Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 25 iюня 2017 г. Сейчасъ на порталѣ посѣтителей - 14.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́нія въ 14-й де́нь.
Свята́го проро́ка Елиссе́я и и́же во святы́хъ отца́ на́шего Меѳо́дія, патріа́рха Константи́на гра́да.

[ВЕЧЕРЪ,]
На Го́споди воззва́хъ: стихи́ры проро́ка, гла́съ 8. Подо́бенъ: О, пресла́внаго чудесе́!

Тя́, Елиссе́е блаже́нне,* ревни́тель Илія́* въ сугу́бѣй благода́ти* просвѣще́на оста́вль,* возду́шный ору́жникъ вои́стинну я́вльшися.* Его́же подо́біемъ* быстрины́ рѣчны́я уста́вилъ еси́ благода́тію* и преше́лъ еси́, сла́вне,* ра́достно украша́яся* и велича́я Христа́.

Дре́вле вѣ́ры Сомани́тиды* отроча́ да́руетъ моли́тва,* его́же, уме́рша, воздви́глъ еси́,* я́ко проро́къ боже́ственный, свяще́нно удивля́емь;* со́лію же па́ки во́ды безча́дныя* я́вѣ претвори́лъ еси́ въ чадоро́діе,* чудеса́ безмѣ́рная соверша́еши* благода́тію Вседѣ́теля Ду́ха, блаже́нне,* тѣ́мже пое́мъ тя́.

Ины стихи́ры свята́го Меѳо́дія, гла́съ и подо́бенъ то́йже:

Отче богому́дре Меѳо́діе,* я́коже ле́въ, рыка́ніемъ* прему́дрыхъ уче́ній твои́хъ* Іанни́на ужаси́лъ еси́, льсти́ваго ли́са,* и у́бо, не терпѣ́ твоего́ обличе́нія,* я́звою меча́ ссѣка́ется злочести́вый.* Тѣ́мже не оста́вилъ еси́ ста́да ги́блемаго Христо́ва,* побо́рникъ бы́въ* правосла́внымъ лю́демъ.

Правосла́вія утвержде́ніе,* Це́ркве па́стырь,* мона́ховъ удобре́ніе,* рѣка́, наводня́ема вода́ми Ду́ха,* ча́ша, пролива́ющая питіе́ пресла́дко,* свѣти́ло, просвѣща́ющее мíра концы́,* ме́чь, обою́ду наощре́нъ благода́тію* и злочести́выхъ полки́ ссѣка́ющь,* ты́ еси́, Меѳо́діе.

Исповѣ́данія о́бразъ,* святи́телей основа́ніе,* и богодохнове́ненъ орга́нъ,* воспѣ́вый уче́нія, благоче́стія испо́лненъ,* прему́дрости до́мъ, любве́ пучи́на,* ми́лованія струя́ приснотеку́щая,* окри́нъ, излива́ющь пи́во умиле́нія,* и благоцвѣту́щь, сла́вне, ра́й* ты́ еси́, Меѳо́діе.

Сла́ва, гла́съ 2:

Проро́къ боже́ственное прише́ствіе возсія́ дне́сь, созыва́юще та́йно празднолю́бныя ду́ши. Иже на колесни́цѣ неботе́чнѣ всѣ́дъ, восто́ка невече́рняго звѣзда́ съ Елиссе́емъ, чу́днымъ му́жемъ, разширя́етъ струи́ но́ваго Іорда́на, проповѣ́даніе уясня́я благоче́стія, сугу́бымъ о́бразомъ вообража́юще я́сно ве́тхія и но́выя единогла́сныя сла́вы сугу́бо благослове́ніе, во и́же вѣ́рно соверша́ющихъ всепра́зднственную па́мять и́хъ.

И ны́нѣ, пра́здника или́ богоро́диченъ. Крестобогоро́диченъ. Подо́бенъ: Егда́ отъ дре́ва.

Дре́ву кре́стному Тя́, Іису́се, пригвожде́на зря́щи, Неискусобра́чная, пла́чущи, глаго́лаше: Ча́до сла́дкое, почто́ оста́вилъ еси́ Мене́, ро́ждшую Тя́, еди́ну? Свѣ́те непристу́пный Пребезнача́льнаго Отца́, потщи́ся и просла́вися, я́ко да сла́ву получа́тъ Боже́ственную и́же Боже́ственный стра́сти Твоя́ сла́вящіи.

На стихо́внѣ пра́здника или́ окто́иха.

Пото́мъ глаго́лемъ припѣ́въ: Свяще́нницы Твои́ облеку́тся въ пра́вду, и преподо́бніи Твои́ возра́дуются.

И пое́мъ стихи́ру, гла́съ 4:

Ве́село дне́сь Це́рковь Бо́жія одѣва́ется и ра́дуется, зову́щи: уясни́ся моя́ добро́та па́че вся́каго гра́да, се́ бо святи́телей вели́кое сокро́вище, сла́вный Меѳо́дій, ше́ствіе къ небесе́мъ сотвори́. Пріиди́те у́бо, празднолю́бцы, правосла́вныхъ собо́ръ, ли́къ соста́вльше ку́пно о́крестъ боже́ственныя ра́ки, исцѣле́ній то́ки пріе́мше отъ нея́, моли́теся Христу́ Бо́гу изба́вити вселе́нную отъ вся́кія е́реси.

Сла́ва, гла́съ 6:

Проро́че, проповѣ́дателю Христо́въ, престо́ла вели́чества никогда́же отлуча́ешися и коему́ждо боля́щу при́сно предстои́ши, въ вы́шнихъ служа́, вселе́нную благословля́еши, всю́ду прославля́емь, проси́ очище́нія душа́мъ на́шимъ.

И ны́нѣ, пра́здника или́ богоро́диченъ. Крестобогоро́диченъ. Подо́бенъ: Тридне́венъ.

На дре́вѣ Живо́тъ на́шъ зря́ще Всенепоро́чная Богоро́дица ви́сящь, ма́терски рыда́ющи, вопія́ше: Сы́не Мо́й и Бо́же Мо́й, спаси́ любо́вію пою́щія Тя́.

Тропа́рь проро́ка, гла́съ 4:

Во пло́ти а́нгелъ, проро́ковъ основа́ніе, вторы́й Предте́ча прише́ствія Христо́ва, Илія́ сла́вный, свы́ше посла́вый Елиссе́еви благода́ть неду́ги отгоня́ти и прокаже́нныя очища́ти, тѣ́мже и почита́ющимъ его́ то́читъ исцѣле́нія.

Сла́ва, Меѳо́дія, гла́съ то́йже:

Пра́вило вѣ́ры и о́бразъ кро́тости, воздержа́нія учи́теля яви́ тя ста́ду твоему́ Яже веще́й Истина. Сего́ ра́ди стяжа́лъ еси́ смире́ніемъ высо́кая, нището́ю бога́тая, святи́телю Меѳо́діе, моли́ Христа́ Бо́га спасти́ся душа́мъ на́шимъ.

И ны́нѣ, богоро́диченъ.



НА УТРЕНИ,
Кано́нъ окто́иха еди́нъ и святы́хъ два́, на 8.

Кано́нъ проро́ка, его́же краегране́сіе: Пою́ ве́село Елиссе́еву благода́ть, гла́съ 5.
Пѣ́снь 1.

Ирмо́съ: Спаси́телю Бо́гу, въ мо́ри лю́ди немо́крыми нога́ми наста́вльшему и фарао́на со всево́инствомъ пото́пльшему, Тому́ еди́ному пои́мъ, я́ко просла́вися.

Изнача́ла о Бо́зѣ пое́мыя пѣ́сни, и́миже пое́тся Пое́мый, проро́ческими облиста́я хвала́ми, пою́ Просла́вльшаго: я́ко просла́вися.

Взе́мъ ко́жу изъ руки́ проро́чи, совоспрія́тъ са́нъ, отъ ра́ла проро́къ претворя́емь заре́ю духо́вною, я́ко просла́вися.

Яко предразумѣ́, Христе́, е́же къ лу́чшему зва́нію, Елиссе́ево предложе́ніе, проро́чества благода́тію просвѣти́лъ еси́, Спа́се Всеси́льне, я́ко просла́вися.

Богоро́диченъ: Пречи́стая Ма́ти Бо́жія, воплоще́ннаго изъ Тебе́ и отъ нѣ́дръ Роди́теля не отлу́чшася Бо́га непреста́нно моли́ отъ вся́кія бѣды́ спасти́, и́хже созда́.

Инъ кано́нъ свята́го Меѳо́дія, гла́съ 4.
Пѣ́снь 1.

Ирмо́съ: Порази́вый Еги́пта и фарао́на мучи́теля погрузи́вый въ мо́ри, лю́ди спа́слъ еси́ изъ рабо́ты, Моисе́йски пою́щія пѣ́снь побѣ́дную: я́ко просла́вися.

Въ постѣ́хъ, преподо́бне, порабоща́я тѣ́ло твое́, ума́стилъ еси́ ду́шу твою́ восхожде́ніи боже́ственными и пи́щу прія́лъ еси́ вы́шняго Ца́рства неиждива́емую.

Слове́снымъ мече́мъ вооружи́вся Ду́ха и, я́коже во броня́, вѣ́рою одѣ́явся, и му́жески еретико́въ полки́ пресѣ́клъ еси́, всеблаже́нне Меѳо́діе о́тче.

Рѣка́ приснотеку́щая Це́ркви бы́ша уста́ твоя́ боже́ственная, ерети́ческая моря́ я́ко вои́стинну, преподо́бне Меѳо́діе, изсуша́я и напоя́я вѣ́рныя.

Богоро́диченъ: Сѣ́нь одушевле́нну, и ковче́гъ, и трапе́зу, го́ру, отъ нея́же усѣче́ся безъ руку́ человѣ́чу Ка́мень, Иже всѣ́хъ Госпо́дь, Марíю Пречи́стую пѣ́сньми почти́мъ.

Пѣ́снь 3.

Ирмо́съ: Си́лою Креста́ Твоего́, Христе́, утверди́ мое́ помышле́ніе, во е́же пѣ́ти и сла́вити спаси́тельное Твое́ вознесе́ніе.

Земна́го пристра́стія отсту́пль, огнедохнове́нному послужи́лъ еси́, служи́телемъ угожде́нія Влады́ки бесѣ́дуя.

Въ ду́сѣ прія́лъ еси́ сугу́ба учи́теля дарова́нія, не погрѣши́въ лѣ́ностію о́наго восхожде́нія.

Съ рыда́ніемъ Иліи́ предста́въ и растерза́въ ри́зу, ми́лотію раздѣля́еши струи́ Іорда́нскія.

Богоро́диченъ: Моли́ непреста́нно, Чи́стая, Проше́дшаго изъ чре́слъ Твои́хъ изба́вити отъ ле́сти діа́воли пою́щія Тя́, Богоневѣ́сто.

Инъ.

Ирмо́съ: Утвержда́яй гро́мъ и созида́яй ду́хъ, утверди́ мене́, Го́споди, да Тя́ пою́ и́стинно и творю́ во́лю Твою́, я́ко нѣ́сть свя́тъ, я́ко Ты́, Бо́же на́шъ.

Тучено́сный бы́сть о́блакъ язы́къ тво́й, Меѳо́діе, сердца́ бо благочести́выхъ напоя́ющь сло́вомъ, нечести́выхъ же всегда́ подавля́ющь пле́велы.

Исправля́я вѣ́ры сло́во, ра́нъ иску́съ прія́лъ еси́ и въ мра́чнѣй, о́тче, темни́цѣ сѣдѣ́ти осужде́нъ бы́лъ еси́. Тѣ́мже къ Свѣ́ту невече́рнему преста́вился еси́, веселя́ся.

Му́чениковъ страда́нія воспѣ́лъ еси́, си́хъ причасти́лся еси́ неотъе́млемыя, о́тче, ра́дости, я́ко сугу́бо пострада́въ непреста́нными скорбьми́ и ра́нами, Меѳо́діе.

Богоро́диченъ: Гавріи́лъ, — ра́дуйся, — Дѣ́вѣ повѣ́дуя, вѣща́ше, — Ду́хъ Святы́й на Тя́ на́йдетъ, Дѣ́во, и Спа́са Го́спода зачне́ши во чре́вѣ Твое́мъ.

Конда́къ Меѳо́дія, гла́съ 2. Подо́бенъ: Тве́рдыя.

На земли́ подвиза́лся еси́, я́ко безпло́тный, и небеса́ наслѣ́довалъ еси́, Меѳо́діе, я́ко изъясни́вый въ концѣ́хъ ико́нъ поклоне́ніе, въ трудѣ́хъ бо и болѣ́знехъ вя́щше пребы́въ, не преста́лъ еси́ дерзнове́ніемъ, облича́я отмета́ющіяся ико́ны Христо́вы.

Икосъ:

Грѣхо́въ ми́ разрѣше́ніе пода́ждь, е́же пѣ́ти по достоя́нію по́двиги твоя́, Меѳо́діе пресла́вне: въ ро́въ бо глубо́къ вве́рженъ бы́лъ еси́, да я́же пре́жде ду́ши, во глубинѣ́ погребе́нныя невѣ́дѣнія, разрѣши́ши къ сія́нію Боже́ственнаго свѣтоли́тія, научи́въ я́вѣ подсо́лнечную Боже́ственному вои́стинну неизрече́нному Христо́ву покланя́тися воображе́нію, облича́я отмета́ющіяся ико́ны Христо́вы.

Сѣда́ленъ проро́ка, гла́съ 1. Подо́бенъ: Гро́бъ Тво́й.

Прозрѣ́ніемъ боже́ственнымъ Илія́ тя́ вели́кій, му́дре Елиссе́е, ученика́ взима́етъ, проро́ка предпоказу́етъ, сія́юща Ду́хомъ. Тѣ́мже, дне́сь всесвяту́ю твою́ па́мять пра́зднующе, благочестному́дренно почита́емъ тя́ съ ни́мъ, сла́вне.

Сла́ва, преподо́бнаго, гла́съ 4. Подо́бенъ: Яви́лся еси́ дне́сь.

Яко свѣ́тлое со́лнце, возсія́въ, о́тче, уче́ньми твои́ми всю́ вселе́нную, свяще́нне, просвѣща́еши, Меѳо́діе, и отгоня́еши мглу́ ерети́ческую.

И ны́нѣ, пра́здника или́ богоро́диченъ:

Пречи́стѣи ру́цѣ Твои́, Дѣ́во Ма́ти, просте́рши, покры́й упова́ющія на Тя́ и Сы́ну Твоему́ зову́щія: всѣ́мъ пода́ждь, Христе́, ми́лости Твоя́.

Крестобогоро́диченъ:

На дре́вѣ ви́дящи воздви́жена Сы́на Твоего́, Пречи́стая, утро́бою ма́тернею растерза́ема, жа́лостно взыва́ла еси́: увы́ Мнѣ́, ка́ко заше́лъ еси́, Свѣ́те Мо́й Безлѣ́тный?

Пѣ́снь 4.

Ирмо́съ: Услы́шахъ, Го́споди, изъ гро́ба Твое́ воста́ніе и просла́вихъ Твою́ непобѣди́мую си́лу.

Якоже дре́вле во́ды, и ны́нѣ непло́дный у́мъ мо́й исцѣля́еши благода́тію, Елиссе́евыми моли́твами.

Боже́ственнѣ обогати́лся еси́ вы́шнихъ сказа́ніемъ и звѣ́ремъ дѣте́й отъе́млеши злообра́зіе.

Ви́дѣнъ бы́лъ еси́, сла́вне, дѣ́вствомъ укра́шенъ, су́щимъ во тмѣ́ пре́лести, я́ко свѣти́льникъ, издале́ча сія́я.

Молча́ти не мо́жетъ Ду́хомъ дви́жимь язы́къ, твоя́ ди́вная въ житіи́, Елиссе́е, исправле́нія.

Богоро́диченъ: Вои́стинну сла́вимъ Тя́, Богоро́дице Безневѣ́стная, и въ Твое́ приста́нище, вѣ́рніи, прибѣга́емъ.

Инъ.

Ирмо́съ: Услы́шахъ, Бо́же, слу́хъ Тво́й и убоя́хся, разумѣ́хъ дѣла́ Твоя́ и ужасо́хся, Го́споди, я́ко Твоего́ хвале́нія испо́лнь земля́.

Му́дрости разу́мною ча́шею омочи́въ устнѣ́, о́тче, рѣ́ки на́мъ источи́лъ еси́ уче́ній, преподо́бне, благоче́стно творя́щимъ па́мять твою́.

Ты́ проповѣ́датель возжелѣ́ненъ, сла́докъ сло́вомъ, про́стъ нра́вы, духо́вными дарова́ніи, святи́телю преподо́бне, пребога́тъ яви́лся еси́, Меѳо́діе.

Копіе́мъ мы́сленнымъ Боже́ственнаго Сло́ва е́же въ ме́рзости ерети́честѣй су́щую пострѣка́въ, уста́вилъ еси́ нече́стія на́глость, Меѳо́діе.

Богоро́диченъ: Ра́дуйся, две́ре мы́сленная, изъ нея́же про́йде неизрече́ннымъ сло́вомъ Ца́рь Небе́сный и, соблю́дъ непоро́чну, запеча́тану па́ки оста́ви.

Пѣ́снь 5.

Ирмо́съ: Утренююще, вопіе́мъ Ти́: Го́споди, спаси́ ны, Ты́ бо еси́ Бо́гъ на́шъ, ра́звѣ бо Тебе́, ино́го не вѣ́мы.

Молчали́вое и кро́ткое, богодохнове́нне, души́ твоея́ проро́ка тя́ показа́, Елиссе́е, вѣ́ры ра́ди.

Боже́ственное твои́хъ слове́съ дѣ́йство просвѣща́етъ мя́ глаго́лы духо́вными, Елиссе́е всеблаже́нне.

Ме́ртвъ грѣ́хъ, я́ко жи́ву предстоя́щу Го́сподеви, проро́че, тебѣ́, Елиссе́е, вмѣня́шеся.

Богоро́диченъ: Не преста́й моля́щи, Его́же родила́ еси́, Богоро́дице, спасти́ ду́ши на́ша, воспѣва́ющихъ Тя́, Пречи́стая.

Инъ.

Ирмо́съ: Возсія́й ми́, Го́споди, свѣ́тъ повелѣ́ній Твои́хъ, я́ко къ Тебѣ́ ду́хъ мо́й у́тренюетъ и пое́тъ Тя́: Ты́ бо еси́ Бо́гъ на́шъ, и къ Тебѣ́ прибѣга́ю, Царю́ ми́ра.

Свѣ́томъ просвѣща́емь Трисо́лнечнымъ, сла́вне, мра́чную и те́мную е́реси мглу́ благоче́стно отгна́лъ еси́ и звѣзда́ бы́лъ еси́, вѣ́рными блиста́я сія́ніи.

Изощре́на тро́сть Ду́ха язы́къ тво́й, я́ко скоропи́сца кни́жника, Меѳо́діе, показа́ся, на скрижа́ли начерта́я серде́цъ благода́ти Боже́ственный зако́нъ нело́жно.

Сле́зныя то́ки всено́щными стоя́ніи, я́ко би́серіе, нося́, преподо́бне, си́ми грѣхо́вныя пото́ки изсуши́лъ еси́ и Боже́ственнаго Ду́ха прія́телище яви́лся еси́ чи́сто.

Богоро́диченъ: Избавля́еши моли́твами Твои́ми отъ вся́каго обстоя́нія прибѣга́ющія въ покро́въ Тво́й, Марíе Богоро́дице: Ты́ бо чту́щихъ Тя́ Предста́тельница еси́ и упова́ніе съ Бо́гомъ.

Пѣ́снь 6.

Ирмо́съ: Обы́де мя́ бе́здна, гро́бъ мнѣ́ ки́тъ бы́сть, а́зъ же возопи́хъ къ Тебѣ́, Человѣколю́бцу, и спасе́ мя десни́ца Твоя́, Го́споди.

Напо́лни пото́ки иногда́ ни до́ждь, ни ду́хъ возду́шный, возду́хъ же благода́ти, проро́че, и сло́во твое́ дѣ́йствомъ Ду́ха напо́лни.

Отъ ма́ла сосу́да иногда́, проро́че, я́коже напо́лнилъ еси́ незави́стно еле́й женѣ́, и мнѣ́ Боже́ственную ми́лость источи́ти, Елиссе́е, помоли́ся.

Честна́я жена́, проро́че, вѣ́рою вжиля́ема, въ ста́рости непло́дствія разрѣше́ніе пріе́млетъ моли́твою, благоча́діе плодя́щи.

Богоро́диченъ: Купину́ Тя́ неопали́му, и го́ру, и лѣ́ствицу одушевле́нну, и две́рь небе́сную досто́йно сла́вимъ, Марíе сла́вная, правовѣ́рныхъ похвало́.

Инъ.

Ирмо́съ: Бу́ря мя́ помышле́ній, пости́гши, во глубину́ низвлачи́тъ мя́ безмѣ́рныхъ грѣхо́въ, но Ты́, Упра́вителю Благíй, предвари́въ, упра́ви, я́ко проро́ка, и спаси́ мя.

Пчелѣ́ трудолю́бнѣй поревнова́въ, пи́сменныя собра́лъ еси́ цвѣ́ты, я́коже въ со́тѣ, се́рдцемъ твои́мъ сіе́ состроя́я и всѣ́мъ источа́я рѣку́ уче́ній твои́хъ.

Слове́съ духо́вныхъ напо́лнився, язы́къ тво́й, прему́дре, языкобо́лія низложи́ ху́льниковъ, проповѣ́дающь Христо́во воплоще́ніе почита́ти и плотско́е подо́біе.

Пе́рвѣе у́бо на сѣда́лищи ста́рецъ похвали́въ Го́спода, на святи́тельстѣ престо́лѣ, напослѣ́докъ же возне́слся еси́ са́мъ, упа́съ богоуго́дно избра́нныя, о́тче, сія́ лю́ди.

Богоро́диченъ: Еди́ну Тя́ Бо́га на́шего Ма́терь, Богоро́дице Влады́чице, тва́рь вся́ познава́етъ, я́ко еди́на вмѣсти́ла еси́ Бо́га несказа́нно во утро́бѣ Твое́й, Боже́ственнымъ не опали́вшися огне́мъ.

Конда́къ, гла́съ 2. Подо́бенъ: Вы́шнихъ ища́.

Проро́къ Бо́жій яви́лся еси́, сугу́бую благода́ть пріе́мь, вои́стинну досто́йную тебе́, Елиссе́е блаже́нне: Иліи́ бо бы́лъ еси́ совсе́льникъ, съ ни́мъ Христу́ Бо́гу моля́ся непреста́нно о всѣ́хъ на́съ.

Икосъ:

Въ зако́нѣ Госпо́дни возсія́вшаго, вси́ Елиссе́я му́драго пѣ́ніи пѣ́сненными воспое́мъ: ве́сь бо испо́лненъ е́сть чуде́съ сугу́быми о́бразы, на́мъ источа́я исцѣле́ній струи́, кропи́тъ бо ду́ши вѣ́рныхъ и спаса́етъ отъ бѣ́дъ, я́коже дре́вле лю́ди безча́дствующія, услажда́етъ со́лію во́ды, креще́нія благода́ть возвѣща́я я́вѣ, моля́ непреста́нно о всѣ́хъ на́съ.

Пѣ́снь 7.

Ирмо́съ: Въ пещи́ о́гненнѣй пѣсносло́вцы спасы́й о́троки, благослове́нъ Бо́гъ оте́цъ на́шихъ.

Прему́дрости лу́чшія ты́, Елиссе́е, испо́лнився, вопія́лъ еси́: благослове́нъ Бо́гъ оте́цъ на́шихъ.

Ты́, я́ко Жи́зни служи́тель, ма́тери а́біе жи́ва ме́ртва сы́на, проро́че, показа́лъ еси́.

Ненача́емыя иногда́ проро́ческія пита́я дѣ́ти, всегуби́тельныя снѣ́ди сотвори́лъ еси́ неврежде́нны.

Богоро́диченъ: Иже отъ Дѣ́вы рожде́йся, Юже Богоро́дицу содѣ́ла, благослове́нъ Бо́гъ оте́цъ на́шихъ.

Инъ.

Ирмо́съ: Въ пещи́ Авраа́мстіи о́троцы Перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.

Росо́ю Боже́ственныя любве́ погаси́лъ еси́ страсте́й, пресла́вне, разжже́нную пе́щь, иску́шся же я́ко зла́то напа́стьми горни́ломъ, я́ко со́лнце, блистаеши.

Адама́нтское се́рдце въ ско́рбехъ имѣ́лъ еси́ и въ гоне́ніихъ, Меѳо́діе, и ны́нѣ блиста́еши луча́ми небе́сными и огнедохнове́нными усты́, тѣ́мже тя́ восхваля́емъ.

Якоже необори́мь сто́лпъ, неподви́жимь пребы́лъ еси́ напа́стными прило́ги, пре́лести утвержде́ніе низлага́я, святи́телю, си́лою твои́хъ слове́съ, Меѳо́діе преблаже́нне.

Богоро́диченъ: Пречу́дный Ты́ черто́гъ, соеди́ншаго Себе́ человѣ́честву, Бо́га еди́на породила́ еси́ и Дѣ́вою пребыла́ еси́, Богоневѣ́стная Ма́ти, Марíе Дѣ́во.

Пѣ́снь 8.

Ирмо́съ: Ороси́вшаго пе́щь и о́троки сохра́ньшаго посредѣ́ горя́щаго пла́мене, о́троцы, славосло́вите, свяще́нницы, благослови́те, лю́діе, превозноси́те во вся́ вѣ́ки.

Сотво́ршаго очище́ніе проро́ка повелѣ́ніемъ о́троцы воспѣва́ютъ, святи́тели благосло́вятъ, лю́діе превозно́сятъ Его́ во вѣ́ки.

Отъ ве́щи очи́щь у́мъ невеще́ственно, невеще́ственнаго жела́ніемъ одержи́мь, ви́дѣлъ еси́. Тѣ́мже, игра́я, вопія́лъ еси́: Христа́ превозноси́те во вся́ вѣ́ки.

Благода́тію прови́дѣ бу́дущая, на дре́вѣ пречи́стый Кре́стъ зри́ши воображе́нъ. Тѣ́мже вопія́лъ еси́, ра́дуяся, богонауче́нный проро́че: Христа́ превозноси́те во вся́ вѣ́ки.

Колесни́цъ мно́жество, окру́жшихъ тя́, низложи́, чу́дне, мра́комъ незави́стно уста́вилъ еси́, безу́міе облича́я, всеблаже́нне, вопія́: Христа́ превозноси́те во вся́ вѣ́ки.

Богоро́диченъ: Ангели сла́вятъ Рождество́ Твое́, Чи́стая Богоневѣ́сто, съ ни́миже вси́ пое́мъ: о́троцы, благослови́те, свяще́нницы, пѣсносло́вите, лю́діе, превозноси́те во вся́ вѣ́ки.

Инъ.

Ирмо́съ: Земля́ и вся́, я́же на не́й, мо́ре и вси́ исто́чницы, небеса́ небе́съ, свѣ́тъ и тма́, мра́зъ и зно́й, сы́нове человѣ́честіи, свяще́нницы, благослови́те Го́спода и превозноси́те Его́ во вѣ́ки.

Ты́ низложи́лъ еси́ ерети́ческая шата́нія, е́же пои́стиннѣ злочести́вая, и совозне́слъ еси́ вѣ́рныхъ Це́ркве, о́тче, ро́гъ, Христо́ву наказу́я ико́ну чести́, Меѳо́діе. Тѣ́мже тя́ пое́мъ и любо́вію почита́емъ.

Тя́ звѣзду́ всесвѣ́тлую Со́лнце показа́ Христо́съ на тве́рди, прему́дре, церко́внѣй, и твои́ми сія́ніи честны́хъ уче́ній концы́, о́тче, озари́лъ еси́ во вся́ вѣ́ки.

Твое́ сло́во, я́коже гро́мъ, Меѳо́діе, возшумѣ́ на земли́, мамо́ны содѣ́йственника и роди́теля пре́лести, я́коже змíя, связа́въ, отсла́лъ еси́ тмѣ́ вѣ́чнѣй, я́ко су́ща наслѣ́дника.

Богоро́диченъ: Еди́нъ еси́ Единоро́денъ горѣ́, Еди́нъ и до́лѣ То́йже: безъ ма́тере горѣ́ отъ Отца́ и безъ отца́ изъ Ма́тере до́лу, въ Не́йже вообрази́лся еси́ въ чужде́е, Сло́ве, обнища́въ, въ мое́ смири́вшееся естество́ отъ грѣха́.

Пѣ́снь 9.

Ирмо́съ: Тя́, па́че ума́ и словесе́, Ма́терь Бо́жію, въ лѣ́то Безлѣ́тнаго неизрече́нно ро́ждшую, вѣ́рніи, единому́дренно велича́емъ.

Жезло́мъ сѣчи́тельнымъ возвлача́ желѣ́зо проро́къ, ве́щное человѣ́къ существо́, Кресто́мъ вознесе́но, науча́ше.

Да тѣле́съ пока́жетъ воста́ніе Живонача́льникъ, возставля́етъ мертвеца́, отню́дъ не иму́ща дыха́нія пло́тію, проро́ка показу́я пречестно́е.

Ны́нѣ въ Боже́ственнѣмъ поко́и Бо́га мо́лиши, чу́дне, блаже́нство улучи́ти при́сно тя́ блажа́щимъ.

Богоро́диченъ: Ра́дуйся, Богоро́дице, Ма́ти Христа́ Бо́га, Его́же родила́ еси́, моли́ согрѣше́ній оставле́ніе дарова́ти вѣ́рою воспѣва́ющимъ Тя́.

Инъ.

Ирмо́съ: Яко сотвори́ Мнѣ́ вели́чія Си́льный, и свя́то и́мя Его́, и ми́лость Его́ въ ро́дъ и ро́дъ боя́щимся Его́.

Святи́телей красота́, мона́ховъ удобре́ніе, всѣ́хъ вѣ́рныхъ о́бразъ, Це́ркве па́стырь и правосла́вныхъ степе́нь, ты́ еси́, Меѳо́діе.

Иліину́ ре́вность стяжа́въ, испо́лнилъ еси́ студа́ беззако́нныя іере́и, воплоще́нія Госпо́дня непокланя́ющихся о́бразу, му́дре Меѳо́діе.

Лику́я со а́нгелы предъ лице́мъ Изба́вителя и сла́вы Его́ наслажда́яся, моли́твами твои́ми на́съ отъ вся́кихъ искуше́ній изба́ви, Меѳо́діе.

Богоро́диченъ: Пое́мъ Твое́ рождество́ и сла́вимъ изъ Тебе́ Рожде́ннаго, я́ко Бо́га же и Человѣ́ка, Ма́ти Дѣ́во Чи́стая, Его́же моли́ прилѣ́жно поми́ловати на́съ.

Свѣти́ленъ. Подо́бенъ: Не́бо звѣзда́ми.

Иліину́ благода́ть сугу́бу прія́лъ еси́ отъ Бо́га, Елиссе́е богоблаже́нне, и прося́щимъ у тебе́ вѣ́рно сугу́бо исцѣле́нія дае́ши, душа́мъ же и тѣ́ломъ.

Сла́ва, святи́теля. Подо́бенъ: Ученико́мъ, зря́щимъ.

Пріиди́те, вѣ́рніи, пое́мъ боже́ственную па́мять святи́теля дне́сь Меѳо́дія, въ ро́вѣ преиспо́днемъ вве́ржена, да ду́ши изба́витъ, погребе́нныя во тмѣ́, отъ лука́ваго нече́стія.

И ны́нѣ, пра́здника или́ богоро́диченъ:

Препѣ́тая Дѣ́во и Богоро́дице, Бо́га неизрече́нно ро́ждшая, прилѣ́жно моли́ Сы́на Твоего́ о на́съ, рабѣ́хъ Твои́хъ, уще́дрити и спасти́ любо́вію хва́лящихъ Тя́.

На стихо́внѣ окто́иха. Сла́ва, гла́съ 6:

Звѣзда́ возсія́ благоче́стія отъ за́падъ со́лнца ви́димаго, вели́кій во святи́телехъ Меѳо́дій, и, мглу́ пресѣ́къ злосла́вныхъ, почи́ на и́стиннѣмъ восто́цѣ, пра́веднаго Со́лнца, Христа́ Бо́га на́шего, и та́мо со безпло́тными водворя́яся ли́ки, и престо́лу предстоя́ Тро́ическому, я́ко преподо́бенъ, я́ко му́ченикъ, я́ко святи́тель, я́ко патріа́рхъ дѣя́ніемъ и видѣ́ніемъ, на́мъ про́ситъ, вѣ́рою творя́щимъ свяще́нную его́ па́мять, ве́лія ми́лости.

И ны́нѣ, пра́здника или́ богоро́диченъ. Крестобогоро́диченъ. Подо́бенъ: Тридне́венъ.

Зача́тіе Твое́ безсѣ́менное и рождество́ несказа́нное помышля́ющи, дивлю́ся зѣло́: ка́ко си́це, я́коже злодѣ́й, благоволи́лъ еси́ умре́ти, Сы́не? — Пречи́стая взыва́ше.


НА ЛИТУРГІИ,

Проки́менъ, гла́съ 4: Ты́ іере́й во вѣ́къ, по чи́ну Мелхиседе́кову. Сти́хъ: Рече́ Госпо́дь Го́сподеви моему́: [сѣди́ одесну́ю Мене́, до́ндеже положу́ враги́ Твоя́ подно́жіе но́гъ Твои́хъ.] Апо́столъ Іа́ковля посла́нія, зача́ло 57. Аллилу́ія, гла́съ 4: Моисе́й и Ааро́нъ [во іере́ехъ Его́ и Саму́илъ въ призыва́ющихъ и́мя Его. Сти́хъ: Призыва́ху Го́спода, и То́й послу́шаше и́хъ.] Ева́нгеліе Луки́, зача́ло 14. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся.]

Источникъ: Минíа, мѣ́сяцъ Іу́ній. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 86 об. – 93.

/ Къ оглавленію раздѣла /


Наверхъ / Къ титульной страницѣ

0