Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 21 октября 2017 г. Сейчасъ на порталѣ посѣтителей - 18.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́нія въ 15-й де́нь.
Слу́жба и́же во святы́хъ отца́ на́шего Іо́ны, митрополи́та Моско́вскаго и всея́ Россíи.

[НА ВЕЛИЦѢЙ ВЕЧЕРНИ,]
[Блаже́нъ мужъ.., 1-й антифо́нъ. На Го́споди воззва́хъ:] стихи́ры на 8, гла́съ 4. Подо́бенъ: Зва́нный свы́ше.

Егда́ боже́ственное сія́ніе* въ се́рдцы твое́мъ,* Іо́но святи́телю, всели́ся,* тогда́ ра́дость пресвѣ́тлую* и пречестну́ю сла́ву воспріи́мъ,* отсю́ду вся́ су́щая,* я́ко преходя́щая, имѣ́лъ еси́,* еди́ному же Бо́гу отъ се́рдца прилѣпи́лся еси́.* Того́ моли́* и Тому́ помоли́ся, вели́кій во архіере́ехъ,* спасти́ и просвѣти́ти ду́ши на́ша.

Егда́ боже́ственное раче́ніе* на́йде на тя́, святи́телю,* тогда́, ве́сь отъ ю́ности себе́* Влады́цѣ Христу́ возложи́въ,* Сего́ возжелѣ́лъ еси́* и, вся́кихъ страсте́й,* до́лу влеку́щихъ, очи́щся,* отсю́ду до́мъ и жили́ще* Пресвята́го Ду́ха яви́лся еси́,* пресла́вная содѣва́я чудодѣ́йства.* Христа́ моли́* спасти́ и просвѣти́ти ду́ши на́ша.

Ины стихи́ры, гла́съ то́йже. Подо́бенъ: Яко до́бля.

На земли́, я́ко а́нгелъ, пожи́въ,* всеблаже́нне святи́телю Іо́но,* надъ страстьми́ воцари́лся еси́,* ху́ждшее покори́лъ еси́ лу́чшему.* Тѣ́мже, преше́дъ къ непреходя́щему Ца́рствію,* моли́ся при́сно низпосла́ти вѣ́рно чту́щимъ тя́* грѣхо́въ очище́ніе* и ве́лію ми́лость. [Два́жды.]

Богодарова́нную ти́ па́ству,* святи́телю Іо́но,* твои́ми уче́ніи до́брѣ упа́слъ еси́* на зла́цѣхъ живо́тныхъ,* ны́нѣ же преше́дъ къ незаходи́мому сія́нію* и присносу́щному весе́лію,* помина́й, преблаже́нне, лю́ди,* чту́щія честно́е успе́ніе твое́,* и моли́ спасти́ся душа́мъ на́шимъ.

Вели́каго архіере́я,* Іо́ны блаже́ннаго,* свяще́нную па́мять* дне́сь соверша́юще,* боже́ственными пѣ́сньми, пріиди́те вси́, почти́мъ* о на́съ всегда́ моля́щася,* низпосла́ти мно́жество щедро́тъ* и спасе́ніе душа́мъ на́шимъ.

Сла́ва, гла́съ 6. Самогла́сенъ:

Благоуха́етъ боже́ственная ра́ка моще́й твои́хъ, Іо́но святи́телю, всѣ́мъ вѣ́рнымъ исцѣле́ніе душа́мъ и тѣлесе́мъ да́рующи. Тѣ́мже тя́ мо́лимъ, богодарова́нное твое́ ста́до въ ми́рѣ соблюсти́, Импера́тора же и все́ Правосла́віе, да вси́ тебе́, я́ко и́стиннаго па́стыря и моли́твенника къ Бо́гу, непреста́нно велича́емъ.

И ны́нѣ, богоро́диченъ: Кто́ Тебе́ не ублажи́тъ...
Та́же вхо́дъ. Проки́менъ дне́. Пареміи́.

При́тчей чте́ніе.

Па́мять пра́веднаго съ похвала́ми, и благослове́ніе Госпо́дне на главѣ́ его́. Блаже́нъ человѣ́къ, и́же обрѣ́те прему́дрость, и сме́ртенъ, и́же увѣ́дѣ ра́зумъ. Лу́чше бо сію́ купова́ти, не́жели зла́та и сребра́ сокро́вища. Честнѣ́йшая же е́сть ка́меній многоцѣ́нныхъ, все́ же честно́е недосто́йно ея́ е́сть. Долгота́ бо дне́й и лѣ́та живота́ въ десни́цѣ ея́, въ шу́йцѣ же ея́ бога́тство и сла́ва. Отъ у́стъ ея́ исхо́дитъ пра́вда, зако́нъ же и ми́лость на язы́цѣ но́ситъ. Послу́шайте у́бо мене́, о ча́да, честна́я бо реку́, и блаже́нъ человѣ́къ, и́же пути́ моя́ сохрани́тъ: исхо́ди бо мои́ — исхо́ди живота́, и уготовля́ется хотѣ́ніе отъ Го́спода. Сего́ ра́ди молю́ ва́съ и предлага́ю мо́й гла́съ сыново́мъ человѣ́ческимъ. Я́ко а́зъ, прему́дрость, устро́ихъ совѣ́тъ, и ра́зумъ и смы́слъ азъ призва́хъ. Мо́й совѣ́тъ и утвержде́ніе, мо́й ра́зумъ, моя́ же крѣ́пость. Азъ мене́ лю́бящія люблю́, и́щущіи же мене́ обря́щутъ благода́ть. Разумѣ́йте у́бо, незло́бивіи, кова́рство, ненака́заніи же, прилага́йте сердца́. Послу́шайте мене́ и па́ки, честна́я бо реку́, и отве́рзу отъ усте́нъ пра́вая, я́ко и́стинѣ поучи́тся горта́нь мой, ме́рзки же пре́до мно́ю устны́ лжи́выя. Съ пра́вдою вси́ глаго́лы у́стъ мои́хъ, ничто́же въ ни́хъ стро́потно, ниже́ развраще́нно. Вся́ пра́ва су́ть разумѣва́ющимъ и про́ста обрѣта́ющимъ ра́зумъ. Науча́ю бо ва́съ и́стинѣ, да бу́детъ о Го́сподѣ наде́жда ва́ша, и испо́лнитеся Ду́ха.

Прему́дрости Соломо́новы чте́ніе.

Уста́ пра́веднаго ка́плютъ прему́дрость, устнѣ́ же муже́й му́дрыхъ вѣ́дятъ благода́ть. Уста́ му́дрыхъ поуча́тся прему́дрости, пра́вда же избавля́етъ и́хъ отъ сме́рти. Сконча́вшуся му́жу пра́ведну, не поги́бнетъ наде́жда. Сы́нъ бо пра́веденъ ражда́ется въ живо́тъ и во благи́хъ свои́хъ пло́дъ пра́вды объи́метъ. Свѣ́тъ пра́веднымъ всегда́, и отъ Го́спода обря́щутъ благода́ть и сла́ву. Язы́къ му́дрыхъ до́брая свѣ́сть, и въ се́рдцѣ и́хъ почíетъ му́дрость. Лю́битъ Госпо́дь преподо́бная сердца́, прія́тни же Ему́ вси́ непоро́чніи въ пути́. Му́дрость Госпо́дня просвѣща́етъ лице́ разу́мнаго: постига́етъ бо жела́ющія ю́, пре́жде да́же разумѣ́ти ю́, и удо́бь у́зрится отъ лю́бящихъ ю́. Утреневавый къ не́й не утруди́тся, и бдя́й ея́ ра́ди вско́рѣ безъ печа́ли бу́детъ. Яко досто́йныхъ ея́ сама́ обхо́дитъ, и́щущи, и во стезя́хъ ея́ явля́ется и́мъ благопріе́мнѣ. Му́дрости никогда́же одолѣ́етъ зло́ба. Си́хъ ра́ди и рачи́тель бы́хъ добро́ты ея́, и возлюби́хъ ю́, и поиска́хъ отъ ю́ности моея́. И взыска́хъ невѣ́сту привести́ себѣ́, я́ко всѣ́хъ Влады́ка возлюби́ ю́. Таи́бница бо е́сть Бо́жія хи́трости и обрѣта́тельница дѣ́лъ Его́. Труды́ ея́ су́ть добродѣ́тели: цѣлому́дрію же и ра́зуму та́ учи́тъ, пра́вдѣ и му́жеству, и́хже потре́бнѣе ничто́же е́сть въ житіи́ человѣ́комъ. Аще же и мно́гаго иску́сства жела́етъ кто́, вѣ́сть дре́вняя, и бы́ти хотя́щая разсмо́тритъ. Свѣ́сть изви́тія слове́съ и разрѣше́нія гада́ній, зна́менія и чудеса́ проразумѣ́етъ, и сбытія́ време́нъ и лѣ́тъ, и всѣ́мъ совѣ́тникъ е́сть бла́гъ. Яко безсме́ртіе е́сть въ не́й и благосла́віе во обще́ніи слове́съ ея́. Сего́ ра́ди бесѣ́довахъ ко Го́споду, и помоли́хся Ему́, и рѣ́хъ отъ всего́ се́рдца моего́: Бо́же отце́въ и Го́споди ми́лости, сотвори́вый вся́ сло́вомъ Твои́мъ и му́дростію Твое́ю устро́ивый человѣ́ка, да владѣ́етъ бы́вшими отъ Тебе́ тварьми́ и да управля́етъ мíръ въ преподо́біи и пра́вдѣ. Да́ждь ми́ Твои́хъ Престо́ловъ присѣдя́щую прему́дрость и не отлучи́ мене́ отъ о́трокъ Твои́хъ, я́ко а́зъ ра́бъ Тво́й и сы́нъ рабы́ни Твоея́. Посли́ ю́ съ Небе́съ отъ свята́го жили́ща Твоего́ и отъ Престо́ла сла́вы Твоея́, да, су́щи со мно́ю, научи́тъ мя́, что́ благоуго́дно е́сть предъ Тобо́ю, и наста́витъ мя́ въ ра́зумъ, и сохрани́тъ мя́ въ сла́вѣ свое́й. Помышле́нія бо сме́ртныхъ вся́ боязли́ва и погрѣши́тельна умышле́нія и́хъ.

Прему́дрости Соломо́новы чте́ніе.

Похваля́ему пра́веднику, возвеселя́тся лю́діе: безсме́ртіе бо е́сть па́мять его́, я́ко отъ Го́спода познава́ется и отъ человѣ́къ, и уго́дна Го́сподеви душа́ его́. Возлюби́те у́бо, о му́жіе, му́дрость и поживете́: восхощи́те ея́ и нака́зани бу́дете. Нача́ло бо ея́ любы́ и соблюде́ніе зако́на. Почти́те прему́дрость, да во вѣ́ки ца́рствуете. Возвѣщу́ ва́мъ и не скры́ю отъ ва́съ та́инъ Бо́жіихъ, я́ко То́й му́дрости наста́вникъ е́сть, и му́дрыхъ испра́витель, и вся́кому смы́слу и дѣ́лу хитре́цъ. И всѣ́мъ смы́сломъ научи́тъ му́дрость, е́сть бо въ не́й Ду́хъ разу́менъ и свя́тъ, и сія́ніе свѣ́та присносу́щнаго, и о́бразъ бла́гости Бо́жія. Та́я дру́ги Бо́жія и проро́ки устроя́етъ, благолѣ́пнѣйши же е́сть со́лнца и па́че вся́каго сотворе́нія звѣ́здъ, свѣ́ту сосужда́ема, обрѣта́ется пе́рвѣйши. Та́я угожда́ющихъ е́й отъ болѣ́зни изба́ви и наста́ви на стези́ пра́выя. Даде́ и́мъ ра́зумъ имѣ́ти свя́тъ, и сохрани́ я́ отъ ловя́щихъ, и по́двигъ крѣ́покъ подаде́ и́мъ. Да разумѣ́ютъ вси́, я́ко си́льнѣйши всего́ е́сть благоче́стіе, и никогда́же премо́жетъ зло́ба му́дрости, ниже́ пре́йдетъ злы́я облича́ющи су́дъ. Реко́ша же въ себѣ́, помы́сливше непра́ведно: наси́льствуемъ пра́ведному, и не пощади́мъ преподо́бства его́, ни усрами́мся сѣди́нъ ста́рости многолѣ́тны. Бу́детъ бо на́мъ крѣ́пость — зако́нъ и улови́мъ пра́веднаго, я́ко неуго́денъ на́мъ е́сть, и проти́вится дѣло́мъ на́шимъ, и поно́ситъ на́мъ отпаде́ніе зако́на, и облича́етъ на́мъ согрѣше́нія наказа́нія на́шего. Возвѣща́етъ на́мъ ра́зумъ имѣ́ти Бо́жій, и о́трока Госпо́дня себе́ имену́етъ. Бы́сть на́мъ на обличе́ніе помышле́ній на́шихъ и тя́жекъ на́мъ е́сть и ви́димь, я́ко неподо́бно ины́мъ житіе́ его́, и измѣне́ны стези́ его́. Въ поруга́ніе вмѣни́хомся ему́, и удаля́ется отъ путе́й на́шихъ, я́ко отъ нечисто́тъ, и блажи́тъ послѣ́дняя пра́ведныхъ. Уви́димъ у́бо, а́ще словеса́ его́ и́стинна су́ть, иску́симъ, я́же сбыва́ются ему́. Руга́ніемъ и му́кою истя́жемъ его́, да разумѣ́емъ кро́тость его́ и иску́симъ беззло́бство его́, сме́ртію безобра́зною осу́димъ его́, бу́детъ бо посѣще́ніе отъ слове́съ его́. Сія́ помы́слиша и прельсти́шася, ослѣпи́ бо я́ зло́ба и́хъ, и не разумѣ́ша та́инъ Бо́жіихъ и не разсуди́ша, я́ко Ты́ еси́ Бо́гъ еди́нъ, живота́ имѣ́яй и сме́рти вла́сть, и спаса́яй во вре́мя ско́рби, и избавля́яй отъ вся́каго зла́. Ще́дръ и Ми́лостивъ, и дая́й преподо́бнымъ Свои́мъ благода́ть, и Свое́ю мы́шцею го́рдымъ противля́яйся.

На стихо́внѣ стихи́ры, гла́съ 1. Подо́бенъ: Небе́сныхъ чино́въ.

Богому́дре Іо́но святи́телю,* ты́ твои́ми моли́твами и посто́мъ,* бдѣ́ніемъ же и ми́лостынею Бо́гу соедини́лся еси́,* тѣ́мже Ду́ха Пресвята́го до́мъ и жили́ще показа́лся еси́,* отону́дуже и архіере́й Це́ркве Христо́вы бы́лъ еси́.* Моли́ спасти́ся душа́мъ на́шимъ.

Сти́хъ: Уста́ моя́ возглаго́лютъ прему́дрость,* и поуче́ніе се́рдца моего́ ра́зумъ.

Повину́яся за́повѣди Бо́га Вседержи́теля,* тѣ́мже отъ ю́ности твоея́ Того́ стопа́мъ, святи́телю, послѣ́довалъ еси́,* сего́ ра́ди отъ Него́ благода́ть прія́лъ еси́* дѣ́йствовати пресла́вная чудеса́* и ду́хи прогони́ти лука́выя отъ всѣ́хъ,* любо́вію чту́щихъ тя́.

Сти́хъ: Услы́шите сія́, вси́ язы́цы,* внуши́те, вси́, живу́щіи по вселе́ннѣй.

Кро́токъ и незло́бивъ* во все́й жи́зни твое́й пребы́лъ еси́,* святи́телю Іо́но,* сего́ ра́ди обрѣ́лъ еси́,* я́коже возжелѣ́лъ еси́,* на небесѣ́хъ со святы́ми поко́й.* Тѣ́мже почита́емъ боже́ственную па́мять твою́,* вѣ́рою пра́зднующе,* богоблаже́нне и всече́стне.

Сла́ва, гла́съ 4. Самогла́сенъ:

Егда́ у́бо Бо́гу поспѣшеству́ющу ти́, святи́телю, Ца́рствующаго гра́да дости́глъ еси́, тогда́ отъ патріа́рха че́стно прія́тъ бы́лъ еси́ и отту́ду па́ки къ Россíйскимъ страна́мъ посыла́емь быва́еши, ми́ръ и благослове́ніе съ собо́ю нося́. Тѣ́мже и Россíйская страна́ тебе́ съ любо́вію, я́ко отца́, воспріе́млетъ. И судо́мъ Бо́жіимъ, и Самоде́ржца хотѣ́ніемъ пресла́вно на архіере́йскій престо́лъ возводи́мь быва́еши, на не́мже мно́га лѣ́та жи́въ, ко Го́споду отхо́диши. Того́ моли́ спасти́ любо́вію пою́щія тя́.

И ны́нѣ, богоро́диченъ: [При́зри на моле́нія...]

Тропа́рь, гла́съ 4:

Отъ ю́ности твоея́ ве́сь са́мъ себе́ Го́сподеви возложи́въ, въ моли́твахъ, и трудѣ́хъ, и въ постѣ́хъ о́бразъ бы́въ добродѣ́тели, отону́дуже ви́дѣвъ Бо́гъ твое́ благо́е произволе́ніе, архіере́я тя́ и па́стыря Це́ркви Свое́й устроя́етъ. Тѣ́мже и по преставле́ніи честно́е тѣ́ло твое́ цѣ́ло и нетлѣ́нно соблюде́ся, Іо́но святи́телю, моли́ Христа́ Бо́га, да спасе́тъ ду́ши на́ша.

Сла́ва, и ны́нѣ, богоро́диченъ: [Еже отъ вѣ́ка утае́нное...]



НА УТРЕНИ,
По 1-й стихоло́гіи сѣда́ленъ, гла́съ 1. Подо́бенъ: Ка́мени запеча́тану.

Уче́ньми твои́ми и дѣ́лы Це́рковь Христо́ву украси́лъ еси́, Іо́но святи́телю. Отсю́ду же въ мíрѣ просія́ твое́ добродѣ́тельное житіе́, въ моли́твахъ, и поще́ніихъ, и бдѣ́ніихъ о́бразъ Це́ркве бы́лъ еси́. Тѣ́мже вопіе́мъ ти́: сла́ва Да́вшему ти́ крѣ́пость, сла́ва Вѣнча́вшему тя́, сла́ва Даю́щему тобо́ю всѣ́мъ исцѣле́ніе. [Два́жды.]

Сла́ва, и ны́нѣ, богоро́диченъ:

Упова́ніе христіа́нъ, Пресвята́я Дѣ́во, Его́же родила́ еси́, Бо́га, па́че ума́ же и сло́ва, непреста́нно моли́ съ вы́шними си́лами, пода́ти оставле́ніе грѣхо́въ на́шихъ всѣ́хъ и исправле́ніе житія́ вѣ́рою и любо́вію при́сно Тя́ сла́вящимъ.

По 2-й стихоло́гіи сѣда́ленъ, гла́съ 4. Подо́бенъ: Вознесы́йся.

Смиренному́дріе предпочита́я бы́лъ еси́, Іо́но святи́телю, и отсю́ду просла́вился еси́, я́ко боже́ственный архіере́й, принося́ же́ртвы поже́ршемуся во́лею Христу́, Бо́гу на́шему, Его́же моли́ спасти́ся душа́мъ на́шимъ. [Два́жды.]

Сла́ва, и ны́нѣ, богоро́диченъ:

Обнови́ла еси́, Чи́стая, Боже́ственнымъ Рождество́мъ Твои́мъ истлѣ́вшее во страсте́хъ земноро́дныхъ ме́ртвенное существо́ и воздви́гла еси́ вся́ отъ сме́рти къ животу́ нетлѣ́нія. Тѣ́мже Тя́ по до́лгу блажи́мъ вси́, Дѣ́во препросла́вленная, я́коже прорекла́ еси́.

По поліеле́и сѣда́ленъ, гла́съ 8. Подо́бенъ: Прему́дрости.

Яко добродѣ́теленъ и кро́токъ, Це́рковь Христо́ву уясни́лъ еси́, дѣ́лы соблю́дъ е́же по о́бразу Бо́жію, архіере́ю вели́кій Іо́но, просія́ бо добродѣ́тельное житіе́ твое́ въ мíрѣ и отъ всѣ́хъ сла́вится. Тѣ́мже вси́, благодаря́ще, вопіе́мъ ти́: богоблаже́нне святи́телю, моли́ Христа́ Бо́га грѣхо́въ оставле́ніе дарова́ти чту́щимъ любо́вію боже́ственную па́мять твою́. [Два́жды.]

Сла́ва, и ны́нѣ, богоро́диченъ:

Яко дѣ́ву и еди́ну въ жена́хъ, Тя́, безъ сѣ́мене ро́ждшую Бо́га пло́тію, вси́ ублажа́емъ, ро́ди человѣ́честіи: о́гнь бо всели́ся въ Тя́ Божества́, и я́ко Младе́нца млеко́мъ пита́еши Зижди́теля и Го́спода. Тѣ́мъ, а́нгельскій и человѣ́ческій ро́дъ, досто́йно сла́вимъ пресвято́е Рождество́ Твое́ и согла́сно вопіе́мъ Ти́: моли́ Христа́ Бо́га согрѣше́ній оставле́ніе дарова́ти покланя́ющимся вѣ́рою пресвято́му Рождеству́ Твоему́.

Степе́нна, 1-й антифо́нъ 4-го гла́са. Та́же, проки́менъ, [гла́съ 4]: Уста́ моя́ возглаго́лютъ прему́дрость* и поуче́ніе се́рдца моего́ ра́зумъ. Сти́хъ: Услы́шите сія́, вси́ язы́цы, внуши́те, вси́, живу́щіи по вселе́ннѣй. Ева́нгеліе святи́тельское: [Іоа́нна, зача́ло 35 отъ полу́.]

По 50-мъ псалмѣ́ стихи́ра, гла́съ 6:

Благоуха́етъ боже́ственная ра́ка моще́й твои́хъ, Іо́но святи́телю, всѣ́мъ вѣ́рнымъ исцѣле́ніе душа́мъ и тѣлесе́мъ да́рующи. Тѣ́мже тя́ мо́лимъ, богодарова́нное твое́ ста́до въ ми́рѣ соблюсти́, Импера́тора же и все́ Правосла́віе, да вси́ тебе́, я́ко и́стиннаго па́стыря и моли́твенника къ Бо́гу, непреста́нно велича́емъ.

Кано́нъ Богоро́дицы на 6 и свята́го на 8.

Кано́нъ Пресвяты́я Богоро́дицы, его́же краегране́сіе: Ма́ти Бо́жія, незави́стную ми́ да́ждь благода́ть. Гла́съ 6.
Пѣ́снь 1.

Ирмо́съ: Яко по су́ху пѣшеше́ствовавъ Изра́иль по бе́зднѣ стопа́ми, гони́теля фарао́на ви́дя потопля́ема, Бо́гу побѣ́дную пѣ́снь пои́мъ, вопія́ше.

Прича́щшися Ева саду́, преслуша́ннаго бра́шна, кля́тву введе́; но сію́ разрѣши́ла еси́, Чи́стая, благослове́нія Нача́токъ, Христа́ ро́ждши.

Яже би́сера отъ Боже́ственныя мо́лніи, Христа́ ро́ждши, страсте́й мои́хъ мглу́ и прегрѣше́ній смуще́ніе, Чи́стая, разжени́ свѣ́томъ Твоея́ свѣ́тлости.

Язы́ковъ ча́яніе Іа́ковъ изъ Тебе́ Воплоща́емаго предзря́ше та́йно у́мныма очи́ма: Бо́га, изба́вльшаго на́съ хода́тайствомъ Твои́мъ.

Оскудѣ́вшимъ князе́мъ отъ колѣ́на Іу́дова, Пречи́стая, Сы́нъ Тво́й и Бо́гъ, проше́дъ Во́ждь, надъ концы́ земны́ми ны́нѣ вои́стинну воцари́ся.

Кано́нъ свята́го Іо́ны, гла́съ 8.
Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Иже отъ Бо́га дарова́нія боже́ственнаго наслажда́яся, ко́еждо проше́ніе посѣща́я чудесы́, отону́дуже, о́тче, и мнѣ́ пода́ждь си́лу, во е́же пѣ́ти твое́ свяще́нное торжество́.

Благода́ть Боже́ственная излія́ся во устна́хъ твои́хъ, святи́телю Іо́но, и бы́лъ еси́ па́стырь Христо́вы Це́ркве: украси́ бо тебе́ Бо́гъ, Его́же житіе́мъ твои́мъ просла́вилъ еси́.

Благоуха́етъ честна́я ра́ка моще́й твои́хъ и источа́етъ здра́вія: неду́зи же при́сно отъ вѣ́рныхъ отгоня́ются, тя́ благоче́стно чту́щихъ, святи́телю.

Стѣ́ну тве́рду Христо́ва Це́рковь стяжа́вши тя́, святи́телю, при́сно пребыва́етъ, хва́лящи своего́ Влады́ку, тебе́ просла́вльшаго.

Богоро́диченъ: Це́рковь Бо́жія бы́сть нескве́рная Отрокови́ца все́льшемуся па́че ума́ въ Тя́, Богоро́дице, и ле́сть отъ ду́шъ человѣ́ческихъ отгна́вшему.

Пѣ́снь 3.

Ирмо́съ: Нѣ́сть свя́тъ, я́коже Ты́, Го́споди Бо́же мо́й, вознесы́й ро́гъ вѣ́рныхъ Твои́хъ, Бла́же, и утверди́вый на́съ на ка́мени исповѣ́данія Твоего́.

Тлѣ́нную мою́ пло́ть и сме́ртную, Всечи́стая Богома́ти, изъ чре́ва Твоего́ несказа́нно пріе́мъ Благíй, и обезтлѣ́нивъ сію́, вѣ́чнѣ Себѣ́ связа́лъ е́сть.

Бо́га воплоща́ема изъ Тебе́ зря́ще, Дѣ́во, ужаса́хуся стра́хомъ ли́цы а́нгельстіи и я́ко Ма́терь Бо́жію, немо́лчными пѣ́сньми Тя́ почита́ютъ.

Ужасе́ся, го́ру у́мную ви́дѣвъ Тя́, проро́къ Даніи́лъ, изъ Нея́же Ка́мень отсѣче́ся кромѣ́ ру́къ и де́монская ка́пища, Богома́ти, крѣ́пко сокруши́.

Не мо́жетъ сло́во Тя́ человѣ́ческое, ниже́ язы́къ, Дѣ́во, похвали́ти досто́йно: изъ Тебе́ бо безъ сѣ́мене Жизнода́вецъ Христо́съ воплоти́тися, Пречи́стая, благоволи́.

Инъ.

Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.

На высоту́ добродѣ́телей возше́лъ еси́, святи́телю и, пріи́мъ священнопома́заніе высо́каго твоего́ житія́, на сѣда́лищи высо́цѣ послужи́лъ еси́ Бо́гу, я́ко архіере́й вели́кій.

Це́рковь Христо́ва, свѣти́льника тя́ стяжа́вши, святи́телю, добродѣ́тельными твои́ми уче́ніи, прему́дре, просвѣща́ется, глаго́лющи: Ты́ моя́, Го́споди, крѣ́пость и утвержде́ніе.

Боже́ственнымъ жела́ніемъ все́ плотско́е жела́ніе отри́нувъ, соверше́ннымъ житіе́мъ просія́лъ еси́. Тѣ́мже отсю́ду преста́вился еси́ къ невече́рнему сія́нію.

Яко архіере́емъ прее́мникъ бы́лъ еси́, святи́телю, потща́вся словесы́ и дѣ́лы, и поуче́ніемъ пра́вымъ подо́бникъ о́нѣмъ бы́ти. Тѣ́мже почита́емъ тя́, я́ко Христо́ва святи́теля.

Богоро́диченъ: Угля Боже́ственнаго свѣтоза́рная клеще́, купина́, не опали́вшися Божества́, сѣно́вныя моя́ попали́ стра́сти и огня́ исхи́ти вѣ́чнующаго.

Сѣда́ленъ, гла́съ 4. Подо́бенъ: Ско́ро предвари́.

Свѣ́тло житіе́ твое́ всѣ́мъ яви́ся, и всепра́зднственная па́мять твоя́, чудесы́ облиста́ющи, удивля́етъ вѣ́рныя. Тебе́ у́бо ны́нѣ ра́достію почита́емъ, архіере́евъ похвало́, моли́ спасти́ся душа́мъ на́шимъ. [Два́жды.]

Сла́ва, и ны́нѣ, богоро́диченъ:

Пое́мъ Тя́, Богоневѣ́сто, Ма́ти Христа́ Бо́га, сла́вяще Рождество́ Твое́ непостижи́мое, и́мже изба́вихомся отъ ле́сти діа́воли и вся́кія бѣды́, Богоро́дице Влады́чице, и вѣ́рно вопіе́мъ: поми́луй ста́до Твое́, еди́на Всепѣ́тая.

Пѣ́снь 4.

Ирмо́съ: Христо́съ моя́ си́ла, Бо́гъ и Госпо́дь, честна́я Це́рковь боголѣ́пно пое́тъ, взыва́ющи, отъ смы́сла чи́ста, о Го́сподѣ пра́зднующи.

Пое́мъ, Пречи́стая, Тебе́, Всенепоро́чную, и́же Тобо́ю спа́сшіися, и благоче́стно пою́ще, взыва́емъ: благослове́нна, Яже Бо́га, Приснодѣ́во, ро́ждшая.

Свѣ́тъ незаходи́мый, Дѣ́во, родила́ еси́, су́щимъ во тмѣ́ житія́ пло́тію свѣтя́щь, Всеблаже́нная, и пою́щимъ Тя́ ра́дость, Приснодѣ́во, источи́ла еси́.

Благода́ть процвѣте́, Зако́нъ преста́ Тобо́ю, Всесвята́я: Ты́ бо, Чи́стая, родила́ еси́ Го́спода, подаю́щаго на́мъ, Приснодѣ́во, оставле́ніе.

Ме́ртва мя́ показа́ са́да вкуше́ніе, жи́зни же Дре́во, изъ Тебе́ я́вльшееся, Пречи́стая, воскреси́, и ра́йскія сла́дости наслѣ́дника мя́ устро́и.

Инъ.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Вели́кое свѣти́ло, сія́ніи твои́хъ добродѣ́телей и свѣтлостьми́ чуде́съ просвѣща́еши вѣ́рныя, и́скренно тебе́ пою́щія, святи́телю.

Яко прекра́сная ма́слина, о́тче, насажде́нъ бы́въ, святи́телю, въ дому́ Госпо́дни, и во дво́рѣхъ до́му Бо́га на́шего процвѣ́лъ еси́, подава́я здра́віе душа́мъ и тѣлесе́мъ.

Всечестно́е тѣ́ло твое́, святи́телю Іо́но, до́мъ Пресвята́го Ду́ха бы́сть: во гро́бѣ бо лежа́, ду́хи лука́выя отъ человѣ́къ прогоня́етъ си́лою въ тебѣ́ Живу́щаго.

Сло́вомъ и дѣ́лы и простото́ю се́рдца просія́лъ еси́, Іо́но святи́телю, помина́й на́съ, чту́щихъ па́мять твою́, преподо́бне.

Богоро́диченъ: Иже всѣ́ми Невмѣсти́мый, Пречи́стая, вмѣща́ется во утро́бу Твою́, спаса́я мя́ бла́гостію, погруже́ннаго грѣхи́.

Пѣ́снь 5.

Ирмо́съ: Бо́жіимъ свѣ́томъ Твои́мъ, Бла́же, у́тренюющихъ Ти́ ду́ши любо́вію озари́, молю́ся, Тя́ вѣ́дѣти, Сло́вѣ Бо́жій, и́стиннаго Бо́га, отъ мра́ка грѣхо́внаго взыва́юща.

Чистото́ю возсія́вши свѣ́тло, Боже́ственное пребыва́ніе Влады́ки, Всепѣ́тая, была́ еси́: Ты́ бо еди́на Ма́ти Бо́жія яви́лася еси́, во объя́тіихъ я́ко Младе́нца Сего́ носи́вши.

Нося́щи добро́ту у́мную краснѣ́йшія Твоея́ души́, Невѣ́ста Бо́жія была́ еси́, запеча́тствована дѣ́вствомъ, Чи́стая, и свѣ́томъ чистоты́ мíръ просвѣща́ющи.

Да рыда́етъ собра́ніе злочести́выхъ, не проповѣ́дающихъ Тя́ я́вѣ Чи́стую Богома́терь, Ты́ бо врата́ Бо́жія Свѣ́та яви́лася еси́ на́мъ, мра́къ прегрѣше́ній разгоня́ющи.

Инъ.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Чи́стъ у́мъ тво́й къ Бо́гу имѣ́я, святи́телю, всегда́, до́брѣ упра́вилъ еси́ Христо́во ста́до, тѣ́мже у́бо и непреходя́щее селе́ніе со а́нгелы и архіере́и наслѣ́дилъ еси́, преподо́бне, отону́дуже сія́еши чудесы́.

Умо́мъ чистѣ́йшимъ разсмотря́лъ еси́ Ума́ всѣ́хъ вино́внаго, сего́ ра́ди пріе́мь дарова́нія чуде́съ, святи́телю, вѣ́рныя удивля́еши, любо́вію тебе́ почита́ющія, прему́дре.

Отъ ю́наго во́зраста житіе́ твое́ просія́, добродѣ́тельми укра́шено, Іо́но святи́телю, и чудесы́ высо́кими удо́брено, блаже́нне, е́же и по преставле́ніи просла́ви тя́ явле́нна.

Сла́ва святи́телей и вѣ́рныхъ люде́й засту́пникъ вои́стинну, о́тче, бы́лъ еси́, красота́ Це́ркве, и основа́ніе добродѣ́телей, и благоче́стія утвержде́ніе, достохва́льне.

Богоро́диченъ: Ви́дѣша боже́ственнаго та́инства, Богора́дованная, непостижи́мую глубину́ честнíи проро́цы чи́стаго рождества́ Твоего́, Пречи́стая, разли́чными о́бразы, я́коже вмѣсти́ша.

Пѣ́снь 6.

Ирмо́съ: Жите́йское мо́ре, воздвиза́емое зря́ напа́стей бу́рею, къ ти́хому приста́нищу Твоему́ прите́къ, вопію́ Ти: возведи́ отъ тли́ живо́тъ мо́й, Многоми́лостиве.

Вели́кій преднаписа́ во проро́цѣхъ Моисе́й Тя́ ковче́гъ, и трапе́зу, и свѣ́щникъ, и ру́чку, обра́зно назна́менуя воплоще́ніе, е́же изъ Тебе́, Вы́шняго, Ма́ти Дѣ́во.

Умерщвля́ется сме́рть, и тлѣ́ніе упраждня́ется Ада́мова осужде́нія, о Влады́чице, Плоду́ Твоему́, прирази́вшееся! Жи́знь бо родила́ еси́, отъ истлѣ́нія избавля́ющую пою́щія Тя́.

Зако́нъ изнемо́же, и сѣ́нь ми́мо и́де, па́че бо ума́ и смы́сла я́вльшейся ми́ благода́ти, я́же изъ Тебе́, Дѣ́во, Рождества́ Бо́га и Спа́са, Многопѣ́тая.

Инъ.

Ирмо́съ: Моли́тву пролію́ ко Го́споду и Тому́ возвѣщу́ печа́ли моя́, я́ко зо́лъ душа́ моя́ испо́лнися и живо́тъ мо́й а́ду прибли́жися, и молю́ся, я́ко Іо́на: отъ тли́, Бо́же, возведи́ мя.

Благолѣ́пія вѣнце́мъ укра́шенъ, сія́еши ны́нѣ, святи́телю, я́ко и́стинный архіере́й, пра́вдою вои́стинну одѣ́явся, преда́ніе Спа́сово соблю́лъ еси́. Тѣ́мже и зва́нію боже́ственному [сподо́бился еси́], вопію́щу ти́: вни́ди въ ра́дость Го́спода твоего́.

Кро́токъ и незло́бивъ, Влады́чнимъ стопа́мъ возслѣ́дуя, преподо́бне, и преходя́ отъ тлѣ́нныхъ къ вѣ́чнымъ, отону́дуже и зе́млю кро́ткихъ со святы́ми дости́глъ еси́. Сего́ ра́ди тя́ собо́ри благочести́выхъ воспѣва́ютъ.

Твоего́ ра́ди житія́ вели́каго и чистоты́, сы́на тя́ свѣ́та и дне́ Христо́съ показа́, и архіере́я и па́стыря Це́ркве Своея́ содѣ́ла, идѣ́же послужи́въ я́ко па́стырь изря́денъ, ко оби́телемъ небе́снымъ восхо́диши.

Разсужде́ніемъ ума́ и жела́ніемъ духо́внымъ распала́емь, жи́знь твою́, святи́телю, проходи́лъ еси́ и, не су́щая, я́ко преходя́щая, ми́мо текíй, къ Боже́ственнымъ селе́ніемъ, о́тче Іо́но, преложи́лся еси́.

Богоро́диченъ: Освяти́ ду́шу мою́, Дѣ́во, Яже Свято́е ро́ждши Сло́во, вои́стинну во святы́хъ, я́ко пречи́сто, почива́ющаго, еди́наго Бо́га на́шего, и да́руй ми́, я́ко Ми́лостива, умиле́нія ту́чу, Пренепоро́чная.

Конда́къ, гла́съ 8. Подо́бенъ: Взбра́нной.

Яко отъ младе́нства Го́сподеви порабо́тивъ себе́, му́дре, посто́мъ и бдѣ́ніемъ тѣ́ло твое́ удруча́я, тѣ́мже сосу́дъ чи́стъ и до́мъ Ду́ху Пресвято́му яви́лся еси́, сего́ ра́ди и Це́ркви Свое́й тебе́ архіере́я и па́стыря устроя́етъ, ю́же до́брѣ упа́съ, ко Го́споду отхо́диши, Его́же возлюби́лъ еси́. Тѣ́мъ мо́лимъ тя́: помина́й на́съ, вѣ́рою чту́щихъ святу́ю па́мять твою́, да вси́ зове́мъ ти́: ра́дуйся, о́тче Іо́но, святи́телю всечестны́й.

Икосъ:

Человѣ́къ у́бо сы́й естество́мъ, о́тче, но па́че человѣ́ка подвиза́лся еси́ въ постѣ́хъ, и бдѣ́ніихъ, и моли́твахъ, и трудѣ́хъ, я́ко о́бразъ бы́въ добродѣ́тели мно́гимъ; сего́ ра́ди тя́ Бо́гъ архіере́я и па́стыря Це́ркве Своея́ устроя́етъ. Отону́дуже тя́ мо́лимъ: моли́ся Благода́телю всѣ́хъ Бо́гу, во е́же вѣ́рному Импера́тору, чту́щему тя́, дарова́ти побѣ́ду на враги́ и на́мъ обрѣсти́ благода́ть и ми́лость въ де́нь Су́дный, да вси́ зове́мъ ти́: ра́дуйся, о́тче Іо́но, святи́телю всечестны́й.

Пѣ́снь 7.

Ирмо́съ: Росода́тельну у́бо пе́щь содѣ́ла а́нгелъ преподо́бнымъ отроко́мъ, халде́и же опаля́ющее велѣ́ніе Бо́жіе, мучи́теля увѣща́ вопи́ти: благослове́нъ еси́, Бо́же оте́цъ на́шихъ.

Юношъ тріе́хъ пе́щь не опали́, рождество́ прообразу́ющихъ Твое́. Боже́ственный бо о́гнь, Тебе́ не опали́въ, всели́ся въ Тя́, и вся́ научи́ вопи́ти: благослове́нъ еси́, Бо́же оте́цъ на́шихъ.

Блажа́тъ Тебе́ концы́, Всечи́стая Ма́ти, я́коже прорекла́ еси́, просвѣща́еми свѣтолу́чными сія́ніи Твои́ми, и благода́тію, пою́ще, вопію́тъ: благослове́нъ еси́, Бо́же оте́цъ на́шихъ.

Па́губныя у́бо зу́бы въ мя́ вонзе́ змíй лука́внѣйшій, но Са́мъ Тво́й, Богома́ти, сокруши́ Сы́нъ, крѣ́пость же мнѣ́ даде́ вопи́ти: благослове́нъ еси́, Бо́же оте́цъ на́шихъ.

Очисти́лище естества́ Ты́ еси́, еди́на Богоблаже́нная: на ра́му бо херуви́мску сѣдя́щаго Бо́га во объя́тіихъ нося́щи, вопіе́ши: благослове́нъ еси́, Бо́же оте́цъ на́шихъ.

Инъ.

Ирмо́съ: Отъ Іуде́и доше́дше, о́троцы, въ Вавило́нѣ иногда́, вѣ́рою Тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.

Ви́дѣвъ твое́ благо́е произволе́ніе Христо́съ Бо́гъ, я́ко не себѣ́ живе́ши, но дѣ́йствующему въ тебѣ́ Го́споду, тѣ́мъ украша́етъ тя́ чуде́съ исцѣле́ніемъ.

Чи́стыми дѣ́лы и исправле́ньми твои́ми просія́въ, я́ко свѣти́ло, богода́нную ти́ Це́рковь до́брѣ упа́слъ еси́, поя́ Христу́: оте́цъ на́шихъ Бо́же, благослове́нъ еси́.

Яко въ зако́нѣ Госпо́дни поуча́яся де́нь и но́щь, святи́телю, за́дняя забыва́я, на пре́дняя же простира́яся, Творцу́ и Влады́цѣ вопія́лъ еси́: благослове́нъ еси́, Го́споди, Бо́же оте́цъ на́шихъ.

Изря́дно житіе́ твое́, святи́телю, всѣ́ми позна́но бы́сть, сего́ ра́ди и по преставле́ніи прославля́етъ тя́ Христо́съ, Ему́же усе́рдно послужи́лъ еси́, Іо́но, о́тче на́шъ, поя́: оте́цъ на́шихъ Бо́же, благослове́нъ еси́.

Богоро́диченъ: Огнь ника́коже Тя́ Божества́ опали́, Дѣ́во: Тя́ бо иногда́ купина́ прообразова́ше, въ горѣ́ опаля́ема, Пречи́стая, и ника́коже сгара́ема.

Пѣ́снь 8.

Ирмо́съ: Изъ пла́мене преподо́бнымъ ро́су источи́лъ еси́ и пра́веднаго же́ртву водо́ю попали́лъ еси́: вся́ бо твори́ши, Христе́, то́кмо е́же хотѣ́ти. Тя́ превозно́симъ во вся́ вѣ́ки.

Позлаще́нною ри́зою, я́коже Цари́цу, Сы́нъ Тво́й, просвѣти́въ заре́ю Ду́ха, Тебе́ одесну́ю Себе́ поста́ви, Пречи́стая, Его́же превозно́симъ во вся́ вѣ́ки.

Иже хотѣ́ніемъ еди́нымъ мíръ водрузи́вый, отъ пречи́стыя Твоея́ утро́бы пло́ть взе́млетъ, свы́ше сію́ назда́ти хотя́, Его́же превозно́симъ во вся́ вѣ́ки.

Сочета́ніемъ Сло́ва ко мнѣ́, человѣ́ку, Боже́ственное жили́ще была́ еси́, Пречи́стая, просія́вши я́вѣ дѣ́вства свѣ́тлостію. Тѣ́мъ Тя́ пое́мъ во вся́ вѣ́ки.

Златоза́рный Тя́ свѣ́щникъ предвообрази́, пріе́мшую несказа́нно Свѣ́тъ непресту́пный, ра́зумомъ Свои́мъ озаря́ющь вся́ческая. Тѣ́мъ Тя́ пое́мъ, Чи́стая, во вся́ вѣ́ки.

Инъ.

Ирмо́съ: Царя́ Небе́снаго, Его́же пою́тъ во́и а́нгельстіи, хвали́те и превозноси́те во вся́ вѣ́ки.

Ангельское житіе́ пожи́лъ еси́ на земли́, святи́телю, смире́нъ и кро́токъ бы́въ, отону́дуже и въ земли́ кро́ткихъ со святы́ми водворя́ешися, Христу́ поя́: хвали́те и превозноси́те Его́ во вѣ́ки.

Хра́мъ освяще́нія всечестна́я ра́ка моще́й твои́хъ, святи́телю, изъ него́же исцѣле́ніе благода́ти почерпа́юще, Влады́ку всѣ́хъ, Го́спода пое́мъ, тебе́ цѣле́бника дарова́вшаго, и превозно́симъ Его́ во вѣ́ки.

Умъ тво́й, святи́телю, манове́ніемъ боже́ственнымъ обожа́емь, до конца́ плотски́хъ страсте́й удали́ся, Христу́ поя́: хвали́те и превозноси́те Его́ во вѣ́ки.

По досто́инству почита́емъ, вѣ́рніи, моще́й твои́хъ честну́ю ра́ку, Іо́но святи́телю, я́ко мѵ́ро, почерпа́юще вѣ́рнымъ благоуха́ніе, Влады́цѣ Христу́ вопію́ще: вся́ дѣла́, хвали́те и превозноси́те Его́ во вѣ́ки.

Богоро́диченъ: Исцѣли́ стра́сти се́рдца моего́, безстра́стія исто́чникъ ро́ждшая, и къ животу́ мя́ боже́ственному наста́ви, да Тя́ сла́влю во вся́ вѣ́ки.

Пѣ́снь 9.

Ирмо́съ: Бо́га человѣ́комъ невозмо́жно ви́дѣти, на Него́же не смѣ́ютъ чи́ни а́нгельстіи взира́ти; Тобо́ю бо, Всечи́стая, яви́ся человѣ́комъ Сло́во воплоще́нно, Его́же велича́юще, съ небе́сными во́и, Тя́ ублажа́емъ.

Звѣзда́, сія́ющи заря́ми Божества́ отъ Іа́кова, отъ мра́ка содержи́мымъ возсія́: Тобо́ю бо, Всечи́стая, [яви́ся] Христо́съ Бо́гъ — Сло́во воплоще́нно, Имже просвѣща́еми, съ небе́сными во́и, Тя́ ублажа́емъ.

Укрѣ́плься си́лою Твое́ю и благода́тію, Тебѣ́ пѣ́снь усе́рдно отъ се́рдца возложи́хъ; но сію́ пріими́, Дѣ́во Чи́стая, благода́ть воздаю́щи Твою́ многосвѣ́тлую, отъ нетлѣ́нныхъ сокро́вищъ, Богоблаже́нная.

Поста́въ показа́лася еси́ я́вѣ Божества́, въ не́мже ри́зу тѣлесе́ Сло́во истка́, богосодѣ́лавъ мо́й, Дѣ́во, зра́къ: въ него́же обло́лкся, всѣ́хъ спасе́, отъ смы́сла чи́ста Тебе́ велича́ющихъ.

Ме́ртвымъ воскресе́ніе ны́нѣ дарова́ся Твои́мъ несказа́ннымъ и неизрече́ннымъ Рождество́мъ, Богоро́дице Всечи́стая, Жи́знь бо, изъ Тебе́ пло́тію обо́лкшися, всѣ́мъ возсія́, и сме́ртную дря́хлость я́вѣ разруши́.

Инъ.

Ирмо́съ: Вои́стинну Богоро́дицу, Тя́ исповѣ́дуемъ, спасе́нніи Тобо́ю, Дѣ́во Чи́стая, съ безпло́тными ли́ки Тя́ велича́юще.

Чи́стымъ се́рдцемъ и боже́ственными восхожде́ніи у́мъ впери́лъ еси́, еди́наго Бо́га зрѣ́ти добро́ты жела́я, и отту́ду свѣтоли́тіемъ просвѣща́ешися, богому́дре святи́телю.

Богопре́данную па́ству твою́, па́стыря тя́ иму́щую, тя́жкія во́лки отгоня́юща отъ всѣ́хъ вѣ́рныхъ, и ста́до, благода́тію Христо́вою соблюда́емо, сохрани́, Іо́но святи́телю.

Яко́же пе́рвѣе цѣлому́дреннаго Іо́сифа тѣ́ло Изра́иль прено́ситъ, та́ко и ны́нѣ ра́ку моще́й твои́хъ, Іо́но святи́телю, вѣ́рніи пріе́млюще, почита́ютъ любе́знѣ, Христа́ велича́юще.

Дне́сь свѣ́тлая па́мять твоя́, святи́телю, возсія́вши, вѣ́рныхъ сердца́ просвѣща́етъ; тѣ́мже и пѣ́ніе сіе́ произве́дшему моли́ Христа́ Бо́га сохрани́ться отъ лука́ваго ловле́нія и получи́ти ми́лость въ де́нь Су́дный.

Богоро́диченъ: Свѣ́томъ покая́нія помраче́ннаго мя́ лѣ́ностію, Всенепоро́чная, просвѣти́, да пою́, и велича́ю, и сла́влю Тя́, Пренепоро́чную Влады́чицу.

Свѣти́ленъ. Подо́бенъ: Посѣти́лъ ны́ е́сть.

Тезоимени́те цѣлому́дрія, отъ ю́наго воспита́нія, святи́телю, бы́въ, потща́лся еси́ тлѣ́нными нетлѣ́нная стяжа́ти, отону́дуже и архіере́йствомъ почте́нъ бы́въ, при́сно о на́съ Влады́ку моли́, любо́вію пою́щихъ тя́. [Два́жды.]

Сла́ва, и ны́нѣ, богоро́диченъ:

Щедро́ты Твоя́, Бо́же, на лю́ди и ста́до Твое́ низпосли́ моли́твами Пречи́стыя Твоея́ Ма́тере и всѣ́хъ святы́хъ Твои́хъ и на́мъ да́руй вели́кую Твою́ ми́лость.

На хвали́техъ стихи́ры на 4, гла́съ 8. Подо́бенъ: О, пресла́внаго чудесе́!

Отче богому́дре, Іо́но святи́телю,* ты́, отъ ю́ности воздержа́нію поуча́яся,* и во бдѣ́ніихъ, и въ моли́твахъ, и постѣ́хъ* Го́сподеви приближа́яся,* и моли́твенницу всегда́ призыва́я Дѣ́ву Богоро́дицу,* Ея́же ра́ди наде́жди не погрѣши́лъ еси́.* Тѣ́мже архіере́я тя́ и па́стыря* Це́ркви Свое́й Христо́съ устро́и,* Того́ моли́ при́сно о душа́хъ на́шихъ. [Два́жды.]

Отче святи́телю Іо́но богому́дре,* ты́ отъ младе́нства мірскíй мяте́жъ оста́вилъ еси́* и молвы́ оттря́слъ еси́,* ума́ чистото́ю Бо́гу приближа́яся,* сего́ ра́ди тя́ Бо́гъ архіере́я Це́ркви* и лю́демъ по достоя́нію боже́ственнаго благода́теля поставля́етъ.* Всегда́ моли́ о на́съ,* низпосла́ти душа́мъ на́шимъ ми́ръ* и ве́лію ми́лость.

Отче богому́дре, святи́телю Іо́но,* ты́, изъ мла́да Христа́ возлюби́въ,* Того́ любви́ прилѣпи́лся еси́* и, Пресвѣ́тлаго Ду́ха Боже́ственными заря́ми* се́рдце твое́ просвѣти́въ,* свѣтови́денъ ве́сь вои́стинну бы́лъ еси́.* Тѣ́мже ко хра́му твоему́ вѣ́рою притека́ющія* проше́нія, я́же ко спасе́нію, сподо́би* и моли́ Христа́ Бо́га* спасти́ся душа́мъ на́шимъ.

Сла́ва, гла́съ 6. Самогла́сенъ:

Небе́снаго Царя́ и Влады́ки преизря́дный служи́тель, святи́телю Іо́но, бы́лъ еси́, чистоту́ бо соблю́лъ еси́, безъ нея́же никто́же у́зритъ Бо́га. Тѣ́мже и возме́здіе по достоя́нію прія́лъ еси́: во гро́бѣ бо лежа́, честно́е тѣ́ло твое́ цѣ́ло и нетлѣ́нно соблюде́ся, душа́ же къ небе́снымъ ликостоя́ніемъ пре́йде. Сего́ ра́ди Творцу́ всѣ́хъ моли́ся при́сно о всѣ́хъ, чту́щихъ тя́ любо́вію, низпосла́ти ми́ръ и ве́лію ми́лость.

И ны́нѣ, богоро́диченъ:

[Богоро́дице, Ты́ еси́ лоза́ и́стинная, возрасти́вшая на́мъ пло́дъ живота́, Тебѣ́ мо́лимся, моли́ся, Влады́чице, со святы́ми апо́столы, поми́ловати ду́ши на́ша.

Славосло́віе вели́кое. Ектеніи́ и отпу́стъ.]



НА ЛИТУРГІИ,

Слу́жба святи́телю: [Блаже́нна, отъ кано́на пѣ́снь 3 и 6. Проки́менъ, гла́съ 1: Уста́ моя́ возглаго́лютъ прему́дрость,* и поуче́ніе се́рдца моего́ ра́зумъ. Сти́хъ: Услы́шите сія́ вси́ язы́цы, внуши́те вси́ живу́щіи по вселе́ннѣй. Апо́столъ ко Евре́омъ, зача́ло 318. Аллилу́ія, гла́съ 2: Уста́ пра́веднаго поуча́тся прему́дрости, и язы́къ eго́ возглаго́летъ су́дъ. Сти́хъ: Зако́нъ Бо́га его́ въ се́рдцѣ его́, и не за́пнутся стопы́ eго́. Ева́нгеліе Іоа́нна, зача́ло 36. Прича́стенъ: Въ па́мять вѣ́чную бу́детъ пра́ведникъ, отъ слу́ха зла́ не убои́тся].

Источникъ: Минíа, мѣ́сяцъ Іу́ній. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 96 – 106.

/ Къ оглавленію раздѣла /


Наверхъ / Къ титульной страницѣ

0