Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 22 октября 2017 г. Сейчасъ на порталѣ посѣтителей - 11.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́рта во 2-й де́нь.
Слу́жба явле́нію ико́ны Пресвяты́я Влады́чицы на́шея Богоро́дицы Держа́вныя.

ВЕЧЕРЪ,
На Го́споди воззва́хъ: поста́вимъ стихо́въ 8 и пое́мъ стихи́ры, гла́съ 4. Подо́бенъ: Яко до́бля.

Яко вели́ка су́щи Цари́ца и Ма́ти* на небеси́ превысо́кихъ си́лъ Царя́,* пречи́стыя Твоя́ ру́цѣ просте́рши,* моле́бно за ны́ предстои́ши* и на земли́, я́ко Держа́вная Помо́щница,* боже́ственною Твое́ю ико́ною и ду́хомъ съ Твои́ми рабы́ пребыва́еши,* и избавля́еши отъ вся́кія напа́сти* благоче́стно Богоро́дицу Тя́ исповѣ́дающія.

Херуви́мовъ и серафи́мовъ превы́шши еси́, Богоро́дице,* небесе́ же и земли́ простра́ннѣйши,* ви́димыя тва́ри и неви́димыя яви́лася еси́, преиму́щи* несосу́днымъ сосужде́ніемъ:* Его́же бо простра́нствія небеса́ не вмѣща́ютъ,* въ Твое́й утро́бѣ вмѣсти́ла еси́, Чи́стая,* Его́же моли́, спасти́ся рабо́мъ Твои́мъ.

О, Всеми́лостивая христіа́номъ Помо́щнице!* не мо́жетъ Тя́ воспѣ́ти досто́йно у́мъ человѣ́ческій и а́нгельскій,* я́ко всея́ тва́ри честнѣ́йши,* небе́сныхъ и земны́хъ сла́внѣйши,* всѣ́хъ бо родила́ еси́ Творца́ и Бо́га.* Но, о Влады́чице!* пріими́ ми́лостивно, ю́же Тебѣ́ отъ се́рдца возложи́хомъ пѣ́снь, * спаса́й на́съ всегда́, на Тя́ бо надѣ́емся.

Гла́съ 2: Всѣ́мъ предста́тельствуеши, Блага́я,* прибѣга́ющимъ съ вѣ́рою въ держа́вный Тво́й покро́въ,* ино́го бо не и́мамы, грѣ́шніи, къ Бо́гу въ бѣда́хъ и ско́рбехъ при́сно избавле́нія,* обремене́ни грѣхи́ мно́гими,* Ма́ти Бо́га Вы́шняго.* Тѣ́мъ же Ти́ припа́даемъ,* изба́ви отъ вся́каго обстоя́нія рабы́ Твоя́.

Гла́съ 6: Упова́ніе и покро́въ держа́вный къ Тебѣ́ притека́ющихъ, Богороди́тельнице,* благо́е предста́тельство мíра,* моли́ со безпло́тными прилѣ́жно,* Его́же родила́ еси́, Человѣколю́бнѣйшаго Бо́га,* изба́витися душа́мъ на́шимъ отъ вся́каго преще́нія,* еди́на Благослове́нная.

Тебѣ́ вси́ ро́ди человѣ́честіи* хва́льныя да́ры прино́сятъ, Влады́чице,* и мо́лятся я́ко Цари́цѣ и Ма́тери Бо́жіи:* проро́цы Тя́ прему́дро проповѣ́даша,* леви́ти благослови́ша,* апо́столи и му́ченицы исповѣ́даша,* ца́ріе и кня́зи покланя́ются[1]* архіере́е проповѣ́дуютъ,* мона́си и простíи благоговѣ́ютъ,* бога́тіи и убо́зіи, сироты́ и вдовы́,* и вся́къ во́зрастъ, и вся́ко преспѣ́яніе, ста́рческое и младе́нческое,* подъ кро́въ Тво́й держа́вный съ вѣ́рою прибѣга́емъ:* покры́й и соблюди́, Госпоже́, моли́твами Твои́ми,* и спаси́ отъ бѣ́дъ ду́ши на́ша.

Всѣ́мъ Предста́тельница те́плая показа́лася еси́, Богороди́тельнице,* всѣ́хъ покро́ве, Держа́ва же отъ Бо́га прибѣга́ющимъ къ Тебѣ́,* въ ну́ждахъ су́щимъ Помо́щница,* плѣ́ннымъ ско́рое избавле́ніе;* Тебе́ бо Христо́съ на ва́рвары положи́лъ е́сть Мсти́тельницу,* и Засту́пницу, и стѣ́ну неразруши́мую,* и немощны́мъ крѣ́пость непреобори́мую,* и ми́ра Пода́тельницу душа́мъ на́шимъ.

Гла́съ 8: Пріиди́те, возра́дуемся держа́внѣй Засту́пницѣ ро́да на́шего,* Цари́цѣ Богоро́дицѣ,* пріиди́те къ ти́хому Ея́ и чу́дному, почита́емому а́нгелы,* честно́му поклони́мся о́бразу.* Да́руетъ бо Богоро́дица вѣ́рнымъ оби́льныя да́ры цѣле́бныя,* отъ неистощи́маго исто́чника — святы́я ико́ны,* неоску́дную благода́ть источа́ющи:* тмы́ избавля́етъ на́съ искуше́ній и бѣ́дъ, и вся́каго грѣха́,* благоче́стно и богопрія́тно прославля́ющихъ,* и чту́щихъ свѣ́тлую и чу́дную Богома́тере святу́ю ико́ну.* Тѣ́мъ, воспѣва́юще, воззове́мъ Первообра́знѣй:* ра́дуйся, любе́зная мíру по́моще* во спасе́ніе ду́шъ на́шихъ.

Слава, и нынѣ, богородиченъ, гласъ 4:

Иже Тебе́ ра́ди богооте́цъ проро́къ Дави́дъ, пѣ́сненно о Тебѣ́ провозгласи́, вели́чія Тебѣ́ Сотво́ршему: предста́ Цари́ца одесну́ю Тебе́. Тя́ бо Ма́терь хода́таицу живота́ показа́, безъ отца́ изъ Тебе́ вочеловѣ́читися благоволи́вый Бо́гъ, да Сво́й па́ки обнови́тъ о́бразъ, истлѣ́вшій страстьми́, и заблу́дшее горохи́щное обрѣ́тъ овча́, на ра́мо воспріи́мъ, ко Отцу́ принесе́тъ и Своему́ хотѣ́нію, съ небе́сными совокупи́тъ си́лами, и спасе́тъ, Богоро́дице, мíръ, Христо́съ, имѣ́яй ве́лію и бога́тую ми́лость.

Вхо́дъ. Проки́менъ дне́. Чте́нія три́.

Бытія́ чте́ніе. [Глава́ 28.]

Изы́де Іа́ковъ отъ студенца́ кля́твеннаго и и́де въ Харра́нь. И обрѣ́те мѣ́сто, и спа́ та́мо, за́йде бо со́лнце; и взя́тъ отъ ка́менія мѣ́ста того́, и положи́ возгла́віе себѣ́, и спа́ на мѣ́стѣ о́номъ. И со́нъ ви́дѣ: и се́ лѣ́ствица утвержде́на на земли́, eя́же глава́ досяза́ше до небе́съ, и Ангели Бо́жіи восхожда́ху и низхожда́ху по не́й. Госпо́дь же утвержда́шеся на не́й, и рече́: Азъ Бо́гъ Авраа́мовъ, отца́ твоего́, и Бо́гъ Исаа́ковъ, не бо́йся: земля́, идѣ́же ты́ спи́ши на не́й, тебѣ́ да́мъ ю́ и сѣ́мени твоему́. И бу́детъ сѣ́мя твое́, я́ко песо́къ земны́й, и распространи́тся на мо́ре, и ли́ву, и сѣ́веръ, и на восто́ки, и возблагословя́тся о тебѣ́ вся́ колѣ́на земна́я и о сѣ́мени твое́мъ. И се́ Азъ съ тобо́ю, сохраня́яй тя́ на вся́комъ пути́, а́може а́ще по́йдеши, и возвращу́ тя́ въ зе́млю сію́, я́ко не и́мамъ тебе́ оста́вити, до́ндеже сотвори́ти Ми́ вся́, ели́ка глаго́лахъ тебѣ́. И воста́ Іа́ковъ отъ сна́ своего́, и рече́: я́ко éсть Госпо́дь на мѣ́стѣ се́мъ, а́зъ же не вѣ́дѣхъ. И убоя́ся, и рече́: я́ко стра́шно мѣ́сто сіе́, нѣ́сть сіе́, но до́мъ Бо́жій, и сія́ врата́ небе́сная.

Прoро́чества Іезекíилева чте́ніе. [Глава́ 43 и 44.]

Та́ко глаго́летъ Госпо́дь: бу́детъ отъ дне́ осма́го и про́чее, сотворя́тъ іере́и на олтари́ всесожже́нія ва́шего и я́же спасе́нія ва́шего, и пріиму́ вы́, глаго́летъ Адонаи́ Госпо́дь. И обрати́ мя́ на пу́ть вра́тъ святы́хъ внѣ́шнихъ, зря́щихъ на восто́ки, и сія́ бя́ху затворе́на. И рече́ Госпо́дь ко мнѣ́: врата́ сія́ затворе́на бу́дутъ, и не отве́рзутся, и никто́же про́йдетъ сквозѣ́ и́хъ, я́ко Госпо́дь Бо́гъ Изра́илевъ про́йдетъ и́ми, и бу́дутъ затворе́на. Яко игу́менъ ся́детъ въ ни́хъ снѣ́сти хлѣ́бъ: по пути́ ела́мскихъ вра́тъ вни́детъ, и по пути́ его́ изы́детъ. И введе́ мя́ по пути́ вра́тъ святы́хъ, су́щихъ къ сѣ́веру, пря́мо хра́му, и ви́дѣхъ, и се́ испо́лнь сла́вы хра́мъ Госпо́день.

При́тчей чте́ніе. [Глава́ 9.]

Прему́дрость созда́ себѣ́ до́мъ и утверди́ столпо́въ се́дмь. Закла́ своя́ же́ртвенная, и раствори́ въ ча́ши свое́й вино́, и угото́ва свою́ трапе́зу. Посла́ своя́ рабы́, созыва́ющи съ высо́кимъ проповѣ́даніемъ на ча́шу, глаго́лющи: и́же е́сть безу́менъ, да уклони́тся ко мнѣ́. И тре́бующимъ ума́ рече́: пріиди́те, яди́те мо́й хлѣ́бъ и пíйте вино́, е́же раствори́хъ ва́мъ. Оста́вите безу́міе, и жи́ви бу́дите, и взыщи́те ра́зума, да поживете́, и испра́вите ра́зумъ въ вѣ́дѣніи. Наказу́яй злы́я, пріи́метъ себѣ́ безче́стіе, облича́яй же нечести́ваго опоро́читъ себе́. Обличе́нія бо нечести́вому — ра́ны ему́. Не облича́й злы́хъ, да не возненави́дятъ тебе́, облича́й прему́дра, и возлю́битъ тя́. Да́ждь прему́дрому вину́, и прему́дршій бу́детъ, сказу́й пра́ведному, и приложи́тъ пріима́ти. Нача́ло прему́дрости — стра́хъ Госпо́день, и совѣ́тъ святы́хъ — ра́зумъ. Разумѣ́ти бо зако́нъ по́мысла е́сть блага́го: си́мъ бо о́бразомъ мно́гое поживе́ши вре́мя, и приложа́тся тебѣ́ лѣ́та живота́.

На литíи стихи́ры, гла́съ 1:

Любо́вію, Чи́стая Дѣ́во, Твою́ святу́ю ико́ну почита́ющимъ, и Бо́жію Тя́ и́стинную Ма́терь согла́сно возвѣща́ющимъ, и вѣ́рно покланя́ющимъ Ти ся Храни́тельница яви́ся и Держа́вная Предста́тельница, вся́кое зло́ отъ си́хъ удаля́ющи, я́ко вся́ могу́щая.

Да и́мя Твое́, Богоро́дице, на земли́ славосло́вится, Иже изъ Тебе́ просія́въ грѣ́шникомъ держа́вную наде́жду и стѣ́ну Тя́ дарова́: Тобо́ю бо вся́кое дыха́ніе къ Бо́гу притека́етъ.

Сла́ва, и ны́нѣ, гла́съ 5:

Востру́бимъ трубо́ю пѣ́сней, воспои́мъ согла́сно Засту́пницѣ страны́ на́шея, Цари́цѣ Богоро́дицѣ: ра́дуйся, благоволе́ніемъ Твои́мъ оте́чество на́ше отъ лѣ́тъ дре́внихъ вѣнча́вшая и благода́ть Твою́ тому́ источа́ющая. Тѣ́мже и пречестны́й Тво́й покро́въ и па́мяти тьма́ми те́мъ чуде́съ Твои́хъ Це́рковь на́ша Россíйская свѣ́тло пра́зднуетъ. Не отыми́ отъ на́съ, о Влады́чице, и ны́нѣ ми́лости Твоя́; при́зри на ско́рби и тѣсноту́ на́шу и воздви́гни на́съ держа́внымъ заступле́ніемъ Твои́мъ.

На стихо́внѣ стихи́ры, гла́съ 3:

Пріиди́те, вси́ концы́ земли́,* честну́ю ико́ну Бо́жія Ма́тере ублажи́мъ,* и́бо, ру́цѣ къ Сы́ну воздѣ́ющи, мо́лится.* Тѣ́мже святы́мъ и держа́внымъ Ея́ предста́тельствомъ* мíръ оживле́нъ бы́сть,* псалмы́, и пѣ́ньми, и пѣ́сньми духо́вными* со всѣ́ми святы́ми пра́зднуемъ свѣ́тло.

Сти́хъ: Помяну́ и́мя Твое́* во вся́комъ ро́дѣ и ро́дѣ.

Вельми́ добро́тою украси́ Тя Бо́гъ,* я́ко въ человѣ́цѣхъ Свѣ́тъ на руку́ Твое́ю,* Яже еди́на во Свѣ́тѣ Его́,* упова́ніе христіа́номъ,* помо́щница су́щимъ въ ну́ждахъ и ско́рбехъ* и приста́нище въ пучи́нѣ тружда́ющимся,* моли́ изба́витися отъ напа́стей* любо́вію пою́щимъ и́мя Твое́, Держа́вная Влады́чице.

Сти́хъ: Слы́ши, Дщи́, и ви́ждь,* и приклони́ у́хо Твое́.

Всечестно́е Твое́ и держа́вное и́мя,* Пресвята́я Дѣ́во Чи́стая,* а́нгелъ мно́жество на небесѣ́хъ* и человѣ́ческій ро́дъ на земли́ блажи́тъ,* я́ко Ма́ти бы́сть Творца́ всѣ́хъ, Христа́ Бо́га.* Того́ моля́щи за ны́ не преста́й, мо́лимъ Тя́,* и́же на Тя́ съ Бо́гомъ упова́ніе возложи́хомъ,* Богоро́дице Препѣ́тая и Неискусобра́чная.

Сла́ва, и ны́нѣ, гла́съ то́йже:

Прибѣ́жище и си́ла на́ша, Богоро́дице, держа́вная по́мощь мíра, моли́твами Твои́ми покры́й рабы́ Твоя́ отъ вся́кія ну́жды, еди́на Благослове́нная.

Тропарь, гласъ 4:

Ангеловъ ли́цы благоговѣ́йно Тебѣ́ слу́жатъ, и вся́ небе́сныя си́лы немо́лчными гла́сы Тя́ ублажа́ютъ, Богоро́дице Дѣ́во; усе́рдно мо́лимъ Тя́, Влады́чице: да пребу́детъ Боже́ственная благода́ть на честнѣ́й ико́нѣ Твое́й Держа́внѣй, и свѣтоза́рный лу́чь сла́вы чуде́съ Твои́хъ да нисхо́дитъ отъ нея́ на всѣ́хъ, съ вѣ́рою Тебѣ́ моля́щихся и вопію́щихъ Бо́гу: аллилу́ія.


НА УТРЕНИ,
На Бо́гъ Госпо́дь: тропа́рь, три́жды.

По 1-мъ стихосло́віи сѣда́ленъ, гла́съ 6:

Свята́я Влады́чице Богоро́дице, Христа́ Бо́га на́шего Ма́ти, я́ко всѣ́хъ Творца́ неизрече́нно ро́ждшая, моли́ся всегда́ бла́гости Его́, страсте́й на́съ изба́вити и оставле́ніе на́мъ да́ти грѣхо́въ.

Сла́ва Отцу́ и Сы́ну и Свято́му Ду́ху:

Прегрѣше́ній пучи́ною обурева́емь, къ ти́хому приста́нищу пречи́стыя Твоея́ моли́твы прибѣ́гъ, Богороди́тельнице, взыва́ю Ти́: спаси́ мя, держа́вную Твою́ просте́рши десни́цу рабу́ Твоему́, Всенепоро́чная.

И ны́нѣ, и при́сно, и во вѣ́ки вѣко́въ. Ами́нь.

Наде́ждо мíра, Блага́я Богоро́дице Дѣ́во, Твое́ и еди́но стра́шное предста́тельство дви́жемъ: умилосе́рдися на безпо́мощныя лю́ди, умоли́ ми́лостиваго Бо́га изба́витися душа́мъ на́шимъ отъ вся́каго преще́нія, еди́на Благослове́нная.

По 2-мъ стихосло́віи сѣда́ленъ, гла́съ 4:

Ты́ еси́ похвала́ и вѣне́цъ святы́мъ всѣ́мъ, о Цари́це! Ты́ упова́ніе на́ше и Помо́щница по Бо́зѣ, и на Тя́ наде́жду спасе́нія на́шего возложи́хомъ вси́. Тебѣ́ мо́лимся, я́ко Бо́жіи Ма́тери: одожди́ грѣ́шнымъ рабо́мъ Твои́мъ бога́тыя Твоя́ душеспаси́тельныя ми́лости.

Сла́ва Отцу́ и Сы́ну и Свято́му Ду́ху:

Недви́жимое утвержде́ніе вѣ́ры и честны́й да́ръ ду́шъ на́шихъ, Богоро́дицу пѣ́сньми велича́емъ, вѣ́рніи: ра́дуйся, Ка́мень жи́зни во чре́вѣ Твое́мъ вмѣсти́вшая; ра́дуйся, конце́въ наде́ждо, скорбя́щихъ заступле́ніе; ра́дуйся, Невѣ́сто неневѣ́стная.

И ны́нѣ, и при́сно, и во вѣ́ки вѣко́въ. Ами́нь.

Всѣ́хъ Царя́ и Творца́ заче́нши, Дѣ́во, родила́ еси́, и се́ ны́нѣ, я́коже Цари́ца, одесну́ю Сего́, Чи́стая, предстои́ши. Тѣ́мже молю́ Тя́: шу́ія ча́сти изба́ви мя́ въ ча́съ Суда́ и десны́мъ овца́мъ сопричти́.

Велича́ніе:

Досто́йно е́сть велича́ти Тя́, Богоро́дице, честнѣ́йшую херуви́мъ, и сла́внейшую безъ сравне́нія серафи́мъ. Или́ сіе́:

Досто́йно е́сть велича́ти Тя́, Богоро́дице, земли́ Ру́сскія Цари́цу Небе́сную и люде́й правосла́вныхъ Влады́чицу Держа́вную.

По поліеле́и сѣда́ленъ, гла́съ 4:

Госпо́дьственно и и́стинно, Богоро́дице, моля́щися, я́ко Ма́ти, со дерзнове́ніемъ Сы́ну Твоему́ и Бо́гу на́шему, сохрани́ лю́ди, изря́дно къ покро́ву Твоему́ притека́ющія, въ Тебѣ́ Держа́ву иму́щія, къ Тебѣ́ прибѣга́ющія — Приста́нищу, Стѣнѣ́, еди́ному Предста́тельству ро́да человѣ́ческаго.

Сла́ва, и ны́нѣ, то́йже.

Степе́нна, 1-й антифо́нъ 4-го гла́са. Проки́менъ, гла́съ 4: Помяну́ и́мя Твое́* во вся́комъ ро́дѣ и ро́дѣ. Сти́хъ: Слы́ши, Дщи́, и ви́ждь, и приклони́ у́хо Твое́. Вся́кое дыха́ніе... Ева́нгеліе отъ Луки́, зача́ло 4.

По 50-мъ псалмѣ́ стихи́ра, гла́съ 6:

При́зри на ны́, Всепѣ́тая Богоро́дице, возсія́й просвѣще́ніе сердца́мъ омраче́ннымъ, и озари́ ста́до Твое́, Пречи́стая, ели́ко бо хо́щеши и мо́жеши, я́ко Ма́ти су́щи Зижди́теля Твоего́, и возопíй моля́щимъ Тя́: Азъ е́смь съ ва́ми, и никто́же на вы́.

Кано́нъ, гла́съ 8.

Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Отъ земноро́дныхъ возра́стши и Зижди́теля ро́ждши, ра́дуйся, на́ша похвало́, Богоро́дице Чи́стая, Тя́, я́ко облада́ющую тва́рьми, велича́емъ.

Своего́ пріе́мши Содѣ́теля, я́ко Са́мъ восхотѣ́, отъ безсѣ́меннаго Твоего́ чре́ва па́че ума́ воплоща́ема, Чи́стая, тва́рей вои́стинну яви́лася еси́ Влады́чица.

Пречи́стая Богоро́дице, Тобо́ю спасе́ніе нетлѣ́нно дарова́ся и неразруши́мо весе́ліе и наде́жда, покро́въ и держа́ва, и душа́мъ на́шимъ прибѣ́жище.

Цари́ца еси́ всѣ́хъ еди́на, Бо́гу, Богороди́тельнице Чи́стая, святы́й престо́лъ и пала́та Христа́ Бо́га, Его́же моли́ о чту́щихъ ико́ну Твою́ честну́ю, пода́ти грѣхо́въ оставле́ніе.

Бу́ди на́мъ по́мощь, Твои́мъ рабо́мъ, Влады́чице Чи́стая, вѣ́рно моля́щимъ Тя́, я́ко ми́лостива, и держа́вны на́съ воздви́гни, во е́же пѣ́ти Тя́.

Спаса́еши, я́ко мо́жеши, при́сно всѣ́хъ, я́ко ро́ждши Влады́ку, влады́чествія мя́ сла́стнаго и страсте́й свободи́, да пою́, ра́дуяся: ра́дуйся, Престо́ле Вы́шняго, Благослове́нная.

Катава́сія: Отве́рзу уста́ моя́...

Пѣ́снь 3.

Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.

Наде́ждо мíру держа́вная, покро́ве и предста́тельство, Всесвята́я Дѣ́во, не пре́зри, Блага́я, моле́нія рабо́въ, отъ любве́ Тя при́сно ублажа́ющихъ.

Вопло́щся отъ утро́бы Твоея́ Госпо́дь, госпо́дствуя тва́рію, и Тебе́, Дѣ́во, Госпожу́ показа́въ ви́димымъ же всѣ́мъ и неви́димымъ, я́ко Ма́терь прославля́я Непоро́чную.

Марíе, честно́е Влады́ки прія́телище, возста́ви ны́, па́дшія въ про́пасть лю́таго отча́янія, и прегрѣше́ній, и скорбе́й, Ты́ бо еси́ грѣ́шныхъ спасе́ніе, и по́мощь, и держа́вное предста́тельство и спаса́еши рабы́ Твоя́.

Су́щая Влады́чица на́ша, Всесвята́я Дѣ́во, моля́щи не преста́й, Его́же родила́ еси́, Бо́га, Ца́рствія Своего́ на́съ сподо́бити.

Кня́зь ми́рный пріи́де на престо́лъ Дави́довъ, ца́рствуя изъ Тебе́, Богоро́дице, Бо́гъ воплоща́емь. О, чу́до! и, бра́нь разрѣ́шъ, почте́ кня́зи моави́тскія, и Тебе́, Ро́ждшую, Цари́цу показа́.

Цари́це Дѣ́во, ро́ждшая Царя́ Христа́, уще́дри и спаси́ мя, страстьми́ преклоне́ннаго, вѣ́рою утверди́ и наста́ви мя́ ко спасе́нія стези́, вѣ́рныхъ спасе́ніе.

Сѣда́ленъ, гла́съ 4:

Да откры́еши на́мъ всѣ́мъ мно́жество Твоея́ ми́лости и бла́гости безпредѣ́льную пучи́ну, грѣхи́ рабо́въ Твои́хъ вся́ изгла́ди. Имаши бо, Всенепоро́чная, я́ко Ма́ти Бо́жія, вла́сть надъ созда́ніемъ и си́лою Твое́ю изво́диши вся́, я́ко хо́щеши, и́бо благода́ть Ду́ха Свята́го, я́вѣ все́льшаяся въ Тя́, содѣ́йствуетъ Ти́ во всѣ́мъ, при́сно Всеблаже́ннѣйшая.

Сла́ва, и ны́нѣ, то́йже.

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́, и просла́вихъ Твое́ Божcтво́.

Тя́, Богоневѣ́сто, похвалу́ всѣ́мъ Христо́съ яви́ и держа́ву, пою́щимъ вѣ́рно Твое́ та́инство.

Ста́немъ благоговѣ́йно въ дому́ Бо́га на́шего и возопіи́мъ: ра́дуйся, мíру Влады́чице, ра́дуйся, Марíе, Госпоже́ всѣ́хъ на́съ; ра́дуйся, еди́на непоро́чная въ жена́хъ и до́брая; ра́дуйся, сто́лпе о́гненный, вводя́щій въ Вы́шнюю жи́знь человѣ́чество.

Прибѣ́жище, Засту́пницу и си́льный покро́въ Тя́ иму́ще, Благослове́нная Пречи́стая Ма́ти Бо́жія. Твое́ю по́мощію и покро́вомъ Боже́ственнымъ сохрани́ на́съ.

Дѣ́во господоимени́тая и Цари́ца всея́ тва́ри, мно́гими проро́ки пронарече́нная и ро́ждшая Царя́ Небе́сныхъ си́лъ, Ца́рствія Небе́снаго, Госпоже́, всѣ́хъ на́съ сподо́би моли́твами Твои́ми.

Чи́ны а́нгельскія удивля́етъ, Богоро́дице, та́йны Твоея́ глубина́, бѣ́сы же смуща́етъ Твоя́ ико́на, е́йже мы́ кла́няемся, чту́ще Тя́, Бо́жію Ма́терь.

Вы́сшую херуви́мъ и всея́ тва́ри восхва́лимъ, еди́ну, ро́ждшую Зижди́теля и Го́спода и отве́рзшую две́ри ра́йскія на́мъ.

Къ Тебѣ́ прибѣга́ю, еди́нѣй держа́внѣй, вѣ́рныхъ покро́ву, на Тя́ наде́жду возлага́ю спасе́нія моего́, Пресвята́я Влады́чице Богоро́дице, не пре́зри мене́.

Пѣ́снь 5.

Ирмо́съ: Просвѣти́ на́съ повелѣ́ніи Твои́ми, Го́споди, и мы́шцею Твое́ю высо́кою Тво́й ми́ръ пода́ждь на́мъ, Человѣколю́бче.

Богоро́дице, всѣ́хъ Цари́це, правосла́вныхъ похвало́, ерети́чествующихъ шата́нія разори́, ми́ръ же пода́ждь чту́щимъ, Пречи́стая, честны́й Тво́й о́бразъ.

Держа́внымъ Твои́мъ кро́вомъ отъ вра́гъ навѣ́та на́съ, Чи́стая, Твоя́ рабы́, сохрани́ вся́ невре́дны, Тя́ бо стяжа́хомъ еди́ну прибѣ́жище въ ско́рбехъ.

Скорѣ́йшею моли́твою, бо́дрымъ Твои́мъ покро́вомъ, держа́вною Твое́ю, Влады́чице Чи́стая, по́мощію, ны́нѣ соблюди́ вѣ́рныя Твоя́ рабы́ отъ вся́каго сопроти́внаго прило́га и страсте́й, и прегрѣше́ній, и напа́стей спаси́.

Цари́ца еси́ Царя́ Христа́ и Го́спода, па́че сло́ва ро́ждши Разо́ршаго а́дова ца́рствія, Его́же прилѣ́жно моли́, Отрокови́це, Вы́шняго Ца́рствія сподо́бити вся́, чту́щія Тя́.

Избавля́ющи яви́ся, Пречи́стая, отъ страсте́й наведе́нія и бѣсо́въ лука́выхъ Твоего́ раба́, стяжа́вшего Тя́ держа́вное заступле́ніе и Предста́тельницу Непосты́дную.

Пѣ́снь 6.

Ирмо́съ: Моли́тву пролію́ ко Го́споду и Тому́ возвѣщу́ печа́ли моя́, я́ко зо́лъ душа́ моя́ испо́лнися и живо́тъ мо́й а́ду прибли́жися, и молю́ся, я́ко Іо́на: отъ тли́, Бо́же, возведи́ мя.

Преукраше́на сла́вою Боже́ственною, Честна́я Цари́ца Сы́ну Своему́ и Бо́гу предстои́тъ, спасе́ніе душе́вное на́мъ прося́щи.

Благодѣ́теля ро́ждши, до́брыхъ Вино́внаго, благодѣя́нія бога́тство всѣ́мъ источи́: вся́ бо мо́жеши, я́ко си́льнаго въ крѣ́пости Христа́ ро́ждши, Богоблаже́нная.

Да пріи́детъ ны́нѣ на ны́ держа́вная Твоя́ дла́нь, Влады́чице, и ча́емыя человѣ́ческія ско́рби да изба́витъ на́съ.

Влады́чице, Ма́ти Изба́вителя, пріими́ моли́твы Твои́хъ непотре́бныхъ ра́бъ, и́мже возда́ждь избавле́ніе грѣхо́въ и богоуго́дныя жи́зни прія́тное исправле́ніе.

Цари́ца еси́ всѣ́хъ еди́на, Бо́гу, Богороди́тельнице Чи́стая, святы́й престо́лъ и пала́та Христа́ Бо́га, Его́же моли́ о чту́щихъ честну́ю ико́ну Твою́, пода́ти грѣхо́въ оставле́ніе.

Ра́бъ, ны́нѣ прихожду́ къ Тебе́, Ма́тери всѣ́хъ Бо́га, отъ всѣ́хъ изба́витися напа́стей моля́ся. Но, о Богороди́тельнице, ца́рствующи съ Сы́номъ Твои́мъ, христіа́нскій ро́дъ сохраня́й.

Держа́вный Тво́й покро́въ, Богороди́тельнице, я́ко Засту́пница су́щи, да́ждь ми́ вско́рѣ, напа́стьми одержи́му, и невре́дна отъ си́хъ сохрани́ мя.

Конда́къ, гла́съ 8:

Взбра́ннѣй Воево́дѣ, Засту́пницѣ на́шей Держа́внѣй, пѣ́сни благода́рственныя прино́симъ о дарова́ніи на́мъ ико́ны Ея́ святы́я, е́юже огражда́еми, ничесо́же устраши́мся, не отъ человѣ́къ бо спасе́ніе на́ше, но Преблагослове́нныя Влады́чицы милосе́рдіемъ. Тѣ́мже дне́сь ра́дуемся и пра́зднуемъ свѣ́тло, я́ко пріи́де Держа́вная на стра́жу земли́ Своея́.

Инъ кондакъ, гла́съ то́йже:

Избра́ннѣй отъ всѣ́хъ родо́въ Засту́пницѣ ро́да христіа́нскаго, покро́вомъ Своея́ бла́гости покрыва́ющей страну́ на́шу правосла́вную, благода́рственная пѣ́нія прино́симъ Ти́, Влады́чице, о явле́ніи на́мъ чу́дныя ико́ны Твоея́ Держа́вныя. Ты́ же, я́ко Всеми́лостивая Засту́пница всѣ́хъ, съ вѣ́рою къ Тебѣ́ притека́ющихъ, отъ вся́кихъ на́съ бѣ́дъ свободи́, да зове́мъ Ти́: ра́дуйся, Ма́ти Бо́жія Держа́вная, Засту́пнице Усе́рдная ро́да христіа́нскаго.

Пѣ́снь 7.

Ирмо́съ: Отъ Іуде́и доше́дше, о́троцы, въ Вавило́нѣ иногда́, вѣ́рою Тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.

Богооте́цъ у́бо Дави́дъ Твою́ сла́ву напису́етъ, Дѣ́во, и Тебе́ тва́рей Цари́цу я́вленно проро́чествуетъ, предстоя́щую одесну́ю, Всенепоро́чная, Бо́га оте́цъ на́шихъ.

Цари́ца Дѣ́ва, злато́ю оде́ждою украше́на, Сы́ну Царю́ ны́нѣ предстои́тъ, Яже безъ сравне́нія а́нгелъ превы́шши.

Ро́дове Тя́ вси́ блажа́тъ, Чи́стая, Іису́съ бо еди́нъ, рожде́йся отъ Твоея́ утро́бы, То́й, я́ко вѣ́сть, сотвори́, Отрокови́це Дѣ́во, съ Тобо́ю вели́чія, Его́же моли́ спасти́ся ста́ду и лю́демъ Твои́мъ.

Цари́ца всѣ́хъ, прише́дши свято́ю ико́ною Свое́ю, небе́сный кро́въ на сла́ву на́мъ уста́ви, и́мже спаса́емся отъ неви́димыхъ вра́гъ нахожде́нія, къ Сы́ну Ея́ вопію́ще: благослове́нъ Бо́гъ оте́цъ на́шихъ.

Яко жениха́ Тя кра́сный черто́гъ, я́ко Влады́чню пала́ту одушевле́нну, я́ко порфи́ру всезлату́ю, я́ко краснѣ́йшее оби́телище Христо́во, Влады́чице всѣ́хъ, умоля́ющаго Тя́ спаси́ мя.

Отча́явся по́мощи вся́кія, къ Тебѣ́, Пренепоро́чная, держа́вной Храни́тельницѣ и Покро́ву, притеко́хъ: не отри́ни у́бо мене́ отъ Боже́ственнаго покро́ва Твоего́.

Пѣ́снь 8.

Ирмо́съ: Царя́ Небе́снаго, Его́же пою́тъ во́и а́нгельстіи, хвали́те и превозноси́те во вся́ вѣ́ки.

Кто́ не воспое́тъ Тя́ отъ земноро́дныхъ, Нескве́рная, Чи́стая Голуби́це? Ты́ бо родила́ еси́ на́мъ Свѣ́тъ вели́кій, жи́зни бога́тство, Іису́са Спа́са, Его́же пое́мъ, хва́ляще я́ко Го́спода, и превозно́симъ во вся́ вѣ́ки.

Тебѣ́, свѣ́тлому Изба́вителя свѣ́щнику, прекра́сный спле́тше ли́къ, пое́мъ: вся́ дѣла́ Госпо́дня, по́йте непреста́нно Дѣ́ву Марíю и превозноси́те Ю во вѣ́ки.

Тро́ицы яви́лася еси́ честны́й хра́мъ, въ Не́мже Оте́цъ — любо́вію, Сы́нъ — пло́тію, Ду́хъ Святы́й наше́ствіемъ оби́тель Себѣ́ сотвори́, Еди́нъ и́стинный Бо́гъ на́шъ, Его́же умоли́ о на́съ, Предста́тельнице всемо́щная.

Позлаще́нною ри́зою, я́коже Цари́цу, Сы́нъ Тво́й просвѣти́въ заре́ю Ду́ха, Тебе́ одесну́ю Себе́ поста́ви, Пречи́стая, Его́же превозно́симъ во вся́ вѣ́ки.

Ты́ — две́рь Царя́ небе́съ и хра́мъ сла́вы Его́, Дѣ́во Всепѣ́тая, отве́рзи на́мъ две́ри милосе́рдія и введи́ ны моли́твами Твои́ми въ жили́ще небе́сныя сла́вы.

Ма́ти Пресвята́я, Ея́же моли́твами ро́дъ человѣ́ческій при́сно соблюда́ется, поклони́ся Отцу́, умоли́ Сы́на, призови́ Свята́го Ду́ха и уми́лостиви Бо́га, въ Тро́ицѣ Еди́наго, о мно́жествѣ грѣхо́въ на́шихъ, да, Тобо́ю поми́ловани бы́вше, Творца́ и Тебе́ благослови́мъ отны́нѣ и до вѣ́ка.

Пѣ́снь 9.
Ирмо́съ: Вои́стинну Богоро́дицу, Тя́ исповѣ́дуемъ, спасе́нніи Тобо́ю, Дѣ́во Чи́стая, съ безпло́тными ли́ки Тя́ велича́юще.

Рѣче́мъ Твои́хъ усте́нъ, Всечи́стая, послѣ́дующе, Тя́ ублажа́емъ, съ Тобо́ю бо вои́стинну вели́чія сотвори́вый Госпо́дь возвели́чи Тя́ и и́стинную Бо́жію Ма́терь, рожде́йся изъ чре́ва Твоего́, показа́.

Приклони́вый небеса́ въ Тя́, Дѣ́во, всели́ся и ны́нѣ на моли́тву Твою́ зри́тъ, Богоро́дице Чи́стая, Твое́, Цари́це, исполня́я проше́ніе, Ему́же за ны́ усе́рдно помоли́ся, на Тя́ бо надѣ́емся, Благослове́нная.

Святы́хъ Свята́я, Дѣ́во Чи́стая, святы́хъ Свята́го родила́ еси́, всѣ́хъ освяща́ющаго, Христа́ Изба́вителя. Тѣ́мже Тя́, Цари́цу и Влады́чицу всѣ́хъ, я́ко Ма́терь Зижди́теля тва́рей проповѣ́дуемъ.

Предъизбра́нная отъ всѣ́хъ родо́въ, услы́ши гла́съ на́шъ и да́руй проще́ніе ду́шъ на́шихъ, избавле́ніе страсте́й и болѣ́зней, вся́ могу́щая, я́ко Ма́ти Бо́жія.

Цари́цу Дѣ́ву Тя́ проповѣ́дуетъ Дави́дъ, Пречи́стая, Чи́стую, тѣ́мже мо́лимъ Тя́: Небе́снаго ны́ Ца́рствія сотвори́ наслѣ́дники, да ублажа́емъ Тя́.

Пріими́ е́же отъ души́ моле́ніе мое́, Пречи́стая Влады́чице, Яже Бо́га ро́ждши пло́тію, къ Тебѣ́ бо прибѣго́хъ, къ держа́внѣй по́мощи, да не погрѣшу́ наде́жды моея́.

Свѣти́ленъ, гла́съ 1:

Влады́чице, всѣ́хъ Влады́чица и всѣ́хъ вы́шшая, всѣ́хъ же превосходя́щая го́рнихъ во́инствъ, простри́ ру́ку держа́вну и сохрани́ мíръ, свяще́нники благослови́, Тебѣ́ священнодѣ́йствующія, мона́хи же прости́, моля́щіяся Тебѣ́, оте́чество на́ше соблюди́, Свята́я Богоро́дице. И ны́нѣ на́съ сподо́би ви́дѣти Небе́сное Ца́рство и ра́йскую две́рь, егда́ ся́детъ Судія́ суди́ти вселе́ннѣй во второ́мъ и стра́шномъ Суди́лищѣ, Влады́чице а́нгеловъ.

Сла́ва, и ны́нѣ:

Да и́мя Твое́, Богоро́дице, на земли́ славосло́вится, Иже изъ Тебе́ просія́въ грѣ́шникомъ держа́вную наде́жду и стѣ́ну Тя́ дарова́, Тобо́ю бо вся́кое дыха́ніе къ Бо́гу притека́етъ.

На хвали́техъ стихи́ры, гла́съ 5:

Блажи́мъ Тя́, Богоро́дице Дѣ́во,* и сла́вимъ Тя́, вѣ́рніи, по до́лгу:* гра́дъ непоколеби́мый,* стѣ́ну необори́мую,* тве́рдую предста́тельницу* и прибѣ́жище ду́шъ на́шихъ.

Святѣ́йшая херуви́мъ,* вы́шшая небе́съ, Всепѣ́тая,* Богоро́дицу Тя́ вои́стинну исповѣ́дующе,* и́мамы, грѣ́шніи, спасе́ніе* и обрѣта́емъ во искуше́ніихъ предста́тельство.* Тѣ́мже не преста́й о на́съ моля́щи,* держа́во и прибѣ́жище ду́шъ на́шихъ.

Востру́бимъ трубо́ю пѣ́сней,* прекло́ншися бо свы́ше, Всецари́ца Ма́ти Дѣ́ва* благослове́ньми вѣнчава́етъ воспѣва́ющія Ю.* Ца́ріе и кня́зи [2] да стеку́тся,* и Цари́цѣ да воспле́щутъ въ пѣ́снехъ,* Царя́ ро́ждшей,* сме́ртію одержи́мыя пе́рвѣе* разрѣши́ти человѣколю́бно Благоволи́вшаго.

Па́стыріе и учи́теліе,* до́браго Па́стыря, Пречи́стую Ма́терь, соше́дшеся, восхва́лимъ:* свѣ́щникъ златоза́рный, свѣтоно́сный о́блакъ,* небе́съ Простра́ннѣйшую, одушевле́нный киво́тъ,* огнезра́чный Влады́чень престо́лъ,* маннопріе́мную злату́ю ста́мну,* заключе́нную Сло́ва две́рь,* всѣ́хъ христіа́нъ прибѣ́жище,* пѣ́сньми богоглаго́ливыми похваля́юще, си́це рце́мъ:* пала́то Сло́ва,* сподо́би смире́нныя ны́ Небе́снаго Ца́рствія,* ничто́же бо невозмо́жно хода́тайству Твоему́.

Сла́ва, и ны́нѣ, гла́съ 8. Подо́бенъ: О, пресла́внаго чудесе́!

О, пресла́внаго чудесе́! небесе́ и земли́ Цари́ца, отъ святы́хъ сро́дниковъ на́шихъ умоля́емая, до нынѣ́ зе́млю Ру́сскую покрыва́етъ и ли́ка Своего́ изображе́ніями ми́лостивно обогаща́етъ. О, Влады́чице Держа́вная! не преста́ни и на бу́дущее вре́мя во утвержде́ніе на Руси́ Правосла́вія ми́лости и чудеса́ излива́ти до вѣ́ка. Ами́нь.

Славосло́віе вели́кое и отпу́стъ.



НА ЛИТУРГІИ,
Слу́жба вся́ Богоро́дицы.

[Блаже́нна отъ кано́новъ, пѣ́снь 3-я и 6-я. Проки́менъ, гла́съ 3, пѣ́снь Богоро́дицы: Вели́читъ душа́ Моя́ Го́спода, и возра́довася ду́хъ Мо́й о Бо́зѣ, Спа́сѣ Мое́мъ. Сти́хъ: Яко призрѣ́ на смире́ніе рабы́ Своея́, се́ бо отны́нѣ ублажа́тъ Мя́ вси́ ро́ди. Апо́столъ къ Филипписíемъ, зача́ло 240. Аллилу́ія, гла́съ 8: Слы́ши Дщи́ и ви́ждь, и приклони́ у́хо Твое́. Сти́хъ: Лицу́ Твоему́ помо́лятся бога́тіи лю́дстіи. Ева́нгеліе Луки́, зача́ло 54. Прича́стенъ: Ча́шу спасе́нія пріиму́, и и́мя Госпо́дне призову́.]

Примѣчанія:
[1] См. Службу Казанской иконѣ Пресвятой Богородицы, стих. на литіи, «Слава, и нынѣ».
[2] См. Службу св. влмч. Димитрію Солунскому, стих. на литіи, «И нынѣ».

Источникъ: Мине́я Ма́ртъ. Ча́сть пе́рвая. — М.: Издательскій совѣтъ Русской Православной Церкви, 2002. — С. 28-41.

/ Къ оглавленію раздѣла /


Наверхъ / Къ титульной страницѣ

0