Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - четвергъ, 14 декабря 2017 г. Сейчасъ на порталѣ посѣтителей - 10.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́нія въ 20-й де́нь.
Свята́го священному́ченика Меѳо́дія, епи́скопа Пата́рскаго, и́же Ориге́нову е́ресь попали́.

[ВЕЧЕРЪ,]
Стихи́ры, гла́съ 4. Подо́бенъ: Да́лъ еси́ зна́меніе.

Словесы́ просвѣти́лъ еси́* церко́вное исполне́ніе,* богоявле́нне Меѳо́діе,* страда́ній же свѣ́тлостію* многобо́жія отгна́лъ еси́ мра́къ* и преше́лъ еси́ къ Свѣ́ту, священному́чениче,* ны́нѣ невече́рнему.* Тѣ́мже твое́ всепра́зднственное* и свѣтоно́сное торжество́ пра́зднуемъ дне́сь,* благоче́стіемъ осія́еми.

Кровьми́ обагри́лъ еси́* свяще́нную оде́жду твою́,* богоно́се Меѳо́діе,* съ не́юже во Свята́я святы́хъ, блаже́нне,* вмѣсти́лся еси́, ра́дуяся,* и зри́ши свѣ́тло* Тро́ическую Боже́ственную свѣ́тлость,* науча́яся яснѣ́йше су́щимъ па́че ума́ и смы́сла* и обожа́яся изря́дне, святи́телю пребога́те.

Ины стихи́ры Богоро́дицѣ. Подо́бенъ то́йже:

Ра́дуйся, солнцезра́чная луче́,* Со́лнца незаходи́маго престо́ле,* Яже Со́лнце возсія́вши недоумѣ́нное.* Ра́дуйся, у́ме, облиста́яй боже́ственными сія́ньми,* заре́ мо́лнійная,* освѣти́вшая земли́ концы́,* и́стинное зла́та блиста́ніе,* Вседо́брая и Пренепоро́чная,* Свѣ́тъ невече́рній* вѣ́рнымъ облиста́вши.

Скве́рну отмы́й стра́стнаго се́рдца моего́,* Богоро́дице Всепѣ́тая,* и вся́ я́звы и гное́нія сего́,* я́же отъ грѣха́, очи́сти, Чи́стая,* и ума́ моего́ уста́ви непостоя́нное,* я́ко да си́лу Твою́* и вели́кое заступле́ніе* велича́ю, окая́нный и непотре́бный ра́бъ Тво́й.

Не́мощь и разслабле́ніе,* Дѣ́во Ма́ти Всенепоро́чная,* души́ моея́ преложи́ въ крѣ́пость и си́лу,* стра́хомъ и любо́вію твори́ти же* и дѣ́яти оправда́нія Христо́ва,* я́ко да избѣ́гну огня́ нестерпи́маго* и наслѣ́діе небе́сное* и жи́знь непреходи́мую* Тобо́ю воспріиму́, веселя́ся всегда́.

Сла́ва, и ны́нѣ, гла́съ и подо́бенъ то́йже:

Бѣсо́вскими преклоне́на прило́гми* и въ ро́въ поги́бели вве́ржена,* уще́дри, Влады́чице,* и утверди́ мя на ка́мени добродѣ́телей,* и, навѣ́ты вра́жія разо́рши,* сподо́би мя́ твори́ти повелѣ́нія* Твоего́ Сы́на и Бо́га на́шего,* я́ко да улучу́* оставле́ніе въ де́нь Суда́.

Крестобогоро́диченъ. Подо́бенъ то́йже:

Распина́ема Христа́ Человѣколю́бца* ви́дящи Пречи́стая* и ре́бра ископава́ема копіе́мъ,* пла́чущи, вопія́ше:* что́ сіе́, Сы́не Мо́й?* Что́ Ти безблагода́тніи лю́діе возда́ша,* за я́же сотвори́лъ еси́ до́брая и́мъ,* и тщи́шися безча́дствовати Мя́, Вселюбе́знѣйшій?* Удивля́юся, Благоутро́бне,* Твоему́ во́льному распя́тію.

Тропа́рь, гла́съ 1:

Кро́вь твоя́, му́дре, та́йно вопіе́тъ отъ земли́, я́коже Авелева къ Бо́гу, богому́дре святи́телю Меѳо́діе, я́сно проповѣ́давый Бо́жіе вочеловѣ́ченіе. Тѣ́мже и посрами́лъ еси́ Ориге́нову ле́сть, и преста́вился еси́ въ небе́сный черто́гъ. Моли́ Христа́ Бо́га, да спасе́тъ ду́ши на́ша.


[НА УТРЕНИ,]
Кано́нъ, творе́ніе Ѳеофа́ново, гла́съ 7.

Пѣ́снь 1.

Ирмо́съ: Ма́ніемъ Твои́мъ на земны́й о́бразъ преложи́ся пре́жде удоборазлива́емое водно́е естество́, Го́споди. Тѣ́мже немо́кренно пѣшеше́ствовавъ Изра́иль, пое́тъ Тебѣ́ пѣ́снь побѣ́дную.

Стези́ ско́рыя, къ Бо́гу мя́ нося́щія, показу́я прехо́дъ, священнотаи́нниче, научи́, я́ко да безконе́чную улучу́ жи́знь моли́твами твои́ми, сла́вне.

Облиста́лъ еси́ свѣтоно́сно во Христо́вѣ Це́ркви, сугу́быми сія́я, священноявле́нне, благода́тьми. Тѣ́мже сугу́быми тя́ вѣнцы́ священнолѣ́пно Христо́съ вѣнча́.

Вѣнце́мъ муче́нія, свяще́нства же ма́стію, блаже́нне, украша́емь, обои́ми просія́лъ еси́. Тѣ́мже и́стинное и богови́дное наслѣ́діе получи́лъ еси́.

Яко непоро́чна же́ртва, и свяще́нна Влады́цѣ, и жива́, и одушевле́нна священнодѣ́йствовася, сла́вне, тѣ́мже же́ртвеннику небе́сному прія́тъ бы́лъ еси́, Меѳо́діе.

Богоро́диченъ: Изба́вителя человѣ́ческаго ро́да, и Свободи́теля, и Спа́са Христа́ на́мъ родила́ еси́, Дѣ́во Ма́ти Чи́стая. Тѣ́мже, я́вѣ Тя́ вѣ́дуще Хода́таицу живота́ вѣ́чнаго, сла́вимъ.

Пѣ́снь 3.

Ирмо́съ: Въ нача́лѣ небеса́ всеси́льнымъ Сло́вомъ Твои́мъ утверже́й, Го́споди Спа́се, и Вседѣ́тельнымъ и Бо́жіимъ Ду́хомъ всю́ си́лу и́хъ, на недви́жимѣмъ мя́ ка́мени исповѣ́данія Твоего́ утверди́.

Распала́ющуся ви́дѣвъ Ориге́нову пре́лесть, я́ко сы́й изря́денъ па́стырь, Боже́ственнымъ огне́мъ ско́ро попали́лъ еси́ всю́ о́наго мглу́, блиста́ющую лучу́ вже́гъ прему́дрости твоея́, богопрія́тне.

Дѣ́вство честно́е и чистоты́ добро́ту иску́сомъ, сла́вне, навы́къ, прему́дростію твое́ю и слове́съ благода́тію всѣ́хъ си́хъ добро́ту показу́еши, богому́дре, и вѣ́чнующую свѣ́тлость.

Твои́хъ слове́съ мо́лнія, и ра́зума труба́, и уче́ній благонаро́читое вѣща́ніе во всю́ зе́млю изы́де, преподо́бне, вся́ зову́щи вѣ́рныя къ прича́стію, преблаже́нне, небе́сныхъ наслажде́ній.

Крѣпча́йшею пи́щею духо́вныхъ напое́ній насы́щшеся, прему́дре, твои́хъ и́стинною пи́щею о́ною наслажда́ются, пребыва́ющею, приснотеку́щею не мимохо́дно и расту́щею прича́стникомъ.

Богоро́диченъ: Съ боже́ственнымъ Гавріи́ломъ, благослове́нная Дѣ́во, Тебѣ́, ра́дуйся, зове́мъ при́сно: ра́дости бо на́мъ вина́ была́ еси́ и весе́лія и́стиннаго, Изба́вителя и Спа́са всѣ́хъ пло́тію ро́ждши.

Сѣда́ленъ, гла́съ 4. Подо́бенъ: Вознесы́йся.

Же́ртвенникъ красе́нъ се́рдце твое́ сотвори́лъ еси́, безкро́вны, священнодѣ́йственне, прине́слъ еси́ же́ртвы Бо́гу, пострада́въ же крѣ́пко и поже́рся, прине́слся еси́ же́ртва, Меѳо́діе, на́съ ра́ди Поже́ршемуся. Его́же прилѣ́жно моли́ при́сно вся́ спасти́, любо́вію пою́щія тя́.

Сла́ва, и ны́нѣ, богоро́диченъ:

Нечи́стыхъ помысло́въ мои́хъ мно́жество и безмѣ́стныхъ мы́слей обурева́нія кто́ изрещи́ мо́жетъ, Всенепоро́чная? Настоя́нія же безпло́тныхъ вра́гъ мои́хъ кто́ исповѣ́сть и си́хъ зло́бу? Но Твое́ю мольбо́ю, Блага́я, си́хъ мнѣ́ всѣ́хъ избавле́ніе да́руй.

Крестобогоро́диченъ:

Иже отъ Безнача́льнаго Отца́ рожде́ннаго напослѣ́докъ Тя́ пло́тію ро́ждшая на Крестѣ́ ви́сяща зря́щи, Христе́, — увы́ Мнѣ́, любе́знѣйшій, Іису́се, — вопія́ше, — ка́ко сла́вимый я́ко Бо́гъ отъ а́нгелъ, отъ беззако́нныхъ ны́нѣ человѣ́къ, Сы́не, хотя́ распина́ешися? Пою́ Тя́, Долготерпѣли́ве.

Пѣ́снь 4.

Ирмо́съ: Отча нѣ́дра не оста́вль и соше́дъ на зе́млю, Христе́ Бо́же, та́йну услы́шахъ смотре́нія Твоего́ и просла́вихъ Тя́, еди́не Человѣколю́бче.

Къ добродѣ́телей высотѣ́, му́ченически сконча́вся, восте́клъ еси́, великодаро́вное воздая́ніе священнодѣ́йствія твоего́ пріе́мъ, преблаже́нне.

Престо́лъ имѣ́я святи́тельскій, свяще́нную же жи́знь стяжа́въ, правосла́вную проповѣ́далъ еси́ вѣ́ру, всече́стне, и научи́лъ еси́ твое́ ста́до.

Сла́дость душеполе́зная твои́хъ уче́ній, я́ко исто́чникъ, происхо́дитъ, прича́стники веселя́ и услажда́я душе́вная на́ша чу́вства.

Богоро́диченъ: Оте́ческихъ нѣ́дръ не отсту́пль и отъ Дѣ́вы вопло́щся, Христе́ Бо́же, сохрани́ ста́до Твое́, строе́нія Твоего́ покланя́ющееся боже́ственнымъ образо́мъ.

Пѣ́снь 5.

Ирмо́съ: Го́споди Бо́же мо́й, отъ но́щи у́треневавъ, Тебѣ́ молю́ся: пода́ждь ми́ оставле́ніе прегрѣше́ній мои́хъ и къ свѣ́ту Твои́хъ повелѣ́ній пути́ моя́ напра́ви, молю́ся.

Ме́ртвостію живоно́сною обле́клся еси́, о́тче, пре́жде сконча́нія твоего́ и, мече́мъ усѣ́ченъ муче́нія твоего́, къ жи́зни многосугу́бнѣй преста́вился еси́, сла́вне, лу́чшей.

Таи́нниче неизрече́нныхъ и о́бщниче вы́шняго ликостоя́нія, любо́вію чту́щія тя́ спаси́, пресла́вне, искуше́ній лю́тыхъ наи́тія разоря́я моли́твами твои́ми.

Имѣ́я ко Влады́цѣ дерзнове́ніе, о́тче, Его́же и стра́сти усе́рдно поревнова́лъ еси́ по́двиги твои́ми, вѣ́рнымъ боже́ственный ми́ръ и тишину́ испроси́, прему́дре.

Пе́рвѣе священнодѣ́йствовалъ еси́ Агнца Бо́жія, грѣхи́ мíра взе́млющаго, послѣди́ же, закала́емь, слове́сна и жива́ же́ртва Сему́ прине́слея еси́, о́тче Меѳо́діе.

Богоро́диченъ: Чи́стая Богоро́дице, мою́ ду́шу омраче́нную, прія́телище су́щи неразори́маго Свѣ́та и хра́мъ Боже́ственныя зари́, свѣ́томъ Твои́мъ просвѣти́, молю́ся.

Пѣ́снь 6.

Ирмо́съ: Пла́вающаго въ молвѣ́ жите́йскихъ попече́ній, съ корабле́мъ потопля́ема грѣхи́ и душетлѣ́нному звѣ́рю примета́ема, я́ко Іо́на, Христе́, вопію́ Ти́: изъ смертоно́сныя глубины́ возведи́ мя́.

Дрема́нія вѣ́ждамъ и очи́ма твои́ма сна́, преблаже́нне, не да́лъ еси́, до́ндеже всѣ́хъ страсте́й себе́ свободи́лъ еси́, и вмѣсти́теленъ хра́мъ содѣ́лалъ еси́ зарелу́чнѣй мо́лніи Ду́ха.

Ве́сь боже́ственному и богови́дному сія́нію, богому́дре, соединя́яся, боже́ственнаго свяще́нства пра́вило бы́лъ еси́ и къ Бо́гу хода́тай яви́лся еси́ все́й Це́ркви вѣ́рныхъ, Меѳо́діе.

Къ свѣ́тлому житію́ свѣ́тлостное совоку́плься су́щихъ открове́ніе, богоглаго́ливе, свѣ́тлаго свѣти́льника мíру тя́ показа́, ерети́ческое глумле́ніе и безбо́жія тму́ отгоня́ща.

Богоро́диченъ: Цари́цу всѣ́хъ бы́вшихъ Тя́ вѣ́дяще, Бо́га бо родила́ еси́, Богома́ти, отъ не сущи́хъ вся́ сотво́ршаго, ра́достное пѣсносло́віе со а́нгеломъ Гавріи́ломъ Тебѣ́ зове́мъ.

Конда́къ, гла́съ 4. Подо́бенъ: Вознесы́йся.

Священнотаи́нникъ Святы́я Тро́ицы, и я́же па́че ума́ повелѣ́ній боже́ственныхъ проповѣ́дникъ, и правосла́внымъ утвержде́ніе бы́лъ еси́, Меѳо́діе, злосла́вныя обличи́лъ еси́ смы́слы, правовѣ́рія ра́ди кро́вію твое́ю священному́ченикъ я́влься, и, Христу́ со а́нгелы предстоя́, моли́ спасти́ся на́мъ.

Пѣ́снь 7.

Ирмо́съ: Въ пе́щь о́гненную вве́ржени, преподо́бніи о́троцы о́гнь въ ро́су преложи́ша, воспѣва́ніемъ си́це вопію́ще: благослове́нъ еси́, Го́споди Бо́же оте́цъ на́шихъ.

Освяще́нъ, богому́дре, и му́ченикомъ и́стины свѣ́тло сія́я кро́вію, съ ни́ми Влады́цѣ пое́ши непреста́нно: благослове́нъ еси́, Го́споди Бо́же оте́цъ на́шихъ.

Утвержде́нъ вѣ́рою, и́дольскій угаси́лъ еси́ пла́мень то́ки святы́хъ крове́й твои́хъ, му́чениче, си́це взыва́я: благослове́нъ еси́, Го́споди Бо́же оте́цъ на́шихъ.

Науче́нъ Боже́ственнымъ видѣ́ніемъ превы́шнимъ, у́мъ прему́дро уясни́лъ еси́, съ вѣ́рно пою́щими, о́тче, взыва́я: благослове́нъ еси́, Го́споди Бо́же оте́цъ на́шихъ.

Богоро́диченъ: Пѣсносло́віемъ сла́витъ Твое́ Рождество́ вся́ тва́рь, Бо́га, Дѣ́во, вѣ́дящи, и, че́стно покланя́ющися, Тому́ зове́тъ: благослове́нъ еси́, Го́споди Бо́же оте́цъ на́шихъ.

Пѣ́снь 8.

Ирмо́съ: Еди́наго Безнача́льнаго Царя́ Сла́вы, Его́же благословя́тъ небе́сныя си́лы и трепе́щутъ чи́ни а́нгельстіи, по́йте, свяще́нницы, лю́діе, превозноси́те Его́ во вѣ́ки.

Тя́, Неви́димаго, я́ко ви́дѣ, терпя́ше мучи́телей ра́ны богому́дрый и вѣнце́мъ увязе́ся, поя́: по́йте, свяще́нницы, лю́діе, превозноси́те Его́ во вѣ́ки.

Непрее́млемое Христо́во Ца́рство свѣ́тло жела́я, святи́телю, сіе́ тебѣ́ исхода́тайствовавшу пра́вою стезе́ю, зовы́й Христу́: лю́діе, превозноси́те Его́ во вѣ́ки.

Многосугу́бну Христо́съ тебѣ́ подаде́ твои́мъ трудо́мъ мзду́, богоно́се, мы́сль преходя́щую вся́ку, пою́щу благоче́стно Того́ Ца́рство во вся́ вѣ́ки.

Уче́ній пучи́ну, и скрижа́ль наказа́ній, и зрѣ́нія высо́каго сокро́вище тя́ зна́емъ, и чу́вствъ престо́лъ, пою́ще благоче́стно Христа́ Царя́ во вся́ вѣ́ки.

Богоро́диченъ: Ра́бски, Пречи́стая, Тебѣ́ прихожду́ вѣ́рою, заче́ншая всѣ́хъ Влады́ку: ны́нѣ спаси́ мя гоне́нія и бѣ́дъ, пою́ща благоче́стно Бо́га, воплоще́ннаго изъ Тебе́, Богороди́тельнице.

Пѣ́снь 9.

Ирмо́съ: Ма́ти Бо́жія и Дѣ́ва, ро́ждшая и дѣ́вствующая па́ки, не естества́ дѣ́ло, но Бо́жія снизхожде́нія, тѣ́мъ, я́ко Еди́ну, Бо́жіихъ чуде́съ сподо́бльшуюся, Тя́ при́сно велича́емъ.

Всегда́ Христа́ моли́, богоблаже́нне о́тче, ересе́й уста́вити е́же на ны́ кова́рства и ны́нѣшній мра́къ отъ среды́ отжени́, я́ко бо святи́тель си́ленъ моли́твенникъ бы́лъ еси́.

Отъ земли́ къ небе́снѣй жи́зни преста́вился еси́, служе́нія твоего́ по́честь пріе́мъ и страда́нія, идѣ́же жи́зни нетлѣ́нныя прича́стникъ бы́въ, вѣ́чно бы́ти со Христо́мъ сподо́бился еси́.

Дре́ва жи́зненнаго пло́дъ объя́лъ еси́, безсме́ртныя, преблаже́нне, жи́зни, человѣ́комъ Первонача́льника пріобрѣ́тъ, Его́же ра́дости наслажда́яся бога́тно, о пою́щихъ тя́ вѣ́рою моли́ся.

Ве́сь у́мъ простира́я, преподо́бне, бла́гостію житія́, Христо́ва зрѣ́нія и кра́снаго весе́лія сподо́бился еси́, я́ко священному́ченикъ и сказа́тель благоче́стія и побо́рникъ.

Богоро́диченъ: Зако́на но́ваго ковче́гъ нарица́емъ Тя́ и богоначерта́нную скрижа́ль, въ не́йже Сло́во написа́ся Бо́жіе, Человѣ́къ бы́въ, за е́же спасти́ мíръ отъ ле́сти, обра́дованная Богоро́дице Всепѣ́тая.

Источникъ: Минíа, мѣ́сяцъ Іу́ній. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 123 – 127.

/ Къ оглавленію раздѣла /


Наверхъ / Къ титульной страницѣ

0