Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 27 iюня 2017 г. Сейчасъ на порталѣ посѣтителей - 19.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́нія въ 15-й де́нь.
Свята́го проро́ка Амо́са.

Аллилу́ія или́ тропа́рь.

[ВЕЧЕРЪ,
На Го́споди воззва́хъ:] стихи́ры, гла́съ 2. Подо́бенъ: Егда́ отъ дре́ва.

Уста́ бы́въ Бо́жія, нече́стія дѣ́латели я́вѣ обличи́лъ еси́, судо́мъ неизбѣ́жнымъ ты́я осуди́въ, пребога́те, пра́веднымъ уче́ніемъ послѣ́дуя и Боже́ственнымъ судо́мъ. Тѣ́мже прему́дрымъ твои́мъ глаго́ломъ ви́дяще возведе́ніе, блаже́нне, пѣ́сньми досто́йно восхваля́емъ тя́.

Престо́лу Влады́чню предстоя́ и неизрече́нныя и Боже́ственныя сла́вы насыща́емь, добро́ты же зря́ премíрныя и свѣ́та наполня́емь, Амо́се богоглаго́ливе, вся́, чту́щія тя́, вѣ́рою помина́й, си́мъ душе́вное спасе́ніе, разрѣше́нія же согрѣше́ній всѣ́мъ прося́, богопрія́тне.

Ины стихи́ры Богоро́дицы, гла́съ и подо́бенъ то́йже:

Ра́дуйся, солнцезра́чная звѣздо́; ра́дуйся, вино́вная всѣ́хъ до́брыхъ, Пренепоро́чная; ра́дуйся, вмѣсти́вшая Бо́га Невмѣсти́маго, Яже кла́съ прозя́бшая безсме́ртія; ра́дуйся, Боже́ственное носи́ло и две́ре всесвѣ́тлая; ра́дуйся, кля́твы убіе́ніе прароди́тельныя на́шея, Отрокови́це, благи́хъ хода́таица су́щи.

Всѣ́хъ скорбя́щихъ ра́досте, и оби́димыхъ предста́тельнице, и убо́гихъ пита́тельнице, стра́нныхъ же утѣше́ніе и же́зле слѣпы́хъ, немощны́хъ посѣще́ніе, тружда́ющихся покро́ве и засту́пнице и си́рыхъ помо́щнице, Ма́ти Бо́га Вы́шняго, Ты́ еси́, Пречи́стая, потщи́ся, мо́лимся, спасти́ся рабо́мъ Твои́мъ.

Покро́въ и заступле́ніе на́мъ, христіа́номъ, Ты́ еси́ и прибѣ́жище держа́вно, Ма́ти Бо́га Вы́шняго. Но и ны́нѣ, я́ко при́сно, бо́дренною Твое́ю моли́твою не преста́й моля́щи спасти́ рабы́ Твоя́ отъ обстоя́ній всѣ́хъ, я́ко Тя́ съ Бо́гомъ и́мамы заступле́ніе, вси́ христіа́не, и прибѣ́жище.

Сла́ва, и ны́нѣ, богоро́диченъ:

Ина́го держа́внаго прибѣ́жища, и крѣ́пости столпа́, и стѣны́ необори́мыя вои́стинну не стяжа́хомъ, ра́звѣ Тебе́, Пречи́стая. Къ Тебѣ́ прибѣга́емъ и Тебѣ́ вопіе́мъ: Влады́чице, помози́, да не поги́бнемъ, покажи́ Твою́ благода́ть на ны́, и крѣ́пости сла́ву, и милосе́рдія Твоего́ вели́чество.

Крестобогоро́диченъ:

Егда́ нескве́рная Агница ви́дѣ Своего́ Агнца, на заколе́ніе я́ко Человѣ́ка во́лею влеко́ма, пла́чущи, глаго́лаше: безча́дствовати Мя́ ны́нѣ тщи́шися, Христе́, ро́ждшую Тя́. Что́ сіе́ сотвори́лъ еси́, Изба́вителю вся́ческихъ? Оба́че воспѣва́ю и сла́влю Твою́, ю́же па́че ума́ и сло́ва, кра́йнюю бла́гость, Человѣколю́бче.

[Тропа́рь, гла́съ 2:

Проро́ка Твоего́ Амо́са па́мять, Го́споди, пра́зднующе, тѣ́мъ Тя́ мо́лимъ: спаси́ ду́ши на́ша.]


[НА УТРЕНИ,]
Кано́нъ, гла́съ 7.

Пѣ́снь 1.

Ирмо́съ: Истря́сшему Бо́гу фарао́на въ мо́ри Чермнѣ́мъ, пѣ́снь побѣ́дную пои́мъ, я́ко просла́вися.

Очи́стивъ мо́й у́мъ отъ страсте́й мра́чнаго по́мысла, проро́ка Твоего́, Влады́ко, Амо́са пѣ́ти озари́.

Таи́нникъ я́влься и́же па́че ума́ та́инъ Бо́жіихъ, сподо́бился еси́ прозрѣ́ти, сла́вне, быва́емая.

Яко нескве́рное Бо́жіе и чи́стое поко́ище я́влься, я́же Ду́ха, Амо́се, прія́лъ еси́ Боже́ственную дѣ́тель.

Богоро́диченъ: Ты́ па́дшую Ада́мову проро́чески возста́вила еси́ ски́нію, Спа́са и Бо́га, Пречи́стая, во чре́вѣ носи́вши.

Пѣ́снь 3.

Ирмо́съ: Утверди́ся вѣ́рою Христо́ва Це́рковь, и́бо непреста́нно пѣ́сньми вопіе́тъ, пою́ще: Свя́тъ еси́, Го́споди, и Тя́ пое́тъ ду́хъ мо́й.

Ты́, беззако́нныя облича́я, Амо́се, Госпо́дню пра́вду пока́зовалъ еси́, вопія́, богоявле́нне: Свя́тъ еси́, Го́споди, спаса́яй ду́ши на́ша.

Показа́лся еси́ сто́лпъ, проро́че, Но́ваго Завѣ́та, отъе́мля сего́ покро́въ и вѣ́рою зовы́й: Свя́тъ еси́, Го́споди, спаса́яй ду́ши на́ша.

Навы́къ Боже́ственная, проро́че богоглаго́льниче, Амо́се боже́ственне, просвѣща́я лю́ди, вопія́лъ еси́: Свя́тъ еси́, Го́споди, спаса́яй ду́ши на́ша.

Богоро́диченъ: Утверди́хся, исповѣ́давъ Боже́ственное Твое́ рождество́, и Предста́тельницу Тя́, Дѣ́во, богатѣ́я, зову́: ра́дуйся, Богоневѣ́стная, наде́ждо моя́ и по́моще.

Сѣда́ленъ, гла́съ 3. Подо́бенъ: Боже́ственныя вѣ́ры.

Боже́ственный орга́нъ Утѣ́шителевъ, подглаша́емь Сего́, блаже́нне, благода́тію всегда́ я́сно, проро́къ бы́лъ еси́: возглаша́еши бо безвѣ́стныхъ явле́ніе и озаря́еши вѣ́рою притека́ющія, Амо́се сла́вне, Христа́ Бо́га моли́ дарова́ти на́мъ ве́лію ми́лость.

Сла́ва, и ны́нѣ, пра́здника или́ богоро́диченъ:

Боже́ственнаго естества́ не отлу́чся, пло́ть бы́въ во чре́вѣ Твое́мъ, но Бо́гъ вочеловѣ́чся и пребы́сть, Иже по рождествѣ́ Ма́терь Тя́ Дѣ́ву, я́ко пре́жде рождества́, сохрани́въ Всенепоро́чну, еди́нъ Госпо́дь, Того́ прилѣ́жно моли́ дарова́ти на́мъ ве́лію ми́лость.

Крестобогоро́диченъ:

Нескве́рная Агница Сло́ва, нетлѣ́нная Дѣ́ва Ма́ти, на Крестѣ́ зря́щи повѣ́шена изъ Нея́ безъ болѣ́зни прозя́бшаго, ма́терски подо́бно рыда́ющи, вопія́ше: увы́ Мнѣ́, Ча́до Мое́, ка́ко стра́ждеши во́лею, хотя́ изба́вити отъ страсте́й безче́стія человѣ́ка?

Пѣ́снь 4.

Ирмо́съ: Услы́шахъ, слу́хъ Тво́й, Го́споди, я́ко яви́лся еси́ на земли́, за е́же спасти́ ны. Тѣ́мъ вопіе́мъ: сла́ва си́лѣ Твое́й, Го́споди.

Служа́щія глухи́мъ и́доломъ обличи́лъ еси́ лю́ди Изра́илевы, тѣ́мъ плѣне́ннымъ бы́ти си́мъ ре́клъ еси́, досточу́дне.

Проро́ка тя́, и́же пе́рвѣе па́стыря показа́ Бо́гъ, воспріе́мъ, священноявле́нне Амо́се. Тѣ́мъ тя́ вси́ вѣ́рою ублажа́емъ.

Яко зерца́ло, Свята́го Ду́ха пріе́мъ, блиста́ніемъ свѣтолу́чная, Амо́се, всѣ́мъ проявля́еши, ра́дуяся, благоче́стіе.

Богоро́диченъ: Сло́во въ Тя́ всели́ся, Чи́стая, существо́ мое́ возобрази́, па́дшее пре́жде преступле́ніемъ.

Пѣ́снь 5.

Ирмо́съ: Къ Тебѣ́ у́тренюю и Тебѣ́ вопію́, Благоутро́бне Го́споди: омраче́нную грѣхми́ ду́шу мою́, свѣ́томъ озари́въ за́повѣдей Твои́хъ, наста́ви.

Умерщвле́нныя снѣ́дною стрѣло́ю, блаже́нне, укори́лъ еси́, я́ко непщу́ющимъ испа́днути вну́треннимъ, и прело́жно бы́ти, и тлѣ́нно наслажде́ніе.

Бога́тыми свѣтоли́тіи осія́емь, яви́лся еси́ богоглаго́ливъ и собесѣ́дникъ Бо́жій, возвѣща́я всѣ́мъ благоче́стія и́стинный пу́ть.

Изба́вити вся́, тя́ пою́щія, блаже́нне, моли́ отъ льще́ній и сѣ́тей вра́жіихъ и свѣ́томъ осія́ти небе́снымъ Ца́рства Христо́ва.

Богоро́диченъ: Богоро́дицу исповѣ́дающіи Тя́, Ма́ти Дѣ́во, непрее́мнаго Ца́рствія и пи́щи Тобо́ю, Богома́ти, получи́ти да сподо́бимся.

Пѣ́снь 6.

Ирмо́съ: Іо́на изъ чре́ва а́дова вопія́ше: возведи́ отъ тли́ живо́тъ мо́й. Мы́ же Тебѣ́ вопіе́мъ: Всеси́льне Спа́се, поми́луй на́съ.

Свѣ́тлыми и́стины заря́ми сія́я, зауши́лъ еси́ лжи́ проро́ка, крѣ́пко облича́я и предглаго́ля того́ потребле́ніе. [Два́жды.]

Омрачи́лъ еси́ пре́лести пла́мень, проро́че, я́ко со́лнце, благоче́стія зарю́ всѣ́мъ возсія́я, я́ко Ду́ха сія́ніе воспріи́мъ.

Богоро́диченъ: Пречи́стаго Твоего́ дѣ́вства пою́, Дѣ́во, несказа́нное и честно́е рождество́ и сла́влю, Пречи́стая, и́мже спаса́юся тли́ и сме́рти.

Конда́къ, гла́съ 4. Подо́бенъ: Яви́лся еси́ дне́сь.

Очи́стивъ Ду́хомъ, проро́че, твое́ свѣтоза́рное се́рдце, сла́вный Амо́се, проро́чествія да́ръ свы́ше пріе́мь, возопи́лъ еси́ велегла́сно во страна́хъ: се́ Бо́гъ на́шъ, и не приложи́тся и́нъ къ Нему́.

Пѣ́снь 7.

Ирмо́съ: Въ пе́щь о́гненную вве́ржени, преподо́бніи о́троцы о́гнь въ ро́су преложи́ша, воспѣва́ніемъ си́це вопію́ще: благослове́нъ еси́, Го́споди, Бо́же оте́цъ на́шихъ.

Еже предглаго́лалъ еси́, Боже́ственное спасе́ніе яви́ся, Амо́се, проро́че чу́дне, просвѣще́ніи благоче́стія осія́я мíръ, вопія́лъ еси́: благослове́нъ еси́, Го́споди, Бо́же оте́цъ на́шихъ. [Два́жды.]

Вжиля́емь Боже́ственною си́лою, богопроти́вными враги́ неврежде́нъ бы́лъ еси́, терпѣли́вно, я́коже адама́нтъ, пребы́лъ еси́, зовы́й: благослове́нъ еси́, Го́споди, Бо́же оте́цъ на́шихъ.

Богоро́диченъ: Непостижи́мое рождество́ Дѣ́вы славосло́вимъ, и́мже сме́рти изба́вихомся. Его́же ра́ди ро́ждшеся въ нетлѣ́ніе, зове́мъ: благослове́нъ еси́, Го́споди, Бо́же оте́цъ на́шихъ.

Пѣ́снь 8.

Ирмо́съ: Еди́наго Безнача́льнаго Царя́ сла́вы, Его́же благословя́тъ небе́сныя си́лы и трепе́щутъ чи́ни а́нгельстіи, по́йте, свяще́нницы, лю́діе, превозноси́те Его́ во вѣ́ки.

Ве́сь восте́клъ еси́ на го́рнюю высоту́, и навы́клъ еси́ неизрече́нныхъ ра́зума, и бы́лъ еси́ сказа́тель Сло́ва воплоще́нія, Амо́се. Тѣ́мже тя́ воспѣва́емъ во вся́ вѣ́ки.

Ума́ острото́ю всѣ́хъ Влады́ку разумѣ́ти, я́коже е́сть мо́щно, сподо́бился еси́, науча́юща тя́ неизрече́нныхъ ра́зуму, зовы́й: свяще́нницы, по́йте, лю́діе, превозноси́те во вся́ вѣ́ки.

Блаже́нство, и ра́дость несказа́нную, и Ца́рство небе́сное, я́ко проро́къ, получи́лъ еси́, небе́сныхъ ви́дче, зовы́й благоче́стно: лю́діе, превозноси́те Его́ во вся́ вѣ́ки.

Богоро́диченъ: Во двою́ естеству́ отъ Тро́ицы Еди́наго боголѣ́пно безъ сѣ́мене, Богома́ти, родила́ еси́ Спа́са мíра. Тѣ́мъ Тя́, вѣ́рніи, любо́вію превозно́симъ во вѣ́ки.

Пѣ́снь 9.

Ирмо́съ: Всепѣ́тая, небе́съ превы́шшая, Безнача́льное Сло́во безсѣ́менно заче́ншая и воплоще́ннаго Бо́га ро́ждшая человѣ́комъ, тѣ́мъ Тя́ вси́ велича́емъ.

Бы́въ проро́ческимъ явле́ніемъ богодви́жимь язы́къ, Боже́ственная вѣща́ющь, всѣ́мъ возвѣсти́лъ еси́, Амо́се, Боже́ственное милосе́рдіе. Тѣ́мже вси́ тя́ при́сно ублажа́емъ. [Два́жды.]

Несказа́нно проро́ческое благосла́віе: и́бо Святы́й Ду́хъ, въ си́хъ все́лься, свѣтоли́тія Своего́ показа́ прича́стники, отъ ни́хже, вси́ вѣ́рніи, просвѣща́емся.

Богоро́диченъ: Ме́ртвости и тли́ мою́ ри́зу отъя́ла еси́, Дѣ́во, спаси́тельную ри́зу — воплоще́ннаго Бо́га — ро́ждши человѣ́комъ. Тѣ́мъ Тя́ вси́ при́сно велича́емъ.

Источникъ: Минíа, мѣ́сяцъ Іу́ній. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 93 – 96.

/ Къ оглавленію раздѣла /


Наверхъ / Къ титульной страницѣ

0