Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 21 октября 2017 г. Сейчасъ на порталѣ посѣтителей - 19.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́лія въ 18-й де́нь.
Свята́го му́ченика Лео́нтія.

[ВЕЧЕРЪ,]
Стихи́ры, гла́съ 8. Подо́бенъ: Что́ вы́ нарече́мъ.

Что́ тя, страстоте́рпче, пронарече́мъ?* Во́ина Христо́ва, я́ко погуби́теля враго́въ;* царя́ страсте́й, я́ко благоче́стія страда́льца;* пита́теля а́лчущихъ, я́ко нищелю́бца;* пра́ведника, я́ко рачи́теля небому́дренна.* Разли́чная твоя́ страда́нія,* свѣтлѣ́йша боре́нія.* Моли́ спасти́ся душа́мъ на́шимъ.

Кто́ не почуди́тся тебѣ́, Лео́нтіе?* Яко все́льника пріе́мъ нетлѣ́нія исто́чника,* рѣ́ки благодѣя́нія источа́еши вѣ́рнымъ* и всѣ́мъ безме́здно* незави́стна приноша́еши, жа́ждущимъ дарова́нія,* весели́ши же причаща́ющіяся* вода́мъ бла́гости.* Моли́ спасти́ся душа́мъ на́шимъ.

Сла́ва, гла́съ 1:

Страстоте́рпче Лео́нтіе прехва́льне, отъ любве́ Христо́вы тя́ ни о́гнь, ни ра́ны, ни ме́чь отлучи́ти возмого́ша, но, му́жески пострада́въ посреди́ мучи́телей, и́дольскія же́ртвы разори́лъ еси́, богому́дре, и ны́нѣ, вѣнцено́сче, лику́еши на небесѣ́хъ. Прилѣ́жно моли́ о душа́хъ на́шихъ.

Крестобогоро́диченъ. Подо́бенъ: Небе́сныхъ чино́въ.

У Креста́ предстоя́щи Сы́на и Бо́га Твоего́* и долготерпѣ́ніе Того́ смотря́ющи,* глаго́лаше, пла́чущи, Ма́ти Чи́стая:* увы́ Мнѣ́, Ча́до сладча́йшее,* что́ сія́ стра́ждеши непра́ведно, Сло́ве Бо́жій,* да спасе́ши человѣ́чество?

На стихо́внѣ окто́иха. Сла́ва, гла́съ 4:

Да весели́тся не́бо дне́сь свѣ́тло и земля́ да ра́дуется вѣ́рно въ па́мять му́ченика Лео́нтія, и́бо наста́вшій де́нь не же́ртвами безслове́сными, но же́ртвою хвалы́ отъ цвѣте́цъ духо́вныхъ вѣнчава́ется: укра́шенъ бо, съ на́ми предстоя́, безкро́вну слу́жбу Вѣнцеда́вцу принося́, мольбу́ прино́ситъ свѣ́тло во дворы́ ра́йскія дости́гнути вѣ́рно творя́щимъ па́мять его́.

Крестобогоро́диченъ. Подо́бенъ: Яко до́бля.

Распина́ема Христа́ Человѣколю́бца ви́дящи Пречи́стая* и ре́бра ископава́ема копіе́мъ,* пла́чущи, вопія́ше:* что́ сіе́, Сы́не Мо́й?* Что́ Ти безблагода́тніи лю́діе возда́ша,* за я́же сотвори́лъ еси́ до́брая и́мъ,* и тщи́шися безча́дствовати Мя́, Вселю́безнѣйшій?* Удивля́юся, Благоутро́бне,* Твоему́ во́льному распя́тію.

Тропа́рь, гла́съ 4:

Му́ченикъ Тво́й, Го́споди, Лео́нтій во страда́ніи свое́мъ вѣне́цъ прія́тъ нетлѣ́нный отъ Тебе́, Бо́га на́шего: имѣ́яй бо крѣ́пость Твою́, мучи́телей низложи́, сокруши́ и де́моновъ немощны́я де́рзости. Того́ моли́твами спаси́ ду́ши на́ша.


[НА УТРЕНИ,]
Канонъ, твореніе Іоанна монаха, гласъ 4.

Пѣ́снь 1.

Ирмо́съ: Воспою́ Тебѣ́, Го́споди Бо́же мо́й, я́ко изве́лъ еси́ лю́ди изъ рабо́ты еги́петскія, покры́лъ же еси́ колесни́цы фарао́новы и си́лу.

Зако́нъ похва́льныхъ добродѣ́тель твоя́ не отпа́даетъ, Христо́въ уго́дниче Лео́нтіе: То́й бо е́сть тебѣ́ похвала́ и бога́тство неотъе́млемо.

Жела́я, блаже́нне, пачеесте́ственныхъ, нескве́рну ду́шу, дѣ́вствомъ же тѣ́ло украси́въ, къ Вы́шнему пути́ благолѣ́пно устро́илъ еси́.

Держа́ву взя́лъ еси́ на пре́лесть, му́ченическую че́сть хваля́, преподо́бне, сла́вный Лео́нтіе, при́сно тебѣ́ жела́емаго.

Богоро́диченъ: Тебѣ́ вси́ притека́емъ, Богоро́дице, я́ко Побо́рницѣ тве́рдѣй, на мольбу́ дви́жуще, изба́вити ста́до Твое́ отъ вся́каго обстоя́нія.

Пѣ́снь 3.

Ирмо́съ: Лу́къ си́льныхъ изнемо́же, и немощству́ющіи препоя́сашася си́лою, сего́ ра́ди утверди́ся въ Го́сподѣ се́рдце мое́.

Обы́чай благоукра́шенъ и му́дрость, благода́ть же отъ Бо́га стяжа́въ, Лео́нтіе, яви́лся еси́ и́стинный страда́лецъ и му́ченикъ изря́денъ.

Возложи́те ду́ши живо́му Бо́гу, — твои́мъ сво́инникомъ приглаша́лъ еси́, Лео́нтіе, — Царю́ же, вѣ́чно пребыва́ющему, во́инствуйте.

Источи́ благоче́стія глаго́лы медото́чный и боголюбе́зный язы́къ тво́й, рабы́ же нече́стія, ху́льники, низлага́ше.

Богоро́диченъ: Ра́дуйся, Ма́ти Неискусобра́чная, Бо́га Сло́ва во утро́бѣ Твое́й вмѣсти́вшая и ро́ждшая воплоще́ннаго, я́ко Бо́га вку́пѣ и Человѣ́ка.

Сѣда́ленъ, гла́съ 4. Подо́бенъ: Ско́ро предвари́.

Кре́стъ, я́коже ору́жіе, воспріе́мъ, къ боре́нію отлучи́лся еси́ неви́димыхъ враго́въ, до́блественнѣ же пострада́лъ еси́. Тѣ́мже, потреби́въ си́лу и́хъ, возме́здіе прія́лъ еси́, чуде́съ благода́ть, моля́ спасти́ся на́мъ, му́чениче Лео́нтіе пресла́вне.

Сла́ва, и ны́нѣ, богоро́диченъ:

Чи́стая, Всенепоро́чная и Неискусому́жная, Яже еди́на Безлѣ́тнаго Сы́на и Сло́ва Бо́жія въ лѣ́то ро́ждши, Сего́ со святы́ми и честны́ми патріа́рхи, и му́ченики, и проро́ки, и преподо́бными моли́ дарова́ти на́мъ очище́ніе и ве́лію ми́лость.

Крестобогоро́диченъ:

На Крестѣ́ Тя́ возвы́шена я́ко узрѣ́ Пречи́стая Ма́ти Твоя́, Сло́ве Бо́жій, ма́терски рыда́ющи, вѣща́ше: что́ но́вое и стра́нное сіе́ чу́до, Сы́не Мо́й? Ка́ко, Жи́знь всѣ́хъ, вкуша́еши сме́рти, оживи́ти ме́ртвыя хотя́, я́ко Милосе́рдъ?

Пѣ́снь 4.

Ирмо́съ: Небеса́ добродѣ́тель Твоя́ покры́ла е́сть, и земля́ испо́лнися сла́вы Твоея́, Христе́. Тѣ́мже вѣ́рно вопіе́мъ: сла́ва си́лѣ Твое́й, Го́споди.

Яростію де́монскою одержи́мый тя́, любо́вію боже́ственною содержи́маго, неми́лостивно ураня́ше, му́чениче страстоте́рпче Лео́нтіе.

Тя́ улови́ти и я́ти хотя́щему ко и́стинѣ де́рзостнѣ отвѣща́лъ еси́, я́ко блаже́нна претя́щаго непщу́я, му́чениче страстоте́рпче Лео́нтіе.

Иже на дре́вѣ тебе́ ра́ди пригвожде́йся пло́тію, на дре́вѣ тя́ свя́зана Его́ ра́ди зря́, крѣ́пости напо́лни и благода́ти.

Богоро́диченъ: Херуви́мскихъ чино́въ преиму́щая и Бо́га, на руку́ сѣдя́щаго, съ пло́тію носи́вшая, ра́дуйся, Богоро́дице Всепѣ́тая.

Пѣ́снь 5.

Ирмо́съ: Стяжа́вый ны́, избра́нныя лю́ди, кро́вію Твое́ю, Го́споди, Тво́й ми́ръ да́ждь на́мъ, во единомы́сліи сохраня́я ста́до Твое́.

Овча́, къ заколе́нію гото́во, приведе́ся, Лео́нтіе всесла́вне, мучи́тельскому суди́щу за Христа́ самово́льнѣ предста́лъ еси́.

Низложи́ти твоея́ души́ крѣ́пость покуша́шеся пре́лести пови́нный, распе́ншагося Го́спода, я́коже злодѣ́я человѣ́ка, уничижа́я.

Да поги́бнутъ бо́зи, зе́млю и не́бо я́вѣ не сотво́ршіи, распны́йся бо всѣ́хъ Содѣ́тель е́сть, — му́чениче, глаго́лалъ еси́.

Богоро́диченъ: Ра́дуйся, Пресвята́я, Чи́стая, Неискусобра́чная, Свята́я Марíе Богоневѣ́сто, я́ко Бо́га родила́ еси́, онебеси́вшаго ро́дъ на́шъ.

Пѣ́снь 6.

Ирмо́съ: Возопи́, прообразу́я погребе́ніе тридне́вное, проро́къ Іо́на, въ ки́тѣ моля́ся: отъ тли́ изба́ви мя́, Іису́се, Царю́ си́лъ.

Ти́хъ у́бо притека́ющимъ вѣ́рою, Лео́нтіе, и сло́во, растворе́но имы́й боже́ственною со́лію, же́стокъ же враго́мъ Христо́вымъ явля́лся еси́.

Ра́дуяся у́бо, вѣ́рный Тво́й ра́бъ Лео́нтій отдая́ше себе́ свидѣ́тельству Ца́рствія Твоего́, но не терпя́ху врази́ Твоея́, Христе́, и́стины.

Разжиза́хуся я́ростію, я́коже звѣ́ріе, беззако́нніи и ру́цѣ возлага́ху, я́ко на ло́въ, на му́ченика наше́дше, расто́ргнути неща́дно непобѣди́маго.

Богоро́диченъ: Не и́мамы, ра́звѣ Тебе́, засту́пницы, Пречи́стая, пою́щіи Пресвято́е Рождество́ Твое́, Влады́чице. Тѣ́мже мо́лимся: благопребы́тна сотвори́ Его́ рабо́мъ Твои́мъ.

Конда́къ, гла́съ 3. Подо́бенъ: Дѣ́ва дне́сь.

Мучи́телей посрами́лъ еси́ лука́вая кова́рства и е́ллиновъ обличи́лъ еси́ безбо́жное служе́ніе, возсія́лъ еси́ богоразу́мія всѣ́мъ человѣ́комъ уче́ньми благоче́стія, богому́дре му́чениче. Сего́ ра́ди твою́ па́мять почита́емъ любо́вію, прему́дре Лео́нтіе.

Икосъ:

Хода́тая Бо́гу и человѣ́комъ Го́спода, на́шу, земны́хъ, нищету́ пріе́мшаго отъ Неискусому́жныя Чи́стыя Богоро́дицы, и распе́ншася, и воздви́гша отъ тли́ человѣ́чество, призыва́ю дарова́ти, я́ко да му́драго Лео́нтія ны́нѣ восхвалю́ и повѣ́мъ свѣ́тлая его́ страда́нія и кра́сная, я́же показа́ до́брѣ, му́жествомъ, и вѣ́рою, и любо́вію вооруже́нъ; сего́ ра́ди почита́емъ любо́вію му́драго Лео́нтія.

Пѣ́снь 7.

Ирмо́съ: Спасы́й во огни́ авраа́мскія Твоя́ о́троки и халде́и уби́въ, я́же Пра́вда пра́ведно уловля́ше, препѣ́тый Го́споди, Бо́же оте́цъ на́шихъ, благослове́нъ еси́.

Тве́рдостію ра́зума, я́коже плѣне́нніи о́троцы, съ пла́менемъ искуше́ній и ле́сть попра́ Лео́нтій непобѣди́мый, поя́ Тебѣ́: Го́споди, Бо́же оте́цъ на́шихъ, благослове́нъ еси́.

Безпристра́стіемъ пло́ть забы́въ, крѣ́пко ра́ны за Христа́, я́ко непобѣди́мъ му́ченикъ, терпѣ́лъ еси́, поя́ Твоему́ Зижди́телю: Бо́же оте́цъ на́шихъ, благослове́нъ еси́.

Му́дростію и любо́вію Христо́вою, естества́ тве́рдо удержа́въ тлѣ́нное сопряже́ніе, живоно́сную произво́лилъ еси́ сме́рть, воспѣва́я, Лео́нтіе: Бо́же оте́цъ на́шихъ, благослове́нъ еси́.

Сло́ва и Ду́ха со Отце́мъ, еди́но Тріѵпоста́сное Естество́ богосло́вствуя, неукло́нный и непобѣди́мый му́ченикъ взыва́ше: препѣ́тый Го́споди, Бо́же оте́цъ на́шихъ, благослове́нъ еси́.

Богоро́диченъ: Безсѣ́менно во утро́бѣ и па́че естества́ пріе́мшую Непремѣ́ннаго Бо́га, за милосе́рдіе человѣ́комъ примѣ́шшася, благоче́стно воспое́мъ, я́ко Ма́терь Бо́жію во вѣ́ки.

Пѣ́снь 8.

Ирмо́съ: На Крестѣ́ пло́тію пригвожде́ннаго и показа́вшаго на́мъ ору́жіе во спасе́ніе, о́троцы, превозноси́те Христа́, Бо́га на́шего, во вѣ́ки.

Терпя́ше плотскíя ра́ны му́ченикъ и безпло́тнаго врага́ зѣло́ побѣжда́ше, поя́: превозноси́те Христа́ Бо́га на́шего во вѣ́ки.

Свѣ́тло у́мъ ко Влады́цѣ въ боде́ніихъ терно́вныхъ просте́рлъ еси́, любо́вію, му́чениче, — превозноси́те, — вопія́, — Христа́, Бо́га на́шего, во вѣ́ки.

Побѣ́да тебѣ́ Христо́съ е́сть, му́чениче, Его́же ра́нами плотски́ми просла́вилъ еси́, взыва́я: о́троцы, превозноси́те Христа́, Бо́га на́шего, во вѣ́ки.

Богоро́диченъ: Тя́ пресла́вно, о Богома́ти, ро́дове вси́ земнíи, Чи́стая, ублажа́емъ, я́ко Тобо́ю къ небеси́ вознесо́хомся, Дѣ́во Ма́ти.

Пѣ́снь 9.

Ирмо́съ: Рождество́ Твое́ нетлѣ́нно яви́ся: Бо́гъ изъ боку́ Твое́ю про́йде, я́ко плотоно́сецъ яви́ся на земли́ и съ человѣ́ки поживе́. Тя́, Богоро́дице, тѣ́мъ вси́ велича́емъ.

Тро́ицы служи́тель показа́лся еси́, послужи́въ, Лео́нтіе, непоро́чно, Ему́же вся́ колѣ́на покланя́ются небе́сныхъ, и земны́хъ, и преиспо́днихъ, Его́же пою́ще, досто́йно велича́емъ.

Ви́дѣти жела́я невеще́ственно лице́мъ открове́ннымъ Госпо́дню сла́ву, нача́лъ совлече́ся и власте́й, еди́но проповѣ́давъ Тріѵпоста́сное Божество́.

Возвесели́лся еси́ твои́мъ исповѣ́даніемъ и тебе́ исповѣ́да досто́йно предъ Отце́мъ Спа́съ, Его́же умоли́, страстоте́рпче, всѣ́мъ спасти́ся, вѣ́рою велича́ющимъ па́мять твою́.

Богоро́диченъ: Вы́шнихъ чино́въ вы́шши еси́, Дѣ́во Богоро́дице, я́ко еди́на позна́лася еси́ Вы́шняго селе́ніе, Благослове́нная. Тѣ́мже Тя́ вси́ Богоро́дицу возвѣща́емъ.

Свѣти́ленъ. Подо́бенъ: Не́бо звѣзда́ми.

Иску́шся, я́коже зла́то, огне́мъ и му́ками, досто́инъ яви́лся еси́ да́ръ Бо́га Вы́шняго, всесла́вне страстоте́рпче, о на́съ ны́нѣ помоли́ся.

[Сла́ва, и ны́нѣ,] богоро́диченъ:

Держа́внымъ Твои́мъ кро́вомъ отъ враго́въ навѣ́та на́съ, Чи́стая, Твоя́ рабы́, сохрани́ неврежде́ны: Тя́ бо стяжа́хомъ еди́ну прибѣ́жище въ ну́ждахъ.


НА ЛИТУРГІИ,

Проки́менъ, гласъ 7: Возвесели́тся пра́ведникъ о Го́сподѣ* [и упова́етъ на Него́]. Сти́хъ: Услы́ши, Бо́же, гла́съ мо́й, [внегда́ моли́тимися къ Тебѣ́]. Апо́столъ Дѣя́ній, зача́ло 29. Аллилу́ія, гла́съ 4: Пра́ведникъ я́ко фи́никсъ процвѣте́тъ, [я́ко ке́дръ, и́же въ Лива́нѣ, умно́жится. Сти́хъ: Насажде́ни въ дому́ Госпо́дни во дво́рѣхъ до́му Бо́га на́шего процвѣту́тъ]. Ева́нгеліе отъ Іоа́нна, зача́ло 52. Прича́стенъ: Въ па́мять вѣ́чную [бу́детъ пра́ведникъ, отъ слу́ха зла́ не убои́тся.]

Источникъ: Минíа, мѣ́сяцъ Іу́ній. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 113 об. – 117.

/ Къ оглавленію раздѣла /


Наверхъ / Къ титульной страницѣ

0