Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 16 декабря 2017 г. Сейчасъ на порталѣ посѣтителей - 1.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́нія въ 21-й де́нь.
Свята́го му́ченика Іуліа́на Тарсíйскаго.

[ВЕЧЕРЪ,]
Стихи́ры, гла́съ 4. Подо́бенъ: Яко до́бля.

И біе́нъ ра́нимь, и лю́тѣ порѣва́емь,* и въ темни́цѣ, блаже́нне, затворя́емь,* мѣ́ста премѣня́я, оскорбля́емь,* со звѣрьми́ заключа́емь,* и глубинѣ́ приближа́яся,* и въ мо́ри потопля́емь,* и пріе́мля блаже́нную кончи́ну,* не отве́рглся еси́ Влады́ки вся́ческихъ,* сла́ва му́чениковъ, пребога́те.

Отъ морски́хъ нѣ́дръ тя́* къ су́ши влеко́ма* окормле́ніемъ Ду́ха* я́ко узрѣ́ честна́я жена́,* вѣ́рно прія́тъ, му́чениче Іуліа́не,* и погребе́нію предаде́* твое́ непоро́чное и многострада́льное тѣ́ло,* побѣди́вшее діа́волово мучи́тельство* дѣ́йствомъ благода́ти.

Сла́ва, гла́съ 6:

Непоро́чныя вѣ́ры неистоща́емое питіе́ поче́рпъ, блаже́нне, и́дольское служе́ніе погаси́лъ еси́, и побѣди́тельно преше́лъ еси́ по́двигъ, росо́ю просвѣти́вся, я́ко незаходи́ма звѣзда́ озаря́емь присносія́ннаго со́лнца Христа́, и, на кíйждо гра́дъ зари́ муче́нія отпуща́я, кончи́ну мо́ремъ блаже́нную воспрія́лъ еси́, и вѣне́чникъ предъ лице́мъ Христа́ предвари́лъ еси́. Его́же моли́, Іуліа́не пресла́вне, спасти́ вѣ́рою па́мять твою́ соверша́ющія.

И ны́нѣ, богоро́диченъ или́ крестобогоро́диченъ. Подо́бенъ: Все́ отло́жше.

Агнца Своего́* Агница нескве́рная дре́вле* и непоро́чная Влады́чица* на дре́вѣ кре́стнѣмъ я́ко узрѣ́,* ма́терски восклица́ше* и, дивя́щися, вопія́ше:* Ча́до сладча́йшее,* что́ зрѣ́ніе сіе́ но́вое и пресла́вное?* Ка́ко со́нмъ безблагода́тный суди́щу Пила́тову предаде́ Тя́* и осужда́етъ на сме́рть Живота́ вся́ческихъ?* Но воспѣва́ю Твое́ неизрече́нное,* Сло́ве, снизхожде́ніе.

На стихо́внѣ окто́иха. Сла́ва, гла́съ 6:

Пріиди́те, мучениколю́бцы, Христо́ва страстоте́рпца и Па́влу сограждани́на и стаи́нника я́вльшася и вку́пѣ тече́ніе соверши́вша благоче́стно просла́вимъ, Іуліа́на сла́внаго: въ во́ду бо вше́дъ, съ водны́ми звѣрьми́ змíеву главу́ сокруши́, и, кровьми́ зе́млю и ше́ствіемъ мо́ре освяти́въ, отъ су́щихъ здѣ́ преста́вися къ вѣ́чнымъ жили́щемъ, и отъ Вседержи́тельныя руки́ подвиго́въ по́честь прія́тъ, про́ситъ очище́нія душа́мъ на́шимъ и ве́лія ми́лости.

Крестобогоро́диченъ. Подо́бенъ: Тридне́венъ.

Предстоя́щи у дре́ва иногда́* во вре́мя распя́тія Дѣ́ва* съ дѣ́вственнымъ ученико́мъ* и пла́чущи, вопія́ше:* увы́ Мнѣ́, ка́ко стра́ждеши,* всѣ́хъ, Христе́, Сы́й безстра́стіе?

Тропа́рь, гла́съ 4:

Му́ченикъ Тво́й, Го́споди, Іуліа́нъ во страда́ніи свое́мъ вѣне́цъ прія́тъ нетлѣ́нный отъ Тебе́, Бо́га на́шего: имѣ́яй бо крѣ́пость Твою́, мучи́телей низложи́, сокруши́ и де́моновъ немощны́я де́рзости. Того́ моли́твами спаси́ ду́ши на́ша.


[НА УТРЕНИ,]
Кано́нъ, творе́ніе Іоа́нна мона́ха, его́же краегране́сіе: Іуліа́на пѣ́сньми му́ченика вѣнча́ю. Гла́съ 8.

Пѣ́снь 1.

Ирмо́съ: Пои́мъ Го́сподеви, прове́дшему лю́ди Своя́ сквозѣ́ Чермно́е мо́ре, я́ко Еди́нъ сла́вно просла́вися.

Свяще́нными да восхва́лится пѣ́сньми страда́лецъ Тво́й сла́вный и пречестна́я па́мять: непристу́пною бо сла́вою просла́вися.

Поползе́ніемъ не па́лся еси́, подвиза́яся му́ченически, Христо́въ во́ине, не́мощію пло́ти да́же до кро́ве.

Па́че сія́нія зла́та му́ченическими ра́нами украси́лся еси́, облиста́яся, и многоцѣ́ннаго ка́мене, святы́й.

Богоро́диченъ: Чи́стая Богоро́дице, Яже воплоще́нное Присносу́щное и Пребоже́ственное Сло́во па́че естества́ ро́ждши, пое́мъ Тя́.

Пѣ́снь 3.

Ирмо́съ: Ты́ еси́ утвержде́ніе притека́ющихъ къ Тебѣ́, Го́споди, Ты́ еси́ свѣ́тъ омраче́нныхъ, и пое́тъ Тя́ ду́хъ мо́й.

Ка́менію не повелѣно́ ми́ бы́сть, я́ко бо́гу служи́ти ручны́хъ дѣ́лъ, — Іуліа́нъ умовре́дному судіи́ отвѣщава́ше.

Стоя́лъ еси́ предъ суди́щемъ мучи́теля, Христу́, му́чениче Іуліа́не, я́ко Судіи́ живы́хъ и ме́ртвыхъ предстоя́.

Безу́менъ не бы́хъ, исповѣ́дая Бо́га, — рече́ Іуліа́нъ, — Еди́наго въ Тро́ицѣ, нераздѣ́льно пѣва́ема.

Богоро́диченъ: Да́ждь на́мъ по́мощь моли́твами Твои́ми, Пречи́стая, прило́ги отрѣва́ющи лю́тыхъ обстоя́ній.

Сѣда́ленъ, гла́съ 1. Подо́бенъ: Гро́бъ Тво́й.

Во́дъ потопле́ніемъ блаже́нную кончи́ну прія́лъ еси́, му́дре, многообра́знаго змíя въ си́хъ удави́въ, побѣ́ду взя́лъ еси́. Тѣ́мже любо́вію твою́ достохва́льную па́мять пра́зднующе, о на́съ моли́ Христа́, мо́лимся.

Сла́ва, и ны́нѣ, богоро́диченъ:

Наста́ви на́съ на пу́ть покая́нія, укло́ншіяся при́сно къ безпу́тіемъ зо́лъ и Преблага́го прогнѣ́вавшія Го́спода, Неискусобра́чная Благослове́нная Марíе, прибѣ́жище отча́янныхъ человѣ́ковъ, Бо́жіе жили́ще.

Крестобогоро́диченъ:

Зря́щи Тя́, Христе́, Всенепоро́чная Ма́ти ме́ртва на Крестѣ́ просте́рта, вопія́ше: Сы́не Мо́й, Собезнача́льне Отцу́ и Ду́ху, что́ неизрече́нное Твое́ сіе́ смотре́ніе, и́мже спа́слъ еси́ пречи́стыхъ ру́къ Твои́хъ, Ще́дре, созда́ніе?

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Многообра́знымъ ра́намъ Іуліа́нъ тѣ́ло предая́ше, не чу́вствуя болѣ́зней, Христо́вою бо любо́вію сохраня́шеся.

Небе́сныя, пресла́вне Іуліа́не, хлами́ды жела́я, гони́телемъ земну́ю, я́ко Христо́въ уго́дникъ, оста́вилъ еси́.

Побѣди́теля де́монскія ле́сти не тѣле́сная си́ла, пребога́те, но жела́ніе непобѣди́мое Христо́выхъ страсте́й тя́ содѣ́ла.

Богоро́диченъ: Очище́ніе на́шимъ да́руй невѣ́дѣніемъ, я́ко безгрѣ́шенъ, и умири́ мíръ Тво́й, Бо́же, моли́твами Ро́ждшія Тя́.

Пѣ́снь 5.

Ирмо́съ: Утренююще, вопіе́мъ Ти́: Го́споди, спаси́ ны, Ты́ бо еси Бо́гъ на́шъ, ра́звѣ Тебе́, ино́го не вѣ́мы.

Подо́бяся во все́мъ Влады́цѣ, прехва́льне, ста́лъ еси́ предъ суди́щемъ беззако́ннующихъ, осужда́емь.

Зако́нно подвиза́вся, закла́лся еси́ Влады́цѣ, я́ко а́гня незло́биво, рука́ми беззако́нныхъ, блаже́нне.

Ни ро́дъ, ни са́нъ земны́й вмѣни́лъ еси́, проти́ву твоему́, му́чениче сла́вне, христоимени́тству превы́шши.

Богоро́диченъ: Марíе, Богоро́дице Безневѣ́стная, упова́ніе враго́въ су́етно сотвори́, пою́щія же Тя́ возвесели́.

Пѣ́снь 6.

Ирмо́съ: Ри́зу мнѣ́ пода́ждь свѣ́тлу, одѣя́йся свѣ́томъ, я́ко ри́зою, Многоми́лостиве Христе́ Бо́же на́шъ.

Ко дре́ву пригвожде́на Тя́, Христе́, сла́вный уго́дникъ Тво́й не стыдя́шеся, но, я́ко сла́вы сокро́вище, непщева́ше.

Умолко́ша пре́лести скве́рныя, богогла́сными же язы́ки боже́ственная та́инства му́ченикъ Христо́выхъ откры́шася.

Исцѣле́нія страсте́й вся́ческихъ и согрѣше́ній проси́ оставле́нія, сла́вне страда́льче Христо́въ, пою́щимъ тя́.

Богоро́диченъ: Привнеси́ мольбу́ на́шу Сы́ну Твоему́, Пречи́стая, Ты́ бо еси́ похвала́ ро́да на́шего и заступле́ніе.

Конда́къ, гла́съ 2. Подо́бенъ: Въ моли́твахъ.

Благоче́стія непобѣди́маго во́ина и и́стины согла́сника и ору́жника, вси́ досто́йно восхва́лимъ Іуліа́на дне́сь и къ нему́ возопіи́мъ: моли́ Христа́ Бо́га о всѣ́хъ на́съ.

Икосъ:

Путе́мъ Госпо́днимъ отъ младе́нства ше́ствовалъ еси́, треблаже́нне, и Того́ благоче́стно свидѣ́нія вожделѣ́лъ еси́, и, кре́стъ на ра́мо, Іуліа́не богому́дре, усе́рдно взе́мъ, ле́сть лю́тую идолонеи́стовства разори́лъ еси́, сокруши́въ ка́пища вра́жія, ко́зни же и ла́янія. Тѣ́мже вѣ́рою притека́емъ въ тво́й покро́въ, вопію́ще, пребога́те: моли́ Христа́ Бо́га о всѣ́хъ на́съ.

Пѣ́снь 7.

Ирмо́съ: Отроцы евре́йстіи въ пещи́ попра́ша пла́мень дерзнове́нно и на ро́су о́гнь преложи́ша, вопію́ще: благослове́нъ еси́, Го́споди Бо́же, во вѣ́ки.

Мѵ́ро благово́нно иска́паетъ хва́льная и сла́вная твоя́ па́мять, во́ине Христо́въ, пою́щимъ непреста́нно: благослове́нъ еси́, Го́споди Бо́же, во вѣ́ки.

Неизглаго́ланная сла́ва вѣнчава́етъ и́же къ хвалѣ́ твое́й со́бранныя, во́ине Христо́въ, пою́щія непреста́нно: благослове́нъ еси́, Го́споди Бо́же, во вѣ́ки.

Глаго́лу мучи́теля не повину́вся, не послужи́лъ еси́, непобѣди́ме, тва́ри, но еди́ному Бо́гу Жи́ву вопія́лъ еси́: благослове́нъ еси́, Го́споди Бо́же, во вѣ́ки.

Богоро́диченъ: Разрѣша́я Евину кля́тву, въ Пренепоро́чную всели́ся Дѣ́ву, благослове́нія исто́чникъ прозяба́я вопію́щимъ: благослове́нъ, Влады́чице, Пло́дъ Твоего́ чре́ва.

Пѣ́снь 8.

Ирмо́съ: Мусикíйскимъ орга́номъ согласу́ющимъ и лю́демъ безчи́сленнымъ, покланя́ющимся о́бразу въ Деи́рѣ, три́ о́троцы не повину́вшеся, Го́спода воспѣва́ху и славосло́вяху во вся́ вѣ́ки.

Ласка́ше у́бо льсте́цъ и му́ками тя́ призыва́ше къ пре́лести, Іуліа́не, ты́ же вопія́лъ еси́: Го́спода по́йте и превозноси́те во вся́ вѣ́ки.

Крѣпча́йше, я́коже ле́въ, по му́кахъ мучи́теля низлага́я, Іуліа́не, взыва́я ве́село: Го́спода по́йте и превозноси́те во вся́ вѣ́ки.

Лю́тость огня́ не отлучи́тъ мя́, ни сѣче́ніе меча́ отто́ргнетъ отъ Содѣ́теля Бо́га, — вопія́ше, взыва́я, — Го́спода по́йте и превозноси́те во вся́ вѣ́ки.

Богоро́диченъ: Яко всѣ́хъ Го́спода ро́ждшую и Дѣ́ву пребы́вшую, Марíе, и по рождествѣ́, вѣ́рніи, досто́йно воспѣва́юще, ра́дуйся, Тебѣ́ вопіе́мъ и превозно́симъ во вся́ вѣ́ки.

Пѣ́снь 9.

Ирмо́съ: Чи́стую сла́вно почти́мъ, лю́діе, Богоро́дицу, о́гнь Божества́ пріи́мшую во чре́вѣ неопа́льно, пѣ́сньми велича́емъ.

Превзя́тое о́ко низложи́лъ еси́, Бо́жій во́ине, безпло́тнаго лестца́, бра́вся съ пло́тію му́жески, Христа́ же велича́я при́сно.

Гнѣ́здъ избѣжа́лъ еси́ змíя, врага́ злонача́льника, въ морскíя, блаже́нне, глубины́ вве́рженъ, му́дре. Тѣ́мъ тя́ пѣ́сньми велича́емъ.

Яко до́брѣ страда́ньми подвиза́лся еси́ по Влады́цѣ, я́ко красно́ вѣнча́лся еси́ десни́цею Влады́ки, тѣ́мже тя́ досто́йно ублажа́емъ.

Богоро́диченъ: Моисе́й въ купинѣ́ Тя́ ви́дѣ, Чи́стая, въ горѣ́, пріе́млющу нестерпи́мый Божества́ о́гнь неопа́льно. Тѣ́мже Тя́ вси́ велича́емъ.

Свѣти́ленъ:

Якоже со́лнце свѣтоно́сно, чуде́сными заря́ми наставля́еши всю́ тва́рь, пресла́вне страстоте́рпче. Тѣ́мже, твою́ соверша́юще па́мять, про́симъ отъ бѣ́дъ вся́ изба́вити.

[Сла́ва, и ны́нѣ,] богоро́диченъ:

Твое́ достоя́ніе, Сло́ве, утверди́ во бранѣ́хъ, царе́мъ побѣ́ды на ва́рвары подая́ Богоро́дицы мольба́ми, Юже дарова́ христіа́номъ Засту́пницу.


НА ЛИТУРГІИ,

Проки́менъ, гла́съ 4: Святы́мъ, и́же су́ть на земли́ Его́, [удиви́ Госпо́дь вся́ хотѣ́нія Своя́ въ ни́хъ]. Сти́хъ: Предзрѣ́хъ Го́спода предо мно́ю вы́ну, [я́ко одесну́ю мене́ е́сть, да не подви́жуся]. Апо́столъ ко Ефесе́емъ, зача́ло 233. Аллилу́ія, гла́съ 4: Воззва́ша пра́ведніи, [и Госпо́дь услы́ша и́хъ, и отъ всѣ́хъ скорбе́й и́хъ изба́ви и́хъ]. Сти́хъ: Мно́ги ско́рби пра́веднымъ, [и отъ всѣ́хъ и́хъ изба́витъ я́ Госпо́дь]. Ева́нгеліе Луки́, зача́ло 106. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся].

Источникъ: Минíа, мѣ́сяцъ Іу́ній. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 127 – 130 об.

/ Къ оглавленію раздѣла /


Наверхъ / Къ титульной страницѣ

0