Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 20 августа 2017 г. Сейчасъ на порталѣ посѣтителей - 10.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Ма́рта въ 1-й де́нь.
Святы́я преподобному́ченицы Евдокíи.

Аще е́сть 40-ца, пое́мъ Аллилу́ія. Аще же ни́, тропа́рь.

На Го́споди воззва́хъ: стихи́ры, гла́съ 4. Подо́бенъ: Да́лъ еси́ зна́меніе.

Серде́чными бразда́ми* сѣ́мя боже́ственное прія́ла еси́,* я́ко земля́ тучна́, богодухнове́нная,* и стори́цею воздаю́щая муче́нія кла́съ* прозябла́ еси́ вои́стинну* и въ жи́тницы мы́сленныя собра́лася еси́* си́лою Ду́ха, тя́ претвори́вшаго* и измѣне́ніемъ лу́чшимъ измѣни́вшаго благода́тію,* Евдокíе всехва́льная.

Ме́ртвыя воскреси́ла еси́* животво́рнымъ твои́мъ провѣща́ніемъ,* Евдокíе сла́вная,* умертви́вши пе́рвѣе* воздержа́нія болѣ́зньми тѣле́сныя стра́сти.* И ны́нѣ живе́ши на небесѣ́хъ съ му́ченики,* до́брѣ сконча́вши тече́ніе страда́нія* по́мощію Ду́ха,* о всѣ́хъ, вѣ́рою тя́ воспѣва́ющихъ, моля́щи.

Сла́ва, и ны́нѣ, богоро́диченъ, гла́съ и подо́бенъ то́йже:

Ра́дуйся, солнцезра́чная луче́,* Со́лнца незаходи́маго престо́ле,* я́же Со́лнце возсія́вши недоумѣ́нное.* Ра́дуйся, у́ме, облиста́яй Боже́ственными сія́ньми,* заре́ мо́лнійная, освѣти́вшая земли́ концы́,* и́стинное зла́та блиста́ніе,* Вседо́брая и Всенепоро́чная,* Свѣ́тъ Невече́рній вѣ́рнымъ облиста́вши.

Крестобогоро́диченъ, подо́бенъ то́йже:

Распина́ема Христа́ Человѣколю́бца* ви́дящи Пречи́стая* и ре́бра ископава́ема копіе́мъ,* пла́чущи, вопія́ше:* что́ сіе́, Сы́не Мо́й?* что́ Ти безблагода́тніи лю́діе возда́ша,* за я́же сотвори́лъ еси́ до́брая и́мъ,* и тщи́шися безча́дствовати Мя́, Вселюбе́знѣйшій?* Удивля́юся, Благоутро́бне,* Твоему́ во́льному распя́тію.

Тропа́рь, гла́съ 8:

Пра́востію у́мною ду́шу твою́ привяза́вши въ любо́вь Христо́ву, тлѣ́нныхъ, и кра́сныхъ, и вре́менныхъ забы́тіемъ претекла́ еси́, я́ко Сло́ва учени́ца: поще́ніемъ стра́сти пе́рвѣе умертви́вши, страда́льчески второ́е врага́ посрами́ла еси́. Тѣ́мъ Христо́съ сугу́быхъ вѣнца́ сподо́би тя́, сла́вная Евдокíе; преподо́бная страстоте́рпице, моли́ Христа́ Бо́га спасти́ся душа́мъ на́шимъ.


[НА УТРЕНИ,]
Кано́нъ, гла́съ 2.

Пѣ́снь 1.

Ирмо́съ: Гряди́те, лю́діе, пои́мъ пѣ́снь Христу́ Бо́гу, раздѣ́льшему мо́ре и наста́вльшему лю́ди, я́же изведе́ изъ рабо́ты еги́петскія, я́ко просла́вися.

Душе́вное озлобле́ніе услади́ти ми́, Благíй, благоизво́ли страстоно́сицы Твоея́ Евдокíи мольба́ми, и сію́ воспѣ́ти, Сло́ве, пода́ждь ми́.

Кто́ Твою́, Христе́, благосе́рдія пучи́ну я́вѣ исповѣ́сть? я́ко спасе́нія содѣ́ла приста́нище, дре́вле прегрѣше́ній глубину́ су́щую.

Якоже земля́ блага́я, твоя́ душа́, пресла́вная, до́ждь прія́тъ уче́нія Ге́рмана преподо́бнаго, и кла́съ благоче́стія пло́дъ принесе́.

Мы́сленный у́гль въ се́рдцы — Христа́ — пріе́мши, всечестна́я, креще́ніемъ, я́коже хвра́стіе, ле́сть и плотскíя стра́сти вои́стинну попали́ла еси́.

Богоро́диченъ: Богоподо́бное селе́ніе вои́стинну Ты́ яви́лася еси́, небе́съ простра́ннѣйши и честнѣ́йши, Богоро́дице Дѣ́во, и ны́нѣ о Тебѣ́ ра́дуется а́нгельскій ли́къ.

Пѣ́снь 3.

Ирмо́съ: Утверди́ на́съ въ Тебѣ́, Го́споди, дре́вомъ умерщвле́й грѣ́хъ, и стра́хъ Тво́й всади́ въ сердца́ на́съ, пою́щихъ Тя́.

Утвержде́ніе, Христе́, и стѣ́ну необори́му въ пе́рсѣхъ преподо́бная Твоя́ стяжа́вши, прило́ги не поколеба́ся врага́, но сего́ до конца́ потреби́.

Возжела́вши Христо́вы красоты́ и Сего́ любо́вію снѣда́ема, страда́ніемъ сочта́лася еси́ Ему́, Евдокíе богому́драя и всесла́вная.

Креще́ніемъ Христо́вымъ, и слеза́ми твои́ми, и по се́мъ кровьми́ муче́нія очи́стившися, хра́мъ была́ еси́ Тро́ицѣ и мѣ́сто свяще́нія.

Богоро́диченъ: Отъ Анны ра́дость ро́ду процвѣла́ еси́ и ражда́еши, Дѣ́во, Царя́, и сра́дуются рождеству́ Твоему́ жены́, разрѣ́шшеся Тобо́ю отъ кля́твы.

Сѣда́ленъ, гла́съ 8. Подо́бенъ: Прему́дрости.

Просвѣ́щшися заре́ю Боже́ственною, преле́стную оста́вила еси́ тму́ и житіе́ воспрія́ла еси́ съ пло́тію невеще́ственное, благода́тьми Боже́ственными испо́лнившися Ду́ха, ма́лымъ провѣща́ніемъ ме́ртвыя воскреси́ла еси́. Тѣ́мъ при кончи́нѣ муче́нія вѣнце́мъ боже́ственнѣ украси́лася еси́ и льсти́ваго посрами́ла еси́, Евдокíе равноа́нгельная, моли́ Христа́ Бо́га прегрѣше́ній оставле́ніе дарова́ти чту́щимъ любо́вію святу́ю па́мять твою́.

Сла́ва, и ны́нѣ, богоро́диченъ:

Яко дѣ́ву и еди́ну въ жена́хъ, Тя́, безъ сѣ́мене ро́ждшую Бо́га пло́тію, вси́ ублажа́емъ, ро́ди человѣ́честіи, о́гнь бо всели́ся въ Тя́ Божества́, и я́ко младе́нца млеко́мъ пита́еши Зижди́теля и Го́спода. Тѣ́мъ, а́нгельскій и человѣ́ческій ро́дъ, досто́йно сла́вимъ пресвято́е рождество́ Твое́ и согла́сно вопіе́мъ Ти́: моли́ Христа́ Бо́га согрѣше́ній оставле́ніе дарова́ти покланя́ющимся вѣ́рою пресвято́му Рождеству́ Твоему́.

Крестобогоро́диченъ:

Агнца, и Па́стыря, и Изба́вителя Агница зря́щи на Крестѣ́, восклица́ше, пла́чущи, и, го́рько рыда́ющи, вопія́ше: мíръ у́бо ра́дуется, пріе́мляй Тобо́ю избавле́ніе, утро́ба же Моя́ гори́тъ, зря́щи Твое́ распя́тіе, е́же терпи́ши за милосе́рдіе ми́лости. Долготерпѣли́ве Го́споди, ми́лости бе́здно и исто́чниче неисчерпа́емый, умилосе́рдися и да́руй согрѣше́ній оставле́ніе вѣ́рою пою́щимъ Боже́ственныя стра́сти Твоя́.

Пѣ́снь 4.

Ирмо́съ: Услы́шахъ, Го́споди, слу́хъ Твоего́ смотре́нія, и просла́вихъ Тя́, Еди́не Человѣколю́бче.

Безбо́жія пучи́ну рѣко́ю боже́ственныхъ твои́хъ крове́й, Евдокíе сла́вная, изсуши́ла еси́.

Яже пе́рвѣе уловля́ющая блу́дными безу́мныя мре́жами, ны́нѣ къ Ца́рству Бо́жію уловля́етъ вѣ́рныя.

Еже безъ пра́вды со́браное тебѣ́ бога́тство тлѣ́нное расточи́вши пра́ведно, нетлѣ́нія бога́тство наслѣ́довала еси́.

Богоро́диченъ: Свѣ́тъ возсія́лъ еси́, Го́споди, и́же въ нощи́ и тмѣ́ прегрѣше́нія, отъ Чи́стыя Дѣ́вы воплоща́емь.

Пѣ́снь 5.

Ирмо́съ: Свѣ́та Пода́телю и вѣко́въ Тво́рче, Го́споди, во свѣ́тѣ Твои́хъ повелѣ́ній наста́ви на́съ: ра́звѣ бо Тебе́, ино́го Бо́га не зна́емъ.

Свѣ́тъ Невече́рній, озари́въ вои́стинну сла́вную, отъ стра́стныя изъя́тъ мглы́ и, къ безстра́стія пути́ наве́дъ, всесвѣ́тлу показа́.

Царя́ Бо́га, я́коже вневѣ́стившися Сы́ну, возста́вила еси́ честны́мъ Его́ призыва́ніемъ уме́ршаго лю́тѣ царе́ва сы́на, пресла́вная.

Му́жескимъ по́мысломъ на суди́щи Христа́, сла́вная, исповѣ́дуеши, Бо́га воплоще́нна, и, мече́мъ во главу́ усѣ́чена, лику́еши съ му́ченики.

Богоро́диченъ: Якоже наде́жду Твое́ предста́тельство вѣ́рніи иму́ще и бѣда́ми го́рькихъ болѣ́зней окруже́ни, къ Тебѣ́ усе́рдно, Дѣ́во, прибѣга́емъ, Влады́чице.

Пѣ́снь 6.

Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же, мя́ возведи́.

Яко тепла́ ре́вность вѣ́ры твоея́, му́ченице Евдокíе, е́юже попра́ла еси́ невѣ́рныхъ настоя́ніе и побѣ́ду пожа́ла еси́ страда́нія.

Сле́зныя то́ки совоку́пльши муче́нія ка́плямъ кро́ве твоея́, еди́ну отъ обою́ ча́шу спасе́нія соверши́ла еси́.

Яже пре́жде смра́да испо́лнена, мно́жествомъ нечистоты́ су́щи, ны́нѣ благово́нія испо́лнися и съ дѣви́ческими ли́ки весели́тся.

Богоро́диченъ: Яже мíра ра́дость, Богоро́дице Чи́стая, ра́дуйся, Тебѣ́ зову́щихъ со а́нгеломъ вѣ́рно Твоея́ ра́дости сподо́би и печа́ль на́шу разори́.

Конда́къ, гла́съ 4:

Во страда́ніи твое́мъ до́брѣ подвиза́вшися, и по сме́рти на́съ освяща́еши чуде́съ излія́ніи, всехва́льная, вѣ́рою прибѣга́ющія въ Боже́ственную це́рковь твою́, и, торжеству́юще, мо́лимъ тя́, преподо́бная му́ченице Евдокíе: да изба́вимся неду́гъ душе́вныхъ и чуде́съ благода́ть почерпе́мъ.

Икосъ:

Страстоте́рпческая це́рковь поро́да яви́ся, средѣ́ стяжа́вши са́дъ безсме́ртія, тѣ́ло сея́ честно́е, и́же сего́ объе́млющіи плоды́ вѣ́твьми крѣ́пко освяща́ются, зря́ще же, удивля́ются, ка́ко вои́стинну ме́ртво тѣ́ло источа́етъ исцѣле́нія, вразумля́я вся́? Тѣ́мъ со тща́ніемъ пріиди́те, ны́нѣ вси́ со мно́ю, смире́ннымъ, и, очи́щше скве́рну, чуде́съ благода́ть почерпе́мъ.

Пѣ́снь 7.

Ирмо́съ: Образу злато́му на по́лѣ Деи́рѣ служи́му, тріе́ Твои́ о́троцы небрего́ша безбо́жнаго велѣ́нія, посредѣ́ же огня́ вве́ржени, ороша́еми, поя́ху: благослове́нъ еси, Бо́же оте́цъ на́шихъ.

Иже дре́вле уловля́яй, одожде́ніи зло́бными всю́ объе́мь тя́, вра́гъ льсте́цъ, попира́емь твои́ми нога́ми, вельми́ зва́ше: увы́ мнѣ́, побѣди́хся, — глаго́ля, — Евдокíе прехва́льная, твои́мъ непрело́жнымъ къ Бо́гу присвое́ніемъ, чи́стая.

Воздержа́ніемъ мно́гимъ мудрова́нія твоея́ пло́ти умертви́вши, ме́ртвымъ подава́еши воскресе́ніе къ Бо́гу дерзнове́ніемъ твои́мъ и къ Нему́ несомнѣ́нною, Евдокíе, мольбо́ю твое́ю: и́бо во́лю твори́тъ боя́щихся Его́.

Стра́сти Христо́вы, я́коже украше́ніе боголѣ́пно, на вы́и твоея́ души́ нося́щи, сего́ привлекла́ еси́ нетлѣ́нія жела́ніемъ, отону́дуже тя́ обручи́ невѣ́сту, непоро́чно зову́щую: благослове́нъ Бо́гъ оте́цъ на́шихъ.

Богоро́диченъ: Пе́рвѣе Гедео́нъ, провозвѣща́я Твое́, Чи́стая, Боже́ственное рождество́ я́вѣ, окри́нъ но́ситъ, по́лнъ воды́, ю́же отъ руна́ оцѣди́: все́ бо въ Тя́ Божество́ всели́ся, Пречи́стая, благослове́нъ Пло́дъ чре́ва Твоего́.

Пѣ́снь 8.

Ирмо́съ: Въ пе́щь о́гненную ко отроко́мъ евре́йскимъ снизше́дшаго и пла́мень въ ро́су прело́жшаго Бо́га, по́йте дѣла́ я́ко Го́спода, и превозноси́те во вся́ вѣ́ки.

Якоже прише́дши умо́мъ ко и́стинному Рачи́телю, удо́бь терпи́ши плотскíя я́звы и огня́ го́рькую болѣ́знь, му́ченице всесла́вная, благословя́щи Христа́ во вѣ́ки вся́.

Треволне́нія бѣ́дъ сокруши́ла еси́ кре́стнымъ я́дриломъ и душе́вное корми́ло въ Ца́рствія Бо́жія приста́нища спасла́ еси́, сла́вная, благословя́щи Христа́ во вѣ́ки.

Безобра́зія страсте́й совлекла́ся еси́ и ду́шу обложи́ла еси́ кра́сною оде́ждею безстра́стія, тѣ́мже Христо́съ, тя́ невѣ́сту обручи́въ, въ небе́сныя всели́ хра́мы.

Богоро́диченъ: Свобожда́ется Тобо́ю пра́баба, Богоро́дице, осужде́нія, и се́ ны́нѣ жены́ стра́ждутъ за Христа́, и ра́дуется естество́ же́нское, я́коже первому́ченица вопіе́тъ, дѣ́ва Ѳе́кла.

Пѣ́снь 9.

Ирмо́съ: Отъ Бо́га Бо́га Сло́ва, неизрече́нною му́дростію прише́дшаго обнови́ти Ада́ма, я́дію въ тлѣ́ніе па́дшаго лю́тѣ, отъ Святы́я Дѣ́вы неизрече́нно воплоти́вшагося на́съ ра́ди, вѣ́рніи, единому́дренно пѣ́сньми велича́емъ.

Лица́ твоего́ зрѣ́ніе духо́вною заре́ю, я́коже со́лнце, возсія́вши, чи́стая, стра́нно показа́шеся видѣ́ніе зря́щимъ невѣ́рнымъ, и́бо, я́коже возлюби́вши Христа́, отъ Него́ просла́вилася еси́ досто́йно, всечестна́я.

Души́ твоея́ свѣщу́ вже́гши, му́ченице, еле́емъ крове́й твои́хъ свѣ́тло, ра́дующися, ны́нѣ возшла́ еси́ въ Боже́ственный невѣ́стникъ Христо́въ съ му́дрыми дѣ́вами, съ ни́миже помина́й всѣ́хъ, вѣ́рою хва́лящихъ тя́.

Отъ терно́вныя пре́лести, я́ко шипо́къ, богому́драя, сладкоуха́ненъ, израсла́ еси́ кра́сно, и вѣ́рныхъ облагово́нила еси́ ду́ши, Евдокíе, невѣ́рныхъ же отрази́ла еси́ тве́рдо смра́дъ преле́стный, тѣ́мже тя́ блажи́мъ.

Соверша́ющихъ любо́вію моле́бную па́мять твою́, къ Бо́гу и Изба́вителю, му́ченице чи́стая, моли́твами отъ вся́кихъ бѣ́дъ спаси́ и мою́ душе́вную скве́рну, и́же ху́до тя́ воспѣ́вшаго, отмы́й.

Богоро́диченъ: О на́съ моля́щи Сы́на Твоего́ не преста́й, Дѣ́во, Человѣколю́бца Бо́га, Тя́ бо наде́жду стяжа́хомъ и Твои́мъ предста́тельствомъ избавля́емся бѣ́дъ, и страсте́й, и прегрѣше́ній, и болѣ́зней, вѣ́рою Тя́ сла́вящіи.

Источникъ: Минíа, мѣ́сяцъ Ма́ртъ. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 1 – 4 об.

/ Къ оглавленію раздѣла /


Наверхъ / Къ титульной страницѣ

0