Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 21 октября 2017 г. Сейчасъ на порталѣ посѣтителей - 18.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́нія въ 30-й де́нь.
Слу́жба преподо́бному Петру́, царе́вичу Орды́нскому, Росто́вскому чудотво́рцу.

[НА ВЕЛИЦѢЙ ВЕЧЕРНИ,
Блаже́нъ му́жъ.., 1-й антифо́нъ.] На Го́споди воззва́хъ: стихи́ры [на 8], гла́съ 5:

Свѣ́тлости духо́вныя* ты́ бы́лъ еси́ сподо́бленъ, о́тче Пе́тре,* проти́ву трудо́въ твои́хъ вели́кихъ, свя́те:* тѣ́мже ны́нѣ во тмѣ́ су́щія грѣхо́внѣй просвѣти́,* дерзнове́ніе имѣ́яй ко Христу́ Бо́гу и Спа́су,* Того́ моли́ всѣ́хъ на́съ поми́ловати.

Грѣхо́вный мра́къ отъ серде́цъ на́шихъ отгна́въ,* тя́жесть облегчи́, лежа́щую на ра́мѣхъ на́шихъ, преподо́бне Пе́тре,* да вси́ твою́ па́мять, соше́дшеся, воспои́мъ,* очище́нія прося́ще согрѣше́ній:* моли́ о спасе́ніи ду́шъ на́шихъ.

Сла́ва, гла́съ 8:

Равноа́нгельное житіе́ пожи́въ, болѣ́зньми по́стническими, о́тче преподо́бне Пе́тре, и воздержа́ніемъ тѣ́ло порабо́тивъ, покори́лъ еси́ ду́ху, дѣ́латель бы́лъ за́повѣдей Госпо́днихъ: испе́рва бо добро́ту о́браза сохрани́лъ еси́, страда́льныя по́двиги по́стными по́ты соверши́лъ еси́ и, сугу́бымъ вѣнце́мъ украси́вся, прилѣ́жно Спа́са моли́ спасти́ся на́мъ.

И ны́нѣ, богоро́диченъ:

[Ца́рь Небе́сный за человѣколю́біе на земли́ яви́ся и съ человѣ́ки поживе́, от Дѣ́вы бо Чи́стыя пло́ть пріе́мый и изъ Нея́ проше́дый съ воспрія́тіемъ, еди́нъ е́сть Сы́нъ, сугу́бъ естество́мъ, но не ѵпоста́сію. Тѣ́мже, соверше́нна Того́ Бо́га и соверше́нна Человѣ́ка вои́стинну проповѣ́дающе, исповѣ́дуемъ Христа́ Бо́га на́шего: Его́же моли́, Ма́ти Безневѣ́стная, поми́ловатися душа́мъ на́шимъ.]

Вхо́дъ. Проки́менъ дне́ и чте́нія.

Прему́дрости Соломо́новы чте́ніе. [Глава́ 5 и 6.]

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́новы чте́ніе. [Глава́ 3.]

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́новы чте́ніе. [Глава́ 4.]

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ры самогла́сны, гла́съ 4:

Струя́ми сле́зъ твои́хъ сѣ́мя боже́ственное напои́лъ еси́, я́ко земля́ плодови́та, богодухнове́нне, стори́цею преподо́бія пло́дъ прозя́блъ еси́ вои́стинну и въ жи́тницы собра́лъ еси́ мы́сленныя си́лою духо́вною тебе́ претво́ршаго премѣне́ніемъ лу́чшимъ, Пе́тре пресла́вне.

Вѣ́рою и любо́вію, о празднолю́бцы, соше́дшеся дне́сь, псалмы́ и пѣ́сньми восхва́лимъ небе́снаго человѣ́ка, земна́го а́нгела, къ нему́ же возопіи́мъ: о всеблаже́нне преподо́бне, по́стниковъ похвало́! о на́съ моли́ся ко Го́споду, Пе́тре, о́тче на́шъ, спасти́ся душа́мъ на́шимъ.

Имѣ́я дерзнове́ніе ко Христу́ Бо́гу, моли́ся о ста́дѣ твое́мъ, преподо́бне, сохрани́тися отъ искуше́ній вра́жіихъ, огня́ и меча́, и вся́каго прило́га, и навѣ́та лука́ваго: тебе́ бо гра́дъ и покро́въ иму́ще, на тя́ наде́жду по Бо́зѣ стяжа́хомъ, блаже́нне.

Житіе́ благоче́стно на земли́ стяжа́въ, прія́телище чи́сто Ду́ха ты́ яви́лся еси́, просвѣща́я вѣ́рою къ тебѣ́ притека́ющія, блаже́нне, тѣ́мже моли́ твоего́ Влады́ку просвѣти́ти ду́ши на́съ, воспѣва́ющихъ тя́, Пе́тре преподо́бне, о́тче на́шъ.

Ра́дуйся, преподо́бне о́тче Пе́тре всече́стне, и́же зако́нъ Госпо́день до́брѣ извы́клъ еси́ и вѣ́ру соблю́лъ еси́ невреди́му, хода́тай яви́вся о ста́дѣ твое́мъ Христу́ Бо́гу: Того́ моли́ умири́ти мíръ и спасти́ ду́ши на́ша.

Сла́ва, гла́съ 8:

Преподо́бне и богоблаже́нне о́тче Пе́тре, вои́стинну сподо́бился еси́ боже́ственныя жи́зни: посто́мъ и бдѣ́ніемъ изнуря́я тѣ́ло твое́, о́бразъ бы́въ мона́хомъ; а́ще бо и тѣле́сный язы́къ умолче́, но чудеса́ свидѣ́тельствуютъ, гра́дъ Росто́въ хва́лится, имѣ́юще въ себѣ́ неотъе́млемое сокро́вище. Наро́ди бо, зря́ще честну́ю ра́ку твои́хъ моще́й и чудеса́ быва́емая, прославля́ютъ просла́вльшаго тя́ Го́спода. Ему́же моли́ся непреста́нно дарова́ти Правосла́вному ИМПЕРАТОРУ на́шему [и́мярекъ] на враги́ побѣ́ды, и вселе́ннѣй ми́ръ и ве́лію ми́лость.

И ны́нѣ, [богоро́диченъ:

Безневѣ́стная Дѣ́во, Яже Бо́га неизрече́нно заче́нши пло́тію, Ма́ти Бо́га Вы́шняго, Твои́хъ рабо́въ мольбы́ пріими́, Всенепоро́чная, всѣ́мъ подаю́щи очище́ніе прегрѣше́ній, ны́нѣ на́ша моле́нія пріе́млющи, моли́ спасти́ся всѣ́мъ на́мъ.]

На стихо́внѣ стихи́ры, гла́съ 5. Подо́бенъ: Ра́дуйся.

Ра́дуйся, по́стническихъ вои́стинну* подвиго́въ благоуха́нный сосу́де,* Кре́стъ бо на ра́мо взе́мъ,* Влады́цѣ Христу́ себе́,* преблаже́нне, возложи́въ,* пло́ти попра́лъ еси́* до́лу влеку́щее мудрова́ніе,* добродѣ́тельми же ду́шу просвѣти́лъ еси́,* къ Боже́ственному воскрили́вся раче́нію,* Пе́тре пресла́вне.* Тѣ́мъ, пресвѣ́тлую твою́ пра́зднующе па́мять,* Боже́ственнаго человѣколю́бія про́симъ получи́ти* твои́ми моли́твами* и мíрови дарова́ти ве́лію ми́лость.

Сти́хъ: Честна́ предъ Го́сподемъ* сме́рть преподо́бныхъ Его́.

Угль богосвѣ́тлый,* огню́ прибли́жися,* богоно́се, Ду́ха,* показа́ся въ мíрѣ,* Пе́тре, просвѣща́я ду́ши* и́же вѣ́рно, богому́дре,* приступающихъ къ тебѣ́,* къ Свѣ́ту водя́ сія́* невече́рнему, преподо́бне,* пусты́нныя же ороша́я свы́ше* Боже́ственною благода́тію* и у́гліе страсте́й увяда́я.* Тѣ́мже побѣ́ды тебѣ́ проявле́нно* дарова́ вѣне́цъ, блаже́нне,* Боже́ственныя пра́вды* Смотри́тель Христо́съ,* Его́же моли́ дарова́ти душа́мъ на́шимъ* ми́ръ и ве́лію ми́лость.

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

Лѣ́ствицѣ на не́бо подо́бно* я́вѣ житіе́ твое́, богому́дре:* е́ю бо къ высотѣ́ взя́тъ бы́лъ еси́* и Христу́ Влады́цѣ бесѣ́довати,* всеблаже́нне Пе́тре, сподо́бился еси́,* у́мъ просвѣща́я и́же отту́ду сія́ніи,* равноа́нгельну свѣ́тлость прія́лъ еси́,* Ему́же ны́нѣ предстоя́,* моли́ся, преподо́бне,* соверша́ющихъ боже́ственную* и всесвяще́нную па́мять твою́* съ тобо́ю предста́вити* и мíру дарова́ти ве́лію ми́лость.

Сла́ва, гла́съ то́йже. Самогла́сенъ:

Преподо́бне о́тче, не да́лъ еси́ сна́ свои́ма очи́ма, ни вѣ́ждома свои́ма дрема́нія, до́ндеже ду́шу и тѣ́ло отъ страсте́й свободи́лъ еси́ и себе́ угото́валъ еси́ Ду́ху жили́ще. Прише́дъ бо, Христо́съ со Отце́мъ оби́тель въ тебѣ́ сотвори́. Единосу́щнѣй Тро́ицѣ уго́дникъ бы́въ, великопроповѣ́дниче Пе́тре, моли́ся о душа́хъ на́шихъ.

И ны́нѣ, богоро́диченъ:

Хра́мъ и Две́рь еси́, [Пала́та и Престо́лъ Царе́въ, Дѣ́во всечестна́я, Еюже Изба́витель мо́й, Христо́съ Госпо́дь, во тмѣ́ спя́щимъ яви́ся, Со́лнце сы́й пра́вды, просвѣти́ти хотя́, я́же созда́ по о́бразу Своему́ руко́ю Свое́ю. Тѣ́мже, Всепѣ́тая, я́ко Ма́терне дерзнове́ніе къ Нему́ стяжа́вшая, непреста́нно моли́, спасти́ся душа́мъ на́шимъ].

Тропа́рь, гла́съ 8:

Оте́чества своего́, блаже́нне Пе́тре, удали́вся, и богоме́рзкую вѣ́ру отню́дъ возненави́дѣвъ, отъ тмы́ во свѣ́тъ прише́лъ еси́ и всели́лся еси́ во сла́вный и многонаро́дный гра́дъ Росто́въ, въ не́мже житіе́ че́стно пожи́въ, це́рковь во и́мя святы́хъ апо́столъ Петра́ и Па́вла воздви́глъ еси́ Христо́вою благода́тію, и сію́ чу́дными ико́нами, я́ко невѣ́сту, украси́въ, святи́теля же, и кня́зя, и вся́ лю́ди житіе́мъ свои́мъ удиви́лъ еси́, тѣ́мже и по сме́рти твое́й Христо́съ да́ромъ чуде́съ обогати́ тя́. Помина́й на́съ, чту́щихъ пресвѣ́тлую па́мять твою́, преподо́бне о́тче Пе́тре, и моли́ Христа́ Бо́га спасти́ся душа́мъ на́шимъ.

Сла́ва, и ны́нѣ, богоро́диченъ:

Иже на́съ ра́ди [рожде́йся отъ Дѣ́вы, и распя́тіе претерпѣ́въ, Благíй, испрове́ргій сме́ртію сме́рть и Воскресе́ніе явле́й я́ко Бо́гъ, не пре́зри, я́же созда́лъ еси́ руко́ю Твое́ю, яви́ человѣколю́біе Твое́, Ми́лостиве. Пріими́ ро́ждшую Тя́, Богоро́дицу, моля́щуюся за ны́, и спаси́, Спа́се на́шъ, лю́ди отча́янныя].


НА УТРЕНИ,
На Бо́гъ Госпо́дь: Тропа́рь преподо́бнаго, два́жды. Сла́ва, и ны́нѣ, богоро́диченъ.

По 1-й каѳи́смѣ сѣда́ленъ свято́му, [гла́съ 5. Подо́бенъ: Собезнача́льное Сло́во].

По́стника Госпо́дня пѣ́сньми почти́мъ, я́ко умертви́вша вся́ прило́ги страсте́й воздержа́ніемъ тве́рдымъ и крѣ́пкимъ терпѣ́ніемъ вои́стинну, и посрами́вшаго зѣло́ сопроти́внаго всю́ горды́ню, и ны́нѣ моля́щагося Го́сподеви поми́ловатися душа́мъ на́шимъ. [Два́жды.]

[Сла́ва, и ны́нѣ,] богоро́диченъ:

Стра́шно чу́до зача́тія и несказа́ненъ о́бразъ рождества́ въ Тебѣ́ позна́ся, Чи́стая Приснодѣ́во, ужаса́етъ ми́ у́мъ и удивля́етъ помышле́ніе, сла́ва Твоя́, Богоро́дице, всѣ́мъ простре́ся, во спасе́ніе ду́шъ на́шихъ.

По 2-й каѳи́смѣ сѣда́ленъ, гла́съ 4:

Посто́мъ, и воздержа́ніемъ, и на земли́ лега́ніемъ увяди́лъ еси́ плотскíя стра́сти, и на небесѣ́хъ отъ Христа́ вели́ко воздая́ніе воспрія́лъ еси́. Тѣ́мъ благоугоди́лъ еси́ Бо́гу и досто́инъ сосу́дъ чудесе́мъ по кончи́нѣ яви́лся еси́, всѣ́мъ исцѣле́ніе подава́я, вѣ́рою притека́ющимъ къ ра́цѣ моще́й твои́хъ, Пе́тре преподо́бне. [Два́жды.]

Сла́ва, и ны́нѣ, богоро́диченъ:

Обнови́ла еси́, Чи́стая, боже́ственнымъ рождество́мъ Свои́мъ, истлѣ́вшее страстьми́ земноро́дныхъ существо́, возста́вила еси́ вся́ отъ сме́рти къ жи́зни нетлѣ́ннѣй. Тѣ́мъ Тя́ ублажа́емъ, вси́, Дѣ́во Препросла́вленная, я́коже прорекла́ еси́.

[Поліеле́й и велича́ніе:

Ублажа́емъ тя́, преподо́бне о́тче Пе́тре, и чте́мъ святу́ю па́мять твою́, наста́вниче мона́ховъ и собесѣ́дниче а́нгеловъ.

Псало́мъ избра́нный: Терпя́ потерпѣ́хъ Го́спода, и вня́тъ ми́ и услы́ша моли́тву мою́...]

По поліеле́и сѣда́ленъ, гла́съ 1. [Подо́бенъ: Ли́къ а́нгельскій.]

Житіе́ благоче́стно на земли́ сконча́въ, прія́телище чи́стое Ду́ху яви́лся еси́, просвѣща́я и́же вѣ́рою къ тебѣ́ притека́ющія, блаже́нне. Тѣ́мже моли́ Влады́ку Христа́ Бо́га просвѣти́ти ду́ши на́ша, воспѣва́ющихъ тя́, Пе́тре преподо́бне, о́тче на́шъ. [Два́жды.]

Сла́ва, и ны́нѣ, богоро́диченъ:

Всѣ́хъ Творца́, и Бо́га, и Созда́теля, Пренепоро́чная Чи́стая, Ду́хомъ Боже́ственнымъ въ ложесна́хъ зача́тъ, безъ истлѣ́нія родила́ еси́, Его́же сла́вяще, Тя́ воспѣва́емъ, Дѣ́во, я́ко пала́ту всѣ́хъ Царя́ и мíрови заступле́ніе.

Та́же степе́нна, 1-й антифо́нъ 4-го гла́са. Проки́менъ, гласъ 4: Возвесели́тся пра́ведникъ о Го́сподѣ* и упова́етъ на Него́. Сти́хъ: Услы́ши, Бо́же, моли́тву мою́, внегда́ моли́тимися къ Тебѣ́. Вся́кое дыха́ніе... Ева́нгеліе отъ Матѳе́я, зача́ло 43.

По 50-мъ псалмѣ́ стихи́ра, гла́съ 8. Самогла́сенъ:

На не́бо теку́щую возше́дъ колесни́цу, чу́дне, кра́йнее житіе́ [стяжа́въ] воздержа́ніемъ, и пусты́нею смотря́я вы́шняго Іерусали́ма красоты́, и болѣ́зненныхъ подвиго́въ досто́йно по́честь воспріи́мь, съ небе́сными ра́дуешися чинонача́ліи, преблаже́нне, вѣ́чныхъ бла́гъ наслѣ́дникъ яви́лся еси́, моли́ся, богоно́се Пе́тре, Спа́су всѣ́хъ умири́ти мíръ и спасти́ ду́ши на́ша.

Кано́нъ [Богоро́дицы, со ирмосо́мъ на 6 и] свята́го Петра́ Царе́вича [на 8], гла́съ 4.

Пѣ́снь 1.

Ирмо́съ: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Ве́сь ты́ Творцу́ возложи́ себе́, вседуше́вное жела́ніе излія́въ Тому́, сего́ ра́ди духо́вную благода́ть воспрія́лъ еси́, свѣ́томъ благода́ти озаря́яся, блаже́нне Пе́тре пресла́вне, вѣ́рою твою́ па́мять соверша́ющія просвѣти́ и отъ тмы́ грѣхо́вныя моли́твами твои́ми изба́ви.

Изъ мла́да Христа́ возлюби́лъ еси́, всеблаже́нне Пе́тре пресла́вне, всече́стне чудотво́рче, и Пречи́стую Его́ Богома́терь. Тѣ́мъ просвѣща́еши чудесы́, я́ко мо́лнія, всю́ вселе́нную.

Ны́нѣ, преблаже́нне Пе́тре, душа́ твоя́ почива́етъ на небесѣ́хъ, со Христо́мъ во Ца́рствіи небе́снѣмъ, здѣ́ же честны́я твоя́ мо́щи подаю́тъ исцѣле́нія приходя́щимъ съ вѣ́рою.

Богоро́диченъ: Ра́дуйся, Пресвята́я Богоро́дице, а́нгельское удивле́ніе, проро́ческое проповѣ́даніе, апо́стольская немо́лчная уста́, моли́ся Сы́ну Твоему́ и Бо́гу на́шему, да сохрани́тъ мѣ́сто сіе́ и святу́ю оби́тель [сію́] блаже́ннаго моле́ніемъ.

Пѣ́снь 3.

Ирмо́съ: Твоя́ пѣсносло́вцы, Богоро́дице, живы́й и незави́стный Исто́чниче, ли́къ Себѣ́ совоку́пльшія, духо́вно утверди́, въ боже́ственнѣй Твое́й сла́вѣ, вѣнце́въ сла́вы сподо́би.

Яко свѣтоза́рное сія́ніе яви́ся ты́ Тріѵпоста́снаго Божества́, Пе́тре блаже́нне, омраче́нныхъ ду́ши просвѣща́еши моли́твами твои́ми.

Изъ мла́да во́зраста воспрія́лъ еси́ во Ордѣ́ Христо́во повелѣ́ніе, и вѣ́ру, и утвержде́ніе, прише́лъ еси́ во гра́дъ Росто́въ и сія́еши, я́ко сія́ніе Тріѵпоста́снаго Божества́, преблаже́нне.

Креста́ Госпо́дня си́лою укрѣпля́емь, блаже́нне Пе́тре, преще́ніемъ вѣ́рныя твоея́ моли́твы, стремле́нія бѣсо́вская на земли́ побѣди́ Бо́жіею си́лою.

Богоро́диченъ: Ра́дуйся, Влады́чице Дѣ́во, це́рквамъ еси́ красота́, царе́мъ похвала́, князе́мъ держа́ва, непреста́нно моли́ся Сы́ну Своему́ и Бо́гу сохрани́ти гра́дъ се́й и лю́ди, моли́твами всеблаже́ннаго Петра́.

Сѣда́ленъ, гла́съ 8:

Тве́рдостію ра́зума украша́яся, плотскíя тяготы́ отве́рглъ, и горды́ню попра́лъ еси́, и бы́лъ еси́ оби́телище Ду́ху Пресвято́му, неукло́ннымъ ра́зумомъ простира́яся ко Христу́ Бо́гу, многоко́зненнаго же стрѣ́лы притупи́лъ еси́ и лу́ки сокруши́лъ еси́, всеблаже́нне Пе́тре: моли́ Христа́ Бо́га грѣхо́въ оставле́ніе пода́ти чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Яко дѣ́ву [и] еди́ну въ жена́хъ, Тя́, безсѣ́менѣ ро́ждшую Бо́га пло́тію, вси́ блажи́мъ, ро́ди человѣ́честіи: о́гнь бо всели́ся въ Тя́ Божества́, и, я́ко младе́нца, дои́ши Зижди́теля и Го́спода. Тѣ́мже, а́нгельскій и человѣ́ческій ро́дъ, досто́йно сла́вимъ пресвято́е Рождество́ Твое́, и согла́сно вопіе́мъ Ти́: моли́ Христа́ Бо́га согрѣше́ній оставле́ніе дарова́ти, воспѣва́ющимъ досто́йно сла́ву Твою́.

Пѣ́снь 4.

Ирмо́съ: Сѣдя́й въ сла́вѣ на Престо́лѣ Божества́ во о́блацѣ ле́гцѣ, прíиде Іису́съ Пребоже́ственный, Нетлѣ́нною Дла́нію и спасе́ зову́щія: сла́ва, Христе́, си́лѣ Твое́й.

Иже на земли́ степе́нь ца́рственный имѣ́лъ еси́, всеблаже́нне Пе́тре, свои́ми моли́твами ми́рное Ца́рство воспрія́лъ еси́ и ны́нѣ на небесѣ́хъ со Христо́мъ ца́рствуеши.

Исцѣле́нія содѣва́етъ, блаже́нне, боже́ственный гро́бъ тво́й, Пе́тре, отгоня́еши бо неду́ги и ду́хи лука́выя отъ человѣ́къ и укрѣпля́еши мудрова́нія и́хъ, е́же восхваля́ти труды́ твоя́, всече́стне.

Со враго́мъ дре́вле бо́ршися воздержа́ніемъ, ны́нѣ крѣ́пкую получи́лъ еси́ побѣ́ду, блаже́нне Пе́тре, пресла́вне чудотво́рче, му́ченически претерпѣ́въ труды́ и низложи́въ бѣсо́вскія ополче́нія.

Богоро́диченъ: Христа́ на́мъ родила́ еси́, Пречи́стая Богоро́дице Влады́чице, Богора́дованная Дѣ́во, спаси́ гра́дъ и лю́ди, къ Тебѣ́ прибѣга́ющія, Богоро́дице Пренепоро́чная.

Пѣ́снь 5.

Ирмо́съ: Ужасо́шася вся́ческая о Боже́ственнѣй сла́вѣ Твое́й: Ты́ бо, неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га, и родила́ еси́ Безлѣ́тнаго Сы́на, всѣ́мъ, воспѣва́ющимъ Тя́, ми́ръ подава́ющая.

Зако́нно моли́твами и посто́мъ всегда́ подвиза́лся еси́, блаже́нне Пе́тре, безмѣ́рно покори́лъ еси́ плотскíй ра́зумъ, смири́въ крѣ́постію Боже́ственнаго Ду́ха.

Отъ ю́ности возжела́лъ еси́ о́браза мона́шескаго и отъ Христа́ воспрія́лъ еси́ вѣне́цъ златы́й и ри́зу нетлѣ́нну, ны́нѣ, всеблаже́нне Пе́тре, со а́нгелы ра́дуется ду́хъ тво́й.

Гро́бъ честна́го тѣлесе́ показа́ся вѣ́рнымъ лю́демъ ду́шъ и тѣле́съ на исцѣле́ніе, и отгна́ніе страсте́й отъ твои́хъ моще́й вси́ почерпа́емъ.

Богоро́диченъ: Всесвѣ́тлымъ укра́шена еси́ свѣ́томъ, Богора́дованная Ма́ти: Ты́ бо породи́ всѣ́хъ честнѣ́йша Христа́ Бо́га на́шего, Его́же моли́, да изба́витъ ны́ отъ всѣ́хъ напа́стей.

Пѣ́снь 6.

Ирмо́съ: Боже́ственное сіе́ и всечестно́е соверша́юще пра́зднество, богому́дріи, Богома́тере, пріиди́те, рука́ми воспле́щимъ, отъ Нея́ ро́ждшагося Бо́га сла́вимъ.

Удиви́ся чудесе́мъ твои́мъ ве́сь мíръ, преблаже́нне Пе́тре, воспрія́лъ бо еси́ отъ Христа́ вѣне́цъ небе́сный, его́же сподо́би и на́съ причасти́тися твои́ми моли́твами, всече́стне.

Лу́къ си́льныхъ сокруши́лъ еси́, бра́нь вся́ку непрія́зненну потреби́лъ еси́, всеблаже́нне Пе́тре, вѣща́ніе пусти́лъ еси́ во всю́ вселе́нную.

Всеблаже́нне Пе́тре, уго́дниче Бо́жій, на небесѣ́хъ предстоя́ престо́лу Бо́жію, мо́лишися о на́съ, здѣ́ же честны́я мо́щи боля́щихъ исцѣля́ютъ и отъ грѣ́хъ изыма́ютъ.

Богоро́диченъ: Изсуши́ла еси́ сады́ безбо́жія, Пренепоро́чная Дѣ́во, Свои́мъ Прозябе́ніемъ, прозя́бшую во мнѣ́ зло́бу искорени́, Богоневѣ́сто.

Конда́къ, гла́съ 4:

Яви́ся ве́ліе со́лнце Христо́вой Це́ркви, просвѣща́я уче́нія свѣтлостьми́, всече́стне, я́ко черпа́ломъ златы́мъ, отъ кла́дязя неиско́паннаго чуде́съ поче́рплъ еси́, отъ исто́чника неистощи́маго, на па́мять успе́нія твоего́ прише́дшимъ, всеблаже́нне Пе́тре, ны́нѣ всѣ́мъ подава́еши грѣхо́въ проще́ніе, сла́во преподо́бнымъ.

Икосъ:

Возлюби́въ, преподо́бне, Христо́вы Боже́ственныя за́повѣди и возненави́дѣвъ мíра сего́ наслажде́ніе, пріи́де усе́рдно къ Тому́ и бы́сть свѣти́льникъ, просвѣща́я концы́ блиста́ніемъ духо́внымъ. Тѣ́мъ, припа́дая, молю́ тя́: просвѣти́ мои́ о́чи душе́вныя, воспѣва́ти твоя́ по́двиги, поще́ніе, бдѣ́ніе и сле́зы, болѣ́зни и изможде́ніе тѣ́ла блаже́нныя ра́ди бу́дущія жи́зни, ея́же ны́нѣ наслажда́ешися, Пе́тре преблаже́нне, всѣ́мъ подая́ грѣхо́въ проще́ніе, сла́во преподо́бнымъ.

Пѣ́снь 7.

Ирмо́съ: Не послужи́ша тва́ри богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́.

Блаже́нно твое́ житіе́ и кончи́на, всече́стне, безсме́ртна, блаже́нне Пе́тре, сего́ ра́ди тя́ Христо́съ свы́ше украси́ вѣнце́мъ, и просвѣща́еши ве́сь мíръ чудесы́, преподо́бне.

Яви́лся еси́ ны́нѣ гра́ду Росто́ву, Пе́тре богоблаже́нне, сто́лпъ непоколеби́мый, и стѣна́ неруши́мая, и вели́кое прибѣ́жище, отъ тебе́ пріе́млюще исцѣле́ній благода́ть, пое́мъ: Бо́же, благослове́нъ еси́.

Хотя́ отъ мірски́хъ сла́достей отлучи́тися, стра́ненъ человѣ́комъ яви́лся пло́ть нося́, бу́дущая и нетлѣ́нная стяжа́въ святы́й, соверши́въ тече́ніе богоно́сныхъ оте́цъ, я́влься о́бщникъ небе́сному Ца́рствію.

Богоро́диченъ: Безъ сѣ́мене зачала́ еси́ Творца́ всѣ́хъ, Христа́ Бо́га, и неизрече́нно родила́ еси́, Его́же моли́, дерзнове́ніе иму́щи къ Нему́, да и на́съ спасе́тъ, вопію́щихъ: Бо́же, благослове́нъ еси́.

Пѣ́снь 8.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки.

Лику́ютъ на небесѣ́хъ чи́нове а́нгельстіи, всеблаже́нне Пе́тре, вѣ́рныхъ же собо́ри, на земли́ твою́ па́мять похваля́юще, пою́тъ: Го́спода по́йте, дѣла́, и превозноси́те Его́ во вѣ́ки.

Чудесы́, свя́те, твои́ми душе́вныя болѣ́зни исцѣли́, твои́ми моли́твами, Пе́тре пресла́вне, прося́щимъ отпуще́ніе безчи́сленныхъ зо́лъ испроси́, со безпло́тными си́лами Христу́ предстоя́, съ ни́ми же пое́мъ непреста́нно: Го́спода воспѣва́йте, дѣла́, и превозноси́те Его́ во вѣ́ки.

Богоро́диченъ: Изъ пречи́стаго чре́ва, Богома́ти, небе́снаго дождя́ ка́пля на́мъ ука́ну, на отмове́ніе скве́рнамъ, на здра́віе тѣлеси́, на прогна́ніе лука́ваго, тѣ́мже Тя́ блажи́мъ, Чи́стая, во вѣ́ки.

Пѣ́снь 9.

Ирмо́съ: Вся́къ земноро́дный да взыгра́ется, Ду́хомъ просвѣща́емь, да торжеству́етъ же безпло́тныхъ умо́въ естество́, почита́ющее свяще́нное торжество́ Богома́тере, и да вопіе́тъ: ра́дуйся, Всеблаже́нная Богоро́дице, Чи́стая Приснодѣ́во.

Удиви́ся во все́мъ мíрѣ, Пе́тре, твоя́ па́мять: чудесы́ сія́еши, я́ко со́лнце, злы́я болѣ́зни исцѣля́я всѣ́мъ, тѣ́мже моя́ стра́сти разжени́, молю́тися, прося́ мнѣ́ отпуще́нія грѣхо́въ, чудотво́рче Христо́въ.

Да вхо́дятъ ны́нѣ во святы́й хра́мъ се́й, къ честно́му гро́бу твоему́, блаже́нне Пе́тре, цари́ и кня́зи, бога́тіи и убо́зіи, припа́дающе, про́сятъ отъ тебе́ почерпа́ти исцѣле́нія, здра́віе и спасе́ніе, тѣ́мъ тя́ вси́ велича́емъ.

Ны́нѣ помоли́ся ко Го́споду, всечу́дне Пе́тре блаже́нне, о и́же твоя́ честны́я мо́щи почита́ющихъ, всегда́ приходя́щихъ съ вѣ́рою: слѣпы́мъ — прозрѣ́ніе, хромы́мъ — хожде́ніе, боля́щимъ всѣ́мъ здра́віе да́руй, да тя́ вси́ велича́емъ.

Богоро́диченъ: Арха́нгели и а́нгели, проро́цы и апо́столи и ве́сь ли́къ преподо́бныхъ оте́цъ и священному́ченикъ, съ преблаже́ннымъ Петро́мъ ко Христу́ прилѣ́жно, съ Пречи́стою Его́ Ма́терію, за ве́сь мíръ моли́теся, да изба́витъ на́съ отъ всѣ́хъ бѣ́дъ, Его́же вси́ велича́емъ.

Свѣти́ленъ. Подо́бенъ: Жены́, услы́шите.

Мірска́го пристра́стія, я́ко отъ скве́рны, уклони́лся еси́, и, а́лчбою пло́ть увяди́въ, обнови́лъ еси́ души́ крѣ́пость, преподо́бне, и сла́вою обогати́лся еси́ небе́сною, сла́вне. Тѣ́мже моля́ о на́съ не преста́й, о́тче преподо́бне. [Два́жды.]

[Сла́ва, и ны́нѣ,] богоро́диченъ:

Истинную Богоро́дицу, Тя́ исповѣ́дуемъ, Влады́чице, Тобо́ю спа́сшіися, Бо́га бо неизрече́нно родила́ еси́, разори́вшаго Кресто́мъ сме́рть, съ Ни́мже Тя́, Дѣ́во, восхваля́емъ.

На хвали́техъ стихи́ры [на 4], гла́съ 8:

Преподо́бне о́тче,* досточу́дне и богоблаже́нне Пе́тре,* обрѣ́лъ еси́ ду́шу твою́* отъ вся́кія скве́рны чи́сту,* Ду́ха благода́ть Всесвята́го въ тя́ всели́ся,* я́ко незаходи́мый Свѣ́тъ,* Его́же дѣ́телію* ду́хи болѣ́зненныя отго́ниши,* вы́ну исцѣля́еши неду́ги и болѣ́зни* приступа́ющимъ къ тебѣ́ про́стымъ се́рдцемъ,* соверша́ющимъ твою́ святу́ю па́мять* и кла́няющимся святы́мъ твои́мъ моще́мъ,* богоно́се, Христо́въ уго́дниче,* подая́й ми́ръ и ве́лію ми́лость.

Чу́вства вся́ уста́вилъ еси́* и, наказа́въ зако́нно, прему́дре,* боже́ственнаго ра́зума* исто́чникъ показа́лся еси́,* Ду́ха Свята́го си́лою* чудеса́ содѣва́я, блаже́нне Пе́тре,* и отъ сла́вы въ сла́ву пре́йде,* дѣя́ніи сла́ву воспріи́мъ,* апо́столомъ собесѣ́дникъ бы́въ.

Вы́шняго по́мощію* и щито́мъ и́стиннымъ огра́ждься,* си́лою Креста́ укрѣпле́нъ,* вся́ полки́ проти́вныхъ побѣди́,* человѣ́ческія умы́* просвѣща́еши чудесы́ мно́гими* и удивля́еши вся́* дѣя́ній твои́хъ по́двиги, Пе́тре.

Вся́, чту́щія па́мять твою́ свѣ́тло,* сподо́би твои́ми моли́твами* лю́тыхъ напа́стей* и стра́стныхъ бу́рь всѣ́хъ гонзну́ти,* при́сно грѣхо́въ проще́ніе прія́ти* и доити́ ми́лости и ра́дости вѣ́чныя,* преблаже́нне Пе́тре.

Сла́ва, гла́съ то́йже:

Пріиди́те, вси́ вѣ́рніи, согла́сно воспои́мъ преблаже́ннаго Петра́, благоче́стія свѣ́тлость, воздержа́нія пра́вило, терпѣ́нія столпа́, простоты́ сокро́вище, смире́нія рѣку́ незави́стну, ни́щихъ утѣ́ху, стра́нныхъ страннопріи́мника, и́стинныя любве́ Христо́вы дѣ́лателя, вои́стинну бли́жняго: се́й у́бо жи́въ и по сме́рти человѣ́комъ засту́пникъ и спаси́тель показа́ся, болѣ́знемъ неисцѣ́льнымъ и вся́ческимъ страсте́мъ исцѣли́тель. Христа́ моли́ спасти́ся душа́мъ на́шимъ.

И ны́нѣ, богоро́диченъ:

Влады́чице, пріими́ моли́твы ра́бъ Твои́хъ и изба́ви на́съ отъ вся́кія ну́жды и печа́ли.

Славосло́віе вели́кое. Ектеніи́, и отпу́стъ.



НА ЛИТУРГІИ,

Блаже́нна [отъ кано́на преподо́бнаго,] пѣ́снь 3-я и 6-я. Проки́менъ, гла́съ 7: Честна́ предъ Го́сподемъ* сме́рть преподо́бныхъ его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Апо́столъ, къ Гала́томъ, зача́ло 213. Аллилу́ія, гла́съ 6: Блаже́нъ му́жъ, боя́йся Го́спода, [въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́.] Ева́нгеліе Луки́, зача́ло 24. Прича́стенъ: Въ па́мять вѣ́чную бу́детъ пра́ведникъ, отъ слу́ха зла́ не убои́тся.

Источникъ: Слу́жба и Ака́ѳистъ преподо́бному Петру́ царе́вичу, Росто́вскому чудотво́рцу. — Изда́ніе второ́е. — М.: Cѵнода́льная Тѵпогра́фія, 1910. — Л. 1 – 15.

/ Къ оглавленію раздѣла /


Наверхъ / Къ титульной страницѣ

0