Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 23 iюля 2017 г. Сейчасъ на порталѣ посѣтителей - 18.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́нія въ 22-й де́нь.
Свята́го священному́ченика Евсе́вія, епи́скопа Самоса́тскаго.

[ВЕЧЕРЪ,]
Стихи́ры, гла́съ 8. Подо́бенъ: Что́ вы́ нарече́мъ.

Что́ тя нарече́мъ, святи́телю?* Рѣку́, отъ мы́сленнаго Еде́ма исходя́щую,* напая́ющую зе́млю ороше́ніи духо́вными;* ча́шу, боже́ственныя воды́ по́лну су́щу,* Аріевы единомы́сленники погружа́ющую;* сто́лпъ о́гненъ, предводя́щій но́выя лю́ди* Боже́ственною благода́тію.* Моли́ спасти́ся душа́мъ на́шимъ.

Что́ тя нареку́, Евсе́віе?* Благоче́стія пода́теля и нече́стія губи́теля,* страстоте́рпцевъ добро́ту и свяще́нниковъ ра́дованіе;* се́рпъ, пле́велы посѣка́ющій,* пшени́цу небе́сную собира́ющій;* исто́чникъ чуде́съ приснотеку́щій,* неду́говъ отъе́млюща зно́й.* Моли́ спасти́ся душа́мъ на́шимъ.

Ины стихи́ры, Пресвяты́я Богоро́дицы. Гла́съ и подо́бенъ то́йже:

Стра́нно та́инство, Чи́стая,* безсѣ́меннаго Твоего́ рождества́, Дѣ́во, и ужа́сно,* превосходя́ вели́чествомъ вся́ку мы́сль человѣ́чу:* Его́же бо не терпя́тъ зрѣ́ти многоочи́тіи* и чи́ни вси́ святы́хъ а́нгелъ трепе́щутъ,* на́мъ пло́тію родила́ еси́,* не отсту́пльша же Отча существа́.* Сла́вимъ ро́ждшую Тя́, Богоневѣ́сто.

Кому́ уподо́билася еси́, окая́нная,* къ покая́нію ника́коже возни́чущи, душе́,* и огня́ не ужаса́ешися, злы́хъ жду́щаго?* Воста́ни,* и Еди́ну къ заступле́нію* ско́рую призови́, и возопíй:* Дѣ́во Ма́ти, моли́ Твоего́ Сы́на* и Бо́га на́шего* изба́вити мя́ сѣ́тей льсти́ваго.

Всѣ́хъ заступле́ніе, Влады́чице,* пучи́ною обурева́емому мнѣ́ тмы́* и лю́тыхъ житія́ треволне́ньми* погружа́ему ми́ при́сно* ка́плю ми́лости Твоея́ низпосли́,* и ру́ку по́мощи Твоея́ пода́ждь ми́,* и ча́сти сподо́би мя́ избра́нныхъ и пра́ведныхъ,* я́ко бе́здну ро́ждшая, Человѣколю́бца.

Сла́ва, и ны́нѣ, [богоро́диченъ]. Гла́съ и подо́бенъ то́йже:

Огнь ро́ждши нестерпи́мый,* попаля́ющь грѣхи́* и ороша́ющь вѣ́рныя,* ве́щная безмѣ́рныхъ мои́хъ, Пренепоро́чная Чи́стая, согрѣше́ній* попали́ моли́твами Твои́ми* и росо́ю иста́явшую страстьми́ ду́шу мою́ прохлади́,* я́ко да Твою́ велегла́сно* ми́лость и си́лу велича́ю,* ра́бъ Тво́й.

Крестобогоро́диченъ. Подо́бенъ то́йже:

Агница Агнца* я́ко ви́дѣ, на дре́вѣ* просте́рта во́лею кре́стнѣмъ,* вопія́ше ма́терски, болѣ́знующи съ пла́чемъ:* Сы́не Мо́й,* что́ стра́нное сіе́ видѣ́ніе?* Всѣ́мъ живо́тъ дая́й я́ко Госпо́дь,* ка́ко умерщвля́ешися, Долготерпѣли́ве,* земны́мъ подая́ воскресе́ніе?* Сла́влю Твое́ мно́гое, Бо́же Мо́й, снизхожде́ніе.


[НА УТРЕНИ,]
Кано́нъ, его́же краегране́сіе: Благоче́стія тезоимени́та честву́ю. Творе́ніе Іо́сифово, гла́съ 8.

Пѣ́снь 1.

Ирмо́съ: Посѣ́ченный несѣко́маго пресѣче́, и ви́дѣ со́лнце зе́млю, ю́же не ви́дѣ, лю́таго врага́ вода́ потопи́, и непроходи́мое про́йде Изра́иль, пѣ́снь же воспѣва́шеся: Го́сподеви пои́мъ, сла́вно бо просла́вися.

Соверше́ннымъ свѣ́томъ осія́емь, и свяще́ннымъ лико́мъ, блаже́нне, сочиня́емь, и му́ченическимъ благосла́віемъ украша́емь, вѣ́рою пра́зднующія твою́, Евсе́віе блаже́нне, па́мять сохраня́й, Христа́ ми́лостива творя́.

Сла́достнѣ жела́ніемъ Христо́вымъ разжига́емь отъ ю́ности, пло́ть покори́лъ еси́, преблаже́нне, души́ свяще́нными си́лами и, сосу́дъ свяще́нъ показа́вся, лю́ди въ преподо́біи, преподо́бне, упа́слъ еси́, пома́зався мѵ́ромъ благода́ти.

Тя́ пастыренача́льника Ду́хъ Святы́й предлага́етъ, ерети́чествующихъ мглу́ словесы́ свѣтоно́сными твои́ми разоря́юща, му́дре, и я́вѣ показу́юща стезю́ пра́вую въ ню́ преподо́бно входя́щимъ, вели́кій Евсе́віе, свѣти́ло серде́цъ на́шихъ.

Богоро́диченъ: Благослове́нная, Бо́га ро́ждшая, благословя́щія Тя́ ны́нѣ, Пречи́стая, благослови́, къ благи́мъ вхо́домъ руководи́, и испо́лни боже́ственныхъ бла́гъ, и пѣ́ти укрѣпи́: Го́сподеви пое́мъ, сла́вно бо просла́вися.

Пѣ́снь 3.

Ирмо́съ: Стра́хъ Тво́й, Го́споди, всади́ въ сердца́ ра́бъ Твои́хъ, и бу́ди на́мъ утвержде́ніе, Тя́ во и́стинѣ призыва́ющимъ.

Бы́лъ еси́ кро́токъ и незло́бивъ, смиреному́дръ же и ти́хъ и любве́ боже́ственныя испо́лненъ, му́ченическими при кончи́нѣ украси́лся еси́ вѣнцы́.

Оде́ждами, я́же отъ кро́ве, Евсе́віе свяще́нне, сія́я, во свята́я восте́клъ еси́, свѣ́тло святы́хъ сла́вою вѣнча́емь.

Облича́я Аріевы единомы́сленники, гоне́нія, блаже́нне, подъя́лъ еси́ и ну́ждную сме́рть, тѣ́мже безсме́ртныя сла́вы сподо́бился еси́.

Богоро́диченъ: Во́лею Отчею Сло́во родила́ еси́, наи́тіемъ Боже́ственнаго Ду́ха, Пресвята́я Дѣ́во Ма́ти, архіере́евъ сла́во, тѣ́мже Тя́ пое́мъ.

Сѣда́ленъ, гла́съ 4. Подо́бенъ: Ско́ро предвари́.

Уясни́въ житіе́ твое́ добродѣ́телей красота́ми, па́стырь наре́клся еси́, святи́тель че́стенъ, преблаже́нне Евсе́віе, кро́вію же муче́нія себе́ украси́лъ еси́, горѣ́ къ невеще́ственнымъ преста́вился еси́ лико́мъ. Съ ни́миже о на́съ Христа́, о́тче, моли́ поми́ловати ду́ши на́ша.

Сла́ва, и ны́нѣ, богоро́диченъ:

Чи́стая, Всенепоро́чная и Неискусому́жная, Яже еди́на Безлѣ́тнаго Сы́на и Сло́ва Бо́жія въ лѣ́то ро́ждши, Сего́ со святы́ми и честны́ми патріа́рхи, и му́ченики, и проро́ки, и преподо́бными моли́ дарова́ти на́мъ очище́ніе и ве́лію ми́лость.

Крестобогоро́диченъ:

На Крестѣ́ Тя́ возвы́шена я́ко узрѣ́ Пречи́стая Ма́ти Твоя́, Сло́ве Бо́жій, ма́терски рыда́ющи, вѣща́ше: что́ но́вое и стра́нное сіе́ чу́до, Сы́не Мо́й? Ка́ко, Жи́знь всѣ́хъ, вкуша́еши сме́рти, оживи́ти ме́ртвыя хотя́, я́ко Милосе́рдъ?

Пѣ́снь 4.

Ирмо́съ: Изъ горы́ приосѣне́нныя, Сло́ве, проро́къ, еди́ныя Богоро́дицы, хотя́ща воплоти́тися, богови́дно усмотри́, и со стра́хомъ славосло́вяше си́лу Твою́.

Уста́вилъ еси́, му́дре, пре́лести гное́ніе со́лію твои́хъ изря́дныхъ уче́ній и неду́гующія е́ресію зловѣ́рія, блаже́нне, исцѣли́лъ еси́, Евсе́віе.

Напра́вивъ лю́ди къ приста́нищу спасе́нія, Аріево погрузи́лъ еси́ невѣ́ріе кро́внымъ наводне́ніемъ, па́стырю и му́чениче, святи́телей удобре́ніе.

Звѣзда́ свѣтла́ возсія́лъ еси́ въ мíрѣ, сія́ніемъ свяще́ннымъ озаря́я мы́сли, преблаже́нне, правосла́вныхъ, тѣ́мже тя́ вѣ́рно ублажа́емъ.

Богоро́диченъ: Усты́, Чи́стая, и язы́комъ, и се́рдцемъ исповѣ́даю Тя́, Зижди́теля Ма́терь, и молю́ Тя́: озари́ ду́шу мою́, омраче́нную согрѣше́ньми.

Пѣ́снь 5.

Ирмо́съ: Отъ но́щи невѣ́дѣнія боговѣ́дѣніемъ просвѣти́вый концы́, просвѣти́ мя́ у́тромъ человѣколю́бія Твоего́, Го́споди.

Уче́ніи твои́ми, блаже́нне, правосла́вныхъ утвержда́я мудрова́ніе, за благоче́стіе заточе́ніе претерпѣ́лъ еси́.

Правосла́вія столпа́, и исцѣле́ній исто́чника тя́ вѣ́мы, прему́дре святи́телю, и Це́ркве утвержде́ніе.

Законоположе́ніи боже́ственными беззако́ннующія утвержда́я, Евсе́віе, отъ руки́ беззако́ннующихъ непра́ведну претерпѣ́лъ еси́ сме́рть.

Богоро́диченъ: Свѣ́телъ свѣ́щникъ, Богороди́тельнице, Боже́ственную свѣщу́ нося́щи, позна́лася еси́, вся́ озаря́ющую концы́.

Пѣ́снь 6.

Ирмо́съ: Моли́тву пролію́ ко Го́споду и Тому́ возвѣщу́ печа́ли моя́, я́ко зо́лъ душа́ моя́ испо́лнися и живо́тъ мо́й а́ду прибли́жися, и молю́ся, я́ко Іо́на: отъ тли́, Бо́же, возведи́ мя.

Проповѣ́далъ еси́ Единосу́щное Сло́во и Собезнача́льнаго Отцу́ Сы́на, ме́рзкаго Аріева неи́стовства потреби́лъ еси́ су́етное мудрова́ніе, Евсе́віе, благочести́выхъ неразсѣ́дное и тве́рдое огражде́ніе.

Кропле́ніемъ честны́хъ твои́хъ крове́й порфи́ру себѣ́ обагри́лъ еси́ ца́рску и вмѣсти́лся еси́, о́тче, съ весе́ліемъ въ Боже́ственное Ца́рствіе, предстоя́ти Царю́ вѣко́въ, всеблаже́нне Евсе́віе.

Яко ши́покъ, я́ко благово́ненъ кри́нъ, я́ко ра́й Бо́жій, показа́лся еси́, посредѣ́ жи́зни имѣ́я дре́во, Самодѣ́теля всѣ́хъ и Го́спода, Евсе́віе. Ны́нѣ на́съ благово́нія исполня́еши Боже́ственнаго Ду́ха.

Богоро́диченъ: Разумѣ́вше богоглаго́ливіи проро́цы та́инства Твоего́ безмѣ́рную глубину́, сіе́ я́вѣ провозвѣсти́ша, Отрокови́це, гада́ньми и Боже́ственными прорече́ніи: Сло́во бо Отчее па́че сло́ва, Чи́стая, воплоти́ла еси́.

Конда́къ, гла́съ 4. Подо́бенъ: Яви́лся еси́ дне́сь.

Благоче́стно во святи́тельствѣ пожи́въ и муче́нія пу́ть проше́дъ, и́дольскія угаси́лъ еси́ же́ртвы, святи́телю Евсе́віе, но я́ко имѣ́яй дерзнове́ніе ко Христу́ Бо́гу, моли́ спасти́ся душа́мъ на́шимъ.

Пѣ́снь 7.

Ирмо́съ: Отроцы евре́йстіи въ пещи́ попра́ша пла́мень дерзнове́нно и на ро́су о́гнь преложи́ша, вопію́ще: благослове́нъ еси́, Го́споди Бо́же, во вѣ́ки.

Пѣ́сньми упражня́яся, святи́телю, и мольба́ми, успи́лъ еси́ стра́сти и на́мъ, вѣ́рнымъ, бо́дръ яви́лся еси́ храни́тель, благоче́стно пою́щимъ тя́ и творя́щимъ твою́ па́мять.

Му́ченикъ я́влься и святи́тель, небе́сная боже́ственнѣ наслѣ́довалъ еси́ и престо́лу предстоя́ Зижди́теля, вопія́: благослове́нъ еси́, Го́споди Бо́же, во вѣ́ки.

Утро возсія́лъ еси́, проповѣ́дая возсія́вшаго отъ Отца́ пре́жде денни́цы, Іису́са Христа́, свѣти́льниче церко́вный, святи́телей украше́ніе, страда́льцевъ удобре́ніе.

Богоро́диченъ: Зако́ны естества́, Дѣ́во, рождество́мъ Твои́мъ обновля́еши пресла́вно и истлѣ́вшія ны́ злы́мъ преступле́ніемъ очища́еши. Тѣ́мже Тя́ по до́лгу восхваля́емъ.

Пѣ́снь 8.

Ирмо́съ: Богоглаго́ливіи о́троцы, въ пещи́ со огне́мъ пла́мень попира́юще, поя́ху: благослови́те, дѣла́ Госпо́дня, Го́спода.

Со святи́тели и му́ченики моли́, я́ко святи́тель и му́ченикъ, священнопроповѣ́дниче Евсе́віе, Спа́са всѣ́хъ обрѣсти́ на́мъ ми́лость.

Благи́мъ нра́вомъ пожи́въ, слове́сною па́лицею свяще́нное твое́ ста́до упа́слъ еси́ и ерети́ческія звѣ́ри, всеблаже́нне, отгна́лъ еси́.

Отягче́нныя пія́нствомъ пре́лести, ерети́чествующія всу́е ты́ облича́я, Евсе́віе, отъ тѣ́хъ убіе́нъ бы́лъ еси́, страда́въ тве́рдо.

Богоро́диченъ: Яко вы́шши небе́сныхъ высо́тъ, вы́шнее родила́ еси́ Сло́во, отъ земли́ возне́сшее па́дшее существо́ человѣ́ческое, Всепѣ́тая.

Пѣ́снь 9.

Ирмо́съ: Вои́стинну Богоро́дицу, Тя́ исповѣ́дуемъ, спасе́нніи Тобо́ю, Дѣ́во Чи́стая, съ безпло́тными ли́ки Тя́ велича́юще.

Ви́дѣти сподо́бился еси́, о́тче, да́льняя, свяще́ннѣй твое́й души́ надѣ́емая, и къ невече́рнему сія́нію, ра́дуяся, всели́лся еси́.

Красе́нъ яви́лся еси́ богоглаго́ланіемъ, и благи́ми дѣя́ніи, Евсе́віе, и всечестны́ми страда́ній, блаже́нне, свѣтлостьми́.

Соста́вимъ ли́къ ра́достенъ, свяще́ннаго восхваля́юще Евсе́вія, благоче́стія добро́тою укра́шена.

Ра́ка твоя́ дае́тъ благода́ть исцѣле́ній, свята́я же па́мять твоя́, Евсе́віе, просвѣща́етъ мíръ, я́ко вели́кое со́лнце.

Богоро́диченъ: Благолюби́вая Дѣ́во, озло́бленную грѣхми́ ду́шу мою́ ублажи́, Яже Преблага́го Бо́га пло́тію ро́ждшая.

Источникъ: Минíа, мѣ́сяцъ Іу́ній. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 130 об. – 134.

/ Къ оглавленію раздѣла /


Наверхъ / Къ титульной страницѣ

0