Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 18 августа 2017 г. Сейчасъ на порталѣ посѣтителей - 26.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́нія въ 27-й де́нь.
Слу́жба благода́рственная Бо́гу, въ Тро́ицѣ Свято́й сла́вимому, о вели́кой, Бо́гомъ дарова́нной побѣ́дѣ надъ свѣ́йскимъ короле́мъ Каро́ломъ вторы́мъ на́десять и во́инствомъ его́, содѣ́янной подъ Полта́вою въ лѣ́то отъ воплоще́нія Госпо́дня 1709-е, мѣ́сяца Іу́нія въ 27-й де́нь.

НА МАЛѢЙ ВЕЧЕРНИ,
[На Го́споди воззва́хъ:] стихи́ры [на 4], гла́съ 1:

Что́ Ти принесе́мъ,* бла́гъ на́шихъ не тре́бующій Бо́же,* я́ко яви́лся еси́ на́мъ съ щедро́тами Твои́ми,* отъ вѣ́ка неслы́шанными?* Нѣ́сть что́ и́но,* кромѣ́ отъ сосу́да Твоего́ избра́ннаго угото́ванную пѣ́снь сію́:* Бо́гу благодаре́ніе,* да́вшему на́мъ побѣ́ду* Го́сподемъ на́шимъ Іису́съ Христо́мъ* и исходя́щимъ отъ Отца́ Всесвяты́мъ Ду́хомъ.

Падо́ша крѣ́пцыи си́лою Твое́ю, Всеси́льный Бо́же,* но ну́ждою падо́ша предъ Тобо́ю* и не возмо́гутъ ста́ти.* Мы́ же, Твое́ю ми́лостію стоя́ще про́сти,* во́лею Твоему́ вели́честву припа́даемъ, вопію́ще:* вознесы́й ро́гъ Христа́ Твоего́ и всѣ́хъ правосла́вныхъ,* сломи́вый же ерети́ческій,* Бо́же на́шъ, сла́ва Тебѣ́.

Кто́ по достоя́нію* воспѣ́ти мо́жетъ ми́лости Твоя́, Го́споди,* я́вльшіяся на́мъ ны́нѣ,* не то́кмо отъ человѣ́къ, но ниже́ отъ а́нгелъ?* Ты́ бо бо́лій еси́ всея́ хвалы́,* и ни еди́но же сло́во дово́льно къ похвале́нію дѣ́лъ Твои́хъ.* Са́мъ у́бо, и́же научи́лъ еси́ ру́цѣ мои́ на ополче́ніе,* и устнѣ́ отве́рзи,* да, я́коже возмо́жно человѣ́комъ,* возвѣстя́тъ хвалу́ Твою́.

Сла́ва, и ны́нѣ, гла́съ 8:

Сла́ва Тебѣ́, Предвѣ́чный Отче, си́хъ, и́же не су́ть досто́йни нарещи́ся сы́ны Твоя́, возлюби́вый и просла́вивый; сла́ва Тебѣ́, Сы́не Единоро́дный, рабо́въ Твои́хъ, а́ки сыно́въ, отъ па́губы искупи́вый; сла́ва Тебѣ́, Ду́ше Пресвяты́й, вся́ во всѣ́хъ благода́тію Свое́ю содѣ́явшій и дѣ́йствующій. Тро́ице Свята́я, Бо́же на́шъ, сла́ва Тебѣ́.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Торже́ственными вѣ́твьми преукра́шенна,* но́вый Сіо́не, Россíе,* благода́рственная воспо́й Бо́гу,* побѣди́вшему супоста́ты твоя́.

Сти́хъ: Услы́шите сія́, вси́ язы́цы,* [внуши́те вси́ живу́щіи по вселе́ннѣй].

Стени́, вра́же Правосла́вія,* се́ бо тя́, вознесе́нна,* покори́ Бо́гъ подъ но́зѣ* боя́щимся Его́.

Сти́хъ: Го́споди, Госпо́дь на́шъ,* я́ко чу́дно и́мя Твое́ [по все́й земли́].

Вси́ окре́стніи наро́ди,* хотя́щіи бра́ни,* вострепещи́те, ви́дяще,* я́ко Бо́гъ* побо́рствуетъ по на́съ.

Сла́ва, и ны́нѣ, гла́съ то́йже:

Вся́къ правосла́вный* да воспое́тъ ди́вное Бо́жіе смотре́ніе,* устро́ившее вѣ́рнымъ сла́ву,* еретико́мъ же* сту́дъ и па́губу.

Тропа́рь, гла́съ 8:

Препросла́вленъ еси́, Го́споди Бо́же на́шъ, дарова́вый крѣ́пость на враги́ Благовѣ́рному Царю́ на́шему Петру́, я́коже Дави́ду на прего́рдаго Голіа́ѳа, осѣни́лъ еси́ надъ главо́ю его́ въ де́нь бра́ни, препоя́салъ еси́ немощны́я си́лою свы́ше и тѣ́ми всю́ де́рзость вра́жію низложи́лъ еси́. Многоми́лостиве, сла́ва Тебѣ́.


НА ВЕЛИЦѢЙ ВЕЧЕРНИ,
[Блаже́нъ му́жъ.., 1-й антифо́нъ.] На Го́споди воззва́хъ: стихи́ры [на 8], гла́съ 6:

Тебѣ́, Тріѵпоста́сному,* побѣди́тельную пѣ́снь Россíя возсыла́етъ,* Отцу́, всемогу́ществомъ вра́жію сокруши́вшему си́лу,* Сы́ну, прему́дростію расточи́вшему лука́выхъ совѣ́ты,* Ду́ху Свято́му Паракли́ту, на́съ въ ско́рбехъ утѣ́шившему,* се́рдцемъ и устна́ми вопію́щи:* Свя́тъ еси́, Отче Всемогу́щій,* Свя́тъ еси́, Сы́не, Бо́жія Прему́дросте,* Свя́тъ еси́ Ду́ше, Благода́ть неистощи́мая,* Бо́же на́шъ, сла́ва Тебѣ́. [Два́жды.]

Воспо́йте, россíйстіи наро́ди,* Побѣди́телю Бо́гу пѣ́снь но́ву,* содѣ́явшему чу́до новѣ́йшее всѣ́хъ дре́внихъ чуде́съ:* си́льныя бо сокруши́ во бра́ни,* немощны́я же препоя́са си́лою свы́ше* и вознесе́ смире́нныя.* Тому́ побѣди́тельная возсыла́емъ* и, припа́дающе, вопіе́мъ:* Бо́же на́шъ, сла́ва Тебѣ́. [Два́жды.]

Пои́мъ Го́сподеви,* и ны́нѣ бо сла́вно просла́вися,* ничи́мже ме́ньше отъ пре́жнихъ:* Иже бо дре́вле го́рдаго фарао́на погрузи́ въ Чермнѣ́мъ мо́ри,* Се́й и ны́нѣ ра́внаго фарао́ну* го́рдостію и суровство́мъ въ чермнѣ́мъ кро́ве* во́евъ его́ потопи́ мо́ри сопроти́внаго.* Мы́ же, преше́дше по су́ху посредѣ́ сего́ мо́ря,* пое́мъ Го́сподеви:* сла́вно бо просла́вися.

Сказа́лъ еси́, Го́споди,* дѣ́ломъ и сло́вомъ,* чесо́ ра́ди дре́вле возне́слъ еси́* лю́таго на лю́ди Твоя́ фарао́на;* позна́хомъ и ны́нѣ отъ стра́ннаго дѣ́ла Твоего́,* чесо́ ра́ди воздви́глъ еси́ востаю́щія на ны́,* я́ко да вознесе́нни смиря́тся паде́ніемъ,* Твое́ же чу́дное и́мя вознесе́тся превы́ше небе́съ* Непостижи́ме въ дѣ́лѣхъ Твои́хъ, Бо́же,* сла́ва милосе́рдію Твоему́.

Благослове́нъ еси́, Го́споди Бо́же на́шъ,* научи́вый ру́цѣ на́ши на ополче́ніе,* пе́рсты на́ша на бра́нь:* Твое́ю бо Ѵпоста́сною Му́дростію невѣ́жество на́ше* на хи́трость вра́жію умудри́ся,* Твое́ю си́лою не́мощь на́ша на гордоси́льнаго укрѣпи́ся,* Твое́ю благода́тію мно́жество грѣхо́въ на́шихъ покры́ся* и я́рость льво́вая смири́ся.* Вся́ вѣ́дый, вся́ могíй,* вся́ беззако́нія рабо́въ Твои́хъ презира́яй,* Бо́же на́шъ, сла́ва Тебѣ́.

Бо́же, пѣ́снь но́ву воспѣва́емъ Тебѣ́,* даю́щему спасе́ніе царе́мъ,* избавля́ющему Петра́, я́коже Дави́да, раба́ Своего́,* отъ стрѣля́нія лю́та.* Ты́ посла́лъ ру́ку Твою́ съ высоты́* и изба́вилъ еси́ на́съ отъ во́дъ мно́гихъ,* отъ ру́къ сыно́въ чужди́хъ,* и́хже хра́брость ублажи́ша и убоя́шася мно́зи;* но на́мъ, на Тя́ надѣ́ющимся,* а не на свою́ си́лу упова́ющимъ, спобо́рствуяй,* я́вственно показа́лъ еси́,* я́ко сíи то́кмо лю́діе блаже́ни су́ть,* и́мже Госпо́дь Бо́гъ и́хъ.

Сла́ва, гла́съ 1:

Кто́ возглаго́летъ си́лы Твоя́, Го́споди? Слы́шаны сотвори́тъ вся́ хвалы́ Твоя́? Ты́ бо и ны́нѣ смири́лъ еси́ я́ко я́звена го́рдаго, мы́шцею си́лы Твоея́ разгна́лъ еси́ враги́ Твоя́, на́мъ же, безчи́сленнаго ра́ди милосе́рдія Твоего́, не по беззако́ніемъ на́шимъ сотвори́лъ еси́, но я́коже ще́дритъ оте́цъ сы́ны, уще́дрилъ еси́ боя́щихся Тебе́. Исповѣ́дятъ небеса́ чудеса́ Твоя́, Го́споди, и земля́ и́стину Твою́ въ Це́рквахъ святы́хъ. Мы́ же воспое́мъ ми́лости Твоя́: исповѣ́мыся Тебѣ́, Го́споди, я́ко Бла́гъ еси́, я́ко во вѣ́ки ми́лость Твоя́.

И ны́нѣ, богоро́диченъ, [гла́съ то́йже]:

Всемíрную сла́ву, [отъ человѣ́къ прозя́бшую и Влады́ку ро́ждшую, небе́сную две́рь воспои́мъ, Марíю Дѣ́ву, безпло́тныхъ пѣ́снь и вѣ́рныхъ удобре́ніе: Сія́ бо яви́ся не́бо и хра́мъ Божества́, Сія́, прегражде́ніе вражды́ разруши́вши, ми́ръ введе́ и Ца́рствіе отве́рзе; Сію́ у́бо иму́ще вѣ́ры утвержде́ніе, Побо́рника и́мамы, изъ Нея́ ро́ждшагося Го́спода. Дерза́йте у́бо, дерза́йте, лю́діе Бо́жіи, и́бо То́й побѣди́тъ враги́, я́ко Всеси́ленъ].

[Вхо́дъ. Проки́менъ дне́. И чте́нія три́.]

Исхо́да чте́ніе. [Главы́ 13 и 14.]

Воздви́гшеся сы́нове Изра́илевы отъ Сокхо́ѳа, ополчи́шася во Оѳо́мѣ при пусты́ни. Бо́гъ же вожда́ше и́хъ дне́мъ у́бо въ столпѣ́ о́блака, показа́ти и́мъ пу́ть, но́щію же въ столпѣ́ огня́. И не оскудѣ́ сто́лпъ о́блака дне́ и сто́лпъ о́гненный но́щи предъ всѣ́ми людьми́. И возглаго́ла Госпо́дь къ Моисе́ю, глаго́ля: глаго́ли сыново́мъ Изра́илевымъ, и, возврати́вшеся, да ополча́тся пря́мо предгра́дія, посредѣ́ Магда́ла и посредѣ́ мо́ря, пря́мо Веелсепфо́ну, предъ ни́ми ополчи́вшеся при мо́ри. И рече́тъ фарао́нъ лю́демъ свои́мъ о сынѣ́хъ Изра́илевыхъ: заблужда́ютъ сíи по земли́, затвори́ бо и́хъ пусты́ня. Азъ же ожесточу́ се́рдце фарао́ново, и пожене́тъ созади́ и́хъ, и просла́влюся въ фарао́нѣ и во все́мъ во́инствѣ его́, и уразумѣ́ютъ вси́ еги́птяне, я́ко Азъ Госпо́дь. И сотвори́ша та́ко. И возвѣще́но бы́сть царю́ еги́петскому, я́ко бѣжа́ша лю́діе, и преврати́ся се́рдце фарао́ново и служи́телей его́ на лю́ди, и реко́ша: что́ сіе́ сотвори́хомъ? Отпусти́вше сы́ны Изра́илевы, е́же не рабо́тати на́мъ? Впряже́ у́бо фарао́нъ колесни́цы своя́ и вся́ лю́ди своя́ собра́ съ собо́ю. И поя́тъ шестьсо́тъ колесни́цъ избра́нныхъ, и вся́каго коня́ еги́петскаго, и триста́ты надъ всѣ́ми. И ожесточи́ Госпо́дь се́рдце фарао́на, царя́ еги́петскаго, и погна́ созади́ сыно́въ Изра́илевыхъ, сы́нове же Изра́илевы исхожда́ху руко́ю высо́кою. И погна́ша еги́птяне во слѣ́дъ и́хъ и обрѣто́ша и́хъ, ополчи́вшихся при мо́ри, и вся́къ ко́нь и колесни́цы фарао́новы, и во́инство его́, и ко́нницы его́ пря́мо предгра́дія, сопроти́ву Веелсепфо́на. И фарао́нъ приближа́шеся, и, воззрѣ́вше, сы́нове Изра́илевы очи́ма ви́дѣша, и се́ еги́птяне ополчи́шася въ слѣ́дъ и́хъ, и убоя́шася зѣло́, и возопи́ша же сы́нове Изра́илевы ко Го́споду. И рѣ́ша къ Моисе́ю: за е́же не бы́ти ли гробо́мъ во Еги́птѣ, изве́лъ еси́ на́съ умертви́ти въ пусты́ни се́й? Что́ сіе́ сотвори́лъ еси́ на́мъ, изве́дъ на́съ изъ Еги́пта? Не се́й ли бѣ́ глаго́лъ, его́же рѣ́хомъ къ тебѣ́, глаго́люще: оста́ви на́съ, я́ко да рабо́таемъ еги́птяномъ. Лу́чше бо бѣ́ на́мъ рабо́тали еги́птяномъ, не́жели умре́ти въ пусты́ни се́й. Рече́ же Моисе́й къ лю́демъ: дерза́йте, сто́йте и зри́те спасе́ніе отъ Го́спода, е́же сотвори́тъ на́мъ дне́сь. Имже бо о́бразомъ зря́сте еги́птяны дне́сь, не приложите́ ктому́ ви́дѣти и́хъ въ вѣ́чное лѣ́то. Госпо́дь побо́ретъ о ва́съ, и вы́ умо́лкните. Рече́ же Госпо́дь къ Моисе́ю: что́ вопіе́ши ко Мнѣ́? Глаго́ли сыново́мъ Изра́илевымъ, и да путеше́ствуютъ. И ты́ возми́ же́злъ тво́й, и простри́ ру́ку твою́ на мо́ре, и расто́ргни е́, и да вни́дутъ сы́нове Изра́илевы посредѣ́ мо́ря по су́ху. И се́ Азъ ожесточу́ се́рдце фарао́ново, и слу́гъ его́, и еги́птянъ всѣ́хъ, и вни́дутъ въ слѣ́дъ и́хъ, и просла́влюся въ фарао́нѣ, и во все́мъ во́инствѣ его́, и въ колесни́цѣхъ, и въ ко́нехъ его́. И уразумѣ́ютъ вси́ еги́птяне, я́ко Азъ Госпо́дь, прославля́ющу Ми ся въ фарао́нѣ, и въ колесни́цахъ, и въ ко́нехъ его́. Взя́тся же а́нгелъ Бо́жій, ходя́й предъ полко́мъ сыно́въ Изра́илевыхъ, и по́йде созади́ и́хъ, взя́тся же и сто́лпъ о́блака отъ лица́ и́хъ и ста́ созади́ и́хъ. И вни́де посредѣ́ полка́ еги́петскаго и посредѣ́ полка́ сыно́въ Изра́илевыхъ, и бы́сть тма́ и мра́къ, и пріи́де но́щь, и не смѣси́шася дру́гъ съ дру́гомъ во всю́ но́щь. Простре́ же Моисе́й ру́ку на мо́ре, и возгна́ Госпо́дь мо́ре вѣ́тромъ ю́жнымъ си́льнымъ всю́ но́щь, и сотвори́ мо́ре су́хо, и разступи́ся вода́, и внидо́ша сы́нове Изра́илевы въ посре́дъ мо́ря по су́ху, и вода́ и́мъ бы́сть стѣна́ одесну́ю и стѣна́ ошу́юю. Погна́ша же еги́птяне, и внидо́ша созади́ и́хъ вся́къ ко́нь фарао́новъ, и колесни́цы, и вса́дницы посредѣ́ мо́ря. Бы́сть же въ стра́жу у́треннюю, и воззрѣ́ Госпо́дь на по́лкъ еги́петскій, въ столпѣ́ о́гненномъ и о́блачномъ, и смяте́ по́лкъ еги́петскій. И связа́ о́си колесни́цъ и́хъ, и ведя́шіе и́хъ съ ну́ждею, и реко́ша еги́птяне: бѣжи́мъ отъ лица́ Изра́илева, Госпо́дь бо побора́етъ по ни́хъ на еги́птяны. Рече́ же Госпо́дь къ Моисе́ю: простри́ ру́ку твою́ на мо́ре, и да возврати́тся вода́, и да покры́етъ еги́птяны, колесни́цы же и вса́дники. Простре́ же Моисе́й ру́ку на мо́ре, и устро́ися вода́ ко дню́ на мѣ́сто, еги́птяне же бѣжа́ша подъ водо́ю, и истрясе́ Госпо́дь еги́птяны посредѣ́ мо́ря. И, обрати́вшися, вода́ покры́ колесни́цы, и вса́дники, и триста́ты, и всю́ си́лу фарао́нову, вше́дшихъ въ слѣ́дъ и́хъ въ мо́ре, и не оста́ отъ ни́хъ ни еди́нъ. Сы́нове же Изра́илевы проидо́ша по су́ху посредѣ́ мо́ря, вода́ же и́мъ — стѣна́ одесну́ю и стѣна́ ошу́юю. И изба́ви Госпо́дь Изра́иля въ де́нь о́нъ изъ руки́ еги́птянъ, и ви́дѣ Изра́иль еги́птяны уме́рша при кра́и мо́ря. Ви́дѣ же Изра́иль ру́ку вели́кую, я́же сотвори́ Госпо́дь еги́птяномъ, и убоя́шася вси́ лю́діе Го́спода, и вѣ́роваша Бо́гу и Моисе́ю, уго́днику Его́.

Леви́тскихъ кни́гъ чте́ніе. [Глава́ 26.]

Глаго́ла Госпо́дь сыно́мъ Изра́илевымъ, глаго́ля: а́ще въ повелѣ́ніяхъ Мои́хъ хо́дите, и за́повѣди Моя́ сохраните́, и сотворите́ я́. И да́мъ ва́мъ до́ждь во вре́мя его́, и земля́ да́стъ рожде́нія своя́, и древа́ по́льная отдадя́тъ пло́дъ сво́й. И пости́гнетъ ва́съ млаче́ніе, обра́ніе вина́, и вина́ обра́ніе пости́гнетъ сѣ́ятву, и снѣ́сте хлѣ́бъ ва́шъ въ сы́тость, и вселите́ся съ тве́рдостію на земли́ ва́шей. И да́мъ ми́ръ въ земли́ ва́шей, и у́спнете, и не бу́детъ ва́съ устраша́яй. И погублю́ звѣ́ри лю́ты отъ земли́ ва́шея, и бра́нь не про́йдетъ сквозѣ́ зе́млю ва́шу. И пожене́те враги́ ва́ша, и паду́тъ предъ ва́ми убіе́ни. И пожене́те пя́ть изъ ва́съ сто́, и сто́ ва́съ пожене́те тмы́: и паду́тъ врази́ ва́ши предъ ва́ми мече́мъ. И при́зрю на вы́, и возблагословлю́ вы, и возвращу́ вы, и умно́жу вы́, и положу́ завѣ́тъ Мо́й съ ва́ми. И снѣ́сте ве́тхая, и ве́тхая ве́тхихъ, и ве́тхая отъ лица́ но́выхъ изнесе́те. И положу́ завѣ́тъ Мо́й въ ва́съ, и не возгнуша́ется душа́ Моя́ ва́ми. И похожду́ въ ва́съ, и бу́ду ва́мъ Бо́гъ, и вы́ бу́дете Мнѣ́ лю́діе. Аще же не послу́шаете Мене́, ниже́ сотворите́ повелѣ́ній Мои́хъ си́хъ, но ни покорите́ся и́мъ, и суде́бъ Мои́хъ вознегоду́етъ душа́ ва́ша, я́коже ва́мъ не твори́ти всѣ́хъ за́повѣдей Мои́хъ, и я́ко разори́ти завѣ́тъ Мо́й. И Азъ сотворю́ си́це ва́мъ: наведу́ на вы́ ску́дость, и сѣ́ете вотще́ сѣ́мена ва́ша, и изъядя́тъ труды́ ва́ша проти́вніи ва́ши, и поста́влю лице́ Мое́ на вы́, и паде́те предъ враги́ ва́шими: и пожену́тъ вы́ ненави́дящіи ва́съ, и побѣ́гнете никому́же, гоня́щу ва́съ. И сокрушу́ досажде́ніе горды́ни ва́шея, и положу́ не́бо ва́мъ, я́ко желѣ́зно, и зе́млю ва́шу, я́ко мѣ́дяну. И бу́детъ вотще́ крѣ́пость ва́ша, и земля́ ва́ша не да́стъ сѣ́мене своего́, и древа́ се́льная не дадя́тъ плода́ своего́. И послю́ на вы́ звѣ́ри ди́вія земны́я, и поядя́тъ ва́съ и потребя́тъ скоты́ ва́ша, и ума́лены сотворю́ вы́, и погуби́тъ вы́ находя́й ме́чь. И бу́детъ земля́ ва́ша пуста́, и двори́ ва́ши бу́дутъ пу́сты, я́ко вы́ ходи́сте ко Мнѣ́ страно́ю, и Азъ пойду́ къ ва́мъ въ я́рости страно́ю — глаго́летъ Госпо́дь Бо́гъ, Святы́й Изра́илевъ.

Проро́чества Софо́ніева чте́ніе. [Глава́ 3.]

Та́ко глаго́летъ Госпо́дь: ра́дуйся зѣло́, дщи́ Сіо́нова, проповѣ́дуй, дщи́ Іерусали́мова, весели́ся и красу́йся отъ всего́ се́рдца твоего́, дщи́ Іерусали́мова. Отъя́тъ Госпо́дь непра́вды твоя́, изба́вилъ тя́ е́сть изъ руки́ вра́гъ твои́хъ, воцари́тся Госпо́дь посредѣ́ тебе́, и не у́зриши зла́ ктому́. Во вре́мя о́но рече́тъ Госпо́дь Іерусали́му: дерза́й, Сіо́не, да не ослабѣ́ютъ ру́цѣ твои́. Госпо́дь Бо́гъ тво́й въ тебѣ́ си́ленъ спасти́ тя, наведе́тъ на тя́ весе́ліе, и обнови́тъ тя́ въ возлюбле́ніи Свое́мъ, и возвесели́тся о тебѣ́ въ красотѣ́, я́ко въ де́нь пра́здника. И собере́тъ сокруше́нныя. Го́ре, кто́ прія́тъ на́нь поноше́ніе? Се́ Азъ творю́ въ тебѣ́ Мене́ ра́ди, глаго́летъ Госпо́дь, во вре́мя о́но спасу́ сотре́ную, и отринове́ную воспріиму́, и положу́ и́хъ въ похвалу́ и имени́ты по все́й земли́.

На литíи стихи́ры, гла́съ 1:

Пріиди́те, окре́стніи наро́ди, и ви́дите дѣла́ Бо́жія, я́же сотвори́ во дне́хъ и во страна́хъ на́шихъ: его́же врага́ убоя́стеся и ублажи́сте, облія́ студо́мъ; на него́же крѣ́пко упова́сте, я́ко стѣна́ преклоне́на и опло́тъ возринове́нъ разори́ся, и, его́же непобѣди́ма бы́ти глаго́ласте, паде́, я́ко еди́нъ отъ человѣ́къ. Мы́ же, си́лою Вы́шняго непобѣди́ми стоя́ще, че́стни и сла́вни, ку́пно же и благода́рни, воспѣва́емъ Бо́гу пѣ́снь побѣ́дную.

Гла́съ 4:

Непочита́тель Креста́ свята́го, лжехристіа́нинъ и боже́ственныхъ ико́нъ посмѣя́тель си́лою Креста́ свята́го побѣжде́нъ е́сть и пору́ганъ и, не надѣ́яся на по́мощь Всеси́льнаго, Его́же че́сть во ико́нахъ повреди́, къ ненави́стникомъ и́мене Христо́ва побѣже́, крестоно́сный же Ца́рь правосла́вніи Россíйскій, святы́хъ ико́нъ побо́рникъ, побѣди́тельную пѣ́снь Бо́гу воспѣва́яй, да ца́рствуетъ во вѣ́ки въ ми́рѣ.

Возвесели́шася небеса́ и вси́, живу́щіи на ни́хъ, па́дшу змíю и а́ггеломъ его́ во бра́ни съ Михаи́ломъ; возвесели́ся и ты́, земле́, я́ко паде́ ле́въ свѣ́йскій, борю́щійся съ на́ми. Ны́нѣ спасе́ніе и си́ла и о́бласть Христа́ Госпо́дня: низложе́нъ бо е́сть клеветни́къ бра́тіи на́шея и уничиже́нъ уничижа́яй на́съ.

Свя́занъ верхо́внѣйшаго моли́твою, святота́ть лета́ющій лю́тѣ паде́ отъ возду́ха, и сокруши́ го́лени, и, и́же крилѣ́ воспрія́тъ, внеза́пу но́гъ лиши́ся. Того́же верхо́внѣйшаго моли́твами и его́ тезоимени́таго труда́ми свѣ́йскій Си́монъ, мня́йся отъ горды́ни не по земли́ ходи́ти, устрѣле́нъ, охромѣ́ на постыдѣ́ніе своея́ го́рдости. Мы́ же, сіе́ дѣ́ло Бо́жіе ви́дѣти сподо́бльшіися, согла́сно возопіе́мъ: Бо́же, го́рдаго смири́вый, а смире́ннаго возвы́сивый, сла́ва смотре́нію Твоему́.

Гла́съ 7:

Не ста́ нога́ на правотѣ́ супоста́та на́шего, тѣ́мже и уязвле́на пра́вды стрѣля́ніемъ; на́шего же Царя́, я́коже Дави́да, нога́ ста́ на ка́мени правосла́внаго исповѣ́данія и и́стины. Тѣ́мже невреди́ма пребы́сть вра́жіими стрѣла́ми, ю́же я́ко ны́нѣ неподви́жиму показа́лъ еси́, Го́споди, утверди́ и сохрани́ во вѣ́къ вѣ́ка непреткнове́нну.

Сла́ва, и ны́нѣ, гла́съ 6:

Ра́дуйся, Бо́гомъ въ бра́ни просла́вленная Россíе, Бо́гомъ вѣнча́нная Правосла́вія сла́во, ра́дуйтеся, военача́льницы и великоду́шніи во́ини Іису́съ Христо́вы и вси́ благочести́выхъ соста́вы: порази́ Бо́гъ враго́въ и супоста́тъ твои́хъ и возвели́чи Свое́ Ца́рство, въ тишину́ и весе́ліе христіа́нскому ро́ду и спасе́ніе всѣ́мъ.

На стихо́внѣ стихи́ры, гла́съ 5:

Пріиди́те, вѣ́рніи,* возра́дуемся Го́сподеви со стра́хомъ и ра́достію,* побѣди́тельныя вѣ́тви, я́же дарова́ на́мъ,* подъ но́гу Его́ подстила́юще,* со стра́хомъ Бо́жія ра́ди вели́чества,* и лю́таго, а́ще и не ско́раго, на нечести́выхъ отмще́нія,* съ ра́достію же, неизглаго́ланнаго милосе́рдія ра́ди,* и́мже презрѣ́въ беззако́нія на́ша,* толи́кая недосто́йнымъ дарова́ на́мъ.

Сти́хъ: Услы́шите сія́, вси́ язы́цы,* внуши́те, вси́, живу́щіи по вселе́ннѣй.

Иже дре́вле посла́ а́нгела Своего́* и поби́ полки́ ассирíйскія,* Се́й и ны́нѣ Госпо́дь си́лъ не стерпѣ́ наруга́нія свѣ́йскаго* на Россíйскую держа́ву,* посла́ а́нгела Своего́, и́же ополчи́ся о́крестъ боя́щихся Его́,* и разгна́ вся́ полки́ проти́вныхъ,* россíйскому же ро́ду* спасе́ніе и безсме́ртную сла́ву содѣ́ла.

Сти́хъ: Го́споди, Госпо́дь на́шъ,* я́ко чу́дно и́мя Твое́ по все́й земли́.

Якоже лю́діе изра́ильтестіи* уви́дѣвше вели́кую ру́ку Госпо́дню на еги́птяновъ,* та́ко и мы́ ны́нѣ, уви́дѣвше,* коли́ка содѣ́ла свѣ́емъ, враго́мъ на́шимъ,* трепе́щемъ, и вѣ́руемъ Тебѣ́, Го́споди, и уго́дникомъ Твои́мъ,* и, съ тре́петомъ припа́дающе, вопіе́мъ:* стра́шенъ и ди́венъ еси́, Го́споди,* не то́кмо наказу́ющій, но и ми́лующій человѣ́ковъ.

Сла́ва, и ны́нѣ, гла́съ 8:

Ви́дѣсте и вы́, свѣ́йстіи военача́льницы и си́лы, Ца́рствующій гра́дъ Россíйскій, но не я́коже хотѣ́сте, но я́ко Бо́гъ изво́ли: ви́дѣсте, преклоне́ни до́лу, я́ко побѣжде́ни ведо́ми, я́коже подоба́етъ плѣ́нникомъ. Ра́дуйтеся оба́че въ себѣ́, обрѣ́тше благочести́ваго Мона́рха ми́лостиваго побѣди́теля, о не́мже ро́ди правосла́вныхъ благоговѣ́йно вопію́тъ: Го́споди Савао́ѳе, поми́луй поми́ловавшаго и враго́въ свои́хъ и утверди́ его́ держа́ву во вѣ́къ вѣ́ка ненавѣ́тну.


НА УТРЕНИ,
На Бо́гъ Госпо́дь: Тропа́рь три́жды: Препросла́вленъ еси́, Го́споди...

По 1-мъ стихосло́віи сѣда́ленъ, гла́съ 7:

Пра́здновати уста́вихомъ наро́читый де́нь се́й Тебѣ́, Ми́лостиве Го́споди, въ о́ньже возвесели́лъ еси́ на́съ о вразѣ́хъ на́шихъ, я́ко да позна́етъ ро́дъ и́нъ, сы́нове родя́щіися, и воста́нутъ, и повѣ́дятъ я́ сыново́мъ свои́мъ: я́ко да положа́тъ на Бо́га упова́ніе, и не забу́дутъ дѣ́лъ Бо́жіихъ, и за́повѣди Его́ взы́щутъ, и съ на́ми просла́вятъ отъ ро́да въ ро́дъ Тя́, зѣло́ просла́вльшагося въ на́съ.

Сла́ва, и ны́нѣ, гла́съ то́йже:

О, кра́йняго неи́стовства и зло́бы! Обрѣ́теся ны́нѣ послѣ́дующій злѣ́ предыду́щему Іу́дѣ, обрѣ́теся вторы́й Іу́да, ра́бъ и льсте́цъ, обрѣ́теся сы́нъ поги́бельный, діа́волъ нра́вомъ, а не человѣ́къ, трекля́тый отсту́пникъ Мазе́па, и́же оста́вивъ Христа́ Госпо́дня, Го́спода и Благодѣ́теля своего́, и прилѣпи́ся къ супоста́ту, совѣща́я возда́ти зла́я за блага́я, за благодѣя́ніе — злодѣ́йство, за ми́лость — не́нависть, Бо́гъ же воздаде́ второ́му, я́коже и пе́рвому Іу́дѣ, по дѣло́мъ и́хъ.

По 2-мъ стихосло́віи сѣда́ленъ, гла́съ 8:

Ра́вно дре́внему столпотворе́нію, высокоу́мно враго́въ на́шихъ зда́ніе подо́бное прія́тъ разоре́ніе: сни́де Бо́гъ ви́дѣти дѣ́ло и́хъ и смѣси́ язы́ки и́мъ, я́ко не слы́шати дру́гъ дру́га своего́, ни во́инству нача́льниковъ гла́су внима́ти, и разсы́па и́хъ по лицу́ земли́ живы́хъ, ме́ртвыхъ же прія́ша преиспо́дняя земли́, и дѣ́ло и́хъ въ пра́хъ разсы́пася. Мы́ же въ зда́ніяхъ хра́мовъ Бо́жіихъ, о ни́хже бра́нь твори́мъ, воспое́мъ велегла́сно: сла́ва снизхожде́нію и смотре́нію Твоему́, еди́не Человѣколю́бче.

Сла́ва, и ны́нѣ, гла́съ то́йже:

Не уподо́бился еси́ человѣ́ку купцу́, и́щущему до́брыя би́серы, неблагода́рный и лука́вый ра́бе, но неи́стовому Іу́дѣ, и́щущему па́губы и взыска́вшему, и́же предаде́ многоцѣ́нный би́серъ, и благи́ми всѣ́ми, и́хже лиши́ся, купи́ неизглаго́ланная зла́я. Сему́ уподо́бился еси́, юро́де, сему́ подража́лъ еси́, неблагода́рне, сему́ послѣ́довалъ еси́, ле́стче Мазе́по, тѣ́мже и благи́хъ лише́нъ, ра́вныя зла́я стяжа́лъ еси́ и къ нему́ преше́лъ еси́ на мѣ́сто свое́.

По поліеле́и припѣ́въ:

Велича́емъ Тя́, Тріѵпоста́сный Бо́же, вознесе́нную го́рдость смири́вшаго и на Тя́ упова́ющимъ побѣ́ду дарова́вшаго.

Псало́мъ избра́нный: Суди́, Го́споди, оби́дящія мя́... [Зри́ на Воздви́женіе Честна́го Креста́.]

Сѣда́ленъ, гла́съ 4:

Не вопроша́й про́чее, Дави́де, гдѣ́ су́ть ми́лости Госпо́дни дре́внія, и́миже кля́лся е́сть отце́мъ на́шимъ? Обрѣто́хомъ бо я́ въ но́вой благода́ти. Обрѣто́хомъ и во дне́хъ на́шихъ та́яжде ми́лости Господни́ дре́внія на поля́хъ Полта́вскихъ, егда́ сни́де къ на́мъ Госпо́дь си́лъ на по́мощь, и ополчи́ся на враго́въ на́шихъ си́льныхъ, и смути́ и́хъ, творя́ ми́лость христу́ Своему́ Петру́ и Свое́ Кресто́мъ сохраня́я вруче́нное тому́ жи́тельство.

Сла́ва, и ны́нѣ, то́йже.

Степе́нна, 1-й антифо́нъ 4-го гла́са. Проки́менъ, гла́съ 4: Бу́ди, Го́споди, ми́лость Твоя́ на на́съ,* я́коже упова́хомъ на Тя́. Или́: Госпо́дь си́лъ съ на́ми,* засту́пникъ на́шъ, Бо́гъ Іа́ковль. Сти́хъ: Госпо́дь разоря́яй совѣ́ты язы́ковъ и отмета́яй мы́сли люде́й. Или́: Бо́гъ на́мъ прибѣ́жище и си́ла, Помо́щникъ въ ско́рбехъ, обрѣ́тшихъ ны́ зѣ́ло. Вся́кое дыха́ніе... Ева́нгеліе Матѳе́я, зача́ло 27.

По 50-мъ псалмѣ́ стихи́ра, гласъ 6:

Восхва́лимъ дне́сь согла́сныя Свята́го Ду́ха орга́ны, Бо́гомъ собра́нный ли́къ апо́стольскій, не подража́вшій Іу́дѣ преда́телю, но вѣ́рою и любо́вію да́же до сме́рти послужи́вшій своему́ Учи́телю. О, блаже́нніи о́вцы, слу́шающіи па́стыря, блазíи раби́ и вѣ́рніи, повину́ющіися Го́споду своему́, досто́йно внидо́сте въ ра́дость Го́спода своего́, досто́йно ся́дете на двуна́десятихъ престо́лѣхъ, судя́ще двана́десяте колѣ́нома Изра́илевома! Блаже́ни и ва́мъ подража́ющіи вѣ́рою и любо́вію къ свои́мъ наста́вникомъ, ча́да отце́мъ, раби́ влады́камъ послушли́віи! Да восхва́лятся ны́нѣ съ ва́ми земнíи а́нгели, не прилѣпи́вшіися діа́волу крамо́льнику, да почту́тся, я́коже апо́столи, не согласи́вшіися со вторы́мъ Іу́дою Мазе́пою, но ду́ши преда́вшіи за своего́ влады́ку. Возвесели́теся ны́нѣ, пла́чущимъ отсту́пникомъ, взыгра́йте, стеня́щимъ и рыда́ющимъ супоста́томъ: досто́йни за вѣ́рность и послуша́ніе прія́тія че́сти и вѣнце́въ небе́сныхъ.

Кано́нъ благода́рственный Бо́гу, въ Тро́ицѣ сла́вимому, да́вшему сію́ пресла́вную побѣ́ду. Гла́съ 1.
Пѣ́снь 1.

Ирмо́съ: Твоя́ побѣди́тельная десни́ца боголѣ́пно въ крѣ́пости просла́вися: та́ бо, Безсме́ртне, я́ко всемогу́щая проти́вныя сотре́, изра́ильтяномъ пу́ть глубины́ новосодѣ́лавшая.

Трисвѣ́тлое Еди́но Божество́, испо́лни уста́ на́ша Всесвята́го Твоего́ Ду́ха, да о си́хъ возмо́жемъ Тебѣ́ воспѣ́ти пѣ́снь благода́рственную, я́же на́мъ, Свѣтодѣ́телю, ми́лостивно содѣ́лалъ еси́.

Боже́ственныхъ чино́въ ли́ки да ста́нутъ ны́нѣ съ на́ми и воспою́тъ побѣди́тельную пѣ́снь Бо́гу, ди́вному и пресла́вному въ дѣ́лѣхъ, Иже чуде́сно смири́ враго́въ на́шихъ вознесе́нную горды́ню.

Къ похвале́нію Тріѵпоста́снаго Божества́ стецы́теся, земноро́дніи, и а́ще не по достоя́нію, то по усе́рдію воспо́йте нераздѣли́мую Тро́ицу, толи́кая блага́я [на́мъ], недосто́йнымъ, содѣ́лавшую.

Богоро́диченъ: Вмѣсти́вшая во утро́бѣ Дѣви́ческой невмѣсти́мое Сло́во, Богороди́тельнице, да́ждь на́мъ сло́во хвале́нія, да съ небе́сными си́лами воспое́мъ Тя́, предста́тельство стра́шное и непобѣди́мое на враги́ во бра́ни.

Инъ.

Ирмо́съ, гла́съ то́йже: Пѣ́снь побѣ́дную пои́мъ вси́ Бо́гу, сотво́ршему ди́вная чудеса́ мы́шцею высо́кою и спа́сшему Изра́иля, я́ко просла́вися.

Терпя́ потерпѣ́хъ Го́спода, рцы́, Россíе, и вня́тъ ми́, и услы́ша моли́тву мою́, и испра́ви стопы́ моя́, и вложи́ во уста́ моя́ пѣ́снь но́ву, Бо́гу благода́рственную, и у́зрятъ мно́зи, и убоя́тся, и упова́ютъ на Го́спода.

Боговѣща́нный Дави́де, ны́нѣ съ доброгла́сными гу́сльми ста́ни, и созови́ всѣ́хъ къ торже́ственному правосла́вныхъ пѣ́нію, и воспо́й съ на́ми Бо́гу пѣ́снь побѣди́тельную.

Словесе́мъ Твои́мъ, Го́споди, утверди́шася небеса́ и повѣ́даютъ сла́ву Твою́; тѣ́мже словесе́мъ утверди́ уста́ на́ша, да и ты́я возвѣстя́тъ сла́ву Твою́, ю́же на́мъ дарова́лъ еси́, Отче, и Сы́не, и Всесвяты́й Ду́ше.

Богоро́диченъ: Пріими́ благода́рственную пѣ́снь, Хода́таице благода́ти на Тя́ надѣ́ющимся, и ми́ръ испроси́ Це́рквамъ, и Царя́ на́шего всегда́ неодолѣ́нна сохраня́ющи, Ему́же побѣ́ду на враги́ дарова́ла еси́.

Пѣ́снь 3.

Ирмо́съ: Утверди́, Го́споди, Це́рковь Твою́, ю́же стяжа́лъ еси́ си́лою Креста́ Твоего́, и́мже врага́ побѣди́лъ еси́ и просвѣти́лъ еси́ вселе́нную.

Же́злъ си́лы посла́лъ еси́ на́мъ, Го́споди, Кре́стъ Тво́й честны́й, и си́мъ ору́жіе вра́жіе притупи́лъ еси́; сему́ жезлу́ си́лы Твоея́ покланя́емся и, покланя́ющеся, Тебе́ Сама́го почита́емъ.

Моисе́й, крестообра́зно распросте́ръ дла́ни, побѣжда́ше Амали́ка; мы́ же, Кре́стъ Христо́въ почита́юще, побѣди́хомъ сопроти́внаго си́лою на Не́мъ Распя́таго, Ему́же побѣди́тельная воспѣва́емъ.

Свѣтосія́ненъ Креста́ о́бразъ на небеси́ ви́дѣвъ, Ца́рь Константи́нъ Максе́нтія побѣди́; си́мъ же зна́меніемъ и Ца́рь на́шъ, свѣ́йскаго Максе́нтія низложи́въ си́лу, Бо́гу побѣди́телю благодаре́ніе возсыла́етъ.

Богоро́диченъ: Іуди́ѳе но́ваго Изра́иля, Богороди́тельнице Марíе, Ты́ еси́ похвала́, и весе́ліе, и че́сть на́ша, Ты́ бо укрѣпи́ла еси́ се́рдце на́ше на разоре́ніе но́ваго Олофе́рна.

Инъ.

Ирмо́съ, гла́съ 4: Лу́къ си́льныхъ изнемо́же, и немощству́ющіи препоя́сашася си́лою, сего́ ра́ди утверди́ся въ Го́сподѣ се́рдце мое́.

Вои́стинну Кре́стъ Тво́й, Го́споди, ору́жіе непобѣди́мое е́сть: си́мъ бо вра́гъ на́шъ и посмѣя́тель си́лы Креста́ низложи́ся, мы́ же побѣди́тели яви́хомся.

Вознесе́нъ змíй исцѣли́ отъ зміе́въ угрызе́нныя; вознесе́нъ Христо́съ на Кре́стъ уврачева́ отъ змíя и отъ льва́ свѣ́йскаго угрызе́нныя, Тому́ сла́ва и благодаре́ніе со Отце́мъ и Святы́мъ Ду́хомъ.

Покланя́емся подно́жію Твоему́, Го́споди, я́ко свя́то е́сть, си́мъ бо враго́въ на́шихъ подно́жіе но́гъ на́шихъ положи́лъ еси́, возне́слъ же еси́ главу́ на́шу, ю́же Тебѣ́ приклоня́емъ, да бу́детъ всегда́ подно́жіе но́гъ Твои́хъ.

Богоро́диченъ: Не упова́ша, Влады́чице, на Тя́ беззако́ннующіи, но упова́ша на язы́къ велерѣ́чивъ, на язы́къ человѣ́чь, тѣ́мже, Влады́чице, че́люсти и́хъ сокруши́ла еси́, упова́ющимъ на Тя́ посо́бствующи.

Сѣда́ленъ, гла́съ 5:

Трисо́лнечный свѣ́тъ славосло́вимъ и про́стѣй Тро́ицѣ ны́нѣ поклони́мся, я́ко просвѣти́ на́съ и поми́лова и воздаде́ сосѣ́домъ на́шимъ седмери́цею въ нѣ́дро и́хъ поноше́ніе и́хъ, и́мже поноси́ша на́мъ, сохраня́ющи о́вцы па́жити Своея́ отъ похище́нія ненасы́тнаго звѣ́ря.

Сла́ва, и ны́нѣ, богоро́диченъ:

Ра́дуйся, стѣно́ тве́рдая почита́ющимъ Тя́; ра́дуйся, паде́ніе не покланя́ющимся Тебѣ́; ра́дуйся, возведе́ніе правосла́вныхъ люде́й, Богоро́дице, вои́стинну упова́ющихъ на Тя́, моли́твами Твои́ми избавля́ющи на́съ отъ бѣ́дъ вся́ческихъ и отъ прего́рдыхъ вра́гъ.

Пѣ́снь 4.

Ирмо́съ, гла́съ 6: Удиви́ся Тво́й ра́зумъ отъ мене́, услы́шавшу пресла́вная велѣ́нія смотре́нія Твоего́, укрѣпи́ся же возлюбле́ніемъ Твоего́ схожде́нія: Ты́ бо моея́ нищеты́ не отве́рглся еси́.

Да не бу́детъ на́мъ де́вять прокаже́нныхъ муже́й подража́ти неблагода́рствію, но, пресла́вно побѣди́вше Го́сподемъ на́шимъ Іису́съ Христо́мъ, съ самаряни́номъ на ногу́ Его́ ни́цъ па́даемъ, хвалу́ Ему́ воздаю́ще.

Небеса́ повѣ́даютъ сла́ву Бо́жію, мы́ же до́лжни Пресвято́е и́мя Его́ превы́ше небе́съ превозноси́ти, я́ко сни́де съ небе́съ спасти́ во бра́ни пома́занныя Своя́.

Четы́рехъ живо́тныхъ, о́крестъ престо́ла Бо́жія стоя́щихъ, возгласи́мъ пѣ́снь сію́: Свя́тъ, Свя́тъ, Свя́тъ Госпо́дь Бо́гъ Вседержи́тель, враго́въ на́шихъ побѣди́вый.

Богоро́диченъ: Руно́, ороше́нное благода́тію Бо́жіею, Марíя, одолѣ́ніе надъ свѣ́ями содѣ́ла, я́коже пре́жде Гедео́ну на Мадіа́ма. То́й у́бо, по Бо́зѣ побѣди́тельная воспѣва́юще, глаго́лемъ: ра́дуйся, заступле́ніе правосла́внымъ христіа́номъ, еретико́мъ же низложе́ніе.

Инъ.

Ирмо́съ, гла́съ 2: Храни́тель тве́рдый и незы́блемое утвержде́ніе Ты́ еси́, Христе́, надѣ́ющіяся на Тя́ неукло́нны утвержда́я на́съ извести́, въ тве́рдомъ Твое́мъ основа́ніи наде́жды и вѣ́ры.

Два́десять и четы́ремъ старѣ́йшинамъ подража́ющее паде́мъ предъ Сѣдя́щимъ на престо́лѣ и поклони́мся Живу́щему во вѣ́ки вѣко́въ: си́мъ бо престо́лъ Россíйскій не подви́жеся вра́жіими навѣ́ты.

Кто́ побѣди́ льва́ свѣ́йскаго, изше́дшаго отъ ны́рища своего́, и́щуща кого́ поглоти́ти? Се́ побѣди́лъ е́сть Ле́въ, и́же сы́й отъ колѣ́на Дави́дова, Его́же прославля́емъ непостижи́мую си́лу.

Аще и Агнецъ еси́ непоро́ченъ и смире́нъ се́рдцемъ, Христе́, но Твое́ю кро́тостію ле́въ лю́тый упраздни́ся, Тебѣ́ у́бо со ста́рцы припа́даемъ и глаго́лемъ, спасе́ніе сѣдя́щаго на престо́лѣ Бо́га на́шего и Агнца.

Богоро́диченъ: Киво́тъ дре́вній, износи́мь въ полки́, побѣжда́ше иноплеме́нниковъ, позлаще́нный Ду́хомъ киво́тъ — Марíя, побѣди́ враго́въ на́шихъ, на́съ же защити́ отъ смертоно́сныя я́звы, Юже я́ко Ма́терь Бо́жію почита́емъ.

Пѣ́снь 5.

Ирмо́съ, гла́съ 7: Роса́, я́же отъ Тебе́, Христе́ Бо́же, исцѣле́ніе вѣ́рнымъ на́мъ яви́ся: земли́ же нече́ствующихъ злочести́во паде́ніе обѣща́ется, тѣ́мже отъ но́щи у́тренююще, пѣ́снь Ти́ прино́симъ.

Вѣ́домъ Бо́гъ во всѣ́хъ дѣ́лѣхъ Свои́хъ, наипа́че же въ тя́жестехъ, егда́ заступа́етъ, зна́емь е́сть; Его́же и мы́ въ тя́жестехъ позна́вше заступле́ніе, егда́ разгна́ враги́ на́ша, благода́рственную пѣ́снь Ему́ прино́симъ.

Отверзо́ша на ны́ уста́ своя́, я́ко ле́въ восхища́яй и рыка́яй; Ты́ же, Го́споди, не удали́лъ еси́ по́мощи Твоея́ отъ на́съ, сокруши́въ члено́вныя льво́мъ.

Повѣ́мы и́мя Твое́ бра́тіи на́шей и посредѣ́ Це́ркве воспое́мъ Тя́, я́ко спа́слъ еси́ на́съ отъ у́стъ льво́выхъ, вознося́, я́ко единоро́га, ро́гъ правосла́вныхъ.

Богоро́диченъ: Въ бѣда́хъ су́щимъ бли́зъ Ты́ еси́, Дѣ́во Чи́стая, тѣ́мже, къ Тебѣ́ прибѣга́юще, премѣне́ніе во всѣ́хъ ско́рбехъ обрѣта́емъ, Влады́чице, Тобо́ю и ны́нѣ спасо́хомся отъ стрѣля́нія вра́жія.

Инъ.

Ирмо́съ, гла́съ 6: Неизрече́нныя Твоея́ си́лы и содержи́тельныя всѣ́хъ прему́дрости Твоея́ устраша́юся, помышля́яй, и вопію́ Ти, Бла́же: на враги́ да вознесе́тся, Христе́, ро́гъ мо́й.

Въ нощи́ кова́рствъ объя́ша на́съ, я́ко ле́въ, гото́въ на ло́въ, но предвари́лъ Госпо́дь и запя́лъ и́мъ: посла́ съ небе́съ Сампсо́на Своего́ и растерза́ че́люсти льво́мъ.

Боя́щіися Го́спода, восхвали́те Его́, я́ко не уничижи́, ниже́ негодова́ моли́твы смире́нныхъ, ниже́ отврати́ лице́ Свое́ отъ на́съ, и, егда́ воззва́хомъ къ Нему́, услы́ша на́съ.

Сла́ва Тебе́, Иже во святы́хъ живе́ши, хвало́ Изра́илева, на Тя́ упова́ша отцы́ на́ши, и изба́вилъ еси́ я́; и мы́ воззва́хомъ и спасо́хомся, упова́хомъ и не постыдѣ́хомся.

Богоро́диченъ: Купино́ю горя́щею и несгара́емою прообразова́нная, Ты́ на́съ посредѣ́ огня́ ра́тнаго неопа́льныхъ сохрани́ла еси́, пречу́дная Ма́ти и Дѣ́во Богороди́тельнице, того́ ра́ди отъ ро́да въ ро́дъ воспѣва́ти Тя́ не преста́немъ.

Пѣ́снь 6.

Ирмо́съ, гла́съ 5: Обы́де мя́ бе́здна, гро́бъ мнѣ́ ки́тъ бы́сть, а́зъ же возопи́хъ къ Тебѣ́, Человѣколю́бцу, и спасе́ мя десни́ца Твоя́, Го́споди.

Испыту́ете, язы́цы, отку́ду на́мъ си́ла на си́льнаго? Не слы́шите ли напе́рсника Госпо́дня, глаго́люща: сія́ е́сть побѣ́да, побѣ́ждшая мíръ — вѣ́ра на́ша.

Иже рече́: а́ще и́мате вѣ́ру, я́ко зе́рно гору́шно, рече́те горѣ́ се́й: прейди́! и пре́йдетъ, и ничто́же невозмо́жно бу́детъ ва́мъ, Се́й ны́нѣ подаде́ си́лу во бра́ни вѣ́рующимъ во и́мя Его́.

Иже Петру́ на мо́ри подаде́ ру́ку, Се́й и ны́нѣ во вре́мя ра́тнаго волне́нія, Госуда́ря на́шего Петра́ я́тъ за ру́ку, и изведе́ Его́ отъ печа́лей мно́гихъ.

Богоро́диченъ: Девво́ра проро́чица, судя́щая дре́вле Изра́илеви, изы́де на бра́нь и побѣди́ Ханаа́на, Сиса́ра же въ бѣ́гство сотвори́. Сни́де и съ на́ми на бра́нь Девво́ра но́ваго Изра́иля — Марíя и та́яжде сотвори́, да бу́детъ прославля́ема отъ всѣ́хъ родо́въ.

Инъ.

Ирмо́съ, гла́съ 2: Возопи́хъ въ ско́рби мое́й ко Го́споду Бо́гу моему́, и посла́ Спа́са мíра, и изба́ви отъ тли́ живо́тъ мо́й.

Возопи́ Россíя въ печа́ли свое́й ко Го́споду, глаго́лющи: кто́ возмо́жетъ крѣ́пкаго сего́ врага́ побѣди́ти? Бо́гъ же отвѣща́ и сло́во дѣ́ломъ утверди́, я́ко вся́ возмо́жна су́ть вѣ́рующему.

Вѣ́рою дре́вній загради́ша уста́ льво́мъ, избы́ша о́стрея меча́, бы́ша крѣ́пцы во бране́хъ, обрати́ша въ бѣ́гство полки́ чужди́хъ; то́южде вѣ́рою Госпо́днею и на́мъ ны́нѣ подо́бная сотвори́ти дарова́ Всеси́льный Госпо́дь, Тому́ сла́ва во вѣ́ки.

Благодари́мъ Тя́, Христе́ Бо́же на́шъ, я́ко на ка́мени основа́лъ еси́ Це́рковь Твою́, и не паде́ся вѣ́тромъ и волне́ніямъ наше́дшимъ, и врата́ а́дова ерети́ческія си́лы не одолѣ́ша е́й.

Богоро́диченъ: Благослове́нна Іаи́ль въ жена́хъ Изра́илевыхъ, я́ко разби́ главу́ Сиса́ра; благослове́нна еси́ отъ всѣ́хъ родо́въ, Марíе Богоро́дице, я́ко главы́ ху́льныя сиса́ровъ ны́нѣшнихъ пресѣ́кла еси́, сохраня́ющи ста́до Свое́ невреди́мо.

Конда́къ, гла́съ 2:

Въ вы́шнихъ живы́й и на смире́нныя призира́яй, Иже не да́лъ еси́ ве́прю отъ дубра́вы озоба́ти и уедине́нному ди́вому поя́сти виногра́да Твоего́, утверди́, Бо́же, е́же содѣ́лалъ еси́ въ на́съ, при́зри съ небесе́ и ви́ждь, и посѣти́ виногра́дъ се́й, и соверши́ его́, его́же насади́ десни́ца Твоя́.

Икосъ:

Ра́дуйся, Бо́гомъ насажде́нный но́вый виногра́де Госпо́день, Свята́я Це́ркви, его́же насади́ въ богопокори́вой земли́ Россíйской десни́ца Вы́шняго; ра́дуйся, я́ко простре́ ро́зги твоя́ до мо́ря и да́же до рѣ́къ о́трасли твоя́; ра́дуйся, я́ко тве́рдымъ опло́томъ огради́ тя и осѣне́ніемъ благода́ти сохрани́ невреди́ма отъ всѣ́хъ звѣре́й ди́віихъ, исходя́щихъ отъ ны́рищъ свои́хъ на пояде́ніе и попра́ніе твое́; ра́дуйся и ты́, вертогра́дарю правосла́вный, съ про́чими дѣ́лательми виногра́да Христо́ва, прогна́вшій и порази́вшій ны́нѣ по́мощію Вы́шняго льва́ свѣ́йскаго, устреми́вшагося на похище́ніе плодо́въ са́да твоего́; ра́дуйтеся, вси́ древеса́, благоче́стіемъ и сла́вою процвѣта́ющіи, и, благодаря́ще Бо́гу, рцы́те па́ки: утверди́, Бо́же, е́же содѣ́лалъ еси́ въ на́съ, при́зри съ небесе́, и ви́ждь, и посѣти́ виногра́дъ се́й, и соверши́ его́, его́же насади́ десни́ца Твоя́.

Пѣ́снь 7.

Ирмо́съ, гла́съ 4: Оте́цъ на́шихъ Бо́же, не посрами́ на́съ, но да́руй на́мъ со дерзнове́ніемъ вопи́ти Тебѣ́: благослове́нъ еси́, Бо́же оте́цъ на́шихъ.

Якоже дре́вле тріе́хъ отроко́въ, та́кожде и на́съ, посредѣ́ огня́ вра́жія стоя́щихъ, за благоче́стіе невре́дныхъ сохрани́лъ еси́, враго́въ же пояде́ пла́мень. Тѣ́мже со о́троки Тебѣ́ вопіе́мъ: благослове́нъ еси́, Бо́же оте́цъ на́шихъ.

Да о и́мени Іису́совѣ вся́ко колѣ́но поклони́тся, небе́сныхъ и земны́хъ, и преиспо́днихъ, и вся́къ язы́къ исповѣ́сть, я́ко Госпо́дь Іису́съ Христо́съ сотвори́ съ на́ми ми́лость, благослове́нъ Бо́гъ оте́цъ на́шихъ.

Во и́мя Іису́са Христа́ Пе́тръ хрома́го смире́ннаго воздви́же и утверди́; во и́мя Того́жде Іису́са Пе́тръ ны́нѣ го́рдо ходя́щаго охроми́ и крѣ́пкаго обезси́ли. Благослове́нно и́мя сла́вы Твоея́, Го́споди.

Богоро́диченъ: Прообразу́емо Рождество́ Твое́, Богоро́дице, о́троки въ пещи́ спасло́ е́сть; собы́вшее же ся ны́нѣ враго́въ на́шихъ ра́тный пла́мень угаси́. Тому́ покланя́ющеся и Тебѣ́, Нача́льницу на́шего спасе́нія, велича́юще, глаго́лемъ: благослове́нъ Бо́гъ оте́цъ на́шихъ.

Инъ.

Ирмо́съ, гла́съ 5: Прехва́льно е́сть и препросла́влено и́мя Твое́, Го́споди, Бо́же оте́цъ на́шихъ, во вся́ вѣ́ки, и препросла́вленъ, я́ко пра́веденъ еси́ о всѣ́хъ, я́же сотвори́лъ еси́ на́мъ.

Образа зла́та бо́жески не поче́тше, побѣди́ша горды́ню Навуходоно́сорову пресла́вніи о́троцы; мы́ же, боже́ственныя ико́ны благоче́стно почита́юще, подо́бное свѣ́йское высокоу́міе смири́хомъ: благослове́нъ Бо́гъ оте́цъ на́шихъ.

Паде́ Навуходоно́соръ, о́бразъ сво́й, а́ки Бо́жій, почита́ти повелѣва́ющій; падо́ша свѣ́и, о́бразы святы́хъ поруга́ющи. Мы́ же, обои́хъ нече́стію сопротивобо́рцы, си́лою Вы́шняго побѣди́хомъ: благослове́нъ Бо́гъ оте́цъ на́шихъ.

Ра́вно со́нному видѣ́нію Навуходоно́сорову помышля́ше коро́ль свѣ́йскій, и паде́ на него́ ка́мень, и зда́ніе умышле́нія его́ разсы́па, и все́ мечта́ніе исчезе́: благослове́нъ Бо́гъ оте́цъ на́шихъ, сотвори́вый та́ко.

Богоро́диченъ: Ты́ еси́ гора́, отъ нея́же отто́ржеся Ка́мень и разсы́па зда́ніе мечта́нія вра́жія, Преблагослове́нная Богоро́дице Марíе, Тебѣ́ у́бо по Бо́зѣ, я́ко паде́ся супоста́тъ на́шъ, благодаре́ніе возсыла́емъ, воспѣва́юще: благослове́нъ Бо́гъ оте́цъ на́шихъ.

Пѣ́снь 8.

Ирмо́съ, гла́съ 1: Прему́дростію и Сло́вомъ вся́ соста́вльшаго Бо́га, отъ язы́ковъ и ва́рваровъ изба́вльшаго на́съ, о́троцы, по́йте, свяще́нницы, просла́вите, лю́діе, превозноси́те во вся́ вѣ́ки.

Забы́ ле́въ естества́ своего́ уста́въ, е́же лови́ти во огра́дѣ свое́й, дерзне́ вни́ти въ предѣ́лы чужды́я. Тѣ́мже и уловле́нъ е́сть отъ Го́спода, о се́мъ Го́спода просла́вите во вся́ вѣ́ки.

Пе́тръ апо́столъ рече́: супоста́тъ на́шъ діа́волъ, я́ко ле́въ. Пе́тръ же россíйскій ви́дѣ супоста́та льва́, я́ко діа́вола, вни́де бо въ держа́вы Россíйскія, но ничто́же, кромѣ́ рыка́нія, сотвори́, низложе́нъ бо и изгна́нъ Го́сподемъ на́шимъ, Его́же превозноси́те во вся́ вѣ́ки.

Ка́мо, изгна́нъ, бѣжи́ши, супоста́те? Въ ста́до ага́рянское, полки́ своя́ въ пораже́ніе и въ плѣ́нъ оста́вивъ; о се́мъ мы́ воспои́мъ Го́спода и превозно́симъ во вся́ вѣ́ки.

Богоро́диченъ: Предвари́вши вско́рѣ и предстоя́щи те́плѣ, Дѣ́во Богоро́дице, зѣло́ одержи́мыхъ на́съ лю́тыми обстоя́ніи отъ печа́ли свободи́ла еси́, о се́мъ да пою́тъ Тя́ свяще́нницы, лю́діе превозно́сятъ во вся́ вѣ́ки.

Инъ.

Ирмо́съ, гла́съ 3: Ангелами немо́лчно въ вы́шнихъ сла́вимаго Бо́га, небеса́ небе́съ, земля́, и го́ры, и хо́лми, и глубина́, и ве́сь ро́дъ человѣ́ческій, пѣ́сньми Того́, я́ко Созда́теля и Изба́вителя, благослови́те и превозноси́те во вся́ вѣ́ки.

Со а́нгелы немо́лчно славосло́вимъ си́лу Твою́, Го́споди, е́юже низложи́лъ еси́ си́лы вра́жія, и бы́ша я́ко пра́хъ предъ лице́мъ вѣ́тра, и пу́ть и́хъ тма́ и по́лзокъ, и а́нгелъ Госпо́день погоня́я и́хъ лю́тымъ паде́ніемъ.

Ополчи́шася а́нгели Твои́, Го́споди, о́крестъ на́съ, и ничто́же успѣ́ша проти́ву на́съ си́лы вра́жія. Тѣ́мже, Тебѣ́ припа́дающе и благодаря́ще, мо́лимъ: огради́ на́съ и въ бу́дущая времена́ святы́ми а́нгелы Твои́ми.

Ка́ко бы́ша въ запустѣ́ніе? Внеза́пу исчезо́ша, я́ко со́ніе востаю́щаго. Ты́, Го́споди, умно́жилъ еси́ на на́съ вели́чествіе Твое́ и, обра́щся, утѣ́шилъ еси́ на́съ, за льще́нія и́хъ положи́лъ еси́ и́мъ зла́я, внегда́ разгордѣ́шася.

Богоро́диченъ: Въ ско́рбехъ утѣше́ніе, въ напа́стехъ и въ бѣда́хъ предста́тельницу Тя́, Ма́ти Бо́жія, стяжа́вше, печа́лей на́шихъ изба́вихомся; тѣ́мъ Тя́ по до́лгу, я́ко Ма́терь Бо́жію и Засту́пницу ро́да христіа́нскаго, велича́емъ.

Пѣ́снь 9.

Ирмо́съ, гла́съ 1: Сотвори́ держа́ву мы́шцею Свое́ю, низложи́ бо си́льныя со престо́лъ и вознесе́ смире́нныя Бо́гъ Изра́илевъ, въ ни́хже посѣти́ на́съ Восто́къ съ высоты́ и напра́вилъ ны́ е́сть на пу́ть ми́ра.

Вску́ю полага́ете ору́жіе супоста́ты? На се́ ли внесо́сте е́ въ страны́ на́ша, да я́коже Голіа́ѳъ свои́мъ мече́мъ пораже́нъ е́сть, та́ко и вы́ отъ своего́ ору́жія пострада́сте.

Позна́сте на коне́цъ, я́ко ору́жіе ва́ше не спасе́тъ ва́съ, того́ ра́ди е́ поверго́сте. Рцы́те у́бо съ на́ми, я́ко Госпо́дь спаса́етъ во бра́ни: благоволи́тъ Госпо́дь въ смире́нныхъ и упова́ющихъ на ми́лость Его́.

Позна́хомъ и мы́, Го́споди, я́ко не ору́жіемъ на́шимъ спасо́хомся, но десни́ца Твоя́ и мы́шца Твоя́, е́юже врази́ на́ши побѣжде́ни покори́шася.

Богоро́диченъ: Неле́стно упова́ніе и по́мощь иму́ще Тя́, Богоро́дице, навѣ́товъ вра́жіихъ не убоя́хомся, они́ же не иму́ще Твоея́ по́мощи, смято́шася. Та́ко да трепе́щутъ вси́, не призыва́ющіи Тя́ на по́мощь, раби́ же Твои́ ничи́мже устраша́еми пребу́дутъ.

Инъ.

Ирмо́съ, гла́съ 8: Да умолча́тъ еретико́въ собра́нія, не и́стинно Богоро́дицу исповѣ́дающихъ Тя́, и́бо свы́ше Тя́ проро́цы предпроповѣ́даша Ма́терь бы́ти Бо́жію и Хода́таицу ро́да на́шего. Тѣ́мъ Тя́, Дѣ́во, велича́емъ.

Госпо́дь Савао́ѳъ во́ждь бѣ́ полко́въ на́шихъ, Се́й устраши́ враго́въ на́шихъ, я́ко и́мъ, мно́гимъ число́мъ су́щимъ, ору́жіе тре́петнымъ отъ ру́къ испаде́, е́же пріе́мше, Го́спода си́лъ велича́емъ.

На́мъ ли кла́няетеся, супоста́ти, и́хже уничижи́сте? Не на́мъ, но и́мени Госпо́дню съ на́ми дади́те сла́ву, Иже немощны́я мíра избра́, да посрами́тъ крѣ́пкая, и уничиже́нная избра́ и не су́щая, да су́щая упраздни́тъ.

Съ на́ми Бо́гъ, разумѣ́йте, язы́цы, и покаря́йтеся, я́ко съ на́ми Бо́гъ, и бо́лѣе безу́мно не дерза́йте: а́ще бо па́ки возмо́жете, и па́ки побѣжде́ни бу́дете, я́ко съ на́ми Бо́гъ.

Богоро́диченъ: Не умолчи́мъ никогда́, Богоро́дице, си́лы Твоя́ глаго́лати, недосто́йніи: а́ще бо Ты́ не бы́ предстоя́ла моля́щи, кто́ бы на́съ изба́вилъ отъ толи́кихъ бѣ́дъ? Кто́ же бы сохрани́лъ до ны́нѣ свобо́дны? Не отсту́пимъ, Влады́чице, отъ Тебе́, Твоя́ бо рабы́ спаса́еши при́сно отъ вся́кихъ лю́тыхъ.

Ексапостила́рій:

Возда́лъ еси́ сосѣ́домъ на́шимъ седмери́цею въ нѣ́дра и́хъ поноше́ніе и́хъ, и́мже поноси́ша на́мъ, Го́споди, мы́ же, лю́діе Твои́ и о́вцы па́жити Твоея́, Тобо́ю сохране́нніи и просла́вленніи, исповѣ́мыся Тебѣ́, Бо́же, во вѣ́къ, въ ро́дъ и ро́дъ возвѣсти́мъ хвалу́ Твою́.

Сла́ва, и ны́нѣ, то́йже.

На хвали́техъ стихи́ры на 4, гла́съ 4:

Гдѣ́ есте́ врази́ на́ши,* де́рзостно на предѣ́лы Россíйскія наше́дшіи?* Гдѣ́ ва́ше ору́жіе?* Гдѣ́ во́инская зна́менія?* Гдѣ́ коры́сти, отъ мно́гихъ земе́ль награ́бленныя?* Гдѣ́ толи́кая су́етная сла́ва?* Ничто́же, кромѣ́ безче́стія ва́шего.* Вои́стинну сбы́стся ны́нѣ проро́ческое сло́во:* врази́ Госпо́дни, ку́пно просла́витися и́мъ и вознести́ся,* исчеза́юще, я́ко ды́мъ, исчезо́ша,* упова́ющіи же на Го́спода не постыдя́тся во вѣ́ки. [Два́жды.]

Рцы́ на́мъ ны́нѣ, богодохнове́нный Дави́де:* гдѣ́ е́сть превознося́щійся и вы́сящійся?* Ви́дѣхъ бо, глаго́леши, нечести́ваго, превознося́щася и вы́сящася,* я́ко ке́дры Лива́нскія,* и гдѣ́ ны́нѣ е́сть, рцы́ на́мъ?* Исчезе́ отъ оче́съ твои́хъ и на́шихъ,* и ми́мо идо́хъ, и се́ не бѣ́, и не обрѣ́теся.* О, су́етнаго киче́нія!* О, преходя́щія сла́вы!* О, вели́кія Твоея́, Бо́же, и́стины на враги́!* О, неизглаго́ланнаго къ на́мъ милосе́рдія!

Съ ма́терію Сиса́ровою* призира́ше свѣ́я, глаго́лющи:* вску́ю уме́длиша стопы́ Каро́ловы* въ до́мъ сво́й возврати́тися?* Нача́льствующіи отвѣща́ша е́й:* не́гли раздѣля́етъ коры́сть* или́ въ Россíи сѣ́де на престо́лѣ* и того́ ра́ди о ме́ньшемъ свое́мъ неради́тъ.* Госпо́дь же сотвори́ ему́,* я́ко Мадіа́му и Сиса́рѣ* и всѣ́мъ, и́же рѣ́ша:* да наслѣ́димъ себѣ́ святи́лище Бо́жіе,* положи́ его́, я́ко ко́ло,* я́ко тро́сть, предъ лице́мъ вѣ́тра,* я́ко о́гнь, попаля́яй дубра́вы,* та́ко погна́ его́ бу́рею Свое́ю* и гнѣ́вомъ Свои́мъ смяте́ его́.

Сла́ва, и ны́нѣ, гла́съ 8:

Вознесе́ ру́ку скве́рную на Це́рковь Бо́жію нечести́вый Никано́ръ и кля́тся до́мъ Бо́жій разори́ти, Бо́гъ же, помо́щникъ рабо́мъ Свои́мъ, кля́тву его́ ло́жну сотвори́. Та́ко сотвори́ и супоста́ту на́шему, просте́ршему ру́ку на Це́рковь Бо́жію, гла́вныя его́ триста́ты и крѣ́пкія военача́льники предаде́ въ ру́цѣ на́ши, са́мъ же, побѣди́тельною ного́ю надѣ́ющійся въ Ца́рствующій гра́дъ вни́ти, охромле́нъ, побѣже́ къ ва́рваромъ и мѣ́ста упокое́нія не обрѣ́те. Та́ко да поги́бнутъ вси́ врази́ Твои́, Го́споди, лю́бящіи же Тя́, я́ко восто́къ со́лнца, да возсія́ютъ.


НА ЛИТУРГІИ,

Блаже́нна отъ кано́на пѣ́снь 3-я и 6-я. Проки́менъ, гла́съ 7: Госпо́дь крѣ́пость лю́демъ Свои́мъ да́стъ,* Госпо́дь благослови́тъ лю́ди Своя́ ми́ромъ. Сти́хъ: Крѣ́пость моя́ и пѣ́ніе мое́ Госпо́дь, и бы́сть мнѣ́ во спасе́ніе. Или́: Кто́ Бо́гъ ве́лій, я́ко Бо́гъ на́шъ? Ты́ еси́ Бо́гъ, творя́й чудеса́. Апо́столъ [къ Ри́мляномъ], зача́ло 99. Аллилу́ія. Сти́хъ: Госпо́дь си́лъ съ на́ми, засту́пникъ на́шъ Бо́гъ Іа́ковль. 2: Бо́гъ на́мъ прибѣ́жище и си́ла, [Помо́щникъ въ ско́рбехъ, обрѣ́тшихъ ны́ зѣ́ло]. Ева́нгеліе отъ Луки́, зача́ло 51: Се́ даю́ ва́мъ вла́сть... Или́ у́треннее. Прича́стенъ: Хвали́те Го́спода съ небе́съ, [хвали́те Его́ въ вы́шнихъ].

Источникъ: Минíа, мѣ́сяцъ Іу́ній. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 193 об. – 206 об.

/ Къ оглавленію раздѣла /


Наверхъ / Къ титульной страницѣ

0