Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 23 iюля 2017 г. Сейчасъ на порталѣ посѣтителей - 19.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́нія въ 26-й де́нь.
Преподо́бнаго отца́ на́шего Дави́да, и́же въ Селу́нѣ.

[ВЕЧЕРЪ,]
Стихи́ры, гла́съ 8. Подо́бенъ: О, пресла́внаго чудесе́!

Якоже пти́ца благопѣ́снива,* на восхо́дѣ садо́внѣ* сѣ́нь, о́тче, водрузи́лъ еси́,* сту́денію померза́емь* и зно́емъ пожига́емь,* зла́ты отсю́ду прія́лъ еси́ крилѣ́* безстра́стія и соверше́нія* и къ небе́снѣй высотѣ́ всели́лся еси́,* о на́съ всегда́ моля́ся, хва́лящихъ тя́.

Боже́ственнымъ безстра́стія у́глемъ* попали́въ плотскíя сла́сти,* неопали́мь пребы́лъ еси́,* на руку́ у́гліе предъ лице́мъ, богодухнове́нне,* царе́вымъ держа́, преподо́бне,* дивля́шеся твое́й свѣ́тлости.* Тѣ́мъ подано́ ти проше́ніе вели́ко отъ Бо́га,* моли́твенника тя́, блаже́нне,* пріобрѣ́тъ благода́тію.

Сла́ва, гла́съ 6:

Преподо́бне о́тче, во всю́ зе́млю изы́де вѣща́ніе исправле́ній твои́хъ, тѣ́мъ на небесѣ́хъ обрѣ́лъ еси́ мзду́ трудо́въ твои́хъ, де́монскія погуби́лъ еси́ полки́ и а́нгельскія дости́глъ еси́ чи́ны, и́хже житію́ безъ поро́ка поревнова́лъ еси́. Дерзнове́ніе имѣ́я ко Христу́ Бо́гу, ми́ръ испроси́ душа́мъ на́шимъ.

И ны́нѣ, богоро́диченъ или́ крестобогоро́диченъ. Подо́бенъ: Тридне́венъ.

Зача́тіе Твое́ безсѣ́менное* рождество́ неизрече́нное помышля́ющи,* удивля́юся зѣло́:* ка́ко си́це, я́коже злодѣ́й,* благоволи́лъ еси́ умре́ти, Сы́не? —* Пречи́стая, пла́чущи, взыва́ше.

На стихо́внѣ окто́иха. Сла́ва, гла́съ 8:

Мона́ховъ мно́жества, наста́вника тя́ почита́емъ, о́тче на́шъ Дави́де, твое́ю бо стезе́ю вои́стинну пра́во ходи́ти позна́хомъ. Блаже́нъ еси́, Христу́ рабо́тавъ и вра́жію обличи́лъ еси́ си́лу, а́нгеловъ собесѣ́дниче, преподо́бныхъ соприча́стниче и пра́ведныхъ, съ ни́миже моли́ся Го́сподеви, поми́ловатися душа́мъ на́шимъ.

Крестобогоро́диченъ. Подо́бенъ: О, пресла́внаго чудесе́!

Юница Нескве́рная* Юнца́ ви́дящи на дре́вѣ,* пригвожда́ема во́лею,* рыда́ющи жа́лостнѣ:* увы́ Мнѣ́! — вопія́ше, —* люби́мѣйшее Ча́до!* что́ Ти со́нмъ воздаде́ безблагода́тный евре́йскій,* хотя́ Мя обезча́дствовати* отъ Тебе́, Вселюбе́зне?

Тропа́рь, гла́съ 8:

Въ тебѣ́, о́тче, извѣ́стно спасе́ся, е́же по о́бразу: пріи́мъ бо кре́стъ, послѣ́довалъ еси́ Христу́, и дѣ́я, учи́лъ еси́ презира́ти у́бо пло́ть, прехо́дитъ бо, прилѣжа́ти же о души́, ве́щи безсме́ртнѣй; тѣ́мже и со а́нгелы сра́дуется, преподо́бне Дави́де, ду́хъ тво́й.


[НА УТРЕНИ,]
Кано́нъ, творе́ніе Іо́сифово, его́же краегране́сіе: Пою́, блаже́нне, твое́ житіе́ боже́ственными словесы́. Гла́съ 5.

Пѣ́снь 1.

Ирмо́съ: Коня́ и вса́дника въ мо́ре Чермно́е сокруша́яй бра́ни, мы́шцею высо́кою, Христо́съ истрясе́, Изра́иля же спасе́, побѣ́дную пѣ́снь пою́ща.

Пѣ́сньми свѣтоно́сную и боже́ственную па́мять твою́, соше́дшеся, почти́мъ, Дави́де преблаже́нне, свѣ́та позна́вше тя́ и дне́, преподо́бне, наслѣ́дника Боже́ственнымъ Ду́хомъ.

Уды умертви́въ, о́тче, на земли́ тѣле́сныя, жи́знь все́льшуюся въ се́рдцы имѣ́лъ еси́, Христа́, умори́вшаго діа́вола си́лу, умертви́вшаго человѣ́чество.

Зако́номъ Влады́ки повину́яся, преподо́бне, кре́стъ тво́й на ра́мо взя́лъ еси́ и, стопа́мъ Сего́ послѣ́дуя, ты́ низложи́лъ еси́ возноше́нія льсти́ваго, смиря́яся.

Богоро́диченъ: Яви́лася еси́ укра́шена добро́тою добродѣ́телей и Христа́ кра́снаго, Дѣ́во, породила́ еси́, человѣ́ки украси́вшаго кра́сными добро́тами Божества́, Приснодѣ́во.

Пѣ́снь 3.

Ирмо́съ: Водрузи́вый на ничесо́мже зе́млю повелѣ́ніемъ Твои́мъ, и повѣ́сивши неодержи́мо тяготѣ́ющую, на недви́жимѣмъ, Христе́, ка́мени за́повѣдей Твои́хъ, Це́рковь Твою́ утверди́, Еди́не Бла́же и Человѣколю́бче.

Увяди́въ воздержа́ніемъ добро́ту тѣле́сную, зари́ прія́тъ Боже́ственнаго Ду́ха и безстра́стія свѣтоза́рными облиста́лъ еси́ луча́ми и исцѣле́ній дарова́ніи, о́тче, проро́ку тезоимени́те.

Святы́хъ послѣ́дуя житію́, пребога́те, ве́сь освяти́лся еси́ боже́ственными дѣя́ніи. Тѣ́мже освяща́еши та́йно вѣ́рою свято́е соверша́ющія твое́ торжество́, о́тче богоно́се всеблаже́нне.

Успи́въ сла́сти тѣле́сныя, преподо́бне, моли́твами, и бдѣ́ніи, и по́двиги, о́тче, въ ми́рѣ вои́стинну усну́въ, почи́лъ еси́. Тѣ́мже тя́ неусы́пна стяжа́хомъ храни́теля, любо́вію чту́щіи тя́.

Богоро́диченъ: Ангеловъ честнѣ́йши яви́лася еси́, ро́ждши тѣ́хъ, Дѣ́во, Созда́теля. Тѣ́мъ молю́ Тя, Чи́стая: освяти́ у́мъ мо́й и се́рдце просвѣти́, о́блакъ страсте́й отгоня́щи.

Сѣда́ленъ, гла́съ 8. Подо́бенъ: Прему́дрости.

Воздержа́ніемъ стра́сти плотскíя души́ повину́въ, о́тче му́дре, яви́лся еси́, блаже́нне, съ тѣ́ломъ а́нгелъ: сѣ́нь же водрузи́лъ еси́, я́ко пти́ца благопѣ́снива на садо́внѣ дре́вѣ, на высоту́ у́мъ впери́лъ еси́. Тѣ́мже чуде́съ дѣ́йствомъ обога́щся, преше́лъ еси́ ко Го́споду, Его́же отъ младе́нства вожделѣ́лъ еси́, Дави́де пресла́вне, моли́ Христа́ Бо́га грѣхо́въ оставле́ніе пода́ти чту́щимъ тя́.

Сла́ва, и ны́нѣ, богоро́диченъ:

Въ напа́сти многоплете́нныя впа́дъ отъ вра́гъ ви́димыхъ и неви́димыхъ, бу́рею одержи́мь безчи́сленныхъ согрѣше́ній мои́хъ, и я́ко къ те́плому заступле́нію и покро́ву моему́, Чи́стая, ко приста́нищу притека́ю Твоея́ бла́гости. Тѣ́мже, Пречи́стая, изъ Тебе́ Воплоще́нному безсѣ́менно моли́ся прилѣ́жно о всѣ́хъ рабѣ́хъ Твои́хъ, непреста́нно моля́щихъ Ти ся, Богоро́дице Пречи́стая, моля́щи Его́ при́сно согрѣше́ній оставле́ніе дарова́ти воспѣва́ющимъ досто́йно сла́ву Твою́.

Крестобогоро́диченъ:

Агнца, и Па́стыря, и Изба́вителя Агница зря́щи на Крестѣ́, восклица́ше, пла́чущи, и, го́рько рыда́ющи, вопія́ше: мíръ у́бо ра́дуется, пріе́мля Тобо́ю избавле́ніе, утро́ба же Моя́ гори́тъ, зря́щи Твое́ распя́тіе, е́же терпи́ши за милосе́рдіе ми́лости. Долготерпѣли́ве Го́споди, ми́лости бе́здно и исто́чниче неисчерпа́емый, умилосе́рдися и да́руй согрѣше́ній оставле́ніе вѣ́рою пою́щимъ боже́ственныя стра́сти Твоя́.

Пѣ́снь 4.

Ирмо́съ: Боже́ственное Твое́ разумѣ́въ истоща́ніе прозорли́во, Авваку́мъ, Христе́, со тре́петомъ вопія́ше Тебѣ́: во спасе́ніе люде́й Твои́хъ, спасти́ пома́занныя Твоя́ прише́лъ еси́.

Глаго́ловъ живото́чныхъ Ду́ха послу́шавъ, сла́ное житія́ оста́вль мо́ре и ка́плями сле́зъ страсте́й изсуши́лъ еси́ пото́ки.

Ра́зума и благода́ти испо́лненъ бы́въ, о́тче Дави́де, въ безмо́лвіи поиска́лъ еси́ Благодѣ́теля всѣ́хъ и Сего́ сія́нія получи́лъ еси́.

Житіе́ твое́ ну́ждею естества́ свѣ́тло показа́въ и содѣ́йствіемъ Ду́ха, отъ ну́ждъ зло́бныхъ человѣ́ки изба́вилъ еси́, преподо́бне.

Богоро́диченъ: Пое́мъ Тя́, Всепѣ́тая Влады́чице, Препѣ́таго Бо́га несказа́нно ро́ждшую и ли́ки а́нгельскія несравни́тельно добро́тою преше́дшую.

Пѣ́снь 5.

Ирмо́съ: Одѣя́йся свѣ́томъ, я́ко ри́зою, къ Тебѣ́ у́тренюю и Тебѣ́ зову́: ду́шу мою́ просвѣти́ омраче́нную, Христе́, я́ко Еди́нъ Благоутро́бенъ.

Просте́ръ твои́ о́чи и помышле́нія ко Иже на дре́вѣ Просте́ршемуся, на садо́внѣ дре́вѣ претерпѣ́лъ еси́, зно́емъ пожига́емь, о́тче, и сту́денію померза́емь.

Ве́сь молніезра́ченъ яви́лся еси́, преподо́бне, о́гнь дла́ньми, Дави́де, держа́ и ца́рствующаго кадя́ чу́днымъ, всеблаже́нне, кажде́ніемъ.

Ны́нѣ не въ гада́ніихъ, ниже́ мечта́ніемъ Боже́ственную добро́ту зри́ши, всеблаже́нне, лице́мъ же, преподо́бне, къ лицу́ па́че, разрѣ́шшимся зерца́ломъ.

Гре́знъ прекра́сенъ боже́ственнаго, Дави́де преподо́бне, виногра́да яви́лся еси́, источа́я вино́ умиле́нія отъ пія́нства, о́тче, страсте́й объюродѣ́вшимъ.

Богоро́диченъ: Напра́ви жи́знь мою́ и движе́нія у́мная, Богороди́тельнице, къ боже́ственному хотѣ́нію изъ Тебе́ неизрече́нно къ на́мъ Прише́дшаго.

Пѣ́снь 6.

Ирмо́съ: Неи́стовствующееся бу́рею душетлѣ́нною, Влады́ко Христе́, страсте́й мо́ре укроти́ и отъ тли́ возведи́ мя, я́ко Благоутро́бенъ.

Хра́мъ Боже́ственнаго Ду́ха позна́лся еси́, преподо́бне Дави́де, въ ма́лѣ хра́минѣ затворе́нъ и тѣ́сною простра́нную искупу́я.

Зако́номъ Влады́ки преклони́лъ еси́, о́тче, твою́ ду́шу, и свѣ́та испо́лненъ бы́лъ еси́, и пріи́мникъ дарова́ній Ду́ха.

Чудесы́ житіе́ твое́, богоно́се о́тче, вои́стинну укра́шено конце́мъ яви́ся. Тѣ́мже вѣ́рно восхваля́емъ тя́.

Богоро́диченъ: Отъ чи́стыхъ крове́й Твои́хъ истка́ся пло́ть, па́че естества́, Созда́вшему человѣ́ка, Богоро́дице. Тѣ́мже досто́йно пое́мъ Тя́.

Конда́къ, гла́съ 1. Подо́бенъ: Ли́къ а́нгельскій.

Са́дъ присноцвѣту́щь, добродѣ́телей плоды́ принося́й, яви́лся еси́ на садо́внѣ дре́вѣ, я́ко благопѣ́снивая пти́ца; ра́й же па́че, жи́зни дре́во, Го́спода, въ се́рдцы твое́мъ пріе́мъ, я́ко воздѣ́лавъ, богому́дре, и́мже пита́еши на́съ благода́тію; при́сно моли́ о на́съ, Дави́де всеблаже́нне.

Икосъ:

Сласте́й мои́хъ пе́щь вжига́етъ ми́ вѣ́чный пла́мень, преподо́бне Дави́де, погаси́ моли́твами твои́ми, я́коже многотеку́щими слеза́ми твои́ми, вже́гъ у́гліе любве́, блаже́нне, Зижди́теля моего́, я́коже дре́вле въ руку́ твое́ю носи́въ, я́ко же́ртву, и царя́ удиви́лъ еси́, я́ко да пою́ тебе́, свѣтоно́сче, Дави́де всеблаже́нне.

Пѣ́снь 7.

Ирмо́съ: Превозноси́мый отце́въ Госпо́дь, пла́мень угаси́, о́троки ороси́, согла́сно пою́щія: Бо́же, благослове́нъ еси́.

Стоя́лъ еси́ неукло́нно на вѣ́твѣхъ са́да, преподо́бне, напое́ніи сле́зъ твои́хъ ча́сто напоя́я и поя́ немо́лчно: Бо́же, благослове́нъ еси́.

Все́ твое́ жела́ніе къ Бо́гу просте́рлъ еси́, все́ се́рдце твое́ прія́телище сотвори́лъ еси́ боже́ственныхъ дарова́ній, богоно́се, воспѣва́я: Бо́же, благослове́нъ еси́.

Тя́, свѣтови́дна, о́тче, бы́вша, у́гліе держа́ща въ руку́, я́ко ви́дѣ ца́рь, удиви́ся и нога́мъ твои́мъ поклони́ся.

Богоро́диченъ: Разрѣши́ся Рождество́мъ Твои́мъ кля́тва человѣ́ча, еди́на Всеблагослове́нная, тѣ́мже Тя́ славосло́вимъ, я́ко Благода́тную, Богоро́дице, во вѣ́ки.

Пѣ́снь 8.

Ирмо́съ: Тебѣ́, Вседѣ́телю, въ пещи́ о́троцы, всемíрный ли́къ спле́тше, поя́ху: дѣла́ вся́кая, Го́спода по́йте и превозноси́те во вся́ вѣ́ки.

Утро разу́мное су́щимъ во тмѣ́ яви́лся еси́ житія́, блаже́нне, свѣ́тъ разумѣ́нія всѣ́мъ озаря́я, любо́вію тя́ чту́щимъ и превознося́щимъ Христа́ во вся́ вѣ́ки.

Бы́лъ еси́ пра́въ, и смире́нъ, и кро́токъ, Дави́да тезоимени́таго изобража́я вѣ́рно. Тѣ́мже съ ни́мъ зе́млю кро́ткихъ, о́тче, наслѣ́довалъ еси́ во вся́ вѣ́ки.

Богосія́ненъ мона́шествующихъ сто́лпъ, Дави́де блаже́нный, проро́къ боже́ственъ другíй яви́лся еси́, бу́дущая предглаго́ля боже́ственная явле́нія Ду́ха Боже́ственнаго.

Богоро́диченъ: Тя́, добро́ту Іа́ковлю, Дѣ́во, Бо́гъ Юже возлюби́, Юже избра́, вси́ я́ко еди́ну Благослове́нную пѣсносло́вимъ во вся́ вѣ́ки.

Пѣ́снь 9.

Ирмо́съ: Иса́іе, лику́й, Дѣ́ва имѣ́ во чре́вѣ и роди́ Сы́на Емману́ила, Бо́га же и Человѣ́ка, Восто́къ и́мя Ему́, Его́же велича́юще, Дѣ́ву ублажа́емъ.

Свяще́нное торжество́, соше́дшеся дне́сь, вѣ́рніи, соверши́мъ, свяще́ннаго вси́ отца́, воздержа́ніемъ возсія́вшаго и себе́ всего́ Бо́гу освяти́вшаго житіе́мъ соверше́нія.

Якоже дре́во насади́лся еси́ на вода́хъ, преподо́бне, то́ки духо́вныхъ добродѣ́телей нося́ плоды́, на садо́внѣ же дре́вѣ водрузи́въ, я́ко оре́лъ, о́тче, гнѣздо́, къ небе́снымъ тво́й у́мъ впери́лъ еси́.

Тво́й проро́чески узрѣ́въ, Дави́де, исхо́дъ, провозглаша́еши сíй лю́демъ, егда́ посыла́емь, е́же на ни́хъ поста́вилъ еси́, му́дре, ца́рствующаго мно́гое негодова́ніе.

Свята́я па́мять твоя́ освяща́етъ дне́сь на́съ, творя́щихъ сію́ вѣ́рно, преподо́бне Дави́де: свя́то бо препроводи́лъ еси́ твою́, свя́те, жи́знь и по успе́ніи ра́дуешися со святы́ми при́сно.

Богоро́диченъ: Свѣтоно́сну две́рь Тя́ предзря́ше Іезекíиль, е́юже про́йде Свѣ́тъ и́стинный, Христо́съ, Бо́гъ на́шъ, Его́же прилѣ́жно моли́, Чи́стая, покая́нія ми́ две́ри отве́рсти, молю́ся.

Свѣти́ленъ. Подо́бенъ: Жены́, услы́шите.

Мірска́го весе́лія, я́ко отъ скве́рны, уклони́лся еси́, и, неяде́ніемъ пло́ть увяди́въ, обнови́лъ еси́ души́ крѣ́пость, преподо́бне, и сла́вою обогати́лся еси́ небе́сною, сла́вне. Тѣ́мже моля́ не преста́й о на́съ Го́спода.

Богоро́диченъ:

Вои́стинну Богоро́дицу Тя́ исповѣ́дуемъ, Влады́чице, Тобо́ю спа́сшіися: и́бо Го́спода неизрече́нно родила́ еси́, разо́ршаго Кресто́мъ сме́рть, къ Себѣ́ же привле́кша преподо́бныхъ собо́ры. Съ ни́миже Тя́ восхваля́емъ, Дѣ́во.

На стихо́внѣ окто́иха. Сла́ва, гла́съ 5:

Преподо́бне о́тче, не да́лъ еси́ сна́ твои́ма очи́ма, ни вѣ́ждома дрема́нія, до́ндеже ду́шу и тѣ́ло отъ страсте́й свободи́лъ еси́ и себе́ угото́валъ еси́ Ду́ху жили́ще: прише́дъ бо, Христо́съ со Отце́мъ оби́тель въ тебѣ́ сотвори́, и Единосу́щныя Тро́ицы уго́дникъ бы́въ, великопроповѣ́дниче, о́тче на́шъ Дави́де, моли́ спасти́ся на́мъ.

И ны́нѣ, богоро́диченъ или́ крестобогоро́диченъ. Подо́бенъ: Ра́дуйся.

Егда́ гро́здъ, ненасажде́нъ су́щъ, я́ко лоза́, отрасти́ла еси́, узрѣ́вши на дре́вѣ повѣ́шена, прободе́на же копіе́мъ въ Боже́ственная ре́бра, что́ сіе́, — глаго́лаше, — Сы́не и Бо́же Мо́й? Ка́ко, Иже неду́ги вся́ и стра́сти исцѣля́яй, стра́сти терпи́ши, безстра́стенъ сы́й по естеству́ Боже́ственному? Что́ Ти безблагода́тніи лю́діе, Благодѣ́телю, сія́ возда́ша вмѣ́сто благодѣ́яній? — вопія́ше Пречи́стая. Но́ Того́ страстьми́ страсте́й мя́ свободи́ти моли́ непреста́нно, я́ко да сла́влю Тя́.

Источникъ: Минíа, мѣ́сяцъ Іу́ній. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 173 об. – 177 об.

/ Къ оглавленію раздѣла /


Наверхъ / Къ титульной страницѣ

0