Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 24 iюня 2017 г. Сейчасъ на порталѣ посѣтителей - 31.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́нія въ 19-й де́нь.
[Пое́мъ ему́ въ суббо́ту, ближа́йшую къ 19-му числу́.]
Слу́жба иже во святы́хъ отцу́ на́шему Іоа́нну, Архіепи́скопу Шанха́йскому и Са́нъ-Франци́сскому, чудотво́рцу.

НА ВЕЛИЦѢЙ ВЕЧЕРНИ,
Пое́мъ Блаже́нъ му́жъ, 1-й антифо́нъ.
На Го́споди воззва́хъ, стихи́ры на 8, гла́съ 6. Подо́бенъ: Всю́ отложи́вше.

Воспои́мъ святи́теля Христо́ва Іоа́нна,* отроко́мъ, отрокови́цамъ и младе́нцемъ любе́зна цѣли́теля,* возра́стнымъ совѣтода́вца му́дра же и тве́рда,* ма́теремъ о ча́дѣхъ извѣсти́теля,* креща́емымъ же и вѣнча́емымъ благослове́нія пода́теля,* провожда́емымъ въ жи́знь вѣ́чную моли́твенника вѣрнѣ́йша,* ревни́теля лѣ́поты и чи́на слу́жбы Бо́жія,* па́стыря же и архипа́стыря,* предводя́ща о́вцы своя́ богода́нныя,* къ нему́же возопіи́мъ:* о, блаже́нне чудотво́рче Іоа́нне,* моли́ о на́съ, любо́вію чту́щихъ тя́!

Восто́къ и за́падъ,* сѣ́веръ и мо́ре лику́йте,* па́мять пра́зднующе святи́телю чудотво́рца* небеса́ ра́дуйтеся,* а́нгела но́ваго пріе́млюще,* моли́твенника богодухнове́ннаго,* и па́стыря безсре́бренника,* благода́тнаго цѣле́бника,* проро́ка и благовѣ́стника,* Іоа́нна ми́лостивого на́шего засту́пника,* и на Судѣ́ на́мъ крѣ́пкаго спору́чника.

Ины стихи́ры, гла́съ 3:

Преподо́біемъ и пра́вдою пожи́въ на земли́, и до́брѣ ста́до Христо́во упа́съ, ве́тхаго человѣ́ка совле́клся еси́, и прило́ги вра́жія отрази́лъ еси́, неусы́пнымъ бдѣ́ніемъ и зѣ́льнымъ поще́ніемъ и моли́твою пла́менною ко Го́споду, ю́же и о на́съ ны́нѣ вознеси́, о́тче Іоа́нне.

Ка́ко не диви́мся неусы́пному трезве́нію твоему́, и ка́ко не воспои́мъ по́стническое житіе́ твое́, посредѣ́ бо мíра во злѣ́ лежа́щего подвиза́лся еси́, пусты́нникомъ дре́внимъ ревну́я, тѣ́мже и любо́вь и́стинную ко Го́споду стяжа́лъ еси́, е́юже покры́й на́съ, чту́щихъ па́мять твою́.

До́брый служи́телю Христо́ва Ева́нгелія, и́же и́стиною Правосла́вія препоя́сався, пра́щею слове́съ твои́хъ, во́лки тя́жкія отгна́лъ еси́, не исповѣ́дающія Христа́, и́стинную Прему́дрость Бо́жію, и ины́я чужды́я прему́дрости и́щущія, тѣ́мже и на́съ умудри́ во спасе́ніе, блаже́нне и богому́дре Іоа́нне, чту́щія свѣ́тло всекра́сную па́мять твою́.

Сла́ва, гла́съ 6:

Дне́сь собра́вшеся воспои́мъ человѣ́ка Бо́жія, архипа́стыря избра́ннѣйшаго, свѣти́льника ру́сскаго разсѣ́янія, учи́теля язы́ковъ разли́чныхъ, стра́нника въ мíрѣ се́мъ вре́меннѣмъ, наслѣ́дника премíрнаго Ца́рствія небе́снаго, Іоа́нна, святи́теля возлю́бленного, и воззове́мъ къ нему́: моли́ Го́спода при́сно о спасе́ніи ду́шъ на́шихъ.

Аще въ пято́къ ве́чера: И ны́нѣ, богоро́диченъ пе́рвый гла́са, а́ще же ни́: И ны́нѣ, богоро́диченъ догма́тикъ, гла́съ 6: Кто́ Тебе́ не ублажи́тъ...

Вхо́дъ, проки́менъ дне́, и чте́нія 3:

При́тчей чте́ніе.

Па́мять пра́веднаго съ похвала́ми, и благослове́ніе Госпо́дне на главѣ́ его́. Блаже́нъ человѣ́къ, и́же обрѣ́те прему́дрость, и сме́ртенъ, и́же увѣ́дѣ ра́зумъ. Лу́чше бо сію́ купова́ти, не́жели зла́та и сребра́ сокро́вища. Честнѣ́йшая же е́сть ка́меній многоцѣ́нныхъ, все́ же честно́е недосто́йно ея́ е́сть. Долгота́ бо дне́й и лѣ́та живота́ въ десни́цѣ ея́, въ шу́йцѣ же ея́ бога́тство и сла́ва. Отъ у́стъ ея́ исхо́дитъ пра́вда, зако́нъ же и ми́лость на язы́цѣ но́ситъ. Послу́шайте у́бо мене́, о ча́да, честна́я бо реку́, и блаже́нъ человѣ́къ, и́же пути́ моя́ сохрани́тъ: исхо́ди бо мои́ — исхо́ди живота́, и уготовля́ется хотѣ́ніе отъ Го́спода. Сего́ ра́ди молю́ ва́съ и предлага́ю мо́й гла́съ сыново́мъ человѣ́ческимъ. Я́ко а́зъ, прему́дрость, устро́ихъ совѣ́тъ, и ра́зумъ и смы́слъ азъ призва́хъ. Мо́й совѣ́тъ и утвержде́ніе, мо́й ра́зумъ, моя́ же крѣ́пость. Азъ мене́ лю́бящія люблю́, и́щущіи же мене́ обря́щутъ благода́ть. Разумѣ́йте у́бо, незло́бивіи, кова́рство, ненака́заніи же, прилага́йте сердца́. Послу́шайте мене́ и па́ки, честна́я бо реку́, и отве́рзу отъ усте́нъ пра́вая, я́ко и́стинѣ поучи́тся горта́нь мой, ме́рзки же пре́до мно́ю устны́ лжи́выя. Съ пра́вдою вси́ глаго́лы у́стъ мои́хъ, ничто́же въ ни́хъ стро́потно, ниже́ развраще́нно. Вся́ пра́ва су́ть разумѣва́ющимъ и про́ста обрѣта́ющимъ ра́зумъ. Науча́ю бо ва́съ и́стинѣ, да бу́детъ о Го́сподѣ наде́жда ва́ша, и испо́лнитеся Ду́ха.

При́тчей чте́ніе.

Уста́ пра́веднаго ка́плютъ прему́дрость, язы́къ же непра́веднаго поги́бнетъ. Устнѣ́ муже́й пра́ведныхъ ка́плютъ благода́ти, уста́ же нечести́выхъ развраща́ются. Мѣ́рила льсти́вая ме́рзость предъ Го́сподемъ, вѣ́съ же пра́ведный прія́тенъ Ему́. Идѣ́же а́ще вни́детъ досажде́ніе, та́мо и безче́стіе, уста́ же смире́нныхъ поуча́ются прему́дрости. Соверше́ніе пра́выхъ наста́витъ и́хъ, и поползнове́ніе отрица́ющихся упасе́тъ и́хъ. Не по́льзуютъ имѣ́нія въ де́нь я́рости, пра́вда же изба́витъ отъ сме́рти. Умеръ пра́ведный, оста́ви раска́яніе, нару́чна же быва́етъ и посмѣя́тельна нечести́выхъ па́губа. Пра́вда непоро́чнаго исправля́етъ пути́, въ нече́стіе же па́даетъ непра́вда. Пра́вда муже́й пра́выхъ изба́витъ и́хъ, безсовѣ́стіемъ же плѣня́ются беззако́нніи. Сконча́вшуся му́жу пра́ведну, не поги́бнетъ наде́жда, похвала́ же нечести́выхъ поги́бнетъ. Пра́ведникъ отъ ло́ва убѣ́гнетъ, въ него́же мѣ́сто предае́тся нечести́вый. Во устѣ́хъ нечести́выхъ сѣ́ть гра́жданомъ, чу́вство же пра́ведныхъ благопоспѣ́шное. Во благи́хъ пра́ведныхъ испра́вится гра́дъ, и въ поги́бели нечести́выхъ ра́дованіе. Во благослове́ніи пра́выхъ возвы́сится гра́дъ, усты́ же нечести́выхъ раскопа́ется. Руга́ется гра́жданомъ лише́нный ра́зума, му́жъ же му́дрый безмо́лвіе во́дитъ.

Прему́дрости Соломо́ни чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ра хра́ма и стихи́ры святи́телю, гла́съ 6:

Отрокъ сы́й еще́ мла́дъ, умили́лся еси́ словесе́мъ Христо́вымъ, и́миже воззва́ Госпо́дь святы́я апо́столы пе́рвыя, си́це ре́къ: по Мнѣ́ гряди́та, и сотворю́ вы́ ловца́ человѣ́комъ. Внима́я же си́мъ Боже́ственнымъ глаго́ломъ, о смиренному́дре Іоа́нне, ты́ ника́коже помы́слилъ еси́ себе́ бы́ти жре́біемъ подо́бна Бо́жіимъ посла́нникомъ послѣ́днимъ и насме́ртникомъ. Са́мъ Христо́съ тя́ вѣ́дый, тя́ просла́ви. Бу́ди же на́мъ увѣнча́ніе твое́ къ покая́нію нелицемѣ́рному воззва́ніе, во спасе́ніе ду́шъ на́шихъ.

Гла́съ 1:

Безпло́тнымъ си́ламъ, непреста́нно Бо́га хва́лящимъ, досто́йно поревнова́лъ еси́ приснобдѣ́нный Іоа́нне преподо́бне, любо́вію о́гненною твое́ю, сего́ ра́ди тѣ́хъ ликостоя́ніемъ сопричта́лся еси́.

Апо́стола благода́тного време́нъ безблагода́тныхъ, юро́дивымъ подража́теля прему́дрого, и по́стниковъ великонра́вного единоревни́теля, тя́, о́тче Іоа́нне, ве́лій чудотво́рче, восхваля́емъ.

Сла́ва, гла́съ то́йже:

Ди́вному во святы́хъ Свои́хъ, Бо́гу и Влады́цѣ, пѣ́ніе и исповѣ́даніе прино́сиши непреста́нно, въ тріе́хъ Ли́цѣхъ познава́емому, въ Существѣ́ же еди́номъ проповѣ́даемому, хра́мъ Сво́й въ души́ твое́й воздви́гшему, и свѣ́томъ Свои́мъ присносу́щнымъ осія́вшему тя́, тобо́ю же и на́съ просвѣща́ющему.

И ны́нѣ, богоро́диченъ, гла́съ то́йже:

Ра́дуйся, Пречи́стая Дѣ́во, ра́дуйся Богоневѣ́сто, ра́дуйся, вѣ́рныхъ прибѣ́жище, ра́дуйся святи́телей непреста́нное пѣ́ніе, ра́дуйся, хра́мы Твоя́ воздви́гнути дарова́вшая уго́днику Твоему́, блаже́нному Іоа́нну, его́же моле́нія пріе́мши, спаси́ благоче́стно пою́щія Тя́.

На стихо́внѣ стихи́ры, гла́съ 1. Подо́бенъ: Небе́сныхъ чино́въ.

Бо́дрствуя и моля́ся во дни́ и въ нощи́,* побѣжда́лъ еси́ вся́ искуше́нія вра́жія,* Іоа́нне святи́телю терпѣли́вѣйшій,* отъ младе́нства служи́ти пра́вдѣ Бо́жіей восхотѣ́вый,* къ небе́сному же Ца́рствію вы́ну устремле́нъ,* су́щихъ здѣ́ на земли́ утѣша́я, ми́ловалъ еси́.

Гла́съ 6:

Сти́хъ: Во всю́ зе́млю изы́де вѣща́ніе и́хъ и въ концы́ вселе́нныя глаго́лы и́хъ.

Наслажде́ніе тлѣ́нное всеконе́чно отри́нувъ,* Го́споду твоему́ послѣ́довалъ еси́,* и па́стырскій же́злъ, я́ко тя́жкій кре́стъ воспріи́мъ,* о́вцы твоя́ упра́вилъ еси́,* предъ ни́ми ходя́ и глаша́я по и́мени,* и мы́ гла́съ тво́й до́брѣ вѣ́дуще,* вслѣ́дъ тебѣ́ ходи́ти тщи́мся,* ты́ же въ ра́дость Го́спода твоего́ ны́нѣ возше́дъ,* неотлуче́нъ отъ на́съ пребу́ди.

Сти́хъ: Небеса́ повѣ́даютъ сла́ву Бо́жію, творе́ніе же руку́ Его́ возвѣща́етъ тве́рдь.

Наста́вникъ вои́стину всемíрный,* благоче́стія учи́тель* и Ду́ха Свята́го сосу́дъ избра́нный показа́лся еси́, блаже́нне Іоа́нне,* тѣ́мже вси́ концы́ тя́ прославля́ютъ,* отъ восто́къ со́лнца да́же до за́падъ,* въ хра́мъ тво́й притека́юще къ моще́мъ твои́мъ,* исцѣле́нія и по́мощь въ ско́рбехъ пріе́млютъ,* ты́ бо въ ра́дость Го́спода твоего́ возше́дъ,* неотлу́чно отъ на́съ пребыва́еши.

Сла́ва, гла́съ 6:

Образъ вои́стину бы́лъ еси́ вѣ́рнымъ: сло́вомъ, житіе́мъ, любо́вію, ду́хомъ, вѣ́рою и чистото́ю; тѣ́мже во всю́ зе́млю изы́де вѣща́ніе исправле́ній твои́хъ, и на небеси́ обрѣ́лъ еси́ мзду́ трудо́въ твои́хъ, но и земны́хъ не разлучи́лся еси́, я́ко исто́чникъ благода́ти приснотеку́щій, мощи твоя намъ оставилъ еси, и нынѣ молишися во еже добрый плодъ духовный принести намъ, иже даровъ твоихъ насладившимся.

И ны́нѣ, богоро́диченъ гла́съ то́йже:

Творе́цъ и Изба́витель мо́й, Пречи́стая, Христо́съ Госпо́дь, изъ Твои́хъ ложе́снъ проше́дъ, въ мя́ оболкíйся, пе́рвыя кля́твы Ада́ма свободи́. Тѣ́мже Ти́, Всечи́стая, я́ко Бо́жіи Ма́тери же и Де́вѣ, вои́стинну вопіе́мъ немо́лчно: ра́дуйся а́нгельски, ра́дуйся Влады́чице, предста́тельство, и покро́ве, и спасе́ніе ду́шъ на́шихъ.

Тропа́рь, гла́съ 5:

Попече́ніе твое́ о па́ствѣ въ стра́нствіи ея́,* се́ проо́бразъ и моли́твъ твои́хъ, за мíръ ве́сь при́сно возноси́мыхъ:* та́ко вѣ́руемъ, позна́въ любо́вь твою́, святи́телю и чудотво́рче Іоа́нне!* Ве́сь отъ Бо́га освяще́нъ священнодѣ́йствіемъ пречи́стыхъ Та́инъ,* и́миже са́мъ при́сно укрѣпля́емъ,* поспѣша́лъ еси́ ко стра́ждущимъ, цѣли́телю отра́днѣйшій.* Поспѣши́ и ны́нѣ въ по́мощь на́мъ, всѣ́мъ се́рдцемъ чту́щимъ тя́.

Два́жды, и Богоро́дице Дѣ́во..., еди́ножды.


Инъ тропа́рь, гла́съ 1:

Святи́тельства да́ръ пріумно́жилъ еси́,* сло́ва проповѣ́даніемъ апо́столомъ поревнова́въ,* бдѣ́ніемъ же, посто́мъ и моли́твою съ преподо́бными вмѣни́лся еси́,* клевету́ и поноше́нія съ кро́тостію пріе́мля.* Сего́ ра́ди Христо́съ тя́ просла́ви чудесы́,* и́хже оби́льно излива́еши на всѣ́хъ съ вѣ́рою притека́ющихъ къ тебѣ́:* и ны́нѣ спаса́й на́съ моли́твами твои́ми,* Іоа́нне досточу́дне, святи́телю Христо́въ.


НА УТРЕНИ,
На Бо́гъ Госпо́дь, тропа́рь, гла́съ 5-й: Попече́ніе твое́ о па́ствѣ, два́жды. Аще суббо́та: Сла́ва и ны́нѣ, богоро́диченъ 1-й гла́са, а́ще же ни́: Сла́ва и ны́нѣ, богоро́диченъ, гла́съ то́йже:

Ра́дуйся, две́ре Госпо́дня непроходи́мая; ра́дуйся стѣно́ и покро́ве притека́ющихъ къ Тебѣ́; ра́дуйся, необурева́емое приста́нище, и Неискусобра́чная, ро́ждшая пло́тію Творца́ Твоего́ и Бо́га, моля́щи не оскудѣва́й о воспѣва́ющихъ и кла́няющихся Рождеству́ Твоему́.

По 1-мъ стихосло́віи сѣда́ленъ, гла́съ 6:

Бо́жія сло́ва служи́телю вѣ́рный, и Ду́ха Свята́го сосу́де избра́нный, ты́ на ка́мени за́повѣдей Христо́выхъ до́мъ души́ твоея́ утверди́лъ еси́, и воздви́гшимся вѣ́тромъ искуше́ній, не паде́ся вну́тренняя хра́мина твоя́, сего́ ра́ди и вла́сть тебѣ́ даде́ся чу́вственному ви́хрю и тру́су запрети́ти; но и на́съ огради́ ны́нѣ отъ во́лнъ мо́ря жите́йского, и въ приста́нище ти́хое упра́ви.

Сла́ва и ны́нѣ, богоро́диченъ, гла́съ то́йже:

Изнемога́етъ сло́во, е́же пѣ́ти, Влады́чице, вели́чія Твоя́ и сла́вити чудеса́ Твоя́ во вся́комъ ро́дѣ и ро́дѣ, тѣ́мже кра́ткими глаго́лы и мно́гимъ упова́ніемъ арха́нгельски вопіе́мъ Ти́: Ра́дуйся, Благода́тная.

По 2-мъ стихосло́віи сѣда́ленъ, гла́съ 5:

Вѣ́рою и любо́вію па́мять твою́, небе́сный человѣ́че и а́нгеле земны́й, вси́ почита́емъ дне́сь: въ мíрѣ бо многомяте́жнѣмъ пусты́нникъ и́стиненъ бы́лъ еси́, и стра́сти вся́ умертви́въ, на высоту́ духо́вную неудобозри́мую дости́глъ еси́, вои́стину чу́до свѣтлѣ́йшее во мра́цѣ вѣ́ка сего́ бы́лъ еси́: сего́ ра́ди удивля́емся вели́цѣй сла́вѣ твое́й я́же на небеси́, и умиле́нно торжеству́емъ прославле́ніе твое́.

Сла́ва и ны́нѣ, богоро́диченъ, гла́съ то́йже:

Отчая Боже́ственная Прему́дрость и Сло́во пре́жде вѣ́къ су́щее, Боже́ственныя сла́вы неотлу́чное, отъ Тебе́ же, Богома́ти, нищету́ на́шу воспріе́млетъ и въ ра́бій о́бразъ нетлѣ́нно вообража́ется, да къ пе́рвѣй сла́вѣ и лу́чшему блаже́нству возведе́тъ дре́вле па́дшія, тѣ́мже Тя́, Влады́чице, я́ко Тобо́ю изба́вленніи немо́лчно ублажа́емъ.

Поліеле́й и велича́ніе:

Велича́емъ тя́, святи́телю о́тче Іоа́нне, и чте́мъ святу́ю па́мять твою́, ты́ бо мо́лиши за на́съ Христа́ Бо́га на́шего.

Псало́мъ избра́нный: Услы́шите сія́ вси́ язы́цы, внуши́те вси́ живу́щіи по вселе́ннѣй.

По поліеле́и сѣда́ленъ, гла́съ 4:

Сла́вы дре́внихъ святы́хъ преизря́дный ревни́телю, восто́ку невѣ́домыхъ и за́падомъ небреже́нныхъ, тѣ́хъ стопа́мъ послѣ́довалъ еси́, и предста́тельствомъ и́хъ покрыва́яся, единовсе́льникъ тѣ́хъ по сме́рти яви́лся еси́; мы́ же къ твоему́ заступле́нію прибѣга́емъ ны́нѣ: не пре́зри убо́гихъ, о́тче Іоа́нне, но въ свято́е сіе́ собра́ніе введи́ на́съ, я́ко единонадеся́таго ча́са дѣ́лателей, да взы́демъ на мѣ́сто послѣ́днее, среди́ перворо́дныхъ Це́ркви торжеству́юще.

Сла́ва и ны́нѣ, богоро́диченъ, гла́съ то́йже:

Соше́дшеся дне́сь, соверша́емъ торжество́ ди́вного святи́теля Іоа́нна, и́же воздви́же Тебѣ́ хра́мъ, Влады́чице, я́ко всѣ́мъ скорбя́щимъ ра́дость и немощны́мъ по́мощь и исцѣле́ніе Ты́ еси́, и къ Тебѣ́ припа́даемъ, спору́чника сего́ иму́ще: помози́ на́мъ въ не́мощехъ неду́гующимъ и грѣхи́ мно́гими отягоще́ннымъ, да Твои́ми моли́твами ми́лость обря́щемъ вско́рѣ у Сы́на Твоего́ и Бо́га на́шего.

Степе́нна, антифо́нъ 4-го гла́са. Проки́менъ, гла́съ 4: Честна́ предъ Го́сподемъ сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Вся́кое дыха́ніе. Ева́нгеліе отъ Іоа́нна, зача́ло 35, отъ полу́.

По 50-мъ псалмѣ́ стихи́ра, гла́съ 6:

Ра́дуются дне́сь правосла́вныхъ собо́ри, и лику́юще свѣ́тло, велича́ютъ свѣти́льника но́вого, дре́внимъ святи́телемъ равносія́тельна, на коне́цъ вѣко́въ возсія́вшаго мíру и земны́я вся́ концы́ просвѣти́вшаго, Іоа́нна пречу́дного, преподо́бнымъ спо́стника и святи́телемъ собесѣ́дника, исповѣ́дникомъ ра́вного крѣ́постію и безме́зднымъ цѣли́телемъ вѣне́цъ и украше́ніе, при́но моля́щася о душа́хъ на́шихъ.

Кано́нъ моле́бный Пресвяты́я Богоро́дицы, гла́съ 8: Во́ду проше́дъ. И кано́нъ святи́теля, гла́съ 4:

Пѣ́снь 1.

Ирмо́съ: Мо́ря чермну́ю пучи́ну, невла́жными стопа́ми, дре́вній пешеше́ствовавъ Изра́иль, крестообра́зныма Моисе́овыма рука́ма, Амали́кову си́лу въ пусты́ни побѣди́лъ е́сть.

Бла́го е́сть воспѣва́ти уго́дники Бо́жія, въ и́хже ли́цѣ на́мъ ра́достнѣ свѣ́титъ святы́й Іоа́ннъ, утѣша́я, врачу́я его́ призыва́ющія, и науча́я на́съ о́бразомъ многотру́днаго житія́ своего́ ревнова́ти о по́мощи су́щимъ въ бѣда́хъ.

О, жела́ніе се́рдца боголюби́вого! Возжела́лъ еси́ еще́ въ во́зрастѣ дѣ́тищномъ и́стины бы́ти побо́рникъ. Та́ко бо плѣни́ша тя́ по́вѣсти о непощади́вшихъ жи́зни своя́ за пра́вду Бо́жію мно́жества ди́вныхъ святы́хъ.

Привре́менно недоумѣ́ненъ бы́лъ еси́, е́же каковы́й пу́ть, во́инскій или́ гражда́нскій себѣ́ избра́ти. Но зрѣ́яше въ души́ твое́й крѣпча́йша мы́сль: всего́ себе́ преда́ти на служе́ніе святѣ́й Це́ркви Христо́вой.

Богоро́диченъ: Мы́ о Тебѣ́ хва́лимся, Богоро́дице, и къ Бо́гу Тя́ и́мамы непосты́дное предста́тельство, простри́ ру́ку Твою́ необори́мую и сокруши́ враги́ на́ша, низпосли́ Твои́мъ рабо́мъ по́мощь отъ Свята́го.

Пѣ́снь 3.

Ирмо́съ: Весели́тся о Тебѣ́ Це́рковь Твоя́, Христе́, зову́щи: Ты́ моя́ крѣ́пость, Го́споди, и прибѣ́жище, и утвержде́ніе.

Съ весе́ліемъ соверша́емъ па́мять твою́, архипа́стырю на́шъ и наста́вниче, покланя́емся честны́мъ и нетлѣ́ннымъ моще́мъ твои́мъ, прося́ше моли́твъ твои́хъ.

Воспрія́лъ еси́ о́бразъ а́нгельскій, и обо́лкся во вся́ ору́жія Бо́жія, ополчи́вся еси́ проти́ву духо́въ зло́бы поднебе́сныхъ, побѣжда́я и́хъ.

Не дава́лъ еси́ сна́ дово́льна очесе́мъ твои́мъ, не возле́глъ еси́ на о́дръ во е́же почи́ти, уподо́бився отце́мъ дре́влимъ, о подви́жниче!

Богоро́диченъ: Ра́й жи́зни су́щи, Богоро́дице, сме́рти грѣхо́вныя и страсте́й многообра́зныхъ изба́ви мя́ вско́рѣ.

Сѣда́ленъ, гла́съ 4:

Моли́тва твоя́, о́тче Іоа́нне, а́ки сто́лпъ о́гненный до небе́съ досяга́яй яви́ся, путеводя́щъ Изра́иля но́ваго въ жите́йстѣмъ стра́нствіи, сего́ ра́ди чту́щимъ тя́ терпѣ́ніе да́руй и благодаре́ніе Го́споду въ сердца́хъ насади́, да не я́коже ропотницы́ о́ныя, еги́петскихъ мя́съ рачи́теліе, осу́димся, но да сподо́бимся земли́ Обѣтова́нныя нетлѣ́нныхъ бла́гъ наслади́тися.

Сла́ва и ны́нѣ, богоро́диченъ, гла́съ то́йже:

Утвержде́ніе на́мъ еси́, Богома́ти, и свяще́нное прибѣ́жище вла́ющимся прило́ги вра́жіими, Тобо́ю же покрыва́еми, проще́ніе грѣхо́въ и дерзнове́ніе ко Го́споду обрѣта́емъ.

Пѣ́снь 4.

Ирмо́съ: Вознесе́на Тя́ ви́дѣвши Це́рковь на Крестѣ́, Со́лнце Пра́ведное, ста́ въ чи́нѣ свое́мъ, досто́йно взыва́ющи: сла́ва си́лѣ Твое́й, Го́споди.

Мно́жества россíйскихъ архипа́стырей наста́вникъ, зарубе́жныя же Це́ркве начина́тель, са́мъ сы́й ревни́тель мона́шеского житія́, тя́, свя́те Іоа́нне, чу́домъ на́шихъ дне́й именова́ и въ по́двизѣхъ крѣпкостоя́тельна.

Аще хо́щете, лю́діе, свята́го жи́ва ви́дѣти, во гра́дъ Би́толь поспѣша́йте, зри́те та́мо отца́ Іоа́нна! — Та́ко се́рбскій имени́тый архипа́стырь изрече́, нра́вомъ же и дѣ́лы Іоа́нновыми восхище́нный.

Юношы карпатору́сстіи, се́рбскія богосло́віи пито́мцы, о тебѣ́ съ вели́кимъ умиле́ніемъ повѣствова́ху, о твое́мъ къ себѣ́ непощаде́ніи и къ ни́мъ любве́, е́же ка́ко осѣня́лъ еси́ и́хъ кре́стнымъ зна́меніемъ, ходя́ между́ спя́щими, поко́й и́хъ соблюда́я.

Богоро́диченъ: Пречи́стая Ма́ти Го́спода на́шего и Дѣ́во, ми́лующая и грѣ́шнѣйшихъ рабо́въ Свои́хъ, я́ко милосе́рдія сокро́вищница пребога́тая, обнови́ на́съ, безмѣ́рно обнища́вшихъ, всѣ́хъ скорбя́щихъ Засту́пнице и Ра́досте!

Пѣ́снь 5.

Ирмо́съ: Ты́, Го́споди мо́й, Свѣ́тъ въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія, вѣ́рою воспѣва́ющія Тя́.

Подража́тель и́стинный Христо́въ бы́лъ еси́, святи́телю, ду́шу полага́яй за па́ству свою́, и предста́лъ еси́ Пастыренача́льнику непосты́дно.

Исцѣле́ній да́ръ даде́ся ти́ еще́ во пресви́терствѣ, пріумно́жилъ еси́ его́ во дни́ святи́тельства и усоверша́еши въ ино́мъ и вѣ́чномъ житіи́.

Преподо́бному Нау́му бы́лъ еси́ содѣ́йственникъ во исцѣле́ніихъ, со ико́ною его́ свято́ю посѣща́я до́мы человѣ́ковъ стра́ждущихъ.

Богоро́диченъ: Богоро́дице Дѣ́во, вселе́нныя блага́я Помо́щнице, Цѣли́тельнице ду́шъ и тѣле́съ на́шихъ, услы́ши на́съ и въ де́нь се́й моля́щихся Тебѣ́.

Пѣ́снь 6.

Ирмо́съ: Возопи́, прообразу́я погребе́ніе тридне́вное, проро́къ Іо́на, въ ки́тѣ моля́ся: отъ тли́ изба́ви мя́, Іису́се, Царю́ си́лъ.

Пріиди́те, восхва́лимъ Богоро́дицѣ хра́мъ воздви́гшаго, самого́ же всѣ́мъ скорбя́щимъ ра́дость и хра́мъ Ду́ха Свята́го бы́вшаго.

Поспѣша́лъ еси́ и въ до́мы стра́ждущихъ и въ пала́ты больни́чныя къ неду́гующимъ, о ни́хже сказа́ ти́ Госпо́дь, я́ко Пречи́стыхъ Та́инъ Его́ препода́тель.

Ты́ боля́щимъ младе́нцемъ яви́лся еси́ здра́вія хода́тай, святы́й Іоа́нне, ско́рбь роди́тельскихъ ду́шъ премѣня́я на ра́дость, и всѣ́мъ во́зрастомъ ты́ показа́лся еси́ вожделе́нный помо́щникъ.

Богоро́диченъ: Оте́чества правосла́вного лиши́хомся, Влады́чице, внегда́ во́лны гнѣ́ва Госпо́дня надъ ни́мъ проидо́ша, зане́ храни́теліе су́етныхъ и ло́жныхъ содѣ́яхомся, внегда́ же скончава́тися душа́мъ на́шимъ, Го́спода помяну́хомъ, да пріи́детъ къ Нему́ Тобо́ю на́ша моли́тва и пѣ́ніе.

Конда́къ, гла́съ 4:

Христу́ пастыренача́льнику послѣ́довавъ, во святи́телехъ изря́днѣйшій яви́лся еси́, спа́слъ бо еси́ о́вцы своя́ отъ губи́тельства безбо́жныхъ, приста́нище ми́рное тѣ́мъ учреди́въ, и попече́ніе непреста́нное о па́ствѣ имѣ́я, врачева́лъ еси́ и́хъ неду́ги душе́вныя же и тѣле́сныя, и ны́нѣ о на́съ къ твои́мъ честны́мъ моще́мъ припа́дющихъ, моли́ Христа́ Бо́га, о́тче Іоа́нне, въ ми́рѣ спасти́ся душа́мъ на́шимъ.

Икосъ:

Небеса́ ны́нѣ съ на́ми ра́дуются и ли́цы святы́хъ пріе́млютъ но́вое и пресла́вное украше́ніе: апо́столы проповѣ́дника всемíрнаго цѣлу́ютъ, му́ченицы дре́вніи восхваля́ютъ ди́вно просла́вльшаго па́мять и́хъ, святи́теліе собесѣ́дуютъ ра́вному въ словеси́ и прему́дрости, бдѣ́нному же подви́жнику преподо́бніи дивя́тся, ца́ріе святíи ди́внаго моли́твенника о возстановле́ніи ца́рства правосла́внаго почита́ютъ, безсре́бренницы съ цѣли́телемъ безме́зднымъ мзду́ нетлѣ́нную и недѣли́мую раздѣля́ютъ, ели́ко всесла́вно бы́сть служе́ніе твое́, о́тче Іоа́нне, та́ко и вѣнце́въ тебѣ́ исплете́ся мно́жество, но моли́ся ку́пно съ ли́ки святы́хъ ко Христу́ Бо́гу отъ на́съ, къ честны́мъ моще́мъ твои́мъ припа́дающихъ, въ ми́рѣ спасти́ся душа́мъ на́шимъ.

Пѣ́снь 7.

Ирмо́съ: Въ пещи́ Авраа́мстіи о́троцы перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.

Сы́на свѣ́та и дне́ благода́ть вои́стину тя́ содѣ́ла: на вся́къ бо де́нь святы́ми Та́йнами укрѣпля́емъ и обожа́емъ, утверди́лъ еси́ въ Го́сподѣ се́рдце твое́.

Ми́лостивымъ предста́тельствомъ твои́мъ вѣ́рныя и невѣ́рныя спаса́хуся и да́ры благода́тныя пріима́ху, ты́ же, да́руя незави́стно исцѣле́нія, во тьмѣ́ пре́лести не оставля́еши пребыва́ти заблу́ждшія, но еди́ного Царя́ сла́вы учи́ши правосла́вно воспѣва́ти во вся́ вѣ́ки.

По́мощь и утѣше́ніе изгна́ннымъ лю́демъ свои́мъ ди́вно сотвори́ Госпо́дь, дарова́въ на́мъ тя́ засту́пника, святи́телю Іоа́нне, но и ны́нѣ покры́й на́съ отъ вра́гъ на́шихъ неви́димыхъ и изъ руки́ всѣ́хъ, ненави́дящихъ на́съ.

Богоро́диченъ: Отцы́ на́ши согрѣши́ша и пре́дани бы́ша въ ру́ки враго́въ беззако́нныхъ и лука́внѣйшихъ па́че всея́ земли́, что́ у́бо сотвори́мъ, Влады́чице, согрѣше́нія роди́тельская непреста́нно умножа́юще, и ка́ко ко́зней лю́тыхъ избѣ́гнемъ, а́ще не ты́ засту́пиши ка́ющіяся и спасе́нія тре́бующія.

Пѣ́снь 8.

Ирмо́съ: Ру́цѣ распросте́ръ Даніи́лъ, льво́въ зія́нія въ ро́вѣ затче́; о́гненную же си́лу угаси́ша, добродѣ́телію препоя́савшеся, благоче́стія рачи́тели о́троцы, взыва́юще: благослови́те вся́ дѣла́ Госпо́дня Го́спода.

Се́рдце твое́ распространи́ся ко всѣ́мъ, любо́вію моля́щимтися, Іоа́нне святи́телю, помина́ющимъ по́двигъ всего́ многотру́дного житія́ твоего́, безболѣ́зненное же и ле́гкое преставле́ніе твое́, Одиги́тріи Пречи́стыя вѣ́рный служи́телю.

Ничто́же возмо́же препя́ти ти́, посѣща́ющу въ больни́цѣ ча́дъ твои́хъ, па́стырю до́брый, ни до́ждь, ни бу́ря, ни тьма́ нощна́я, иногда́ никому́же зуву́щу, ду́хомъ предви́дя ну́жду и́хъ, Го́споду поспѣ́шствующу и указу́ющу, да вси́ просла́вятъ Бо́га оте́цъ на́шихъ.

Егда́ ца́рства правосла́вная на земли́ падо́ша и забве́нію пре́дана бы́ша, не преста́лъ еси́ побѣ́ды проси́ти царе́мъ благовѣ́рнымъ въ дре́внихъ пѣ́снехъ неизмѣ́нно, я́ко тѣ́хъ держа́ва то́чію благослове́нна е́сть отъ Бо́га оте́цъ на́шихъ.

Богоро́диченъ: Вели́читъ душа́ Твоя́, Влады́чице, Го́спода на́шего и ра́дуется ду́хъ Тво́й о Бо́зѣ Спа́сѣ и Сы́нѣ Твое́мъ. И ка́ко смѣ́ли бы́хомъ мы́ воспѣва́ти пѣ́снь Твою́, а́ще не бы́ благоволи́ла Сама́ проро́чески рещи́, я́ко ублажа́тъ Мя́ вси́ ро́ди.

Пѣ́снь 9.

Ирмо́съ: Кам́ень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся, Христо́съ, совокупи́вый разстоя́щаяся естества́. Тѣ́мъ веселя́щеся, Тя́, Богоро́дице, велича́емъ.

Поспѣша́я ко стра́ждущимъ, при́сно ду́шу твою́ за о́вцы твоя́ полага́лъ еси́, тѣ́мже и чудотворе́ній да́ръ тебѣ́ даде́ся, моли́твами бо твои́ми немощству́ющіи препоя́сашася си́лою, и ни́щіи добродѣ́телію отъ гно́ища страсте́й воздвиго́шася.

Заре́ю свѣ́тлою лю́демъ па́ствы твоея́ просія́лъ еси́, о́тче Іоа́нне, внегда́ смути́тися душа́мъ и́хъ въ годи́ну Бо́жія гнѣ́ва, но помяну́лъ е́сть Госпо́дь ми́лость Свою́ и смире́нныя утѣ́ши тобо́ю.

Къ ца́рству Бо́жію пути́ на́ша напра́ви, послужи́вый ему́ преподо́біемъ и пра́вдою вся́ дни́ живота́ твоего́, наста́ви ра́зумъ люде́й твои́хъ ко спасе́нію и просвѣти́ во тьмѣ́ и сѣ́ни сме́ртней сѣдя́щія, о́тче блаже́нне Іоа́нне, да ра́достно пою́ще, соверша́емъ па́мять твою́.

Богоро́диченъ: Наста́ви но́ги на́ша на пу́ть ми́ренъ, Всечи́стая Влады́чице, ми́ръ и́стинный къ человѣ́комъ приве́дшая, Сы́на Твоего́, Кресто́мъ вражду́ упраздни́вшаго и дре́вняго супоста́та побѣ́дно низложи́вшаго.

Свѣти́ленъ:

Аще и умро́хъ пло́тію, но жи́въ е́смь, не скорби́те, лю́діе, — си́це по преставле́ніи твое́мъ возвѣсти́лъ еси́, свѣ́томъ та́инственнымъ просвѣща́я тя́ пою́щія, о́тче Іоа́нне, святи́телю преди́вный.

Сла́ва и ны́не, богоро́диченъ:

О Тебѣ́, Богоро́дице Дѣ́во, святíи вси́ пра́зднующе ра́дуются, и на Тя́ упова́емъ мы́ раби́ Твои́ многогрѣ́шніи, зову́ще: весели́ся и ра́дуйся, Ма́ти Христа́ Вседержи́теля.

На хвали́техъ стихи́ры, на 4, гла́съ 4:

Благода́рно воспои́мъ, вѣ́рніи, Го́споду Бо́гу на́шему, и восхва́лимъ Его́ по мно́жеству вели́чествія Его́, дарова́вшаго на́мъ засту́пника изря́днаго, на земли́ чудотвори́вшаго, и съ небесе́ на убо́гія призира́ющаго, ему́же ны́нѣ прино́симъ пѣ́ніе и къ моще́мъ его́ припа́даемъ со стра́хомъ, избавле́нія прегрѣше́ній прося́ще и душа́мъ на́шимъ спасе́нія.

До́брого па́стыря и дѣтопита́леля восхва́лимъ, се́й бо тща́ніе о па́ствѣ имѣ́я, наипа́че о дѣ́техъ сиро́тахъ имѣ́яше попече́ніе и оби́тель и́мъ сотвори́, святи́теля Ти́хона въ по́мощь призва́въ, и не оста́ви и́хъ въ бѣдѣ́, су́щей бра́ни отъ безбо́жныхъ, но да́же до кра́я вселе́нныя въ ти́хое приста́нище пресели́, его́же моли́твами и на́мъ, Спа́се, сотвори́ ми́лость.

Бдѣ́нное пѣ́ніе соверша́юще, вѣ́рніи, восхва́лимъ Го́спода Бо́га на́шего и Его́ до́браго служи́теля, его́же избра́, я́ко не отъ мíра бы́сть: се́й бо о́бразъ показа́ на́мъ терпѣ́нія и моли́твы непреста́нныя, бо́дростію препобѣжда́я тѣлесе́ не́мощь, Бо́жіею же му́дростію просвѣще́нъ, пра́выя вѣ́ры ревни́тель бы́сть, вѣ́рныя вся́ко наставля́я, тѣ́мже моли́твами его́, Христе́ Бо́же, пода́ждь на́мъ въ пра́вой вѣ́рѣ и благоче́стіи пребы́ти.

Ди́внаго Бо́га во святы́хъ Свои́хъ, вся́кое дыха́ніе псало́мски да восхва́литъ, на коне́цъ вѣко́въ низпосла́вшаго на́мъ чу́дное утѣше́ніе, Іоа́нна, святи́теля всемíрнаго, и́стины побо́рника крѣ́пкаго, посредѣ́ собла́зновъ и лжи́ недви́жно пребы́вшаго, и отъ мра́чныя пре́лести вся́ воздвиза́ющаго, и ко спасе́нію на́съ приводя́щаго.

Сла́ва, гла́съ то́йже:

Исповѣ́дуемъ ди́вное заступле́ніе твое́, не таи́мъ чуде́съ твои́хъ, на на́съ бы́вшихъ, хода́таю на́шъ ко Го́споду, святи́телю Іоа́нне, и́миже упова́нію правосла́вному обуча́еши на́съ, маловѣ́рныхъ, и уныва́ющихъ и ропотли́выхъ, да твои́ми моли́твами по́мощь Бо́жію и́мамы, е́юже спаса́емся отъ ро́да сего́ развраще́ннаго, чту́щія досто́йно па́мять твою́.

И ны́нѣ, богоро́диченъ, гла́съ то́йже:

Богоро́дице, всѣ́хъ Цари́це, правосла́вныхъ похвало́, ерети́чествующихъ шата́нія разори́, и ли́ца и́хъ посрами́, не кла́няющихся, ниже́ чту́щихъ, Пречи́стая, честны́й Тво́й о́бразъ.

Славосло́віе вели́кое, тропа́рь, и отпу́стъ.



НА ЛИТУРГІИ:

Блаже́нна, отъ кано́на святи́теля пѣ́снь 3 и 6. Проки́менъ, гла́съ 1: Уста́ моя́ возглаго́лютъ прему́дрость, и поуче́ніе се́рдца моего́ ра́зумъ. Сти́хъ: Услы́шите сія́ вси́ язы́цы, внуши́те вси́ живу́щіи по вселе́ннѣй. Апо́столъ ко Евре́омъ, зача́ло 318. Аллилу́ія, гла́съ 2: Уста́ пра́веднаго поуча́тся прему́дрости, [и язы́къ eго́ возглаго́летъ су́дъ. Сти́хъ: Зако́нъ Бо́га его́ въ се́рдцѣ его́, и не за́пнутся стопы́ eго́]. Ева́нгеліе отъ Іоа́нна, зача́ло 36. Прича́стенъ: Въ па́мять вѣ́чную бу́детъ пра́ведникъ, отъ слу́ха зла́ не убои́тся.

Источникъ: Слу́жба и Ака́ѳистъ Святи́телю Іоа́нну, Архіепи́скопу Шанха́йскому и Са́нъ-Франци́сскому, Чудотво́рцу. — Jordanville: Holy Trinity Monastery, 2001. — С. 1-35.

/ Къ оглавленію раздѣла /


Наверхъ / Къ титульной страницѣ

0