Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 23 октября 2017 г. Сейчасъ на порталѣ посѣтителей - 14.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́нія въ 16-й де́нь.
Слу́жба преподо́бному отцу́ на́шему Ти́хону, Лу́хскому чудотво́рцу.

НА МАЛѢЙ ВЕЧЕРНИ,
[На Го́споди воззва́хъ:] стихи́ры [на 4], гла́съ 1. Подо́бенъ: Наста́, богоно́се.

Се́ что́ добро́, или́ что́ красно́, но е́же жи́ти бра́тіи вку́пѣ, — воспѣва́лъ еси́ Дави́дски, Ти́хоне преподо́бне. Сего́ ра́ди вожделѣ́въ любодру́жное благо́е еди́нство, духо́вное бра́тство въ пусты́нѣ се́й совокупи́лъ еси́, е́же и назира́й непреста́нно, мо́лимъ тя́, пася́ и посѣща́я духо́вныхъ ча́дъ твои́хъ, ко Го́споду моли́твами твои́ми.

Возлюби́те, бра́тіе, Бо́га и ничто́же предпочти́те па́че любве́ Его́, — глаго́лалъ еси́ ученико́мъ твои́мъ, уча́ и́хъ сло́вомъ и дѣ́ломъ, Ти́хоне преподо́бне. — Да, егда́ Христо́съ яви́тся, Живо́тъ ва́шъ, тогда́ и вы́ съ Ни́мъ я́витеся во сла́вѣ и пріи́мете че́сть отъ Него́ со всѣ́ми святы́ми, отъ вѣ́ка Бо́гу угоди́вшими.

Весели́ся дне́сь и ра́дуйся, пусты́ня Лу́ховская, и процвѣта́й, я́ко кри́нъ се́льный. Се́ бо умно́жи тебѣ́ ча́да преподо́бный оте́цъ на́шъ Ти́хонъ, му́жъ жела́ній духо́вныхъ, приводя́ сія́ Христо́ви Пастыренача́льнику и моля́ непреста́нно о всѣ́хъ на́съ.

Сла́ва, гла́съ 6:

Еже по о́бразу соблю́дъ невреди́мо, во е́же по подо́бію, ели́ко мо́щно, дости́глъ еси́, преподо́бне, му́жески бо естество́ пону́дивъ, потща́лся еси́ ху́дшее покори́ти лу́чшему и пло́ть порабо́тити ду́ху. Тѣ́мже мона́шествующихъ яви́лся еси́ цвѣ́тъ, но́вый пусты́ни жи́тель, благотеку́щихъ обучи́тель, зерца́ло соверше́нства духо́внаго и пра́вило добродѣ́телей извѣ́стное. Кто́ изочте́тъ вся́ по́двиги и труды́ твоя́? Или́ кíй язы́къ изрече́тъ же́стокое твое́ житіе́, твое́ безмѣ́рное терпѣ́ніе, твою́ нищету́ и смире́ніе? Богоно́се преподо́бне, богому́дре преблаже́нне, о́тче на́шъ Ти́хоне! Предстоя́ ны́нѣ престо́лу Царя́ сла́вы, непреста́нно моли́ся о на́съ, вѣ́рою и любо́вію чту́щихъ тя́ и торже́ственно пра́зднующихъ приснора́достную и всепра́зднственную па́мять твою́.

И ны́нѣ, богоро́диченъ по гла́су:

[Богоро́дице, Ты́ еси́ лоза́ и́стинная, возрасти́вшая на́мъ Пло́дъ живота́, Тебѣ́ мо́лимся: моли́ся, Влады́чице, со святы́ми апо́столы поми́ловати ду́ши на́ша.]

На стихо́внѣ стихи́ры, гла́съ 4:

Восхожде́нія въ се́рдцѣ твое́мъ полага́я, у́мъ тво́й помышле́ніи о Бо́зѣ, тѣ́ло же твое́ трудолю́біемъ упражня́я, ве́сь освяще́нъ и богоно́сенъ показа́лся еси́, Ти́хоне преподо́бне, о́тче на́шъ! Тѣ́мже и неблагообра́зныя ви́ды пусты́ни ве́ліе благообра́зіе души́ твое́й приплоди́ша, моли́ о душа́хъ на́шихъ.

Сти́хъ: Честна́ предъ Го́сподемъ [сме́рть преподо́бныхъ Его́].

Не бо́йся, ма́лое ста́до, — вѣща́лъ еси́ духо́внѣй па́ствѣ твое́й, о́тче, — я́ко благоизво́ли Оте́цъ ва́шъ Небе́сный да́ти ва́мъ Ца́рство. Его́же Ца́рствія и на́съ, духо́вныхъ ча́дъ твои́хъ, сподо́би твои́ми къ Бо́гу моли́твами.

Сти́хъ: Пра́ведникъ, я́ко фи́никсъ, процвѣте́тъ, [я́ко ке́дръ, и́же въ Лива́нѣ, умно́жится].

Ре́вность не по ра́зуму и дерзнове́ніе не по Бо́зѣ игу́мена Константи́на слѣпото́ю тѣле́сною вма́лѣ наказа́лъ еси́, о́тче, и па́ки прозрѣ́ти ему́ моли́твами твои́ми дарова́лъ еси́. Тѣ́мже и на́шу душе́вную слѣпоту́ просвѣти́, мо́лимъ тя́, свѣ́та живо́тнаго наслажда́яся при́сно во Ца́рствіи Христа́ и Бо́га.

Сти́хъ: Насажде́ни въ дому́ Госпо́дни, [во дво́рѣхъ Бо́га на́шего процвѣту́тъ].

Пусты́нный жи́тель, и въ тѣлеси́ а́нгелъ, и чудотво́рецъ ди́венъ яви́лся еси́ въ странѣ́ се́й, преподо́бне о́тче на́шъ Ти́хоне приснопа́мятне, и, пріи́мь да́ръ чуде́съ отъ Бо́га, исцѣля́еши неду́жныя и освяща́еши ду́ши вѣ́рою притека́ющихъ къ тебѣ́. Сего́ ра́ди и мы́, въ честнѣ́й па́мяти твое́й веселя́щеся, любо́вію вопіе́мъ ти́: сла́ва Да́вшему ти́ крѣ́пость, сла́ва Вѣнча́вшему тя́, сла́ва Дѣ́йствующему тобо́ю всѣ́мъ исцѣле́нія.

Сла́ва, гла́съ 8:

Мíра су́етнаго пре́лесть и многомяте́жную молву́, преподо́бне, оста́вивъ любве́ ра́ди Христо́вы, въ безпло́дную пусты́ню всели́лся еси́ и безпло́тныхъ жи́тельству въ не́й подража́лъ еси́: ты́ бо ча́да послуша́нія въ не́й, плоды́ терпѣ́нія твоего́, возрасти́лъ еси́, и, безпло́дное пусты́ни ра́ломъ смире́нія воздѣ́лавъ, вѣ́рою насади́въ и благоче́стіемъ напои́въ, во сто́ труды́ и по́двиги твои́ми уплодоноси́лъ еси́, и бы́лъ еси́ свѣти́льникъ свѣ́тлый странѣ́ се́й. Моли́ непреста́нно спасти́ся душа́мъ на́шимъ.

И ны́нѣ, богоро́диченъ гла́са:

[Влады́чице, пріими́ моли́твы ра́бъ Твои́хъ и изба́ви на́съ отъ вся́кія ну́жды и печа́ли.]

Тропа́рь, гла́съ 4:

Жела́ніемъ духо́внымъ въ пусты́ню всели́лся еси́ и, та́мо невозвра́тно ше́ствовавъ Боже́ственными стезя́ми, дости́глъ еси́ въ небе́сныя оби́тели, и ны́нѣ со а́нгелы предстои́ши у престо́ла всѣ́хъ Царя́ Христа́ Бо́га, Ему́же прилѣ́жно моли́ся поми́ловати [оби́тель сію́,] гра́дъ же и лю́ди, вѣ́рою пра́зднующія пречестну́ю па́мять твою́, Ти́хоне преподо́бне, о́тче на́шъ.

Сла́ва, и ны́нѣ, [богоро́диченъ]:

Еже отъ вѣ́ка утае́нное, [и а́нгеломъ несвѣ́домое та́инство: Тобо́ю, Богоро́дице, су́щимъ на земли́ яви́ся, Бо́гъ въ несли́тномъ соедине́ніи воплоща́емь, и кре́стъ во́лею на́съ ра́ди воспріи́мъ, и́мже воскреси́въ первозда́ннаго, спасе́ отъ сме́рти ду́ши на́ша].



НА ВЕЛИЦѢЙ ВЕЧЕРНИ,
[Бла́женъ му́жъ.., 1-й антифо́нъ.] На Го́споди воззва́хъ: стихи́ры [на 8], гла́съ 5. Подо́бенъ: Ра́дуйся.

Ра́дуйся, преподо́бне о́тче Ти́хоне, а́нгеловъ собесѣ́дниче и преподо́бныхъ соприча́стниче, съ ни́миже лику́я въ небе́сныхъ оби́телѣхъ и ра́дуяся, предстои́ши у престо́ла Влады́ки Христа́ Бо́га, Ему́же прилѣ́жно моли́ся, поми́ловати Благовѣ́рнаго ИМПЕРАТОРА на́шего, и ца́рствію ЕГО невре́дну сохране́ну бы́ти, умири́ти мíръ и спасти́ ду́ши на́ша. [Два́жды.]

Ра́дуйся и весели́ся, пусты́нный жи́телю, и́нокомъ удобре́ніе, Ти́хоне треблаже́нне: ты́ бо труды́ и бдѣ́ніемъ, посто́мъ и моли́твами, воздержа́ніемъ и всено́щнымъ стоя́ніемъ Христа́ себѣ́ пріобрѣ́лъ еси́, отъ Него́же пріи́мь да́ръ благосты́ни, раздава́еши и́ бога́тно всѣ́мъ, притека́ющимъ къ ра́цѣ моще́й твои́хъ, одержи́мымъ разли́чными неду́ги да́руеши исцѣле́ніе: слѣпы́мъ — прозрѣ́ніе, хромы́мъ — хожде́ніе, разсла́бленнымъ — исправле́ніе и бѣ́снымъ, изступи́вшимъ ума́, — ра́зумъ и благомы́сліе. Тѣ́мъ мо́лимъ тя́, преподо́бне: моли́ся Христу́ Бо́гу умири́ти мíръ и спасти́ ду́ши на́ша. [Два́жды.]

Ра́дуйся, преподо́бне о́тче Ти́хоне, небе́сный человѣ́че и земны́й а́нгеле: ты́ бо во пло́ти, я́ко безпло́тенъ, пожи́лъ еси́: не да́лъ бо еси́ сна́ твои́ма очи́ма, ни вѣ́ждома дрема́нія, до́ндеже сно́мъ сме́рти усну́лъ еси́, и безпло́тныхъ ли́ки дости́глъ еси́, тѣ́мже и на небеси́ со а́нгелы ликовству́еши и за равноа́нгельное житіе́ твое́ вели́кое воздая́ніе воспрія́лъ еси́ отъ всѣ́хъ Царя́ Христа́ Бо́га, Ему́же прилѣ́жно моли́ся умири́ти мíръ и спасти́ ду́ши на́ша. [Два́жды.]

Ра́дуйся и весели́ся, Це́рковь Бо́жія, красу́йся и лику́й, ты́ бо вои́стинну яви́лася еси́ преукра́шенна, сицево́е въ себѣ́ имѣ́я сокро́вище, благосты́ни исто́чника неоскудѣва́емаго, честны́я и многоцѣле́бныя мо́щи преди́внаго чудотво́рца Ти́хона, его́же моли́твами, о Христе́, всѣ́хъ Царю́, Вѣ́рному и Благочести́вѣйшему ИМПЕРАТОРУ на́шему да́руй на враги́ побѣ́ду и одолѣ́ніе, умири́ мíръ и спаси́ ду́ши на́ша. [Два́жды.]

Сла́ва, гла́съ 8:

Пріиди́те, мона́шествующихъ мно́жество, пріиди́те, христоимени́тіи лю́діе, пріиди́те, вся́ страны́ Россíйскія земли́, смы́слъ и у́мъ отъ скве́рны очи́стивше, и единомы́сленно совоку́пльшеся, и къ Еди́ному Бо́гу взира́юще, со стра́хомъ и богобоя́зненнымъ се́рдцемъ вни́демъ въ це́рковь Го́спода и ви́димъ ра́ку чудотво́рца Ти́хона, ю́же, благоговѣ́йнѣ обстоя́ще, цѣлу́имъ и благода́рными гла́сы Христу́ Бо́гу возопіи́мъ, глаго́люще: сла́ва милосе́рдію Твоему́, Христе́ Бо́же, сла́ва человѣколю́бію Твоему́, Го́споди, сла́ва мно́жеству щедро́тъ Твои́хъ, Преблагíй Влады́ко, Иже не оста́ви на́съ, смире́нныхъ ра́бъ Твои́хъ, но призрѣ́ на ны́ съ высоты́ жили́ща Твоего́. Дарова́ на́мъ сицева́го свѣти́льника, преди́внаго чудотво́рца Ти́хона, его́же моли́твами, Го́споди, Христолюби́вому ИМПЕРАТОРУ на́шему посо́бствуй на враги́ и налѣжа́щихъ на́съ бѣ́дъ свободи́, я́ко Человѣколю́бецъ.

И ны́нѣ, богоро́диченъ:

Ца́рь Небе́сный [за человѣколю́біе на земли́ яви́ся и съ человѣ́ки поживе́, от Дѣ́вы бо Чи́стыя пло́ть пріе́мый и изъ Нея́ проше́дый съ воспрія́тіемъ, еди́нъ е́сть Сы́нъ, сугу́бъ естество́мъ, но не ѵпоста́сію. Тѣ́мже, соверше́нна Того́ Бо́га и соверше́нна Человѣ́ка вои́стинну проповѣ́дающе, исповѣ́дуемъ Христа́ Бо́га на́шего: Его́же моли́, Ма́ти Безневѣ́стная, поми́ловатися душа́мъ на́шимъ].

Проки́менъ дне́ и чте́нія три́ препо́добническая.

Прему́дрости Соломо́ни чте́ніе. [Глава́ 3.]

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Яко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе. [Глава́ 5 и 6.]

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе. [Глава́ 4.]

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ры, гла́съ 1:

Отче преподо́бне Ти́хоне, ты́ плотска́я стремле́нія всено́щнымъ стоя́ніемъ увяди́лъ еси́, у́мъ и се́рдце твое́ очища́я непреста́нными къ Бо́гу моли́твами, и боля́щимъ вра́чь изря́дный отъ Го́спода Бо́га показа́лся еси́, и ны́нѣ, преподо́бне, моли́ся дарова́ти душа́мъ на́шимъ ми́ръ и ве́лію ми́лость.

Отче богому́дре Ти́хоне, труды́ твои́ми и воздержа́ніемъ въ ли́къ по́стниковъ сподо́бился еси́ вчине́нъ бы́ти и, безстра́стіемъ укра́шенъ, всели́лся еси́ во оби́тель преподо́бныхъ и пра́ведныхъ, идѣ́же свѣ́тъ незаходи́мый и дре́во жи́зни. И ны́нѣ моли́ся дарова́ти душа́мъ на́шимъ ми́ръ и ве́лію ми́лость.

Сла́ва, гла́съ 6:

Преподо́бне о́тче, во всю́ зе́млю изы́де вѣща́ніе исправле́ній твои́хъ, тѣ́мже на небеси́ обрѣ́лъ еси́ мзду́ труда́мъ твои́мъ. Де́монская прогна́лъ еси́ по́лчища и а́нгельскія дости́глъ еси́ чи́ны, и́хже житію́ непоро́чно поревнова́лъ еси́; дерзнове́ніе имѣ́я ко Христу́ Бо́гу, ми́ръ испроси́ душа́мъ на́шимъ.

И ны́нѣ, [богоро́диченъ]:

Богоро́дице, Ты́ еси́ лоза́ и́стинная, [возрасти́вшая на́мъ Пло́дъ живота́, Тебѣ́ мо́лимся: моли́ся, Влады́чице, со святы́ми апо́столы поми́ловати ду́ши на́ша.]

На стихо́внѣ стихи́ры, гла́съ 4:

Житіе́ непоро́чное, терпѣ́ніе, и кро́тость, и любо́вь нелицемѣ́рну, воздержа́ніе безмѣ́рно, всено́щное стоя́ніе, умиле́ніе боже́ственно, вѣ́ру и наде́жду и́стинну, ми́лованіе къ скорбя́щимъ, о́тче, стяжа́въ, я́ко а́нгелъ, пожи́лъ еси́ на земли́ съ тѣ́ломъ, Ти́хоне блаже́нне, моли́твенниче о душа́хъ на́шихъ.

Сти́хъ: Честна́ предъ Го́сподемъ сме́рть преподо́бныхъ Его́.

Земны́й а́нгелъ и небе́сный человѣ́къ яви́лся еси́, преподо́бне, исто́чникъ умиле́нія, исцѣле́ній струя́, пучи́на чуде́съ, грѣ́шниковъ моли́твенниче, ма́слина Бо́жія вои́стинну плодови́та, еле́емъ трудо́въ твои́хъ возвесели́ сердца́, Ти́хоне чу́дне, вѣ́рно восхваля́ющихъ тя́ и моли́ Человѣколю́бца Бо́га отъ бѣ́дъ изба́вити любо́вію чту́щія честну́ю па́мять твою́.

Сти́хъ: Блаже́нъ му́жъ, боя́йся Го́спода, въ за́повѣдехъ [Его́ восхо́щетъ зѣло́].

Посто́мъ и воздержа́ніемъ умертви́въ мудрова́ніе тѣле́сныхъ страсте́й и превы́ше бы́въ смѣше́нія до́льнихъ, нося́ въ себѣ́ начерта́ніе невре́дно, первообра́знаго о́браза Боже́ственную добро́ту, и познава́емь ве́сь свѣтови́денъ, дѣ́йствомъ Ду́ха Свята́го, Ти́хоне о́тче на́шъ, яви́лся еси́ мона́шествующимъ удобре́ніе.

Сла́ва, гла́съ 8:

Мона́ховъ мно́жества, наста́вника тя́ почита́емъ, о́тче на́шъ Ти́хоне, твое́ю бо стезе́ю вои́стинну пра́во ходи́ти позна́хомъ, блаже́нъ еси́, Христу́ рабо́тавъ, и вра́жію обличи́лъ еси́ си́лу, а́нгеловъ собесѣ́дниче, преподо́бныхъ соприча́стниче и пра́ведныхъ, съ ни́миже моли́ся Го́сподеви, поми́ловатися душа́мъ на́шимъ.

И ны́нѣ, богоро́диченъ:

Безневѣ́стная Дѣ́во, [Яже Бо́га неизрече́нно заче́нши пло́тію, Ма́ти Бо́га Вы́шняго, Твои́хъ рабо́въ мольбы́ пріими́, Всенепоро́чная, всѣ́мъ подаю́щи очище́ніе прегрѣше́ній, ны́нѣ на́ша моле́нія пріе́млющи, моли́ спасти́ся всѣ́мъ на́мъ].

На благослове́ніи хлѣ́бовъ: Тропа́рь свята́го, два́жды. [Пи́санъ на ма́лѣй вече́рни.] И Богоро́дице Дѣ́во.., еди́ножды.




НА УТРЕНИ,
На Бо́гъ Госпо́дь: Тропа́рь преподо́бнаго, два́жды. Сла́ва, и ны́нѣ, богоро́диченъ.

По 1-мъ стихосло́віи сѣда́ленъ, гла́съ 1:

Отче Ти́хоне, ты́ плотска́я стремле́нія всено́щнымъ стоя́ніемъ увяди́лъ еси́, ду́шу же просвѣти́лъ еси́ и на небесѣ́хъ отъ Христа́ вели́кое возме́здіе воспрія́лъ [еси́]. Тѣ́мъ благоугоди́лъ еси́ Бо́гу, Ему́же моли́ся дарова́ти душа́мъ на́шимъ ми́ръ и ве́лію ми́лость. [Два́жды.]

Сла́ва, и ны́нѣ, богоро́диченъ:

Моли́твы Свои́хъ ра́бъ пріими́, Богоро́дице, и изба́ви на́съ отъ вся́кія бѣды́, я́ко ро́ждшая Христа́ Бо́га, Изба́вителя ду́шъ на́шихъ.

По 2-мъ стихосло́віи сѣда́ленъ, гла́съ 2:

Отче богому́дре Ти́хоне, ты́ подо́бникъ бы́лъ еси́ по́стникомъ, безстра́стіемъ укра́шенъ, всели́лся еси́ во оби́тель преподо́бныхъ и пра́ведныхъ, идѣ́же свѣ́тъ незаходи́мый и дре́во жи́зни, и ны́нѣ моли́ся дарова́ти душа́мъ на́шимъ ми́ръ и ве́лію ми́лость. [Два́жды.]

Сла́ва, и ны́нѣ, богоро́диченъ:

Бо́жію естеству́ бы́хомъ о́бщницы Тобо́ю, Богоро́дице Приснодѣ́во: Бо́га бо на́мъ воплоще́нна родила́ еси́. Тѣ́мже по до́лгу Тя́ вси́ благоче́стно велича́емъ.

По поліеле́и велича́ніе:

Ублажа́емъ тя́, преподо́бне о́тче Ти́хоне, [и чте́мъ святу́ю па́мять твою́, наста́вниче мона́ховъ и собесѣ́дниче а́нгеловъ].

Псало́мъ избра́нный: Терпя́ потерпѣ́хъ Го́спода, [и вня́тъ ми́ и услы́ша моли́тву мою́]...

Сѣда́ленъ, гла́съ 4:

Отче богому́дре Ти́хоне, ты́ свѣти́льникъ бы́лъ еси́, просвѣща́я Россíйскую зе́млю чуде́сными сія́ніи, и душетлѣ́нныхъ неду́гъ тму́ отгоня́я, и благоче́стно пра́зднующимъ па́мять твою́ подая́ свы́ше спаси́тельное избавле́ніе отъ бѣ́дъ и скорбе́й. И ны́нѣ моли́ся дарова́ти душа́мъ на́шимъ ми́ръ и ве́лію ми́лость. [Два́жды.]

Сла́ва, и ны́нѣ, богоро́диченъ:

Стѣна́ непобѣди́мая христіа́номъ еси́, Богоро́дице Дѣ́во, къ Тебѣ́ бо прибѣга́юще, невреди́ми пребыва́емъ и, па́ки согрѣша́юще, и́мамы Тя́ Моли́твенницу. Тѣ́мъ, благодаря́ще, вопіе́мъ Ти́: ра́дуйся, Обра́дованная, Госпо́дь съ Тобо́ю.

Степе́нна, 1-й антифо́нъ 4-го гла́са. Проки́менъ, [гла́съ 4]: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, [я́же воздаде́ ми́]? Ева́нгеліе отъ Матѳе́я, зача́ло 43.

Стихи́ра, гла́съ 6:

Преподо́бне и преблаже́нне о́тче Ти́хоне, ты́ вои́стинну сподо́бился еси́ блаже́нныя жи́зни, посто́мъ бо и бдѣ́ніемъ изнуря́я тѣ́ло свое́, о́бразъ бы́лъ еси́ и́нокомъ, и а́ще тѣле́сный ти́ язы́къ умолче́, но чудеса́ свидѣ́тельствуютъ: пусты́ня, проповѣ́дуя, ра́дуется, имѣ́я въ себѣ́ неистощи́мое сокро́вище; лю́діе же, зря́ще честны́й гро́бъ моще́й твои́хъ и чудеса́, тобо́ю соверша́емая, прославля́ютъ просла́вльшаго тя́ Го́спода, Ему́же моли́ся непреста́нно, дарова́ти Правосла́вному ИМПЕРАТОРУ на́шему на враги́ побѣ́ду и одолѣ́ніе, и вселе́ннѣй ми́ръ и ве́лію ми́лость.

Кано́нъ преподо́бному Ти́хону, гла́съ 8.

Пѣ́снь 1.

Ирмо́съ: Посѣ́ченный несѣко́маго пресѣче́, и ви́дѣ со́лнце зе́млю, ю́же не ви́дѣ; лю́таго врага́ вода́ потопи́, и непроходи́мое про́йде Изра́иль; пѣ́снь же воспѣва́шеся: Го́сподеви пои́мъ, сла́вно бо просла́вися.

Разрѣши́ мглу́ мои́хъ согрѣше́ній, Христе́ Спа́се, и не помяни́ мои́хъ грѣхо́въ мно́жества, но Твои́мъ мя́ свѣ́томъ просвѣти́, Влады́ко, и отве́рзи ми́ недосто́йніи устнѣ́, я́ко да возмогу́ воспѣва́ти уго́дника Твоего́, преблаже́ннаго Ти́хона, и́же Тебе́ ра́ди, я́ко безпло́тенъ, подвиза́ся.

Посто́мъ, и моли́твами, и сле́зными пото́ки до́мъ Пресвято́му Ду́ху себе́ угото́валъ еси́, Его́же сія́ньми, я́ко звѣзда́ свѣтоно́сная, яви́лся еси́, и́миже просвѣти́, молю́ тя́, души́ моея́ зѣ́ницы, и свѣ́томъ покая́нія озари́ мя́, и облецы́ мя́ во ору́жіе свѣ́та, я́ко да возмогу́ воспѣ́ти по́двиги твоя́, преподо́бне о́тче.

Свѣ́томъ Трисо́лнечнаго Божества́ озари́вся, преподо́бне, неви́димыхъ вра́гъ шата́нія и ко́зни низложи́въ, попра́лъ еси́, и отъ Христа́ Бо́га сугу́бъ вѣне́цъ прія́лъ еси́, и весе́ліе, и ра́дость, и сла́ву вѣ́чную наслѣ́довалъ еси́, ея́же на́мъ сподо́битися моли́твами твои́ми, моли́ Ми́лостиваго Бо́га, преблаже́нне о́тче на́шъ Ти́хоне.

Богоро́диченъ: Просвѣти́, Чи́стая, ду́шу мою́, омраче́нную грѣхо́вными страстьми́, и вѣ́чнаго мя́ пла́мене и тмы́ изба́ви хода́тайствомъ Твои́мъ, Влады́чице, я́ко да, ра́дуяся, воспою́ пресвято́е Рождество́ Твое́, Дѣ́во Ма́ти Чи́стая.

Пѣ́снь 3.

Ирмо́съ: Утверди́ся се́рдце мое́ въ Го́сподѣ, вознесе́ся ро́гъ мо́й въ Бо́зѣ мое́мъ, разшири́шася на враги́ моя́ уста́ моя́, возвесели́хся о спасе́ніи Твое́мъ.

Разрѣши́вся отъ тѣле́сныхъ у́зъ, блаже́нне, и къ высотѣ́ небе́снѣй, ра́дуяся, возше́лъ еси́, и въ пребыва́лища присножи́вущая всели́лся еси́, идѣ́же въ ли́кѣ преподо́бныхъ и пра́ведныхъ вели́кое возме́здіе отъ Христа́ Бо́га воспрія́лъ еси́, досточу́дне о́тче на́шъ Ти́хоне.

Жела́ніемъ духо́внымъ въ пусты́ню дости́глъ еси́, и въ не́й трудолю́бно подвиза́лся еси́, непреста́нными моли́твами къ Бо́гу приближа́яся, и превознося́щагося врага́ до конца́ смири́лъ еси́, тѣ́мже ны́нѣ съ невеще́ственными ли́ки, блаже́нне, водворя́ешися.

Дарова́ніе чуде́съ отъ Христа́ Бо́га сподо́бился еси́ воспрія́ти, и, я́коже со́лнце, сія́еши всю́ду исцѣле́нія, и, я́ко лучу́, испуща́еши благодѣя́нія твоя́ всѣ́мъ, вѣ́рою притека́ющимъ къ ра́цѣ моще́й твои́хъ и свѣ́тло пра́зднующимъ па́мять твою́, досточу́дне о́тче на́шъ, Ти́хоне преподо́бне.

Богоро́диченъ: Пренепоро́чная Влады́чице, моли́ Сы́на Твоего́, Христа́ Бо́га на́шего, Его́же родила́ еси́, Неискусобра́чная Дѣ́во, и млеко́мъ пита́ла еси́, Пита́теля вся́ческихъ, я́ко да ми́лостивъ бу́детъ на́мъ въ де́нь стра́шнаго прише́ствія Его́.

Сѣда́ленъ, гла́съ 4:

Стра́стное покори́лъ еси́ плотско́е мудрова́ніе и го́ршая порабо́тилъ еси́ лу́чшему, о́тче на́шъ Ти́хоне пресла́вне, сокруши́въ бѣсо́вскія ко́зни посто́мъ, сія́ніи твои́хъ добродѣ́телей возсія́лъ еси́ въ мíрѣ, я́ко луча́ со́лнечная. Сего́ ра́ди тя́ воспѣва́емъ. [Два́жды.]

Сла́ва, и ны́нѣ, богоро́диченъ:

Стѣна́ непобѣди́мая на́мъ, христіа́номъ, еси́, Богоро́дице Дѣ́во, къ Тебѣ́ бо прибѣга́юще, и́мамы Тя́ Моли́твенницу. Тѣ́мъ, благодаря́ще, вопіе́мъ Ти́: ра́дуйся, Обра́дованная, Госпо́дь съ Тобо́ю.

Пѣ́снь 4.

Ирмо́съ: Проро́къ Авваку́мъ у́мныма очи́ма прови́дѣ, Го́споди, прише́ствіе Твое́, тѣ́мъ и вопія́ше: отъ ю́га пріи́детъ Бо́гъ. Сла́ва си́лѣ Твое́й, сла́ва снизхожде́нію Твоему́.

Посто́мъ и моли́твами, бдѣ́ніемъ и воздержа́ніемъ, я́ко огне́мъ, хвра́стіе бѣсо́вское попали́лъ еси́ и, небе́сныхъ вра́тъ дости́гъ невозбра́нно, преподо́бне о́тче Ти́хоне, обрѣ́лъ еси́ е́же вну́трь вхожде́ніе, идѣ́же зри́ши жела́емаго ти́ Христа́, отъ а́нгелъ сла́вима.

Сія́ніемъ чуде́съ, я́ко луча́ со́лнечна, облиста́еши, я́ко звѣзда́ пресвѣ́тлая, озаря́еши всю́ду и, я́ко кри́нъ, Дави́дски въ пусты́ни свѣ́тло процвѣ́лъ еси́, вѣ́рныхъ сердца́ просвѣща́еши и тѣлесе́мъ здра́віе неоску́дно да́руеши всѣ́мъ, вѣ́рою притека́ющимъ къ ра́цѣ моще́й твои́хъ, преподо́бне о́тче на́шъ Ти́хоне.

Добродѣ́тельми, я́ко во броня́, обо́лкся еси́, преподо́бне, отъ Христа́ Вседержи́теля, и вся́ лука́ваго кова́рства и бра́ни до́бльственнѣ претерпѣ́въ, побѣди́лъ еси́ бѣсо́вскія полки́, тѣ́мъ ны́нѣ со а́нгелы лику́еши, съ ни́миже Христу́ Бо́гу моли́ся спасти́ вся́, почита́ющія тя́, о́тче на́шъ Ти́хоне.

Богоро́диченъ: Иже всѣ́хъ Творца́ и Го́спода ро́ждшая, Пречи́стая Дѣ́во, изба́ви на́съ му́ки и вѣ́чнаго осужде́нія, Тебя́ воспѣва́ющихъ, Богороди́тельнице Чи́стая.

Пѣ́снь 5.

Ирмо́съ: Мра́къ души́ моея́ разжени́, Свѣтода́вче Христе́ Бо́же, началоро́дную тму́ изгна́въ бе́здны, и да́руй ми́ свѣ́тъ повелѣ́ній Твои́хъ, Сло́ве, да у́тренюя, сла́влю Тя́.

Посто́мъ и воздержа́ніемъ, я́ко живото́чнымъ исто́чникомъ, напая́я себе́, кла́съ Боже́ственный возрасти́лъ еси́, и́мже пита́еши неоску́дно всѣ́хъ, вѣ́рою притека́ющихъ къ ра́цѣ моще́й твои́хъ, преподо́бне о́тче Ти́хоне.

Вѣ́ру и́стинную и любо́вь стяжа́лъ еси́ къ Тріеди́ному Бо́гу. Сего́ ра́ди устрани́вся мíра, въ пусты́ню всели́лся еси́, идѣ́же мно́гими труды́ и болѣ́зньми тѣ́ло свое́ изнури́лъ еси́, и ны́нѣ, ра́дуяся, зри́ши жела́емаго Христа́. Къ Нему́же воздви́гни ру́цѣ свои́, преподо́бне, и отъ собла́знъ вра́жіихъ пою́щія тя́ сохрани́, Ти́хоне, о́тче на́шъ.

Яко свѣти́ло вели́кое яви́лся еси́, преподо́бне, богодаро́ванными ти́ чудесы́ ве́сь мíръ просвѣща́я, и, я́ко отъ исто́чника неистоща́емаго, струи́ испуща́еши исцѣле́нія всѣ́мъ, вѣ́рою притека́ющимъ и облобыза́ющимъ ра́ку моще́й твои́хъ, да́руя здра́віе неоску́дно.

Богоро́диченъ: Изба́ви гра́дъ и лю́ди, прибѣга́ющихъ къ Тебѣ́, Богороди́тельнице Чи́стая, роди́вшая Христа́ Бо́га, Его́же пое́тъ вся́ тва́рь и трепе́щутъ го́рніи престо́ли. Того́ моли́, Всепѣ́тая, спасти́ ду́ши на́ша.

Пѣ́снь 6.

Ирмо́съ: Яко во́ды морскíя, Человѣколю́бче, волна́ми жите́йскими обурева́юся, тѣ́мже, я́ко Іо́на, та́ко вопію́ Ти́: возведи́ отъ тли́ живо́тъ мо́й, Благоутро́бне Го́споди.

Дне́сь возсія́ па́мять твоя́, преподо́бне, я́ко звѣзда́ пресвѣ́тлая, чуде́сными блиста́ньми просвѣща́еши, и мра́къ грѣхо́вный отгоня́еши, и тѣлесе́мъ здра́віе неоску́дно да́руеши, слѣпы́я просвѣща́я, разсла́бленныя укрѣпля́я и бѣ́сы прогоня́я.

Болѣ́зньми, и труды́, и зѣ́льнымъ воздержа́ніемъ душетлѣ́нныя стра́сти умертви́лъ еси́, я́ко безпло́тенъ, во пло́ти пожи́лъ еси́, свѣтлообра́зенъ всегда́ явля́яся, и дарова́нія чуде́съ сподо́бился еси́ отъ Христа́ Бо́га, больны́я и прокаже́нныя исцѣля́я и стра́ждущимъ отъ духо́въ нечи́стыхъ проще́ніе да́руя.

Красоты́ мірскíя возненави́дѣвъ, сла́ву же мимотеку́щую и бога́тство ни во что́же вмѣни́въ, еди́наго Христа́ возлюби́лъ еси́, и Тому́ все́ю душе́ю прилѣпи́лся еси́, и отъ Него́ прія́лъ еси́ небе́сное бога́тство и сла́ву вѣ́чную.

Богоро́диченъ: Ра́дуйся, пресвѣ́тлый Свѣти́льниче, Нескве́рная Агнице, Пречи́стая Влады́чице; ра́дуйся ро́ждшая отъ пречи́стую боку́ Твое́ю Агнца и Па́стыря, Христа́ Бо́га на́шего, Его́же моли́ спасти́ Тя́ воспѣва́ющихъ.

Конда́къ, гла́съ 8:

Христо́вою любо́вію уязви́вся, преподо́бне, во слѣ́дъ Его́ невозвра́тно ше́ствовалъ еси́, посто́мъ и воздержа́ніемъ плотскíя стра́сти умертви́лъ еси́, бдѣ́ніемъ же и моли́твами вселука́ваго врага́ до конца́ низложи́лъ еси́, и слеза́ми, я́ко еле́емъ, свѣщу́ свѣ́тлу себе́ угото́валъ еси́; тѣ́мже въ небе́сныя оби́тели невозбра́нно вше́лъ еси́, идѣ́же, ра́дуяся, Го́сподеви предстои́ши, Ему́же прилѣ́жно моли́ся, мо́лимъ тя́, я́ко да ми́лостивъ на́мъ бу́детъ въ де́нь стра́шнаго Его́ прише́ствія, и да не пребу́демъ и мы́ внѣ́ черто́га Христо́ва, но да сподо́битъ ны́ одесну́ю Себе́ ста́ти моли́твами твои́ми, преподо́бне, да зове́мъ ти́: ра́дуйся, богому́дре о́тче на́шъ Ти́хоне.

Пѣ́снь 7.

Ирмо́съ: Халде́йская пе́щь, огне́мъ распаля́емая, ороша́шеся Ду́хомъ, Бо́жіимъ предстоя́ніемъ, о́троцы поя́ху: благослове́нъ еси́, Бо́же оте́цъ на́шихъ.

Отлучи́вся мірска́го пристра́стія, бо́дренными моли́твами и всено́щнымъ стоя́ніемъ жи́знь свою́ препроводи́лъ еси́ и Ду́ху Пресвято́му хра́мъ себе́ содѣ́лалъ еси́, Его́же дѣ́йствомъ бѣсо́вскія полки́ побѣди́лъ еси́ и безъ вѣ́сти си́хъ сотвори́лъ еси́.

Любве́ ра́ди Христо́вы, Ти́хоне преподо́бне, въ пусты́няхъ и гора́хъ живы́й, плотско́е мудрова́ніе до конца́ умертви́лъ еси́, крѣ́пкимъ поще́ніемъ и жесто́кимъ воздержа́ніемъ жи́знь свою́ соверши́лъ еси́, и на небеси́ житіе́ себѣ́ стяжа́лъ еси́, идѣ́же святы́хъ ду́си ра́дуются и ликовству́ютъ.

Влады́чнему смире́нію подража́лъ еси́, преподо́бне, тѣ́сный и приско́рбный пу́ть во́лею ше́ствовавъ: не пощадѣ́лъ бо еси́ пло́ти своея́, но преда́лъ еси́ ю́ на по́двиги и труды́. Сего́ ра́ди отъ Вседержи́тельныя руки́ прія́лъ еси́ неувяда́емый вѣне́цъ.

Богоро́диченъ: Иже пре́жде всѣ́хъ вѣ́къ Бо́гъ Сы́й въ Твою́ пречи́стую утро́бу воплоти́ся неизрѣче́ннымъ соше́ствіемъ, Богоотрокови́це Чи́стая и Неискусобра́чная Дѣ́во: Ты́ бо во всѣ́хъ ро́дѣхъ избра́ся бы́ти жили́ще Христу́ Бо́гу, Его́же моли́, Всепѣ́тая, спасти́ ду́ши, воспѣва́ющія Сы́ну Твоему́: оте́цъ на́шихъ Бо́же, благослове́нъ еси́.

Пѣ́снь 8.

Ирмо́съ: На горѣ́ святѣ́й просла́вльшася и въ купинѣ́ огне́мъ Приснодѣ́вы Моисе́ови та́йну я́вльшаго, Го́спода по́йте и превозноси́те во вся́ вѣ́ки.

То́ки сле́зными страсте́й пучи́ну изсуши́лъ еси́, и вся́ лука́ваго кова́рства крѣ́пкимъ воздержа́ніемъ, я́ко сѣ́ть, разто́ргнулъ еси́, сего́ ра́ди дости́глъ еси́ въ го́рній Іерусали́мъ и та́мо со а́нгелы сла́виши Еди́наго Тріѵпоста́снаго Бо́га, Ему́же не преста́й моля́ся, изба́витися на́мъ бѣ́дъ и скорбе́й, отъ вся́кія ну́жды и печа́ли моли́твами твои́ми, преподо́бне о́тче на́шъ Ти́хоне.

Гро́бъ моще́й твои́хъ, преподо́бне, я́ко ма́слина плодови́та, яви́ся въ це́ркви Животворя́щаго Креста́ Госпо́дня, отъ него́же, я́ко плоды́, боля́щимъ разли́чными неду́ги подаю́тся исцѣле́нія, бѣсо́вскія полки́, я́коже съ высоты́ мо́лніею, посѣка́ются и попаля́ются, вѣ́рныхъ же сердца́ къ Боже́ственному ра́зуму наставля́ются.

Воздержа́ніемъ и чистото́ю, я́коже крило́ма, впери́вся, отъ земны́хъ къ вы́шнимъ свѣ́тлостемъ пресла́вно восте́клъ еси́ и, Трисо́лнечнаго Божества́ заре́ю просвѣти́вся, всю́ду сія́еши, я́коже свѣти́ло. Тѣ́мже мо́лимъ тя́, преподо́бне: моли́ Милосе́рдаго Бо́га просвѣти́ти ду́ши на́ша и тѣлеса́ очи́стити на́мъ, вѣ́рою творя́щимъ святу́ю па́мять твою́, досточу́дне о́тче на́шъ Ти́хоне.

Богоро́диченъ: Чи́стая и Всенепоро́чная Дѣ́во, Яже во святы́хъ Свята́го почива́ющаго родила́ еси́, Бо́га Сло́ва, Его́же моли́, Влады́чице, изба́вити на́съ напа́стей, и бѣ́дъ, и лю́таго вѣ́чнаго осужде́нія, Тебе́ бо Предста́тельницу вси́, су́щіи въ печа́лехъ, стяжа́хомъ, я́ко Ро́ждшую Спасе́ніе на́ше. Ему́же пое́мъ: благослови́те Го́спода, по́йте и превозноси́те Его́ во вѣ́ки.

Пѣ́снь 9.

Ирмо́съ: Благослове́нъ Госпо́дь Бо́гъ Изра́илевъ, воздви́гнувый ро́гъ спасе́нія на́мъ въ дому́ Дави́довѣ, Отрока Своего́, въ ни́хже посѣти́ на́съ Восто́къ съ высоты́ и напра́вилъ ны́ е́сть на пу́ть ми́ра.

Мíра преоби́дѣвъ, бога́тство же и сла́ву, я́ко пра́хъ, вмѣни́въ, Христа́ еди́наго возлюби́лъ еси́ и, къ Тому́ потща́вся усе́рдно пріити́, всели́лся еси́ въ пусты́ню, въ не́йже обрѣ́лъ еси́ пра́вый пу́ть, и́мже небла́зненно преше́лъ еси́ къ жела́емому ти́ Влады́цѣ Христу́, посто́мъ, и моли́твами, и всено́щнымъ стоя́ніемъ.

Христо́вымъ раче́ніемъ па́че огня́ распала́емь, настоя́щая же и мимотеку́щая, я́ко уме́ты, вмѣни́въ, стра́сти тѣле́сныя, я́ко плѣ́нника вери́гами, посто́мъ связа́лъ еси́ и ду́хови повину́лся еси́. Сего́ ра́ди стра́шенъ враго́мъ яви́лся еси́ и сла́венъ человѣ́комъ, Ти́хоне преподо́бне.

Очи́стивъ у́мъ сво́й, преподо́бне, и въ пусты́ни, я́ко въ ца́рстихъ черто́зѣхъ, со мно́гимъ весе́ліемъ живы́й, душетлѣ́нныя стра́сти воздержа́ніемъ умертви́лъ еси́, и сле́зными пото́ки лука́ваго змія́, я́ко въ мо́ри, погрузи́лъ еси́, и, я́ко пра́хъ, того́ бе́зъ вѣ́сти сотвори́лъ еси́, досточу́дне о́тче на́шъ Ти́хоне.

Богоро́диченъ: Ты́ еси́, Пречи́стая, всему́ мíру прибѣ́жище, Богороди́тельнице Марíе, мірски́хъ мя́ собла́знъ и страсте́й тѣле́сныхъ свободи́, и вѣ́чнующія му́ки и гее́нны изба́ви, и прича́стника мя́ сотвори́ небе́сному Ца́рствію хода́тайствомъ Твои́мъ, Влады́чице.

Свѣти́ленъ, гла́съ 8. Подо́бенъ: Жены́, услы́шите.

Процвѣ́лъ еси́, я́ко фи́никсъ, Дави́дски, о́тче, и оби́тель яви́лся еси́ Ду́ха Пресвята́го, Иже сла́вна тя́ вселе́ннѣй показа́. О на́съ непреста́нно моли́, почита́ющихъ вѣ́рою пречестну́ю па́мять твою́, преподо́бне о́тче на́шъ Ти́хоне. [Два́жды.]

Сла́ва, и ны́нѣ, богоро́диченъ:

Тя́ пѣ́сньми немо́лчными ублажа́емъ, Дѣ́во, я́ко отъ Тро́ицы Еди́наго родила́ еси́, Богоро́дице, и но́сиши на боже́ственную руку́ Пребога́тое Сло́во, Еже непремѣ́нно и неизмѣ́нно.

На хвали́техъ стихи́ры, гла́съ 8. Подо́бенъ: Му́ченицы Госпо́дни.

Преподо́бенъ и че́стенъ, свѣти́льникъ боже́ственный и свѣтоно́сный подъ спу́домъ жите́йскія толстоты́ никогда́же скрыва́ется, но на версѣ́ полага́етъ его́ высо́кихъ чуде́съ Человѣколю́бецъ. Того́ моли́твами, Христе́, да́руй лю́демъ Твои́мъ ве́лію ми́лость. [Два́жды.]

На ра́ло возложи́лъ еси́, всече́стне, дѣ́ланіе руку́ твое́ю, дѣ́лающу ти́ всегда́ боже́ственныя, и не возврати́лся еси́ зря́ вспя́ть, тѣ́мже бы́лъ еси́ упра́вленъ во Ца́рствіе Христа́, вопло́щшагося Бо́га, во спасе́ніе душа́мъ на́шимъ.

Въ ладіи́ тѣле́снѣй вози́мь, кро́ткими дыха́ніи кро́ткаго Ду́ха, легко́ преше́лъ еси́ жите́йскую пучи́ну, му́дре, и на Би́серѣ многоцѣ́ннѣмъ твоя́ имѣ́нія прода́въ, и обрѣ́тъ Его́, въ себѣ́ удержа́лъ еси́, блаже́нъ бы́въ Боже́ственными добро́тами Его́.

Сла́ва, гла́съ 5:

Преподо́бне о́тче, гла́съ Ева́нгелія услы́шавъ, мíръ оста́вилъ еси́, бога́тство и сла́ву ни во что́же вмѣни́въ, и всѣ́мъ, послу́шающимъ тя́, вопія́лъ еси́: возлюби́те Бо́га, и обря́щете благода́ть вѣ́чную, и ничто́же предпочти́те, па́че любве́ Его́, да егда́ пріи́детъ во сла́вѣ Свое́й, тогда́ обря́щете благода́ть со всѣ́ми святы́ми. Тѣ́хъ моли́твами и уго́дника Твоего́, Влады́ко Христе́, сохрани́ и спаси́ ду́ши на́ша.

И ны́нѣ, богоро́диченъ, [гла́съ то́йже]:

Блажи́мъ Тя́, Богоро́дице Дѣ́во, и сла́вимъ Тя́, вѣ́рніи, по до́лгу, гра́дъ непоколеби́мый, стѣ́ну необори́мую, тве́рдую Предста́тельницу и прибѣ́жище ду́шъ на́шихъ.

Та́же: Славосло́віе вели́кое. [Ектеніи́] и отпу́стъ.




НА ЛИТУРГІИ,

Блаже́нна, отъ кано́на пѣ́снь 3-я и 6-я. Проки́менъ, гла́съ 4: Честна́ предъ Го́сподемъ* [сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми?] Апо́столъ къ Гала́томъ, зача́ло 213. [Аллилу́ія, гла́съ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́.] Ева́нгеліе отъ Луки́, зача́ло 24. Прича́стенъ: Въ па́мять вѣ́чную [бу́детъ пра́ведникъ, отъ слу́ха зла́ не убои́тся].

Источникъ: Слу́жба со Ака́ѳистомъ преподо́бному отцу́ на́шему Тѵ́хону, Лу́хскому чудотво́рцу. — Изда́ніе второ́е. — СПб.: Въ Сѵнода́льной Тѵпогра́фіи, 1885. — С. 3-30, 74-82.

/ Къ оглавленію раздѣла /


Наверхъ / Къ титульной страницѣ

0