Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 18 августа 2017 г. Сейчасъ на порталѣ посѣтителей - 14.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́нія въ 12-й де́нь.
Слу́жба преподо́бнаго отца́ на́шего Ону́фрія Вели́каго, пустынножи́теля.

[ВЕЧЕРЪ,]
[На Го́споди воззва́хъ:] стихи́ры, гла́съ 8. Подо́бенъ: О, пресла́внаго чудесе́!

Отче богому́дре Ону́фріе,* мра́зъ нощны́й и дневны́й ва́ръ* наде́ждею, преподо́бне,* бу́дущихъ претерпѣ́лъ еси́,* на земли́ твоя́ у́ды умертви́въ,* небе́сную жи́знь получи́лъ еси́:* вну́трь вше́лъ еси́ черто́га, свя́те, ра́достно,* добро́ту безмѣ́рную* зрѣ́ти Зижди́теля твоего́.

Отче богому́дре Ону́фріе,* я́ко сокро́вище, тя́ обрѣ́тъ,* въ пусты́ни кры́ющася, сла́вный Пафну́тій* и су́щимъ въ мíрѣ сказа́ я́сно* твои́хъ подвиго́въ исправле́нія,* вѣ́рныя богатя́ повѣстьми́* богоуго́днаго твоего́ житія́, прехва́льне,* его́же и на́съ покажи́* моли́твами твои́ми подража́тели, сла́вне.

Отче богому́дре Ону́фріе,* въ пусты́ни мя́ ны́нѣ страсте́й водворя́ющася,* на пу́ть пра́вый добродѣ́телей руково́дствуя мя́,* къ покая́нія стезѣ́, моли́твами твои́ми* наста́ви ко исполне́нію боже́ственныхъ хотѣ́ній,* къ неистощи́мому благи́хъ воспрія́тію,* я́ко твою́, ра́дуяся,* соверша́ю па́мять, всехва́льне.

Сла́ва, гла́съ 6:

Преподо́бне о́тче, во всю́ зе́млю изы́де вѣща́ніе исправле́ній твои́хъ, тѣ́мъ на небесѣ́хъ обрѣ́лъ еси́ мзду́ трудо́въ твои́хъ, де́монскія погуби́лъ еси́ полки́ и а́нгельскія дости́глъ еси́ чи́ны, и́хже житію́ безъ поро́ка поревнова́лъ еси́, дерзнове́ніе имѣ́я ко Христу́ Бо́гу, ми́ръ испроси́ душа́мъ на́шимъ.

И ны́нѣ, богоро́диченъ:

Бо́га, изъ Тебе́ Воплоти́вшагося, разумѣ́хомъ, Богоро́дице Дѣ́во, Того́ моли́ о спасе́ніи ду́шъ на́шихъ.

На стихо́внѣ стихи́ры, гла́съ 4. Подо́бенъ: Да́лъ еси́ зна́меніе.

Блаже́нства е́же вы́ше ума́ жела́я,* вмѣни́лъ еси́, боже́ственне,* сла́дкую пи́щу — воздержа́ніе,* нищету́ же — бога́тство,* нестяжа́ніе — многоимѣ́ніе и́стинное* и смире́ніе — въ благосла́віе,* тѣ́мже и жела́нія е́же въ ра́зумѣ получи́лъ еси́,* въ ски́ніяхъ водворя́яся святы́хъ, Ону́фріе.

Сти́хъ: Честна́ предъ Го́сподемъ* [сме́рть преподо́бныхъ Его́].

Тече́ніе по́стничества невозвра́тнѣ соверши́лъ еси́* и вѣ́ру соблю́лъ еси́,* отту́ду же и вѣне́цъ прія́лъ еси́, о́тче, пра́вды,* его́же тебѣ́ угото́ва Христо́съ,* Иже по достоя́нію подая́ возме́здія* и по́чести да́руя и воздая́нія въ трудѣ́хъ,* Его́же и на́съ ны́нѣ изба́вити отъ бѣ́дъ моли́.

Сти́хъ: Блаже́нъ му́жъ, боя́йся Го́спода,* [въ за́повѣдехъ Его́ восхо́щетъ зѣло́].

Вся́кое сладостра́стіе укроща́яй,* тѣ́ла отре́клся еси́, богому́дре,* огорча́яй чу́вство воздержа́нія труды́* и жесто́кими пребыва́ніи,* терпѣ́ніемъ же искуше́ній* и стоя́ніемъ крѣ́пкимъ во обстоя́ніяхъ,* въ ни́хже мѣ́сто безконе́чное прія́лъ еси́ наслажде́ніе,* и сла́дость несконча́емую,* и ра́дость неизглаго́ланную.

Сла́ва, гла́съ 6:

Еже по о́бразу соблю́дъ невреди́мо, у́мъ влады́ку на стра́сти па́губныя по́стнически поста́вивъ, во е́же по подо́бію, я́ко мо́щно, возше́лъ еси́, му́жески бо естество́ пону́дивъ, потща́лся еси́ ху́ждшее покори́ти лу́чшему, и пло́ть порабо́тити ду́ху. Тѣ́мже мона́шествующихъ яви́лся еси́ ве́рхъ, граждани́нъ пусты́нный, благотеку́щихъ обучи́тель, пра́вило добродѣ́тели извѣ́стнѣйшее. И ны́нѣ на небесѣ́хъ зерца́ломъ разрѣ́шшимся, о́тче на́шъ Ону́фріе, чи́стѣ зри́ши Святу́ю Тро́ицу, моля́ся, о и́же вѣ́рою и любо́вію чту́щихъ тя́.

И ны́нѣ, [богоро́диченъ]:

Богоро́дице, Ты́ еси́ лоза́ и́стинная, возрасти́вшая на́мъ Пло́дъ живота́, Тебѣ́ мо́лимся: моли́ся, Влады́чице, со святы́ми апо́столы, поми́ловатися ду́шамъ на́шимъ.

Тропа́рь, гла́съ 1:

Жела́ніемъ духо́внымъ пусты́ни дости́глъ еси́, богому́дре Ону́фріе, и, я́ко безпло́тенъ, въ не́й многолѣ́тнѣ подвиза́лся еси́ трудолю́бнѣ, соревну́я проро́комъ Иліи́ и Крести́телю, и, отъ руку́ а́нгельску Та́инъ Боже́ственныхъ наслади́вся, ны́нѣ во свѣ́тѣ Святы́я Тро́ицы ку́пно съ ни́ми весели́шися, моли́ спасти́ся на́мъ, твою́ па́мять почита́ющимъ.

Сла́ва, и ны́нѣ, богоро́диченъ:

Моли́твы Твои́хъ ра́бъ пріими́ Богоро́дице Дѣ́во, и изба́ви на́съ отъ вся́кія бѣды́, я́ко ро́ждшая Христа́ Спа́са, и Изба́вителя ду́шъ на́шихъ.


[НА УТРЕНИ,]
Кано́нъ, гла́съ 4.

Пѣ́снь 1.

Ирмо́съ: Колесни́цы фарао́новы и си́лу его́ вве́рже въ мо́ре Крѣ́пкій во бра́нехъ; воспое́мъ пѣ́снь но́вую, я́ко просла́вися.

Зари́ трисвѣ́тлыя осія́емь свѣ́томъ, мра́ка мя́ исхи́ти смертоно́снаго согрѣше́ній твои́ми, о́тче, моли́твами, Ону́фріе, я́ко да пою́ па́мять твою́.

Мíра отве́ргся, прилѣпи́лся еси́ Христу́, пло́ть покори́лъ еси́ по́мыслу и прія́телище яви́лся еси́ Свята́го Ду́ха, о́тче [богому́дре] Ону́фріе.

Столпо́мъ боже́ственнаго свѣ́та наставля́емь, Еги́петъ оста́вилъ еси́ стра́стный, и къ высотѣ́ дости́глъ еси́ безстра́стія, и Бо́гу бесѣ́довалъ еси́.

Богоро́диченъ: Родила́ еси́ пре́жде Тебе́ ро́ждшагося изъ Отца́, пребыла́ же еси́ нетлѣ́нна, и по рождествѣ́ Дѣ́ва: тѣ́мже Богоро́дицу Тя́ и́стинную исповѣ́дуемъ, Препѣ́тая.

Пѣ́снь 3.

Ирмо́съ: Утвержда́яй гро́мъ и созида́яй ду́хъ, утверди́ мене́, Го́споди, да Тя́ пою́ и́стинно и творю́ во́лю Твою́: я́ко нѣ́сть свя́тъ, я́ко Ты́, Бо́же на́шъ.

Ангельскому послѣ́дуя зрѣ́нію, пусты́ню дости́глъ еси́ и, воздержа́ніемъ плотскíя сла́сти увяди́въ, а́нгельски пожи́лъ еси́ въ то́й, блаже́нне.

Насажде́нно дре́во при исхо́дищахъ яви́вся воздержа́нія во́дъ, во бла́го, о́тче, вре́мя благопло́діе добродѣ́телей я́ко вои́стинну по́далъ еси́, Ону́фріе, дѣя́ніемъ.

Всесвѣ́тлая звѣзда́ вселе́ннѣй отъ пусты́ни возсія́лъ еси́, уясни́лъ еси́ вѣ́рныхъ, заря́ми по́двиговъ, благочести́выхъ собо́ры, о́тче на́шъ Ону́фріе преподо́бне.

Богоро́диченъ: Пра́отецъ разори́ла еси́ печа́ль, ра́дость на́мъ ро́ждши, Жизнода́вца и Изба́вителя, Пресвята́я Богоро́дице, Его́же прилѣ́жно моли́ спасти́ ста́до Твое́.

Сѣда́ленъ, гла́съ 4. [Подо́бенъ: Ско́ро предвари́.]

Удали́лся еси́, преподо́бне, и въ пусты́няхъ я́вѣ водвори́лся еси́, Го́спода, изба́вльшаго тя́ отъ лю́тъ, при́сно ожида́я. Тѣ́мже, благоугоди́въ Влады́цѣ, всеблаже́нне, прія́лъ еси́ нестарѣ́ющееся небе́сное Ца́рство, въ не́мже ны́нѣ водворя́яся, помина́й чту́щія тя́. [Два́жды.]

Сла́ва, и ны́нѣ, богоро́диченъ:

Наста́ви на́съ на пу́ть покая́нія, укло́ншіяся при́сно къ безпу́тіемъ зо́лъ и Преблага́го прогнѣ́вавшія Го́спода, Неискусобра́чная благослове́нная Марíе, прибѣ́жище отча́янныхъ человѣ́ковъ, Бо́жіе жили́ще.

Пѣ́снь 4.

Ирмо́съ: Услы́шахъ, Бо́же, слу́хъ Тво́й и убоя́хся, разумѣ́хъ дѣла́ Твоя́ и ужасо́хся, Го́споди, я́ко Твоего́ хвале́нія испо́лнь земля́.

Совле́клъ еси́ тлѣ́нную грѣха́ ри́зу, о́тче, пра́вды, Ону́фріе, во оде́жду обле́клся еси́ и вну́трь черто́га всели́лся еси́.

Моли́твами непреста́нными свѣ́тъ боже́ственнаго ра́зума собра́лъ еси́ въ се́рдцѣ твое́мъ, о́тче на́шъ, неразу́мія же отбѣ́глъ еси́ мра́чныя ле́сти, Ону́фріе.

Тѣ́сный ше́ствовавъ пу́ть и приско́рбный на землѣ́, богому́дре, къ широ́кому дости́глъ еси́ и ра́дости испо́лненъ небе́сныхъ наслажде́ній, преподо́бне.

Богоро́диченъ: Спасе́ніе Тя́ на вся́ко вре́мя и мѣ́сто призыва́ю: не пре́зри мене́, Всенепоро́чная, Яже Бо́га ро́ждшая, Изба́вителя вку́пѣ и Спа́са моего́.

Пѣ́снь 5.

Ирмо́съ: Возсія́й ми́, Го́споди, свѣ́тъ повелѣ́ній Твои́хъ, я́ко къ Тебѣ́ ду́хъ мо́й у́тренюетъ и пое́тъ Тя́: Ты́ бо еси́ Бо́гъ на́шъ, и къ Тебѣ́ прибѣга́ю, Царю́ ми́ра.

Ангеломъ единожи́теля Пафну́тій обрѣ́тъ въ пусты́ни тя́, вели́каго равноа́нгельнаго свѣти́льника, благоче́стно житія́ твоего́ всѣ́мъ яви́ исправле́нія, му́дре.

Возсія́ тебѣ́ Госпо́дь, Его́же отъ души́ вожделѣ́лъ еси́, безстра́стія Свѣ́тъ невече́рній, Ону́фріе, и мíръ въ по́вѣстехъ непоро́чнаго житія́ твоего́ ве́сь просвѣти́лъ еси́, му́дре.

Яко благопроповѣ́дуя, Ону́фріе блаже́нне, е́же прилѣпля́тися Бо́гу на́шему, на Того́ упова́ніе отъ души́ возложи́лъ еси́ и Того́ хвалу́ имѣ́лъ еси́ во устѣ́хъ при́сно.

Богоро́диченъ: Возсія́й ми́, Влады́чице, зарю́ ми́лости Твоея́, во тмѣ́ прегрѣше́ній мои́хъ су́щу, Дѣ́во, и къ свѣ́ту наста́ви покая́нія, молю́ся, и спасе́нія жи́зни.

Пѣ́снь 6.

Ирмо́съ: Бу́ря мя́ помышле́ній пости́гши, во глубину́ низвлачи́тъ мя́ безмѣ́рныхъ грѣхо́въ, но Ты́, Упра́вителю Благíй, предвари́въ, упра́ви, я́ко проро́ка, и спаси́ мя.

Мра́зомъ померза́емѣй пло́ти твое́й, теплото́ю Ду́ха грѣ́яшеся тво́й ду́хъ; зно́емъ же опаля́емь, му́дре, роса́ прохлажда́ше небе́сная тя́ благода́тію.

Ходя́щу тебѣ́ въ пусты́ни, отъ Бо́га предвожда́лся еси́, сла́вне, свѣтозаре́ніемъ, та́мо хотя́щаго свѣ́та прія́ти тя́ ны́нѣ пропису́я и сла́ву, при́сно пребыва́ющую.

Въ верте́пѣ роди́выйся и на руку́ ста́рца я́ко Младе́нецъ прія́ти сподо́блься, младе́нствующа дѣ́лы благи́ми, ста́рца въ верте́пѣ тя́ учиня́етъ къ лу́чшимъ. [1]

Богоро́диченъ: Бе́здну ми́лости ро́ждшая, страсте́й мои́хъ бе́здну пучи́ною щедро́тъ Твои́хъ пото́пльши, ту́чу отъ души́ пода́ждь мнѣ́ сле́зъ, Богороди́тельнице Всенепоро́чная.

[Конда́къ, гла́съ 3. Подо́бенъ: Дѣ́ва дне́сь.

Сія́ніемъ Ду́ха Пресвята́го, богому́дре, просвѣ́щся, оста́вилъ еси́ я́же въ житіи́ молвы́, пусты́ню же дости́гъ, преподо́бне о́тче, возвесели́лъ еси́ и́же надъ всѣ́ми Бо́га и Зижди́теля, сего́ ра́ди прославля́етъ тя́ Христо́съ, блаже́нне, вели́кій Дарода́тель.

Икосъ:

Кто́ изрече́тъ твоя́ по́двиги, всеблаже́нне? Или́ кто́ отъ земноро́дныхъ досто́йно похва́литъ твое́ житіе́, Ону́фріе о́тче? Якоже безпло́тенъ, пожи́лъ еси́, бы́ліи пита́емь, пи́щу же имѣ́лъ еси́ — Христа́ Бо́га, на Него́же твою́ наде́жду положи́лъ еси́, на́гъ ходя́ въ пусты́няхъ, сту́день и мра́зъ, я́ко безпло́тенъ, терпя́. Сего́ ра́ди То́й тя́ свѣти́льника показа́, блаже́нне, вели́кій Дарода́тель.]

Пѣ́снь 7.

Ирмо́съ: Глаго́лавый на горѣ́ съ Моисе́омъ и о́бразъ дѣ́вства явле́й въ купинѣ́, благослове́нъ еси́, Бо́же оте́цъ на́шихъ.

На горѣ́ Илію́ препита́вый вра́номъ, То́й тебѣ́ а́нгеломъ пи́щу посыла́етъ, тя́ велича́я, преподо́бне, Того́ возвели́чившаго.

Якоже фи́никсъ, при исхо́дищихъ прозя́бъ водны́хъ воздержа́нія, пи́щу имѣ́лъ еси́ фи́ники, пита́вся пи́щею болѣ́зней твои́хъ.

Видѣ́ніи разширя́яся, о́тче, болѣ́зньми пита́лся еси́ воздержа́нія и ны́нѣ получи́лъ еси́ го́рнее благопита́ніе, Ону́фріе.

Богоро́диченъ: Иже во чре́во Дѣ́вы всели́выйся и сіе́ небе́съ ши́рши показа́вый, благослове́нъ еси́, Го́споди, Бо́же оте́цъ на́шихъ.

Пѣ́снь 8.

Ирмо́съ: Земля́ и вся́, я́же на не́й, мо́ре и вси́ исто́чницы, небеса́ небе́съ, свѣ́тъ и тма́, мра́зъ и зно́й, сы́нове человѣ́честіи, свяще́нницы, благослови́те Го́спода и превозноси́те Его́ во вѣ́ки.

Зе́млю до́льную премину́въ, небе́сную стяжа́лъ еси́ жи́знь, и безпло́тныхъ лико́мъ счи́слился еси́, нося́ пло́ть, Ону́фріе блаже́нне, и зе́млю кро́ткихъ наслѣ́довалъ еси́, ю́же тебѣ́ подаде́ Христо́съ во вѣ́ки.

Сле́зныя ка́пли гаси́ло стяжа́лъ еси́ вои́стинну стра́стнымъ разгорѣ́ніемъ и любо́вію огня́ боже́ственнаго росѣ́ [2] совокупи́лся еси́ безстра́стія — Христу́ Бо́гу на́шему, тѣ́мже тя́ чти́мъ, Ону́фріе богому́дре.

Ангельскому житію́ поревнова́вша непреста́нными моли́твами, руко́ю а́нгела Святы́мъ Та́йнамъ прича́стника, о́тче, Христо́съ тя́ показа́, Вели́каго Совѣ́та вои́стинну Ангелъ, Его́же превозно́симъ во вѣ́ки.

Богоро́диченъ: Земле́ свята́я, изъ Нея́же Христо́съ прозябе́, кла́съ жи́зни, и иста́явшее гла́домъ назда́ человѣ́ческое естество́ дре́внія зло́бы, Богома́ти Всенепоро́чная, тѣ́мже Тя́ пое́мъ во вѣ́ки.

Пѣ́снь 9.

Ирмо́съ: Яко сотвори́ Мнѣ́ вели́чіе Си́льный, и свя́то и́мя Его́, и ми́лость Его́ въ ро́дъ и ро́дъ боя́щимся Его́.

Взира́ніи непреста́нными, я́же къ Бо́гу, о́тче богому́дре, обожа́емь, прича́стіемъ Его́ бы́лъ еси́ бо́гъ и, со а́нгелы служа́, Сего́ сла́виши при́сно.

Умертви́въ пло́ть, побѣди́лъ еси́ врага́, преста́вился еси́ къ невече́рнѣй зари́, небе́сныхъ бла́гъ ты́ наслѣ́дникъ бы́въ, о́тче Ону́фріе.

Любо́вію творя́щихъ святы́й тво́й пра́здникъ отъ вся́каго треволне́нія страсте́й мольба́ми твои́ми избавля́й при́сно, я́ко дерзнове́ніе обрѣ́тъ у Спа́са, Ону́фріе.

Богоро́диченъ: Наде́жду Тя́ и стѣ́ну стяжа́вше, Пречи́стая, упова́емъ улучи́ти блага́я моли́твами Твои́ми, Чи́стая, я́же обѣща́ Христо́съ, воплоти́выйся изъ Тебе́ на́съ ра́ди.

Свѣти́ленъ. Подо́бенъ: Жены́, услы́шите.

Ангельстіи удиви́шася чи́ни твои́мъ подвиго́мъ, я́же въ пусты́ни твори́лъ еси́, Ону́фріе богоно́се: три́ бо къ шести́десятимъ лѣ́та, о́тче, пости́лся еси́. И ны́нѣ, всеблаже́нне преподо́бне, со Христо́мъ ца́рствуеши въ непроходи́мыя вѣ́ки. [Два́жды.]

[Сла́ва, и ны́нѣ], богоро́диченъ:

Богоро́дицу Тя́ вои́стинну исповѣ́дуемъ, Влады́чице, Тебе́ ра́ди спа́сшіися, и́бо Бо́га неизрече́нно родила́ еси́, разру́шшаго кресто́мъ сме́рть и къ Себѣ́ привле́кша преподо́бныхъ собо́ры, съ ни́миже Тя́ восхваля́емъ, Дѣ́во.

На хвалитехъ стихиры [на 4], гласъ 8:

На не́бо теку́щую всѣ́дъ колесни́цу, чу́дне, добродѣ́телей* дости́глъ еси́ краегра́дія по́стничествомъ,* изъ пусты́ни смотря́я вы́шняго Іерусали́ма премíрная,* и я́же отъ трудо́въ и по́двиговъ досто́йныя по́чести воспріе́мъ,* съ небе́сными ра́дуешися чинонача́ліи, преблаже́нне,* вѣ́чныхъ бла́гъ наслѣ́дникъ и Ца́рствія жи́тель бы́въ,* но моли́ся, богоно́сне Ону́фріе, Спа́су всѣ́хъ,* умири́ти мíръ и спасти́ ду́ши на́ша.

По́двига нелѣ́ностно тве́рдостію, блаже́нне, защити́вся* и благода́тію духо́вною вооружи́вся,* Амали́ка побѣди́лъ еси́,* вся́кія еги́петскія тмы́ ополче́ніе, и, по́мыслъ очи́стивъ,* и́же на высоту́, блазни́теля обличи́лъ еси́,* побѣдоно́сецъ яви́ся на ду́хи, преблаже́нне,* и снаслѣ́дникъ Христо́въ яви́ся,* безпло́тныхъ подража́тель бы́въ,* но моли́ся, богоно́сне Ону́фріе, Спа́су всѣ́хъ* умири́ти мíръ и спасти́ ду́ши на́ша.

Вре́менныхъ предзря́, до́льныхъ [взыску́я], богому́дре,* высо́кая и пребыва́ющая возлюби́лъ еси́ боже́ственнымъ раче́ніемъ,* кре́стъ бо сво́й поне́слъ еси́ на ра́мѣ ева́нгельски* и Бо́га возлюби́лъ еси́,* поще́ніемъ му́жески побѣди́въ бѣсо́вскія полки́,* съ небе́сными весели́шися ли́ки, я́коже непобѣди́мь* и пречи́стый хра́мъ, жела́я безконе́чныя жи́зни сподо́битися, [бы́лъ еси́],* но моли́ся, богоно́сне Ону́фріе, Спа́су всѣ́хъ,* умири́ти мíръ и спасти́ ду́ши на́ша.

Взыска́лъ еси́, богоно́сне, ви́дѣти Госпо́дню красоту́* и еди́нъ Тому́ Еди́ному бесѣ́довати вожделѣ́лъ еси́,* тѣ́мже мíръ оста́вилъ еси́,* бѣ́гая и пребыва́я въ пусты́няхъ и гора́хъ,* и, въ Христа́ обле́кся, небре́глъ еси́ о ри́зѣ,* нетлѣ́нія ри́зу себѣ́ самому́ содѣ́ловая,* съ не́юже же возше́лъ еси́ въ небе́сный черто́гъ,* вѣ́чно ра́дуяся, Ону́фріе преподо́бне.

Сла́ва, гла́съ 6:

Дне́сь вели́кій свѣти́льникъ, основа́ніе пусты́нныхъ, ве́рхъ преподо́бныхъ, пра́вило и́ночествующихъ, а́нгелъ земны́й и небе́сный человѣ́къ, вели́кій Ону́фрій отъ земны́хъ къ небе́снымъ пресла́вно прехо́дитъ, а́нгельскими чи́нми дориноси́мъ. Тѣ́мже и мы́, соше́дшеся въ па́мять его́, псалмы́ и пѣ́сньми духо́вными Христа́ воспѣва́емъ, Иже та́ко того́ по досто́инству просла́вльшаго, и мо́лимся: того́ моли́твами да спасе́тъ ду́ши на́ша, я́ко Человѣколю́бецъ.

И ны́нѣ, богоро́диченъ:

Преложе́ніе скорбя́щихъ, премѣне́ніе боля́щихъ еси́, Богоро́дице Всепѣ́тая, спаси́ оби́тель [или́: гра́дъ] и лю́ди, бори́мыхъ умире́ніе, обурева́емыхъ тишина́, еди́на Предста́тельница вѣ́рныхъ.


[НА ЛИТУРГІИ,

Блаже́нна отъ кано́на преподо́бнаго, пѣ́снь 3-я и 6-я. Проки́менъ, гла́съ 7: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Апо́столъ, къ Гала́томъ, зача́ло 213. Аллилу́ія, гла́съ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́. Ева́нгеліе Матѳе́я, зача́ло 43. Прича́стенъ: Въ па́мять вѣ́чную бу́детъ пра́ведникъ, отъ слу́ха зла́ не убои́тся.]

Примѣчанія:
[1] Тропарь канона исправленъ по изданію 1893 года; въ текстѣ службы: «Въ Вертепѣ Родивыйся, и на руку старца яко Младенецъ пріяти тя сподобилъ еси; дѣлы, благими учиняетъ тя къ лучшимъ».
[2] Въ текстѣ: «горѣ».

Источникъ: Служба съ акаѳистомъ и житіе преподобнаго отца нашего Онуфрія Великаго, пустынножителя. — Іерусалимъ, 1900. — С. 3-8, 24-26.

/ Къ оглавленію раздѣла /


Наверхъ / Къ титульной страницѣ

0