Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - среда, 28 iюня 2017 г. Сейчасъ на порталѣ посѣтителей - 8.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́нія въ 27-й де́нь.
Преподо́бнаго отца́ на́шего Сампсо́на Страннопріи́мца.

[ВЕЧЕРЪ,
На Го́споди воззва́хъ:] стихи́ры, гла́съ 1. Подо́бенъ: Всехва́льніи му́ченицы.

Отче богому́дре Сампсо́не,* по́стникомъ приче́лся еси́,* безстра́стіемъ укра́шенъ,* и всели́лся еси́ во оби́тели преподо́бныхъ,* идѣ́же Свѣ́тъ незаходи́мый* и идѣ́же е́сть Дре́во жи́зни.* И ны́нѣ моли́ся* дарова́ти душа́мъ на́шимъ ми́ръ* и ве́лію ми́лость.

Отче богодохнове́нне Сампсо́не,* свѣти́льникъ бы́лъ еси́,* просвѣща́я подсо́лнечную чуде́съ сія́ніи,* душетлѣ́нныхъ неду́говъ* отгоня́я тму́,* де́монскій отрѣва́я мра́къ.* И ны́нѣ моли́ся* дарова́ти душа́мъ на́шимъ ми́ръ* и ве́лію ми́лость.

Сла́ва, и ны́нѣ, богоро́диченъ, гла́съ и подо́бенъ то́йже:

Увы́ мнѣ́, что́ бу́ду,* у́мъ, и ду́шу, и тѣ́ло* оскверни́въ прегрѣше́ньми?* Что́ сотворю́?* Ка́ко же избѣжу́ пла́мене нестерпи́маго,* нерѣши́мыхъ у́зъ и вѣ́чныхъ?* Но, о Всенепоро́чная,* пре́жде конца́ моли́ Сы́на Твоего́* пода́ти ми́ оставле́ніе.

Крестобогоро́диченъ. Подо́бенъ то́йже:

Своего́ Агнца* Агница и Непоро́чная Влады́чица* на Крестѣ́ я́ко ви́дѣ, зра́ка не иму́ща,* ниже́ добро́ты, —* увы́ Мнѣ́, — рыда́ющи, глаго́лаше, —* гдѣ́ добро́та Твоя́ за́йде, Сладча́йшій?* Гдѣ́ благолѣ́піе?* Гдѣ́ благода́ть блиста́ющая о́браза Твоего́,* Сы́не Мо́й любе́знѣйшій?

Тропа́рь, гла́съ 8:

Въ терпѣ́ніи твое́мъ стяжа́лъ еси́ мзду́ твою́, о́тче преподо́бне, въ моли́твахъ непреста́нно терпѣ́вый, ни́щія возлюби́вый и сія́ удовли́вый. Но моли́ся Христу́ Бо́гу, Сампсо́не ми́лостиве блаже́нне, спасти́ся душа́мъ на́шимъ.


[НА УТРЕНИ,]
Кано́нъ, его́же краегране́сіе: Пою́ тя, Сампсо́не, вѣ́рно боже́ственными словесы́. Іо́сифъ. Гла́съ 2.

Пѣ́снь 1.

Ирмо́съ: Гряди́те, лю́діе, пои́мъ пѣ́снь Христу́ Бо́гу, раздѣ́льшему мо́ре и наста́вльшему лю́ди, я́же изведе́ изъ рабо́ты еги́петскія, я́ко просла́вися.

Пѣ́сньми твое́ пресвѣ́тлое торжество́ восхвали́ти устреми́вшуся, свѣ́тъ ми́ низпосли́, предстоя́ вѣнцено́сецъ престо́лу Влады́чню, преблаже́нне.

Еди́ну жела́я, я́же къ жи́зни веду́щую тя́, мíра кра́сная прете́клъ еси́ и премíрное наслѣ́діе стяжа́лъ еси́. Тѣ́мже тя́, соше́дшеся, Сампсо́не, почита́емъ.

Зако́ну Бо́жію повину́вся, досточу́дне, къ кра́йнѣй добродѣ́тели, ра́дуяся, восте́клъ еси́, ми́лостивъ всѣ́мъ бы́въ. Тѣ́мже тя́ ны́нѣ ублажа́емъ.

Богоро́диченъ: Тя́, Бо́жію па́че сло́ва Роди́тельницу, я́ко держа́вно заступле́ніе всѣ́хъ, Пренепоро́чная, побѣжда́емыхъ, сла́вимъ непреста́нно и ублажа́емъ.

Пѣ́снь 3.

Ирмо́съ: Утверди́ на́съ въ Тебѣ́, Го́споди, дре́вомъ умерщвле́й грѣ́хъ, и стра́хъ Тво́й всади́ въ сердца́ на́съ, пою́щихъ Тя́.

Сампсо́на свяще́ннаго восхва́лимъ: Бо́жію бо подо́бяся благоутро́бію, ми́лостивъ неду́жнымъ бы́сть, наготу́ющимъ же всѣ́мъ оде́жда.

Свя́то и че́стно боже́ственное житіе́ твое́ препроводи́въ, со святы́ми сочета́лся еси́ и оби́тели преподо́бныхъ дости́глъ еси́, просвѣще́нія неизрече́ннаго сподобля́емь.

Блаже́нъ еси́ ты́, и бла́го тебѣ́ бу́детъ, Боже́ственныя соблю́дшу, о́тче, зако́ны Го́спода и Бо́га на́шего, Его́же моли́ спасти́ся ста́ду твоему́.

Богоро́диченъ: Души́ моея́ и ума́, Чи́стая, тму́ отжени́ и да́ждь я́ко въ де́нь наро́читъ пожи́ти, спаси́тельная творя́щу повелѣ́нія.

Сѣда́ленъ, гла́съ 4. Подо́бенъ: Ско́ро предвари́.

Просія́въ ду́хомъ, я́ко свѣти́льникъ свѣ́телъ, Сампсо́не всеблаже́нне, озаря́еши на́съ, че́стнѣ, въ дому́ твое́мъ: сего́ ра́ди врачева́нія, отъ Бо́га тебѣ́ да́нная, о́тче, су́щимъ въ разли́чныхъ неду́зѣхъ раздава́еши. Тѣ́мже мольба́ми твои́ми изба́ви ны́ отъ страсте́й.

Сла́ва, и ны́нѣ, богоро́диченъ:

Обнови́ла еси́, Чи́стая, Боже́ственнымъ Рождество́мъ Твои́мъ истлѣ́вшее во страсте́хъ земноро́дныхъ ме́ртвенное существо́ и воздви́гла еси́ вся́ отъ сме́рти къ животу́ нетлѣ́нія. Тѣ́мже Тя́ по до́лгу блажи́мъ вси́, Дѣ́во Препросла́вленная, я́коже прорекла́ еси́.

Крестобогоро́диченъ:

Дѣ́во Пренепоро́чная, Ма́ти Христа́ Бо́га, ору́жіе про́йде Твою́ пресвяту́ю ду́шу, егда́ распина́ема ви́дѣла еси́ во́лею Сы́на и Бо́га Твоего́. Его́же, Благослове́нная, моля́щи не преста́й проще́ніе прегрѣше́ній на́мъ дарова́ти.

Пѣ́снь 4.

Ирмо́съ: Услы́шахъ, Го́споди, слу́хъ Твоего́ смотре́нія и просла́вихъ Тя́, Еди́не Человѣколю́бче.

Яко звѣзда́ пресвѣ́тлая, всѣ́хъ на́съ просвѣща́еши сердца́, достодо́лжно блажа́щихъ тя́.

Дрема́ніе отъ о́чію твое́ю отложи́въ, бдѣ́лъ еси́ непреста́нно и сла́сти тѣле́сныя успи́лъ еси́.

Ни́щимъ дово́ленъ бы́лъ еси́ Христа́ ра́ди и прія́лъ еси́ вы́шнее наслѣ́діе, преподо́бне, ра́дуяся.

Богоро́диченъ: Тя́, Всенепоро́чная Влады́чице, свѣ́тлую пала́ту Сло́ва, пѣсносло́вимъ и ублажа́емъ.

Пѣ́снь 5.

Ирмо́съ: Свѣ́та Пода́телю и вѣко́въ Тво́рче, Го́споди, во свѣ́тѣ Твои́хъ повелѣ́ній наста́ви на́съ: ра́звѣ бо Тебе́, ино́го Бо́га не зна́емъ.

Пречи́стый Свѣ́тъ, почи́вшій въ тебѣ́, всего́ тя́ свѣтови́дна сотвори́, о́тче, просвѣща́юща вѣ́рныхъ добродѣ́телей твои́хъ свѣ́тлыми сія́ніи.

Ми́лованіемъ мно́гимъ ни́щимъ бога́тство бы́лъ еси́ и вра́чь су́щимъ въ не́мощи воста́лъ еси́ я́вѣ, си́хъ врачева́ніемъ отъе́мля неду́ги.

Яви́лся еси́ хра́мъ чи́стъ Пресвята́го и Честна́го Ду́ха, страсте́й ти́ну очи́щъ са́мъ себе́ я́ко вои́стинну, о́тче богоно́се, тѣ́мже восхваля́емъ тя́.

Богоро́диченъ: Тя́, Пресвята́я Чи́стая, добро́ту Іа́ковлю, вѣ́рою боже́ственными гла́сы пѣсносло́вимъ, ро́ждшую на́мъ Бо́га Плотоно́сца, Его́же трепе́щутъ вся́ческая.

Пѣ́снь 6.

Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же, мя́ возведи́.

Сокро́вищи небе́сными обогати́лся еси́, любя́ ми́лованіе, Сампсо́не сла́вне, и отверза́я ни́щимъ твою́ утро́бу, соверше́ннымъ умо́мъ.

Созда́лъ еси́ въ сла́ву Бо́гу на́шему хра́мъ освяще́нъ, въ о́ньже притека́юще, отъ многови́дныхъ очища́ются неду́гъ вѣ́рніи, преблаже́нне.

Чи́сто житіе́ твое́ препроводи́лъ еси́ и съ преподо́бными преподо́бно всели́лся еси́, о на́съ моли́ся, вѣ́рно чту́щихъ тя́, богодохнове́нне.

Богоро́диченъ: Не́бо высоко́ была́ еси́ всѣ́хъ Царя́ Бо́га, Всенепоро́чная, и чи́стая пала́та, и черто́гъ свѣ́телъ, Боже́ственною благода́тію.

Конда́къ, гла́съ 8. Подо́бенъ: Яко нача́тки.

Яко врача́ всеизря́дна и моли́твенника благопрія́тна, къ ра́цѣ твое́й боже́ственнѣй притека́юще, Сампсо́не богому́дре преподо́бне, соше́дшеся любо́вію, псалмы́ и пѣ́сньми, ра́дующеся, Христа́ прославля́емъ, такову́ю тебѣ́ благода́ть подава́юща исцѣле́ній.

Икосъ:

Ста́рческое, кро́ткое и незло́бивое, непоро́чно житіе́ соверши́вшаго, сла́вно благода́ть пріи́мшаго чуде́съ, тве́рду и неизрече́нну, Сампсо́на преподо́бнаго восхва́лимъ, а́лчущихъ пита́теля, и су́щихъ въ ну́ждахъ помо́щника, и побо́рника вели́ка, неду́гующимъ воздви́гша Боже́ственный хра́мъ исцѣле́ній.

Пѣ́снь 7.

Ирмо́съ: Образу злато́му на по́лѣ Деи́рѣ служи́му, тріе́ Твои́ о́троцы небрего́ша безбо́жнаго велѣ́нія, посредѣ́ же огня́ вве́ржени, ороша́еми, поя́ху: благослове́нъ еси, Бо́же оте́цъ на́шихъ.

Крѣ́пость Христа́ держа́вну въ напа́стехъ имѣ́я, преблаже́нне, житія́ премину́лъ еси́ бу́рю безъ истопле́нія, преподо́бне, и къ ти́хому приста́нищу, воспѣва́я, дости́глъ еси́: благослове́нъ еси́, Бо́же оте́цъ на́шихъ.

Прему́дростію мно́гою и любо́вію духо́вною подвиза́емь, хра́мъ созда́лъ еси́, о́тче, вели́къ, въ него́же притека́юще всегда́, исцѣле́ніе пріе́млютъ вси́, вопію́ще и глаго́люще: благослове́нъ еси́, Бо́же оте́цъ на́шихъ.

Свѣ́щникъ свѣ́телъ добродѣ́телей, Боже́ственнымъ свѣ́томъ просвѣща́емь, Сампсо́не, яви́лся еси́ и озари́лъ еси́ вселе́нныя концы́. Тѣ́мже, соше́дшеся, тя́ вѣ́рою ублажа́емъ, пою́ще: благослове́нъ еси́, Бо́же оте́цъ на́шихъ.

Богоро́диченъ: Руно́ иногда́ предъявля́ше чи́стую утро́бу Твою́, пріе́мшую небе́сный До́ждь, всѣ́хъ ороша́ющь одержи́мыхъ жа́ждею грѣхо́вною, Всепѣ́тая. Благослове́на еси́, Бо́га пло́тію ро́ждшая.

Пѣ́снь 8.

Ирмо́съ: Въ пе́щь о́гненную ко отроко́мъ евре́йскимъ снизше́дшаго и пла́мень въ ро́су прело́жшаго Бо́га, по́йте дѣла́ я́ко Го́спода, и превозноси́те во вся́ вѣ́ки.

Язы́къ движа́ ра́достно на Бо́жія, о́тче Сампсо́не, пѣ́сни, стра́сти плотскíя воздержа́ніемъ порабо́тилъ еси́ души́, и ра́бъ Христу́ и́скренній яви́лся еси́ и вы́шняго гра́да наслѣ́дникъ.

Чи́стый тво́й у́мъ, блиста́ніи Боже́ственными укра́шенъ, пресвѣ́телъ яви́ся и прія́тенъ чи́стыхъ, всеблаже́нне, Боже́ственныхъ сія́ній, тѣ́мже тя́ чти́мъ, Сампсо́не, во вѣ́ки.

Освяще́нну имѣ́я жи́знь, пресла́вно, Сампсо́не всеблаже́нне, я́вѣ просла́вился еси́, къ Бо́гу преше́дъ: се́ бо пребыва́етъ па́мять твоя́ во вѣ́ки и пра́вда.

Богоро́диченъ: Уста́ви страсте́й мои́хъ лю́тую бу́рю, Чи́стая Благослове́нная, и возбрани́ всѣ́мъ, неща́дно мою́ нищету́, Дѣ́во, борю́щимъ враго́мъ безпло́тнымъ, я́ко да вѣ́рно пою́ Тя.

Пѣ́снь 9.

Ирмо́съ: Отъ Бо́га Бо́га Сло́ва, неизрече́нною му́дростію прише́дшаго обнови́ти Ада́ма, я́дію въ тлѣ́ніе па́дшаго лю́тѣ, отъ Святы́я Дѣ́вы неизрече́нно воплоти́вшагося на́съ ра́ди, вѣ́рніи, единому́дренно пѣ́сньми велича́емъ.

Се́ па́мять твоя́, о́тче, я́коже со́лнце, всѣ́мъ возсія́, просвѣща́ющи свѣ́тло въ не́й тя́ сла́вящія, я́ко служи́теля Христо́ва, и наслѣ́дника Ца́рствія Его́, и всѣ́мъ преподо́бнымъ соприча́стника.

Яко свѣтоза́рно житіе́ твое́, я́ко ве́лія сла́ва, я́ко бога́тъ гро́бъ тво́й, му́дре, идѣ́же честно́е тѣ́ло твое́ лежа́ше, здра́віе источа́етъ притека́ющимъ вѣ́рно и твоея́ прося́щимъ по́мощи всегда́.

Твои́мъ пресла́внымъ, о́тче, врачевство́мъ, е́же болѣ́зньми стяжа́лъ еси́, посѣща́ти при́сно не оскудѣ́й, мо́лимся, во мно́зѣ милосе́рдіи непреста́нно предстоя́ на́мъ и облегча́я болѣ́зни и труды́ ду́шъ на́шихъ.

Со́лнечныя облиста́я чту́щимъ тя́, о́тче, зари́, просвѣти́ на́ша душе́вная чу́вства и свѣ́тлости Боже́ственныя прича́стники сподо́би ны́ моли́твами твои́ми, блаже́нне, бы́ти, мо́лимъ тя́.

Богоро́диченъ: Свѣтови́дѣнъ Тя́ о́блакъ пра́веднаго Со́лнца вѣ́дяще, Чи́стая, — ра́дуйся, — вѣ́рно Тебѣ́ взыва́емъ, — апо́столовъ сла́ва, и вѣне́цъ му́чениковъ сла́вныхъ, и вѣ́рныхъ спасе́ніе, Дѣ́во Неискусобра́чная.

Свѣти́ленъ. Подо́бенъ: Не́бо звѣзда́ми.

Расточи́лъ еси́ твое́ бога́тство ни́щимъ богоуго́дно и ве́сь возложи́лся еси́, о Сампсо́не, Го́сподеви, Его́же моли́ вся́ческихъ страсте́й на́съ изба́вити.

Сла́ва, и ны́нѣ, богоро́диченъ:

Держа́внымъ Твои́мъ покро́вомъ отъ вра́гъ навѣ́та на́съ, Чи́стая, Твоя́ рабы́, сохрани́ вся́ невре́дны, Тя́ бо стяжа́хомъ еди́ну прибѣ́жище въ ну́ждахъ.


НА ЛИТУРГІИ,

Проки́менъ, гла́съ 7: Честна́ предъ Го́сподемъ сме́рть преподо́бныхъ его́. [Сти́хъ: Что́ возда́мъ Го́сподеви о всѣ́хъ, я́же воздаде́ ми́?] Апо́столъ, къ Гала́томъ, зача́ло 213. [Аллилу́ія, гла́съ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́.] Ева́нгеліе Луки́, зача́ло 67. Прича́стенъ: Въ па́мять вѣ́чную [бу́детъ пра́ведникъ, отъ слу́ха зла́ не убои́тся].

Источникъ: Минíа, мѣ́сяцъ Іу́ній. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 190 – 193.

/ Къ оглавленію раздѣла /


Наверхъ / Къ титульной страницѣ

0