Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 18 ноября 2017 г. Сейчасъ на порталѣ посѣтителей - 15.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́нія въ 11-й де́нь.
Пра́зднованіе Пресвятѣ́й Влады́чицѣ на́шей Богоро́дицѣ ра́ди чудотво́рныя Ея́ ико́ны, нарица́емыя «Досто́йно е́сть», и въ воспомина́ніе бы́вшаго отъ арха́нгела Гавріи́ла чудесе́.

НА МАЛѢЙ ВЕЧЕРНИ,
На Го́споди воззва́хъ: стихи́ры, гла́съ 4. Подо́бенъ: Да́лъ еси́ зна́меніе.

Пріиди́те ны́нѣ, празднолю́бцы, мона́шествующихъ сосло́віе, пріиди́те, пѣ́сньми воспои́мъ, и́миже на́съ арха́нгелъ научи́ пѣ́ти Чи́стѣй Дѣ́вѣ, пріиди́те, совоспои́мъ те́плѣ Тоя́ боже́ственная великодѣя́нія и любо́вію ублажи́мъ вои́стинну Присноблаже́нную во хра́мѣ Тоя́ дне́сь Прота́тстѣмъ веселя́щеся. [Два́жды.]

Пѣ́снь, ю́же арха́нгелъ Гавріи́лъ я́ко преднача́тіе къ пѣ́сни Космы́ воспѣ́, пле́щуще, богому́дріи, дне́сь благогла́снѣ воспои́мъ, любо́вію и благоговѣ́ніемъ вку́пѣ Тоя́ вели́кое сіе́ чу́до, е́же дне́сь о́нъ соверши́ въ ке́лліи пѣ́нія, мона́ха бо послу́шника пѣ́сни стра́ннѣй научи́.

Ны́нѣ Тя́ блажи́мъ, Присноблаже́нная Влады́чице, и вѣ́рно покланя́емся Твое́й ико́нѣ всечестнѣ́й, Храни́тельницѣ Горы́, предъ Не́юже о́бразомъ стра́ннымъ Гавріи́лъ съ небесе́ внеза́пу предста́ и воспѣ́, е́же досто́йно е́сть пѣ́ти и блажи́ти Тя́, Ма́терь Созда́теля.

Сла́ва, и ны́нѣ, гла́съ 1:

Возвесели́теся дне́сь, мно́жество пустынножи́телей и общежи́телей Святы́я Горы́, и взыгра́йте, веселя́щеся, благода́рственная Дѣ́вѣ припѣва́юще. Се́ бо промышле́ніемъ Свои́мъ чрезъ а́нгелово прише́ствіе а́нгельскую пѣ́снь на́мъ востайново́дствова. Досто́йно е́сть я́ко вои́стинну блажи́ти и чти́ти Ю, я́ко Ма́терь су́щую Творца́ всѣ́хъ, Христа́ Бо́га на́шего, вы́сшую херуви́мъ и серафи́мъ святѣ́йшую безъ сравне́нія су́щую и спаса́ющую отъ бѣ́дъ ду́ши на́ша.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Досто́йно вои́стинну е́сть, Богоро́дице, при́сно Тя́ блажи́ти, Бо́га Ма́терь, спаса́ющую чту́щихъ Тя́.

Сти́хъ: Помяну́ и́мя Твое́ во вся́комъ ро́дѣ и ро́дѣ.

Ико́на всесла́вная Ма́тере Бо́га Сло́ва, Покрови́тельнице Прота́та, покрыва́й на́съ, сохраня́ющи отъ вся́кихъ скорбе́й.

Сти́хъ: Лицу́ Твоему́ помо́лятся бога́тіи лю́дстіи.

Арха́нгелъ Гавріи́лъ, съ небесе́ прише́дъ, предъ честно́ю ико́ною пѣ́снь а́нгельскую, Чи́стая, Тебѣ́ воспѣ́.

Сла́ва, и ны́нѣ, гла́съ и подо́бенъ то́йже:

Упова́ніе христіа́нъ, Пресвята́я Дѣ́во, благода́тію Твоея́ ико́ны отъ вся́каго вре́да Твоя́ рабы́ соблюда́й.

Тропа́рь пи́санъ на вели́цѣй вече́рни.



НА ВЕЛИЦѢЙ ВЕЧЕРНИ,
[Блаже́нъ му́жъ.., 1-й антифо́нъ.] На Го́споди воззва́хъ: стихи́ры [на 8], гла́съ 1. Подо́бенъ: О, ди́вное чу́до!

О, ди́вное чу́до! Бо́гъ, Иже изъ Тебе́ воплоти́выйся, благоволи́ пѣ́сни Твое́й ны́нѣ, Чи́стая, преднача́тися. Сего́ ра́ди Гавріи́ла ко и́ноку въ подо́бнѣмъ о́бразѣ посла́ пѣ́сни Твое́й научи́ти, и́же пре́жде вопія́ше Тебѣ́: Благода́тная, ра́дуйся, съ Тобо́ю Госпо́дь, подая́й мíрови Тобо́ю ве́лію ми́лость. [Два́жды.]

О, Твои́хъ чуде́съ, Чи́стая! Вы́шняго Ма́ти показа́лася еси́, Влады́чице. И ны́нѣ съ небесе́ промышле́ніемъ Твои́мъ по́сланъ бы́сть стра́ннымъ о́бразомъ пѣ́сни Твое́й научи́ти, Всенепоро́чная, арха́нгелъ Гавріи́лъ, соверше́ннѣйше, и́же пре́жде вопія́ше Тебѣ́: Благода́тная, ра́дуйся, съ Тобо́ю Госпо́дь, подая́й мíрови Тобо́ю ве́лію ми́лость. [Два́жды.]

Твое́ сла́вимъ промышле́ніе, Богома́ти Дѣ́во, на́съ бо научи́ла еси́ преднача́тію ди́вному я́ко вои́стинну пѣ́сни Твое́й боже́ственнаго ны́нѣ Гавріи́ла прише́ствіемъ стра́ннымъ, Всенепоро́чная. Припа́дающе у́бо вѣ́рно, Тебѣ́ взыва́емъ, съ ни́мъ вопію́ще: Благода́тная, ра́дуйся, съ Тобо́ю Госпо́дь, подая́й мíрови Тобо́ю ве́лію ми́лость. [Два́жды.]

О, ди́вное чу́до! Гавріи́лъ свѣтоза́рный во о́бразѣ и́ночестѣмъ яви́ся и́ноку, въ ке́лліи оста́вшуся, воспріи́мъ чу́дно Твоея́ пѣ́сни преднача́тіе, Всенепоро́чная. Начерта́ же а́біе на дщи́цѣ ка́меннѣй руко́ю пое́мая, неви́димъ же пото́мъ бы́въ, во удивле́ніе приведе́ мона́шествующаго, е́же сла́вити Тя́, Всепѣ́тая. [Два́жды.]

Сла́ва, и ны́нѣ, гла́съ 4:

Подоба́ше Горѣ́ се́й Аѳо́нстѣй, Тебе́ Предста́тельницу иму́щей, Богома́ти, е́же сію́ пѣ́снь Твою́, Дѣ́во Всепѣ́тая, арха́нгелу пе́рвѣйше въ не́й воспѣ́ти и отсю́ду въ концы́ вселе́нныя протещи́, къ составле́нію пѣ́сней Богома́тернихъ. Тѣ́мже вопіе́мъ Ти́: Богоро́дице Пресла́вная, Твоего́ Сы́на моли́, во е́же спасти́ся душа́мъ на́шимъ.

Вхо́дъ. Проки́менъ дне́. И чте́нія три́ Богоро́дицы.

Бытія́ чте́ніе. [Глава́ 28.]

Изы́де Іа́ковъ отъ студенца́ кля́твеннаго и и́де въ Харра́нь. И обрѣ́те мѣ́сто, и спа́ та́мо, за́йде бо со́лнце; и взя́тъ отъ ка́менія мѣ́ста того́, и положи́ возгла́віе себѣ́, и спа́ на мѣ́стѣ о́номъ. И со́нъ ви́дѣ: и се́ лѣ́ствица утвержде́на на земли́, eя́же глава́ досяза́ше до небе́съ, и Ангели Бо́жіи восхожда́ху и низхожда́ху по не́й. Госпо́дь же утвержда́шеся на не́й, и рече́: Азъ Бо́гъ Авраа́мовъ, отца́ твоего́, и Бо́гъ Исаа́ковъ, не бо́йся: земля́, идѣ́же ты́ спи́ши на не́й, тебѣ́ да́мъ ю́ и сѣ́мени твоему́. И бу́детъ сѣ́мя твое́, я́ко песо́къ земны́й, и распространи́тся на мо́ре, и ли́ву, и сѣ́веръ, и на восто́ки, и возблагословя́тся о тебѣ́ вся́ колѣ́на земна́я и о сѣ́мени твое́мъ. И се́ Азъ съ тобо́ю, сохраня́яй тя́ на вся́комъ пути́, а́може а́ще по́йдеши, и возвращу́ тя́ въ зе́млю сію́, я́ко не и́мамъ тебе́ оста́вити, до́ндеже сотвори́ти Ми́ вся́, ели́ка глаго́лахъ тебѣ́. И воста́ Іа́ковъ отъ сна́ своего́, и рече́: я́ко éсть Госпо́дь на мѣ́стѣ се́мъ, а́зъ же не вѣ́дѣхъ. И убоя́ся, и рече́: я́ко стра́шно мѣ́сто сіе́, нѣ́сть сіе́, но до́мъ Бо́жій, и сія́ врата́ небе́сная.

Прoро́чества Іезекíилева чте́ніе. [Глава́ 43 и 44.]

Та́ко глаго́летъ Госпо́дь: бу́детъ отъ дне́ осма́го и про́чее, сотворя́тъ іере́и на олтари́ всесожже́нія ва́шего и я́же спасе́нія ва́шего, и пріиму́ вы́, глаго́летъ Адонаи́ Госпо́дь. И обрати́ мя́ на пу́ть вра́тъ святы́хъ внѣ́шнихъ, зря́щихъ на восто́ки, и сія́ бя́ху затворе́на. И рече́ Госпо́дь ко мнѣ́: врата́ сія́ затворе́на бу́дутъ, и не отве́рзутся, и никто́же про́йдетъ сквозѣ́ и́хъ, я́ко Госпо́дь Бо́гъ Изра́илевъ про́йдетъ и́ми, и бу́дутъ затворе́на. Яко игу́менъ ся́детъ въ ни́хъ снѣ́сти хлѣ́бъ: по пути́ ела́мскихъ вра́тъ вни́детъ, и по пути́ его́ изы́детъ. И введе́ мя́ по пути́ вра́тъ святы́хъ, су́щихъ къ сѣ́веру, пря́мо хра́му, и ви́дѣхъ, и се́ испо́лнь сла́вы хра́мъ Госпо́день.

При́тчей чте́ніе. [Глава́ 9.]

Прему́дрость созда́ себѣ́ до́мъ и утверди́ столпо́въ се́дмь. Закла́ своя́ же́ртвенная, и раствори́ въ ча́ши свое́й вино́, и угото́ва свою́ трапе́зу. Посла́ своя́ рабы́, созыва́ющи съ высо́кимъ проповѣ́даніемъ на ча́шу, глаго́лющи: и́же е́сть безу́менъ, да уклони́тся ко мнѣ́. И тре́бующимъ ума́ рече́: пріиди́те, яди́те мо́й хлѣ́бъ и пíйте вино́, е́же раствори́хъ ва́мъ. Оста́вите безу́міе, и жи́ви бу́дите, и взыщи́те ра́зума, да поживете́, и испра́вите ра́зумъ въ вѣ́дѣніи. Наказу́яй злы́я, пріи́метъ себѣ́ безче́стіе, облича́яй же нечести́ваго опоро́читъ себе́. Обличе́нія бо нечести́вому — ра́ны ему́. Не облича́й злы́хъ, да не возненави́дятъ тебе́, облича́й прему́дра, и возлю́битъ тя́. Да́ждь прему́дрому вину́, и прему́дршій бу́детъ, сказу́й пра́ведному, и приложи́тъ пріима́ти. Нача́ло прему́дрости — стра́хъ Госпо́день, и совѣ́тъ святы́хъ — ра́зумъ. Разумѣ́ти бо зако́нъ по́мысла е́сть блага́го: си́мъ бо о́бразомъ мно́гое поживе́ши вре́мя, и приложа́тся тебѣ́ лѣ́та живота́.

На литíи стихи́ры, гла́съ 1:

Дѣ́вственное торжество́ дне́сь, бра́тіе! Да игра́етъ Аѳо́нъ, да ликовству́етъ Це́рковь! Созва́ бо на́съ Свята́я Богоро́дица на лѣ́тній пра́здникъ стра́нныхъ пѣ́сней Ея́, Гавріи́лу арха́нгелу на́съ научи́вшу страннообра́зне боже́ственныя пѣ́сни Ея́ преднача́тію. Та́ко бо, я́влься и́ноку въ подо́бнѣмъ о́бразѣ, Богоро́дицу возвели́чи, я́ко Су́щаго на херуви́мѣхъ съ тѣ́ломъ носи́вшую. Тоя́ моли́твами, Христе́ Бо́же, спаси́ ду́ши на́ша.

Гла́съ 2:

Яже небе́съ Вы́сшая су́щи, и херуви́мъ Сла́внѣйшая, и всея́ тва́ри Честнѣ́йша, Яже премно́гія ра́ди чистоты́ Присносу́щнаго Естества́ прія́телище бы́вши, во оби́тели Ея́ дне́сь отъ а́нгела велича́ется пѣ́сньми, и тѣ́мъ исполня́ются вся́ческая ра́дости, и на́мъ да́руется ве́лія ми́лость.

Всенепоро́чная Невѣ́ста и Ма́ти благоволе́нія Отча, Бо́гомъ предопредѣле́нная Тому́ въ жили́ще, дне́сь стра́нную слу́ху пѣ́снь чрезъ арха́нгела на́мъ предае́тъ, Юже безпло́тныя си́лы непреста́нно сла́вятъ, и мы́ ублажа́емъ, я́ко Богоро́дицу, вои́стинну Присноблаже́нную и Всенепоро́чную и Ма́терь Бо́га на́шего.

Сла́ва, и ны́нѣ, гла́съ 5:

Воспо́йте, лю́діе, Ма́тери Бо́га на́шего, воспо́йте. Дне́сь бо арха́нгелъ пѣ́снь но́вую Пренепоро́чныя Дѣ́вы мона́ху уедине́нному воспѣ́, Юже и чти́ти непреста́нно до́лжны есмы́ вси́, Засту́пницу на́шу су́щую.

На стихо́внѣ стихи́ры, гла́съ 1. Подо́бенъ: Небе́сныхъ чино́въ.

Небе́сныхъ чино́въ преднача́льника, Тебѣ́ Гавріи́ла боже́ственнаго Бо́гъ пре́жде, Дѣ́во, посла́, принести́, Отрокови́це, Твоего́ неизрече́ннаго зача́тія благовѣ́стіе, ны́нѣ же пѣ́сни Твое́й научи́ти преднача́тію.

Сти́хъ: Помяну́ и́мя Твое́ во вся́комъ ро́дѣ и ро́дѣ.

Кто́ досто́йно, Дѣ́во, повѣ́сть стра́нное сіе́ чу́до, бы́вшее во сла́ву Твою́, Отрокови́це? Ибо преднача́вшій пѣ́снь Твою́ чу́дными похвала́ми Тебѣ́, яви́ся во о́бразѣ и́нока ны́нѣ а́нгелъ, та́ко пѣ́ти глаго́ля всѣ́мъ.

Сти́хъ: Лицу́ Твоему́ помо́лятся бога́тіи лю́дстіи.

Тя́ блажи́ти, Дѣ́во, е́сть досто́йно, я́ко вои́стинну боже́ственный Гавріи́лъ воспѣ́, Чи́стую Богоро́дицу, Блаже́нную и Пренепоро́чную, вои́стинну Ма́терь су́щую Тя́ Бо́жію, Юже въ пѣ́снехъ велича́емъ.

Сла́ва, и ны́нѣ, гла́съ 4:

Пѣ́снь, ея́же не вѣ́де, услы́ша ны́нѣ мона́шествующій, сказа́ бо ему́ арха́нгелъ пѣ́сни Твоея́, Дѣ́во, преднача́тіе. Тѣ́мже удивля́яся, мона́хъ прося́ще сему́ преда́тися и въ пи́сьмени. Сего́ ра́ди на дщи́цѣ ка́меннѣй руко́ю начерта́въ и пото́мъ неви́димъ бы́въ, въ ра́дости воспѣва́ти Тя́ при́сно Богоро́дицу устро́и.

Тропа́рь, гла́съ 4:

Отце́въ все́ Аѳо́нское мно́жество, собери́теся, вѣ́рно пра́зднующе, дне́сь ра́дующеся и свѣ́тло восклица́юще вси́ въ весе́ліи, Бо́жія бо Ма́ти ны́нѣ отъ а́нгела пресла́вно воспѣва́ется. Тѣ́мже, я́ко Богоро́дицу, при́сно Сію́ сла́вимъ.

Инъ тропа́рь, гла́съ то́йже:

Притеце́мъ, вѣ́рніи, со дерзнове́ніемъ къ ми́лующей Цари́цѣ Богоро́дицѣ и уми́льно воззове́мъ къ Не́й: низпосли́ на ны́ ми́лости Твоя́ бога́тыя: Це́рковь на́шу сохрани́, лю́ди во благоде́нствіи соблюди́, зе́млю на́шу изба́ви отъ вся́каго обстоя́нія, ми́ръ да́руй мíрови и спасе́ніе душа́мъ на́шимъ.


НА УТРЕНИ,
[Тропа́рь Богоро́дицы, два́жды. Сла́ва, и ны́нѣ, и́нъ тропа́рь.]

По 1-мъ стихосло́віи сѣда́ленъ, гла́съ 1. Подо́бенъ: Гро́бъ Тво́й, Спа́се.

Все́ мно́жество отце́въ Аѳо́нскихъ собра́ся ны́нѣ свѣ́тло воспѣ́ти Твое́, Отрокови́це, сла́вное торжество́. Дне́сь бо нача́льникъ а́нгеловъ преднача́тіе пѣ́сни Твоея́ пресла́вно на́мъ возвѣсти́.

[Сла́ва, и ны́нѣ, то́йже.]

По 2-мъ стихосло́віи сѣда́ленъ, гла́съ 4. Подо́бенъ: Удиви́ся Іо́сифъ.

Гавріи́лъ съ небесе́ пре́жде по́сланъ бы́сть Тебѣ́, Чи́стая, благовѣсти́ти Твое́ безсѣ́менное зача́тіе стра́шное. То́й и ны́нѣ во о́бразѣ мона́шествующаго яви́ся я́вѣ научи́ти пѣ́сни Твое́й, и сію́ чу́дно начерта́. Сего́ ра́ди вси́ съ пусты́нниками и общежи́телями Аѳо́на вопіе́мъ: ра́дуйся, Юже воспѣва́ютъ чи́ни а́нгельстіи.

[Сла́ва, и ны́нѣ, то́йже.]

Велича́ніе:

Досто́йно е́сть велича́ти Тя́, Богоро́дице, Честнѣ́йшую херуви́мъ и Сла́внѣйшую безъ сравне́нія серафи́мъ.

[Псало́мъ избра́нный: Помяни́, Го́споди, Дави́да, и всю́ кро́тость его́...]

По поліеле́и сѣда́ленъ, гла́съ 3. Подо́бенъ: Красотѣ́ дѣ́вства.

Аѳо́на ны́нѣ все́ мно́жество весели́тся, пра́зднуя свѣ́тлое торжество́, Богоро́дицу вои́стинну увѣ́дѣвъ Тя́ блажи́ти, Присноблаже́нную и Чи́стую, Всенепоро́чную и нескве́рную, Ма́терь Бо́га на́шего су́щую. Тѣ́мже съ Гавріи́ломъ Тебѣ́ зове́мъ: ра́дуйся, Благода́тная.

Сла́ва, и ны́нѣ, гла́съ и подо́бенъ то́йже:

Красоту́ дѣ́вства Твоего́ и пресвѣ́тлую чистоту́ Твою́ Гавріи́лъ показа́въ на́мъ, возопи́ ны́нѣ, поя́ Тебѣ́ пѣ́сни Твоея́ преднача́тіе ди́вное, всеизря́дное, и сіе́ начерта́ на дщи́цѣ ка́меннѣй чу́дно, а́біе неви́димъ бы́сть. Тѣ́мже Тя́ почита́емъ.

Степе́нна 1-й антифо́нъ 4-го гла́са. Проки́менъ, гла́съ 4: Помяну́ и́мя Твое́* во вся́комъ ро́дѣ и ро́дѣ. Сти́хъ: Слы́ши, Дщи́, и ви́ждь, и приклони́ у́хо Твое́. Вся́кое дыха́ніе... Ева́нгеліе Луки́, зача́ло 4.

По 50-мъ псалмѣ́ стихи́ра, гла́съ 2. Самогла́сна:

Благовѣсти́ Гавріи́лъ Благода́тнѣй пре́жде: Ра́дуйся, Неневѣ́стная Отрокови́це и Неискусобра́чная! Ны́нѣ же, я́влься въ стра́ннѣмъ о́бразѣ мона́шествующему, пѣ́снь воспѣ́ но́вую. Тогда́ благовѣсти́въ сказа́ Тебѣ́, Чи́стая, ны́нѣ воспѣ́ Тя́ чу́дно, я́ко Пренепоро́чную и ро́ждшую, Дѣ́во, Го́спода.

Кано́нъ [благода́ренъ] Богома́тери [со ирмосо́мъ на 6 и пра́здника, на 8.] Гла́съ 4.

Пѣ́снь 1.

Ирмо́съ: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Аѳо́нъ, и́же нарече́ся Свята́я Гора́, Всенепоро́чная, Чи́стая, я́коже прорекла́ еси́, ны́нѣ свѣ́тло пра́зднуетъ Тебѣ́, Святѣ́й вои́стинну Горѣ́ су́щей, и боже́ственное соверша́етъ дне́сь Тебѣ́ торжество́.

Боже́ственнымъ при́сно Гавріи́лъ та́йнамъ Твои́мъ изря́днымъ слу́житъ чу́дно, о Всенепоро́чная, тѣ́мже и ны́нѣ, Дѣ́во, Твоея́ пѣ́сни, ра́дуяся, пое́тъ преднача́тіе.

Не престае́ши, Всенепоро́чная, соверша́ти при́сно рабо́мъ Твои́мъ пресла́вная чудеса́, Ма́ти Чи́стая, и во вся́ времена́ излива́ти благодѣя́нія, Пресвята́я, я́ко Благодѣ́тельница на́ша.

Ка́ко изреку́ велича́йшее, соверше́нное тобо́ю, арха́нгеле, бли́зъ скита́ Каре́йскаго чу́до, егда́ научи́лъ ны́ еси́ твои́мъ явле́ніемъ пѣ́сни досто́йнѣй Богома́тери?

Пѣ́снь 3.

Ирмо́съ: Твоя́ пѣсносло́вцы, Богоро́дице, живы́й и незави́стный Исто́чниче, ли́къ Себѣ́ совоку́пльшія, духо́вно утверди́, въ боже́ственнѣй Твое́й сла́вѣ, вѣнце́въ сла́вы сподо́би.

Приспѣ́ вре́мя собра́тися всѣ́мъ отце́мъ въ хра́мѣ Прота́тстѣмъ, всено́щную соверши́ти хвалу́, тогда́ боже́ственную пѣ́снь Твою́, Чи́стая, воспѣва́етъ арха́нгелъ.

Пріи́де со ины́ми и ста́рецъ о́наго послу́шника и́нока, и сему́ еди́ному оста́вшуся Гавріи́лъ арха́нгелъ яви́ся въ подо́бнѣмъ о́бразѣ, предначина́я пѣ́снь Твою́.

Приложе́ніе творя́ше къ пѣ́сни Твое́й, я́ко преднача́тіе, Чи́стая, тоя́, ю́же пре́жде воспѣ́ Косма́, боже́ственный Тво́й служи́тель, глаго́ля, я́ко та́ко обы́чай е́сть и́мъ начина́ти пѣ́снь Твою́.

О, чуде́съ Твои́хъ стра́шныхъ, арха́нгеле боже́ственный Гавріи́ле! Ка́ко во и́ночестѣмъ о́бразѣ пѣ́снь воспѣ́лъ еси́ Богома́тери дне́сь и, я́ко подоба́ше, возвели́чилъ еси́?

Инъ конда́къ, гла́съ 8:

Арха́нгельскій гла́съ вопіе́мъ Ти́, Всецари́це: досто́йно е́сть, я́ко вои́стинну, блажи́ти Тя́, Богоро́дицу, Присноблаже́нную и Пренепоро́чную и Ма́терь Бо́га на́шего.

Сѣда́ленъ, гла́съ 4. Подо́бенъ: Удиви́ся Іо́сифъ.

Удиви́ся и́нокъ а́нгела пѣ́сни, стра́нно пою́щаго ту́ю предъ Твое́ю пѣ́снію, о Чи́стая, я́вльшуся сему́ во о́бразѣ подо́бнѣмъ, а поне́же и́нокъ написа́тися жела́ше о́нѣй, на дщи́цѣ ка́меннѣй руко́ю чу́дно начерта́, и неви́димъ бы́сть. Отто́лѣ проповѣ́дася всѣ́мъ пѣ́снь сія́, е́же Богоро́дицу Тя́ сла́вити, Всенепоро́чная.

[Сла́ва, и ны́нѣ, то́йже.]

Пѣ́снь 4.

Ирмо́съ: Неизслѣ́дный Бо́жій совѣ́тъ, е́же отъ Дѣ́вы воплоще́нія Тебе́, Вы́шняго, проро́къ Авваку́мъ усмотря́я, зовя́ше: сла́ва си́лѣ Твое́й, Го́споди.

Досто́йно, предначина́ше, я́ко вои́стинну е́сть блажи́ти Тя́, Пречи́стая, Богоро́дицу, Присноблаже́нную и вои́стинну Пренепоро́чную и Бо́га Ма́терь Всенескве́рную.

Предначина́тельную сію́ пѣ́снь боже́ственному Гавріи́лу стра́нно пою́щу, удивля́шеся слу́шаяй и́нокъ, а поне́же вопроша́ше, — та́ко пѣ́ти, — рече́, — обыко́хомъ.

Глаго́лати и ему́ та́ко повелѣва́ше Гавріи́лъ сіе́ преднача́тіе, та́же пѣ́ти пѣ́снь Космы́ боже́ственную и всѣ́хъ научи́ти сему́, боже́ственный рече́ арха́нгелъ.

Зане́же проси́ и́нокъ, Гавріи́ле боже́ственне, написа́ти пѣ́снь, ю́же услы́ша, ты́ начерта́лъ еси́ а́біе на дскѣ́ ка́меннѣй, арха́нгеле. Сла́ва неизрече́ннѣй си́лѣ твое́й!

Пѣ́снь 5.

Ирмо́съ: Ужасо́шася вся́ческая о Боже́ственнѣй сла́вѣ Твое́й: Ты́ бо, неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га, и родила́ еси́ Безлѣ́тнаго Сы́на, всѣ́мъ, воспѣва́ющимъ Тя́, ми́ръ подава́ющая.

Ужасе́ся человѣ́къ ди́внымъ чудесе́мъ, егда́ чу́до узрѣ́, я́ко дска́ ка́менная начерта́ся и внеза́пу собесѣ́дующій ему́ неви́димъ бы́сть, Гавріи́лъ, сла́вный и честны́й архистрати́гъ.

Ста́рецъ, егда́ во у́тріе въ ке́ллію свою́ возврати́ся и егда́ стра́нная сія́ услы́ша, дску́ же ка́менну узрѣ́, руко́ю начерта́нну, взе́мъ же а́біе съ ученико́мъ сію́, принесо́ша Горы́ нача́льствующимъ.

Зна́емы и всѣ́мъ извѣ́стны бы́ша сія́ чудеса́, Дѣ́во, поне́же дску́ ка́менную а́біе въ ца́рствующій гра́дъ торже́ственно отсла́ша Горы́ нача́льствующіи, во е́же сла́вити Тя́ всѣ́мъ.

Стеко́шася вси́ во убо́гое обита́лище, въ не́мже стра́нное чу́до содѣ́яся, и Твое́й ико́нѣ, предъ не́юже воспѣ́та бы́сть пѣ́снь, Всечи́стая, благоговѣ́йнѣ покланя́ющеся, единогла́сно уста́виша въ Прота́тѣ то́й храни́тися.

Пѣ́снь 6.

Ирмо́съ: Боже́ственное сіе́ и всечестно́е соверша́юще пра́зднество, богому́дріи, Богома́тере, пріиди́те, рука́ми воспле́щимъ, отъ Нея́ ро́ждшагося Бо́га сла́вимъ.

Съ неизрече́нною вси́ стеко́шася ра́достію и весе́ліемъ, е́же взя́ти честну́ю ико́ну Твою́, іере́и, и мона́шествующіи, и все́ Горы́ мно́жество, Пречи́стая.

Боже́ственную Твою́ ико́ну сію́ со вся́кимъ благоговѣ́ніемъ держа́ще отцы́ вси́, пле́щуще, съ пѣ́сньми и пѣ́ньми внесо́ша въ Боже́ственный хра́мъ Тво́й, Пречи́стая.

Дѣ́во! Стоя́ніе всено́щное соверши́ша, любо́вію Тебѣ́ чту́ще и арха́нгела, пѣ́снь Твою́ возвѣсти́вша, и ны́нѣ мы́ та́кожде ва́съ вку́пѣ почита́емъ.

Отцы́ боже́ственніи, съ пѣ́сньми, по тайнодѣ́йствіи, взе́мше боже́ственную Твою́ ико́ну, вну́трь хра́ма, въ невходи́мая, со мно́гимъ благоговѣ́ніемъ поста́виша.

Конда́къ, гла́съ 4. Подо́бенъ: Яви́лся еси́ дне́сь.

Пра́зднуетъ дне́сь ве́сь Аѳо́нъ, я́ко пѣ́снь прія́тъ отъ а́нгела чу́дно Тебѣ́, Чи́стѣй Богома́тери, Юже вся́ тва́рь чти́тъ, сла́вящи.

Икосъ:

Ны́нѣ да весели́тся мно́жество отце́въ Аѳо́на: се́ бо Дѣ́вѣ пре́жнія пѣ́сни, ю́же чу́дно воспѣ́ Ей Косма́, боже́ственный пѣснопѣ́вецъ, Гавріи́лъ ны́нѣ пое́тъ преднача́тіе, и́же: Досто́йно е́сть я́ко вои́стинну, — глаго́лаше и́ноку, — блажи́ти Тя́, Богоро́дицу, Присноблаже́нную и Пренепоро́чную и Ма́терь Бо́га на́шего; сему́ повелѣва́ше, да та́ко вси́ предначина́ютъ Твою́ пѣ́снь. И, сію́ начерта́въ руко́ю на дскѣ́ ка́меннѣй, внеза́пу бы́сть неви́димъ. Инокъ же, дивя́ся, воспѣва́ше, я́коже научи́ся, чи́стую Богома́терь, Юже вся́ тва́рь чти́тъ, сла́вящи.

Пѣ́снь 7.

Ирмо́съ: Не послужи́ша тва́ри богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́.

Преизря́дную че́сть воздая́ху вси́ отцы́, и пре́жніи и ны́нѣшніи, се́й ико́нѣ Твое́й боже́ственнѣй, Пренепоро́чная, пра́веднѣйше: че́сти бо премно́гія удосто́ися пресла́вно.

Ве́лія благода́ти удосто́ися боже́ственная ико́на Твоя́, Пренепоро́чная, я́сно бо предъ не́ю Твоея́ пѣ́сни преднача́тіе пе́рвѣе возгласи́ся благоволе́ніемъ Твои́мъ. Тѣ́мже по до́лгу ны́нѣ се́й съ любо́вію покланя́емся.

Не боготвори́мъ ико́ну Твою́, Пречи́стая, я́коже на ны́ клеве́щутъ, но относи́тельнѣ чти́мъ, Пренепоро́чная, сію́, ра́дующеся, лобыза́емъ че́ствовательно, раби́ Твои́, ны́нѣ же и во вѣ́ки.

Съ Тобо́ю, Пресвята́я, не престае́мъ чти́ти и сла́внаго Гавріи́ла, на́съ ны́нѣ пѣ́сни Твое́й научи́вшаго, и́же и пре́жде, Тебѣ́ возглаша́я, взыва́ше: ра́дуйся, Благода́тная.

Пѣ́снь 8.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки.

Отроко́мъ благочести́вымъ подража́юще, Богоро́дице, о чудесѣ́хъ Твои́хъ, я́же твори́тъ Госпо́дь во сла́ву Твою́, Пречи́стая, воспѣва́юще, пое́мъ: Го́спода по́йте, дѣла́, и превозноси́те во вся́ вѣ́ки.

Вои́стинну благослове́нъ, и́же сподо́бися услы́шати боже́ственныя хвалы́ Твоя́ отъ а́нгела, Пресвята́я Дѣ́во Пренепоро́чная, я́коже Сы́нъ Тво́й благоволи́, и́мже всѣ́хъ научи́ пѣ́ти Тя́ досто́йно и превозноси́ти Тя́ во вся́ вѣ́ки.

«Пѣ́ніе» — по достоя́нію уста́вися именова́ти мѣ́сто о́но, идѣ́же соверши́ся сіе́ чу́до, я́коже нарица́ніе удержа́ся до на́съ и навсегда́, на па́мять, Пречи́стая, чудесе́, я́ко да воспѣва́емъ Тя́ и превозно́симъ во вся́ вѣ́ки.

«Досто́йно е́сть» — да́же до ны́нѣ нарица́ется я́сно и ке́ллія та́, въ не́йже и бо́жественная Твоя́ ико́на, предъ не́юже пе́рвѣе воспѣ́то бы́сть пѣ́сни Твоея́, Дѣ́во Чи́стая, преднача́тіе, я́ко да пою́тъ Тя́ вси́ досто́йно и превозно́сятъ Тя́ во вся́ вѣ́ки.

Пѣ́снь 9.

Ирмо́съ: Вся́къ земноро́дный да взыгра́ется, Ду́хомъ просвѣща́емь, да торжеству́етъ же безпло́тныхъ умо́въ естество́, почита́ющее свяще́нное торжество́ Богома́тере, и да вопіе́тъ: ра́дуйся, Всеблаже́нная Богоро́дице, Чи́стая Приснодѣ́во.

Вси́ раби́ Твои́, стека́емся во хра́мъ Тво́й Боже́ственный и пра́зднуемъ, свѣ́тло соверша́юще ны́нѣ торжество́, въ лѣ́тную дне́сь па́мять чудесе́ Твоея́ пѣ́сни восполне́нія, Богоро́дице, Чи́стая Приснодѣ́во.

Досто́йно е́сть, — не престае́мъ, ра́дующеся, глаго́лати, — блажи́ти Тя́, Присноблаже́нную же я́ко вои́стинну и Пренепоро́чную и Ма́терь Бо́га на́шего, — отъ а́нгела си́мъ ны́нѣ научи́вшеся, Богоро́дице, Чи́стая Приснодѣ́во!

Вку́пѣ сла́внаго и боже́ственнаго арха́нгела Гавріи́ла дне́сь, ра́дующеся, прославля́емъ, благода́рственная пѣ́нія принося́ще, ди́внымъ чу́домъ всѣ́хъ научи́вшаго боже́ственнѣй пѣ́сни Чи́стыя Богома́тери, — ра́дуйся, таи́нниче неизрече́нныхъ, — взыва́юще.

Ра́дуйся, хра́мъ Прота́та пресла́вный, хва́лящійся сокро́вищемъ всечестны́я, боже́ственныя и благода́ть точа́щія ико́ны еди́ныя Богома́тере и Предста́тельницы Аѳо́на: Гора́ бо сія́ избра́нный жре́бій Ея́ содѣ́лася.

Свѣти́ленъ. Подо́бенъ: Жены́, услы́шите.

Собери́теся, взыгра́йте, свѣ́тло торжеству́йте, Гавріи́лъ бо боже́ственный мона́шествующему ны́нѣ предста́ въ и́ночестѣмъ о́бразѣ, пѣ́снь Богома́терню пе́рвый провѣща́въ въ Горѣ́ Аѳо́нстѣй, стяжа́вшей Ю Предста́тельницу.

[Сла́ва, и ны́нѣ, то́йже.]

На хвали́техъ стихи́ры, гла́съ 1. Подо́бенъ: Небе́сныхъ чино́въ.

Съ небе́сныхъ круго́въ соше́дъ, Гавріи́лъ стра́ннымъ о́бразомъ яви́ся и́ноку послу́шнику, Твою́ пѣ́снь, о Дѣ́во, необы́чную ему́ поя́ ны́нѣ, арха́нгелъ, предначина́я е́ю ту́, ю́же нѣ́когда Косма́ Тебѣ́ воспѣ́. [Два́жды.]

Гавріи́лъ Дѣ́вѣ пре́жде благовѣ́стіе съ небесе́ прине́съ, возопи́: ра́дуйся! Ны́нѣ же стра́нную пѣ́снь Ея́ чу́дно Горѣ́ Святѣ́й возвѣсти́, припѣва́я, е́же блажи́ти я́ко вои́стинну досто́йно е́сть Всечи́стую.

Любо́вію боже́ственнѣй ико́нѣ Твое́й покланя́емся, Чи́стая, предъ не́юже воспѣ́ся пе́рвѣе преднача́тіе пѣ́сни Твоея́ отъ а́нгела. Тѣ́мже вѣ́рно сію́ ны́нѣ лобыза́емъ и вку́пѣ Гавріи́лу боже́ственному свѣ́тло пра́зднуемъ, я́ко вино́вному.

Сла́ва, и ны́нѣ, гла́съ 6:

Кто́ возглаго́летъ си́лы Твоя́, Чи́стая, или́ кто́ изочте́тъ чуде́съ Твои́хъ мно́жества? Мно́го и па́че естества́ дѣ́йствуеши Твоя́ чудеса́. О, вели́чій, я́же и ны́нѣ содѣ́лала еси́! Твоея́ бо пѣ́сни преднача́тіе чрезъ а́нгела, Всечи́стая, на́мъ предала́ еси́, Дѣ́во, и стра́нно на дщи́цѣ ка́меннѣй сему́ написа́тися Ты́ благоволи́ла еси́ промышле́ніемъ Твои́мъ, е́же въ пѣ́снехъ велича́ти Тя́, Пренепоро́чная.


НА ЛИТУРГІИ,

Слу́жба Богоро́дицы: [Блаже́нна отъ кано́на, пѣ́снь 3-я и 6-я. Проки́менъ, гла́съ 3, пѣ́снь Богоро́дицы: Вели́читъ душа́ Моя́ Го́спода, и возра́довася ду́хъ Мо́й о Бо́зѣ, Спа́сѣ Мое́мъ. Сти́хъ: Яко призрѣ́ на смире́ніе рабы́ Своея́, се́ бо отны́нѣ ублажа́тъ Мя́ вси́ ро́ди. Апо́столъ къ Филипписíемъ, зача́ло 240. Аллилу́ія, гла́съ 8: Слы́ши Дщи́ и ви́ждь, и приклони́ у́хо Твое́. Сти́хъ: Лицу́ Твоему́ помо́лятся бога́тіи лю́дстіи. Ева́нгеліе Луки́, зача́ло 54. Прича́стенъ: Ча́шу спасе́нія пріиму́, и и́мя Госпо́дне призову́.]

Источникъ: Мине́я Ію́нь. Ча́сть пе́рвая. — М.: Издательскій совѣтъ Русской Православной Церкви, 2002. — С. 359-372.

/ Къ оглавленію раздѣла /


Наверхъ / Къ титульной страницѣ

0