Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 28 апрѣля 2017 г. Сейчасъ на порталѣ посѣтителей - 22.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́нія въ 21-й де́нь.
Па́мять преподо́бныя Анастасíи, ма́тере и́же во святы́хъ отца́ на́шего Са́ввы, пе́рваго архіепи́скопа и учи́теля Се́рбскаго
[1].

НА МАЛѢЙ ВЕЧЕРНИ,
На Го́споди воззва́хъ: стихи́ры [на 4], гла́съ 1:

Изъ утро́бы твоея́ прече́стенъ пло́дъ* Влады́цѣ Христу́ принесла́ еси́,* же́ртву благопрія́тну и присноживо́тну,* и́же бы́сть вѣ́рнымъ стѣна́ и утвержде́ніе.

Му́дрыми словесы́ и те́плою любо́вію* сы́на своего́ Ра́стка зако́ну Христо́ву научи́ла еси́,* я́ко подоба́етъ па́че всѣ́хъ Христа́ люби́ти* и любо́вію Ему́ служи́ти.* Онъ же, послу́шавъ совѣ́ты твоя́,* до конца́ вся́ испо́лни.

Па́мять твою́ чту́ще,* богому́драя ма́ти Анастасíе,* духо́вно весели́мся,* ты́ бо вы́ну мо́лишися ко Христу́,* со Симео́номъ преподо́бнымъ и Са́ввою преосвяще́ннымъ,* изба́вится на́мъ отъ бѣ́дъ и печа́ли.

Сла́ва, гла́съ 2:

Егда́ во благослове́ннѣмъ бра́цѣ, по рожде́ніи же мно́гихъ сыно́въ и дще́рей, заключи́ся утро́ба твоя́, ты́, вку́пѣ съ супру́гомъ твои́мъ, со слеза́ми взыва́ла еси́ къ Бо́гу, о е́же дарова́ти ва́мъ еще́ ча́до му́жескаго по́ла, е́же бу́детъ ва́мъ утѣ́ха и же́злъ въ ста́рости. Госпо́дь же Благíй услы́ша моли́тву ва́шу и благослови́ ва́съ рожде́ніемъ сы́на, и́же бы́сть свѣти́ло ро́ду се́рбскому.

И ны́нѣ, богоро́диченъ, гла́съ то́йже:

Не умолчи́мъ никогда́, Богоро́дице, псалмы́ и пѣ́сньми воспѣва́ти вели́чія Твоя́: Бо́га бо, вои́стинну воплоти́вшагося, родила́ еси́ во всемíрное спасе́ніе и избавле́ніе.

На стихо́внѣ стихи́ры, гла́съ 1:

Хвале́ній вся́кихъ досто́йна еси́,* преподо́бная ма́ти Анастасíе,* въ за́повѣдехъ Госпо́днихъ ходи́вшая,* Бо́жіею ми́лостію подвиза́ема.

Сти́хъ: Блаже́ни вси́, боя́щіися Го́спода,* ходя́щіи въ путе́хъ Его́.

Чи́стую любо́вь къ Бо́гу имѣ́ла еси́,* нелицемѣ́рную любо́вь ко всѣ́мъ показа́ла еси́,* тѣ́мъ, торжеству́юще, ублажа́емъ тя́.

Сти́хъ: Умно́жилъ еси́ на мнѣ́ вели́чествіе Твое́* и, обра́щся, утѣ́шилъ мя́ еси́.

Уже́ заключе́ннѣй утро́бѣ твое́й,* пло́дъ чре́ва дарова́ся тебѣ́ отъ Всеще́драго Бо́га,* сего́ ра́ди тя́ ублажа́юще,* всеси́льную ми́лость Бо́жію велича́емъ.

Сла́ва, гла́съ то́йже, самогла́сенъ:

Неизрече́нное человѣколю́біе Свое́, е́же Всеблагíй Бо́гъ къ земноро́днымъ и́мать, на тебѣ́, Анастасíе, показа́, я́ко пра́ведну ти́ бы́ти со Симео́номъ по ве́ліей бла́гости Свое́й изво́ли, и, моли́тву ва́шу услы́шавъ, дарова́ ва́мъ ча́до, и́же бы́сть вели́кое свѣти́ло ро́да се́рбскаго.

И ны́нѣ, богоро́диченъ, гла́съ то́йже:

Ра́дости вся́ испо́лнила еси́, вы́шняя и ни́жняя Ты́ совокупи́ла еси́, Богоро́дице. Тѣ́мже ра́достно и согла́сно ны́нѣ не́бо и вся́ земля́ воспѣва́етъ Тя́.

Тропа́рь пи́санъ на вели́цѣй вече́рни. Сла́ва, и ны́нѣ, богоро́диченъ.



НА ВЕЛИЦѢЙ ВЕЧЕРНИ,
Блаже́нъ му́жъ.., антифо́нъ 1-й. На Го́споди воззва́хъ: стихи́ры на 8, гла́съ 6, самогла́сны:

Ты́ на́ша похвала́ еси́,* богому́драя ма́ти Анастасíе,* родила́ бо еси́ просвѣти́теля ро́да се́рбскаго,* науче́нная му́дростію свы́ше,* воспита́ла еси́ кро́тостію и смире́ніемъ,* Христа́ пѣ́ти и сла́вити.

Почита́юще кро́тость и смире́ніе твое́,* воспѣва́емъ дне́сь Благодѣ́теля всѣ́хъ Бо́га,* присносла́вная ма́ти Анастасíе,* просла́вльшаго тя́* и въ пи́щи ра́йстѣй вогнѣзди́вшаго тя́,* Его́же моли́ вы́ну* спасти́ и просвѣти́ти ду́ши на́ша.

Свѣ́тлость Ду́ха Свята́го въ се́рдцы нося́щи,* ча́до свѣ́та родила́ еси́,* ро́дъ же се́рбскій обогати́ла еси́,* и ны́нѣ на небесѣ́хъ во святы́хъ лику́еши,* не забу́ди и на́съ,* но моли́ся вы́ну ко Го́споду* дарова́ти отпуще́ніе грѣхо́въ всѣ́мъ на́мъ,* при́сно тя́ прославля́ющимъ.

Похва́льныя пѣ́сни,* я́ко ца́рскій вѣне́цъ,* богому́дрѣй главѣ́ твое́й прино́симъ,* достосла́вная ма́ти Анастасíе,* и́бо Христо́съ тя́ нетлѣ́ніемъ вѣнча́* и Ца́рствія небе́снаго сподо́би,* тѣ́мже вопіе́мъ ти́:* моли́ся за ста́до твое́ Бо́гу,* изба́витися отъ вся́каго зла́* и Бо́жія сла́вы улучи́ти.

Ины стихи́ры, гла́съ 8:

Преста́вилася еси́, Анастасíе,* къ жи́зни вои́стинну нетлѣ́ннѣй* и ны́нѣ съ ли́ки пра́ведныхъ слику́еши,* и́бо и́стиннаго просвѣти́теля* ро́да се́рбскаго родила́ еси́,* тѣ́мже твое́ преставле́ніе соверша́емъ* и, почита́юще, вѣ́рно вопіе́мъ ти́:* не забу́ди на́съ, вѣ́рныя рабы́ твоя́,* но при́сно моли́ся о душа́хъ на́шихъ.

Дне́сь свѣ́тло пра́зднуемъ честно́е успе́ніе твое́,* почита́юще тя́ всеблагоговѣ́йно,* достохва́льная ма́ти Анастасíе,* изъ тебе́ бо произы́де велича́йшій учи́тель боговѣ́дѣнія,* разоря́яй мра́къ невѣ́дѣнія.* Моли́ о на́съ, ма́ти преподо́бная,* и испроси́ душа́мъ на́шимъ ми́ръ и единомы́сліе* и всѣ́мъ вѣ́рнымъ ве́лію ми́лость.

Преподо́бно и пра́ведно пожи́вши,* къ безконе́чнѣй жи́зни дне́сь преста́вилася еси́,* ра́дости неизглаго́ланныя наслажда́ющися* и Свѣ́та невече́рняго,* и ны́нѣ въ ли́цѣ пра́ведныхъ водворя́ешися* и мо́лишися о душа́хъ на́шихъ.

Ду́шу свою́ съ тѣ́ломъ* къ небе́снѣй впери́ла еси́ высотѣ́,* му́дрымъ же дѣ́вамъ единожи́тельница была́ еси́,* преподо́бная ма́ти Анастасíе,* притека́ющимъ къ Бо́гу яви́лася еси́ боже́ственное изображе́ніе* и ны́нѣ на небеси́ лику́еши,* тѣ́мже свѣтоно́сную па́мять твою́ соверша́юще,* боже́ственными пѣ́сньми восхваля́емъ тя́.

Сла́ва, гла́съ 6:

Ты́ похвала́ на́ша еси́ и вели́чіе, и́бо изъ утро́бы твоея́, прече́стенъ пло́дъ Влады́цѣ прине́сши, ро́ду твоему́ свѣти́льника всемíрнаго дарова́ла еси́, послѣди́ же себе́ саму́, я́ко же́ртву соверше́нну, воздержа́нія огне́мъ Бо́гу принесла́ еси́ и а́нгельское житіе́ боже́ственнѣ пожила́ еси́, тѣ́мже па́мять твою́ хва́лимъ и велича́емъ.

И ны́нѣ, богоро́диченъ, гла́съ то́йже: Кто́ Тебе́ не ублажи́тъ...
Вхо́дъ. Проки́менъ дне́ и чте́нія три́.

Прему́дрости Соломо́ни чте́ніе.

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе.

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ра хра́ма и преподо́бныя, гла́съ 4, самогла́сны:

Вожделѣ́вши отъ души́ Христу́ послужи́ти, украси́ла еси́ себе́ саму́ смире́ніемъ и чистото́ю, любо́вь же тлѣ́нныхъ и жела́нія отри́нула еси́, житіе́ свое́ свѣ́тлостію дѣ́лъ просвѣти́ла еси́, тѣ́мже и свѣ́тлость святы́хъ узрѣ́ла еси́, сего́ ра́ди и мы́ хва́лимъ тя́, Анастасíе богоблаже́нная.

Посто́мъ, слеза́ми и вѣ́рою моля́щися, вку́пѣ со супру́гомъ свои́мъ преблаже́ннымъ Симео́номъ испроси́ли есте́ отроча́, съ ни́мже ны́нѣ моли́теся спасти́ся отъ бѣ́дъ всѣ́мъ, любо́вію чту́щимъ ва́съ.

Ангельскія си́лы дивя́тся смире́нію и му́дрости твое́й, блаже́нная, ро́дъ же се́рбскій пое́тъ и благослови́тъ вся́ческихъ Творца́, благослови́вшаго и просла́вльшаго тя́, преподо́бная ма́ти Анастасíе.

Сла́ва, гла́съ 5:

Житіе́ свое́ добродѣ́телію упра́вила еси́, ма́ти преподо́бная, смире́ніемъ и кро́тостію богому́жно пожи́вши, родила́ еси́ свѣти́льника вѣ́рнымъ, ро́ду се́рбскому втора́го Крести́теля, Аѳо́нстѣй пусты́ни кра́сное воспита́ніе, послѣди́ же, вне́млющи гла́су его́, себе́ саму́ Христу́ Бо́гу принесла́ еси́, я́ко же́ртву благопрія́тну, сего́ ра́ди Всеще́дрый Бо́гъ, вѣ́дый твое́ се́рдце и смире́ніе, увязе́ тя́ вѣнце́мъ благолѣ́пія.

И ны́нѣ, богоро́диченъ, гла́съ то́йже:

Пріиди́те въ чистотѣ́, человѣ́цы, пріиди́те, ли́къ соста́вимъ и воскли́кнемъ Преблагослове́ннѣй: Ты́ еси́ упова́ніе на́ше и Помо́щница по Бо́зѣ, на Тя́ наде́жду спасе́нія на́шего возлага́емъ вси́, Тебѣ́ мо́лимся, я́ко Бо́жіи Ма́тери: озари́ сердца́ на́ша и одожди́ на́мъ, грѣ́шнымъ рабо́мъ Твои́мъ, бога́тыя Твоя́ душеспаси́тельныя ми́лости.

На стихо́внѣ стихи́ры, гла́съ 2, самогла́сны:

Поработи́вшися Христу́ отъ души́,* чистото́ю, я́ко со́лнце, просія́ла еси́,* житіе́мъ же свои́мъ, е́же въ мíрѣ се́мъ,* благоче́стія о́бразъ была́ еси́ всѣ́мъ,* сего́ ра́ди многокра́тное воздая́ніе отъ руку́ Вседержи́теля прія́ла еси́,* богоблаже́нная Анастасíе,* тѣ́мже тя́ вси́ ублажа́емъ.

Сти́хъ: Блаже́ни вси́, боя́щіися Го́спода,* ходя́щіи въ путе́хъ Его́.

Пресла́вная па́мять твоя́, богому́драя Анастасíе,* озаря́етъ всю́ страну́ Се́рбскую* и вся́ вѣ́рныя просвѣща́етъ, благоче́стно почита́ющія тя́* и вѣ́рою и любо́вію воспѣва́ющія тя́.

Сти́хъ: Умно́жилъ еси́ на мнѣ́ вели́чествіе Твое́* и, обра́щся, утѣ́шилъ мя́ еси́.

Воспріи́мши ле́гкое и́го Христо́во,* боже́ственнымъ же стра́хомъ составля́ема,* чистоты́ и цѣлому́дрія вина́ была́ еси́,* и предѣ́лъ воздержа́нія,* и любве́ о́бразъ, Анастасíе.

Сла́ва, гла́съ то́йже:

Пріиди́те, лю́діе, ли́къ соста́вимъ и стеце́мся вѣ́рно вси́, возвели́чимъ честну́ю па́мять ма́тере се́рбскія и наста́вницы на́шея Анастасíи, сія́ бо отъ ю́ности возлюби́ возлю́бльшаго ю́ Христа́, къ Нему́же и взы́де, ра́дуяся, со супру́гомъ Симео́номъ, тѣ́мъ и мы́ любе́зно пра́зднуемъ, взыва́юще е́й: моли́ся о на́съ ко Го́споду, умири́ти мíръ и спасти́ ду́ши на́ша.

И ны́нѣ, богоро́диченъ, гла́съ то́йже:

Богороди́тельнице Чи́стая, Щедролюби́ваго Бо́га пло́тію ро́ждшая, мольбы́ ра́бъ Твои́хъ не пре́зри, но моли́твами Твои́ми спаси́ на́съ отъ вся́кихъ бѣ́дъ и скорбе́й.

[На благослове́ніи хлѣ́бовъ: тропа́рь святы́я, два́жды, и Богоро́дице, Дѣ́во.., еди́ножды.]

Тропа́рь, гла́съ 4:

Добродѣ́тельми бога́тая, кро́тостію и благоче́стіемъ украше́нная, возсія́ла еси́ чистото́ю житія́ твоего́, сего́ ра́ди Благíй Бо́гъ благослови́ тя́ ма́ти свѣти́льника ро́да бы́ти, тѣ́мже вопіе́мъ ти́: ра́дуйся, преподо́бная ма́ти Анастасíе.


НА УТРЕНИ,
На Бо́гъ Госпо́дь: Тропа́рь преподо́бныя, два́жды. Сла́ва, и ны́нѣ, богоро́диченъ.

По 1-мъ стихосло́віи сѣда́ленъ, гла́съ 4:

Не́бо иногда́ ма́нною обремени́въ, Бо́гъ о́ную лю́демъ въ пусты́ни низпусти́; та́ко отъ блаже́нныя Анастасíи Са́вву на́мъ просвѣти́теля дарова́, тѣ́мже, благодаря́ще, взыва́емъ: ве́лія Твоя́ ми́лость къ на́мъ, Бо́же на́шъ Всеще́дрый. [Два́жды.]

Сла́ва, и ны́нѣ, богоро́диченъ, гла́съ то́йже:

Ты́ Бо́га еди́на родила́ еси́, Дѣ́во, пресла́вно, Ты́ естество́ обнови́ла еси́ рождество́мъ Твои́мъ, Ты́ Еву разрѣши́ла еси́ перворо́дныя кля́твы, тѣ́мже, благодаря́ще, взыва́емъ: ве́лія Твоя́ ми́лость къ человѣ́комъ, Богоро́дице Всепѣ́тая.

По 2-мъ стихосло́віи сѣда́ленъ, гла́съ 3:

Въ Бо́жіихъ за́повѣдехъ процвѣта́юще съ преблаже́ннымъ Симео́номъ, подвиза́ема руко́ю Бо́жіею, достосла́вная Анастасíе, моли́ Преблага́го Влады́ку, да и мы́, грѣ́шніи, прино́симъ до́бръ пло́дъ живы́я вѣ́ры. [Два́жды.]

Сла́ва, и ны́нѣ, богоро́диченъ, гла́съ то́йже:

Тя́ неискусому́жно ро́ждшую Жизнода́вца и Спа́са, вси́ мо́лимъ прилѣ́жно, Богоро́дицу Тя́ исповѣ́дающе, изба́витися вся́кія ско́рби Твои́ми моли́твами, да и мы́, грѣ́шніи, прино́симъ до́бръ пло́дъ живы́я вѣ́ры.

Поліеле́й.

Велича́ніе: Ублажа́емъ тя́, преподо́бная ма́ти Анастасíе, и чте́мъ святу́ю па́мять твою́: ты́ бо мо́лиши за на́съ Христа́ Бо́га на́шего.

Псало́мъ избра́нный: Терпя́, потерпѣ́хъ Го́спода...

По поліеле́и сѣда́ленъ, гласъ 8:

Яви́лася еси́ въ Се́рбіи но́вая учени́ца Христо́ва, житіе́мъ уча́щи вся́ Еди́ному Бо́гу покланя́тися, богоблаже́нная Анастасíе, и ны́нѣ помоли́ся Христу́ за ча́да твоя́ и испроси́ всѣ́мъ отпуще́ніе грѣхо́въ, при́сно тя́ прославля́ющимъ. [Два́жды.]

Сла́ва, и ны́нѣ, богоро́диченъ, гла́съ то́йже:

Вѣ́дуще Тя́ Ма́терь и Дѣ́ву, Пресвята́я, согла́сно почита́емъ и благоче́стно вопіе́мъ Ти́: ра́дуйся, Благослове́нная Богоро́дице, упова́ніе ду́шъ на́шихъ.

Степе́нна, 1-й антифо́нъ 4-го гла́са. Проки́менъ, гла́съ 4: Сохрани́ душа́ моя́ свидѣ́нія Твоя́* и возлюби́ я́ зѣло́. Сти́хъ: Сохрани́хъ за́повѣди Твоя́ и свидѣ́нія Твоя́, я́ко вси́ путіе́ мои́ предъ Тобо́ю, Го́споди. Вся́кое дыха́ніе... Ева́нгеліе отъ Матѳе́я, зача́ло 104.

По 50-мъ псалмѣ́ стихи́ра, гла́съ 6:

Недоумѣва́емъ, ка́ко тя́ нарече́мъ, преподо́бная ма́ти? Лива́нскую ли го́ру, роса́ бо небе́сная сни́де на тя́, рѣку́ ли Фисо́нъ, добрѣ́йшій сапфи́ръ, ка́мень честны́й, Са́вву иму́щую, и́мже просвѣти́ся вся́ земля́ Се́рбская. Но моли́ся Христу́ Бо́гу со Симео́номъ преподо́бнымъ и Са́ввою преосвяще́ннымъ отъ вся́каго озлобле́нія изба́витися всему́ правосла́вному ро́ду се́рбскому.

Кано́нъ Богоро́дицы со ирмосо́мъ на 6 и преподо́бныя на 8.

Кано́нъ преподо́бныя, гла́съ 5, его́же краегране́сіе: Ма́терь Анастасíю любо́вію пою́. Въ богоро́дичнахъ же и въ сѣда́льнѣ: Про́та Ми́рко.

Пѣ́снь 1.

Ирмо́съ: Христо́съ яви́ся на земли́, изба́вивый ро́дъ на́шъ отъ идолонеи́стовства, Тому́ Еди́ному пои́мъ, я́ко просла́вися.

Мо́лніями Ду́ха осія́емая, те́мныя о́блаки души́ моея́ разрѣши́, у́мъ же мо́й озари́ и устнѣ́ къ пѣ́нію тебе́ хвали́ти отве́рзи.

Ангела ро́ду се́рбскому родила́ еси́, и́бо и́стинную любо́вь къ Бо́гу имѣ́ла еси́, благолюби́вая Анастасíе, тѣ́мже и ублажа́емъ тя́ съ любо́вію.

То́й и́стинно лю́битъ Бо́га, и́же за́повѣди Его́ соблюда́етъ; ты́ же се́ испо́лнила еси́, сего́ ра́ди боголюби́вую тя́ хва́лимъ и велича́емъ.

Богоро́диченъ: Предста́тельство и покро́въ жи́зни моея́ бу́ди ми́, Богороди́тельнице Чи́стая, вся́ бо мо́жеши, я́ко си́льнаго въ крѣ́пости Христа́ ро́ждши, Богоблаже́нная.

Пѣ́снь 3.

Ирмо́съ: Утверди́ ны, Бо́же, Твое́ю си́лою, и низложи́ ерети́ческая шата́нія, и вознеси́ ро́гъ на́шъ.

Егда́ заключи́ся утро́ба твоя́, я́коже иногда́ Лíи, возскорбѣ́ла еси́ и къ Бо́гу взыва́ла еси́, прося́щи еще́ ча́до му́жескаго по́ла.

Ро́ждшееся отъ тебе́ ве́лію сла́ву принесе́ тебѣ́, преподо́бная ма́ти Анастасíе, сего́ ра́ди сла́вимъ тя́ и велича́емъ.

Аще и жена́ Симео́нова была́ еси́, но во всѣ́хъ за́повѣдехъ безъ поро́ка ходи́ла еси́, тѣ́мже и уподо́билася еси́ му́дрымъ дѣ́вамъ.

Богоро́диченъ: Ро́ждши Благодѣ́теля всѣ́хъ, до́брыхъ Вино́внаго, прегрѣше́ній мои́хъ мглу́ разрѣши́ и здра́віе моли́твами Твои́ми пода́ждь ми́.

Сѣда́ленъ, гла́съ 4:

Образъ была́ еси́ смире́нія, чистоты́ и цѣлому́дрія мно́гихъ вина́, украша́ема му́дростію и смире́ніемъ, ра́зумомъ и разсужде́ніемъ и инѣ́ми кра́сными дарова́ніи, тѣ́мже мо́лимъ тя́: моли́ Христа́ Бо́га, да украси́тъ и на́съ си́ми добродѣ́тельми. [Два́жды.]

Сла́ва, и ны́нѣ, богоро́диченъ, гла́съ то́йже:

Твое́ пое́мъ благоутро́біе, Всенепоро́чная, Тобо́ю бо позна́хомъ неопи́санное Сло́во Бо́жіе, Единоро́днаго Сы́на Вседержи́телева, и вопіе́мъ Ти́, Чи́стая: ра́дуйся, Благослове́нная Богоро́дице, упова́ніе ду́шъ на́шихъ.

Пѣ́снь 4.

Ирмо́съ: Услы́шахъ, Го́споди, слу́хъ Тво́й и убоя́хся, разумѣ́хъ смотре́ніе Твое́ и просла́вихъ Тя́, Еди́не Человѣколю́бче.

Науче́на Бо́гомъ, ты́ была́ еси́ лу́чшая учи́тельница сы́ну твоему́, и́же, науче́нъ тобо́ю, бы́сть и́стинный учи́тель ро́да своего́.

Анастасíе преподо́бная, моли́ Христа́ Бо́га на́шего, да вси́, надѣ́ющіися На́нь, получи́мъ живо́тъ вѣ́чный.

Сра́дуются дне́сь на́мъ вся́ преподо́бныя и пра́ведныя, дѣ́вы же и жены́ до́блествовавшія, воспѣва́юще съ на́ми честно́е твое́ преставле́ніе.

Богоро́диченъ: Ангельстіи чи́ни пою́тъ Тя́ непреста́нно, Богоро́дице Дѣ́во, ро́ждшую безъ отца́ Собезнача́льное Сло́во Отчее, о чу́до! осѣне́ніемъ Свята́го Ду́ха.

Пѣ́снь 5.

Ирмо́съ: Свѣ́те Истинный, Христе́ Бо́же, къ Тебѣ́ у́тренюетъ ду́хъ мо́й отъ но́щи, яви́ на мя́ лице́ Твое́.

Ты́ Бо́гомъ возлю́блена еси́, ма́ти Анастасíе, Его́же моли́ о на́съ: да и мы́ возлю́бимъ Бо́га и возлю́блены бу́демъ отъ Него́.

Агница Христо́ва житіе́мъ была́ еси́, кро́тостію и смире́ніемъ ду́шу твою́ украси́вши, тѣ́мже тя́ Христо́съ въ нетлѣ́нныя черто́ги прія́тъ.

Саму́ю себе́ устро́ивши, я́ко чи́стое зерца́ло Боже́ственныхъ разумѣ́ній, проявля́ла еси́ благонра́віе, кро́тость и смире́ніе.

Богоро́диченъ: Милосе́рдія Твоего́ бе́здну пода́ждь ми́ призыва́ющу, я́же Благосе́рдаго ро́ждши, и спаси́ всѣ́хъ, пою́щихъ Тя́.

Пѣ́снь 6.

Ирмо́съ: Отъ ки́та проро́ка изба́вилъ еси́, мене́ же изъ глубины́ грѣхо́въ возведи́, Го́споди, и спаси́ мя.

Іису́съ Человѣколю́бецъ, ви́дя твое́ благослове́нное души́ мудрова́ніе, вѣнце́мъ сла́вы увязе́ тя.

Юнѣ́йшій сы́нъ тво́й, любо́вію твое́ю води́мый, Влады́чнею же си́лою утвержда́емь, прія́телище Трисо́лнечнаго Свѣ́та показа́ся.

Лю́діе, вѣ́дяще тя́ въ за́повѣдехъ Госпо́днихъ ходи́вшую и благода́тію Его́ оправда́нную, достоблаже́нная Анастасíе, досто́йно сла́вятъ па́мять твою́.

Богоро́диченъ: Изъ чре́ва Твоего́, Чи́стая, про́йде Плотоно́сецъ, обле́кся, Всенепоро́чный, кромѣ́ грѣха́ во всего́ человѣ́ка, Его́же моли́ вѣ́рою Тя́ чту́щія спасти́.

Конда́къ, гла́съ 4:

Во благослове́ннѣмъ бра́цѣ пожи́вши, нескве́рно удержа́ла еси́ зако́нно цѣлому́дріе, ча́да же твоя́ кро́тко учи́ла еси́ па́че всѣ́хъ Христа́ люби́ти, Ему́же ны́нѣ предстоя́щи и моля́щися, помяни́ и на́съ, вопію́щихъ ти́: ра́дуйся, преподо́бная ма́ти Анастасíе.

Икосъ:

Егда́ утро́ба твоя́ заключи́ся, я́коже Лíи иногда́, возскорбѣ́ли есте́ о́ба супру́га и, возжелѣ́вше еще́ еди́ное благослове́нное ча́до, въ нощнѣ́й моли́твѣ наединѣ́ со слеза́ми взыва́ли есте́ къ Бо́гу си́це: Влады́ко, Бо́же Вседержи́телю, послу́шавый дре́вле Авраа́ма и Са́рру и про́чихъ пра́ведниковъ, моли́вшихся Тебѣ́ о ча́дѣхъ, услы́ши и на́съ, грѣ́шныхъ рабо́въ Твои́хъ, да́руй на́мъ по Твое́й бла́гости имѣ́ти еще́ ча́до му́жескаго по́ла, е́же бу́детъ на́мъ утѣ́ха и же́злъ въ ста́рости на́шей, и се́ ны́нѣ полага́емъ обѣ́тъ — по дѣтозача́тіи се́мъ отлучи́тися отъ бра́чнаго обще́нія и до конца́ жи́зни въ чистотѣ́ тѣле́снѣй сохрани́тися. Уви́дѣвъ Госпо́дь серде́цъ ва́шихъ чистоту́ и по моли́твѣ ва́шей дарова́ ва́мъ сы́на, его́же вы нареко́сте Ра́стко, во и́ноцѣхъ же Са́вва, и́же бы́сть пе́рвый просвѣти́тель ро́да се́рбскаго. Тѣ́мже вопіе́мъ ти́: ра́дуйся, преподо́бная ма́ти Анастасíе.

Пѣ́снь 7.

Ирмо́съ: Благослове́нъ еси́, Бо́же, ви́дяй бе́здны и на престо́лѣ сла́вы сѣдя́й, препѣ́тый и пресла́вный.

Юность свою́ чи́сту сы́нъ тво́й дарова́ Христу́, слѣ́дуя твоя́ богому́драя увѣща́нія, и на́съ научи́ пѣ́ти: благослове́нъ еси́, Бо́же, препѣ́тый и пресла́вный.

Благодари́ти Бо́га научи́ на́съ, богому́драя ма́ти Анастасíе, да вси́ со умиле́ніемъ взыва́емъ: благослове́нъ еси́, Бо́же, препѣ́тый и пресла́вный.

Ору́жіемъ честна́го креста́ вооружи́вшися, оста́вила еси́ житія́ мяте́жъ и молвы́ убѣжа́ла еси́, моли́твами и поще́ніемъ, жела́ніемъ упражня́ющися и пою́щи: благослове́нъ еси́, Бо́же, препѣ́тый и пресла́вный.

Богоро́диченъ: Разумѣ́вше прозорли́выма очи́ма, проро́цы Тя́ я́вѣ провозвѣсти́ша, хотя́щу бы́ти Ма́терь Вседѣ́теля и всѣ́хъ Влады́ки, тѣ́мже Тя́, Всепѣ́тая, Богоро́дицу исповѣ́дуемъ.

Пѣ́снь 8.

Ирмо́съ: Творца́ тва́ри, Его́же ужаса́ются а́нгели, по́йте, лю́діе, и превозноси́те во вся́ вѣ́ки.

Вѣ́рныхъ мы́сли озаря́етъ свѣ́тлый де́нь пра́здника твоего́, и просвѣща́етъ всю́ зе́млю, и науча́етъ пѣ́ти: Творца́ тва́ри по́йте и превозноси́те во вся́ вѣ́ки.

Іису́су Го́споду принесла́ еси́ же́ртву благопрія́тну прозя́бшаго изъ ложе́снъ твои́хъ свѣти́льника вѣ́рнымъ, усе́рдно взыва́ющи: Творца́ тва́ри по́йте и превозноси́те во вся́ вѣ́ки.

Юже сла́ву пріобрѣла́ еси́, Анастасíе, мо́ли и о на́съ улучи́ти ю́, вѣ́рою вопію́щимъ съ тобо́ю: Творца́ тва́ри по́йте и превозноси́те во вся́ вѣ́ки.

Богоро́диченъ: Красе́нъ добро́тою па́че всѣ́хъ Пло́дъ чре́ва Твоего́, Богоро́дице Дѣ́во, Ты́ бо родила́ еси́ Бо́га воплоще́нна, я́вльшася за е́же спасти́ человѣ́ка, тѣ́мже Тя́ вси́ велича́емъ.

Пѣ́снь 9.

Ирмо́съ: Тя́, Блаже́нную въ жена́хъ, Благослове́нную Бо́гомъ, человѣ́ческій ро́дъ, пѣ́сньми велича́емъ.

Прозябе́ніе твое́ бы́сть на́мъ сто́лпъ о́гненный, честна́я ма́ти Анастасíе, просвѣща́я на́съ и очища́я отъ вся́каго те́мнаго неразу́мія, тѣ́мъ тя́ вси́ пѣ́сньми велича́емъ.

Оте́честву своему́ дарова́ла еси́ и́стинна просвѣти́теля, Святы́я Горы́ кра́сное воспита́ніе, вѣ́рнымъ же всѣ́мъ утвержде́ніе, стѣ́ну и забра́ло, тѣ́мъ тя́ вси́ пѣ́сньми велича́емъ.

Юнѣ́йшаго сы́на гла́съ послу́шавши, совлекла́ еси́ ца́рскую ри́зу, въ безстра́стія же оде́жду одѣ́ялася еси́ и Жениху́ Христу́ чи́сто обручи́лася еси́. Тѣ́мъ тя́ ве́сь се́рбскій ро́дъ пѣ́сньми велича́етъ.

Богоро́диченъ: Облакъ Сло́ва Ты́ еси́, Всечи́стая, и свѣща́ со́лнечная, колесни́ца многоцѣ́нная, дѣви́ческое возвыше́ніе, гора́ ту́чная и усыре́нная, Пресвята́я Дѣ́во Господоимени́тая.

Свѣти́ленъ:

Свѣ́томъ Христо́вымъ озаря́ема, свяще́нное отроча́ породила́ еси́, е́же бы́сть свѣти́льникъ ро́ду се́рбскому, съ ни́мже при́сно моли́ о спасе́ніи ро́да на́шего. [Два́жды.]

Сла́ва, и ны́нѣ, богоро́диченъ:

Свѣ́тлое проро́ческое сбытіе́, апо́стольская похвало́, всего́ мíра вожделѣ́нная Помо́щнице, просвѣти́ на́съ, рабы́ Твоя́, небе́снымъ сія́ніемъ.

На хвали́техъ стихи́ры на 4, гла́съ 4:

Похва́льными пѣ́сньми* па́мять твою́ прославля́емъ дне́сь* и хвалу́, я́ко ца́рскій вѣне́цъ,* богому́дрѣй главѣ́ твое́й прино́симъ,* ю́же Христо́съ благода́тію вѣнча́,* достосла́вная ма́ти Анастасíе;* тѣ́мже мо́лимъ тя́:* моли́ся Христу́ Бо́гу за ста́до твое́ правосла́вное,* о е́же изба́витися на́мъ отъ вся́каго зла́.

Прославля́юще ра́достно* де́нь свята́го твоего́ преставле́нія,* и хвале́бную пѣ́снь возсыла́юще Христу́ Бо́гу,* нетлѣ́ннымъ вѣнце́мъ вѣнча́вшему тя́,* Анастасíе богому́драя,* прилѣ́жно мо́лимъ тя́:* проси́ на́мъ оставле́ніе грѣхо́въ,* сла́вящимъ тя́ вѣ́рно.

При́зри, Го́споди, на на́съ, недосто́йныя,* и умилосе́рдися на грѣ́шныя лю́ди Твоя́,* не преда́ждь на́съ до конца́ въ ру́ки пога́ныхъ* за мно́жество беззако́ній на́шихъ,* но моли́твами преподо́бныя ма́тере на́шея Анастасíи* изба́ви ны́ отъ вся́кія напа́сти.

О тебѣ́ ца́рь Соломо́нъ рече́ пре́жде:* жена́ разу́мная благослове́на е́сть,* стра́хъ же Госпо́день сія́ да хва́литъ.* Ты́ же, преподо́бная,* самѣ́ми дѣ́лы сло́во испо́лнила еси́,* стра́хъ Бо́жій и благоче́стіе въ до́мѣ свое́мъ* и по все́й Се́рбіи утверди́ла еси́,* творя́щи пло́дъ покая́нія,* о не́мже небеса́ веселя́тся и Христо́съ ра́дуется.

Сла́ва, гла́съ 8:

Му́дрости твое́й и смире́нію а́нгели удиви́шася, мы́ же, пою́ще вся́ческихъ Творца́, тя́ просла́вльшаго, мо́лимъ тя́: бу́ди на́мъ предгра́діе и стѣна́, чи́стою любо́вію тя́ чту́щимъ и святу́ю па́мять твою́ творя́щимъ, богоблаже́нная, вѣ́рныхъ помо́щнице.

И ны́нѣ, богоро́диченъ, гла́съ то́йже:

Рождество́мъ Твои́мъ, Богороди́тельнице Всепѣ́тая, возсія́ на́мъ свѣ́тъ благода́ти, и всю́ подсо́лнечную просвѣти́, и предста́теля тмы́ погуби́, а́нгеловъ похвало́ и всѣ́хъ человѣ́ковъ спасе́ніе, еди́на Предста́тельнице вѣ́рныхъ.

Славосло́віе вели́кое. Ектеніи́ и отпу́стъ.



НА ЛИТУРГІИ,

Блаже́нна, отъ кано́на преподо́бныя, пѣ́снь 3-я и 6-я. Проки́менъ, гла́съ 6: Сохрани́ душа́ моя́ свидѣ́нія Твоя́* и возлюби́ я́ зѣло́. Сти́хъ: Сохрани́хъ за́повѣди Твоя́ и свидѣ́нія Твоя́, я́ко вси́ путіе́ мои́ предъ Тобо́ю, Го́споди. Апо́столъ къ Гала́томъ, зача́ло 208. Аллилу́ія, гла́съ 6: Наста́ви мя́, Го́споди, на пу́ть Тво́й, и пойду́ во и́стинѣ Твое́й. [Сти́хъ: Да возвесели́тся се́рдце мое́ боя́тися и́мене Твоего́.] Ева́нгеліе отъ Матѳе́я, зача́ло 104. Прича́стенъ: Ра́дуйтеся, пра́ведніи, о Го́сподѣ, пра́вымъ подоба́етъ похвала́.

Примѣчаніе:
[1] Въ Серблякѣ служба преп. Анастасіи начинается съ пѣснопѣній Великой вечерни. Послѣдованіе Малой вечерни приводится по изданію: Минея Июнь. Часть вторая. М., 2002. С. 202-204.


Источникъ: Србљак. — Београд: Издаjе Свети Архиjереjски Синод Српске Православне Цркве, 1986. — С. 439-448.



/ Къ оглавленію раздѣла /


Наверхъ / Къ титульной страницѣ

0