Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 21 октября 2017 г. Сейчасъ на порталѣ посѣтителей - 19.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́нія въ 16-й де́нь.
Слу́жба преподо́бному отцу́ на́шему Ти́хону, Калу́жскому чудотво́рцу.

НА ВЕЛИЦѢЙ ВЕЧЕРНИ,
Блаже́нъ му́жъ.., 1-й антифо́нъ. На Го́споди воззва́хъ: стихи́ры на 8, гла́съ 6. Подо́бенъ: Всю́ отложи́вше.

Вся́ земна́я оста́вилъ еси́,* къ небе́снымъ возложи́въ у́мъ тво́й,* Христу́ еди́ному въ слѣ́дъ ходи́ти восхотѣ́лъ еси́,* преподо́бне о́тче на́шъ Ти́хоне;* сего́ ра́ди безмо́лвно жи́ти взыска́лъ еси́,* въ пусты́ню уклони́выйся,* въ не́йже подвиза́вся,* житіе́ а́нгельское притяжа́лъ еси́.* Того́ ра́ди благода́ть пріе́мъ отъ Бо́га* исцѣля́ти неду́ги разли́чныя,* Тому́ моли́ся, преподо́бне,* поми́ловатися душа́мъ на́шимъ. [Два́жды.]

Вся́ оста́вилъ еси́* жите́йскія молвы́ мíра сего́, преподо́бне,* посто́мъ и моли́твами вооружи́въ себе́,* искуше́нія мно́га претерпѣ́лъ еси́,* положи́въ основа́ніе добродѣ́телей,* къ высотѣ́ безстра́стія дости́глъ еси́,* ума́ высо́кое смире́ніемъ возве́лъ еси́ Бо́гу,* отъ Него́же пріе́мъ благода́ть* исцѣля́ти неду́ги разли́чныя,* преподо́бне о́тче на́шъ Ти́хоне,* Тому́, блаже́нне, моли́ся* о душа́хъ на́шихъ. [Два́жды.]

Вся́ оста́вилъ еси́,* и оте́чество твое́,* и, коне́чнаго ра́ди смире́нія твоего́* воспріи́мъ и́ноческій о́бразъ,* всели́лся еси́ въ пусты́ни,* въ не́йже устро́ивъ хра́мъ боголѣ́пнаго Преображе́нія* и собра́въ учени́къ мно́жество,* въ постѣ́ и воздержа́ніи богоуго́дно подвиза́лся еси́.* Сего́ ра́ди дарова́ тебѣ́ Бо́гъ* исцѣля́ти неду́ги разли́чныя.* Ему́же моли́ся,* преподо́бне о́тче на́шъ Ти́хоне,* спасти́ся душа́мъ на́шимъ.

Боже́ственныя ра́дости* и весе́лія духо́внаго* богоспаса́емый гра́дъ Калу́га испо́лнися* въ свѣтоно́снѣй па́мяти твое́й, о́тче Ти́хоне;* мы́ же, духо́вная твоя́ ча́да,* ра́достнѣ соше́дшеся, свѣ́тло пра́зднуемъ,* боголѣ́пную сла́ву возсыла́юще прославля́ющему тя́ Бо́гу.* Ему́же, преподо́бне о́тче на́шъ, моли́ся* за творя́щихъ па́мять твою́,* спасти́ ду́ши на́ша.

Свѣти́ло вели́кое* яви́лся еси́ на́мъ,* преподо́бне о́тче на́шъ Ти́хоне,* просвѣща́я страну́ сію́* заря́ми изря́дныхъ чуде́съ твои́хъ:* се́ бо любо́вію пра́зднующимъ* и съ вѣ́рою приходя́щимъ* къ твоему́ цѣльбоно́сному гро́бу* исцѣле́нія неоску́дно подае́ши.* Христа́ Бо́га моли́* согрѣше́ній оставле́ніе дарова́ти душа́мъ на́шимъ* и ве́лію ми́лость.

Преподо́бне о́тче богоблаже́нне Ти́хоне,* жесто́кимъ твои́мъ житіе́мъ,* во мзду́ трудо́въ твои́хъ,* сподо́бился еси́ обрѣсти́* богода́ненъ да́ръ благода́тныхъ исцѣле́ній:* се́ бо съ вѣ́рою приходя́щіи* къ цѣльбоно́сному твоему́ гро́бу* исцѣле́ніе пріе́млютъ.* Тѣ́мже, я́ко имѣ́я дерзнове́ніе ко Го́споду,* Того́ моли́ Це́рквамъ единомы́сліе низпосла́ти,* Импера́тору на́шему здра́віе дарова́ти* и всему́ наслѣ́дію и держа́вѣ Его́,* и душа́мъ на́шимъ ве́лію ми́лость.

Сла́ва, гла́съ то́йже:

Пріиди́те дне́сь, правосла́вніи Россíйстіи лю́діе, обстоя́ще всечестну́ю ра́ку свята́го отца́ на́шего Ти́хона, благоче́стнѣ восхва́лимъ его́, и, ра́достно пою́ще, псало́мская пѣ́нія любо́вію принесе́мъ ему́, и, свѣ́тло всепра́зднственная воспѣва́юще, си́це рце́мъ: ра́дуйся, свѣти́льниче многосвѣ́тлый мона́шескаго собра́нія; ра́дуйся, боля́щихъ цѣли́телю; ра́дуйся, те́плый засту́пниче; ра́дуйся, утвержде́ніе и си́ло вѣ́рою тя́ чту́щихъ; ра́дуйся, похвало́ гра́ду на́шему Калу́гѣ и защище́ніе. Отче на́шъ Ти́хоне, моли́ Христа́ Бо́га о держа́вѣ благочести́вѣйшаго Импера́тора на́шего, на враги́ побѣ́ду Ему́ дарова́ти, и на́съ, си́рыхъ, не забу́ди, но пребыва́й съ на́ми, ча́ды твои́ми, и моли́ся за ны́ ко Го́споду, да спасе́тъ ду́ши на́ша.

И ны́нѣ, богоро́диченъ: Кто́ Тебе́ не ублажи́тъ...
Вхо́дъ. Проки́менъ дне́ и чте́нія три́.

При́тчей чте́ніе.

Па́мять пра́веднаго съ похвала́ми, и благослове́ніе Госпо́дне на главѣ́ его́. Блаже́нъ человѣ́къ, и́же обрѣ́те прему́дрость, и сме́ртенъ, и́же увѣ́дѣ ра́зумъ. Лу́чше бо сію́ купова́ти, не́жели зла́та и сребра́ сокро́вища. Честнѣ́йшая же е́сть ка́меній многоцѣ́нныхъ, все́ же честно́е недосто́йно ея́ е́сть. Долгота́ бо дне́й и лѣ́та живота́ въ десни́цѣ ея́, въ шу́йцѣ же ея́ бога́тство и сла́ва. Отъ у́стъ ея́ исхо́дитъ пра́вда, зако́нъ же и ми́лость на язы́цѣ но́ситъ. Послу́шайте у́бо мене́, о ча́да, честна́я бо реку́, и блаже́нъ человѣ́къ, и́же пути́ моя́ сохрани́тъ: исхо́ди бо мои́ — исхо́ди живота́, и уготовля́ется хотѣ́ніе отъ Го́спода. Сего́ ра́ди молю́ ва́съ и предлага́ю мо́й гла́съ сыново́мъ человѣ́ческимъ. Я́ко а́зъ, прему́дрость, устро́ихъ совѣ́тъ, и ра́зумъ и смы́слъ азъ призва́хъ. Мо́й совѣ́тъ и утвержде́ніе, мо́й ра́зумъ, моя́ же крѣ́пость. Азъ мене́ лю́бящія люблю́, и́щущіи же мене́ обря́щутъ благода́ть. Разумѣ́йте у́бо, незло́бивіи, кова́рство, ненака́заніи же, прилага́йте сердца́. Послу́шайте мене́ и па́ки, честна́я бо реку́, и отве́рзу отъ усте́нъ пра́вая, я́ко и́стинѣ поучи́тся горта́нь мой, ме́рзки же пре́до мно́ю устны́ лжи́выя. Съ пра́вдою вси́ глаго́лы у́стъ мои́хъ, ничто́же въ ни́хъ стро́потно, ниже́ развраще́нно. Вся́ пра́ва су́ть разумѣва́ющимъ и про́ста обрѣта́ющимъ ра́зумъ. Науча́ю бо ва́съ и́стинѣ, да бу́детъ о Го́сподѣ наде́жда ва́ша, и испо́лнитеся Ду́ха.

При́тчей чте́ніе.

Уста́ пра́веднаго ка́плютъ прему́дрость, язы́къ же непра́веднаго поги́бнетъ. Устнѣ́ муже́й пра́ведныхъ ка́плютъ благода́ти, уста́ же нечести́выхъ развраща́ются. Мѣ́рила льсти́вая ме́рзость предъ Го́сподемъ, вѣ́съ же пра́ведный прія́тенъ Ему́. Идѣ́же а́ще вни́детъ досажде́ніе, та́мо и безче́стіе, уста́ же смире́нныхъ поуча́ются прему́дрости. Соверше́ніе пра́выхъ наста́витъ и́хъ, и поползнове́ніе отрица́ющихся упасе́тъ и́хъ. Не по́льзуютъ имѣ́нія въ де́нь я́рости, пра́вда же изба́витъ отъ сме́рти. Умеръ пра́ведный, оста́ви раска́яніе, нару́чна же быва́етъ и посмѣя́тельна нечести́выхъ па́губа. Пра́вда непоро́чнаго исправля́етъ пути́, въ нече́стіе же па́даетъ непра́вда. Пра́вда муже́й пра́выхъ изба́витъ и́хъ, безсовѣ́стіемъ же плѣня́ются беззако́нніи. Сконча́вшуся му́жу пра́ведну, не поги́бнетъ наде́жда, похвала́ же нечести́выхъ поги́бнетъ. Пра́ведникъ отъ ло́ва убѣ́гнетъ, въ него́же мѣ́сто предае́тся нечести́вый. Во устѣ́хъ нечести́выхъ сѣ́ть гра́жданомъ, чу́вство же пра́ведныхъ благопоспѣ́шное. Во благи́хъ пра́ведныхъ испра́вится гра́дъ, и въ поги́бели нечести́выхъ ра́дованіе. Во благослове́ніи пра́выхъ возвы́сится гра́дъ, усты́ же нечести́выхъ раскопа́ется. Руга́ется гра́жданомъ лише́нный ра́зума, му́жъ же му́дрый безмо́лвіе во́дитъ.

Прему́дрости Соломо́ни чте́ніе.

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ра хра́ма, и свята́го стихи́ры, гла́съ 2:

Пріиди́те, боголюбе́зное ста́до, мона́шеское собра́ніе, съ любопра́зднственными чи́нми христіа́нскаго мно́жества, боголюби́ваго гра́да Калу́ги лю́діе, дне́сь восхва́лимъ Христо́ва рачи́теля, жи́теля пусты́ннаго, мона́ховъ прему́драго наста́вника, по́стниковъ похвалу́, похва́льныя пѣ́сни принесе́мъ ему́, глаго́люще: ра́дуйся, ре́вности боже́ственныя испо́лненный; ра́дуйся, труды́ по́стническими здѣ́ подвиза́яся, проти́внаго му́жески побѣди́лъ еси́; ра́дуйся, я́ко того́ ра́ди дарова́ тебѣ́ Бо́гъ благода́ть исцѣле́ній. Его́же моли́, преподо́бне о́тче на́шъ Ти́хоне, спасти́ ду́ши на́ша.

Въ ти́хое и небу́рное приста́нище безмо́лвія вше́лъ еси́, идѣ́же съ Бо́гомъ еди́нъ безмо́лвствовалъ еси́, та́же житіе́ а́нгельское проходи́лъ еси́, благоукраша́я себе́ труды́ по́стническими, и́миже присносу́щнаго свѣ́та Христа́ Бо́га узрѣ́лъ еси́. Его́же непреста́нно моли́ отъ вся́кихъ зо́лъ на́съ изба́вити, всечестно́е твое́ успе́ніе пра́зднующихъ, и спасти́ ду́ши на́ша.

Вся́ оста́вивъ земна́я, къ небе́снымъ у́мъ тво́й впери́лъ еси́, въ слеза́хъ и воздыха́ніихъ жи́вый вся́ дни́ твоя́, мы́сленную добро́ту зрѣ́ти жела́лъ еси́; сего́ ра́ди вся́къ ви́дъ добродѣ́телей проходи́лъ еси́ и небе́сныхъ селе́ній дости́глъ еси́, идѣ́же свѣ́тъ невече́рній сія́етъ Христа́ Бо́га на́шего. Ему́же непреста́нно моли́ся, преподо́бне о́тче на́шъ Ти́хоне, спасти́ся душа́мъ на́шимъ.

Сла́ва, гла́съ 5:

Ра́дуйтеся и весели́теся о Го́сподѣ, благочести́выхъ собра́ніе, такова́го свѣти́льника — преподо́бнаго отца́ Ти́хона иму́ще, пресвѣ́тлымъ житіе́мъ свои́мъ всю́ страну́ сію́ озари́вшаго, его́же Бо́гъ чудесы́ просла́ви: се́ бо оби́льна исцѣле́нія да́руетъ всѣ́мъ, приходя́щимъ къ нему́ съ вѣ́рою. Тѣ́мже, обстоя́ще всечестну́ю ра́ку его́, мо́лимся ему́, глаго́люще: о всеблаже́нне о́тче на́шъ Ти́хоне, непреста́нно моли́ся Христу́ Бо́гу, дарова́ти Импера́тору на враги́ побѣ́ду и одолѣ́ніе, и душа́мъ на́шимъ ми́ръ и ве́лію ми́лость.

И ны́нѣ, [богоро́диченъ], гла́съ то́йже: Хра́мъ и две́рь еси́...

На стихо́внѣ стихи́ры, гла́съ 8:

Преподо́бне о́тче на́шъ Ти́хоне,* ты́ отъ ю́ности Христу́ послѣ́довалъ еси́,* страну́ оте́чества твоего́ оста́вль,* и въ пусты́ню всели́лся еси́,* идѣ́же, вся́ земна́я мудрова́нія отри́нувъ,* по́стническими труды́ Бо́гу угоди́лъ еси́,* пло́ть твою́ ду́ху покори́вый,* того́ ра́ди предстоя́ти престо́лу Влады́чню* на небесѣ́хъ сподо́бился еси́.* Его́же моли́, блаже́нне,* о и́же вѣ́рою* пречестну́ю твою́ па́мять почита́ющихъ.

Сти́хъ: Честна́ предъ Го́сподемъ* сме́рть преподо́бныхъ Его́.

Преподо́бне о́тче Ти́хоне,* ты́ отъ да́льнія страны́* въ пусты́ню сію́ дости́глъ еси́* и струя́ми сле́зъ твои́хъ напои́лъ еси́ ю́,* въ не́йже плоды́ пра́вды возрасти́лъ еси́:* собра́въ учени́къ мно́жество* и богоуго́дно съ ни́ми подвиза́вся,* Святы́мъ Ду́хомъ просвѣти́лся еси́,* благода́ть исцѣле́ній отъ Бо́га пріе́мъ.* Его́же моли́ спасти́ и просвѣти́ти ду́ши на́ша.

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

Преподо́бне о́тче, блаже́нне Ти́хоне,* ты́, и́го Христо́во на ра́мо твое́ усе́рдно взе́мъ,* коне́чнаго ра́ди твоего́ смире́нія* высоты́ добродѣ́телей дости́глъ еси́.* Предувѣ́дѣвъ же твое́ къ Бо́гу отше́ствіе* и поучи́въ о по́льзѣ душе́внѣй со́бранныя тобо́ю ученики́,* пресели́лся еси́ къ вѣ́чнымъ оби́телемъ;* и по преставле́ніи твое́мъ* мно́гая отъ гро́ба твоего́ исцѣле́нія источа́еши* съ вѣ́рою приходя́щимъ и любо́вію твою́ па́мять соверша́ющимъ.* Тѣ́мже испроси́ на́мъ отъ Христа́ Бо́га* ми́ръ и ве́лію ми́лость.

Сла́ва, гла́съ 6:

Весели́ся и ра́дуйся, свята́я и боголюбе́зная пусты́ня, воспита́вшая досточу́днаго сего́ отца́ на́шего Ти́хона, его́же житіе́мъ освяти́ся мѣ́сто, на не́мже въ жи́зни се́й вѣ́рою Го́сподеви послужи́лъ е́сть: се́ бо и по преставле́ніи свое́мъ источа́етъ оби́льная исцѣле́нія всѣ́мъ, приходя́щимъ съ вѣ́рою къ цѣльбоно́сному его́ гро́бу и глаго́лющимъ: о всеблаже́нне о́тче на́шъ Ти́хоне, непреста́нно моли́ся Христу́ Бо́гу, благочести́вѣйшему Импера́тору на́шему на враги́ побѣ́ду и одолѣ́ніе дарова́ти, на́мъ же, христоимени́тымъ лю́демъ, ми́ръ и ве́лію ми́лость.

И ны́нѣ, [богоро́диченъ]: Творе́цъ и Изба́витель мо́й...

Тропа́рь, гла́съ 4:

Яко свѣти́льникъ пресвѣ́тлый, яви́лся еси́ въ Россíйстѣй земли́, преподо́бне о́тче на́шъ Ти́хоне, въ пусты́ни всели́вся, въ не́йже преходя́ жесто́кое жи́тельство, я́ко безпло́тенъ, пожи́лъ еси́, сего́ ра́ди и чуде́съ дарова́ніемъ обогати́ тя Бо́гъ. Тѣ́мъ и мы́, притека́юще къ ра́цѣ моще́й твои́мъ, уми́льно глаго́лемъ: о́тче преподо́бне, моли́ Христа́ Бо́га спасти́ся душа́мъ на́шимъ.

Сла́ва, и ны́нѣ, [богоро́диченъ]: Еже отъ вѣ́ка утае́нное...
Аще же е́сть бдѣ́ніе, глаго́лемъ тропа́рь преподо́бному, два́жды, и Богоро́дице Дѣ́во.., еди́ножды.



НА УТРЕНИ,
[На Бо́гъ Госпо́дь:] Тропа́рь свята́го, два́жды. Сла́ва, и ны́нѣ, богоро́диченъ: Еже отъ вѣ́ка утае́нное...

По 1-мъ стихосло́віи сѣда́ленъ, гла́съ 8:

Преподо́бне о́тче на́шъ Ти́хоне, мно́гимъ воздержа́ніемъ жи́знь твою́ украси́въ, ученико́мъ твои́мъ показа́лъ еси́ терпѣ́нія и смиренному́дрія пу́ть, веду́щій въ жи́знь вѣ́чную: са́мъ же, ева́нгельскому уче́нію послѣ́дуя, жесто́кимъ житіе́мъ пло́ть твою́ изнури́лъ еси́. Тѣ́мже ны́нѣ на небесѣ́хъ водворя́яся и Тріѵпоста́сному Божеству́ предстоя́, преподо́бне, моли́ Христа́ Бо́га согрѣше́ній оставле́ніе дарова́ти чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, [богоро́диченъ]:

Небе́сную две́рь и киво́тъ, всесвяту́ю го́ру, свѣ́тлый о́блакъ воспои́мъ, неопали́мую купину́, слове́сный ра́й, Евы воззва́ніе, вселе́нныя всея́ вели́кое сокро́вище, я́ко спасе́ніе въ Не́й содѣ́лася мíру и оставле́ніе дре́внихъ согрѣше́ній. Сего́ ра́ди вопіе́мъ Ей: моли́ся Сы́ну Твоему́ прегрѣше́ній оставле́ніе дарова́ти благоче́стно покланя́ющимся всесвято́му Рождеству́ Твоему́.

По 2-мъ стихосло́віи сѣда́ленъ, гла́съ 4:

Не терпя́ мірска́го наси́лія, удали́лся еси́ въ пусты́ню, въ не́йже благоче́стно Христу́ рабо́тавъ, увяди́лъ еси́ плотско́е мудрова́ніе воздержа́ніемъ и надъ страстьми́ тѣле́сными воцари́лся еси́. Тѣ́мже предстоя́ ны́нѣ престо́лу Госпо́дню, всѣ́мъ на́мъ, вѣ́рою приходя́щимъ къ твоему́ цѣльбоно́сному гро́бу, Ти́хоне всече́стне, испроси́ ве́лію ми́лость. [Два́жды.]

Сла́ва, и ны́нѣ, [богородиченъ]:

Безневѣ́стная Чи́стая Богоро́дице Дѣ́во, еди́на Предста́тельнице вѣ́рныхъ и покро́ве, бѣ́дъ, и скорбе́й, и лю́тыхъ обстоя́ній вся́ изба́ви, на Тя́ упова́ніе иму́щія, Отрокови́це, и ду́ши на́ша спаси́ боже́ственными мольба́ми Твои́ми.

По поліеле́и сѣда́ленъ, гла́съ 8:

Въ пусты́ню, преблаже́нне, всели́лся еси́ и, въ не́й проходя́ жесто́кое жи́тельство, я́коже безпло́тенъ, пожи́лъ еси́, ли́къ мона́шествующихъ сла́внѣ совокупи́въ. Тѣ́мже, богоно́сне о́тче на́шъ Ти́хоне, моли́ Христа́ Бо́га согрѣше́ній оставле́ніе дарова́ти чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, [богородиченъ]:

Яко дѣ́ву и еди́ну въ жена́хъ, Тя́, безъ сѣ́мене ро́ждшую Бо́га пло́тію, вси́ ублажа́емъ, ро́ди человѣ́честіи: о́гнь бо всели́ся въ Тя́ Божества́, и я́ко Младе́нца млеко́мъ пита́еши Зижди́теля и Го́спода. Тѣ́мъ, а́нгельскій и человѣ́ческій ро́дъ, досто́йно сла́вимъ пресвято́е Рождество́ Твое́ и согла́сно вопіе́мъ Ти́: моли́ Христа́ Бо́га согрѣше́ній оставле́ніе дарова́ти покланя́ющимся вѣ́рою пресвято́му Рождеству́ Твоему́.

Степе́нна, 1-й антифо́нъ 4-го гла́са. Проки́менъ, гла́съ 4: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Вся́кое дыха́ніе... Ева́нгеліе отъ Матѳе́я, зача́ло 43.

По 50-мъ псалмѣ́ стихи́ра, гла́съ 6:

Пріиди́те, правосла́вныхъ собо́ри, свѣ́тло пра́зднуимъ па́мять преподо́бнаго отца́ на́шего Ти́хона, по́стниковъ похвалу́, пусты́ни украси́теля, благоче́стія учи́теля, свѣ́томъ благода́ти просвѣще́ннаго, — раздая́теля боже́ственныхъ сокро́вищъ, врача́ неду́жныхъ, ему́же ны́нѣ моля́щеся, глаго́лемъ: о́тче всеблаже́нне, не преста́й моля́ся Христу́ Бо́гу о чту́щихъ тя́, дарова́ти на́мъ ми́ръ и ве́лію ми́лость.

Кано́нъ Богоро́дицѣ со ирмосо́мъ на 6 и свята́го на 8, гла́съ 8.

Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Всего́ себе́ Вседержи́телю Бо́гу возложи́въ, богому́дре, къ Тому́ жела́ніемъ и любо́вію у́мъ тво́й впери́лъ еси́, да, со Христо́мъ пребыва́я, жи́знь вѣ́чную наслѣ́дуеши.

Упова́ніемъ на Бо́га Всеблага́го укрѣпля́емь, преблаже́нне Ти́хоне, къ бу́дущимъ бла́гимъ простира́лся еси́ посто́мъ и моли́твами.

Ди́вно житіе́ твое́, всеблаже́нне, ку́пно же и смире́ніе, е́же отъ ю́ности стяжа́лъ еси́, сего́ ра́ди отъ всего́ мíра отлучи́въ себе́, бы́лъ еси́ мона́хъ благоиску́сенъ, цвѣты́й въ добродѣ́телехъ.

Богоро́диченъ: Вопло́щься изъ пречи́стыхъ ложе́снъ Твои́хъ, Дѣ́во Всечи́стая, Бо́жіе Сло́во, всѣ́мъ изъясни́ ве́лію боже́ственную любо́вь: человѣ́ческое бо естество́ ли́ку а́нгельскому совокупи́ и въ небе́сная возведе́.

Катава́сія: Отве́рзу уста́ моя́...

Пѣ́снь 3.

Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.

Вели́ко къ Бо́гу дерзнове́ніе стяжа́лъ еси́, преподо́бне Ти́хоне, посто́мъ и моли́твами, Его́же ми́лостива бы́ти къ на́мъ испроси́.

Вре́менныхъ и до́льнихъ возгнуша́вся, высо́кая, при́сно пребыва́ющая, возлюби́лъ еси́, боже́ственнымъ раче́ніемъ распаля́я боголюби́вую твою́ ду́шу, и, сотвори́въ Всевы́шняго во́лю, воспрія́лъ еси́ блага́я небе́сная.

Жела́я, преподо́бне, насыща́тися при́сно пребыва́ющія сла́дости, бы́ліи самора́сленными въ пусты́ни пита́лся еси́ и та́ко по́двигъ житія́ твоего́ соверша́лъ еси́, ны́нѣ же наслажда́ешися присносу́щныхъ бла́гъ.

Богоро́диченъ: Твою́ по́мощь пода́ждь ми́, рабу́ Твоему́, Дѣ́во Влады́чице, вразуми́ и руково́дствуй мя́ на пути́ спасе́нія, изба́ви мя́ бѣ́дъ и скорбе́й, я́ко ро́ждшая всѣ́хъ Избавле́ніе.

Сѣда́ленъ, гла́съ 4:

Многомяте́жіе мíра и непостоя́нную суету́, я́ко пра́хъ, вмѣни́въ и стяжа́въ жи́знь а́нгельску, Бо́гу угоди́лъ еси́; тѣ́мже и на́съ отъ тлетво́рныхъ страсте́й изба́ви, мо́лимся, твою́ па́мять при́сно въ пѣ́снехъ почита́ющихъ, блаже́нне Ти́хоне, о́тче на́шъ. [Два́жды.]

Сла́ва, и ны́нѣ, [богоро́диченъ]:

Яко невоздѣ́ланная, Дѣ́во, лоза́, краснѣ́йшій Гро́здъ прозябла́ еси́, источа́ющь на́мъ вино́ спасе́нія, всѣ́хъ веселя́щее ду́ши же и тѣлеса́. Тѣ́мже, я́ко вину́ Тя до́брыхъ блажа́ще при́сно, со а́нгеломъ вопіе́мъ Ти́: ра́дуйся, Благода́тная.

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Пото́ки сле́зными пусты́ню напои́лъ еси́, блаже́нне, сѣ́мя трудо́въ твои́хъ сѣ́я въ не́й, тѣ́мже и стори́чный пло́дъ ра́достнѣ пожа́лъ еси́, вопія́: сла́ва си́лѣ Твое́й, Го́споди.

Помина́я, преподо́бне Ти́хоне, послѣ́дній де́нь жи́зни сея́, на вся́къ ча́съ гото́вился еси́ ко исхожде́нію, благи́ми дѣ́лы украша́я ду́шу твою́, ожида́я прише́ствія Влады́ки твоего́.

Моля́ся не преста́й, о́тче на́шъ Ти́хоне, о святѣ́й оби́тели и пусты́ни твое́й, ю́же мно́гими труды́ воздѣ́лалъ еси́, прося́ избавле́нія отъ злы́хъ обстоя́ній и скорбе́й вся́ческихъ, да тя́ вси́, я́ко отца́ чадолюби́ва, непреста́нно воспѣва́емъ.

Богоро́диченъ: Яко Богоизбра́нну Отрокови́цу, произше́дшую изъ чре́слъ ца́рскихъ, Ца́рь всѣ́хъ, Христо́съ Госпо́дь возлюби́въ и вы́шшу херуви́мъ и серафи́мъ показа́въ, ве́сь, Богоро́дице, всели́ся въ Тя́.

Пѣ́снь 5.

Ирмо́съ: Просвѣти́ на́съ повелѣ́ніи Твои́ми, Го́споди, и мы́шцею Твое́ю высо́кою Тво́й ми́ръ пода́ждь на́мъ, Человѣколю́бче.

Яко дре́во благора́сленно при вода́хъ, насажде́нъ бы́въ, о́тче преподо́бне Ти́хоне, вѣ́тви добродѣ́телей мно́ги израсти́лъ еси́, подъ сѣ́нь твою́ вся́ пріе́мля, хотя́щія спасе́нія.

Моли́твенникъ те́плъ въ жи́зни се́й бы́лъ еси́, блаже́нне о́тче на́шъ Ти́хоне, хода́тайствы твои́ми здра́віе всѣ́мъ подава́я неоску́дное, тѣ́мъ и ны́нѣ па́че въ моли́тву предлага́емъ тя́, прося́ще тобо́ю прія́ти ми́лости и грѣхо́въ оставле́ніе.

Ца́рство небе́сное стяжа́лъ еси́ произво́льною нището́ю, отону́дуже источа́еши оби́льно дарова́нія духо́вныхъ исцѣле́ній всѣ́мъ, вѣ́рно почита́ющимъ пречестну́ю твою́ па́мять, преподо́бне о́тче на́шъ Ти́хоне.

Богоро́диченъ: Возсія́ изъ Тебе́ мы́сленное Со́лнце и свѣ́тлыя лучи́ Своего́ Божества́ простре́, Богоро́дице Влады́чице, тѣ́мъ Тя́ вси́ непреста́нными пѣ́ніи велича́емъ.

Пѣ́снь 6.

Ирмо́съ: Моли́тву пролію́ ко Го́споду и Тому́ возвѣщу́ печа́ли моя́, я́ко зо́лъ душа́ моя́ испо́лнися и живо́тъ мо́й а́ду прибли́жися, и молю́ся, я́ко Іо́на: отъ тли́, Бо́же, возведи́ мя.

Честно́е тѣ́ло твое́, преподо́бне, мно́гое исцѣле́ніе источа́етъ вѣ́рою приходя́щимъ къ цѣльбоно́сному твоему́ гро́бу, о́тче на́шъ Ти́хоне.

Непреста́нными твои́ми къ Бо́гу, о́тче на́шъ Ти́хоне, моли́твами небе́сныхъ селе́ній дости́глъ еси́, идѣ́же е́сть свѣ́тъ неизрече́нный и наслажде́ніе преподо́бныхъ, съ ни́ми же предстои́ши всѣ́хъ Бо́гу, о́тче Ти́хоне.

Но́щь тебѣ́, я́ко де́нь, блаже́нне, вмѣня́шеся: не да́лъ бо еси́ поко́я тѣлеси́ твоему́, ни сна́ очесе́мъ, ни вѣ́ждамъ дрема́нія, до́ндеже дости́глъ еси́ поко́я небе́снаго.

Богоро́диченъ: Расто́ргни мои́хъ прегрѣше́ній рукописа́ніе и да́руй ми́ разрѣше́ніе отъ одержа́щихъ мя́ печа́лей и страсте́й Твои́ми моли́твами, Влады́чице.

Конда́къ, гла́съ 8:

Оте́чества удали́вся, преподо́бне, въ пусты́ню всели́лся еси́, идѣ́же жесто́кое житіе́ твое́ показа́лъ еси́ и, мно́гихъ добродѣ́тельми удиви́въ, дарова́ніе чуде́съ отъ Христа́ прія́лъ еси́. Тѣ́мже помина́й на́съ, чту́щихъ па́мять твою́, да зове́мъ ти́: ра́дуйся, преподо́бне Ти́хоне, о́тче на́шъ.

Икосъ:

Возлюби́въ, преподо́бне о́тче на́шъ Ти́хоне, Христо́вы Боже́ственныя за́повѣди и возненави́дѣвъ мíра сего́ наслажде́ніе, оста́вивъ оте́чество, прите́клъ еси́ усе́рдно въ пусты́ню и бы́лъ еси́ въ не́й свѣти́льникъ, просвѣща́яй здѣ́шнія страны́ блиста́ніемъ духо́внымъ. Тѣ́мже со тща́ніемъ приходя́ще къ цѣльбоно́сному твоему́ гро́бу, зове́мъ ти́: ра́дуйся, преподо́бне Ти́хоне, о́тче на́шъ.

Пѣ́снь 7.

Ирмо́съ: Отъ Іуде́и доше́дше, о́троцы, въ Вавило́нѣ иногда́, вѣ́рою Тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.

Му́жески въ пусты́ни подвиза́лся еси́ и, зарю́ духо́вную воспріе́мъ, взя́лся еси́ къ высотѣ́ небе́снѣй, преподо́бне о́тче Ти́хоне, идѣ́же и ны́нѣ со а́нгелы прославля́ешися.

Молча́ніемъ въ пусты́ни язы́къ тво́й обузда́лъ еси́ и немяте́жнымъ житіе́мъ во пло́ти а́нгельски, о́тче на́шъ Ти́хоне, пожи́лъ еси́.

Вои́стинну благíя жи́зни сподо́бился еси́, преподо́бне о́тче Ти́хоне, чистото́ю и поще́ніемъ сію́ обрѣ́тъ, и ны́нѣ со безпло́тными чи́ны Бо́гу предстои́ши.

Богоро́диченъ: Разумѣ́ти рождества́ Твоего́, Чи́стая, неизглаго́ланную глубину́ недоумѣ́етъ у́мъ человѣ́чь: Бо́гъ бо, истощи́въ Себе́ за милосе́рдіе, воплоще́ніемъ Свои́мъ всего́ мя́ обнови́.

Пѣ́снь 8.

Ирмо́съ: Царя́ Небе́снаго, Его́же пою́тъ во́и а́нгельстіи, хвали́те и превозноси́те во вся́ вѣ́ки.

Сле́зными пото́ки, преподо́бне о́тче на́шъ Ти́хоне, зе́млю се́рдца твоего́ напои́лъ еси́ и, предстоя́ въ моли́твахъ, непоколеби́мь, Творца́ всѣ́хъ славосло́вилъ еси́.

Бо́дренными твои́ми бдѣ́ніи, блаже́нне Ти́хоне, и ча́стыми воздыха́ніи благода́ть Ду́ха Свята́го возрасте́ въ тебѣ́, о́тче, и сла́вна тя́ показа́.

Поще́нія страда́ньми и до́блестными по́двиги твои́ми, преблаже́нне о́тче Ти́хоне, кла́сы Боже́ственныя возрасти́лъ еси́, и́миже пита́еши благоче́стно почита́ющія па́мять твою́.

Богоро́диченъ: Всеблага́я Влады́чице, Преблага́го Бо́га пло́тію ро́ждшая, озло́бленное страстьми́ мое́ се́рдце очи́сти, да вѣ́рою и любо́вію сла́влю Тя́.

Пѣ́снь 9.

Ирмо́съ: Вои́стинну Богоро́дицу, Тя́ исповѣ́дуемъ, спасе́нніи Тобо́ю, Дѣ́во Чи́стая, съ безпло́тными ли́ки Тя́ велича́юще.

Пучи́ною сле́зъ твои́хъ, преподо́бне о́тче Ти́хоне, злонача́льнаго змíя потопи́лъ еси́ и я́ко побѣдоно́сецъ изря́денъ къ небе́снымъ возше́лъ еси́, идѣ́же непреста́нно со а́нгельскими ли́ки сла́виши всѣ́хъ Бо́га.

Житіе́ незло́биво имѣ́лъ еси́, преподо́бне о́тче Ти́хоне, и укра́шено по́ты страда́нія, прехва́льне, того́ ра́ди боже́ственныя ра́дости испо́лнися ду́хъ тво́й.

Хва́лится тобо́ю, преподо́бне о́тче на́шъ Ти́хоне, гра́дъ тво́й Калу́га, я́ко вѣнце́мъ ца́рскимъ обложи́вся, имѣ́я мо́щи твоя́ въ предѣ́лѣхъ свои́хъ, я́ко до́бра стра́жа отъ Го́спода.

Богоро́диченъ: Препѣ́тая Дѣ́во, Бо́га пло́тію ро́ждшая, сла́вящія Тя́ прича́стники Боже́ственнаго Свѣ́та покажи́ и изба́ви ны́ гее́нны о́гнены и вся́каго вре́да вра́жія моли́твами Твои́ми.

Свѣти́ленъ:

Мра́зъ нощны́й претерпѣ́лъ еси́, и тяготу́ ва́ра дневна́го поне́слъ еси́, и си́хъ ра́ди вѣ́чное наслажде́ніе воспрія́лъ еси́, Христо́въ уго́дниче, блаже́нне Ти́хоне, моли́ спасти́ся душа́мъ на́шимъ. [Два́жды.]

Сла́ва, и ны́нѣ, [богоро́диченъ]:

По Бо́зѣ на Тя́ упова́емъ, Пресвята́я Дѣ́во Богоро́дице, и мо́лимся Тебѣ́: Твои́ми мольба́ми къ Сы́ну Твоему́ и Бо́гу на́шему неврежде́нны до конца́ ны́ сохрани́.

На хвали́техъ стихи́ры на 4, гла́съ 8, самогла́сны:

Боже́ственною си́лою укрѣпля́емь,* чу́вственныя стра́сти побѣди́лъ еси́* воздержа́нія бразда́ми,* житіе́ непоро́чно пожи́въ въ пусты́ни, пресла́вне,* тѣ́мъ и обогати́ тя Бо́гъ дарова́ніемъ чуде́съ,* Его́же моли́ спасти́ся душа́мъ на́шимъ.

Чи́стый сосу́дъ показа́лся еси́,* исто́чникъ исцѣле́ній излива́я,* по́стниковъ удобре́ніе, мона́шествующихъ подкрѣпле́ніе,* гра́ду на́шему Калу́гѣ похвала́ и утвержде́ніе,* Ти́хоне преподо́бне о́тче на́шъ.

Преподо́бне о́тче Ти́хоне,* измла́да въ добродѣ́тели прилѣ́жно обучи́вся,* орга́нъ бы́лъ еси́ Свята́го Ду́ха* и, отъ Него́ пріе́мъ чуде́съ дѣ́йство,* ны́нѣ боже́ственнымъ свѣ́томъ осіява́ешися,* просвѣти́ и на́ша сердца́ и мы́сли* и моли́ спасти́ся душа́мъ на́шимъ.

Свѣ́тлое и богоуго́дное житіе́ твое́,* я́ко свѣ́тъ, вои́стинну на земли́ показа́ся,* блаже́нне о́тче на́шъ Ти́хоне.* Тѣ́мже и ви́димая вся́ оста́вилъ еси́* и Непостижи́маго зрѣ́ти сподо́бился еси́,* Его́же моли́, преподо́бне,* спасти́ся душа́мъ на́шимъ.

Сла́ва, гла́съ 6:

Житіе́ твое́ въ пусты́ни благоче́стно препроводи́лъ еси́, добродѣ́тельми укра́шено, посто́мъ бо и моли́твою, я́ко вѣнце́мъ боже́ственнымъ, вѣнча́лся еси́, ны́нѣ же Влады́чню престо́лу предстои́ши, со а́нгельскими лику́я во́инствы. Сего́ ра́ди тя́ въ пѣ́снехъ почита́емъ, Ти́хоне, преподо́бне о́тче на́шъ, моли́ спасти́ся душа́мъ на́шимъ.

И ны́нѣ, богоро́диченъ:

Богоро́дице, Ты́ еси́ лоза́ и́стинная, возрасти́вшая на́мъ Пло́дъ Живота́, Тебѣ́ мо́лимся: моли́ся, Влады́чице, съ преподо́бнымъ отце́мъ на́шимъ Ти́хономъ и со всѣ́ми святы́ми поми́ловатися душа́мъ на́шимъ.

Славосло́віе вели́кое. [Ектеніи́] и отпу́стъ.



НА ЛИТУРГІИ,

Блаже́нна отъ кано́на, пѣ́снь 3-я и 6-я. Проки́менъ, гла́съ 7: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Апо́столъ къ Гала́томъ, зача́ло 213. Аллилуія, гласъ 6: Блаже́нъ му́жъ, [боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́]. Ева́нгеліе Луки́, зача́ло 24. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся.]

Зри: Аще бу́детъ па́мять преподо́бнаго Ти́хона въ попра́зднство святы́я Пятидеся́тницы или́ въ недѣ́лю всѣ́хъ святы́хъ, ищи́ уста́въ его́ слу́жбы въ хра́мовыхъ глава́хъ.

Источникъ: Минíя дополни́тельная. — СПб.: С.-Петербу́ргская Сѵнода́льная Типогра́фія, 1909. — Л. 107 – 114.

/ Къ оглавленію раздѣла /


Наверхъ / Къ титульной страницѣ

0