Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 21 октября 2017 г. Сейчасъ на порталѣ посѣтителей - 16.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́нія въ 16-й де́нь.
Свята́го и чудотво́рца Ти́хона Амаѳу́нтскаго.

[ВЕЧЕРЪ,]
Стихи́ры, гла́съ 8. Подо́бенъ: Что́ вы́ нарече́мъ.

Боже́ственнаго испо́лненъ ра́зума,* ста́да яви́лся еси́ слове́снаго,* сіе́ воспитава́я благочести́вно* на зла́цѣ и́стинныхъ уче́ній,* всему́дръ па́стырь.* Тѣ́мже твое́ свято́е ны́нѣ торжество́ почита́емъ,* просла́вльшаго тя́ Го́спода велегла́сно сла́вяще:* Ти́хоне богому́дре всеблаже́нне,* моли́ спасти́ся душа́мъ на́шимъ.

Чудесы́ Бо́гъ тя́ просла́ви,* сла́вяй, о́тче, сла́вящихъ Его́ при́сно,* во вре́мя бо честны́я* и боже́ственныя па́мяти твоея́, му́дре,* зри́тся гре́знъ зрѣ́лъ су́щь,* пою́щимъ пресла́вное чу́до,* отъ него́же вѣ́рніи, причаща́ющеся,* освяще́ніе и по́льзу пріе́млютъ,* досто́йно тя́ сла́вящіи.

Ины стихи́ры Богоро́дицы. Гла́съ и подо́бенъ то́йже:

Стра́нно та́инство, Чи́стая,* безсѣ́меннаго Твоего́ Рождества́, Дѣ́во, и ужа́сно,* превосходя́ вели́чествомъ* вся́ку мы́сль человѣ́чу.* Его́же бо не терпя́тъ зрѣ́ти многоочи́тіи* и вси́ чи́ны святы́хъ а́нгелъ боя́тся,* на́мъ пло́тію породила́ еси́,* не отсту́пльша же Отча существа́.* Сла́вимъ ро́ждшую Тя́, Богоневѣ́сто.

Кому́ уподо́билася еси́, окая́нная,* къ покая́нію ника́коже возни́чущи, душе́,* и огня́ не ужаса́ешися, злы́хъ жду́щаго?* Воста́ни, и еди́ну къ заступле́нію* ско́рую призови́, и возопíй:* Дѣ́во Ма́ти,* моли́ Твоего́ Сы́на* и Бо́га на́шего* изба́вити мя́ сѣ́тей льсти́ваго.

Всѣ́хъ заступле́ніе, Влады́чице,* пучи́ною преклоне́на мя́ те́мною* и лю́тѣ жите́йскимъ треволне́ніемъ* потопля́емому мнѣ́ при́сно,* ка́плю ми́лости Твоея́ низпосли́,* и ру́ку по́мощи Твоея́ пода́ждь ми́,* и ча́сти сподо́би мя́* избра́нныхъ и пра́ведныхъ,* я́ко бе́здну ро́ждшая, Человѣколю́бца.

Сла́ва, и ны́нѣ, богоро́диченъ. Подо́бенъ то́йже:

Огнь ро́ждши нестерпи́мый,* попаля́ющь грѣхи́* и ороша́ющь вѣ́рныя,* ве́щная безмѣ́рныхъ мои́хъ,* Пренепоро́чная Чи́стая,* согрѣше́ній попали́ моли́твами Твои́ми* и росо́ю иста́явшую страстьми́ ду́шу мою́ прохлади́,* я́ко да Твою́ велегла́сно* ми́лость и си́лу велича́ю, ра́бъ Тво́й.

Крестобогоро́диченъ. Подо́бенъ то́йже:

Агница Агнца я́ко ви́дѣ,* на дре́вѣ просте́рта во́лею кре́стнѣмъ,* вопія́ше ма́терски, болѣ́знующи съ пла́чемъ:* Сы́не Мо́й,* что́ стра́нное сіе́ видѣ́ніе?* Всѣ́мъ живо́тъ дая́й я́ко Госпо́дь,* ка́ко умерщвля́ешися, Долготерпѣли́ве,* земны́мъ подая́ воскресе́ніе?* Сла́влю Твое́ мно́гое, Бо́же Мо́й, снизхожде́ніе.

Тропа́рь, гла́съ 1:

Пусты́нный жи́тель, и въ тѣлеси́ а́нгелъ, и чудотво́рецъ яви́лся еси́, богоно́се о́тче на́шъ Ти́хоне: посто́мъ, бдѣ́ніемъ, моли́твою небе́сная дарова́нія пріи́мъ, исцѣля́еши неду́жныя и ду́ши вѣ́рою приходя́щихъ ти́. Сла́ва Да́вшему тебѣ́ крѣ́пость, сла́ва Вѣнча́вшему тя́, сла́ва Дѣ́йствующему тобо́ю всѣ́мъ исцѣле́нія.


НА УТРЕНИ,
Оба кано́на окто́иха и свята́го на 4. Творе́ніе Ѳеофа́ново, гла́съ 8.

Пѣ́снь 1.

Ирмо́съ: Колесницегони́теля фарао́ня погрузи́ чудотворя́й иногда́ Моисе́йскій же́злъ, крестообра́зно порази́въ и раздѣли́въ мо́ре, Изра́иля же бѣглеца́, пѣшехо́дца спасе́, пѣ́снь Бо́гови воспѣва́юща.

Видѣ́ніи па́че ума́ исполня́емь, Ти́хоне блаже́нне, и отту́ду боже́ственныя зари́ насыща́яся, пода́ждь пою́щимъ тя́ благода́тный гла́съ, и́мже яви́мся досто́йни твоя́ добродѣ́тели повѣ́дати.

Пріе́мся пути́ лу́чшаго отъ ю́ности, все́ прароди́тельное имѣ́ніе, я́коже пра́хъ, ми́мо те́клъ еси́ и, ни́щимъ разда́въ, воздая́ніе обрѣ́лъ еси́ стори́цею, глаго́ломъ, блаже́нне, вѣ́ровавъ Го́спода твоего́.

Иже въ вы́шнихъ Почива́яй, се́рдце твое́ добродѣ́телей до́мъ обрѣ́тъ, всели́ся и въ тебѣ́ упоко́ися: со Отце́мъ бо, я́коже рече́, оби́тель въ тебѣ́ сотвори́, предочище́ну Ду́хомъ.

Богоро́диченъ: Бо́гъ Человѣ́къ бы́сть изъ утро́бы Твоея́, Пречи́стая, и Дѣ́ву па́ки Тя́ по рождествѣ́ сохрани́, естество́ же обожи́въ, е́же подо́бію сопроти́вно, даде́ пе́рвое достоя́ніе.

Пѣ́снь 3.

Ирмо́съ: Утверже́й въ нача́лѣ небеса́ ра́зумомъ и зе́млю на вода́хъ основа́вый, на ка́мени мя́, Христе́, за́повѣдей Твои́хъ утверди́, я́ко нѣ́сть свя́тъ, па́че Тебе́, еди́не Человѣколю́бче.

Зла́то и сребро́, я́коже зе́млю попира́емую, вмѣни́лъ еси́ и, я́ко уме́ты, мірску́ю сла́ву, неукло́нно бо тво́й у́мъ возве́лъ еси́ къ нетлѣ́ннымъ, я́же и получи́въ, всели́лся еси́, Ти́хоне богому́дре пребога́те.

Яко да лу́чшую жи́знь и вѣ́чно пребыва́ющую получи́ши, свяще́нный Ти́хоне, преоби́дѣлъ еси́ жи́знь тлѣ́нную, му́чениче, произволе́ніемъ всѣ́мъ дѣ́лу са́мъ себе́ вда́въ.

Стоя́лъ еси́ на суди́щи иногда́ мучи́тельстѣ, исповѣ́дая Христа́ Царя́ со дерзнове́ніемъ, не ужаса́яся ра́нъ, ни сме́рти, чу́дне, враги́ вспя́ть твои́ми глаго́лы улови́лъ еси́.

Богоро́диченъ: Не отри́нулъ еси́, Христе́, облещи́ся въ смердя́щаго и дале́че Тебе́ бы́вша грѣхо́мъ, но отъ ложе́снъ пріе́мъ Дѣви́ческихъ нищету́ мою́, боготвори́ши и спаса́еши за мно́гую бла́гость.

Сѣда́ленъ, гла́съ 4. Подо́бенъ: Ско́ро предвари́.

Улучи́ти жела́я вѣ́чную жи́знь, отъ страсте́й очи́стилъ еси́ твою́ ду́шу вои́стинну, богому́дре о́тче на́шъ. Тѣ́мже свяще́нія прія́лъ еси́ зарю́, дарова́нія исцѣле́ній излива́еши вѣ́рою къ покро́ву твоему́ притека́ющимъ, Ти́хоне блаже́нне.

Сла́ва, и ны́нѣ, богоро́диченъ:

Еди́на, ро́ждшая Творца́ всему́, еди́на, украси́вшая человѣ́чество Рождество́мъ Твои́мъ, Богоневѣ́сто, изба́ви мя́ отъ сѣ́ти льсти́ваго врага́, поста́ви мя́ на ка́мени Христо́выхъ хотѣ́ній, Того́ моля́щи прилѣ́жно, Его́же воплоти́ла еси́.

Крестобогоро́диченъ:

Дѣ́во Пренепоро́чная, Ма́ти Христа́ Бо́га, ору́жіе про́йде Твою́ пресвяту́ю ду́шу, егда́ распина́ема ви́дѣла еси́ во́лею Сы́на и Бо́га Твоего́. Его́же, Благослове́нная, моля́щи не преста́й проще́ніе прегрѣше́ній на́мъ дарова́ти.

Пѣ́снь 4.

Ирмо́съ: Ты́ моя́ крѣ́пость, Го́споди, Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча, и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти: си́лѣ Твое́й сла́ва, Человѣколю́бче.

Пріе́мъ, о́тче, крѣ́пость Ду́ха, непобѣди́мь яви́лся еси́ и неутоли́мь и укрѣпля́еши, я́коже воево́да, во́ины, ко устремле́нію призыва́я. Тѣ́мже и безъ кро́ве твою́ побѣ́ду поста́вль, муче́нія вѣне́цъ прія́лъ еси́.

Освя́щся, Ти́хоне, Бо́гу, соверша́я свяще́нныя зако́ны, пожи́лъ еси́, а не я́коже ная́тый па́стырь, но по ста́дѣ ду́шу твою́ полага́я. Тѣ́мже, во́лки уби́въ, къ па́жити живоно́снѣй Христо́во наста́вилъ еси́ ста́до.

Твою́ честну́ю вои́стинну почита́етъ па́мять Ки́прскій о́стровъ, лику́я со все́ю земле́ю, и е́же въ не́мъ излія́ніемъ чуде́съ повѣ́дая, приложи́ къ видѣ́нію ны́нѣ едина́че зрѣ́ти хотя́щимъ са́дъ пресла́внаго прозябе́нія.

Богоро́диченъ: Свѣ́тъ отъ Свѣ́та, просія́въ безлѣ́тно, Сы́не Оте́чь, въ послѣ́дняя отъ ложе́снъ проше́лъ еси́ Дѣви́ческихъ, всего́ Ада́ма, дре́вле умерщвле́ннаго, Собо́ю исправля́я. Тѣ́мже Твою́ Ма́терь, Богоро́дицу вои́стинну, чту́ще, вѣ́рніи, проповѣ́даемъ.

Пѣ́снь 5.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Истиннаго видѣ́нія, сла́вне, бы́въ, Ти́хоне, испо́лненъ, тщíя му́дрости рача́щія обличи́лъ еси́, де́монскую пре́лесть отгоня́, и ба́сни вся́, и ки́прская дѣла́ ме́рзкая.

Чи́сто житіе́ имѣ́я, е́же па́че ума́ дѣ́лы соверша́я, всеосвяще́ннымъ о́бразомъ трапе́зѣ боже́ственнѣй предста́ Христо́вѣ. Тѣ́мже моли́твами твои́ми, богому́дре Ти́хоне, де́монскія хра́мы опрове́рглъ еси́.

Распя́тся, я́коже Па́велъ, мíру, и мíръ распя́, пребога́те, себѣ́, не жи́лъ еси́ пло́ти, но Бо́гу и Ду́ху, богоно́се Ти́хоне. Тѣ́мже улучи́лъ, и́хже жела́лъ еси́, и на́съ, твои́хъ рабо́въ, помяни́.

Богоро́диченъ: Неискусобра́чная яви́лася еси́ Ма́ти, свѣтлѣ́йши со́лнца: кто́ бо отъ вѣ́ка слы́ша Дѣ́ву доя́щу? На Тебѣ́ же вся́ боголѣ́пно, Дѣ́во Ма́ти, устро́ишася, ро́ждшей Зижди́теля Твоего́.

Пѣ́снь 6.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Де́монское сплете́ніе отъ твоего́ ста́да отгоня́, чу́дне, и и́дольскую прогоня́ ле́сть многобо́жную, стра́шенъ показа́лся еси́ сопроти́внымъ, богоглаго́ливе Ти́хоне прему́дре.

Просла́ви тя́ Бо́гъ, Иже тобо́ю просла́вленный, въ зна́меніяхъ стра́шна, въ чудесѣ́хъ вели́ка на́мъ дарова́въ, богоно́се Ти́хоне, вѣ́рно тя́ блажа́щимъ.

Освяти́лъ еси́ твою́, му́дре, жи́въ, честну́ю зе́млю и, преше́дъ отъ нея́ ко прія́тію небе́сному, чудесы́ просла́вилъ еси́ пресла́вными, Ти́хоне, Влады́цѣ дру́же и́скренній.

Богоро́диченъ: Умерщвле́нія ми́ пло́дъ, и́же дре́вле естество́мъ въ раи́, жи́зни же Ты́ пло́дъ, Боже́ственный ра́й, Богоро́дице, процвѣла́ еси́, и́мже пита́яся, не ктому́ сме́рти порабоще́нъ бу́ду.

Конда́къ, гла́съ 3. Подо́бенъ: Дѣ́ва дне́сь.

Въ по́стничествѣ, свя́те, боголюбе́зномъ пребы́въ, Утѣ́шителеву си́лу съ высоты́ прія́лъ еси́, и́долъ низложи́ти пре́лести, лю́ди же спасти́, де́моны отгна́ти, неду́ги исцѣля́ти. Сего́ ра́ди почита́емъ тя́ я́ко Бо́жія дру́га, Ти́хоне блаже́нне.

Пѣ́снь 7.

Ирмо́съ: Халде́йская пе́щь, огне́мъ распаля́емая, ороша́шеся Ду́хомъ, Бо́жіимъ предстоя́ніемъ, о́троцы поя́ху: благослове́нъ еси́, Бо́же оте́цъ на́шихъ.

Уста боже́ственная бы́въ, человѣ́ки отъ недосто́инства ты́ досто́йны содѣ́лалъ еси́, многочу́дне Ти́хоне. Тѣ́мже тя́ Христо́съ чудесы́ и по кончи́нѣ вои́стинну просла́ви.

Въ жела́ніи бы́въ о́нѣхъ наде́ждъ, всего́ мірска́го, о́тче, пристра́стія му́дрѣ отре́клся еси́. Тѣ́мже и возвѣсти́лъ еси́, я́коже проро́къ, му́дре Ти́хоне, твою́ кончи́ну.

Соше́дшеся, празднолю́бцы, та́йными видѣ́ніи Ки́пръ про́йдемъ и сада́ дѣ́ланіе пресла́вно ви́димъ, отъ него́же мíръ объе́млетъ чи́сто спасе́ніе.

Богоро́диченъ: Пло́дъ чре́ва Твоего́, Богоро́дице Дѣ́во, Онаго прича́щшимся безсме́ртіе источа́етъ: Евинъ бо до́лгъ Ты́ разрѣши́ла еси́, Бо́га ро́ждши.

Пѣ́снь 8.

Ирмо́съ: Седмери́цею пе́щь халде́йскій мучи́тель богочести́вымъ неи́стовно разжже́, си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Свяще́ннѣйшу истка́лъ еси́ оде́жду твою́, прехва́льне Ти́хоне, добродѣ́телей укра́шь добро́тами, тѣ́мже и явле́ніе, я́коже отъ благово́нія, сказу́я, твою́ кончи́ну су́щимъ о́крестъ тебе́ провозвѣща́я, сла́вити Спа́са устроя́лъ еси́, блаже́нне: Христа́ превозноси́те во вѣ́ки.

Зако́нъ тѣлесе́ забы́въ, я́коже безпло́тенъ, те́клъ еси́, идѣ́же вѣне́цъ тебѣ́ вы́шняго зва́нія, богому́дре, угото́вася: не бо пло́ти и кро́ви, Ти́хоне, обѣща́лся еси́ пожи́ти. Тѣ́мже добро́ты зри́ши Христо́ва Ца́рства, съ Ни́мъ ца́рствуя во вся́ вѣ́ки.

Побѣдоно́сецъ бы́лъ еси́ на вся́ враги́ Христо́вы, со́вѣстнымъ муче́ніемъ держа́лся еси́ и, нра́вомъ жря́ себе́ во́льнымъ, Ти́хоне му́дре, предъ всѣ́ми бо мучи́тели вопія́лъ еси́: Христо́съ Бо́гъ е́сть, и бого́въ лжеиме́нныхъ па́мять да поги́бнетъ во вѣ́ки.

Богоро́диченъ: Пресвята́я Влады́чице, мíру Помо́щнице, ско́рбныхъ крѣ́пкое прибѣ́жище, еди́на Засту́пнице су́щихъ въ ну́ждахъ рабо́въ Твои́хъ, Твое́ достоя́ніе изми́ отъ бѣ́дъ и скорбе́й разли́чныхъ, да вѣ́рою вопіе́мъ: ра́дуйся, мíра ра́досте и спасе́ніе.

Пѣ́снь 9.

Ирмо́съ: Устраши́ся вся́къ слу́хъ неизрече́нна Бо́жія снизхожде́нія, я́ко Вы́шній во́лею сни́де да́же и до пло́ти, отъ дѣви́ческаго чре́ва бы́въ Человѣ́къ. Тѣ́мже Пречи́стую Богоро́дицу, вѣ́рніи, велича́емъ.

Пѣ́ніе тебѣ́, Ти́хоне, свяще́нно, отъ усте́нъ недосто́йныхъ приноси́мо, пріими́, воздая́ніе подава́я, грѣхо́въ избавле́ніе моли́твами твои́ми къ Бо́гу: хода́тая бо тя́ вси́ предлага́емъ, чту́щіи твою́ вѣ́рно па́мять.

Пома́за тя́ Ду́хъ Чи́стый и Пресвяты́й еле́емъ ра́дости, пресла́вне, дарова́ній мно́жествомъ украси́, и ца́рствовати съ Ни́мъ сла́вно сподо́бися, Ти́хоне всеосвяще́нне, свяще́нниковъ удобре́ніе и похвала́.

О, твои́хъ, Ти́хоне свяще́нне, благода́ти чуде́съ! Не мо́жетъ сказа́ти язы́къ человѣ́чь ви́димое: отъ невла́жна бо прозябе́нія ло́знаго пе́рвѣе, ны́нѣ ско́рымъ манове́ніемъ пресла́вно твори́тъ гре́знъ зрѣ́лъ.

Побѣ́ды мнѣ́ на стра́сти моли́твами твои́ми пода́ждь, молю́ся, и сподо́би улучи́ти мя́, Ти́хоне, человѣколю́бія Бо́жія и благи́хъ наслажде́нія и красоты́ Его́ прія́ти, любо́вію те́плѣ блажа́щаго.

Богоро́диченъ: Спаси́ мя́, Ма́ти Бо́жія, я́же мíрови спасе́ніе ро́ждшая, моли́твами Твои́ми отъ многообра́зныхъ находя́щихъ ми́ и многоплете́нныхъ искуше́ній, на Тя́ бо наде́жду спасе́нія моего́ возложи́хъ вѣ́рно, ра́бъ Тво́й.

Источникъ: Минíа, мѣ́сяцъ Іу́ній. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 106 – 110.

/ Къ оглавленію раздѣла /


Наверхъ / Къ титульной страницѣ

0