Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 15 декабря 2017 г. Сейчасъ на порталѣ посѣтителей - 5.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́нія въ 25-й де́нь.
Святы́я преподобному́ченицы Февро́ніи.

[ВЕЧЕРЪ,]
На Го́споди воззва́хъ: стихи́ры Предте́чи, гла́съ 4. Самогла́сны:

Дне́сь гла́съ Сло́ва,* гла́съ, за невѣ́ріе держи́мый, разрѣша́етъ оте́чь* и Це́ркви явля́етъ благоча́діе,* соу́зы непло́дствія разрѣша́я ма́терни.* Свѣти́льникъ Свѣ́та предгряде́тъ,* заря́ Со́лнца пра́вды возвѣща́етъ прише́ствіе* въ созда́ніе всѣ́хъ и спасе́ніе ду́шъ на́шихъ.

Анато́лія: Бо́жію Сло́ву хотя́щу отъ Дѣ́вы роди́тися,* а́нгелъ отъ ста́рческихъ чре́слъ происхо́дитъ,* вели́кій въ рожде́нныхъ жена́ми* и проро́ковъ превы́шшій:* подоба́ше бо боже́ственныхъ веще́й* пресла́внымъ бы́ти нача́ломъ,* кромѣ́ во́зраста исча́діе* и безъ сѣ́мене зача́тіе.* Творя́й чудеса́ во спасе́ніе на́ше,* сла́ва Тебѣ́.

Ины стихи́ры святы́я, гла́съ то́йже. Подо́бенъ: Да́лъ еси́ зна́меніе.

Страда́ніе претерпѣ́ла еси́* твои́мъ боре́ніемъ сугу́бо,* Февро́ніе всехва́льная,* по́ты воздержа́нія муче́нія кро́вь смѣси́вши.* Тѣ́мже и вѣне́цъ сугу́бъ* Благодѣ́тель тебѣ́ дарова́,* къ Нему́же и возшла́ еси́, испещре́нна свѣ́тло,* я́ко дѣ́ва всенепоро́чная* и я́ко му́ченица непобѣди́мая.

Добро́тою тѣлесе́* красоты́ боже́ственныя души́ твоея́ стеко́шася,* я́ко кри́нъ, просія́ла еси́* во оби́телехъ преподо́бныхъ, убѣле́на* и кро́вными то́ки обагре́нна,* невѣ́сто всенепоро́чная.* Тѣ́мже тя́ и небе́сный кра́сный прія́тъ невѣ́стникъ* и черто́гъ неразори́мый,* я́ко дѣ́ву и му́ченицу.

Окрестъ тебе́ пріи́де,* Февро́ніе всехва́льная,* избавля́яй а́нгелъ,* отъ младе́нства бо Го́спода боя́щися яви́ся* и возложена́ я́ко возложе́ніе че́стно,* соблюде́но Вседержи́телю.* Тѣ́мже попра́ла еси́ Сели́ново безу́міе* и усе́рдно востекла́ еси́* ко Христу́, Жениху́ твоему́.

Сла́ва, и ны́нѣ, гла́съ 8:

Ви́ждь Елисаве́ть къ Дѣ́вѣ Марíи глаго́лющу: что́ пришла́ еси́ ко мнѣ́, Ма́ти Го́спода моего́? Ты́ Царя́ но́сиши, и а́зъ во́ина; Ты́ Законода́вца, и а́зъ законоположи́теля; Ты́ Сло́ва, и а́зъ гла́съ, проповѣ́дающъ Ца́рство небе́сное.

На стихо́внѣ окто́иха. Сла́ва, и ны́нѣ, гла́съ 6:

Елисаве́ть зача́тъ Предте́чу благода́ти, Дѣ́ва же Го́спода сла́вы. Цѣлова́стѣся о́бѣ ма́тери, и младе́нецъ взыгра́ся, вну́трь бо ра́бъ хваля́ше Влады́ку. Удиви́вшися же, ма́ти Предте́чева нача́тъ вопи́ти: отку́ду мнѣ́ се́, да Ма́ти Госпо́да моего́ пріи́де ко мнѣ́? Да спасе́тъ лю́ди отча́янныя Имѣ́яй ве́лію ми́лость.

Тропа́рь, гла́съ 4:

Проро́че и Предте́че прише́ствія Христо́ва, досто́йно восхвали́ти тя́ недоумѣ́емъ мы́, любо́вію чту́щіи тя́: непло́дство бо ро́ждшія и о́тчее безгла́сіе разрѣши́ся сла́внымъ и честны́мъ твои́мъ рождество́мъ, и воплоще́ніе Сы́на Бо́жія мíрови проповѣ́дуется.

Тропа́рь святы́я, гла́съ то́йже:

Агница Твоя́, Іису́се, Февро́нія, зове́тъ ве́ліимъ гла́сомъ: Тебе́, Женише́ мо́й, люблю́, и Тебе́ и́щущи, страда́льчествую, и сраспина́юся, и спогреба́юся креще́нію Твоему́, и стражду́ Тебе́ ра́ди, я́ко да ца́рствую въ Тебѣ́, и умира́ю за Тя́, да и живу́ съ Тобо́ю; но, я́ко же́ртву непоро́чную, пріими́ мя, съ любо́вію поже́ршуюся Тебѣ́; тоя́ моли́твами, я́ко Ми́лостивъ, спаси́ ду́ши на́ша.


НА УТРЕНИ,
Еди́нъ кано́нъ окто́иха, и Предте́чи на 4, и святы́я на 4.

Кано́нъ Предте́чи, Іоа́нна мона́ха, гла́съ 8.
Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Ангела небе́сна имѣ́въ, боже́ственнаго своего́ рождества́ прозна́менающа, сла́вне, зе́менъ а́нгелъ яви́лся еси́ и небе́сный человѣ́къ, Предте́че.

Высото́ю житія́ па́че есте́ственна не́бо яви́лся еси́ и тве́рдь слове́сная, Христа́ у́бо, я́коже со́лнце, посредѣ́, добродѣ́тели же, я́коже звѣ́зды, стяжа́въ.

Честна́ сме́рть твоя́, му́дре, предъ Го́сподемъ, поже́ршимся на́съ ра́ди: и му́жескій по́лъ, я́ко а́гнецъ слове́сенъ, носи́мь.

Богоро́диченъ: Въ Тя́ все́лься, Изба́витель изгна́, Отрокови́це, все́льшійся въ мя́ многосле́зный вои́стинну грѣ́хъ и рая́ жи́теля показа́.

Инъ кано́нъ святы́я, творе́ніе Ѳеофа́ново, его́же краегране́сіе: Пѣ́сньми тя́ пою́ му́дренно, Февро́ніе. Гла́съ то́йже.
Пѣ́снь 1. Ирмо́съ то́йже.

Побо́рнице сла́вы Христо́вы, пода́ждь ми́ благода́ть, Февро́ніе, и просвѣще́ніе твое́ восхвали́ти свѣтоно́сное ра́достно, чи́стая, торжество́.

Поуче́ніемъ сме́ртнымъ вы́ну просвѣща́ющи, му́ченице Февро́ніе, твою́ ду́шу, возшла́ еси́ къ высотѣ́ муче́нія, томле́ньми прине́сшися Христу́.

Обно́вльши болѣ́зньми воздержа́нія ни́ву, му́ченице, се́рдца твоего́ я́сно, муче́ній прія́ла еси́ вѣнцы́, страда́льчески Бо́гу на́шему пою́щи.

Богоро́диченъ: Ма́ніемъ вся́ содѣва́яй изъ Тебе́, Богома́ти, воплоти́ся, Его́же благоче́стно жела́ющи, отрокови́ца Февро́нія му́ченически Тому́ приведе́ся.

Пѣ́снь 3.

Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.

Непло́днаго чре́ва многоцвѣ́тное прозябе́ніе, непло́дную ду́шу мою́ покажи́ многопло́дну до́брыми прозябе́ніи, я́коже виногра́дъ расту́щь, добродѣ́телей точа́щь сла́дкое гро́здіе.

Свяще́ннаго вои́стинну ко́рене и чи́ста сѣ́мене священноро́дная прозябе́ кра́сная вѣ́твь, и прозя́бшаго Христа́, отъ Іессе́я боже́ственнаго ко́рене живоно́сное прозябе́ніе, блаже́нне, крести́лъ еси́.

Стена́нія немо́лчна, и ча́сты сле́зы, и сокруше́но се́рдце, и ду́хъ смире́нъ да́ждь ми́, прехва́льне, и сѣ́тованенъ пла́чь, и тепло́ умиле́ніе, и болѣ́знь пребы́тну.

Богоро́диченъ: Отъ земноро́дна прозя́бши ко́рене, Чи́стая Влады́чице, присноцвѣту́щее и кра́сное прозябе́ніе естества́, Христа́ прозябла́ еси́, Божества́ цвѣ́тъ: Ааро́новъ бо же́злъ вообража́ше Тя́.

Инъ.

Ирмо́съ: Ты́ еси́ утвержде́ніе притека́ющихъ къ Тебѣ́, Го́споди, Ты́ еси́ Свѣ́тъ омраче́нныхъ, и пое́тъ Тя́ ду́хъ мо́й.

Укрѣпи́лася еси́ Ду́хомъ низложи́ти свирѣ́пство, пресла́вная, мучи́тельское и многобо́жіе, Февро́ніе, безбо́жное.

Ты́ ны́нѣ утверди́лъ еси́ держа́вною руко́ю, Влады́ко, му́ченически подвиза́вшуюся Февро́нію сла́вную.

Тѣ́ло твое́, сѣко́мо за Христа́, чи́стая всему́драя, му́ченически, тебе́ рая́ содѣ́ла наслажде́ніе.

Богоро́диченъ: Обрѣ́те Тя́ по́мощь, Бо́жію Ма́терь, Пречи́стая, сла́вная му́ченица Февро́нія, и мучи́теля посрами́ла е́сть.

Конда́къ святы́я, гла́съ 6. Подо́бенъ: Засту́пнице.

Женише́ мо́й, сладча́йшій Христе́, — взыва́ше Февро́нія, — не тру́дно ми́ тещи́ во слѣ́дъ Тебе́, и́бо сла́дость любве́ Твоея́ ду́шу мою́ наде́ждею впери́ и красота́ ми́лости Твоея́ се́рдце мое́ услади́ испи́ти ча́шу страда́ній по Тебѣ́, да досто́йну мя́ въ черто́зѣ съ му́дрыми дѣ́вами ликовствова́ти о Тебѣ́ сопричте́ши. Тѣ́мже, преподо́бная страстоте́рпице, почита́юще по́двиги трудо́въ твои́хъ, мо́лимъ тя́: моли́ не затвори́тися и на́мъ черто́га две́ремъ.

Сѣда́ленъ, гла́съ 8. Подо́бенъ: Повелѣ́нное.

Заха́ріинъ пло́дъ, непло́дныя цвѣ́тъ роди́ся дне́сь на́мъ отъ обѣща́нія, честны́й Іоа́ннъ, Предте́ча Госпо́день, игра́я же во утро́бѣ ма́терни, проповѣ́дуетъ и пре́жде рождества́ Содѣ́теля всѣ́хъ. Се́й показа́ неизрече́нное Бо́жіе и спаси́тельное явле́ніе, сего́ вси́ почита́емъ.

Инъ сѣда́ленъ святы́я, гла́съ то́йже. Подо́бенъ: Прему́дрости.

Ду́шу связа́вши любо́вію Христо́вою, тлѣ́нная же и вре́менная, му́ченице му́драя, забве́ніемъ премину́ла еси́, я́ко Словесе́ учени́ца: по́стнически пе́рвѣе стра́сти умертви́вши, страда́льчески второ́е льсти́ваго посрами́ла еси́. Тѣ́мже и Зижди́теля сугу́бу дерзнове́нію сподо́билася еси́, сла́вная, я́ко Того́ послу́шавши, Февро́ніе пребога́тая, моли́ Христа́ Бо́га, согрѣше́ній оставле́ніе дарова́ти чту́щимъ любо́вію святу́ю па́мять твою́.

Сла́ва, и ны́нѣ, богоро́диченъ:

Яко Всенепоро́чная Невѣ́сто Творцу́, я́ко неискусому́жная Ма́ти Изба́вителю, прія́телище я́ко су́щи Утѣ́шителя, Препѣ́тая, беззако́нію мя́ су́ща скве́рное оби́телище и бѣсо́мъ игра́лище въ ра́зумѣ бы́вша, потщи́ся отъ тѣ́хъ злодѣ́йства мя́ изба́вити и свѣ́тлое жили́ще добродѣ́телей соверши́, Свѣтоно́сная, Нетлѣ́нная, отжени́ о́блакъ страсте́й и Вы́шняго прича́стія сподо́би и Свѣ́та невече́рняго моли́твами Твои́ми.

Крестобогоро́диченъ:

Агнца, и Па́стыря, и Изба́вителя Агница зря́щи на Крестѣ́, восклица́ше, пла́чущи, и, го́рько рыда́ющи, вопія́ше: мíръ у́бо ра́дуется, пріе́мля Тобо́ю избавле́ніе, утро́ба же Моя́ гори́тъ, зря́щи Твое́ распя́тіе, е́же терпи́ши за милосе́рдіе ми́лости. Долготерпѣли́ве Го́споди, ми́лости бе́здно и исто́чниче неисчерпа́емый, умилосе́рдися и да́руй согрѣше́ній оставле́ніе вѣ́рою пою́щимъ Боже́ственныя стра́сти Твоя́.

Пѣ́снь 4.

Ирмо́съ: Ты́ моя́ крѣ́пость, Го́споди, Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча, и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти: си́лѣ Твое́й сла́ва, Человѣколю́бче.

Не довлѣ́ютъ уста́ человѣ́ча восхвали́ти тя́, его́же уста́ Христо́ва похвали́ша, сла́дкая и медото́чная, и жи́зни испо́лнь су́щая, и сло́во всѣ́мъ да́рующая. Оба́че пріими́ мое́ пѣ́ніе, вѣ́дый любо́вь, и са́мое то́ моле́ніе, и́бо неизбѣ́жно.

Чи́стое яви́ся се́рдце твое́, Предте́че, мѵроположе́ніе Свята́го Ду́ха, благоуха́ющее добродѣ́тели, кадя́щее ра́зумъ, сладя́щее благодѣя́нія. Блаже́нни у́бо ели́цы чи́стіи се́рдцемъ, Бо́га бо тíи, рече́, у́зрятъ.

Посѣче́ніе сѣки́ры при ко́рени приближа́ется, и свидѣ́тельствуется, я́ко вся́ко дре́во, не творя́щее плода́ добра́, сѣ́чивомъ посѣка́ется и вве́ржется во о́гнь гее́нскій. Тѣ́мже трепещи́, душе́ моя́, и плоды́ покая́нія принеси́.

Яко имѣ́я на небесѣ́хъ житіе́, прія́тъ гра́дъ, иму́щь основа́нія незы́блемая, гра́да бо здѣ́ не вожделѣ́лъ еси́, пребыва́ющій же Іерусали́мъ, я́вѣ свобо́дный, ма́терь Па́влову, Вы́шній Сіо́нъ.

Богоро́диченъ: Вѣ́ра тепла́ повѣ́дуется, а не сказа́ніе стра́шнаго, Отрокови́це, та́инства Твоего́: смотря́емо бо то́, ника́коже сказа́нно е́сть, и зри́мо — непости́жно, съ Тобо́ю бо ми́мо тека́етъ, и постиза́емо отбѣга́етъ, и, явля́яся, ма́ло что́ открыва́ется.

Инъ. Ирмо́съ то́йже.

Поро́ка въ тебѣ́ отню́дъ нѣ́сть, всехва́льная Февро́ніе, ты́ бо по обоему́, Изба́вителю твоему́ и Рачи́телю вожделѣ́нному благоугоди́ти потща́лася еси́, воздержа́тельными болѣ́зньми, му́ченическими страда́ньми украше́нная, богому́драя, пребога́тая.

Отъ млады́хъ, му́ченице, ногте́й вожделѣ́ла еси́ любы́ Исто́чника приснотеку́щаго, вожделѣ́ннаго всѣ́мъ слове́снымъ, Его́же насы́щшися, муче́нія болѣ́зни претерпѣ́ла еси́, огне́мъ опаля́ема и удо́въ лише́на, Февро́ніе, дѣ́въ похвало́.

Словесы́ Бо́жіими воспи́тана, богому́драя, жела́ющимъ сло́во спаси́тельное свяще́нныхъ кни́гъ свяще́нно вруча́ющи, боже́ственнѣ, му́ченице, просте́рла еси́ и уче́нія мзду́ прія́ла еси́, му́ченикъ сла́вою обогати́вшися.

Богоро́диченъ: Две́рь Свѣ́та всѣ́мъ яви́лася еси́, Всенепоро́чная, су́щимъ во тмѣ́ Свѣ́тъ неопи́санный, опи́санъ пло́тію Христа́, пра́веднаго Со́лнца, возблиста́вши, Его́же ны́нѣ луча́ми Февро́нія укрѣпи́вшися, му́ченикъ сла́ву притяжа́.

Пѣ́снь 5.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Ветíйствующій язы́къ, любому́дренно гремя́щихъ словеса́, и глаго́лъ си́лы, и число́мъ, и завѣ́томъ теку́щіи, и пле́щущее высокогла́сіе ра́зумъ восхвали́ти тя́ досто́йно не мо́гутъ.

Тучено́сенъ о́блакъ, до́ждь кропя́щь разумѣ́ній, и иста́явшія неразу́мія пла́менемъ и исчеза́ющія прохлажда́ющъ росо́ю, просте́рта Христо́съ тя́ показа́, Предте́че.

Да́ры нетлѣ́нными, и благодѣя́ніи боже́ственными, и дарова́ніи обогати́ мя, обнища́вшаго и наготу́юща отъ добродѣ́тели вся́кія, и твои́мъ покро́вомъ одѣ́й мя́ спаси́тельнымъ, я́коже боже́ственною ри́зою.

Скве́рныя мы́сли и тлетво́рная помышле́нія израсти́вши, душа́ моя́, блаже́нне, страсте́й те́рніемъ олядѣ́: е́юже ве́щію разгорѣ́вшися, твои́хъ моли́твъ огне́мъ очи́щь, стра́хъ Бо́жій въ не́й всѣ́й.

Богоро́диченъ: Господоимени́тая Дѣ́во, гра́дъ нарече́на Царя́ Христа́, веселу́емый устремле́ніи мы́сленныя рѣки́, идѣ́же е́сть всѣ́хъ веселя́щихся жили́ще, окая́нную мою́ ду́шу учини́.

Инъ. Ирмо́съ то́йже.

Украси́ся порфи́рою, му́ченице, изъ крове́й твои́хъ истка́нною тебѣ́, обнажи́ся тѣ́ломъ, и страсте́й оде́жду отве́ргла еси́, предъ суди́щемъ ста́вши мучи́телей, о Февро́ніе, Христо́вѣ подо́бящися наготѣ́.

Разже́гшися, му́ченице, любо́вію Жениха́ твоего́ мы́сленнаго и распа́льшися Сего́ добро́тами нетлѣ́нными, претерпѣ́ла еси́ усѣче́ніе ру́къ и я́звенныя болѣ́зни, Февро́ніе, му́ченицъ похвало́.

То́ки твои́хъ крове́й многобо́жія пла́мень угаси́ша, твои́ же зу́бы искорене́нніи всю́ исторго́ша и́дольскую ле́сть и пи́щу тебѣ́, Февро́ніе, вѣ́чныя красоты́ содѣ́лаша.

Богоро́диченъ: Твои́ но́зѣ, усѣ́кшеся, боже́ственныхъ му́ченикъ стезе́ю ше́ствоваша и къ Ро́ждшемуся отъ Дѣ́вы Святы́я преидо́ша, ходя́ще ра́достно въ раи́, Февро́ніе дѣ́во, Богоневѣ́сто.

Пѣ́снь 6.

Ирмо́съ: Моли́тву пролію́ ко Го́споду и Тому́ возвѣщу́ печа́ли моя́, я́ко зо́лъ душа́ моя́ испо́лнися и живо́тъ мо́й а́ду прибли́жися, и молю́ся, я́ко Іо́на: отъ тли́, Бо́же, возведи́ мя.

Яко безпло́тенъ, Крести́телю, и невеще́ственъ, поуча́яся безсме́ртію невеще́ственныхъ, въ ме́ртвеннѣй и ве́щнѣй пло́ти твое́й любому́дріемъ же коне́чнымъ украси́лся еси́, постя́ся, и бы́лъ еси́ а́нгельскому и человѣ́ческому существу́ соприча́стникъ.

Пресвѣ́тло во звѣзда́хъ со́лнце, во времена́хъ же сладча́йша весна́, всѣ́мъ же святы́хъ собо́ру ты́ я́коже звѣзда́мъ надлежи́ши со́лнце неразсу́днымъ вели́чествомъ, по вся́кому обога́щся естеству́.

Вели́кій христіа́нъ засту́пниче, те́плый грѣ́шниковъ утѣ́шителю, небе́снаго Ца́рствія витíя, вво́дниче въ боже́ственное Креще́ніе, проповѣ́дниче покая́нія, покая́нія мя́ о́бразы утверди́.

Богоро́диченъ: Ты́ лѣ́ствица еси́, небеси́ равна́, Влады́чице, отъ земли́ до небесе́ просте́рта, Ты́ вои́стинну непроходи́мая две́рь, па́че же всезлата́я ру́чка и мо́стъ, возводя́щь, къ небеси́ и жи́зни восхо́ды отверза́ющь.

Инъ. Ирмо́съ то́йже.

Сели́на злочести́ваго безбо́жное и го́рдое низложи́ся суровство́ Бо́жіимъ е́же о всѣ́хъ промышле́ніемъ, взыска́вшимъ кро́вь твою́, сла́вная, и спасе́ся твои́мъ терпѣ́ніемъ боже́ственный Лисима́хъ.

Свѣти́льникъ богосія́ненъ тя́ показа́, му́драя и богоно́сная Вріе́ни, уче́ніи наста́вльши, отрокови́це, и наде́жды ника́коже погрѣши́: предста́ви бо тя́ Христу́, Февро́ніе, невѣ́сту нескве́рну.

Богоро́диченъ: Одушевле́нный Влады́ки черто́гъ, и́же свѣ́тлыми дѣ́вства заря́ми свѣтови́дно, я́ко кри́нъ, сія́я посреди́ терно́внаго смѣше́нія, Пречи́стая и Боголѣ́пная Богоро́дица Дѣ́ва сла́вится.

Конда́къ Предте́чи, гла́съ 3. Подо́бенъ: Дѣ́ва дне́сь.

Пре́жде непло́ды, дне́сь Христо́ва Предте́чу ражда́етъ, и то́й е́сть исполне́ніе вся́каго проро́чества: Его́же бо проро́цы проповѣ́даша, на Сего́ во Іорда́нѣ ру́ку положи́въ, яви́ся Бо́жія Сло́ва проро́къ, проповѣ́дникъ, вку́пѣ и Предте́ча.

Икосъ:

Іису́са Христа́, и́стиннаго Бо́га на́шего, Иса́ія иногда́ и проро́цы вси́ во о́бразѣхъ ви́дѣша и сѣ́нехъ, но се́й бо́лій си́хъ бы́сть проро́къ, я́коже пи́шетъ: Бо́га бо Сло́ва, Его́же прорече́, ви́дѣ во пло́ти и осяза́, и пре́жде рожде́нія провозвѣща́етъ игра́ніи свои́ми всему́ мíру ра́дость, я́ко пе́рвѣе яви́ся Сло́ва прише́ствія проро́къ и проповѣ́дникъ, вку́пѣ и Предте́ча.

Пѣ́снь 7.

Ирмо́съ: Отъ Іуде́и доше́дше, о́троцы, въ Вавило́нѣ иногда́, вѣ́рою Тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.

Проро́ковъ ве́рхъ, апо́столовъ печа́ть и по́стниковъ нача́ло, соверше́ніе пра́ведныхъ, утвержде́ніе му́чениковъ тя́ Христо́съ, блаже́нне, показа́, и́стинная Глава́ всея́ Це́ркве.

Изъ чре́ва ма́терня испо́лнился еси́ Свята́го Ду́ха, Предте́че, и сике́ра и вина́ не пи́лъ еси́, я́коже рече́ отцу́ твоему́ а́нгелъ. Тѣ́мже наре́клся еси́ вели́къ предъ Бо́гомъ.

Крести́вый человѣ́ки во огни́ Святы́мъ Ду́хомъ пе́рвѣе огне́мъ гее́нскимъ то́кмо крести́тъ по́слѣжде Тому́ невѣ́рующія, и́же го́рькаго креще́нія, Крести́телю, изба́ви мя́.

Богоро́диченъ: Ру́чка безду́шная дре́вле Тя́ одушевле́нну ру́чку сказа́ше, Влады́чице, жи́зни бо ма́нну носи́вши, Христа́, сме́рти го́ресть отъе́млющаго, и́стинную сла́дость и просвѣще́ніе мíру.

Инъ.

Ирмо́съ: Отроцы евре́йстіи въ пещи́ попра́ша пла́мень дерзнове́нно и на ро́су о́гнь преложи́ша, вопію́ще: благослове́нъ еси́, Го́споди Бо́же, во вѣ́ки.

Струи́ то́чиши исцѣле́ній притека́ющимъ вѣ́рою къ твоему́ гро́бу, Февро́ніе, и Жениху́ твоему́ вопію́щимъ: благослове́нъ еси́, Го́споди Бо́же, во вѣ́ки.

О, до́брыя твоея́ ку́пли! Го́рстію кро́ве, богому́драя, измѣни́ла еси́ Ца́рствіе Бо́жіе, всехва́льная, вопію́щи: благослове́нъ еси́, Го́споди Бо́же, во вѣ́ки.

Богоро́диченъ: Съ ли́ки дѣви́ческими лику́еши, досточу́дная Февро́ніе дѣ́во, Дѣ́вѣ Богома́тери вопію́щи: благослове́нъ, Пречи́стая, Пло́дъ Твоего́ чре́ва.

Пѣ́снь 8.

Ирмо́съ: Седмери́цею пе́щь халде́йскій мучи́тель богочести́вымъ неи́стовно разжже́, си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Во́ду сла́дку напои́тельну непокори́вымъ и неразу́мнымъ источи́ лю́демъ изра́ильтескимъ жезла́ уязвле́ніемъ ка́мень немо́кренный, и тве́рдый, и несѣко́мый; отъ непло́дныхъ же и безча́дныхъ чре́слъ на́мъ истече́ рѣка́ исцѣле́ній.

Съ похвала́ми, проро́че, творя́тъ па́мять твою́ собо́ръ пра́ведныхъ, проро́къ сосло́віе, му́ченикъ во́инства и по́стникъ составле́ніе, чи́нове преподо́бныхъ и святы́хъ всѣ́хъ: па́мять бо пра́ведныхъ вои́стинну съ похвала́ми.

Не́бо одушевле́нное, добродѣ́тельми, я́ко звѣзда́ми, украше́нное, златосія́нное и златоза́рное со́лнце, свѣ́щникъ благода́ти, сокро́вище Ду́ха, Ца́рствія вели́кій проповѣ́дникъ, витíя богодохнове́нный, громогла́сный язы́къ, труба́ вели́кая, Предте́ча да воспое́тся.

Богоро́диченъ: Стра́нна и ди́вна ужа́сна повѣ́данія страннолѣ́пнаго и пресла́внаго Рождества́ Твоего́, Марíе Всепѣ́тая: Го́спода бо сла́вы, Ему́же херуви́ми и серафи́ми предстоя́тъ, еди́наго отъ Тро́ицы неслія́нно, непрело́жно родила́ еси́ безъ сѣ́мене, изъ Тебе́ воплоще́нна.

Инъ. Ирмо́съ то́йже.

Свѣтоявле́нна па́мять твоя́, Февро́ніе, соверша́ется ны́нѣ, свѣтови́дными мо́лніями блиста́ющи: Свѣ́ту бо прибли́жися и свѣтоно́сна бы́сть, Свѣтотво́рцу и Свѣтода́телю вопію́щи: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Удивле́нна была́ еси́ пе́рвѣе воздержа́ніи, прехва́льная, и му́ченически украси́лася еси́ по́слѣжде, во слѣ́дъ бо потекла́ еси́ Рачи́теля, отрокови́це свѣ́тлая. Оба сосца́ твоя́, бла́ги па́че вина́, урѣ́зани бы́вше, Февро́ніе, за благоче́стіе, воня́ же твои́хъ арома́тъ вѣ́рныя благоуха́етъ.

Отягче́нъ прегрѣше́ньми, Февро́ніе всехва́льная, и треволне́ніи страсте́й преклоне́нъ, прибѣга́ю къ покро́ву твоему́, обои́хъ разрѣше́ніе ища́й. Но, я́ко чу́дная и избра́нная Влады́цѣ, вопію́ща не пре́зри, но твои́ми мя́ моли́твами исхити́, дѣ́во, отъ плени́цъ душетлѣ́нныхъ.

Богоро́диченъ: Вѣтíйствующіи язы́цы Тя́ воспѣ́ти не мо́гутъ, о Богороди́тельнице, Марíе Богоневѣ́сто: Бо́га бо родила́ еси́, надъ всѣ́ми су́щаго, Отрокови́це Чи́стая, отъ дѣви́ческаго неискусобра́чнаго чре́ва. Ему́же ны́нѣ Февро́нія, пою́щи, взыва́етъ: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Пѣ́снь 9.

Ирмо́съ: Ужасе́ся о се́мъ не́бо, и земли́ удиви́шася концы́, я́ко Бо́гъ яви́ся человѣ́комъ пло́тски, и чре́во Твое́ бы́сть простра́ннѣйшее небе́съ. Тѣ́мъ Тя́, Богоро́дицу, Ангеловъ и человѣ́къ чинонача́лія велича́ютъ.

Се́ тебѣ́, влады́цѣ моему́ и те́плому души́ моея́ засту́пнику, худо́е сіе́ принесо́хъ приноше́ніе, ра́бское служе́ніе, блаже́нне, благоразу́мно исполня́я, е́же вонми́, возлю́бль нра́въ пе́рвѣе дѣ́лъ и пре́жде да́ра произволе́ніе.

Нечи́стыми устна́ми и скве́рными Пречи́стыя Дѣ́вы всечи́стаго тя́ сро́дника, блаже́нне, молю́, нечи́стый и скве́рный и окаля́нный сластьми́: омы́й тѣ́ло, очи́сти ду́хъ и ду́шу мою́ освяти́.

Черто́га небе́снаго таи́нниче, Жениха́ Христа́ дру́же и́скренній, стоя́й и гла́съ слы́ша ра́достный Женихо́въ досто́йный, покажи́ блага́го гла́са и мене́ со благослове́нными наслѣ́дника Ца́рствія, Бо́гу зову́щу въ наслѣ́діе.

Богоро́диченъ: Пречи́стая Дѣ́во, Ма́ти Бо́жія невеще́ственно паля́щаго Угля, ве́щь душа́мъ одушевле́нна, клеща́ серафи́мская и пламеноно́сный престо́ле носи́маго херуви́мы, ве́щь души́ моея́ огне́мъ невеще́ственнымъ попали́ и негаси́маго огня́ изба́ви мя́.

Инъ. Ирмо́съ то́йже.

Боже́ственная Влады́ки голуби́це, позлаще́нна свѣ́тлостію дѣ́вства, тѣ́ло просвѣ́щши поще́ніемъ, позлаще́нна крилы́ златови́дными блиста́ніи твоего́ исповѣ́данія и божественныхъ твои́хъ крове́й, тя́ пою́щія просвѣти́.

Уму бесѣ́довавши наги́мъ умо́мъ, Февро́ніе богому́драя, попра́ла еси́ жела́нія до конца́, и кончи́ну блаже́нную получи́ти сподо́билася еси́, и ны́нѣ ца́рствуеши со Христо́мъ, свѣ́тло съ твои́мъ Женихо́мъ въ неизрече́нныхъ черто́зѣхъ въ весе́ліи пребыва́ющи.

Исцѣле́нія источа́еши, я́ко рѣ́ки, вѣ́рою притека́ющимъ ко твое́й честнѣ́й ра́цѣ, Февро́ніе богови́дная, дѣ́вства сто́лпъ, цвѣ́тъ естества́ красе́нъ, дщи́ Царе́ва, я́же вну́трь иму́щи боже́ственныя сла́вы блаже́нство.

Богоро́диченъ: Испра́вила еси́, Дѣ́во, же́нъ поползе́ніе, Сло́ва ро́ждши, горѣ́ воздви́жущаго низпа́дшія, я́ко Блага́, и держа́внаго си́лъ, Его́же, Февро́нія сла́вная, вожделѣ́вши усе́рдно: въ слѣ́дъ Тебѣ́ потеку́, ра́дующися, — возопи́ла е́сть.

Свѣти́ленъ. Подо́бенъ: Жены́, услы́шите.

Предте́чево дне́сь радостотво́рное рожде́ніе сѣ́тованіе рѣши́тъ о́тча безгла́сія и ро́ждшія непло́дство, возвѣща́етъ же настоя́щую ра́дость и весе́ліе. Тѣ́мже и вся́ тва́рь свѣ́тло то́е пра́зднуетъ.

[Сла́ва, и ны́нѣ,] богоро́диченъ:

Прему́дрость ѵпоста́сную, и Сло́во пресу́щное, и Врача́ ду́шъ и тѣле́съ ро́ждшая, гное́нія и ра́ны души́ моея́ исцѣли́, лю́тыя и вре́менныя, и се́рдца моего́ уста́ви болѣ́зни, Дѣ́во.

На стихо́внѣ стихи́ры окто́иха. Сла́ва, гла́съ 2:

Иже отъ проро́ка проро́ка и непло́дныя прозябе́ніе, въ рожде́нныхъ жена́ми превы́шша всѣ́хъ, пусты́ннаго граждани́на, Іоа́нна сла́внаго псалмы́ и пѣ́ньми и пѣ́сньми духо́вными восхва́лимъ, вопію́ще къ нему́: Крести́телю Спа́совъ и Предте́че, я́ко имѣ́я дерзнове́ніе, въ честнѣ́мъ твое́мъ рождествѣ́ умоли́ Христа́ дарова́ти ми́ръ мíру и душа́мъ на́шимъ ве́лію ми́лость.

И ны́нѣ, богоро́диченъ.
Или́ крестобогоро́диченъ, подо́бенъ: Егда́ отъ дре́ва.

Дре́ву кре́стному Тя́, Іису́се, пригвожде́на зря́щи, Неискусобра́чная, пла́чущи, глаго́лаше: Ча́до сла́дкое, почто́ оста́вилъ еси́ Мене́, ро́ждшую Тя́, еди́ну, Свѣ́те непристу́пный, Пребезнача́льнаго Отца́? Потщи́ся и просла́вися, я́ко да сла́ву получа́тъ Боже́ственную, и́же Боже́ственныя стра́сти Твоя́ сла́вящіи.


НА ЛИТУРГІИ,

Проки́менъ, гла́съ 4: Ди́венъ Бо́гъ во святы́хъ Свои́хъ,* Бо́гъ Изра́илевъ. Сти́хъ: Въ це́рквахъ благослови́те Бо́га, Го́спода отъ исто́чникъ Изра́илевыхъ. Апо́столъ къ Кори́нѳяномъ, зача́ло 181. Аллилу́ія, гла́съ 1: Терпя́, потерпѣ́хъ Го́спода, и вня́тъ ми́ [и услы́ша моли́тву мою́. Сти́хъ: Поста́ви на ка́мени но́зѣ мои́ и испра́ви стопы́ моя́]. Ева́нгеліе Луки́, зача́ло 33. Прича́стенъ: Въ па́мять вѣ́чную [бу́детъ пра́ведникъ, отъ слу́ха зла́ не убои́тся].

Источникъ: Минíа, мѣ́сяцъ Іу́ній. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 157 об. – 165.

/ Къ оглавленію раздѣла /


Наверхъ / Къ титульной страницѣ

0