Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 24 iюня 2017 г. Сейчасъ на порталѣ посѣтителей - 29.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́рта во 2-й день.
Свята́го священному́ченика Ѳеодо́та, епи́скопа Киринійскаго.

[ВЕЧЕРЪ,]
На Го́споди воззва́хъ: стихи́ры, гла́съ 4. Подо́бенъ: Яко до́бля.

Воло́выми жи́лами біе́мь,* и на дре́вѣ протяза́емь,* и го́рько стру́жемь, досточу́дне,* и въ темни́цѣ заключа́емь,* и гвоздьми́ но́ги твоя́ пригвожде́ны лю́тѣ,* на о́дръ разжже́нъ полага́емь,* непрело́женъ яви́лся еси́,* во всѣ́хъ Укрѣпля́ющаго тя́ сла́вя,* священному́чениче Ѳеодо́те.

Жи́лами твои́хъ по́двиговъ* врага́ придави́въ,* и того́ си́лу побори́лъ еси́* и, му́жествовавъ свѣтлѣ́йше,* въ вы́шнѣмъ Ца́рствіи вѣнцено́сецъ живе́ши,* просвѣще́нія сподо́бився* и красоты́ пра́зднующихъ,* и мо́лишися чту́щія тя́ спасти́,* сла́ва му́чениковъ Ѳеодо́те.

Сла́ва, и ны́нѣ, богоро́диченъ, гла́съ и подо́бенъ то́йже:

Осужде́нія изба́ви, Пресвята́я Богоневѣ́сто,* и лю́тыхъ прегрѣше́ній* смире́нную мою́ ду́шу,* и сме́рти измѣни́ моли́твами Твои́ми,* и да́руй оправда́ніе получи́ти* въ де́нь испыта́нія,* е́же получи́ша святы́хъ собо́ри,* покая́ніемъ очище́на мя́ пре́жде конца́ покажи́* и сле́зными излія́ніи.

Крестобогоро́диченъ, подо́бенъ то́йже:

На Крестѣ́ Тя́ я́ко узрѣ́* пригвожде́на, Го́споди,* Агница и Ма́ти Твоя́ дивля́шеся* и — что́ видѣ́ніе сіе́, — взыва́ше, —* Сы́не вожделѣ́нне,* сія́ Тебѣ́ невѣ́рный собо́ръ воздаде́ беззако́нный,* и́же мно́гихъ Твои́хъ чуде́съ наслади́выйся?* Но сла́ва неизглаго́ланному* соше́ствію Твоему́, Влады́ко.


[НА УТРЕНИ,]
Кано́нъ, его́же краегране́сіе: Бо́жіе да́ніе бы́лъ еси́ лѣ́потно, блаже́нне. Іо́сифъ. Гла́съ 4.

Пѣ́снь 1.

Ирмо́съ: Мо́ря чермну́ю пучи́ну невла́жными стопа́ми дре́вній пѣшеше́ствовавъ Изра́иль, крестообра́зными Моисе́овыма рука́ма Амали́кову си́лу въ пусты́ни побѣди́лъ е́сть.

Бо́гъ твоя́ къ Нему́ движе́нія, му́чениче, напра́ви, Его́же честны́я соблю́дъ за́повѣди, іера́рхъ бы́лъ еси́ и муче́нія кро́вію озари́лся еси́, явле́ннѣйше.

Боже́ственнѣ и благоче́стнѣ пожи́въ, пло́ти движе́нія по́стническими умертви́въ по́двиги и живо́тъ пріе́мъ, іера́рховъ удобре́ніе, му́чениковъ исполне́ніе.

Всели́вся въ прему́дрое се́рдце твое́ Ду́хъ Святы́й, отъ пеле́нъ, преподо́бне, пра́ва, сострада́тельна тя́, и ти́ха, и іера́рха боже́ственна, му́чениче, показа́, Ѳеодо́те.

Богоро́диченъ: Бя́ше порабоще́нно пе́рвѣе пре́лестію, Чи́стая, человѣ́ческое естество́ лука́внѣ, Христа́ же ро́ждши, Ты́ свобо́ду улучи́, велему́дренно Тя́ сла́вящее.

Пѣ́снь 3.

Ирмо́съ: Весели́тся о Тебѣ́ Це́рковь Твоя́, Христе́, зову́щи: Ты́ моя́ крѣ́пость, Го́споди, и прибѣ́жище, и утвержде́ніе.

Сле́зъ твои́хъ стена́ньми, и крове́й пото́ки угаси́лъ еси́ пре́лести лю́тое у́гліе, му́чениче святи́телю Ѳеодо́те.

Житіе́ твое́ чи́стое показа́въ, священнодѣ́теля боже́ственна и и́стинна свидѣ́теля тя́ страсте́й Христо́выхъ содѣ́ла.

Среди́ суди́ща стоя́ и уязвля́емь лю́тыми ра́нами, Христо́ва и́мене, му́чениче, не отве́рглся еси́, Ѳеодо́те.

Богоро́диченъ: Уврачу́й мо́й у́мъ, изнемо́гшій прило́ги, Пречи́стая, лука́ваго змíя и грѣху́ рабо́тающій.

Сѣда́ленъ, гла́съ 4. Подо́бенъ: Вознесы́йся.

Священнонача́льства оде́жду свѣтлѣ́йшу крове́й твои́хъ омоче́ньми содѣ́лалъ еси́, на небеса́ всели́вся, Ѳеодо́те, ви́дя, Его́же возжелѣ́лъ еси́ чи́стою мы́слію. Тѣ́мже твою́ сла́вимъ всесвяще́нную па́мять и взыва́емъ: помяни́ на́съ, со дерзнове́ніемъ къ Бо́гу предстоя́й.

Сла́ва, и ны́нѣ, богоро́диченъ:

Нечи́стыхъ помысло́въ мои́хъ мно́жество и безмѣ́стныхъ мы́слей обурева́нія кто́ изрещи́ мо́жетъ, Всенепоро́чная? Настоя́нія же безпло́тныхъ вра́гъ мои́хъ кто́ исповѣ́сть и си́хъ зло́бу? Но Твое́ю мольбо́ю, Блага́я, си́хъ мнѣ́ всѣ́хъ избавле́ніе да́руй.

Крестобогоро́диченъ:

Иже отъ Безнача́льнаго Отца́ рожде́ннаго напослѣ́докъ Тя́ пло́тію ро́ждшая на Крестѣ́ ви́сяща зря́щи, Христе́, — увы́ Мнѣ́, любе́знѣйшій, Іису́се, — вопія́ше, — ка́ко сла́вимый я́ко Бо́гъ отъ а́нгелъ, отъ беззако́нныхъ ны́нѣ человѣ́къ, Сы́не, хотя́ распина́ешися? Пою́ Тя́, Долготерпѣли́ве.

Пѣ́снь 4.

Ирмо́съ: Вознесе́на Тя́ ви́дѣвши Це́рковь на Крестѣ́, Со́лнце Пра́ведное, ста́ въ чи́нѣ свое́мъ, досто́йно взыва́ющи: сла́ва си́лѣ Твое́й, Го́споди.

Сокруша́емо тѣ́ло твое́ ра́нами, по́мыслъ твердѣ́йшій и вои́стинну, му́чениче, крѣпча́йшь содѣ́ловаше, пою́ща: сла́ва си́лѣ Твое́й, Го́споди.

Распаля́емь любо́вію Влады́чнею, я́же отъ ра́нъ терпѣ́лъ еси́ болѣ́зни лютѣ́йшія, я́коже ино́му стра́ждущу, са́мъ пребыва́лъ еси́ велича́йшій въ му́ченицѣхъ, Ѳеодо́те.

Претерпѣ́лъ еси́ му́ки, богому́дре о́тче, прибли́жившіяся тѣ́лу, воздая́нія бо пребыва́ющая ви́дѣлъ еси́ ума́ чистото́ю, облегча́ющая болѣ́зни твоя́.

Богоро́диченъ: Свѣтлѣ́йшая пала́то Влады́ки, Пресвята́я Богоро́дице, хра́мы на́съ покажи́ Свята́го Ду́ха, въ хра́мѣ Твое́мъ святѣ́мъ хвалу́ Го́сподеви принося́щія.

Пѣ́снь 5.

Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Возвыша́емь, му́дре, на дре́во, Ѳеодо́те, претерпѣва́лъ еси́ твердѣ́йше терза́нія пло́ти твоея́, вельми́ удивля́емь.

Ви́симь, строга́нія терпѣ́лъ еси́ тѣле́сная, Ѳеодо́те, Влады́ку укрѣпля́ющаго имѣ́яй и вѣ́рою тя́ утвержда́юща.

Кро́вными омоче́ньми обагри́въ, Ѳеодо́те блаже́нне, оде́жду твою́ свяще́нную, свѣтлѣ́йшу показа́лъ еси́.

Богоро́диченъ: Зачала́ еси́ Бо́га, бы́вша Человѣ́ка, о Влады́чице! Сего́ ра́ди, ро́ди родо́въ, Тя́ непреста́нно ублажа́емъ.

Пѣ́снь 6.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Всажде́нъ бы́лъ еси́ въ темни́цу, я́ко злодѣ́й, Ѳеодо́те, храни́тель сы́й Боже́ственныхъ Влады́ки, сла́вне, повелѣ́ній, боже́ственное твое́ пра́зднество вельми́ уясни́вшаго.

Стоя́лъ еси́ предъ суди́щемъ непра́ведныхъ, суди́мь, и осужда́я человѣ́ки, беззако́ннующія всу́е и предпочита́ющія непра́вду, святи́телю богому́дре, па́че пра́вды.

Во́лны сверѣ́пыхъ му́къ разруши́лъ еси́, я́коже нѣ́кій ка́мень, всеблаже́нне, возше́дъ восхожде́ніемъ твоего́ се́рдца къ Ка́меню краеуго́льному — Христу́ Бо́гу.

Богоро́диченъ: Всели́вся во чре́во Твое́, Христо́съ Бо́гъ на́шъ, въ человѣ́цѣхъ живу́щій грѣ́хъ, Пречи́стая, изгоня́етъ и сво́йственный Себѣ́ человѣколюбе́зно содѣ́ловаетъ.

Конда́къ, гла́съ 3:

Мо́ря зловѣ́ріе обличи́лъ еси́, и и́дольскаго безбо́жія ле́сть вѣ́рою правовѣ́рія уязви́лъ еси́ и, всесожже́ніе боже́ственное бы́въ, чудодѣ́йствіемъ ороша́еши концы́, о́тче святи́телю Ѳеодо́те, Христа́ Бо́га моли́ дарова́ти на́мъ ве́лію ми́лость.

Пѣ́снь 7.

Ирмо́съ: Въ пещи́ авраа́мстіи о́троцы перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.

Боже́ственною, о́тче, распаля́емь любо́вію Ду́ха, на о́дръ разжже́нъ весьма́ возложе́нъ, не опали́мь пребы́лъ еси́, — благослове́нъ еси́, Бо́же мо́й, — зовы́й, — и Го́споди.

Якоже ино́му са́мъ пребыва́я стра́ждущу, ве́сь бо умо́мъ, блаже́нне, къ Бо́гу прише́дъ, сѣче́нія же и жже́нія ты́ небре́глъ еси́, не чу́вствуя Христо́вымъ манове́ніемъ.

Прему́дростію слове́съ безслове́сія су́щія, блаже́нне, испо́лнены посреди́ суди́ща обличи́лъ еси́, проявле́нно злоче́стіемъ неду́говавшія и па́че сотво́ршаго де́монскія изво́лившія кумíры.

Богоро́диченъ: Съ вы́шнимъ ликостоя́ніемъ, вси́, Ма́ти Бо́жія, — ра́дуйся, — Тебѣ́ зове́мъ, — одушевле́нное не́бо, и пресла́вная пала́то, и престо́ле о́гненный, на не́мже Христо́съ пло́тію почи́.

Пѣ́снь 8.

Ирмо́съ: Ру́цѣ распросте́ръ, Даніи́лъ, льво́въ зія́нія въ ро́вѣ затче́; о́гненную же си́лу угаси́ша, добродѣ́телію препоя́савшеся, благоче́стія рачи́тели, о́троцы, взыва́юще: благослови́те, вся́ дѣла́ Госпо́дня, Го́спода.

По́двиги твои́ми врагу́ противля́яся, му́чениче Ѳеодо́те, гвоздьми́ бо, сла́вне, въ но́ги пронзе́нъ, отводя́щею къ Ца́рству небе́сному стезе́ю ше́ствовалъ еси́, — благослови́те, — поя́, — дѣла́ Госпо́дня, Го́спода.

Проповѣ́дая Бо́га, на зе́млю прише́дша и Боже́ственными страстьми́ стра́сть всепа́губную разру́шшаго, стра́сть боже́ственную и блаже́нную подъя́лъ еси́ пло́тію, вопія́, Ѳеодо́те: благослови́те, вся́ дѣла́ Госпо́дня, Го́спода.

Крове́й ка́плями и свяще́нныхъ уче́ній тече́ніемъ, вѣ́рныхъ напои́лъ еси́ сердца́ благода́тію, всему́дре, и прозяба́ти устро́илъ еси́ Земледѣ́лателю благи́хъ Боже́ственная разумѣ́нія, Ему́же вопіе́мъ: благослови́те, вся́ дѣла́ Госпо́дня, Го́спода.

Богоро́диченъ: Скве́рны очи́стила еси́ вся́кія естество́ человѣ́ческое, Пречи́стая, небе́сный ро́ждши до́ждь, Человѣ́ка бы́вша, и новосодѣ́лала еси́ ны́, обветша́вшія, Чи́стая, вопію́щія: вся́ дѣла́, благослови́те Госпо́дня Го́спода.

Пѣ́снь 9.

Ирмо́съ: Ка́мень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.

Исцѣле́нія источа́етъ вся́ческая моще́й боже́ственная ра́ка свяще́ннѣйшаго па́стыря, и стра́сти уставля́етъ, и рѣши́тъ лѣ́тныя я́ко вои́стинну болѣ́зни Спа́са Боже́ственною благода́тію.

Яко священному́ченикъ, вяза́ти же и рѣши́ти имѣ́я вла́сть, разрѣши́ зо́лъ мои́хъ у́зы и ду́шу мою́, жего́му огне́мъ грѣха́, ороси́, моля́ Всеще́драго.

Дне́сь вѣ́рно пра́зднуетъ Це́рковь, богоно́се, всесвяще́нную твою́ па́мять и отше́ствіе къ Человѣколю́бцу и, ра́дуяся, плете́тъ тебѣ́ пѣ́сней боже́ственныя діади́мы.

Якоже днесвѣ́тлую звѣзду́, тя́ стяжа́вше, богоглаго́ливе, твои́ми свѣтолу́чными заря́ми боже́ственныхъ болѣ́зней и чуде́съ твои́хъ чи́стыми свѣтлостьми́ озаря́емся, Ѳеодо́те.

Богоро́диченъ: Свѣ́тъ на́мъ ро́ждши, Дѣ́во, отъ Отца́ пре́жде денни́цы возсія́вшій неизрече́нно, неразу́мія тму́ разруши́ла еси́ и въ сѣ́ни спя́щія грѣхо́внѣй просвѣти́ла еси́.

Источникъ: Минíа, мѣ́сяцъ Ма́ртъ. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 4 об. – 7 об.

/ Къ оглавленію раздѣла /


Наверхъ / Къ титульной страницѣ

0