Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 20 августа 2017 г. Сейчасъ на порталѣ посѣтителей - 17.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́нія въ 13-й де́нь.
Святы́я му́ченицы Акили́ны и свята́го Трифи́ллія, епи́скопа Левкусíи Ки́прскія.

[ВЕЧЕРЪ,
На Го́споди воззва́хъ:] стихи́ры, гла́съ 4. Подо́бенъ: Да́лъ еси́ зна́меніе.

Да́ръ принесла́ еси́,* твои́хъ удо́въ терза́нія,* Жениху́ твоему́, всечестна́я.* Тѣ́мже, черто́говъ тя́ пресвѣ́тлыхъ сподо́бивъ,* просвѣща́етъ свѣ́томъ Боже́ственныя сла́вы Пресу́щный,* Ему́же предстои́ши, ра́дующися,* о на́съ прилѣ́жно моли́,* вѣ́рно сла́вящихъ* твое́, Акили́но, страда́ніе.

Жела́ніемъ, прехва́льная,* одержи́ма Зижди́теля твоего́,* Того́ страда́нія пло́тію изобрази́ла еси́,* вся́ко треволне́ніе болѣ́зней претерпѣ́вши.* И ны́нѣ живе́ши на небесѣ́хъ,* неболѣ́зненную сла́ву* и вѣне́цъ нося́щи неувяда́емый* и ви́дящи, е́же зря́тъ а́нгельстіи чи́ны,* Акили́но богодохнове́нная.

Ины стихи́ры, гла́съ 8. Подо́бенъ: О, пресла́внаго чудесе́!

Отче Трифи́лліе сла́вне,* слеза́ми мно́гими освѣща́емь изря́дно,* къ пе́рвому Вино́внику до́брыхъ возлетѣ́лъ еси́* и сто́лпъ свѣтови́денъ яви́лся еси́,* просвѣща́я всѣ́хъ словесы́ и чудесы́,* приступа́ющихъ къ тебѣ́* мы́слію всегда́ благопоко́рною.* Тѣ́мъ тя́ чти́мъ и ублажа́емъ.

Отче свяще́нне Трифи́лліе,* ты́ воскри́ліемъ ри́зъ че́стно,* я́ко Ааро́нъ вторы́й укра́шенъ,* святы́хъ свята́я ны́нѣ зри́ши,* вну́трь бы́въ вторы́я катапета́смы.* О, чи́стаго твоего́ па́че ума́ сія́нія,* святи́телей боже́ственное удобре́ніе,* ему́же пріобщи́лся еси́.

Имѣ́яй ду́шу ми́лостиву,* и чи́стъ по́мыслъ,* и се́рдце нестро́потно,* и вѣ́ру нескве́рную,* и любо́вь нелицемѣ́рную,* святи́тельства, о́тче, досто́инство,* лико́мъ оте́ческимъ вчиня́емь че́стно.* Тѣ́мже почита́емъ тя́ свяще́нными пѣ́сньми* и благоче́стно вси́ ублажа́емъ и восхваля́емъ.

Сла́ва, и ны́нѣ, богоро́диченъ:

Ра́дуйся, ду́шъ просвѣще́ніе,* согрѣша́ющихъ проще́ніе,* неради́выхъ исправле́ніе.* Ра́дуйся, утѣше́ніе и ра́дость,* скорбя́щихъ помо́щнице.* Ра́дуйся, Блага́я,* немощны́хъ ду́шъ исцѣле́ніе.* Ра́дуйся, примире́ніе къ Бо́гу и хода́таице,* серафи́мъ всѣ́хъ я́ко су́щи святѣ́йши, Чи́стая.

Крестобогоро́диченъ:

Тя́ ви́дящи, пригвожда́ема* на Крестѣ́, Іису́се,* и стра́сти пріе́млюща во́лею,* Дѣ́ва и Ма́ти Твоя́, Влады́ко, —* увы́ Мнѣ́, — вопія́ше, —* Ча́до сла́дкое,* ра́ны непра́ведно ка́ко терпи́ши,* Врачу́, исцѣли́вый человѣ́ческое неможе́ніе* и отъ тли́ всѣ́хъ изба́вивый милосе́рдіемъ Твои́мъ?

Тропа́рь, гла́съ 4:

Агница Твоя́, Іису́се, Акили́на, зове́тъ ве́ліимъ гла́сомъ: Тебе́, Женише́ мо́й, люблю́, и Тебе́ и́щущи, страда́льчествую, и сраспина́юся, и спогреба́юся креще́нію Твоему́, и стражду́ Тебе́ ра́ди, я́ко да ца́рствую въ Тебѣ́, и умира́ю за Тя́, да и живу́ съ Тобо́ю; но, я́ко же́ртву непоро́чную, пріими́ мя, съ любо́вію поже́ршуюся Тебѣ́. Тоя́ моли́твами, я́ко Ми́лостивъ, спаси́ ду́ши на́ша.

Тропа́рь святи́теля, гла́съ то́йже:

Пра́вило вѣ́ры и о́бразъ кро́тости, воздержа́нія учи́теля яви́ тя ста́ду твоему́, Яже веще́й Истина. Сего́ ра́ди стяжа́лъ еси́ смире́ніемъ высо́кая, нището́ю бога́тая, о́тче Трифи́лліе, моли́ Христа́ Бо́га, спасти́ся душа́мъ на́шимъ.


[НА УТРЕНИ,]
Кано́нъ окто́иха еди́нъ и святы́хъ два́, на 8.

Кано́нъ святы́я, творе́ніе Іо́сифово, его́же краегране́сіе: Пріими́ пѣ́ніе, добротвори́вая Акили́но. Гла́съ 8.
Пѣ́снь 1.

Ирмо́съ: Посѣ́ченый несѣко́маго пресѣче́, и ви́дѣ со́лнце зе́млю, ю́же не ви́дѣ, лю́таго врага́ вода́ потопи́, и непроходи́мое про́йде Изра́иль, пѣ́снь же вспѣва́шеся: Го́сподеви пои́мъ, сла́вно бо просла́вися.

Препросла́влена, Христу́, Жениху́ твоему́, на небесѣ́хъ вои́стинну, ра́дующися, предстои́ши. Тѣ́мже тя́ на земли́ благоче́стно сла́вящія моли́твами твои́ми воспросла́ви, честна́я, и себѣ́ прича́стники сотвори́, Го́сподеви пою́щія: сла́вно бо просла́вися.

Въ тя́ все́льшися, благода́ть Ду́ха твою́ ду́шу чи́сту, сла́вная, соверши́, и ра́нами тѣ́ла краснѣ́йши была́ еси́. Тѣ́мже тя́ Жени́хъ ду́шъ, чи́сту до конца́ нетлѣ́нну су́щу, Себѣ́ обручи́, прехва́льная.

Зимѣ́ ле́стнѣй, земны́я концы́ испо́лншей дре́вле лю́тѣ, испо́лнена су́щи Ду́ха, я́ко му́ченица неле́стная Го́спода Вседержи́теля, дости́гла еси́ ве́сну жи́зненную и побѣ́ду взяла́ еси́ побѣди́тельную, Акили́но сла́вная, богому́драя, досточу́дная.

Богоро́диченъ: Иже Безнача́льному Отцу́ ссу́щный вни́де во утро́бу Твою́, Человѣ́къ бы́въ, и спасе́ ны, зло́бою прекло́ншіяся и ле́стію врага́ порабоще́нныя, Марíе Богоневѣ́сто. Сего́ ра́ди вѣ́рою Тя́ и любо́вію ублажа́емъ.

Инъ кано́нъ свята́го Трифи́ллія, гла́съ 2.
Пѣ́снь 1.

Ирмо́съ: Гряди́те, лю́діе, пои́мъ пѣ́снь Христу́ Бо́гу, раздѣ́льшему мо́ре и наста́вльшему лю́ди, я́же изведе́ изъ рабо́ты еги́петскія, я́ко просла́вися.

Хвалу́ Бо́гу вѣ́рою принесе́мъ вси́, Своего́ уго́дника украси́вшему добродѣ́тельми многообра́зными и втора́го Моисе́я воздви́гшему.

Ты́, возше́дъ на го́ру добродѣ́телей, Боже́ственный зако́нъ прія́лъ еси́, о́тче Трифи́лліе, и скрижа́лію по́мысла добро́ту души́ твоея́ уясни́лъ еси́.

Ты́, разу́мно, преподо́бне, благоуха́я, яви́лся еси́, душе́вное бо исцѣле́ніе всѣ́мъ прозя́блъ еси́, я́коже тѣле́снымъ, о́тче, богодохнове́нно бы́ліе я́влься вѣ́рнымъ.

Богоро́диченъ: Жи́зни исто́чникъ была́ еси́, Дѣ́во Чи́стая Ма́ти, Нача́льника и Го́спода ро́ждши, Жи́знь вся́ческихъ, ороша́ющи вѣ́рою славосло́вящихъ Тя́.

Пѣ́снь 3.

Ирмо́съ: Ты́ еси́ утвержде́ніе притека́ющихъ къ Тебѣ́, Го́споди, Ты́ еси́ свѣ́тъ омраче́нныхъ, и пое́тъ Тя́ ду́хъ мо́й.

Истка́ла еси́ ри́зу свѣ́та благода́тію, сла́вная, кро́вію твое́ю, Акили́но му́ченице, свяще́нно обагри́вши.

Уязви́лася еси́ любо́вію боже́ственною я́вѣ, всечестна́я, тѣ́мже тве́рдо я́звы же и болѣ́зни лю́тыя претерпѣ́ла еси́.

Всю́ тя́ освяти́ Изба́витель, честна́я, Госпо́дь, все́ю крѣ́постію Сего́, Акили́но, отъ души́ возлюби́вшу.

Богоро́диченъ: Невѣ́сту Тя́ безневѣ́стну и чи́сто, Чи́стая, селе́ніе Іису́сово, святѣ́йшу херуви́мъ вѣ́мы.

Инъ.

Ирмо́съ: Утверди́ на́съ въ Тебѣ́, Го́споди, дре́вомъ умерщвле́й грѣ́хъ, и стра́хъ Тво́й всади́ въ сердца́ на́съ, пою́щихъ Тя́.

Возсія́ свѣ́тло, я́коже со́лнце мíру, па́мять твоя́, святи́телю, и просвѣща́етъ сердца́ на́ша, вѣ́рно соверша́ющихъ сію́ благода́тію.

Са́дъ бы́въ Боже́ственнаго Ду́ха, гро́здъ боже́ственный прозя́бшій, и вѣ́ры вино́ на́мъ, вѣ́рнымъ, мы́сленно раствори́лъ еси́.

Ме́чь взе́мъ Боже́ственныя благода́ти, на́глость посѣ́клъ еси́ веліа́ра и до́бль показа́лся еси́ на́мъ побѣдоно́сецъ Христо́въ, свяще́нне.

Богоро́диченъ: Ни язы́къ земноро́дныхъ, ни у́мъ безпло́тенъ возмо́жетъ рождество́ Твое́ сказа́ти: па́че естества́ бо и ума́, Богоро́дице, Зижди́теля породила́ еси́.

Конда́къ святи́теля, гла́съ 8. Подо́бенъ: Взбра́нной.

Изря́дствомъ житія́ чистоту́ дѣ́вства пріе́мъ, Трифи́лліе, первопресто́льникъ показа́лся еси́ Левкусíи и яви́лся еси́ тѣ́мъ провозвѣсти́тель и богоразу́мія наста́вникъ. Сего́ ра́ди ра́достно взыва́емъ ти́: ра́дуйся, святи́телей украше́ніе.

Сѣда́ленъ святы́я, гла́съ 8. Подо́бенъ: Прему́дрости.

Добродѣ́телей осія́вшися Боже́ственнымъ свѣ́томъ, страда́льческимъ украси́лася еси́, пресла́вная, честна́я, вѣнце́мъ и, красна́ добро́тами бы́вши, вѣ́рою всѣ́хъ Влады́цѣ уневѣ́стилася еси́ вои́стинну, нескве́рная, нетлѣ́нная. Тѣ́мже небе́снымъ сподо́билася еси́ черто́гомъ, до́брѣ пострада́вши и льсти́ваго побѣди́вши, Акили́но богому́драя, моли́ Христа́ Бо́га согрѣше́ній оставле́ніе дарова́ти чту́щимъ любо́вію святу́ю па́мять твою́.

Сла́ва свята́го, гла́съ 3. Подо́бенъ: Боже́ственныя вѣ́ры.

Ре́вность вѣ́ры имѣ́я, преблаже́нне, прозя́блъ еси́ плоды́ зрѣ́лы: враго́въ бо посрами́лъ еси́ полки́ и діа́вола, Трифи́лліе, уби́лъ еси́. Отче преподо́бне, Христа́ Бо́га моли́ дарова́ти на́мъ ве́лію ми́лость.

И ны́нѣ, пра́здника или́ богоро́диченъ:

Боже́ственная ски́нія была́ еси́ Сло́ва, еди́на Пречи́стая Ма́ти Дѣ́во, чистото́ю а́нгелы превозше́дшая, па́че всѣ́хъ мене́, пе́рсть бы́вша, оскверне́на плотски́ми прегрѣше́ньми, очи́сти моли́твъ Твои́хъ боже́ственными вода́ми, подаю́щи, Чи́стая, ве́лію ми́лость.

Крестобогоро́диченъ:

Нескве́рная Агница Сло́ва, нетлѣ́нная Дѣ́ва Ма́ти, на Крестѣ́ зря́щи повѣ́шена изъ Нея́ безъ болѣ́зни прозя́бшаго, ма́терски подо́бно рыда́ющи, вопія́ше: увы́ Мнѣ́, Ча́до Мое́, ка́ко стра́ждеши во́лею, хотя́ изба́вити отъ страсте́й безче́стія человѣ́ка?

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Го́рдаго змíя ты́ не́мощію тѣ́ла низложи́ла еси́, воева́вши свѣ́тло и томи́телей на́глость потреби́вши.

Муче́нія свѣ́тлостію и дѣ́вства боже́ственными добро́тами, Акили́но, была́ еси́ Влады́цѣ невѣ́ста изря́дная.

Тече́нія крове́й твои́хъ многобо́жія о́гнь погаси́ша, чуде́съ же струи́ человѣ́ковъ омыва́ютъ неду́ги.

Богоро́диченъ: Дрема́ніемъ уны́нія мя́ со́нъ грѣхо́вный, Отрокови́це, пости́же, бо́дренною моли́твою Твое́ю возста́ви мя́ къ покая́нію.

Инъ.

Ирмо́съ: Услы́шахъ, Го́споди, слу́хъ Твоего́ смотре́нія и просла́вихъ Тя́, Еди́не Человѣколю́бче.

Сосу́дъ вои́стинну пречи́стъ показа́лся еси́, преблаже́нне святи́телю, и Боже́ственный Ду́хъ въ тя́ всели́ся.

Просвѣ́щся Боже́ственнымъ Ду́хомъ, у́мъ преста́вилъ еси́ къ вы́шнимъ и на пре́лесть, о́тче, подвиза́лся еси́ крѣ́пко.

Якоже а́гнцы, упа́слъ еси́ слове́сныя твоя́ о́вцы, преблаже́нне, и Христу́ приве́лъ еси́ словесы́ твои́ми.

Богоро́диченъ: Необори́мую стѣ́ну Тя́ и держа́вную наде́жду, Богоро́дице, вѣ́рніи, стяжа́хомъ въ напа́стехъ при́сно.

Пѣ́снь 5.

Ирмо́съ: Отъ но́щи невѣ́дѣнія боговѣ́дѣніемъ просвѣти́вый концы́, просвѣти́ мя у́тромъ человѣколю́бія Твоего́, Го́споди.

Волну́емѣй, я́коже свирѣ́пѣющуся мо́рю, ле́сти иногда́, яви́лася еси́ окормля́ема, Акили́но му́ченице, Христо́вою благода́тію.

Смотря́ющи, му́ченице, къ вѣнце́мъ, подъя́ла еси́ тве́рдо растерза́нія удо́въ твои́хъ и ну́ждную сме́рть.

Свѣтоявле́нно украси́лася еси́, сопоста́ты са́мыя уди́вльши, кра́сною твое́ю добро́тою и душе́внымъ воста́ніемъ.

Богоро́диченъ: Изба́вленніи вси́ прароди́тельнаго осужде́нія Рождество́мъ Твои́мъ, — ра́дуйся, — Тебѣ́ приглаша́емъ, Обра́дованная Препѣ́тая.

Инъ.

Ирмо́съ: Свѣ́та Пода́телю и вѣко́въ Тво́рче, Го́споди, во свѣ́тѣ Твои́хъ повелѣ́ній наста́ви на́съ: ра́звѣ бо Тебе́, ино́го Бо́га не зна́емъ.

Боже́ственною благода́тію, му́дре, одѣ́явся держа́вно, сла́вне, врага́ низложи́лъ еси́ си́лу, и вѣне́цъ отъ Бо́га прія́лъ еси́ досто́йно, я́ко таи́нникъ, Трифи́лліе.

На не́бо возве́дъ души́ твоея́ о́чи, сла́вне, Боже́ственныхъ позна́лъ еси́ уче́ній бе́здну, о́тче, человѣ́комъ открыва́я Тро́ическое сія́ніе.

Все́ ору́жіе взе́мъ, священноявле́нне, Бо́жіе, посрами́лъ еси́ собо́рно вра́жіе му́жество и, уче́ніи Боже́ственными главу́ сокруши́въ, вѣ́чно ра́дуешися.

Богоро́диченъ: Воплоще́нна изъ Тебе́, Богороди́тельнице, вѣ́рніи, позна́хомъ, безъ сѣ́мене Сы́на рожде́нна, Бо́га и́стинна и Человѣ́ка естество́мъ. Тѣ́мже Тя́ сла́вимъ.

Пѣ́снь 6.

Ирмо́съ: Іо́ну въ ки́тѣ, Го́споди, еди́наго всели́лъ еси́, мене́ же, свя́заннаго мре́жами вра́жіими, я́ко отъ тли́ о́наго, спаси́.

Послѣ́довати Христо́вымъ сла́внымъ вожделѣ́ла еси́ страда́ніемъ, дѣ́во, и мужему́дренно претерпѣ́ла еси́ біе́нія и расторга́нія свята́го твоего́ тѣлесе́.

Многови́дныя болѣ́зни претерпѣ́ла еси́, огня́ же небрегла́ еси́ болѣ́зни. Тѣ́мже, Акили́но, и болѣ́зни на́ша вся́ облегча́еши моли́твами твои́ми.

Смотря́я свы́ше, чудя́шеся ли́къ а́нгельскій, сла́вная дѣ́во, терпѣ́нію твоему́, ка́ко безпло́тныя враги́ съ пло́тію побѣжда́ла еси́ благода́тію.

Богоро́диченъ: Да бо́гъ человѣ́къ бу́детъ, Бо́гъ ви́дѣнъ бы́сть Человѣ́къ, Дѣ́во, изъ Твои́хъ ложе́снъ несказа́нно ро́ждся, и е́же бѣ́, пребы́въ неизмѣ́ненъ.

Инъ.

Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же, мя́ возведи́.

Яко Ено́хъ, преста́вился еси́ ду́хомъ отъ земны́хъ ты́ къ небе́снымъ и нетлѣ́нія прія́лъ еси́ по достоя́нію, блаже́нне, вѣне́цъ.

Левкусíя тя́ имѣ́ утвержде́ніе, о́тче, и па́стыря, и таи́нника благода́ти, я́ко свѣтоно́сно со́лнце, просвѣща́юща мíръ чудесы́.

Непоколеби́мое Це́ркве основа́ніе, всѣ́ми мя́ кова́рствы врага́ коле́блема, души́ моея́ хра́мину моли́твами твои́ми, о́тче, ны́нѣ утверди́.

Богоро́диченъ: Вы́шши го́рнихъ си́лъ и святѣ́йши еси́, Всенепоро́чная, па́че естества́ вмѣ́щши Невмѣсти́маго Сло́ва во утро́бѣ Твое́й.

Конда́къ, гла́съ 2. Подо́бенъ: Вы́шнихъ ища́.

Дѣ́вства твоего́ добро́тами предочи́стивши ду́шу твою́, на высоту́ муче́ніемъ востекла́ еси́, Акили́но всечестна́я, любо́вію Жениха́ твоего́ Христа́ уязви́вшися, Ему́же со а́нгелы предстои́ши, веселя́щися, съ ни́миже не преста́й моля́ся о всѣ́хъ на́съ.

Пѣ́снь 7.

Ирмо́съ: Отроцы евре́йстіи въ пещи́ попра́ша пла́мень дерзнове́нно и на ро́су о́гнь преложи́ша, вопію́ще: благослове́нъ еси́, Го́споди Бо́же, во вѣ́ки.

Тѣлеси́ стра́ждущу, богому́драя, неради́ла еси́, смотря́ющи су́щая та́мо воздая́нія, и свѣ́тъ, и сла́ву, Акили́но, и Бо́жію красоту́, и Боже́ственное весе́ліе.

Нескве́рно нося́щи тѣ́ло, и се́рдце Го́сподеви соедине́но, предъ суди́щемъ, чи́стая, мучи́телей предста́ла еси́, неразумѣ́юща мучи́теля облича́ющи, богому́драя.

Мíра измѣни́ла еси́ тлѣ́ннаго премíрныя ра́ди жи́зни нетлѣ́нныя, и вре́менныя пи́щи пребыва́ющею, дѣ́во, и тѣле́снымъ обру́чникомъ безсме́ртнаго Жениха́.

Тро́иченъ: Пѣ́сньми Боже́ственное Единонача́ліе, Тричи́сленное у́бо Ли́цы пресла́вно, естество́мъ же про́сто су́ще, почита́емъ, вопію́ще: Го́споди Бо́же, благослове́нъ еси́ во вѣ́ки.

Инъ.

Ирмо́съ: Тѣ́лу злато́му прему́дрыя дѣ́ти не послужи́ша, и въ пла́мень са́ми поидо́ша, и бо́ги и́хъ обруга́ша, среди́ пла́мене возопи́ша и ороси́ я́ а́нгелъ: услы́шася уже́ у́стъ ва́шихъ моли́тва.

Образу страсте́й воздержа́ніемъ разу́мно не поклони́лся еси́ и не опали́ тѣле́сная пе́щь, о́тче, ро́су твою́. Ду́ха же испо́лнився Свята́го, де́рзостнѣ взыва́лъ еси́: благослове́нъ еси́, Го́споди, Бо́же оте́цъ на́шихъ.

Па́стырь перводѣ́теленъ показа́лся еси́ крѣ́покъ Левкусíи, му́дре, и приве́лъ еси́ Влады́цѣ твоему́ мно́жество люде́й, всепло́діе. Тѣ́мже вѣ́рно про́симъ: предстоя́, моли́ся о ста́дѣ твое́мъ Бо́гу, изба́витися вся́кія тли́.

Живы́й исто́чникъ сле́зъ твои́хъ, му́дре и пресла́вне, всѣ́хъ удивля́етъ: исцѣле́ній бо струя́ми при́сно богатя́щеся, Трифи́лліе, и твои́хъ моще́й благода́ть пое́мъ и глаго́лемъ: благослове́нъ еси́, Го́споди, Бо́же оте́цъ на́шихъ.

Богоро́диченъ: Приста́нище тве́рдо, Предста́тельнице стра́шная и стѣна́ необори́мая въ ну́ждахъ бѣ́дствующимъ, обурева́емымъ въ ско́рбехъ, Яже къ Сы́ну Твоему́ мольбы́, Богоро́дице, иму́щи, отъ многообра́зныхъ искуше́ній спаса́й рабы́ Твоя́.

Пѣ́снь 8.

Ирмо́съ: Богоглаго́ливіи о́троцы въ пещи́, со огне́мъ пла́мень попира́юще, поя́ху: благослови́те, дѣла́ Госпо́дня, Го́спода.

Просвѣще́на сія́ніемъ чистоты́ и обагре́ніи кро́вными испещре́нна, предстои́ши, Акили́но дѣви́це, Христу́ Бо́гу на́шему.

Чиста́ же́ртва принесла́ся еси́, и приноше́ніе пресвѣ́тло, и я́ко благово́нный ѳиміа́мъ, Акили́но богому́драя, Христу́ Бо́гу на́шему.

Неду́ги разли́чныя человѣ́комъ цѣли́тъ и отгоня́етъ де́монскій вре́дъ свято́е тѣ́ло твое́, Акили́но, во гро́бѣ, пресла́вная, лежа́щее.

Богоро́диченъ: Нетлѣ́нное Сло́во, па́че сло́ва тлѣ́нія на́съ вся́каго избавля́юща, родила́ еси́, сего́ ра́ди Тя́ вси́, Дѣ́во, сла́вимъ.

Инъ.

Ирмо́съ: Въ пе́щь о́гненную ко отроко́мъ евре́йскимъ снизше́дшаго и пла́мень въ ро́су прело́жшаго Бо́га, по́йте дѣла́ я́ко Го́спода, и превозноси́те во вся́ вѣ́ки.

Спасе́нія пу́ть всѣ́мъ отве́рзлъ еси́, му́дре, су́щимъ въ Левкусíи, пе́рвое сѣ́дъ на престо́лѣ церко́внѣмъ вѣ́рно, отъ Боже́ственнаго сія́нія, сла́вне, сíй, святи́телю, пріи́мъ досто́йно.

Прибѣга́ющія вѣ́рно къ ра́цѣ твое́й, священноявле́нне, отъ бѣ́дъ изба́вити и искуше́ній врага́ моли́ Благодѣ́теля Христа́ неоску́дно.

Удиви́шася, му́дре, а́нгельстіи ли́цы твоему́ поще́нію, и де́монская мно́жества тре́петъ прія́ша вели́къ, и вся́ко зда́ніе ужасе́ся, человѣ́ческій же ро́дъ почита́етъ тя́ досто́йно.

Богоро́диченъ: Не забу́ди гла́са, Предста́тельнице стра́шная, моли́твенникъ Твои́хъ, но отъ вся́кія болѣ́зни моли́твами Твои́ми и вся́каго преще́нія исхити́, прекло́нитъ бо Твое́ Ма́тернее Бо́га моле́ніе.

Пѣ́снь 9.

Ирмо́съ: Вои́стинну Богоро́дицу, Тя́ исповѣ́дуемъ, спасе́нніи Тобо́ю, Дѣ́во Чи́стая, съ безпло́тными ли́ки Тя́ велича́юще.

На Крестѣ́ пригво́ждшемуся Спа́су дѣ́ва сраспя́тся нра́вомъ пра́вымъ, и змíеву главу́ попра́вши.

Красна́ добро́та твоя́ и вели́ко твоея́ души́ благоро́діе, пребога́тая, богови́дно, Акили́но, ны́нѣ явле́нно бы́сть.

Совоку́пльшися съ ли́ки безпло́тныхъ и съ му́ченическими собо́ры, прехва́льная, о на́съ всѣ́хъ Бо́га моли́.

Пресла́вная твоя́ па́мять всѣ́хъ созыва́етъ ра́достно, Акили́но, пѣ́ти твоя́ сла́вныя, му́ченице, болѣ́зни и страда́нія.

Богоро́диченъ: Гла́съ Тебѣ́ а́нгеловъ, Пречи́стая, вопіе́мъ: ра́дуйся, спасе́ніе всѣ́хъ человѣ́ковъ и сла́вныхъ му́ченикъ боже́ственное вѣнча́ніе.

Инъ.

Ирмо́съ: Отъ Бо́га Бо́га Сло́ва, неизрече́нною му́дростію прише́дшаго обнови́ти Ада́ма, я́дію въ тлѣ́ніе па́дшаго лю́тѣ, отъ Святы́я Дѣ́вы неизрече́нно воплоти́вшагося на́съ ра́ди, вѣ́рніи, единому́дренно пѣ́сньми велича́емъ.

Мы́сленное о́ко на высоту́ взе́мъ, позна́лъ еси́ Тро́ическую зарю́ и, земны́я осія́въ, му́дре, обогати́лъ еси́ всѣ́хъ Боже́ственнымъ просвѣще́ніемъ боголѣ́пно. Тѣ́мъ тя́ по достоя́нію въ пѣ́снехъ велича́емъ.

Свѣти́льникъ показа́лся еси́, всеблаже́нне, мы́сленный Левкусíемъ, обходя́ окре́стныя страны́, му́дре, и Христо́вымъ позна́ніемъ, я́ко луча́ми одушевле́нными, украси́въ свяще́нными боголѣ́пно, и ле́сти мíра а́біе избавля́я.

Ны́нѣ, вѣ́рніи, собра́вшеся, мо́лимъ тя́, о́тче, при́сно моли́ти Христа́: я́ко да гла́да, и иноплеме́нниковъ па́губы, и вся́кія бѣды́ изба́витъ на́съ, я́ко си́ленъ, да тя́ по достоя́нію въ пѣ́снехъ велича́емъ.

Богоро́диченъ: Несказа́ннаго чревоноше́нія неизрече́нное рождество́ ко́е сло́во ска́жетъ земноро́дныхъ? Младе́нецъ бо бѣ́ и Бо́гъ рожде́йся; ро́ждшая же Раба́ и Ма́ти рожде́ннаго Сы́на, Богоро́дице. Тѣ́мъ Тя́ пое́мъ и Рождество́ Твое́.

Источникъ: Минíа, мѣ́сяцъ Іу́ній. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 80 об. – 86.

/ Къ оглавленію раздѣла /


Наверхъ / Къ титульной страницѣ

0