Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - четвергъ, 21 сентября 2017 г. Сейчасъ на порталѣ посѣтителей - 20.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́нія въ 23-й де́нь.
Святы́я му́ченицы Агрипи́ны.

[ВЕЧЕРЪ,]
Стихи́ры му́ченицы, гла́съ 4. Подо́бенъ: Да́лъ еси́ зна́меніе.

Бога́тство я́ко многоцѣ́нно,* Сикелíи тя́ дае́тъ,* въ Ри́мѣ пострада́вшую,* Христо́съ Бо́гъ на́шъ,* идѣ́же прише́дши, сла́вная му́ченице,* де́моновъ лука́вое мно́жество отго́ниши* предста́тельствомъ твои́мъ.* Тѣ́мже тя́ ублажа́емъ* и свято́е твое́ дне́сь пра́зднуемъ страда́ніе,* Агрипи́но многострада́льная.

Ноша́ху на ра́менахъ тя́ Ва́сса и Па́вла,* повелѣ́ніемъ вся́ческая Нося́щаго,* мѣста́ премѣня́юще и долготу́ пучи́ны,* му́ченице Агрипи́но,* чудодѣ́йствія стра́шная соверша́ющи* Боже́ственною благода́тію,* почи́ла еси́ на мѣ́стѣ,* идѣ́же Бо́гъ учини́,* утружде́ннымъ поко́й бы́вши, всехва́льная.

Ины стихи́ры Богоро́дицы. Гла́съ и подо́бенъ то́йже:
Зри́: Егда́ пое́ши Аллилу́ія, сíи стихи́ры глаго́ли пре́жде:

Ра́дуйся, солнцезра́чная луче́,* Со́лнца незаходи́маго престо́ле,* я́же Со́лнце возсія́вши недоумѣ́нное;* ра́дуйся, у́ме, облиста́яй боже́ственными сія́ньми,* заре́ мо́лнійная, освѣти́вшая земли́ концы́,* и́стинное зла́та блиста́ніе,* вседо́брая и Пренепоро́чная,* Свѣ́тъ невече́рній вѣ́рнымъ облиста́вши.

Скве́рну отмы́й отра́стнаго се́рдца моего́,* Богоро́дице Всепѣ́тая,* и вся́ я́звы и гное́нія сего́,* я́же отъ грѣха́, очи́сти, Чи́стая,* и ума́ моего́ уста́ви непостоя́ніе,* я́ко да си́лу Твою́* и вели́кое заступле́ніе* велича́ю, окая́нный* и непотре́бный ра́бъ Тво́й.

Не́мощь и разслабле́ніе,* Дѣ́во Ма́ти Всенепоро́чная,* души́ моея́ преложи́ въ крѣ́пость и си́лу,* стра́хомъ и любо́вію твори́ти же* и дѣ́яти оправда́нія Христо́ва,* я́ко да избѣ́гну огня́ нестерпи́маго* и наслѣ́діе небе́сное* и жи́знь непреходи́мую* Тобо́ю воспріиму́, веселя́ся всегда́.

Сла́ва, и ны́нѣ [богоро́диченъ]. Гла́съ и подо́бенъ то́йже:

Бѣсо́вскими приклоне́на прило́гми* и въ ро́въ поги́бели вве́ржена,* уще́дри, Влады́чице,* и утверди́ мя на ка́мени добродѣ́телей,* и, навѣ́ты вра́жія разо́рши,* сподо́би мя твори́ти повелѣ́нія* Твоего́ Сы́на и Бо́га на́шего,* я́ко да улучу́* оставле́ніе въ де́нь Суда́.

Крестобогоро́диченъ. Подо́бенъ то́йже:

Распина́ема Христа́ Человѣколю́бца ви́дящи Пречи́стая* и ре́бра ископова́ема копіе́мъ,* пла́чущи, вопія́ше:* что́ сіе́, Сы́не Мо́й?* Что́ Ти безблагода́тніи лю́діе возда́ша,* за я́же сотвори́лъ еси́ до́брая и́мъ,* и тщи́шися безча́дствовати Мя́, Вселюбе́знѣйшій?* Удивля́юся, Благоутро́бне,* Твоему́ во́льному распя́тію.

Тропа́рь, гла́съ 4:

Агница Твоя́, Іису́се, Агрипи́на, зове́тъ ве́ліимъ гла́сомъ: Тебе́, Женише́ мо́й, люблю́, и Тебе́ и́щущи, страда́льчествую, и сраспина́юся, и спогреба́юся креще́нію Твоему́, и стражду́ Тебе́ ра́ди, я́ко да ца́рствую въ Тебѣ́, и умира́ю за Тя́, да и живу́ съ Тобо́ю; но, я́ко же́ртву непоро́чную, пріими́ мя, съ любо́вію поже́ршуюся Тебѣ́; тоя́ моли́твами, я́ко Ми́лостивъ, спаси́ ду́ши на́ша.


[НА УТРЕНИ,]
Кано́нъ, его́же краегране́сіе: Христо́ву невѣ́сту Агрипи́ну хвалю́. Гла́съ 4.

Пѣ́снь 1.

Ирмо́съ: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Сія́ніемъ благода́ти, облиста́вшимъ тебе́ свы́ше, мра́къ отжени́ невѣ́дѣнія моего́ и пода́ждь ми́ моли́твами твои́ми, Агрипи́но, благода́ть воспѣ́ти твоя́, му́ченице, чудеса́.

Со́лнца свѣтлѣ́йши я́ко и́стинно возсія́ла еси́ на тве́рди Це́ркви Христо́вы и просвѣти́ла еси́ заря́ми по́двигъ, му́ченице, и чуде́съ твои́хъ мíра концы́.

Жениха́ безсме́ртнаго, Жизнода́вца жела́ющи, я́ко да́ръ, страда́ніе Сему́ принесла́ еси́ и воспрія́ла еси́ небе́сное Ца́рство и вѣне́цъ нетлѣ́ненъ, му́ченице сла́вная.

Руко́ю Влады́ки твоего́ окормля́ема, преплыла́ еси́ непостоя́нное мо́ре нече́стія, честна́я, и устреми́лася еси́ ко приста́нищу, Агрипи́но, вы́шнія свѣ́тлости, богоблаже́нная.

Богоро́диченъ: Денни́ца возсія́ въ сердца́хъ, Пренепоро́чная, вѣ́рою чту́щихъ Тя́, Бо́жію Ма́терь, и озари́ де́нь свѣтоно́сный, Христо́съ, Иже изъ ложе́снъ Твои́хъ возсія́, Препѣ́тая.

Пѣ́снь 3.

Ирмо́съ: Лу́къ си́льныхъ изнемо́же, и немощству́ющіи препоя́сашася си́лою, сего́ ра́ди утверди́ся въ Го́сподѣ се́рдце мое́.

Же́зліемъ біе́ма, ра́довашеся, си́ми ко́сти нече́стія сокруша́ющи и вопію́щи: Твоея́ любве́ ничто́же мя́ разлучи́тъ, Христе́.

Да враго́въ наготу́ обличи́ши, му́ченице, ри́зъ совлекла́ся еси́, сего́ ра́ди нетлѣ́нія оде́жду тебѣ́ Христо́съ даде́.

Уста́, глаго́лющая беззако́нно на тя́, зако́нно, Христо́ва му́ченице, загради́шася, вели́чія Спа́са проповѣ́дающей ти́.

Протя́гъ на земли́ тѣ́ло твое́, нече́стія служи́тель осу́етися, просте́ртъ бо ко Влады́цѣ у́мъ тво́й иму́щи.

Богоро́диченъ: Глаго́лъ благоче́стно испо́лнися Иса́іинъ: Дѣ́ва бо роди́ воплоще́нна Жизнода́вца и Спа́са ду́шъ на́шихъ.

Сѣда́ленъ, гла́съ 4. Подо́бенъ: Ско́ро предвари́.

Иже ка́менію служа́щіи пре́лестію мно́гою отягчава́ютъ ка́меніемъ тя́, исповѣ́дающую Христа́, Ка́меня необори́маго. Тѣ́мже, сконча́вшися, пресла́вныхъ чуде́съ, сла́вная Агрипи́но, облиста́ла еси́ зарю́, просвѣща́ющую ду́ши на́съ, восхваля́ющихъ тя́.

Сла́ва, и ны́нѣ, богоро́диченъ:

Еди́на, ро́ждшая Творца́ всѣ́хъ, еди́на, украси́вшая человѣ́чество Рождество́мъ Твои́мъ, Богоневѣ́сто, изба́ви мя́ отъ сѣ́ти льсти́ваго врага́, поста́ви мя́ на ка́мени Христо́выхъ хотѣ́ній, Того́ моля́щи прилѣ́жно, Его́же воплоти́ла еси́.

Крестобогоро́диченъ:

На Крестѣ́ Тя́ возвы́шена я́ко узрѣ́ Пречи́стая Ма́ти Твоя́, Сло́ве Бо́жій, ма́терски рыда́ющи, вѣща́ше: что́ но́вое и стра́нное сіе́ чу́до, Сы́не Мо́й? Ка́ко, Жи́знь всѣ́хъ, вкуша́еши сме́рти, оживи́ти ме́ртвыя хотя́, я́ко Милосе́рдъ?

Пѣ́снь 4.

Ирмо́съ: Сѣдя́й въ сла́вѣ на Престо́лѣ Божества́ во о́блацѣ ле́гцѣ, прíиде Іису́съ Пребоже́ственный, Нетлѣ́нною Дла́нію и спасе́ зову́щія: сла́ва, Христе́, си́лѣ Твое́й.

Во́лю Того́ боя́щихся творя́й, а́нгеломъ, му́ченице, разрѣша́етъ тя́ у́зъ и стѣсне́нія, разори́вшую вся́кое нече́стіе соу́зомъ любве́ Христа́, Жениха́ твоего́.

Умертви́вшися любве́ ра́ди Умертви́вшаго всю́ крѣ́пость сме́ртную, благода́ть источа́еши присноживо́тную, страстьми́ умерщвле́нныя исцѣля́еши, Агрипи́но, му́чениковъ Христо́выхъ удобре́ніе.

Превозше́дши любо́вію Жениха́ твоего́ вся́ку плотску́ю любо́вь, терпѣ́ла еси́ тве́рдо, внегда́ біе́мѣ бы́ти болѣ́зненнѣ, вопію́щи: не разлучи́тъ мя́ любве́ Твоея́, Христе́, му́къ преще́ніе.

Блаже́ннаго совокупле́нія тро́ичнымъ жела́ніемъ пострада́вшихъ Ва́ссы и, Агрипи́ны цѣлому́дрыя кто́ му́жество изрече́тъ? Имже показа́ша не́мощну и́дольскую крѣ́пость держа́вно.

Богоро́диченъ: Цари́ца Дѣ́ва, злато́ю оде́ждою укра́шена, Сы́ну Царю́ ны́нѣ предстои́тъ, Яже безъ разсужде́нія а́нгелы превосходя́щи, зову́щія: сла́ва, Христе́, си́лѣ Твое́й.

Пѣ́снь 5.

Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Свѣ́тъ незаходи́мый, все́льшійся въ твое́ тѣ́ло, явля́ше тя́ зря́щимъ въ нощи́, я́ко во дни́, зарю́, чуде́съ испуща́ющую.

Нескве́рная а́гница, Па́стыря стопа́мъ послѣ́дующи, я́коже же́ртва непоро́чна, Сему́ принесе́ся боже́ственно.

Умъ иму́щи свѣ́телъ, проро́чествія испо́лненъ, бу́дущая, я́ко су́щая, сла́вная Ва́ссо, предглаго́лати сподо́билася еси́.

Богоро́диченъ: О, Ма́ти Бо́жія, души́ моея́ озлобле́ніе исцѣли́, ро́ждшая Преблага́го Сло́ва, всѣ́хъ ублажа́юща.

Пѣ́снь 6.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Облиста́вшее отъ Ри́ма, я́ко незаходи́мое со́лнце, Сикелíя тѣ́ло святы́я му́ченицы пріе́мши, мра́ка де́монскаго избавля́ется лю́тости.

До́блественно требога́тыя святы́я му́ченицы, я́же пре́жде сме́рти уме́ршія, въ ча́яніи муче́нія, уме́ршее твое́ живоно́сное тѣ́ло принесо́ша.

Ору́жіе врага́ на тебѣ́ изнемо́же, и́бо, я́ко гра́дъ, низложи́ла еси́, неиму́щъ основа́нія, сего́ горды́ню, Агрипи́но, трудо́мъ сла́вныхъ по́двиговъ твои́хъ.

Исцѣля́ется прикоснове́ніемъ тѣ́ла твоего́ кровоточи́вая, прокаже́нніи очища́ются, вѣ́рою притека́юще, отбѣга́етъ же и и́нъ вся́къ неду́гъ призыва́ніемъ свята́го твоего́, му́ченице, и́мене.

Богоро́диченъ: Глаго́лы Гавріи́ла, Дѣ́во Всенепоро́чная, ны́нѣ пріе́мше, вопіе́мъ: ра́дуйся, Ма́ти еди́на благослове́нная; ра́дуйся, две́ре, Со́лнца пра́вды иму́щи.

Конда́къ, гла́съ 4. Подо́бенъ: Яви́лся еси́.

Свѣ́тлыхъ по́двигъ твои́хъ свѣтоно́сный наста́ де́нь, въ о́ньже почита́ющи си́хъ, боже́ственная Це́рковь вся́ созыва́етъ ве́село вопи́ти тебѣ́: ра́дуйся, дѣ́во и му́ченице, Агрипи́но всечестна́я.

Пѣ́снь 7.

Ирмо́съ: Спасы́й во огни́ авраа́мскія Твоя́ о́троки и халде́и уби́въ, я́же Пра́вда пра́ведно уловля́ше, препѣ́тый Го́споди, Бо́же оте́цъ на́шихъ, благослове́нъ еси́.

Голуби́ца, я́коже злата́, ору́жіемъ Креста́ огражда́ема, ага́ряны, и́же въ нощи́ ко гра́ду твоему́ прибли́жившіяся, потреби́ла еси́, спа́сши вѣ́рныя отъ скверноубíйства си́хъ, му́ченице.

Многови́дныя Христа́ ра́ди претерпѣ́вши болѣ́зни, му́ченице, неболѣ́зненно обрѣла́ еси́ въ то́мъ и безсме́ртно наслажде́ніе, зову́щи: препѣ́тый Го́споди, Бо́же оте́цъ, благослове́нъ еси́.

Свяще́нникъ чу́дный и чудодѣ́йствомъ сія́я, твоя́ чудеса́ зря́, Агрипи́но, Бо́га велича́ше и, веселя́ся, поя́ше: Бо́же оте́цъ на́шихъ, благослове́нъ еси́.

Тве́рдымъ по́мысломъ тве́рдое твое́ къ страсте́мъ нося́щи тѣ́ло, же́нскую ника́коже чу́ла еси́ не́мощь, зову́щи, дѣ́во, Влады́цѣ: благослове́нъ еси́, Го́споди, Бо́же оте́цъ на́шихъ.

Богоро́диченъ: Ро́ждшая Бо́га, пребыва́еши по рождествѣ́ Дѣ́вою и млеко́мъ пита́еши ма́терски подо́бно Пита́теля мíра, Пренепоро́чная, Ему́же пою́ще, зове́мъ: Бо́же оте́цъ на́шихъ, благослове́нъ еси́.

Пѣ́снь 8.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки.

Но́щь, я́ко де́нь, зря́шеся нося́щимъ, му́ченице, твоя́ мо́щи. Мѣ́сто благоуха́шеся вся́ко, тя́ пріе́млющее. Де́монское ополче́ніе вельми́ отгоня́шеся. Исцѣле́ній излива́ются ка́пли превознося́щимъ Христа́ во вся́ вѣ́ки.

Жениха́ безсме́ртнаго жела́ющи, въ слѣ́дъ благоуха́ній Сего́ текла́ еси́, Того́ страсте́мъ и сме́рти подо́бящися, му́ченице сла́вная, и взыва́ющи: Го́спода по́йте, дѣла́, и превозноси́те Его́ во вѣ́ки.

Несумнѣ́нну иму́щи вѣ́ру, еле́емъ просвѣ́щши крове́й твои́хъ, му́ченице, свѣщу́ твою́, вну́трь вошла́ еси́ черто́га, пою́щи небе́сныя ра́дости: Го́спода по́йте, дѣла́, и превозноси́те Его́ во вѣ́ки.

Ви́дѣти красоту́ Госпо́дню, Сего́ же Це́рковь посѣща́ти жела́ющи, я́ко на колесни́цѣ кро́ве своея́ взе́мшися, пою́щи, къ Сему́ дости́гла еси́: Го́спода по́йте, дѣла́, и превозноси́те Его́ во вѣ́ки.

Богоро́диченъ: Купина́, я́же пре́жде прообразова́ше стра́нное рождества́ Твоего́ та́инство, неопа́льна пребы́вши, Пренепоро́чная: и́бо о́гнь родила́ еси́ Божества́, неопа́льна пребыла́ еси́, Отрокови́це, тѣ́мже Тя́ пое́мъ во вся́ вѣ́ки.

Пѣ́снь 9.

Ирмо́съ: Ка́мень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.

Ма́ніемъ вся́ творя́щаго къ концу́ муче́нія Агаѳони́ка съ Ва́ссою вку́пѣ и Па́влою усе́рдно тща́щеся, я́ко вои́стинну друже́бно, обрѣто́ша жела́нія кра́й.

Въ небе́сныхъ черто́зѣхъ всели́вшися, дѣ́во, и неви́димыхъ добро́ты смотря́ющи, и пріе́млющи Бо́жію свѣ́тлость, тя́ пою́щія уясни́.

Вѣне́цъ положи́ся благода́тей на версѣ́ твое́мъ, Агрипи́но, я́ко сконча́вшей тече́ніе и вѣ́ру соблю́дшей некра́дому, и пра́ведныхъ чи́нове красно́ тя́ прія́ша.

Яко предстоя́щи Зижди́телю со дерзнове́ніемъ Влады́цѣ, му́ченице Агрипи́но, со всѣ́ми отъ вѣ́ка святы́ми проси́ согрѣше́ній проще́нія тя́ пою́щимъ, до́брая дѣ́во.

Богоро́диченъ: Вся́ Содержа́щаго ма́терски подо́бно Твои́ми рука́ми нося́щи, Дѣ́во Марíе, руки́ мя́ изба́ви борца́, я́ко да Твое́, спаса́емь, восхвалю́ вели́чіе.

Источникъ: Минíа, мѣ́сяцъ Іу́ній. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 134 – 138.

/ Къ оглавленію раздѣла /


Наверхъ / Къ титульной страницѣ

0