Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 26 iюня 2017 г. Сейчасъ на порталѣ посѣтителей - 21.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́нія въ 18-й де́нь.
Слу́жба Пресвятѣ́й Богоро́дицѣ, соверша́емая въ де́нь пра́зднества свято́й чудотво́рной Боголю́бской ико́нѣ Бо́жіей Ма́тери.

[НА ВЕЛИЦѢЙ ВЕЧЕРНИ,
Блаже́нъ му́жъ.., 1-й антифо́нъ.] На Го́споди воззва́хъ: стихи́ры на 8, гла́съ 4:

Тебѣ́ припа́даютъ, Госпоже́, святи́телей сосло́віе, ца́ріе же и кня́зи и ве́сь наро́дъ, уми́льно моля́щеся, и любе́зно цѣлу́ютъ Тво́й о́бразъ, Боголюби́вая, глаго́люще: чту́щій Тя́ гра́дъ всегда́ спаса́й отъ всѣ́хъ бѣ́дъ. [Два́жды.]

Боже́ственными дѣ́тельми соблюда́еши и покрыва́еши отъ вра́жіихъ нахожде́ній любо́вію пра́зднующія пресла́вное явле́ніе Твое́, Боголюби́вая, благовѣ́рному кня́зю Андре́ю, и зову́щія Ти́: Ты́ еси́ крѣ́пость на́ша и утвержде́ніе, и ра́дованіе боголѣ́пное. Ви́дя же Тя́, моля́щуюся о на́съ, и мы́ покланя́емся Сы́ну Твоему́ и Бо́гу на́шему и глаго́лемъ: Іису́се Всеси́льне, спаси́ ду́ши на́ша, я́ко Милосе́рдъ. [Два́жды.]

Дне́сь, священнособра́вшеся, восхва́лимъ Богоро́дицу: Пресвята́я Дѣ́во, мно́гая Твоя́ вели́чія и чуде́съ пучи́на, Ты́ бо еси́ на́мъ свя́тое огражде́ніе, и похвала́, и сла́ва, и исто́чникъ исцѣле́ній. Пра́зднующе свято́му Твоему́ о́бразу, Боголюби́вая, мо́лимся, глаго́люще: Іису́се Всеси́льне, спаси́ ду́ши на́ша, я́ко Милосе́рдъ.

Благоче́стно, Пречи́стая, честны́ми Твои́ми моли́твами огради́ и сохрани́ и стра́шны враго́мъ и нерабо́тны яви́ творя́щія пра́зднество Твоему́ о́бразу, Боголюби́вая, да Сы́ну Твоему́ зове́мъ: Іису́се Всеси́льне, спаси́ ду́ши на́ша, я́ко Милосе́рдъ.

Сла́ва, и ны́нѣ, гла́съ 8:

Пріиди́те, возра́дуемся держа́внѣй Засту́пницѣ ро́да на́шего, Цари́цѣ Богоро́дицѣ, пріиди́те, поклони́мся Ей въ чу́дномъ и почита́емомъ а́нгелы честно́мъ Ея́ о́бразѣ: да́руетъ бо Богоро́дица вѣ́рнымъ оби́льныя да́ры цѣле́бныя отъ неистощи́маго исто́чника святы́я ико́ны Боголю́бскія, искуше́ній, и бѣ́дъ, и вся́каго грѣха́ избавля́етъ на́съ, благоче́стно и богопрія́тно прославля́ющихъ и чту́щихъ свѣ́тлую ико́ну Ея́. Тѣ́мъ, воспѣва́юще, воззове́мъ Боголюби́вѣй: ра́дуйся, любе́зная вѣ́рнымъ Помо́щнице, во спасе́ніе ду́шъ на́шихъ.

Вхо́дъ. Проки́менъ дне́. И чте́нія три́ Богоро́дицы.

Бытія́ чте́ніе. [Глава́ 28.]

Изы́де Іа́ковъ отъ студенца́ кля́твеннаго и и́де въ Харра́нь. И обрѣ́те мѣ́сто, и спа́ та́мо, за́йде бо со́лнце; и взя́тъ отъ ка́менія мѣ́ста того́, и положи́ возгла́віе себѣ́, и спа́ на мѣ́стѣ о́номъ. И со́нъ ви́дѣ: и се́ лѣ́ствица утвержде́на на земли́, eя́же глава́ досяза́ше до небе́съ, и Ангели Бо́жіи восхожда́ху и низхожда́ху по не́й. Госпо́дь же утвержда́шеся на не́й, и рече́: Азъ Бо́гъ Авраа́мовъ, отца́ твоего́, и Бо́гъ Исаа́ковъ, не бо́йся: земля́, идѣ́же ты́ спи́ши на не́й, тебѣ́ да́мъ ю́ и сѣ́мени твоему́. И бу́детъ сѣ́мя твое́, я́ко песо́къ земны́й, и распространи́тся на мо́ре, и ли́ву, и сѣ́веръ, и на восто́ки, и возблагословя́тся о тебѣ́ вся́ колѣ́на земна́я и о сѣ́мени твое́мъ. И се́ Азъ съ тобо́ю, сохраня́яй тя́ на вся́комъ пути́, а́може а́ще по́йдеши, и возвращу́ тя́ въ зе́млю сію́, я́ко не и́мамъ тебе́ оста́вити, до́ндеже сотвори́ти Ми́ вся́, ели́ка глаго́лахъ тебѣ́. И воста́ Іа́ковъ отъ сна́ своего́, и рече́: я́ко éсть Госпо́дь на мѣ́стѣ се́мъ, а́зъ же не вѣ́дѣхъ. И убоя́ся, и рече́: я́ко стра́шно мѣ́сто сіе́, нѣ́сть сіе́, но до́мъ Бо́жій, и сія́ врата́ небе́сная.

Прoро́чества Іезекíилева чте́ніе. [Глава́ 43 и 44.]

Та́ко глаго́летъ Госпо́дь: бу́детъ отъ дне́ осма́го и про́чее, сотворя́тъ іере́и на олтари́ всесожже́нія ва́шего и я́же спасе́нія ва́шего, и пріиму́ вы́, глаго́летъ Адонаи́ Госпо́дь. И обрати́ мя́ на пу́ть вра́тъ святы́хъ внѣ́шнихъ, зря́щихъ на восто́ки, и сія́ бя́ху затворе́на. И рече́ Госпо́дь ко мнѣ́: врата́ сія́ затворе́на бу́дутъ, и не отве́рзутся, и никто́же про́йдетъ сквозѣ́ и́хъ, я́ко Госпо́дь Бо́гъ Изра́илевъ про́йдетъ и́ми, и бу́дутъ затворе́на. Яко игу́менъ ся́детъ въ ни́хъ снѣ́сти хлѣ́бъ: по пути́ ела́мскихъ вра́тъ вни́детъ, и по пути́ его́ изы́детъ. И введе́ мя́ по пути́ вра́тъ святы́хъ, су́щихъ къ сѣ́веру, пря́мо хра́му, и ви́дѣхъ, и се́ испо́лнь сла́вы хра́мъ Госпо́день.

При́тчей чте́ніе. [Глава́ 9.]

Прему́дрость созда́ себѣ́ до́мъ и утверди́ столпо́въ се́дмь. Закла́ своя́ же́ртвенная, и раствори́ въ ча́ши свое́й вино́, и угото́ва свою́ трапе́зу. Посла́ своя́ рабы́, созыва́ющи съ высо́кимъ проповѣ́даніемъ на ча́шу, глаго́лющи: и́же е́сть безу́менъ, да уклони́тся ко мнѣ́. И тре́бующимъ ума́ рече́: пріиди́те, яди́те мо́й хлѣ́бъ и пíйте вино́, е́же раствори́хъ ва́мъ. Оста́вите безу́міе, и жи́ви бу́дите, и взыщи́те ра́зума, да поживете́, и испра́вите ра́зумъ въ вѣ́дѣніи. Наказу́яй злы́я, пріи́метъ себѣ́ безче́стіе, облича́яй же нечести́ваго опоро́читъ себе́. Обличе́нія бо нечести́вому — ра́ны ему́. Не облича́й злы́хъ, да не возненави́дятъ тебе́, облича́й прему́дра, и возлю́битъ тя́. Да́ждь прему́дрому вину́, и прему́дршій бу́детъ, сказу́й пра́ведному, и приложи́тъ пріима́ти. Нача́ло прему́дрости — стра́хъ Госпо́день, и совѣ́тъ святы́хъ — ра́зумъ. Разумѣ́ти бо зако́нъ по́мысла е́сть блага́го: си́мъ бо о́бразомъ мно́гое поживе́ши вре́мя, и приложа́тся тебѣ́ лѣ́та живота́.

На литíи стихи́ры, гла́съ 6:

Небе́сный Царю́, Человѣколю́бче Го́споди, Долготерпѣли́ве и Многоми́лостиве, при́зри отъ свята́го жили́ща Твоего́, ви́ждь смире́ніе на́ше, ви́ждь и озлобле́ніе на́ше, и не я́ростію Твое́ю обличи́ши на́съ, ниже́ гнѣ́вомъ Твои́мъ нака́жеши на́съ, и не преда́ждь на́съ въ наше́ствіе язы́комъ или́ въ ру́ки враго́мъ, да не когда́ реку́тъ язы́цы: гдѣ́ е́сть Бо́гъ и́хъ? Мы́ же лю́діе Твои́ и о́вцы па́жити Твоея́ и и́мя Твое́ призыва́емъ. Имаши есте́ственную бла́гость Твою́, сего́ ра́ди покрыва́й гра́дъ се́й [или́ оби́тель сію́]. Имаши Приснодѣ́ву моли́твенницу, ро́ждшую Тя́, Сло́ве Бо́жій, и́маши ли́къ апо́столовъ и мно́жество му́чениковъ и преподо́бныхъ, пріими́ моле́ніе и́хъ о лю́дехъ согрѣ́шшихъ и отча́янныхъ и спаси́, Незло́биве, достоя́ніе Твое́.

Гла́съ 3:

Пріиди́те, вси́ концы́ земли́, честно́му о́бразу Бо́жія Ма́тере поклони́мся: Та́ бо, ру́цѣ къ Сы́ну воздѣ́ющи, мо́лится о на́съ и Тоя́ святы́мъ о́бразомъ на́ша страна́ оживлена́ бы́сть. Мы́ же, псалмы́ и пѣ́сньми духо́вными поя́ Ей со всѣ́ми святы́ми, пра́зднуемъ дне́сь свѣ́тло.

Вельми́ добро́тою украси́ Тя́ Бо́гъ, я́ко человѣ́комъ Свѣ́тъ даде́ на руку́ Твое́ю, Боголюби́вая; Ты́ же, въ сія́ніи Его́ су́щи, упова́ніе христіа́номъ, Помо́щница и́мъ въ ну́ждахъ и ско́рбехъ, Боголюби́вая, и приста́нище тружда́ющимся, моли́ изба́витися на́мъ отъ напа́стей, любо́вію пою́щимъ Тя́ и моля́щимся всечестно́му Твоему́ о́бразу, Боголюби́вая.

Сла́ва, и ны́нѣ, гла́съ 8:

Тя́ мо́лимъ, Предста́тельницу на́шу, Пречи́стая Боголюби́вая, одержи́ми печа́льми, не оста́ви до конца́ поги́бнути рабо́мъ Твои́мъ, но ускори́ изъя́ти на́съ отъ настоя́щаго гнѣ́ва и ско́рби. О, Пресвята́я Дѣ́во Чи́стая, Ты́ бо еси́ на́мъ стѣна́ и по́мощь, Боголюби́вая.

На стихо́внѣ стихи́ры, гла́съ 8:

Ра́дуйся, Богоро́дице Всепѣ́тая; ра́дуйся, исто́чниче живота́ вѣ́рнымъ, притека́ющимъ къ Тебѣ́; ра́дуйся, всѣ́хъ Влады́чице, Госпоже́ тва́ри, Благослове́нная; ра́дуйся, Всенепоро́чная и Препросла́вленная; ра́дуйся, пала́то; ра́дуйся Боже́ственное селе́ніе; ра́дуйся, Всепречи́стая; ра́дуйся Ма́ти Дѣ́во, ра́дуйся, Боголюби́вая.

Сти́хъ: Помяну́ и́мя Твое́ во вся́комъ ро́дѣ и ро́дѣ.

Ра́дуйся, Боголюби́вая Богоро́дице, Пречи́стая Ма́ти Христо́ва; ра́дуйся вѣ́рныхъ наде́ждо; ра́дуйся, мíра очище́ніе; ра́дуйся, вся́кія ско́рби избавля́ющая рабы́ Твоя́; ра́дуйся, человѣ́комъ утѣше́ніе живоно́сное; ра́дуйся, заступле́ніе призыва́ющимъ Тя́, Боголюби́вая; ра́дуйся, Бо́жіе пребыва́ніе и горо́ свята́я.

Сти́хъ: Слы́ши, Дщи́, и ви́ждь, и приклони́ у́хо Твое́.

Ра́дуйся, Боголюби́вая Богоро́дице, Пречи́стая Ма́ти Христо́ва; ра́дуйся, еди́на наде́жда человѣ́комъ и заступле́ніе; ра́дуйся, освяще́нная пала́то; ра́дуйся, прибѣ́жище; ра́дуйся, свѣти́льниче Свѣ́та свѣ́тлый; ра́дуйся, ра́ю; ра́дуйся, Боже́ственное селе́ніе; ра́дуйся, исто́чниче, источа́ющій во́ду жи́зни притека́ющимъ къ Тебѣ́, Боголюби́вая.

Сла́ва, и ны́нѣ, гла́съ 4:

Ты́ еси́, Богоро́дице, а́нгеловъ ра́дость; Ты́ еси́ человѣ́комъ сла́ва, Боголюби́вая; Ты́ вѣ́рнымъ наде́жда, Богоро́дице Всепѣ́тая, Предста́тельнице на́ша, и къ Тебѣ́ прибѣга́емъ во вся́кой ну́ждѣ, я́ко да моли́твами Твои́ми отъ стрѣ́лъ вра́жіихъ, и па́губы душетлѣ́нныя, и вся́кихъ скорбе́й изба́вимся вси́, воспѣва́ющіи Тя́, Боголюби́вая.

Тропа́рь, гла́съ 1:

Боголюби́вая Цари́це, Неискусому́жная Дѣ́во, Богоро́дице Марíе, моли́ за ны́ Тебе́ Возлюби́вшаго и ро́ждшагося отъ Тебе́ Сы́на Твоего́, Христа́ Бо́га на́шего, пода́ти на́мъ оставле́ніе прегрѣше́ній, мíрови ми́ръ, благопло́дію изоби́ліе, ИМПЕРАТОРУ на́шему [и́мярекъ] и наслѣ́дію ЕГО здра́віе, на враги́ же одолѣ́ніе. Па́стыремъ святы́ню и всему́ человѣ́чу ро́ду спасе́ніе. Гра́ды на́ша и страны́ Россíйскія отъ нахожде́нія иноплеме́нныхъ заступи́ и отъ междоусо́бныя бра́ни сохрани́. О, Ма́ти Боголюби́вая Дѣ́во! О, Цари́це Всепѣ́тая! Ри́зою Свое́ю покры́й на́съ отъ вся́каго зла́, отъ ви́димыхъ и неви́димыхъ вра́гъ защити́ и спаси́ ду́ши на́ша.


НА УТРЕНИ,
[На Бо́гъ Госпо́дь: Тропа́рь Богоро́дицы, два́жды. Сла́ва, и ны́нѣ, то́йже.]

По 1-й каѳи́смѣ сѣда́ленъ, гла́съ 5:

Пречи́стая Дѣ́во Боголюби́вая, поми́луй на́съ, прибѣга́ющихъ съ вѣ́рою къ Тебѣ́, Милосе́рдой, и прося́щихъ те́плаго заступле́нія Твоего́: мо́жеши бо, я́ко Блага́я, всѣ́хъ спасти́ и, я́ко Ма́ти Бо́га Вы́шняго, ма́терними Твои́ми моли́твами всегда́ избавля́еши чту́щихъ Тя́ отъ всѣ́хъ бѣ́дъ, Боголюби́вая.

Сла́ва, и ны́нѣ, то́йже.

По 2-й каѳи́смѣ сѣда́ленъ, гла́съ 1:

Ма́терь Тя́ Бо́жію мо́лимъ вси́ вои́стинну и къ щедро́тамъ Твои́мъ вопіе́мъ, любо́вію прибѣга́юще къ Твое́й бла́гости: Тя́ бо и́мамы, грѣ́шніи, засту́пницу, Боголюби́вая, и Тебе́ стяжа́хомъ въ напа́стехъ спасе́ніе, Еди́ну Пречи́стую.

Сла́ва, и ны́нѣ, то́йже.

Велича́ніе:

Велича́емъ Тя́, Пресвята́я Дѣ́во, и чте́мъ о́бразъ Тво́й святы́й, его́же благовѣ́рный кня́зь Андре́й даде́ на́мъ на враги́ въ побѣ́ду и всѣ́мъ вѣ́рнымъ во спасе́ніе.

Псало́мъ [избра́нный]: Ве́лій Госпо́дь, и хва́ленъ зѣло́...

По поліеле́и сѣда́ленъ, гла́съ 1:

Стена́ необори́мая на́мъ, христіа́номъ, еси́, Богоро́дице Дѣ́во, къ Тебѣ́ бо прибѣга́юще, невреди́мы пребыва́емъ и, па́ки согрѣша́юще, и́мамы Тя́ моли́твенницу, Боголюби́вая. Тѣ́мъ, благодаря́ще, вопіе́мъ Ти́: ра́дуйся, Благода́тная, Госпо́дь съ Тобо́ю.

Сла́ва, и ны́нѣ, то́йже.

[Степе́нна, 1-й антифо́нъ 4-го гла́са. Проки́менъ, гла́съ 4: Помяну́ и́мя Твое́* во вся́комъ ро́дѣ и ро́дѣ. Сти́хъ: Слы́ши, Дщи́, и ви́ждь, и приклони́ у́хо Твое́. Вся́кое дыха́ніе... Ева́нгеліе Луки́, зача́ло 4.]

По 50-мъ псалмѣ́ стихи́ра, гла́съ 6:

Не ввѣ́ри мя́ человѣ́ческому предста́тельству, [Пресвята́я Влады́чице, но пріими́ моле́ніе раба́ Твоего́: ско́рбь бо обдержи́тъ мя́, терпѣ́ти не могу́ де́монскаго стрѣля́нія, покро́ва не и́мамъ, ниже́ гдѣ́ прибѣ́гну, окая́нный, всегда́ побѣжда́емь, и утѣше́нія не и́мамъ, ра́звѣ Тебе́, Влады́чице мíра, упова́ніе и предста́тельство вѣ́рныхъ, не пре́зри моле́ніе мое́, поле́зно сотвори́].

Кано́нъ [благода́ренъ Богома́тери со ирмосо́мъ на 6 и пра́здника, на 8,] гла́съ 4.

Пѣ́снь 1.

Ирмо́съ: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Благоговѣ́ютъ предъ Тобо́ю, Богоро́дице, а́нгеловъ нача́льницы и святы́хъ чи́ни че́стно слу́жатъ Ти́, пра́ведніи красу́ются, кня́зь же Андре́й мо́лится, и гра́дъ Влади́міръ похваля́ется свѣ́тло. Мы́ же, грѣ́шніи, припа́дая къ Твое́й свято́й ико́нѣ, Боголюби́вая, ми́лости про́симъ: озари́ на́ша сердца́, Пресвята́я Дѣ́во Богоро́дице.

Кня́зь Андре́й вопія́ше со слеза́ми: Пресвята́я Цари́це Богоро́дице, упова́ніе христіа́номъ, умоли́ Сы́на Своего́, Христа́ Бо́га на́шего, о держа́вѣ Твое́й, Ты́ бо изво́лила еси́ въ предѣ́лѣхъ страны́ Влади́мірскія оби́тели Свое́й сла́вно созда́тися во и́мя Твое́, Боголюби́вая.

Пріиди́те, христоимени́тіи лю́діе, умы́ та́йно очи́стившеся, притеце́мъ въ хра́мъ Ма́тере Христа́ Бо́га на́шего, боголюби́мое мѣ́сто страны́ Влади́мірскія я́ко богопрія́тное селе́ніе ви́дяще: въ не́мъ бо явля́етъ на́мъ Свою́ ми́лость Влады́чица.

Подъ кро́въ Тво́й, Богоро́дице Дѣ́во, прибѣга́емъ вси́, ро́ди человѣ́честіи: просвѣти́, Боголюби́вая, мѣ́сто свято́е торжества́ Твоего́, и мы́, грѣ́шніи раби́ Твои́, моля́щеся Пречи́стѣй Твое́й ико́нѣ, про́симъ отъ Тебе́ прія́ти вели́кія ми́лости.

Пѣ́снь 3.

Ирмо́съ: Твоя́ пѣсносло́вцы, Богоро́дице, живы́й и незави́стный Исто́чниче, ли́къ Себѣ́ совоку́пльшія, духо́вно утверди́, въ боже́ственнѣй Твое́й сла́вѣ, вѣнце́въ сла́вы сподо́би.

Засту́пница и покро́въ гра́ду Влади́міру и вся́кому гра́ду и странѣ́, бу́ди на́мъ помо́щница и прибѣ́жище, Боголюби́вая, всѣ́хъ на́съ заступи́, Госпоже́ Цари́це и Богоро́дице, и во вся́кихъ злы́хъ мѣ́стѣхъ вѣ́рныя сохрани́.

Пріими́ хвалу́ отъ у́стъ на́шихъ недосто́йныхъ, о Пресвята́я Богоро́дице, Дѣ́во Боголюби́вая, наде́ждо на́ша и похвало́! Покланя́емся Твоему́ пресла́вному о́бразу: мольбу́ пріими́ о рабѣ́хъ Твои́хъ.

Пречи́стѣи ру́цѣ Твои́, Цари́це и Богоро́дице, ми́лостивно воздви́гни къ Сы́ну Твоему́ и Бо́гу на́шему, прося́щи отпуще́нія согрѣше́ній на́шихъ, и житіе́ на́ше испра́ви, и вся́кія благода́ти испо́лни на́съ и ми́лости сподо́би.

Пресвята́я Дѣ́во, Ма́ти Боголюби́вая, сохрани́ рабы́ Твоя́ отъ вся́кія сопроти́вныя си́лы, и изба́ви отъ вся́кія напа́сти, и ра́дость мíру сотвори́ душе́вную и тѣле́сную, и пре́зри на́мъ вся́ согрѣше́нія.

Сѣда́ленъ, гла́съ 2:

Моле́ніе те́плое и стѣна́ необори́мая, ми́лости исто́чниче, мíрови прибѣ́жище, прилѣ́жно вопіе́мъ Ти́: Богоро́дице Влады́чице, предвари́ и отъ бѣ́дъ изба́ви на́съ, еди́на вско́рѣ Предста́тельствующая.

[Сла́ва, и ны́нѣ, то́йже.]

Пѣ́снь 4.

Ирмо́съ: Сѣдя́й въ сла́вѣ на Престо́лѣ Божества́ во о́блацѣ ле́гцѣ, прíиде Іису́съ Пребоже́ственный, Нетлѣ́нною Дла́нію и спасе́ зову́щія: сла́ва, Христе́, си́лѣ Твое́й.

Ева́нгелія Христо́ва богогла́сный списа́тель Лука́ написа́ о́бразъ Тво́й чу́дный, Всенепоро́чная Влады́чице, и Младе́нца Ти́ Превѣ́чнаго на руку́ изобрази́; святы́й же кня́зь Андре́й въ нощно́мъ видѣ́ніи узрѣ́вши Тя́, моля́щуюся за ны́, даде́ на́мъ о́бразъ Твоего́ моле́нія, къ Нему́же притека́ющія бѣ́дъ и напа́стей избавля́еши.

О, Пресвята́я Дѣ́во Богоро́дице! Ты́ изво́лила еси́ изы́ти изъ гре́ческія страны́ въ чудотво́рномъ о́бразѣ Твое́мъ и доити́ до свята́го мѣ́ста, идѣ́же и яви́лася еси́ кня́зю Андре́ю; о́нъ же, моля́ся Тебѣ́, со слеза́ми вопія́ше: Пресвята́я Дѣ́во Богоро́дице, изба́ви на́съ отъ вся́кихъ бѣ́дъ и скорбе́й.

На Тя́ упова́ніе возложи́хомъ, Боголюби́вая Ма́ти Дѣ́во, Предста́тельницу Тя́ живота́ тве́рду и непоколеби́му стяжа́хомъ, моли́ о на́съ, рабѣ́хъ Твои́хъ, Всеще́драго Бо́га.

Ты́ еси́ похвала́ и вѣне́цъ святы́мъ всѣ́мъ, вси́ на Тя́ по Бо́зѣ наде́жду возложи́хомъ и Тебѣ́ мо́лимся, Боголюби́вая Цари́це, Бо́жія Ма́ти, Помо́щнице грѣ́шнымъ и спасе́ніе рабо́мъ Твои́мъ.

Пѣ́снь 5.

Ирмо́съ: Ужасо́шася вся́ческая о Боже́ственнѣй сла́вѣ Твое́й: Ты́ бо, неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га, и родила́ еси́ Безлѣ́тнаго Сы́на, всѣ́мъ, воспѣва́ющимъ Тя́, ми́ръ подава́ющая.

Вся́кое мѣ́сто, Пресвята́я Дѣ́во Богоро́дице, Свое́ю ми́лостію просвѣща́еши, гра́ду же Влади́міру и мѣ́сту боголюби́мому вели́кая похвала́ и утвержде́ніе, въ бѣда́хъ су́щимъ ско́рая Помо́щница.

Проповѣ́дуетъ пресла́вно вели́чія Твоя́ Ла́вра, я́же во Твое́ и́мя нача́ло прія́, Ма́ти Бо́жія Боголюби́вая, хва́лятъ моле́бницы, и велича́ютъ чудотво́рный о́бразъ Твоего́ моле́нія о на́съ, и глаго́лютъ: утверди́, Го́споди, оби́тель сію́.

Приспѣ́ дне́сь па́мять твоя́, кня́же Андре́е, ра́дуется пресла́вный гра́дъ Влади́міръ и боголюби́мое мѣ́сто красу́ется, зову́ще: Пресвята́я Дѣ́во Богоро́дице, спаси́ на́съ и изба́ви отъ вся́кія ну́жды и печа́ли.

Марíе, злата́я кади́льнице, стра́сти па́губныя отжени́ отъ на́съ и утверди́ на́съ непоколеби́мыхъ, Пресвята́я Дѣ́во Боголюби́вая, не и́мамы бо ины́я по́мощи, ра́звѣ Тебе́, Влады́чице.

Пѣ́снь 6.

Ирмо́съ: Боже́ственное сіе́ и всечестно́е соверша́юще пра́зднество, богому́дріи, Богома́тере, пріиди́те, рука́ми воспле́щимъ, отъ Нея́ ро́ждшагося Бо́га сла́вимъ.

Прише́ствіемъ честна́го о́браза Твоего́, Цари́це Богоро́дице, освяти́ла еси́ мѣ́сто боголюби́мое, на не́мже оби́тель Свою́ отъ дре́внихъ лѣ́тъ сохраня́еши, идѣ́же и на́съ сподо́би Тебе́ пѣ́ти чи́стыми сердцы́.

Не ужаса́йся, кня́же Андре́е, и не диви́ся, ви́дѣвъ о́бразъ Пречи́стыя Богоро́дицы, отъ гре́ческія страны́ изше́дшій, доити́ же гра́да Росто́ва не изво́лившій: се́ бо до́йде до мѣ́ста свята́го, свы́ше пронарече́ннаго, и подви́же вопи́ти тебе́ къ Преблагослове́ннѣй: О, Всеми́лостивая, моли́ о на́съ Сы́на Своего́, Христа́ Бо́га на́шего!

Воздви́гнемъ ру́цѣ свои́ горѣ́ и вознесе́мъ хвале́нія Го́сподеви: се́ бо вои́стинну пріи́де Пречи́стая Дѣ́ва и Богоро́дица Боголюби́вая: вся́ озаря́я вѣ́рныя Боже́ственною Свое́ю ико́ною.

Хра́мъ живы́й и освяще́нный су́щи, Пренепоро́чная, Пребезнача́льное Сло́во пло́тію родила́ еси́, безслове́сія мíръ изба́вльшее, изба́ви и на́съ отъ напа́стей Твои́ми моли́твами, Боголюби́вая.

Конда́къ, гла́съ 8:

Дѣ́во и Ма́ти Боголюби́вая, Цари́це Марíе Богоро́дице, Ми́лостивая Хода́таице къ Сы́ну Своему́ и Бо́гу на́шему за ны́, рабы́ Твоя́! Ты́, Отрокови́це, благоизво́лила еси́ Твоему́ пречу́дному о́бразу, его́же написа́ богоглаго́ливый Лука́, пе́рвѣе отъ страны́ гре́ческія, пото́мъ же и отъ ца́рствующаго гра́да Кíева изы́ти, по умоле́нію благовѣ́рнаго кня́зя Андре́я, и яви́ти ми́лость Свою́ новопросвѣще́ннымъ лю́демъ страны́ сея́, но, не изво́ливши дости́гнути гра́да Росто́ва, возлюби́ла еси́ пребыва́ти въ предѣ́лѣхъ Влади́мірскихъ, идѣ́же и яви́лася еси́ вѣ́рному рабу́ Твоему́, кня́зю Андре́ю, моля́щися о лю́дехъ Твои́хъ Сы́ну и Бо́гу Твоему́, я́коже дре́вле свято́му Андре́ю въ хра́мѣ Влахе́рнскомъ. Тѣ́мже святы́й кня́зь Андре́й, новописа́въ Тебе́, Моли́твенницу о лю́дехъ Твои́хъ, оста́ви на́мъ се́й моли́твенный ли́къ Тво́й, Боголюби́вая Ма́ти, и основа́ оби́тель въ мѣ́стѣ Твоего́ явле́нія, изъ нея́же отъ чудотво́рныя Твоея́ ико́ны и по все́й странѣ́ Россíйстѣй ми́лость, и по́мощь, и исцѣле́ніе подае́ши съ вѣ́рою приходя́щимъ къ Тебѣ́: я́ко о Тебѣ́, Богоро́дице, вся́ тва́рь ра́дуется.

Тропа́рь, гла́съ 1:

Всепѣ́тая и всесла́вная Цари́це Богоро́дице, Ма́ти всея́ тва́ри Содѣ́теля, христіа́нская наде́ждо и Засту́пнице, печа́льныхъ утѣше́ніе, ненадѣ́ющихся и отча́явшихся ско́рое надѣ́яніе, мо́лимъ Тя́: ми́лостива бу́ди на́мъ, грѣ́шнымъ, и не оста́ви ра́бъ Свои́хъ, и не отри́ни моле́нія вѣ́рныхъ, въ ско́рбехъ и бѣда́хъ предъ честны́мъ о́бразомъ Твои́мъ избавле́нія тре́бующихъ. О, Влады́чице, Блага́я Помо́щнице! Ри́зою Твое́ю честно́ю на́съ защити́ и отъ всѣ́хъ зо́лъ изба́ви, моля́щи Сы́на Твоего́, Христа́ Бо́га на́шего, да спасе́тъ ду́ши на́ша, я́ко Милосе́рдъ.

Пѣ́снь 7.

Ирмо́съ: Не послужи́ша тва́ри богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́.

Боголюби́вому житію́ первонача́льникъ и наста́вникъ, кня́же Андре́е, бы́лъ еси́ и моле́бно подвиза́лся еси́ предъ пречу́днымъ о́бразомъ Бо́жія Ма́тере: свѣтлѣ́йши бо со́лнца возсія́ пречестна́я ико́на Пресвяты́я Богоро́дицы, Ейже моли́ся спасти́ся на́мъ.

Херуви́мъ и серафи́мъ превы́шши яви́лася еси́, Богоро́дице: Ты́ бо еди́на прія́ла еси́ невмѣсти́маго Бо́га во утро́бѣ Свое́й и благоволи́ла доити́ о́бразу Твоему́ боголюби́маго мѣ́ста. Мы́ же, раби́ Твои́, вси́ вѣ́рніи, пѣ́сньми Тя́ ублажа́емъ.

Пресвята́я Госпоже́ Дѣ́во Богоро́дице, Ма́ти Христа́ Бо́га на́шего, вся́ко мо́жеши на́мъ бы́ти Помо́щница, посѣти́вшая чу́днымъ о́бразомъ Твои́мъ боголюби́мое мѣ́сто сіе́, Боголюби́вая Влады́чице, посѣти́ и на́съ и не оста́ви, я́коже Сама́ вѣ́си, съ вѣ́рою приходя́щихъ къ Тебѣ́.

Приступи́ къ чу́дному о́бразу Боголюби́выя Богома́тере вели́кій кня́зь Андре́й и, просте́ръ ру́цѣ свои́, взе́мъ я́ко безцѣ́нное сокро́вище, и возвѣсти́ отцу́ своему́, ка́ко чуде́сно изъ Вышегра́да посѣти́ мѣ́сто боголюби́мое.

Пѣ́снь 8.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки.

Пріими́ моле́ніе на́ше, Пречи́стая Богоро́дице, сохрани́ и заступи́ отъ вся́каго зла́ и не отри́ни на́съ отъ Своего́ честна́го о́браза: Тя́ бо и́мамы моли́твенницу те́плу, и стѣ́ну тве́рду, и покро́въ неруши́мый, и земли́ на́шей вели́кую похвалу́ и утвержде́ніе.

Ра́дуемся душе́ю и весели́мся се́рдцемъ, взира́юще на о́бразъ Тво́й, Пресвята́я Богоро́дице Боголюби́вая, иму́ще Тя́ держа́ву непобѣди́мую и утвержде́ніе непоколеби́мое, наде́жду, и упова́ніе, и душа́мъ на́шимъ спасе́ніе.

Помо́щница еси́ въ ско́рбехъ, и въ напа́стехъ, и бѣда́хъ и въ темни́цахъ избавле́ніе, на бра́ни и въ ра́техъ заступле́ніе, Богоотрокови́це Чи́стая, и избавле́ніе всѣ́мъ вѣ́рнымъ человѣ́комъ, и похвала́, и гра́ду на́шему вели́кое утвержде́ніе.

Пѣ́снь 9.

Ирмо́съ: Вся́къ земноро́дный да взыгра́ется, Ду́хомъ просвѣща́емь, да торжеству́етъ же безпло́тныхъ умо́въ естество́, почита́ющее свяще́нное торжество́ Богома́тере, и да вопіе́тъ: ра́дуйся, Всеблаже́нная Богоро́дице, Чи́стая Приснодѣ́во.

Се́ Тебѣ́, Пресвята́я Цари́це Боголюби́вая, посыла́ется съ небесе́ арха́нгелъ Гавріи́лъ, Царя́ всѣ́хъ и Бо́га провозвѣсти́ти прише́ствіе и возгласи́ти Тебѣ́: ра́дуйся, Благода́тная, Госпо́дь съ Тобо́ю!

Ра́дуйся, Ма́ти Дѣ́во, ра́дуйся, Пречи́стая, прія́телище Бо́жіе, ра́дуйся, свѣ́щниче Свѣ́та, Ада́мово воззва́ніе и Евино избавле́ніе, горо́ свята́я и пресла́вная и свяще́нный черто́же!

Ты́ еси́ похвала́ христіа́номъ, Влады́чице, Ты́ ору́жіе на враги́ и стѣна́, къ Тебѣ́ прибѣга́емъ, Тя́ и ны́нѣ на по́мощь призыва́емъ: Госпоже́ Цари́це Богоро́дице, спаси́ и сохрани́ правовѣ́рныя лю́ди Твоя́, Боголюби́вая.

О, Всеми́лостивая христіа́номъ Помо́щнице! Не мо́жетъ Тя́ воспѣ́ти досто́йно у́мъ человѣ́ческій и а́нгельскій, я́ко всея́ тва́ри Честнѣ́йшую, небе́сныхъ и земны́хъ си́лъ Сла́внѣйшую: всѣ́хъ бо Творца́ родила́ еси́ и Бо́га. Но, о Влады́чице! пріими́ ми́лостивно на́ше моле́ніе, всегда́ бо на Тя́ надѣ́емся.

Свѣти́ленъ. Подо́бенъ: Посѣти́лъ ны́ е́сть.

Те́плое заступле́ніе въ бѣда́хъ, и Помо́щницу на́шу, и къ Бо́гу примире́ніе, Еюже тли́ изба́вихомся, Богоро́дицу, вѣ́рніи, ублажа́емъ.

Сла́ва, и ны́нѣ:

Тя́ Предста́тельницу и́мамы, грѣ́шніи, о Пресвята́я Дѣ́во: Ты́ благопремѣ́нна сотвори́ Сы́на Твоего́ и Бо́га на́шего ма́терними Твои́ми моли́твами.

На хвали́техъ стихи́ры на 4, гла́съ 6:

Велича́емъ Тя́ вси́, Пренепоро́чная Ма́ти Христа́ Бо́га на́шего, Яже пре́жде рождества́ Дѣ́ва, и въ рождествѣ́ Дѣ́ва, и по рождествѣ́ па́ки пребыва́еши Дѣ́ва. Невѣ́сто неневѣ́стная, низложи́ враго́въ на́шихъ, мо́лимъ Тя́, Влады́чице. [Два́жды.]

Преблагослове́нна и Препросла́вленна еси́, Богоро́дице Дѣ́во, я́ко родила́ еси́ всѣ́хъ Творца́, Ма́ти су́щи Живота́, Тобо́ю прія́хомъ мы́, грѣ́шніи, паде́нія на́шего воста́ніе, Еди́на Благослове́нная.

Блажи́мъ Тя́, вси́ ро́ди, Богоро́дице, я́ко ра́дости вся́ ны́ испо́лнила еси́ явле́ніемъ Твои́мъ кня́зю Андре́ю и дарова́ніемъ на́мъ честна́го о́браза Твоего́, Пречи́стая, ему́же дне́сь покланя́ющеся, уми́льно мо́лимъ Тя́: сподо́би, Влады́чице, Твоя́ рабы́ въ бу́дущемъ вѣ́цѣ избра́нныхъ ра́дости.

Сла́ва, и ны́нѣ, гла́съ 8:

О, пресла́внаго чудесе́! Во всѣ́хъ страна́хъ Тебе́ ра́ди прославля́ема оби́тель Твоя́, Богоневѣ́сто, я́ко и́мать въ себѣ́ чудотво́рную Твою́ ико́ну, отъ нея́же неизрече́нныя цѣльбы́ пріе́млюще, благода́рственная вопіе́мъ Тебѣ́ и уми́льно мо́лимъ Тя́: Пресвята́я Дѣ́во, спаси́ ду́ши на́ша, я́ко Милосе́рдая.


НА ЛИТУРГІИ,

Блаже́нна, пѣ́снь 3-я и 6-я. Проки́менъ, Апо́столъ, Ева́нгеліе, и прича́стенъ Богоро́дицѣ о́бщій. [Проки́менъ, гла́съ 3, пѣ́снь Богоро́дицы: Вели́читъ душа́ Моя́ Го́спода, и возра́довася ду́хъ Мо́й о Бо́зѣ, Спа́сѣ Мое́мъ. Сти́хъ: Яко призрѣ́ на смире́ніе рабы́ Своея́, се́ бо отны́нѣ ублажа́тъ Мя́ вси́ ро́ди. Апо́столъ къ Филипписíемъ, зача́ло 240. Аллилу́ія, гла́съ 8: Слы́ши Дщи́ и ви́ждь, и приклони́ у́хо Твое́. Сти́хъ: Лицу́ Твоему́ помо́лятся бога́тіи лю́дстіи. Ева́нгеліе Луки́, зача́ло 54. Прича́стенъ: Ча́шу спасе́нія пріиму́, и и́мя Госпо́дне призову́.]


Моли́тва Боголюби́вой Бо́жіей Ма́тери:

О, чу́дная и вы́сшая всѣ́хъ тва́рей Цари́це Богоро́дице, небе́снаго Царя́ Христа́ Бо́га на́шего Ма́ти! Услы́ши на́съ, грѣ́шныхъ и недосто́йныхъ ра́бъ Твои́хъ, въ ча́съ се́й моля́щихся и припа́дающихъ къ Тебѣ́ съ воздыха́ніемъ и слеза́ми, и уми́льно глаго́лющихъ: изведи́ на́съ отъ ро́ва страсте́й, Влады́чице, изба́ви на́съ отъ вся́кія ско́рби и печа́ли, огради́ отъ вся́кія напа́сти и злы́хъ клеве́тъ, отъ непра́ведного и лю́таго навѣ́та вра́жія. Мо́жеши бо, о Благода́тная Ма́терь на́ша, не то́чію отъ вся́каго зла́ сохрани́ти лю́ди Твоя́, но и вся́кимъ благодѣя́ніемъ снабди́ти и спасти́. Ра́звѣ Тебе́ ины́я Предста́тельницы въ бѣда́хъ и обстоя́ніяхъ и те́плыя Хода́таицы о на́съ, грѣ́шныхъ, не и́мамы къ Сы́ну Твоему́, Христу́ Бо́гу на́шему, Его́же умоли́, Влады́чице, да спасе́нніи Тобо́ю сла́вимъ и въ бу́дущемъ вѣ́цѣ Всесвято́е и́мя Сы́на Твоего́ и Бо́га на́шего, ку́пно со Отце́мъ и Святы́мъ Ду́хомъ, ны́нѣ и въ безконе́чныя вѣ́ки. Ами́нь.

Источникъ: Слу́жба Пресвятѣ́й Богоро́дицѣ, соверша́емая въ Боголю́бовской оби́тели, въ де́нь пра́зднества свято́й чудотво́рной Боголю́бской ико́нѣ Бо́жіей Ма́тери. Мѣ́сяца Іу́нія въ 18-й де́нь. — СПб.: Въ Сѵнода́льной Тѵпогра́фіи, 1874. — С. 3-22, 55-64.

/ Къ оглавленію раздѣла /


Наверхъ / Къ титульной страницѣ

0