Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 19 ноября 2017 г. Сейчасъ на порталѣ посѣтителей - 15.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́нія въ 15-й де́нь.
Па́мять свята́го блаже́ннаго великому́ченика, и́же во царе́хъ, кня́зя Ла́заря, бы́вшаго самоде́ржца Се́рбскія земли́.

НА МАЛѢЙ ВЕЧЕРНИ,
На Го́споди воззва́хъ: стихи́ры на 4, гла́съ 1. Подо́бенъ: Небе́сныхъ чино́въ.

Да́нный ти́ тала́нтъ держа́вный, богому́дре, возрасти́лъ еси́ сугу́бо благода́тію, о не́мже и кро́вь свою́ излія́лъ еси́, Ла́заре. Тѣ́мже слы́шиши: благíй ра́бе и вѣ́рный, вни́ди въ ра́дость Го́спода твоего́.

Ко́рене блага́го блаже́ннѣйшая о́трасль бы́лъ еси́, при исто́чникахъ благоче́стія насажде́нъ, дре́во плодови́то, вся́къ ви́дъ добродѣ́телей нося́й, бы́лъ еси́ и сего́ во времена́ Содѣ́телю и Творцу́ твоему́ отда́лъ еси́.

Сла́ва, гла́съ 2:

Пріиди́те, собо́ри вѣ́рныхъ, му́драго почти́мъ Ла́заря въ пѣ́снехъ: вѣ́рою бо Бо́гу благоугоди́, и муче́нія вѣнцу́ сподо́бися, и со а́нгелы селе́ніе стяжа́. Ему́же любо́вію вопіе́мъ: пріиди́ и ста́ни съ на́ми, свя́те, и предначина́й торжество́ па́мяти твоея́, и моли́ Христа́ Бо́га о душа́хъ на́шихъ.

И ны́нѣ, богоро́диченъ:

Все упова́ніе мое́ на Тя́ возлага́ю, Ма́ти Бо́жія, сохрани́ мя подъ кро́вомъ Твои́мъ.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Пріиди́те, лю́діе, Тріѵпоста́сное Божество́ сла́вяще, торжество́ похва́льнѣ соверши́мъ но́ваго Ла́заря, сла́вяще того́ я́ко Бо́жія уго́дника.

Сти́хъ: Пра́ведникъ, я́ко фи́никсъ, процѣете́тъ, [я́ко ке́дръ, и́же въ Лива́нѣ, умно́жится].

Добро́тами добродѣ́телей одѣ́явся пе́рвѣе, муче́нія же вѣнце́мъ украси́вся по́слѣжде, красе́нъ во сла́вѣ предстои́ши Влады́цѣ.

Стихъ: Насажде́ни въ дому́ Госпо́дни, [во дво́рѣхъ Бо́га на́шего процвѣту́тъ].

Пра́ведниковъ и му́чениковъ украше́ніе, ца́рствующихъ похвала́ и своему́ оте́честву, пріими́ пѣ́ніе вѣ́рою тя́ сла́вящихъ.

Сла́ва, и ны́нѣ, богоро́диченъ:

До́мъ Тя́ пречи́стъ Бо́жія Прему́дрость обрѣ́тши, отъ крове́й Твои́хъ пречи́стыхъ воплоща́ется, Дѣ́во, и по рождествѣ́ нетлѣ́нну Тя́ показа́.

Тропа́рь, гла́съ 3:

Красоту́ возжелѣ́въ сла́вы Бо́жія, въ земнѣ́й Тому́ благоугоди́лъ еси́ и, поруче́нный ти́ тала́нтъ до́брѣ воздѣ́лавъ, усугуби́лъ еси́, о не́мже и подвиза́вся до кро́ве. Отону́дуже и мзду́ болѣ́зней твои́хъ, я́ко му́ченикъ, прія́лъ еси́ отъ Христа́ Бо́га: Его́же моли́ спасти́ся пою́щимъ тя́, Ла́заре.

Сла́ва, и ны́нѣ, богоро́диченъ: Тя́, хода́тайствовавшую...



НА ВЕЛИЦѢЙ ВЕЧЕРНИ,
Пое́мъ: Блаже́нъ му́жъ.., 1-й антифо́нъ. [На Го́споди воззва́хъ:] стихи́ры на 8, гла́съ 2. Подо́бенъ: Егда́ отъ дре́ва Тя́ ме́ртва.

Егда́ вѣ́рою и любо́вію и́стинною ве́сь присво́ился еси́ да́вшему тя́ Бо́гу, и сокро́вище добродѣ́телей обрѣ́лся еси́, тогда́ и Вы́шній сугу́бою сла́вою прославля́етъ тя́, ски́птры ца́рственныя вруча́етъ въ земны́хъ, въ небе́сныхъ же Ца́рство небе́сное тебѣ́, свя́те, дарова́. [Два́жды.]

Егда́ промышле́ніемъ Всеви́дящаго Очесе́ тебѣ́ держа́ва вручи́ся ста́да христоимени́таго, тогда́ недрема́нное о́ко о не́мъ имѣ́лъ еси́ и, я́ко бо́дрый па́стырь, труди́лся еси́ до сме́рти. Сего́ ра́ди слы́шиши: до́брый дѣ́лателю и вѣ́рный, о ма́лѣ я́ко бы́лъ еси́ вѣ́ренъ, надъ мно́гими тя́ поста́влю.

Егда́ безбо́жное наше́ствіе на тя́ устреми́ся, во благоче́стіи ви́дѣвше тя́, гобзу́юща со ста́домъ, и хотя́ще то́ расхи́тити, я́коже звѣ́ріе неми́лостивіи, тогда́ ты́, свя́те, но́вый Дави́дъ яви́ся сопротивле́ніемъ, я́ко ина́го Голіа́ѳа, со мно́жествомъ язы́къ порази́лъ еси́ и я́ко му́ченикъ до кро́ве побѣ́днымъ вѣнце́мъ увя́злся еси́.

Ины стихи́ры, гла́съ 8. Подо́бенъ: О, пресла́внаго чудесе́!

О, пресла́внаго чудесе́! Ликовству́ютъ дне́сь а́нгели на небесѣ́хъ и человѣ́цы на земли́, въ па́мяти но́ваго Ла́заря. Ангели вѣнча́ютъ того́ я́ко побѣди́теля, человѣ́цы же пѣ́ніе съ похвало́ю прино́сятъ, чудя́щеся и глаго́люще: о, ка́ко тече́ніе соверши́! о, несказа́ннаго твоего́ весе́лія, прему́дре, его́же пріобщи́тися вои́стинну сподо́бился еси́. [Два́жды.]

О, ди́внаго чудесе́! Что́ бо нарече́мъ тя́, чу́дне? Пра́ведника, я́ко за́повѣди Бо́жія на земли́ сохрани́лъ еси́? му́ченика ли, я́ко непра́веднѣ глава́ твоя́ усѣче́ся? во обои́хъ бо благоугоди́лъ еси́ Бо́гу и со а́нгелы селе́ніе стяжа́лъ еси́. О, неизглаго́ланнаго твоего́ селе́нія, Ла́заре! въ не́мже тя́ всели́ Христо́съ, я́ко му́ченика че́стна.

О, пресла́внаго чудесе́! О, ди́внаго премѣне́нія и прославле́нія десни́цы Вы́шняго, е́же на тебѣ́ содѣ́я Госпо́дь, пребога́те Ла́заре! Иже и по сме́рти просла́ви тя́, я́ко Своего́ уго́дника: твое́ бо честно́е тѣ́ло, во гро́бѣ лежа́щее, нерастлѣ́но отню́дъ, но облагоуха́емо явля́етъ, увѣря́я всѣ́хъ, каковы́я по́чести получи́лъ еси́ и сла́ву, ю́же стяжа́лъ еси́ на небесѣ́хъ.

Сла́ва, гла́съ 6:

Кто́ тебе́ не блажи́тъ, бо́драго дѣ́лателя за́повѣдей Бо́жіихъ? Или́ кто́ не похва́литъ всекра́сное твое́ житіе́? Собра́лъ бо еси́, я́ко пчела́ любодѣ́льная, многоцвѣ́тныя добродѣ́тели, бу́дущую сла́ву искíй пріобрѣсти́, земну́ю измѣни́въ, о́ко слѣпы́хъ, нога́ хромы́хъ, же́злъ ста́рости, и всѣ́мъ вся́ бы́лъ еси́ ми́лостивною руко́ю, муче́нія же вѣнце́мъ главу́ твою́ украси́лъ еси́, Христу́ Бо́гу предстои́ши, Того́ сла́вы наслажда́яся. Ему́же и моли́ся, мо́лимъ тя́, Ла́заре му́дре, трудо́мъ твои́мъ вѣ́чновати въ тишинѣ́, и спасти́ся душа́мъ на́шимъ.

И ны́нѣ, богоро́диченъ:

Кто́ Тебѣ́ не ублажи́тъ, Пресвята́я Дѣ́во? Кто́ ли не воспое́тъ Твоего́ Пречи́стаго Рождества́? Безлѣ́тно бо отъ Отца́ возсія́вый Сы́нъ Единоро́дный, То́йже отъ Тебе́, Чи́стыя, про́йде, неизрече́нно вопло́щся: естество́мъ Бо́гъ Сы́й и естество́мъ бы́въ Человѣ́къ на́съ ра́ди; не во двою́ лицу́ раздѣля́емый, но во двою́ естеству́ несли́тно познава́емый. Того́ моли́, Чи́стая Всеблаже́нная, поми́ловатися душа́мъ на́шимъ.

Вхо́дъ. Проки́менъ дне́ и пареміи́:

Проро́чества Иса́іина чте́ніе.

Та́ко глаго́летъ Госпо́дь: вси́ язы́цы собра́шася вку́пѣ, и соберу́тся кня́зи отъ ни́хъ, кто́ возвѣсти́тъ сія́ въ ни́хъ? Или́ я́же отъ нача́ла, кто́ слы́шана сотвори́тъ ва́мъ? Да приведу́тъ свидѣ́тели своя́ и оправдя́тся, и да услы́шатъ, и да реку́тъ и́стину. Бу́дите Ми́ свидѣ́тели, и Азъ Свидѣ́тель, глаго́летъ Госпо́дь Бо́гъ, и отрокъ, его́же избра́хъ, да позна́ете и вѣ́руете Ми́, и разумѣ́ете, я́ко Азъ е́смь; пре́жде Мене́ не бы́сть и́нъ бо́гъ, и по Мнѣ́ не бу́детъ. Азъ е́смь Бо́гъ, и нѣ́сть ра́звѣ Мене́ спаса́яй. Азъ возвѣсти́хъ и спасо́хъ, уничижи́хъ, и не бѣ́ въ ва́съ чу́ждій. Вы́ Мнѣ́ свидѣ́тели, и Азъ Госпо́дь Бо́гъ. И еще́ отъ нача́ла Азъ е́смь, и нѣ́сть отъ ру́къ Мои́хъ избавля́яй; сотворю́, и кто́ отврати́тъ то? Си́це глаго́летъ Госпо́дь Бо́гъ, избавля́яй ва́съ Святы́й Изра́илевъ.

Прему́дрости Соломо́новы чте́ніе.

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе сокруше́ніе; они́ же су́ть въ ми́рѣ. Ибо предъ лице́мъ человѣ́ческимъ а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Яко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ возсія́ютъ и, я́ко и́скры по сте́блію, потеку́тъ: су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́новы чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́, или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ра хра́ма и свята́го, гла́съ 1:

Собо́ри празднолю́бныхъ вси́, пріиди́те, но́вый бо Ла́зарь на́съ дне́сь высо́кимъ проповѣ́даніемъ, вопія́, созыва́етъ на трапе́зу духо́вную, со тща́ніемъ, веселя́щеся, теце́мъ и па́мять сконча́нія его́ почти́мъ, сла́вяще того́, я́ко Бо́жія уго́дника.

Гла́съ 2:

Вы́шнія возжелѣ́въ сла́вы, бла́гъ, кро́токъ и незло́біемъ укра́шенъ, и́стиною же и пра́вдою одѣ́янъ и вся́кія злы́я ве́щи огреба́яся показа́лся еси́, блаже́нне, въ ню́же и вше́лъ еси́, я́ко досто́инъ, и со дерзнове́ніемъ Христу́ Бо́гу предстои́ши, Его́же ны́нѣ на́мъ благопремѣ́нна твои́ми моли́твами сотвори́.

Благозра́чіемъ добродѣ́телей украси́вся, пребога́те, уясни́лся еси́ болѣ́зньми добротво́рными отъ страда́ній, и съ му́ченики по достоя́нію приче́лся еси́, Ла́заре, и къ сла́вѣ несконча́емѣй отъ земны́хъ премину́лъ еси́, и равностоя́тель святы́мъ показа́лся, съ ни́миже проси́ на́мъ отъ Христа́ ве́лію ми́лость.

Сла́ва, гла́съ 5:

Востру́бимъ трубо́ю благогла́сныхъ пѣ́сней, и́же Боже́ственнымъ Ду́хомъ со́бранніи дне́сь, во всечестны́й пра́здникъ уго́дника Христо́ва, всѣ́хъ любопра́зднственныхъ къ похвале́нію созыва́юще, воспѣ́ти съ любо́вію па́мять его́. Ца́ріе и кня́зіе, стецы́теся, дивя́щеся и чудя́щеся новопросія́вшаго житію́ и по́двигу, и восхвали́те цѣлому́дрія рачи́теля, Правосла́вія столпа́ непоколеби́маго, церко́внаго зда́теля, ни́щимъ пода́теля оби́льна, побо́рника Правосла́вія тве́рдаго, вся́кою добродѣ́телію и пре́жде страда́нія украше́ннаго, по́двигомъ до́брымъ подвиза́вшася и тече́ніе соверши́вша, со и́же Бо́гови угоди́вшими селе́ніе обрѣ́тша, держа́вныхъ похвалу́ и благолѣ́піе, предста́теля и засту́пника на́шего, въ пѣ́снехъ благогла́сныхъ похваля́юще, си́це рце́мъ: Тро́ицѣ я́ко при́сно, Ла́заре, предстои́ши, моли́ изба́витися на́мъ отъ вся́каго обстоя́нія твои́ми моли́твами.

И ны́нѣ, богоро́диченъ. Ге́рмана патріа́рха:

Востру́бимъ трубо́ю пѣ́сней, прекло́ншися бо свы́ше, Всецари́ца Ма́ти Дѣ́ва благослове́ньми вѣнчава́етъ воспѣва́ющія Ю. Цари́ и кня́зи да стеку́тся, и Цари́цѣ да воспле́щутъ въ пѣ́снехъ, Царя́ ро́ждшей, сме́ртію одержи́мыя пе́рвѣе разрѣши́ти человѣколю́бно Благоизво́лившаго. Па́стыріе и учи́теліе, до́браго Па́стыря, Пречи́стую Ма́терь, соше́дшеся, восхва́лимъ: свѣ́щникъ златоза́рный, свѣтоно́сный о́блакъ, небе́съ Простра́ннѣйшу, одушевле́нный же киво́тъ, огнезра́чный Влады́чень престо́лъ, маннопріе́мную злату́ю ста́мну, заключе́нную Сло́ва две́рь, всѣ́хъ христіа́нъ прибѣ́жище, пѣ́сньми богоглаго́ливыми похваля́юще, си́це рце́мъ: пала́то Сло́ва, сподо́би смире́нныхъ на́съ небе́снаго Ца́рствія, ничто́же бо невозмо́жно хода́тайству Твоему́.

На стихо́внѣ стихи́ры, гла́съ 2. Подо́бенъ: Кíими похва́льными.

Кíими похва́льными пѣ́сньми воспое́мъ Ла́заря, и́же торжеству́ вино́внаго? Сла́венъ бо въ житіи́ на земли́ показа́лся еси́, сла́внѣйшій же отъ до́брыхъ дѣ́лъ яви́вся, за́повѣдемъ послѣ́дуя Влады́ки твоего́. Но а́ще и недоумѣ́емъ, хвали́ти досто́йнѣ, укрѣпи́ ны, му́дре, пою́щихъ тя́, и проси́ отъ Христа́ ве́лію ми́лость.

Сти́хъ: Пра́ведникъ, я́ко фи́никсъ, процвѣте́тъ, [я́ко ке́дръ, и́же въ Лива́нѣ, умно́жится].

Кíими язы́ки бре́нными украси́мъ Ла́заря му́драго? Та́ко просія́вшаго въ послѣ́днія на́ша ро́ди, и́же отъ ю́ности Бо́жіимъ Ду́хомъ возлю́бленнаго, благоче́стія столпа́ непоколеби́маго, преиспещре́нна добро́тами добродѣ́телей, о лю́дяхъ свои́хъ моля́ща Бо́га. Ему́же моли́ся, богопрія́тне, и испроси́ сла́вящимъ тя́ ми́ръ и ве́лію ми́лость.

Сти́хъ: Насажде́ни въ дому́ Госпо́дни, во дво́рѣхъ Бо́га на́шего [процвѣту́тъ].

Ко́е по достоя́нію пѣ́ніе принесе́мъ ти́, Ла́заре? На земли́ бо пожи́лъ еси́ во благоче́стіи и чистотѣ́, украси́вся добродѣ́тельми вои́стинну, по́двигъ же до́брый и тече́ніе соверши́въ, ага́рянскому наше́ствію и горды́ни сопроти́вился еси́, му́дре, не терпя́ благоче́стію разоря́ему зрѣ́тися; отню́дуже я́ко му́ченикъ ра́ди болѣ́зней твои́хъ мзду́ прія́лъ еси́, му́ченическая мѣ́ста наслѣ́довалъ еси́, съ ни́миже проси́ на́мъ ми́ръ и ве́лію ми́лость.

Сла́ва, гла́съ 4:

Дне́сь Це́рковь Правосла́вная та́йно ликовству́етъ, но́вою одѣ́явшися оде́ждею, я́ко порфи́рою и ви́ссономъ, но́ваго Ла́заря, и, се́ю одѣ́яна, крася́щися, взыва́етъ: вели́читъ сла́ва моя́ Го́спода, дарова́вшаго ми́ моего́ краси́теля. И па́ки со дерзнове́ніемъ зове́мъ: Иже просла́вивый Твоего́ страда́льца, Христе́ Бо́же, умири́ мíръ и спаси́ ду́ши на́ша.

И ны́нѣ, богоро́диченъ:

При́зри на моле́нія Твои́хъ ра́бъ, Всенепоро́чная, утоля́ющи лю́тая на ны́ воста́нія, вся́кія ско́рби на́съ измѣня́ющи, Тя́ бо еди́ну тве́рдое и извѣ́стное утвержде́ніе и́мамы, и Твое́ предста́тельство стяжа́хомъ, да не постыди́мся, Влады́чице, Тя́ призыва́ющіи, потщи́ся на умоле́ніе Тебѣ́ вѣ́рно вопію́щихъ: ра́дуйся, Влады́чице, всѣ́хъ по́моще, ра́досте и покро́ве, и спасе́ніе ду́шъ на́шихъ.

На благослове́ніи хлѣ́бовъ: Тропа́рь, гла́съ 3, два́жды [пи́санъ на ма́лѣй вече́рни] и Богоро́дице Дѣ́во.., еди́ножды.



НА УТРЕНИ,
На Бо́гъ Госпо́дь: Тропа́рь свята́го два́жды. Сла́ва, и ны́нѣ, богоро́диченъ.

По 1-й каѳи́смѣ сѣда́ленъ, гла́съ 1. Подо́бенъ: Ка́мени запеча́тану.

На ка́мени непоколеби́мыя вѣ́ры но́зѣ твои́ утверди́лъ еси́, богому́дре, ника́коже бу́ря тебе́ треволне́нія поколеба́, но немо́кренно сію́ преше́лъ еси́, къ Бо́гу возвы́сився, Ему́же и соводворя́яся, ра́достно Тому́ зове́ши: сла́ва милосе́рдію [Твоему́], Спа́се, сла́ва ца́рствію Твоему́, сла́ва смотре́нію Твоему́, еди́не Человѣколю́бче. [Два́жды.]

Сла́ва, и ны́нѣ, богоро́диченъ:

Ру́цѣ Твои́ боже́ственніи, и́миже Содѣ́теля носи́ла еси́, Дѣ́во Пресвята́я, воплоще́нна Божество́мъ, просте́рши, умоли́ изба́витися намъ отъ искуше́ній, и страсте́й, и бѣ́дъ, восхваля́ющимъ Тя́ любо́вію и вопію́щимъ Тебѣ́: сла́ва Все́льшемуся въ Тя́, сла́ва Проше́дшему изъ Тебе́; сла́ва Свободи́вшему на́съ рождество́мъ Твои́мъ.

По 2-й каѳи́смѣ сѣда́ленъ, гла́съ 3. Подо́бенъ: Красотѣ́ дѣ́вства.

Красото́ю житія́ твоего́ и страда́ніемъ болѣ́зней твои́хъ, а́нгелы удиви́лъ еси́ и человѣ́ки возвесели́лъ еси́, сего́ ра́ди сме́рть яви́ся тебѣ́ поко́й, и къ непреста́нному весе́лію премину́лъ еси́, Ла́заре, въ не́мже я́ко сы́й, проси́ на́мъ отъ Христа́ ве́лію ми́лость. [Два́жды.]

Сла́ва, и ны́нѣ, богоро́диченъ:

Красотѣ́ дѣ́вства Твоего́, и пресвѣ́тлой чистотѣ́ Твое́й, Гавріи́лъ удиви́вся, вопія́ше Ти́, Богоро́дице: ку́ю Ти́ похвалу́ принесу́ досто́йную? Что́ же возимену́ю Тя́? Недоумѣва́ю и ужаса́юся. Тѣ́мже я́ко повелѣ́нъ бы́хъ, вопію́ Ти́: ра́дуйся, Благода́тная.

[Поліеле́й.

Велича́ніе: Велича́емъ тя́, святы́й и пра́ведный, и́же во царе́хъ Се́рбскихъ, кня́же Ла́заре, и чте́мъ святу́ю па́мять твою́, ты́ бо мо́лиши за на́съ Христа́ Бо́га на́шего.

Псало́мъ избра́нный: Блаже́нъ му́жъ, боя́йся Го́спода...] [1]

По поліеле́и сѣда́ленъ, гла́съ 8. Подо́бенъ: Повелѣ́нное та́йно.

Повелѣ́нныя ти́ за́повѣди пріе́мь, разу́мнѣ стра́хъ Бо́жій въ себе́ прія́лъ еси́ пе́рвѣе, и́мже и окормля́емь, стезю́ пра́вую не погрѣши́лъ еси́, е́юже и ше́ствуя, во две́ри му́ченическія вше́лъ еси́, съ ни́миже проси́ пою́щимъ тя́ смире́ніе, я́ко да благода́рно пое́мъ ти́, му́дре: ра́дуйся, Ла́заре пребога́те. [Два́жды.]

Сла́ва, и ны́нѣ, богоро́диченъ:

Повелѣ́нное та́йно, пріе́мь въ ра́зумѣ, въ кро́вѣ Іо́сифовѣ тща́ніемъ предста́ безпло́тный, глаго́ля Неискусобра́чнѣй: Приклони́вый схожде́ніемъ небеса́, вмѣща́ется неизмѣ́нно ве́сь въ Тя́. Его́же и ви́дя въ ложесна́хъ Твои́хъ пріе́мша ра́бій зра́къ, ужаса́юся зва́ти Тебѣ́: ра́дуйся Невѣ́сто неневѣ́стная.

Та́же степе́нна, 1-й антифо́нъ 4-го гла́са. Проки́менъ, гла́съ 4: Мно́ги ско́рби пра́веднымъ,* и отъ всѣ́хъ и́хъ изба́витъ я́ Госпо́дь. Сти́хъ: Воззва́ша пра́ведніи, и Госпо́дь услы́ша и́хъ. Вся́кое дыха́ніе... Ева́нгеліе Луки́, зача́ло 63.

По 50-мъ псалмѣ́ стихи́ра, гла́съ 6:

Иже благода́тію Боже́ственнаго Ду́ха со́браніи дне́сь празднолю́бцы, ли́къ соста́вльше, пое́мъ пѣ́снь но́ву, па́мять сотворя́ще треблаже́ннаго Ла́заря, въ ню́же соше́дшеся, Спа́са велича́емъ и торжества́ вино́внику моле́бнѣ рце́мъ: я́ко имы́й дерзнове́ніе у Царя́ Сла́вы, моли́ изба́витися вре́да вся́каго отъ души́ сла́вящимъ тя́.

Кано́нъ Богоро́дицы со ирмосо́мъ на 6 и свята́го два́ [кано́на] на 8.

Кано́нъ свята́го, его́же краегране́сіе: Ла́заря похвали́ти, Бо́же мо́й, ра́зумъ да́руй ми́. Гла́съ 4.
Пѣ́снь 1.

Ирмо́съ: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Лику́я со а́нгельскими собо́ры при́сно, у престо́ла Боже́ственнаго, свѣтови́дныя зари́ исполня́емь, омраче́нную ду́шу мою́ озари́ти моли́ся, я́ко да по до́лгу возмогу́ воспѣ́ти па́мять твою́, Ла́заре.

Аще и по достоя́нію восхвали́ти тя́ недоумѣ́емъ, чту́щіи тя́, но, ели́ко по си́лѣ, пѣ́снь плете́мъ сла́вней твое́й па́мяти, проповѣ́дающе твое́ житіе́ и страда́ніе: я́коже любоча́денъ, пріими́ сіе́, а́ще и не по достоя́нію хвале́ніе.

Зача́ло добродѣ́тельнаго твоего́ житія́, стра́хъ Госпо́день взя́лъ еси́ отъ ю́ности, Ла́заре, и се́й имѣ́лъ еси́, наставля́ющь тя́ къ пути́ пра́вому, и́мже ше́ствуя, во дворы́ Госпо́дни вше́лъ еси́.

Богоро́диченъ: Ангельскихъ си́лъ вѣ́мы Тя́ превы́шшую, лю́діе вѣ́рніи, Спа́са и Бо́га прославля́емъ, Дѣ́во Всепѣ́тая, и, Богоро́дицу Тя́ отъ души́ сла́вяще, мо́лимся: отъ супоста́тныхъ наше́ствія пою́щія Тя́ изба́ви.

Инъ кано́нъ свята́го, гла́съ 8.
Пѣ́снь 1.

Ирмо́съ: Колесницегони́теля фарао́ня погрузи́ чудотворя́й иногда́ Моисе́йскій же́злъ, крестообра́зно порази́въ и раздѣли́въ мо́ре, Изра́иля же бѣглеца́, пѣшехо́дца спасе́, пѣ́снь Бо́гови воспѣва́юща.

Иже на тя́ разсвирѣ́пѣвшіи иноплеме́нницы потреби́шася, я́ко Даѳа́нъ и Авиро́нъ окая́нніи: тебе́ бо неви́димо храня́ще боже́ственная си́ла, Бо́гу вся́ко надъ ни́ми тя́ устро́ившу, мно́гимъ по́слѣжде тобо́ю промышля́я заступле́ніе.

Ви́дѣвъ Созда́вшій еди́нъ сердца́ человѣ́ковъ, богому́дре Ла́заре, се́рдца твоего́, е́же къ Нему́, нра́ва же кро́ткое и незло́бивое, на престо́лѣ ца́рствующихъ посади́ и па́стыря тя́ христокра́сныхъ люде́й устро́и.

Егда́ на стра́жи твое́й ста́лъ еси́ богода́нныя ти́ вла́сти, Ла́заре, тогда́ недрема́нное о́ко стяжа́лъ еси́, къ соблюде́нію богода́ннаго ти́ ста́да, о не́мже труди́вся до сме́рти, отню́дуже и мзду́ прія́лъ еси́ трудо́въ твои́хъ.

Новопросія́вшая звѣзда́ яви́лся еси́ на за́падѣ, сія́я свѣ́тлыми луча́ми твои́хъ моще́й всѣ́мъ вѣ́рнымъ, па́че же твоему́ оте́честву, и си́хъ привлача́ къ пресвѣ́тлому сія́нію твои́хъ по́двигъ и избавля́я тѣ́хъ отъ тмы́ несвѣ́тлыя, Ла́заре, и отъ приходя́щихъ то́е расхи́тити звѣре́й.

Богоро́диченъ: Вседе́рзостную крѣ́пость иноплеме́нниковъ, о Влады́чице, потреби́, лю́ди же вѣ́рныя, Тебе́ сла́вящія, спаси́; цари́ же вѣ́рныя устро́й и укрѣпи́, и́же Сы́ну и Бо́гу Твоему́ пѣ́снь воспѣва́ющихъ.

Катава́сія по уста́ву.

Пѣ́снь 3.

Ирмо́съ: Твоя́ пѣсносло́вцы, Богоро́дице, живы́й и незави́стный Исто́чниче, ли́къ Себѣ́ совоку́пльшія, духо́вно утверди́, въ боже́ственнѣй Твое́й сла́вѣ, вѣнце́въ сла́вы сподо́би.

Ра́зума отъ пеле́нъ испо́лненъ ты́ бы́лъ еси́ и благода́ти Боже́ственныя, вся́ческихъ добродѣ́телей оби́ленъ, ни́щимъ же и убо́гимъ твое́ бога́тство расточи́лъ еси́, сего́ ра́ди тя́ Христо́съ на небесѣ́хъ мно́гимъ бога́тствомъ обогати́.

Авраа́му на земли́ страннолю́біемъ подо́бяся, имѣ́лъ еси́ десни́цу благопода́тну: стра́нныя, и больны́я, и мимоходя́щія пріе́мля, сподо́бился еси́ и Бо́га прія́ти въ тебѣ́, Ла́заре.

Преиспещре́нный и сла́вный до́мъ тво́й, достоблаже́нне Ла́заре, его́же на земли́ добродѣ́тельными лѣ́потами украси́лъ еси́, жела́я вѣ́чныхъ бла́гъ получи́ти, му́дре, отню́дуже и Ца́рствія небе́снаго сподо́бился еси́.

Богоро́диченъ: О, Господоимени́тая Дѣ́во Всенепоро́чная! возбране́ніе имѣ́я и по́мощь Твоея́ моли́твы, до́блій во́инъ Твоего́ Сы́на и Бо́га первонача́льника безбо́жнаго побѣди́, себѣ́ же исхода́таи сла́ву му́ченическую.

Инъ.

Ирмо́съ: Утверже́й въ нача́лѣ небеса́ ра́зумомъ и зе́млю на вода́хъ основа́вый, на ка́мени мя́, Христе́, за́повѣдей Твои́хъ утверди́, я́ко нѣ́сть свя́тъ, па́че Тебе́, еди́не Человѣколю́бче.

Иже на высоту́ хулу́ глаго́лавый, го́рдымъ о́комъ ви́дѣвъ твоя́ поле́зная, Ла́заре, ле́стными ухищре́ньми укра́сти тя́ покуси́ся; ты́ же, Му́дрость су́щую — Христа́ Бо́га въ дому́ се́рдца твоего́ имы́й, того́ подъ но́зѣ твои́ покори́лъ еси́, вопія́: нѣ́сть свя́тъ, па́че Тебе́, Го́споди.

Бѣся́щася пе́рсянина я́ко ви́дѣвъ, со мно́жествомъ язы́къ на тя́ прише́дша, дави́дски, Ла́заре, къ боре́нію того́ изше́лъ еси́ и, я́коже о́наго втора́го побѣди́лъ еси́ Голіа́ѳа, взыва́я: нѣ́сть свя́тъ, па́че Тебе́, Го́споди.

Яко побо́рнику Правосла́вія и му́ченику неле́стну хвалу́ и сла́ву вси́ тебѣ́, вѣ́рніи, прино́симъ, Ла́заре: богора́тнаго бо звѣ́ря, я́ко не убоя́вшася рещи́: пріиди́те, и потреби́мъ пра́вую вѣ́ру сла́вящихъ отъ земли́, и не помяне́тся и́мя Правосла́вія въ ни́хъ, — крѣ́пко низложи́лъ еси́.

Богоро́диченъ: Благопремѣне́нна сотвори́, Влады́чице Всепѣ́тая, бо́дрыми Твои́ми моли́твами отъ Твоея́ утро́бы я́вльшагося человѣ́комъ пло́тію, я́ко да обря́щемъ, Тебе́ сла́вящіи, грѣхо́въ оставле́ніе и наслѣ́дницы яви́мся сла́вы Сы́на и Бо́га Твоего́.

Сѣда́ленъ, гла́съ 8. Подо́бенъ: Прему́дрости сло́во.

Прему́дростію и ра́зумомъ украше́нъ, му́жескимъ и тве́рдымъ сія́я смы́сломъ, бла́гъ же, и кро́токъ, и ми́лостивъ бы́лъ еси́ и вруче́нную ти́ па́ству до́брѣ упа́слъ еси́, язы́ческихъ же наше́ствій непра́ведное заколе́ніе претерпѣ́лъ еси́, тѣ́мже и вѣне́цъ болѣ́зней твои́хъ прія́лъ еси́. Сего́ ра́ди вопіе́мъ ти́, Ла́заре: моли́ Христа́ Бо́га согрѣше́ній оставле́ніе дарова́ти, чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Яко Всенепоро́чная Невѣ́сто Творца́, я́ко Неискусому́жная Ма́ти Изба́вителя, прія́телище я́ко су́щи Утѣ́шителя, Всепѣ́тая, беззако́нію мя́ су́ща скве́рно оби́телище и де́моновъ игра́лище въ ра́зумѣ бы́вша, потщи́ся отъ си́хъ злодѣ́йствія мя́ изба́вити и свѣ́тлое жили́ще добродѣ́телей соверши́, Свѣтоно́сная Нетлѣ́нная, отжени́ о́блакъ страсте́й, и вы́шняго прича́стія сподо́би, и свѣ́та невече́рняго моли́твами Твои́ми.

Пѣ́снь 4.

Ирмо́съ: Сѣдя́й въ сла́вѣ на Престо́лѣ Божества́ во о́блацѣ ле́гцѣ, прíиде Іису́съ Пребоже́ственный, Нетлѣ́нною Дла́нію и спасе́ зову́щія: сла́ва, Христе́, си́лѣ Твое́й.

Хра́мъ Бо́жій яви́лся еси́ по достоя́нію, хра́мъ бо Тому́ благолѣ́пенъ содѣ́лалъ еси́, всѣ́хъ приводя́щъ во удивле́ніе, оби́ліемъ кипя́ вся́кимъ, Ла́заре, въ не́мже и ли́ки и́ноческія собра́лъ еси́.

Ввѣ́ренный тебѣ́ тала́нтъ держа́вный, Ла́заре, не въ земли́ скры́лъ еси́, я́ко ра́бъ лѣни́вый, но дѣ́лавъ, я́ко ра́бъ бо́дрый своего́ Влады́ки, его́же и многоусугу́бленна Тому́ прине́слъ еси́.

Авситидíйскаго Іова житію́ всекра́сному подо́бяся, му́дростію и ра́зумомъ просвѣще́нъ яви́лся еси́, смире́ніемъ се́рдца укра́шенъ и высото́ю житія́ сія́я, и па́че си́хъ высоча́йшая испра́вилъ еси́, Ла́заре.

Богоро́диченъ: Лю́діе вѣ́рніи, сла́вящіи Тя́, Ма́терь Бо́жію, припа́дающе, мо́лимся чистотѣ́ Твое́й: моли́ся, Влады́чице, со святы́мъ му́ченикомъ о чту́щихъ Тя́: вся́ бо мо́жеши, я́ко Христа́ ро́ждши, Богоблаже́нная.

Инъ.

Ирмо́съ: Ты́ моя́ крѣ́пость, Го́споди, Ты́ моя́ и си́ла, Ты́ мо́й Бо́гъ, Ты́ мое́ ра́дованіе, не оста́вль нѣ́дра Отча, и на́шу нищету́ посѣти́въ. Тѣ́мъ съ проро́комъ Авваку́момъ зову́ Ти: си́лѣ Твое́й сла́ва, Человѣколю́бче.

Яко Гедео́нъ всекрѣ́пкій, къ наше́дшему мно́жеству пе́рсскому дерзну́лъ еси́, хра́мы моли́твенныя и сосу́ды святы́я не терпя́ зрѣ́ти пожига́емы, любя́ о си́хъ умре́ти и ду́шу твою́ положи́ти; отъ ни́хъ же главно́е усѣче́ніе претерпѣ́лъ еси́, взыва́я: сла́ва си́лѣ Твое́й, Го́споди.

Всекрѣ́пкимъ твои́мъ усе́рдіемъ спле́лся еси́ велехва́льному пе́рсянину и, того́ побѣди́въ, взыва́лъ еси́: да проліе́тся кро́вь моя́ о любви́ Христа́ моего́, изво́лихъ бо примета́тися въ дому́ Бо́га моего́ па́че, не́жели жи́ти ми́ въ тлѣ́нныхъ.

Досточу́денъ и му́жественъ въ бра́нѣхъ бы́лъ еси́, но́вый въ му́ченицѣхъ Ла́заре, ра́ны мно́гія и главно́е отсѣче́ніе любве́ ра́ди Бо́жія отъ беззако́нныхъ претерпѣ́лъ еси́, ду́хъ же пре́далъ еси́ въ ру́цѣ Бо́гу, ра́дуяся.

Богоро́диченъ: Возсія́лъ еси́ отъ Дѣ́вы, я́коже отъ о́блака звѣзда́ озаря́ющая, показу́я му́ченикомъ красоту́ и всѣ́мъ, до́брѣ подвиза́вшимся и страстьми́ распе́ншимся, Ще́дре, си́лу Твою́.

Пѣ́снь 5.

Ирмо́съ: Ужасо́шася вся́ческая о Боже́ственнѣй сла́вѣ Твое́й: Ты́ бо, неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га, и родила́ еси́ Безлѣ́тнаго Сы́на, всѣ́мъ, воспѣва́ющимъ Тя́, ми́ръ подава́ющая.

Іо́сифа цѣлому́дреннаго чистотѣ́ и боже́ственному житію́ подо́бяся, пшеницеда́тель и ми́лостивъ ни́щимъ бы́лъ еси́: сію́ посѣ́явъ въ бразда́хъ, нището́ю изсо́хшихъ, отону́дуже во вре́мя плодо́въ весе́ліемъ рукоя́ти пожа́лъ еси́.

Твоего́ ра́ди ми́лованія, е́же на земли́ стяжа́лъ еси́, пра́вды ра́ди твоея́, пріобрѣ́теніе стои́тъ тебѣ́ нетлѣ́нно, е́же и получи́въ, обрѣ́лъ еси́ трудо́въ твои́хъ возме́здіе и живе́ши съ ли́ки пра́ведникъ и му́ченикъ, ра́дуяся.

Иже нището́ю угнѣта́еміи лю́тѣ и и́же въ плѣне́ныхъ и вся́кихъ ну́ждахъ озлобля́еміи тру́бятъ въ подсо́лнечнѣй, Ла́заре, твои́хъ, досточу́дне, ми́лованій пучи́ну неизслѣ́диму.

Богоро́диченъ: Безъ сѣ́мене Сло́во Бо́жіе, Неискусобра́чная, о Богоро́дице, родила́ еси́, я́коже То́й благоизво́ли, Его́же ра́ди, Бо́га, му́жески сла́вный му́ченикъ Ла́зарь, проповѣ́дуя, вожделѣ́нно пострада́.

Инъ.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Да подви́жится къ твоему́ похвале́нію вся́къ язы́къ, я́ко хва́ленъ ста́ду твоему́ бы́лъ еси́ во́ждь, и я́ко, си́хъ приве́дъ, упа́слъ еси́ на па́житѣхъ живо́тныхъ, и я́ко засту́пникъ тѣ́мъ въ животѣ́ и по сме́рти яви́вся, и я́ко о не́мъ подвиза́лся еси́ до сме́рти.

Нача́льствующу тебѣ́ ста́ду христоимени́тому въ звѣ́рскихъ нахожде́ніихъ, не нае́мникъ, но па́стырь до́брый бы́лъ еси́, за́повѣди Пастыренача́льника потща́лся еси́ испо́лнити, расхища́ющимъ ста́до Христо́во возбраня́я, убіе́нъ бы́лъ еси́.

Свѣтя́щую тя́ свѣщу́ во дни́ и нощи́, Ла́заре, твоя́ честны́я свѣтоза́рныя мо́щи стяжа́вши, Це́рковь весели́тся, просвѣща́ема дне́сь заре́ю, ю́же свы́ше прія́лъ еси́ Ду́ха Свята́го осѣне́ніемъ, и́миже вся́кія ле́сти избѣжа́вши, тя́ прославля́етъ.

Богоро́диченъ: Ду́шу мою́ озари́, омраче́нную прегрѣше́ньми и ослѣпле́нную лю́тыми похотьми́, Яже Со́лнце ро́ждшая Пра́ведное, Приснодѣ́во: ели́ка бо хо́щеши, мо́жеши.

Пѣ́снь 6.

Ирмо́съ: Боже́ственное сіе́ и всечестно́е соверша́юще пра́зднество, богому́дріи, Богома́тере, пріиди́те, рука́ми воспле́щимъ, отъ Нея́ ро́ждшагося Бо́га сла́вимъ.

О, всекра́сныя ку́пли твоея́, свя́те! О, чу́днаго твоего́ измѣне́нія! Маловре́менною бо сла́вою вѣ́чную искупи́лъ еси́, въ не́йже ны́нѣ живе́ши, о на́съ моли́ся.

Житію́ твоему́, Ла́заре, кто́ не удиви́тся, собра́лъ бо еси́, я́коже пчела́ благоразу́мная, мно́жество цвѣтови́дныхъ добродѣ́телей: въ ни́хже, красу́яся, на́съ облагоуха́еши.

Еже по достоя́нію чу́днаго твоего́ житія́, досто́йно жела́ему сла́ву, ты́ отъ Христа́ Бо́га получи́лъ еси́, идѣ́же ны́нѣ предстои́ши, въ ри́зу свѣ́тлу отъ добродѣ́телей облече́нъ, ра́дуяся.

Богоро́диченъ: Ма́ти Приснодѣ́во, я́ко Чи́стую Тя́, Сло́во Чи́стое возлюби́, изъ Тебе́ вопло́щся, обнови́ человѣ́ка и Своего́ уго́дника просла́ви чудесы́.

Инъ.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Страны́ вся́ окре́стныя, Ла́заре, проповѣ́дуютъ твое́ житіе́ и по́двиги, изря́днѣе же твое́ оте́чество, свя́те; труби́тъ же и Це́рковь Свята́я, па́мять твою́ сла́вящи, я́ко о то́й кро́вь твою́ излія́лъ еси́, но́вый въ му́ченицѣхъ Ла́заре.

Гобзу́юща тя́ въ поле́зныхъ я́ко ви́дѣ пе́рсянинъ, на тя́ свирѣ́по рыка́я, со мно́жествомъ язы́къ прихо́дитъ, отъ ни́хже и главно́е отсѣче́ніе претерпѣ́лъ еси́, я́ко му́ченикъ, того́же возгнѣще́ніе вѣ́чному огню́ мече́мъ содѣ́лалъ еси́.

Бо́гъ, Иже во гро́бѣ забве́нія не оста́ви твое́ тѣ́ло, земно́му же естеству́ повелѣ́ не растли́ти, но цѣ́ло и облагоуха́емо явля́етъ, всѣ́хъ вѣ́рныхъ чу́вствія и зрѣ́ніе во удивле́ніе привлача́.

Богоро́диченъ: Иже вся́ приведы́й отъ небытія́ въ бытіе́, Иже отъ Дѣ́вы Неискусому́жныя на́съ ра́ди вопло́щся, Исмаи́ля врага́ покори́, борю́щаго на́съ, ро́ду на́шему побѣ́ду да́руя, мольба́ми Твоего́ Ла́заря и Ро́ждшія Тя́, Сло́ве Бо́жій.

Конда́къ, гла́съ 8. Подо́бенъ: Взбра́нной Воево́дѣ.

Возбра́нника благоче́стія всеизря́дна и му́ченика о и́стинѣ непосты́дна, че́стнѣ и по до́лгу восхваля́етъ тя́ ста́до твое́, богому́дре, но́ я́ко имѣ́я дерзнове́ніе ко Христу́ Бо́гу, тебе́ сла́вящимъ смире́ніе испроси́, да зове́мъ ти́: ра́дуйся, Ла́заре приснопа́мятне.

Икосъ:

Имать тебе́ твое́ оте́чество и па́ства, я́ко жи́ва и по сме́рти: да́ръ прече́стенъ и бога́тство неиждива́емое, засту́пника вели́ка и возбра́нника крѣ́пка, о благолюбе́зне; тѣ́мже и въ де́нь сконча́нія твоего́ пѣ́сни достохва́льныя прино́симъ ти́, и, велича́юще тя́, взыва́емъ тебѣ́ такова́я: ра́дуйся, отца́ благочести́ва прозябе́ніе; ра́дуйся, ма́тере благоговѣ́йныя прижи́тіе; ра́дуйся, я́ко отъ ю́ности послѣ́довалъ еси́ за́повѣдемъ Бо́жіимъ; ра́дуйся, сто́лпе Правосла́вія непоколеби́мый; ра́дуйся, зда́телю и краси́телю святы́хъ церкве́й; ра́дуйся, оби́льное ми́лованіе ни́щихъ; ра́дуйся, па́стырю до́брый, положи́вый ду́шу твою́ о лю́дехъ Бо́жіихъ; ра́дуйся, я́ко о благоче́стіи кро́вь твою́ излія́лъ еси́; ра́дуйся, я́ко си́хъ ра́ди съ му́ченики причте́ся и водворе́ніе съ ни́ми получи́лъ еси́; ра́дуйся, я́ко тобо́ю украси́шася правосла́вніи; ра́дуйся, я́ко сла́ва о тебѣ́ протече́ по вселе́ннѣй; ра́дуйся, на́шъ засту́пниче и изба́вителю. И сія́ тебѣ́ прино́симъ, свя́те, я́ко досто́йну, и мо́лимъ тя́: возме́здіе сла́вящимъ тя́ пода́ждь и вся́каго озлобле́нія на́съ изба́ви, да зове́мъ ти́: ра́дуйся, Ла́заре приснопа́мятне.

Пѣ́снь 7.

Ирмо́съ: Не послужи́ша тва́ри богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́.

О Бо́зѣ вѣ́рою усе́рдною возмога́я, мно́жество хра́мовъ святы́хъ обнови́лъ еси́, мно́жайшія же отъ основа́нія воздви́глъ еси́ Го́споду въ славосло́віе, и́хже ра́ди до́мъ Ду́ха Свята́го себе́ содѣ́лалъ еси́, вопія́: благослове́нъ Бо́гъ оте́цъ на́шихъ.

Испещре́нну лѣ́ствицу, и до небе́съ досяжу́щу, на земли́, я́ко худо́гъ, хитре́цъ Ла́заре, устро́илъ еси́: бы́ша во тебѣ́, я́коже степе́ни лѣ́ствичныя, блага́я дѣла́, и́миже восте́къ, идѣ́же жела́лъ еси́, зовы́й: благослове́нъ Бо́гъ оте́цъ на́шихъ.

Ра́зума свѣ́тлости въ добродѣ́тели житія́ и пре́жде страда́нія ты́, му́дре, испо́лнь бы́лъ еси́, краснѣ́йшій же яви́лся еси́ по по́двизѣхъ чуде́сныхъ. Тѣ́мже тя́ я́ко Бо́жія уго́дника почита́емъ, зову́ще: благослове́нъ Бо́гъ оте́цъ на́шихъ.

Богоро́диченъ: Ада́мъ отъ тли́ рождество́мъ Твои́мъ изба́вися, кромѣ́ бо тлѣ́нія человѣ́ческаго ро́ждши, тѣ́мже тлѣ́нія зла́го мя́, Отрокови́це, изба́ви мольба́ми Твоего́ Ла́заря, Влады́чице.

Инъ.

Ирмо́съ: Бо́жія снисхожде́нія о́гонь устыдѣ́ся въ Вавило́нѣ иногда́, сего́ ра́ди о́троцы въ пещи́, ра́дованною ного́ю, я́ко во цвѣ́тницѣ, лику́юще поя́ху: благослове́нъ еси́, Бо́же оте́цъ на́шихъ.

Не терпя́, богому́дре, зрѣ́ти хра́момъ моли́твеннымъ безбо́жными пожига́емымъ и ста́до христоимени́тое расхища́емо, ре́вностію Бо́жія любве́ разже́гся, изше́лъ еси́, и му́ченическое отъ си́хъ главно́е отсѣче́ніе претерпѣ́лъ еси́, зовы́й: благослове́нъ Бо́гъ оте́цъ на́шихъ.

Съ ли́ки а́нгельскими въ свѣ́тлѣмъ пребыва́ніи и съ му́ченическими собо́ры водворя́яся я́ко му́ченикъ, Ла́заре, у престо́ла всѣ́хъ Царя́ и Бо́га на́шего, лику́я, зове́ши: благослове́нъ Бо́гъ оте́цъ на́шихъ.

Дне́сь весели́тся вся́ка душа́ вѣ́рныхъ, собра́вшихся на свято́е торжество́, во всесвяты́й хра́мъ тво́й, и, зря́ще въ не́мъ, я́коже со́лнце, святы́я твоя́ мо́щи, ра́дуется, взыва́юще: благослове́нъ Бо́гъ оте́цъ на́шихъ.

Богоро́диченъ: Восхваля́емъ Тя́, похвалу́ му́чениковъ и вѣ́рныхъ спасе́ніе, вси́ ро́ди человѣ́честіи, Пренепоро́чная: Бо́га бо родила́ еси́ и пребыва́еши Дѣ́вою нетлѣ́нна, Ему́же зове́мъ: благослове́нъ Бо́гъ оте́цъ на́шихъ.

Пѣ́снь 8.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки.

Заре́ю солнцеви́дною достолѣ́пно, Ла́заре, украше́нъ и багряни́цею, ю́же отъ крове́й твои́хъ очервле́нною, бы́лъ еси́ одѣ́янъ, держа́ кре́стъ твое́ю руко́ю, Христу́, просла́вльшему тя́, предстои́ши. Тѣ́мъ мо́лимъ тя́: труда́мъ твои́мъ вѣ́чновати Ему́ моли́ся.

Услы́ши мольбы́ и пѣ́нія гла́съ люде́й твои́хъ, свя́те, вонми́ воздыха́нію ста́да твоего́, я́ко отечестволю́бецъ, и проти́вися гнѣ́внѣ на на́съ вою́ющимъ: вѣ́мы бо многомо́щную моли́тву пра́веднаго.

Ма́лаго и худа́го моле́нія на́шего не пре́зри, мо́лимъ тя́, жи́телю вы́шняго Ца́рствія Ла́заре, но призира́й на твое́ ста́до, я́коже при животѣ́ и по сме́рти, и смире́ніе испроси́ ро́ду на́шему и хва́лящимъ тя́.

Да ра́дуется дне́сь мно́жество боже́ственное: яви́ся бо на за́падѣ пресвѣ́тлая звѣзда́, во вре́мя послѣ́днее сія́ющи досточу́дными луча́ми свои́хъ исправле́ній и озаря́я вѣ́рныя, Ла́заре всебога́те. Тѣ́мже торжеству́имъ, зову́ще: благослови́те, вся́ дѣла́ Госпо́дня, Го́спода и превозноси́те во вся́ вѣ́ки.

Богоро́диченъ: Ангеловъ Ти́ гла́съ, Богоневѣ́сто, приноша́емъ: ра́дуйся, Помо́щнице вѣ́рно чту́щихъ Тя́ человѣ́ковъ, проро́ковъ сбытіе́, апо́столовъ и му́чениковъ украше́ніе боголѣ́пное.

Инъ.

Ирмо́съ: Седмери́цею пе́щь халде́йскій мучи́тель богочести́вымъ неи́стовно разжже́, си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Не пожда́въ сме́рти есте́ственныя, но́, я́коже жела́въ, получи́лъ еси́, всекра́сное твое́ житіе́ муче́ніемъ удобротвори́лъ еси́, и преше́лъ еси́ къ вы́шнимъ оби́телемъ, идѣ́же зри́ши добро́ту неизрече́нную, и, я́ко му́ченикъ имѣ́я дерзнове́ніе, зове́ши: о́троцы, благослови́те, свяще́нницы, воспо́йте, лю́діе, превозноси́те Христа́ во вся́ вѣ́ки.

Полку́ богосо́бранному предсія́я, я́коже звѣзда́ благозра́чная, и си́хъ во свѣ́тлая селе́нія приве́лъ еси́ путе́мъ страда́льческимъ, и лико́мъ му́ченическимъ приче́тъ си́хъ съ собо́ю, крѣ́пко бо о благоче́стіи кро́вь твою́ пролія́лъ еси́, свя́те, зовы́й: о́троцы, благослови́те, свяще́нницы, воспо́йте, лю́діе, превозноси́те Христа́ во вся́ вѣ́ки.

Во сла́ву и свѣ́тлость боже́ственную преше́дъ ду́хомъ, я́ко любоча́денъ, на́съ, си́рыхъ, не оста́вилъ еси́, но́, я́коже Илія́ Елиссе́ю ми́лоть во утѣше́ніе, си́це честно́е тѣ́ло твое́ цѣ́ло и благоуха́нно на́мъ оста́вилъ еси́, любя́ и по сме́рти пито́мцы твоя́, пою́щія: о́троцы, благослови́те, свяще́нницы, воспо́йте, лю́діе, превозноси́те Христа́ во вся́ вѣ́ки.

Богоро́диченъ: Сы́нъ Единоро́дный, Иже пре́жде вѣ́къ неви́димый, напослѣ́докъ же вѣко́въ Пе́рвенецъ бы́сть, ви́димъ пло́тію изъ Тебе́, Ма́ти Дѣ́во, на́съ ра́ди вочеловѣ́чися, да земны́я обожи́тъ, Бо́гъ спасе́нія моего́, Ему́же зове́мъ: благослови́те, вся́ дѣла́ Госпо́дня, Го́спода и превозноси́те во вся́ вѣ́ки.

Пѣ́снь 9.

Ирмо́съ: Вся́къ земноро́дный да взыгра́ется, Ду́хомъ просвѣща́емь, да торжеству́етъ же безпло́тныхъ умо́въ естество́, почита́ющее свяще́нное торжество́ Богома́тере, и да вопіе́тъ: ра́дуйся, Всеблаже́нная Богоро́дице, Чи́стая Приснодѣ́во.

Ра́дующися во всепра́зднственный де́нь твоего́ сконча́нія, Це́рковь вѣ́рныхъ дне́сь, со всѣ́ми окре́стными совоку́пльшися, пра́зднуетъ, храни́теля и засту́пника бо́дра стяжа́вши: ю́же огражда́й твои́мъ предста́тельствомъ, я́ко да тя́ велича́емъ.

Украси́въ ду́шу твою́ боже́ственными лѣ́потами, кра́сному Сло́ву сла́венъ предстои́ши во дерзнове́ніи мно́зѣ. Сего́ ра́ди мо́лимъ тя́: свы́ше на́съ, пѣвцы́ твоя́, назира́й ми́лостивно, наро́ду на́шему побѣди́тельная на супоста́ты испроси́, я́ко да тя́ ублажа́емъ.

Иже празднолю́бныхъ собо́ри, и́же въ торжество́ ны́нѣ хвали́маго Ла́заря собра́вшеся, наслади́мся торжества́ спасе́ннаго, зря́ще проро́ческихъ дне́сь сбы́вшихся слове́съ: е́же пра́ведницы во вѣ́ки живу́тъ и отъ Го́спода си́мъ прославле́ніе, Его́же велича́емъ.

Многоцѣ́нное бога́тство и неиждива́емое — тѣ́ло твое́ стяжа́въ, хра́мъ тво́й, свя́те, крася́щеся тобо́ю, и взыва́етъ, веселя́ся: вели́читъ сла́ва моя́ Го́спода, дарова́вшаго мое́ украше́ніе, покро́въ и заступле́ніе отъ супоста́товъ.

Богоро́диченъ: Истинную Богоро́дицу вѣ́дый му́ченикъ Ла́зарь, и изъ Тебе́ рожде́ннаго Бо́га проповѣ́дуя, къ безбо́жному мно́жеству отъ Того́ любве́ ополчи́ся, и му́жески проти́вися да́же и до сме́рти, Богоро́дице, Тя́ велича́емъ.

Инъ.

Ирмо́съ: Ужасе́ся о се́мъ не́бо, и земли́ удиви́шася концы́, я́ко Бо́гъ яви́ся человѣ́комъ пло́тски, и чре́во Твое́ бы́сть простра́ннѣйшее небе́съ. Тѣ́мъ Тя́, Богоро́дицу, а́нгеловъ и человѣ́къ чинонача́лія велича́ютъ.

Тебе́ мо́лимъ, свя́те, прилѣ́жно: о Це́ркви вѣ́рнѣй помоли́ся, о не́й же и кро́вь твою́ му́ченически излія́лъ еси́, правосла́внѣй же вѣ́рѣ крѣ́пость на е́реси враго́въ испроси́, смире́ніе же — чту́щимъ тя́, Ла́заре.

Яко ши́покъ багрянови́дный, и я́блоко благово́нно, я́ко кри́нъ се́льный и я́ко мѵ́ро благоуха́нно, ра́ка твоя́, Ла́заре, на́съ облагоуха́ющи, весели́тъ: ю́же и посредѣ́ иму́ще, я́коже сокро́вище многоцѣ́нное, то́ю красу́емся, Спа́са велича́юще.

Въ пра́здникъ святы́я твоея́ па́мяти, Ла́заре, соше́дшеся, ли́цы веселя́тся, съ ни́миже и мы́ пѣ́сньми тя́ почита́емъ. Пріиди́ же и ты́, свя́те, и предначина́й торже́ственная, озлобле́нія же на́съ вся́каго изба́ви, я́ко твое́ есмы́ ста́до.

Богоро́диченъ: О, Всепѣ́тая Цари́це, Яже Безнача́льнаго ро́ждши Царя́ Сла́вы! пою́щимъ Тя́ согрѣше́ній проще́ніе и житію́ устрое́ніе благоприбы́тно пода́ждь Твоего́ Ла́заря мольба́ми.

Свѣти́ленъ. Подо́бенъ: Со ученики́ взы́демъ.

Оте́чество твое́, израсти́вшее тя́, твои́ми пелена́ми хва́лится, по́двиги же и страда́ньми красу́ется, но́вый въ му́ченицѣхъ Ла́заре, свѣтлѣ́ется же и це́рковь Спа́са и Бо́га, сокро́вище бога́тое иму́щи — святы́я твоя́ мо́щи; мы́ же, вѣ́рніи, па́мять твою́ соверша́юще, моле́бно зове́мъ: изба́ви почита́ющихъ тя́ озлобле́нія вся́каго твои́ми моли́твами. [Два́жды.]

[Сла́ва, и ны́нѣ,] богоро́диченъ:

Пріими́ моле́ніе, Всечи́стая Ма́ти Бо́жія Сло́ва, Твои́хъ люде́й, вѣ́рно сла́вящихъ Тя́, Богоро́дицу, и сохраня́й Твое́ ста́до ненавѣ́тно сопроти́вными, непреста́нно сла́вящее Тя́, Непосты́дную Засту́пницу: ины́я бо Помо́щницы не и́мамы, ра́звѣ Тебе́, Влады́чице.

На хвали́техъ стихи́ры на 4, гла́съ 4. Подо́бенъ: Яко до́бля.

До́бляго исполни́теля за́повѣдей Бо́жіихъ, соше́дшеся, восхва́лимъ по достоя́нію но́ваго Ла́заря, блага́го ко́рене о́трасль сладча́йшую, сла́внаго въ житіи́ земна́го влады́чествія, краснѣ́йшаго же въ добродѣ́телехъ показа́вшася, и́же вся́кою добродѣ́телію оби́льнаго, и со а́нгелы Христу́ предстоя́щаго, и о и́же па́мять Его́ съ любо́вію пою́щихъ моля́щагося. [Два́жды.]

До́бляго и му́жественнаго во бра́нехъ и адама́нта твердѣ́йшаго, побо́рника всеи́стинна о Правосла́віи, благоче́стія столпа́ непоколеби́маго, чу́днаго Ла́заря ублажи́мъ, ревни́теля и подража́теля Авраа́ма о́наго, и́же о и́стинѣ му́ченика я́вльшагося, у Христа́ предстоя́щаго, о на́съ моля́щагося.

Кро́вію новоизлія́нною твое́ю вѣ́рныхъ Це́рковь украша́ется, па́че же труды́ твои́ми содѣ́ланная, я́ко о то́й сію́ излія́лъ еси́, и, се́ю обагри́вшися, та́йно лику́етъ, веселя́щися, и почита́етъ достопа́мятное твое́ сконча́ніе, му́чениковъ удобре́ніе и держа́вныхъ похвало́, Ла́заре, и мо́лимтися: огражда́й сію́ отъ обстоя́ній.

Сла́ва, гла́съ 8:

Нача́ло добродѣ́тельнаго твоего́ житія́, стра́хъ Бо́жій въ ду́шу твою́ всели́лъ еси́, и́мже окормля́емь, стезю́ десну́ю не погрѣши́лъ еси́, и, се́ю ше́ствуя, Тому́ угоди́лъ еси́, и да́нный ти́ тала́нтъ до́брѣ воздѣ́лалъ еси́, о не́мже главно́е отсѣче́ніе прія́лъ еси́, отону́дуже и мно́жае Христо́ви присво́ился еси́. Тѣ́мже боже́ственная селе́нія и гра́дъ небе́сный всекра́сную твою́ ду́шу прія́тъ, идѣ́же ны́нѣ лику́еши бли́зъ Царя́ и Бо́га, тѣ́мъ мо́лимъ тя́: моли́ о сла́вящихъ тя́ любо́вію, Ла́заре.

И ны́нѣ, богоро́диченъ:

Чи́стая Дѣ́во, Сло́ва врата́, Бо́га на́шего Ма́ти, моли́ спасти́ся на́мъ.

Славосло́віе вели́кое, [ектеніи́] и отпу́стъ.



НА ЛИТУРГІИ,

Блаже́нна 1-го кано́на, пѣ́снь 3-я, и 2-го кано́на, пѣ́снь 6-я. Проки́менъ, гла́съ 7: Возвесели́тся пра́ведникъ о Го́сподѣ,* и упова́етъ на Него́. Сти́хъ: Услы́ши, Бо́же, гла́съ мо́й, [внегда́ моли́тимися къ Тебѣ́]. Апо́столъ въ Дѣя́ніяхъ, зача́ло 29. Аллилу́ія, гла́съ 4: Пра́ведникъ, я́ко фи́никсъ, процвѣте́тъ, [я́ко ке́дръ, и́же въ Лива́нѣ, умно́жится. Сти́хъ: Насажде́ни въ дому́ Госпо́дни, во дво́рѣхъ Бо́га на́шего процвѣту́тъ]. Ева́нгеліе Іоа́нна, зача́ло 52. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся.]

Примѣчаніе:
[1] См.: Зборник црквених богослужбених пјесама, псалама и молитава. Извод из Типика и црквенословенски рјечник за Православне Србске Цркве и школе. — Сремски Карловци: Српска манастирска штампариjа, 1901. — С. 301.

Источникъ: Србљак. — Београд: Издаjе Свети Архиjереjски Синод Српске Православне Цркве, 1986. — С. 408-422.



/ Къ оглавленію раздѣла /


Наверхъ / Къ титульной страницѣ

0