Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 17 декабря 2017 г. Сейчасъ на порталѣ посѣтителей - 10.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́нія въ 12-й де́нь.
Слу́жба преподо́бному отцу́ на́шему Арсе́нію, Конѣ́вскому чудотво́рцу.

НА МАЛѢЙ ВЕЧЕРНИ,
[На Го́споди воззва́хъ:] стихи́ры на 4, гла́съ 1. Подо́бенъ: Небе́сныхъ чино́въ ра́дованіе.

Ра́дуйтеся, лю́діе, и весели́теся, не я́ко весна́ пріи́де, земноро́дныхъ ве́лія ра́дость, но я́ко де́нь прибли́жися, въ о́ньже пѣ́сненными хвала́ми, я́ко цвѣты́, венча́ется святы́й Арсе́ній, путево́ждь спасе́нія на́шего.

Сра́дуйтеся на́мъ, Аѳо́нская горо́ и Вели́кій Новгра́де, въ свѣтоно́сный де́нь па́мяти свята́го Арсе́нія, и́же въ ва́съ добродѣ́тельными дѣя́ньми, я́ко фи́никсъ, процвѣте́ и, я́ко ке́дръ въ Лива́нѣ, умно́жися.

Страстьми́ борю́щихъ де́моновъ моли́твою и посто́мъ побѣжда́я и боже́ственнымъ жела́ніемъ согрѣва́я се́рдце, хра́мъ че́стенъ Ду́ху Свято́му бы́ти сподо́бился еси́, богоно́се Арсе́ніе, о́тче на́шъ.

Сла́ва, гла́съ 5:

Яко жа́ждущій еле́нь на исто́чники водны́я, ты́, ко Го́споду горя́й ду́хомъ, тѣ́снымъ путе́мъ по́стничества неукло́нно те́клъ еси́, преподо́бне, отъ Него́ же и во́ду живоно́сну пріи́мъ, къ вѣ́чной жи́зни пресели́лся еси́, идѣ́же ны́нѣ богозрѣ́ніемъ насыща́яся, помина́й на́съ, любо́вію пра́зднующихъ всечестну́ю па́мять твою́.

И ны́нѣ, богоро́диченъ, гла́съ то́йже:

Якоже де́нь со́лнечными луча́ми па́че просвѣща́ется, си́це дне́шнее торжество́ ико́на Твоя́, Влады́чице, чуде́съ сія́ніемъ свѣтоза́рнѣйшимъ твори́тъ и всѣ́хъ на́съ ра́дости исполня́етъ, а́нгельски вопію́щихъ Ти́: ра́дуйся, Благода́тная, Бо́га пло́тію ро́ждшая ко спасе́нію ду́шъ на́шихъ.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

До́мъ душе́вный омы́лъ еси́, блаже́нне Арсе́ніе, о́тче на́шъ, струя́ми сле́зъ твои́хъ, и возсія́лъ тебѣ́ свѣ́тъ Христо́въ.

Сти́хъ: Честна́ предъ Го́сподемъ [сме́рть преподо́бныхъ Его́].

Сѣ́мя Боже́ственное обрѣ́тъ тя́, Арсе́ніе, зе́млю бла́гу, страсте́й те́рніемъ не подави́ся, но возрасти́ добродѣ́телей пло́дъ стори́чный.

Сти́хъ: Блаже́нъ му́жъ, боя́йся Го́спода, [въ за́повѣдехъ Его́ восхо́щетъ зѣло́].

Ничто́же земно́е возмо́же тя́, свя́те Арсе́ніе, отъ любве́ Бо́жія разлучи́ти, е́ю же, я́ко свѣти́льникъ горя́й и свѣтя́й, при́сно бы́лъ еси́.

Сла́ва, гла́съ 4:

Труды́ и по́двиги твоя́ му́жеству тезоимени́та я́вѣ показа́ша тя́, преподо́бне о́тче на́шъ, и́ми же отце́въ Святы́я Горы́ удиви́лъ еси́, благослове́нія и даро́въ отъ ни́хъ сподо́бился еси́. И ны́нѣ на небесѣ́хъ мзду́ трудо́въ твои́хъ воспріи́мъ, Христу́ Бо́гу не преста́й моли́тися, е́же спасти́ и просвѣти́ти ду́ши на́ша.

И ны́нѣ, богоро́диченъ, гла́съ то́йже:

Исто́чникъ Тя́ исцѣле́ній всѣ́мъ вѣ́рнымъ проповѣ́дуютъ чудеса́ святы́я ико́ны Твоея́, Влады́чице, ю́же святы́й Арсе́ній, я́ко многоцѣ́ненъ да́ръ, трудолю́біемъ пріобрѣ́тъ, всѣ́мъ на́мъ дарова́. Тѣ́мъ, благода́рнымъ се́рдцемъ и усты́ пою́ще, уми́льно Тебѣ́ вопіе́мъ: ра́дуйся, благи́хъ Вино́вная, ра́дуйся, Стѣно́ неруши́мая, Прибѣ́жище и Спасе́ніе ду́шъ на́шихъ.

Тропа́рь, гла́съ 1:

Боже́ственною любо́вію возгорѣ́вся, мірска́я пристра́стія отъ души́ отве́ргше, тѣ́снымъ путе́мъ по́стничества во слѣ́дъ Христа́ невозвра́тнымъ умо́мъ ше́ствовалъ еси́, Арсе́ніе всеблаже́нне, отъ Него́ же и мзду́ трудо́въ твои́хъ на небесѣ́хъ воспріи́мъ, помина́й на́съ, чту́щихъ святу́ю па́мять твою́ и вопію́щихъ: сла́ва Да́вшему ти́ крѣ́пость, сла́ва Вѣнча́вшему тя́, сла́ва Дѣ́йствующему тобо́ю всѣ́мъ исцѣле́нія.

Инъ тропа́рь, гла́съ 4:

Ду́хомъ Бо́жіимъ наставля́емый, возлюби́лъ еси́ безмо́лвіе, въ не́мъ же ева́нгельски подвиза́ющуся, пречу́дный Аѳо́нскій да́ръ — Богома́тере ико́на, дарова́ся ти́, всеблаже́нне, и, о́бразъ добродѣ́телей бы́въ ста́ду твоему́, Арсе́ніе о́тче на́шъ, къ го́рнему торжеству́ возше́лъ еси́, идѣ́же со а́нгелы ликовству́я, моли́ Христа́ Бо́га спасти́ся душа́мъ на́шимъ.


НА ВЕЛИЦѢЙ ВЕЧЕРНИ,
Блаже́нъ му́жъ.., 1-й антифо́нъ. На Го́споди воззва́хъ: стихи́ры на 8, гла́съ 8. Подо́бенъ: О, пресла́внаго чудесе́!

Благовѣ́стія Христо́ва Боже́ственный гла́съ, — не люби́те мíра, — отъ мíра воззва́ тя́ въ ю́ности, и бы́лъ еси́ рачи́тель по́стническихъ по́двиговъ, боже́ственныя любве́ пра́вило, трудолю́бія зерца́ло, свѣти́льникъ благода́тный, горя́й ду́хомъ ко Го́споду и свѣтя́й добродѣ́тельми и чудесы́, Его́ же ны́нѣ, всехва́льне Арсе́ніе, моли́ о душа́хъ на́шихъ. [Два́жды.]

Обновля́тися острово́мъ, ре́клъ Госпо́дь проро́комъ Иса́іемъ, и се́ тобо́ю испо́лнися, свя́те Арсе́ніе: необита́емый о́стровъ бы́сть твое́ю оби́телію, идѣ́же, я́ко на мѣ́стѣ зла́чнѣ и водѣ́ поко́йнѣ, Боже́ственными глаго́лы ча́да мно́га воспита́въ, ко Христу́ приве́лъ еси́; сего́ ра́ди ны́нѣ духо́вно пра́зднующе, тя́ въ пѣ́снехъ ублажа́емъ. [Два́жды.]

Го́рняго мудрова́нія испо́лненъ сы́й, къ горѣ́ Аѳо́нстѣй ты́ ше́ствуеши, богому́дре Арсе́ніе, идѣ́же луча́ми добродѣ́телей, я́ко богоза́рное свѣти́ло, возсія́лъ еси́ и, чуде́съ сокро́вище — о́бразъ Богоблагода́тныя въ да́ръ пріи́мъ, страну́ сію́ озари́лъ еси́; тѣ́мъ, свѣ́тло дне́сь пра́зднующе, воспѣва́емъ ди́вныя по́двиги твоя́. [Два́жды.]

Яко избра́нный Бо́жій, Бо́га добродѣ́тельми прославля́лъ еси́, не искíй сла́вы отъ человѣ́къ, и Бо́гъ просла́ви тя́ въ чудесѣ́хъ, Арсе́ніе досточу́дне: ты́ бо, я́влься на мо́ри, живота́ отча́янныхъ ры́барей спа́слъ еси́; ты́ слѣпцу́ прозрѣ́нія вино́венъ бы́лъ еси́; при гро́бѣ твое́мъ неду́жный здра́въ бы́сть, — ди́вна вся́ дѣла́ твоя́! Ди́венъ Бо́гъ во святы́хъ Свои́хъ! [Два́жды.]

Сла́ва, гла́съ 6:

Яко а́нгелъ, бы́лъ еси́ на земли́, всеблаже́нне о́тче на́шъ Арсе́ніе, невеще́ственно имы́й житіе́, порабо́тивъ пло́ть ду́ху: я́ко херуви́мъ, храня́й дре́во жи́зни, Христа́, вну́трь себе́ и не дая́ вхо́да скве́рну или́ нечи́сту по́мыслу въ ра́й мы́сленный, я́ко серафи́мъ, горя́й вы́ну ко Христу́ любве́ пла́менемъ. И ны́нѣ на небесѣ́хъ со безпло́тными ли́ки Тріѵпоста́сному Божеству́ славосло́віе принося́, помина́й на́съ, чту́щихъ всечестну́ю па́мять твою́.

И ны́нѣ, богоро́диченъ, гла́съ то́йже:

Кто́ Тебѣ́ не ублажи́тъ, [Пресвята́я Дѣ́во? Кто́ ли не воспое́тъ Твоего́ Пречи́стаго Рождества́? Безлѣ́тно бо отъ Отца́ возсія́вый Сы́нъ Единоро́дный, То́йже отъ Тебе́, Чи́стыя, про́йде, неизрече́нно вопло́щся: естество́мъ Бо́гъ Сы́й и естество́мъ бы́въ Человѣ́къ на́съ ра́ди; не во двою́ лицу́ раздѣля́емый, но во двою́ естеству́ несли́тно познава́емый. Того́ моли́, Чи́стая Всеблаже́нная, поми́ловатися душа́мъ на́шимъ].

Та́же вхо́дъ. Проки́менъ дне́ и чте́нія три́.

Прему́дрости Соломо́новы чте́ніе. [Глава́ 3.]

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́новы чте́ніе. [Глава́ 5 и 6.]

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́новы чте́ніе. [Глава́ 4.]

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ры, гла́съ 3:

Да ра́дуется дне́сь вѣ́рныхъ мно́жество, пою́ще во псалмѣ́хъ и пѣ́снехъ всехва́льнаго Арсе́нія, и́же красото́ю добродѣ́телей, я́ко кри́нъ въ пусты́нѣ, процвѣте́, и бы́сть, я́коже плодови́та ма́слина, въ дому́ Бо́жія Ма́тере, и ди́вно просла́вися на земли́, и къ небеси́, я́ко оре́лъ, возлетѣ́, идѣ́же Христу́ Бо́гу при́сно мо́лится о душа́хъ на́шихъ.

Еже Бо́гу подо́бное и, ели́ко мо́щно, сообра́зное, души́ благолѣ́піе возжела́лъ еси́ взыска́ти, посто́мъ, бдѣ́ніемъ и труда́ми, смире́ніемъ же, моли́твою и слеза́ми у́зы страсте́й растерза́въ, Ду́ху Свято́му усво́ился еси́, Имже ду́хъ тво́й обнови́ся и дарова́ній сподо́бися. Его́ же моли́, преподо́бне о́тче на́шъ, отъ и́га страсте́й изба́вити на́съ и спасти́ ду́ши на́ша.

Въ трудѣ́ и по́двизѣ, во бдѣ́ніихъ мно́жицею, во а́лчбѣ и жа́ждѣ и въ пу́тныхъ ше́ствіихъ во Аѳо́нскую го́ру ты́ му́жественъ яви́лся еси́, богоно́се о́тче на́шъ, я́ко и ста́рость не разсла́би тя́ въ по́двигахъ твои́хъ, но апо́стольски взыва́лъ еси́: я́ко не изнемога́ю, но умерщвля́ю тѣ́ло мое́ и порабоща́ю ду́ху, да не ка́ко инѣ́хъ уча́ сло́вомъ, са́мъ неключи́мъ дѣ́лы явлю́ся.

Сла́ва, гла́съ 6:

Егда́ въ небе́сныя оби́тели позна́лъ еси́, Арсе́ніе, исхо́дъ тво́й отъ земли́, тогда́, я́ко оте́цъ чадолюби́вый, благослове́ніе дая́ ча́домъ свои́мъ, заповѣ́далъ еси́ и́мъ благоугожда́ти Го́сподеви правосла́віемъ и до́брыми дѣ́лы: вѣ́ра бо безъ дѣ́лъ мертва́ е́сть. Тѣ́мъ и о на́съ, грѣ́шныхъ, Христа́ Бо́га моли́, преподо́бне, е́же благоче́стно житіе́ сконча́ти на́мъ и съ тобо́ю всели́тися, идѣ́же Свѣ́тъ невече́рній.

И ны́нѣ, [богоро́диченъ], гла́съ то́йже:

Богоро́дице, Ты́ еси́ лоза́ [и́стинная, возрасти́вшая на́мъ Пло́дъ живота́, Тебѣ́ мо́лимся: моли́ся, Влады́чице, со святы́ми апо́столы поми́ловати ду́ши на́ша].

На стихо́внѣ стихи́ры, гла́съ 5. Подо́бенъ: Ра́дуйся.

Ра́дуйся, мона́ховъ свѣ́тлая добро́то, ра́дуйся, Арсе́ніе о́тче на́шъ! Ра́дуйся, я́ко трудо́въ твои́хъ и по́стническихъ по́двиговъ прія́лъ еси́ возме́здіе: свѣ́тлая селе́нія ра́йская, зрѣ́ніе сла́вы Божества́ Трисо́лнечнаго, со а́нгелы ликостоя́ніе, съ преподо́бными торжество́ премíрное, неизрече́нную ра́дость съ пра́ведными, сла́ву присносу́щную со всѣ́ми святы́ми. Тѣ́мже Человѣколю́бца Бо́га моли́, преподо́бне, е́же и на́мъ, грѣ́шнымъ, сподо́битися небе́снаго Ца́рствія.

Сти́хъ: Честна́ предъ Го́сподемъ [сме́рть преподо́бныхъ Его́].

Ра́дуйся, Арсе́ніе, небе́сный граждани́не, совсе́льниче а́нгеловъ; ра́дуйся, всесвѣ́тлый свѣти́льниче, сія́ніемъ чуде́съ всѣ́хъ озаря́ющій: ты́ по вода́мъ пла́вающимъ по́моще, отъ потопле́нія спасе́ніе, явле́ніемъ твои́мъ слѣпцу́ прозрѣ́ніе дарова́ся. Ра́дуйся, врачу́ безме́здный прося́щимъ тя́ вѣ́рою. Ра́дуйся, де́моновъ прогони́телю, страхова́нія тѣ́хъ до конца́ разруши́вый. О, преподо́бне о́тче на́шъ! Не преста́й моли́ти Христа́ Бо́га е́же отъ бѣ́дъ и зо́лъ изба́вити на́съ, умири́ти мíръ и спасти́ ду́ши на́ша.

Сти́хъ: Блаже́нъ му́жъ, боя́йся Го́спода, [въ за́повѣдехъ Его́ восхо́щетъ зѣло́].

Ра́дуйся, Арсе́ніе, благíй и вѣ́рный ра́бе Христо́въ и богому́дрый наста́вниче спасе́нія на́шего: ты́, о́бразъ и пра́вило житія́ спаси́тельнаго преднаписа́въ на́мъ собо́ю, всѣ́хъ на́съ отъ сна́ лѣ́ности возбужда́еши на по́двигъ добродѣ́телей. Ты́ у́тро мы́сленное, трудолю́біемъ озари́вшее собо́ры и́ноковъ. Вели́кій Но́вградъ тобо́ю сла́вится, и вся́ страна́ сія́ красу́ется, мы́ же, се́рдцемъ и усты́ пою́ще, тебе́ умиле́нно про́симъ моли́ти вы́ну Спа́са Христа́ о спасе́ніи ду́шъ на́шихъ.

Сла́ва, гла́съ 8:

Мона́ховъ ликостоя́ніе и все́ вѣ́рныхъ мно́жество, пѣсносло́вяще, ублажа́емъ тя́, Арсе́ніе о́тче на́шъ! Блаже́нъ еси́ вои́стинну, я́ко прило́гъ уны́нія въ духо́вныхъ по́двизѣхъ не разсла́би тя́, но, тре́звъ имы́й у́мъ въ моли́твѣ непреста́ннѣй, ве́сь Христу́ усво́ился еси́ и, я́ко благíй и вѣ́рный ра́бъ, вни́ти сподо́бился еси́ въ ра́дость Го́спода своего́, Его́ же моли́ о душа́хъ на́шихъ.

И ны́нѣ, [богоро́диченъ], гла́съ то́йже:

Безневѣ́стная Дѣ́во, [Яже Бо́га неизрече́нно заче́нши пло́тію, Ма́ти Бо́га Вы́шняго, Твои́хъ рабо́въ мольбы́ пріими́, Всенепоро́чная, всѣ́мъ подаю́щи очище́ніе прегрѣше́ній, ны́нѣ на́ша моле́нія пріе́млющи, моли́ спасти́ся всѣ́мъ на́мъ].

На благослове́ніи хлѣ́бовъ: Тропа́рь преподо́бнаго, два́жды. И Богоро́дице Дѣ́во.., еди́ножды.



НА УТРЕНИ,
На Бо́гъ Госпо́дь: Тропа́рь свята́го Арсе́нія, два́жды. Сла́ва, и ны́нѣ, богоро́диченъ.

По 1-й стихоло́гіи сѣда́ленъ, гла́съ 4:

Якоже звѣзду́ пресвѣ́тлую, Содѣ́тель мíра дарова́ тя́ на́мъ, Арсе́ніе блаже́нне! Въ нощи́ бо житія́ сего́, грѣхи́ мно́гими омраче́нни су́ще, добродѣ́тели твоя́ пою́ще, просвѣща́емся и чуде́съ свѣ́тлостію озаря́емся, сла́ву и благодаре́ніе прино́симъ просла́вльшему тя́ Христу́ Бо́гу, Спа́су ду́шъ на́шихъ. [Два́жды.]

Сла́ва, и ны́нѣ, богоро́диченъ, гла́съ то́йже:

Пріими́, Влады́чице, моли́твы на́ша и принеси́ я́ къ Сы́ну Твоему́ и Бо́гу на́шему, я́ко да изба́витъ ны́, грѣ́шныя, отъ де́рзости лука́выхъ де́моновъ, страстьми́ на́шими на́съ при́сно ра́тующихъ, и да огради́тъ ми́ромъ ду́ши на́ша.

По 2-й стихоло́гіи сѣда́ленъ, гла́съ 8:

Ду́хомъ горя́й ко Го́споду, вся́ кра́сная и сла́дкая мíра сего́ вмѣни́лъ еси́, Арсе́ніе, за уме́ты, да Его́ еди́наго пріобря́щеши, и ни ско́рбь, ни тѣснота́ житія́ по́стническаго возмого́ша тя любве́ Его́ разлучи́ти. Его́ же моли́, преподо́бне, отъ пристра́стій мірски́хъ сердца́ на́ша очи́стити, въ любви́ Свое́й утверди́ти и спасти́ ду́ши на́ша. [Два́жды.]

Сла́ва, и ны́нѣ, богоро́диченъ, гла́съ то́йже:

Купина́, дре́вле огне́мъ горя́щая, не сгара́ше, проявля́я Богоневѣ́стныя Дѣ́вы рождества́ та́инство, Яже, Огнь Божества́ во чре́вѣ пріи́мши, неопа́льна пребы́сть, Сію́, вѣ́рніи, я́ко Ма́терь Бо́жію, благоче́стно велича́емъ.

[Велича́ніе:

Ублажа́емъ тя́, преподо́бне о́тче Арсе́ніе, и чте́мъ святу́ю па́мять твою́, наста́вниче мона́ховъ и собесѣ́дниче а́нгеловъ.

Псало́мъ избра́нный: Терпя́ потерпѣ́хъ Го́спода, и вня́тъ ми́ и услы́ша моли́тву мою́...]

По поліеле́и сѣда́ленъ, гла́съ 1:

Идѣ́же сла́дкая вода́ во исто́чницѣхъ, та́мо вси́ жа́ждущіи стека́ются; но се́ въ Боже́ственнѣмъ хра́мѣ, многоцѣле́бная ра́ка свята́го Арсе́нія и благода́тный о́бразъ Бо́жія Ма́тере, я́ко исто́чницы отъ Бо́га на́мъ дарова́шася, къ ни́мъ же, вѣ́рніи, пріиди́те, во е́же благи́хъ дарова́ній сподо́битися. [Два́жды.]

Сла́ва, и ны́нѣ, богоро́диченъ, гла́съ то́йже:

Свѣще́ та́инственная, Влады́чице Богоро́дице, отъ святы́я Твоея́ ико́ны благода́тнымъ свѣ́томъ возсія́й на ны́, грѣ́шныя рабы́ Твоя́, отъ мра́ка страсте́й изба́ви и безстра́стія красоту́ пода́ждь душа́мъ на́шимъ.

Та́же степе́нна, 1-й антифо́нъ 4-го гла́са. Проки́менъ, гла́съ 4: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Вся́кое дыха́ніе... Ева́нгеліе отъ Матѳе́я, зача́ло 43.

По 50-мъ псалмѣ́ стихи́ра, гла́съ 6:

Свѣтоно́сная па́мять твоя́, преподо́бне о́тче на́шъ Арсе́ніе, я́ко труба́ велегла́сная, отъ всѣ́хъ стра́нъ торжества́ рачи́телей созыва́етъ и гла́съ орга́новъ у́мныхъ дви́жетъ ко хвале́нію Содѣ́теля, Иже показа́ тя́ свя́тъ орга́нъ Свята́го Ду́ха и я́ко неистощи́мое бла́гъ сокро́вище дарова́ на́мъ ра́ку твою́. Тѣ́мъ свѣ́тло дне́сь пра́зднующе, дарова́ній духо́вныхъ исполня́емся и, веселя́щеся, тя́ въ пѣ́снехъ ублажа́емъ.

Кано́нъ Богоро́дицы со ирмосо́мъ на 6 и преподо́бнаго Арсе́нія на 8.

[Кано́нъ преподо́бнаго Арсе́нія], гла́съ 8.
Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Содѣ́телю а́нгеловъ и свѣ́та Пода́телю, Іису́се, Бо́же мо́й, у́мъ и се́рдце мое́ просвѣти́, да земна́го а́нгела — свята́го Арсе́нія воспою́, ра́дуяся сла́вѣ Твое́й.

Якоже кри́нъ се́льный, красе́нъ бы́лъ еси́, Арсе́ніе, въ ю́ности добродѣ́тельми и я́ко избра́нный Бо́жій, по́лнъ сы́й любве́ и благода́ти, удали́лся еси́ отъ мíра.

Простра́ннаго пути́ бѣ́гая, пу́ть тѣ́снаго житія́, по́двиги и труды́ по́стническія возлюби́лъ еси́, богому́дре, и́миже вни́ти сподо́бился еси́ въ вѣ́чный поко́й.

Богоро́диченъ: Хва́лимъ, благослови́мъ, пое́мъ и велича́емъ Тя́, Богоро́дице, я́ко рождество́мъ Твои́мъ отъ пре́лести мíръ изба́вленъ бы́сть и подаде́ся отпуще́ніе грѣхо́въ и спасе́ніе душа́мъ на́шимъ.

Пѣ́снь 3.

Ирмо́съ: Ты́ еси́ утвержде́ніе притека́ющихъ къ Тебѣ́, Го́споди, Ты́ еси́ свѣ́тъ омраче́нныхъ, и пое́тъ Тя́ ду́хъ мо́й.

Яже на горѣ́ оби́тель бы́сть тебѣ́, Арсе́ніе, я́ко лѣ́ствица, на го́ру добродѣ́телей возводя́щая и го́рняго ра́зума и мудрова́нія хода́тайственна.

Кро́ткому и смире́нному се́рдцемъ Го́споду Іису́су подража́я, смире́нъ мудрова́ніемъ, кро́токъ и послушли́въ ты́ бы́лъ еси́, отъ Него́же и благода́ть тебѣ́, Арсе́ніе, дарова́ся.

Якоже Гедео́нъ иноплеме́нники, ты́ па́губныя стра́сти воздержа́ніемъ побѣди́лъ еси́, досточу́дне, и ничто́же успѣ́ вра́гъ діа́волъ, при́сно о́ными ра́тующій.

Богоро́диченъ: Оскверне́но се́рдце и устнѣ́ имѣ́я, припа́даю, и лобыза́ю, Пречи́стая, о́бразъ Тво́й святы́й, и со слеза́ми молю́ Тя́, Влады́чице: росо́ю благода́ти и ду́шу и тѣ́ло мое́ очи́сти.

Сѣда́ленъ, гла́съ 5:

Ма́ніемъ Боже́ственнымъ, а́ще и нехотя́щаго, внеза́пу бу́ря вѣ́треная къ сему́ о́строву на ладіи́ обрати́ тя́, свя́те Арсе́ніе, идѣ́же все́льшися, духо́въ нечи́стыхъ страхова́нія потреби́лъ еси́ и оби́тель созда́лъ еси́, въ не́й же, я́ко ма́слина, плодови́тъ бы́лъ еси́ добродѣ́тельми и душепита́тельными словесы́. И ны́нѣ во оби́телехъ небе́сныхъ Христа́ Бо́га моли́ отъ грѣхопаде́ній изба́вити ны́ и спасти́ ду́ши на́ша. [Два́жды.]

Сла́ва, и ны́нѣ, богоро́диченъ, гла́съ то́йже:

Благоутро́бія исто́чниче, Ма́ти Госпо́дня, не пре́зри ны́, во глубину́ грѣхо́вную впа́дшія, но моли́ Сы́на Твоего́ и Бо́га на́шего, е́же не погуби́ти на́съ со беззако́ньми на́шими, но поми́ловати и спасти́ ду́ши на́ша.

Пѣ́снь 4.

Ирмо́съ: Услы́шахъ, Го́споди, слу́хъ Тво́й и убоя́хся, разумѣ́хъ неизрече́нное Твое́ смотре́ніе и просла́вихъ, Сло́ве, снизхожде́ніе Твое́.

Аще и соверше́нъ бы́лъ еси́ въ дѣя́ніи и видѣ́ніи, но сокро́вище духо́вныхъ даро́въ умно́жити жела́я, я́ко рачи́тельный купе́цъ, поше́лъ еси́, Арсе́ніе, отъ сѣ́вера на восто́къ.

Го́рняго Сіо́на искíй, я́ко жа́ждущій еле́нь на исто́чники во́дныя, во Аѳо́нскую го́ру ты́ ше́ствуеши, богому́дре, и на́съ научи́, мо́лимъ тя́, го́рняя му́дрствовати, а не земна́я.

Во Аѳо́нстѣй горѣ́, я́ко богоза́рный свѣти́льникъ, возсія́лъ еси́, Арсе́ніе, добродѣ́тельми: по́двиги бо и труды́ твоя́ свѣтови́дна и сла́вна тя́ сотвори́ша.

Богоро́диченъ: Не оста́ви погружа́тися лю́тыми скорбьми́ ду́шу мою́, о Ра́досте, Ра́дость роди́вшая, Богоневѣ́сто! Но те́мныя скорбе́й о́блацы отъ се́рдца отжени́ и да́руй ми́ свѣ́тъ и весе́ліе.

Пѣ́снь 5.

Ирмо́съ: Просвѣти́ на́съ повелѣ́ніи Твои́ми, Го́споди, и мы́шцею Твое́ю высо́кою Тво́й ми́ръ пода́ждь на́мъ, Человѣколю́бче.

Богоизбра́нному сосу́ду — Па́влу, труда́ми, Арсе́ніе, ревну́я, са́мъ бы́лъ еси́, я́ко сосу́дъ зла́тъ, че́стенъ, богоизбра́нъ, небе́снымъ мѵ́ромъ испо́лненъ, благоуха́яй при́сно до́брыми дѣ́лы и словесы́.

Свя́та и пра́ведна, духо́вныхъ плодо́въ испо́лнена и небе́снымъ сокро́вищемъ ода́рствованна, необита́емому о́строву дарова́ тя́ Бо́гъ, Арсе́ніе, на прославле́ніе и́мене Своего́ свята́го.

Еже при исхо́дѣ отъ Горы́ Святы́я проро́чески рече́ а́вва Іоа́ннъ, сіе́ тобо́ю, о́тче, испо́лнися: оби́тель бо во странѣ́ сѣ́вернѣй устро́илъ еси́ и хра́мъ ди́венъ въ че́сть Хра́му одушевле́нному.

Богоро́диченъ: Взира́юще на святу́ю ико́ну Твою́, Влады́чице, зри́мъ вели́чіе и сла́ву Твою́ и благоче́стно сла́вимъ Тя́, я́ко покро́въ, заступле́ніе и спасе́ніе ду́шъ на́шихъ.

Пѣ́снь 6.

Ирмо́съ: Моли́тву пролію́ ко Го́споду и Тому́ возвѣщу́ печа́ли моя́, я́ко зо́лъ душа́ моя́ испо́лнися и живо́тъ мо́й а́ду прибли́жися, и молю́ся, я́ко Іо́на: отъ тли́, Бо́же, возведи́ мя.

Проро́ческій гла́съ во умѣ́ имы́й, — се́, что́ добро́ или́ что́ красно́, но е́же жи́ти бра́тіи вку́пѣ, — купножи́тіе, еди́но се́рдце и ду́шу иму́щее, во оби́тели твое́й уста́вилъ еси́, му́дре, въ назида́ніе и спасе́ніе ду́шъ на́шихъ.

Яко избра́нный Бо́жій, святы́й и возлю́бленный, возлю́бленъ бы́лъ еси́, Арсе́ніе, святы́мъ Евѳи́міемъ, богому́дрымъ па́стыремъ Вели́каго Нова́града, и́же, во оби́тели твое́й бы́въ, просла́ви Бо́га, святы́я Своя́ прославля́ющаго.

Образъ добродѣ́телей бы́лъ еси́ ста́ду твоему́, богопросвѣще́нный наста́вниче на́шъ Арсе́ніе, отъ вся́кія злы́я ве́щи удале́нъ: я́ко да изба́вишися отъ собла́зна, преткнове́нія и кознодѣ́йства вра́жія.

Богоро́диченъ: Хра́ме одушевле́нный, Богоро́дице Дѣ́во! Предста́тельствомъ Твои́мъ мене́, жили́ще бѣсо́въ и страсте́й, претвори́ во хра́мъ Ду́ху Пресвято́му, да воспою́, ра́дуяся, Твое́ Ма́тернее благоутро́біе.

Конда́къ, гла́съ 8:

Трисія́тельнаго Божества́ сія́ніемъ просвѣти́въ се́рдце твое́, преподо́бне, свѣтови́денъ ве́сь яви́лся еси́ добродѣ́тельми, я́ко и го́ру Аѳо́нскую свѣ́тъ трудолю́бія твоего́ озари́, идѣ́же святу́ю ико́ну Со́лнца и́стиннаго, Христа́, и Его́ Пречи́стыя Ма́тере въ да́ръ пріи́мъ, на о́стровъ Нева́ е́зера прише́дъ, оби́тель устро́илъ еси́, всеблаже́нне. Тѣ́мъ, вѣ́рою и любо́вію къ цѣле́бной ра́цѣ твое́й притека́юще, ра́достно вопіе́мъ ти́: ра́дуйся, пресвѣ́тлый свѣти́льниче, Арсе́ніе, о́тче на́шъ.

Икосъ:

Ка́ко тя́ восхвали́ти, недоумѣ́ю? Ты́ са́мъ безпло́дный у́мъ мо́й, преподо́бне о́тче, сотвори́ благопло́денъ и научи́ язы́къ до́брѣ глаго́лати твоя́ по́двиги и труды́, и́миже восто́къ и сѣ́веръ, я́ко луча́ми свѣ́тлыми, озари́лъ еси́. Сего́ ра́ди ны́нѣ ве́сь собо́ръ празднолю́бцевъ хва́литъ тя́, вопію́щи: ра́дуйся, блага́го ко́рене богоизбра́нное прозябе́ніе; ра́дуйся, плодови́тая ма́слино Вели́каго Нова́града; ра́дуйся, зерца́ло въ ю́ности благонра́вія; ра́дуйся, Христо́ва и́га рачи́телю всеизря́дный; ра́дуйся, свѣтоза́рное и́ноковъ удобре́ніе; ра́дуйся, горы́ Аѳо́нскія посѣти́телю трудолю́бный; ра́дуйся, чуде́съ сокро́вищемъ, о́бразомъ Богома́тере, одарова́нный; ра́дуйся, въ чудесѣ́хъ отъ Бо́га просла́вленный пресла́вно; ра́дуйся, страхова́ній де́монскихъ потреби́телю; ра́дуйся, обурева́емыхъ на мо́ри спаси́тельное окормле́ніе; ра́дуйся, боля́щихъ безме́здное врачева́ніе; ра́дуйся, я́ко ра́ка твоя́ то́читъ исцѣле́нія. Ра́дуйся, Конѣ́вское пресвѣ́тлое свѣти́ло, Арсе́ніе, о́тче на́шъ!

Пѣ́снь 7.

Ирмо́съ: Отъ Іуде́и доше́дше, о́троцы, въ Вавило́нѣ иногда́, вѣ́рою Тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.

Мы́сленному кумíру — грѣху́, води́мъ сы́й Ду́хомъ Святы́мъ, ты́, о́тче, не послужи́лъ еси́, и отъ огня́ страсте́й невреди́ма тя́ сохрани́ Вседѣ́тель, пою́ща: отце́въ Бо́же, благослове́нъ еси́.

Не имѣ́ша въ трудѣ́хъ поко́я ру́цѣ твои́, Арсе́ніе, ни у́мъ въ тре́звенной моли́твѣ, ниже́ о́чи твои́ воздрема́ша когда́ отъ бдѣ́нія, ни колѣ́на твоя́ изнемого́ста отъ поста́, я́ко Бо́га помо́щника себѣ́ имѣ́лъ еси́, поя́ Ему́: отце́въ Бо́же, благослове́нъ еси́.

Оби́тель твоя́, Арсе́ніе, отъ ску́дости и гла́да изба́вися, возвра́щшуся ти́ второ́е отъ Аѳо́нскія горы́. И ны́нѣ, Даю́щаго пи́щу а́лчущимъ моли́, хлѣ́бъ насу́щный дарова́ти пою́щимъ: отце́въ Бо́же, благослове́нъ еси́.

Богоро́диченъ: Врачу́ ду́шъ и тѣле́съ, Христе́ Бо́же, моли́твами Тебе́ ро́ждшія не́мощи на́ша уврачу́й, просвѣти́ и укрѣпи́ ны́ въ за́повѣдехъ Твои́хъ, пою́щія: отце́въ Бо́же, благослове́нъ еси́.

Пѣ́снь 8.

Ирмо́съ: Царя́ Небе́снаго, Его́же пою́тъ во́и а́нгельстіи, хвали́те и превозноси́те во вся́ вѣ́ки.

Царя́ сла́вы Христа́, не иска́въ сла́вы человѣ́ческія, на небесѣ́хъ зрѣ́ти лице́мъ къ Лицу́ сподо́бился еси́, Арсе́ніе, во вся́ вѣ́ки.

Царя́ ца́рствующихъ Бо́га въ небе́сномъ Ца́рствіи не преста́й моли́ти, Арсе́ніе, е́же ИМПЕРАТОРУ на́шему на супоста́ты побѣ́ду и одолѣ́ніе дарова́ти.

Царя́ Небе́снаго моли́, преподо́бне, дарова́ти ми́ръ Це́ркви, оби́ліе бла́гъ земны́хъ, отпуще́ніе грѣхо́въ и спасе́ніе душа́мъ на́шимъ.

Богоро́диченъ: Царю́ Небе́сныхъ си́лъ, Іису́се Всеси́льне, моли́твами Ма́тере Твоея́ Пречи́стыя отъ обдержа́щихъ мя́ страсте́й изба́ви, я́ко Благоутро́бенъ.

Пѣ́снь 9.

Ирмо́съ: Вои́стинну Богоро́дицу, Тя́ исповѣ́дуемъ, спасе́нніи Тобо́ю, Дѣ́во Чи́стая, съ безпло́тными ли́ки Тя́ велича́юще.

Яко избра́нный во́инъ Христо́въ, благоче́стно по́двиги соверша́я и тѣ́снаго пути́ тече́ніе скончава́я, упова́ніемъ ты́ ра́довался еси́, Арсе́ніе, о воздая́ніи на небесѣ́хъ.

Яко благíй вои́стинну, отъ блага́го сокро́вища се́рдца своего́ словеса́ бла́га при исхо́дѣ изне́слъ еси́, богому́дре, наказу́я ученики́ своя́ е́же благоугожда́ти Го́сподеви благоче́стіемъ и добродѣ́телей дѣ́ланіемъ.

О, Боже́ственнаго раче́нія! Яко въ ча́съ исхо́да отъ земли́ святы́й Арсе́ній быва́етъ прича́стникъ Боже́ственныхъ Та́инъ Христо́выхъ и а́біе ду́хъ сво́й въ ру́цѣ Его́, ра́дуяся, предае́тъ.

Богоро́диченъ: Отъ святы́я ико́ны Твоея́, Влады́чице, благода́тію озаря́еми, ра́достно вопіе́мъ Ти́: ра́дуйся, исто́чниче воды́ живо́тныя, ра́дуйся, земноро́дныхъ ра́досте, прибѣ́жище и спасе́ніе ду́шъ на́шихъ.

Свѣти́ленъ:

Якоже звѣ́зды многосвѣ́тлыя, добродѣ́тели твоя́, свѣти́льниче на́шъ Арсе́ніе, помышле́нія на́ша дне́сь озаря́ютъ и сердца́ ра́дости исполня́ютъ, я́же воспѣва́юще, тя́ при́сно ублажа́емъ. [Два́жды.]

Сла́ва, и ны́нѣ, богоро́диченъ:

Всесвѣ́тлая заре́ у́мнаго Со́лнца, возсія́й ми́ свѣ́тъ ра́зума, е́же пѣ́ти и сла́вити Твое́, Влады́чице, Ма́тернее о на́съ смотре́ніе.

На хвали́техъ стихи́ры на 4, гла́съ 4. Подо́бенъ: Да́лъ еси́ зна́меніе.

Да́лъ еси́ во о́бразъ на́мъ благоугожда́ти Тебѣ́, Го́споди, свята́го Арсе́нія, и́же кре́стъ сво́й взе́мъ, Тебѣ́ усе́рдно послѣ́дова и, пло́ть распя́въ со страстьми́ и по́хотьми, у́мре мíру и грѣху́, да Тебѣ́ еди́ному живе́тъ, Іису́се Всеси́льне, Спа́се ду́шъ на́шихъ.

Мірски́хъ обурева́ній, и ду́хомъ зло́бы воздвиза́емыхъ страсте́й, и пото́па грѣхо́внаго, въ корабли́ житія́ мона́шескаго вѣ́трилами Ду́ха Свята́го носи́мый, изба́вился еси́, Арсе́ніе, и въ ти́хое приста́нище вѣ́чныя жи́зни упра́ви тя́ Вседѣ́тель, Іису́съ Человѣколю́бецъ, Спа́съ ду́шъ на́шихъ.

Щито́мъ вѣ́ры огражде́нъ и си́лою Креста́ вооруже́нъ, избра́нный во́инъ Тво́й, Го́споди, му́жеству соиме́нный святы́й Арсе́ній, всю́ си́лу вра́жію низложи́, страхова́нія и мечты́ лука́ваго потреби́, имѣ́я Помо́щницу Тебе́ Ро́ждшую, Іису́се Человѣколю́бче, Покрови́телю и Спа́се ду́шъ на́шихъ.

Яко живоно́сный исто́чникъ бы́сть ра́ка твоя́, Арсе́ніе, исцѣле́ній струи́ при́сно точа́щая всѣ́мъ, съ вѣ́рою притека́ющимъ, со слеза́ми моля́щимся и боголѣ́пно сла́вящимъ тя́, просла́вльшаго Іису́са Человѣколю́бца, Врача́ ду́шъ и тѣле́съ на́шихъ.

Сла́ва, гла́съ 6:

Въ ра́йская селе́нія возше́лъ еси́ отъ на́съ, всеблаже́нне о́тче на́шъ Арсе́ніе, и о́комъ бре́ннымъ зрѣ́ти тя́ не мо́жемъ, вѣ́рою же созерца́емъ, я́ко съ ли́ки всѣ́хъ святы́хъ сла́дкимъ зрѣ́ніемъ Боже́ственныя сла́вы насыща́ешися и въ Тріе́хъ Ли́цѣхъ сла́вимому Бо́гу при́сно мо́лишися о душа́хъ на́шихъ.

И ны́нѣ, богоро́диченъ, гла́съ то́йже:

Образъ Тво́й, Влады́чице, свѣ́тлыми чуде́съ луча́ми вѣ́рныя озаря́етъ и свѣтоно́сный де́нь се́й ра́достнымъ твори́тъ, на́нь же мы́ взира́юще, благода́рно Тебѣ́ вопіе́мъ: ра́дуйся, Дѣ́во Ма́ти Госпо́дня; ра́дуйся, стѣно́ неруши́мая; ра́дуйся, вѣ́рнымъ блага́я помо́щнице; ра́дуйся, Боже́ственный покро́ве, заступле́ніе и спасе́ніе ду́шъ на́шихъ.

Славосло́віе вели́кое, [ектеніи́] и отпу́стъ.



НА ЛИТУРГІИ:

Блаже́нна отъ кано́на пѣ́снь 3 и 6. Проки́менъ, [гла́съ 7]: Честна́ предъ Го́сподемъ* [сме́рть преподо́бныхъ его́]. Сти́хъ: Что́ возда́мъ Го́сподеви [о всѣ́хъ, я́же воздаде́ ми́?] Апо́столъ, къ Гала́томъ, зача́ло 213. Аллилу́ія, [гла́съ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́]. Ева́нгеліе Луки́, зача́ло 24. Прича́стенъ: Въ па́мять вѣ́чную [бу́детъ пра́ведникъ, отъ слу́ха зла́ не убои́тся.]


Моли́тва преподо́бному Арсе́нію.

О, всеблаже́нне и богоно́се Арсе́ніе, о́тче на́шъ! Сы́й во сла́вѣ небе́снаго Царя́ Христа́ Бо́га, предстоя́ престо́лу Его́ со всѣ́ми Его́ святы́ми, не пре́зри на́съ, до́лу су́щихъ, грѣ́шныхъ и недосто́йныхъ, при честнѣ́й ра́цѣ твое́й со слеза́ми тебѣ́ моля́щихся, но пріими́ серде́чное стена́ніе и бре́нныхъ усте́нъ моле́ніе сіе́ на́ше. Тебѣ́ бо вси́ мо́лимся, о преподо́бне о́тче, и тебе́ умиле́нно про́симъ: бу́ди о на́съ хода́тай и моли́твенникъ теплѣ́йшій ко Всеблаго́му Бо́гу. Моли́ бла́гость Его́, е́же спасти́ на́съ отъ прегрѣше́ній на́шихъ, и́миже вѣ́сть судьба́ми. Моли́ся щедро́тамъ Его́, е́же подава́ти ще́дро оби́тели се́й и всему́ мíру потре́бная. Моли́ся Даю́щему всѣ́мъ ми́ръ, низпосла́ти ми́ръ це́рквамъ, собира́я расточе́нныя во еди́но, сохрани́ти держа́ву Благочести́вѣйшаго ИМПЕРАТОРА на́шего [и́мярекъ] въ ми́рѣ и тишинѣ́, и вся́кому вѣ́рному въ до́мѣ, и на пути́, и на мо́ри, и повсю́ду дни́ бла́ги и безмяте́жны дарова́ти; благослови́ти труды́ отце́въ и бра́тій на́шихъ, и прости́ти всѣ́хъ согрѣше́нія во́льная и нево́льная, я́ко да сподо́бимся и мы́, грѣ́шніи, вку́пѣ съ тобо́ю сла́вити Отца́ и Сы́на и Свята́го Ду́ха въ безконе́чныя вѣ́ки. Ами́нь.

Источникъ: Слу́жба, [Житіе́ и Сло́во похва́льное] преподо́бному отцу́ на́шему Арсе́нію, Конѣ́вскому чудотво́рцу. — СПб.: Въ Сѵнода́льной Тѵпогра́фіи, 1864. — С. 1-38.

/ Къ оглавленію раздѣла /


Наверхъ / Къ титульной страницѣ

0