Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 26 сентября 2017 г. Сейчасъ на порталѣ посѣтителей - 9.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́нія въ 12-й де́нь.
Слу́жба на де́нь пренесе́нія честны́хъ моще́й святы́я преподо́бныя благовѣ́рныя вели́кія княги́ни иноки́ни Анны, Ка́шинскія чудотво́рицы.

НА МАЛѢЙ ВЕЧЕРНИ,
[На Го́споди, воззва́хъ:] стихи́ры на 4, гла́съ 1. Подо́бенъ: О, ди́вное чу́до!

О, блаже́нная ма́ти,* вели́кая княги́не иноки́не Анно!* Ты́ отъ млады́хъ ногте́й твои́хъ* стра́хъ Бо́жій имѣ́ла еси́ въ се́рдцѣ твое́мъ,* духо́вныя о́чи твои́* къ го́рнему Іерусали́му устремля́ющи* и помышля́ющи всегда́ о бу́дущихъ,* я́же и получи́ла еси́, преподо́бная.* Тѣ́мже ны́нѣ моли́ся* дарова́ти на́мъ ми́ръ и ве́лію ми́лость.

О, чу́дная ма́ти,* вели́кая княги́не иноки́не Анно!* Чи́стая душа́ твоя́,* я́ко зерца́ло, очище́но добродѣ́тельми твои́ми мно́гими, явля́ется,* отобража́ющее всѣ́мъ душе́вное спасе́ніе* и ко Творцу́ на́шему и Бо́гу присвое́ніе.* Ны́нѣ у́бо моли́ся* дарова́ти душа́мъ на́шимъ ми́ръ и ве́лію ми́лость.

Сла́ва, гла́съ 5:

Возсія́вшей веснѣ́, пріиди́те, лю́діе, возвесели́мся, се́ бо приближа́ется лѣ́то Госпо́дне благопрія́тное, принося́щее плоды́ мно́гія: почти́мъ па́мять преподо́бныя ма́тере, вели́кія княги́ни иноки́ни Анны, и воспріи́мемъ по́льзу душе́вную, я́ко та́я угоди́ Христу́ Бо́гу мно́гими свои́ми труды́ и по́двиги и показа́ на́мъ пу́ть ко спасе́нію, и ны́нѣ мо́литъ Христа́ Бо́га дарова́ти на́мъ ми́ръ и ве́лію ми́лость.

И ны́нѣ, богоро́диченъ:

Блажи́мъ Тя́ Богоро́дице Дѣ́во, [и сла́вимъ Тя́ вѣ́рніи по до́лгу, гра́дъ непоколеби́мый, стѣ́ну необори́мую, тве́рдую предста́тельницу, и прибѣ́жище ду́шъ на́шихъ].

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

До́мъ и жили́ще* Пресвято́му Ду́ху* была́ еси́, блаже́нная ма́ти Анно,* тѣ́мъ и Христо́съ въ тебѣ́ живя́ше* и у́мъ тво́й и ду́шу просвѣща́ше.

Сти́хъ: Честна́ предъ Го́сподемъ* сме́рть преподо́бныхъ Его́.

До́мъ и пода́тельница ни́щимъ* и всѣ́мъ неиму́щимъ* яви́лася еси́, достохва́льная,* тѣ́мъ и пріобрѣла́ еси́* бога́тство неистощи́мое на небесѣ́хъ.

Сти́хъ: Что́ возда́мъ Го́сподеви о всѣ́хъ,* я́же воздаде́ ми?

До́мъ добродѣ́телей,* измла́да начала́ еси́ бы́ти,* преподо́бная ма́ти Анно,* тѣ́мъ и получи́ла еси́ Ца́рство небе́сное* и жи́знь вѣковѣ́чную.

Сла́ва, и ны́нѣ, гла́съ то́йже:

Ра́дуйся, Ма́ти Госпо́дня, ра́дость отъ а́нгела пріе́мшая, и мíру пода́вшая, и печа́ль Евину до́брѣ утоли́вшая.

Тропа́рь, гла́съ 3:

Дне́сь восхваля́емъ тя́, преподо́бная ма́ти, вели́кая княги́не иноки́не Анно: я́ко бо лоза́ плодови́та посредѣ́ те́рнія, процвѣла́ еси́ во гра́дѣ Ка́шинѣ твои́ми добродѣ́тельми, всѣ́хъ удиви́ла еси́ чу́днымъ твои́мъ житіе́мъ, тѣ́мже Христу́ Бо́гу угоди́ла еси́, и ны́нѣ, ра́дующися и веселя́щися, пребыва́еши съ ли́ки преподо́бныхъ же́нъ, наслажда́ющися ра́йскія красоты́ и весе́лія. Мо́лимъ у́бо тя́: моли́ о на́съ Человѣколю́бца, Христа́ Бо́га на́шего, дарова́ти на́мъ ми́ръ и ве́лію ми́лость.

Сла́ва, и ны́нѣ, богоро́диченъ:

[Тя́, хода́тайствовавшую спасе́ніе ро́да на́шего, воспѣва́емъ, Богоро́дице Дѣ́во: пло́тію бо, отъ Тебе́ воспрія́тою, Сы́нъ Тво́й и Бо́гъ на́шъ, Кресто́мъ воспріи́мъ стра́сть, изба́ви на́съ отъ тли́, я́ко Человѣколю́бецъ.]


НА ВЕЛИЦѢЙ ВЕЧЕРНИ,
Блаже́нъ му́жъ.., [1-й антифо́нъ.] На Го́споди воззва́хъ: стихи́ры на 8, гла́съ 5. Подо́бенъ: Ра́дуйся.

Ра́дуйся, преподо́бная ма́ти,* вели́кая княги́не иноки́не Анно,* благоволи́ бо Бо́гъ освяти́ти тя́ отъ ю́ности твоея́* Боже́ственнымъ Свои́мъ свѣтосія́ніемъ,* и обогати́ти тя́ Свое́ю благода́тію,* и просвѣти́ти твои́ о́чи серде́чныя,* во е́же зрѣ́ти къ бу́дущему пребыва́нію.* Того́ ра́ди, я́ко ца́рскимъ путе́мъ,* ше́ствовала еси́, блаже́нная,* Христу́ Бо́гу угожда́ющи,* Ему́же ны́нѣ моли́ся* дарова́ти на́мъ ми́ръ и ве́лію ми́лость. [Два́жды.]

Ра́дуйся, блаже́нная ма́ти,* я́ко, подо́бящися Аннѣ цѣлому́дреннѣй,* де́нь и но́щь моли́лася еси́ Го́сподеви,* пребыла́ же еси́ въ постѣ́ и смире́ніи,* вы́ну твою́ ду́шу снабдѣва́ющи,* тѣ́мже угоди́ла еси́ Небе́сному Царю́ и Влады́цѣ всѣ́хъ,* Ему́же ны́нѣ моли́ся* дарова́ти на́мъ ми́ръ и ве́лію ми́лость. [Два́жды.]

Ра́дуйся, ни́щимъ пита́тельнице неоску́дная,* си́рымъ и вдови́цамъ крѣ́пкая помо́щнице,* всѣ́мъ же скорбя́щимъ утѣше́ніе;* ми́лостиву ду́шу твою́ иму́щи,* съ любо́вію и ти́хостію* ми́лостыню подава́ла еси́,* надѣ́ющися сугу́бу ми́лость себѣ́ прія́ти въ бу́дущемъ вѣ́цѣ,* по рече́нному отъ Христа́ Бо́га на́шего,* я́ко ми́лостивіи ми́лостивъ и су́дъ пріи́мутъ.* Тѣ́мже угоди́ла еси́, преподо́бная,* Творцу́ твоему́ и Го́споду* и прія́ла еси́ отъ Него́ Ца́рство небе́сное* и вѣне́цъ нетлѣ́нный,* Того́ моли́ спасти́ся душа́мъ на́шимъ. [Два́жды.]

Ра́дуйся, достохва́льная ма́ти,* вели́кая княги́не иноки́не Анно,* я́ко за мно́гія твоя́ добродѣ́тели* сподо́билася еси́ прія́ти отъ Бо́га да́ръ чудотворе́ній:* мно́ги бо боля́щія разли́чными неду́ги исцѣля́еши,* и, я́ко нѣ́кіимъ драги́мъ бога́тствомъ, обогаща́еши,* и всѣ́хъ чудесы́ твои́ми удивля́еши.* Тѣ́мъ тя́ ны́нѣ мо́лимъ:* моли́ Христа́ Бо́га* дарова́ти душа́мъ на́шимъ ми́ръ и ве́лію ми́лость.

Ра́дуйся, чи́стая се́рдцемъ ма́ти,* я́ко тезоимени́та бы́вши Аннѣ цѣлому́дреннѣй,* вы́ну гото́вилася еси́ къ вѣ́чному спасе́нію,* по Госпо́дню изволе́нію,* къ Нему́ же и отшла́ еси́* въ вѣ́чный поко́й и весе́ліе* и пребыва́еши въ неизрече́нныхъ свѣ́тлостехъ,* со всѣ́ми святы́ми, Бо́гу угоди́вшими,* ра́дующися и веселя́щися,* наслажда́ющися Боже́ственнаго свѣтосія́нія.* Моли́ у́бо Христа́ Бо́га* дарова́ти на́мъ ми́ръ и ве́лію ми́лость.

Сла́ва, гла́съ 8:

Пріиди́те, вси́ вѣ́рніи россíйстіи наро́ди, почти́мъ, и похва́лимъ, и согла́сно воспои́мъ россíйскую на́шу похвалу́, я́ко пресвѣ́тлую звѣзду́, осіява́ющую гра́дъ сво́й Ка́шинъ чудесы́ свои́ми, ни́щимъ пита́тельницу, си́рымъ и вдова́мъ засту́пницу, скорбя́щимъ утѣ́шительницу, сію́ блаже́нную въ жена́хъ, преподо́бную ма́терь княги́ню Анну: сія́ бо пре́йде ко Христу́ Бо́гу въ вѣ́чныя оби́тели и ны́нѣ пребыва́етъ въ го́рнихъ селе́ніихъ, съ чи́нми а́нгельскими ра́дующися и веселя́щися. Тѣ́мъ возопіи́мъ къ не́й, зову́ще: ра́дуйся, россíйская похвало́, всѣ́мъ жена́мъ кра́сное удобре́ніе, гра́ду Ка́шину просвѣще́ніе; пріе́мши отъ Христа́ Бо́га Ца́рство небе́сное и вѣне́цъ нетлѣ́нный, Того́ моли́ спасти́ся душа́мъ на́шимъ.

И ны́нѣ, богоро́диченъ:

Ца́рь Небе́сный [за человѣколю́біе на земли́ яви́ся и съ человѣ́ки поживе́, от Дѣ́вы бо Чи́стыя пло́ть пріе́мый и изъ Нея́ проше́дый съ воспрія́тіемъ, еди́нъ е́сть Сы́нъ, сугу́бъ естество́мъ, но не ѵпоста́сію. Тѣ́мже, соверше́нна Того́ Бо́га и соверше́нна Человѣ́ка вои́стинну проповѣ́дающе, исповѣ́дуемъ Христа́ Бо́га на́шего: Его́же моли́, Ма́ти Безневѣ́стная, поми́ловатися душа́мъ на́шимъ].

Вхо́дъ. Проки́менъ дне́ и чте́нія три́.

Прему́дрости Соломо́новы чте́ніе. [Глава́ 3.]

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́новы чте́ніе. [Глава́ 5 и 6.]

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́новы чте́ніе. [Глава́ 4.]

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ра хра́ма, и преподо́бнѣй стихи́ры, гла́съ 2. Подо́бенъ: Кíими похва́льными вѣнцы́.

Кíими похва́льными пѣ́сньми* ублажи́мъ преподо́бную чудотво́рицу,* вели́кую княги́ню иноки́ню Анну,* вѣ́рнымъ лю́демъ засту́пницу те́плую?* Вѣ́рою и любо́вію возопіи́мъ е́й, глаго́люще:* ра́дуйся, земли́ на́шей кра́сное утвержде́ніе,* всему́ же христоимени́тому жи́тельству удивле́ніе,* тя́ бо вѣнце́мъ нетлѣ́нія вѣнча́етъ Христо́съ Бо́гъ на́шъ,* имѣ́яй ве́лію и бога́тую ми́лость.

Кíими похва́льными пѣ́сньми* возвели́чимъ преподо́бную ма́терь,* вели́кую княги́ню Анну,* те́плую моли́твенницу и хода́таицу* ко Влады́цѣ Христу́ и Бо́гу на́шему?* Во умиле́ніи серде́цъ на́шихъ е́й помо́лимся:* моли́ Благовѣ́рному Импера́тору на́шему* побѣ́ду на враги́ дарова́ти,* прося́щи на́мъ ми́ра и ве́лія ми́лости.

Кíими пѣ́сненными добро́тами* восхва́лимъ преподо́бную ма́терь Анну?* Яко бо звѣзда́, осіява́етъ зе́млю Россíйскую* и гра́дъ сво́й Ка́шинъ* свои́мъ къ Бо́гу предстоя́ніемъ,* Того́ моля́щи за лю́ди правосла́вныя,* во е́же спасти́ся всѣ́мъ,* па́мять ея́ вѣ́рою и любо́вію почита́ющимъ.

Сла́ва, гла́съ 5:

Стецы́теся, вси́ правовѣ́рніи лю́діе, соше́дшеся, соста́вимъ пра́зднество, въ прославле́ніе вели́кія княги́ни иноки́ни Анны и возопіи́мъ е́й, глаго́люще: ра́дуйся, я́ко а́нгелы и человѣ́ки удиви́ла еси́, блаже́нная, чи́стымъ твои́мъ и непоро́чнымъ житіе́мъ и прешла́ еси́ ко Христу́ въ вѣ́чный поко́й и небу́рное приста́нище. Дне́сь лю́діе ра́дуются и веселя́тся о обрѣ́теніи честны́хъ моще́й твои́хъ, я́же подаю́тъ исцѣле́ніе приходя́щимъ къ ни́мъ съ вѣ́рою, ты́ же, пребыва́ющи у Христа́ Бо́га во Ца́рствіи небе́снѣмъ, моли́ спасти́ся душа́мъ на́шимъ.

И ны́нѣ, богоро́диченъ:

Хра́мъ и Две́рь еси́, [Пала́та и Престо́лъ Царе́въ, Дѣ́во всечестна́я, Еюже Изба́витель мо́й, Христо́съ Госпо́дь, во тмѣ́ спя́щимъ яви́ся, Со́лнце сы́й пра́вды, просвѣти́ти хотя́, я́же созда́ по о́бразу Своему́ руко́ю Свое́ю. Тѣ́мже, Всепѣ́тая, я́ко Ма́терне дерзнове́ніе къ Нему́ стяжа́вшая, непреста́нно моли́, спасти́ся душа́мъ на́шимъ].

На стихо́внѣ стихи́ры, гла́съ 8. Подо́бенъ: О, пресла́внаго чудесе́!

О, пресла́внаго чудесе́,* я́ко въ не́мощнѣмъ естествѣ́* ве́лія крѣ́пость яви́ся,* и бѣсо́вская пре́лесть побѣди́ся,* и вся́ ко́зни лука́ваго разруши́шася,* и навѣ́ты упраздни́шася.* О, блаже́нная въ жена́хъ,* преподо́бная вели́кая княги́не иноки́не Анно,* моли́ о на́съ Человѣколю́бца,* Христа́ Бо́га на́шего.

Сти́хъ: Честна́ предъ Го́сподемъ* сме́рть преподо́бныхъ Его́.

О, вели́кихъ Боже́ственныхъ дарова́ній,* на тебѣ́, ма́ти преподо́бная,* вели́кая княги́не Анно, бы́вшихъ:* я́ко отъ млады́хъ ногте́й твои́хъ* всели́ся въ тя́ Христо́съ Бо́гъ на́шъ,* тѣ́мъ мно́гія добродѣ́тели сотвори́ла еси́* и житіе́мъ твои́мъ всѣ́хъ удиви́ла еси́.* Моли́ у́бо спасти́ся душа́мъ на́шимъ.

Сти́хъ: Что́ возда́мъ Го́сподеви о всѣ́хъ,* я́же воздаде́ ми?

О, досточу́дная ма́ти Анно,* похвала́ еси́ гра́ду Ка́шину,* всѣ́мъ же иноки́нямъ кра́сное удобре́ніе:* я́ко бо добропло́дная лоза́,* посредѣ́ и́хъ процвѣла́ еси́ до́брыми твои́ми дѣ́лы* и прешла́ еси́ къ вѣ́чному селе́нію.* Моли́ у́бо о на́съ Христа́ Бо́га* спасти́ся душа́мъ на́шимъ.

Сла́ва, гла́съ 6:

Пріиди́те, вси́ и́ноцы и иноки́ни, мірстíи же му́жіе и жены́ благочести́выя, бога́тіи и убо́зіи, хотя́щіи спасти́ся: поревну́имъ блаже́ннѣй и преподо́бнѣй ма́тери, вели́цѣй княги́нѣ Аннѣ, я́же посто́мъ, и бдѣ́ніемъ, и зѣ́льнымъ воздержа́ніемъ тѣ́ло свое́ до конца́ изнури́, и, я́ко ве́лія свѣти́льница, возсія́ до́брыми свои́ми дѣ́лы, и, прише́дши ко Христу́ въ вѣ́чныя селе́нія, ны́нѣ пребыва́етъ въ невече́рнемъ Свѣ́тѣ со а́нгельскими чи́нми, ра́дующися и веселя́щися, и мо́литъ о царѣ́ и о всѣ́хъ лю́дехъ, во е́же спасти́ся душа́мъ на́шимъ.

И ны́нѣ, богоро́диченъ:

Творе́цъ и Изба́витель мо́й, [Пречи́стая, Христо́съ Госпо́дь, изъ Твои́хъ ложе́снъ проше́дъ, въ мя́ оболкíйся, пе́рвыя кля́твы Ада́ма свободи́. Тѣ́мже Ти́, Всечи́стая, я́ко Бо́жіи Ма́тери же и Дѣ́вѣ, вои́стинну вопіе́мъ немо́лчно: ра́дуйся а́нгельски, ра́дуйся, Влады́чице, предста́тельство, и покро́ве, и спасе́ніе ду́шъ на́шихъ.]

[На благослове́ніи хлѣ́бовъ: Тропа́рь святы́я, два́жды [пи́санъ на ма́лѣй вече́рни] и Богоро́дице Дѣ́во.., еди́ножды.]



НА УТРЕНИ,
[На Бо́гъ Госпо́дь: Тропа́рь святы́я, два́жды. Сла́ва, и ны́нѣ, богоро́диченъ.]

По 1-мъ стихосло́віи сѣда́ленъ, гла́съ 1:

Дне́сь призыва́етъ на́съ обрѣ́теніе честны́хъ моще́й твои́хъ, преподо́бная ма́ти Анно, свѣ́тло пра́здновати па́мять твою́, дне́сь ца́рь со іера́рхи ра́дуется, и вси́ лю́діе веселя́тся, пріи́мше тя́ засту́пницу предъ Го́сподемъ. Ты́ же, о блаже́нная, моли́ся о на́съ, вѣ́рою и любо́вію тя́ почита́ющихъ. [Два́жды.]

Сла́ва, и ны́нѣ, богоро́диченъ:

Свѣ́тъ, отъ Свѣ́та происходя́й, во Твою́ Дѣви́чу утро́бу вни́де и пло́тію обложи́ся недомы́сленно и несказа́нно, рождество́мъ же Его́ вся́ тва́рь обнови́ся и и́дольская ле́сть разори́ся. Тѣ́мъ мо́лимъ Тя́, Пречи́стая: моли́, да спасе́тъ ду́ши на́ша.

По 2-мъ стихосло́віи сѣда́ленъ, гла́съ 4. Подо́бенъ: Ско́ро предвари́.

Преблагíй Бо́гъ, прему́дростію Свое́ю вся́ содѣ́ловаяй и прославля́яй святы́я Своя́, просла́ви тя́, преподо́бная ма́ти, на земли́ и на небеси́. Иму́щи у́бо къ Нему́ дерзнове́ніе ве́ліе, моли́ за Импера́тора и за вся́ лю́ди, въ правосла́віи живу́щія, я́ко да пода́стъ и́мъ ми́лость Свою́ въ де́нь су́дный. [Два́жды.]

Сла́ва, и ны́нѣ, богоро́диченъ:

Отъ всѣ́хъ родо́въ предъизбра́нная и отъ всѣ́хъ проро́ковъ пронарече́нная, отъ всѣ́хъ же человѣ́къ препросла́вленная и отъ а́нгелъ удивля́емая, Ма́ти Бо́га Вы́шняго, удиви́ на на́съ, недосто́йныхъ рабѣ́хъ Твои́хъ, ми́лость Твою́ и моли́ за ны́ Сы́на Твоего́ и Бо́га на́шего, я́ко да пода́стъ на́мъ ми́лость Свою́ въ де́нь су́дный.

На поліеле́и велича́ніе:

Ублажа́емъ тя́, преподо́бная ма́ти, вели́кая княги́не Анно, и чте́мъ святу́ю па́мять твою́, наста́внице иноки́нямъ и собесѣ́днице а́нгеломъ.

Псало́мъ избра́нный: Терпя́, потерпѣ́хъ Го́спода...

По поліеле́и сѣда́ленъ, гла́съ 8. Подо́бенъ: Прему́дрости.

Отъ ю́ности твоея́ предъизбра́ тя Госпо́дь въ селе́нія Своя́, преподо́бная ма́ти Анно, и отъ Вседержи́тельныя десни́цы Его́ положи́ся вѣне́цъ нетлѣ́ненъ на главѣ́ твое́й, и, озаре́на бы́вши отъ Него́ Боже́ственнымъ свѣтосія́ніемъ, ны́нѣ мо́лишися за твое́ оте́чество, за всю́ же зе́млю Россíйскую, и за вся́ христіа́ны правосла́вныя, святу́ю па́мять твою́ вѣ́рно почита́ющія и Христу́ воспѣва́ющія: сла́ва Тебѣ́, Го́споди, творя́щему ди́вная Твоя́ чудеса́. [Два́жды.]

Сла́ва, и ны́нѣ, богоро́диченъ:

Со́лнце разу́мное возсія́ отъ пречи́стыя Твоея́ утро́бы, отъ Него́ же вся́ тва́рь ви́димая и неви́димая просвѣти́ся и те́рніе грѣхо́вное искорени́ся, тѣ́мъ и мы́, убо́зіи и недосто́йніи раби́ Твои́, мо́лимъ Тя́: да просвѣти́тъ Сы́нъ Тво́й мра́къ ду́шъ на́шихъ, да избу́демъ ти́ны грѣхо́вныя и да обря́щемъ ми́лость въ де́нь стра́шнаго испыта́нія Твои́ми ма́терними къ Нему́ моли́твами.

[Та́же степе́нна, 1 антифо́нъ, 4-го гла́са.] Проки́менъ гла́съ 4: Ди́венъ Бо́гъ во святы́хъ Свои́хъ,* Бо́гъ Изра́илевъ. Сти́хъ: Въ це́рквахъ благослови́те Бо́га, Го́спода отъ исто́чникъ Изра́илевыхъ. Вся́кое дыха́ніе... Ева́нгеліе отъ Матѳе́я, зача́ло 104.

По 50-мъ псалмѣ́ стихи́ра, гла́съ 6:

Тя́ хода́таицу и моли́твенницу благопрія́тну и́мамы къ Бо́гу, преподо́бная ма́ти, вели́кая княги́не Анно, ты́ бо мо́лиши за Благовѣ́рнаго Импера́тора на́шего и за вся́ правосла́вныя лю́ди, я́ко да изба́вимся отъ бѣ́дъ, и скорбе́й, и отъ вся́каго навѣ́та вра́жія. Тѣ́мъ прославля́емъ твою́ святу́ю и честну́ю па́мять, и восхваля́емъ тя́, блаже́нную въ жена́хъ, зову́ще: не преста́й моля́щися о душа́хъ на́шихъ.

Кано́нъ Пресвятѣ́й Богоро́дицѣ со ирмосо́мъ на 6 и преподо́бнѣй кано́нъ на 8, гла́съ 3.

Пѣ́снь 1.

Ирмо́съ: Во́ды дре́вле, ма́ніемъ Боже́ственнымъ, во еди́но со́нмище совокупи́вый, и раздѣли́вый мо́ре Изра́ильтескимъ лю́демъ, Се́й Бо́гъ на́шъ, препросла́вленъ е́сть, Тому́ Еди́ному пои́мъ, я́ко просла́вися.

Да́ждь ми́, Го́споди, разумѣ́ніе, да досто́йно воспою́ и просла́влю благоуго́ждшую Ти́ преподо́бную ма́терь, пре́жде бы́вшую вели́кую княги́ню Анну, и возопію́ Тебѣ́, Христу́ моему́, я́ко препросла́вленъ еси́.

О тебѣ́, блаже́нная ма́ти Анно, хощу́ ны́нѣ язы́къ подви́гнути и сло́во простре́ти: споспѣ́шествуй ми́, недосто́йному, моли́твами твои́ми, да досто́йно восхвалю́ тя́ и воспою́ Го́сподеви моему́, я́ко просла́вися.

Со млады́хъ ногте́й твои́хъ стра́хъ Бо́жій имѣ́ла еси́ въ се́рдцѣ твое́мъ, блаже́нная, его́же до конца́ содержа́ла еси́, укрѣпля́ема Боже́ственною благода́тію, тѣ́мъ и ду́шу твою́ спасла́ еси́, вы́ну пою́щи Христу́, я́ко просла́вися.

Богоро́диченъ: Тобо́ю, Пречи́стая Влады́чице, отъ всѣ́хъ родо́въ предъизбра́нная Дѣ́во, ве́сь мíръ обнови́ся, и ве́сь ро́дъ человѣ́ческій отъ ле́сти діа́вольскія свободи́ся, и вопіе́тъ ко Христу́, я́ко просла́вися.

Пѣ́снь 3.

Ирмо́съ: Непло́дная душе́ и безча́дная, стяжи́ пло́дъ благосла́вный, веселя́щися, возопíй: утверди́хся Тобо́ю, Бо́же, нѣ́сть свя́тъ, нѣ́сть пра́веденъ, па́че Тебе́, Го́споди.

Око душе́вное чи́сто и здра́во имѣ́ла еси́ отъ ю́ности твоея́, блаже́нная, и́мже всегда́ зрѣ́ла еси́ къ го́рнему селе́нію, его́же и дости́гла еси́, и ны́нѣ Христу́ воспѣва́еши: нѣ́сть свя́тъ и нѣ́сть пра́веденъ, па́че Тебе́, Го́споди.

Изъ благочести́ваго ко́рене произрасла́ еси́, блаже́нная, и, во вся́ дни́ житія́ твоего́ съ супру́гомъ твои́мъ чи́сто и непоро́чно пребыва́ющи, вопія́ла еси́ ко Христу́: нѣ́сть свя́тъ и нѣ́сть пра́веденъ, па́че Тебе́, Го́споди.

Ничто́же предъ Бо́гомъ вя́щше е́сть добро́ты душе́вныя. Ты́ же, преподо́бная ма́ти, соблюла́ еси́ ю́ непреткнове́нно, вопію́щи ко Христу́: нѣ́сть свя́тъ и нѣ́сть пра́веденъ, па́че Тебе́, Го́споди.

Богоро́диченъ: Отрокови́це Чи́стая, Ма́ти Го́спода на́шего, помози́ ми, недосто́йному рабу́ Твоему́, воспѣ́ти уго́дницу Сы́на Твоего́ и Бо́га моего́, преподо́бную ма́терь Анну, и рещи́ ко Христу́: нѣ́сть свя́тъ и нѣ́сть пра́веденъ, па́че Тебе́, Го́споди.

Сѣда́ленъ, гла́съ 3:

Воспита́на была́ еси́, блаже́нная, отъ ро́ждшихъ тя́ въ за́повѣдехъ Госпо́днихъ, я́ко лоза́ въ красноцвѣту́щихъ виногра́дѣхъ, тѣ́мъ тя́ ублажа́емъ и святу́ю па́мять твою́ вѣ́рно почита́емъ. Моли́ Христа́ Бо́га, да спасе́тъ ду́ши на́ша. [Два́жды.]

Сла́ва, и ны́нѣ, богоро́диченъ:

Свѣ́та Превѣ́чнаго, отъ Отца́ пре́жде вѣ́къ рожде́нное Сло́во Бо́жіе, родила́ еси́ на́мъ, Пресвята́я Влады́чице, Христа́ Бо́га на́шего, Имже вселе́нная отъ тли́ сме́ртныя свободи́ся, тѣ́мъ Тя́ непреста́нно съ Ни́мъ пое́мъ и велича́емъ.

Пѣ́снь 4.

Ирмо́съ: Покры́ла е́сть небеса́ добродѣ́тель Твоя́, Христе́, изъ Киво́та бо проше́дъ святы́ни, Твоея́ Нетлѣ́нныя Ма́тере, въ хра́мѣ Сла́вы Твоея́ яви́лся еси́, я́ко Младе́нецъ руконоси́мь, и испо́лнишася вся́ Твоего́ хвале́нія.

Преукраше́на была́ еси́, преподо́бная ма́ти, добродѣ́тельми твои́ми, я́ко цвѣ́ты благоуха́нными и я́ко ка́меніемъ драгоцѣ́ннымъ. Тѣ́мъ и угоди́ла еси́ нетлѣ́нному Царю́ и Влады́цѣ всѣ́хъ, Ему́же и воспѣ́ла еси́: Го́споди, испо́лнишася вся́ Твоего́ хвале́нія.

О, тве́рдое основа́ніе вѣ́ры, о, любы́ къ Бо́гу крѣ́пкая! Въ же́нстѣмъ бо естествѣ́ му́жески побѣди́ла еси́ неви́димаго врага́ супоста́та и та́ко угоди́ла еси́ Христу́, вопію́щи: Го́споди, испо́лнишася вся́ Твоего́ хвале́нія.

Христо́въ хра́мъ была́ еси́, преподо́бная ма́ти, твое́ю чистото́ю и цѣлому́дріемъ и про́чими добродѣ́тельми, тѣ́мже вмѣсти́ла еси́ въ себѣ́ Свята́го Ду́ха, къ Не́муже и возопи́ла еси́: Го́споди, испо́лнишася вся́ Твоего́ хвале́нія.

Богоро́диченъ: Вои́стинну всѣ́хъ тва́рей вы́шши яви́лася еси́, Влады́чице, и кто́ дово́ленъ по достоя́нію изрещи́ вели́чіе Твое́? Простра́ннѣе бо небе́съ яви́ся чре́во Твое́, въ не́мже носи́ла еси́ всѣ́ми невмѣсти́маго Бо́га, къ Нему́же и мы́ вопіе́мъ: Го́споди, испо́лнишася вся́ Твоего́ хвале́нія.

Пѣ́снь 5.

Ирмо́съ: Яко ви́дѣ Иса́ія обра́зно на престо́лѣ превознесе́на Бо́га, отъ а́нгелъ сла́вы дориноси́ма, о, окая́нный, — вопія́ше, — а́зъ! прови́дѣхъ бо воплоща́ема Бо́га, Свѣ́та Невече́рня, и ми́ромъ Влады́чествующа.

Аще и во благоде́нствіи пребыва́ла еси́, блаже́нная ма́ти, и вся́ко изоби́ліе близъ себе́ имѣ́ла еси́, ника́коже вдала́ся еси́ на поко́й и весе́ліе пи́щное, но, зѣ́льнымъ трудо́мъ и воздержа́ніемъ тѣ́ло твое́ удруча́ющи, воспѣва́ла еси́ Жениха́ твоего́, Христа́, Свѣ́та невече́рня и ми́ромъ влады́чествующа.

Любо́вію Христо́вою уязви́вшися, блаже́нная ма́ти, вели́кая княги́не иноки́не Анно, я́ко добропло́дная лоза́ въ виногра́дѣ, процвѣла́ еси́ во гра́дѣ Ка́шинѣ благи́ми твои́ми дѣя́ніи и побѣди́ла еси́ бѣсо́вскія полки́, воспѣва́ющи Христа́, Свѣ́та невече́рня и ми́ромъ влады́чествующа.

Истиннымъ свѣ́томъ Христо́вымъ осія́на была́ еси́, ма́ти свята́я, вели́кая княги́не иноки́не Анно, насыща́ющися ве́лія благода́ти и воспѣва́ющи Его́, Свѣ́та невече́рня и ми́ромъ влады́чествующа.

Богоро́диченъ: Ты́ у́бо, Чи́стая Ма́ти Госпо́дня, чистото́ю и дѣ́вствомъ всѣ́хъ превозшла́ еси́, тѣ́мже избра́на была́ еси́ въ Бо́жіе вмѣсти́лище и родила́ еси́ на́мъ Христа́ Бо́га на́шего, Свѣ́та невече́рня и ми́ромъ влады́чествующа.

Пѣ́снь 6.

Ирмо́съ: Бе́здна послѣ́дняя грѣхо́въ обы́де мя́, и исчеза́етъ ду́хъ мо́й; но простры́й, Влады́ко, высо́кую Твою́ мы́шцу, я́ко Петра́ мя́, Упра́вителю, спаси́.

Изъ благочести́ваго ко́рене произрасла́ еси́, преподо́бная ма́ти, вели́кая княги́не иноки́не Анно, благоче́стіемъ же и вѣ́рою, а́ки цвѣ́тъ, процвѣла́ еси́ во твое́мъ оте́чествѣ, во гра́дѣ Ка́шинѣ, и прешла́ еси́ къ го́рнему жи́тельству, вопію́щи ко Христу́: я́ко Петра́, мя́, Упра́вителю, спаси́.

Вои́стину досто́йна еси́ похвалы́ ве́лія, преподо́бная ма́ти, вели́кая княги́не Анно, я́ко въ же́нстѣмъ естествѣ́ му́жескую крѣ́пость имѣ́ла еси́, и побѣди́ла еси́ супоста́та діа́вола, и воспѣва́ла еси́ ко Влады́цѣ Христу́: я́ко Петра́, мя́, Упра́вителю, спаси́.

Ей, вои́стину свѣ́телъ и тве́рдъ у́мъ имѣ́ла еси́, преподо́бная, вся́ бо кра́сная мíра сего́, я́ко уме́ты, вмѣни́ла еси́, блаже́нная, и ничто́же возмо́же поколеба́ти непоро́чную твою́ ду́шу, внегда́ воспѣва́ти ти́ Христу́: я́ко Петра́, мя́, Упра́вителю, спаси́.

Богоро́диченъ: Ле́стнымъ у́бо зміи́нымъ преступле́ніемъ низпадо́хомъ, но съ Сы́номъ Твои́мъ, Іису́сомъ Христо́мъ, Бо́гомъ на́шимъ, совоста́хомъ, Ма́ти Госпо́дня, Его́же родила́ еси́ на́мъ, Свѣ́тъ, и Живо́тъ, и Воскресе́ніе.

Конда́къ, гла́съ 4. Подо́бенъ: Возне́слся еси́.

Яко пресвѣ́тлая звѣзда́, яви́лася еси́ въ Россíйстѣй земли́, во гра́дѣ Ка́шинѣ, преподо́бная ма́ти Анно, во всѣ́хъ благочести́выхъ и вѣ́рныхъ жена́хъ, а́ки кри́нъ, процвѣла́ еси́ чи́стымъ и непоро́чнымъ твои́мъ житіе́мъ, во иноки́няхъ же соверше́нными твои́ми труды́ и по́двиги, и возшла́ еси́ къ вы́шнему гра́ду, ра́дующися и веселя́щися, я́ко до́брѣ соверши́вши твое́ тече́ніе, и ны́нѣ честны́я твоя́ мо́щи, а́ки би́серіе драго́е, яви́шася, на исцѣле́ніе всѣ́мъ, приходя́щимъ съ вѣ́рою. Тѣ́мъ и вопіе́мъ ти́: ра́дуйся, всекра́сная душе́ю, и моли́ Христа́ Бо́га о спасе́ніи ду́шъ на́шихъ.

Икосъ:

Пріиди́те, вси́ благовѣ́рніи лю́діе, воспои́мъ и просла́вимъ преподо́бную вели́кую княги́ню иноки́ню Анну, и та́ко къ не́й возопіи́мъ: ра́дуйся, ма́ти свята́я, великоимени́тая княги́не иноки́не Анно, я́ко отъ ю́ности твоея́ возлюби́ла еси́ Христа́ и по за́повѣдемъ Его́ ше́ствовала еси́; ра́дуйся, я́ко зѣ́льнымъ твои́мъ воздержа́ніемъ тѣ́ло твое́ удручи́ла еси́; ра́дуйся, я́ко сподо́билася еси́ отъ Бо́га да́ра чудотворе́ній; ра́дуйся, я́ко озари́ Бо́гъ се́рдце твое́, во е́же восхотѣ́ти облещи́ся во и́ноческое одѣя́ніе и послѣ́довати Христу́; ра́дуйся, ни́щимъ пита́тельнице и си́рымъ засту́пнице; ра́дуйся, всѣ́мъ россíйскимъ жена́мъ похвало́ и утвержде́ніе; ра́дуйся, всему́ Россíйскому ца́рству тве́рдое удобре́ніе; ра́дуйся, я́ко вмѣ́сто земна́го ца́рства небе́сное обрѣла́ еси́; ра́дуйся, я́ко по сме́рти твое́й тѣ́ло твое́ въ нѣ́дрѣхъ земли́ не подве́ржеся тлѣ́нію; ра́дуйся, я́ко предстои́ши съ ли́ки святы́хъ и преподо́бныхъ же́нъ невече́рнему Свѣ́ту и мо́лишися о спасе́ніи ду́шъ на́шихъ.

Пѣ́снь 7.

Ирмо́съ: Якоже дре́вле благочести́выя три́ о́троки ороси́лъ еси́ въ пла́мени халде́йстѣмъ, свѣ́тлымъ Божества́ огне́мъ и на́съ озари́, благослове́нъ еси́, взыва́ющія, Бо́же оте́цъ на́шихъ.

Истинно ве́ліе чу́до яви́ся во гра́дѣ Ка́шинѣ, я́ко честны́я твоя́ мо́щи мно́га лѣ́та земле́ю покрове́ны бы́ша, ны́нѣ же Бо́жіею благода́тію яви́шася верху́ земли́ на исцѣле́ніе всѣ́мъ, приходя́щимъ съ вѣ́рою и вопію́щимъ: благослове́нъ Бо́гъ оте́цъ на́шихъ.

Ка́ко возмо́жемъ не диви́тися тебѣ́, блаже́нная ма́ти? Пребыла́ бо еси́, а́ки свѣща́ свѣтя́щи, посредѣ́ россíйскихъ же́нъ чу́днымъ твои́мъ житіе́мъ, вы́ну воспѣва́ющи: благослове́нъ Бо́гъ оте́цъ на́шихъ.

Утвержде́на была́ еси́, ма́ти преподо́бная, а́ки адама́нтъ крѣ́пкій, добродѣ́тельми твои́ми и, я́ко невѣ́ста, укра́шена была́ еси́ мони́сты златы́ми — дѣ́лы твои́ми благи́ми, воспѣва́ющи Христу́: благослове́нъ еси́, Го́споди Бо́же оте́цъ на́шихъ.

Богоро́диченъ: Юницу Тя́ нескве́рную, Дѣ́ву и Богоро́дицу, издале́ча проро́цы имены́ разли́чными нареко́ша: и́нъ бо Тя́ го́ру мы́сленну нарече́, другíй же — Роди́тельницу Бо́жію, о́въ же — руно́, о́въ же — свяще́нную две́рь. Тѣ́мже и мы́ вси́ досто́йно Тя́ пое́мъ и славосло́вимъ во вѣ́ки.

Пѣ́снь 8.

Ирмо́съ: Служи́ти Живо́му Бо́гу въ Вавило́нѣ о́троцы претерпѣ́вше, о мусикíйскихъ орга́нѣхъ неради́ша и, посредѣ́ пла́мене стоя́ще, боголѣ́пную пѣ́снь воспѣва́ху, глаго́люще: благослови́те, вся́ дѣла́ Госпо́дня, Го́спода.

Ка́ко изглаго́лю вели́чіе Бо́жіе на тебѣ́, преподо́бная ма́ти Анно, я́вльшееся? Яко по толи́цѣхъ лѣ́тѣхъ обрѣто́шася мо́щи твоя́ нетлѣ́нны, на удивле́ніе всѣ́мъ человѣ́комъ, пою́щимъ: благослови́те, вся́ дѣла́ Госпо́дня, Го́спода.

Ничто́же е́сть дража́йше предъ Бо́гомъ добродѣ́тельныя души́, ея́же ве́сь мíръ недосто́инъ. Тѣ́мже и ты́, преподо́бная ма́ти Анно, па́че всего́ прилѣжа́ла еси́ о сицевѣ́й безсме́ртнѣй ве́щи, пою́щи: благослови́те, вся́ дѣла́ Госпо́дня, Го́спода.

Яко свѣщу́ свѣ́тлу, угото́вала еси́ кро́ткую ду́шу твою́, преподо́бная ма́ти Анно, тѣ́мже по сме́рти твое́й мно́га исцѣле́нія неду́жнымъ излія́шася отъ честны́хъ моще́й твои́хъ. Сего́ ра́ди мы́ вопіе́мъ: благослови́те, вся́ дѣла́ Госпо́дня, Го́спода.

Богоро́диченъ: Го́спода моего́ и Бо́га Ро́ждшая, Ма́ти Безневѣ́стная, дерзнове́ніе иму́щи къ Нему́, заступи́ и сохрани́ мя Твои́мъ хода́тайствомъ, я́ко да воспою́: благослови́те, вся́ дѣла́ Госпо́дня, Го́спода.

Пѣ́снь 9.

Ирмо́съ: Сла́дкою Пречи́стаго Твоего́ Рождества́ стрѣло́ю уязвле́ни, Чи́стая, Твое́й достожела́ннѣй добро́тѣ дивя́щеся, пѣ́сньми а́нгельскими досто́йно Тя́ я́ко Ма́терь Бо́жію велича́емъ.

Имиже вѣ́сть судьба́ми прославля́етъ Госпо́дь святы́я Своя́, и́хже имена́ напи́сана су́ть на небеси́ въ кни́гахъ живо́тныхъ, То́йже и тя́ просла́ви Свои́мъ милосе́рдіемъ, преподо́бная ма́ти Анно. Тѣ́мъ тя́ пое́мъ и велича́емъ.

Ны́нѣ съ ли́ки а́нгельскими на небесѣ́хъ предстои́ши Влады́цѣ всѣ́хъ, преподо́бная ма́ти Анно, моля́щи о гра́дѣ твое́мъ и о чту́щихъ вѣ́рою святу́ю па́мять твою́, неду́гующимъ же подаю́щи исцѣле́ніе отъ честны́хъ моще́й твои́хъ. Тѣ́мъ тя́ пое́мъ и велича́емъ.

Юна еще́ во́зрастомъ бы́вши, преподо́бная ма́ти Анно, тѣ́снымъ и приско́рбнымъ путе́мъ ше́ствовала еси́, вся́кія сла́дости, я́ко го́рести, отвраща́ющися, ны́нѣ же дости́гла еси́ неизрече́нныя ра́дости. Тѣ́мъ тя́ пое́мъ и велича́емъ.

Богоро́диченъ: Ааро́новъ же́злъ прозябе́й, Влады́чице, пре́жде непло́денъ бы́въ, по́слѣжде цвѣ́тъ и пло́дъ испусти́; та́кожде и Ты́, Пресвята́я Дѣ́во, безму́жно родила́ еси́ Христа́ Бо́га на́шего. Тѣ́мъ Тя́ пое́мъ и велича́емъ.

Свѣти́ленъ:

Стра́хомъ Бо́жіимъ огражде́на была́ еси́, преподо́бная, и, ника́коже убоя́вшися де́монскихъ си́лъ, отшла́ еси́ ко Трисія́нному Вели́кому Свѣ́ту и ны́нѣ пребыва́еши въ неизре́ченнѣй свѣ́тлости со всѣ́ми святы́ми. Тѣ́мъ тя́ мо́лимъ: моли́ся о на́съ, творя́щихъ святу́ю па́мять твою́. [Два́жды.]

[Сла́ва, и ны́нѣ,] богоро́диченъ:

Свѣ́та Превѣ́чнаго родила́ еси́ на́мъ, Христа́ Бо́га на́шего, Пречи́стая Дѣ́во, изба́вльшаго ве́сь мíръ отъ ле́сти діа́вола. Тѣ́мже мо́лимъ Тя́: не преста́й моля́щи, да пода́стъ на́мъ ми́лость Свою́ въ де́нь су́дный.

На хвали́техъ стихи́ры, гла́съ 8. Подо́бенъ: Что́ Тя́ нарече́мъ.

Что́ тя́ нарече́мъ, преподо́бная ма́ти Анно?* Яко бо звѣзда́, осіява́еши* оте́чество твое́, гра́дъ Ка́шинъ,* многочи́сленными чудесы́ твои́ми,* подаю́щи исцѣле́ніе приходя́щимъ съ вѣ́рою* къ честны́мъ моще́мъ твои́мъ.* Моли́ у́бо спасти́ся душа́мъ на́шимъ. [Два́жды.]

Что́ тя возъимену́емъ, блаже́нная ма́ти Анно?* Луну́ ли свѣ́тлую,* свѣтя́щую во все́й земли́ Россíйстѣй?* или́ звѣзду́ разу́мную,* зря́щую ко у́мному Со́лнцу,* наслажда́ющуся Боже́ственнаго свѣтосія́нія* и моля́щуся за ве́сь христіа́нскій ро́дъ,* да не превозмо́гутъ супоста́ты,* но да бу́дутъ побѣжде́ни стра́хомъ Бо́жіимъ.* Моли́ у́бо спасти́ся душа́мъ на́шимъ.

Пріиди́те, вси́ россíйстіи наро́ди,* почти́мъ и похва́лимъ преподо́бную ма́терь,* вели́кую княги́ню иноки́ню Анну,* па́че зла́та чистоту́ возлюби́вшую,* и па́че сапфи́ра ду́шу свою́ просвѣти́вшую* до́брыми свои́ми дѣ́яніи,* и ны́нѣ предстоя́щую Царю́ Небе́сному* со а́нгельскими ли́ки,* и моля́щую спасти́ся душа́мъ на́шимъ.

Сла́ва, гла́съ 8:

Кто́ не подиви́тся, кто́ не похва́литъ и не воспое́тъ вѣ́рно сію́ блаже́нную преподо́бную ма́терь Анну? Яко по святѣ́мъ ея́ преставле́ніи бы́ша си́лою Бо́жіею мно́га чудеса́ отъ честны́хъ моще́й ея́, я́же подаю́тъ исцѣле́нія приходя́щимъ къ ни́мъ съ вѣ́рою. Сего́ ра́ди возопіи́мъ къ не́й, си́це зову́ще: ра́дуйся, преподо́бная ма́ти иноки́не Анно, вели́каго да́ра отъ Христа́ сподо́бившаяся и ны́нѣ пребыва́ющая во Ца́рствіи небе́снѣмъ съ ли́ки преподо́бныхъ, моли́ спасти́ся душа́мъ на́шимъ.

И ны́нѣ, богоро́диченъ, гла́съ то́йже:

Влады́чице, пріими́ моли́твы ра́бъ Твои́хъ и изба́ви на́съ отъ вся́кія ну́жды и печа́ли.

[Славосло́віе вели́кое. Ектеніи́, и отпу́стъ.]



НА ЛИТУРГІИ,

Слу́жба преподо́бнымъ жена́мъ: Блаже́нна отъ кано́на, пѣ́снь 3-я и 6-я. Проки́менъ, [гла́съ 4]: Ди́венъ Бо́гъ во святы́хъ Свои́хъ,* Бо́гъ Изра́илевъ. [Сти́хъ: Въ це́рквахъ благослови́те Бо́га, Го́спода отъ исто́чникъ Изра́илевыхъ.] Апо́столъ къ Гала́томъ, зача́ло 208. [Аллилу́ія, гла́съ 1: Терпя́, потерпѣ́хъ Го́спода, и вня́тъ ми́ и услы́ша моли́тву мою́. Сти́хъ: Поста́ви на ка́мени но́зѣ мои́ и испра́ви стопы́ моя́]. Ева́нгеліе отъ Матѳе́я, зача́ло 104. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся].


Зри́: Аще бу́детъ па́мять преподо́бныя Анны Ка́шинскія въ попра́зднство святы́я Пятидеся́тницы или́ въ недѣ́лю всѣ́хъ святы́хъ, ищи́ уста́въ ея́ слу́жбы въ храмовы́хъ глава́хъ.

Источникъ: Слу́жба на де́нь пренесе́нія честны́хъ моще́й святы́я преподо́бныя благовѣ́рныя вели́кія княги́ни иноки́ни Анны, Ка́шинскія чудотво́рицы. Мѣ́сяца Іу́нія въ 12 де́нь. — Изда́ніе второ́е. — СПб.: Сѵнода́льная тѵпогра́фія, 1909. — С. 5-45.

/ Къ оглавленію раздѣла /


Наверхъ / Къ титульной страницѣ

0