Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 21 августа 2017 г. Сейчасъ на порталѣ посѣтителей - 24.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́нія, въ 11-й де́нь.
Соверша́емъ па́мять святы́хъ первому́ченикъ земли́ Кита́йскія.
И, а́ще хра́мъ и́хъ, или́ изво́литъ настоя́тель соверши́ти всено́щное бдѣ́ніе:
[1]


НА МАЛѢЙ ВЕЧЕРНИ,
На Го́споди воззва́хъ, стихи́ры, гла́съ 1. Подо́бенъ: Небе́сныхъ чино́въ.

Небоплете́нныя вѣнцы́ прія́ли есте́ отъ Подвигополо́жника Христа́, пресла́вніи новому́ченицы земли́ Кита́йскія, а́нгеломъ подо́бницы богораче́ніемъ су́ще, о на́съ моли́теся, преле́стнаго житія́ сего́ мо́ре преплы́ти, и въ небе́сную при́стань дости́гнути.

Небодосто́йный ли́че, воскре́сшему Христу́ пожро́стеся, да лу́чшая пріобря́щете, болѣ́зньми и страда́ніи ва́шими возвесели́сте а́нгеловъ и человѣ́ковъ мно́жества, тѣ́мже, па́мять ва́шу соверша́ющія, отъ болѣ́зней и страсте́й мно́гихъ исцѣли́те.

Сла́ва, гла́съ и подо́бенъ то́йже:

Небосвѣ́тліи восто́ка да́льняго свѣти́льницы яви́стеся, и мра́къ а́довъ дре́вняго темнонеи́стовства разори́сте; ску́дства похва́лъ на́шихъ не пре́зрите, но луча́ми небому́дрія ду́ши чту́щихъ по́двигъ ва́шъ при́сно просвѣща́йте.

И ны́нѣ, богоро́диченъ, гла́съ и подо́бенъ то́йже:

Небе́сныхъ чино́въ ра́дованіе,* на земли́ человѣ́ковъ крѣ́пкое предста́тельство,* Пречи́стая Дѣ́во,* спаси́ ны, и́же къ Тебѣ́ прибѣга́ющія,* я́ко на Тя́ упова́ніе* по Бо́зѣ, Богоро́дице, возложи́хомъ.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Му́чениковъ кита́йскихъ* кра́сная исправле́нія воспѣва́юще,* исто́чницы росы́ небе́сныя* обрѣта́емъ цѣльбоно́сныя,* моли́твенницы вѣ́рнымъ вѣ́рніи.

Сти́хъ: Отъ восто́къ со́лнца до за́падъ хва́льно и́мя Госпо́дне.

Ба́нею пакибытія́* улучи́вше просвѣще́ніе,* кро́вію послѣди́* крести́стеся, страда́льцы,* соверше́ннѣйше.

Сти́хъ: Отъ стра́нъ собра́ и́хъ, отъ восто́къ, и за́падъ, и сѣ́вера и мо́ря.

На колесни́цѣ кро́ве ва́шея всѣ́дше,* сла́вніи новому́ченицы,* пу́ть постиго́сте небе́сный,* и въ Но́вый Іерусали́мъ* тѣ́мъ всели́стеся.

Сла́ва, и ны́нѣ, гла́съ 5:

Кто́ воспое́тъ по достоя́нію благосе́рдія Твоего́ бе́здну, Пренепоро́чная Богоневѣ́сто? Му́дріи молча́тъ, красноглаго́ливіи изнемога́ютъ, мы́ же, я́ко младе́нцы, вопіе́мъ Ти́: ра́дуйся, скорбя́щимъ ра́досте, бога́тство ни́щимъ, си́рымъ — Ма́ти и сла́во презрѣ́ннымъ!

Тропа́рь святы́мъ первому́ченикомъ Кита́йскимъ, гла́съ 5:

Въ странѣ́ язы́честѣй вѣ́рою Правосла́вною просвѣти́стеся* и вма́лѣ въ вѣ́рѣ пожи́вше, Ца́рствіе вѣ́чное наслѣ́довасте,* чистото́ю нра́вовъ христіа́нскихъ* лжеблагоче́стіе конфуціа́нское посрами́сте,* и бѣсодохнове́нный будди́змъ попра́сте я́ко уме́ты,* кро́вію ва́шею зе́млю Кита́йскую освяща́юще,* тѣ́мже, мо́лимся, Влады́ку всѣ́хъ моли́те,* страну́ ва́шу въ послѣ́дняя времена́ вѣ́рою Правосла́вною просвѣти́ти,* и на́съ въ не́й укрѣпи́ти.

И отпу́стъ.



НА ВЕЛИЦѢЙ ВЕЧЕРНИ,
Блаже́нъ му́жъ, антифо́нъ, гла́съ 1. На Го́споди воззва́хъ, поста́вимъ стихо́въ 8, и пое́мъ стихи́ры, гла́съ 5. Подо́бенъ: Ра́дуйся, Живоно́сный Кре́сте.

Се́, ны́нѣ, благослови́те Го́спода, вѣ́рніи,* се́, ны́нѣ, ра́дуйся Правосла́вная Це́ркве,* ра́дость му́чениковъ* ди́вно воспѣва́ющи:* свѣти́льники бо но́выми не́бо красу́ется,* а́нгели лику́ютъ, вѣнцы́ и́мъ подаю́ще,* человѣ́цы сра́дуются,* хвале́нія вознося́ще,* земля́ же Кита́йская освяще́нна торжеству́етъ* и мы́ му́ченикъ сла́вныхъ* свѣ́тлое прославле́ніе пра́зднуемъ.

Ра́дуйся ны́нѣ, о́тче Іоа́нне,* свѣти́ло Тобо́льское,* пе́рвыхъ въ Кита́й проповѣ́дникъ Правосла́вія посла́вый;* ра́дуйся и ты́, Ирку́тскій свѣти́льниче,* Инноке́нтіе пречу́дне,* благовѣ́стникомъ правосла́внымъ въ Кита́и покрови́телю и споспѣ́шниче; се́ ча́да ва́ша прославля́ются,* я́ко до́бліи земли́ сея́ первому́ченицы,* се́ безча́дная ражда́етъ,* безво́дная пусты́ня рѣ́ки живота́ источа́етъ,* чу́до ди́вное,* ра́досте ве́лія,* о на́съ Христа́, му́ченицы, моли́те.

Гла́съ 8:

Го́споди, благоволи́лъ еси́ зе́млю Твою́,* и язы́комъ Свѣ́тъ яви́лся еси́,* крила́ про́повѣди и́стины и надъ земле́ю на́шею просте́рлъ еси́, —* си́це му́ченицы взыва́ху, —* егда́ Тебе́ ра́ди, Іису́се Сладча́йшій, закала́хуся,* си́це и мы́ Тя́ прославля́емъ,* Животе́ и Воскресе́ніе на́ше,* Го́споди, сла́ва Тебѣ́!

О, ди́вное вѣ́ры та́инство!* О, глубины́ прему́дрости Твоея́, Христе́!* Во всѣ́хъ бо язы́цѣхъ спасе́ніе Твое́,* и́бо па́дшему ро́ду на́шему покая́ніе* ту́не дарова́ти изво́лилъ еси́,* что́ у́бо возда́мы Тебѣ́? —* Си́це глаго́летъ святы́хъ новому́ченикъ собо́ръ,* и́мже ны́нѣ со слеза́ми мо́лимся:* отъ вся́кихъ бѣ́дъ свободи́те* любо́вію ва́съ чту́щія.

Сла́ва, гла́съ 2:

Собо́ре святы́хъ новому́ченикъ,* земли́ Кита́йскія по́лче боже́ственный,* утвержде́ніе вѣ́рнымъ, ликова́ніе всѣ́хъ святы́хъ:* рѣза́нія го́рькія болѣ́зни,* кро́ве то́ки, во главу́ усѣче́нія,* у́дъ терза́нія, пло́ти раздра́нія, —* вся́ претерпѣ́ли есте́, ди́вніи, на ка́мени вѣ́ры и́стинныя утверди́вшеся,* пѣ́ніе Бо́гу въ му́кахъ возсыла́ли есте́,* и я́ко зла́то въ горни́лѣ просвѣ́щшеся,* ва́съ велича́ющихъ въ ско́рбехъ укрѣпля́ете.

И ны́нѣ, богоро́диченъ пра́здника.
Вхо́дъ. Свѣ́те Ти́хій. Проки́менъ дне́ и чте́нія 3.


Проро́чества Иса́іина чте́ніе:

Та́ко глаго́летъ Госпо́дь: вси́ язы́цы собра́шася вку́пѣ, и соберу́тся кня́зи отъ ни́хъ, кто́ возвѣсти́тъ сія́ въ ни́хъ? Или́ я́же отъ нача́ла, кто́ слы́шана сотвори́тъ ва́мъ? Да приведу́тъ свидѣ́тели своя́ и оправдя́тся, и да услы́шатъ, и да реку́тъ и́стину. Бу́дите Ми́ свидѣ́тели, и Азъ Свидѣ́тель, глаго́летъ Госпо́дь Бо́гъ, и отрокъ, его́же избра́хъ, да позна́ете и вѣ́руете Ми́, и разумѣ́ете, я́ко Азъ е́смь; пре́жде Мене́ не бы́сть и́нъ бо́гъ, и по Мнѣ́ не бу́детъ. Азъ е́смь Бо́гъ, и нѣ́сть ра́звѣ Мене́ спаса́яй. Азъ возвѣсти́хъ и спасо́хъ, уничижи́хъ, и не бѣ́ въ ва́съ чу́ждій. Вы́ Мнѣ́ свидѣ́тели, и Азъ Госпо́дь Бо́гъ. И еще́ отъ нача́ла Азъ е́смь, и нѣ́сть отъ ру́къ Мои́хъ избавля́яй; сотворю́, и кто́ отврати́тъ то? Си́це глаго́летъ Госпо́дь Бо́гъ, избавля́яй ва́съ Святы́й Изра́илевъ.

Прему́дрости Соломо́новы чте́ніе:

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе сокруше́ніе; они́ же су́ть въ ми́рѣ. Ибо предъ лице́мъ человѣ́ческимъ а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Яко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ возсія́ютъ и, я́ко и́скры по сте́блію, потеку́тъ: су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе:

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

На литíи стихи́ры, гла́съ 1. Подо́бенъ: Всехва́льніи му́ченицы.

Всехва́льніи му́ченицы, Кита́я боговѣнча́нный со́нме, ро́да ва́шего не забу́дите, но, я́ко зва́нніи свы́ше, Вы́шняго Бо́га те́плѣ умоля́йте, о грѣсѣ́хъ на́шихъ не прогнѣ́ватися до конца́, ерети́ческая злохуле́нія сло́вомъ прему́дрости попали́ти, и́стинную вѣ́ру въ земли́ ва́шей умно́жити, сердца́ на́ша окамене́нная умягчи́ти, и свѣ́томъ Боже́ственнымъ, ва́съ почита́ющихъ, спаси́тельнѣ озари́ти.

Гла́съ 2. Подо́бенъ: Кíими похва́льными.

Кíими похва́льными пѣ́сньми просла́вимъ свѣ́тлое ва́ше сконча́ніе, Христо́вы а́гнцы непоро́чніи, свяще́нными усты́ Тро́ицу ны́нѣ прославля́ющіи, благоче́стія побо́рницы, сла́вы небе́сныя люби́теліе, исто́чники благода́тныхъ исцѣле́ній неисчерпа́еміи, вѣ́рнымъ те́пліи посо́бники, моля́щіися Христу́ дарова́ти на́мъ ве́лію ми́лость.

Гла́съ 4.

Язы́ки на земли́ наста́виши, воспѣ́ иногда́ Дави́дъ богоглаго́ливый, позна́ти пу́ть Тво́й: приспѣ́ у́бо и земли́ Кита́йстѣй вре́мя, согла́сно проро́честву псало́мника, пло́дъ принести́ Вертогра́дарю Творцу́, сла́достный и до́брый — новому́ченикъ пресвѣ́тлое мно́жество, моля́щихся Христу́ о спасе́ніи ду́шъ на́шихъ.

Сла́ва, гла́съ 6:

Свѣ́тлое, па́мяти ва́шея, торжество́ соверша́юще, весе́ліемъ исполня́емся. Дерзнове́ннымъ моли́твенникомъ су́щимъ ва́мъ, о на́съ проле́йте те́плое моле́ніе, немощны́я укрѣпи́те, боля́щимъ здра́віе да́руйте, скорбя́щимъ же и озло́бленнымъ — утѣше́ніе, ра́дующимся — смире́ніе, обурева́емымъ страстьми́ — цѣлому́дріе, невѣ́рнымъ — просвѣще́ніе, вѣ́рнымъ же — вся́ческихъ грѣхо́въ устране́ніе.

И ны́нѣ, богоро́диченъ, гла́съ то́йже:

Ны́нѣ раздра́ся совѣ́тъ діа́воль, ны́нѣ сокруши́ся держа́ва сатаны́: Рождество́мъ бо Твои́мъ, Ма́ти Дѣ́во, я́ко пти́цы отъ сѣ́ти новому́ченицы изба́вишася, Свѣ́томъ и́стиннымъ просвѣти́шася и се́, предстоя́ще предъ престо́ломъ Бо́жіимъ, съ Тобо́ю мо́лятся о спасе́ніи всѣ́хъ почита́ющихъ Тя́, Богоро́дицу, вои́стинну.

На стихо́внѣ стихи́ры, гла́съ 8. Подо́бенъ: О, пресла́внаго чудесе́!

Богому́дрый собо́ре,* наста́ дне́сь па́мять ва́ша лучеза́рная,* Христо́ва Ца́рствія наслѣ́дницы,* послуша́нія до сме́рти и любве́ боже́ственныя подви́жницы:* вся́ Це́рковь ва́съ любо́вію пое́тъ,* со́лнце и звѣ́зды вку́пѣ сликовству́ютъ,* вы́ же собра́вшимся въ хра́мѣ ва́шемъ* подава́ете ми́ръ, и ра́дость* и наде́жду спасе́нія.

Сти́хъ: Отъ восто́къ со́лнца до за́падъ хва́льно и́мя Госпо́дне.

О, пресла́внаго чудесе́!* Низборе́ніе де́моновъ, человѣ́комъ засту́пницы,* показа́лъ еси́, Христе́ Бо́же на́шъ,* страстоте́рпцы земли́ Кита́йскія,* и́же во ору́жіе свѣ́та обле́кшеся,* лю́тыя му́ки претерпѣ́ша,* вы́спрь я́ко орлы́ воспари́ша,* поднебе́сныхъ духо́въ посрами́ша,* и въ черто́гъ небе́сный всели́шася.

Сти́хъ: Отъ стра́нъ собра́ и́хъ, отъ восто́къ, и за́падъ, и сѣ́вера и мо́ря.

Ра́дуйся, богозва́нный му́чениковъ собо́ре,* ра́дуйся, свѣтоплодови́тый са́де богоса́дный,* сугубосо́тный по́лче боже́ственный;* земля́ Кита́йская даде́ пло́дъ сво́й* Содѣ́телю вся́ческихъ: кро́вь ва́шу — вѣ́рнымъ рѣ́ки цѣле́бныя;* пло́ти умерщвле́ніе — а́нгеловъ весе́ліе;* моли́твы ва́ша —* человѣ́комъ спасе́ніе.

Сла́ва, гла́съ 5. Подо́бенъ: Ра́дуйся.

Ра́дуйся, страстоте́рпецъ собо́ре боже́ственный,* звѣре́мъ неви́димымъ зу́бы сокруши́вшіи,* а́нгеломъ подража́теліе,* человѣ́комъ те́пліи предста́теліе,* Це́ркве украше́ніе,* вѣ́рнымъ приста́нище,* странѣ́ Кита́йстѣй печа́льницы,* правосла́внымъ въ не́й прише́льцемъ храни́теліе,* усе́рдно моля́щіися о душа́хъ на́шихъ.

И ны́нѣ, богоро́диченъ, гла́съ то́йже:

Хра́мъ и Две́рь еси́, Пала́та и Престо́лъ Царе́въ, Дѣ́во всечестна́я, Еюже Изба́витель мо́й, Христо́съ Госпо́дь, во тмѣ́ спя́щимъ яви́ся, Со́лнце сы́й пра́вды, просвѣти́ти хотя́, я́же созда́ по о́бразу Своему́ руко́ю Свое́ю. Тѣ́мже, Всепѣ́тая, я́ко Ма́терне дерзнове́ніе къ Нему́ стяжа́вшая, непреста́нно моли́, спасти́ся душа́мъ на́шимъ.

На благослове́ніи хлѣ́бовъ, тропа́рь первому́ченикомъ два́жды, та́же Богоро́дице Дѣ́во, еди́ножды.



НА УТРЕНИ.
На Бо́гъ Госпо́дь: тропа́рь первому́ченикомъ, гла́съ 5:

Въ странѣ́ язы́честѣй вѣ́рою Правосла́вною просвѣти́стеся* и вма́лѣ въ вѣ́рѣ пожи́вше, Ца́рствіе вѣ́чное наслѣ́довасте,* чистото́ю нра́вовъ христіа́нскихъ* лжеблагоче́стіе конфуціа́нское посрами́сте,* и бѣсодохнове́нный будди́змъ попра́сте я́ко уме́ты,* кро́вію ва́шею зе́млю Кита́йскую освяща́юще,* тѣ́мже, мо́лимся, Влады́ку всѣ́хъ моли́те,* страну́ ва́шу въ послѣ́дняя времена́ вѣ́рою Правосла́вною просвѣти́ти,* и на́съ въ не́й укрѣпи́ти. [Два́жды.]

Сла́ва, и ны́нѣ, богоро́диченъ, гла́съ то́йже:

Еже отъ вѣ́ка утае́нное,* и а́нгеломъ несвѣ́домое та́инство:* Тобо́ю, Богоро́дице, су́щимъ на земли́ яви́ся,* Бо́гъ въ несли́тномъ соедине́ніи воплоща́емь,* и кре́стъ во́лею на́съ ра́ди воспріи́мъ,* и́мже воскреси́въ первозда́ннаго,* спасе́ отъ сме́рти ду́ши на́ша.

По 1-мъ стихосло́віи сѣда́ленъ, гла́съ 6:

Ца́рствующу импера́тору Гуансю́ю въ земли́ Кита́йстѣй, Христо́съ въ ва́съ, му́ченицы крѣ́пкіи, всели́ся и ца́рствіе Свое́ неви́димо ва́мъ дарова́; и́же бо на Крестѣ́ спа́сшагося о́бразъ на себѣ́ нося́ще, во еди́номъ часѣ́ ра́еви сподо́бистеся. Тѣ́мже и на́съ помяни́те предъ престо́ломъ Влады́чнимъ.

Сла́ва: Свѣти́ла богоозаре́нная, Христо́вы му́ченицы, просвѣти́те ро́дъ ва́шъ во тмѣ́ житія́, я́ко да но́щь невѣ́рія преше́дше, благообра́зіе Христо́во возлю́бятъ, и слѣдотворе́ньми ва́шими укрѣ́пльшеся, ва́мъ благода́рственная воспою́тъ.

И ны́нѣ, богоро́диченъ: Немо́кренно дре́вле Изра́иль Тебе́, Пречи́стая, прообразу́я, Чермно́е про́йде мо́ре, ны́нѣ но́вый Изра́иль неискусобра́чіе Твое́ пое́тъ, и съ му́ченики вопіе́тъ: незаходи́мыми луча́ми ро́дъ человѣ́ческій просвѣ́щшая, просвѣти́ вся́ и́щущія Го́спода и Сы́на Твоего́.

По 2-мъ стихосло́віи сѣда́ленъ, гла́съ 3:

Первозва́нніи ва́съ обрѣ́те Христо́съ ро́да кита́йскаго му́ченицы, я́коже у́бо низложи́ли есте́ змíеву горды́ню, и на по́двигъ дерзнове́нно поте́кше, въ тѣлесѣ́хъ ва́шихъ Христа́ просла́вили есте́; То́го у́бо, святíи, прилѣ́жно ны́нѣ моли́те, дарова́ти на́мъ ве́лію ми́лость.

Сла́ва: Рожде́нніи во тьмѣ́ невѣ́дѣнія, богоза́рни по сме́рти яви́стеся. О, ва́шего боголю́бія! Аще и недо́лзѣ въ вѣ́рѣ пожи́вше, крѣ́пцы въ му́кахъ за Христа́ пребы́сте, тѣ́мже согла́сно ва́мъ пое́мъ: ра́дуйтеся, боговожделѣ́нніи ро́да кита́йскаго свѣти́льницы!

И ны́нѣ, богоро́диченъ: Свѣтонача́льника Христа́ ро́ждшая, Тому́, со святи́тели да́льняго восто́ка: Инноке́нтіемъ, Никола́емъ, но́вымъ Іоа́нномъ и Іо́ною новопросла́вленнымъ, те́плѣ моли́ся, свѣтозаре́ніемъ Боже́ственнаго сло́ва сла́ву Свою́ повѣ́сти и въ ро́дѣ Кита́йстѣмъ, Богоро́дице Дѣ́во.

По поліеле́и сѣда́ленъ, гла́съ 8:

Высо́кими умы́, дре́вомъ кре́стнымъ просвѣти́вшеся, во главѣ́ съ Митрофа́номъ, нача́ло свѣ́тлое, въ му́кахъ освяще́нный со́нме, положи́сте ро́ду ва́шему: да не оскудѣ́ютъ у́бо отъ ва́съ сле́зныя моле́нія, во е́же сле́зъ испо́лненное житіе́ преити́ спаси́тельнѣ всѣ́мъ чту́щимъ ва́съ любо́вію.

Сла́ва, и ны́нѣ, богоро́диченъ:

Непоро́чная Агнице, Богома́ти Пречи́стая, кто́ любо́вь Твою́ ко всѣ́мъ человѣ́комъ изрече́тъ? Тобо́ю весели́тся вся́кая тва́рь, Тебѣ́ сра́дуется новопросла́вленный земли́ Кита́йскія первому́ченикъ собо́ръ, и́хже моли́твы о на́съ пріе́мши, принеси́ Сы́ну Твоему́, да спасе́тъ Тобо́ю ду́ши на́ша.

Та́же степе́нна, 1-й антифо́нъ 4-го гла́са. Проки́менъ, гла́съ 4: Тебе́ ра́ди, Го́споди,* умерщвля́еми есмы́ ве́сь де́нь. Сти́хъ: Вмѣни́хомся я́ко о́вцы заколе́нія. Вся́кое дыха́ніе да хва́литъ Го́спода. Ева́нгеліе отъ Матѳе́я, зача́ло 36. По 50-мъ псалмѣ́, Сла́ва: Моли́твами новому́чениковъ... и про́чая.

Та́же стихи́ра, гла́съ 6-й:

Земля́ Кита́йская дне́сь свѣтоно́сными освяща́ется кровьми́,* вѣ́ка захо́дъ озаря́ется му́ченическими свѣтлостьми́,* и Це́рковь Христо́ва благоза́рными красу́ется звѣзды́,* свѣ́томъ бо Христо́выхъ просвѣ́щшеся страсте́й,* страстоно́сіе сконча́ша сла́вно новому́ченицы,* жи́зни вѣ́чныя вѣнцы́ прія́ша,* и свѣтонаста́вницы всѣ́мъ пра́вды жа́ждущимъ яви́шася.

Кано́нъ святы́мъ первому́ченикомъ земли́ Кита́йскія, гла́съ 6.

Пѣ́снь 1.

Ирмо́съ: Волно́ю морско́ю скры́вшаго дре́вле, гони́теля мучи́теля — подъ земле́ю скры́ша спасе́нныхъ о́троцы; но мы́ я́ко отрокови́цы, Го́сподеви пои́мъ, сла́вно бо просла́вися.

Припѣ́въ: Святíи первому́ченицы кита́йстіи, моли́те Бо́га о на́съ!

Пра́вду Твою́, Христе́ Бо́же, въ се́рдцѣ мое́мъ не скры́ю, и спасе́ніе Твое́ во всѣ́хъ язы́цѣхъ воспою́; прикосни́ся у́бо усто́мъ мои́мъ, у́гліемъ Ду́ха Твоего́ скве́рну мою́ очища́я, Сло́ве, да доброслове́снѣ воспою́ первому́ченикъ кита́йскихъ по́двигъ кра́сный.

Святы́й апо́столе Ѳомо́, Ева́нгелія въ земли́ импера́тора же́лтаго пе́рвый проповѣ́дниче, ра́дуйся ны́нѣ, досто́йное ро́ждіе Христо́во зря́: новому́чениковъ ли́къ, вѣ́ры Правосла́вныя, тобо́ю дре́вле проповѣ́данныя, но́вая хвала́, вѣ́рнымъ же ра́дованіе.

Сѣдя́щимъ ва́мъ во тьмѣ́ и сѣ́ни сме́ртнѣй, свѣ́томъ Правосла́вія озари́стеся и къ и́стинному Бо́гу, въ Тро́ицѣ Еди́ному, всѣ́мъ се́рдцемъ притеко́сте, отону́дуже и свѣтоно́сіемъ ва́шимъ вѣ́рніи ны́нѣ просвѣща́ются.

Свяще́ннѣйшее и́мя Христо́во въ Кита́и ва́ми ны́нѣ возвели́чися, прехва́льніи страстоте́рпцы, и́бо во исповѣ́даніи ва́шемъ до конца́ непоколе́блемо пребы́вше, а́нгеловъ возра́довасте и человѣ́ковъ удиви́сте.

Богоро́диченъ: Вои́стинну Тя́, Дѣ́во Преблагослове́нная, вси́ ро́ди велича́ютъ, се́ бо и земля́ Кита́йская Тебѣ́ новому́ченикъ усты́ благода́рственная воспису́етъ: ра́дуйся, Спа́са на́шего нетлѣ́нно ро́ждшая.

Пѣ́снь 3.

Ирмо́съ: Тебе́, на вода́хъ повѣ́сившаго всю́ зе́млю неодержи́мо, тва́рь, ви́дѣвши на ло́бнѣмъ ви́сима, у́жасомъ мно́гимъ содрога́шеся, нѣ́сть свя́тъ, ра́звѣ Тебе́, Го́споди, взыва́ющи.

Аще и въ странѣ́ безбо́жнѣй роди́стеся, богорачи́тельнѣ и́стину взыска́сте и во́ду живу́ю въ живо́тъ вѣ́чный теку́щую въ Це́ркви Правосла́внѣй обрѣто́сте.

Сни́де неча́янно до́ждь испыта́ній, пріидо́ша рѣ́ки гнѣ́ва, язы́ковъ бу́ри нападо́ша на вы́, христому́ченицы до́бліи, и́хже небу́рно, я́ко вѣ́рніи Христу́ до сме́рти, претерпѣ́сте до конца́.

Кра́сное ва́ше къ Го́рнему Іерусали́му ше́ствіе воспѣва́емъ, мужедо́блестію диви́мся, боголю́біемъ ва́шимъ ду́ши на́ша, досточу́дніи, услажда́ются, тѣ́мъ у́бо бу́дите на́мъ и въ ра́достѣхъ и въ ско́рбехъ соше́ственники.

Аще посредѣ́ те́рній кри́ну прозя́бшему диви́мся, кольми́ па́че свѣ́тлымъ си́мъ звѣзда́мъ, въ бе́зднѣ язы́ческаго мра́ка я́сно возблиста́вшимся, ва́съ пое́мъ, восто́ка да́льняго богоза́рніи свѣти́льницы.

Богоро́диченъ: Бо́гъ посреди́ Тебе́ всели́вся, ника́ко дѣ́вства Твоего́ ключи́ поколеба́, Чи́стая, Его́же прилѣ́жно моли́, утверди́ти вся́ пою́щія Тя́.

Сѣда́ленъ, гла́съ 8:

Свѣ́томъ небе́снымъ сія́етъ дне́сь хра́мъ се́й: недугоцѣли́тельный кла́дязь неисчерпа́емый, новому́ченикъ собо́ръ, во́дъ свои́хъ подае́тъ живоро́дную сла́дость, любо́вію чту́щимъ я́, и сласте́й напое́ніе го́рькое су́шитъ.

Сла́ва, и ны́нѣ, богоро́диченъ:

Земна́го житія́ преле́стныхъ отто́ргшеся, и пло́ти му́ками креству́емы отрѣ́шшеся, крестоно́сному Бо́гу на́шему вѣ́рны до сме́рти пребы́ша, отъ Тебе́ пло́тію Рожде́нному, Ма́ти Дѣ́во; и́хъ моли́твами, я́ко Блага́я, очи́сти ны́ отъ вся́каго грѣха́, Кресто́мъ Боже́ственнымъ.

Пѣ́снь 4.

Ирмо́съ: На Крестѣ́ Твое́ Боже́ственное истоща́ніе прови́дя, Авваку́мъ, ужа́сся, вопія́ше: Ты́ си́льныхъ пресѣ́клъ еси́ держа́ву, Бла́же, пріобща́яся су́щимъ во а́дѣ, я́ко Всеси́ленъ.

Му́ченицы преблаже́нніи, са́ми себе́ на во́льное преда́сте заколе́ніе, и зе́млю Кита́йскую кровьми́ свои́ми освяти́вше, и ны́нѣ о всѣ́хъ, любо́вію па́мять ва́шу пра́зднующихъ, моли́те Христа́ Бо́га.

Припѣ́въ: Святы́й му́чениче Па́вле, моли́ Бо́га о на́съ.

Па́влу, вели́кому язы́къ апо́столу, тезоимени́те, му́чениче Па́вле, ра́дости испо́лнь, про́повѣди послужи́лъ еси́ ева́нгельстѣй, и съ моли́твою во устѣ́хъ ду́шу свою́ Бо́гу возлю́бленному отъ тебе́ преда́лъ еси́.

Припѣ́въ: Свята́я му́ченице Іе, моли́ Бо́га о на́съ.

Іе, блаже́нная вѣ́ры наста́внице, не убоя́лася еси́ за Христа́ пострада́ти, и два́жды заму́чена бы́вши, кра́сное по́прище, я́ко а́гница Христо́ва непоро́чная, въ чи́стѣй вѣ́рѣ сконча́ла еси́.

Припѣ́въ: Святы́й му́чениче Іоа́нне, моли́ Бо́га о на́съ.

Отроче Іоа́нне, о́смь лѣ́тъ отъ рождества́ твоего́ въ мíрѣ се́мъ пожи́въ, мѣ́ру во́зраста Христо́ва дости́глъ еси́, я́ко за Христа́ закла́нъ бы́лъ еси́, та́же я́ко а́гнецъ всесожже́нъ. Ра́дуйся ны́нѣ, но́вый Ісаа́че, ра́дуйся, му́чениче всечу́дне!

Богоро́диченъ: Богороди́тельнице пречу́дная, Просвѣще́ніе мíру ро́ждшая, не преста́й моля́щи вку́пѣ съ новому́ченики, ны́нѣ прославля́емыми, Сы́на и Бо́га Твоего́, дарова́ти и ро́ду кита́йскому, въ идолослуже́ніи углѣ́бшему зѣло́, поне́ наконе́цъ просвѣще́ніе.

Пѣ́снь 5.

Ирмо́съ: Богоявле́нія Твоего́, Христе́, къ на́мъ ми́лостивно бы́вшаго, Иса́ія, Свѣ́тъ ви́дѣвъ Невече́рній, изъ но́щи у́треневавъ взыва́ше: воскре́снутъ ме́ртвіи, и воста́нутъ су́щіи во гробѣ́хъ, и вси́ земноро́дніи возра́дуются.

Сія́етъ па́мять ва́ша, рабы́ Христо́вы вѣ́рніи, и вѣ́рныхъ сердца́ те́плѣ озаря́етъ, покланя́ющихся любо́вію о́бразу честно́му ва́шему и пою́щихъ ва́мъ: ра́дуйтеся, ве́лія бо есте́ вѣ́ры Правосла́вныя похвала́!

О, преблаже́нніи Христо́вы уго́дницы! Не забу́дите оте́чества ва́шего земна́го: мра́къ Богопротивле́нія отжени́те, въ невѣ́дѣніи косня́щія просвѣти́те, и покая́нія вре́мени всѣ́мъ дарова́тися у Христа́ неотсту́пно проси́те.

Воспои́мъ свѣ́тлыя о́троцы кита́йскія, отъ возбѣснѣ́вшихся язы́чникъ за Христа́ закла́нныя; тѣ́хъ па́мять ны́нѣ соверша́емъ, виѳлее́мское по́двига и́хъ подо́біе тайнозря́ще: тацѣ́хъ бо е́сть Ца́рствіе небе́сное!

Припѣ́въ: Святы́й му́чениче Іоа́нне, моли́ Бо́га о на́съ.

Отроче Іоа́нне, предъ сме́ртію осклабля́яся, мучи́телемъ ре́клъ еси́, я́ко нѣ́сть тя́жко за Христа́ страда́ти. О, чу́дное земли́ Кита́йскія прозябе́ніе! Благоуха́ніемъ кро́тости твоея́ испо́лни и на́ша сердца́!

Богоро́диченъ: Всѣ́хъ Творца́, Бо́га же и Содѣ́теля, Всенепоро́чная Чи́стая, Ду́хомъ Боже́ственнымъ въ ложесна́хъ зачала́ еси́, Его́же сла́вяще, Тя́ воспѣва́емъ, Дѣ́во, я́ко пала́ту Царя́ всѣ́хъ, и мíра заступле́ніе.

Пѣ́снь 6.

Ирмо́съ: Я́тъ бы́сть, но не удержа́нъ въ пе́рсехъ ки́товыхъ Іо́на: Тво́й бо о́бразъ нося́, Страда́вшаго, и погребе́нію да́вшагося, я́ко отъ черто́га отъ звѣ́ря изы́де. Приглаша́ше же кустодíи: храня́щіи су́етная и ло́жная, ми́лость сію́ оста́вили есте́.

Припѣ́въ: Святы́й священному́чениче Митрофа́не, моли́ Бо́га о на́съ.

Досто́йно е́сть хвале́ніе осо́бь тебѣ́ воспѣ́ти, пе́рвый въ Кита́и священному́чениче вѣ́ры Правосла́вныя; благослови́ ны свы́ше, о́тче достохва́льне, и моли́тву на́шу Бо́гу принеси́.

Припѣ́въ: Святы́й священному́чениче Митрофа́не, моли́ Бо́га о на́съ.

Въ дому́ христіа́нъ правосла́вныхъ ро́ждься, во благоче́стіи до́брѣ воспита́нъ бы́лъ еси́, и отъ ю́ности твоея́ и́стинную вѣ́ру возлюби́лъ еси́, Митрофа́не достоблаже́нне.

Припѣ́въ: Святы́й священному́чениче Митрофа́не, моли́ Бо́га о на́съ.

Въ вѣ́рѣ Христо́вѣ непоколеби́мъ пребы́въ, удосто́ился еси́ до сме́рти за Христа́ пострада́ти, тѣ́мже ра́дуйся, пра́вило вѣ́ры, о́бразе кро́тости, благоче́стія похвало́!

Припѣ́въ: Святы́й священному́чениче Митрофа́не, моли́ Бо́га о на́съ.

Свяще́ннаго зва́нія а́ще и недосто́йна себе́ непщева́лъ еси́, возведе́ тя́ апо́столъ Япо́ніи вели́кій Никола́й на го́ру па́стырскаго ро́ду твоему́ служе́нія; ны́нѣ же съ равноапо́столомъ Тро́ицѣ ку́пно предстоя́ща, моли́тася усе́рдно спасти́ся душа́мъ на́шимъ.

Припѣ́въ: Святы́й священному́чениче Митрофа́не, моли́ Бо́га о на́съ.

Пе́рвѣе по́ты служе́нія ни́ву ду́шъ напая́я, по́слѣжде кро́ве проли́тіемъ зла́ки немощны́я укрѣпля́я, и по сме́рти о ро́дѣ твое́мъ пече́шися, сла́вне.

Богоро́диченъ: Святѣ́йшу а́нгеловъ и всея́ тва́ри Вы́шшу, изъ Тебе́ пло́тію Роди́выйся, Тя́ содѣ́ла, тѣ́мже, я́ко Влады́чица, съ новому́ченики земли́ Кита́йскія, о на́съ Сы́на и Бо́га Твоего́ моли́.

Конда́къ, гла́съ 1:

Му́ченицы послѣ́днихъ време́нъ,* въ кро́ви Агнчей ри́зы своя́ убѣли́ли есте́,* любве́ ра́ди ко Христу́ кро́вь ва́шу пролія́ли есте́,* сего́ ра́ди ны́нѣ въ Це́ркви небе́снѣй де́нь и но́щь Ему́ слу́жите;* тѣ́мже за ны́ Христа́ моли́те, му́ченицы сла́вніи,* отъ прельще́нія анти́христа да сокры́етъ ма́лое ста́до свое́,* и отъ ско́рби вели́кія да на́съ всѣ́хъ приведе́тъ* ко странѣ́ невече́рняго свѣ́та.

Икосъ:

Ангельстіи во́и возра́дувахуся, егда́ отъ мра́ка язы́чества къ свѣ́ту Правосла́вія притеко́сте, святы́мъ креще́ніемъ ду́ши и тѣлеса́ ва́ша отъ грѣхо́въ ощища́юще. Мы́ же, жре́бій тя́жкій въ вѣ́цѣ се́мъ но́ваго язы́чества Христу́ служи́ти улучи́вше, предъ ико́ною ва́шею пѣ́ніе возно́симъ сицево́е: ра́дуйтеся, исповѣ́дницы Христо́вы въ вѣ́цѣ се́мъ богоху́льнѣмъ; ра́дуйтеся, свѣ́тлыя звѣ́зды восто́ка; ра́дуйтеся, Истинному Бо́гу покло́нницы вѣ́рніи; ра́дуйтеся, си́льніи бѣсо́мъ сопротивобо́рцы; ра́дуйтеся, свѣти́льницы, тьму́ язы́ческую разгна́вшіи; ра́дуйтеся, и́долы скве́рныя попра́вшіи; ра́дуйтеся, земли́ Кита́йскія кри́ны пречу́дніи; ра́дуйтеся, о просвѣще́ніи ро́да ва́шего те́плѣ моля́щіися; ра́дуйтеся, о́вцы многострада́льныя Па́стыря за ны́ закла́вшагося; ра́дуйтеся, терпѣ́нія столпы́ богорачи́тельнаго; ра́дуйтеся, Боже́ственныя любве́ со́лнца огнезра́чная; ра́дуйтеся, отъ но́щи невѣ́дѣнія ко у́тру богозна́нія дости́гшіи; ра́дуйтеся, сла́вніи первому́ченицы кита́йстіи, на́съ до конца́ претерпѣ́ти укрѣпля́ющіи!

Пѣ́снь 7.

Ирмо́съ: Неизрече́нное чу́до: въ пещи́ Изба́вивый преподо́бныя о́троки изъ пла́мене, во гро́бѣ ме́ртвъ бездыха́ненъ полага́ется, во спасе́ніе на́съ пою́щихъ: Изба́вителю Бо́же, благослове́нъ еси́.

Припѣ́въ: Свята́я м́ченице Татіа́но, моли́ Бо́га о на́съ.

Новому́ченицу Татіа́ну, во главу́ за Христа́ усѣче́нную восхва́лимъ, та́ бо за на́съ хода́тайствуетъ предъ престо́ломъ Тро́ицы Боже́ственныя, е́же спасти́ся всѣ́мъ пою́щимъ ю́.

Припѣ́въ: Святы́й м́чениче Иса́іе, моли́ Бо́га о на́съ.

Ре́вность проро́ческую ко Христу́ имѣ́я, блаже́нне Иса́іе, не пощади́лъ еси́ тлѣ́нныя пло́ти твоея́, недосто́йны непщу́я стра́сти вре́менныя ко хотя́щей по ни́хъ яви́тися сла́вѣ небе́снѣй.

Припѣ́въ: Свята́я м́ченице Марíе, моли́ Бо́га о на́съ.

Иса́ія пресла́внаго обру́чнице, ди́вная новому́ченице Марíе, Пречи́стѣй Богома́тери тезоиме́нна су́щи, близъ це́ркве Ея́, идѣ́же и роди́лася еси́, умре́ти восхотѣ́ла еси́.

Ра́дуйтеся, адама́нты тве́рдіи, Христо́вы исповѣ́дницы; ра́дуйтеся, вѣ́рнымъ храни́теліе неотсту́пніи; ра́дуйтеся, ча́ши Христо́вѣ прича́стницы, креще́ніемъ Его́ крести́вшіися; вели́кую ва́шу къ Бо́гу любо́вь вся́ Це́рковь ны́нѣ воспѣва́етъ.

Богоро́диченъ: Новъ Ада́мъ за пе́рваго Ты́ бы́лъ еси́, отъ Дѣ́вы за прама́терь, Изба́витель всѣ́хъ и Спа́съ, за сме́рть — и́стинная Жи́знь безсме́ртная, тѣ́мже Тя́ ро́ждшую Богоро́дицу вѣ́дуще, по достоя́нію вси́ вѣ́рніи ублажа́емъ.

Пѣ́снь 8.

Ирмо́съ: Ужасни́ся, боя́йся, Не́бо, и да подви́жатся основа́нія земли́: се́ бо въ мертвецѣ́хъ вмѣня́ется въ Вы́шнихъ Живы́й, и во гро́бъ ма́лъ страннопріе́млется. Его́же о́троцы благослови́те, свяще́нницы воспо́йте, лю́діе превозноси́те во вся́ вѣ́ки.

Богоизбра́нніи новому́ченицы, вѣ́рою несомнѣ́нною въ рука́хъ мучи́телей вда́стася: младе́нцы съ ма́терьми, о́троцы и отрокови́цы, ю́ноши и дѣ́вы, ста́рцы съ ю́нотами, имени́тіи и безъиме́нніи, Бо́гу же Истинному покло́нницы вѣ́рніи, Го́спода пою́ще и превознося́ще во вся́ вѣ́ки.

Сла́вный по́лче бра́нникъ неустраши́мыхъ, удо́въ растерза́ніемъ діа́вольскія сѣ́ти растерза́сте, и я́ко звѣ́зды златоза́рныя зе́млю Кита́йскую озари́сте, сія́ніемъ ва́шимъ и на́съ просвѣти́те, Го́спода прославля́ющія и превознося́щія въ хра́мѣ ва́шемъ.

Прославля́емъ ва́съ, новому́ченицы всехва́льніи, прозна́тельнѣ Человѣколю́бцемъ Го́сподемъ избра́нніи, и мо́лимся: свѣтоза́рный со́нме, просвѣти́тельнѣ возсія́йте, те́плыми къ Бо́гу моли́твами, зари́ Правосла́вія и странѣ́ ва́шей.

Прорцы́ ны́нѣ, Дави́де богогла́сне, я́ко отъ стра́нъ собра́ Госпо́дь, и́хже изба́ви изъ руки́ врага́, отъ восто́къ, и за́падъ, отъ сѣ́вера и мо́ря, во́ду бо жи́ву сло́ва Бо́жія обрѣ́тше напая́ютъ ду́ши любо́вію пою́щихъ я́.

Богоро́диченъ: Ра́дуйся, Со́лнце пра́вды мíру возсія́вшая, Звѣздо́ златоза́рная, ра́дости луча́ми му́чениковъ первозва́нныхъ земли́ Кита́йскія ны́нѣ озаря́ющая, съ ни́миже моли́ Сы́на Твоего́ дарова́ти вселе́ннѣй ми́ръ и ве́лію ми́лость.

Пѣ́снь 9.

Ирмо́съ: Не рыда́й Мене́, Ма́ти, зря́щи во гро́бѣ, Его́же во чре́вѣ безъ сѣ́мене зачала́ еси́ Сы́на: воста́ну бо, и просла́влюся, и вознесу́ со сла́вою, непреста́нно я́ко Бо́гъ, вѣ́рою и любо́вію Тя́ велича́ющія.

О, ра́досте на́ша, собо́ре святы́хъ ди́вныхъ! Вели́кія му́ки ва́ша, и сле́зы, и крове́й излія́ніе почита́юще, все́ю душе́ю ва́съ умоля́емъ: не оскудѣва́йте, моля́щеся Царю́ Христу́, дарова́ти всѣ́мъ въ хра́мѣ ва́шемъ сте́кшимся спасе́ніе.

Столпы́ Це́ркве Правосла́вныя на восто́цѣ да́льнѣмъ утвержде́нныя, ва́съ воспѣва́емъ, прехва́льніи, тѣ́мъ и на́съ въ вѣ́рѣ утвержда́ете и заступле́ній рѣ́ки вѣ́рнымъ источа́ете.

Стѣле́сники человѣ́комъ су́ще, естества́ не́мощное превзыдо́сте и а́нгеломъ дивле́ніе бы́сте, тѣ́мъ и немощны́я укрѣпля́ете, болѣ́зни вѣ́рою къ ва́мъ притека́ющихъ врачу́ете, страсте́й ва́мъ моля́щихся потребля́ете, я́ко страстоно́сцы пречу́дніи.

Богоро́диченъ: Яко всѣ́хъ предста́тельнице христіа́нъ, Богома́ти всенепоро́чная Влады́чице, я́ко ми́лостива, изба́ви отъ бѣ́дъ и искуше́ній стра́ждущія рабы́ Твоя́, и неду́гующія — лю́тыхъ прегрѣше́ній, ра́нами и болѣ́зньми тя́жкими одержи́мыя, изврачу́й.

Свѣти́ленъ, гла́съ 2. Подо́бенъ: Жены́ услы́шите.

Дне́сь тве́рдь небе́сная* звѣ́зды но́выми красу́ется,* и́хже блиста́ньми мо́ре земно́е* ра́дости лучи́ испуща́етъ,* и вѣ́рніи озаре́нніи лику́ютъ,* Свѣтода́вцу пѣ́снь побѣ́дную пою́ще.

Сла́ва, и ны́нѣ, богоро́диченъ:

Умоле́на бы́вши, Всецари́це Дѣ́во,* мольба́ми честны́хъ новому́ченикъ кита́йскихъ,* мра́къ душе́вный отъ на́съ отъими́,* я́ко Свѣтода́теля еди́наго всѣ́мъ ро́ждшая.

На хвали́техъ поста́вимъ стихо́въ 4, и пое́мъ стихи́ры, гла́съ 4. Подо́бенъ: Яко до́бля.

Двувѣко́вныхъ сѣ́яній проповѣ́дникъ ру́сскихъ* пло́дъ Христу́ сугубосо́тный,* блаже́нныхъ страстоте́рпцевъ ли́къ, ны́нѣ земли́ Кита́йскія прино́ситъ:* се́ разботѣ́ша кра́сныя пусты́ни,* ороше́ніемъ свяще́нныхъ му́ченикъ кровьми́,* и́хже па́мять цѣльбоно́сную* Це́рковь Христо́ва ны́нѣ пра́зднуетъ;* и́мже и мы́ хвале́ніе усе́рдное прино́симъ:* ра́дуйтеся, моли́твенницы ва́съ пою́щихъ неотсту́пніи!

Дне́сь ли́къ святы́хъ новому́ченикъ прославля́ется,* въ земли́ Кита́йстѣй Бо́гу всѣ́хъ угоди́вшихъ,* предстоя́ще въ хра́мѣ и́хъ уми́льно чту́щимъ я́,* неви́димо за ны́ мо́лятся Христу́,* неду́жныя исцѣля́ютъ,* скорбя́щія утѣша́ютъ,* обурева́емымъ ми́ръ и свѣ́тъ душе́вный подава́ютъ,* лучи́стыми къ Бо́гу* о на́съ грѣ́шныхъ мольба́ми.

Дне́сь восто́къ лучи́ своя́ всему́ мíру подае́тъ,* дне́сь мра́чная удо́лія пре́лести упражня́ются,* суему́дріе язы́ческое посрамля́ется* отъ язы́къ возсія́вшими Свѣтода́вцу покло́нники.* О, му́ченицы сла́вніи,* звѣ́зды, захо́дъ мíра тлѣ́ннаго озаря́ющіи,* дне́сь свѣтоли́тіемъ ва́шимъ* Це́рковь боже́ственная исполня́ется,* и вѣ́рныхъ собра́ніе о ва́съ свѣ́тло лику́етъ.

Дне́сь жи́тницы небе́сныя мно́жества пшени́цы исполня́ются,* дне́сь земля́ Кита́йская прино́ситъ Ти́,* Содѣ́телю вся́ческихъ, Бо́же, нача́тки плодоноше́нія,* я́же пріе́мъ въ въ пренебе́сный Тво́й же́ртвенникъ,* утверди́ сіе́, е́же о на́съ содѣ́лалъ еси́,* умно́жи на́мъ лѣ́та покая́нія, проле́й ми́лость Твою́ мíру всѣму́,* и Правосла́вія луча́ми пре́жде конца́ просвѣти́ страну́ Кита́йскую,* имѣ́яй моли́твенники те́плыя,* ли́къ новому́ченикъ преизря́дныхъ та́мо Тя́ просла́вившихъ.

Сла́ва, гла́съ 8:

Насажде́нный Бо́гомъ виногра́де,* крестоно́сное мно́жество страда́льцевъ чу́дныхъ,* приспѣ́вшѣй па́мяти ва́шей,* къ ва́мъ, благосе́рдніи, прибѣга́емъ,* пріими́те и отъ на́съ хвале́нія сія́ недосто́йная,* и бу́дите засту́пницы и неотсту́пніи хода́таи* всѣ́мъ се́рдцемъ ва́мъ зову́щимъ:* ра́дуйтеся, му́ченицы многоми́лостивіи,* ва́съ чту́щихъ никогда́же оставля́ющіи.

И ны́не, богоро́диченъ, гла́съ то́йже:

Влады́чице, пріими́ моли́твы ра́бъ Твои́хъ, и изба́ви на́съ отъ вся́кія ну́жды и печа́ли.

Славосло́віе вели́кое и отпу́стъ.



НА ЛИТУРГІИ.

Блаже́нна отъ кано́на святы́хъ, пѣ́снь 3-я и 6-я. Проки́менъ, гла́съ 4: Тебе́ ра́ди, Го́споди,* умерщвля́еми есмы́ ве́сь де́нь. Сти́хъ: Вмѣни́хомся я́ко о́вцы заколе́нія. Апо́столъ къ Ри́мляномъ, зача́ло 99. Аллилу́ія, гла́съ 2. Бо́гъ бого́въ, Госпо́дь глаго́ла, и призва́ зе́млю отъ восто́къ со́лнца до за́падъ. Ева́нгеліе отъ Іоа́нна, зача́ло 52. Прича́стенъ: Ра́дуйтеся пра́ведніи о Го́сподѣ, пра́вымъ подоба́етъ похвала́.

Примѣчаніе:
[1] Слу́жба сія́ соста́влена въ Болга́ріи, по благослове́нію преосвяще́ннѣйшаго Иларіо́на, архіепи́скопа Сидне́йскаго и Австралíйско-Новозела́ндскаго и преосвяще́ннѣйшаго Фо́тія, епи́скопа Тріа́дицкаго, къ возстановле́нію пра́зднованія па́мяти святы́хъ Кита́йскихъ первому́чениковъ въ 1997 году.

Источникъ: Слу́жба святы́мъ первому́ченикомъ кита́йскимъ, и́хже па́мять мѣ́сяца Іу́нія въ 11 де́нь. — Софія, 2000. — 45 с.

/ Къ оглавленію раздѣла /


Наверхъ / Къ титульной страницѣ

0