Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 23 iюля 2017 г. Сейчасъ на порталѣ посѣтителей - 19.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́нія въ 26-й де́нь.
Слу́жба явле́нію ико́ны Пресвяты́я Влады́чицы на́шея Богоро́дицы и Приснодѣ́вы Марíи, Ти́хвинскія.

НА МАЛѢЙ ВЕЧЕРНИ,
На Го́споди воззва́хъ: стихи́ры, гла́съ 1. Подо́бенъ: Небе́сныхъ чино́въ.

О Твое́мъ, Влады́чице, явле́ніи пресла́вномъ* уми́льни бы́вше лю́діе, вку́пѣ же и ра́достни,* я́ко чуде́съ сокро́вище,* пречи́стый Тво́й о́бразъ лобыза́ютъ,* Бо́жіею благода́тію просвѣща́ющъ вѣ́рныя* и отъ бѣ́дъ избавля́ющъ съ любо́вію притека́ющія.

Съ пресла́вными чи́нми а́нгельскими* дне́сь, вѣ́рніи, духо́внѣ весели́мся,* свѣ́тло пра́зднующе пресвѣ́тлое торжество́ Богома́тере:* пречи́стый бо Ея́ о́бразъ,* я́ко исто́чникъ приснотеку́щій, яви́ся,* исцѣле́ній незави́стныя да́ры* при́сно мíру источа́ющій.

Сла́ва, и ны́нѣ, гла́съ 5:

Стра́нно чу́до явле́нія о́браза Твоего́, Влады́чице, и несказа́нно: удивля́етъ премíрная и ужаса́етъ земна́я, вку́пѣ же и просвѣща́етъ свѣтоно́сною благода́тію ро́ждшагося отъ Тебе́ Христа́ Бо́га на́шего и Твое́ю. Его́же моли́, Чи́стая, въ боже́ственнѣмъ торжествѣ́ Твое́мъ пода́ти на́мъ просвѣще́ніе и ве́лію ми́лость.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

О, Всенепоро́чная Дѣ́во!* Ко́е Тебѣ́ принесе́мъ благодаре́ніе?* Яко свѣтоза́рнымъ Пречи́стыя Твоея́* и изъ Тебе́ ро́ждшагося Младе́нца ико́ны явле́ніемъ* утверди́ла еси́ сердца́ вѣ́рныхъ.

Сти́хъ: Слы́ши, Дщи́, и ви́ждь,* и приклони́ у́хо Твое́.

О, Пресвята́я Госпоже́ Влады́чице!* не забу́ди на́съ, Твоя́ рабы́,* вѣ́рою покланя́ющіяся чудотво́рной Твое́й ико́нѣ* и благоче́стно воспѣва́ющія Тя́,* и изба́ви ны́, Госпоже́, отъ всѣ́хъ бѣ́дъ и напа́стей.

Сти́хъ: Помяну́ и́мя Твое́* во вся́комъ ро́дѣ и ро́дѣ.

О, Всепѣ́тая Ма́ти!* умилосе́рдися на моле́ніе на́ше:* Сы́на бо Твоего́ и Твое́ есмы́ достоя́ніе,* вся́ спаси́ и поми́луй,* да вси́ Тя́ непреста́нно велича́емъ.

Сла́ва, и ны́нѣ:

Ти́хое приста́нище* оби́тель Твоя́, Богоневѣ́сто, яви́ся* всѣ́хъ, съ вѣ́рою притека́ющихъ,* иму́щи въ себѣ́ пречестну́ю Твою́ ико́ну,* всѣ́мъ неоску́дно благода́ть подаю́щую.


НА ВЕЛИЦѢЙ ВЕЧЕРНИ,
[Блаже́нъ му́жъ.., 1-й антифо́нъ.] На Го́споди воззва́хъ: стихи́ры, гла́съ 2. Подо́бенъ: Кíими похва́льными.

Кíими чи́стыми устна́ми* ублажи́мъ Богоро́дицу?* Честнѣ́йшую херуви́мовъ* и святѣ́йшую су́щу серафи́мовъ,* а́нгеловъ же* и всѣ́хъ святы́хъ сла́внѣйшую,* престо́лъ Царе́въ непоколеби́мый,* до́мъ, въ не́мже всели́ся Вы́шній,* спасе́ніе мíра,* Бо́жіе освяще́ніе,* подаю́щую вѣ́рнымъ* въ боже́ственнѣмъ торжествѣ́ Ея́* бога́тно ве́лію ми́лость.

Кíя духо́вныя пѣ́сни* ны́нѣ принесе́мъ Ти́, Всечи́стая?* Ибо пречестны́я Твоея́ ико́ны* пречу́днымъ ше́ствіемъ* подсо́лнечную освяти́ла еси́,* и ди́внымъ ея́ явле́ніемъ* всю́ Россíйскую страну́ удиви́ла еси́,* и свѣтоза́рнымъ ея́ прише́ствіемъ* пусто́е мѣ́сто и непроходи́мое просвѣти́ла еси́,* идѣ́же и ны́нѣ водворя́ешися* боже́ственною ико́ною Твое́ю,* всеси́льнымъ Твои́мъ предста́тельствомъ* мíру непреста́нно подаю́щи ве́лію ми́лость.

Кíя умиле́нныя гла́сы* принесо́ша Ти́ тогда́, Богоро́дице,* зря́щіи свѣтоно́сную ико́ну Твою́,* чу́дно на возду́сѣ стоя́щую* и свѣтоза́рными луча́ми сія́ющую,* благочести́віи лю́діе?* То́чію съ рыда́ніемъ моля́хуся,* съ пла́чемъ взыва́юще:* пріиди́ къ на́мъ, Цари́це, сни́ди, Влады́чице,* низпосли́ щедро́ты Твоего́ человѣколю́бія,* посѣти́ ны свы́ше,* просвѣти́ омраче́нныя Твои́мъ свѣтоза́рнымъ прише́ствіемъ,* и неотсту́пна бу́ди во вѣ́ки,* мíрови бога́тно подаю́щи ве́лію ми́лость.

Что́ Ти принесе́мъ, Пресвята́я Дѣ́во,* за мно́гую Твою́ благосты́ню и человѣколю́біе?* Яко пресла́вно по возду́ху* низпосла́ла еси́* земли́ Россíйстѣй боже́ственное Твое́ дарова́ніе,* многочуде́сную Твою́ ико́ну, Богоотрокови́це Чи́стая,* отъ нея́же Бо́жіею благода́тію* чудесы́ происходя́щими* бѣ́дъ избавля́емся,* и изоби́льно пріе́млемъ* душа́мъ же и тѣ́ломъ* отъ вся́кихъ болѣ́зней исцѣле́ніе,* и непреста́нно почерпа́емъ ве́лію ми́лость.

Ины стихи́ры, гла́съ 5. Подо́бенъ: Ра́дуйся.

Ра́дуйся, наде́жда на́ша, Богоро́дице Чи́стая,* ра́дуйся, ра́дость а́нгеломъ пріи́мшая.* Ра́дуйся, ро́ждшая Отчее сія́ніе,* ра́дуйся, благослове́нная Чи́стая Пресвята́я Дѣ́во,* еди́на Всепѣ́тая.* Ра́дуйся, христіа́номъ въ бѣда́хъ ско́рая Помо́щнице* и те́плая Засту́пнице,* ра́дуйся, Правосла́вія похвало́ высо́кая* и сла́во превознесе́нная,* ро́ждшая Па́стыря до́браго,* на́съ, заблу́ждшихъ, взыска́вшаго* и грѣхо́вными плени́цами свя́занныхъ разрѣши́вшаго,* подаю́щаго мíрови ве́лію ми́лость. [Два́жды.]

Ра́дуйся, Пресвята́я Дѣ́во,* спасе́нія на́шего Хода́таица,* Ты́ источи́ла еси́ всѣ́мъ ра́дость и благослове́ніе,* ро́ждши безъ сѣ́мене пло́тію Исто́чника бла́гъ,* краснѣ́йшаго добро́тою па́че всѣ́хъ сыно́въ человѣ́ческихъ,* Іису́са, всего́ мíра Изба́вителя,* и на пречи́стую руку́ Твое́ю Того́ носи́ла еси́.* И ны́нѣ пречи́стымъ о́бразомъ ви́димъ Его́,* человѣколю́бнѣ и свѣтоза́рно съ Тобо́ю прише́дша* къ на́мъ на исцѣле́ніе не́мощей тѣле́сныхъ* и во спасе́ніе ду́шъ на́шихъ.

Ра́дуйся дне́сь, Россíйская земле́ христолюби́вая,* сла́ва бо Госпо́дня на тебѣ́ возсія́* пресла́внымъ явле́ніемъ ико́ны Богома́тере,* лучено́сно бо къ тебѣ́ пріи́де ди́вно по возду́ху,* всѣ́хъ Бо́га про́мысломъ.* Лику́й ны́нѣ и весели́ся, Вели́кій Новгра́де,* я́ко воспрія́лъ еси́ въ предѣ́лѣ о́бласти твоея́* свы́ше просія́вшую Боже́ственную зарю́,* чуде́съ благода́ть излива́ющую.* Красу́йся и свѣ́тло торжеству́й,* пречестна́я оби́тель Богома́тере,* я́ко уясни́ся твоя́ добро́та прекра́сно:* имѣ́еши бо въ себѣ́ ве́ліе вселе́нныя сокро́вище,* чу́дную ико́ну Влады́чицы,* пресла́вно по ае́ру прише́дшую,* да́рующую всѣ́мъ вѣ́рнымъ ве́лію ми́лость.

Сла́ва, и ны́нѣ, гла́съ 6:

Дне́сь ра́дуется вѣ́рныхъ мно́жество, яви́ бо ся боже́ственная ико́на Твоя́, Влады́чице, на возду́сѣ, я́ко многосвѣ́тлое со́лнце, свѣ́томъ ве́ліимъ сія́ющи и лучи́ ми́лости повсю́ду испуща́ющи, вся́ вѣ́рныя просвѣща́етъ. Дне́сь ликовству́юще а́нгели Тебѣ́ слу́жатъ и, почита́юще Тя́, отъ мѣ́ста на мѣ́сто неви́димо ико́ну Твою́ преноси́ша, Богома́ти, доне́сше же богоизбра́ннаго мѣ́ста, благоговѣ́йно поста́виша съ досто́йными славословле́ніи. Мы́ же что́ Ти принесе́мъ, бре́нніи? И ко́е благохвале́ніе прише́ствію Твоему́ сотвори́мъ? Недоумѣва́емъ, то́чію удивля́емся, велича́юще Твое́ милосе́рдіе, е́же на на́съ показа́ла еси́. Но, о Пресвята́я, моли́ся прилѣ́жно Сы́ну Твоему́ и Бо́гу на́шему дарова́ти вѣ́рному Импера́тору на́шему [и́мярекъ] на враги́ побѣ́ды, и мíру умире́ніе, и душа́мъ на́шимъ ве́лію ми́лость.

Вхо́дъ. Проки́менъ дне́. Чте́нія три́.

Бытія́ чте́ніе. [Глава́ 28.]

Изы́де Іа́ковъ отъ студенца́ кля́твеннаго и и́де въ Харра́нь. И обрѣ́те мѣ́сто, и спа́ та́мо, за́йде бо со́лнце; и взя́тъ отъ ка́менія мѣ́ста того́, и положи́ возгла́віе себѣ́, и спа́ на мѣ́стѣ о́номъ. И со́нъ ви́дѣ: и се́ лѣ́ствица утвержде́на на земли́, eя́же глава́ досяза́ше до небе́съ, и Ангели Бо́жіи восхожда́ху и низхожда́ху по не́й. Госпо́дь же утвержда́шеся на не́й, и рече́: Азъ Бо́гъ Авраа́мовъ, отца́ твоего́, и Бо́гъ Исаа́ковъ, не бо́йся: земля́, идѣ́же ты́ спи́ши на не́й, тебѣ́ да́мъ ю́ и сѣ́мени твоему́. И бу́детъ сѣ́мя твое́, я́ко песо́къ земны́й, и распространи́тся на мо́ре, и ли́ву, и сѣ́веръ, и на восто́ки, и возблагословя́тся о тебѣ́ вся́ колѣ́на земна́я и о сѣ́мени твое́мъ. И се́ Азъ съ тобо́ю, сохраня́яй тя́ на вся́комъ пути́, а́може а́ще по́йдеши, и возвращу́ тя́ въ зе́млю сію́, я́ко не и́мамъ тебе́ оста́вити, до́ндеже сотвори́ти Ми́ вся́, ели́ка глаго́лахъ тебѣ́. И воста́ Іа́ковъ отъ сна́ своего́, и рече́: я́ко éсть Госпо́дь на мѣ́стѣ се́мъ, а́зъ же не вѣ́дѣхъ. И убоя́ся, и рече́: я́ко стра́шно мѣ́сто сіе́, нѣ́сть сіе́, но до́мъ Бо́жій, и сія́ врата́ небе́сная.

Прoро́чества Іезекíилева чте́ніе. [Глава́ 43 и 44.]

Та́ко глаго́летъ Госпо́дь: бу́детъ отъ дне́ осма́го и про́чее, сотворя́тъ іере́и на олтари́ всесожже́нія ва́шего и я́же спасе́нія ва́шего, и пріиму́ вы́, глаго́летъ Адонаи́ Госпо́дь. И обрати́ мя́ на пу́ть вра́тъ святы́хъ внѣ́шнихъ, зря́щихъ на восто́ки, и сія́ бя́ху затворе́на. И рече́ Госпо́дь ко мнѣ́: врата́ сія́ затворе́на бу́дутъ, и не отве́рзутся, и никто́же про́йдетъ сквозѣ́ и́хъ, я́ко Госпо́дь Бо́гъ Изра́илевъ про́йдетъ и́ми, и бу́дутъ затворе́на. Яко игу́менъ ся́детъ въ ни́хъ снѣ́сти хлѣ́бъ: по пути́ ела́мскихъ вра́тъ вни́детъ, и по пути́ его́ изы́детъ. И введе́ мя́ по пути́ вра́тъ святы́хъ, су́щихъ къ сѣ́веру, пря́мо хра́му, и ви́дѣхъ, и се́ испо́лнь сла́вы хра́мъ Госпо́день.

При́тчей чте́ніе. [Глава́ 9.]

Прему́дрость созда́ себѣ́ до́мъ и утверди́ столпо́въ се́дмь. Закла́ своя́ же́ртвенная, и раствори́ въ ча́ши свое́й вино́, и угото́ва свою́ трапе́зу. Посла́ своя́ рабы́, созыва́ющи съ высо́кимъ проповѣ́даніемъ на ча́шу, глаго́лющи: и́же е́сть безу́менъ, да уклони́тся ко мнѣ́. И тре́бующимъ ума́ рече́: пріиди́те, яди́те мо́й хлѣ́бъ и пíйте вино́, е́же раствори́хъ ва́мъ. Оста́вите безу́міе, и жи́ви бу́дите, и взыщи́те ра́зума, да поживете́, и испра́вите ра́зумъ въ вѣ́дѣніи. Наказу́яй злы́я, пріи́метъ себѣ́ безче́стіе, облича́яй же нечести́ваго опоро́читъ себе́. Обличе́нія бо нечести́вому — ра́ны ему́. Не облича́й злы́хъ, да не возненави́дятъ тебе́, облича́й прему́дра, и возлю́битъ тя́. Да́ждь прему́дрому вину́, и прему́дршій бу́детъ, сказу́й пра́ведному, и приложи́тъ пріима́ти. Нача́ло прему́дрости — стра́хъ Госпо́день, и совѣ́тъ святы́хъ — ра́зумъ. Разумѣ́ти бо зако́нъ по́мысла е́сть блага́го: си́мъ бо о́бразомъ мно́гое поживе́ши вре́мя, и приложа́тся тебѣ́ лѣ́та живота́.

На литíи стихи́ры, гла́съ 3:

Пріиди́те, вси́ празднолю́бцы, чу́дное явле́ніе ико́ны Бо́жія Ма́тере ублажи́мъ, пресла́вно бо и боголѣ́пно возсія́, ея́же святы́мъ явле́ніемъ мíръ просвѣще́нъ бы́сть. Тѣ́мъ усты́ и сердцы́ и пѣ́сньми и пѣ́ніи духо́вными се́й святы́й де́нь со всѣ́ми притека́ющими пра́зднуемъ свѣ́тло.

Гла́съ 8:

Пе́рвѣе написа́вшейся Твое́й ико́нѣ ева́нгельскихъ та́инъ благовѣ́стникомъ и къ Тебѣ́, Цари́цѣ, принесе́ннѣй, да усво́иши ту́ и си́льну содѣ́лаеши спасти́ честву́ющія Тя́. И пора́довалася еси́, я́ко су́щи ми́лостива спасе́нія на́шего Содѣ́тельница, я́ко уста́ и гла́съ ико́нѣ бы́вши, я́коже и Бо́га внегда́ зачина́ющи во чре́вѣ, пѣ́снь воспѣ́ла еси́: се́ отны́нѣ ублажа́тъ Мя́ вси́ ро́ди. И, на ту́ зря́щи, глаго́лала еси́ со вла́стію: съ си́мъ о́бразомъ благода́ть Моя́ и си́ла. И мы́ и́стинно вѣ́руемъ, я́ко се́ рекла́ еси́, Госпоже́: си́мъ о́бразомъ съ на́ми еси́. Тѣ́мъ, благоговѣ́йно предстоя́ще, покланя́емся Тебѣ́, раби́ Твои́, посѣти́ ны́ Твои́ми Ма́терними щедро́тами.

Кто́ досто́йно возмо́жетъ исповѣ́дати чуде́съ Твои́хъ, Чи́стая, глубину́ превели́кую? Твои́мъ бо милосе́рднымъ присѣще́ніемъ пусты́ня свы́ше прія́тъ ико́ну Твою́ чу́дную; тогда́ же Тя́, Влады́чице, со святи́телемъ Никола́емъ свѣтоза́рно въ пусты́ни бесѣ́дующу, узрѣ́ му́жъ благоговѣ́йный, и́же, зрѣ́ти не терпя́ неизрече́ннаго Твоего́ сія́нія, на зе́млю ни́цъ па́дъ, ника́коже зрѣ́ти можа́ше, до́ндеже возста́ви его́ святи́тель о́нъ чу́дный, отъ стра́ха человѣколю́бнѣ укрѣпля́я его́. Ты́ же, Чи́стая, свѣ́томъ ми́лости Твоея́ сего́ просвѣ́щши, кре́стнаго утвержде́нія благоволе́ніе Твое́ соверши́ти повелѣ́ла еси́ въ по́льзу вѣ́рныхъ спасе́нія.

Гла́съ 4:

Да ка́плютъ сла́дость о́блацы, и вся́ земля́ да возра́дуется ра́достно о неизрече́ннѣй ми́лости Твое́й, Пречи́стая. Чу́до бо зри́мо е́сть, Влады́чице, ди́вное, я́ко пре́жде пусты́ня, вся́каго обнаже́на благолѣ́пія и ники́мже проходи́ма и зна́ема, ны́нѣ же Твои́мъ, Богома́ти, присѣще́ніемъ мѣ́сто пресла́вно, и оби́тель, я́ко гра́дъ прекра́сенъ, явля́ется, и хра́мъ присносвѣ́телъ, въ не́мже боже́ственное сокро́вище, чу́дная ико́на Твоя́, Богоро́дице, показу́ется. Ея́же мы́ зря́ще благолѣ́піе и усе́рдно покланя́ющеся, ра́достію и стра́хомъ цѣлу́емъ ю́: стра́хомъ — грѣха́ ра́ди, я́ко недосто́йни су́ще; ра́достію же — ми́лости ра́ди, ю́же подае́ши на́мъ, рабо́мъ Твои́мъ, я́ко Милосе́рда.

Влады́чице Блага́я, мíру держа́вная Помо́щнице, укрѣпи́ сла́вящаго Тя́ Импера́тора на враги́, я́коже иногда́ кро́ткаго Дави́да на проти́вныя. И я́коже дре́вле спасла́ еси́ Ца́рскій гра́дъ отъ иноплеме́нныхъ нахожде́нія, та́ко и ны́нѣ спаси́ страну́ Россíйскую отъ проти́вныхъ наше́ствія и соблюди́ отъ всѣ́хъ навѣ́тъ вра́жіихъ, Ты́ бо, Богоневѣ́стная, всѣ́хъ вѣ́рныхъ съ Бо́гомъ покро́въ и спасе́ніе.

Сла́ва, и ны́нѣ, гла́съ 5:

Россíйская страна́ дне́сь весели́тся съ вы́шними си́лами, свы́ше обогати́вшися ико́ною Богома́тере, и христолюби́вое ста́до вопіе́тъ, созыва́ющи: пріиди́те, вѣ́рніи, просвѣти́теся въ свѣ́тломъ торжествѣ́ Богоро́дицы. Пріиди́те, празднолю́бцы, возвесели́теся въ чуде́снѣмъ пра́здницѣ о́бщія всѣ́хъ Влады́чицы. Пріиди́те и ви́дите боже́ственное сокро́вище, всѣ́мъ чуде́съ да́ры оби́льно подаю́щее. Что́ у́бо воздади́мъ Го́сподеви, сицево́е человѣколю́біе на́мъ яви́вшему, пречи́стый Сво́й и Его́ ро́ждшія о́бразъ, я́ко небе́сный да́ръ на́мъ низпосла́вшему, и вѣ́рныхъ просвѣти́вшему? Тѣ́мже, наслажда́ющеся ве́лія Того́ милосе́рдія, ра́достно Тому́ возсыла́емъ гла́сы благода́рныя, ро́ждшей Того́ ве́село воспѣва́юще: сла́ва, Влады́чице, вопло́щшемуся изъ Тебе́ Христу́ Бо́гу на́шему, таковы́я благода́ти на́съ сподо́бльшему.

На стихо́внѣ стихи́ры, гла́съ 2. Подо́бенъ: Егда́ отъ дре́ва.

Егда́ ви́дѣ Моисе́й* купину́ горя́щую и не опаля́ему,* прообразу́ющу въ Твою́ пречи́стую, Дѣ́во, утро́бу* Боже́ственнаго огня́ вселе́ніе,* тогда́ стра́хомъ одержа́шеся, та́инству удивля́яся,* си́це и ны́нѣ лю́діе Твои́, Влады́чице,* зря́ще пречи́стый Тво́й о́бразъ,* воплоти́вшагося отъ Тебе́ благоволе́ніемъ,* отъ веще́ственнаго огня́ невеще́ственною Боже́ственною си́лою,* неопали́мь, и благода́тію па́че со́лнца сія́ющь,* и вѣ́рныхъ сердца́ просвѣща́ющь,* ра́достно Сы́ну Твоему́ вопія́ху, глаго́люще:* сла́ва, Человѣколю́бче, Твоему́ милосе́рдію.

Сти́хъ: Помяну́ и́мя Твое́* во вся́комъ ро́дѣ и ро́дѣ.

Егда́ ужа́сно, Влады́чице, и тре́петно* покры́ ка́меніе Твоего́ хра́ма зда́тели,* тогда́ лю́діе ско́рбію уязви́шася,* ча́юще, я́ко тíи ме́ртви су́ть,* но, о, чудесе́ пресла́внаго!* я́коже бо дре́вле Сло́во Бо́жіе и Бо́гъ всѣ́хъ,* изъ Тебе́ изво́ливый воплоти́тися, Всепѣ́тая,* тридне́вно Іо́ну соблюде́ неврежде́нна во чре́вѣ ки́тове,* си́це и ны́нѣ Твои́мъ предста́тельствомъ чудодѣ́йствова,* по тридне́вномъ тѣ́хъ каменозавале́ніи* жи́вы и невре́дны сохрани́ и́хъ* и ра́достію вся́ пѣ́ти научи́:* сла́ва Его́ человѣколю́бному щедро́тъ мно́жеству,* прославля́ющему Тебе́, безъ сѣ́мене ро́ждшую.

Сти́хъ: Слы́ши, Дщи́, и ви́ждь,* и приклони́ у́хо Твое́.

Егда́ по мно́зѣй ско́рби, Благода́тная,* лю́діе хотѣ́ша пе́рсти преда́ти о́ныя зда́тели,* пребы́вшія подъ ка́меніемъ тридне́вное вре́мя,* тогда́ Сы́ну и Бо́гу Твоему́ изво́лившу* па́че просла́вити Твое́ во святѣ́й оби́тели предста́тельство,* жи́вы и безвре́дны обрѣто́ша я́ Твои́мъ хране́ніемъ,* Сего́ ра́ди весе́лія испо́лншеся,* сла́вяху Тя́ съ ни́ми, милосе́рдую Влады́чицу,* и ро́ждшемуся отъ Тебе́ съ ра́достію вопія́ху:* сла́ва, Человѣколю́бче, Твоему́ благоутро́бію.

Сла́ва, и ны́нѣ, гла́съ 8:

Пріиди́те, вси́ вѣ́рніи, притеце́мъ въ це́рковь Богома́тере: се́ бо сія́етъ въ не́й всечестна́я Ея́ ико́на, я́ко свѣти́ло благоче́стія, всѣ́хъ празднолю́бныхъ собо́ры, благода́тію Бо́жіею просвѣща́ющи и грѣхо́внаго помраче́нія тму́ отгоня́ющи, чудеса́ же та́мо притека́ющимъ пресла́вная содѣва́етъ и ду́хи лука́вствія прогоня́етъ. Импера́тору у́бо благочести́вому на сопроти́вныя крѣ́пость подава́етъ, стѣна́ и забра́ло всея́ земли́ быва́ющи, и оби́тель Свою́ заступле́ніемъ си́льнымъ утвержда́ющи, пресла́вными на враги́ побѣ́дами прославля́ется, и вся́ вѣ́рныя торжествова́ти созыва́етъ, и ра́достно къ Богома́тери зва́ти науча́етъ: крѣ́пость на́ша и утвержде́ніе, упова́ніе и спасе́ніе съ Бо́гомъ — Ты́ еси́, Богоро́дице. И Тебѣ́ мо́лимся: моли́ Сы́на Твоего́ и Бо́га на́шего, да изба́витъ на́съ въ де́нь Су́дный муче́нія и сподо́битъ Ца́рствія Своего́ небе́снаго.

Тропа́рь, гла́съ 4:

Дне́сь, я́ко со́лнце пресвѣ́тлое, возсія́ на́мъ на возду́сѣ всечестна́я ико́на Твоя́, Влады́чице, луча́ми ми́лости мíръ просвѣща́ющи, ю́же вели́кая Россíя, я́ко нѣ́кій да́ръ Боже́ственный свы́ше благоговѣ́йнѣ воспріе́мши, прославля́етъ Тя́, Богома́ти, всѣ́хъ Влады́чицу, и отъ Тебе́ ро́ждшагося Христа́ Бо́га на́шего велича́етъ ра́достно. Ему́же моли́ся, о Госпоже́ Цари́це Богоро́дице, да сохрани́тъ вся́ гра́ды и страны́ христіа́нскія невреди́мы отъ всѣ́хъ навѣ́тъ вра́жіихъ и спасе́тъ вѣ́рою покланя́ющихся Его́ боже́ственному и Твоему́ пречи́стому о́бразу, Дѣ́во Неискусобра́чная.


НА УТРЕНИ,
На Бо́гъ Госпо́дь: тропа́рь, три́жды.

По 1-мъ стихосло́віи сѣда́ленъ, гла́съ 4:

Боже́ственными заря́ми просвѣти́ пою́щія Тя́ и умы́ утверди́, Дѣ́во Всенепоро́чная, крѣ́пкая всего́ мíра Засту́пнице, да торжеству́емъ вси́, любо́вію хва́ляще Тя́ и пресла́вное прише́ствіе Твоего́ о́браза сла́вяще, и мо́лимъ: не преста́й, Дѣ́во, моли́твами Твои́ми спаса́ти рабы́ Твоя́ отъ вся́кія бѣды́, еди́на Благослове́нная.

Сла́ва, и ны́нѣ, то́йже.

По 2-мъ стихосло́віи сѣда́ленъ, гла́съ 3:

Яко звѣзда́ многосвѣ́тлая, взы́де и пресла́вно отъ восто́ка къ за́паду пріи́де Тво́й о́бразъ, Богоневѣ́стная, Сы́на Твоего́ и Бо́га всемо́щною си́лою, озаря́я тмо́ю скорбе́й одержи́мыя, и преще́нія вра́гъ избавля́я, и тѣ́хъ сѣ́ти разруша́я, предста́тельство крѣ́пкое, ору́жіе непобѣди́мое на враги́ мíру всему́ явля́яся: изъ Тебе́ бо всѣ́хъ Влады́ка пло́ть пріи́мъ, я́ко Сы́нъ Ма́терь Тя́ Свою́ и Тво́й пречи́стый о́бразъ прославля́етъ.

Сла́ва, и ны́нѣ, то́йже.

[Поліеле́й.]

Припѣ́въ Богоро́дицѣ: Досто́йно е́сть велича́ти Тя́, Богоро́дице, честнѣ́йшую херуви́мъ и сла́внѣйшую безъ сравне́нія серафи́мъ.

Псало́мъ избра́нный: Бо́же, су́дъ Тво́й царе́ви да́ждь...

По поліеле́и сѣда́ленъ, гла́съ 6:

Безпомо́щнымъ по́мощь Ты́ вои́стинну, Пречи́стая Богома́ти, отсю́ду, смире́нніи, Тобо́ю возвыша́емся, о Тебѣ́, Высо́цѣй, держи́мся: всѣ́мъ Ты́ еси́ Прибѣ́жище и къ Бо́гу всеми́лостивая Хода́таица.

Сла́ва, и ны́нѣ, то́йже.

Степе́нна, 1-й антифо́нъ 4-го гла́са. Проки́менъ, [гла́съ 4]: Помяну́ и́мя Твое́* во вся́комъ ро́дѣ и ро́дѣ. Сти́хъ: Слы́ши, Дщи́, и ви́ждь, и приклони́ у́хо Твое́. Вся́кое дыха́ніе... Ева́нгеліе Луки́, зача́ло 4.

По 50-мъ псалмѣ́ стихи́ра, гла́съ 6:

Дне́сь ра́дуется вѣ́рныхъ мно́жество... [Пи́сана на вели́цѣй вече́рни, на Го́споди воззва́хъ...]

Кано́на два́: 8-го гла́са и 4-го. Тропари́ обои́хъ кано́новъ на двана́десять. Ирмосы́ 1-го кано́на по два́жды.

Кано́нъ пе́рвый, имы́й краегране́сіе сицево́: О, Благода́тная! Ты́ облагодати́ ми препро́ста сло́ва пѣ́снь. Гла́съ 8.
Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

О, Тро́ице Вседержи́тельная и Еди́нице Трисо́лнечная! Ду́шу мою́, и се́рдце, и у́мъ, молю́, просвѣти́вши и благода́тію освяти́вши, къ Боже́ственнѣй Твое́й любви́, Преблага́я, возведи́ и наста́ви благоче́стно пѣ́ти благосе́рдіе Приснодѣ́вы Благослове́нныя.

Блага́го Царя́ Блага́я Ма́ти, Яже всѣ́мъ благопослу́шная въ проше́ніихъ и всеси́льная въ благодѣя́ніихъ, благода́ть свѣ́та Твоего́ и на́мъ возсія́й и облагодати́ дне́сь, о Богоблагода́тная, пѣ́снь Тебѣ́ пѣ́ти начина́ющія.

Лико́мъ а́нгельскимъ вино́вно е́сть ра́дости Твоего́, Влады́чице, настоя́щаго торжества́ славосло́віе: сíи бо дне́сь дви́жутся къ похвале́нію; мы́ же, бре́нніи, что́ Ти принесе́мъ? то́чію усе́рдная благода́рствія.

Арха́нгельскій гла́съ пое́мъ Ти́: ра́дуйся, Чи́стая! а́ще и недосто́йни есмы́. За бла́гость у́бо се́й пріими́, Влады́чице, свѣ́томъ ми́лости Твоея́ на́съ просвѣща́ющи и благода́ть всѣ́мъ подаю́щи.

Другíй кано́нъ, гла́съ 4.
Пѣ́снь 1.

Ирмо́съ: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Да́ждь ми́, Свѣтода́вче Христе́, въ наро́читый де́нь пресла́внаго явле́нія ико́ны, Ро́ждшія Тя́, свѣ́тло торжествова́ти и ве́село во стра́сѣ и ра́дости воспѣва́ти при́сно Тоя́ чудеса́.

Сло́во Бо́жіе Свѣтода́тельное и Прему́дрость Отчую пло́тію, Дѣ́во, ро́ждшая, просвѣти́ глубо́кую тму́ моего́ неразу́мія и сло́во ми́ пода́ждь воспѣ́ти Твоя́ чудеса́.

Дне́сь вѣ́рныхъ собо́ри просвѣща́ются, ерети́ческая же ополче́нія посрамля́ются, ви́дяще ико́ну Твою́, Влады́чице, я́ко со́лнце, по возду́ху ше́ствующу, нече́стія мглу́ потребля́ющу и вѣ́рныя просвѣща́ющу.

Еди́на еси́ Ты́ вели́чіе на́ше и похвала́ съ Бо́гомъ, Богоневѣ́стная, Тобо́ю бо отъ бѣ́дъ спаса́емся, и къ Тебѣ́ прибѣга́емъ, и прилѣ́жно мо́лимся: изба́ви, Влады́чице, рабы́ Твоя́ вѣ́чнаго муче́нія, воспѣва́ющія Твоя́ чудеса́.

Катава́сія: Отве́рзу уста́ мо́я...

Пѣ́снь 3.

Ирмо́съ: Утвержде́й въ нача́лѣ небеса́ ра́зумомъ и зе́млю на вода́хъ основа́вый, на ка́мени мя́, Христе́, за́повѣдей Твои́хъ утверди́, я́ко нѣ́сть свя́тъ, па́че Тебе́, Еди́не Человѣколю́бче.

Гряди́те, вѣ́рніи, на пресла́вное видѣ́ніе, зри́те на высотѣ́ благолѣ́пно сія́ющу пречи́стымъ Свои́мъ о́бразомъ Дѣ́ву Пречи́стую, на́съ благода́тно посѣща́ющу, благовѣ́рно пою́щихъ: нѣ́сть пречи́сты, па́че Тебе́, Влады́чице.

Освяща́ется, Богоро́дице, Твое́ю благода́тію вся́къ у́мъ вѣ́рныхъ и возвыша́ется чу́днымъ ико́ны Твоея́ прише́ствіемъ, ю́же благоче́стно почита́ющихъ и Тебе́ вѣ́рно сла́вящихъ, сподо́би, Влады́чице, на́съ, рабо́въ Твои́хъ, вы́шняго прича́стія.

Да́ждь на́мъ ненавѣ́тно небе́сную ше́ствовати стезю́, Богоневѣ́стная, на боже́ственная дѣя́нія на́съ укрѣпля́ющи, я́ко да Твои́мъ, Дѣ́во, заступле́ніемъ злоко́зненнаго путе́й укло́ньшеся, присносу́щныя сла́вы бу́демъ о́бщницы.

Ангеловъ Творца́, и́стиннаго Свѣ́та Христа́, неизрече́нно изъ Тебе́, Богома́ти, возсія́вшаго луча́ми, омраче́нныя на́ша ду́ши и сердца́ просвѣти́ и благода́тію Твое́ю, о Благода́тная, освяти́, къ го́рняго свѣ́та раче́нію наставля́ющи.

Инъ.

Ирмо́съ: Твоя́ пѣсносло́вцы, Богоро́дице, живы́й и незави́стный Исто́чниче, ли́къ Себѣ́ совоку́пльшія, духо́вно утверди́, въ боже́ственнѣй Твое́й сла́вѣ, вѣнце́въ сла́вы сподо́би.

Христе́ Іису́се, Превѣ́чный Царю́ и Многоми́лостиве, пречестна́го Твоего́ о́браза и ро́ждшія Тя́ Приснодѣ́вы просвѣти́ на́съ явле́ніемъ и пода́ждь на́мъ согрѣше́ній оставле́ніе и отъ бѣ́дъ избавле́ніе.

Егда а́нгелами неви́димо носи́му пречестну́ю Твою́ ико́ну, Влады́чице, и свѣтоза́рно стоя́щу на возду́сѣ лю́діе ви́дѣша, тогда́, просвѣти́вшеся свѣ́томъ Твоея́ ми́лости, ра́дости неизглаго́ланныя испо́лнишася.

О, боголюби́віи святи́теліе и свяще́нницы, ца́ріе и кня́зи и наро́ди вси́, свѣ́тло ликовству́йте дне́сь, я́ко возсія́ на высотѣ́ Заря́ свѣтоно́сная, держа́щи и́стиннаго Свѣ́та, изображе́на пло́тію, съ Ни́мже сни́де къ на́мъ, подаю́щи всему́ мíру просвѣще́ніе.

Твое́ю, Дѣ́во, всечестно́ю ико́ною дре́вле Творе́цъ всѣ́хъ чудодѣ́йствова, спасе́ Ца́рскій гра́дъ отъ иноплеме́нныхъ нахожде́нія; си́це и Россíйстѣй странѣ́ бу́ди, Госпоже́ Цари́це, покро́въ и заступле́ніе, спаса́ющи ю́ отъ всѣ́хъ навѣ́тъ вра́жіихъ.

Сѣда́ленъ, гла́съ 4:

Яко дре́вняго вои́стинну киво́та честнѣ́йши Тво́й пречи́стый о́бразъ, Влады́чице! Па́че бо иле́ктра блиста́яся, повсю́ду неоску́дно лучи́ ми́лости Твоея́ всѣ́мъ, явля́я, простира́етъ и ми́лостивно чту́щія пресла́вное прише́ствіе его́ благода́тію Бо́жіею соблюда́етъ. О не́мже, Влады́чице, мы́, ра́дующеся, усе́рдно пра́зднуемъ и ма́тернее Твое́ къ на́мъ милосе́рдіе прославля́емъ.

Сла́ва, и ны́нѣ, то́йже.

Пѣ́снь 4.

Ирмо́съ: Ты́ моя́ крѣ́пость, Го́споди, Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча, и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти: си́лѣ Твое́й сла́ва, Человѣколю́бче.

Творе́цъ всѣ́хъ и Созда́тель, вседержи́тельною си́лою нося́й вся́ческая, о́бразомъ Свои́мъ боже́ственнымъ и Твои́мъ, Дѣ́во, дне́сь чудоно́снымъ пресла́вно пріи́де, на руку́ Твое́ю, Чи́стая, носи́мь, на спасе́ніе человѣ́комъ и исцѣле́ніе.

Неизрече́нному Бо́жію дарова́нію, ико́нѣ Свѣ́та Христа́ и Пречи́стыя Дѣ́вы, пріиди́те, вѣ́рніи, поклони́мся и съ любо́вію припаде́мъ, вопію́ще: низпосли́, о Благода́телю, ро́ждшія Тя́ ра́ди Приснодѣ́вы Благосе́рдыя, благода́ть и ми́лость на́мъ, рабо́мъ Твои́мъ.

Ангеловъ Цари́це, мы́сленный киво́те, зако́ннаго па́че киво́та пречи́стый Тво́й о́бразъ неизрече́нными чудесы́ и благода́тьми Бо́гъ украси́ и просла́ви и а́нгеломъ почита́ти того́ повелѣ́: съ ни́миже о на́съ Ему́, о Всепѣ́тая, моли́ся, сла́вящихъ спаси́тельное Его́ смотре́ніе, и Твое́ е́же бы на́мъ спасе́ніе улучи́ти.

Яже по благода́ти дарова́нная отъ Бо́га Помо́щнице на́мъ всѣ́мъ, христіа́номъ, Того́ моли́, Всеблага́я и Всенепоро́чная, я́ко да пре́зритъ на́ша безчи́сленная согрѣше́нія и изба́витъ пла́меннаго томле́нія, и тмы́ кромѣ́шнія, и му́ки вся́кія.

Инъ.

Ирмо́съ: Сѣдя́й въ сла́вѣ на Престо́лѣ Божества́ во о́блацѣ ле́гцѣ, прíиде Іису́съ Пребоже́ственный, Нетлѣ́нною Дла́нію и спасе́ зову́щія: сла́ва, Христе́, си́лѣ Твое́й.

Земля́ у́бо вся́ дне́сь да возвесели́тся, вку́пѣ же и возду́хъ, и мо́ре да кропи́тъ ра́дованіе, я́ко всечестна́го о́браза Богома́тере чуде́снымъ ше́ствіемъ Россíйская страна́ пресла́вно озари́ся.

Раболѣ́пно слу́жатъ и а́нгельстіи чи́нове Тебѣ́, всѣ́хъ Цари́цѣ, и благоговѣ́йно почита́ютъ всечестну́ю Твою́ ико́ну, воспѣва́юще Тя́, Пресвяту́ю Дѣ́ву, мы́ же, смире́нніи, ка́ко Тебе́, Всечи́стую, досто́йно пѣ́ти возмо́жемъ?

Арха́нгельскую пѣ́снь, — е́же ра́дуйся, — Тебѣ́ зове́мъ, Богоневѣ́сто, — Госпо́дь съ Тобо́ю, ра́дуйся, ра́досте а́нгеловъ и всѣ́хъ человѣ́ковъ, сла́вящихъ Тя́, вои́стинну весе́ліе, спаси́ ду́ши пою́щихъ Тя́, Богоро́дице Чи́стая.

О, Богороди́тельнице, ра́дости Пода́тельнице, вѣ́рою сла́вящія Тя́ и отъ души́ пою́щія ра́дости неизрече́нныя испо́лни и Свѣ́та невече́рняго сподо́би, Дѣ́во Благода́тная, Влады́чице.

Пѣ́снь 5.

Ирмо́съ: Утренюетъ ду́хъ мо́й къ Тебѣ́, Бо́же, отъ Отца́ рожде́нному неизрече́нно и воздви́гнувшему ро́гъ спасе́нія на́мъ.

Ты́, о Благода́тная, въ ми́лостивомъ Твое́мъ дне́сь благоволе́ніи боголѣ́пнымъ явле́ніемъ страну́ на́шу благода́тно просвѣти́ла еси́ и та́инственное свѣ́та Твоего́ просвѣще́ніе мíру низпосла́ла еси́, къ свѣ́ту вы́шнія сла́вы, Богоро́дице, вѣ́рныя возводя́щи.

Омрачи́хомся по́мыслы, отягчи́хомся грѣхи́, недоумѣ́емъ свѣтоно́сныя благода́ти и ми́лости Твоея́ исповѣ́дати, Влады́чице, но, о Пресвята́я Дѣ́во, просвѣти́ на́съ и обогати́ та́инственными Твои́ми дарова́ніи боже́ственныхъ жела́ній, къ свѣ́ту пра́ваго пути́ направля́ющи.

Благоче́стно отвсю́ду, о Богома́ти, къ пречестнѣ́й Твое́й ико́нѣ притека́ющія, и усе́рдно покланя́ющіяся, и вѣ́рно вездѣ́ Тя призыва́ющія предвари́, отъ бѣ́дъ вся́кихъ спаса́ющи, и лю́тыхъ неду́гъ избавля́ющи, и ду́хи лука́выя прогоня́ющи, тишину́ и здра́віе подаю́щи всѣ́мъ, Влады́чице.

Лю́тыми помышле́ніи и скве́рными воспомина́ніи отъ лука́выхъ враго́въ стужа́емыхъ зѣ́льнѣ, не оста́ви на́съ, ниже́ пре́зри, Богороди́тельнице, но осѣни́ Твое́ю благода́тію, покрыва́ющи отъ си́хъ, и заступа́ющи, и спаса́ющи отъ всѣ́хъ и́хъ навѣ́тъ, о Богоблаже́нная!

Инъ.

Ирмо́съ: Ужасо́шася вся́ческая о Боже́ственнѣй сла́вѣ Твое́й: Ты́ бо, неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га, и родила́ еси́ Безлѣ́тнаго Сы́на, всѣ́мъ, воспѣва́ющимъ Тя́, ми́ръ подава́ющая.

Въ пусты́ни явле́нно Тебе́, Богома́ти, со святи́телемъ благоговѣ́йный узрѣ́ти му́жъ сподо́бися и благоволе́нія Твоего́ глаго́лы отъ Тебе́, Цари́це, воспрія́тъ, на бо́льшее утвержде́ніе и въ по́льзу мíру спасе́нія.

Окая́ненъ у́бо а́зъ, Всечи́стая, и недосто́инъ таковы́я ны́нѣ благода́ти, е́же Тя́ ви́дѣти, но поне́ въ бу́дущемъ сподо́би мя́ узрѣ́ти Тя́, и Сы́на Твоего́ усрѣ́сти, гряду́ща во сла́вѣ, и гла́съ Боже́ственный услы́шати, зову́щь во Ца́рство небе́сное.

Прибѣга́емъ къ Твое́й, Дѣ́во, бла́гости, и о́чи серде́цъ на́шихъ воспуща́емъ къ Тебѣ́, Чи́стая, и, съ пла́чемъ колѣ́на преклоня́юще, мо́лимъ Тя́: не пре́зри на́шего воздыха́нія и бу́ди на́мъ покро́въ и помо́щница въ де́нь Су́дный.

Еди́на еси́ всѣ́хъ предста́тельница христіа́нъ, Богома́ти Пречи́стая, услы́ши на́ше моле́ніе, воззри́ на ны́, Всепѣ́тая, спаси́ гра́дъ и оби́тель Твою́ и озари́ ста́до Твое́ заре́ю благода́ти Твоего́ заступле́нія.

Пѣ́снь 6.

Ирмо́съ: Моли́тву пролію́ ко Го́споду и Тому́ возвѣщу́ печа́ли моя́, я́ко зо́лъ душа́ моя́ испо́лнися и живо́тъ мо́й а́ду прибли́жися, и молю́ся, я́ко Іо́на: отъ тли́, Бо́же, возведи́ мя.

Ае́ръ простра́нный и земля́ на́ша, Цари́це, въ пресла́вномъ Твоея́ ико́ны прише́ствіи чуде́съ и Боже́ственныхъ даро́въ благода́тію Твое́ю испо́лнися, во утвержде́ніе благоче́стія и всѣ́хъ вѣ́рныхъ, Всепѣ́тая, е́юже дне́сь и супоста́ты низлага́ются и сла́вящіи Тя́ крѣ́пцѣ утвержда́ются.

Гра́де Бо́жій, селе́ніе Свято́е, Дѣ́во Богоневѣ́стная, сохрани́ отъ сопроти́вныхъ нахожде́нія и отъ всѣ́хъ навѣ́тъ вра́жіихъ святы́й до́мъ Тво́й и вся́ гра́ды и страны́ христіа́нскія, любо́вію пою́щія Тя́ и вѣ́рно почита́ющія пречи́стый о́бразъ Тво́й.

Освяще́ніе, здра́віе и спасе́ніе всегда́ подава́й душа́мъ же и тѣлесе́мъ на́шимъ, о Ма́ти Бо́жія, благоче́стно покланя́ющимся ико́нѣ Твое́й боже́ственнѣй, и усты́ и се́рдцемъ благоговѣ́йно ю́ со стра́хомъ цѣлу́ющимъ, и вѣ́рою отъ души́ Тя́ пѣсносло́вящимъ.

Держа́вный покро́въ и стѣ́ну необори́му стяжа́вше Тя́, Приснодѣ́во Богоро́дице, упова́ніе на Тя́ съ Бо́гомъ возлага́емъ, вѣ́рніи, и прилѣ́жно мо́лимъ: си́лою Твое́ю стрѣ́лы вра́жія и ко́зни вся́ бѣсо́вскія не́мощны, я́ко младе́нчески, покажи́ и недѣ́йственны, крѣ́пкая на́ша Помо́щнице.

Инъ.

Ирмо́съ: Боже́ственное сіе́ и всечестно́е соверша́юще пра́зднество, богому́дріи, Богома́тере, пріиди́те, рука́ми воспле́щимъ, отъ Нея́ ро́ждшагося Бо́га сла́вимъ.

О, преди́внаго Твоего́ чудесе́, Влады́чице! Яко за преслуша́ніе Твоего́ повелѣ́нія ужа́сно человѣ́къ съ главы́ церко́вныя восхище́нъ бы́въ, на земли́ невреди́мь обрѣ́теся, ми́лостію Твое́ю, Всеми́лостивая.

Никто́же та́ко преслу́ша Боже́ственная повелѣ́нія, я́коже а́зъ, окая́нный. Тѣ́мъ, Ти́ припа́дая, молю́ся, Влады́чице: пре́жде да́же до конца́ не поги́бну, настави́ мя́ на и́стинный пу́ть и спаси́ мя, Чи́стая.

Ты́, о Богома́ти, ро́ждшая Претерпѣ́вшаго на́съ ра́ди на дре́вѣ кре́стнѣмъ распя́тіе, умоли́ при́сно на́мъ, страда́ніе Его́ свято́е по́мнящимъ, во́лю Его́ боже́ственную твори́ти и вѣ́чныхъ бла́гъ наслѣ́дниками бы́ти.

Влады́чице, Дѣ́во Чи́стая, изба́ви на́съ лю́тыхъ всѣ́хъ, умоля́ющи Пригвозди́вшаго на Крестѣ́ грѣхи́ на́ша, и сподо́би на́съ досто́йно одесну́ю Его́ ста́ти, егда́ пріи́детъ во сла́вѣ Свое́й.

Конда́къ, гла́съ 8:

Притеце́мъ, лю́діе, къ Дѣ́вѣй Богоро́дицѣ Цари́цѣ, благодаря́ще Христа́ Бо́га, и, къ Тоя́ чудотво́рнѣй ико́нѣ, уми́льно взира́ющи, припаде́мъ и возопіе́мъ Ей: о Влады́чице Марíе, присѣти́вши страну́ сію́ Твоего́ честна́го о́браза явле́ніемъ чуде́сно, спаса́й въ ми́рѣ и благовре́менствѣ вѣ́рнаго Импера́тора на́шего и вся́ христіа́ны, наслѣ́дники показу́ющи небе́сныя жи́зни, Тебѣ́ бо вѣ́рно зове́мъ: ра́дуйся, Дѣ́во, мíра спасе́ніе.

Икосъ:

Пречу́дное явле́ніе Богома́тере ви́дяще, на высоту́ добродѣ́телей взы́демъ и у́мъ на не́бо возведе́мъ. Сего́ бо ра́ди небоше́ственнѣ пріи́де, да привлече́тъ къ высотѣ́ вопію́щія Ей си́це: ра́дуйся, благослове́нная Дѣ́во, отъ всѣ́хъ родо́въ Бо́гомъ избра́нная; ра́дуйся, Небе́сная Цари́це, Го́спода Бо́га Ма́ти и Творца́ вся́ческихъ. Ра́дуйся, всера́достное а́нгеломъ пѣ́ніе; ра́дуйся, всежела́тельное всего́ мíра зрѣ́ніе. Ра́дуйся, неподви́жимое вѣ́ры благоче́стія основа́ніе; ра́дуйся, всесвѣ́тлое благода́ти позна́ніе. Ра́дуйся, Бо́жіе къ земны́мъ благоволе́ніе; ра́дуйся, земны́хъ къ Бо́гу возведе́ніе. Ра́дуйся, озло́бленнымъ душа́мъ утѣше́ніе; ра́дуйся, всѣ́мъ вѣ́рнымъ ско́рое поможе́ніе. Ра́дуйся, дарова́нная отъ Бо́га Предста́тельнице ро́ду христіа́нскому, его́же и соблюда́й прилѣ́жно отъ вся́кихъ бѣ́дъ и зо́лъ, да зове́мъ Ти́: ра́дуйся, Дѣ́во, вѣ́рнымъ спасе́ніе.

Пѣ́снь 7.

Ирмо́съ: Бо́жія снизхожде́нія о́гонь устыдѣ́ся въ Вавило́нѣ иногда́, сего́ ра́ди о́троцы въ пещи́, ра́дованною ного́ю, я́ко во цвѣ́тницѣ, лику́юще поя́ху: благослове́нъ еси́, Бо́же оте́цъ на́шихъ.

Ангеломъ говѣ́йный о́бразъ Тво́й, Влады́чице, неизрече́нною при́сно благода́тію сія́етъ и си́лою: дне́сь бо того́ дарова́ніи земны́я просвѣща́еши, и къ небе́снымъ наставля́еши, и къ вѣ́чному животу́ устроя́еши за неизглаго́ланную Твою́ бла́гость, Богоблагода́тная.

Твоего́ боголѣ́пнаго явле́нія, и пресла́внаго ико́ны прише́ствія, и чуде́съ пучи́ны, Чи́стая, витíйствующихъ уста́ ника́коже возмога́ютъ исповѣ́дати; мы́ же, гру́біи, что́ возглаго́лемъ? то́чію: поми́луй и спаси́ на́съ, о Всеми́лостивая Влады́чице!

Извѣ́стная вѣ́рныхъ Помо́щнице и всѣ́хъ благи́хъ Пода́тельнице, пріими́ на́съ, вѣ́рно припа́дающихъ и любо́вію вопію́щихъ Ти́: поми́луй на́съ, Госпоже́, поми́луй на́съ, я́коже дне́сь, та́ко и во о́ный вѣ́къ, бу́ди на́мъ Помо́щница и Засту́пница.

Ма́ти Бо́жія Милосе́рдая, ми́лости Твоея́ две́ри дне́сь отве́рзи на́мъ и отъ у́стъ мы́сленныхъ волко́въ исхити́, хотя́щихъ на́съ поглоти́ти и до конца́ погуби́ти; поми́луй, мо́лимъ Тя́, о Влады́чице, поми́луй, не отврати́ посра́мленныхъ ра́бъ Твои́хъ.

Инъ.

Ирмо́съ: Не послужи́ша тва́ри богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́.

Единоча́дый Тво́й Сы́нъ и Бо́гъ всѣ́хъ, Богома́ти, пречи́стый Тво́й о́бразъ невреди́мь сохрани́ во пла́мени, о, чудесе́! Благода́тію па́че со́лнца обрѣ́теся сія́ющь, и вѣ́рныя просвѣща́ющь, вѣ́рою пою́щія: Бо́же, благослове́нъ еси́.

Небе́сніи чи́нове веселя́тся съ земноро́дными, Богоро́дице, въ свѣ́тломъ торжествѣ́ Твое́мъ, е́же соверша́ющія ны́ и со стра́хомъ предстоя́щія предъ пречи́стымъ Твои́мъ о́бразомъ просвѣти́ свѣ́томъ сія́нія Твоего́, Пречи́стая, и вся́ спаси́.

Еди́наго отъ Тро́ицы Бо́га Сло́ва, Царя́ Небе́снаго, пло́тію, Цари́це, родила́ еси́, Того́ моли́, Влады́чице, Импера́тору на́шему [и́мярекъ] пода́ти одолѣ́ніе на проти́вныя и всѣ́мъ вѣ́рнымъ по́мощь, грѣхо́въ оставле́ніе и душа́мъ спасе́ніе.

Рабы́ Твоя́, Чи́стая, пою́щія Тя́ и вѣ́рою несумнѣ́нною моля́щіяся Тебѣ́, свѣтода́тельною Твое́ю и Боже́ственною осѣни́ благода́тію, я́ко Благодѣ́теля всѣ́хъ ро́ждшая, и покры́й и сохрани́ отъ всѣ́хъ навѣ́тъ вра́жіихъ.

Пѣ́снь 8.

Ирмо́съ: Покрыва́яй вода́ми превы́спренняя Своя́, полага́яй мо́рю предѣ́лъ песо́къ, и содержа́й вся́, Тя́ пое́тъ со́лнце, Тя́ сла́витъ луна́, Тебѣ́ прино́ситъ пѣ́снь вся́ тва́рь, я́ко Содѣ́телю всѣ́хъ во вѣ́ки.

Изря́дніи чи́нове небе́сніи благоче́стно благоговѣ́ютъ пречи́стому Твоему́ о́бразу, Всечи́стая, и пречу́дному Его́ прише́ствію, подъ со́лнцемъ пресла́вну показа́вшуся и ро́дъ правовѣ́рный воздви́гшу пѣ́ти и сла́вити Сы́на Твоего́, я́ко Содѣ́теля всѣ́хъ во вѣ́ки.

Пресла́вная дне́сь пою́ще, любе́зно а́нгеломъ говѣ́йной Твое́й ико́нѣ покланя́емся, благоговѣ́юще, о Госпоже́ Цари́це! Сла́вящаго Тя́ Импера́тора на́шего [и́мярекъ], Боже́ственною Твое́ю благода́тію осѣни́, и на враги́ укрѣпи́, и ца́рство Его́ ми́рно соблюди́.

Ра́дости вина́ Всеблагослове́нная, ра́дуйся, Всенепоро́чная, ра́дуйся, Благода́тная, держа́ва на́ша и огражде́ніе и спаси́тельное прибѣ́жище, спаси́ ны, рабы́ Твоя́, не иму́щія па́че Тебе́ къ Бо́гу по́мощи, на Тя́ бо надѣ́емся и Тебе́ пое́мъ во вѣ́ки.

Еди́ну Тя́ жи́зни на́шея стяжа́хомъ съ Бо́гомъ Храни́тельницу и крѣ́пку наде́жду спасе́нія: мо́лимъ Тя́, о Благосе́рдая, и по кончи́нѣ хода́тайствовати о на́съ, я́ко да бу́дущихъ стяза́ній изба́вимся и ми́лостива обря́щемъ Сы́на Твоего́ и Бо́га въ де́нь Су́дный.

Инъ.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки.

О, пресла́вныхъ чуде́съ Твои́хъ, Чи́стая! Яко зда́тели святы́я це́ркве Твоея́, подъ ка́меніемъ тридне́вно бы́вшіи, обрѣто́шася жи́ви и безвре́дни, покро́вомъ Твои́мъ соблюде́ни, Тебѣ́, всѣ́хъ Цари́цѣ, возсыла́юще гла́сы похва́льныя.

Жи́знь вмѣ́сто сме́рти дарова́ла еси́, Богоро́дице, ме́ртвенному существу́. Тѣ́мже и на́съ, умерщвле́нныхъ грѣхи́ мно́гими, Богоневѣ́сто, неврежде́нны отъ вра́гъ соблюди́ и къ жи́зни лу́чшей возведи́, спаса́ющи ду́ши на́ша.

Дне́сь испо́лнишася ра́дости и весе́лія вси́ вѣ́рніи о ико́нѣ Твое́й, Богоро́дице, я́ко въ че́люстѣхъ сме́рти бы́вшимъ яви́лася еси́ жи́зни Вино́вница и исто́чникъ приснотеку́щій, цѣле́бныя да́ры всѣ́мъ точа́щій и спасе́ніе подаю́щій.

Изря́дно воспѣ́ти пречи́стаго Твоего́ о́браза и ро́ждшагося изъ Тебе́ Младе́нца, и́стинна же Бо́га, чу́дныя ико́ны пресла́вное прише́ствіе совоку́пльшихся люде́й отвсю́ду, Всепѣ́тая, моле́ніе пріими́ и проше́нія испо́лни.

Пѣ́снь 9.

Ирмо́съ: Ужасе́ся о се́мъ не́бо, и земли́ удиви́шася концы́, я́ко Бо́гъ яви́ся человѣ́комъ пло́тски и чре́во Твое́ бы́сть простра́ннѣйшее небе́съ. Тѣ́мъ Тя́, Богоро́дицу, Ангеловъ и человѣ́къ чинонача́лія велича́ютъ.

Про́ста пути́ по ае́ру свѣтопрія́тному ико́на Твоя́, Влады́чице, стезю́ проходя́щи, богодви́жимо и свѣтолѣ́пно неизслѣ́димы стези́ творя́щи, вѣ́рныя въ поднебе́снѣй благода́тію озари́, вѣ́рою вопію́щія: вои́стинну честнѣ́йши всѣ́хъ еси́, Дѣ́во Чи́стая.

Сло́ва витíйствомъ превысо́кихъ Твои́хъ, Чи́стая, чуде́съ ника́коже по достоя́нію украси́ти удо́бни есмы́, то́чію усе́рднѣ мо́лимъ Тя́, Цари́це: да мо́лиши Сы́на Твоего́, Влады́ку и Царя́ всѣ́хъ, дарова́вшаго на́мъ Тебе́, пресла́вную Помо́щницу, сподо́бити на́съ небе́снаго Своего́ Ца́рствія.

Пѣ́снь благода́рственно пѣ́нія за неизрече́нное Твое́ милосе́рдіе, о Богоблагода́тная, отъ на́съ пріими́, проше́нія на́ша въ по́льзу исполня́ющи, и къ высотѣ́ го́рнѣй всѣ́хъ возведи́, вѣ́рно бо Ти́ зове́мъ: вои́стинну вы́шши всѣ́хъ еси́, Дѣ́во Всенепоро́чная.

Ро́ди вси́, ра́достно блажи́мъ Тя́, Богоро́дице, я́ко ра́дости вся́ ны́ испо́лнила еси́ пресла́внымъ прише́ствіемъ ико́ны Твоея́, Пречи́стая. Ейже дне́сь покланя́ющеся, уми́льно мо́лимъ Тя́: не забу́ди, Влады́чице, Твои́хъ рабо́въ сподо́бити въ бу́дущемъ вѣ́цѣ избра́нныхъ ра́дости.

Инъ.

Ирмо́съ: Вся́къ земноро́дный да взыгра́ется, Ду́хомъ просвѣща́емь, да торжеству́етъ же безпло́тныхъ умо́въ естество́, почита́ющее свяще́нное торжество́ Богома́тере, и да вопіе́тъ: ра́дуйся, Всеблаже́нная Богоро́дице, Чи́стая Приснодѣ́во.

Явле́нію, Влады́чице, всечестны́я Твоея́ ико́ны кто́ не удиви́тся или́ кто́ не почуди́тся? По возду́ху бо сію́, я́ко нѣ́кій да́ръ свѣтоно́сный, низпосла́ла еси́ земли́ Россíйстѣй, ра́достно пою́щей Тя́ и вѣ́рно велича́ющей.

Ра́дость мíру, Дѣ́во, неизглаго́ланную дарова́вши явле́ніемъ пречи́стыя Твоея́ ико́ны, изба́ви, Влады́чице, отъ вся́кія печа́ли вѣ́рою покланя́ющіяся е́й и со стра́хомъ цѣлу́ющія ю́: о Пресвята́я! вся́ спаси́ и поми́луй и Ца́рствія небе́снаго сподо́би.

Ро́ждшая, Влады́чице, Человѣколю́бца Бо́га, за человѣколю́біе посѣти́ла еси́ на́съ боже́ственною Твое́ю ико́ною, къ не́йже всегда́ притека́юще и благолѣ́піе ея́ зря́ще, Тебѣ́ уми́льно вопіе́мъ: спаса́й при́сно, Богоро́дице, достоя́ніе Твое́.

Устна́ми смире́нными принесо́хъ Ти́ препро́стое сіе́, Всепѣ́тая, пѣ́ніе: поне́же гру́бъ е́смь, многогрѣ́шный, и недосто́инъ по достоя́нію воспѣ́ти Тя́, но отъ усе́рдія на Твоя́ щедро́ты надѣ́яся, я́ко Спаси́теля всего́ мíра родила́ еси́, не возгнуша́йся, Цари́це, пріими́ сіе́ и спаси́ мя.

Свѣти́ленъ. Подо́бенъ: Жены́, услы́шите.

Пречи́стый о́бразъ Тво́й, и́мже присѣти́ла еси́ на́съ, Богоотрокови́це Дѣ́во, чту́ще, пра́зднуемъ сего́ ны́нѣ прише́ствіе, отъ него́ благода́тію Сы́на Твоего́ и Твое́ю пріе́млюще скорбе́й, и бѣ́дъ, и напа́стей избавле́ніе, Ма́ти Бо́га Вы́шняго.

Сла́ва, и ны́нѣ, то́йже.

На хвали́техъ стихи́ры, гла́съ 8. Подо́бенъ: О, пресла́внаго чудесе́!

О, пресла́внаго чудесе́!* Всемíрная ра́дость* свы́ше просія́ на́мъ — ико́на Богома́тере,* подаю́щи всему́ мíру просвѣще́ніе,* и благоче́стію утвержде́ніе,* и вѣ́рнымъ спасе́ніе,* Бо́жіе сіе́ дарова́ніе земны́мъ дарова́ся.* О не́мже ра́дующеся, Тебе́, Христе́, мо́лимъ:* спаси́ ду́ши на́ша, я́ко Милосе́рдъ. [Два́жды.]

О, пресла́внаго чудесе́!* Превы́ше всѣ́хъ стра́нъ Россíйская земля́ почте́ся* отъ Вы́шняго промышле́нія,* и́бо та́, а не и́на Его́ благода́тію сподо́бися* сію́ прія́ти ико́ну Богома́тере,* я́ко небе́сный да́ръ свѣтолу́чный,* пресла́вно Бо́гомъ свы́ше по́сланный.* О не́мже ра́дующися,* къ Тебѣ́, Христе́, уми́льно вопіе́тъ:* спаси́, Бла́же, ду́ши на́ша, я́ко Милосе́рдъ.

Пресла́вно, Богоро́дице, во всѣ́хъ страна́хъ* Тобо́ю хва́лится оби́тель Твоя́, Богоневѣ́сто,* я́ко имѣ́етъ въ себѣ́ чудотво́рную Твою́ ико́ну,* чу́дно по возду́ху и пресла́вно а́нгелы принесе́нную,* отъ нея́же неизрече́нныя цѣльбы́ пріе́млюще,* благода́рственная вопіе́мъ Тебѣ́,* уми́льно моля́ще Тя́:* Пресвята́я Дѣ́во,* спаси́ ду́ши на́ша, я́ко Милосе́рдая.

Сла́ва, и ны́нѣ, гла́съ 2:

Якоже иногда́ Ца́рскій гра́дъ, имѣ́я ико́ну Твою́, Дѣ́во Пречи́стая, Бо́жіимъ и Твои́мъ посо́біемъ побѣжда́я проти́вныя, ра́довашеся, та́ко и ны́нѣ Россíйская страна́, ди́вно стяжа́вши о́бразъ Тво́й, Госпоже́, во свое́ заступле́ніе, утвержда́ющися, торжеству́етъ ве́село. Вельми́ же красу́ется и пречестна́я оби́тель Твоя́, имѣ́ющи Тя́ съ Бо́гомъ покро́въ и тве́рдое огражде́ніе отъ всѣ́хъ нахожде́ній вра́жіихъ, це́рковь же Твоя́, Богоро́дице, я́коже иногда́ Влахе́рнская, пречи́стымъ Твои́мъ о́бразомъ свѣ́тится, и пресла́вными чудесы́ просвѣща́ется, и, ра́дующися, духо́вно лику́етъ, Влады́чице, со всѣ́ми вѣ́рными зову́щи дне́сь: ра́дуйся, Пресвята́я Дѣ́во, мое́ благолѣ́піе, и похвало́, и вѣ́чное весе́ліе. Ты́ мя́ преди́вными чудесы́ обогаща́еши и боже́ственными дарова́ніи. Ты́ еси́, Влады́чице, исцѣле́ній исто́чникъ неисчерпа́емый, и су́щимъ въ бѣда́хъ утѣше́ніе, и всѣ́мъ вѣ́рнымъ покро́въ и спасе́ніе.

Славосло́віе вели́кое, [ектеніи́] и отпу́стъ, и ча́съ 1-й.



НА ЛИТУРГІИ,

Слу́жба вся́ Богоро́дицѣ: [Блаже́нна отъ кано́на пе́рваго пѣ́снь 3-я и отъ втора́го пѣ́снь 6-я. Проки́менъ, гла́съ 3, пѣ́снь Богоро́дицы: Вели́читъ душа́ Моя́ Го́спода,* и возра́довася ду́хъ Мо́й о Бо́зѣ, Спа́сѣ Мое́мъ. Сти́хъ: Яко призрѣ́ на смире́ніе рабы́ Своея́, се́ бо отны́нѣ ублажа́тъ Мя́ вси́ ро́ди. Апо́столъ къ Филипписíемъ, зача́ло 240. Аллилу́ія, гла́съ 8: Слы́ши Дщи́ и ви́ждь, и приклони́ у́хо Твое́. Сти́хъ: Лицу́ Твоему́ помо́лятся бога́тіи лю́дстіи. Ева́нгеліе Луки́, зача́ло 54. Прича́стенъ: Ча́шу спасе́нія пріиму́, и и́мя Госпо́дне призову́.]

Источникъ: Минíа, мѣ́сяцъ Іу́ній. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 178 – 189 об.

/ Къ оглавленію раздѣла /


Наверхъ / Къ титульной страницѣ

0