Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 23 октября 2017 г. Сейчасъ на порталѣ посѣтителей - 19.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́нія въ 30-й де́нь.
Слу́жба собо́ра святы́хъ сла́вныхъ и всехва́льныхъ двуна́десяти апо́столовъ.

НА МАЛѢЙ ВЕЧЕРНИ,
На Го́споди воззва́хъ: стихи́ры [на 4], гла́съ 1:

Пріиди́те, вѣ́рніи,* всехва́льный собо́ръ* двуна́десяти апо́столовъ Христо́выхъ* сла́вно восхва́лимъ:* Петра́, ка́меня вѣ́ры,* Па́вла, учи́теля язы́къ,* напе́рсника Христо́ва Іоа́нна Богосло́ва* и бра́та его́ Іа́кова,* Андре́я богому́драго,* Фили́ппа и Варѳоломе́я,* Матѳе́я, списа́вшаго Благовѣ́стіе,* ди́внаго Ѳому́, Си́мона Зило́та,* Іу́ду, сро́дника Госпо́дня,* съ Іа́ковомъ пресла́внымъ. [Два́жды.]

Апо́столи сла́вніи,* Христо́вы ученицы́ богозва́нніи,* вселе́нныя учи́теліе,* обрѣ́тше Го́спода Бо́га* и человѣ́ковъ Хода́тая су́ща,* Тому́ боголѣ́пнѣ прилѣпи́стеся* и я́ко Бо́га Того́ и я́ко Человѣ́ка всесоверше́нна* въ мíрѣ я́вѣ проповѣ́дасте.

Егда́ на престо́лѣхъ обоюна́десятихъ* ся́дете со всѣ́хъ Судіе́ю* суди́ти вся́кой тва́ри,* неосужде́нны ны́ покажи́те* и тмы́ и вся́каго муче́нія изба́вите,* боже́ственніи апо́столи.

Сла́ва, и ны́нѣ, богоро́диченъ:

Апо́столовъ удобре́ніе, Богообра́дованная, су́щи, омраче́на мя́ сластьми́ жите́йскими покая́нія просвѣти́ заря́ми, я́ко да велича́ю Тя́.

На стихо́внѣ стихи́ры, гла́съ 8:

Апо́столи прему́дріи,* Христо́вы ученицы́ богозва́нніи,* вселе́нныя учи́теліе* ва́шими моли́твами* боже́ственнымъ уче́ніемъ внима́ти укрѣпи́те мя́* и стезе́ю тѣ́сною помога́йте ходи́ти ми́ всегда́,* я́ко да доспѣ́ю* въ пребыва́ніе ра́йское простра́ннѣйшее.

Сти́хъ: Во всю́ зе́млю изы́де вѣща́ніе и́хъ* и въ концы́ вселе́нныя глаго́лы и́хъ.

Ученико́въ Твои́хъ ли́къ вселе́нную просвѣти́:* бы́вше бо иногда́ ры́бъ ловцы́,* ны́нѣ человѣ́ковъ бы́ша,* тѣ́хъ ра́ди, Бо́же, поми́луй на́съ.

Сти́хъ: Небеса́ повѣ́даютъ сла́ву Бо́жію,* творе́ніе же руку́ Его́ возвѣща́етъ тве́рдь.

Апо́стольскій ли́къ* Ду́хомъ Святы́мъ просвѣти́лъ еси́, Христе́,* и на́шу скве́рну грѣхо́вную* тѣ́хъ ра́ди омы́й, Бо́же,* и поми́луй на́съ.

Сла́ва, гла́съ то́йже:

Христо́вы ученицы́, егда́ съ Ни́мъ суди́ти ся́дете суду́ пови́нныхъ, неосужде́нну мою́ ду́шу соблюди́те, оскверне́нную безмѣ́стными дѣ́лы, я́ко блазíи мои́ предста́теліе и я́ко мíра засту́пницы.

И ны́нѣ, богоро́диченъ:

Апо́столовъ ра́досте и страстоте́рпецъ вѣне́цъ неувяда́емый, вои́стинну еси́ Богороди́тельница, Всенепоро́чная Отрокови́це, съ ни́миже испроси́ на́мъ, Влады́чице, прегрѣше́ній избавле́ніе и житію́ исправле́ніе, вѣ́рою прося́щимъ Тя́ и вопію́щимъ Ти́: ра́дуйся, всеи́стиннѣ благи́хъ сокро́вище.

Тропа́рь, гла́съ 4:

Апо́столовъ первопресто́льницы и вселе́нныя учи́теліе, Влады́ку всѣ́хъ моли́те ми́ръ вселе́ннѣй дарова́ти и душа́мъ на́шимъ ве́лію ми́лость.

[Слава, и нынѣ, богородиченъ:

Еже отъ вѣ́ка утае́нное, и а́нгеломъ несвѣ́домое та́инство, Тобо́ю, Богоро́дице, су́щимъ на земли́ яви́ся: Бо́гъ въ несли́тномъ соедине́ніи воплоща́емь, и Кре́стъ во́лею на́съ ра́ди воспріи́мъ, и́мже воскреси́въ первозда́ннаго, спасе́ отъ сме́рти ду́ши на́ша.]


НА МАЛОМЪ ПОВЕЧЕРІИ,
Кано́нъ Петра́ и Па́вла, его́же краегране́сіе: Петра́ почита́ю, Па́вла пою́ разу́мно. Гла́съ 4.

Пѣ́снь 1.

Ирмо́съ: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Пода́ждь ми́, Го́споди, Пресвята́го Твоего́ Ду́ха ка́пли дарова́ній, сло́во наро́чито, и возвеселю́ся, вѣ́рно похваля́я пе́рвыхъ апо́столъ Твои́хъ исправле́нія.

Оста́вилъ еси́, прехва́льне Пе́тре, усе́рдно вре́менная и Христо́вымъ стопа́мъ послѣ́довалъ еси́. Невѣ́рство же оста́вивъ, Па́вле, и Призва́вшему тя́ послѣ́довалъ еси́.

Благода́ть, апо́столи, суще́ственнѣ наше́дшую ва́мъ, пріе́мше Боже́ственнаго Ду́ха, проидо́сте зе́млю всю́, Пе́тре и Па́вле, уча́ще концы́.

Богоро́диченъ: Витíйстіи многовѣща́нніи и мусикíйстіи велегла́сніи язы́цы Тя́ не мо́гутъ чти́ти или пѣ́ти, Чи́стая: па́че бо человѣ́ка содѣ́яшася въ Тебѣ́ еди́нѣй Боже́ственная та́инства.

Пѣ́снь 3.

Ирмо́съ: Твоя́ пѣсносло́вцы, Богоро́дице, живы́й и незави́стный Исто́чниче, ли́къ Себѣ́ совоку́пльшія, духо́вно утверди́, въ боже́ственнѣй Твое́й сла́вѣ, вѣнце́въ сла́вы сподо́би.

Сро́дникъ, Пе́тре, тебѣ́ Андре́й проявля́етъ Мессíю Христа́, къ Нему́же вѣ́рою приступи́лъ еси́. И ты́, Па́вле чу́дный, богодѣ́тельнымъ креще́ніемъ отъ Ана́ніи просвѣти́лся еси́.

Ле́стно и́же писа́ніемъ зако́на па́дающій ро́дъ Изра́илевъ просвѣще́ніемъ благода́ти Пе́тръ приве́дъ, язы́къ же стада́ Па́велъ отъ пре́лести изба́ви.

На́ги и про́сты во язы́ки посла́лъ еси́ Твоя́ ученики́, вмѣ́сто ору́жія Твое́ и́мя нося́ще свято́е, и ле́стную бра́нь, Христе́, вѣ́рою разруши́ша.

Богоро́диченъ: Испо́лнися, апо́столи, позна́ти Го́спода вся́ земля́, отъ Дѣ́вы возсія́вшаго и мíръ обно́вльша боже́ственнымъ ва́шимъ проповѣ́даніемъ, Пе́тре и Па́вле прехва́льніи.

Пѣ́снь 4.

Ирмо́съ: Неизслѣ́дный Бо́жій совѣ́тъ, е́же отъ Дѣ́вы воплоще́нія Тебе́, Вы́шняго, проро́къ Авваку́мъ усмотря́я, зовя́ше: сла́ва си́лѣ Твое́й, Го́споди.

Съ крѣ́пкими у́бо немощнíи, съ витíями же невѣ́жди спле́тшеся благоче́стно, Пе́тре и Па́вле, взе́мше побѣ́ду, Христо́вы апо́столи.

Отсту́пника Си́мона, волхва́ лю́таго, я́ко златолю́бца обличи́ боже́ственный Пе́тръ, и ны́нѣ Па́велъ му́дрый стези́ развраща́ющаго Христо́вы Ели́ма ослѣпи́лъ е́сть.

Невѣ́жественно ры́барь и усма́рь сло́во иму́ще, но растворе́нно Боже́ственною со́лію, ду́ши любому́дрыхъ услади́ша и Христу́ вѣ́рою приведо́ша.

Богоро́диченъ: Рѣ́чію богодохнове́нною пре́жде Авваку́мъ го́ру Тя́ чи́сту и присѣ́нну боже́ственный рече́, Приходя́щаго отъ ю́га и Тобо́ю Воплоща́ема, Влады́чице, возвѣща́я явле́нно.

Пѣ́снь 5.

Ирмо́съ: Ужасо́шася вся́ческая о Боже́ственнѣй сла́вѣ Твое́й: Ты́ бо, неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га, и родила́ еси́ Безлѣ́тнаго Сы́на, всѣ́мъ, воспѣва́ющимъ Тя́, ми́ръ подава́ющая.

Яко су́ща тве́рда, Христо́съ тя́ ка́мень нарече́, Пе́тре, и на тебѣ́ Це́рковь, ея́же а́довы врата́ не одолѣ́ютъ. Тебе́ же, Па́вле, сосу́дъ избра́нъ рече́, Сего́ пронести́ предъ язы́ки и́мя.

Пе́тръ, отве́ргся Учи́теля три́жды, три́жды же люби́ти приглаше́ніемъ присво́ися. Па́велъ, и́же пе́рвѣе ху́льникъ сы́й, тя́жко же оскорбля́я вѣ́рныя, по́слѣжде проповѣ́даше, Его́же гоня́ше пе́рвѣе.

Нетлѣ́нно зва́ніе и сла́ву присносу́щну Пе́тръ отъ Христа́ обрѣ́те съ Па́вломъ: о́въ у́бо ключи́ небе́сныя прія́тъ, се́й же въ ра́й восхи́щся, глаго́лы неизрече́нныя навы́къ па́че человѣ́ка.

Богоро́диченъ: Отъ Боже́ственнаго Ду́ха Иса́ія испо́лнь, рождество́ безъ отца́ прорече́ изъ Тебе́, Дѣ́во, ро́ждшагося Емману́ила, Иже е́сть съ на́ми Бо́гъ, Его́же, Чи́стая, родила́ еси́, тѣ́мже вси́ пое́мъ Тя́.

Пѣ́снь 6.

Ирмо́съ: Боже́ственное сіе́ и всечестно́е соверша́юще пра́зднество, богому́дріи, Богома́тере, пріиди́те, рука́ми воспле́щимъ, отъ Нея́ ро́ждшагося Бо́га сла́вимъ.

Свѣтла́ Петро́ва чудеса́, че́стна же и Па́влова зна́менія: и́бо ри́зы и сѣ́ни и́хъ неду́ги боля́щихъ исцѣлева́ютъ, прилага́еміи.

Пе́тръ вои́стинну сла́вный и Па́велъ пои́стинѣ чу́дный, дво́ица боже́ственная и честнѣ́йша жили́ща Живонача́льныя Тро́ицы всѣ́ми помина́ется.

Боля́щихъ ду́ши и тѣлеса́, я́ко боже́ственный вра́чь изря́денъ, Пе́тръ исцѣли́, Па́велъ язы́ки озари́ и свѣ́томъ Госпо́днимъ назна́мена.

Богоро́диченъ: Пѣ́ти Тя́ до́лжни есмы́, но вои́стинну по достоя́нію не мо́жемъ. Тѣ́мже пое́мъ Тя́ молча́ніемъ, чту́ще несказа́нное, е́же на Тебѣ́, Дѣ́во, содѣ́янное та́инство.

Пѣ́снь 7.

Ирмо́съ: Не послужи́ша тва́ри богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́.

Ублажи́ся Пе́тръ отъ Христа́, я́ко сему́ ре́кшу Сы́на Бо́га Жива́го, и Па́велъ почте́ся, я́ко сосу́дъ благопотре́бенъ, и взыва́ху: отце́въ Госпо́дь и Бо́гъ, благослове́нъ еси́.

Законослуже́бники у́бо Пе́тръ умудря́ше, я́коже завѣща́ся ему́, Па́велъ же — язы́чники; о́ба же благода́тію Христу́ привожда́ху и взыва́ху: оте́цъ на́шихъ Бо́же, благослове́нъ еси́.

Яко преизря́денъ Пе́тръ Христо́въ па́стырь, ста́до прія́тъ, Це́ркви же Па́велъ учи́тель боже́ственъ бы́сть, взыва́юще: оте́цъ на́шихъ Бо́же, благослове́нъ еси́.

Богоро́диченъ: Всенепоро́чная Марíе и изря́дная свя́тостію, Яже Бо́га пло́тію, Дѣ́во, ро́ждши, Неискусобра́чная Чи́стая, Того́ моли́ отъ вся́каго на́съ изба́вити наведе́нія и грѣха́.

Пѣ́снь 8.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки.

Си́лою укрѣ́плься Пе́тръ Боже́ственною, уме́ршую Тави́ѳу воскреси́, Па́велъ же Евти́ха, съ высоты́ па́дша и умерщвле́нна, возста́ви, о́ба взыва́юща: Го́спода воспѣва́йте, дѣла́, и превозноси́те Его́ во вся́ вѣ́ки.

Видѣ́ніемъ ужа́снымъ и чу́днымъ Корни́лія у́бо Пе́тръ просвѣти́, Па́велъ же Га́ія, Кри́спа, и Пане́стія, и Стефани́на крести́, о́ба зову́ща: Го́спода воспѣва́йте, дѣла́, и превозноси́те Его́ во вся́ вѣ́ки.

Блюдо́ма Петра́ свя́зана Христо́съ у́бо а́нгеломъ но́щію разрѣши́. Па́вла же и Си́лу, а́біе моля́щимся, въ кла́дѣ но́ги тве́рдо стя́гнуты, изведе́ и темни́цу потря́съ. Тѣ́мже воспое́мъ Христа́ во вѣ́ки.

Богоро́диченъ: Изба́ви страсте́й всепа́губныхъ, плени́цы же согрѣше́ній ны́нѣ расто́ргни, и́миже ко́ждо стя́жется: вси́ бо согрѣши́хомъ и очище́нія про́симъ, су́ще пови́нніи. Еже пода́ждь, Богоро́дице, мольба́ми Твои́ми превознося́щимъ Христа́ во вѣ́ки.

Пѣ́снь 9.

Ирмо́съ: Вся́къ земноро́дный да взыгра́ется, Ду́хомъ просвѣща́емь, да торжеству́етъ же безпло́тныхъ умо́въ естество́, почита́ющее свяще́нное торжество́ Богома́тере, и да вопіе́тъ: ра́дуйся, Всеблаже́нная Богоро́дице, Чи́стая Приснодѣ́во.

Ве́сь всю́ду мíръ проидо́сте, я́коже крила́ти, и Ева́нгеліе колѣ́номъ всѣ́мъ, язы́комъ и страна́мъ Христо́во проповѣ́давше, вся́ привлеко́сте къ вѣ́рѣ, Пе́тре преблаже́нный и чу́дный Па́вле апо́столе.

Прини́къ во глубо́кую ста́рость и естества́ до́лгъ, Пе́тре, исполня́я, Учи́теля твоего́ Христа́ подо́біемъ кре́стъ претерпѣ́лъ еси́. Ты́ же во главу́ твою́, Па́вле, усѣ́ченъ бы́въ, — о чу́до стра́шно! — вмѣ́сто кро́ве млека́ источи́лъ еси́ пото́ки и невѣ́рныя обрати́лъ еси́.

О, боже́ственная дво́ице, му́дрѣ вручи́вшаяся всего́ мíра душа́мъ, и ко благоче́стію отъ нече́стія претво́рше, и по сме́рти спаса́юще еще́ вѣ́рныхъ ду́ши, и ны́нѣ на́съ помяни́те и предста́вите Христу́, верхо́вніи апо́столи.

Богоро́диченъ: Спа́се Благíй, Иже естество́мъ Человѣколю́бецъ и Многомилосе́рдъ, Препѣ́тыя Твоея́ Ма́тере Дѣ́вы боже́ственными мольба́ми, Петра́ моли́твами и Па́вла, апо́столъ Твои́хъ, ми́лость Твою́ и по́мощь съ небесе́ на́мъ посли́.

Та́же обы́чныя моли́твы и отпу́стъ.



НА ВЕЛИЦЕЙ ВЕЧЕРНИ,
Блаже́нъ му́жъ.., 1-й антифо́нъ. На Го́споди воззва́хъ: стихи́ры на 8, гла́съ 2:

Да восхва́лится дне́сь* двоенадеся́тица богоизбра́нная,* апо́стольская и всечестна́я:* Пе́тръ и Па́велъ всехва́льніи,* Іа́ковъ и Іоа́ннъ, сы́ны гро́мовы,* Андре́й Первозва́нный,* богому́дрый Фили́ппъ съ Варѳоломе́емъ,* богоглаго́ливый Матѳе́й,* сла́вный Ѳома́ съ боже́ственнымъ Іу́дою и други́мъ Іа́ковомъ* и Си́монъ Зило́тъ.

Кíими похва́льными вѣнцы́* увязе́мъ Петра́ и Па́вла,* раздѣле́нныя тѣлесы́* и совоку́пленныя ду́хомъ,* богопроповѣ́дниковъ первостоя́тели?* Оваго у́бо я́ко апо́столовъ преднача́льника,* о́ваго же я́ко па́че инѣ́хъ труди́вшася.* Си́хъ бо вои́стинну досто́йно безсме́ртныя сла́вы вѣнцы́* вѣнча́етъ Христо́съ Бо́гъ на́шъ,* имѣ́яй ве́лію ми́лость.

Иже всѣ́дый со Христо́мъ на вода́хъ,* егда́ основа́ніе имя́ше несумнѣ́нно въ се́рдцы, блаже́нне,* по водѣ́, неиму́щей слѣ́да,* пути́ съ Ни́мъ пріобщи́лся еси́.* Егда́ же я́ко человѣ́къ,* я́же вы́ше человѣ́ка помы́сливъ, ужасе́ся* у́мнымъ преклоне́ніемъ,* волна́ми бу́рею поползе́ся,* разумѣ́въ же еди́наго Ко́рмчія, Бо́га и Спа́са,* про́сиши спасти́ тя,* Его́же моли́* спасти́ и просвѣти́ти ду́ши на́ша.

Пріиди́те, прему́дрости глубину́* и правосла́вныхъ догма́тъ списа́теля,* вѣ́рніи, пѣ́сньми боже́ственными дне́сь вѣнча́емъ,* Іоа́нна сла́внаго и возлю́бленнаго:* се́й бо возгреме́, е́же въ нача́лѣ бѣ́ Сло́во.* Отону́дуже громогла́сенъ показа́ся,* я́ко благовѣ́стникъ мíрови,* просія́въ многому́дреннѣ всехва́льный.

Гла́съ 8:

Проповѣ́дника вѣ́ры и слугу́ Сло́ва,* Андре́я восхва́лимъ:* то́й бо изъ глубины́ человѣ́ки уловля́етъ,* вмѣ́сто тро́сти кре́стъ въ рука́хъ держа́,* и, я́ко уже ниспуща́я си́лу,* возво́дитъ ду́ши отъ ле́сти вра́жія,* и прино́ситъ Бо́гу да́ръ благопрія́тенъ при́сно.* Того́, вѣ́рніи, въ ли́цѣ учени́къ Христо́выхъ восхва́лимъ,* да мо́лится съ ни́ми:* я́ко да ми́лостивъ на́мъ бу́детъ въ де́нь су́дный.

Іа́кова воспое́мъ Зеведе́ова вси́:* со Христо́мъ бо взы́де на го́ру Ѳаво́рскую,* и зри́тель бы́сть Боже́ственнаго Преображе́нія,* и, соше́дъ, проповѣ́даше во вселе́нную всю́* съ Петро́мъ и Іоа́нномъ.

Яко свѣти́льника Свѣ́та и ученика́,* я́ко самови́дца Сло́ва боже́ственнаго,* вси́ хва́лимъ тя́, Госпо́день апо́столе,* и́бо, благода́тныя твоя́ мре́жи простира́я,* слове́сныя ры́бы уловля́еши повелѣ́ніемъ.* Тѣ́мже и язы́цы уловля́хуся,* си́лою Ду́ха наставля́еми вѣ́рою,* всехва́льне евангели́сте Матѳе́е,* моли́ Христа́ Бо́га* грѣхо́въ оставле́ніе дарова́ти* чту́щимъ любо́вію святу́ю па́мять твою́.

Верхо́вныя я́вльшіяся отъ учени́къ,* вели́кія свѣти́льники и свѣ́тлыя апо́столы Христо́вы восхва́лимъ:* огне́мъ бо Боже́ственнаго Ду́ха* мглу́ пре́лести попали́ша всю́,* тѣ́мже и вы́шняго Ца́рствія* ору́жницы досто́йнѣ показа́шася* и благода́ти сопресто́льницы.* Сего́ ра́ди вопіе́мъ:* апо́столи Христа́ Бо́га,* прегрѣше́ній оставле́ніе испроси́те* пра́зднующимъ любо́вію святу́ю па́мять ва́шу.

Сла́ва, гла́съ 1:

Двоена́десятице апо́столъ, Го́споди, двоедесятолу́чшая я́ко со́лнце, яви́ся земли́: тѣ́хъ бо ра́ди увяди́лъ еси́ пре́лести лука́ваго и тѣ́хъ бо ра́ди озаря́еши ду́ши Твои́хъ рабо́въ, и на́съ, рабо́въ Твои́хъ, спаса́й и́хъ моли́твами, я́ко Еди́нъ Человѣколю́бецъ.

И ны́нѣ, богоро́диченъ, гла́съ то́йже:

Всемíрную сла́ву, [отъ человѣ́къ прозя́бшую и Влады́ку ро́ждшую, небе́сную две́рь воспои́мъ, Марíю Дѣ́ву, безпло́тныхъ пѣ́снь и вѣ́рныхъ удобре́ніе: Сія́ бо яви́ся не́бо и хра́мъ Божества́, Сія́, прегражде́ніе вражды́ разруши́вши, ми́ръ введе́ и Ца́рствіе отве́рзе; Сію́ у́бо иму́ще вѣ́ры утвержде́ніе, Побо́рника и́мамы, изъ Нея́ ро́ждшагося Го́спода. Дерза́йте у́бо, дерза́йте, лю́діе Бо́жіи, и́бо То́й побѣди́тъ враги́, я́ко Всеси́ленъ].

Вхо́дъ. Проки́менъ дне́ и чте́нія.

Исхо́да чте́ніе. [Глава́ 15.]

Пріидо́ша сы́нове Изра́илевы въ Ме́рру, и не можа́ху пи́ти воды́ отъ Ме́рры: горька́ бо бѣ́. Сего́ ра́ди нарече́ся и́мя мѣ́сту тому́ Го́ресть. И ропта́ху лю́діе на Моисе́я, глаго́люще: что́ піе́мъ? Возопи́ же Моисе́й ко Го́споду, и показа́ ему́ Госпо́дь дре́во, и вложи́ е́ въ во́ду, и услади́ся вода́. Та́мо положи́ ему́ оправда́нія и судьбы́, и та́мо его́ искуси́, и рече́: а́ще слу́хомъ услы́шиши гла́съ Го́спода Бо́га твоего́, и уго́дная предъ Ни́мъ сотвори́ши, и внуши́ши за́повѣдемъ Его́, и сохрани́ши вся́ оправда́нія Его́, — вся́ку болѣ́знь, ю́же наведо́хъ еги́птяномъ, не наведу́ на тя́: Азъ бо е́смь Госпо́дь Бо́гъ тво́й, исцѣля́яй тя́. И пріидо́ша во Ели́мъ, и бя́ху та́мо двана́десять исто́чниковъ во́дъ и се́дмьдесятъ сте́блій фи́никовыхъ, и ополчи́шася та́мо при вода́хъ.

Іису́са Нави́на чте́ніе. [Глава́ 4.]

Рече́ Госпо́дь ко Іису́су, глаго́ля: поими́ двана́десять муже́й отъ людíй, му́жа еди́наго отъ коего́ждо пле́мене, повели́ и́мъ, глаго́ля: возми́те отъ среды́ Іорда́на, идѣ́же стоя́ша но́зи жре́честіи, гото́выхъ двана́десять ка́меней и, изне́сше я́ съ собо́ю, положи́те въ полцѣ́ ва́шемъ, идѣ́же ста́нете та́мо въ нощи́. И призва́въ Іису́съ двана́десять муже́й сла́вныхъ отъ сыно́въ Изра́илевыхъ, еди́наго отъ коего́ждо пле́мене, рече́ и́мъ: иди́те предо мно́ю предъ лице́мъ Госпо́днимъ въ среди́ну Іорда́на, и, взе́мъ отту́ду кíйждо ка́мень еди́нъ, да возложи́тъ на ра́мена своя́, по числу́ племе́нъ (сыно́въ) Изра́илевыхъ. Да бу́дутъ ва́мъ сíи въ зна́меніе, посредѣ́ ва́съ лежа́ще всегда́, да егда́ вопро́ситъ тебе́ у́тро сы́нъ тво́й, глаго́ля: что́ су́ть ка́меніе сіе́ ва́мъ? И ты́ возвѣсти́ши сы́ну твоему́, глаго́ля: я́ко оскудѣ́ Іорда́нъ рѣка́ отъ лица́ киво́та завѣ́та Го́спода всея́ земли́, егда́ прехожда́ше его́, и изся́че вода́ Іорда́нова, и бу́дутъ ва́мъ ка́меніе сіе́ въ па́мять сыно́въ Изра́илевыхъ да́же до вѣ́ка. И сотвори́ша та́ко сы́нове Изра́илевы, я́коже заповѣ́да Госпо́дь Іису́су. И взе́мше двана́десять ка́меней отъ среды́ Іорда́на, я́коже заповѣ́да Госпо́дь Іису́су въ сконча́ніи прехожде́нія сыно́въ Изра́илевыхъ, и принесо́ша и́хъ съ собо́ю въ по́лкъ, и положи́ша и́хъ та́мо. Поста́ви же Іису́съ и другíя двана́десять ка́меней въ самѣ́мъ Іорда́нѣ на мѣ́стѣ, идѣ́же стоя́ху но́зи жреце́въ, воздвиза́ющихъ киво́тъ завѣ́та Госпо́дня, во Іорда́нѣ до́ндеже сконча́ Іису́съ вся́, ели́ка заповѣ́да Госпо́дь Іису́су повѣ́дати лю́демъ, по всѣ́мъ, ели́ка заповѣ́да Моисе́й Іису́су, и потща́шася лю́діе, и преидо́ша. И бы́сть, егда́ сконча́ша вси́ лю́діе преходи́ти (Іорда́нъ), пре́йде и киво́тъ завѣ́та Госпо́дня и жрецы́ предъ ни́ми.

Проро́чества Іо́илева чте́ніе. [Глава́ 2.]

Воструби́те трубо́ю въ Сіо́нѣ, проповѣ́дите въ горѣ́ Мое́й святѣ́й, и да смяту́тся вси́, живу́щіи на земли́, я́ко предстои́тъ де́нь Госпо́день. Якоже у́тро, разлію́тся по гора́мъ лю́діе мно́зи и крѣ́пцы, подо́бни и́мъ не бы́ша отъ вѣ́ка и по ни́хъ не приложи́тся до лѣ́тъ въ ро́дъ и ро́дъ. Якоже ви́дъ ко́нскій — ви́дъ и́хъ, и, я́коже ко́нницы, та́ко прожену́тъ, я́коже гла́съ колесни́цъ на верхи́ го́ръ востеку́тъ, и я́ко гла́съ пла́мене о́гненна, попаля́юща тро́стіе, и я́ко лю́діе мно́зи и крѣ́пцы, воополча́ющіися на бра́нь. Отъ лица́ и́хъ сокруша́тся лю́діе, вся́кое лице́, а́ки опале́ніе горнца́. Якоже борцы́ потеку́тъ, и я́коже му́жіе хра́бри взы́дутъ на огра́ды, и кíйждо въ пу́ть сво́й по́йдетъ, и не совратя́тъ путíй свои́хъ. И бу́детъ по си́хъ, и излію́ отъ Ду́ха Моего́ на вся́ку пло́ть, и прореку́тъ сы́нове ва́ши и дще́ри ва́ша, и ста́рцы ва́ши со́нія у́зрятъ, и ю́ноты ва́ши видѣ́нія уви́дятъ, и́бо на рабы́ Моя́ и на рабы́ни Моя́ во дни́ о́ны излію́ отъ Ду́ха Моего́. И да́мъ чудеса́ на небеси́ и на земли́: кро́вь, и о́гнь, и куре́ніе ды́ма. Со́лнце обрати́тся во тму́, и луна́ — въ кро́вь, пре́жде не́же пріити́ дню́ Госпо́дню, вели́кому и просвѣще́нному. И бу́детъ: вся́къ, и́же призове́тъ и́мя Госпо́дне, спасе́тся, я́ко въ горѣ́ Сіо́нѣ и во Іерусали́мѣ бу́детъ спаса́емый, я́коже рече́ Госпо́дь, и благовѣству́еміи, и́хже Госпо́дь призва́.

На литíи стихи́ры, гла́съ 4:

Пе́тре и Па́вле, Сло́ва дѣ́лателіе, Андре́е, Іа́кове и Іоа́нне прему́дре, Варѳоломе́е и Фили́ппе, Ѳомо́ и Матѳе́е, Си́моне, Іу́до, боже́ственне Іа́кове и Матѳíе, всемíрная всечестна́я ученико́въ двоенадеся́тице, и́же въ мíрѣ проповѣ́давшіи Всесвяту́ю Тро́ицу, естество́мъ Бо́га присносу́щнаго, Це́ркве неразори́мыя вои́стинну стѣ́ны и непоколеби́міи столпи́, Влады́цѣ всѣ́хъ моли́теся спасти́ся на́мъ.

Петра́ и Па́вла, и Іа́кова, Андре́я, Фили́ппа сла́внаго, Варѳоломе́я, Ѳому́, Іоа́нна, и Іа́кова Алфе́ева и съ Матѳе́емъ богопроповѣ́дникомъ, и Іу́ду всему́драго, и Си́мона Зило́та, и Матѳе́я почти́мъ, апо́столы и Влады́цѣ дру́ги су́щія, и́миже сія́ніе позна́хомъ Тро́ическое и тмы́ изба́вихомся невѣ́дѣнія, и́же си́хъ вѣ́ровавшіи уче́ніемъ.

Бога́тство некра́домо Це́ркви, сто́лпъ непоколеби́мъ благоче́стія, Варѳоломе́е, показа́лся еси́, апо́столе, въ мо́ри же стезю́ творя́, пучи́ну боже́ственныхъ источа́еши исцѣле́ній, достосла́вне, Христа́ Бо́га моли́ дарова́ти на́мъ ве́лію ми́лость.

Гла́съ 3:

Благоукраша́ется вселе́нная, Еѳіо́пія ликовству́етъ, я́ко вѣнце́мъ, красу́ема тобо́ю, просвѣти́вшися свѣ́тло, торжеству́етъ па́мять твою́, богоглаго́ливе Фили́ппе, вся́ бо вѣ́ровати Христу́ научи́лъ еси́ и тече́ніе соверши́лъ досто́йно Ева́нгелія. Тѣ́мъ дерзнове́нно Еѳіо́пія вопіе́тъ Бо́гу, Его́же моли́ дарова́ти на́мъ ве́лію ми́лость.

Гла́съ 5:

Вѣ́рно торжеству́емъ пречестну́ю па́мять твою́, Іа́кове сла́вне, не я́ко Алфе́ева тя́ сы́на, но я́ко апо́стола Христо́ва почита́юще и проповѣ́дника Того́ неизрече́ннаго воплоще́нія. Тѣ́мъ Влады́чню престо́лу со безпло́тными всегда́ предстоя́ и апо́столъ и му́ченикъ ли́ки, прилѣ́жно моли́ся спасти́ ны́ Спаси́телю и Бо́гу на́шему.

Гла́съ 1:

Іу́до всехва́льне, твое́ вѣща́ніе изы́де, я́коже мо́лнія, въ концы́ всея́ земли́, му́дре, помраче́нныя ле́стью безбо́жія къ Свѣ́ту наставля́я невече́рнему, Имже ны́нѣ сія́я, испроси́ душа́мъ на́шимъ ве́лію ми́лость.

Гла́съ 4:

Си́монъ, апо́столъ всесвѣ́тлый и пречу́дный, язы́ковъ учи́тель, мре́жа боже́ственная, изъ глубины́ поги́бельныя на́съ улови́вшая богосло́віемъ высо́кимъ, и́стинный проповѣ́дникъ, вся́ ко Христо́ву позна́нію ны́нѣ му́дрѣ приведе́. Тѣ́мже, въ вы́шнихъ сы́й, съ вы́шними ли́ки вселя́емь, моли́ся, богови́дче, Сло́ву, Христу́ Бо́гу на́шему, дарова́ти на́мъ ве́лію ми́лость.

Сла́ва, гла́съ 6:

Всечестны́й апо́столовъ приспѣ́ пра́здникъ Це́ркви Христо́вѣ, хода́тайствующій спасе́ніе всѣ́мъ на́мъ. Та́йно у́бо восплеска́вше, къ си́мъ рце́мъ: ра́дуйтеся, свѣти́льницы су́щимъ во тмѣ́, мы́сленнаго Со́лнца зари́ облиста́ющіи; ра́дуйтеся, апо́столи святíи, уче́ній боже́ственныхъ основа́нія незы́блема, дру́зи Христо́вы, сосу́ди честнíи. Пріиди́те посреди́ на́съ неви́димо, сподобля́юще даро́въ невеще́ственныхъ ва́шъ пра́здникъ восхваля́ющихъ пѣ́сньми.

И ны́нѣ, богоро́диченъ:

Блажи́мъ Тя́, Пречи́стая, я́коже прорекла́ еси́, Бо́га бо во пло́ти родила́ еси́, Его́же проповѣ́да ли́къ апо́стольскій, съ ни́миже испроси́ на́мъ прегрѣше́ній разрѣше́ніе, Всесвята́я.

На стихо́внѣ стихи́ры, гла́съ 6. Подо́бенъ: Тридне́венъ воскре́слъ.

Вели́кимъ та́йнамъ Бо́жіимъ* служи́тели бы́сте,* богосло́вцы и богови́дцы ученицы́,* и благода́ть исцѣле́ній прія́сте,* и всѣ́хъ человѣ́къ болѣ́зни исцѣля́ете.

Сти́хъ: Во всю́ зе́млю изы́де вѣща́ніе и́хъ* и въ концы́ вселе́нныя глаго́лы и́хъ.

Вели́кое прибѣ́жище и покро́въ* душа́мъ на́шимъ,* духово́мъ лю́тымъ прогна́ніе вы́ есте́,* богови́дцы апо́столи Госпо́дни,* тѣ́мже ва́съ прилѣ́жно почита́емъ.

Сти́хъ: Небеса́ повѣ́даютъ сла́ву Бо́жію,* творе́ніе же руку́ Его́ возвѣща́етъ тве́рдь.

Отъ вся́каго обстоя́нія,* и врежде́нія бѣсо́вскаго,* и прегрѣше́нія, и зла́го плѣне́нія изба́вите* и́же вѣ́рою ва́съ восхваля́ющихъ,* боже́ственніи апо́столи блаже́нніи.

Сла́ва, гла́съ то́йже:

Ры́барская тро́сть любому́дрыхъ шата́ніе и витíйскія струи́ пречерта́, богому́драя уче́нія, изображе́ній догма́ты и та́инъ благи́хъ я́сно изложи́вше Ева́нгеліе, и пи́щи присносу́щныя прича́стіе, и а́нгельское наслажде́ніе, и пребыва́ющую сла́ву.

И ны́нѣ, богоро́диченъ:

Проро́цы проповѣ́даша, апо́столи научи́ша, му́ченицы исповѣ́даша, и мы́ вѣ́ровахомъ Богоро́дицу Тя́ вои́стинну су́щую, тѣ́мъ и велича́емъ рождество́ Твое́ неизрече́нное.

На благослове́ніи хлѣ́бовъ: Тропа́рь апо́столовъ, два́жды. [Пи́санъ на ма́лѣй вече́рни.] И Богоро́дице Дѣ́во.., еди́ножды.



НА УТРЕНИ,
На Бо́гъ Госпо́дь: Тропа́рь апо́столовъ, два́жды. Сла́ва, и ны́нѣ, богоро́диченъ.

По 1-мъ стихосло́віи сѣда́ленъ, гла́съ 1. Подо́бенъ: Гро́бъ Тво́й, Спа́се.

Ли́къ духо́вный апо́стольскій мíру посла́ся та́йно отъ Бо́га Вы́шняго, и нево́лею стра́ждущимъ вра́чеве яви́шася: Тріѵпоста́снаго еди́нственнѣ призыва́юще, Боже́ственное воплоще́ніе Емману́ила Го́спода му́дрѣ написа́ша.

Сла́ва:

Моли́твами честны́хъ и боже́ственныхъ апо́столъ Твои́хъ, Человѣколю́бче Ще́дрый, еди́не Ми́лостиве, смире́ніе пода́ждь рабо́мъ Твои́мъ и спаси́ отъ бѣ́дъ воспѣва́ющихъ Тя́ и вѣ́рою покланя́ющихся.

И ны́нѣ, богоро́диченъ:

Купину́, ю́же Моисе́й неопали́му ви́дѣ, го́ру Бо́жію, святы́й о́блакъ, сѣ́нь нескве́рную, богопрія́тную трапе́зу, пала́ту Высо́каго Царя́ всесвѣ́тлую и непроходи́мую, Дѣ́во, пое́мъ Тя́.

По 1-мъ стихосло́віи чте́ніе изъ Четіи́-Мине́и святи́теля Дими́трія, митрополи́та Росто́вскаго, его́же нача́ло: По избра́ніи двана́десяти апо́столовъ, Христо́съ Госпо́дь избра́... [Зри́ Іу́нія въ 30-й де́нь.]

По 2-мъ стихосло́віи сѣда́ленъ, гла́съ 3. Подо́бенъ: Боже́ственныя вѣ́ры.

Боже́ственныя трубы́ Утѣ́шителя, возглаша́юще дыха́ніе слове́съ спасе́нія, мíру возгласи́те и и́же во мра́цѣ пре́лести спя́щія къ свѣ́ту богоразу́мія, возста́вивше, приведи́те, Боже́ственнаго Свѣ́та апо́столи, моля́ще Христа́ Бо́га спасти́ся душа́мъ на́шимъ.

Сла́ва:

Яко лучи́, блиста́ющіи заря́ми духо́вными, въ мíръ ве́сь по́слани бы́сте, чуде́съ дѣ́йство незави́стно подаю́ще, служи́теліе Христо́выхъ та́инъ бы́вше и богопи́санныя скрижа́ли, Бо́жія благода́ти напи́санныя богонауче́ннаго зако́на, священнотаи́нницы пребога́тіи.

И ны́нѣ, богоро́диченъ:

Боже́ственнаго естества́ не отлу́чся, пло́ть бы́въ во чре́вѣ Твое́мъ, но Бо́гъ вочеловѣ́чся и пребы́сть, Иже по рождествѣ́ Ма́терь Тя́ Дѣ́ву, я́ко пре́жде рождества́, сохрани́въ Всенепоро́чну, еди́нъ Госпо́дь, Того́ прилѣ́жно моли́ дарова́ти на́мъ ве́лію ми́лость.

[Велича́ніе:

Велича́емъ ва́съ, апо́столи Христо́вы двуна́десяте, ве́сь мíръ уче́ньми свои́ми просвѣти́вшія и вся́ концы́ ко Христу́ приве́дшія.

Псало́мъ избра́нный: Небеса́ повѣ́даютъ сла́ву Бо́жію...]

По поліеле́и сѣда́ленъ, гла́съ 8:

Юже проидо́сте, тва́рь просвѣ́щше, Спа́совы ученицы́, ле́сть и́дольскую, я́ко хвра́стіе, попали́вше уче́ніи ва́шими, язы́ки, отъ неразу́мія глубины́ къ боже́ственному ра́зуму улови́вше, спасо́сте, и ны́нѣ моли́теся Христу́, я́ко да ми́лостивъ на́мъ бу́детъ въ де́нь су́дный. [Два́жды.]

Сла́ва, и ны́нѣ, богоро́диченъ:

Те́плое заступле́ніе су́щимъ въ бѣда́хъ, и Помо́щницу на́шу, и къ Бо́гу премѣне́ніе, Еюже тли́ изба́вихомся, Богоро́дицу, вѣ́рніи, ублажа́емъ.

Степе́нна, 1-й антифо́нъ 4-го гла́са. Проки́менъ, гла́съ 4: Во всю́ зе́млю изы́де вѣща́ніе и́хъ* и въ концы́ вселе́нныя глаго́лы и́хъ. Сти́хъ: Небеса́ повѣ́даютъ сла́ву Бо́жію, творе́ніе же руку́ Его́ возвѣща́етъ тве́рдь. Вся́кое дыха́ніе... Ева́нгеліе отъ Матѳе́я, зача́ло 34.

По 50-мъ псалмѣ́ стихи́ра, гла́съ 6:

Благоче́стія и́стинныя проповѣ́дники [и Це́ркве пресвѣ́тлыя звѣ́зды пѣ́сньми похва́льными почти́мъ, Петра́, ка́меня вѣ́ры, и Па́вла, и́стиннаго учи́теля и таи́нника Христо́ва. Сíи бо и́стинное сло́во всѣ́явше въ сердца́ вѣ́рныхъ, всѣ́мъ плодоно́сіе да́рующа, и мо́лятъ Христа́ Бо́га спасти́ся душа́мъ на́шимъ].

Кано́новъ святы́мъ двуна́десяти апо́столомъ два́:

Пе́рвый, гла́съ 4, со ирмосо́мъ на 6, его́же краегране́сіе: Христо́вы почита́ю му́дрыя апо́столы.
Пѣ́снь 1.

Ирмо́съ: Мо́ря чермну́ю пучи́ну невла́жными стопа́ми дре́вній пѣшеше́ствовавъ Изра́иль, крестообра́зными Моисе́овыма рука́ма Амали́кову си́лу въ пусты́ни побѣди́лъ е́сть.

Ли́къ апо́стольскій пѣ́ти ми́ жела́ющу, Христе́, моли́твами и́хъ, я́ко Бо́гъ, зарю́ Пресвята́го Ду́ха да́руй ми́ и свѣ́тъ прему́дрости Твоея́.

Укрѣ́пльшеся си́лою Твое́ю и благода́тію, Христе́, си́лу проти́вныхъ вра́гъ разруши́ша честнíи Твои́ апо́столи, богови́дцы бы́вше неоску́днымъ къ Тебѣ́ манове́ніемъ.

Исцѣле́нія творя́ще, Влады́ко, Твои́мъ и́менемъ, язы́ческая совокупле́нія Твои́мъ позна́ніемъ улови́ша сла́вніи апо́столи и свѣ́томъ Твои́мъ просвѣти́ша.

Прему́дрости небе́сныя научи́вшеся, пресла́вніи Христо́вы апо́столи, я́вственно, прему́дріи, обуи́сте многосло́вія нечести́выхъ поспѣше́ніемъ проповѣ́данія.

Богоро́диченъ: Отъ Тро́ицы Пребоже́ственныя Еди́наго, Пречи́стая, родила́ еси́, изъ Тебе́ пло́тію я́вльшагося по на́мъ, благоволе́ніемъ ро́ждшаго И, и дѣ́йствомъ Ду́ха Пресвята́го, Дѣ́во Ма́ти.

Инъ кано́нъ со ирмосо́мъ на 8, гла́съ 4.
Пѣ́снь 1. Ирмо́съ то́йже.

Верхо́внѣйшаго апо́столовъ дне́сь, Петра́, я́ко предстоя́теля Христо́вы Це́ркве и первопресто́льника, богодухнове́нными пѣ́сньми досто́йно воспои́мъ.

На ка́мени твоего́ богосло́вія водрузи́ Влады́ка Іису́съ Це́рковь непрекло́нну, въ не́йже тя́, апо́столе Пе́тре, сла́вимъ.

Якоже дре́вле, Христе́, десни́цею Твое́ю по водѣ́ пѣ́ша ходя́ща Петра́ спа́слъ еси́, и мене́, потопля́ема бу́рею лю́тыхъ напа́стей, спаси́, я́ко Милосе́рдъ.

Егда́ Свѣ́тъ узрѣ́лъ еси́, возсія́вшій на Ѳаво́рѣ, со́лнечныя покрыва́ющій лучи́, свѣ́томъ, су́щимъ отъ Свѣ́та, озари́лся еси́, Пе́тре, и вѣ́рныя просвѣти́лъ еси́.

Три́жды отве́рглся еси́ Христа́, тѣ́мже вопроше́ніемъ трикра́тнымъ исцѣля́етъ твое́ согрѣше́ніе, Пе́тре пресла́вне, и утвержде́ніе показу́етъ мно́гихъ коле́блющихся.

Богоро́диченъ: Ты́, Пресвята́я Богома́ти, похвала́ Христо́выхъ апо́столовъ была́ еси́, му́чениковъ же сла́ва и проро́ковъ основа́ніе, тѣ́мже, вѣ́рніи, Тя́ вси́ достодо́лжно велича́емъ.

Катава́сія: Отве́рзу уста́ моя́...

Пѣ́снь 3.

Ирмо́съ: Весели́тся о Тебѣ́ Це́рковь Твоя́, Христе́, зову́щи: Ты́ моя́ крѣ́пость, Го́споди, и прибѣ́жище, и утвержде́ніе.

Небе́сная и честна́я боговѣща́юще на земли́ уче́нія, язы́ки о́гненными извѣству́юще, проповѣ́дницы Христо́вы, пре́дали есте́.

Показа́лъ еси́ небеса́ слове́сная — ученики́ Твоя́, Влады́ко, сла́ву Твою́ повѣ́дающія всѣ́мъ конце́мъ.

Напи́сани бы́вше на небесѣ́хъ и я́вльшеся Христу́ ссе́льницы, чту́щихъ ва́съ любо́вію ны́нѣ, прему́дріи, сохрани́те.

Богоро́диченъ: Всели́выйся въ на́съ, Иже въ вы́шнихъ живы́й, Пречи́стая, пло́ть бо пріи́мъ отъ Тебе́ безъ сѣ́мене, яви́ся.

Инъ. Ирмо́съ то́йже.

Воспои́мъ, вѣ́рніи, Петро́ва сро́дника, Андре́я, Христо́ва ученика́: То́й бо, мо́ре мре́жами испыта́въ иногда́, ры́бы улови́, ны́нѣ же вселе́нную тро́стію ло́витъ креста́, и язы́ки отъ пре́лести обраща́етъ ко креще́нію, и, Христу́ предстоя́, про́ситъ ми́ра мíру и душа́мъ на́шимъ ве́лію ми́лость.

Яко боже́ственнаго ученика́ и первозва́ннаго всѣ́хъ Христо́выхъ ученико́въ похваля́емъ тя́ любо́вію, Андре́е апо́столе, и вѣ́рно вопіе́мъ ти́: изба́ви па́ству твою́, е́йже отъ Бо́га ввѣ́рился еси́, вся́кія ско́рби, и ну́ждъ, и вся́каго озлобле́нія.

Первозва́ннаго апо́стола Христо́ва, Ева́нгелія свята́го проповѣ́дника, Россíйскія страны́ богодухнове́ннаго просвѣти́теля, Андре́я пресла́внаго пѣ́сньми восхва́лимъ.

Неизрече́нную Твою́ добро́ту Андре́й предувѣ́дѣвъ, Іису́се, сро́дника призва́ свѣ́тлѣ: Пе́тре единокро́вне, обрѣто́хомъ Мессíю, въ зако́нѣ и проро́цѣхъ проповѣ́даннаго, гряди́, прилѣпи́мся и́стинно жи́зни.

Вожделѣ́вый креста́, Христо́въ учениче́ Андре́е, получи́лъ еси́ кресто́мъ твои́мъ нетлѣ́нное Ца́рство, къ нему́же вся́ привле́клъ еси́ кресто́мъ боготаи́нники, наслѣ́дство подая́й богосло́вомъ Того́.

Богоро́диченъ: Бо́га, Его́же родила́ еси́, Дѣ́во Всенепоро́чная, моли́ о всѣ́хъ, благоче́стно Тя́ чту́щихъ, съ первозва́ннымъ Андре́емъ, улучи́ти Боже́ственнаго осія́нія Твоего́ Сы́на и стоя́нія избра́нныхъ и святы́хъ, и́бо мо́жеши, я́ко хо́щеши.

Инъ конда́къ, гла́съ 2. Подо́бенъ: Вы́шнихъ ища́.

Петра́, вѣ́рніи, ка́меня вѣ́ры, похва́лимъ и Па́вла богому́драго, созыва́ютъ бо всѣ́хъ пра́здновати вѣ́рою, собо́рнѣ вку́пѣ вся́ двана́десяте, я́ко проповѣ́дники вѣ́рѣ, прося́ща грѣхо́въ оставле́нія.

Сѣда́ленъ, гла́съ 4:

Свѣти́ла въ концѣ́хъ, ученики́ Твоя́, Христе́, яви́лъ еси́, сія́ющія душа́мъ, су́щимъ во тмѣ́, ра́зумъ Тво́й, Влады́ко, и, ле́сть и́дольскую тѣ́хъ ра́ди омрачи́въ, уче́ньми благоче́стія просвѣти́лъ еси́ мíръ. Тѣ́хъ мольба́ми спаси́ ду́ши на́ша.

Сла́ва:

Всели́вшеся во Свѣ́тѣ непристу́пнѣмъ, я́ко жили́ще Свѣ́та су́щіи, хра́мъ ва́шъ святы́й просвѣща́ете при́сно Боже́ственными проповѣ́даніи. Тѣ́мже вѣ́рою вопіе́мъ: тмы́ на́съ избавля́йте, и вся́ческихъ бѣ́дъ, и лю́таго язы́ческаго наше́ствія, умоля́юще Зижди́теля, апо́столи.

И ны́нѣ, богоро́диченъ:

Яко дѣ́ву и еди́ну въ жена́хъ, Тя́, безъ сѣ́мене ро́ждшую Бо́га пло́тію, вси́ ублажа́емъ, ро́ди человѣ́честіи: о́гнь бо всели́ся въ Тя́ Божества́, и я́ко Младе́нца млеко́мъ пита́еши Зижди́теля и Го́спода. Тѣ́мъ, а́нгельскій и человѣ́ческій ро́дъ, досто́йно сла́вимъ пресвято́е Рождество́ Твое́ и согла́сно вопіе́мъ Ти́: моли́ Христа́ Бо́га согрѣше́ній оставле́ніе дарова́ти покланя́ющимся вѣ́рою пресвято́му Рождеству́ Твоему́.

Пѣ́снь 4.

Ирмо́съ: Вознесе́на Тя́ ви́дѣвши Це́рковь на Крестѣ́, Со́лнце пра́ведное, ста́ въ чи́нѣ свое́мъ, досто́йно взыва́ющи: сла́ва си́лѣ Твое́й, Го́споди.

Глаго́ловъ боже́ственныхъ апо́столъ вѣща́ніе огнеобра́зно про́йде вселе́нную всю́, ле́сти у́бо ве́щь попаля́ющее и просвѣща́ющее благода́тію благочести́выхъ совокупле́нія.

Почернѣ́вшій мра́комъ безбо́жія мíръ богозра́чная свѣти́ла просвѣти́ша заря́ми благода́ти, ученицы́ Госпо́дни, я́вльшеся сія́ніемъ проповѣ́данія.

Свяще́нными заря́ми просвѣще́ни мы́сленнаго Со́лнца, я́ко со́лнце, въ мíрѣ сія́ете, прехва́льніи, свѣ́томъ Боже́ственнымъ пре́лести мглу́ отгоня́юще.

Же́злъ си́лы иму́ще, Кре́стъ Тво́й, сла́ное житія́ самови́дцы Твои́, Сло́ве, мо́ре пресѣко́ша, я́ко ко́ни, смуща́юще многобо́жія во́ды.

Богоро́диченъ: Укра́шена разли́чнымъ свѣтоли́тіемъ, не́бо одушевле́нное Тебе́, Царя́ ца́рствующихъ, Христе́, Дѣви́ца Пречи́стая, ны́нѣ я́ко Богоро́дица сла́вима е́сть.

Инъ. Ирмо́съ то́йже.

Апо́столъ Христо́въ бы́лъ еси́ избра́нный и Богосло́ву возлю́бленному бра́тъ единоро́дный, всехва́льне Іа́кове, испроси́ душа́мъ на́шимъ грѣхо́въ оставле́ніе.

Проповѣ́дникъ Христо́въ бы́въ, боже́ственный Іа́кове, ты́, зва́нъ у́бо, ско́ро послѣ́довалъ еси́, оте́ческую любо́вь презрѣ́въ и вѣ́чная измѣни́въ теку́щими, тѣ́мже неизрече́ннаго небе́снаго наслѣ́дія сподо́бился еси́, блаже́нне приснопа́мятне.

Свѣ́телъ тя́ о́блакъ Сло́ва, облиста́юща сла́вою обоже́на, на Ѳаво́рстѣй горѣ́ осѣни́, блаже́нне Іа́кове, и гла́съ слы́шати Оте́ческій сподо́бился еси́, извѣству́яй Того́ Сыновство́.

Вѣ́рно торжеству́емъ пречестну́ю па́мять твою́, Іа́кове сла́вне, не Алфе́ева тя́ сы́на, но я́ко апо́стола Христо́ва почита́юще. Тѣ́мже, Влады́чню престо́лу предстоя́, прилѣ́жно моли́ся спасти́ся на́мъ.

Пріими́, богогла́се апо́столе Іа́кове, моле́бную пѣ́снь, ю́же ти́ прино́симъ, твою́ пра́зднующе пречестну́ю и пресвѣ́тлую па́мять: изба́ви отъ грѣхо́въ рабы́ твоя́, верхо́вный Христо́въ апо́столе.

Богоро́диченъ: Совѣ́та Вели́каго Ангелъ, отъ Дѣ́вы Ма́тере я́влься мíру, пло́ть пріе́мъ, я́ко добродѣ́тельми укра́шена ученика́ тя показу́етъ и богогла́сника, Іа́кове, словеса́ Его́ вѣтíйствующа.

Пѣ́снь 5.

Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Боже́ственныя Твоя́ и прему́дрыя служи́тели свѣ́тъ показа́лъ еси́ въ мíрѣ, Тебе́, Незаходи́маго Свѣ́та, всѣ́мъ возвѣща́ющія.

Иже вся́ку добродѣ́тель я́вственно проше́дше, апо́столи, разли́чныя бѣсо́вскія зло́бы сплете́нія разруши́сте.

Яви́ша на́мъ Тро́ическое сія́ніе во еди́нствѣ Божества́, о́гненными язы́ки вѣща́юще апо́столи.

Богоро́диченъ: Тя́ ору́жіе непобѣди́мое на враги́ предлага́емъ, Тя́ утвержде́ніе и наде́жду на́шего спасе́нія, Богоневѣ́сто, стяжа́хомъ.

Инъ. Ирмо́съ то́йже.

Отъ ры́барей лове́цъ человѣ́ковъ и Богосло́въ бы́лъ еси́, му́дре Іоа́нне, пренебре́гъ оте́ческую и мірску́ю любо́вь, Влады́цѣ Сло́ву жела́ніемъ боже́ственныхъ возслѣ́дуя.

Небе́сныхъ ра́зумъ пріи́мъ богослове́снѣйше, Бо́га Сло́ва проповѣ́далъ еси́, — въ нача́лѣ бѣ́ Сло́во, и Сло́во бѣ́ къ Бо́гу, и Бо́гъ бѣ́ Сло́во — благовѣству́я, науча́лъ еси́.

Якоже мо́лнія свѣ́тлая, проходя́щи, вселе́ннѣй, блаже́нне Іоа́нне, яви́лся еси́, чистоты́ свѣ́тлостію, дѣ́вства же блиста́ніемъ и благоче́стія догма́ты мíръ просвѣща́я, возлю́бленне Христу́ Бо́гу.

Гро́мовъ сы́нъ бы́въ, человѣ́комъ богосло́вилъ еси́, е́же въ нача́лѣ бѣ́ Сло́во, апо́столе Іоа́нне, возлегíй бо на пе́рси Влады́ки твоего́ и отту́ду поче́рпъ богосло́вія струи́, тва́рь всю́ напая́еши.

Благовѣ́стниче Іоа́нне, равноа́нгельне, дѣ́вственниче, Богосло́ве, богонауче́нне, правосла́вно мíру пречи́стое ребро́, кро́вь и во́ду источи́вшее, проповѣ́далъ еси́, и́мже вѣ́чную жи́знь обрѣта́емъ душа́мъ на́шимъ.

Богоро́диченъ: Егда́ предста́ла еси́ съ возлю́бленнымъ ученико́мъ у Креста́ Сы́на Твоего́, услы́шала еси́ отъ Него́: се́ сы́нъ Тво́й! Съ ни́мже Тя́ вси́ пое́мъ, Богороди́тельнице Дѣ́во.

Пѣ́снь 6.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Утверди́въ ученики́ Твоя́, Спа́се, прему́дростію и чудесы́, си́льнѣйшія содѣ́лалъ еси́ е́ллинскаго буесло́вія, и си́хъ преле́стная разруши́ша велѣ́нія.

Боже́ственныя рѣ́ки прему́дрости напо́лниша спаси́тельныхъ во́дъ удо́лія вся́ церко́вная, отъ исто́чникъ спаси́тельныхъ струя́ми обога́щше.

Явльшеся живо́тныя звѣ́зды, прехва́льніи, разори́сте всю́ мра́чную пре́лесть свѣтоза́рными сія́ніи и богоразу́мія свѣ́тъ возсія́вше.

Богоро́диченъ: Всю́ Тя, голуби́цу соверше́нну и предобру́, свѣ́тлый обрѣ́тъ кри́нъ и удо́льный цвѣ́тъ, о Богома́ти, Жени́хъ мы́сленный въ Тя́ всели́ся.

Инъ. Ирмо́съ то́йже.

Отчую тебѣ́ сла́ву Собо́ю показа́вый, Фили́ппе, ли́ку ученико́въ тя́ Христо́съ вчини́, твою́ провѣ́дый добродѣ́тель, богоблаже́нне.

Тече́ніе кра́сныхъ твои́хъ но́гъ, Фили́ппе, возврати́въ къ ше́ствію небе́сному, возше́лъ еси́, ра́дуяся, и, Тро́ицѣ предста́въ, во Отцѣ́ ви́диши Сы́на и Ду́ха Боже́ственнаго, сего́ ра́ди вѣ́рою всесвяще́нную твою́ и боже́ственную пра́зднуемъ па́мять.

Со апо́столы всѣ́ми честны́ми, и проро́ки, и страстоте́рпцы, Фили́ппе, преподо́бными, іера́рхи и пра́ведными, съ Богоро́дицею моли́ разрѣше́ніе грѣхо́въ мно́гихъ и прегрѣше́ній да́ти очище́ніе вѣ́рою свѣтоно́сную и боже́ственную па́мять твою́ соверша́ющимъ.

Прече́стна тя́ Ка́меня живота́ ка́мень показа́, на не́мже созда́ Це́рковь Свою́, Варѳоломе́е, апо́столе Госпо́день. Тѣ́мже тя́ чти́мъ и ублажа́емъ.

Кресто́мъ блаже́нную кончи́ну, сла́вне Варѳоломе́е, пріе́мъ, сообра́зенъ бы́лъ еси́ страсте́мъ Учи́теля твоего́ и прича́стникъ свѣ́тлости, Боже́ственныя сла́вы, при́сно со а́нгелы Тому́ предстоя́ и неизрече́ннаго свѣ́та сподобля́емь.

Богоро́диченъ: Изъ Тебе́ па́че сло́ва Бо́гъ Сло́во роди́тися благоизво́ли пло́тію, Дѣ́во, Ма́ти Чи́стая, ученика́ избра́въ и служи́теля при́снаго, Варѳоломе́я сла́внаго.

Конда́къ, гла́съ 2. Подо́бенъ: Вы́шнихъ ища́.

Ка́мень Христо́съ ка́меня вѣ́ры прославля́етъ свѣ́тло, ученико́въ преизря́дна, и съ Па́вломъ ве́сь дванадесяточи́сленный собо́ръ дне́сь. Ихже па́мять соверша́юще вѣ́рно, си́хъ Просла́вльшаго прославля́емъ.

Икосъ:

Всечестну́ю и преблаже́нную па́мять ва́шу творя́щіи ны́нѣ, въ пѣ́снехъ прилѣ́жно вопіе́мъ къ ва́мъ: пресвѣ́тлая и богозра́чная свѣти́ла мíра, возлю́бленніи ученицы́ Христо́вы двана́десяте, я́ко иму́ще къ Нему́ дерзнове́ніе, моли́теся за ны́, ва́мъ бо дана́ е́сть благода́ть исцѣле́ній и грѣхо́въ проще́нія, прилѣ́жно у́бо Его́ моли́те грѣхо́въ и напа́стей изба́витися на́мъ, да еди́наго Человѣколю́бца, ва́съ просла́вльшаго, прославля́емъ.

Пѣ́снь 7.

Ирмо́съ: Въ пещи́ Авраа́мстіи о́троцы перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.

Сы́ны сотвори́въ ученики́ Твоя́, Иже пре́жде естество́мъ Бо́гъ, любо́вію наслѣ́дники показа́лъ еси́ оте́ческаго наслѣ́дія, Преблагíй, и ходи́ти съ Тобо́ю, я́ко съ Бо́гомъ и Влады́кою, изво́лилъ еси́.

Прему́дрости изли́тіе, серде́чную широту́, язы́къ доброглаго́ливъ, Сло́ве, пода́въ боже́ственнымъ ученико́мъ Твои́мъ, посла́лъ еси́ проповѣ́дати Ева́нгеліе Ца́рствія всѣ́мъ конце́мъ.

Явльшеся, я́ко о́блацы Бо́жія свѣ́та, апо́столи всѣ́мъ одождева́ютъ во́ду животворя́щую, зову́ще: благослове́нъ еси́ въ хра́мѣ сла́вы Твоея́, Го́споди.

Богоро́диченъ: Преукраше́нна Бо́жіею сла́вою яви́лася еси́, Пречи́стая, еди́на отъ вѣ́ка Сло́во Бо́жіе заче́ншая, Ма́ти Дѣ́во: благослове́нна Ты́ въ жена́хъ, Всенепоро́чная Влады́чице.

Инъ. Ирмо́съ то́йже.

Руко́ю любопы́тною Боже́ственная ре́бра испыта́въ и гвозде́й я́звы, я́же Безсме́ртный на́съ ра́ди подъя́тъ, и невѣ́ріе преложи́въ ра́достнѣ во благовѣ́ріе, Ѳомо́, возопи́лъ еси́: Ты́ еси́ Бо́гъ мо́й и Госпо́дь.

Осія́нъ, апо́столе Ѳомо́, сла́вою Христо́вою, и, ребро́ животво́рное осяза́въ, поче́рплъ еси́ неизслѣ́димую богосло́вія пучи́ну, и мíръ обогати́лъ еси́.

Христо́съ, вели́кое Со́лнце, лучу́ тя́ многосвѣ́тлую во Индíю посыла́етъ, мра́чную ле́сть, таи́нниче, вско́рѣ разгоня́юща, Ѳомо́, прему́дре апо́столе, и лю́ди просвѣща́юща Тро́ицу почита́ти Боже́ственную, Еюже вси́ сохраня́емся.

Пе́рвый Христо́во Ева́нгеліе написа́въ и всю́ просвѣти́въ подсо́лнечную тва́рь, Матѳе́й, зѣло́ прему́дрѣйшій и Христо́въ таи́нникъ изя́щный, ны́нѣ почита́емь свяще́нными пѣ́сньми, всѣ́мъ отпуще́нія грѣхо́въ про́ситъ, любо́вію чту́щимъ Того́.

Евангели́стъ отъ мыта́рства, я́ко послѣ́дова Тебѣ́, Христе́, претвори́ся богоглаго́ливый всеси́льною Твое́ю крѣ́постію, Матѳе́й всеизря́днѣйшій.

Богоро́диченъ: Всепѣ́тую Дѣ́ву написа́лъ еси́ боже́ственными твои́ми словесы́, Творца́ всѣ́хъ ро́ждшую, апо́столе Матѳе́е, Ему́же вси́ пое́мъ: препѣ́тый отце́въ Госпо́дь и Бо́гъ, благослове́нъ еси́.

Пѣ́снь 8.

Ирмо́съ: Ру́цѣ распросте́ръ, Даніи́лъ, льво́въ зія́нія въ ро́вѣ затче́; о́гненную же си́лу угаси́ша, добродѣ́телію препоя́савшеся, благоче́стія рачи́тели, о́троцы, взыва́юще: благослови́те, вся́ дѣла́ Госпо́дня, Го́спода.

Боже́ственный прему́дрый ли́къ апо́столъ Христо́выхъ огне́мъ Ду́ха, я́коже пле́велы, попали́ша многоразли́чная бѣсо́вская чти́лища и вѣ́рныхъ сердца́ просвѣти́ша, вопію́ще: благослови́те, вся́ дѣла́ Госпо́дня, Го́спода.

Согла́сно боже́ственныя ученики́, Христо́вы апо́столы, я́же возгремѣ́вшія на́мъ Боже́ственная велѣ́нія, приста́нища вѣ́рныхъ, благода́тели о́бщія человѣ́честву, Спа́су служи́тели почти́мъ.

Всечестны́я и вмѣсти́тельныя сосу́ды добродѣ́телей, человѣ́ческія нача́тки, проповѣ́данія трубы́, пото́ки нетлѣ́нныя жи́зни, богоно́сныя мо́лніи, исцѣле́ній исто́чники, кра́сныя но́ги Ева́нгелія почти́мъ.

Богоро́диченъ: По́лный Сы́й смиря́ется на́съ ра́ди, да исполне́нія Его́ причасти́мся: въ пречи́стое бо чре́во Твое́ вше́дъ Необыме́нный, отъ Оте́ческихъ нѣ́дръ не отсту́пль, воплоти́ся. Тѣ́мъ Тя́ вси́ благослови́мъ, Марíе Богоневѣ́стная.

Инъ. Ирмо́съ то́йже.

Іу́до, бра́тія твоя́ тя́ похваля́ютъ, бра́та я́вльшася, и непщу́ема я́вльшагося пло́тію Сло́ва превѣ́чнаго, отъ Присносу́щнаго возсія́вшаго, отъ Нерожде́нна Роди́теля.

Апо́столе Іу́до, посыла́еши всѣ́мъ человѣ́комъ свѣ́тлое и уче́нія ду́ха испо́лненно посла́ніе, священноявле́нне, пречу́дне.

Іу́до, апо́столе Христо́въ, учени́къ бы́въ вопло́щшагося Бо́га на́шего, отъ Него́же, я́ко овча́ посредѣ́ волко́въ, вои́стинну посла́лся еси́, сло́вомъ твои́мъ си́хъ претворя́я злоче́стіе ко благоче́стію и боже́ственному разумѣ́нію Святы́я Тро́ицы. Тѣ́мже восхваля́емъ тя́.

Ре́вности тезоимени́тъ нарече́нный, Си́моне досточу́дне, ре́вностію поревнова́лъ еси́ по Го́сподѣ Бо́зѣ Вседержи́тели.

Яко красны́, Си́моне, твои́ но́ги, благолѣ́пенъ е́сть и язы́къ, глаго́лющъ сла́ву Христо́ву, и научи́ зва́ти: Го́спода по́йте и превозноси́те во вся́ вѣ́ки.

Богоро́диченъ: Вся́ а́нгеловъ во́инства, Предте́че Госпо́день, апо́столовъ двоенадеся́тице, святíи вси́ съ Богоро́дицею, сотвори́те моли́тву, во е́же спасти́ся на́мъ.

Пѣ́снь 9.

Ирмо́съ: Ка́мень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.

Рѣши́ти плени́цы прегрѣше́ній вла́сть пріе́мше отъ Влады́ки, богови́дцы, воспѣва́ющихъ ва́съ ми́лостивно грѣхи́ очи́стите и спасе́нія сподо́бите.

Вседухо́вную зарю́, су́щественно ва́мъ я́вльшуюся, вси́ воспрія́сте, апо́столи сла́вніи, въ го́рницѣ научи́вшеся высо́кимъ проповѣ́даніемъ и уче́ніемъ, и ны́нѣ досто́йно блажи́ми есте́.

Ва́мъ Христо́съ ны́нѣ, друго́мъ Свои́мъ почи́вшимъ, вѣнцы́ подае́тъ неувяда́емыя и видѣ́нія Боже́ственнаго исполня́етъ, Ему́же ны́нѣ моли́теся Це́ркви вся́ спасти́.

Богоро́диченъ: Пло́тію пріити́ восхотѣ́въ, украси́вый сло́вомъ вся́ческая въ Тя́ всели́ся, еди́ну Святѣ́йшую всѣ́хъ обрѣ́те и Богоро́дицу показа́ и́стинную, Ма́ти Дѣ́во.

Инъ.

Ирмо́съ: Тя́, пресла́вную Невѣ́сту и Всесвяту́ю Богоро́дицу, Зижди́теля ро́ждшую неви́димыхъ же и всѣ́хъ ви́димыхъ, пѣ́сньми велича́емъ.

Ученико́въ двоенадеся́тыхъ яви́лся еси́, исполня́я ли́къ блаже́нный, изъ него́же преда́тель себе́ отве́ргъ, пріобрѣ́те го́рькое удавле́ніе, на Христа́ воздви́гъ пя́ту, тайновѣща́телю Матѳíе чу́дне.

Свѣтоза́рное, я́ко со́лнце, во ве́сь мíръ изше́дшее, вѣща́ніе твое́ просвѣща́етъ язы́ческую Це́рковь благода́тію, чудоно́сче Матѳíе апо́столе.

Излія́ся благода́ть во устна́хъ твои́хъ, сла́вне апо́столе Матѳíе, и бы́лъ еси́ свѣти́льникъ Це́ркве Христо́вы, уча́ слове́сныя о́вцы вѣ́ровати въ Тро́ицу Единосу́щную и во Еди́но Божество́.

Досади́тель и гони́тель Це́ркве бы́лъ еси́, Па́вле, всеблаже́нне, съ небесе́ же зва́нъ бы́въ, защити́лъ еси́ сію́ пресла́вно, е́йже ны́нѣ моли́ изба́витися отъ бѣ́дъ и спасти́ся душа́мъ на́шимъ.

Па́вле, уста́ Госпо́дня, основа́ніе уче́ній, иногда́ у́бо гони́тель Іису́са Спа́са, ны́нѣ же и первопресто́льникъ апо́столовъ бы́въ, блаже́нне. Тѣ́мже неизглаго́ланная ви́дѣлъ еси́, му́дре, да́же до тре́тіяго небесе́ возше́дъ, и взыва́лъ еси́: пріиди́те со мно́ю, и благи́хъ не лиши́мся.

Богоро́диченъ: Со святы́ми а́нгелы, съ боже́ственными апо́столы, со сла́вными му́ченики Твоего́ моли́ Сы́на и Бо́га, Богороди́тельнице Пречи́стая, отъ бѣ́дъ изба́вити ду́ши на́ша.

Свѣти́ленъ. Подо́бенъ: Ученико́мъ.

Ученико́въ всечестну́ю двоенадеся́тицу ра́достно восхвали́ти стеце́мся, ра́дуйтеся, и́же всю́ подсо́лнечную обше́дше и язы́ковъ уло́вльше зловѣ́рныя чреды́, научи́вшеся Боже́ственнымъ.

Сла́ва:

Двоенадесяточи́сленный ли́къ дне́сь восхва́лимъ, вси́ вѣ́рніи, я́ко утверди́вшеся отъ ни́хъ, и Христу́ возопіе́мъ: моли́твами и́хъ, Спа́се, мíръ Тво́й умири́.

И ны́нѣ, богоро́диченъ:

Мы́ о Тебѣ́ хва́лимся, Богоро́дице, и къ Бо́гу Тя́ и́мамы предста́тельство: простри́ ру́ку Твою́ святу́ю и сокруши́ враги́ на́ша, Твои́мъ низпосли́ рабо́мъ по́мощь отъ Свята́го.

На хвали́техъ стихи́ры, гла́съ 2:

Гряди́те, собо́ри дне́сь вѣ́рныхъ,* благохва́льное и кра́сное собра́ніе,* благода́ти избра́нныя сосу́ды,* апо́столы Христо́вы духо́вными пѣ́сньми просла́вимъ,* я́ко незави́стно всѣ́мъ сло́во всѣ́явше,* съ си́ми и благода́ть Ду́ха обогати́ша* и, Истиннаго Виногра́да су́ще ло́зіе,* гро́здъ зрѣ́лъ на́мъ воздѣ́лаша,* веселя́щъ сердца́ на́ша.* Къ ни́мъ же открове́ннымъ лице́мъ* и чи́стою со́вѣстію возопіе́мъ, глаго́люще:* ра́дуйтеся, разори́тели безслове́сныхъ и служи́тели слове́сныхъ;* ра́дуйтеся, всѣ́хъ Творца́ и Строи́теля избра́нія кра́сная;* ра́дуйтеся, хода́таи благи́хъ и отгони́теліе ле́стныхъ,* и́хже да умо́лимъ:* моли́теся при́сно къ Зижди́телю и Учи́телю,* ми́ръ крѣпкостоя́теленъ мíру дарова́ти* и душа́мъ на́шимъ ве́лію ми́лость.

Апо́стола вси́ и ученика́ Христо́ва* восхва́лимъ пѣ́сньми,* невѣ́рствіемъ бо Христо́во воскресе́ніе возвѣсти́въ* и Того́ пречи́стую стра́сть осяза́ніемъ увѣ́ривъ,* и ны́нѣ на́мъ, всехва́льне Ѳомо́,* проси́ ми́ра и ве́лія ми́лости.

Матѳíе апо́столе,* ли́къ боже́ственный напо́лнилъ еси́,* изъ него́же Іу́да испаде́,* и боже́ственными блиста́ніи му́дрыхъ твои́хъ слове́съ* тму́ отгна́лъ еси́ идолонеи́стовства Бо́жіею благода́тію,* и ны́нѣ моли́ся* дарова́ти на́мъ ми́ръ и ве́лію ми́лость.

Ка́я темни́ца не имѣ́ тебе́ ю́зника?* Ка́я же Це́рковь не и́мать тя́ витíю?* Дама́скъ великому́дрствуетъ о тебѣ́, Па́вле,* вѣ́де бо тя́ запя́та свѣ́томъ,* Ри́мъ, твою́ кро́вь пріе́мый, и то́й хва́лится,* но и Та́рсъ мно́жае ра́дуется* и лю́битъ, почита́я твоя́ пелены́,* Па́вле, похвало́ вселе́нныя,* отъ Ри́ма прише́дши, утверди́ на́съ.

Сла́ва, гла́съ 4:

Крестообра́зно распросте́рши мре́жу вѣ́ры, двоенадеся́тица боже́ственныхъ апо́столъ Твои́хъ вся́ язы́ки улови́ла е́сть къ Твоему́ позна́нію, Христе́, и мо́ре сла́ное страсте́й изсуши́. Сего́ ра́ди мо́лимъ Тя́: изъ глубины́ прегрѣше́ній воззови́ ны́ тѣ́хъ всеблагопрія́тными мольба́ми.

И ны́нѣ, богоро́диченъ, [гла́съ то́йже:

Изба́ви на́съ отъ ну́ждъ на́шихъ, Ма́ти Христа́ Бо́га, ро́ждшая всѣ́хъ Творца́, да вси́ вопіе́мъ Ти́: ра́дуйся, еди́но предста́тельство ду́шъ на́шихъ.

Славосло́віе вели́кое. Ектеніи́ и отпу́стъ.]



НА ЛИТУРГІИ,

Блаже́нна отъ 1-го кано́на 12-ти апо́столовъ, пѣ́снь 3-я и 6-я. Проки́менъ, гла́съ 8: Во всю́ зе́млю изы́де вѣща́ніе и́хъ,* и въ концы́ вселе́нныя глаго́лы и́хъ. Сти́хъ: Небеса́ повѣ́даютъ сла́ву Бо́жію, творе́ніе же руку́ Его́ возвѣща́етъ тве́рдь. Апо́столъ Дѣя́ній апо́стольскихъ, зача́ло 2. Аллилу́ія, гласъ 1: Исповѣ́дятъ небеса́ чудеса́ Твоя́, Го́споди, [и́бо и́стину Твою́ въ це́ркви святы́хъ.] Сти́хъ: Бо́гъ прославля́емь въ совѣ́тѣ святы́хъ. Ева́нгеліе Ма́рка, зача́ло 12. Прича́стенъ: Во всю́ зе́млю [изы́де вѣща́ніе и́хъ, и въ концы́ вселе́нныя глаго́лы и́хъ].


Моли́тва:

Влады́ко Всемогу́щій, Го́споди Бо́же на́шъ, избра́вый возлю́бленныя Своя́ ученики́ и апо́столы на про́повѣдь спасе́нія всему́ мíру, да́вый и́мъ вла́сть отпуща́ти грѣхи́! Пріими́ хода́тайства и́хъ о ро́дѣ человѣ́ческомъ, его́же и суди́ти съ ни́ми и́маши, тѣ́хъ са́мыхъ, я́ко друго́въ Твои́хъ, на́мъ зѣло́ честны́хъ, дерза́емъ, недосто́йніи, въ предста́тельство къ Тебѣ́, многопоспѣшеству́ющее ко спасе́нію ду́шъ на́шихъ приводи́ти, моля́ще и́хъ усе́рдно.

Святíи первоверхо́вніи апо́столи Пе́тре и Па́вле, евангели́сти Христо́вы Іоа́нне Богосло́ве и Матѳе́е, первозва́нный учениче́ Андре́е, водруже́ніемъ креста́ Россíю благослови́вый, апо́столи святíи Іа́кове, бра́те Госпо́день, со други́мъ Іа́ковомъ, Фили́ппе, Варѳоломе́е, Ѳомо́, Си́моне, Іу́до и Матѳíе! Вси́ святíи богоизбра́нніи апо́столи, изря́днѣйшіи уго́дницы Христо́вы, безбо́жія искорени́теліе и вѣ́ры и́стинныя насади́тели! Помози́те на́мъ мо́щнымъ ва́шимъ предъ Го́сподемъ хода́тайствомъ изба́витися отъ вся́каго зла́ и вра́жія ле́сти, тве́рдо же пре́данную ва́ми вѣ́ру Правосла́вную сохраня́ти, въ не́йже ва́шимъ предста́тельствомъ ни ра́нами, ни преще́ніемъ, ни мо́ромъ, ни ко́имъ гнѣ́вомъ отъ Созда́теля своего́ ума́лени бу́демъ, но ми́рное здѣ́ поживе́мъ житіе́ и сподо́бимся ви́дѣти блага́я на земли́ живы́хъ, сла́вяще Отца́ и Сы́на и Свята́го Ду́ха, Еди́наго въ Тро́ицѣ сла́вимаго и покланя́емаго Бо́га, ны́нѣ, и при́сно, и во вѣ́ки вѣко́въ. Ами́нь.

Источникъ: Мине́я Ию́нь. Ча́сть втора́я. — М.: Издательскій совѣтъ Русской Православной Церкви, 2002. — С. 495-513.

/ Къ оглавленію раздѣла /


Наверхъ / Къ титульной страницѣ

0