Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 17 декабря 2017 г. Сейчасъ на порталѣ посѣтителей - 9.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Служба изъ русскаго Пантелеимонова монастыря на Аѳонѣ.

Мѣ́сяца Іу́нія 15-й де́нь.
Преподо́бнаго Іерони́ма блаже́ннаго, Стридо́нскаго.

НА ВЕЧЕРНИ,
Блаже́нъ му́жъ.., 1-й антифо́нъ. На Го́споди воззва́хъ: стихи́ры [на 8], гла́съ 1. Подо́бенъ: Небе́сныхъ чино́въ.

Небе́снаго блаже́нства* небому́дренный сподо́бився,* о на́съ мо́лится со дерзнове́ніемъ* еди́ному всѣ́хъ Царю́* Іерони́мъ преподо́бный,* благоче́стно па́мять того́ соверша́ющихъ. [Два́жды.]

О честнѣ́й твое́й па́мяти крася́щеся,* мона́шествующихъ ли́цы,* Іерони́ме о́тче,* пѣ́ніе прино́симъ тебѣ́,* прося́ще твоего́ предста́тельства,* его́же не лиша́й на́съ,* любо́вію почита́ющихъ тя́.

Богому́драго уче́нія бога́тство* и зрѣ́нія высо́каго сокро́вище* тя́ вѣ́дуще, вопіе́мъ ти́:* ра́дуйся, гра́да Бо́жія обита́телю* и соприча́стниче въ по́двизѣхъ просія́вшихъ* прему́дрыхъ проповѣ́дникъ же и преподо́бныхъ.

Ины стихи́ры, гла́съ 4. Подо́бенъ: Да́лъ еси́ зна́меніе.

Прине́слъ еси́ Зижди́телю твоему́* ума́ пра́вость, преподо́бне,* чистоту́, воздержа́ніе,* моли́тву неразсѣ́янную, излія́ніе сле́зъ,* и́хже ра́ди сподо́бился еси́ ви́дѣти сла́ву Бо́жію,* ю́же зря́тъ Того́ изря́днѣйшіи,* и пѣ́ти трисвяту́ю пѣ́снь,* богому́дре Іерони́ме,* на небеси́ воспѣва́емую а́нгелы. [Два́жды.]

Кре́стъ на ра́мена воспріи́мъ* и ско́рби до́блѣ претерпѣ́въ,* Бо́гови благоугоди́лъ еси́,* дѣ́вствующихъ же мно́жество Тому́ приве́лъ еси́,* я́ко удобре́ніе преподо́бныхъ,* я́ко прія́телище Боже́ственнаго Ду́ха.* Тѣ́мже лѣ́тную твою́ па́мять соверша́емъ, вѣ́рніи,* прося́ще твоего́ заступле́нія.

Гра́дъ, въ не́мже роди́ся е́же по пло́ти Госпо́дь,* Виѳлее́мъ сла́вный,* то́й прія́тъ труды́ твоя́ и по́ты по́стническія,* и въ не́мъ, о́тче богому́дре, успе́ніе твое́ бы́сть,* и предста́лъ еси́ въ весе́ліи, ве́сь свѣ́телъ, Іерони́ме,* Подвигополо́жнику и Спа́су мíра* о всѣ́хъ Тому́ моля́ся.

Сла́ва, гла́съ 2:

Возжела́въ и́стинно му́дрости Бо́жія, усе́рдный послу́шатель бы́лъ еси́ богому́дрыхъ слове́съ Григо́рія Вели́каго, ри́тора и богосло́ва, отону́дуже навы́къ Боже́ственнымъ, до́брѣ подвиза́лся еси́, преподо́бне о́тче, и всѣ́мъ че́стенъ яви́лся еси́ и Христу́ прія́тенъ, я́ко и́скренній Того́ служи́тель. Ему́же не преста́й моли́тися о вѣ́рою и любо́вію соверша́ющихъ честну́ю па́мять твою́.

И ны́нѣ, богоро́диченъ:

[Пре́йде сѣ́нь зако́нная, благода́ти прише́дши: я́коже бо купина́ не сгара́ше, опаля́ема, та́ко Дѣ́ва родила́ еси́ и Дѣ́ва пребыла́ еси́. Вмѣ́сто столпа́ о́гненнаго пра́ведное возсія́ Со́лнце, вмѣ́сто Моисе́я — Христо́съ, спасе́ніе ду́шъ на́шихъ.]

Вхо́дъ. Проки́менъ дне́. Чте́нія три́ преподо́бническая.

Прему́дрости Соломо́ни чте́ніе. [Глава́ 3.]

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе. [Глава́ 5 и 6.]

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе. [Глава́ 4.]

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На стихо́внѣ стихи́ры, гла́съ 5. Подо́бенъ: Ра́дуйся.

Ра́дуйся, чи́стый у́ме,* осія́нія Бо́жія пріе́млющій* и сія́ вѣ́рнымъ подава́яй,* чту́щимъ, Іерони́ме му́дре, святу́ю твою́ па́мять,* всему́дрыми бо твои́ми, преподо́бне, писа́ніи,* смы́сленныя вся́ на хвалу́ Бо́га поощря́еши,* я́ко иску́сенъ учи́тель христоимени́тымъ лю́демъ* и незы́блемое тѣ́хъ утвержде́ніе.

Сти́хъ: Честна́ предъ Го́сподемъ* сме́рть преподо́бныхъ Его́.

Ра́дуйся, стра́хомъ утверди́выйся Бо́жіимъ,* я́ко тѣ́мъ позна́лъ еси́ прему́дрость Боже́ственную,* любо́вію же и милосе́рдіемъ сво́й бы́лъ еси́ Созда́телю твоему́, Іерони́ме,* я́ко богоразу́менъ, добродѣ́теленъ же и ре́вностенъ.* Тѣ́мже, преблаже́нне,* вся́кія ну́жды и ско́рби свобожда́й воспѣва́ющія тя́* моли́твами твои́ми ко Го́споду.

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

Ра́дуйся, Далматíи до́брое прозябе́ніе* и воспита́ніе свя́то Земли́ Святы́я,* мно́жайшая лѣ́та пожи́вый въ по́стничествѣ,* Бо́га просла́вивъ во у́дѣхъ свои́хъ и въ по́двизѣхъ,* и́хже подъя́лъ еси́, себе́ удруча́я.* Сего́ ра́ди пра́ведно водворя́ешися ны́нѣ на небеси́,* сла́вы исполня́емь, я́ко Боже́ственный таи́нникъ,* я́ко Христо́ва Ца́рствія наслѣ́дникъ.

Сла́ва, гла́съ 6:

Внѣ́шнія прему́дрости рачи́тель бы́въ, бо́льшія сія́ сподо́бился еси́ и лу́чшія, Іерони́ме благосла́вне. Тѣ́мъ, обою́ду изря́дну ти́ су́щу, всѣ́ми позна́но бы́сть богопрія́тное житіе́ твое́, на супоста́та бо твоя́ побѣ́ды возвѣща́ютъ тя́ сы́на Свѣ́та и уго́дника Христа́ Свѣтода́вца, подаю́щаго моли́твами твои́ми душа́мъ на́шимъ просвѣще́ніе, ми́ръ и ве́лію ми́лость.

И ны́нѣ, богоро́диченъ:

Богоро́дице, Ты́ еси́ лоза́ и́стинная, [возрасти́вшая на́мъ Пло́дъ живота́, Тебѣ́ мо́лимся: моли́ся, Влады́чице, со святы́ми апо́столы поми́ловати ду́ши на́ша].

Тропа́рь, гла́съ 3:

Вели́ка имѣ́етъ тя́ предста́теля, богому́дре, правосла́вныхъ собра́ніе, я́коже у́бо преподо́бныхъ еси́ собесѣ́дникъ и Боже́ственныя прему́дрости соприча́стникъ, та́ко, пречу́дне Іерони́ме, Христу́ Бо́гу моли́ся дарова́ти на́мъ ве́лію ми́лость.

[Сла́ва, и ны́нѣ, богоро́диченъ:

Тя́, хода́тайствовавшую спасе́ніе ро́да на́шего, воспѣва́емъ, Богоро́дице Дѣ́во: пло́тію бо, отъ Тебе́ воспрія́тою, Сы́нъ Тво́й и Бо́гъ на́шъ, Кресто́мъ воспріи́мъ стра́сть, изба́ви на́съ отъ тли́, я́ко Человѣколю́бецъ.]


НА УТРЕНИ,
[На Бо́гъ Госпо́дь: Тропа́рь свята́го, два́жды. Сла́ва, и ны́нѣ, богоро́диченъ.]

По 1-мъ стихосло́віи сѣда́ленъ, гла́съ 1. Подо́бенъ: Гро́бъ Тво́й, Спа́се.

До́брѣ поучи́вся отъ богому́драго Григо́рія, преподо́бно устреми́ся отъ за́пада къ восто́ку всеизя́щный Іерони́мъ, подвиза́вся же богоуго́дно, мо́лится ны́нѣ о на́съ ко Спа́су, сла́вную того́ соверша́ющихъ па́мять, его́же вѣ́рою почита́емъ. [Два́жды.]

Сла́ва, и ны́нѣ, богоро́диченъ:

Ма́терь Тя́ Бо́жію свѣ́мы вси́, Дѣ́ву вои́стинну и по рождествѣ́ я́вльшуюся, любо́вію прибѣга́юще къ Твое́й бла́гости: Тебе́ бо и́мамы, грѣ́шніи, Предста́тельницу и Тебе́ стяжа́хомъ въ напа́стехъ спасе́ніе, еди́ну Всенепоро́чную.

По 2-мъ стихосло́віи сѣда́ленъ, гла́съ 4. Подо́бенъ: Яви́лся еси́.

Яви́ся дне́сь, преподо́бне о́тче, вѣ́рнымъ па́мять твоя́ свяще́нная и свѣтоза́рная и ду́ши просвѣща́етъ тебе́ почита́ющихъ, му́дре Іерони́ме. [Два́жды.]

Сла́ва, и ны́нѣ, богоро́диченъ:

Наше́ствіемъ Ду́ха Всесвята́го, Отцу́ Сопресто́льнаго и Единосу́щнаго, гла́сомъ арха́нгеловымъ зачала́ еси́, Благослове́нная, человѣ́ковъ воззва́ніе.

[Велича́ніе:

Ублажа́емъ тя́, преподо́бне о́тче Іерони́ме, и чте́мъ святу́ю па́мять твою́, наста́вниче мона́ховъ и собесѣ́дниче а́нгеловъ.

Псало́мъ избра́нный: Терпя́ потерпѣ́хъ Го́спода, и вня́тъ ми́ и услы́ша моли́тву мою́...]

По поліеле́и сѣда́ленъ, гла́съ 4. Подо́бенъ: Удиви́ся Іо́сифъ.

Испо́лненъ удивле́нія бы́лъ еси́, егда́ гра́дъ Бо́жій сподо́бился еси́ ви́дѣти, изше́дъ изъ тѣ́ла, и, Августи́ну, дру́гу твоему́, я́влься, повѣ́далъ еси́ сія́. Онъ же, улучи́въ жела́ніе, — ра́дуйся, — глаго́лаше тебѣ́, богому́дрому, предстоя́щему престо́лу всѣ́хъ Влады́ки и моля́щемуся о притека́ющихъ къ тебѣ́ съ вѣ́рою. [Два́жды.]

Сла́ва, и ны́нѣ, богоро́диченъ:

Удиви́ся Іо́сифъ, е́же па́че естества́ зря́ и внима́ше мы́слію, и́же на руно́ до́ждь, въ безсѣ́менномъ зача́тіи Твое́мъ, Богоро́дице, купину́, огне́мъ неопали́мую, же́злъ Ааро́новъ прозя́бшій, и, свидѣ́тельствуя, обру́чникъ Тво́й и храни́тель свяще́нникомъ взыва́ше: Дѣ́ва ражда́етъ и по рождествѣ́ па́ки Дѣ́вою пребыва́етъ.

Степе́нна, 1-й антифо́нъ 4-го гла́са. Проки́менъ, гла́съ 4: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Вся́кое дыха́ніе... Ева́нгеліе преподо́бническое: [Матѳе́я, зача́ло 43]

По 50-мъ псалмѣ́ стихи́ра, гла́съ 6:

Преподо́бне о́тче, богоно́се Іерони́ме, таи́нниче Христо́въ, вѣ́дателю неизрече́нныхъ и правосла́вныхъ наста́вниче иску́снѣйшій, не преста́й моли́тися о на́съ, любо́вію соверша́ющихъ па́мять твою́.

Кано́нъ [моле́бный Пресвяты́я Богоро́дицы, гла́съ 8: Во́ду проше́дъ... и кано́нъ свята́го,] его́же краегране́сіе, безъ богоро́дичныхъ: Тебѣ́, Іерони́ме, пѣ́снь пою́. Гла́съ 8.

Пѣ́снь 1.

Ирмо́съ: Колесницегони́теля фарао́ня погрузи́ чудотворя́й иногда́ Моисе́йскій же́злъ, крестообра́зно порази́въ и раздѣли́въ мо́ре, Изра́иля же бѣглеца́, пѣшехо́дца спасе́, пѣ́снь Бо́гови воспѣва́юща.

Тебѣ́, богопроповѣ́днику, приношу́ похвалу́ и молю́ся сло́ву да́тися ми́ твои́ми къ Бо́гу моли́твами, я́ко да возглашу́ вели́чія, богому́дре, честна́го жи́тельства твоего́.

Отъ Далма́тскія земли́ бога́тый благода́тію израсте́ и украси́ся добродѣ́тельми сла́вный Іерони́мъ, му́дростію же и разумѣ́ніемъ вѣща́ній Ду́ха, я́ко преи́скрененъ Бо́гу бы́сть.

Глаго́лы боже́ственнаго Григо́рія носи́лъ еси́ въ храни́лищи свое́мъ, я́ко того́ таи́нникъ, богатносвѣ́тле, и я́ко послѣ́дователь Христа́ и апо́столовъ Его́, я́ко прича́стникъ богосло́вія, блаже́нне.

Богоро́диченъ: Неудержи́мыми на ны́ сме́рть устремле́ніи напада́ше, но, Твоему́ Рождеству́ прибли́жившися, поги́бе и, прирази́вшися, упраздни́ся, Богоро́дице Дѣ́во: Жи́знь бо, вои́стинну присносу́щную, воплоще́нну родила́ еси́.

Катава́сія [а́ще по́стъ]: Отве́рзу уста́ моя́...

Пѣ́снь 3.

Ирмо́съ: Утвержде́й въ нача́лѣ небеса́ ра́зумомъ и зе́млю на вода́хъ основа́вый, на ка́мени мя́, Христе́, за́повѣдей Твои́хъ утверди́, я́ко нѣ́сть свя́тъ, па́че Тебе́, Еди́не Человѣколю́бче.

Украша́яся добро́тою нра́ва, многолюбе́зенъ бы́лъ еси́ всѣ́мъ, и уго́дникъ Бо́жій преподо́бенъ, и во отцѣ́хъ сла́венъ, преблаже́нне.

Умо́мъ чи́стымъ обогати́вся, е́ллинскую му́дрость, іуде́йскую и лати́нскую увѣ́дѣлъ еси́, халде́евъ же и пе́рсовъ, но преда́лъ еси́ себе́ Самопрему́дрости — Христу́, сла́вне.

За любо́вь Христо́ву посту́ прилѣжа́лъ еси́ и вся́ческимъ воздержа́нія трудо́мъ, и́хже ра́ди бы́лъ еси́ богому́дръ, Бо́гови благоуха́ніе и человѣ́комъ утѣше́ніе.

Богоро́диченъ: Поро́ка въ Тебѣ́ и скве́рны нѣ́сть отню́дъ, Дѣ́во, пребыва́лище же па́че яви́лася еси́ небе́сныхъ добродѣ́телей: въ Тебе́ бо всели́ся вся́кая святы́ня, Влады́чице.

Сѣда́ленъ, гла́съ 5. Подо́бенъ: Собезнача́льное Сло́во.

Іерони́ма пѣ́сньми, вѣ́рніи, почти́мъ, поче́тшаго дѣ́лы Христа́ Го́спода и научи́вша на́съ спаси́тельнымъ стезя́мъ и е́же въ Бо́га и́стиннаго вѣ́ровати благоче́стно: те́плый бо сы́й на́шъ предста́тель мо́лится о мíрѣ и спасе́ніи ду́шъ на́шихъ. [Два́жды.]

Сла́ва, и ны́нѣ, богоро́диченъ:

Ра́дуйся, свята́я горо́ и богопрохо́дная, ра́дуйся, одушевле́нная купино́ и неопали́мая, ра́дуйся, еди́на къ Бо́гу мíрови мо́сте, преводя́й ме́ртвыя къ вѣ́чному животу́; ра́дуйся, нетлѣ́нная Отрокови́це, неискусому́жно ро́ждшая Спа́са ду́шъ на́шихъ.

Пѣ́снь 4.

Ирмо́съ: Ты́ моя́ крѣ́пость, Го́споди, Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти́: си́лѣ Твое́й сла́ва, Человѣколю́бче.

Въ Виѳлее́мъ прише́лъ еси́, богоно́сне, и та́мо подвиза́лся еси́ до конца́ ева́нгельски, вселе́нъ бы́въ съ преподо́бными, я́ко преподо́бный, на небеси́, идѣ́же и мо́лишися о вѣ́рою пою́щихъ тя́.

Яко избра́нникъ, я́ко святы́хъ оте́цъ собесѣ́дникъ, въ Святѣ́й Земли́ пожи́лъ еси́, въ не́йже Христо́съ я́ко Человѣ́къ поживе́ и я́ко Бо́гъ спасе́ на́съ. Тѣ́мъ, достоблаже́нне, почита́емъ па́мять твою́.

Бо́жія уго́дника пѣ́сньми ублажа́ю, Іерони́ма терпѣливому́драго, у́зкій пу́ть возлю́бльша и изгна́ніе пріе́мша, его́же, Го́споди, моли́твами грѣхо́въ разрѣше́ніе, я́ко Бо́гъ ми́лостивъ, пода́ждь на́мъ.

Богоро́диченъ: Невѣ́сту Бо́жію Тя́ и Ма́терь вѣ́мы, Богоро́дице, Тебе́ бо, я́ко мѵрово́нный шипо́къ, обрѣ́тъ Сло́во Бо́жіе, цвѣту́щъ во удо́ліи смире́ннаго человѣ́чества, возжелѣ́ Твоея́ добро́ты, и, отъ Тебе́ Плотоно́сецъ произше́дъ, вѣ́рныя облагоуха́.

Пѣ́снь 5.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́, окая́ннаго, но обрати́ мя и къ свѣ́ту за́повѣдей Твои́хъ пути́ моя́ напра́ви, молю́ся.

Новососта́вленна е́сть твоя́ всечестна́я па́мять, преподо́бне, а́ще и дре́вня сія́ лѣ́ты. Тѣ́мже, прехва́льне, я́коже отъ дре́внихъ бы́лъ еси́, и отъ но́выхъ бу́ди достохва́ленъ.

Превосхо́диши мно́жайшихъ, всеизря́дне, богому́дріемъ, и исполня́еши весе́лія и сла́дости вѣ́рныя, и къ высотѣ́ Боже́ственнѣй возво́диши, я́ко благода́ти Бо́жіей обита́лище.

Блаже́нства удосто́ился еси́, достоблаже́нне, сострада́теленъ и ми́лостивъ бы́въ, стра́нныя и безпокро́вныя упокоева́я, ни́щимъ помога́я и нагíя одѣва́я.

Богоро́диченъ: Украси́лася еси́, Дѣ́во, я́ко краснѣ́йшее Сло́во ро́ждшая, Его́же при́сно моли́ уще́дрити притека́ющія къ Тебѣ́ и соблюсти́ отъ вся́каго де́монскаго вре́да на Тя́ упова́ющія.

Пѣ́снь 6.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

На земли́ просла́ви тя́ Госпо́дь, свя́те, богому́дрыми бо писа́ніи твои́ми свѣ́тиши конце́мъ, я́ко со́лнце, Іерони́ме свѣтоза́рне.

Умертви́въ плотскíя стра́сти воздержа́ніемъ, написа́лъ еси́, благоу́мне, кни́ги же и сви́тки, учи́тельныя и изъясня́юща сло́во Бо́жіе.

Свѣ́тлый въ по́стникахъ и вели́кій въ му́дрости бы́въ, ти́тло наста́вника вѣ́рныхъ прія́лъ еси́, ны́нѣ благохвали́мый на́ми, богоглаго́ливе.

Богоро́диченъ: Зачала́ еси́ вои́стинну Бо́га Сло́ва во утро́бѣ Твое́й, и Сего́ па́че естества́, Пречи́стая, родила́ еси́, Его́же ми́лостива сотвори́ на́мъ въ де́нь су́дный.

Конда́къ, гла́съ 8. Подо́бенъ: Взбра́нной Воево́дѣ.

Въ преподо́бныхъ преподо́бнѣйшаго и въ блаже́нныхъ блаже́ннѣйшаго учи́теля, пѣ́сньми восхва́лимъ Іерони́ма достохва́льнаго, вѣ́рныхъ наста́вника и засту́пника, любо́вію тому́ зову́ще: ра́дуйся, о́тче богому́дре.

Икосъ:

Якоже другíй а́нгелъ, Іерони́ме о́тче, ви́дѣнъ бы́лъ еси́, на земли́ живя́, и невѣ́рніи у́бо и злосла́вніи лю́тѣ вопія́ху на тя́, правосла́вніи же, ра́дующеся, взыва́ху тебѣ́ такова́я: ра́дуйся, о́трасле Далматíи боже́ственная; ра́дуйся, благíй пло́дъ ея́ и сы́нъ; ра́дуйся, Земли́ Святы́я воспита́ніе свято́е; ра́дуйся, благоче́ствующихъ похвало́; ра́дуйся, я́ко списа́нія твоя́ свѣ́тятъ, я́ко свѣ́тъ; ра́дуйся, я́ко по́стничество твое́ похваля́ется, я́коже лѣ́по; ра́дуйся, кра́йній дру́же му́драго Августи́на; ра́дуйся, проше́нія испо́лнивый сего́; ра́дуйся, вѣ́рныхъ учи́телю; ра́дуйся, враго́въ невѣ́рныхъ сопротивобо́рче; ра́дуйся, узрѣ́вый небе́сный гра́дъ; ра́дуйся, воспѣва́яй въ не́мъ Бо́гу боже́ственную пѣ́снь. Ра́дуйся, о́тче богому́дре.

Пѣ́снь 7.

Ирмо́съ: Бо́жія снизхожде́нія о́гнь устыдѣ́ся въ Вавило́нѣ иногда́, сего́ ра́ди о́троцы въ пещи́, ра́дованною ного́ю, я́ко во цвѣ́тницѣ лику́юще, поя́ху: благослове́нъ еси́ Бо́же, оте́цъ на́шихъ.

Ума́ чистото́ю прія́лъ еси́ благода́ть бога́тную отъ Бо́га, твори́ти же и глаго́лати вся́ къ по́льзѣ души́, богопроповѣ́дниче, благословля́я Бо́га оте́цъ на́шихъ.

Пчелѣ́ трудолю́бнѣй поревнова́въ, пи́сьменныя собра́лъ еси́ цвѣ́ты, я́коже въ со́тѣ, се́рдцемъ и умо́мъ сіе́ состроя́я и тѣ́мъ услажда́я вѣ́рныхъ.

Испо́лненный благода́ти Госпо́дней, я́ко вои́стинну избра́нникъ, бу́ди хода́тай о на́съ, вопію́щихъ и пою́щихъ: благослове́нъ еси́, Бо́же оте́цъ на́шихъ.

Богоро́диченъ: Невѣ́стникъ пречи́стъ, е́же па́че сло́ва Сло́ва воплоще́нія, и черто́гъ, и престо́лъ, правому́дрствующе, Тя́ Богороди́тельнице, имену́емъ, сла́вяще Рождество́ Твое́.

Пѣ́снь 8.

Ирмо́съ: Седмери́цею пе́щь халде́йскій мучи́тель, Богочести́вымъ неи́стовно разжже́; си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Свяще́нно плещи́ дне́сь, гра́де Дави́довъ, пѣ́сньми Спа́су твоему́, и́бо со ины́ми твои́ми Іерони́ма богому́драго и́маши въ гра́жданехъ свои́хъ, вопія́: лю́діе, превозноси́те Го́спода во вся́ вѣ́ки.

Въ се́рдцѣ положи́въ восхожде́ніе, богому́дре, и Творцу́ вы́ну соединя́яся, возше́лъ еси́ отъ дѣя́нія въ зрѣ́ніе духо́внѣ и, кра́ю жела́ній предстоя́, пое́ши: лю́діе, превозноси́те Го́спода во вся́ вѣ́ки.

Стра́нна, тобо́ю соверше́нная, преподо́бне, отъ за́пада бо устремля́ешися къ восто́ку, подвиза́яся те́плѣйше въ Виѳлее́мѣ, идѣ́же дву́мъ оби́телемъ во́ждь быва́еши и по кончи́нѣ сказу́еши небе́сная.

Богоро́диченъ: Свѣ́тъ пе́рвый ро́ждшая, а́нгелы, вторы́я свѣ́ты, составле́й и свѣ́тъ первонача́льный и свѣти́ла два́ произведы́й, ко всѣ́мъ же ду́шу, я́ко свѣ́тъ, вдохну́вый, просвѣти́ ума́ моего́ мра́къ, Богоро́дице.

Пѣ́снь 9.

Ирмо́съ: Ужасе́ся о се́мъ не́бо, и земли́ удиви́шася концы́, я́ко Бо́гъ яви́ся человѣ́комъ пло́тски и чре́во Твое́ бы́сть простра́ннѣйшее небе́съ. Тѣ́мъ Тя́, Богоро́дицу, Ангеловъ и человѣ́къ чинонача́лія велича́ютъ.

Весели́тся а́нгеловъ боже́ственный ли́къ, пріе́мъ тя́, всеизя́щне: а́нгельски бо ты́ пожи́лъ еси́ на земли́, блаже́нне, свяще́нныхъ учи́телей добро́то и по́стниковъ похвало́.

Прославля́ется па́мять твоя́ благоче́стно на земли́, и ны́нѣ обита́еши со Августи́номъ на небеси́, о на́съ моля́ся и о соиме́нныхъ тебѣ́, почита́ющихъ тя́, богоно́се, и о́бразъ тво́й лобыза́ющихъ.

Яко у́тро, возсія́лъ еси́ и, я́ко со́лнце, заше́лъ еси́ къ небе́снымъ, идѣ́же возжелѣ́лъ еси́ бы́ти, оста́вивъ писа́нія твоя́, чу́дне, я́ко сокро́вище, отъ ни́хже источа́ются благода́ть и весе́ліе небе́сное.

Богоро́диченъ: Сохрани́въ Тя́ Дѣ́ву, отъ Твои́хъ возсія́вшее ложе́снъ Невече́рнее Со́лнце вѣ́рнаго служи́теля Своего́ прича́стника Своего́ свѣ́та и ра́дости неизрече́нныя сотвори́, съ ни́мже моли́ся уще́дрити Тя́ велича́ющія.

Свѣти́ленъ:

Пло́ть покори́въ ду́ху, подвиза́лся еси́ во пло́ти, а́ки безпло́тенъ, тѣ́мже и вы́шшій бы́въ, сподо́бился еси́, Іерони́ме, хвали́ти всѣ́хъ Влады́ку со а́нгелы.

Сла́ва:

Труда́ми твои́ми и по́ты Виѳлее́мъ умасти́вся, вопіе́тъ ти́, богоно́сному: о Іерони́ме богому́дре, ты́ моя́ похвала́ и мона́шествующихъ удобре́ніе!

И ны́нѣ, богоро́диченъ:

Сла́дость а́нгеловъ, скорбя́щихъ ра́дость, христіа́нъ Предста́тельница, Дѣ́во Ма́ти Госпо́дня, заступи́ на́съ и изба́ви вѣ́чныхъ му́къ моли́твами Твои́ми.

На хвали́техъ стихи́ры, гла́съ 8. Подо́бенъ: О, пресла́внаго чудесе́!

Отче му́дре Іерони́ме!* Очи́стивъ у́мъ, пло́ти внѣ́ бы́лъ еси́* и прему́дрость къ себѣ́ привле́клъ еси́,* е́юже позна́лъ еси́ прему́дрости Вѣ́дца и Пода́теля,* Христа́ Бо́га на́шего.* О, богому́дрыхъ твои́хъ по́двиговъ!* Имиже возвели́чилъ еси́, я́же Бо́жія,* и посрами́лъ еси́, я́же вра́жія.

Отче му́дре Іерони́ме!* Пятіязы́чныя му́дрости разумѣ́ніемъ* и боже́ственнымъ поще́ніемъ твои́мъ* вели́къ яви́лся еси́ побо́рникъ* святы́я Правосла́вныя вѣ́ры,* сего́ ра́ди и ра́дуется воспита́вый тя́ гра́дъ святы́й,* въ не́мже просла́вилъ еси́ словесы́ и дѣ́лы твои́ми* укрѣ́пльшаго тя́ Спа́са и Го́спода.

Отче му́дре Іерони́ме!* Наста́вниче вѣ́рныхъ,* Августи́на и́скренній дру́же* и Григо́рія послу́шателю усе́рднѣйшій,* писа́нія твоя́ изблиста́ютъ* лучи́ богому́драго учи́тельства,* ему́же поуча́ющеся,* благоче́стно восхваля́емъ тя́.

Отче му́дре Іерони́ме!* Лѣ́та мно́га на земли́ подвизався,* восте́клъ еси́ къ небе́сному гра́ду Бо́жію,* о не́мже возвѣсти́лъ еси́* во снѣ́ дру́гу твоему́,* но моли́ся сподо́битися* и на́мъ бы́ти та́мо,* чту́щимъ честну́ю па́мять твою́.

Сла́ва, гла́съ то́йже:

Пріиди́те, благоче́стія проповѣ́дника, богому́драго вси́ Іерони́ма пѣ́сньми восхва́лимъ: се́й бо внѣ́шней прему́дрости предобучи́вся, и богоуго́дными по́двиги предочи́щенъ, орга́нъ бы́сть Свята́го Ду́ха и Пребоже́ственныя Тро́ицы жили́ще, того́ у́бо моли́твенника предлага́емъ Тебѣ́, Тріѵпоста́сному Бо́гу, дарова́ти на́мъ ве́лію ми́лость.

И ны́нѣ, богоро́диченъ:

[Влады́чице, пріими́ моли́твы ра́бъ Твои́хъ и изба́ви на́съ отъ вся́кія ну́жды и печа́ли.]

[Славосло́віе вели́кое, ектеніи́ и отпу́стъ.]



НА ЛИТУРГІИ,

Слу́жба вся́ преподо́бническая: [Блаже́нна отъ кано́на преподо́бнаго, пѣ́снь 3-я и 6-я. Проки́менъ, гла́съ 7: Честна́ предъ Го́сподемъ* сме́рть преподо́бныхъ его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Апо́столъ, къ Гала́томъ, зача́ло 213. Аллилу́ія, гла́съ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́. Ева́нгеліе отъ Луки́, зача́ло 24. Прича́стенъ: Въ па́мять вѣ́чную бу́детъ пра́ведникъ, отъ слу́ха зла́ не убои́тся.]

Источникъ: Мине́я Ію́нь. Ча́сть пе́рвая. — М.: Издательскій совѣтъ Русской Православной Церкви, 2002. — С. 573-583.

/ Къ оглавленію раздѣла /


Наверхъ / Къ титульной страницѣ

0