Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 28 апрѣля 2017 г. Сейчасъ на порталѣ посѣтителей - 31.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́нія, въ 23-й де́нь.
Слу́жба свято́му пра́ведному Арте́мію, Ве́ркольскому чудотво́рцу.

[НА ВЕЛИЦѢЙ ВЕЧЕРНИ,
Пое́мъ Блаже́нъ му́жъ, 1-й антифо́нъ.] На Го́споди, воззва́хъ: стихи́ры на 8, гласъ 1:

Возлюби́въ Бо́га отъ младе́нства,* послушли́въ бы́лъ еси́ роди́телю твоему́,* пра́ведне Арте́міе,* и труды́ полага́я земны́я,* жела́лъ еси́ насыща́тися пи́щи* въ по́тѣ лица́ твоего́;* тѣ́мже и сподо́бился еси́ вѣ́чныя жи́зни* и во оби́телехъ святы́хъ пребыва́еши,* моли́ у́бо Человѣколю́бца Бо́га* о спасе́ніи ду́шъ на́шихъ. [Три́жды.]

Въ де́нь трудо́въ твои́хъ* не́бо помрачи́ся иногда́ о́блаки,* и вѣ́тренному дыха́нію умно́жшуся* и мо́лніямъ блиста́ющимъ,* воззрѣ́въ горѣ́, пресла́вне Арте́міе,* во стра́сѣ Бо́жіемъ испусти́лъ еси́ ду́шу твою́* и пресели́лся еси́ въ Ца́рствіе небе́сное,* въ селе́ніихъ пра́ведныхъ моля́ Христа́ Бо́га* о спасе́ніи ду́шъ на́шихъ. [Три́жды.]

Во ю́ностнѣмъ цвѣ́тѣ* всели́вся во блаже́нную жи́знь* и небе́сныя да́ры пріи́мъ отъ Влады́ки всѣ́хъ,* Ему́ усе́рдно предстои́ши,* прехва́льне Арте́міе,* и лику́еши со а́нгелы,* пресла́вный вѣне́цъ нося́* на версѣ́ свое́мъ, всече́стне,* отъ Вседержи́телевы руки́,* Его́же моли́ о спасе́ніи ду́шъ на́шихъ. [Два́жды.]

Сла́ва, гла́съ 8:

Пріиди́те, вѣ́рніи, всечестны́й пра́здникъ соста́вимъ: преди́внаго въ чудесѣ́хъ Арте́мія, благоче́стную вѣ́твь во ю́ностнѣмъ цвѣ́тѣ, воспои́мъ и возвели́чимъ дне́сь. Ты́ же, о, всехва́льне Арте́міе, воздѣжи́ ру́цѣ свои́ ко Го́споду, да изба́витъ на́съ отъ обдержа́щихъ ны́ болѣ́зней, и бѣ́дъ и скорбе́й, да сохрани́тъ же на́съ отъ вра́гъ ви́димыхъ и неви́димыхъ, и сподо́битъ Ца́рствія небе́снаго, и пода́стъ мíрови ве́лію ми́лость.

И ны́нѣ, богоро́диченъ: Ца́рь Небе́сный...
Вхо́дъ. Проки́менъ дне́. Чте́нія три́.

Проро́чества Иса́іина чте́ніе.

Та́ко глаго́летъ Госпо́дь: вси́ язы́цы собра́шася вку́пѣ, и соберу́тся кня́зи отъ ни́хъ, кто́ возвѣсти́тъ сія́ въ ни́хъ? Или́ я́же отъ нача́ла, кто́ слы́шана сотвори́тъ ва́мъ? Да приведу́тъ свидѣ́тели своя́ и оправдя́тся, и да услы́шатъ, и да реку́тъ и́стину. Бу́дите Ми́ свидѣ́тели, и Азъ Свидѣ́тель, глаго́летъ Госпо́дь Бо́гъ, и отрокъ, его́же избра́хъ, да позна́ете и вѣ́руете Ми́, и разумѣ́ете, я́ко Азъ е́смь; пре́жде Мене́ не бы́сть и́нъ бо́гъ, и по Мнѣ́ не бу́детъ. Азъ е́смь Бо́гъ, и нѣ́сть ра́звѣ Мене́ спаса́яй. Азъ возвѣсти́хъ и спасо́хъ, уничижи́хъ, и не бѣ́ въ ва́съ чу́ждій. Вы́ Мнѣ́ свидѣ́тели, и Азъ Госпо́дь Бо́гъ. И еще́ отъ нача́ла Азъ е́смь, и нѣ́сть отъ ру́къ Мои́хъ избавля́яй; сотворю́, и кто́ отврати́тъ то? Си́це глаго́летъ Госпо́дь Бо́гъ, избавля́яй ва́съ Святы́й Изра́илевъ.

Прему́дрости Соломо́ни чте́ніе.

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́новы чте́ніе.

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе сокруше́ніе; они́ же су́ть въ ми́рѣ. Ибо предъ лице́мъ человѣ́ческимъ а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Яко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ возсія́ютъ и, я́ко и́скры по сте́блію, потеку́тъ: су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ры, гла́съ 8:

Восхваля́емъ пѣ́сньми свяще́нными чудотворе́нія твоя́, пресла́вне Арте́міе: ты́ бо, я́ко вра́чь хи́трый, яви́вся въ Дви́нской странѣ́, да́руеши здра́віе человѣ́комъ и чуде́съ дарова́ніе источа́еши, и Го́сподеви хода́тай о всѣ́хъ предстои́ши, и мо́лишися о душа́хъ на́шихъ.

Но́ваго страстоте́рпца Арте́мія пѣ́сньми духо́вными воспое́мъ, просія́вшаго чудесы́ свои́ми; то́й бо, я́ко не созрѣ́лый кла́съ, пожа́тый отъ всѣ́хъ Творца́ и Го́спода, преста́вися въ жи́знь неконча́емую, предстоя́ти престо́лу Его́ и моли́тися о душа́хъ на́шихъ.

Пресла́вная па́мять твоя́, Арте́міе, и мо́щи твоя́, я́ко пресвѣ́тлая заря́, возсія́, Боже́ственною благода́тію невреди́мы ничи́мже и источа́ющія пресла́вная чудеса́. Тѣ́мже ти́ ны́нѣ вопіе́мъ: не забу́ди ны́, моли́ся Христу́ Бо́гу о душа́хъ на́шихъ.

Сла́ва, гла́съ 6:

Дне́сь стеце́мся, вѣ́рніи, въ пречестну́ю па́мять прему́драго о́трока и страстоте́рпца Арте́мія, и пѣ́сненными похвала́ми воспое́мъ, глаго́люще: ра́дуйся, дѣ́лателю благíй земли́, отъ нея́же плоды́ къ Бо́гу принося́й и пріе́мляй до́брыя кла́сы; ра́дуйся, свѣти́льниче пресвѣ́тлый, и́же мно́гими чудесы́ просвѣща́яй концы́ вселе́нныя; ра́дуйся, врачу́ хи́трый душа́мъ и тѣ́ломъ. И ны́нѣ, пресла́вне Арте́міе, не преста́й моля́ся Христу́ Бо́гу о и́же вѣ́рою и любо́вію чту́щихъ приснора́достную и всепра́зднственную па́мять твою́.

И ны́нѣ, богоро́диченъ.

На стихо́внѣ стихи́ры, гла́съ 2:

Кíими похва́льными пѣ́сньми* воспое́мъ пресла́внаго въ чудесѣ́хъ Арте́мія,* въ настоя́щій се́й де́нь соше́дшеся въ пречестнѣ́мъ хра́мѣ?* Яко просвѣти́ся чудодѣ́йствы свои́ми:* слѣпы́я просвѣща́я,* прокаже́нныя очища́я,* боля́щія исцѣля́я,* вся́ приходя́щія отъ неду́гъ избавля́я;* его́же просла́ви Христо́съ Бо́гъ на́шъ,* имѣ́яй ве́лію ми́лость.

Сти́хъ: Пра́ведникъ, я́ко фи́никсъ процвѣте́тъ* и я́ко ке́дръ, и́же въ Лива́нѣ, умно́жится.

Кíими духо́вными похвала́ми* восхва́лимъ чудотво́рца Арте́мія?* Подае́тъ бо неоску́дная исцѣле́нія* и мо́лится о на́съ* и за вся́ вѣ́рныя лю́ди,* о е́же спасти́ся на́мъ,* того́ па́мять вѣ́рно чту́щимъ;* его́же вѣнцы́ вѣнча́етъ Христо́съ Бо́гъ на́шъ,* имѣ́яй ве́лію ми́лость.

Сти́хъ: Насажде́ни въ дому́ Госпо́дни,* во дво́рѣхъ Бо́га на́шего процвѣту́тъ.

Кíими похва́льными добро́тами* ны́нѣ просла́вимъ тя́,* пра́ведне Арте́міе,* въ честнѣ́мъ пра́здницѣ твое́й па́мяти* духо́вно пра́зднующе?* Моли́ся Христу́ Бо́гу за лю́ди своя́:* тебе́ бо те́пла предста́теля, и храни́теля,* и моли́твенника ко Влады́цѣ стяжа́хомъ,* подаю́щему мíрови ве́лію ми́лость.

Сла́ва, гла́съ 4:

Егда́ изше́лъ еси́, прему́дре Арте́міе, труды́ своя́ полага́ти, двоюна́десяти лѣ́тъ сы́й, тогда́ у́бо ве́лію бы́вшу вѣ́тренему дыха́нію съ шу́момъ стра́шнымъ, помрачи́ся не́бо тучено́сными о́блаки, дождю́ разлива́ющуся и гро́мному гла́су шумя́щу и мо́лніямъ ве́ліимъ блиста́ющимся; ты́ же, пра́ведный о́троче, стра́хомъ одержи́мъ бы́лъ еси́ и пре́далъ ду́шу твою́ въ ру́цѣ Бо́жіи, тѣ́ло же твое́ бы́сть положе́но на пу́стѣ мѣ́стѣ; но Бо́гъ возвы́си е́ десни́цею Свое́ю, по мно́гихъ лѣ́тѣхъ просла́вивъ чудесы́ Свои́ми во странѣ́ вѣ́рнѣй оте́чества твоего́, и ны́нѣ, пресла́вне, моли́ спасти́ся душа́мъ на́шимъ.

И ны́нѣ, богоро́диченъ.

Тропа́рь, гла́съ 2:

Вы́шняго повелѣ́ніемъ, тучено́снымъ облако́мъ, не́бо помрачи́вшимъ и мо́лніямъ блиста́ющимъ, гро́му же возшумѣ́вшу съ преще́ніемъ, испусти́лъ еси́ ду́шу твою́ въ ру́цѣ Го́сподеви, прему́дре Арте́міе, и ны́нѣ предстои́ши престо́лу Влады́ки всѣ́хъ, и́же вѣ́рою и любо́вію приходя́щимъ къ ра́цѣ твое́й, подая́ исцѣле́ніе всѣ́мъ неотло́жно и моля́ся Христу́ Бо́гу, спасти́ся душа́мъ на́шимъ.

Сла́ва, и ны́нѣ, богоро́диченъ: Вся́, па́че смы́сла...



НА УТРЕНИ,
На Бо́гъ Госпо́дь: тропа́рь свята́го, два́жды. Сла́ва, и ны́нѣ, богоро́диченъ.

По 1-й каѳи́смѣ сѣда́ленъ, гла́съ 1:

Боже́ственное жела́ніе возлюби́въ и жили́ще бы́въ Свято́му Ду́ху, пречестны́ми чудесы́ сія́я, благочести́ве Арте́міе, со а́нгелы веселя́ся и съ му́ченики пребыва́я, моли́ся Христу́ Бо́гу, ми́ръ мíрови испроси́ и душа́мъ на́шимъ ве́лію ми́лость. [Два́жды.]

Сла́ва, и ны́нѣ, богоро́диченъ:

Упова́ніе христіа́номъ, Пресвята́я Дѣ́во, Его́же родила́ еси́, Бо́га, па́че ума́ и сло́ва, непреста́нно моли́ съ вы́шними си́лами и съ пра́веднымъ Арте́міемъ да́ти оставле́ніе грѣхо́мъ на́шимъ.

По 2-й каѳи́смѣ сѣда́ленъ, гла́съ 3:

Па́мять твою́ всесвѣ́тлую возвели́чимъ дне́сь и пѣ́сньми боже́ственными ликова́ніе соста́вимъ, всече́стне Арте́міе: ты́ бо небе́сныя да́ры пріе́млеши, и́миже подае́ши неду́гъ исцѣле́нія приходя́щимъ къ тебѣ́ съ вѣ́рою, и мо́лишися къ Бо́гу, да пода́стъ мíрови ве́лію ми́лость. [Два́жды.]

Сла́ва, и ны́нѣ, богоро́диченъ:

Чистотѣ́ Твое́й, Богора́дованная, арха́нгелъ Гавріи́лъ предстоя́ дивля́шеся, и вопія́ше: О, Невѣ́сто неискусобра́чная, Отрокови́це небла́зненная, ка́ко Ти́ изреку́ пре́жде вѣ́къ сокрове́нную та́йну? Ты́ бо еси́ небе́снымъ и земны́мъ соедине́ніе; ра́дуйся, Обра́дованная, Госпо́дь съ Тобо́ю.

По Хвали́те и́мя Госпо́дне.., припѣ́въ:

Велича́емъ тя́, страстоте́рпче Христо́въ, Арте́міе, и чте́мъ святу́ю па́мять твою́, ты́ бо мо́лиши за на́съ Христа́ Бо́га на́шего.

Псало́мъ избра́нный: Бо́гъ на́мъ прибѣ́жище...

По поліеле́и сѣда́ленъ, гла́съ 8:

Яви́лся еси́ чу́денъ и предо́бръ уго́дникъ Небе́снаго Царя́, просвѣща́я на земли́ живу́щія чудесы́ твои́ми, богому́дре Арте́міе; сего́ ра́ди приходя́щіи къ тебѣ́ облобыза́ютъ че́стно мо́щи твоя́ и вѣ́рою почерпа́ютъ исцѣле́ніе отъ неисчерпа́емаго исто́чника. Тѣ́мже, пресла́вне Арте́міе, моли́ Христа́ Бо́га спасти́ ду́ши на́ша. [Два́жды.]

Сла́ва, и ны́нѣ, богоро́диченъ:

Яко Дѣ́ву еди́ну въ жена́хъ, Тя́ безъ сѣ́мене ро́ждшую Бо́га пло́тію, вси́ блажи́мъ, ро́дове человѣ́честіи: Огнь бо въ Тя́ всели́ся Божества́, и я́ко Младе́нца дои́ши Зижди́теля и Го́спода. Тѣ́мже, а́нгельскій и человѣ́ческій ро́дъ, досто́йно сла́вимъ пресвято́е Рождество́ Твое́ и согла́сно вопіе́мъ Ти́: моли́ Христа́ Бо́га грѣхо́въ оставле́ніе дарова́ти воспѣва́ющимъ досто́йно сла́ву Твою́.

Степе́нна 4-го гла́са, антифо́нъ 1-й. Проки́менъ, [гла́съ 4]: Возвесели́тся пра́ведникъ о Го́сподѣ* и упова́етъ на Него́. Сти́хъ: Услы́ши, Бо́же, гла́съ мо́й, [внегда́ моли́ти ми ся къ Тебѣ́]. Вся́кое дыха́ніе... Ева́нгеліе отъ Луки́, зача́ло 63.

По 50-мъ псалмѣ́ стихи́ра, гла́съ 8. Самогла́сенъ:

Стра́хъ Госпо́день обы́де тя́, и гро́мъ ве́лій возгласи́ надъ тобо́ю, богоуго́дне Арте́міе; ты́ же, пресели́вся въ вѣ́чныя оби́тели, и прія́въ жи́тельство съ му́ченики, ликовству́еши со а́нгельскими чи́нми, предстоя́й у престо́ла Влады́чня, и нося́ вѣне́цъ нетлѣ́нный отъ Спа́са Христа́ Бо́га, Ему́же моли́ся о предстоя́щихъ ти́ лю́дехъ, во е́же спасти́ся душа́мъ и́хъ.

Кано́нъ [Богоро́дицѣ со ирмосо́мъ на 6 и] свято́му пра́ведному Арте́мію [на 8], гла́съ 8. [Хвалу́ пое́мъ чудотворе́нію].

Пѣ́снь 1.

Ирмо́съ: Посѣ́ченый несѣко́маго пресѣче́, и ви́дѣ со́лнце зе́млю, ю́же не ви́дѣ, лю́таго врага́ вода́ потопи́, и непроходи́мое про́йде Изра́иль. Пѣ́снь же воспѣва́шеся: Го́сподеви пои́мъ, сла́вно бо просла́вися.

Пречестна́я твоя́ па́мять просія́, и ра́ка твоя́ мно́га исцѣле́нія прояви́, богому́дре Арте́міе, приходя́щимъ къ тебѣ́, пѣ́снь же воспѣва́шеся: Го́сподеви пои́мъ, сла́вно бо просла́вися.

Посѣче́ся вра́гъ отъ Влады́ки всѣ́хъ, Иже прія́тъ ду́шу твою́ въ пречи́стыя ру́цѣ; ты́ же благода́ть прія́лъ еси́, блаже́нне, неду́жныя исцѣля́ти. Сего́ ра́ди пѣ́снь воспѣва́емъ: Го́сподеви пои́мъ, сла́вно бо просла́вися.

Преди́вный Госпо́дь, ви́дя врага́ и устраша́я того́ преще́ніемъ гро́знымъ, и мо́лніею паля́, и водо́ю потопля́я, ду́шу твою́ прія́лъ е́сть, Арте́міе, тѣ́ло же твое́ въ чудесѣ́хъ просія́, и́миже исцѣля́еміи вопію́тъ: Го́сподеви пои́мъ, сла́вно бо просла́вися.

Богоро́диченъ: Пречи́стая Дѣ́во, ро́ждшая Превѣ́чнаго Бо́га, Того́ моли́, да изба́витъ ны́ отъ напа́стей, и бѣ́дъ лю́тыхъ, и отъ лука́ваго врага́, мо́лимъ Тя́, вопію́ще: пои́мъ Го́сподеви, сла́вно бо просла́вися.

Пѣ́снь 3.

Ирмо́съ: Стра́хъ Тво́й, Го́споди, всади́ въ сердца́ ра́бъ Твои́хъ, и бу́ди на́мъ утвержде́ніе, Тя́ во и́стинѣ призыва́ющимъ.

Стра́хъ Тво́й, Го́споди, возгремѣ́, и страстоте́рпецъ Тво́й ду́хъ испусти́ и прія́тъ Ца́рствіе небе́сное, ны́нѣ же мо́лится о всѣ́хъ, призыва́ющихъ Тя́.

Престо́лу Влады́чню предстоя́, богому́дре Арте́міе, не преста́й моля́ся о и́же вѣ́рою приходя́щихъ къ тебѣ́ и тя́ призыва́ющихъ.

Исцѣле́нія струи́ источа́еши ко гро́бу твоему́ приходя́щимъ, Арте́міе, во и́стину тя́ призыва́ющимъ.

Богоро́диченъ: Марíе, Ма́ти Христа́ Бо́га, поми́луй моля́щихся Тебѣ́, несумнѣ́нною вѣ́рою во и́стину Тя́ призыва́ющихъ.

Сѣда́ленъ, гла́съ 4. Подо́бенъ: Удиви́ся Іо́сифъ.

Отъ младе́нства душе́ю Бо́гу прилѣпи́вся, двоюна́десяти лѣ́тъ къ Бо́гу преста́вился еси́, и въ вѣ́чное Ца́рство всели́вся, прія́лъ еси́ да́ръ отъ Бо́га неду́жныя исцѣля́ти, прокаже́нныя очища́ти, слепы́мъ о́чи отверза́ти, лука́выя ду́хи прогоня́ти и отъ тряса́вицъ избавля́ти съ вѣ́рою тя́ призыва́ющихъ; непреста́нную благода́ть у Христа́ испроси́, богоуго́дне Арте́міе, и душа́мъ на́шимъ ве́лію ми́лость. [Два́жды.]

Сла́ва, и ны́нѣ, богоро́диченъ:

Удиви́ся Іо́сифъ, е́же па́че естества́ зря́, и внима́ше мы́слію руно́вному дождю́, въ безсѣ́меннѣмъ зача́тіи Твое́мъ, Богоро́дице. Ты́ бо и купина́ еси́, огне́мъ неопаля́ема, и же́злъ Ааро́новъ прозя́бшій, и свидѣ́тельствуетъ обру́чникъ Тво́й и храни́тель, свяще́нникомъ вопія́: Дѣ́ва ражда́етъ, и по рождествѣ́ па́ки Дѣ́вою пребу́детъ.

Пѣ́снь 4.

Ирмо́съ: Услы́шахъ, Го́споди, слу́хъ Тво́й и убоя́хся, я́ко неизрече́ннымъ совѣ́томъ, Бо́гъ сы́й Присносу́щный, отъ Дѣ́вы прише́лъ еси́, вопло́щся. Сла́ва снизхожде́нію Твоему́, Христе́, сла́ва си́лѣ Твое́й.

Услы́ша, Го́споди, слу́хъ Твоего́ смотре́нія, и убоя́ся пра́ведный Арте́мій, егда́ неизрече́ннымъ свѣ́томъ мо́лнія возсія́ изъ тучено́снаго о́блака, и вопія́ше: сла́ва снизхожде́нію Твоему́, Христе́, сла́ва си́лѣ Твое́й.

Услы́шимъ и мы́ слу́хъ чудодѣ́йствія твоего́, пра́ведниче Бо́жій Арте́міе, и притеце́мъ къ гро́бу твоему́, съ вѣ́рою вопію́ще Го́сподеви: сла́ва снизхожде́нію Твоему́, Христе́, сла́ва си́лѣ Твое́й.

Услы́ши на́съ, грѣ́шныхъ, призыва́ющихъ тя́ въ ско́рбехъ и въ неду́зѣхъ, и да́руй исцѣле́ніе, свя́те Арте́міе, покланя́ющимся о́бразу твоему́ и вопію́щимъ Влады́цѣ всѣ́хъ: сла́ва снизхожде́нію Твоему́, Христе́, сла́ва си́лѣ Твое́й.

Богоро́диченъ: Услы́ши ны́, Пречи́стая Богоро́дице Дѣ́во, моля́щіяся Тебѣ́, и изба́ви на́съ отъ вра́гъ ви́димыхъ и неви́димыхъ, я́ко да вопіе́мъ Го́сподеви: сла́ва снизхожде́нію Твоему́, Христе́, сла́ва си́лѣ Твое́й.

Пѣ́снь 5.

Ирмо́съ: Страсте́й мя́ мглы́, я́ко отъ глубо́кія но́щи избавля́яй, у́треневати сподо́би ду́хъ мо́й, молю́ся, во свѣ́тѣ дне́ повелѣ́ній Твои́хъ, Христе́.

Стра́шныя мглы́ и те́мнаго о́блака устраши́ся богому́дрый Арте́мій и преста́вися въ вѣ́чный живо́тъ, во свѣ́тѣ дне́ повелѣ́ній Твои́хъ, Христе́.

Стра́шныя мглы́ изба́ви на́съ и одержа́щія болѣ́зни исцѣли́, прему́дре Арте́міе, предстоя́й во свѣ́тѣ дне́ повелѣ́ній Христо́выхъ.

Страстьми́ мно́гими одержи́мь е́смь и стремле́ніемъ грѣхо́внымъ погруже́нъ; изба́ви мя́, Го́споди, отъ прегрѣше́ній моле́ніемъ уго́дника Твоего́ Арте́мія.

Богоро́диченъ: Стра́шными херуви́мы сла́вима еси́, Пречи́стая Дѣ́во, изба́ви на́съ отъ напа́сти и возведи́ во свѣ́тъ дне́ повелѣ́ній Сы́на Твоего́.

Пѣ́снь 6.

Ирмо́съ: Бе́здна грѣхо́въ и прегрѣше́ній бу́ря мя́ смуща́етъ и во глубину́ ну́жднаго рѣ́етъ мя́ отча́янія, но Твою́ крѣ́пкую ру́ку мнѣ́ простри́, я́ко Петро́ви, о Упра́вителю, и спаси́.

Две́ри небе́сныя отверзо́шася тебѣ́, и ра́йскія пи́щи наслади́лся еси́, водвори́вся въ жи́зни вѣ́чнѣй, и со святы́ми пребыва́еши, Арте́міе; моли́ся у́бо о на́съ Бо́гу и отъ тли́ ны́ возведи́.

Со а́нгелы ликовству́еши, у престо́ла Влады́чня предстоя́ и благода́ть имѣ́я исцѣля́ти неду́ги любо́вію приступа́ющихъ къ тебѣ́, прему́дре Арте́міе.

Имѣ́я къ Бо́гу боже́ственное дерзнове́ніе, преблаже́нне Арте́міе, вѣ́рою чи́стою хва́лящихъ тя́ помина́й, отъ бу́рей и отъ напа́стей спаса́й и отъ тли́ возведи́.

Богоро́диченъ: Даніи́лъ Тя́ го́ру мы́сленную прови́дѣ, отъ нея́ же Ка́мень отсѣче́ся, Пренепоро́чная, и сни́де отъ небеси́ роса́ во чре́во Твое́, богоразу́міемъ напои́въ зе́млю: Ты́ бо израсти́ла еси́ Изба́вителя всѣ́хъ Творца́.

Конда́къ, гла́съ 8:

Возсія́ дне́сь пресвѣ́тлая па́мять прему́драго Арте́мія; Богода́нная благода́ть, я́ко рѣ́ки, излива́етъ отъ святоцѣле́бныя ра́ки моще́й его́ ди́вная исцѣле́нія, и́миже отъ многоразли́чныхъ неду́гъ избавля́емся, съ вѣ́рою пріе́млюще я́, и взыва́юще: ра́дуйся, Арте́міе богому́дре.

Икосъ:

Отъ ю́ности возлюби́въ Бо́га и незло́бивъ сы́й, въ дѣ́тствѣ яви́лся еси́, я́ко му́жъ смы́сленъ, отъ гро́мнаго же преще́нія сме́рть вкуси́лъ еси́ и уго́дникъ яви́лся Влады́цѣ, пречу́дне Арте́міе, положе́но же бы́сть тѣ́ло твое́ на пу́стѣ мѣ́сте, идѣ́же обрѣто́шася мо́щи по три́десять тре́тіемъ лѣ́тѣ преставле́нія твоего́, чудеса́ творя́ща пресла́вная и исцѣле́нія мно́га неду́жнымъ, съ вѣ́рою приходя́щимъ ко гро́бу твоему́ и вопію́щимъ: ра́дуйся, Арте́міе богому́дре.

Пѣ́снь 7.

Ирмо́съ: Ангеломъ о́троки изъ огня́ спасы́й и гремя́щую пе́щь преложи́вый на ро́су, благослове́нъ еси́, Бо́же оте́цъ на́шихъ.

Ангели слу́жатъ Вседержи́телю Бо́гу быва́ющимъ мо́лніямъ и облако́мъ гро́мнымъ; ты́ же, свя́те Арте́міе, коне́цъ житія́ отъ сего́ пріе́мля, взыва́лъ еси́: благослове́нъ Госпо́дь, Бо́гъ оте́цъ на́шихъ.

Пресели́вся въ жи́знь небе́сную, предстои́ши Го́сподеви, пребога́те Арте́міе, вопія́: благослове́нъ Госпо́дь, Бо́гъ оте́цъ на́шихъ.

Чудодѣ́йствія да́ръ пріи́мъ отъ Бо́га неду́ги исцѣля́ти, прему́дре Арте́міе, воспѣва́лъ еси́ Го́сподеви: благослове́нъ Бо́гъ оте́цъ на́шихъ.

Богоро́диченъ: Пресвята́я Дѣ́во, Христа́ ро́ждши, непреста́нно моли́ о рабѣ́хъ Свои́хъ, да вопіе́мъ Го́сподеви: благослове́нъ еси́, Го́споди, Бо́же оте́цъ на́шихъ.

Пѣ́снь 8.

Ирмо́съ: Покрыва́яй вода́ми превы́спренняя Своя́, полага́яй мо́рю предѣ́лъ песо́къ и содержа́й вся́, Тя́ пое́тъ со́лнце, Тя́ сла́витъ луна́, Тебѣ́ прино́ситъ пѣ́снь вся́ тва́рь, я́ко Содѣ́телю всѣ́хъ во вѣ́ки.

Покрыва́яй во́дными о́блаки небеса́ и пролива́яй во́ды на зе́млю, прія́тъ ду́шу пра́веднаго Арте́мія, возвеселя́я ю́ чудодѣ́йствы; Ему́же вопіе́мъ, я́ко Содѣ́телю всѣ́хъ во вѣ́ки.

Пречестна́я ра́ка твоя́ источа́етъ чудеса́, блаже́нне Арте́міе, мы́ же, здра́віе пріе́млюще, прино́симъ хвалу́ Го́сподеви, я́ко Содѣ́телю всѣ́хъ во вѣ́ки.

Пребоже́ственное селе́ніе имѣ́яй, чудотворе́нія благода́ть прія́лъ еси́ отъ Вседержи́телевы руки́, и притека́ющіи къ тебѣ́ вѣ́рою мо́щи твоя́ облобыза́ютъ, пресла́вне Арте́міе, и моли́твенно вопію́тъ Бо́гу, я́ко Содѣ́телю вся́ческихъ во вѣ́ки.

Богоро́диченъ: Еди́наго отъ Тро́ицы родила́ еси́, Препѣ́тая Дѣ́во, Превѣ́чнаго Бо́га, Его́же моли́ о воспѣва́ющихъ Ти́, да изведе́тъ ны́ отъ обдержа́щихъ напа́стей и бѣ́дъ, я́ко да вопіе́мъ Творцу́ и Содѣ́телю всѣ́хъ во вѣ́ки.

Пѣ́снь 9.

Ирмо́съ: Устраши́ся вся́къ слу́хъ неизрече́нна Бо́жія снизхожде́нія, я́ко Вы́шній во́лею сни́де да́же и до пло́ти, отъ дѣви́ческаго чре́ва бы́въ Человѣ́къ. Тѣ́мже Пречи́стую Богоро́дицу, вѣ́рніи, велича́емъ.

Устраши́ся слу́хъ пра́веднаго о́трока Арте́мія, отъ гла́са гро́ма Твоего́, Го́споди, и преставле́ніе прія́тъ пречу́дный Арте́мій по Боже́ственнѣй Твое́й во́ли, Влады́ко, тѣ́мже Тя́ велича́емъ.

Вопіе́мъ ти́, богому́дре Арте́міе, страстоте́рпче: не оста́ви на́съ, си́рыхъ, но да́руй на́мъ душе́вное спасе́ніе, и тѣле́сное здра́віе, и по́мощь неосла́бну, да тя́ вѣ́рою велича́емъ.

Притеце́мъ, лю́діе, къ пречестно́му о́бразу Арте́мія, и припа́дающе, возопіи́мъ ему́: бу́ди на́мъ стѣна́ неруши́ма отъ супоста́тъ на́шихъ и изба́ви отъ враго́въ ви́димыхъ и неви́димыхъ, да тя́, вѣ́рніи, велича́емъ.

Богоро́диченъ: Гора́ неруши́мая и две́рь небе́сная, ковче́же златы́й, Влады́чице Дѣ́во, покры́й на́съ кро́вомъ крилу́ Твое́ю и соблюди́ ны отъ всѣ́хъ зо́лъ, да Тя́, Пречи́стую Богоро́дицу, вѣ́рніи, велича́емъ.

Свѣти́ленъ. Подо́бенъ: Жены́, услы́шите.

Яко свѣ́тлая звѣзда́, возсія́ша мо́щи твоя́, Арте́міе прехва́льне, и я́ко многоцѣ́нный би́серъ, обрѣто́шася многоразли́чная подаю́ще исцѣле́нія и чуде́съ зарю́ испуща́юще, тѣ́мже ны́нѣ предстои́ши Влады́цѣ всѣ́хъ, во свѣ́тѣ ра́дуяся. [Два́жды.]

Сла́ва, и ны́нѣ, богоро́диченъ:

Пресвѣ́тлая Цари́це Богоро́дице, ро́ждшая Христа́ Спа́са безъ сѣ́мене отъ Свята́го Ду́ха, отъ Отца́ исходя́щаго и просвѣти́вшаго вся́ вѣ́рныя, да́руй на́мъ во Свѣ́тѣ присносу́щнемъ водвори́тися и Ду́хомъ Бо́жіимъ освяти́тися, я́ко да Тя́, Богоро́дице, сла́вимъ.

На хвали́техъ стихи́ры на 4, гла́съ 4:

Пречестна́я па́мять твоя́,* страстоте́рпче Арте́міе, соверша́ется дне́сь,* и восхваля́ются мо́щи твоя́ пресвѣ́тлыя,* чудесы́ сія́ющія;* вѣ́рніи же, притека́юще и здра́віе пріе́млюще,* неду́ги разли́чными одержи́міи,* про́сятъ у Христа́ ми́ра мíрови* и душа́мъ на́шимъ ве́лію ми́лость. [Два́жды.]

Восхва́лимъ пѣ́сньми боже́ственными* и возвели́чимъ тя́, сла́вне Арте́міе,* и́же измла́да Бо́га возлюби́въ* и по преставле́ніи предстоя́ престо́лу Бо́жію,* мо́лишися, е́же изба́витися на́мъ* отъ вра́гъ ви́димыхъ и неви́димыхъ,* и отъ одержа́щихъ зо́лъ сохрани́ ны́,* и испроси́ у Христа́ ми́ра мíрови* и душа́мъ на́шимъ ве́лію ми́лость.

Просія́лъ еси́ свѣтоза́рно* во оте́чествіи твое́мъ,* богоуго́дне Арте́міе,* тѣ́ло бо твое́ по лѣ́тѣхъ мно́гихъ обрѣ́теся,* ничи́мже врежде́но* и чудеса́ пресла́вная творя́щее,* хромы́я, и слѣпы́я, и глухíя,* и разсла́бленныя исцѣля́ющее,* и отъ тряса́вицъ избавля́ющее.* Проси́ у Христа́ ми́ръ мíрови* и душа́мъ на́шимъ ве́лію ми́лость.

Сла́ва, гла́съ 2:

Возсія́ дне́сь пресвѣ́тлая ра́дость, и многоцѣле́бныя мо́щи твоя́ источа́ютъ здра́віе, я́ко алава́стръ мѵ́ро, неду́жныя исцѣля́юще, лука́выя ду́хи прогоня́юще и отъ вся́кой я́зи избавля́юще; пріиди́те у́бо, ны́нѣ ра́достными усты́ восхва́лимъ пра́веднаго и цѣлому́дреннаго Арте́мія, сподо́бившагося таковы́я благода́ти прія́ти, то́й бо мо́лится Христу́ Бо́гу спасти́ся душа́мъ на́шимъ.

И ны́нѣ, богоро́диченъ.
Славосло́віе вели́кое, [ектеніи́] и отпу́стъ.



НА ЛИТУРГІИ,

Блаже́нна отъ кано́на, пѣ́снь 3-я и 6-я. Проки́менъ, гла́съ 4: Ди́венъ Бо́гъ во святы́хъ Свои́хъ, Бо́гъ Изра́илевъ. Сти́хъ: Въ це́рквахъ благослови́те Бо́га, Го́спода отъ исто́чникъ Изра́илевыхъ. Апо́столъ къ Тимоѳе́ю, зача́ло 292: Ча́до Тимоѳе́е, возмога́й о благода́ти... Аллилу́ія, [гла́съ 4]: Пра́ведникъ я́ко фи́никсъ процвѣте́тъ, я́ко ке́дръ, и́же въ Лива́нѣ, умно́жится. Сти́хъ: Насажде́ни въ дому́ Госпо́дни во дво́рѣхъ до́му Бо́га на́шего процвѣту́тъ. Ева́нгеліе отъ Іоа́нна, зача́ло 52: Рече́ Госпо́дь Свои́мъ ученико́мъ: си́ заповѣ́даю ва́мъ, да лю́бите дру́гъ дру́га. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся.

Источникъ: Слу́жба и ака́ѳистъ свято́му пра́ведному Арте́мію, Ве́ркольскому чудотво́рцу. — М.: Сѵнода́льная тѵпогра́фія, 1900. — Л. 2 – 13 об., 28 – 31 об.

/ Къ оглавленію раздѣла /


Наверхъ / Къ титульной страницѣ

0