Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - вторникъ, 23 мая 2017 г. Сейчасъ на порталѣ посѣтителей - 17.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́нія въ 12-й де́нь.
Преподо́бнаго отца́ на́шего Ону́фрія и преподо́бнаго отца́ на́шего Петра́ Аѳо́нскаго.

[ВЕЧЕРЪ,]
На Го́споди воззва́хъ: стихи́ры, гла́съ 8. Подо́бенъ: О, пресла́внаго чудесе́!

Отче богому́дре Ону́фріе,* мра́зъ нощны́й и дневны́й ва́ръ* наде́ждею, преподо́бне,* бу́дущихъ претерпѣ́лъ еси́,* на земли́ твоя́ у́ды умертви́въ,* небе́сную жи́знь получи́лъ еси́:* вну́трь вше́лъ еси́ черто́га, свя́те, ра́достно,* добро́ту безмѣ́рную* зрѣ́ти Зижди́теля твоего́.

Отче богому́дре Ону́фріе,* я́ко сокро́вище, тя́ обрѣ́тъ,* въ пусты́ни кры́ющася, сла́вный Пафну́тій* и су́щимъ въ мíрѣ сказа́ я́сно* твои́хъ подвиго́въ исправле́нія,* вѣ́рныя богатя́ повѣстьми́* богоуго́днаго твоего́ житія́, прехва́льне,* его́же и на́съ покажи́* моли́твами твои́ми подража́тели, сла́вне.

Ины стихи́ры преподо́бнаго Петра́, гла́съ и подо́бенъ то́йже:

Петру́ боже́ственному тезоимени́та,* послѣ́дующа вои́стинну* и ре́вности вѣ́ры благоче́стно тя́, преподо́бне,* пріобщи́вшася позна́хомъ:* благíй бо зако́нъ возлюби́лъ еси́,* и о́наго боже́ственная повелѣ́нія,* о́тче, вожделѣ́лъ еси́,* и ду́шу удобри́лъ еси́ добродѣ́тельми.* Тѣ́мже тя́ почита́емъ и ублажа́емъ.

Преподо́бне о́тче всебога́те,* терпѣ́ніе и́стинно, и любо́вь нелицемѣ́рну,* и наде́жду неукло́нну,* соверше́нное смире́ніе* во умиле́ніи души́ стяжа́въ,* Боже́ственнаго Ду́ха хра́мъ бы́лъ еси́,* Его́же сія́ніе чи́сто воспріе́мъ,* земны́мъ свѣ́тъ ви́дѣнъ бы́лъ еси́ вторы́й* житія́ чистото́ю.

Преподо́бне о́тче богодухнове́нне,* лѣ́та мно́га на земли́* неявле́ніемъ кры́емь,* позна́нъ бы́лъ еси́ Ду́хомъ* въ зна́меніихъ и чудесѣ́хъ* благово́ніемъ мѵ́ра,* и́бо источи́лъ еси́ живу́щую свѣ́тлость и святы́ню* и Боже́ственнаго Ду́ха вои́стинну благода́ть* лю́бящимъ тя́ показу́я.

Сла́ва, гла́съ 6:

Преподо́бніи отцы́, во всю́ зе́млю изы́де вѣща́ніе исправле́ній ва́шихъ, тѣ́мже на небесѣ́хъ обрѣто́сте мзду́ трудо́въ ва́шихъ, де́монскія полки́ погуби́сте и а́нгельскія достиго́сте чи́ны, и́хже житію́ непоро́чно поревнова́сте. Дерзнове́ніе иму́ще ко Го́споду, ми́ръ испроси́те душа́мъ на́шимъ.

И ны́нѣ, пра́здника или́ богоро́диченъ.
Крестобогоро́диченъ. Подо́бенъ: Тридне́венъ.

Со́лнце омрачи́ся,* на Крестѣ́ Тя́ пригвожде́на,* Свѣтода́вче, зря́щи,* и земля́ стра́хомъ колеба́шеся,* лю́діе же іуде́йстіи* ника́коже уще́дриша,* беззако́нніи.

На стихо́внѣ окто́иха. Сла́ва, гла́съ 6:

Еже по о́бразу соблю́дше невре́дно, у́мъ влады́ку на стра́сти губи́тельныя по́стнически утве́рждше, ко е́же по подо́бію, я́коже мо́щно, пріидо́сте: му́жески бо естество́ пону́дивше, потща́вшеся ху́ждшее покори́ти лу́чшему и пло́ть порабо́тити ду́ху. Тѣ́мже мона́шествующихъ показа́стеся ве́рхъ, гра́ждане пусты́нніи, благотеку́щихъ обучи́тели, пра́вило добродѣ́телей извѣ́стное, и ны́нѣ на небесѣ́хъ зерца́ломъ разрѣ́шшимся чи́стѣ зрите́ Святу́ю Тро́ицу, моля́щеся вку́пѣ о и́же вѣ́рою и любо́вію чту́щихъ ва́съ.

И ны́нѣ, пра́здника или́ богоро́диченъ.
Крестобогоро́диченъ. Подо́бенъ: Тридне́венъ.

Зача́тіе Твое́ безсѣ́менное* и рождество́ неизрече́нное помышля́ющи,* удивля́юся зѣло́:* ка́ко си́це, я́коже злодѣ́й,* благоволи́лъ еси́ умре́ти, Сы́не? —* Пречи́стая, пла́чущи, взыва́ше.

Тропа́рь, гла́съ 4:

Бо́же оте́цъ на́шихъ, творя́й при́сно съ на́ми по Твое́й кро́тости, не отста́ви ми́лость Твою́ отъ на́съ, но моли́твами и́хъ въ ми́рѣ упра́ви живо́тъ на́шъ.


[НА УТРЕНИ,]
Кано́нъ окто́иха еди́нъ и святы́хъ два́, на 8.

Кано́нъ Ону́фрія, гла́съ 4.
Пѣ́снь 1.

Ирмо́съ: Колесни́цы фарао́новы и си́лу его́ вве́рже въ мо́ре Крѣ́пкій во бра́нехъ; воспое́мъ пѣ́снь но́вую, я́ко просла́вися.

Зари́ трисвѣ́тлыя осія́емь свѣ́томъ, мра́ка мя́ исхи́ти смертоно́снаго согрѣше́ній твои́ми, о́тче, моли́твами, Ону́фріе, я́ко да пою́ па́мять твою́.

Мíра отве́ргся, прилѣпи́лся еси́ Христу́, пло́ть покори́лъ еси́ по́мыслу и прія́телище яви́лся еси́ Свята́го Ду́ха, о́тче богому́дре Ону́фріе.

Столпо́мъ боже́ственнаго свѣ́та наставля́емь, Еги́петъ оста́вилъ еси́ стра́стный, и къ высотѣ́ дости́глъ еси́ безстра́стія, и Бо́гу бесѣ́довалъ еси́.

Богоро́диченъ: Родила́ еси́ пре́жде Тебе́ ро́ждшагося изъ Отца́, пребыла́ же еси́ нетлѣ́нна, и по рождествѣ́ Дѣ́ва: тѣ́мже Богоро́дицу Тя́ и́стинную исповѣ́дуемъ, Препѣ́тая.

Инъ кано́нъ преподо́бнаго Петра́. Творе́ніе Іо́сифово, гла́съ 2.
Пѣ́снь 1.

Ирмо́съ: Гряди́те, лю́діе, пои́мъ пѣ́снь Христу́ Бо́гу, раздѣ́льшему мо́ре и наста́вльшему лю́ди, я́же изведе́ изъ рабо́ты Еги́петскія, я́ко просла́вися.

Друга́го тя́ на́мъ Петра́ предлага́етъ Це́рковь дне́сь, просвѣща́юща на́ша мы́сли па́мятію твое́ю боже́ственною, о́тче пребога́те.

Ка́ла страсте́й очи́щъ о́чи у́мныя, преподо́бне, я́сно ви́дѣлъ еси́ безмѣ́рную добро́ту Христа́ Царя́, тя́ просла́вльшаго.

Просія́въ тебѣ́, Трисо́лнечнаго Божества́, преблаже́нне, невече́рній свѣ́тъ, содѣ́ла тя́ чи́сто прія́телище боже́ственныхъ дарова́ній, о́тче богому́дре.

Богоро́диченъ: Иже на́съ ра́ди изъ Тебе́, Дѣ́во, въ человѣ́ка премно́гою бла́гостію обо́лкся, преподо́бныхъ собо́ры Того́ возлю́бльшихъ препросла́вленъ е́сть.

Пѣ́снь 3.

Ирмо́съ: Утвержда́яй гро́мъ и созида́яй ду́хъ, утверди́ мене́, Го́споди, да Тя́ пою́ и́стинно и творю́ во́лю Твою́: я́ко нѣ́сть свя́тъ, я́ко Ты́, Бо́же на́шъ.

Ангельскому послѣ́дуя зрѣ́нію, пусты́ню дости́глъ еси́ и, воздержа́ніемъ плотскíя сла́сти увяди́въ, а́нгельски пожи́лъ еси́ въ то́й, блаже́нне.

Насажде́но дре́во при исхо́дищихъ яви́вся воздержа́нія во́дъ, во бла́го, о́тче, вре́мя благопло́діе добродѣ́телей я́ко вои́стинну по́далъ еси́, Ону́фріе, дѣя́ніемъ.

Всесвѣ́тлая звѣзда́ вселе́ннѣй отъ пусты́ни возсія́въ, уясни́лъ еси́ вѣ́рныхъ, заря́ми по́двиговъ, благочести́выхъ собо́ры, о́тче на́шъ Ону́фріе преподо́бне.

Богоро́диченъ: Пра́отецъ разори́ла еси́ печа́ль, ра́дость на́мъ ро́ждши, Жизнода́вца и Изба́вителя, Пресвята́я Богоро́дице, Его́же прилѣ́жно моли́ спасти́ ста́до Твое́.

Инъ.

Ирмо́съ: Утверди́ на́съ въ Тебѣ́, Го́споди, дре́вомъ умерщвле́й грѣ́хъ, и стра́хъ Тво́й всади́ въ сердца́ на́съ, пою́щихъ Тя́.

Умертви́въ я́же на земли́ у́ды, преподо́бне, поуче́ніи оживи́лъ еси́ ду́шу боже́ственными и получи́лъ еси́ вѣ́чную жи́знь и свѣ́тлость.

Совокупи́лся еси́, я́ко до́брѣ пожи́въ, съ вы́шними, преблаже́нне, ликостоя́ніи, въ безмо́лвіи пребыва́я и на добро́ту боже́ственную взира́я.

Въ гора́хъ я́вѣ скрыва́емь, человѣ́къ совокупле́нія удали́лся еси́ и у́мъ ве́сь впери́лъ еси́ къ небе́снѣй добро́тѣ, веселя́ся.

Богоро́диченъ: Пала́ту красну́ неизрече́ннаго бога́тства, Дѣ́во, зна́юще, по до́лгу Тя́ сла́вимъ, спа́сшіися Рождество́мъ Твои́мъ, Всенепоро́чная.

Конда́къ преподо́бнаго Петра́, гла́съ 2. Подо́бенъ: Вы́шнихъ ища́.

Удали́въ себе́ человѣ́ческаго сожи́тельства, въ пеще́рахъ ка́менныхъ и разсѣ́линахъ пожи́лъ еси́, жела́ніемъ боже́ственнымъ и любо́вію, Пе́тре, Го́спода твоего́, отъ Него́же вѣне́цъ прія́лъ еси́. Моли́ непреста́нно спасти́ся на́мъ.

Икосъ:

Мірски́хъ мо́лвъ избѣ́гъ и бу́ри жите́йскія, я́ко бѣ́гательны и уко́рны, непроходи́мая мѣста́ дости́глъ еси́ и осо́бь, я́коже пти́ца, еди́нъ лѣ́та мно́га пожи́лъ еси́, въ пеще́рахъ и про́пастехъ, и разсѣ́линахъ кры́яся, ко Го́споду взира́я и Того́ исполня́я повелѣ́нія; отъ Него́же прія́тъ благода́ть, преподо́бне, я́ко со́лнце, о́тче, возсія́лъ еси́, моля́ непреста́нно о всѣ́хъ на́съ.

Сѣда́ленъ свята́го Ону́фрія, гла́съ 4. Подо́бенъ: Ско́ро предвари́.

Удали́лся еси́, преподо́бне, и въ пусты́няхъ я́вѣ водвори́лся еси́, Го́спода, изба́вльшаго тя́ отъ лю́тъ, при́сно ожида́я. Тѣ́мже, благоугоди́въ Влады́цѣ, всеблаже́нне, прія́лъ еси́ нестарѣ́ющееся небе́сное Ца́рство, въ не́мже ны́нѣ водворя́яся, помина́й чту́щія тя́.

Сла́ва, преподо́бнаго Петра́, гла́съ 1. Подо́бенъ: Гро́бъ Тво́й, Спа́се.

Погре́блъ еси́ страсте́й всевоста́ніе умерщвле́ніемъ пло́ти, свяще́нный о́тче, и жи́знь безконе́чную по сме́рти прія́лъ еси́. Тѣ́мже дне́сь Христо́ва Це́рковь пра́зднуетъ твою́ досточу́дную па́мять, преподо́бныхъ украше́ніе.

И ны́нѣ, пра́здника или́ богоро́диченъ:

Наста́ви на́съ на пу́ть покая́нія, укло́ншіяся при́сно къ безпу́тіемъ зо́лъ и Преблага́го прогнѣ́вавшія Го́спода, Неискусобра́чная благослове́нная Марíе, прибѣ́жище отча́янныхъ человѣ́ковъ, Бо́жіе жили́ще.

Крестобогоро́диченъ:

Зря́щи Тя́, Христе́, Всенепоро́чная Ма́ти ме́ртва, на Крестѣ́ просте́рта, вопія́ше: Сы́не Мо́й, собезнача́льне Отцу́ и Ду́ху, что́ неизрече́нное Твое́ сіе́ смотре́ніе, и́мже спа́слъ еси́ пречи́стыхъ ру́къ Твои́хъ, Ще́дре, созда́ніе?

Пѣ́снь 4.

Ирмо́съ: Услы́шахъ, Бо́же, слу́хъ Тво́й и убоя́хся, разумѣ́хъ дѣла́ Твоя́ и ужасо́хся, Го́споди, я́ко Твоего́ хвале́нія испо́лнь земля́.

Совле́къ тлѣ́нную грѣха́ ри́зу, о́тче, пра́вды, Ону́фріе, во оде́жду обле́клся еси́ и вну́трь черто́га всели́лся еси́.

Моли́твами непреста́нными свѣ́тъ боже́ственнаго ра́зума собра́лъ еси́ въ се́рдцы твое́мъ, о́тче на́шъ, неразу́мія же отбѣ́глъ еси́ мра́чныя ле́сти, Ону́фріе.

Тѣ́сный ше́ствовавъ пу́ть и приско́рбный на земли́, богому́дре, къ широ́кому дости́глъ еси́ и ра́дости испо́лненъ небе́сныхъ наслажде́ній, преподо́бне.

Богоро́диченъ: Спасе́ніе Тя́ на вся́ко вре́мя и мѣ́сто призыва́ю: не пре́зри мене́, Всенепоро́чная, Яже Бо́га ро́ждшая, Изба́вителя вку́пѣ и Спа́са моего́.

Инъ.

Ирмо́съ: Прише́лъ еси́ отъ Дѣ́вы не хода́тай, ни а́нгелъ, но Са́мъ Го́споди вопло́щся, и спа́слъ еси́ всего́ мя человѣ́ка; тѣ́мъ зову́ ти́: сла́ва си́лѣ Твое́й, Го́споди.

Въ гора́хъ и пеще́рахъ, му́дре, быва́я, боже́ственное восхожде́ніе въ се́рдцы поло́жь, вся́ изсуши́лъ еси́ страсте́й то́ки Боже́ственною благода́тію.

Стрѣля́нія де́моновъ, и стрѣ́лъ, и ловле́нія до конца́ отбѣ́глъ еси́, щито́мъ вѣ́ры, преподо́бне, покрыва́емь.

Пове́ржена при ногу́ твое́ю льсти́ваго змíя и смѣ́хъ ви́дяще, су́рово свирѣ́пѣющагося, Пе́тре всесла́вне, вели́чіе Го́сподеви возсыла́емъ.

Богоро́диченъ: Госпо́дь, изъ Тебе́ роди́вся, Госпоже́ Всенепоро́чная, облада́юща врага́ мíромъ изба́ви вся́, преподо́бныя же, я́ко возлю́бльшія Сего́, возвели́чи.

Пѣ́снь 5.

Ирмо́съ: Возсія́й ми́, Го́споди, свѣ́тъ повелѣ́ній Твои́хъ, я́ко къ Тебѣ́ ду́хъ мо́й у́тренюетъ и пое́тъ Тя́: Ты́ бо еси́ Бо́гъ на́шъ, и къ Тебѣ́ прибѣга́ю, Царю́ ми́ра.

Ангеломъ единожи́теля Пафну́тій обрѣ́тъ въ пусты́ни тя́, вели́каго равноа́нгельнаго свѣти́льника, благоче́стно житія́ твоего́ всѣ́мъ яви́ исправле́нія, му́дре.

Возсія́ тебѣ́ Госпо́дь, Его́же отъ души́ вожделѣ́лъ еси́, безстра́стія Свѣ́тъ невече́рній, Ону́фріе, и мíръ въ по́вѣстехъ непоро́чнаго житія́ твоего́ ве́сь просвѣти́лъ еси́, му́дре.

Яко благопроповѣ́дуя, Ону́фріе блаже́нне, е́же прилѣпля́тися Бо́гу на́шему, на Того́ упова́ніе отъ души́ возложи́лъ еси́ и Того́ хвалу́ имѣ́лъ еси́ во устѣ́хъ при́сно.

Богоро́диченъ: Возсія́й ми́, Влады́чице, зарю́ ми́лости Твоея́, во тмѣ́ прегрѣше́ній мои́хъ су́щу, Дѣ́во, и къ свѣ́ту наста́ви покая́нія, молю́ся, и спасе́нія жи́зни.

Инъ.

Ирмо́съ: Свѣ́та Пода́телю и вѣко́въ Тво́рче, Го́споди, во свѣ́тѣ Твои́хъ повелѣ́ній наста́ви на́съ: ра́звѣ бо Тебе́, ино́го Бо́га не зна́емъ.

На го́ры честны́хъ за́повѣдей восте́къ, я́коже Моисе́й, преподо́бне, ви́делъ еси́ Бо́га я́вѣ, я́коже вмѣща́лъ еси́, и, всѣ́ми просвѣ́щся душе́вными чу́вствы, вельми́ просла́вился еси́.

Манове́ніи боже́ственными при́сно удобря́емь, му́дре, пребы́лъ еси́ стра́сти вся́кія неприча́стенъ, Пе́тре, и безстра́стіемъ, я́ко оде́ждею, обле́клся еси́, преподо́бне.

Лѣ́ты мно́гими сокрыва́емо тѣ́ло твое́ въ просвѣще́ніе на́ше яви́ся, источа́я рѣ́ки на́мъ исцѣле́ній и мѵ́ро благода́ти.

Богоро́диченъ: Свяще́нными гла́сы Тя́, добро́ту Іа́ковлю, пое́мъ, пло́тски ро́ждшую мíрови Свѣ́тъ, Иже отъ Свѣ́та, просвѣща́ющь преподо́бныхъ собо́ръ.

Пѣ́снь 6.

Ирмо́съ: Бу́ря мя́ помышле́ній пости́гши, во глубину́ низвлачи́тъ мя́ безмѣ́рныхъ грѣхо́въ, но Ты́, Упра́вителю Благíй, предвари́въ, упра́ви, я́ко проро́ка, и спаси́ мя.

Мра́зомъ померза́емѣй пло́ти твое́й, теплото́ю Ду́ха грѣ́яшеся тво́й ду́хъ; зно́емъ же опаля́емь, му́дре, роса́ прохлажда́ше небе́сная тя́ благода́тію.

Ходя́щу ти́ въ пусты́ни, отъ Бо́га предвожда́лся еси́, сла́вне, свѣтозаре́ніемъ, та́мо хотя́щаго свѣ́та прія́ти тя́ ны́нѣ пропису́я и сла́ву, при́сно пребыва́ющую.

Въ верте́пѣ роди́выйся и на руку́ ста́рца я́ко Младе́нецъ прія́ти сподо́блься, младе́нствующа дѣ́лы благи́ми, ста́рца въ верте́пѣ тя́ учиня́етъ къ лу́чшимъ.

Богоро́диченъ: Бе́здну ми́лости ро́ждшая, страсте́й мои́хъ бе́здну пучи́ною щедро́тъ Твои́хъ пото́пльши, ту́чу отъ души́ пода́ждь ми́ сле́зъ, Богороди́тельнице Всенепоро́чная.

Инъ.

Ирмо́съ: Въ бе́зднѣ грѣхо́внѣй валя́яся, неизслѣ́дную милосе́рдія Твоего́ призыва́ю бе́здну: отъ тли́, Бо́же, мя́ возведи́.

Утве́рждься крѣ́постію Ду́ха, всю́ вра́жію крѣ́пость смири́лъ еси́ и, побѣди́тель бы́въ, ко Христу́ вѣнцено́сецъ восте́клъ еси́.

Стопа́мъ послѣ́дуя бы́лъ еси́, преподо́бне, Петру́ верхо́вному, ка́меню вѣ́ры, его́же и зва́ніе имѣ́лъ еси́ и вѣ́рою бога́тно обогати́лся еси́.

По́двигомъ боже́ственнымъ подвиза́лся еси́, о́тче, и вѣ́ру подо́бно соблю́лъ еси́, про́чее тебѣ́ предлежи́тъ до́браго дѣ́ланія вѣне́цъ.

Богоро́диченъ: Во утро́бу Твою́ всели́ся, и все́ человѣ́ческое существо́ обожи́, и преподо́бныхъ, Чи́стая, мно́жество свяще́нно привлече́.

Конда́къ, гла́съ 3. Подо́бенъ: Дѣ́ва дне́сь.

Сія́ніемъ Ду́ха Пресвята́го, богому́дре, просвѣ́щся, оста́вилъ еси́ я́же въ житіи́ молвы́, пусты́ню же дости́гъ, преподо́бне о́тче, возвесели́лъ еси́ и́же надъ всѣ́ми Бо́га и Зижди́теля, сего́ ра́ди прославля́етъ тя́ Христо́съ, блаже́нне, вели́кій Дарода́тель.

Икосъ:

Кто́ изрече́тъ твоя́ по́двиги, всеблаже́нне? Или́ кто́ отъ земноро́дныхъ досто́йно похва́литъ твое́ житіе́, Ону́фріе о́тче? Якоже безпло́тенъ, пожи́лъ еси́, бы́ліи пита́емь, пи́щу же имѣ́лъ еси́ — Христа́ Бо́га, на Него́же твою́ наде́жду положи́лъ еси́, на́гъ ходя́ въ пусты́няхъ, сту́день и мра́зъ, я́ко безпло́тенъ, терпя́. Сего́ ра́ди То́й тя́ свѣти́льника показа́, блаже́нне, вели́кій Дарода́тель.

Пѣ́снь 7.

Ирмо́съ: Глаго́лавый на горѣ́ съ Моисе́омъ и о́бразъ дѣ́вства явле́й въ купинѣ́, благослове́нъ еси́, Бо́же оте́цъ на́шихъ.

На горѣ́ Илію́ препита́вый вра́номъ, То́й тебѣ́ а́нгеломъ пи́щу посыла́етъ, тя́ велича́я, преподо́бне, Того́ возвели́чившаго.

Якоже фи́никсъ, при исхо́дищахъ прозя́бъ водны́хъ воздержа́нія, пи́щу имѣ́лъ еси́ фи́ники, пита́вся пи́щею болѣ́зней твои́хъ.

Видѣ́ніи разширя́яся, о́тче, болѣ́зньми пита́лся еси́ воздержа́нія и ны́нѣ получи́лъ еси́ го́рнее благопита́ніе, Ону́фріе.

Богоро́диченъ: Иже во чре́во Дѣ́вы всели́выйся и сіе́ небе́съ ши́рши показа́вый, благослове́нъ еси́, Го́споди, Бо́же оте́цъ на́шихъ.

Инъ.

Ирмо́съ: Тѣ́лу злато́му прему́дрыя дѣ́ти не послужи́ша, и въ пла́мень са́ми поидо́ша, и бо́ги и́хъ обруга́ша, среди́ пла́мене возопи́ша и ороси́ я́ а́нгелъ: услы́шася уже́ у́стъ ва́шихъ моли́тва.

Тве́рдымъ по́мысломъ на ра́мо кре́стъ взе́мъ, Распе́ншемуся послѣ́довалъ еси́, я́ко мона́хъ освяще́нъ, опаля́я, я́ко хвра́стіе, стра́сти и вопія́, преблаже́нне: благослове́нъ еси́, Го́споди, Бо́же оте́цъ на́шихъ.

Тя́, лѣ́ты мно́гими сокрове́на, я́ко сокро́вище, явля́етъ та́йно Боже́ственное Сло́во, Пе́тре преподо́бне, въ явле́нно снабдѣ́ніе всѣ́мъ, вта́йнѣ стяжа́вшимъ грѣхо́вныя скве́рны, явле́нна тя́ моли́твенника, ка́ющимся я́сно.

Благово́нно Христу́ обѣ́томъ добродѣ́телей яви́ся кажде́ніе, мѵ́ро излива́емо благово́нно отъ честны́хъ моще́й твои́хъ всѣ́мъ зря́щимъ во удивле́ніе излива́я: съ пло́тію бо а́нгельское житіе́ пожи́лъ еси́.

Богоро́диченъ: Красну́ обрѣ́тъ и добру́ въ жена́хъ Тя́, Пресвята́я, прекра́сное Сло́во всели́ся въ пресвято́е чре́во Твое́, вся́ ли́ки преподо́бныхъ освѣ́щь, зову́щія: благослове́нъ еси́, Го́споди, Бо́же оте́цъ на́шихъ.

Пѣ́снь 8.

Ирмо́съ: Земля́ и вся́, я́же на не́й, мо́ре и вси́ исто́чницы, небеса́ небе́съ, свѣ́тъ и тма́, мра́зъ и зно́й, сы́нове человѣ́честіи, свяще́нницы, благослови́те Го́спода и превозноси́те Его́ во вѣ́ки.

Зе́млю до́льную премину́въ, небе́сную стяжа́лъ еси́ жи́знь, и безпло́тныхъ лико́мъ счи́слился еси́, нося́ пло́ть, Ону́фріе блаже́нне, и зе́млю кро́ткихъ наслѣ́довалъ еси́, ю́же тебѣ́ подаде́ Христо́съ во вѣ́ки.

Сле́зныя ка́пли гаси́ло стяжа́лъ еси́ вои́стинну стра́стнымъ разгорѣ́ніемъ и любо́вію огня́ боже́ственнаго росѣ́ совокупи́лся еси́ безстра́стія — Христу́ Бо́гу на́шему, тѣ́мже тя́ чти́мъ, Ону́фріе богому́дре.

Ангельскому житію́ поревнова́вша непреста́нными моли́твами, руко́ю а́нгела Свои́мъ Та́йнамъ прича́стника, о́тче, Христо́съ тя́ показа́, Вели́каго Совѣ́та вои́стинну Ангелъ, Его́же превозно́симъ во вѣ́ки.

Богоро́диченъ: Земле́ свята́я, изъ Нея́же Христо́съ прозябе́, кла́съ жи́зни, и иста́явшее гла́домъ назда́ человѣ́ческое естество́ дре́внія зло́бы, Богома́ти Всенепоро́чная, тѣ́мже Тя́ пое́мъ во вѣ́ки.

Инъ.

Ирмо́съ: Въ пе́щь о́гненную ко отроко́мъ евре́йскимъ снизше́дшаго и пла́мень въ ро́су прело́жшаго Бо́га, по́йте дѣла́ я́ко Го́спода, и превозноси́те во вся́ вѣ́ки.

Блаже́нства боже́ственнаго сподо́бился еси́ вои́стинну, Пе́тре богому́дре, во́лею обнища́въ и всегда́, му́дре, пла́кавъ, и, кро́токъ бы́въ, наслѣ́дилъ еси́ зе́млю кро́ткихъ.

Бо́дръ имѣ́я по́мыслъ, успи́лъ еси́ страсте́й воста́нія и, усну́въ, со́нъ до́лжный ны́нѣ пра́веднымъ, всѣ́мъ, пребога́те, неусыпа́ющь яви́лся еси́, тя́ чту́щимъ моли́твенникъ.

Зимо́ю и ва́ромъ, му́дре, побѣди́въ зи́му де́монскую, духо́вною теплото́ю потребля́еши я́вѣ и стра́сти умерщвля́еши тѣле́сныя, безстра́стія облиста́я сія́ніемъ.

Въ горѣ́ Аѳо́нстѣй всели́лся еси́, я́коже на Карми́льстѣй иногда́, Пе́тре богому́дре, Ѳесви́тянинъ Илія́, въ безмо́лвіи Бо́га усе́рдно ища́й, досточу́дне, и Сего́ зрѣ́нія, я́ко преподо́бенъ, сподо́бился еси́.

Богоро́диченъ: Уны́лъ имѣ́я по́мыслъ и ду́шу, сластьми́ отягче́ну, къ Тебѣ́ прибѣга́я, Богороди́тельнице Чи́стая, вопію́ Ти: воздви́гни и спаси́ мя, отча́яннаго и осужде́ннаго.

Пѣ́снь 9.

Ирмо́съ: Яко сотвори́ Мнѣ́ вели́чіе Си́льный, и свя́то и́мя Его́, и ми́лость Его́ въ ро́дъ и ро́дъ боя́щимся Его́.

Взира́ніи непреста́нными, я́же къ Бо́гу, о́тче богому́дре, обожа́емь, прича́стіемъ Его́ бы́лъ еси́ бо́гъ и, со а́нгелы служа́, Сего́ сла́виши при́сно.

Умертви́въ пло́ть, побѣди́лъ еси́ врага́, преста́вился еси́ къ невече́рнѣй зари́, небе́сныхъ бла́гъ ты́ наслѣ́дникъ бы́въ, о́тче Ону́фріе.

Любо́вію творя́щихъ святы́й тво́й пра́здникъ отъ вся́каго треволне́нія страсте́й мольба́ми твои́ми избавля́й при́сно, я́ко дерзнове́ніе обрѣ́тъ у Спа́са, Ону́фріе.

Богоро́диченъ: Наде́жду Тя́ и стѣ́ну стяжа́вше, Пречи́стая, упова́емъ улучи́ти блага́я моли́твами Твои́ми, Чи́стая, я́же обѣща́ Христо́съ, воплоти́выйся изъ Тебе́ на́съ ра́ди.

Инъ.

Ирмо́съ: Отъ Бо́га Бо́га Сло́ва, неизрече́нною му́дростію прише́дшаго обнови́ти Ада́ма, я́дію въ тлѣ́ніе па́дшаго лю́тѣ, отъ Святы́я Дѣ́вы неизрече́нно воплоти́вшагося на́съ ра́ди, вѣ́рніи, единому́дренно пѣ́сньми велича́емъ.

Крѣ́постію и держа́вою Христо́съ Бо́гъ тя́ препоя́савъ, укрѣпи́ побѣди́ти хи́трости де́монскія, пребога́те, я́ко возлю́бльша Сего́ отъ всего́ се́рдца и души́. Сего́ ра́ди тя́ вѣ́рою ублажа́емъ и любо́вію.

Яви́лся еси́ въ дому́ Госпо́дни, я́ко ма́слина, богому́дре, еле́емъ по́товъ твои́хъ на́ша умаща́я ли́ца, творя́щихъ тво́й се́й сла́вный и боже́ственный пра́здникъ, мона́ховъ украше́ніе, преподо́бныхъ верхо́вникъ.

Твое́ пресла́вное, источи́вшее, всесла́вный Пе́тре, тѣ́ло благово́нно и красно́ мѵ́ро, вѣ́рныя благово́нія испо́лни, благово́ніе бо Бо́гу и жи́въ, и по кончи́нѣ я́вѣ показа́лся еси́. Тѣ́мже тя́ досто́йно ублажа́емъ.

Освяще́нный Го́споду Бо́гу на́шему сосу́де, му́ченикомъ, и апо́столомъ, и а́нгеломъ собесѣ́дниче, о всѣ́хъ моли́, вѣ́рою тя́ чту́щихъ на земли́, да обря́щемъ вси́ согрѣше́ній оставле́ніе.

Богоро́диченъ: Пощади́ мя, Го́споди, пощади́, егда́ хо́щеши ми́ суди́ти, и не осуди́ мене́ во о́гнь, ниже́ я́ростію обличи́ши мене́, мо́литъ Тя́ Дѣ́ва, Тебе́ ро́ждшая, Христе́, и а́нгельстіи собо́ри, и преподо́бныхъ совокупле́нія.

Свѣти́ленъ. Подо́бенъ: Жены́, услы́шите.

Ангельстіи удиви́шася чи́ни твои́мъ подвиго́мъ, я́же въ пусты́ни твори́лъ еси́, Ону́фріе богоно́се: три́ бо къ шести́десятимъ лѣ́та, о́тче, пости́лся еси́. И ны́нѣ, всеблаже́нне преподо́бне, со Христо́мъ ца́рствуеши въ непроходи́мыя вѣ́ки.

Сла́ва, свята́го Петра́, подо́бенъ то́йже:

Петру́ тезоимени́таго верхо́вному вси́, по́стниковъ похвалу́ и преподо́бныхъ сла́ву, столпа́ небе́снаго, цвѣ́та аѳо́нскаго велегла́сно пѣ́сньми почти́мъ по до́лгу, я́ко моли́твенника на́мъ всѣ́мъ.

[И ны́нѣ], богоро́диченъ:

Богоро́дицу Тя́ вои́стинну исповѣ́дуемъ, Влады́чице, Тебе́ ра́ди спа́сшіися, и́бо Бо́га неизрече́нно родила́ еси́, разру́шшаго кресто́мъ сме́рть и къ Себѣ́ привле́кша преподо́бныхъ собо́ры, съ ни́миже Тя́ восхваля́емъ, Дѣ́во.

На стихо́внѣ окто́иха. Сла́ва, гла́съ 8:

Мона́ховъ мно́жества, наста́вники ва́съ почита́емъ, отцы́ всечестнíи, и́миже мы́ вои́стинну стезю́ пра́вую ше́ствовати позна́хомъ. Блаже́ни есте́ Христу́ рабо́тавшіи и вра́жію низложи́вшіи си́лу, Госпо́дни уго́дницы, а́нгеломъ святы́мъ соприча́стницы, съ ни́миже моли́теся Го́сподеви поми́ловатися душа́мъ на́шимъ.

Крестобогоро́диченъ. Подо́бенъ: О, пресла́внаго чудесе́!

Юница нескве́рная,* Юнца́ ви́дящи, на дре́вѣ* пригвожда́ема во́лею,* рыда́ющи жа́лостнѣ, —* увы́ Мнѣ́, — вопія́ше, —* Люби́мѣйшее Ча́до!* Что́ Ти со́нмъ воздаде́ безблагода́тный евре́йскій,* хотя́ Мя обезча́дствовати* отъ Тебе́, Вселюбе́зне?


НА ЛИТУРГІИ,

Блаже́нна, отъ кано́на Петра́, пѣ́снь 3-я, и Ону́фрія, пѣ́снь 6-я. Проки́менъ, гла́съ 7: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви [о всѣ́хъ, я́же воздаде́ ми́?] Апо́столъ, къ Гала́томъ, зача́ло 213. Аллилу́ія, гла́съ 6: Блаже́нъ му́жъ, боя́йся Го́спода, [въ за́повѣдехъ Его́ восхо́щетъ зѣло́]. Сти́хъ: Си́льно на земли́ бу́детъ [сѣ́мя его́]. Ева́нгеліе Матѳе́я, зача́ло 43. Прича́стенъ: Ра́дуйтеся, пра́ведніи, о Го́сподѣ, [пра́вымъ подоба́етъ похвала́.]

Источникъ: Минíа, мѣ́сяцъ Іу́ній. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 73 об. – 80.

/ Къ оглавленію раздѣла /


Наверхъ / Къ титульной страницѣ

0