Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 29 апрѣля 2017 г. Сейчасъ на порталѣ посѣтителей - 16.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́нія въ 17-й де́нь.
Святы́хъ му́ченикъ Ману́ила, Саве́ла и Исма́ила.

[ВЕЧЕРЪ,]
Стихи́ры, гла́съ 4. Подо́бенъ: Яко до́бля.

Ману́илъ чу́дный,* и Саве́лъ блаже́нный,* и Исма́илъ прему́дрый* пѣ́сньми свяще́нными да почту́тся:* Тро́ицу бо Несозда́нную* предъ враги́ священнопроповѣ́дающе,* многобо́жную угаси́ша ле́сть* кро́вными излія́ніи* и сла́ву прія́ша неувяда́емую.

Царя́ беззако́ннаго,* беззако́нно повелѣва́ющаго поклони́тися* и че́сти принести́ безслове́снымъ бого́мъ безду́шнымъ,* блаже́нніи, му́дрѣ посрами́сте,* Ману́иле, и Исма́иле, и Саве́ле великоимени́тіи,* и, пострада́вше терпѣли́вно и зако́нно,* вѣнцы́ исплето́сте побѣ́ды, о мíрѣ моля́щеся.

Сла́ва, гла́съ 8:

Чи́сто возлю́бльше Тя́, Сло́ве Бо́жій, сла́вніи му́ченицы, огню́ служи́ти оста́вльше, небре́гше же и о Халде́йстѣй земли́, Твои́мъ свѣ́томъ озари́шася; вооружи́вшеся же и ору́жіемъ вѣ́ры, посрами́ша Іуліа́на мучи́теля Ману́илъ сла́вный, и Саве́лъ ди́вный, и Исма́илъ требога́тый; со Отце́мъ и Ду́хомъ пою́ще Тя́, мо́лятъ спасти́ся душа́мъ на́шимъ.

Крестобогоро́диченъ. Подо́бенъ: О, пресла́внаго чудесе́!

Что́ зри́мое видѣ́ніе,* е́же Мои́ма очи́ма ви́дится, о Влады́ко!* Содержа́й всю́ тва́рь,* на дре́во воздви́женъ бы́въ,* и умира́еши, всѣ́мъ дая́й жи́знь, —* Богоро́дица, пла́чущи, глаго́лаше,* егда́ узрѣ́ на Крестѣ́ возноси́ма* изъ Нея́ неизрече́нно возсія́вшаго* Бо́га и Человѣ́ка.

Тропа́рь, гла́съ 4:

Му́ченицы Твои́, Го́споди, во страда́ніихъ свои́хъ вѣнцы́ прія́ша нетлѣ́нныя отъ Тебе́, Бо́га на́шего: иму́ще бо крѣ́пость Твою́, мучи́телей низложи́ша, сокруши́ша и де́моновъ немощны́я де́рзости. Тѣ́хъ моли́твами спаси́ ду́ши на́ша.


НА УТРЕНИ,
Оба кано́на окто́иха и святы́хъ на 4, гла́съ 8.

Пѣ́снь 1.

Ирмо́съ: Истря́сшему въ мо́ри мучи́тельство фарао́не и Изра́иля су́шею наста́вльшему, пои́мъ Христу́, я́ко просла́вися во вѣ́ки.

Пое́мъ пѣ́снь вси́ Зижди́телю и Вседержи́телю Бо́гу, страстоте́рпцевъ досто́йно поче́тшему, сла́внаго Ману́ила и страда́вшія съ ни́мъ, во вѣ́ки.

Оте́ческое служе́ніе отве́ргше огнепоклоне́ніе, гони́теля стремле́ніе возрази́ша и бы́ша страда́льцы е́же въ Тро́ицѣ честны́мъ исповѣ́даніемъ.

Яко единочи́слени Тро́ицѣ, пострада́вше Ея́ ра́ди, достолѣ́пно вѣнча́стеся, му́ченицы, моли́теся у́бо непреста́нно изба́вити всѣ́хъ на́съ отъ бѣ́дъ.

Богоро́диченъ: Еже отъ Дѣ́вы рождество́ вы́ше естества́, Рожде́йся утаи́ кня́зя тмы́, я́коже пи́шетъ, и отве́рзе Еде́мъ Богоро́дицу Ю исповѣ́дающимъ.

Пѣ́снь 3.

Ирмо́съ: Нѣ́сть свя́тъ, я́ко Госпо́дь, и нѣ́сть пра́веденъ, я́ко Бо́гъ на́шъ, Его́же пое́тъ вся́ тва́рь: нѣ́сть пра́веденъ па́че Тебе́, Го́споди.

Нѣ́сть, святíи, по достоя́нію восхвали́ти свяще́нное ва́ше страда́ніе, и́мже увязо́стеся небоплете́нными вѣнцы́, Бо́гу, Изба́вителю на́шему, моля́щеся спасти́ся на́мъ.

Огне́мъ опаля́еми, неоскудѣва́еми умо́мъ, ра́нами око́вани, болѣ́зньми изощре́ни, небокова́нніи мечи́ бы́сте, му́ченицы, на нечести́выя враги́.

Посрами́ся томи́тель, паде́ніемъ ужа́снымъ па́дся отсту́пникъ и беззако́нникъ, Христу́ укрѣ́пльшу му́ченикъ тро́ицу до́блѣ ополчи́тися на нече́стіе его́.

Богоро́диченъ: Саму́ю Тебѣ́ приво́димъ, ро́ждшую Тя́ пло́тію, на мольбу́ держа́вѣ Твое́й, Христе́ Бо́же на́шъ, и му́чениковъ собо́ры, тѣ́хъ мольба́ми умири́ мíръ Тво́й.

Сѣда́ленъ, гла́съ 1. Подо́бенъ: Гро́бъ Тво́й, Спа́се.

Яко трисвѣ́тлая свѣща́, огне́мъ Тро́ическимъ вже́гшеся, пе́рсовъ, огню́ служа́щихъ, тму́ попали́сте и Христа́ со дерзнове́ніемъ проповѣ́дасте, возсія́вшаго отъ Неискусому́жныя Дѣ́вы, и блаже́нную прія́ете кончи́ну, тричи́сленніи му́ченицы.

Сла́ва, и ны́нѣ, богоро́диченъ:

Наста́ви ны́ на пу́ть покая́нія, укло́ншіяся при́сно къ безпу́тіемъ зо́лъ и Преблага́го прогнѣ́вавшія Го́спода, Неискусобра́чная благослове́нная Марíе, прибѣ́жище отча́янныхъ человѣ́ковъ, Бо́жіе жили́ще.

Крестобогоро́диченъ:

Зря́щи Тя́, Христе́, Всенепоро́чная Ма́ти ме́ртва на Крестѣ́ просте́рта, вопія́ше: Сы́не Мо́й, Собезнача́льне Отцу́ и Ду́ху, что́ неизрече́нное Твое́ сіе́ смотре́ніе, и́мже спа́слъ еси́ пречи́стыхъ ру́къ Твои́хъ, Ще́дре, созда́ніе?

Пѣ́снь 4.

Ирмо́съ: Изъ горы́ приосѣне́нныя, Сло́ве, проро́къ, еди́ныя Богоро́дицы, хотя́ща воплоти́тися богови́дно усмотри́ и со стра́хомъ славосло́вяше си́лу Твою́.

Отъ ко́рене волше́бна тро́ица благослове́нная, отца́ неблагочести́ва, ма́тере же благоче́ствующія, му́ченикъ прозябе́, бра́тія, возрасти́вшая плоды́ благоче́стія.

Звѣ́зды неле́стны бы́сте вѣ́ры, я́ко со́лнце, я́вѣ возсія́вше мíру, трисія́нная тро́ица, светонѣ́сный Ману́илъ, Саве́лъ и со Исма́иломъ.

Моли́теся тріе́, я́коже еди́нъ, Тро́ицѣ да́ти очище́ніе и оставле́ніе согрѣше́ній творя́щимъ вѣ́рою и́стинною, святíи му́ченицы, па́мять ва́шу.

Богоро́диченъ: Пала́та красна́ всѣ́хъ Царя́ показа́ся вои́стинну, и престо́лъ Вы́шняго, и вы́шши тва́ри Богома́ти, и Предста́тельница ду́шъ на́шихъ.

Пѣ́снь 5.

Ирмо́съ: Отъ но́щи невѣ́денія боговѣ́дѣніемъ просвѣти́вый концы́, просвѣти́ мя у́тромъ человѣколю́бія Твоего́, Го́споди.

Достодо́лжно вси́ му́чениковъ соверша́емъ па́мять: си́хъ бо кро́вію ве́сь освяти́ся мірскíй возду́хъ.

Нощеборю́щую дре́вле вѣ́рныхъ Це́рковь, му́ченицы сію́ просвѣти́ша заре́ю пра́выя и́хъ вѣ́ры.

Авраа́мова нѣ́дра му́ченическія ду́ши прія́ша, и́миже, я́коже о́бразъ напи́санъ, вы́шнее Ца́рство проповѣ́дается.

Богоро́диченъ: Яже отъ Тро́ицы еди́наго воплоще́нна ро́ждши Бо́га вои́стинну, Богома́ти, моли́ бѣ́дъ изба́вити рабы́ Твоя́.

Пѣ́снь 6.

Ирмо́съ: Ри́зу мнѣ́ пода́ждь свѣ́тлу, одѣя́йся свѣ́томъ, я́ко ри́зою, многоми́лостиве Христе́ Бо́же на́шъ.

Избѣго́ша скве́рны мы́сленныя святíи му́ченицы, спа́сшеся безъ волне́нія, окормле́ніемъ Креста́ наставля́еми.

Кро́ви ва́ша, зи́нувши, земля́ покры́, святíи, и внеза́пу мо́щи въ до́льнихъ сокро́вищахъ сокрове́ни бы́ша.

Умири́ мíръ, Бо́же, и спаси́, я́ко Милосе́рдъ, ста́до Твое́ неврежде́но моли́твами сла́вныхъ страстоте́рпецъ Твои́хъ.

Богоро́диченъ: Безъ сíмене заче́нши Бо́га, Зижди́теля естества́ нетлíнно родила́ еси́, Того́ моли́, Богома́ти, спасти́ся на́мъ.

Конда́къ, гла́съ 2. Подо́бенъ: Вы́шнихъ ища́.

Вѣ́рою Христо́вою уя́звлени, всеблаже́нніи, и Сего́ вѣ́рно испи́вше ча́шу, пе́рсская служе́нія и де́рзость на зе́млю низложи́сте, Тро́ицы равночи́сленніи, моли́твы творя́ще о всѣ́хъ на́съ.

Икосъ:

Иже испе́рва боже́ственною Твое́ю добро́тою, Іису́се Жизнода́вче, озари́ мя я́вѣ, я́ко да воспою́ му́ченики, за Тя́ подви́гшіяся да́же до сме́рти, и вра́жію всю́ крѣ́пость низложи́вшія до́блѣ, и и́дольскія ле́сти отбѣ́гшія, кре́стною си́лою укрѣпля́еми. Му́ки бо претерпѣ́вше, Тро́ическую сла́ву воспрія́ша, Того́ у́бо о всѣ́хъ моли́те.

Пѣ́снь 7.

Ирмо́съ: Въ нача́лѣ зе́млю основа́вый, и небеса́ сло́вомъ утверди́вый, благослове́нъ еси́ во вѣ́ки, Го́споди, Бо́же оте́цъ на́шихъ.

Тріе́ отъ еди́наго свѣ́та свѣти́льники возжже́ Христо́ва свѣтоно́сная Це́рковь, вѣнцено́сца и побѣдоно́сца сла́внаго Ману́ила и страда́вшія съ ни́мъ.

Халде́йское оста́вльше оте́чество, волше́бныя отбѣго́ша вѣ́ры тріе́ Тро́ицѣ честнíи ору́жницы, вопію́ще: благослове́нъ еси́ во вѣ́ки, Го́споди Бо́же оте́цъ на́шихъ.

Тріе́ во огни́, и́же о Аза́ріи, халде́йскія избѣго́ша слу́жбы, и тріе́ ору́жницы, и́же отъ Перси́ды, пострада́вше по Христѣ́, и́же о Ману́илѣ.

Богоро́диченъ: Въ жена́хъ не роди́ дѣ́ва, то́кмо Ты́ еди́на, Дѣ́во Богоро́дице: отца́ бо до́лѣ и ма́тере горѣ́, Младе́нцу вся́ко не бѣ́: сугу́бъ бо бѣ́ Христо́съ.

Пѣ́снь 8.

Ирмо́съ: На горѣ́ святѣ́й просла́вльшася, и въ купинѣ́ огне́мъ Приснодѣ́вы Моисе́ови та́йну я́вльшаго, Го́спода по́йте и превозноси́те во вся́ вѣ́ки.

Воздержа́ніемъ вжили́вше тѣ́ло, благоче́стіемъ укрѣ́пльше ду́хъ, страда́льческое совокупи́ша все́ удержа́ніе къ неви́димымъ князе́мъ тмы́ Христо́вы страстоте́рпцы.

Якоже цвѣ́ты, вѣнцы́ вѣнча́ема му́ченикъ Христо́ва Це́рковь невѣ́стническою оде́ждою одѣ́яся, кро́вію омоче́ною, я́ко отъ нетлѣ́нія обагре́нія му́ченикъ.

Ча́сти, Христе́, спаса́емыхъ, и жре́бія улучи́ти Твои́хъ му́ченикъ, и неотъе́млемыя сла́вы сподо́билъ еси́ исповѣ́дающихъ еди́наго Тя́, Сы́на Отча и Дѣ́вы.

Богоро́диченъ: Яко еди́наго ро́ждши отъ Тро́ицы, моля́щи не преста́й, Богоро́дице, да изба́вимся отъ беззако́ній на́шихъ и сподо́бимся явле́нія Его́ и Ца́рствія.

Пѣ́снь 9.

Ирмо́съ: Проявле́нное на горѣ́ законополо́жнику во огни́ и купинѣ́, Рождество́ Приснодѣ́вы, въ на́ше вѣ́рныхъ спасе́ніе, пѣ́сньми немо́лчными велича́емъ.

Трегу́бнымъ у́жемъ ва́съ совокупи́ благода́ть, Ману́иле, Саве́ле и Исма́иле, незы́блемою вѣ́рою собра́вши единому́дренный нра́въ и́же по Христѣ́ исповѣ́данія ва́шего.

Іуліа́на смра́днаго и отсту́пника, льсти́ваго мучи́теля треплете́нною пра́щею побѣди́сте, Тро́ицы ору́жницы, тріе́ увязо́стеся вѣнцы́ вку́пѣ.

Достопа́мятное чу́до му́ченикъ, по кончи́нѣ бо зія́ніемъ земля́ покры́вши, пома́лѣ, я́ко свѣтолу́чны звѣ́зды, отъ земны́хъ нѣ́дръ облиста́ша.

Богоро́диченъ: Яже отъ Твое́ю боку́ ро́ждшая несказа́ннымъ сло́вомъ е́же отъ Безнача́льна Отца́ пресу́щное Сло́во, Богома́ти, и въ ма́терехъ Дѣ́ва, спаса́й ду́ши воспѣва́ющихъ Тя́.

Свѣти́ленъ:

Чу́дная и треплете́нная во плени́цахъ златы́хъ, му́ченикъ наста́ всесвяще́нная па́мять: вели́каго вои́стинну Ману́ила, и Саве́ла, и Исма́ила пресла́вныхъ, и всѣ́хъ вѣ́рныхъ сердца́ озаря́етъ свѣ́томъ и ду́ши весели́тъ.

[Сла́ва, и ны́нѣ,] богоро́диченъ:

Яко иму́щи милосе́рдіе и ми́лость вели́ку, при́зри, Всепѣ́тая Богоро́дице Дѣ́во, на мое́ смире́ніе, и страсте́й молву́ и собла́знъ житія́ разори́, Отрокови́це, и огня́ гее́нскаго изба́ви мя́ Твои́ми моли́твами.


НА ЛИТУРГІИ,

Проки́менъ, гла́съ 4: Ди́венъ Бо́гъ во святы́хъ Свои́хъ,* [Бо́гъ Изра́илевъ]. Сти́хъ: Въ це́рквахъ благослови́те Бо́га, Го́спода [отъ исто́чникъ Изра́илевыхъ]. Апо́столъ ко Ефесе́емъ, зача́ло 233. Аллилу́ія, гла́съ 4: Воззва́ша пра́ведніи [и Госпо́дь услы́ша и́хъ, и отъ всѣ́хъ скорбе́й и́хъ изба́ви и́хъ. Сти́хъ: Мно́ги ско́рби пра́веднымъ и отъ всѣ́хъ и́хъ изба́витъ я́ Госпо́дь]. Ева́нгеліе Луки́, зача́ло 106. Прича́стенъ: Ра́дуйтеся пра́ведніи о Го́сподѣ, [пра́вымъ подоба́етъ похвала́].

Источникъ: Минíа, мѣ́сяцъ Іу́ній. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 110 – 113 об.

/ Къ оглавленію раздѣла /


Наверхъ / Къ титульной страницѣ

0