Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 21 октября 2017 г. Сейчасъ на порталѣ посѣтителей - 16.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́нія въ 28-й де́нь.
Слу́жба святы́мъ и чудотво́рцемъ, безсре́бренникомъ Ки́ру и Іоа́нну,
отправля́емая по церко́вному чиноположе́нію со всено́щнымъ бдѣ́ніемъ.

НА МАЛѢЙ ВЕЧЕРНИ,
На Го́споди воззва́хъ: стихи́ры на 4, гла́съ 4. Подо́бенъ: Да́лъ еси́ зна́меніе.

Стра́сти безслове́сныя* поко́рше, святíи,* душе́вными си́лами,* человѣ́комъ и ското́мъ* благодѣя́ніе подава́ете,* отъ Христа́ дарова́ніемъ исцѣле́ній обога́щшеся.* Тѣ́мже свяще́нное ва́ше* и свѣтоно́сное торжество́ соверша́юще,* про́симъ очище́нія душа́мъ на́шимъ.

Святы́й хра́мъ ва́шъ* я́ко не́бо показа́ся,* свѣтоза́рное и спаси́тельное,* и я́ко звѣ́зды, чудеса́ спаси́тельная* ны́нѣ притяжа́вше,* я́коже со́лнце свѣ́тло,* Боже́ственныхъ исцѣле́ній дѣ́йство,* Ки́ре преблаже́нне, Іоа́нне пресла́вне,* Госпо́дни служи́тели,* и моли́твенницы о душа́хъ на́шихъ.

Сла́ва, гла́съ 8:

Кто́ не удиви́тся, кто́ не просла́витъ, кто́ не воспое́тъ вѣ́рно му́дрыхъ и пресла́вныхъ безсре́брениковъ чудеса́? Яко и по свято́мъ и́хъ преставле́ніи всѣ́мъ подаю́тъ, притека́ющимъ вѣ́рою, бога́тно врачева́нія, и честны́я и святы́я мо́щи тѣ́хъ то́чатъ благода́ть врачева́ній. О, дво́ица свята́я! О, честны́я главы́! О, му́дросте и сла́во отъ Бо́га да́нныя ва́мъ благода́ти! Тѣ́мже пѣ́сньми зове́мъ Благодѣ́телю Бо́гу, показа́вшему ты́я на врачева́ніе ду́шъ и тѣле́съ на́шихъ.

И ны́нѣ, богоро́диченъ:

Ра́дуйся, вселе́нныя похвало́; ра́дуйся, хра́ме Госпо́день; ра́дуйся, горо́ приосѣне́нная; ра́дуйся, всѣ́хъ прибѣ́жище, ра́дуйся, свѣ́щниче златы́й; ра́дуйся, сла́во правосла́вныхъ честна́я; ра́дуйся, Марíе, Ма́ти Христа́ Бо́га; ра́дуйся, раю́; ра́дуйся, Боже́ственная трапе́зо; ра́дуйся, сѣ́не; ра́дуйся, ру́чко всезлата́я; ра́дуйся, всѣ́хъ упова́ніе.

На стихо́внѣ стихи́ры, гла́съ 1. Подо́бенъ: Небе́сныхъ чино́въ.

Чуде́съ луча́ми облиста́вше вселе́нную всю́,* святíи безме́здницы,* пресвѣ́тліи свѣти́льницы,* небеси́ уподо́бистеся благода́тію,* высо́каго жи́тельства добродѣ́тельми,* звѣ́зды предлага́еми.

Сти́хъ: Святы́мъ, и́же су́ть на земли́ Его́,* удиви́ Госпо́дь вся́ хотѣ́нія Своя́ въ ни́хъ.

Дождеро́дныя о́блаки, преизя́ществующа* многотеку́щими благода́тей чудесы́,* му́ченицы Госпо́дни,* всю́ зе́млю мы́сленно напая́ете,* здра́вая пѣснопѣ́нія Бо́гу* приноси́ти понужда́юща.

Сти́хъ: Се́ что́ добро́, или́ что́ красно́, но е́же жи́ти бра́тіи вку́пѣ.

Исцѣля́ти стра́сти души́ и тѣлесе́* хи́трость отъ Бо́га и́стинно пріе́мше,* му́ченицы Госпо́дни,* преесте́ственно исцѣля́ете вся́* не человѣ́ческими лѣчба́ми враче́бными,* но Боже́ственными вдохнове́ньми.

Сла́ва, гла́съ 4:

Исто́чникъ исцѣле́ній иму́ще, святíи безсре́бреницы Ки́ре и Іоа́нне, исцѣле́нія подае́те всѣ́мъ тре́бующимъ, я́ко велича́йшихъ даро́въ сподо́бльшеся отъ приснотеку́щаго исто́чника — Спа́са Христа́. Рече́ бо къ ва́мъ Госпо́дь, я́ко единоревни́телемъ апо́столовъ: се́ да́хъ ва́мъ вла́сть надъ ду́хи нечи́стыми, я́коже тѣ́хъ изгони́ти и исцѣли́ти вся́къ неду́гъ и вся́кую я́зю. Тѣ́мже, въ повелѣ́ніихъ Его́ до́брѣ пожи́вше, ту́не прія́сте, ту́не подае́те, исцѣля́юще стра́сти ду́шъ и тѣле́съ на́шихъ.

И ны́нѣ, богоро́диченъ:

Богоро́дице, всѣ́хъ Цари́це, правосла́вныхъ похвало́, ерети́чествующихъ шата́нія разори́, и ли́ца и́хъ посрами́, не кла́няющихся, ниже́ чту́щихъ, Пречи́стая, честны́й Тво́й о́бразъ.

Тропа́рь, гла́съ 5:

Чудеса́ святы́хъ Твои́хъ му́ченикъ стѣ́ну необори́му на́мъ дарова́вый, Христе́ Бо́же, тѣ́хъ моли́твами совѣ́ты язы́ковъ разори́, ца́рства ски́птры укрѣпи́, я́ко еди́нъ Бла́гъ и Человѣколю́бецъ.

Сла́ва, и ны́нѣ, богоро́диченъ:

Ра́дуйся, две́ре Госпо́дня непроходи́мая; ра́дуйся, стѣно́ и покро́ве притека́ющихъ къ Тебѣ́; ра́дуйся, необурева́емое приста́нище и неискусобра́чная, ро́ждшая пло́тію Творца́ Твоего́ и Бо́га, моля́щи не оскудѣва́й о воспѣва́ющихъ и кла́няющихся Рождеству́ Твоему́.

Ектенія́ ма́лая и отпу́стъ.



НА ВЕЛИЦѢЙ ВЕЧЕРНИ,
По обы́чномъ псалмѣ́, пое́мъ Блаже́нъ му́жъ.., 1-й антифо́нъ. На Го́споди воззва́хъ: стихи́ры на 8, гла́съ 4. Подо́бенъ: Яко до́бля.

Дво́ицу почти́мъ* му́ченикъ пѣ́сньми,* Тро́ическую иму́щу свѣ́тлость,* основа́ніе вѣ́ры,* цвѣ́ты, дыха́ющія* благово́ніе и́стинно* Христо́ва разумѣ́нія,* Ки́ра вси́ и съ ни́мъ вели́каго Іоа́нна,* я́ко моля́щіяся непреста́нно о на́съ ко Го́споду. [Три́жды.]

Житія́ свѣ́тлостію* и посто́мъ просія́лъ еси́* и страда́ніемъ по́слѣжде* украси́лъ еси́ твою́ ду́шу, Ки́ре сла́вне,* во́инство же оста́вилъ еси́ земно́е,* му́дре Іоа́нне,* и обрѣ́лъ еси́ небе́сное,* моля́ще о́ба Спа́са* о блажа́щихъ ва́шу па́мять, блаже́нніи. [Три́жды.]

Вра́чеве показа́стеся немощны́мъ, блаже́нніи,* и свѣти́льницы незаходи́міи* Боже́ственныя вѣ́ры,* исповѣ́данія соглаго́льницы,* му́ченикомъ соприча́стницы,* вѣнцы́ вои́стинну отъ Христа́ пріи́мше,* Ки́ре сла́вне и му́дре Іоа́нне,* непреста́нно моли́те Спа́са* о и́же вѣ́рою пою́щихъ ва́съ. [Два́жды.]

Сла́ва, гла́съ 8:

Дво́ица му́ченикъ дне́сь возсія́ на́мъ, душе́вныя болѣ́зни на́ша исцѣля́юща, Ки́ръ и Іоа́ннъ чудодѣ́йственніи: о́въ у́бо, равноа́нгельное облобыза́въ еди́нственное житіе́, да́же до конца́ пожи́въ, кро́вію му́ченическою присвоя́ется Христу́; о́въ же, въ во́инскихъ просія́въ сосло́віихъ, небе́снымъ воинствосло́віямъ градопису́ется. Тѣ́мже и въ па́мять и́хъ исцѣле́нія подава́ютъ вѣ́рою соверша́ющимъ, моля́щеся о душа́хъ на́шихъ.

И ны́нѣ, богоро́диченъ:

Ца́рь Небе́сный за человѣколю́біе на земли́ яви́ся и съ человѣ́ки поживе́, от Дѣ́вы бо Чи́стыя пло́ть пріе́мый и изъ Нея́ проше́дый съ воспрія́тіемъ, еди́нъ е́сть Сы́нъ, сугу́бъ естество́мъ, но не ѵпоста́сію. Тѣ́мже, соверше́нна Того́ Бо́га и соверше́нна Человѣ́ка вои́стинну проповѣ́дающе, исповѣ́дуемъ Христа́ Бо́га на́шего: Его́же моли́, Ма́ти Безневѣ́стная, поми́ловатися душа́мъ на́шимъ.

Аще суббо́та: И ны́нѣ, богоро́диченъ 1-й, настоя́щаго гла́са.
Вхо́дъ. Проки́менъ дне́ и чте́нія три́.

Проро́чества Иса́іина чте́ніе. [Глава́ 43.]

Та́ко глаго́летъ Госпо́дь: вси́ язы́цы собра́шася вку́пѣ, и соберу́тся кня́зи отъ ни́хъ, кто́ возвѣсти́тъ сія́ въ ни́хъ? Или́ я́же отъ нача́ла, кто́ слы́шана сотвори́тъ ва́мъ? Да приведу́тъ свидѣ́тели своя́ и оправдя́тся, и да услы́шатъ, и да реку́тъ и́стину. Бу́дите Ми́ свидѣ́тели, и Азъ Свидѣ́тель, глаго́летъ Госпо́дь Бо́гъ, и отрокъ, его́же избра́хъ, да позна́ете и вѣ́руете Ми́, и разумѣ́ете, я́ко Азъ е́смь; пре́жде Мене́ не бы́сть и́нъ бо́гъ, и по Мнѣ́ не бу́детъ. Азъ е́смь Бо́гъ, и нѣ́сть ра́звѣ Мене́ спаса́яй. Азъ возвѣсти́хъ и спасо́хъ, уничижи́хъ, и не бѣ́ въ ва́съ чу́ждій. Вы́ Мнѣ́ свидѣ́тели, и Азъ Госпо́дь Бо́гъ. И еще́ отъ нача́ла Азъ е́смь, и нѣ́сть отъ ру́къ Мои́хъ избавля́яй; сотворю́, и кто́ отврати́тъ то? Си́це глаго́летъ Госпо́дь Бо́гъ, избавля́яй ва́съ Святы́й Изра́илевъ.

Прему́дрости Соломо́новы чте́ніе. [Глава́ 3.]

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе сокруше́ніе; они́ же су́ть въ ми́рѣ. Ибо предъ лице́мъ человѣ́ческимъ а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Яко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ возсія́ютъ и, я́ко и́скры по сте́блію, потеку́тъ: су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́новы чте́ніе. [Глава́ 5.]

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

На литíи стихи́ра хра́ма и святы́хъ стихи́ры, гла́съ 2:

Вра́чеве немощству́ющихъ, сокро́вища врачева́ній, спаси́теліе вѣ́рныхъ, безсре́бреницы всесла́вніи, въ ну́ждахъ зову́щія и боля́щія исцѣли́те, моля́ще Бо́га блага́го изба́витися на́мъ отъ сѣ́тей вра́жіихъ.

Исто́чникъ исцѣле́ній еди́наго то́кмо въ лѣ́тѣ исцѣлева́ше, хра́мъ же безсре́брениковъ все́ мно́жество исцѣля́етъ неду́гующихъ: неоску́дно бо е́сть и неиждива́емое бога́тство святы́хъ. Тѣ́хъ моли́твами, Христе́, поми́луй на́съ.

Ра́дуется ли́къ святы́хъ во вѣ́ки, Ца́рство бо небе́сное наслѣ́доваша; земля́, мо́щи и́хъ пріе́мши, благово́ніе возвѣ́я, раби́ Христо́вы бы́ша, всели́вшеся въ жи́знь вѣ́чную.

Сла́ва, гла́съ 6:

Безконе́чна е́сть святы́хъ благода́ть, ю́же отъ Христа́ прія́ша, тѣ́мже и мо́щи и́хъ отъ Боже́ственныя си́лы непреста́нно дѣ́йствуютъ чудеса́. Ихже имена́, вѣ́рою призыва́ема, неисцѣ́льныя болѣ́зни исцѣля́ютъ. Имиже, Го́споди, и на́съ душе́вныхъ и тѣле́сныхъ страсте́й свободи́, я́ко Человѣколю́бецъ.

И ны́нѣ, богоро́диченъ:

Творе́цъ и Изба́витель мо́й, Пречи́стая, Христо́съ Госпо́дь, изъ Твои́хъ ложе́снъ проше́дъ, въ мя́ оболкíйся, пе́рвыя кля́твы Ада́ма свободи́. Тѣ́мже Ти́, Всечи́стая, я́ко Бо́жіи Ма́тери же и Дѣ́вѣ, вои́стинну вопіе́мъ немо́лчно: ра́дуйся а́нгельски, ра́дуйся, Влады́чице, предста́тельство, и покро́ве, и спасе́ніе ду́шъ на́шихъ.

На стихо́внѣ стихи́ры, гла́съ 1. Подо́бенъ: Небе́сныхъ чино́въ.

Чуде́съ луча́ми облиста́вше вселе́нную всю́,* святíи безме́здницы,* пресвѣ́тліи свѣти́льницы,* небеси́ уподо́бистеся благода́тію,* высо́каго жи́тельства добродѣ́тельми,* звѣ́зды предлага́еми.

Сти́хъ: Святы́мъ, и́же су́ть на земли́ Его́,* удиви́ Госпо́дь вся́ хотѣ́нія Своя́ въ ни́хъ.

Дождеро́дныя о́блаки, преизя́ществующа* многотеку́щими благода́тей чудесы́,* му́ченицы Госпо́дни,* всю́ зе́млю мы́сленно напая́ете,* здра́вая пѣснопѣ́нія Бо́гу* приноси́ти понужда́юща.

Сти́хъ: Се́ что́ добро́, или́ что́ красно́, но е́же жи́ти бра́тіи вку́пѣ.

Исцѣля́ти стра́сти души́ и тѣлесе́* хи́трость отъ Бо́га и́стинно пріе́мше,* му́ченицы Госпо́дни,* преесте́ственно исцѣля́ете вся́* не человѣ́ческими лѣчба́ми враче́бными,* но Боже́ственными вдохнове́ньми.

Сла́ва, гла́съ 2:

Пріиди́те, вѣ́рныхъ сосло́віе, дне́сь, пѣ́сньми вѣнча́емъ Ки́ра со Іоа́нномъ, ра́ла благода́тная и да́тели прося́щимъ незави́стны, многообра́знѣ бо всѣ́мъ яви́шася вра́чеве пресвѣ́тліи. Тѣ́мже и мо́лятъ о душа́хъ на́шихъ.

И ны́нѣ, богоро́диченъ:

О, чудесе́ но́ваго, всѣ́хъ дре́внихъ чуде́съ! Кто́ бо позна́ Ма́терь, безъ му́жа ро́ждшую и на руку́ нося́щую всю́ тва́рь Содержа́щаго? Бо́жіе е́сть изволе́ніе Ро́ждшееся. Его́же я́ко Младе́нца, Пречи́стая, Твои́ма рука́ма носи́вшая, и ма́тернее дерзнове́ніе къ Нему́ иму́щая, не преста́й моля́щи о чту́щихъ Тя́, уще́дрити и спасти́ ду́ши на́ша.

На благослове́ніи хлѣ́бовъ: Тропа́рь, гла́съ 5: Чудеса́ святы́хъ.., два́жды. [Пи́санъ на ма́лѣй вече́рни.] И Богоро́дице Дѣ́во.., еди́ножды. И чте́ніе.



НА УТРЕНИ,
На Бо́гъ Госпо́дь: Тропа́рь безме́здниковъ, два́жды. Сла́ва, и ны́нѣ, богоро́диченъ: Ра́дуйся, две́ре... [Пи́санъ на ма́лѣй вече́рни.] Аще суббо́та: Богоро́диченъ настоя́щаго гла́са.

По 1-мъ стихосло́віи сѣда́ленъ, гла́съ 2:

Вели́кихъ досто́йни бы́вше дарова́ній, сла́вніи, во смире́ннѣмъ житіи́ на земли́ пожи́сте, и, преходя́ще всю́ду, ту́не боля́щимъ неду́ги и стра́сти исцѣля́юще, яви́стеся а́нгеломъ собесѣ́дницы, Ки́ре и Іоа́нне, вѣ́рніи, бра́тіе прекра́сніи, и на́ша стра́сти, моли́твами ва́шими, исцѣли́те. [Два́жды.]

Сла́ва, и ны́нѣ, богоро́диченъ:

Милосе́рдія су́щи исто́чникъ, ми́лости сподо́би на́съ, Богоро́дице, при́зри на лю́ди согрѣши́вшія, яви́ я́ко при́сно си́лу Твою́: на Тя́ бо упова́юще, — ра́дуйся, — вопіе́мъ Ти́, я́коже иногда́ Гавріи́лъ, безпло́тныхъ архистрати́гъ.

По 2-мъ стихосло́віи сѣда́ленъ, гла́съ 1:

Страстоте́рпцы Христо́вы Ки́ре и Іоа́нне, моли́теся за ны́, вѣ́рою приходя́щія къ ва́мъ, вы́ бо, моли́твами ва́шими, подае́те исцѣле́нія благода́ть, и премно́гія неду́ги отгоня́ете, я́ко сохра́нницы жи́зни на́шея. [Два́жды.]

Сла́ва, и ны́нѣ, богоро́диченъ:

Пречи́стая Богоро́дице, на небесѣ́хъ благослове́нная, и на земли́ славосло́вимая, ра́дуйся, Невѣ́сто неневѣ́стная.

Та́же поліеле́й и по поліеле́и припѣ́въ:

Велича́емъ ва́съ чудотво́рцы сла́вніи Ки́ре и Іоа́нне, и чте́мъ честна́я страда́нія ва́ша, я́же за Христа́ претерпѣ́ли есте́.

Псало́мъ избра́нный: Бо́гъ на́мъ прибѣ́жище и си́ла...

По поліеле́и сѣда́ленъ, гла́съ 5. Подо́бенъ: Собезнача́льное Сло́во.

Возсія́ дне́сь пра́зднество страстоте́рпцевъ Ки́ра и Іоа́нна, имѣ́ютъ бо съ небесе́ зарю́. Ли́къ а́нгельскій торжеству́етъ и человѣ́ческій ро́дъ спра́зднуетъ. Тѣ́мже сíи мо́лятся о душа́хъ на́шихъ. [Два́жды.]

Сла́ва, и ны́нѣ, богоро́диченъ:

Ди́вныя Дѣ́вы та́йна всему́ мíру яви́ся спасе́ніе, изъ Нея́же роди́ся Ра́дость: Го́споди, сла́ва Тебѣ́!

Степе́нна, 1-й антифо́нъ 4-го гла́са. Проки́менъ, [гла́съ 4:] Святы́мъ, и́же су́ть на земли́ Его́,* удиви́ Госпо́дь вся́ хотѣ́нія Своя́ въ ни́хъ. Сти́хъ: Предзрѣ́хъ Го́спода предо мно́ю вы́ну, [я́ко одесну́ю мене́ е́сть, да не подви́жуся]. Вся́кое дыха́ніе... Ева́нгеліе Матѳе́я, зача́ло 34 отъ полу́: Во вре́мя о́но, призва́въ Іису́съ обана́десять ученики́ Своя́... ту́не прія́сте, ту́не дади́те. Сла́ва: Моли́твами святы́хъ безсре́бренниковъ... И ны́нѣ: Моли́твами Богоро́дицы... Та́же: Поми́луй мя́, Бо́же...

По 50-мъ псалмѣ́ стихи́ра, гла́съ 1:

Свѣтоза́рная и свята́я, и благообра́зная му́чениковъ Ки́ра и Іоа́нна, всепра́зднственная па́мять, я́же всю́ зе́млю просвѣща́ющи, мра́къ грѣхо́вный отгоня́ющи, лѣчба́мъ благода́ть источа́етъ.

Кано́нъ Богоро́дицы, гла́съ 8, со ирмосо́мъ на 6: ирмо́съ по два́жды, тропари́ на 4. [Аще суббо́та: кано́нъ хра́ма Христо́ва или́ Богоро́дицы на 6.]
Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Мно́гими содержи́мь напа́стьми, къ Тебѣ́ прибѣга́ю спасе́нія искíй, о Ма́ти Сло́ва и Дѣ́во! отъ тя́жкихъ и лю́тыхъ мя спаси́.

Страсте́й мя смуща́ютъ прило́зи, мно́гаго уны́нія испо́лнити мою ду́шу: умири́, Отрокови́це, тишино́ю Сы́на и Бо́га Твоего́, Всенепоро́чная.

Спа́са ро́ждшую Тя и Бо́га, молю́, Дѣ́во, изба́витися ми лю́тыхъ: къ Тебѣ́ бо ны́нѣ прибѣга́я, простира́ю и ду́шу и помышле́ніе.

Неду́гующа тѣ́ломъ и душе́ю, посѣще́нія Боже́ственнаго, и промышле́нія отъ Тебе́ сподо́би, еди́на Богома́ти, я́ко Блага́я, Блага́го же Роди́тельнице.

Инъ кано́нъ святы́хъ, тропари́ на 8, гла́съ то́йже.
Пѣ́снь 1.

Ирмо́съ: Истря́сшему въ мо́ри мучи́тельство фарао́не и Изра́иля су́шею наста́вльшему, пои́мъ Христу́, я́ко просла́вися во вѣ́ки.

Показа́вшему въ мíрѣ чудотво́рцы и врачи́, Ки́ра честна́го и Іоа́нна му́ченика, всѣ́мъ цѣля́ща стра́сти благода́тію, воспое́мъ, вѣ́рніи, и му́чениковъ почти́мъ па́мять.

Отве́ргшеся ны́нѣшнихъ, бу́дущихъ рачи́тели кровьми́ и́стинному Рачи́телю послѣ́доваша, тѣ́мже въ ра́нахъ стра́ждуще, до́блественнѣ терпя́ху.

Укрѣ́пльшеся дерзнове́ніемъ и утве́рждше ду́шу, научи́вшеся о Христѣ́, и съ му́ченики пострада́ша му́жески, и вѣнцы́ исплето́ша зако́нно.

Богоро́диченъ: Спаси́ мя, Ма́ти Истины, обурева́ема лю́тѣ отъ страсте́й и ча́сто погружа́ема, и напра́ви мя́, Чи́стая, ко спасе́нію ти́хаго приста́нища.

Катава́сія: Отве́рзу уста́ моя́...

Пѣ́снь 3.

Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.

Предста́телство и покро́въ жи́зни моея́ полага́ю Тя, Богороди́тельнице Дѣ́во, Ты мя окорми́ ко приста́нищу Твоему́, благи́хъ вино́вна, вѣ́рныхъ утвержде́ніе, еди́на Всепѣ́тая.

Молю́, Дѣ́во, душе́вное смуще́ніе, и печа́ли моея́ бу́рю разори́ти: Ты́ бо, Богоневѣ́стная, нача́лника тишины́ Христа́ родила́ еси́, еди́на Пречи́стая.

Благодѣ́теля ро́ждши, до́брыхъ вино́внаго, благодѣя́нія бога́тство всѣ́мъ источи́: вся́ бо мо́жеши, я́ко си́льнаго въ крѣ́пости Христа́ ро́ждши, Богоблаже́нная.

Лю́тыми неду́ги и болѣ́зненными страстьми́ истяза́ему, Дѣ́во, Ты́ ми помози́: исцѣле́ній бо неоску́дное Тя зна́ю сокро́вище, Пренепоро́чная, неиждива́емое.

Инъ.

Ирмо́съ: Нѣ́сть свя́тъ, я́ко Госпо́дь, и нѣ́сть пра́веденъ, я́ко Бо́гъ на́шъ, Его́же пое́тъ вся́ тва́рь: нѣ́сть пра́веденъ, па́че, Тебе́, Го́споди.

Вѣ́рою обостри́лъ еси́ святы́я Твоя́, Христе́, наде́ждею искова́лъ еси́, любо́вію разже́глъ еси́, треми́ всеору́жіи треплете́нный вѣне́цъ тѣ́мъ испле́лъ еси́.

До́блѣ сопроти́въ ста́ша къ мучи́телемъ нечести́вымъ непобѣди́міи му́ченицы, пре́лести ловле́нія невре́дно преше́дше: Христо́мъ бо вооружи́вшеся, съ Ни́мъ и веселя́тся.

Яко столпы́ богозда́нніи и основа́нія тве́рдая, на ка́мени водрузи́ша восхожде́нія вѣ́ры, отъ ка́мене пи́вше во́ду присноживо́тную, ю́же отъ ча́ши Христо́вы.

Богоро́диченъ: Ду́ху бы́сть жили́ще, Чи́стая, пріи́мши исполне́ніе всего́ Божества́ сыно́внѣ и ро́ждши Спа́са и Го́спода и Изба́вителя ро́да на́шего.

Сѣда́ленъ, гла́съ 4. Подо́бенъ: Вознесы́йся.

До́лу влеку́щія стра́сти попра́вше, къ муче́нія, страда́льцы, Боже́ственнѣй высотѣ́ свѣ́тло вознесо́стеся благода́тію, Ки́ре и Іоа́нне, вселе́нныя свѣти́льницы. Тѣ́мже мо́лимся: тмы́ грѣхо́вныя и неду́гъ изба́вите на́съ, Иже надъ всѣ́ми Бо́га моля́ще. [Два́жды.]

Сла́ва, и ны́нѣ, богоро́диченъ:

Грѣхолюби́въ сы́й, молю́ Тя́, безгрѣ́шнаго Бо́га ро́ждшую, взе́млющаго грѣхи́ мíра, Пречи́стая, многогрѣ́шную ду́шу мою́ уще́дрити и грѣхи́ моя́ мно́гія очи́стити: грѣ́шнымъ бо Ты́ еси́ очище́ніе, и спасе́ніе вѣ́рнымъ, и заступле́ніе.

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Страсте́й мои́хъ смуще́ніе, ко́рмчію ро́ждшая Го́спода, и бу́рю ути́ши мои́хъ прегрѣше́ній, Богоневѣ́стная.

Милосе́рдія Твоего́ бе́здну призыва́ющу пода́ждь ми, Яже благосе́рдаго ро́ждшая, и Спа́са всѣхъ пою́щихъ Тя.

Наслажда́ющеся, Пречи́стая, Твои́хъ дарова́ній, благода́рственное воспѣва́емъ пѣ́ніе, вѣ́дуще Тя Богома́терь.

На одрѣ́ болѣ́зни моея́, и не́мощи низлежа́щу ми, я́ко благолюби́ва, помози́, Богоро́дице, еди́на Приснодѣ́во.

Наде́жду и утвержде́ніе, и спасе́нія стѣ́ну недви́жиму, иму́ще Тя, Всепѣ́тая, неудо́бства вся́каго избавля́емся.

Инъ.

Ирмо́съ: Изъ горы́ приосѣне́нныя, Сло́ве, проро́къ, еди́ныя Богоро́дицы, хотя́ща воплоти́тися, богови́дно усмотри́, и со стра́хомъ славосло́вяше си́лу Твою́.

Тѣ́ло, и ду́шу, и у́мъ, и серде́чная вся́ Христу́ пожро́сте вѣ́рою и, мучи́телей суровство́ побѣ́ждше, зако́нно, святíи, вѣнча́стеся.

Мечу́ и огню́ тѣ́ло преда́вше, же́ртвы прія́тны бы́сте Бо́гу и въ воню́ благоуха́нія на трапе́зѣ та́йнѣ принесо́стеся.

Неугаси́ма заря́ возсія́ мíру — мо́щи Твои́хъ му́ченикъ, Благодѣ́телю, е́юже отгна́ся тма́ неразу́мія и въ тоя́ мѣ́сто введе́ся благоразу́міе.

Богоро́диченъ: Влады́чице Чи́стая, Сло́ва Боже́ственнаго две́ри, Це́ркви Твое́й совоку́пленныя и Тя́, Пречи́стую, пѣ́сньми хва́лящія покры́й и соблюди́ отъ вся́кихъ зо́лъ.

Пѣ́снь 5.

Ирмо́съ: Просвѣти́ на́съ повелѣ́ніи Твои́ми, Го́споди, и мы́шцею Твое́ю высо́кою Тво́й ми́ръ пода́ждь на́мъ, Человѣколю́бче.

Испо́лни, Чи́стая, весе́лія се́рдце мое́, Твою́ нетлѣ́нную даю́щи ра́дость, весе́лія ро́ждшая вино́внаго.

Изба́ви на́съ отъ бѣ́дъ, Богоро́дице Чи́стая, вѣ́чное ро́ждши избавле́ніе, и миръ всякъ умъ преиму́щій.

Разрѣши́ мглу прегрѣше́ній моихъ, Богоневѣ́сто, просвѣще́ніемъ Твоея́ свѣ́тлости, Свѣтъ ро́ждшая Боже́ственный и превѣ́чный.

Исцѣли́, Чи́стая, души́ моея́ неможе́ніе, посѣще́нія Твоего́ сподо́бльши, и здра́віе моли́твами Твои́ми пода́ждь ми.

Инъ.

Ирмо́съ: Утренююще вопіе́мъ Ти́: Го́споди, спаси́ ны, Ты́ бо еси́ Бо́гъ на́шъ, ра́звѣ Тебе́, ино́го не вѣ́мы.

Спу́тники дѣ́вы стяжа́вше, страстоте́рпцы, взя́сте соверше́нный вѣне́цъ побѣ́ды, ра́дующеся.

Боже́ственнаго сія́нія заре́ю просвѣ́щшеся, му́ченицы прехва́льніи, и при́сно мíръ просвѣща́ете.

Страсте́мъ Госпо́днимъ подо́бящеся, страстоте́рпцы, болѣ́зни претерпѣ́сте доблему́дренно, непобѣди́міи.

Богоро́диченъ: Ути́ши непостоя́нную бу́рю страсте́й мои́хъ, Яже Бо́га ро́ждши, Ко́рмчію и Го́спода.

Пѣ́снь 6.

Ирмо́съ: Моли́тву пролію́ ко Го́споду и Тому́ возвѣщу́ печа́ли моя́, я́ко зо́лъ душа́ моя́ испо́лнися и живо́тъ мо́й а́ду прибли́жися, и молю́ся, я́ко Іо́на: отъ тли́, Бо́же, возведи́ мя.

Сме́рти и тли́ я́ко спа́слъ есть, Са́мъ Ся́ изда́въ сме́рти, тлѣ́ніемъ и сме́ртію мое́ естество́ я́то бы́вшее, Дѣ́во, моли́ Го́спода и Сы́на Твоего́, враго́въ злодѣ́йствія мя изба́вити.

Предста́тельницу Тя живота́ вѣмъ, и храни́тельницу тве́рду, Дѣ́во, и напа́стей рѣша́щу молвы́, и нало́ги бѣсо́въ отгоня́ющу: и молю́ся всегда́, отъ тли́ страсте́й мои́хъ изба́вити мя.

Яко стѣ́ну прибѣ́жища стяжа́хомъ, и душъ всесоверше́нное спасе́ніе, и простра́нство въ ско́рбехъ, Отрокови́це, и просвѣще́ніемъ Твоимъ при́сно ра́дуемся: о Влады́чице, и ны́нѣ насъ отъ страсте́й и бѣдъ спаси́.

На одрѣ́ ны́нѣ немощству́яй лежу́, и нѣсть исцѣле́нія пло́ти мое́й, но Бо́га и Спа́са мíру, и Изба́вителя неду́говъ ро́ждшая, Тебѣ́ молю́ся Благо́й: отъ тли неду́гъ возста́ви мя.

Инъ.

Ирмо́съ: Ри́зу мнѣ́ пода́ждь свѣ́тлу, одѣя́йся свѣ́томъ, я́ко ри́зою, многоми́лостиве Христе́ Бо́же на́шъ.

Броня́ми вѣ́ры до́брѣ вооружи́вшеся, му́ченицы, тве́рдо уязви́сте сопротивобо́рца врага́ и супоста́та.

Па́мять святы́хъ Твои́хъ, Христе́, въ пѣ́снехъ сла́вимъ и Тебѣ́, Бо́гу на́шему, поклоне́ніе вѣ́рою прино́симъ.

Страсте́мъ Твои́мъ ревнова́вше, Христе́, сла́вніи му́ченицы муче́нія претерпѣ́ша, и́хже моли́твами, Бо́же, спаси́ всѣ́хъ на́съ.

Богоро́диченъ: Це́рковь Тя́ Бо́жію, и ковче́гъ, и черто́гъ одушевле́нъ, и две́рь небе́сную, Богоро́дице, вѣ́рніи, возвѣща́емъ.

Конда́къ, гла́съ 3. Подо́бенъ: Дѣ́ва дне́сь.

Отъ Боже́ственныя благода́ти да́ръ чуде́съ воспріе́мше, святíи, чудодѣ́йствуете въ мíрѣ непреста́нно, вся́ на́ша стра́сти рукодѣ́йствіемъ изсѣца́юще неви́димо, Ки́ре богому́дре со Іоа́нномъ сла́внымъ: вы́ бо су́щнѣ боже́ственніи вра́чеве есте́.

Икосъ:

Са́ми себе́ Бо́гу возло́жше, святíи, все́ искуше́ніе лю́тое Его́ ра́ди претерпѣ́сте, уме́рше усе́рдно, му́ченицы до́бліи, и по кончи́нѣ всѣ́мъ источа́ете Боже́ственная дарова́нія, су́щимъ въ разли́чныхъ неду́зѣхъ, и отъ мно́гихъ исцѣля́ете зо́лъ, отъ ни́хже еди́нъ и пе́рвый е́смь а́зъ, окая́нный, тѣ́ломъ бо и душе́ю отъ я́звъ лю́тыхъ болю́, и вѣ́рою ва́мъ вопію́: исцѣли́те мя́, вы́ бо боже́ственніи вра́чеве есте́.

Пѣ́снь 7.

Ирмо́съ: Отъ Іуде́и доше́дше, о́троцы, въ Вавило́нѣ иногда́, вѣ́рою Тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.

На́ше спасе́ніе я́коже восхотѣ́лъ еси́, Спа́се, устро́ити, во утро́бу Дѣ́выя всели́лся еси́, Юже мíру предста́тельницу показа́лъ еси́: отецъ на́шихъ Бо́же, благослове́нъ еси́.

Воли́теля ми́лости, Его́же родила́ еси́, Ма́ти Чи́стая, умоли́ изба́витися отъ прегрѣше́ній, и душе́вныхъ скве́рнъ, вѣ́рою зову́щимъ: отецъ на́шихъ, Бо́же, благослове́нъ еси́.

Сокро́вище спасе́нія, и исто́чникъ нетлѣ́нія, Тя ро́ждшую, и сто́лпъ утвержде́нія, и дверь покая́нія зову́щимъ показа́лъ еси́: отецъ на́шихъ Бо́же, благослове́нъ еси́.

Тѣле́сныя сла́бости и душе́вныя неду́ги, Богороди́тельнице, любо́вію приступа́ющихъ ко кро́ву Твоему́, Дѣ́во, исцѣли́ти сподо́би, Спа́са Христа́ намъ ро́ждшая.

Инъ.

Ирмо́съ: Ангеломъ о́троки изъ огня́ спасы́й и гремя́щую пе́щь преложи́вый на ро́су, благослове́нъ еси́, Бо́же оте́цъ на́шихъ.

Небе́сныя сла́вы рачи́тели бы́вше, страда́льцы Твои́, Го́споди, Ки́ръ и Іоа́ннъ вре́менную и тлѣ́ющую сла́ву оста́виша.

Яко слове́сную же́ртву, преда́вше тѣ́ло и, я́ко служе́ніе, излива́юще Тебѣ́, Бо́гу, кро́вь, страда́льцы Твои́, Іису́се, всесожже́ни бы́ша.

Яко стра́шенъ е́сть му́чениковъ собо́ръ, я́ко и по сме́рти ду́хи прогоня́етъ и неду́гующимъ исцѣле́ніе подава́етъ.

Богоро́диченъ: Па́че вины́ ражда́еши вся́ческихъ Вино́внаго, премно́гою бла́гостію Человѣ́ка бы́вша, тѣ́мже согла́сно Тя́, Чи́стая, ублажа́емъ.

Пѣ́снь 8.

Ирмо́съ: Царя́ Небе́снаго, Его́же пою́тъ во́и а́нгельстіи, хвали́те и превозноси́те во вся́ вѣ́ки.

По́мощи я́же отъ Тебе́ тре́бующія, не пре́зри, Дѣ́во, пою́щія и превознося́щія Тя во вѣ́ки.

Неможе́ніе души́ моея́ исцѣля́еши, и тѣле́сныя болѣ́зни, Дѣ́во, да Тя просла́влю, Чи́стая, во вѣ́ки.

Исцѣле́ній бога́тство излива́еши вѣ́рно пою́щимъ Тя, Дѣ́во, и превознося́щимъ неизрѣче́нное Твое́ рождество́.

Напа́стей Ты прило́ги отгоня́еши, и страсте́й нахо́ды, Дѣ́во: тѣ́мже Тя пое́мъ во вся вѣ́ки.

Инъ.

Ирмо́съ: Отъ Отца́ пре́жде вѣ́къ рожде́ннаго и отъ Ма́тере въ послѣ́дняя воплоще́ннаго, свяще́нницы, благослови́те, лю́діе, превозноси́те во вся́ вѣ́ки.

О и́дольскихъ негодова́вше же́ртвахъ, духо́вны принесо́ша себе́ же́ртвы на небе́снѣй трапе́зѣ до́бліи муче́ніемъ.

Та́йныя слу́жбы священнодѣ́йствующе, отсѣче́ніе удо́въ Тому́ принесо́ша, я́ко прія́тныя же́ртвы, тѣ́ло и кро́вь на трапе́зѣ и ча́ши.

Запина́теля прама́тере утаи́вшися, пи́щный объя́сте пото́къ и отъ Боже́ственнаго дре́ва вкуси́сте, дѣви́цы, страда́ньми украси́вшися.

Богоро́диченъ: Проро́къ прорече́нія, Пресвята́я, въ Тебѣ́ коне́цъ прія́ша Боже́ственный, мíръ ве́сь до́лжно Тя́ пѣ́ти, Чи́стая, убѣжда́ютъ.

Пѣ́снь 9.

Ирмо́съ: Вои́стинну Богоро́дицу, Тя́ исповѣ́дуемъ, спасе́нніи Тобо́ю, Дѣ́во Чи́стая, съ безпло́тными ли́ки Тя́ велича́юще.

То́ка слезъ мои́хъ не отврати́ся, Яже отъ вся́каго лица́ вся́ку сле́зу отъе́мшаго, Дѣ́во, Христа́ ро́ждшая.

Ра́дости мое́ се́рдце испо́лни, Дѣ́во, Яже ра́дости пріе́мшая исполне́ніе, грѣхо́вную печа́ль потребля́ющи.

Приста́нище и предста́телство къ Тебѣ́ прибѣга́ющихъ бу́ди, Дѣ́во, и стѣна́ неруши́мая, прибѣ́жище же и покро́въ, и весе́ліе.

Свѣ́та Твоего́ заря́ми просвѣти́, Дѣ́во, мракъ невѣ́дѣнія отгоня́ющи, благовѣ́рно Богоро́дицу Тя исповѣ́дающихъ.

На мѣ́стѣ озлобле́нія не́мощи смири́вшагося, Дѣ́во, исцѣли́, изъ нездра́вія во здра́віе претворя́ющи.

Инъ.

Ирмо́съ: Велича́емъ Тя́, Ма́терь Бо́жію, и сла́вимъ Тя́, Богоро́дице Дѣ́во, я́ко Спа́са ро́ждшую ду́шъ на́шихъ.

Христо́вы ору́жницы, неду́гующимъ вра́чеве, Ки́ръ и Іоа́ннъ, чуде́съ благода́ть отъ Бо́га пріе́мше, исцѣля́ютъ всѣ́хъ на́съ.

Душе́вныя стра́сти, предста́вше, Ки́ръ и Іоа́ннъ до конца́ отгоня́ютъ вѣ́рою и си́лою Христо́вою, непобѣди́міи.

Бо́же Зижди́телю, Его́же проповѣ́даша иногда́ Ки́ръ и Іоа́ннъ, творя́щія па́мять тѣ́хъ муче́нія вся́ уще́дри.

Богоро́диченъ: Ма́терь вси́ Бо́га на́шего Боже́ственно почти́мъ: Тоя́ бо ра́ди вы́шнія сподо́бихомся че́сти, воспѣва́ющіи Ю.

Свѣти́ленъ. Подо́бенъ: Не́бо звѣзда́ми.

Чудодѣ́йственніи свѣти́льницы, Ки́ре со Іоа́нномъ, душе́вныя на́ша неду́ги и тѣле́сныя исцѣли́те, отъ Го́спода пріе́мше благода́ть исцѣле́ній. [Два́жды.]

Сла́ва, и ны́нѣ, богоро́диченъ:

Иже отъ Бо́га мíру пода́ннымъ благи́мъ Ты́ вина́ была́ еси́, Богоро́дице, но и ны́нѣ моли́ о о́бщемъ спасе́ніи Благопремѣ́ннаго Бо́га.

На хвали́техъ стихи́ры на 4, гла́съ 4. Подо́бенъ: Яко до́бля.

Дво́ицу почти́мъ* му́ченикъ пѣ́сньми,* Тро́ическую иму́щу свѣ́тлость,* основа́ніе вѣ́ры,* цвѣ́ты, дыха́ющія* благово́ніе и́стинно* Христо́ва разумѣ́нія,* Ки́ра вси́ и съ ни́мъ вели́каго Іоа́нна,* я́ко моля́щіяся непреста́нно о на́съ ко Го́споду. [Два́жды.]

Житія́ свѣ́тлостію* и посто́мъ просія́лъ еси́* и страда́ніемъ по́слѣжде* украси́лъ еси́ твою́ ду́шу, Ки́ре сла́вне,* во́инство же оста́вилъ еси́ земно́е,* му́дре Іоа́нне,* и обрѣ́лъ еси́ небе́сное,* моля́ще о́ба Спа́са* о блажа́щихъ ва́шу па́мять, блаже́нніи.

Вра́чеве показа́стеся немощны́мъ, блаже́нніи,* и свѣти́льницы незаходи́міи* Боже́ственныя вѣ́ры,* исповѣ́данія соглаго́льницы,* му́ченикомъ соприча́стницы,* вѣнцы́ вои́стинну отъ Христа́ пріи́мше,* Ки́ре сла́вне и му́дре Іоа́нне,* непреста́нно моли́те Спа́са* о и́же вѣ́рою пою́щихъ ва́съ.

Сла́ва, гла́съ то́йже:

Достохва́льными пѣ́сньми, вѣ́рніи, возвели́чимъ Ки́ра и Іоа́нна, и́же ду́хомъ единокро́вныя и по пло́ти братому́дрыя, съ ни́миже Аѳана́сію до́блюю похваля́юще и прозябе́ніе ея́, Ѳеодо́тію, Евдоксíю и Ѳеокти́сту, страстоте́рпицы и приснодѣ́вы, моля́щія Христа́ о душа́хъ на́шихъ.

И ны́нѣ, богоро́диченъ:

Изба́ви ны́ отъ ну́ждъ на́шихъ, Ма́ти Христа́ Бо́га, ро́ждшая всѣ́хъ Творца́, да вси́ зове́мъ Ти́: ра́дуйся, еди́но предста́тельство ду́шъ на́шихъ.

Славосло́віе вели́кое. Ектеніи́ и отпу́стъ.



НА ЛИТУРГІИ,

Блаже́нна отъ кано́на святы́хъ, пѣ́снь 3-я и 6-я на 8. Проки́менъ, гла́съ 4: Святы́мъ, и́же су́ть на земли́ Его́, [удиви́ Госпо́дь вся́ хотѣ́нія Своя́ въ ни́хъ]. Сти́хъ: Предзрѣ́хъ Го́спода предо мно́ю вы́ну, [я́ко одесну́ю мене́ е́сть, да не подви́жуся]. Апо́столъ къ Кори́нѳяномъ, зача́ло 153. Аллилу́ія, гла́съ 4: Воззва́ша пра́ведніи, [и Госпо́дь услы́ша и́хъ, и отъ всѣ́хъ скорбе́й и́хъ изба́ви и́хъ]. Сти́хъ: Мно́ги ско́рби пра́веднымъ, [и отъ всѣ́хъ и́хъ изба́витъ я́ Госпо́дь]. Ева́нгеліе Матѳе́я, зача́ло 34, отъ полу́. Прича́стенъ: Ра́дуйтеся пра́ведніи о Го́сподѣ, [пра́вымъ подоба́етъ похвала́.]

Источникъ: Слу́жба Святы́мъ и Чудотво́рцемъ, Безсре́бренникомъ Ки́ру и Іоа́нну, отправля́емая по церко́вному чиноположе́нію со всено́щнымъ бдѣ́ніемъ, въ де́нь Вступле́нія на Всероссíйскій Импе́раторскій престо́лъ Ея́ Импера́торскаго Вели́чества, Благочести́вѣйшія Госуда́рыни Императри́цы Екатери́ны Алексíевны, Самоде́ржицы Всероссíйскія, Іу́нія 28-го. — М.: Въ Моско́вской Тѵпогра́фіи, 1765. — 22 л.

/ Къ оглавленію раздѣла /


Наверхъ / Къ титульной страницѣ

0