Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 25 апрѣля 2017 г. Сейчасъ на порталѣ посѣтителей - 20.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

[Мѣ́сяца Іу́нія въ 27-й де́нь.]
Преподо́бнаго Амвро́сія, ста́рца Оптинскаго.

НА ВЕЛИЦѢЙ ВЕЧЕРНИ,
Блаже́нъ му́жъ.., 1-й антифо́нъ. На Го́споди воззва́хъ: стихи́ры на 8, гла́съ 8. Подо́бенъ: О, пресла́внаго чудесе́!

Дне́сь свѣ́тло торжеству́етъ* Свя́то-Введе́нская пу́стынь,* прославля́ющи своего́ вели́каго моли́твенника,* преподо́бнаго ста́рца Оптинскаго,* Амвро́сія чудотво́рца,* и́же здѣ́ подвиза́ся ре́вностно* и, возше́дъ на лѣ́ствицу духо́вную,* просія́лъ е́сть, я́ко свѣти́льникъ огнезра́чный,* по все́й земли́ Россíйстѣй.

Пріиди́те, вѣ́рніи лю́діе,* воздади́мъ досто́йное поклоне́ніе* ны́нѣ просла́вленному ста́рцу Бо́жію* и согла́сно воспои́мъ ему́:* преподо́бне о́тче на́шъ Амвро́сіе,* моли́твенниче на́шъ предъ престо́ломъ Царя́ Небе́снаго,* не забу́ди на́съ, убо́гихъ ча́дъ твои́хъ,* ча́ющихъ твоея́ по́мощи,* и изба́ви на́съ отъ вся́кія ну́жды и печа́ли.

Что́ тя нарече́мъ, преподо́бне Амвро́сіе?* Въ по́двизѣхъ бо возше́лъ еси́* на го́ру свя́тости и соверше́нства,* я́ко земны́й а́нгелъ и человѣ́къ небе́сный* ны́нѣ же ра́дуешися и весели́шися въ черто́зѣхъ Царя́ ца́рствующихъ,* и та́мо зри́ши сла́ву и добро́ту неизрече́нную,* и съ го́рними си́лами непреста́нно* воспѣва́еши трисвяту́ю пѣ́снь* Бо́гу, въ Тро́ицѣ сла́вимому.

Пра́зднующе па́мять богоно́снаго Амвро́сія,* вели́каго ста́рца Оптинскаго,* всероссíйскаго наста́вника благоче́стія,* воспо́йте, лю́діе, пѣ́снь но́вую:* блаже́нъ еси́, преподо́бне о́тче на́шъ,* сотвори́вый вся́, заповѣ́данная Христо́мъ,* ны́нѣ бо ты́, прославля́емь въ совѣ́тѣ святы́хъ,* созерца́еши сла́ву Вседержи́теля Бо́га,* прославля́ющаго просла́вльшихъ Его́.

Ины стихи́ры, гла́съ 2. Подо́бенъ: Егда́ отъ дре́ва.

Преподо́бне о́тче Амвро́сіе,* кто́ исповѣ́сть труды́ и болѣ́зни твоя́,* я́же поне́слъ еси́ ра́ди Ца́рствія небе́снаго?* И бы́лъ еси́ о́бразъ терпѣ́нія и смире́нія,* кро́тости и воздержа́нія,* цѣлому́дрія и послуша́нія,* тѣ́миже обогати́лъ еси́ ду́шу твою́* и стяжа́лъ еси́ да́ры Ду́ха Всесвята́го,* Имже вся́ка душа́ живи́тся.

Благословля́лъ еси́ Го́спода* на вся́кое вре́мя,* въ ра́дости и печа́ли земна́го житія́,* всегда́ хвала́ Его́ бы́сть во устѣ́хъ твои́хъ,* да услы́шатъ кро́тцыи и немощству́ющіи гла́съ тво́й и возвеселя́тся,* взыска́лъ бо еси́ Го́спода, и услы́ша тя́,* и отъ всѣ́хъ скорбе́й твои́хъ изба́ви тя́.* Присту́пимъ и мы́, бра́тіе, къ Бо́гу и просвѣти́мся,* и ли́ца на́ша не постыдя́тся.

Святы́й уго́дниче Бо́жій,* вѣ́ры правосла́вныя ревни́телю,* сосу́де благода́ти избра́нный,* ди́внымъ житіе́мъ твои́мъ пу́стынь Оптина просла́вися,* и вси́ концы́ земли́ на́шея возра́довашася,* тебе́ бо вси́ стяжа́хомъ стѣ́ну и утвержде́ніе,* моли́ся при́сно ко Го́споду,* всеми́лостивому Бо́гу на́шему,* да спасе́тъ ду́ши на́ша.

Богоблаже́нне о́тче Амвро́сіе,* су́етная и ло́жная мíра сего́* отве́рглъ еси́ непоколеби́мо,* облекíйся въ ри́зы мона́шескія,* препобѣди́лъ еси́ въ себѣ́ ве́тхаго человѣ́ка,* угаси́въ разжже́нныя стрѣ́лы вра́жія,* ду́шу свою́, я́ко зѣ́ницу о́ка,* соблю́лъ еси́ невреди́му,* тѣ́мже тя́ вси́ ублажа́емъ.

Сла́ва, гла́съ 1:

Пріиди́те, мона́ховъ мно́жество, хвале́бными пѣ́сньми па́мять почти́мъ богоно́снаго ста́рца Амвро́сія, Оптины пу́стыни украше́нія, се́ бо, я́ко фи́никсъ, насажде́нный въ дому́ Бо́жіемъ, процвѣ́лъ и возблагоуха́лъ е́сть я́ко цвѣ́тъ неувяда́емый, и ны́нѣ предстои́тъ предъ Царе́мъ Небе́снымъ, моля́ся о душа́хъ на́шихъ.

И ны́нѣ, богоро́диченъ, гла́съ то́йже:

Всемíрную сла́ву, [отъ человѣ́къ прозя́бшую и Влады́ку ро́ждшую, небе́сную две́рь воспои́мъ, Марíю Дѣ́ву, безпло́тныхъ пѣ́снь и вѣ́рныхъ удобре́ніе: Сія́ бо яви́ся не́бо и хра́мъ Божества́, Сія́, прегражде́ніе вражды́ разруши́вши, ми́ръ введе́ и Ца́рствіе отве́рзе; Сію́ у́бо иму́ще вѣ́ры утвержде́ніе, Побо́рника и́мамы, изъ Нея́ ро́ждшагося Го́спода. Дерза́йте у́бо, дерза́йте, лю́діе Бо́жіи, и́бо То́й побѣди́тъ враги́, я́ко Всеси́ленъ].

Вхо́дъ. Проки́менъ дне́. И чте́нія три́.

При́тчей чте́ніе. [Главы́ 10, 3 и 8.]

Па́мять пра́веднаго съ похвала́ми, и благослове́ніе Госпо́дне на главѣ́ его́. Блаже́нъ человѣ́къ, и́же обрѣ́те прему́дрость, и сме́ртенъ, и́же увѣ́дѣ ра́зумъ. Лу́чше бо сію́ купова́ти, не́жели зла́та и сребра́ сокро́вища. Честнѣ́йшая же е́сть ка́меній многоцѣ́нныхъ, все́ же честно́е недосто́йно ея́ е́сть. Долгота́ бо дне́й и лѣ́та живота́ въ десни́цѣ ея́, въ шу́йцѣ же ея́ бога́тство и сла́ва. Отъ у́стъ ея́ исхо́дитъ пра́вда, зако́нъ же и ми́лость на язы́цѣ но́ситъ. Послу́шайте у́бо мене́, о ча́да, честна́я бо реку́, и блаже́нъ человѣ́къ, и́же пути́ моя́ сохрани́тъ: исхо́ди бо мои́ — исхо́ди живота́, и уготовля́ется хотѣ́ніе отъ Го́спода. Сего́ ра́ди молю́ ва́съ и предлага́ю мо́й гла́съ сыново́мъ человѣ́ческимъ. Я́ко а́зъ, прему́дрость, устро́ихъ совѣ́тъ, и ра́зумъ и смы́слъ азъ призва́хъ. Мо́й совѣ́тъ и утвержде́ніе, мо́й ра́зумъ, моя́ же крѣ́пость. Азъ мене́ лю́бящія люблю́, и́щущіи же мене́ обря́щутъ благода́ть. Разумѣ́йте у́бо, незло́бивіи, кова́рство, ненака́заніи же, прилага́йте сердца́. Послу́шайте мене́ и па́ки, честна́я бо реку́, и отве́рзу отъ усте́нъ пра́вая, я́ко и́стинѣ поучи́тся горта́нь мой, ме́рзки же пре́до мно́ю устнѣ́ лжи́выя. Съ пра́вдою вси́ глаго́лы у́стъ мои́хъ, ничто́же въ ни́хъ стро́потно, ниже́ развраще́нно. Вся́ пра́ва су́ть разумѣва́ющимъ и про́ста обрѣта́ющимъ ра́зумъ. Науча́ю бо ва́съ и́стинѣ, да бу́детъ о Го́сподѣ наде́жда ва́ша, и испо́лнитеся Ду́ха.

Прему́дрости Соломо́новы чте́ніе. [Главы́ 10, 6, 8 и 9.]

Уста́ пра́веднаго ка́плютъ прему́дрость, устнѣ́ же муже́й му́дрыхъ вѣ́дятъ благода́ть. Уста́ му́дрыхъ поуча́тся прему́дрости, пра́вда же избавля́етъ и́хъ отъ сме́рти. Сконча́вшуся му́жу пра́ведну, не поги́бнетъ наде́жда. Сы́нъ бо пра́веденъ ражда́ется въ живо́тъ и во благи́хъ свои́хъ пло́дъ пра́вды объи́метъ. Свѣ́тъ пра́веднымъ всегда́, и отъ Го́спода обря́щутъ благода́ть и сла́ву. Язы́къ му́дрыхъ до́брая свѣ́сть, и въ се́рдцѣ и́хъ почíетъ му́дрость. Лю́битъ Госпо́дь преподо́бная сердца́, прія́тни же Ему́ вси́ непоро́чніи въ пути́. Му́дрость Госпо́дня просвѣща́етъ лице́ разу́мнаго: постига́етъ бо жела́ющія ю́, пре́жде да́же разумѣ́ти ю́, и удо́бь у́зрится отъ лю́бящихъ ю́. Утреневавый къ не́й не утруди́тся, и бдя́й ея́ ра́ди вско́рѣ безъ печа́ли бу́детъ. Яко досто́йныхъ ея́ сама́ обхо́дитъ, и́щущи, и во стезя́хъ ея́ явля́ется и́мъ благопріе́мнѣ. Му́дрости никогда́же одолѣ́етъ зло́ба. Си́хъ ра́ди и рачи́тель бы́хъ добро́ты ея́, и возлюби́хъ ю́, и поиска́хъ отъ ю́ности моея́. И взыска́хъ невѣ́сту привести́ себѣ́, я́ко всѣ́хъ Влады́ка возлюби́ ю́. Таи́бница бо е́сть Бо́жія хи́трости и обрѣта́тельница дѣ́лъ Его́. Труды́ ея́ су́ть добродѣ́тели: цѣлому́дрію же и ра́зуму та́ учи́тъ, пра́вдѣ и му́жеству, и́хже потре́бнѣе ничто́же е́сть въ житіи́ человѣ́комъ. Аще же и мно́гаго иску́сства жела́етъ кто́, вѣ́сть дре́вняя, и бы́ти хотя́щая разсмо́тритъ. Свѣ́сть изви́тія слове́съ и разрѣше́нія гада́ній, зна́менія и чудеса́ проразумѣ́етъ, и сбытія́ време́нъ и лѣ́тъ, и всѣ́мъ совѣ́тникъ е́сть бла́гъ. Яко безсме́ртіе е́сть въ не́й и благосла́віе во обще́ніи слове́съ ея́. Сего́ ра́ди бесѣ́довахъ ко Го́споду, и помоли́хся Ему́, и рѣ́хъ отъ всего́ се́рдца моего́: Бо́же отце́въ и Го́споди ми́лости, сотвори́вый вся́ сло́вомъ Твои́мъ и му́дростію Твое́ю устро́ивый человѣ́ка, да владѣ́етъ бы́вшими отъ Тебе́ тварьми́ и да управля́етъ мíръ въ преподо́біи и пра́вдѣ. Да́ждь ми́ Твои́хъ Престо́ловъ присѣдя́щую прему́дрость и не отлучи́ мене́ отъ о́трокъ Твои́хъ, я́ко а́зъ ра́бъ Тво́й и сы́нъ рабы́ни Твоея́. Посли́ ю́ съ Небе́съ отъ свята́го жили́ща Твоего́ и отъ Престо́ла сла́вы Твоея́, да, су́щи со мно́ю, научи́тъ мя́, что́ благоуго́дно е́сть предъ Тобо́ю, и наста́витъ мя́ въ ра́зумъ, и сохрани́тъ мя́ въ сла́вѣ свое́й. Помышле́нія бо сме́ртныхъ вся́ боязли́ва и погрѣши́тельна умышле́нія и́хъ.

Прему́дрости Соломо́новы чте́ніе. [Глава́ 3.]

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ра хра́ма и свята́го, гла́съ 6:

Преподо́бне о́тче на́шъ Амвро́сіе, всея́ Россíи наста́вниче богому́дрый, же́зле немощны́хъ и стра́ждущихъ, о́бразе вѣ́ры и благоче́стія, проповѣ́дниче смире́нія и терпѣ́нія, моли́твенниче за Оте́чество на́ше правосла́вное, дне́сь ублажа́емъ честну́ю твою́ па́мять, съ вѣ́рою и любо́вію притека́юще, взыва́емъ ти́ дерзнове́нно: моли́ Христа́ Бо́га спасти́ся душа́мъ на́шимъ.

Сла́ва, гла́съ 8:

Пріиди́те, вѣ́рніи лю́діе, [воздади́мъ досто́йное поклоне́ніе ны́нѣ просла́вленному ста́рцу Бо́жію и согла́сно воспои́мъ ему́: преподо́бне о́тче на́шъ Амвро́сіе, моли́твенниче на́шъ предъ престо́ломъ Царя́ Небе́снаго, не забу́ди на́съ, убо́гихъ ча́дъ твои́хъ, ча́ющихъ твоея́ по́мощи, и изба́ви на́съ отъ вся́кія ну́жды и печа́ли].

И ны́нѣ, богоро́диченъ, гла́съ то́йже:

Безневѣ́стная Дѣ́во, [Яже Бо́га неизрече́нно заче́нши пло́тію, Ма́ти Бо́га Вы́шняго, Твои́хъ рабо́въ мольбы́ пріими́, Всенепоро́чная, всѣ́мъ подаю́щи очище́ніе прегрѣше́ній, ны́нѣ на́ша моле́нія пріе́млющи, моли́ спасти́ся всѣ́мъ на́мъ].

На стихо́внѣ стихи́ры, гла́съ 5. Подо́бенъ: Ра́дуйся, Живоно́сный Кре́сте.

Пѣ́снь воспои́мъ, лю́діе,* учи́телю душеспаси́тельнаго жи́тельства,* исто́чнику любве́ Христо́вой,* вели́кому ста́рцу Амвро́сію,* мона́ховъ путеводи́телю,* а́лчущихъ пита́телю,* бѣ́дствующимъ помо́щнику,* всѣ́мъ христіа́номъ прибѣ́жищу:* пріими́, уго́дниче Бо́жій, на́ша моле́нія,* вѣ́рныхъ ча́дъ твои́хъ,* чту́щихъ святу́ю па́мять твою́.

Сти́хъ: Честна́ предъ Го́сподемъ* сме́рть преподо́бныхъ Его́.

Пра́зднующе, преподо́бне о́тче,* святу́ю па́мять твою́,* благода́рную пѣ́снь воспѣва́емъ ти́,* ты́ бо вѣ́си ну́жды на́съ, ча́дъ твои́хъ,* обремене́нныхъ скорбьми́ мно́гими,* помога́еши на́мъ си́лою свы́ше* и огражда́еши, я́ко щи́тъ,* отъ вся́кихъ де́монскихъ нахожде́ній,* низпосыла́я ве́лію ми́лость.

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

Притеце́мъ, бра́тіе,* къ исто́чнику свѣ́та и́стины,* богоблаже́нному Амвро́сію,* просвѣти́мся его́ уче́ньми духо́вными* и съ вѣ́рою возопіи́мъ ку́пно:* пріими́ на́ша моли́твы* и изба́ви на́съ отъ вся́кихъ зо́лъ и скорбе́й.

Сла́ва, гла́съ 8:

Наста́вниче всѣ́хъ приходя́щихъ къ тебѣ́, о́тче на́шъ Амвро́сіе, любве́ насади́телю, ни́щихъ корми́телю, жа́ждущихъ напои́телю, грѣ́шниковъ до́брый исправи́телю, невѣ́рныхъ вразуми́телю, при́зри на на́съ, ча́дъ твои́хъ, чту́щихъ святу́ю па́мять твою́.

И ны́нѣ, богоро́диченъ, гла́съ то́йже:

Безневѣ́стная Дѣ́во, [Яже Бо́га неизрече́нно заче́нши пло́тію, Ма́ти Бо́га Вы́шняго, Твои́хъ рабо́въ мольбы́ пріими́, Всенепоро́чная, всѣ́мъ подаю́щи очище́ніе прегрѣше́ній, ны́нѣ на́ша моле́нія пріе́млющи, моли́ спасти́ся всѣ́мъ на́мъ].

Тропа́рь, гла́съ 5:

Яко къ цѣле́бному исто́чнику, притека́емъ къ тебѣ́, Амвро́сіе, о́тче на́шъ, ты́ бо на пу́ть спасе́нія на́съ вѣ́рно наставля́еши, моли́твами отъ бѣ́дъ и напа́стей охраня́еши, въ тѣле́сныхъ и душе́вныхъ ско́рбехъ утѣша́еши, па́че же смире́нію, терпѣ́нію и любви́ науча́еши; моли́ человѣколю́бца Христа́ и Засту́пницу усе́рдную спасти́ся душа́мъ на́шимъ.


НА УТРЕНИ,
На Бо́гъ Госпо́дь: Тропа́рь свята́го два́жды. Сла́ва, и ны́нѣ, богоро́диченъ.

По 1-мъ стихосло́віи сѣда́ленъ, гла́съ 8:

Це́рковь свята́я ны́нѣ пра́зднуетъ твою́ честну́ю па́мять, о́тче на́шъ Амвро́сіе, почита́ющи по́двиги твоего́ земна́го житія́, ты́ бо яви́лся еси́ вои́стину я́ко рѣка́ благода́ти Ду́ха Свята́го, врачу́я не́мощи тѣле́сныя и душе́вныя всѣ́хъ прибѣга́ющихъ къ тебѣ́ съ вѣ́рою и наде́ждою. Тѣ́мъ взыва́емъ тебѣ́ непреста́нно: моли́ся Христу́ Бо́гу о спасе́ніи ду́шъ на́шихъ. [Два́жды.]

Сла́ва, и ны́нѣ, богоро́диченъ:

Упова́ніе и прибѣ́жище христіа́номъ, Богоро́дице Приснодѣ́во Марíе, не пре́зри упова́ющихъ на Тя́ рабо́въ Твои́хъ, тре́буемъ бо всегда́ Твоея́ по́мощи и заступле́нія, я́ко Ма́ти еси́ Зижди́теля всѣ́хъ, Христа́ Бо́га на́шего: тѣ́мъ и велича́емъ Рождество́ Твое́, Пречи́стая, и вопіе́мъ: ра́дуйся, Богора́дованная Влады́чице; ра́дуйся, спасе́ніе душа́мъ на́шимъ и ве́лія ми́лость.

По 2-мъ стихосло́віи сѣда́ленъ, гла́съ 1:

Любо́вію Христо́вою привле́клъ еси́ вся́ концы́ земли́ на́шея и учи́лъ еси́ до́брому христіа́нскому жи́тельству, терпѣ́ніе и смире́ніе насажда́я въ душа́хъ а́лчущихъ спасе́нія, наипа́че помога́еши на́мъ, предстоя́ ны́нѣ у Царя́ ца́рствующихъ и Влады́ки жи́зни вѣ́чныя и моля́ Его́, да поми́луетъ недосто́йныхъ ра́бъ Свои́хъ и спасе́тъ ду́ши на́ша. [Два́жды.]

Сла́ва, и ны́нѣ, богоро́диченъ:

Тя́, Пресвята́я Богоро́дице, а́нгели пою́тъ непреста́нно, я́ко Содѣ́теля тѣ́хъ и Бо́га на́шего несказа́нно во чре́вѣ Твое́мъ заче́нши, родила́ еси́ неискусому́жно во спасе́ніе на́ше и избавле́ніе, Его́же и мо́лиши при́сно, су́щимъ на земли́ здра́віе дарова́ти и мíру всему́ умире́ніе. Тѣ́мже и зове́мъ Ти́: ра́дуйся, всѣ́хъ родо́въ весе́ліе; ра́дуйся, Дѣ́во, христіа́нъ похвало́.

По поліеле́и сѣда́ленъ, гла́съ 8:

Досто́йно восхва́лимъ, бра́тіе, по́двиги всея́ Россíи чудотво́рца, преподо́бнаго отца́ на́шего Амвро́сія, возше́дшаго на высоту́ лѣ́ствицы духо́вныя и просла́вльшаго Бо́га соверше́нствомъ добродѣ́телей душеспаси́тельныхъ, и па́ки воспои́мъ, со умиле́ніемъ серде́цъ на́шихъ зову́ще: ра́дуйся, Амвро́сіе, о́тче святы́й, до́брый наста́вниче благоче́стія. [Два́жды.]

Сла́ва, и ны́нѣ, богоро́диченъ:

Дѣ́во пренепоро́чная и неискусобра́чная Марíе, при́зри и посѣти́ рабо́въ Твои́хъ, вѣ́рно пою́щихъ и хва́лящихъ Тя́ во хра́мѣ Твое́мъ, Препѣ́тая: ра́дуйся, Богоблагода́тная Богоро́дице Всепѣ́тая; ра́дуйся, спасе́ніе на́ше и утвержде́ніе; ра́дуйся, просвѣти́вшая ро́дъ на́шъ свѣтоно́снымъ Рождество́мъ Сы́на Твоего́ и Бо́га на́шего, Имже искорени́ся ле́сть бѣсо́вская; ра́дуйся, совокупи́вшая до́льняя небе́снымъ; ра́дуйся, Невѣ́сто неневѣ́стная.

Степе́нна, 1-й антифо́нъ 4-го гла́са. Проки́менъ, гла́съ 4: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Вся́кое дыха́ніе... Ева́нгеліе отъ Матѳе́я, зача́ло 43.

По 50-мъ псалмѣ́ стихи́ра, гла́съ 6:

Богоно́сный о́тче на́шъ Амвро́сіе, въ христоподража́тельномъ житіи́ свое́мъ стяжа́лъ еси́ плоды́ духо́вныя: любо́вь, ми́ръ, ра́дость, долготерпѣ́ніе, бла́гость, милосе́рдіе, вѣ́ру, кро́тость, воздержа́ніе, пло́ть распя́въ со страстьми́ и похотьми́, тяготы́ други́хъ поне́слъ еси́ и та́ко испо́лнилъ еси́ зако́нъ Христо́въ, достоблаже́нне о́тче, моли́ся о спасе́ніи ду́шъ на́шихъ.

Кано́нъ Богоро́дицы со ирмосо́мъ на 6 и свята́го на 8.

Кано́нъ свята́го, гла́съ 8.
Пѣ́снь 1.

Ирмо́съ: Колесницегони́теля фарао́ня погрузи́ чудотворя́й иногда́ Моисе́йскій же́злъ, крестообра́зно порази́въ и раздѣли́въ мо́ре, Изра́иля же бѣглеца́, пѣшехо́дца спасе́, пѣ́снь Бо́гови воспѣва́юща.

Це́рковь ны́нѣ торжеству́етъ, свѣ́тло пра́зднующи твою́ святу́ю па́мять, и съ ра́достію воспѣва́етъ ти́ хвале́бную пѣ́снь, сла́вящи Го́спода, ди́внаго во святы́хъ Свои́хъ.

Позна́лъ еси́ сла́дость жи́зни во Христѣ́ и не обину́яся оста́вилъ еси́ пре́лесть земны́хъ бла́гъ и суету́ мíра, всего́ себе́ покори́въ Бо́гу.

Кто́ изочте́тъ по́двиги твоя́, я́же поне́слъ еси́ ра́ди Ца́рствія небе́снаго, въ пѣ́ніи, бдѣ́ніи и поще́ніи утвержда́я ду́хъ сво́й?

Восходи́лъ еси́ отъ си́лы въ си́лу въ добродѣ́ланіи за́повѣдей Христо́выхъ и стяжа́лъ еси́ да́ръ Ду́ха Свята́го, Его́же дѣ́йствіемъ спа́слъ еси́ мно́гія ду́ши христіа́нскія.

Богоро́диченъ: Богоро́дице Приснодѣ́во Марíе, простри́ ми ми́лостивнѣ десни́цу на по́мощь, умоля́ющи Сы́на Твоего́ и Бо́га, я́ко уя́звенъ е́смь лю́тѣ и на Тя́ то́чію наде́жду мою́ положи́хъ, Ты́ мя́ уще́дри.

Катава́сія: Отве́рзу уста́ моя́...

Пѣ́снь 3.

Ирмо́съ: Утвержде́й въ нача́лѣ небеса́ ра́зумомъ и зе́млю на вода́хъ основа́вый, на ка́мени мя́, Христе́, за́повѣдей Твои́хъ утверди́, я́ко нѣ́сть свя́тъ па́че Тебе́, Еди́не Человѣколю́бче.

Послуша́ніемъ соверше́ннымъ отве́рглся еси́ во́ли своея́ и тѣ́мъ стра́сти существа́ па́дшаго Ада́ма отри́нулъ еси́, всего́ себе́ преда́въ води́тельству богому́дрыхъ ста́рцевъ и отце́въ пу́стыни, и́же и возрасти́ша тя́ въ мѣ́ру во́зраста духо́внаго.

Цѣлому́дрія красоту́ стяжа́ла е́сть твоя́ чи́стая душа́, си́лою покая́нія совле́кшися ве́тхаго человѣ́ка и въ духо́вномъ преуспѣя́ніи обле́кшися во Христа́.

Бога́тства тлѣ́ннаго мíра возненави́дѣлъ еси́ и бы́лъ еси́ я́ко стра́нникъ и пришле́цъ на земли́, взыску́я Гра́да небе́снаго, тѣ́мже Домовлады́ка введе́ тя въ черто́гъ сла́вы Своея́.

Христо́съ Бо́гъ обогати́ тя да́ромъ чуде́съ, и мно́гія болѣ́зни стра́ждущихъ исцѣли́лъ еси́; не оста́ви на́съ, ча́ющихъ отъ тебе́ благода́тныя по́мощи.

Богоро́диченъ: Наде́жда и упова́ніе на́ше, Влады́чице мíра, блага́я Помо́щнице, спаси́, и въ крѣ́пости ро́гъ вознеси́ правосла́вныхъ, и лю́ди на́ша отъ вся́кихъ бѣ́дъ и отъ разли́чныхъ обстоя́ній свободи́.

Сѣда́ленъ, гла́съ 4:

Ли́къ мона́ховъ ны́нѣ славосло́витъ тя́, преподо́бне о́тче на́шъ Амвро́сіе, ублажа́я честну́ю па́мять твою́, и вся́ оби́тель въ ра́дости торжеству́етъ, почита́ющи твое́ чи́стое въ добродѣ́телехъ житіе́ и мно́жество чудотворе́ній, тобо́ю преизлива́емыхъ. Тѣ́мже мы́ вси́ вку́пѣ вопіе́мъ: спаса́й на́съ моли́твами твои́ми, Амвро́сіе, о́тче на́шъ. [Два́жды.]

Сла́ва, и ны́нѣ, богоро́диченъ:

Подъ Твое́ благоутро́біе притека́юще, мо́лимъ, Богоро́дице Дѣ́во, не пре́зри пла́ча на́шего и моли́твы, но ускори́ изба́вити отъ бѣ́дъ и скорбе́й лю́ди безотвѣ́тныя: Ты́ бо еди́на еси́ извѣ́стнѣйшее христіа́номъ упова́ніе, и къ Тебѣ́ прибѣга́юще, вси́ спаса́емся.

Пѣ́снь 4.

Ирмо́съ: Ты́ моя́ крѣ́пость, Го́споди, Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча, и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти: си́лѣ Твое́й сла́ва, Человѣколю́бче.

Избра́нный сосу́дъ Ду́ха Свята́го бы́лъ еси́ и то́ки чуде́съ изли́лъ еси́. Пріими́ на́ша моли́твы и исцѣли́ на́съ отъ ра́нъ грѣхо́вныхъ и страсте́й.

Позна́вый си́лу моли́твы во спасе́ніе души́, научи́ на́съ душеполе́зно моли́тися ко Изба́вителю всѣ́хъ ми́лостивому Іису́су.

Вѣ́ру и́стинную правосла́вную утверди́ въ лю́дехъ твои́хъ, чту́щихъ тя́ я́ко ревни́теля уче́нія Христо́ва.

Что́ воздади́мъ ти́, преблаже́нне о́тче на́шъ, за вся́, я́же возда́лъ еси́ на́мъ, ча́домъ твои́мъ, чту́щимъ твою́ честну́ю па́мять?

Богоро́диченъ: Изъ твоего́ пречи́стаго чре́ва, Богороди́тельнице, Сло́во Бо́жіе произы́де несказа́нно, Его́же объе́мши, отъ зо́лъ изба́вити умоли́ зову́щихъ: сла́ва си́лѣ Твое́й, Го́споди.

Пѣ́снь 5.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Свѣ́томъ уче́нія Христо́ва просвѣще́нный, мра́къ заблужде́нія грѣхо́внаго отме́лъ еси́, наста́ви во свѣ́тѣ повелѣ́ній Бо́жіихъ и на́съ, омраче́нныхъ страстьми́.

Но́вая свѣща́ возсія́лъ еси́, о́тче, на земли́ Россíйстѣй, озаря́я свѣ́томъ любве́ боже́ственныя вся́ до́льняя. Просвѣти́, богоно́се, на́съ, недосто́йныхъ ча́дъ твои́хъ, свѣ́томъ за́повѣдей Христо́выхъ.

Возлюби́лъ еси́ бли́жняго и подъя́лъ еси́ его́ бре́мя грѣхо́въ и скорбе́й, да у́зритъ свѣ́тъ и́стины и испра́витъ стопы́ своя́ къ дѣ́ланію за́повѣдей Христо́выхъ.

Унаслѣ́довалъ еси́ Ца́рство небе́сное, идѣ́же пра́зднующихъ гла́съ непреста́нный и безконе́чная сла́дость зря́щихъ лица́ добро́ту Бо́га неизрече́нную.

Богоро́диченъ: Нескве́рная Агнице и Богоотрокови́це Марíе, Твои́ми моли́твами укрѣпи́вшеся, святíи побѣди́ша бѣсо́вскія си́лы. Тѣ́мже и на́мъ, упова́ющимъ на Тя́, ско́ро предста́ни въ по́мощь, да посра́мятся и паду́тъ вси́, явля́ющіи рабо́мъ Твои́мъ зла́я.

Пѣ́снь 6.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Крѣ́пкое заступле́ніе бу́ди всѣ́мъ, притека́ющимъ къ твое́й по́мощи въ неду́зѣхъ и печа́лехъ, о́тче на́шъ Амвро́сіе, Оптинскія оби́тели вели́кій ста́рче.

Изба́ви на́съ отъ кова́рства лука́выхъ духо́въ и изведи́ изъ глубины́ грѣхо́вныя, да очи́ститъ на́съ Христо́съ Бо́гъ отъ беззако́ній на́шихъ и спасе́тъ ду́ши на́ша.

Ка́ко рце́мъ твоя́ благодѣя́нія лю́демъ, стра́ждущимъ и уничиже́ннымъ? Ка́ко воспои́мъ ти́ благода́рственную пѣ́снь? Пріими́ ны́нѣ пѣ́снь хвале́бную недосто́йныхъ ча́дъ твои́хъ.

Посѣти́ на́ша не́мощи по ми́лости твое́й, исцѣли́ я́звы духо́вныя си́лою да́нною ти́ свы́ше благода́ти, да воста́немъ отъ ме́ртвеннаго сна́ грѣхо́внаго.

Богоро́диченъ: Пѣсносло́вяще, Чи́стая, изъ утро́бы Твоея́ Вопло́щшагося, Тя́ славосло́вимъ, я́ко Бо́жію Ма́терь.

Конда́къ, гла́съ 2:

Завѣ́тъ Пастыренача́льника испо́лнивъ, ста́рчества благода́ть наслѣ́довалъ еси́, болѣ́знуя се́рдцемъ о всѣ́хъ, съ вѣ́рою притека́ющихъ къ тебѣ́. Тѣ́мже и мы́, ча́да твоя́, съ любо́вію вопіе́мъ ти́: о́тче святы́й Амвро́сіе, моли́ Христа́ Бо́га спасти́ся душа́мъ на́шимъ.

Икосъ:

Доброзра́чное житіе́ показа́лъ еси́ и свои́ми добродѣ́тельми озари́лъ еси́ всю́ зе́млю Ру́сскую, привле́клъ еси́ къ себѣ́ вся́ концы́ Оте́чества на́шего, окормля́я неизче́тную па́ству вѣ́рныхъ ча́дъ твои́хъ, и́хже съ любо́вію призрѣ́лъ еси́, я́ко оте́цъ чадолюби́вый и ми́лостивый. Тѣ́мже сте́кшеся въ де́нь преставле́нія твоего́, во умиле́ніи зове́мъ: ра́дуйся, подви́жниче благоче́стія, воспріе́мый бога́тыя да́ры Ду́ха Всесвята́го; ра́дуйся, высото́ смире́нія и терпѣ́нія, и́миже науча́еши вѣ́рная ча́да своя́; ра́дуйся, дре́во плодоно́сное, и́мже напита́лъ еси́ мно́жество а́лчущихъ жи́зни вѣ́чныя; ра́дуйся, цвѣ́те благоуха́нный любве́ боже́ственныя, е́юже утѣша́ются скорбя́щіи и болѣ́знующіи; ра́дуйся, исто́чниче приснотекíй чуде́съ и благотворе́ній, отъ ни́хже боля́щіи исцѣлева́ютъ и ги́бнущіи спаса́ются; ра́дуйся, дерзнове́нный хода́таю на́шъ предъ пра́веднымъ Судіе́ю; ра́дуйся, помо́щниче на́мъ пресла́вный во всѣ́хъ обстоя́ніихъ. Ра́дуйся, богому́дре Амвро́сіе, вели́кій ста́рче всероссíйскій.

Пѣ́снь 7.

Ирмо́съ: Бо́жія снизхожде́нія о́гнь устыдѣ́ся въ Вавило́нѣ иногда́, сего́ ра́ди о́троцы въ пещи́, ра́дованною ного́ю, я́ко во цвѣ́тницѣ лику́юще, поя́ху: благослове́нъ еси́ Бо́же, оте́цъ на́шихъ.

Пресели́лся еси́ въ го́рнія черто́ги и та́мо зри́ши сла́ву неизрече́нную превѣ́чнаго Бо́га, зовя́: благослове́нъ еси́, Бо́же оте́цъ на́шихъ.

Въ со́нмѣ святы́хъ уго́дниковъ ны́нѣ прославля́еши прему́драго Творца́ и Го́спода си́лъ, воспѣва́я: благослове́нъ еси́, Бо́же оте́цъ на́шихъ.

Съ ли́ки а́нгеловъ и арха́нгеловъ предстои́ши предъ лице́мъ Вседержи́теля и та́мо немо́лчно пое́ши: благослове́нъ еси́, Бо́же оте́цъ на́шихъ.

Вни́де въ ра́дость Го́спода, я́ко до́брый и вѣ́рный ра́бъ его́ бы́лъ еси́ на земли́, и ны́нѣ на небесѣ́хъ взыва́еши: благослове́нъ еси́, Бо́же оте́цъ на́шихъ.

Богоро́диченъ: Ви́ждь, Влады́чице, души́ моея́ злосмра́дныя ра́ны, и́хже самохо́тнѣ подъя́хъ, окая́нный, и не могу́ приложи́ти пла́стыря, но е́ле жи́въ сы́й, вопію́: ми́лостива мнѣ́ Врача́ всѣ́хъ и Бо́га ма́терними Твои́ми моли́твами сотвори́, я́ко да воспою́ Ти: благослове́нъ, Пречи́стая, Пло́дъ Твоего́ чре́ва.

Пѣ́снь 8.

Ирмо́съ: Седмери́цею пе́щь халде́йскій мучи́тель богочести́вымъ неи́стовно разжже́, си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Це́рковь ны́нѣ ликовству́етъ, пра́зднующи блаже́нную па́мять твою́, достохва́льне о́тче, и обрѣ́теніе честны́хъ моще́й твои́хъ прославля́етъ ра́достно, пою́щи: да благослови́тъ вся́ тва́рь Го́спода и превозно́ситъ Его́ во вѣ́ки.

Собра́шася ны́нѣ въ оби́тели святѣ́й мона́ховъ мно́жество, ублажа́ющихъ твою́ честну́ю па́мять и пою́щихъ съ ра́достію: да благослови́тъ вся́ тва́рь Го́спода и превозно́ситъ Его́ во вѣ́ки.

Па́стыріе и учи́теліе стеко́шася въ се́й гра́дъ оби́тельный, идѣ́же въ добродѣ́телехъ ты́ процвѣ́лъ еси́, поя́: да благослови́тъ вся́ тва́рь Го́спода и превозно́ситъ Его́ во вѣ́ки.

Ста́ріи и младíи, си́льніи и немощнíи пріидо́ша ны́нѣ въ до́мъ Госпо́день просла́вити преподо́бнаго ста́рца и отца́ на́шего Амвро́сія, вопію́ще: да благослови́тъ вся́ тва́рь Го́спода и превозно́ситъ Его́ во вѣ́ки.

Богоро́диченъ: Отъ Тебе́, Пресвята́я Богоро́дице, излія́ся вода́ живо́тная на омове́ніе скве́рны всемíрныя, е́юже благоволи́ и мое́ се́рдце прохлади́ти и окропи́ти росо́ю моли́твъ въ кро́вѣ кри́лъ Твои́хъ во вѣ́ки вся́.

Пѣ́снь 9.

Ирмо́съ: Ужасе́ся о се́мъ не́бо, и земли́ удиви́шася концы́, я́ко Бо́гъ яви́ся человѣ́комъ пло́тски, и чре́во Твое́ бы́сть простра́ннѣйшее небе́съ. Тѣ́мъ Тя́, Богоро́дицу, Ангеловъ и человѣ́къ чинонача́лія велича́ютъ.

Проповѣ́дуетъ ны́нѣ Правосла́вная Це́рковь по́двиги твоя́, я́ко всероссíйскаго уго́дника Бо́жія, и чти́тъ твою́ па́мять, восхваля́ющи твое́ ангелоподо́бное житіе́.

При́зри съ небесе́, о́тче на́шъ Амвро́сіе, на вѣ́рныя лю́ди твоя́ и низпосли́ свы́ше ру́ку по́мощи всѣ́мъ, покланя́ющимся честно́му о́бразу твоему́.

Услы́ши гла́съ моле́нія на́шего, посѣти́ ми́лостію твое́ю болѣ́зни и не́мощи ча́дъ твои́хъ, съ вѣ́рою къ тебѣ́ прибѣга́ющихъ, досточу́дне о́тче на́шъ.

Припа́даемъ во умиле́ніи серде́цъ на́шихъ къ стопа́мъ твои́мъ, вели́кій ста́рче земли́ на́шея, про́симъ и мо́лимъ: не забу́ди посѣща́ти чту́щія пречестну́ю па́мять твою́.

Богоро́диченъ: Ко́е Тебѣ́ дарова́ніе принесе́мъ, Богоро́дице? Или́ что́ вѣща́ти и́мамы, грѣ́шніи? То́чію уми́льно вопіе́мъ, моля́щеся: спаси́ рабы́ Твоя́, Богоблагода́тная Отрокови́це, я́ко да Тя́ при́сно велича́емъ.

Свѣти́ленъ:

Мона́шескаго о́браза житіе́ избра́въ непрело́жно и отри́нувъ мíра сего́ суету́ и сла́ву, всели́лся еси́ въ оби́тель Богоро́дицы, преподо́бне о́тче на́шъ Амвро́сіе, и процвѣ́лъ еси́, я́ко кри́нъ се́льный. Мы́ же, чту́ще святу́ю па́мять твою́, зове́мъ ти́: бу́ди на́мъ помо́щникъ и засту́пникъ въ бѣда́хъ и ско́рбехъ обстоя́щихъ. [Два́жды.]

Сла́ва, и ны́нѣ, богоро́диченъ:

Ра́дуйся, Тебѣ́ зове́мъ, благослове́нная Богоро́дице Дѣ́во, я́ко Тобо́ю присносу́щныя ра́дости прича́стницы бы́хомъ. Живо́тъ бо на́шъ и спасе́ніе недомы́слимо и превы́ше естества́ родила́ еси́, сего́ ра́ди непреста́нно ублажа́ютъ Тя́ ро́дове родо́въ, я́коже пре́жде прорекла́ еси́.

На хвали́техъ стихи́ры на 4, гла́съ 6:

Восхва́лимъ, вѣ́рніи лю́діе,* достоблаже́нную па́мять преподо́бнаго Амвро́сія,* вели́каго ста́рца Оптинскаго,* всея́ Россíи чудотво́рца,* то́й бо, сконча́въ земно́е стра́нствіе,* вни́де въ оби́тель Царя́ Небе́снаго* и зри́тъ та́мо красоту́ неизрече́нную,* вчини́вся съ ли́ки безпло́тныхъ,* пое́тъ съ ни́ми пѣ́снь трисвяту́ю* въ Тро́ицѣ сла́вимому Бо́гу.

Возра́дуемся, бра́тіе,* пра́зднующе свѣ́тлую па́мять* богоно́снаго ста́рца Амвро́сія,* учи́теля благоче́стія,* проповѣ́дника любве́ Христо́вой,* его́же Бо́гъ сотвори́ сосу́дъ избра́нный благода́ти Своея́ живоно́сныя,* воспои́мъ, зову́ще:* моли́, о́тче, всеще́драго Бо́га* спасти́ся душа́мъ на́шимъ.

Преблаже́нне о́тче Амвро́сіе,* вонми́ гла́су ду́шъ на́шихъ,* ча́ющихъ твоея́ ми́лости,* се́ бо ско́рби и ну́жды* превзыдо́ша главу́ на́шу,* и нѣ́сть исцѣле́нія пло́ти на́шея;* пріиди́ и помози́ всѣ́мъ,* чту́щимъ твою́ святу́ю па́мять.

Це́рковь Ру́сская ны́нѣ пра́зднуетъ* твою́ прехва́льную па́мять,* богому́дре о́тче Амвро́сіе,* прославля́ющи твое́ земно́е житіе́,* е́же украси́лъ еси́ добродѣ́тельми Христо́выми.* Не премолчи́ за ны́ ко Го́споду* въ твои́хъ те́плыхъ моли́твахъ,* да спасе́тъ ду́ши на́ша.

Сла́ва, гла́съ 8:

Бу́ди помо́щникъ и засту́пникъ на́мъ, обурева́емымъ въ пучи́нѣ жите́йскаго мо́ря, богоблаже́нне о́тче Амвро́сіе, до́брый па́стырю и дѣ́лателю жа́твы мно́гія, тебе́ бо вси́ вѣ́мы я́ко ми́лостиваго чудотво́рца, ско́раго врача́ ду́шъ и тѣле́съ на́шихъ, крѣ́пкаго моли́твенника предъ Бо́гомъ о спасе́ніи ду́шъ на́шихъ.

И ны́нѣ, богоро́диченъ, гла́съ то́йже:

Влады́чице, пріими́ [моли́твы ра́бъ Твои́хъ и изба́ви на́съ отъ вся́кія ну́жды и печа́ли].

Славосло́віе вели́кое. [Ектеніи́] и отпу́стъ.



НА ЛИТУРГІИ,

Слу́жба преподо́бническая: [Блаже́нна отъ кано́на свята́го, пѣ́снь 3 и 6. Проки́менъ, гла́съ 7: Честна́ предъ Го́сподемъ* сме́рть преподо́бныхъ его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Апо́столъ, къ Гала́томъ, зача́ло 213. Аллилу́ія, гла́съ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́. Ева́нгеліе отъ Луки́, зача́ло 24. Прича́стенъ: Въ па́мять вѣ́чную бу́детъ пра́ведникъ, отъ слу́ха зла́ не убои́тся.]

Источникъ: Минíа дополни́тельная. — М.: «Правило вѣры», 2008. — С. 71-91.

/ Къ оглавленію раздѣла /


Наверхъ / Къ титульной страницѣ

0