Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 22 октября 2017 г. Сейчасъ на порталѣ посѣтителей - 18.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́нія въ 25-й де́нь.
Слу́жба святы́хъ чудотво́рцевъ Му́ромскихъ кня́зя Петра́, во и́ноцѣхъ Дави́да, и княги́ни Февро́ніи, во и́нокиняхъ Евфроси́ніи.

ВЕЧЕРЪ,
Блаже́нъ му́жъ.., [1-й антифо́нъ]. На Го́споди воззва́хъ: стихи́ры, творе́ніе господи́на Пахо́мія мона́ха, Гла́съ 4. Подо́бенъ: Яко до́бля.

Наста́ ны́нѣ всесвѣ́тлая па́мять ва́ша,* пресла́вный Пе́тре* съ прему́дрою Февро́ніею,* осѣня́ющи новоизбра́нныя лю́ди.* Тѣ́мъ Христа́ моли́те* о спасе́ніи всѣ́хъ,* любо́вію ва́съ непреста́нно,* блаже́нніи, почита́ющихъ,* чудотво́рцевъ Му́ромскихъ.

Пе́рвѣе у́бо, прехва́льніи,* отъ ю́ности ва́шея Христу́ рабо́тасте,* су́щая въ мíрѣ се́мъ,* я́ко уме́ты, презрѣ́вше* и сего́ ра́ди ми́лостынею и моли́твами* до́брѣ Тому́ угоди́вше.* Тѣ́мъ и по сме́рти* исцѣле́ніе подава́ете всѣ́мъ,* вѣ́рою ва́съ почита́ющимъ.

Ины стихи́ры, творе́ніе Михаи́ла мона́ха, гла́съ 2. Подо́бенъ: Кíими похва́льными.

Кíими похва́льными вѣнцы́* вѣнча́емъ блаже́ннаго Петра́* вку́пѣ съ прему́дрою Февро́ніею,* раздѣле́нныхъ тѣ́ломъ и совоку́пленыхъ благода́тію?* Оваго, я́ко прему́дра змíя побѣди́вшаго,* о́ву же, я́ко цѣлому́дрія сохра́нницу.* Сего́ ра́ди, соше́дшеся,* воспое́мъ пѣ́сньми ра́достными,* си́це глаго́люще:* ра́дуйтеся, прехва́льніи, царе́й благочести́выхъ ски́петръ,* князе́й правосла́вныхъ похвале́ніе,* земли́ Россíйскія заступле́ніе,* оте́чества своего́ храни́теліе,* ва́съ бо безсме́ртныя сла́вы вѣнцы́* вѣнча́ Христо́съ Бо́гъ,* имѣ́яй ве́лію ми́лость.

Кíими пѣ́сненными добро́тами* восхва́лимъ Петра́ блаже́ннаго* съ прехва́льною Февро́ніею?* Яко богоразу́мная кри́ла,* прелетѣ́вшая отъ земли́ на не́бо,* и прибли́жившася престо́лу Святы́я Тро́ицы,* и со а́нгелы ве́село ликовству́ющая,* и Христу́ моля́щаяся о устрое́ніи мíра* и о сохране́ніи земли́ Россíйскія отъ наше́ствія сопроти́вныхъ* и междоусо́бныя бра́ни,* и́же любо́вію восхваля́ютъ* и непреста́нно почита́ютъ* Му́ромскія чудотво́рцы.

Кíими пѣ́сньми духо́вными* похва́лимъ блаже́нныхъ,* спле́тшихся любо́вію вку́пѣ обою́?* Пѣ́сньми ра́достными воспое́мъ, си́це глаго́люще:* ра́дуйтеся, блаже́нніи и треблаже́нніи,* въ боголю́біи пожи́вшіи,* смире́ніе и поще́ніе сохра́ньшіи* и ми́лостыню да́рующіи,* о не́йже Са́мъ Христо́съ та́ко рече́:* блаже́ни ми́лостивіи, я́ко тíи поми́ловани бу́дутъ.* И сего́ ра́ди вопіе́мъ къ ни́мъ си́це:* пресла́вный Пе́тре вку́пѣ съ прему́дрою Февро́ніею,* моли́те Христа́ о гра́дѣ сро́дствія ва́шего* и на́мъ низпосла́ти ми́ръ и ве́лію ми́лость.

Кíими смире́нными устна́ми* воспое́мъ Петра́ блаже́ннаго съ пречестно́ю Февро́ніею,* яви́вшихся въ Россíйстѣй земли́ но́выхъ чудотво́рцевъ* и свѣти́лъ незаходи́мыхъ?* Со́лнца мы́сленнаго звѣ́зды пресвѣ́тлыя,* просвѣща́ющія ве́сь мíръ чуде́съ свѣ́тлостію,* печа́льныхъ утѣше́ніе,* плѣне́нныхъ избавле́ніе отъ го́рькія рабо́ты,* крѣ́пость и забра́ло гра́да на́шего.* Тѣ́мже пріиди́те, вси́ вѣ́рніи,* пра́здникъ блаже́нныхъ псало́мски торжеству́емъ,* да моли́твами и́хъ вра́жія шата́нія вся́ Христо́съ низложи́тъ,* имѣ́яй ве́лію ми́лость.

Сла́ва, гла́съ 6. Самогла́сенъ:

Блаже́нно и треблаже́нно оте́чество ва́ше, блаже́нъ и гра́дъ, въ не́мже жили́ще имѣ́сте, прече́стенъ же и свя́тъ хра́мъ, въ не́мже положе́на бы́ша честна́я тѣлеса́ ва́ша, пресла́вный Пе́тре съ прему́дрою Февро́ніею, Христу́ моли́теся, Его́же отъ ю́ности возлюби́сте, сохрани́ти оте́чество ва́ше и душа́мъ на́шимъ дарова́ти ми́ръ и ве́лію ми́лость.

И ны́нѣ, богоро́диченъ:

[Кто́ Тебѣ́ не ублажи́тъ, Пресвята́я Дѣ́во? Кто́ ли не воспое́тъ Твоего́ Пречи́стаго Рождества́? Безлѣ́тно бо отъ Отца́ возсія́вый Сы́нъ Единоро́дный, То́йже отъ Тебе́, Чи́стыя, про́йде, неизрече́нно вопло́щся: естество́мъ Бо́гъ Сы́й и естество́мъ бы́въ Человѣ́къ на́съ ра́ди; не во двою́ лицу́ раздѣля́емый, но во двою́ естеству́ несли́тно познава́емый. Того́ моли́, Чи́стая Всеблаже́нная, поми́ловатися душа́мъ на́шимъ.]

Вхо́дъ. Проки́менъ дне́. Чте́нія [три́] преподо́бническая.

Прему́дрости Соломо́ни чте́ніе.

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе.

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Яко вели́кое со́лнце,* вселе́ннѣй все́й* яви́стеся, блаже́нніи,* чудесы́ просвѣща́юще ве́сь мíръ,* тѣ́мже, соше́дшеся, вси́ воспое́мъ ва́съ.

Сти́хъ: Честна́ предъ Го́сподемъ* сме́рть преподо́бныхъ Его́.

Свѣ́томъ сія́я* Боже́ственныя благода́ти,* пресвѣ́тлый ва́шъ пра́здникъ ра́достенъ всѣ́мъ,* его́же, ра́дующеся,* и́скренно вси́ восхва́лимъ.

Сти́хъ: Что́ возда́мъ Го́сподеви о всѣ́хъ,* я́же воздаде́ ми?

Пріиди́те, му́ромстіи наро́ди,* вели́цыи и ма́ліи,* восхва́лимъ въ ва́съ пре́жде ца́рствовавшія,* те́плыя предста́тели,* но́выя чудотво́рцы, Петра́ и Февро́нію.

Сла́ва, гла́съ 8. Самогла́сенъ:

Ра́дуйся и весели́ся о Го́сподѣ, гра́де Му́роме, и свѣ́тло торжеству́й и лику́й, це́рковь Бо́жія, въ не́йже лежи́тъ честно́е сокро́вище, пресла́вныхъ но́выхъ чудотво́рцевъ Петра́ благочести́ваго и Февро́ніи прему́дрыя, сокро́вище дра́го и ковче́гъ пресла́венъ, тѣлеса́, чудеса́ точа́щая всѣ́мъ, притека́ющимъ съ вѣ́рою. Сего́ ра́ди пріиди́те, вси́ лю́діе, соше́дшеся, вѣ́рніи, поклони́мся святы́мъ. Тецы́те, собра́вшеся, и псало́мски восплещи́те рука́ми, и, лику́юще, ра́дуйтеся, и, веселя́щеся, си́це глаго́лите: ра́дуйтеся, пресла́вніи чудотво́рцы, Пе́тре блаже́нне и Февро́ніе богому́драя, гра́да бо на́шего утвержде́ніе и на́съ, вѣ́рныхъ, спасе́ніе. И ны́нѣ, въ па́мяти ва́шей, испроси́те у Христа́ дарова́ти душа́мъ на́шимъ ми́ръ и ве́лію ми́лость.

И ны́нѣ, богоро́диченъ:

[Безневѣ́стная Дѣ́во, Яже Бо́га неизрече́нно заче́нши пло́тію, Ма́ти Бо́га Вы́шняго, Твои́хъ рабо́въ мольбы́ пріими́, Всенепоро́чная, всѣ́мъ подаю́щи очище́ніе прегрѣше́ній, ны́нѣ на́ша моле́нія пріе́млющи, моли́ спасти́ся всѣ́мъ на́мъ.]

Тропа́рь, гла́съ 8:

Яко благочести́ваго ко́рене пречестна́я о́трасль бы́лъ еси́, до́брѣ во благоче́стіи пожи́въ, блаже́нне Пе́тре, та́ко и съ супру́жницею твое́ю, прему́дрою Февро́ніею, въ мíрѣ Бо́гу угоди́вше и преподо́бныхъ житію́ сподо́бистеся. Съ ни́миже моли́теся Го́сподеви сохрани́ти безъ вре́да оте́чество ва́ше, да ва́съ непреста́нно почита́емъ.

Сла́ва, и ны́нѣ, богоро́диченъ:

Иже на́съ ра́ди рожде́йся отъ Дѣ́вы, [и распя́тіе претерпѣ́въ, Благíй, испрове́ргій сме́ртію сме́рть и Воскресе́ніе явле́й я́ко Бо́гъ, не пре́зри, я́же созда́лъ еси́ руко́ю Твое́ю, яви́ человѣколю́біе Твое́, Ми́лостиве. Пріими́ ро́ждшую Тя́, Богоро́дицу, моля́щуюся за ны́, и спаси́, Спа́се на́шъ, лю́ди отча́янныя].


НА УТРЕНИ,
На Бо́гъ Госпо́дь: Тропа́рь [святы́хъ], два́жды. Сла́ва, и ны́нѣ, богоро́диченъ.

По 1-й стихоло́гіи сѣда́ленъ, гла́съ 1. Подо́бенъ: Ли́къ а́нгельскій.

Вси́ пра́зднуемъ вку́пѣ всесвяту́ю па́мять Петра́ и Февро́ніи прему́дрыхъ, Це́рковь бо сла́витъ, вопію́щи къ ни́мъ: моли́твами ва́шими, блаже́нніи, исцѣли́те неду́ги и болѣ́зни на́ша и вся́кихъ искуше́ній изба́вите вѣ́рою па́мять ва́шу восхваля́ющихъ. [Два́жды.]

Сла́ва, и ны́нѣ, богоро́диченъ:

Чу́до чуде́съ, Благода́тная, въ Тебѣ́ зря́щи, тва́рь ра́дуется: зачала́ бо еси́ безсѣ́менно и родила́ еси́ неизрече́нно, Его́же чинонача́лія а́нгеловъ ви́дѣти не мо́гутъ. Того́ моли́ о душа́хъ на́шихъ.

По 2-й стихоло́гіи сѣда́ленъ, гла́съ 3. Подо́бенъ: Красотѣ́ дѣ́вства.

Иму́ще Ду́хъ Истинный, прему́дріи, тѣ́мже мы́, соше́дшеся, вѣ́рніи, па́мять ва́шу велича́емъ, и облобыза́емъ честну́ю ра́ку, исцѣле́нія получа́юще неоску́дно, и, пою́ще, рце́мъ си́це: Пе́тре пресла́вне ку́пно съ супру́жницею Февро́ніею, Христу́ моли́теся сохрани́ти оте́чество ва́ше, и разруши́ти междоусо́бную страсте́й на́шихъ бра́нь, и дарова́ти на́мъ ве́лію ми́лость. [Два́жды.]

Сла́ва, и ны́нѣ, богоро́диченъ:

Красотѣ́ дѣ́вства Твоего́, и пресвѣ́тлой чистотѣ́ Твое́й, Гавріи́лъ удиви́вся, вопія́ше Ти́, Богоро́дице: ку́ю Ти́ похвалу́ принесу́ досто́йную? Что́ же возымену́ю Тя́? Недоумѣва́ю и ужаса́юся. Тѣ́мже, я́ко повелѣ́нъ бы́хъ, вопію́ Ти́: ра́дуйся, Благода́тная.

Хвали́те и́мя Госпо́дне...

Припѣ́въ: Ублажа́емъ ва́съ, святíи чудотво́рцы Пе́тре и Февро́ніе, и чте́мъ святу́ю па́мять ва́шу, вы́ бо мо́лите за ны́ Христа́, Бо́га на́шего.

Псало́мъ избра́нный: Блаже́нъ му́жъ, боя́йся Го́спода...

По поліеле́и сѣда́ленъ, гла́съ 8. Подо́бенъ: Прему́дрости.

Пріиди́те, вси́ лю́діе, хвалу́ принесе́мъ пресла́внымъ и богому́дрымъ чудотво́рцемъ Петру́ и Февро́ніи, си́це вопію́ще: ра́дуйся, преблаже́нне Пе́тре, и́же го́рдаго змíя свирѣ́пство погуби́лъ еси́, та́кожде и ны́нѣ съ супру́жницею твое́ю засту́пницы и хода́таи бу́дите оте́честву ва́шему, и сопроти́вныхъ го́рдость низложи́те, и грѣхо́въ оставле́ніе да́руйте чту́щимъ любо́вію святу́ю па́мять ва́шу. [Два́жды.]

Сла́ва, и ны́нѣ, богоро́диченъ:

О Тебѣ́ ра́дуется, Благода́тная, вся́кая тва́рь, а́нгельскій собо́ръ и человѣ́ческій ро́дъ, освяще́нный хра́ме и раю́ слове́сный, дѣ́вственная похвало́, изъ Нея́же Бо́гъ воплоти́ся, и Младе́нецъ бы́сть, пре́жде вѣ́къ Сы́й Бо́гъ на́шъ: ложесна́ бо Твоя́ престо́лъ сотвори́ и чре́во Твое́ простра́ннѣе небе́съ содѣ́ла. О Тебѣ́ ра́дуется, Благода́тная, вся́кая тва́рь, сла́ва Тебѣ́.

Та́же степе́нна, 4-го гла́са, антифо́нъ 1-й. Проки́менъ, [гла́съ 4]: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Вся́кое дыха́ніе... Ева́нгеліе Матѳе́я, зача́ло 43.

По 50-мъ псалмѣ́ стихи́ра, гла́съ 6:

Вся́къ гра́дъ и страна́, сла́вному гра́ду на́шему сра́дуйтеся, и псало́мски восплещи́те рука́ми вку́пѣ, духо́вное дне́сь торжество́ пра́зднующе Петра́ благочести́ваго и Февро́ніи сла́вныя, и пѣ́сньми похвали́те, всечестны́й се́й де́нь соверша́юще, въ весе́ліи вопію́ще си́це: пріими́те пѣ́ніе люде́й ва́шихъ, блаже́нніи, и моля́щимся пода́йте неоску́дно исцѣле́ніе и ве́лію ми́лость.

Кано́нъ Богоро́дицы, со ирмосо́мъ на 6, гла́съ 2: Нетре́ну, необы́чну... Святы́мъ же два́ кано́на на 8.

Кано́нъ святы́мъ, гла́съ 8.
Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Пѣ́снь Твоему́ уго́днику, на земли́ Тебе́ просла́вльшему, Петру́ принести́, Бо́же, да́руй ми́, я́ко да Смыслода́вца пѣ́сньми возвели́чу Тя́.

Ва́съ, преблаже́нніи, оте́честву ва́шему, я́ко пресвѣ́тлое со́лнце, Христо́съ показа́, чудесы́ всѣ́хъ озаря́ющее, вѣ́рою къ ва́мъ приходя́щихъ.

Яко о тѣле́сныхъ небре́гше, и земна́я, я́ко тлѣ́нная, возненави́дѣвше, и сего́ ра́ди мíра отре́кшеся, преподо́бныхъ че́сти сподо́бистеся, съ ни́миже о мíрѣ моли́теся.

Богоро́диченъ: Пречи́стая Богоро́дице, ро́ждшая пло́тію присносу́щное Сло́во Безнача́льнаго Отца́, Приснодѣ́во, Ему́же ны́нѣ взыва́емъ: Изба́вителю Бо́гу на́шему пои́мъ.

Другíй кано́нъ чудотво́рцемъ, творе́ніе господи́на Михаи́ла мона́ха, гла́съ 1.
Пѣ́снь 1.

Ирмо́съ: Пѣ́снь побѣ́дную пои́мъ вси́ Бо́гу, сотво́ршему ди́вная чудеса́ мы́шцею высо́кою и спа́сшему Изра́иля, я́ко просла́вися.

Благочести́ваго и вѣнцено́снаго Петра́ вку́пѣ съ Февро́ніею, соше́дшеся, по достоя́нію восхва́лимъ, чуде́съ пода́теля оби́льныхъ и спаса́ющаго ду́ши на́ша.

Пѣ́сньми и пѣ́ньми духо́вными восхва́лимъ блаже́нныхъ вку́пѣ, си́це глаго́люще: ра́дуйтеся, прехва́льніи, оте́честву ва́шему пресвѣ́тліи свѣти́льницы и тве́рдіи засту́пницы.

Аще и на коне́цъ лѣ́тъ новопросвѣще́нная Россíйская земля́ си́хъ блаже́нныхъ израсти́, но дре́внихъ че́сти сподо́бишася: дарова́нія бо чуде́съ оби́льно подаю́тъ приходя́щимъ къ ни́мъ.

Богоро́диченъ: Ума́ моего́, Всенепоро́чная, омраче́нія свѣ́томъ Твои́мъ отжени́ и тмы́ изба́ви мя́ вѣ́чнующія, я́ко да пою́ вели́чія Твоя́.

Пѣ́снь 3.

Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.

Безпомо́щнымъ бу́ди помо́щникъ, блаже́нне Пе́тре, и печа́льнымъ ми́лостивное утѣше́ніе, да, твои́ми моли́твами избавля́еми, почита́емъ тя́.

Якоже иногда́ змíя уби́въ, коне́чному безвѣ́стію пре́далъ еси́, та́ко и ны́нѣ твое́ оте́чество борю́щихъ побѣди́, треблаже́нне, да тя́ прославля́емъ.

Ви́ждь уны́ніе, ви́ждь печа́ль, ви́ждь бѣду́, на ны́ напа́дающую отъ проти́вныхъ, тѣ́мже моли́твою твое́ю ко Го́споду премѣни́, Пе́тре, да благоче́стно тя́ почита́емъ.

Богоро́диченъ: Тебе́ вси́ стяжа́хомъ, христіа́не, прибѣ́жище и стѣ́ну и Тебе́ славосло́вимъ немо́лчно, Безневѣ́стная.

Инъ.

Ирмо́съ: Да утверди́тся се́рдце мое́ въ во́ли Твое́й, Христе́ Бо́же, и́же надъ вода́ми не́бо утвержде́й второ́е и основа́вый на вода́хъ зе́млю, Всеси́льне.

Тебе́ въ чудесѣ́хъ сла́вна Россíйскимъ страна́мъ показа́ Бо́гъ, Пе́тре преблаже́нне, и украси́ тя́ небе́сными дарми́. Того́ ны́нѣ моли́ поми́ловати всѣ́хъ на́съ.

Свѣти́льницы пресвѣ́тліи, я́коже со́лнце второ́е, сія́юще, на́съ озари́те, соверша́ющихъ па́мять ва́шу, преблаже́нніи Пе́тре и Февро́ніе.

Весе́лія хода́тай наста́ на́мъ, свѣтоно́сный де́нь Петра́ и Февро́ніи прему́дрыхъ, и́же вѣ́рою воспѣва́ющимъ и́хъ да́руютъ ве́лію ми́лость.

Богоро́диченъ: Изба́ви на́съ отъ всѣ́хъ напа́стей и отъ мно́гихъ собла́знъ змíевыхъ и тмы́, Всенепоро́чная, Яже Свѣ́тъ поро́ждшая на́мъ невече́рній.

Сѣда́ленъ, гла́съ 4:

Благослове́нному и свѣтоно́сному торжеству́, я́коже со́лнцу возсія́вшу, Петра́ и Февро́ніи, во все́мъ мíрѣ, къ ни́мже стеце́мся, вѣ́рніи, и непреста́нно вопіе́мъ си́це: а́ще и преидо́сте отъ земли́, пресла́вніи, но на́съ не отлучи́стеся и та́мо со а́нгелы Тро́ицѣ предстоите́, Юже моли́те спасти́ ду́ши на́ша. [Два́жды.]

Сла́ва, и ны́нѣ, богоро́диченъ:

Сло́во Отчее, Христа́ Бо́га на́шего, отъ Тебе́ воплоти́вшагося, позна́хомъ, Богоро́дице Дѣ́во, еди́на Чи́стая, еди́на Благослове́нная. Тѣ́мъ непреста́нно Тя́, воспѣва́юще, велича́емъ.

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Яко хода́тай и засту́пникъ оте́честву твоему́, я́ко сопроти́вныхъ рѣши́тель бу́ди, заступа́я лю́ди твоя́, тебе́, Пе́тре, сла́вящія.

Яко въ небе́сныхъ оби́телехъ съ преподо́бными и пра́ведными веселя́ся, преблаже́нне Пе́тре ку́пно съ Февро́ніею, не преста́й моля́ о лю́дехъ твои́хъ.

Тебѣ́ мо́лимся, преблаже́нне, сопроти́вныхъ шата́ніе низложи́ и неду́ги человѣ́ковъ облегчи́, я́ко да во гла́сѣхъ хвале́нія тебе́ велича́емъ.

Богоро́диченъ: Очище́ніе на́шимъ да́руй прегрѣше́ніемъ, я́ко Пребла́гъ, и умири́ мíръ Тво́й, Бо́же, моли́твами ро́ждшія Тя́.

Инъ.

Ирмо́съ: Ду́хомъ прови́дя, проро́че Авваку́ме, Словесе́ воплоще́ніе, проповѣ́далъ еси́, вопія́: внегда́ прибли́житися лѣ́томъ, позна́ешися, внегда́ пріити́ вре́мени, пока́жешися. Сла́ва си́лѣ Твое́й, Го́споди.

Змíя у́бо иногда́ уби́въ, блаже́нне, коне́чнѣй того́ па́губѣ пре́далъ еси́, та́ко и ны́нѣ, Пе́тре, оте́чество твое́ сохраня́й ненавѣ́тно вку́пѣ съ Февро́ніею моли́твами твои́ми.

Заре́ю трисо́лнечныя благода́ти сія́я свѣ́тлый ва́шъ пра́здникъ, блаже́нніи, страстна́го омраче́нія бѣсо́вскаго избавля́йте творя́щихъ вѣ́рою па́мять ва́шу.

Дне́сь де́нь святы́й пра́здничный мона́ховъ созыва́етъ стада́ на весе́ліе и трапе́зу духо́вную и на пи́щу нетлѣ́нныя жи́зни и боже́ственнаго наслажде́нія чудотво́рцевъ.

Богоро́диченъ: Разумѣ́въ проро́къ Ду́хомъ Бо́жіимъ, го́ру Тя́ пріосѣне́нную преднаписа́, Чи́стая; иста́явшую зно́емъ мно́гихъ прегрѣше́ній ду́шу мою́ прохлади́ хода́тайствомъ Твои́мъ, Дѣ́во, еди́на бо Ты́ человѣ́комъ исправле́ніе.

Пѣ́снь 5.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Земля́ освяти́ся, пріе́мши честна́я тѣлеса́ ва́ша, богоблаже́нніи Пе́тре и Февро́ніе, человѣ́цы же, пріе́млюще ва́ми исцѣле́ніе, Христа́ сла́вятъ, и́скренно ва́съ просла́вльшаго.

Аще и преидо́сте отъ земли́, но къ небе́снымъ доспѣ́сте и та́мо со а́нгелы Тро́ицѣ предста́сте, Юже моли́те спасти́ любо́вію ва́съ почита́ющихъ, блаже́нніи.

Яко звѣ́зды пресвѣ́тлыя и я́ко незаходи́мое со́лнце, стяжа́вше ва́съ, оте́чество ва́ше хва́лится, почита́юще па́мять ва́шу пречестну́ю, Пе́тре и Февро́ніе.

Богоро́диченъ: Дѣ́ву пое́мъ Тя́ по рождествѣ́, Богоро́дице, Ты́ бо пло́тію Бо́га Сло́ва на́мъ родила́ еси́, Ему́же вси́ си́це зове́мъ: пути́ на́ша напра́ви, мо́лимъ Ти ся.

Инъ.

Ирмо́съ: Свѣ́тлый на́мъ возсія́й Свѣ́тъ Присносу́щный, у́тренюющимъ о судьба́хъ за́повѣдей Твои́хъ, Влады́ко Человѣколю́бче, Христе́, Бо́же на́шъ.

О, предо́брая дво́ице! О, пресвѣ́тлая свѣти́ла! О, благосопряже́ніе; еди́нъ свѣ́тъ во двою́ тѣлесе́ су́щъ! О, свѣти́льницы блазíи своему́ житію́ бы́вше! Яре́мъ бо Госпо́день взе́мше, Тому́ отъ души́ послѣ́довасте вѣ́рою.

Досточу́дная и пресла́вная па́мять ва́ша возсія́ въ Россíйстѣй земли́, блаже́нніи, и ра́достно вѣ́рныхъ весели́тъ собо́ръ, и́скренно ва́съ въ пѣ́снехъ, святíи, сла́вящихъ.

Цари́ и свяще́нницы, кня́зи и вельмо́жи, и ста́рцы со ю́нотами, и вся́къ во́зрастъ, свѣ́тло предыгра́йте, па́мять пресла́вныхъ Петра́ и Февро́ніи въ пѣ́снехъ велича́юще.

Богоро́диченъ: Свѣтообра́зный Христо́въ хра́мъ, Отрокови́це, моли́твами Твои́ми Отцу́ и Сы́ну и Свято́му Ду́ху и на́съ хра́мы сотвори́, преподо́бныя содѣва́ющи, Пречи́стая.

Пѣ́снь 6.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

О, пречестна́я дво́ице! О, вели́цыи свѣти́льницы! Освяти́те и просла́вите любо́вію ва́съ въ пѣ́снехъ сла́вящихъ, чудотво́рцы.

Яко пресвѣ́тлая дво́ице и я́ко пречестна́я верста́ и благосочета́ніе, яре́мъ Госпо́день взе́мше, Тому́ отъ души́ порабо́тасте.

Яко совѣ́тницы до́бріи своему́ житію́, еди́ну мы́сль во двою́ тѣ́лу иму́ще, мíръ чудесы́ просвѣща́ете, тѣ́мже и на́съ озари́те моли́твами ва́шими.

Богоро́диченъ: Уясня́ютъ проро́честіи гла́си Бо́жію Тя́, Дѣ́во, Роди́тельницу, пое́мъ же Тя́ и мы́, ви́дяще сбытіе́ честны́хъ прорица́ній, дѣ́вству вои́стинну и чистотѣ́ вмѣсти́лище.

Инъ.

Ирмо́съ: Проро́ка Іо́ну подража́я, вопію́: живо́тъ мо́й, Бла́же, свободи́ изъ тли́, и спаси́ мя, Спа́се мíра, зову́ща: сла́ва Тебѣ́.

Отъ прече́стна ко́рене израсте́ вѣ́твь пресла́вная, и, благоче́стно на земли́ пожи́въ, Пе́тре, прія́телище чи́сто Ду́ха Свята́го бы́лъ еси́: просвѣща́й пою́щихъ ны́нѣ па́мять твою́.

Весе́лія дне́сь испо́лнися Россíйская земля́, въ наро́читый де́нь пра́здника ва́шего, пресла́вніи чудотво́рцы, и, пою́щи, си́це глаго́летъ: моли́те Христа́ сохрани́ти оте́чество ва́ше отъ язы́ка чужда́го.

Сиро́тъ и вдови́цъ засту́пницы, и въ бѣда́хъ необори́міи помо́щницы, и всѣ́хъ притека́ющихъ къ ва́мъ приста́нище небу́рное, и неле́стное ути́шіе су́щихъ во грѣсѣ́хъ.

Богоро́диченъ: Вели́чія Тебѣ́, Чи́стая, сотвори́ Христо́съ Бо́гъ на́шъ, Его́же моли́ при́сно возвели́чити и въ на́съ бога́тую Его́ ми́лость, Пренепоро́чная Влады́чице.

Конда́къ, гла́съ 8. Подо́бенъ: Взбра́нной.

Мíра сего́ княже́ніе и сла́ву вре́менну помышля́я, сего́ ра́ди благоче́стно въ мíрѣ пожи́лъ еси́, Пе́тре, ку́пно и съ супру́жницею твое́ю прему́дрою Февро́ніею, ми́лостынею и моли́твами Бо́гу угоди́вше. Тѣ́мже, и по сме́рти неразлу́чно во гро́бѣ лежа́ще, исцѣле́ніе неви́димо подава́ете, и ны́нѣ Христу́ моли́теся сохрани́ти гра́дъ же и лю́ди, и́же ва́съ сла́вящихъ.

Икосъ:

Уясни́ язы́къ мо́й, Спа́се, и умили́ се́рдце мое́, разшири́ уста́ моя́ и напо́лни Ду́ха и прему́дрости, да и́миже возглаго́лю и воспою́ си́це Твоя́ чудотво́рцы: ра́дуйся, Пе́тре блаже́нне съ прехва́льною Февро́ніею вку́пѣ; ра́дуйтеся, земли́ Россíйстѣй засту́пницы и князе́мъ правосла́внымъ помо́щницы; ра́дуйтеся, оте́честву ва́шему храни́тели и гра́ду на́шему утвержде́ніе. О, пречестна́я дво́ице и благо́е сопряже́ніе, Христу́ моли́теся сохрани́ти гра́дъ и лю́ди, и́же ва́съ сла́вящихъ.

Пѣ́снь 7.

Ирмо́съ: Отъ Іуде́и доше́дше, о́троцы, въ Вавило́нѣ иногда́, вѣ́рою Тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.

Въ болѣ́зни къ тебѣ́ прибѣга́ющихъ избавля́й, преблаже́нне Пе́тре ку́пно съ Февро́ніею, Христу́ вопію́щихъ: оте́цъ на́шихъ Бо́же, благослове́нъ еси́.

Всѣ́мъ приста́нище бу́дите, преблаже́нніи, и небу́рное оти́шіе су́щимъ во грѣсѣ́хъ, да и мы́ съ ва́ми Христу́ возопіе́мъ: оте́цъ на́шихъ Бо́же, благослове́нъ еси́.

Прибѣ́жище да ми́ бу́дите въ де́нь гнѣ́ва, богоблаже́нніи, я́ко посредѣ́ хожду́ сѣте́й мно́гихъ: тѣ́мже изба́вите мя́ отъ ни́хъ, да возмогу́ воспѣ́ти ва́съ.

Дне́сь пресла́вная па́мять Петра́ и Февро́ніи, я́ко со́лнце, возсія́ въ мíрѣ, въ ню́же соше́дшеся, вси́ воспое́мъ си́це: оте́цъ на́шихъ Бо́же, благослове́нъ еси́.

Богоро́диченъ: Ка́пля богото́чная, отъ Тебе́ ро́ждшаяся, мíръ освяти́, Богоро́дице Дѣ́во: ка́пли мнѣ́ ми́лости источи́, освяща́ющія ду́ши и помышле́нія земны́хъ.

Инъ.

Ирмо́съ: Отроцы, благоче́стію совоспита́ни, злочести́ваго велѣ́нія небре́гше, о́гненнаго преще́нія не убоя́шася, но, посреди́ пла́мене стоя́ще, поя́ху: отце́въ Бо́же, благослове́нъ еси́.

Во всѣ́хъ страна́хъ про́йде вѣща́ніе, я́ко гра́ду Му́рому яви́шася чудотво́рцы пресла́вніи, да́рующе мно́жество исцѣле́ній всѣ́мъ, приходя́щимъ къ ни́мъ и вѣ́рою пою́щимъ и́хъ.

Се́ ны́нѣ стеко́шася отъ всѣ́хъ градо́въ и стра́нъ вси́ ца́ріе и свяще́нницы, и кня́зи и вельмо́жи, бога́тіи и убо́зіи, вси́ ра́дующеся вку́пѣ, хвалу́ возда́ти ва́мъ, богоблаже́нніи.

Чудесы́ у́бо твои́ми, я́ко цвѣ́тъ, процвѣ́лъ еси́, пресла́вне Пе́тре, я́коже рече́ проро́къ: пра́ведникъ, я́ко фи́никсъ, процвѣте́тъ. Сего́ ра́ди вси́ тя́ ны́нѣ сла́вимъ, блаже́нне.

Богоро́диченъ: Тебе́, Всесвята́я Чи́стая, раби́ Твои́, всегда́ во дни́ и въ нощи́ мо́лимъ сокруше́нною мы́слію, прося́ще избавле́ніе пода́ти грѣхо́въ на́шихъ Твои́ми моли́твами.

Пѣ́снь 8.

Ирмо́съ: Царя́ Небе́снаго, Его́же пою́тъ во́и а́нгельстіи, хвали́те и превозноси́те во вся́ вѣ́ки.

Очи́сти и прости́ согрѣше́нія на́ша, Безгрѣ́шне, моли́твами Твои́хъ уго́дникъ Петра́ и Февро́ніи, да пое́мъ Тя́, Христе́, во вѣ́ки.

Иже отъ се́рдца руко́ю недосто́йною приноси́мое ва́мъ хвале́ніе, блаже́нніи, пріими́те и мольбу́ сотвори́те о на́съ ко Христу́ Бо́гу.

Тро́иченъ: Пѣвце́мъ, Тебе́ пою́щимъ, Тро́ице Пресвята́я, согрѣше́нія оста́ви, я́ко Пребла́га, моли́твъ ра́ди Петра́ и Февро́ніи, да Тя́ пое́мъ во вѣ́ки.

Богоро́диченъ: Божества́ сосу́дъ бы́вши, Чи́стая, просвѣти́ мя въ повелѣ́ніи Свѣ́та ходи́ти, Пречи́стая, отъ чре́ва Твоего́ возсія́вшаго и просвѣти́вшаго вѣ́рныхъ сердца́.

Инъ.

Ирмо́съ: Его́же ужаса́ются а́нгели и вся́ во́инства, я́ко Творца́ и Го́спода, по́йте, свяще́нницы, просла́вите, о́троцы, благослови́те, лю́діе, и превозноси́те во вся́ вѣ́ки.

Ангельстіи чи́нове хва́лятъ ва́съ, пресла́вніи, и человѣ́честіи ро́ди пою́тъ непреста́нно, творя́ще вѣ́рно па́мять ва́шу.

Досто́йными похвала́ми воспѣ́ти пресла́вныя чудотво́рцы у́мъ и смы́слъ да́руй ми́, Христе́ Бо́же, я́ко да пою́, ра́дуяся, па́мять и́хъ.

Побѣ́да имени́та вои́стинну вѣ́рнымъ лю́демъ, въ бѣда́хъ крѣ́пцыи помо́щницы яви́шася, Пе́тръ ку́пно съ Февро́ніею.

Богоро́диченъ: Уврачу́й, Пречи́стая, стра́сти се́рдца моего́, ро́ждшая всѣ́хъ Царя́ Бо́га, и пра́ведныхъ ча́сти яви́ мя прича́стника, Богоро́дице Дѣ́во, Христа́, Сы́на Твоего́, умоли́вши.

Пѣ́снь 9.

Ирмо́съ: Вои́стинну Богоро́дицу, Тя́ исповѣ́дуемъ, спасе́нніи Тобо́ю, Дѣ́во Чи́стая, съ безпло́тными ли́ки Тя́ велича́юще.

Отъ ю́ности ва́шея чи́стую со́вѣсть иму́ще къ Бо́гу, сего́ ра́ди, благоче́стно пожи́вше, къ вы́шнимъ преидо́сте. Моли́те Христа́ о на́съ, да ва́съ любо́вію почита́емъ.

Яко предстоя́ще Святѣ́й Тро́ицѣ съ преподо́бными и пра́ведными, моли́теся, блаже́нніи, изба́вити на́съ вся́каго преще́нія и гнѣ́ва, да ва́съ непреста́нно велича́емъ.

Лю́діе твои́ мо́лятъ тя́, богоблаже́нне Пе́тре, ку́пно моли́ Христа́ съ прему́дрою Февро́ніею, съ не́юже въ мíрѣ богоуго́дно пожи́лъ еси́, изба́вити на́съ отъ вся́кихъ зо́лъ.

Богоро́диченъ: О, чудесе́ вели́каго! Ка́ко вмѣсти́ся во утро́бу Твою́ Христо́съ Бо́гъ, ника́коже вмѣсти́мый? Его́же за хва́лящія Тя́ умоли́, Дѣ́во, отъ бѣ́дъ изба́вити на́съ и отъ беззако́нныхъ человѣ́къ всегда́.

Инъ.

Ирмо́съ: Свѣтоно́сный о́блакъ, въ о́ньже всѣ́хъ Влады́ка, я́ко до́ждь съ небесе́ на руно́, сни́де и воплоти́ся на́съ ра́ди, бы́въ Человѣ́къ, Безнача́льный, велича́емъ вси́ я́ко Ма́терь Бо́га на́шего Чи́стую.

Красе́нъ душе́ю и тѣ́ломъ и благоче́стіемъ сія́я, сла́вне Пе́тре, боже́ственнаго испо́лненъ ра́зума и прему́дрости, орга́нъ Свята́го Ду́ха бы́лъ еси́, по смерти у́бо къ безсме́ртнѣй жи́зни и неконча́емому блаже́нству преше́лъ еси́, ра́дуяся.

Яко у́тро, я́ко де́нь свѣ́тлый, ва́шъ пра́здникъ яви́ся, сла́вніи, а́ки струя́, происхо́дитъ отъ ра́ки ва́шея исцѣле́ній вся́кихъ и вѣ́рныхъ сердца́ напоя́етъ, любо́вію ва́съ почита́ющихъ.

Вели́къ щи́тъ и вели́ка крѣ́пость земли́ Россíйстѣй обрѣ́лся еси́, блаже́нне Пе́тре вку́пѣ съ Февро́ніею, Импера́тору правосла́вному похвале́ніе и сла́ва во всѣ́хъ язы́цѣхъ, и ны́нѣ мо́лимъ вы́ сохрани́ти оте́чество ва́ше отъ ва́рварскаго нахожде́нія.

Богоро́диченъ: Яже Свѣ́тъ ро́ждшая боже́ственный, омраче́ннаго мя́ всѣ́ми прило́ги лука́ваго, и во уны́ніи живу́щаго, и прогнѣвля́ющаго Бо́га, Всенепоро́чная, просвѣти́ и наста́ви къ до́брымъ дѣло́мъ, я́ко вина́ всѣ́хъ благи́хъ.

Свѣти́ленъ. Подо́бенъ: Посѣти́лъ ны́.

Иже благоче́стно пра́зднующимъ па́мять ва́шу, богоблаже́нніи Пе́тре и Февро́ніе, вку́пѣ ми́рно пожи́вше и благоче́стно, моли́те Христа́ грѣхо́въ оставле́ніе дарова́ти рабо́мъ ва́шимъ. [Два́жды.]

[Сла́ва, и ны́нѣ,] богоро́диченъ:

Пресвята́я Богоро́дице, упова́ніе на́ше и похвало́, Тя́ еди́ну вѣ́дуще, вѣ́рою покланя́ющеся, мо́лимъ: ра́дуйся, Неискусобра́чная Свята́я Марíе, покро́ве и огражде́ніе на́ше и помо́щница су́щимъ въ бѣда́хъ. Моли́ Христа́, Сы́на Твоего́, за рабы́ Твоя́, на Тя́ бо надѣ́емся.

На хвали́техъ стихи́ры, на 4, гла́съ 4. Подо́бенъ: Зва́нный свы́ше.

Яко свѣтоза́рное со́лнце,* блаже́нніи, отъ за́пада возсія́вше,* всю́ Россíйскую зе́млю просвѣти́сте* и къ свѣ́ту весе́лія наста́висте;* и ны́нѣ о пою́щихъ ва́съ,* Пе́тре блаже́нне съ прему́дрою Февро́ніею,* и сла́вящихъ лю́дехъ,* и прося́щихъ исцѣле́нія,* и ко Христу́ и́скренно притека́ющихъ* моли́те спасти́* и просвѣти́ти ду́ши на́ша.

О, вели́кое и несказа́нное чу́до* Боже́ственныя благода́ти,* Петра́ блаже́ннаго съ прему́дрою Февро́ніею* ка́ко возмо́жемъ воспѣ́ти или́ изглаго́лати?* Оваго я́ко хра́бра и богочести́ва,* о́ву же я́ко му́дру и благовѣ́ріе храня́щу.* Овъ у́бо го́рдаго змíя побѣди́,* о́ва же смире́ніе любля́ше;* и ны́нѣ Христу́ Бо́гу мо́лятся* спасти́ и просвѣти́ти ду́ши на́ша.

Всечестны́й приспѣ́ пра́здникъ* святы́хъ чудотво́рцевъ,* хода́тайствуя всѣ́мъ спасе́ніе,* въ не́мже, та́йно восплеска́вше,* къ ни́мъ си́це рце́мъ:* ра́дуйтеся, свѣти́ла те́мнымъ* мы́сленнаго Со́лнца;* ра́дуйся, Пе́тре* ку́пно съ супру́жницею твое́ю,* благовѣ́ріе храня́ще* во еди́нствѣ Святы́я Тро́ицы,* Юже моли́те* спасти́ и просвѣти́ти ду́ши на́ша.

Пе́рвѣе у́бо, прехва́льніи,* отъ ю́ности своея́* Христу́ порабо́тавше,* су́щаго въ мíрѣ се́мъ* я́ко прехва́льна позна́вше* и сего́ ра́ди ми́лостынею и моли́твами* до́брѣ Тому́ угоди́вше.* Тѣ́мже и по сме́рти* исцѣле́ніе подава́ете всѣ́мъ,* вѣ́рою ва́съ почита́ющимъ,* Пе́тре и Февро́ніе,* и ве́лію ми́лость.

Сла́ва, гла́съ 2. Самогла́сенъ:

Пріиди́те, вси́ язы́цы, восплещи́те рука́ми и ликовству́йте, пріиди́те, вси́ россíйстіи кня́зи, свяще́нницы и вельмо́жи, мона́си же и простíи, духо́внѣ возвесели́мся въ наро́читый де́нь пра́здника но́выхъ чудотво́рцевъ Му́ромскихъ, Петра́ блаже́ннаго и Февро́ніи прему́дрыя. И си́хъ, я́ко цвѣ́ты, хвала́ми и пѣ́сньми почти́мъ, си́це глаго́люще: ра́дуйтеся, пресла́вніи, небе́сніи человѣ́цы, земнíи а́нгели, Ду́ха Свята́го оби́телище, и ева́нгельскому гла́су у́бо возслѣ́дницы, тѣ́мъ и прія́сте вмѣ́сто тлѣ́нныхъ нетлѣ́нная. И ны́нѣ въ па́мяти ва́шей моли́те Христа́ Бо́га сохрани́ти оте́чество ва́ше и поми́ловати гра́дъ и лю́ди, почита́ющія ва́съ, и спасти́ ду́ши на́ша.

И ны́нѣ, богоро́диченъ:

На Тя́ упова́ніе, [Богоро́дице, возложи́хомъ, ча́янія да не отпаде́мъ, спаси́ на́съ отъ бѣ́дъ, Помо́щнице недоумѣ́емымъ, и сопроти́вныхъ совѣ́ты разори́: Ты́ бо еси́ на́ше спасе́ніе, Благослове́нная].

Та́же, славосло́віе вели́кое. Тропа́рь. [Ектеніи́] и отпу́стъ.



НА ЛИТУРГІИ,

Блаже́нна отъ кано́на 1-го пѣ́снь 3-я, на 4, и друга́го пѣ́снь 6-я [на 4]. Проки́менъ, гла́съ 7: Честна́ предъ Го́сподемъ* сме́рть преподо́бныхъ его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Апо́столъ, къ Гала́томъ, зача́ло 213. Аллилу́ія, гла́съ 6: Блаже́нъ му́жъ, боя́йся Го́спода, [въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́.] Ева́нгеліе Матѳе́я, зача́ло 10. Прича́стенъ: Ра́дуйтеся пра́ведніи о Го́сподѣ, [пра́вымъ подоба́етъ похвала́].

Источникъ: Минíа, мѣ́сяцъ Іу́ній. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 165 – 173 об.

/ Къ оглавленію раздѣла /


Наверхъ / Къ титульной страницѣ

0