Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 20 августа 2017 г. Сейчасъ на порталѣ посѣтителей - 11.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

О иконѣ Божіей Матери, именуемой «Троеручица».

Икона Божией Матери, именуемая Троеречица Исторія иконы Троеручицы соединена съ судьбою жизни святаго преподобнаго Іоанна Дамаскина, извѣстнаго пѣснописца нашей Церкви. Святой Іоаннъ, сильно поражавший, и письменно и устно, иконоборную ересь, за свою ревность въ этомъ отношеніи, былъ оклеветанъ Греческимъ императоромъ Львомъ Исавряниномъ (въ VIII вѣкѣ) предъ Дамасскимъ княземъ, при которомъ св. Іоаннъ занималъ важную государственную должность. Князь, не разобравши дѣла и не подозрѣвая тайныхъ козней царственной особы противу св. Іоанна, приказалъ отсѣчь у него руку, будто бы писавшую ко Льву письма, полныя враждебнаго духа противу Дамаска и политической измѣны его князю. Рука была отсѣчена и, въ страхъ всему городу, вывѣшена на публичномъ мѣстѣ. Подъ вечеръ, когда утихъ гнѣвъ князя Дамасскаго, св. Іоаннъ ходатайствовалъ предъ нимъ, чрезъ друзей своихъ, чтобъ позволено было взять ему вывѣшенную на позоръ кисть его усѣченной руки. Князь склонился на ходатайство своихъ придворныхъ, друзей Іоанновыхъ, и кисть руки была возвращена страдальцу. Когда наступила ночь, св. Іоаннъ затворился въ своей молитвенной, и приложивши мертвую кисть руки къ составу ея, палъ предъ иконою Богоматери, горько зарыдалъ и всею силою сердечной вѣры и любви просилъ у Нея исцѣленія руки своей, въ защиту православія и на пораженіе усиливающейся иконоборной ереси далѣе>>

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́нія въ 28-й де́нь.
Пра́зднованіе Пресвятѣ́й Влады́чицѣ на́шей Богоро́дицѣ и Приснодѣ́вѣ Марíи ра́ди ико́ны Ея́, нарица́емыя «Троеру́чица», я́же во Святѣ́й Горѣ́ Аѳо́нстѣй.

НА МАЛѢЙ ВЕЧЕРНИ,
На Го́споди воззва́хъ: стихи́ры самогла́сны [на 4], гла́съ 6:

Ра́дуйся, Аѳо́не святы́й,* иму́ще въ себѣ́ многоцѣле́бенъ да́ръ —* Пречи́стыя Дѣ́вы Богоро́дицы* ико́ны чуде́сное явле́ніе,* е́юже въ Тро́ицѣ сла́витъ Бо́га Вы́шняго. [Два́жды.]

Ра́дуйся, Аѳо́не святы́й,* и вся́ вселе́нная, ликовству́й,* я́ко ты́ и́маши во огра́дѣ свое́й* зало́гъ благода́ти Бо́жія —* пречу́дную ико́ну Влады́чицы Богоро́дицы,* ея́же троеру́чное явле́ніе сла́вимъ.

Ра́дуйся и весели́ся, Аѳо́не святы́й,* ты́ бо безцѣ́нное сокро́вище въ себѣ́ храни́ши —* цѣльбоно́сную ико́ну Пречи́стыя Дѣ́вы и Влады́чицы,* я́же тре́тію и пречи́стую ру́ку на ико́нѣ* изобрази́ всѣ́мъ на заступле́ніе.

Сла́ва, и ны́нѣ, гла́съ 8:

Ископа́йте, лю́діе, исто́чникъ въ высотѣ́ Аѳо́нскія горы́, потече́тъ бо сла́дость во ве́сь мíръ неизрече́нная, напая́ющи исцѣле́ніи душе́вными и тѣле́сными отъ святы́я и чудотво́рныя ико́ны Влады́чицы на́шея Приснодѣ́вы Богоро́дицы. Та́ бо вѣ́рнымъ источа́етъ да́ры цѣле́бныя и созыва́етъ ви́дѣти, ка́ко двѣма́ рука́ма держи́тъ во объя́тіихъ Держа́щаго всю́ тва́рь, тре́тіею избавля́етъ на́съ отъ всѣ́хъ бѣ́дъ.

На стихо́внѣ стихи́ры, гла́съ 7:

Восхваля́юще чу́до* отъ святы́я Твоея́ ико́ны,* толи́ко невѣ́домое,* вси́ вопіе́мъ Тебѣ́,* Дѣ́во Пречи́стая:* моли́твами Твои́ми* спаси́ ду́ши на́ша.

Сти́хъ: Слы́ши, Дщи́, и ви́ждь,* и приклони́ у́хо Твое́.

Лику́юще,* да пра́зднуетъ ве́сь мíръ* пречу́дное Богоро́ждшія Дѣ́вы явле́ніе,* сплета́юще Ей пѣ́сни духо́вныя,* потщи́мся воспѣ́ти* свяще́нный о́бразъ Ея́,* любо́вію и чудесы́ просла́вльшейся,* и предъ ни́мъ вопію́ще:* пода́ждь ми́лость на́мъ, Влады́чице,* и спаси́ ду́ши на́ша.

Сти́хъ: Лицу́ Твоему́ помо́лятся* бога́тіи лю́дстіи.

Лику́йте, вси́ лю́діе,* и торжеству́йте,* о́бразъ бо Пресвяты́я Тро́ицы,* всечестны́ми рука́ми Свои́ми* Пречи́стая Дѣ́ва* на ико́нѣ изобража́етъ на́мъ,* пріиди́те, празднолю́бцы вси́,* ублажи́мъ чу́дное* явле́ніе Богома́тере,* да спасе́тъ ду́ши на́ша.

Сла́ва, и ны́нѣ, гла́съ 8:

Влады́чице, пріими́ моли́твы ра́бъ Твои́хъ и изба́ви на́съ отъ вся́кія ну́жды и печа́ли.

Тропа́рь, гла́съ 4:

Дне́сь всемíрная ра́дость возсія́ на́мъ ве́лія: дарова́ся святѣ́й горѣ́ Аѳо́нстѣй цѣльбоно́сная Твоя́, Влады́чице Богоро́дице, ико́на, со изображе́ніемъ тричи́сленно и нераздѣ́льно пречи́стыхъ ру́къ Твои́хъ, въ прославле́ніе Святы́я Тро́ицы: созыва́еши бо вѣ́рныхъ и моля́щихся Тебѣ́ о се́мъ позна́ти, я́ко двѣма́ и́маши Сы́на и Го́спода держа́ти, тре́тію же яви́ на прибѣ́жище и покро́въ чту́щимъ Тя́ отъ вся́кихъ напа́стей и бѣ́дъ избавля́ти, да вси́, притека́ющіи къ Тебѣ́ вѣ́рою, пріе́млютъ отъ всѣ́хъ зо́лъ свобожде́ніе, отъ враго́въ защище́ніе. Сего́ ра́ди и мы́ вку́пѣ со Аѳо́номъ вопіе́мъ: ра́дуйся, Благода́тная, Госпо́дь съ Тобо́ю.


НА ВЕЛИЦѢЙ ВЕЧЕРНИ,
[Блаже́нъ му́жъ.., 1-й антифо́нъ.] На Го́споди воззва́хъ: стихи́ры [на 8], гла́съ 1. Подо́бенъ: О, ди́вное чу́до!

О, ди́вное чу́до!* Исто́чникъ приснотеку́щій,* пречи́стый о́бразъ Тво́й, Влады́чице Богоро́дице,* дарова́ся святоимени́той Горѣ́,* удивля́етъ же премíрная* и ужаса́етъ земна́я чудесы́ свои́ми,* зря́ще бо о́бразъ Святы́я Тро́ицы,* треми́ рука́ми Твои́ми изображе́нный:* двѣма́ держи́ши Сы́на Своего́, Христа́ Бо́га на́шего,* тре́тіею же отъ напа́стей и бѣ́дъ вѣ́рно прибѣга́ющихъ избавля́еши,* тѣ́мже благода́рно Тебѣ́ вопіе́мъ:* Обра́дованная, ра́дуйся, съ Тобо́ю Госпо́дь,* подая́й мíрови Тобо́ю ве́лію ми́лость. [Три́жды.]

О, ве́ліе чу́до и неизрече́нное!* Яви́ на́мъ на ико́нѣ святѣ́й три́ ру́ки Своя́,* о Дѣ́во Преблагослове́нная!* Сіе́ бы́сть чу́до чудесе́мъ* и во все́мъ мíрѣ ра́дость ве́лія,* неизрече́нное бога́тство возсія́ на́мъ благода́ти Бо́жія,* да вси́, припа́дающе къ Тебѣ́, мо́лимся:* отврати́, Богоро́дице, вся́кія напа́сти отъ ра́бъ Твои́хъ* и покажи́ си́лу и благода́ть цѣльбоно́сныя святы́я ико́ны Твоея́,* да вѣ́рно Тебѣ́ вопіе́мъ:* Обра́дованная, ра́дуйся, съ Тобо́ю Госпо́дь,* подая́й мíрови Тобо́ю ве́лію ми́лость. [Три́жды.]

О, стра́нное чу́до и пресла́вное!* Да вси́, притека́юще, у́зримъ,* ка́ко тре́тію и пречи́стую ру́ку на ико́нѣ изъяви́,* о Дѣ́во Преблагослове́нная,* на по́мощь вѣ́рнымъ и въ заступле́ніе* отъ бѣ́дъ на́шихъ и напа́стей,* Тебѣ́ еди́ной досто́йно е́сть показа́ти* сто́ль ве́лія чудеса́,* пріиди́те, вѣ́рніи,* приспѣ́ бо де́нь свѣ́тлаго Ея́ торжества́,* припа́дающе, мо́лимся и уми́льно вопіе́мъ:* Обра́дованная, ра́дуйся, съ Тобо́ю Госпо́дь,* подая́й мíрови Тобо́ю ве́лію ми́лость. [Два́жды.]

Сла́ва, и ны́нѣ, гла́съ 2:

О, пресла́внаго чудесе́! Воспѣ́ти досто́йно недоумѣва́етъ вся́къ у́мъ, ка́ко во Аѳо́нъ вхо́дитъ Цари́ца, Царя́ Христа́ ро́ждшая, и преподо́бному Михаи́лу Малеину́ яви́ся чу́днымъ о́бразомъ, откры́ благода́ть о Горѣ́, и о се́мъ Аѳо́нъ ликовству́етъ, я́ко имѣ́юще многобога́тый да́ръ во огра́дѣ свое́й, цѣльбоно́сную, Влады́чице, Твою́ ико́ну, къ Не́йже мы́ возопіе́мъ: о Преблагослове́нная, къ Тебѣ́ имѣ́ютъ вѣ́рніи сердца́, любо́вію распале́нная, благода́рственную пѣ́снь пою́ще, я́ко Всенаде́жнѣй Засту́пницѣ ро́да на́шего, Яже благоизво́ли дарова́ти на́мъ на прибѣ́жище пречи́стый зра́къ Сво́й, въ не́мъ бо зри́мъ прославля́емый въ Тебѣ́ о́бразъ Тріеди́наго Божества́, просла́ви и въ на́съ, чту́щихъ Тя́, Влады́чице, и́мя Твое́, и сподо́би ми́лость улучи́ти Сы́на Твоего́, Христа́ Бо́га на́шего, Того́ моля́щи, я́ко Милосе́рдъ.

Вхо́дъ. Проки́менъ дне́. И чте́нія три́ Богоро́дицы.

Бытія́ чте́ніе. [Глава́ 28.]

Изы́де Іа́ковъ отъ студенца́ кля́твеннаго и и́де въ Харра́нь. И обрѣ́те мѣ́сто, и спа́ та́мо, за́йде бо со́лнце; и взя́тъ отъ ка́менія мѣ́ста того́, и положи́ возгла́віе себѣ́, и спа́ на мѣ́стѣ о́номъ. И со́нъ ви́дѣ: и се́ лѣ́ствица утвержде́на на земли́, eя́же глава́ досяза́ше до небе́съ, и Ангели Бо́жіи восхожда́ху и низхожда́ху по не́й. Госпо́дь же утвержда́шеся на не́й, и рече́: Азъ Бо́гъ Авраа́мовъ, отца́ твоего́, и Бо́гъ Исаа́ковъ, не бо́йся: земля́, идѣ́же ты́ спи́ши на не́й, тебѣ́ да́мъ ю́ и сѣ́мени твоему́. И бу́детъ сѣ́мя твое́, я́ко песо́къ земны́й, и распространи́тся на мо́ре, и ли́ву, и сѣ́веръ, и на восто́ки, и возблагословя́тся о тебѣ́ вся́ колѣ́на земна́я и о сѣ́мени твое́мъ. И се́ Азъ съ тобо́ю, сохраня́яй тя́ на вся́комъ пути́, а́може а́ще по́йдеши, и возвращу́ тя́ въ зе́млю сію́, я́ко не и́мамъ тебе́ оста́вити, до́ндеже сотвори́ти Ми́ вся́, ели́ка глаго́лахъ тебѣ́. И воста́ Іа́ковъ отъ сна́ своего́, и рече́: я́ко éсть Госпо́дь на мѣ́стѣ се́мъ, а́зъ же не вѣ́дѣхъ. И убоя́ся, и рече́: я́ко стра́шно мѣ́сто сіе́, нѣ́сть сіе́, но до́мъ Бо́жій, и сія́ врата́ небе́сная.

Прoро́чества Іезекíилева чте́ніе. [Глава́ 43 и 44.]

Та́ко глаго́летъ Госпо́дь: бу́детъ отъ дне́ осма́го и про́чее, сотворя́тъ іере́и на олтари́ всесожже́нія ва́шего и я́же спасе́нія ва́шего, и пріиму́ вы́, глаго́летъ Адонаи́ Госпо́дь. И обрати́ мя́ на пу́ть вра́тъ святы́хъ внѣ́шнихъ, зря́щихъ на восто́ки, и сія́ бя́ху затворе́на. И рече́ Госпо́дь ко мнѣ́: врата́ сія́ затворе́на бу́дутъ, и не отве́рзутся, и никто́же про́йдетъ сквозѣ́ и́хъ, я́ко Госпо́дь Бо́гъ Изра́илевъ про́йдетъ и́ми, и бу́дутъ затворе́на. Яко игу́менъ ся́детъ въ ни́хъ снѣ́сти хлѣ́бъ: по пути́ ела́мскихъ вра́тъ вни́детъ, и по пути́ его́ изы́детъ. И введе́ мя́ по пути́ вра́тъ святы́хъ, су́щихъ къ сѣ́веру, пря́мо хра́му, и ви́дѣхъ, и се́ испо́лнь сла́вы хра́мъ Госпо́день.

При́тчей чте́ніе. [Глава́ 9.]

Прему́дрость созда́ себѣ́ до́мъ и утверди́ столпо́въ се́дмь. Закла́ своя́ же́ртвенная, и раствори́ въ ча́ши свое́й вино́, и угото́ва свою́ трапе́зу. Посла́ своя́ рабы́, созыва́ющи съ высо́кимъ проповѣ́даніемъ на ча́шу, глаго́лющи: и́же е́сть безу́менъ, да уклони́тся ко мнѣ́. И тре́бующимъ ума́ рече́: пріиди́те, яди́те мо́й хлѣ́бъ и пíйте вино́, е́же раствори́хъ ва́мъ. Оста́вите безу́міе, и жи́ви бу́дите, и взыщи́те ра́зума, да поживете́, и испра́вите ра́зумъ въ вѣ́дѣніи. Наказу́яй злы́я, пріи́метъ себѣ́ безче́стіе, облича́яй же нечести́ваго опоро́читъ себе́. Обличе́нія бо нечести́вому — ра́ны ему́. Не облича́й злы́хъ, да не возненави́дятъ тебе́, облича́й прему́дра, и возлю́битъ тя́. Да́ждь прему́дрому вину́, и прему́дршій бу́детъ, сказу́й пра́ведному, и приложи́тъ пріима́ти. Нача́ло прему́дрости — стра́хъ Госпо́день, и совѣ́тъ святы́хъ — ра́зумъ. Разумѣ́ти бо зако́нъ по́мысла е́сть блага́го: си́мъ бо о́бразомъ мно́гое поживе́ши вре́мя, и приложа́тся тебѣ́ лѣ́та живота́.

На литíи стихи́ры, гла́съ 5:

Ты́ еси́ Моли́твенница, нело́жная упова́ющихъ христіа́нъ, Ты́ еси́ Предста́тельница вѣ́рная всѣ́мъ прибѣга́ющимъ, показа́ла бо еси́ на́мъ во спасе́ніе троеру́чный о́бразъ Тво́й, пріими́ мольбы́ отъ на́съ, прилѣ́жно призыва́ющихъ Тя́, и пода́ждь ве́лію и бога́тую ми́лость.

Ты́ еси́ упова́ніе и покро́въ вѣ́рнымъ, о Преблагослове́нная Влады́чице, да́руй на́мъ ми́лость Сы́на Твоего́ и Го́спода, Ты́ бо еси́ Хода́таица къ Нему́ си́льная, ели́ко восхо́щеши, вся́ у Него́ испроси́ти мо́жеши, Того́ моли́ пода́ти ми́ръ и ве́лію ми́лость.

Ты́ еси́ прибѣ́жище на́ше, Ты́ еси́ избавле́ніе отъ напа́стей и бѣ́дъ, умилосе́рдися, о Дѣ́во Пречи́стая, низпосли́ на́мъ щедро́ты милосе́рдія отъ святы́я Твоея́ ико́ны, на ню́же ра́достно взира́юще, про́симъ умире́нія душа́мъ на́шимъ и ве́лію ми́лость.

Сла́ва, и ны́нѣ, гла́съ 8:

О, чу́дное украше́ніе хра́ма Твоего́, Госпоже́ Цари́це Богоро́дице, ико́ною Твое́ю, е́йже предстоя́тъ вѣ́рніи, моля́щеся, со слеза́ми вопію́тъ: о Дѣ́во Всеблага́я Богоро́дице! Ты́ еси́ небе́сныхъ сла́ва, земны́хъ упова́ніе, оби́димыхъ Засту́пница, печа́льныхъ утѣше́ніе. Дне́сь пра́зднуемъ явле́ніе честна́го о́браза Твоего́, преиспо́лненнаго си́лы и чуде́съ Тріеди́наго Божества́, я́ко три́ ру́ки на не́мъ ви́димы е́сть: двѣма́ держи́ши Держа́щаго вся́, тре́тіею же защища́еши отъ бѣ́дъ чту́щихъ Тя́, да вси́ боля́щіи, притека́юще, неоску́дно пріе́млютъ исцѣле́ніе, стра́ждущіи отъ бѣ́дъ избавле́ніе, Ты́ бо еси́ всѣ́мъ Нело́жная на́мъ Предста́тельница и Моле́бница ко Христу́ Бо́гу на́шему, Того́ моли́ спасти́ся душа́мъ на́шимъ.

На стихо́внѣ стихи́ры самогла́сны, гла́съ 4:

Яко пресвѣ́тлѣе со́лнца* дне́сь возсія́ на́мъ свѣти́ло во хра́мѣ се́мъ,* предстоя́щая ико́на Влады́чицы на́шея Богоро́дицы,* освѣща́етъ бо прибѣга́ющихъ къ не́й вѣ́рою* и позна́ніе подае́тъ о чуде́сномъ явле́ніи Свое́мъ,* я́ко тричи́сленныя ру́ки Ея́ прославля́ютъ Святу́ю Тро́ицу,* и бли́зъ престо́ла Тро́ичнаго Сама́ сѣди́тъ,* моля́щи о на́съ, изба́витися душа́мъ на́шимъ* отъ всѣ́хъ бѣ́дъ, зо́лъ и обстоя́ній.

Гла́съ 5:

Сти́хъ: Слы́ши, Дщи́, и ви́ждь,* и приклони́ у́хо Твое́.

Яко свѣтоза́рная заря́,* озари́ въ сердца́хъ на́шихъ ико́на Твоя́, о Дѣ́во, ра́дость ве́лію,* показу́етъ бо чу́до пресла́вное,* ка́ко Ты́, Влады́чице Всепѣ́тая,* двѣма́ рука́ма Сы́на и Го́спода объе́млеши,* тре́тіею же ди́вный покро́въ и заступле́ніе рабо́мъ Твои́мъ явля́еши.* Спаси́, Влады́чице, ду́ши на́ша* отъ всѣ́хъ бѣ́дъ, зо́лъ и обстоя́ній.

Сти́хъ: Лицу́ Твоему́ помо́лятся* бога́тіи лю́дстіи.

Яже ненаде́жныхъ упова́ніе извѣ́стное* и согрѣша́ющихъ спасе́ніе,* Марíе Всепѣ́тая, Чи́стая Богоро́дице,* пріими́ отъ на́съ моле́ніе сіе́,* зря́щихъ на пречестну́ю ико́ну Твою́,* я́ко отъ нея́ вѣ́рнымъ источа́еши чудеса́,* скорбя́щимъ ско́рби облегча́еши,* немощны́хъ исцѣля́еши,* ожида́емъ и мы́ милосе́рдія Твоего́:* пода́ждь бога́тую Твою́ ми́лость и спаси́ ду́ши на́ша* отъ всѣ́хъ бѣ́дъ, зо́лъ и обстоя́ній.

Сла́ва, и ны́нѣ, гла́съ 6:

Наде́жда безмѣ́рная и во все́мъ Помо́щница и Засту́пница гото́вая Ты́ еси́, Дѣ́во Пречи́стая. Пріиди́те, вѣ́рніи, соше́дшеся въ хра́мъ, пѣ́сньми духо́вными ра́достно Ея́ почти́мъ, зря́ще чудотво́рную ико́ну Ея́, и со дерзнове́ніемъ моле́ніе принесе́мъ и уми́льно возопіе́мъ: ра́дуйся, Влады́чице мíра и ду́шъ на́шихъ спасе́ніе; ра́дуйся, Защи́тнице бѣ́дствующихъ, подаю́щая Свою́ неоску́дную ми́лость; ра́дуйся, утоле́ніе печа́льныхъ. Не преста́й, Влады́чице, о на́съ моли́ти Христа́ Бо́га на́шего, поми́ловатися душа́мъ на́шимъ.

На благослове́ніи хлѣ́бовъ: Тропа́рь Богоро́дицы [пи́санъ на ма́лѣй вече́рни], три́жды.



НА УТРЕНИ,
На Бо́гъ Госпо́дь: Тропа́рь Богоро́дицы, три́жды.

По 1-мъ стихосло́віи сѣда́ленъ, гла́съ 4. Подо́бенъ: Удиви́ся Іо́сифъ.

Чу́до пресла́вное зри́тся дне́сь, весели́теся, лю́діе, почита́юще явле́ніе ико́ны Всенепоро́чныя Дѣ́вы Богоро́дицы, се́ бо возсія́ на́мъ Боже́ственная заря́, благоче́стно отъ всѣ́хъ родо́въ пою́щимъ, и ны́нѣ мы́ Ей, взыва́юще, прино́симъ благода́рственную пѣ́снь, я́ко показу́етъ на́мъ познава́ти Еди́наго въ Тро́ицѣ Бо́га на́шего.

Сла́ва, и ны́нѣ, то́йже.

По 2-мъ стихосло́віи сѣда́ленъ, гла́съ 4. Подо́бенъ: Удиви́ся Іо́сифъ.

Чу́до чудесе́мъ яви́ся на́мъ ико́на Твоя́, Влады́чице Богоро́дице, на не́йже пречи́стыми Твои́ми рука́ми Святу́ю Тро́ицу нераздѣ́льно въ Тріе́хъ Ѵпоста́сѣхъ прославля́еши, сего́ ра́ди, взира́юще на ико́ну, съ вѣ́рою мо́лимся: пріими́, о Ма́ти и Дѣ́во, на́съ въ Сво́й покро́въ и изба́ви всѣ́хъ бѣ́дъ, Преблагослове́нная.

Сла́ва, и ны́нѣ, то́йже.

Велича́ніе со сладкопѣ́ніемъ:

Ли́къ 1: Велича́емъ Тя́, Пренепоро́чная Дѣ́во, и чте́мъ чудеса́ о́браза свята́го Твоего́, тре́хъ пречи́стыхъ ру́къ Твои́хъ явле́ніе въ сла́ву Божества́, въ Тро́ицѣ Бо́га на́шего.

Ли́къ 2: Велича́емъ Тя́, Пресвята́я Дѣ́во, и чте́мъ тричи́сленное изображе́ніе пречи́стыхъ ру́къ Твои́хъ, Ты́ бо двѣма́ Сы́на и Го́спода держи́ши, тре́тіею отъ напа́стей и бѣ́дъ на́съ избавля́еши.

Псало́мъ избра́нный: Помяни́, Го́споди, Дави́да...

По поліеле́и сѣда́ленъ, гла́съ 8. Подо́бенъ: Повелѣ́нное та́йно.

Ве́ліе чу́до и пресла́вное, Аѳо́нъ велегла́сно вопіе́тъ, иму́ще о́бразъ въ себѣ́ Пречи́стыя Дѣ́вы Богоро́дицы, я́ко стра́жа наде́жнаго проти́ву враго́въ ви́димыхъ и неви́димыхъ, и мы́ вси́ уми́льно вопіе́мъ: предвари́, Влады́чице, моли́твами Твои́ми ко Христу́ Бо́гу на́шему, да спасе́тъ ду́ши на́ша.

Сла́ва, и ны́нѣ, то́йже.

Та́же степе́нна, 1-й антифо́нъ 4-го гла́са. Проки́менъ, гла́съ 4: Слы́ши, Дщи́, и ви́ждь,* и приклони́ у́хо Твое́. Сти́хъ: Лицу́ Твоему́ помо́лятся бога́тіи лю́дстіи. Вся́кое дыха́ніе... Ева́нгеліе Луки́, зача́ло 4.

По 50-мъ псалмѣ́ стихи́ра, гла́съ 6:

Дне́сь ра́дуйтеся, лю́діе, прине́сше достодо́лжную пѣ́снь Влады́чицѣ на́шей Приснодѣ́вѣ Богоро́дицѣ, и почерпи́те благода́ть неоску́дную отъ неистощи́маго исто́чника ико́ны Ея́, свѣтлоблиста́емыя чудесы́, я́ко тричи́сленно изобрази́ пречи́стыя ру́ки Своя́ во о́бразъ Тро́ичнаго Божества́ и, преподо́бному Михаи́лу Малеину́ возвѣща́ющи благода́ть, Го́ру Аѳо́нскую избра́ Себѣ́ я́ко мѣ́сто уго́дное, спаса́ти въ не́й тве́рдо обита́ющихъ и прибѣга́ющихъ къ Ея́ покро́ву и заступле́нію и разсѣ́янный у́мъ собра́ти во еди́но ста́до, е́же прославля́ти Христа́ Бо́га на́шего, Того́ моли́ спасти́ся душа́мъ на́шимъ.

Кано́нъ, [благода́ренъ Богома́тери со ирмосо́мъ на 6 и пра́здника на 8,] его́же краегране́сіе: Пресвята́я Дѣ́ва въ рука́хъ Свои́хъ сла́витъ Святу́ю Тро́ицу. Гла́съ 1.

Пѣ́снь 1.

Ирмо́съ: Твоя́ побѣди́тельная десни́ца боголѣ́пно въ крѣ́пости просла́вися: та́ бо, Безсме́ртне, я́ко всемогу́щая проти́вныя сотре́, изра́ильтяномъ пу́ть глубины́ новосодѣ́лавшая.

Ди́вны Твоя́ чудеса́, Влады́чице Богоро́дице! Яже исцѣли́ усѣ́ченную ру́ку десну́ю преподо́бному Іоа́нну Дамаски́ну, е́юже по исцѣле́ніи пѣснотворе́ніе написа́ въ прославле́ніе и́мене Твоего́, и вси́, таково́му чудеси́ дивя́щеся, вопію́тъ: ра́дуйся, Преблагослове́нная, въ болѣ́знехъ на́шихъ исцѣле́ніе.

Влады́чице Богоро́дице, извлеки́ мя изъ глубины́ напа́стей и бѣ́дъ, прибѣга́ю и а́зъ подъ кро́въ Тво́й и заступле́ніе, да не изы́ду посра́мленъ и лише́нъ ми́лости Твоея́, слезя́щій предъ чудотво́рною ико́ною Твое́ю, на не́йже три́ руки́ изображе́ны въ сла́ву Бо́га Вы́шняго.

О, Богоблаже́нная и Многоимени́тая Дѣ́во Ма́ти, исто́чникъ милосе́рдія и щедро́тъ, а́зъ имѣ́ю къ Тебѣ́ вѣ́ру ве́лію, наде́жду извѣ́стную и любо́вь серде́чную, отврати́ вся́кія напа́сти отъ ра́бъ Твои́хъ, сла́вимъ бо тричи́сленное и нераздѣ́льное на ико́нѣ пречи́стыхъ ру́къ Твои́хъ явле́ніе, и́миже Ты́ Святу́ю Тро́ицу во еди́нствѣ прославля́еши.

Влады́чице Дѣ́во, кто́ не удиви́тся всечестны́я Твоея́ ико́ны троеру́чному явле́нію, сла́достно бо зрѣ́ти, ка́ко Ты́ прему́дро Тріѵпоста́сное Божество́ прославля́еши, ско́ро услы́ши, Пречи́стая, моле́ніе на́ше и защити́ руко́ю Твое́ю, ю́же тре́тію яви́ на́мъ на заступле́ніе.

Катава́сія, гла́съ 8: Сокруши́вшему бра́ни...

Пѣ́снь 3.

Ирмо́съ: Еди́не, вѣ́дый человѣ́ческаго существа́ не́мощь и ми́лостивно въ не́ вообра́жся, препоя́ши мя́ съ высоты́ си́лою, е́же вопи́ти Тебѣ́, Святы́й, одушевле́нный хра́ме неизрече́нныя сла́вы Твоея́, Человѣколю́бче.

Съ высоты́ Аѳо́нскія Горы́ повсю́ду блиста́етъ бога́тство милосе́рдія Твоего́, Влады́чице Богоро́дице, отъ святы́я ико́ны, ю́же троеру́чно яви́ на прибѣ́жище вѣ́рнымъ, мы́ же къ Тебѣ́ воззове́мъ: о Ма́ти и Дѣ́во! изба́ви на́съ отъ огня́, и меча́, и всѣ́хъ бѣ́дъ, Преблагослове́нная.

Безмѣ́рную Твою́ ми́лость на мнѣ́ славосло́влю и велича́ю въ пѣ́снехъ благода́рныхъ чи́стымъ се́рдцемъ и усты́, я́ко изба́вила еси́ мене́ всѣ́хъ напа́стей и бѣ́дъ и не допусти́ла еси́ поги́бнути до конца́. И а́зъ Тебе́, Влады́чицу Богоро́дицу, и чудеса́ о́браза Твоего́ велича́ти и прославля́ти не преста́ну во вѣ́ки.

Высота́ вели́ка Аѳо́нскія Горы́, но явле́ніе и чудеса́ ико́ны Твоея́ неизрече́нно превы́ше горы́, и благода́ть Бо́жія въ не́й, я́ко мо́ре неизчерпа́емое, приходя́щимъ вѣ́рою: пріе́млютъ бо утѣше́ніе и въ напа́стехъ избавле́ніе. Пода́ждь, о Преблагослове́нная Дѣ́во, и мнѣ́, бѣ́дствующему, защище́ніе ско́рое.

Ты́ еси́ всѣ́хъ скорбя́щихъ прибѣ́жище, и оби́димыхъ Засту́пница, и неруши́мый покро́въ въ бѣда́хъ стра́ждущихъ. Тѣ́мже, припа́дая, вопіе́мъ Тебѣ́, Дѣ́во Пречи́стая: пріими́ моле́ніе на́ше, отъ всея́ души́ честну́ю и преиспо́лненную щедро́тъ ико́ну Твою́ почита́ющихъ.

Сѣда́ленъ, гла́съ 5. Подо́бенъ: Собезнача́льное Сло́во.

Яко возлюби́ла еси́ па́ству Твою́, Богоро́ждшая Ма́ти, благоволи́ дарова́ти е́й святу́ю пречестну́ю Свою́ ико́ну, на не́йже Прему́дрость Тріѵпоста́сную въ пречи́стыхъ рука́хъ Свои́хъ прославля́еши, и подае́ши познава́ти въ Тро́ицѣ Еди́наго Бо́га, и мно́гая чудеса́ отъ ико́ны Твоея́ вѣ́рою и любо́вію Тя́ призыва́ющимъ явля́еши, и па́ству Свою́ огражда́еши, и подае́ши всему́ мíру спасе́ніе и утвержде́ніе.

Сла́ва, и ны́нѣ, то́йже.

Пѣ́снь 4.

Ирмо́съ: Го́ру Тя́, благода́тію Бо́жіею приосѣне́нную, прозорли́выма Авваку́мъ усмотри́въ очи́ма, изъ Тебе́ изы́ти Изра́илеву провозглаша́ше Свято́му, во спасе́ніе на́ше и обновле́ніе.

Обнови́мъ сердца́ вѣ́рою, зря́ще во Аѳо́нстѣй Горѣ́ но́вое Влады́чицы Богоро́дицы троеру́чное явле́ніе. Вся́къ, недоумѣва́юще о се́мъ, то́кмо моля́щеся, Тебѣ́ вопіе́тъ: о Ма́ти и Дѣ́во, пріими́ моле́ніе на́ше и пода́ждь ми́лость и защище́ніе, и испо́лни язы́къ и сердца́ вѣ́рныхъ досто́йнаго Ти́ хвале́нія.

Ра́достною трубо́ю Аѳо́нъ во вся́ концы́ земли́ гласи́тъ: пріиди́те и ви́дите дѣла́ Бо́жія, ка́ко Пречи́стая Дѣ́ва на ико́нѣ въ рука́хъ Свои́хъ явля́етъ Тро́ичный ви́дъ Божества́, и́миже держи́тъ Любо́вь и Милосе́рдіе, воспису́емъ сугу́бо въ сердца́хъ на́шихъ ра́достную пѣ́снь досто́йнаго Ея́ хвале́нія.

Яко сподо́бися преподо́бный Михаи́лъ Малеи́нъ благода́ть я́вно отъ Тебе́, Влады́чице Богоро́дице, улучи́ти, сподо́би и мене́, Всепречи́стая, зрѣ́ти и разумѣ́ти, ка́ко Ты́ Святу́ю Тро́ицу на ико́нѣ въ рука́хъ Свои́хъ прославля́еши, да воспису́ю въ се́рдцѣ мое́мъ Тво́й о́бразъ и молю́ Тя: отве́рзи язы́къ мо́й и испо́лни его́ досто́йнаго Тебе́ хвале́нія.

Гряди́те, лю́діе, ко Аѳо́ну дне́сь, е́же принести́ моле́ніе Приснодѣ́вѣ Чи́стѣй Богоро́дицѣ предъ чу́дною Ея́ ико́ною, тричи́сленно и нераздѣ́льно пречи́стыми рука́ми изобража́ющую еди́ную си́лу Божества́, на сію́ же враги́ на́ша зрѣ́ти не мо́гутъ, мы́ же, вѣ́рніи, взира́юще на о́ную, вопіе́мъ: отве́рзи на́мъ уста́ пѣ́ти пѣ́снь досто́йнаго Тебе́ хвале́нія.

Пѣ́снь 5.

Ирмо́съ: Просвѣти́вый сія́ніемъ прише́ствія Твоего́, Христе́, и освѣти́вый Кресто́мъ Твои́мъ мíра концы́, сердца́ просвѣти́ свѣ́томъ Твоего́ богоразу́мія, правосла́вно пою́щихъ Тя́.

Аѳо́нская Гора́ преиспо́лнися святы́нь, на не́йже яви́ся и просла́вися свята́я Твоя́, Влады́чице Богоро́дице, ико́на, крася́щаяся излія́ніемъ отъ нея́ благода́ти во исцѣле́ніе скорбя́щихъ, и вси́ таково́му чудеси́ дивя́тся, я́ко три́ пречи́стыя Твоя́ ру́ки на́мъ яви́.

Сія́етъ добро́та, блиста́ютъ, я́ко со́лнечныя лучи́, отъ Твоея́ святы́я ико́ны разли́чная чудеса́. Низпосли́ мнѣ́, о Преблагослове́нная, покро́въ и заступле́ніе Твое́ отъ враго́въ, гу́бящихъ мя́, тíи бо отъ руки́ Твоея́ поги́бнутъ, я́ко тре́тію на ико́нѣ изъяви́ на́мъ на заступле́ніе.

Пресла́вное чу́до зри́тся, Всенепоро́чная Дѣ́во, на ико́нѣ Твое́й: во о́бразъ Святы́я Тро́ицы ру́ки Своя́ яви́ и позна́ніе подае́ши рабо́мъ Твои́мъ, я́ко двѣма́ держи́ши Держа́щаго вся́, тре́тіею же защища́еши во всѣ́хъ напа́стехъ вѣ́рно прибѣга́ющихъ къ Тебѣ́. Мы́ же, вѣ́рніи, вопіе́мъ: ра́дуйся, Засту́пнице на́ша Всенаде́жная.

О, неизмѣ́римая глубина́ рождества́ Твоего́! О, неизрече́нное бога́тство милосе́рдія Твоего́! Яко безмѣ́рныя печа́ли и напа́сти въ ра́дость на́мъ твори́ши, призыва́ющимъ Тя́ въ ну́ждѣ и обстоя́ніи, пода́ждь же ми́лость Твою́ въ стра́шный де́нь суда́ и испыта́нія дѣ́лъ человѣ́ческихъ.

Пѣ́снь 6.

Ирмо́съ: Обы́де на́съ послѣ́дняя бе́здна, нѣ́сть избавля́яй, вмѣни́хомся, я́ко о́вцы заколе́нія, спаси́ лю́ди Твоя́, Бо́же на́шъ, Ты́ бо крѣ́пость немощству́ющихъ и исправле́ніе.

Во Аѳо́нъ ра́достно вси́ притеце́мъ зрѣ́ти явле́ніе ико́ны Влады́чицы Богоро́дицы, я́ко сла́витъ небе́снаго Творца́ въ Тро́ицѣ Трисо́лнечное естество́ и на́съ Тро́ическому покланя́тися учи́тъ Божеству́. Ейже, припа́дая, со слеза́ми вопіе́мъ: о Дѣ́во Пречи́стая, отве́рзи на́ша уста́ и испо́лни се́рдце вопи́ти Тебѣ́ пѣ́снь досто́йнаго хвале́нія.

Утѣше́ніе ве́ліе обрѣто́хъ души́ мое́й въ бѣда́хъ и напа́стехъ — прибѣга́ти къ Тебѣ́, Богороди́тельницѣ, и а́зъ къ цѣльбоно́снѣй Твое́й ико́нѣ со слеза́ми вопію́: не пре́зри, Богоро́дице, сле́зъ и воздыха́нія моего́ и возведи́ отъ печа́лей въ ра́дость, я́ко и Аѳо́нъ ра́достно ликовству́етъ, иму́ще честны́й о́бразъ Тво́й троеру́чнаго явле́нія.

Влады́чице, мíра спасе́ніе, вѣ́рныхъ наде́жда, покро́въ и заступле́ніе, всеусе́рдно припа́дая къ Тебѣ́, вопіе́мъ: покажи́ на на́съ, погиба́ющихъ, си́лу и благода́ть цѣльбоно́сныя святы́я ико́ны Твоея́, изба́ви на́съ всѣ́хъ напа́стей, да не преста́немъ велича́ти Тебе́, Засту́пницу въ печа́лехъ вѣ́рную.

О, Всенепоро́чная Дѣ́во! Боже́ственное прорече́ніе у́стъ Твои́хъ испо́лнися, е́же о рожде́ніи преподо́бнаго Михаи́ла Малеина́ пре́жде предрекла́ еси́, ра́дуется вся́ земля́ о Боже́ственнѣй си́лѣ Твое́й, весели́тся гла́съ пра́зднующихъ непреста́нно, зря́ще Твоего́ лица́ добро́ту неизрече́нную, ве́село воспѣва́юще: ра́дуйся, Дѣ́во, христіа́нъ похвало́.

Конда́къ, гла́съ 8. Подо́бенъ: Взбра́нной Воево́дѣ.

Дне́сь весе́лое наста́ ны́нѣ Твое́ торжество́, Богома́ти Пречи́стая, вси́ вѣ́рніи испо́лнишася ра́дости и весе́лія, я́ко сподо́бльшеся изря́дно воспѣ́ти преди́вное явле́ніе честна́го о́браза Твоего́ и Ро́ждшагося изъ Тебе́ Младе́нца, и́стинна же Бо́га, Его́же двѣма́ рука́ма объе́млеши, и тре́тіею отъ напа́стей и бѣ́дъ на́съ изыма́еши и избавля́еши отъ всѣ́хъ зо́лъ и обстоя́ній.

Икосъ:

Ангеловъ Творца́, и́стиннаго Свѣ́та Христа́, неизрече́нно изъ Тебе́, Богома́ти, возсія́вшаго, на ико́нѣ чуде́снѣ яви́ и тричи́сленнымъ Свои́мъ изображе́ніемъ пречи́стыхъ ру́къ Твои́хъ вся́ концы́ земли́ удиви́, тѣ́мже благода́рственно дерза́емъ вопи́ти Тебѣ́ си́це: ра́дуйся, по человѣ́честву двѣма́ рука́ма Сы́на и Бо́га объе́млющая; ра́дуйся, по Божеству́ тре́тіею руко́ю отъ напа́стей и бѣ́дъ на́съ избавля́ющая; ра́дуйся, стра́ждущимъ въ печа́лехъ помога́ющая; ра́дуйся, болѣ́зни вско́рѣ исцѣля́ющая; ра́дуйся, я́ко Тобо́ю защища́емся отъ враго́въ си́льныхъ, помышля́ющихъ на ны́ зла́я; ра́дуйся, сохраня́ющая отъ всѣ́хъ зо́лъ и обстоя́ній.

Пѣ́снь 7.

Ирмо́съ: Тебе́, у́мную, Богоро́дице, пе́щь, разсмотря́емъ, вѣ́рніи, я́коже бо о́троки спасе́ три́ Превозноси́мый, мíръ обнови́, во чре́вѣ Твое́мъ всецѣ́лъ, хва́льный отце́въ Бо́гъ и препросла́вленъ.

О, Ма́ти Бо́га Вы́шняго, при́зри на моле́ніе вѣ́рою къ Тебѣ́ прибѣга́ющихъ: врази́ на мя́ ополчи́шася, изостри́ша ме́чь сво́й, уязви́ти мя́ хотя́ще. Ты́ Защи́тница на́ша, отыми́ поноше́нія человѣ́ческія и напра́сныя клеветы́, на Тебе́ надѣ́юся, Ты́ бо моя́ крѣ́пость и защище́ніе.

Ненави́дящіи мя́, творя́ще оби́ды, ниспуска́ютъ стрѣ́лы лука́вствія, хотя́ще мя́ зѣло́ уязви́ти, а́зъ же, Пречи́стая Влады́чице, взира́я на ико́ну Твоего́ троеру́чнаго явле́нія, ю́же дарова́ на́мъ я́ко стра́жа на враги́, приношу́ Тебѣ́ моле́ніе: защити́, Всепѣ́тая, руко́ю Твое́ю мене́, погиба́ющаго.

Влады́чице Богоро́дице, сокруши́ злы́я враго́въ на мя́ по́мыслы и клеветы́ уста́ви, избавля́ющи непови́нныя отъ ско́рби, и́мамы бо, Пречи́стая Дѣ́во, Твою́ ико́ну, благода́ти преиспо́лненную, враго́въ устраша́ющую и вѣ́рно прибѣга́ющихъ къ Тебѣ́ увеселя́ющую.

О, Дѣ́во Пречи́стая! Смири́ сердца́ злы́хъ человѣ́къ, оби́дящихъ и ненави́дящихъ мя́, и вражде́бно кляну́щихъ загради́ уста́, да посра́мятся врази́ и у́зрятъ Твою́ сопроти́въ борю́щую си́лу, се́ ми́лостивно Ты́ на́съ посѣща́еши и зало́гъ благода́ти — ико́ну Твою́ я́ко стра́жа на враги́ да́руеши.

Пѣ́снь 8.

Ирмо́съ: Въ пещи́ о́троцы Изра́илевы, я́коже въ горни́лѣ, добро́тою благоче́стія чистѣ́е зла́та блеща́хуся, глаго́люще: благослови́те, вся́ дѣла́ Госпо́дня, Го́спода, по́йте и превозноси́те во вся́ вѣ́ки.

Услы́ши моле́ніе мое́, Влады́чице Всепѣ́тая, облегчи́ бре́мя бѣ́дъ мои́хъ и напа́стей, я́ко да возмогу́ возда́ти Тебѣ́ обѣ́ты, я́же въ печа́ли глаго́лаша уста́ моя́, сла́влю бо толи́ко чуде́сное явле́ніе святы́я ико́ны Твоея́, возведи́ мя руко́ю Твое́ю изъ глубины́ бѣ́дъ въ ра́дость, воспѣва́юща и превознося́ща Тя́ во вѣ́ки.

О, Преблагослове́нная Дѣ́во! Егда́ приспѣ́ де́нь свѣ́тлаго торжества́ — явле́нія пречу́днаго о́браза Твоего́, тогда́ Аѳо́нская Гора́ краси́тся, я́ко пріе́млетъ многобога́тный да́ръ во огра́ду свою́ зари́ Боже́ственныя. О, Дѣ́во, озари́ сердца́ на́ша свѣ́томъ Божества́, Его́же въ рука́хъ Твои́хъ на ико́нѣ прославля́еши, пою́щихъ и превознося́щихъ Тя́ во вся́ вѣ́ки.

Ужасомъ объя́ти бы́ша и недоумѣва́ша о се́мъ, ка́ко три́ руки́ на ико́нѣ на́мъ яви́, но то́кмо ра́достно вопіе́мъ: о Влады́чице Дѣ́во, еди́ной Тебѣ́ сіе́ досто́йно е́сть — двѣма́ рука́ма Сы́на и Го́спода держа́ти, а тре́тіею вѣ́рныя отъ бѣ́дъ избавля́ти, пою́щихъ и превознося́щихъ Тя́ во вся́ вѣ́ки.

Пою́тъ Тя́ вси́ земноро́дніи и славосло́вятъ си́лы небе́сныя, я́ко Ма́терь Христа́ Бо́га на́шего, Ты́ бо, сѣдя́щи на честнѣ́мъ престо́лѣ бли́зъ Пресвяты́я Тро́ицы, во о́бразъ Ея́ и три́ руки́ на ико́нѣ яви́. Моли́ Ю о на́съ, Пречи́стая, изба́витися на́мъ му́къ, да возра́дуются вси́, пою́щіи и превознося́щіи Тя́ во вѣ́ки.

Пѣ́снь 9.

Ирмо́съ: Образъ чи́стаго рождества́ Твоего́ огнепали́мая купина́ показа́ неопа́льная; и ны́нѣ на на́съ напа́стей свирѣ́пѣющую угаси́ти, мо́лимся, пе́щь, да Тя́, Богоро́дице, непреста́нно велича́емъ.

Безмѣ́рно наслади́хся щедро́тъ и благодѣя́ній Твои́хъ а́зъ, Дѣ́во Пречи́стая, и воспѣва́ю Тя́ благода́рственными пѣ́сньми предъ ико́ною Твое́ю, на не́йже зри́тся чу́до чудесе́мъ: тре́тія пречи́стая рука́ Твоя́, на по́мощь и защище́ніе Тя́ призыва́ющимъ.

Въ пѣ́снехъ благода́рныхъ не преста́ну велича́ти Тя́, Всепречи́стая Дѣ́во Богоро́дице, я́ко неисче́тныя щедро́ты низпосла́ла еси́, проповѣ́дуеши всѣ́мъ чудеса́ цѣльбоно́сныя Твоея́ ико́ны, я́ко подае́ши въ болѣ́знехъ исцѣле́ніе, въ напа́стехъ избавле́ніе, Ты́ бо еси́ покро́въ всѣ́мъ прибѣга́ющимъ.

Удиви́ла еси́ всѣ́хъ вои́стинну, Пренепоро́чная Дѣ́во, заступле́ніемъ и покро́вомъ Твои́мъ, врази́ мои́ отступи́ша отъ мене́, вмѣ́сто печа́ли ра́дость ми́ дарова́, и а́зъ ра́достно вопію́, я́ко цѣльбоно́сная Твоя́ ико́на ди́вная чудеса́ показа́, да вси́ вѣ́дуще, я́ко Ты́ еси́ Засту́пница всѣ́мъ прибѣга́ющимъ.

Ви́ждь, Влады́чице Богоро́дице, неможе́ніе мое́, недоумѣва́ю бо воспѣ́ти милосе́рдіе Твое́ на мнѣ́, пода́ждь обновле́ніе се́рдцу моему́ досто́йно воспѣ́ти Тебѣ́ пѣ́снь, толи́ко чу́дному на ико́нѣ пречи́стыхъ тре́хъ ру́къ Твои́хъ изображе́нію, Ты́ бо еси́ Нело́жная Засту́пница христіа́нъ.

Свѣти́ленъ. Подо́бенъ: Не́бо звѣзда́ми.

Гора́ Аѳо́нская вопіе́тъ: гряди́те, лю́діе, къ неистощи́мому исто́чнику — цѣльбоно́снѣй ико́нѣ Влады́чицы на́шея Богоро́дицы прія́ти щедро́тъ мно́жество, вси́ бо прибѣга́ющіи получа́ютъ неисче́тно да́ры цѣле́бныя и вопію́тъ: вои́стинну Ты́ еси́, Дѣ́во Благослове́нная, всѣ́мъ крѣ́пость, держа́ва и защище́ніе.

Сла́ва, и ны́нѣ, то́йже.

На хвали́техъ стихи́ры самогла́сны [на 4], гла́съ 5:

Тебѣ́ воспои́мъ свѣ́тло Дави́дскую пѣ́снь,* я́ко Цари́цѣ и Богоро́дицѣ, —* лицу́ Твоему́ помо́лятся бога́тіи лю́дстіи, —* и Аѳо́нская Гора́ ра́достію исполня́ется,* я́ко въ па́ствѣ Твое́й сохраня́ется,* преподо́бному Михаи́лу Малеину́ благода́ть откры́ла еси́,* сего́ ра́ди и мы́, любо́вію созыва́еми* ви́дѣти святу́ю и пречу́дную Твою́, Богоро́дице, ико́ну,* въ не́йже Богонача́ліе въ Тро́ицѣ явля́еши* изображе́ніемъ пречи́стыхъ ру́къ Твои́хъ,* тѣ́мже къ Тебѣ́ вопіе́мъ:* Влады́чице, моли́ Христа́ Бо́га на́шего* спасти́ся душа́мъ на́шимъ. [Два́жды.]

Тебѣ́ припа́даемъ, Госпоже́, и мо́лимся,* зря́ще пречестну́ю ико́ну Твою́,* сію́ бо и Аѳо́нъ ликовству́етъ,* имѣ́я во огра́дѣ свое́й зало́гъ благода́ти Бо́жія,* да вси́ притека́ющіи пріе́млютъ неоску́дно* благопотре́бнаго проше́нія своего́ исполне́ніе.* Пріими́, Влады́чице Всепѣ́тая,* вѣ́рныхъ Твои́хъ ра́бъ мольбы́,* честву́ющихъ пра́здникъ явле́нія Твоего́,* Ты́ бо на́мъ на ико́нѣ Свое́й три́ руки́ яви́ла еси́* въ сла́ву Бо́га на́шего,* Того́ моли́ спасти́ся душа́мъ на́шимъ.

Тебѣ́ припа́дая, мо́лимся,* о Дѣ́во Чи́стая Богоро́дице,* Ма́ти Бо́га на́шего,* ви́дяще ико́ну святу́ю Твою́,* сія́ющую па́че со́лнечныхъ лу́чь,* подае́ши бо ми́лости прося́щимъ,* скорбя́щимъ ско́рби облегча́еши,* немощны́мъ здра́віе да́руеши,* я́ко получи́ исцѣле́ніе десны́я своея́ руки́ святы́й Іоа́ннъ Дамаски́нъ,* е́йже и мы́ ны́нѣ со умиле́ніемъ, предстоя́ще, мо́лимся* и, любе́зно облобыза́въ, глаго́лемъ:* спаси́ на́съ, Госпоже́, отъ гла́да, огня́, меча́ и всѣ́хъ бѣ́дъ,* почита́ющихъ вѣ́рно Твое́ явле́ніе,* и пода́ждь по́мощь спасти́ся душа́мъ на́шимъ.

Сла́ва, и ны́нѣ, гла́съ 6:

Дне́сь, собо́ри вѣ́рныхъ, соше́дшеся, восплещи́те рука́ми весе́лія, духо́внѣ торжеству́юще де́нь пресла́внаго явле́нія цѣльбоно́сныя ико́ны Приснодѣ́вы Чи́стыя Богоро́дицы, Ейже мы́ предстои́мъ и единогла́сно возопіи́мъ: ра́дуйся, Преблагослове́нная, я́ко изображе́ніемъ на ико́нѣ пречи́стыхъ ру́къ Твои́хъ въ Тро́ицѣ Бо́га сла́виши; ра́дуйся, я́ко еди́ну си́лу и благода́ть въ ни́хъ имѣ́еши; ра́дуйся, я́ко двѣма́ рука́ма Сы́на и Го́спода держи́ши, тре́тіею же отъ всѣ́хъ напа́стей и бѣ́дъ на́съ избавля́еши; ра́дуйся, Засту́пнице на́ша Всенаде́жная ко Христу́ Бо́гу на́шему, Того́ моли́ спасти́ся душа́мъ на́шимъ.

Славосло́віе [вели́кое, ектеніи́] и отпу́стъ.



НА ЛИТУРГІИ,

Блаже́нна отъ кано́на, пѣ́снь 3-я и 6-я. Проки́менъ, гла́съ 3, пѣ́снь Богоро́дицы: Вели́читъ душа́ Моя́ Го́спода,* и возра́довася ду́хъ Мо́й о Бо́зѣ, Спа́сѣ Мое́мъ. Сти́хъ: Яко призрѣ́ на смире́ніе рабы́ Своея́, се́ бо отны́нѣ ублажа́тъ Мя́ вси́ ро́ди. Апо́столъ къ Филипписíемъ, зача́ло 240. Аллилу́ія, гла́съ 8: Слы́ши Дщи́ и ви́ждь, и приклони́ у́хо Твое́. Сти́хъ: Лицу́ Твоему́ помо́лятся бога́тіи лю́дстіи. Ева́нгеліе Луки́, зача́ло 54. Прича́стенъ: Ча́шу спасе́нія пріиму́, [и и́мя Госпо́дне призову́].


Моли́твы ко Пресвятѣ́й Богоро́дицѣ:

Моли́тва пе́рвая:

О, Пресвята́я Госпоже́ Влады́чице Богоро́дице, ве́ліе чу́до свято́му Іоа́нну Дамаски́ну яви́вшая, я́ко вѣ́ру и́стинную и наде́жду несумнѣ́нную показа́вшему! Услы́ши на́съ, грѣ́шныхъ, предъ чудотво́рною Твое́ю ико́ною усе́рдно моля́щихся и прося́щихъ Твоея́ по́мощи: не отри́ни моле́нія сего́ мно́гихъ ра́ди прегрѣше́ній на́шихъ, но, я́ко Ма́ти милосе́рдія и щедро́тъ, изба́ви на́съ отъ болѣ́зней, скорбе́й и печа́лей, прости́ содѣ́янныя на́ми грѣхи́, испо́лни ра́дости и весе́лія всѣ́хъ, чту́щихъ святу́ю ико́ну Твою́, да ра́достно воспое́мъ и любо́вію просла́вимъ и́мя Твое́, я́ко Ты́ еси́ отъ всѣ́хъ родо́въ избра́нная и благослове́нная во вѣ́ки вѣко́въ. Ами́нь.

Ина моли́тва:

О, Пресвята́я и Преблагослове́нная Дѣ́во Богоро́дице Марíе! Припа́даемъ и покланя́емся Тебѣ́ предъ свято́ю Троеру́чною ико́ною Твое́ю, воспомина́юще пресла́вное чу́до Твое́ исцѣле́ніемъ усѣче́нныя десни́цы преподо́бнаго Іоа́нна Дамаскина́ отъ ико́ны сея́ явле́нное, его́же зна́меніе доны́нѣ ви́димо е́сть на не́й во о́бразѣ тре́тія руки́, къ изображе́нію Твоему́ приложе́нныя. Мо́лимся Ти́ и про́симъ Тя́, всеблагу́ю и всеще́друю ро́да на́шего Засту́пницу: услы́ши на́съ, моля́щихся Тебѣ́, и я́коже блаже́ннаго Іоа́нна, въ ско́рби и болѣ́зни къ Тебѣ́ возопи́вшаго, услы́шала еси́, та́ко и на́съ не пре́зри, скорбя́щихъ и болѣ́знующихъ ра́нами страсте́й многоразли́чныхъ и къ Тебѣ́ отъ души́ сокруше́нныя и смире́нныя усе́рдно прибѣга́ющихъ. Ты́ зри́ши, Госпоже́ Всеми́лостивая, не́мощи на́ша, озлобле́ніе на́ше, ну́жду, потре́бу на́шу въ Твое́й по́мощи и заступле́ніи, я́ко отвсю́ду враги́ окруже́ни есмы́ и нѣ́сть помога́ющаго, ниже́ заступа́ющаго, а́ще не Ты́ умилосе́рдишися о на́съ, Влады́чице. Ей, мо́лимъ Ти ся, вонми́ гла́су болѣ́зненному на́шему и помози́ на́мъ святооте́ческую правосла́вную вѣ́ру до конца́ днíй на́шихъ непоро́чно сохрани́ти, во всѣ́хъ за́повѣдехъ Госпо́днихъ неукло́нно ходи́ти, покая́ніе и́стинное о грѣсѣ́хъ на́шихъ всегда́ Бо́гу приноси́ти и сподо́битися ми́рныя христіа́нскія кончи́ны и до́браго отвѣ́та на стра́шнѣмъ судѣ́ Сы́на Твоего́ и Бо́га на́шего, Его́же умоли́ за на́съ ма́тернею моли́твою Твое́ю, да не осу́дитъ на́съ по беззако́ніемъ на́шимъ, но да поми́луетъ на́съ по вели́цѣй и неизрече́ннѣй ми́лости Свое́й. О, Всеблага́я! Услы́ши на́съ и не лиши́ на́съ по́мощи Твоея́ держа́вныя, да, Тобо́ю спасе́ніе получи́вше, воспое́мъ и просла́вимъ Тя́ на земли́ живы́хъ и ро́ждшагося отъ Тебе́ Искупи́теля на́шего Го́спода Іису́са Христа́, Ему́же подоба́етъ сла́ва и держа́ва, че́сть и поклоне́ніе, ку́пно со Отце́мъ и Святы́мъ Ду́хомъ всегда́, ны́нѣ и при́сно и во вѣ́ки вѣко́въ. Ами́нь.

Источникъ: Мине́я Ию́нь. Ча́сть втора́я. — М.: Издательскій совѣтъ Русской Православной Церкви, 2002. — С. 408-424.

/ Къ оглавленію раздѣла /


Наверхъ / Къ титульной страницѣ

0