Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 17 октября 2017 г. Сейчасъ на порталѣ посѣтителей - 10.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́рта во 2-й де́нь.
Преставле́ніе и́же во святы́хъ отца́ на́шего Арсе́нія, епи́скопа Тферска́го.

[ВЕЧЕРЪ,
На Го́споди воззва́хъ:] стихи́ры [на 8], гла́съ 6. Подо́бенъ: Все́ отло́жше.

Ве́сь отъ ю́ности облиста́лъ еси́* житія́ добродѣ́телей луче́ю,* всеблаже́нне святи́телю,* и лю́ди твоя́ просвѣти́лъ еси́,* и хра́мъ Пречи́стыя воздви́глъ еси́ пречу́денъ.* И ны́нѣ всели́лся еси́, идѣ́же Свѣ́тъ невече́рній,* идѣ́же ликостоя́нія а́нгелъ,* съ ни́миже предстоя́, преподо́бне,* помина́й на́съ, святи́телю Арсе́ніе,* твою́ па́мять соверша́ющихъ,* со дерзнове́ніемъ моля́ся* о душа́хъ на́шихъ. [Два́жды.]

Святи́тель богопрія́тенъ* и па́стырь и́стиненъ,* сто́лпъ непревра́тенъ,* основа́ніе вѣ́ры недви́жимо,* благоче́стія степе́нь непоколеби́мый,* забра́ло Це́ркве неруши́мое,* святи́телей добро́та* и чуде́съ исто́чникъ,* Арсе́ніе, бы́лъ еси́.* Тѣ́мъ тя́ ублажа́емъ благочести́вно* пѣ́ньми и пѣ́сньми духо́вными* и всесвяще́нную соверша́емъ па́мять твою́. [Два́жды.]

Со́лнца свѣтлѣ́йши* просія́ на́мъ па́мять твоя́,* святи́телю Арсе́ніе,* вседо́блій о́тче свяще́нне,* сего́ ра́ди тя́ ублажа́емъ, богому́дре,* и моле́бно воспѣва́емъ,* я́ко пока́зался еси́ земли́ на́шей чудотво́рецъ,* и моле́бникъ, и предста́тель теплѣ́йшій.* Тѣ́мъ моли́ся Христу́ Бо́гу* изба́витися ста́ду твоему́ отъ навѣ́та вра́жія,* е́же стяжа́лъ еси́, му́дре,* моли́твами твои́ми. [Два́жды.]

Сла́ва, гла́съ 6. Самогла́сенъ:

Пріиди́те, вси́ Россíйскія митропо́ліи, вся́ко оте́чество, гра́дове и страны́, ца́ріе и архіере́е, кня́зи и вси́ лю́діе, и вся́къ язы́къ, стеце́мся къ честнѣ́й па́мяти святи́теля пресла́вно на́шея земли́, дне́сь въ пѣ́снехъ и пѣ́ніихъ восхва́лимъ вели́каго па́стыря и учи́теля, Арсе́нія богому́драго. Се́й бо измла́да жела́ніе боже́ственно пріи́мъ въ се́рдцы свое́мъ и возлюби́въ Христа́ и Пречи́стую Его́ Ма́терь, Ейже и оби́тель сотвори́, и хра́мъ че́стенъ созда́, и вельми́ украси́, и мно́жества мона́ховъ собра́. Тѣ́мже твое́ пра́зднуемъ успе́ніе, вси́ вѣ́рніи, о́крестъ стоя́ще твоея́ ра́ки, моле́бно къ тебѣ́ ру́цѣ простира́емъ, святи́телю Арсе́ніе: моли́ся Христу́ Бо́гу о ча́дѣхъ твои́хъ и о всѣ́хъ, любо́вію пра́зднующихъ честну́ю па́мять твою́.

И ны́нѣ, богоро́диченъ:

Кто́ Тебѣ́ не ублажи́тъ, [Пресвята́я Дѣ́во? Кто́ ли не воспое́тъ Твоего́ Пречи́стаго Рождества́? Безлѣ́тно бо отъ Отца́ возсія́вый Сы́нъ Единоро́дный, То́йже отъ Тебе́, Чи́стыя, про́йде, неизрече́нно вопло́щся: естество́мъ Бо́гъ Сы́й и естество́мъ бы́въ Человѣ́къ на́съ ра́ди; не во двою́ лицу́ раздѣля́емый, но во двою́ естеству́ несли́тно познава́емый. Того́ моли́, Чи́стая Всеблаже́нная, поми́ловатися душа́мъ на́шимъ].

Вхо́дъ. Проки́менъ дне́. И чте́нія.

При́тчей чте́ніе. [Глава́ 3.]

Па́мять пра́веднаго съ похвала́ми, и благослове́ніе Госпо́дне на главѣ́ его́. Блаже́нъ человѣ́къ, и́же обрѣ́те прему́дрость, и сме́ртенъ, и́же увѣ́дѣ ра́зумъ. Лу́чше бо сію́ купова́ти, не́жели зла́та и сребра́ сокро́вища. Честнѣ́йшая же е́сть ка́меній многоцѣ́нныхъ, все́ же честно́е недосто́йно ея́ е́сть. Долгота́ бо дне́й и лѣ́та живота́ въ десни́цѣ ея́, въ шу́йцѣ же ея́ бога́тство и сла́ва. Отъ у́стъ ея́ исхо́дитъ пра́вда, зако́нъ же и ми́лость на язы́цѣ но́ситъ. Послу́шайте у́бо мене́, о ча́да, честна́я бо реку́, и блаже́нъ человѣ́къ, и́же пути́ моя́ сохрани́тъ: исхо́ди бо мои́ — исхо́ди живота́, и уготовля́ется хотѣ́ніе отъ Го́спода. Сего́ ра́ди молю́ ва́съ и предлага́ю мо́й гла́съ сыново́мъ человѣ́ческимъ. Я́ко а́зъ, прему́дрость, устро́ихъ совѣ́тъ, и ра́зумъ и смы́слъ азъ призва́хъ. Мо́й совѣ́тъ и утвержде́ніе, мо́й ра́зумъ, моя́ же крѣ́пость. Азъ мене́ лю́бящія люблю́, и́щущіи же мене́ обря́щутъ благода́ть. Разумѣ́йте у́бо, незло́бивіи, кова́рство, ненака́заніи же, прилага́йте сердца́. Послу́шайте мене́ и па́ки, честна́я бо реку́, и отве́рзу отъ усте́нъ пра́вая, я́ко и́стинѣ поучи́тся горта́нь мой, ме́рзки же пре́до мно́ю устны́ лжи́выя. Съ пра́вдою вси́ глаго́лы у́стъ мои́хъ, ничто́же въ ни́хъ стро́потно, ниже́ развраще́нно. Вся́ пра́ва су́ть разумѣва́ющимъ и про́ста обрѣта́ющимъ ра́зумъ. Науча́ю бо ва́съ и́стинѣ, да бу́детъ о Го́сподѣ наде́жда ва́ша, и испо́лнитеся Ду́ха.

При́тчей чте́ніе. [Главы́ 10 и 11.]

Уста́ пра́веднаго ка́плютъ прему́дрость, язы́къ же непра́веднаго поги́бнетъ. Устнѣ́ муже́й пра́ведныхъ ка́плютъ благода́ти, уста́ же нечести́выхъ развраща́ются. Мѣ́рила льсти́вая ме́рзость предъ Го́сподемъ, вѣ́съ же пра́ведный прія́тенъ Ему́. Идѣ́же а́ще вни́детъ досажде́ніе, та́мо и безче́стіе, уста́ же смире́нныхъ поуча́ются прему́дрости. Соверше́ніе пра́выхъ наста́витъ и́хъ, и поползнове́ніе отрица́ющихся упасе́тъ и́хъ. Не по́льзуютъ имѣ́нія въ де́нь я́рости, пра́вда же изба́витъ отъ сме́рти. Умеръ пра́ведный, оста́ви раска́яніе, нару́чна же быва́етъ и посмѣя́тельна нечести́выхъ па́губа. Пра́вда непоро́чнаго исправля́етъ пути́, въ нече́стіе же па́даетъ непра́вда. Пра́вда муже́й пра́выхъ изба́витъ и́хъ, безсовѣ́стіемъ же плѣня́ются беззако́нніи. Сконча́вшуся му́жу пра́ведну, не поги́бнетъ наде́жда, похвала́ же нечести́выхъ поги́бнетъ. Пра́ведникъ отъ ло́ва убѣ́гнетъ, въ него́же мѣ́сто предае́тся нечести́вый. Во устѣ́хъ нечести́выхъ сѣ́ть гра́жданомъ, чу́вство же пра́ведныхъ благопоспѣ́шное. Во благи́хъ пра́ведныхъ испра́вится гра́дъ, и въ поги́бели нечести́выхъ ра́дованіе. Во благослове́ніи пра́выхъ возвы́сится гра́дъ, усты́ же нечести́выхъ раскопа́ется. Руга́ется гра́жданомъ лише́нный ра́зума, му́жъ же му́дрый безмо́лвіе во́дитъ.

Прему́дрости Соломо́ни чте́ніе. [Глава́ 4.]

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ры, гла́съ 2. Самогла́сны:

Умъ преподо́бенъ, я́ко при́сно къ Бо́гу внима́ющъ, свобо́денъ же и самоизво́ленъ, я́ко страстьми́ непорабоще́нъ, ду́шу чи́сту имѣ́я, се́рдце ми́лостивно и слеза́ми умиле́нно, тѣ́ло же моли́твами къ Бо́гу служе́бно, притяжа́лъ еси́, Арсе́ніе святи́телю, сло́во му́дростно и смире́нно. Ве́сь отъ ю́ности благонра́віемъ Христу́ усво́ися, отъ Него́же святи́тельства досто́инство прія́лъ еси́, и лю́ди твоя́ упа́слъ еси́, и Правосла́віемъ обогати́лъ еси́. Ны́нѣ я́ко предстоя́ Христу́ Бо́гу, отъ вся́кихъ на́съ бѣ́дъ изба́ви и спаси́ ду́ши на́ша.

Гла́съ 4:

Ева́нгельскихъ исто́чникъ словесы́ твои́ми, святи́телю, люде́й твои́хъ сердца́ напои́лъ еси́, и сѣ́мя благоче́стія въ ни́хъ моли́твами твои́ми возрасти́лъ еси́, и си́хъ прине́слъ еси́ Христу́ пло́дъ изря́денъ. И ны́нѣ я́ко предстоя́ у Него́ съ ли́ки апо́столъ и святи́тель, помина́й на́съ къ Нему́ моли́твами твои́ми и сохрани́ на́съ отъ вся́каго озлобле́нія, соверша́ющихъ вѣ́рою па́мять твою́.

Апо́стольскаго престо́ла сподо́бился еси́, святи́тельство пріи́мъ, святи́телю Арсе́ніе, ты́ бо украси́лъ еси́ це́рковь Ма́тере Госпо́дни и уго́дниковъ Ея́, Анто́нія и Ѳеодо́сія. Въ ню́же мы́ ны́нѣ, ча́да твоя́, притека́юще и ли́ки составля́юще, тебе́ восхваля́емъ, я́ко отца́ чадолюби́ва, и моле́бнѣ къ тебѣ́ ру́цѣ простира́емъ: моли́ся о на́съ Христу́ Бо́гу и Пречи́стѣй Его́ Ма́тери, о и́же вѣ́рою и любо́вію тебе́ почита́ющихъ.

Сла́ва, гла́съ 8:

Вся́къ язы́къ да почуди́тся ны́нѣ о пресла́вныхъ вели́чіихъ Бо́га на́шего, и вся́ка уста́ да подви́жутся на похвале́ніе и да воспою́тъ Христа́ Бо́га, я́ко въ послѣ́дняя времена́ и ро́ды такова́ на́мъ произведе́ свѣти́льника вели́каго, святи́теля присноблаже́ннаго Арсе́нія. Тѣ́мже вопіе́мъ ему́: ра́дуйся, упасы́й Це́рковь Христо́ву и лю́ди твоя́, сего́ ра́ди ны́нѣ на небесѣ́хъ въ весе́ліи водворя́ешися; ра́дуйся и ты́, богохрани́мый гра́де Тфе́рь, я́ко такова́ имѣ́я въ себѣ́ пожи́вша святи́теля; весели́теся и вы́, лю́діе сего́ гра́да, я́ко такова́ святи́теля и учи́теля сподо́бистеся прія́ти; ра́дуйся и весели́ся, Бо́жія Ма́тере це́рковь, я́ко люби́мый тобо́ю въ тебѣ́ почи́лъ е́сть богому́дрый Арсе́ній. Но, о богоблаже́нный о́тче! не преста́й моля́ся о и́же вѣ́рою чту́щихъ всечестно́е твое́ преставле́ніе.

И ны́нѣ, богоро́диченъ:

Влады́чице, пріими́ моли́тву ра́бъ Твои́хъ [и изба́ви на́съ отъ вся́кія ну́жды и печа́ли].

На стихо́внѣ стихи́ры, гла́съ 8. Подо́бенъ: О, пресла́внаго чудесе́!

Отче святи́телю Арсе́ніе,* окрили́въ у́мъ къ Бо́гу вѣ́рою,* мірска́го смѣше́нія* возгнуша́лся еси́ неуста́внаго,* и, кре́стъ тво́й взе́мъ,* Всеви́дцу послѣ́довалъ еси́,* и люби́тель мона́ховъ бы́лъ еси́ изря́денъ.* Сего́ ра́ди святи́тельскаго престо́ла прія́ти сподо́бился еси́,* тѣ́мъ не преста́й моля́ся о душа́хъ на́шихъ.

Сти́хъ: Честна́ предъ Го́сподемъ* сме́рть преподо́бныхъ Его́.

Отче святи́телю Арсе́ніе,* ты́ отъ утро́бы къ Бо́гу* прибли́жилъ еси́ тво́й у́мъ* и весьма́ прилѣжа́лъ еси́ Царю́ Вседержи́телю,* плоды́ досто́йны принося́ Ему́* отъ твои́хъ по́двигъ, святи́телю,* соукраша́емь добродѣ́тельными вѣнцы́.* Тѣ́мъ благи́хъ обрѣ́лъ еси́* воспрія́тіе, досточу́дне.

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

Отче святи́телю Арсе́ніе,* ты́ мона́хомъ наказа́тель* и Россíйстѣй земли́ звѣзда́ пресвѣ́тлая,* осіява́я чудесы́ всю́ сію́ страну́,* тя́ бо избра́ Бо́гъ отъ ю́ности, о́тче,* па́стыря овца́мъ слове́снымъ и учи́теля.* Тѣ́мъ моли́ся о на́съ* съ ли́ки святи́телей* и проси́ ста́ду твоему́ грѣхо́въ оставле́нія.

Сла́ва, гла́съ 6:

Яко всечестны́й коне́цъ успе́нія твоего́ и е́же отше́ствіе твое́ ко Го́споду увѣ́дѣвше благочести́віи кня́зи, и священномона́си, и вси́ лю́діе, взе́мше честно́е тѣ́ло твое́, принесо́ша тобо́ю въ богозда́нную це́рковь Пречи́стыя Бо́жія Ма́тере. Сія́ ви́дѣвше, мона́си твоея́ оби́тели, люби́мая тобо́ю ча́да, прите́кше и узрѣ́вше тебе́ ме́ртва на одрѣ́, пла́чущеся го́рько и, о́дръ слеза́ми облива́юще, велегла́сно тебѣ́ вопія́ху: увы́ на́мъ, па́стырю на́шъ до́брый! къ кому́ уже́ прибѣ́гнемъ? кто́ на́съ посѣти́тъ? кто́ на́шу нищету́ удовли́тъ? кто́ бо тако́въ бы́сть, я́коже ты́, любе́зенъ мона́хомъ? кому́ на́съ оставля́еши, люби́мый на́шъ о́тче Арсе́ніе? Аще и тѣ́ломъ отше́лъ еси́ отъ на́съ, но ду́хомъ пребыва́й съ на́ми, посѣща́я на́съ, и моли́ся за ны́ ко Го́споду и Пречи́стѣй Его́ Ма́тери, вѣ́рою и любо́вію па́мять твою́ почита́ющія.

И ны́нѣ, богоро́диченъ:

Богоро́дице, Ты́ еси́ лоза́ и́стинная, [возрасти́вшая на́мъ Пло́дъ живота́, Тебѣ́ мо́лимся: моли́ся, Влады́чице, со святы́ми апо́столы поми́ловати ду́ши на́ша].

Тропа́рь, гла́съ 8:

Благоче́стно пожи́въ во святи́тельствѣ, лю́ди просвѣти́лъ еси́ уче́ніемъ твои́мъ, и о хра́мѣ Пречи́стыя вельми́ подвиза́вся, и люби́тель мона́ховъ бы́въ, сего́ ра́ди отъ Христа́ па́ствы твоея́ вѣне́цъ прія́лъ еси́. Тѣ́мже, я́ко апо́стольскаго престо́ла намѣ́стника и святи́теля вели́каго чту́ще тя́, мо́лимъ, ча́да твоя́, блаже́нне: отъ всѣ́хъ бѣ́дъ изба́ви на́съ я́же ко Христу́ моли́твами твои́ми, святи́телю Христо́въ Арсе́ніе, о́тче на́шъ.

Сла́ва, и ны́нѣ, богоро́диченъ:

Иже на́съ ра́ди рожде́йся отъ Дѣ́вы, [и распя́тіе претерпѣ́въ, Благíй, испрове́ргій сме́ртію сме́рть и Воскресе́ніе явле́й я́ко Бо́гъ, не пре́зри, я́же созда́лъ еси́ руко́ю Твое́ю, яви́ человѣколю́біе Твое́, Ми́лостиве. Пріими́ ро́ждшую Тя́, Богоро́дицу, моля́щуюся за ны́, и спаси́, Спа́се на́шъ, лю́ди отча́янныя].


НА УТРЕНИ,
На Бо́гъ Госпо́дь: Тропа́рь свята́го, два́жды. Сла́ва, и ны́нѣ, богоро́диченъ.

По 1-й стихоло́гіи сѣда́ленъ, гла́съ 8:

Ле́сть мíра, и бога́тства свѣ́тлость, и высо́кую любо́вь роди́телей преоби́дѣвъ, смире́ніемъ же къ нищетѣ́ уча́щему Влады́цѣ Христу́ послѣ́довалъ еси́, отъ Него́же поще́ніемъ и моли́твами и́стинное бога́тство, и су́щую свѣ́тлость, и Ца́рство недви́жимо, святи́телю Арсе́ніе, наслѣ́довалъ еси́. Къ Нему́же ны́нѣ моли́ся грѣхо́въ оставле́ніе пода́ти чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Да Сво́й па́ки сози́ждеши о́бразъ, Спа́се, истлѣ́вшій страстьми́, небе́сныхъ утаи́вся суще́ствъ, воплоти́лся еси́ отъ Дѣ́вы, Ейже со стра́хомъ вопіе́мъ: ра́дуйся, Обра́дованная, Госпо́дь съ Тобо́ю.

По 2-й стихоло́гіи сѣда́ленъ, гла́съ 3:

Добродѣ́телей дѣ́ланіемъ це́ркви возсія́лъ еси́ вели́кое со́лнце и уче́ніемъ слове́съ твои́хъ просвѣти́ лю́ди твоя́. Тѣ́мже и по успе́ніи несконча́ему благода́ть прія́лъ еси́, святи́телю Арсе́ніе, моли́ Христа́ Бо́га дарова́ти на́мъ ве́лію ми́лость. [Два́жды.]

Сла́ва, и ны́нѣ, богоро́диченъ:

Яко невоздѣ́ланная, Дѣ́во, лоза́, краснѣ́йшій Гро́здъ прозябла́ еси́, источа́ющъ на́мъ вино́ спасе́нія, всѣ́хъ веселя́щее ду́ши же и тѣлеса́. Тѣ́мже, я́ко вину́ Тя́ до́брыхъ блажа́ще при́сно, со а́нгеломъ вопіе́мъ Ти́: ра́дуйся, Благода́тная!

[Велича́ніе:

Велича́емъ тя́, святи́телю о́тче Арсе́ніе, и чте́мъ святу́ю па́мять твою́, ты́ бо мо́лиши за на́съ Христа́ Бо́га на́шего.

Псало́мъ избра́нный: Услы́шите сія́ вси́ язы́цы, внуши́те вси́ живу́щіи по вселе́ннѣй...]

По поліеле́и сѣда́ленъ, гла́съ 8:

Ми́лостивому Христо́ву уго́днику, незло́бивому и кро́ткому, вси́ тебѣ́ прилѣ́жно мо́лимся и любо́вію зове́мъ: ра́дуйся, святи́телю Арсе́ніе, украси́вый хра́мъ Бо́жія Ма́тере и уго́дниковъ Ея́ Анто́нія и Ѳеодо́сія. Съ ни́миже моли́ Христа́ Бо́га грѣхо́въ оставле́ніе дарова́ти чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Егда́ пріи́детъ суди́ти все́й земли́ всѣ́хъ Влады́ка и Творе́цъ, овца́мъ мя́ причти́ десны́мъ, осужде́ннаго, и кромѣ́шнія тмы́ и вся́каго муче́нія, Твоего́ непотре́бнаго раба́ исхити́, молю́ся, да благода́рно велича́ю бога́тство Твоея́ бла́гости, Богоро́дице Всенепоро́чная, и вопію́ Ти, ра́дуяся: моли́ся Христу́ Бо́гу прегрѣше́ній оставле́ніе да́ти мнѣ́, Тебе́ бо и́мамъ наде́жду, ра́бъ Тво́й.

Степе́нна, 1-й антифо́нъ 4-го гла́са. Проки́менъ, гла́съ 4: Свяще́нницы Твои́ облеку́тся въ пра́вду,* и преподо́бніи Твои́ возра́дуются. Сти́хъ: Помяни́, Го́споди, Дави́да и всю́ кро́тость его́. Вся́кое дыха́ніе... Ева́нгеліе отъ Іоа́нна, зача́ло 36.

По 50-мъ псалмѣ́ стихи́ра, гла́съ 6:

Ду́ха Свята́го благода́ть въ твои́хъ устна́хъ излія́ся, о́тче, и бы́лъ еси́ па́стырь Христо́вы Це́ркве, уча́ слове́сныя о́вцы вѣ́ровати въ Тро́ицу Единосу́щную, во Еди́но Божество́.

Кано́нъ святи́теля Арсе́нія, его́же краегране́сіе: Свята́го Христо́ва святи́теля Арсе́нія похвали́ти ра́зумъ, Бо́же мо́й, да́руй ми́. Гла́съ 2.

Пѣ́снь 1.

Ирмо́съ: Гряди́те, лю́діе, пои́мъ пѣ́снь Христу́ Бо́гу, раздѣ́льшему мо́ре и наста́вльшему лю́ди, я́же изведе́ изъ рабо́ты еги́петскія, я́ко просла́вися.

Свѣ́те отъ Свѣ́та, Христе́ Бо́же, отъ Отца́ пре́жде вѣ́къ рожде́йся и искони́ Сы́й со Отце́мъ и Ду́хомъ, мра́къ души́ моея́ отгна́въ, озари́ у́мъ мо́й, молю́ся, я́ко да возмогу́ пѣ́ти Твоего́ уго́дника, Арсе́нія свяще́ннаго.

Аще и человѣ́къ еси́ естество́мъ, о́тче, но а́нгельски на земли́ пожи́лъ еси́, десна́го пути́ отъ ю́ности е́мься, цѣлому́дрія рачи́тель бы́въ, Ду́ха Свята́го честно́е оби́телище, Арсе́ніе свяще́нне, яви́лся еси́.

Му́дрости глави́зну, стра́хъ Бо́жій возлюби́въ и за́повѣдемъ Его́ при́сно поуча́яся, дре́во насади́ся при исхо́дищахъ во́дъ духо́вныхъ, отъ ни́хже, о́тче, напоя́емь, пло́дъ Христу́, Арсе́ніе, прине́слся еси́.

Богоро́диченъ: Услы́ша Ева прама́ти, Чи́стая: въ печа́лѣхъ роди́ши ча́да. Ты́ же, Дѣ́во, услы́шала еси́: Госпо́дь съ Тобо́ю, ра́дуйся! И ра́дованнымъ гла́сомъ, Богоневѣ́сто, печа́ль прама́тере потре́бльши.

Пѣ́снь 3.

Ирмо́съ: На ка́мени мя́ вѣ́ры утверди́въ, разшири́лъ еси́ уста́ моя́ на враги́ моя́, возвесели́бося ду́хъ мо́й, внегда́ пѣ́ти: нѣ́сть свя́тъ, я́коже Бо́гъ на́шъ, и нѣ́сть пра́веденъ, па́че Тебе́, Го́споди.

Презрѣ́въ ни́жняя, я́ко попира́ема, и любо́вь роди́телей преоби́дѣвъ, Христа́ взыска́лъ еси́, Его́же любо́вію ду́шу твою́ уязви́лъ еси́, Того́ любя́ и Того́ ища́ красоты́.

Свѣти́льникъ сы́й, твою́ ду́шу украша́я слеза́ми, ра́но ко Христу́ у́тренюя, ру́ку же просте́ртіемъ въ моли́твахъ, Амали́ка — тѣ́ло умертви́лъ еси́ и на го́ру безстра́стія возше́лъ еси́.

Благоро́діемъ высо́къ и благоду́шіемъ изя́щенъ, ра́зума му́дростію удивле́нъ бы́лъ еси́, цвѣ́тъ я́ко прекра́сный, чистото́ю сія́я, и свѣ́тлымъ смире́ніемъ, Арсе́ніе о́тче, украси́лся еси́.

Богоро́диченъ: Ма́ти Бо́жія, Пречи́стая, Благослове́нная и Пренепоро́чная, души́ моея́ стру́пы исцѣли́ и стра́сти плотскíя умертви́, умири́ у́мъ мо́й, отъ вся́каго вре́да и вра́жія напа́сти изми́ мя́, Влады́чице.

Сѣда́ленъ, гла́съ 4:

Вели́кій Христо́въ святи́тель да воспое́тся, сто́лпъ свѣ́тлый, просвѣща́яй на́съ чуде́съ свѣтлостьми́, богоно́сный о́тче на́шъ Арсе́ніе, па́стырю и учи́телю земли́ на́шея, Христа́ моли́ о ста́дѣ твое́мъ и о всѣ́хъ, вѣ́рою и любо́вію чту́щихъ святу́ю па́мять твою́. [Два́жды.]

Сла́ва, и ны́нѣ, богоро́диченъ:

Пое́мъ Тя́, Богоневѣ́сто, Ма́ти Христа́ Бо́га, сла́вяще рождество́ Твое́ непостижи́мое, и́мже изба́вихомся отъ ле́сти діа́воли и вся́кія бѣды́, Богоро́дице Влады́чице, и вѣ́рно вопіе́мъ: поми́луй ста́до Твое́, еди́на Всепѣ́тая.

Пѣ́снь 4.

Ирмо́съ: Пою́ Тя, слу́хомъ бо, Го́споди, услы́шахъ и ужасо́хся: до мене́ бо и́деши, мене́ ища́, заблу́ждшаго. Тѣ́мъ мно́гое Твое́ снизхожде́ніе, е́же на мя́, прославля́ю, Многоми́лостиве.

Вельми́ украси́лъ еси́ престо́лъ тво́й, святи́телю Арсе́ніе, велики́ми бо чудесы́ преспѣ́лъ еси́ и житіе́мъ свѣ́тлымъ, сего́ ра́ди превели́кій Бо́гъ на́шъ вельми́ тя́ просла́ви.

Ми́лости Пода́теля Го́спода вѣ́дый, блаже́нне, те́плѣ Его́ умоли́лъ еси́ на исцѣле́ніе и спасе́ніе мно́гимъ, съ вѣ́рою къ тебѣ́ притека́ющимъ и въ по́мощь тя́ призыва́ющимъ.

Врача́ изря́дна разли́чно неду́гующимъ и наставле́ніе всѣ́мъ, прельще́нымъ злы́мъ совѣ́томъ, Христо́съ тя́ дарова́, чудотво́рца земли́ на́шей, святи́теля Арсе́нія, тѣ́мже тя́ ублажа́емъ.

Богоро́диченъ: Исцѣли́ла еси́ сокруше́ніе, Всенепоро́чная, дре́вняго окая́нства землены́хъ, поро́ждшая Го́спода и Царя́ Христа́, поне́сшаго неду́ги на́ша за благосе́рдіе неизглаго́ланное, Дѣ́во Ма́ти.

Пѣ́снь 5.

Ирмо́съ: Просвѣще́ніе во тмѣ́ лежа́щихъ, спасе́ніе отча́янныхъ, Христе́ Спа́се мо́й, къ Тебѣ́ у́тренюю, Царю́ ми́ра, просвѣти́ мя сія́ніемъ Твои́мъ, ино́го бо ра́звѣ Тебе́ Бо́га не зна́ю.

Сла́вный па́стырь, неистощи́мый исто́чникъ исцѣле́нія, церко́вный сто́лпъ, вѣ́рныхъ утвержде́ніе, вели́кій свѣти́льникъ многосвѣ́тлый, святи́телю Арсе́ніе.

Яко свѣтоза́рно житіе́, я́ко зѣло́ чу́дно, я́ко красни́ тру́дове твои́, я́ко вели́ка благода́ть свы́ше дана́ ти, му́дре, сего́ ра́ди вѣ́рою почита́емъ тя́, святи́телю Арсе́ніе.

Пресвѣ́тлая твоя́ па́мять простира́ется въ мíрѣ и просвѣща́етъ человѣ́ческія ду́ши свѣ́томъ благода́ти; ю́же соверша́ющихъ любо́вію, отъ бѣ́дъ на́съ изба́ви, мо́лимся, святи́телю Арсе́ніе.

Богоро́диченъ: Се́ о́дръ Соломо́новъ, его́же обстоя́тъ си́льніи, Богодухнове́нныхъ писа́ній ны́нѣ прорица́нія, на не́мже Христо́съ Бо́гъ воплоще́ніемъ почи́лъ е́сть, Благослове́нная и Обра́дованная.

Пѣ́снь 6.

Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же, мя́ возведи́.

Свѣти́льника тя́ су́щіи во тмѣ́ пре́лести, неле́стно наставля́юща, обрѣ́тше, къ путе́мъ живота́, богоблаже́нне Арсе́ніе. И ны́нѣ по сме́рти вра́чь яви́лся еси́ боля́щимъ Ду́ха Боже́ственною благода́тію.

Зако́номъ повину́яся Влады́чнимъ, заблу́ждшія взыска́лъ еси́ и во огра́ду покая́нія приве́лъ еси́, я́ко па́стырь и́стиненъ показа́вся ста́ду твоему́, о́тче святи́телю Арсе́ніе.

Свяще́нія хра́мъ, о́тче, Боже́ственнаго Ду́ха вѣ́рою бы́въ, созда́лъ еси́ хра́мъ Пречи́стыя Ма́тере Бо́жія и Ея́ уго́дниковъ, Анто́нія и Ѳеодо́сія, и оби́тель пречу́дну сотвори́лъ и украси́лъ еси́, въ не́йже тѣ́ло твое́ положено́ бы́сть.

Богоро́диченъ: Зако́ни о Тебѣ́ пресла́вно, Дѣ́во, обновля́ются: ражда́еши бо безъ сѣ́мене Бо́га Спа́са и пребыва́еши, дѣ́вствующи па́ки, — стра́нно чу́до! — тѣ́мъ Тя́, Ма́терь Емману́илеву, благоче́стно исповѣ́дуемъ.

Конда́къ, гла́съ 8:

Воспріе́мши ра́достно честны́я твоя́ мо́щи пречи́стая це́рковь, въ ню́же че́стно вноси́мы мно́жествомъ священномона́ховъ и кня́зи благовѣ́рными, и я́же пріе́мши, я́ко сокро́вище многоцѣ́нное. Тѣ́мже и мы́ ны́нѣ, твоея́ огра́ды слове́сныя о́вцы, о́крестъ ра́ки твоея́ предстоя́ще, любе́зно вопіе́мъ ти́: не забу́ди ча́дъ твои́хъ, о́тче, и́хже му́дрѣ собра́лъ и возлюби́лъ еси́, я́ко да зове́мъ ти́: ра́дуйся, святи́телю Арсе́ніе, па́стырю и учи́телю на́шъ.

Икосъ:

Отъ скве́рныхъ усте́нъ, отъ нечи́ста се́рдца, ка́ко ти́ принесу́ хвале́нія, окая́нный? Ужаса́юся и трепе́щу, но, надѣ́яся на тво́й благосе́рдный нра́въ, о́тче, хвалу́ ти прино́симъ, глаго́люще: ра́дуйся, па́стырю на́шъ до́брый, святи́телю Арсе́ніе, упасы́й ста́до Христо́во; ра́дуйся, ди́вный чудотво́рче, притека́ющимъ къ тебѣ́ съ вѣ́рою неоску́дно исцѣле́ніе подава́я; ра́дуйся, це́рквамъ воздви́женіе и и́ноковъ люби́телю, си́рымъ и ни́щимъ пода́телю; ра́дуйся и ты́, богохрани́мый гра́де Тфе́рь, я́ко такова́ имѣ́ въ себѣ́ пожи́вша святи́теля; ра́дуйся и весели́ся, Бо́жія Ма́тере це́рковь, я́ко люби́мый Тобо́ю въ тебѣ́ почи́лъ е́сть богому́дрый Арсе́ній. Но, о богоблаже́нне о́тче! Аще и тѣ́ломъ преше́лъ еси́ отъ на́съ, но ду́хомъ пребыва́я съ на́ми, и моли́ся за ны́ Христу́ и Пречи́стѣй Его́ Ма́тери съ Ея́ уго́дники, Анто́ніемъ и Ѳеодо́сіемъ, и спаса́й пою́щихъ тя́, да зове́мъ ти́: ра́дуйся, святи́телю Арсе́ніе, па́стырю и учи́телю на́шъ.

Пѣ́снь 7.

Ирмо́съ: Богопроти́вное велѣ́ніе беззако́ннующаго мучи́теля высо́къ пла́мень вознесло́ е́сть: Христо́съ же простре́ Богочести́вымъ отроко́мъ ро́су духо́вную, Сы́й Благослове́нъ и Препросла́вленъ.

Вы́шній Царю́ и Вседержи́телю, моли́твами Твоего́ уго́дника жи́знь умири́ всѣ́мъ, Сло́ве, христіа́номъ, посо́бствуя на ва́рвары благовѣ́рному Импера́тору на́шему, да Тебѣ́, Христе́, зове́мъ: благослове́нъ Бо́гъ оте́цъ на́шихъ.

Престо́лу предстоя́ Бо́жію, святи́телю Христо́въ Арсе́ніе, моли́ти прилѣ́жно не преста́й о на́съ, твои́хъ рабѣ́хъ, да огня́ вѣ́чнаго изба́вимся и вся́каго озлобле́нія, отъ вра́гъ находя́щаго, твои́ми моли́твами.

Исцѣле́нія подава́еши всю́ду вѣ́рою къ тебѣ́ притека́ющимъ, святи́телю Арсе́ніе. Тѣ́мже мо́лимъ тя́, твои́ раби́: печа́ль на́шу въ ра́дость преложи́ и отъ вся́кія изба́ви ско́рби твои́ми моли́твами.

Богоро́диченъ: Стра́сти моего́ се́рдца исцѣли́ ми́лостію Твое́ю, Всепѣ́тая, у́мъ мо́й умири́, и ду́шу мою́ просвѣти́, и ходи́ти мя́ напра́ви на стезю́ спаси́тельную, я́ко да пою́ Тя́, Препѣ́тая.

Пѣ́снь 8.

Ирмо́съ: Въ пе́щь о́гненную ко отроко́мъ евре́йскимъ снизше́дшаго и пла́мень въ ро́су прело́жшаго Бо́га, по́йте дѣла́, я́ко Го́спода, и превозноси́те во вся́ вѣ́ки.

Устро́ивъ твою́ жи́знь боголѣ́пно, святи́телю Арсе́ніе, строи́тель изря́денъ показа́лся еси́ твое́й оби́тели и свѣ́тло прія́телище Бо́жіе.

Чуде́съ глубина́ и исцѣле́ній рѣка́, исто́чникъ непреста́ненъ, струя́, ника́коже оскудѣва́ема, твоя́ ра́ка показа́ся, о́тче.

Иже къ Бо́гу моли́твами твои́ми те́плыми очи́сти на́съ отъ вся́кія скве́рны, и скорбе́й, и болѣ́зней и вся́кія ну́жды, святи́телю Арсе́ніе, изба́ви.

Богоро́диченъ: Пресвята́я Дѣ́во, Ты́ мя спаси́ и не́мощи мое́й бу́ди по́мощь, скорбе́й мно́гихъ и лю́тыхъ мя́ изба́ви, да Тя́ сла́влю, еди́ну Богоро́дицу.

Пѣ́снь 9.

Ирмо́съ: Безнача́льна Роди́теля Сы́нъ, Бо́гъ и Госпо́дь, вопло́щься отъ Дѣ́вы, на́мъ яви́ся, омраче́нная просвѣти́ти, собра́ти расточе́нная, тѣ́мъ Всепѣ́тую Богоро́дицу, велича́емъ.

Чудеса́ бо твоя́ мно́га и исцѣле́нія безчи́сленна незави́стно подава́еши съ те́плою вѣ́рою приходя́щимъ, Арсе́ніе святи́телю, похвала́ земли́ на́шей.

Поста́ви тебе́ Христо́съ Ма́тере Своея́ це́ркве столпа́ крѣ́пка и неподви́жима, соблюда́юща и назира́юща гра́дъ тво́й неподви́жимь и святу́ю оби́тель Свою́.

Святи́тели у́бо и кня́зи благочести́віи, свяще́нницы и и́ноцы и вси́ лю́діе, му́жи и жены́, и ста́рцы со младе́нцы, и вся́къ во́зрастъ, и вся́ко состоя́ніе, святи́телю на́шему Арсе́нію свѣ́тло пра́зднуемъ.

Богоро́диченъ: Моли́ Твоего́ Сы́на, Госпоже́ Пречи́стая Богоро́дице, изба́вити мя́ въ де́нь стра́шнаго осужде́нія, да, ра́дуяся, пѣ́сньми велича́ю Тя́.

Свѣти́ленъ:

Восхва́лимъ дне́сь пѣ́сньми вели́каго па́стыря и учи́теля, Арсе́нія богому́драго: се́й бо измла́да возлюби́ Христа́ и Пречи́стую Его́ Ма́терь, съ Не́юже ны́нѣ мо́литъ Христа́ Бо́га поми́ловати ду́ши на́ша. [Два́жды.]

[Сла́ва, и ны́нѣ,] богоро́диченъ:

Иже отъ Бо́га мíру по́данымъ благи́мъ Ты́ вина́ была́ еси́, Богоро́дице, но и ны́нѣ ми́лостива сотвори́ о о́бщемъ спасе́ніи благопремѣ́ннаго Бо́га.

На хвали́техъ стихи́ры, гла́съ 2. Подо́бенъ: Кíими похва́льными.

Кíими похва́льными вѣнцы́* увязе́мъ святи́теля?* Благоче́стія управле́ніе,* цѣлому́дрія рачи́теля,* свѣ́тлое Це́ркве украше́ніе,* исто́чника Боже́ственныхъ исцѣле́ній,* проли́тіе дарова́ній духо́вныхъ,* рѣку́ мно́гихъ чуде́съ,* зе́млю на́шу веселя́щу,* ди́внаго чудотво́рца Арсе́нія,* предста́теля на́шего и храни́теля. [Два́жды.]

Кíими духо́вными пѣ́сньми* похва́лимъ Арсе́нія свяще́ннаго?* Ди́внаго въ чудесѣ́хъ* и безпло́тнымъ сожи́теля,* освяще́ннаго отъ пеле́нъ,* столпа́ Це́ркви неподви́жима,* весе́ліе земли́ на́шей,* и́нокомъ люби́теля,* я́ко вои́стинну отца́ чадолюби́ва* и больны́мъ врача́ безме́здна.

Кíими пѣ́сненными добро́тами* ублажи́мъ Арсе́нія досточу́днаго?* Печа́льнымъ утѣше́ніе,* отча́яннымъ засту́пника,* и́нокомъ утвержде́ніе,* похвалу́ земли́ на́шей,* святи́телемъ украше́ніе,* рѣку́ ми́лости вои́стинну,* Боже́ственнаго Христо́ва смире́нія ревни́теля,* подаю́щаго мíрови ве́лію ми́лость.

Сла́ва, гла́съ 8. Самогла́сенъ:

Пріиди́те, стеце́мся вси́ къ боже́ственнѣй па́мяти отца́ на́шего, изря́днаго чудотво́рца Арсе́нія, се́й бо, отъ ю́ности жела́ніе боже́ственное въ се́рдцы свое́мъ пріи́мъ и возлюби́въ Христа́ и Пречи́стую Его́ Ма́терь, Ейже и оби́тель сотвори́, и вельми́ украси́, и мно́жество мона́ховъ собра́. Тѣ́мъ бы́въ христолюби́вымъ князе́мъ учи́тель пра́выя вѣ́ры, вельмо́жамъ тве́рдое защище́ніе, си́рымъ я́ко оте́цъ милосе́рдъ, вдови́цамъ те́плое заступле́ніе, скорбя́щимъ утѣше́ніе, боля́щимъ исцѣле́ніе. Ра́дуйся и весели́ся, Бо́жія Ма́тере це́рковь, я́ко люби́мый тобо́ю въ тебѣ́ почи́лъ е́сть, богому́дрый Арсе́ній. Но, о богоблаже́нный о́тче! не преста́й моля́ся о ста́дѣ твое́мъ и о всѣ́хъ, вѣ́рою чту́щихъ всечестно́е успе́ніе твое́.

И ны́нѣ, богоро́диченъ:

Влады́чице, пріими́ моли́тву ра́бъ Твои́хъ [и изба́ви на́съ отъ вся́кія ну́жды и печа́ли].

Славосло́віе вели́кое. Ектеніи́. И отпу́стъ. Ча́съ пе́рвый.



НА ЛИТУРГІИ,

Блаже́нна, отъ кано́на свята́го, пѣ́снь 3-я и 6-я. Проки́менъ, гла́съ 7: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Апо́столъ ко Евре́емъ, зача́ло 311, отъ полу́. Аллилу́ія, гла́съ 2: Свяще́нницы Твои́ облеку́тся въ пра́вду, и преподо́бніи Твои́ возра́дуются. Сти́хъ: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Ева́нгеліе Матѳе́я, зача́ло 11. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся].

Источникъ: Минíа, мѣ́сяцъ Ма́ртъ. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 8 – 16.

/ Къ оглавленію раздѣла /


Наверхъ / Къ титульной страницѣ

0