Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 24 iюня 2017 г. Сейчасъ на порталѣ посѣтителей - 22.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́нія въ 19-й де́нь.
Свята́го апо́стола Іу́ды, бра́та Госпо́дня.

НА ВЕЧЕРНИ,
Пое́мъ: Блаже́нъ му́жъ.., 1-й антифо́нъ. На Го́споди воззва́хъ: стихи́ры на 8, гла́съ 1. Подо́бенъ: Всехва́льніи му́ченицы.

Іу́до чу́дный,* Христо́ва колесни́ца я́ко бы́въ,* и́дольскую горды́ню низложи́лъ еси́,* плѣ́нъ же та́йно Сло́вомъ Бо́жіимъ плѣни́лъ еси́* къ жи́зни нетлѣ́ннѣй, сла́вне,* е́юже наслажда́яся ны́нѣ,* испроси́ душа́мъ на́шимъ ми́ръ* и ве́лію ми́лость. [Три́жды.]

Іу́до, апо́столе Христо́въ,* учени́къ бы́въ вопло́щшагося Бо́га на́шего,* отъ Него́же, я́ко овча́ посредѣ́ волко́въ,* вои́стинну посла́лся еси́,* сло́вомъ твои́мъ си́хъ претворя́я* злоче́стіе ко благоче́стію* и боже́ственному разумѣ́нію Святы́я Тро́ицы.* Тѣ́мже восхваля́емъ тя́. [Два́жды.]

Сла́ва, гла́съ 8:

Иже Боже́ственнаго Ду́ха я́сно благода́ть пріе́мъ, свяще́ннаго ли́ка апо́стольска соприча́стникъ бы́въ, Іу́до апо́столе, тѣ́мъ носи́мое съ небесе́ иногда́ дыха́ніе о́гненное о́гненнымъ язы́комъ вдохну́въ, язы́ческое терно́вное попали́лъ еси́ безбо́жіе. Христа́ Бо́га, проповѣ́дниче, моли́ спасти́ся душа́мъ на́шимъ.

И ны́нѣ, [богоро́диченъ]: Ца́рь Небе́сный...
Вхо́дъ. Проки́менъ дне́. И чте́нія три́.

Собо́рнаго посла́нія Іу́дина чте́ніе. [Глава́ 1.]

Іу́да, Іису́су Христу́ ра́бъ, бра́тъ же Іа́кову, су́щимъ о Бо́зѣ Отцѣ́ освяще́ннымъ, Іису́съ Христо́мъ соблюде́ннымъ зва́ннымъ. Ми́лость ва́мъ, и ми́ръ, и любы́ да умно́жится. Возлю́бленніи, вся́ко тща́ніе творя́ писа́ти ва́мъ о о́бщемъ спасе́ніи ва́шемъ, ну́жда ми́ бы́сть писа́ти ва́мъ, моля́ подвиза́тися о пре́даннѣй вѣ́рѣ святы́мъ еди́ною. Привнидо́ша бо нѣ́цыи человѣ́цы, [дре́вле предуста́вленніи на сіе́ осужде́ніе,] нечести́віи, Бо́га на́шего благода́ть прелага́ющіи въ скве́рну, и еди́наго Влады́ки Бо́га, и Го́спода на́шего Іису́са Христа́ отмета́ющіися. Воспомяну́ти же ва́мъ хощу́, вѣ́дущимъ и ва́мъ еди́ною сіе́, я́ко Госпо́дь лю́ди отъ земли́ Еги́петскія спасе́, послѣди́ невѣ́ровавшія погуби́. Ангелы же, не соблю́дшія своего́ нача́льства, но оста́вльшія свое́ жили́ще на су́дъ вели́каго дне́, у́зами вѣ́чными подъ мра́комъ соблюде́. Якоже Содо́ма и Гомо́рра, и окре́стныя и́хъ гра́ды, подо́бнымъ и́мъ о́бразомъ преблуди́вша и ходи́вша въ слѣ́дъ пло́ти ины́я, предлежа́тъ въ показа́ніе огня́ вѣ́чнаго, су́дъ подъе́мше. Та́кожде у́бо и сíи, со́нія ви́дяще, пло́ть у́бо скверня́тъ, госпо́дьства же отмѣта́ются, сла́вы же ху́ляще [не трепе́щутъ]. Михаи́лъ же Арха́нгелъ, егда́, со діа́воломъ разсужда́я, глаго́лаше о Моисе́овѣ тѣлеси́, не смѣ́яше суда́ навести́ ху́льна, но рече́: да запрети́тъ тебѣ́ Госпо́дь. Сíи же, ели́ка у́бо не вѣ́дятъ, ху́лятъ: ели́ка же по естеству́, я́ко безслове́сная живо́тная, вѣ́дятъ, въ си́хъ скверня́тся.

Собо́рнаго посла́нія Іу́дина чте́ніе. [Глава́ 1.]

Го́ре и́мъ, я́ко въ пу́ть Ка́иновъ ходи́ша, и въ ле́сть Валаа́мовы мзды́ пролія́шася, и въ прерѣка́ніи Корре́овѣ погибо́ша. Сíи су́ть въ любва́хъ ва́шихъ скверни́тели, съ ва́ми яду́ще, безъ боя́зни себе́ пасу́ще, о́блацы безво́дни, отъ вѣ́тръ преноси́ми, древеса́ есе́нна безпло́дна, два́жды уме́рша, искорене́на. Во́лны свирѣ́пыя мо́ря, воспѣня́юще своя́ стыдѣ́нія, звѣ́зды преле́стныя, и́мже мра́къ тмы́ во вѣ́ки блюде́тся. Проро́чествова же и о си́хъ седмы́й отъ Ада́ма Ено́хъ, глаго́ля: се́ пріи́детъ Госпо́дь во тма́хъ святы́хъ [а́нгелъ] Свои́хъ, сотвори́ти су́дъ о всѣ́хъ и изобличи́ти всѣ́хъ нечести́выхъ о всѣ́хъ дѣ́лѣхъ нече́стія и́хъ, и́миже нече́ствоваша, и о всѣ́хъ жесто́кихъ словесѣ́хъ, и́хже глаго́лаша на́нь грѣ́шницы нечести́віи. Сíи су́ть ропотницы́, укори́тели, ча́сть поро́чна, въ по́хотехъ свои́хъ ходя́ще, нече́стіемъ и законопреступле́ніемъ, и уста́ и́хъ глаго́лютъ прего́рдая, чудя́щеся ли́цамъ по́льзы ра́ди.

Собо́рнаго посла́нія Іу́дина чте́ніе. [Глава́ 1.]

Вы́ же, возлю́бленніи, помина́йте глаго́лы преждерече́нныя отъ апо́столъ Го́спода на́шего Іису́са Христа́. Зане́ глаго́лаху ва́мъ, я́ко въ послѣ́днее вре́мя бу́дутъ руга́тели, по свои́хъ по́хотѣхъ ходя́ще и нече́стіихъ. Сіи су́ть отдѣля́юще себе́ отъ еди́ности вѣ́ры и су́ть тѣле́сни, Ду́ха не иму́ще. Вы́ же, возлю́бленніи, свято́ю ва́шею вѣ́рою назида́юще себе́ Ду́хомъ Святы́мъ, и моля́щеся, са́ми себе́ въ любви́ Бо́жіей соблюда́йте, жду́ще ми́лости Го́спода на́шего Іису́са Христа́ въ жи́знь вѣ́чную. И о́вѣхъ у́бо ми́луйте, разсужда́юще, о́вѣхъ же стра́хомъ спаса́йте, отъ огня́ восхища́юще. Облича́йте же съ боя́знію, ненави́дяще и я́же отъ пло́ти оскверне́ную ри́зу. Могу́щему же сохрани́ти вы́ безъ грѣха́ и безъ скве́рны и поста́вити предъ сла́вою свое́ю непоро́чны въ ра́дости, еди́ному прему́дрому Бо́гу и Спа́су на́шему, [Іису́сомъ Христо́мъ, Го́сподемъ на́шимъ,] сла́ва и вели́чіе, держа́ва и вла́сть пре́жде всего́ вѣ́ка, и ны́нѣ, и во вся́ вѣ́ки. Ами́нь.

На стихо́внѣ стихи́ры, гла́съ 4. Подо́бенъ: Да́лъ еси́ зна́меніе.

Прія́лъ еси́, апо́столе,* надъ де́моны непобѣди́мую вла́сть и си́лу* и о и́мени Христо́вѣ* нача́ла тмы́ отгони́ти,* проше́лъ еси́ зе́млю,* просвѣща́я, я́ко со́лнце,* и вся́ страны́ науча́я,* пе́рвое, сла́вне, Христо́во проповѣ́далъ еси́* спаси́тельное прише́ствіе.

Сти́хъ: Во всю́ зе́млю изы́де вѣща́ніе и́хъ* и въ концы́ вселе́нныя глаго́лы и́хъ.

Пе́рвѣй бла́гости* и есте́ственному и пребоже́ственному* житію́ подо́бяся,* му́жъ бы́лъ еси́ бла́гъ, Іу́до, по существу́,* и бра́тъ Госпо́день имену́емь,* нра́ва твоего́ благода́тію* и обы́чая красото́ю,* Христо́въ показа́лся еси́ учени́къ и́скренній.

Сти́хъ: Небеса́ повѣ́даютъ сла́ву Бо́жію,* творе́ніе же руку́ Его́ возвѣща́етъ тве́рдь.

Орга́нъ, до́брѣ соста́вленъ,* боже́ственнымъ окормле́ніемъ,* апо́столе Іу́до,* язы́комъ зва́нію ты́ ввѣ́рился еси́,* къ позна́нію Христо́ву наставля́я* словесы́ и дѣя́ніи,* вся́ просвѣти́лъ еси́* исповѣ́дати и́стинное Іису́са Божество́,* Спа́са ду́шъ на́шихъ.

Сла́ва, гла́съ 2:

Ре́вности боже́ственныя испо́лненъ, апо́столе Іу́до досточу́дне, ревну́я, поревнова́лъ еси́ Бо́гу Вседержи́телю, и боже́ственныхъ тя́ чуде́съ испо́лнена показа́, стра́нную бо ре́вность имѣ́я, дѣ́йствіемъ нра́въ стяжа́лъ еси́. Тѣ́мже Вы́шній сы́й, съ вы́шними ли́ки вселя́емь, моли́ся, богови́дче, Сло́ву, Христу́ Бо́гу на́шему, дарова́ти на́мъ ве́лію ми́лость.

И ны́нѣ, богоро́диченъ: О, чудесе́ но́ваго!..

Тропа́рь, гла́съ 1:

Христо́ва тя́ сро́дника, о Іу́до, вѣ́дуще и му́ченика тве́рда, свяще́нно восхваля́емъ, пре́лесть попра́вша и вѣ́ру соблю́дша. Тѣ́мже, дне́сь всесвяту́ю твою́ па́мять пра́зднующе, грѣхо́въ разрѣше́ніе моли́твами твои́ми пріе́млемъ.


НА УТРЕНИ,
На Бо́гъ Госпо́дь: Тропа́рь апо́стола, два́жды. Сла́ва, и ны́нѣ, [богоро́диченъ]: Гавріи́лу вѣща́вшу...

По 1-й каѳи́смѣ сѣда́ленъ, гла́съ 2:

Улови́въ язы́ки апо́столъ сла́вный и научи́въ концы́ земны́я Тебѣ́ кла́нятися со Отце́мъ и Ду́хомъ, Христе́ Бо́же, того́ ра́ди утверди́ Це́рковь Твою́ и вѣ́рнымъ низпосли́ благослове́ніе Твое́, еди́не Ми́лостиве и Человѣколю́бче. [Два́жды.]

Сла́ва, и ны́нѣ, богоро́диченъ:

Боже́ственнаго естества́ о́бщницы бы́хомъ Тобо́ю, Богоро́дице Приснодѣ́во: Бо́га бо на́мъ воплоще́нна родила́ еси́. Тѣ́мже Тя́ по до́лгу вси́ благоче́стно велича́емъ.

По 2-й каѳи́смѣ сѣда́ленъ, гла́съ 4:

Лучу́, я́ко со́лнце, пра́вды испусти́ тя́ Христо́съ просвѣти́ти всю́ зе́млю, апо́столе сла́вне Іу́до: боже́ственными твои́ми моли́твами озаря́еши и боже́ственнымъ свѣ́томъ невече́рнимъ всѣ́хъ просвѣща́еши, вѣ́рою соверша́ющихъ святу́ю па́мять твою́. [Два́жды.]

Сла́ва, и ны́нѣ, богоро́диченъ:

Упова́ніе непосты́дное надѣ́ющихся на Тя́, еди́на, ро́ждшая па́че естества́ пло́тію Христа́, Бо́га на́шего, Того́ со святы́ми апо́столы моли́, пода́ти вселе́ннѣй очище́ніе прегрѣше́ній и всѣ́мъ на́мъ пре́жде конца́ житія́ исправле́ніе.

По поліеле́и сѣда́ленъ, гла́съ 8. Подо́бенъ: Прему́дрости.

Мре́жею сло́ва возве́дъ изъ глубины́ неразу́мія боголѣ́пно, язы́ки приве́лъ еси́ вѣ́рою и, я́ко исто́чникъ сы́й во́дъ духо́вныхъ, вселе́нную всю́ напои́лъ еси́ благода́тію. Тѣ́мже и спа́сшіися тобо́ю, богогла́се, я́ко дру́га тя́ бли́жняго Христо́ва ублажа́емъ, апо́столе Іу́до, вопію́ще ти́: моли́ Христа́ Бо́га согрѣше́ній оставле́ніе дарова́ти чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Небе́сная пою́тъ Тя́, [Обра́дованная, Ма́ти Безневѣ́стная, и мы́ славосло́вимъ неизслѣ́дованное Твое́ рождество́, Богоро́дице, моли́ спасти́ся душа́мъ на́шимъ].

Степе́нна, 1-й антифо́нъ 4-го гла́са. Проки́менъ, гла́съ 4: Во всю́ зе́млю изы́де вѣща́ніе и́хъ,* [и въ концы́ вселе́нныя глаго́лы и́хъ]. Сти́хъ: Небеса́ повѣ́даютъ сла́ву Бо́жію, [творе́ніе же руку́ Его́ возвѣща́етъ тве́рдь]. Вся́кое дыха́ніе... Ева́нгеліе Іоа́нна, зача́ло 67.

По 50-мъ псалмѣ́ стихи́ра, гла́съ 1:

Во всю́ зе́млю изы́де твое́ спаси́тельное вѣща́ніе, богови́дче апо́столе, и просвѣти́ ду́ши заблу́ждшія, и Христу́ приведе́ человѣ́ки, просвѣще́нныя благода́тію. Тѣ́мже моли́ дарова́ти душа́мъ на́шимъ ми́ръ и ве́лію ми́лость.

Кано́нъ Богоро́дицы со ирмосо́мъ на 6 и апо́стола на 8, его́же краегране́сіе: Пѣ́ти Іу́ду богови́дца тщу́ся. Творе́ніе Ѳеофа́ново, гла́съ 5.

Пѣ́снь 1.

Ирмо́съ: Коня́ и вса́дника въ мо́ре Чермно́е сокруша́яй бра́ни, мы́шцею высо́кою, Христо́съ истрясе́, Изра́иля же спасе́, побѣ́дную пѣ́снь пою́ща.

Таи́нниче небе́сныхъ, Іу́до всему́дре, учениче́ Спа́совъ и о́бщниче и́стинныя жи́зни, язы́къ мо́й подви́гни и сло́во упра́ви на пѣ́ніе твое́, всеблаже́нне.

Влекíй Спа́совъ яре́мъ, апо́столе, и бразду́ сѣкíй, и обновля́я благода́тію, сѣ́мя сѣ́ялъ еси́ и мно́гъ пло́дъ прине́слъ еси́ Призва́вшему, пресла́вне.

Сло́ва вопло́щшагося обрѣ́тъ Учи́теля и Сего́, богови́дче, луча́ми просвѣща́емь, бы́лъ еси́ свѣ́тъ вторы́й, Пе́рваго сія́ньми сообразу́яся, досточу́дне.

Богоро́диченъ: Вѣ́ра да повѣ́дуется то́кмо, а не сказа́ніе, е́же па́че ума́ чуде́съ, Богороди́тельнице Пречи́стая, Непостижи́маго Бо́га Сло́ва родила́ еси́, оболче́на въ человѣ́чество.

Катава́сія по уста́ву.

Пѣ́снь 3.

Ирмо́съ: Водрузи́вый на ничесо́мже зе́млю повелѣ́ніемъ Твои́мъ, и повѣ́сивши неодержи́мо тяготѣ́ющую, на недви́жимѣмъ, Христе́, ка́мени за́повѣдей Твои́хъ, Це́рковь Твою́ утверди́, Еди́не Бла́же и Человѣколю́бче.

Взя́тся учени́къ Христо́выхъ благолѣ́піе превы́ше вся́каго вели́чества: сíи бо бы́ша Ему́ дру́зи же и сво́йственніи, и сро́дницы, и соснѣ́дницы, и та́инъ сказа́тели.

Іу́до, бра́тія твоя́ тя́ похваля́ютъ, бра́та я́вльшася и непщу́ема я́вльшагося пло́тію Сло́ва Превѣ́чнаго, отъ Присносу́щнаго возсія́вшаго, отъ нерожде́на Роди́теля.

Умертви́въ на земли́ твоя́ у́ды, пожи́лъ еси́ съ жи́знію всѣ́хъ Христа́, пребога́те, и живоно́сныя жи́зни все́й вселе́ннѣй провозвѣ́стникъ ты́ бы́лъ еси́, глаго́лы живо́тныя проповѣ́дая.

Богоро́диченъ: Се́ Ты́ па́че всѣ́хъ, Чи́стая, ублажи́лася еси́, превозшла́ еси́ всѣ́хъ свя́тостію, всѣ́хъ превознесла́ся еси́ и всѣ́хъ яви́лася вы́шши небе́сныхъ си́лъ, Ма́ти Бо́жія бы́вши.

Конда́къ, гла́съ 2. Подо́бенъ: Вы́шнихъ ища́.

Па́влу я́влься собесѣ́дникъ, апо́столе, съ си́мъ на́мъ про́повѣдь возвѣсти́лъ еси́ Боже́ственныя благода́ти, тайноглаго́льниче Іу́до блаже́нне. Сего́ ра́ди вопіе́мъ ти́: не преста́й моля́ся о всѣ́хъ на́съ.

Сѣда́ленъ, гла́съ 8. Подо́бенъ: Прему́дрости.

Ро́ждшагося Влады́ки и бра́та бы́вша всѣ́мъ избра́ннымъ, Іу́до блаже́нне, бра́тъ бы́лъ еси́ и отъ Него́ апо́столъ во вся́ концы́ посла́лся еси́, прему́дре, сло́во вѣ́ры всѣ́мъ всѣва́я и просвѣща́я во тмѣ́ невѣ́дѣнія рабо́тающія лука́вому міроде́ржцу. Сего́ ра́ди вопіе́мъ ти́: моли́ Христа́ Бо́га грѣхо́въ оставле́ніе дарова́ти чту́щимъ любо́вію святу́ю па́мять твою́. [Два́жды.]

Сла́ва, и ны́нѣ пра́здника или́ богоро́диченъ:

Яко Всенепоро́чная Невѣ́сто Творцу́, я́ко неискусому́жная Ма́ти Изба́вителю, прія́телище я́ко су́щи Утѣ́шителя, Препѣ́тая, беззако́нію мя́ су́ща скве́рное оби́телище и бѣсо́мъ игра́лище въ ра́зумѣ бы́вша, потщи́ся отъ тѣ́хъ злодѣ́йства мя́ изба́вити и свѣ́тлое жили́ще добродѣ́телей соверши́, Свѣтоно́сная, Нетлѣ́нная, отжени́ о́блакъ страсте́й и Вы́шняго прича́стія сподо́би и Свѣ́та невече́рняго моли́твами Твои́ми.

Пѣ́снь 4.

Ирмо́съ: Боже́ственное Твое́ разумѣ́въ истоща́ніе прозорли́во, Авваку́мъ, Христе́, со тре́петомъ вопія́ше Тебѣ́: во спасе́ніе люде́й Твои́хъ, спасти́ пома́занныя Твоя́ прише́лъ еси́.

Вели́кій Спа́совъ апо́столъ явле́нія Ду́ха сподо́бленъ и возлю́бленъ бы́сть, зрѣ́нія Его́ зарю́ и добро́ту ви́дѣвъ.

Благода́ти сы́й испо́лненъ и даро́въ, отъ Бо́га пода́нныхъ, апо́столе, на спаси́тельное приста́нище тя́ пѣсносло́вящія наставля́й.

Си́лою непобѣди́мою Ду́ха Пресвята́го огражда́емь, служи́телю неизрече́нныхъ, лука́вствія отгоня́еши ду́хи сло́вомъ благода́ти.

Богоро́диченъ: Несказа́нно заче́нши, Всенепоро́чная, Творца́ Твоего́ и Бо́га, моли́ спасти́ ны отъ бѣ́дъ и душе́вное спасе́ніе пода́ти пою́щимъ Тя́, Влады́чице.

Пѣ́снь 5.

Ирмо́съ: Одѣя́йся свѣ́томъ, я́ко ри́зою, къ Тебѣ́ у́тренюю и Тебѣ́ зову́: ду́шу мою́ просвѣти́ омраче́нную, Христе́, я́ко Еди́нъ Благоутро́бенъ.

Зако́на оста́вль сѣ́ни, и́стины о́бразъ свѣ́тло проповѣ́далъ еси́, са́мую и́стину стяжа́въ наста́вника.

Сло́ва повелѣ́ніе исполня́я, апо́столе, язы́ки вся́, уче́ніи твои́ми науча́я, обте́клъ еси́, и си́хъ крестя́ Тро́ическимъ призыва́ніемъ.

До́ждь небе́сный, я́ко роса́ свы́ше, боже́ственное вѣща́ніе твое́, богопроповѣ́дниче, мглу́ разори́ многобо́жія еди́наго Бо́га проповѣ́даніемъ.

Богоро́диченъ: Умертви́ стра́сти моя́, Богороди́тельнице, и ду́шу мою́, умерщвле́нную грѣхо́вными сластьми́, возста́ви, Ма́ти и́стиннаго Воскресе́нія.

Пѣ́снь 6.

Ирмо́съ: Неи́стовствующееся бу́рею душетлѣ́нною, Влады́ко Христе́, страсте́й мо́ре укроти́ и отъ тли́ возведи́ мя, я́ко Благоутро́бенъ.

Видѣ́нія уче́ніемъ, житія́ дѣя́ньми свѣ́тло, Христо́въ апо́столе, сія́я, су́щія во глубинѣ́ невѣ́дѣнія просвѣти́лъ еси́.

Посыла́еши всѣ́мъ человѣ́комъ свѣ́тлое и уче́нія Ду́ха испо́лнено посла́ніе, священноявле́нне пречу́дне.

Богови́децъ вѣща́етъ небе́сная, я́коже слове́сную нѣ́кую Бо́жію сла́ву повѣ́дая на́съ ра́ди пло́тію Явльшагося и чудесы́.

Богоро́диченъ: Пресвята́я Влады́чице Богома́ти, изба́ви мя́ тли́ и страсте́й смуще́ніе утоли́, я́же исто́чникъ безстра́стія ро́ждшая.

Конда́къ, гла́съ 2. Подо́бенъ: Тве́рдыя.

Тве́рдымъ умо́мъ избра́нъ учени́къ ты́ яви́лся еси́ и сто́лпъ необори́мь Це́ркве Христо́вы, язы́комъ проповѣ́далъ еси́ сло́во Христо́во, вѣ́ровати, глаго́ля, во Еди́но Божество́; отъ Него́же просла́вився, прія́лъ еси́ да́ръ исцѣле́ній, цѣли́ти неду́ги притека́ющихъ къ тебѣ́, апо́столе Іу́до всехва́льне.

Икосъ:

Истиннаго благоче́стія проповѣ́дника и держа́внаго и́стины побо́рника досто́йно восхва́лимъ, я́ко подо́бника Христу́ и свидѣ́теля: стра́сти бо Его́ на тѣ́лѣ му́жески прія́тъ, я́ко учени́къ Словесе́ и апо́столъ, Іу́до всехва́льный.

Пѣ́снь 7.

Ирмо́съ: Превозноси́мый отце́въ Госпо́дь, пла́мень угаси́, о́троки ороси́, согла́сно пою́щія: Бо́же, благослове́нъ еси́.

Богови́дна ссу́щіемъ Божества́ бы́вша, вси́ Іу́ду воспое́мъ, согла́сно пою́ще: Бо́же, благослове́нъ еси́.

Духодви́жимый и богодухнове́нный язы́къ тво́й мíръ обрати́ Христо́вымъ проповѣ́даніемъ, Ему́же вси́ пое́мъ: Бо́же, благослове́нъ еси́.

Дае́тъ тебѣ́ небе́сное наслѣ́діе Госпо́дь и престо́лъ пресвѣ́телъ, на не́мже почива́я, боже́ственнѣ пое́ши: Бо́же, благослове́нъ еси́.

Богоро́диченъ: Усты́ и ра́зумомъ Тя́ Богоро́дицу Влады́чицу проповѣ́дуемъ, веселя́щеся: Бо́га бо родила́ еси́, Ему́же вси́ пое́мъ: Бо́же, благослове́нъ еси́.

Пѣ́снь 8.

Ирмо́съ: Тебѣ́, Вседѣ́телю, въ пещи́ о́троцы, всемíрный ли́къ спле́тше, поя́ху: дѣла́ вся́кая, Го́спода по́йте и превозноси́те во вся́ вѣ́ки.

Бога́тство язы́къ и царе́й по́честь, благозва́ніе воспрія́лъ еси́, вопія́, апо́столе: вся́ дѣла́ Госпо́дня, Го́спода по́йте и превозноси́те во вся́ вѣ́ки.

Всю́ зарю́ Утѣ́шителеву, блаже́нне, прія́лъ еси́ соше́дшую, зовы́й, сла́вне: вся́ дѣла́ Госпо́дня, Го́спода по́йте и превозноси́те во вся́ вѣ́ки.

Ве́щи тлѣ́нныя возненави́дѣвъ, небе́сныхъ сла́ву произво́лилъ еси́, пребыва́ющую вѣ́дый, апо́столе, тѣ́мже вопія́лъ еси́: вся́ дѣла́ Госпо́дня, Го́спода по́йте и превозноси́те во вся́ вѣ́ки.

Богоро́диченъ: Пріиди́те, добро́ту Іа́ковлю воспои́мъ, Марíю Пречи́стую, согла́сно пою́ще: вся́ дѣла́ Госпо́дня, Го́спода по́йте и превозноси́те во вся́ вѣ́ки.

Пѣ́снь 9.

Ирмо́съ: Иса́іе, лику́й, Дѣ́ва имѣ́ во чре́вѣ и роди́ Сы́на Емману́ила, Бо́га же и Человѣ́ка, Восто́къ и́мя Ему́, Его́же велича́юще, Дѣ́ву ублажа́емъ.

Облиста́вся, сла́вне, свѣтоли́тій Ду́ха заре́ю, чуде́съ блиста́нія па́че естества́ всѣ́мъ испуща́еши, я́ко учени́къ Емману́илевъ, Его́же велича́юще, тя́, богови́дче, ублажа́емъ.

Со а́нгельскими чи́нми предстоя́ще, богови́дніи самови́дцы и зри́тели Единоро́днаго, пло́тію обнища́вшаго на́съ ра́ди, Сего́ прилѣ́жно ны́нѣ моли́те спасти́ ду́ши на́ша.

Богоро́диченъ: Яко ро́ждши, Пречи́стая, тва́ри Содѣ́теля, по всему́ Роди́теля но́сиши нача́ло, несравни́тельно имѣ́я прія́тіе и превознесе́нно. Тѣ́мже Рождеству́ Твоему́ покланя́ющеся, Тя́ прославля́емъ.

Свѣти́ленъ. Подо́бенъ: Ду́хомъ во святи́лищи.

Тече́ніе кра́сныхъ твои́хъ но́гъ, Іу́до апо́столе, возврати́въ къ ше́ствію небе́сному, возше́лъ еси́, ра́дуяся, и, Тро́ицѣ предста́въ, во Отцѣ́ ви́диши Сы́на и Ду́ха Боже́ственнаго. Сего́ ра́ди вѣ́рою пресвяще́нную твою́ и боже́ственную пра́зднуемъ па́мять. [Два́жды.]

Сла́ва, и ны́нѣ, богоро́диченъ:

Стра́шнаго испыта́нія воспомина́ю ча́съ, мно́жество зо́лъ дѣ́лъ мои́хъ ужаса́етъ и устраша́етъ мя́, но уще́дри, Пречи́стая, те́плою Твое́ю моли́твою и да́ждь ми́ спасе́ніе: ели́ка бо хо́щеши, мо́жеши.

На хвали́техъ стихи́ры на 4, гла́съ 5. Подо́бенъ: Преподо́бне о́тче.

Манове́ніемъ боже́ственнымъ повину́яся, преблаже́нне,* воплоще́нное Сло́во всѣ́мъ проповѣ́далъ еси́,* на́мъ уподо́бльшася безъ преложе́нія,* Сего́ бы́въ че́стенъ учени́къ,* Сему́ бы́въ бра́тъ по пло́ти,* Того́ сла́вы сподо́блься,* я́ко чи́стъ, зрѣ́ти боже́ственнымъ умо́мъ.* Тѣ́мже почита́емъ тя́, Іу́до богогла́се,* и па́мять твою́ соверша́емъ,* вѣ́рно вопію́ще ти́:* Христа́ моли́ всегда́* дарова́ти вселе́ннѣй единомы́сліе,* ми́ръ и ве́лію ми́лость. [Два́жды.]

Го́ру, иска́пающую сла́дость боже́ственнаго ра́зума,* апо́столе Іу́до, тя́ имену́емъ;* ми́рную рѣку́, устреми́вшуюся отъ духо́вныхъ невеще́ственныхъ исто́чникъ,* и безбо́жія изсуша́ющую моря́,* и напоя́ющую та́йно благочести́выхъ сердца́ и помышле́нія;* трубу́ доброгла́сну, глася́щую Сло́ва Боже́ственное явле́ніе,* мíръ избавля́юща.* Его́же ны́нѣ моли́, Ему́же помоли́ся всегда́* дарова́ти вселе́ннѣй единомы́сліе,* ми́ръ и ве́лію ми́лость.

Блаже́нне Іу́до,* бра́тія твоя́ тя́ восхвали́ша,* Бо́жія бра́та я́вльшася* и бы́вша Ду́ха прія́телище боголѣ́пно.* Его́же свѣтлостьми́ чи́сто просвѣ́щся,* у́гль яви́лся еси́, ле́сть попаля́я,* вѣ́рныя же вся́ просвѣща́я чи́стыхъ уче́ній сія́ньми.* Тѣ́мже почита́емъ тя́,* я́ко незаходи́мую денни́цу,* и соверша́емъ твою́ па́мять святу́ю,* вѣ́рно вопію́ще ти́:* Христа́ моли́ всегда́* дарова́ти вселе́ннѣй единомы́сліе,* ми́ръ и ве́лію ми́лость.

Сла́ва, гла́съ 2:

Оста́вивъ земна́я, послѣ́довалъ еси́ Христу́ и, зна́менався дохнове́ніемъ Свята́го Ду́ха, по́сланъ бы́въ отъ Него́ въ язы́ки поги́бшія обраща́ти человѣ́ки во свѣ́тъ богоразу́мія, апо́столе Іу́до, и, сконча́въ по́двиги боже́ственныя твоея́ стра́сти и му́къ разли́чныхъ, ду́шу твою́ Христу́ пре́далъ еси́. Того́ моли́, всеблаже́нне, дарова́ти на́мъ ве́лію ми́лость.

И ны́нѣ, [богоро́диченъ]: Спаси́ отъ бѣ́дъ...
Славосло́віе вели́кое. [Ектеніи́] и отпу́стъ.



НА ЛИТУРГІИ,

Блаже́нна апо́стола, пѣ́снь 3-я и 6-я. Проки́менъ, гла́съ 8: Во всю́ зе́млю изы́де вѣща́ніе и́хъ* [и въ концы́ вселе́нныя глаго́лы и́хъ]. Сти́хъ: Небеса́ повѣ́даютъ сла́ву Бо́жію, [творе́ніе же руку́ Его́ возвѣща́етъ тве́рдь]. Апо́столъ [въ посла́ніи Іу́диномъ], зача́ло 77. Аллилу́ія, гласъ 1: Исповѣ́дятъ небеса́ чудеса́ [Твоя́, Го́споди, и́бо и́стину Твою́ въ це́ркви святы́хъ. Сти́хъ: Бо́гъ прославля́емь въ совѣ́тѣ святы́хъ]. Ева́нгеліе отъ Іоа́нна, зача́ло 48. Прича́стенъ: Во всю́ зе́млю изы́де вѣща́ніе и́хъ и въ концы́ вселе́нныя глаго́лы и́хъ.

Источникъ: Минíа, мѣ́сяцъ Іу́ній. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 117 – 123.

/ Къ оглавленію раздѣла /


Наверхъ / Къ титульной страницѣ

0