Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - среда, 23 августа 2017 г. Сейчасъ на порталѣ посѣтителей - 16.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́нія въ 10-й де́нь.
Свята́го священному́ченика Тимоѳе́я, епи́скопа Пру́сскаго.

[ВЕЧЕРЪ,]
Стихи́ры, гла́съ 4. Подо́бенъ: Яко до́бля.

Святи́телю Тимоѳе́е,* пру́сяновъ похвало́,* вселе́нныя побо́рниче* и мíра свѣти́льниче,* Це́ркве удобре́ніе,* вѣ́ры же́ртва свяще́нная* и му́чениковъ честно́е и свѣтоно́сное украше́ніе,* моли́ отъ тли́ и бѣ́дъ изба́витися* вѣ́рою творя́щимъ всечестну́ю па́мять твою́.

Прекра́сную оде́жду омоче́ніи кро́вными* истка́лъ еси́ болѣ́зньми твои́ми, о Тимоѳе́е,* оде́жду небе́сную свы́ше* нетлѣ́нна очище́нія* и непрело́жныя жи́зни* неизрече́нно воспрія́лъ еси́,* ю́же невеще́ственну въ вы́шнихъ нося́,* о всѣ́хъ моли́ся, страстоте́рпче,* благоче́стно восхваля́ющихъ тя́.

Ины стихи́ры Богоро́дицы, гла́съ и подо́бенъ то́йже:

Осужде́нія изба́ви, Пресвята́я Богоневѣ́сто,* и лю́тыхъ прегрѣше́ній* смире́нную мою́ ду́шу,* и сме́рти измѣни́ моли́твами Твои́ми,* и да́руй оправда́ніе получи́ти въ де́нь испыта́нія,* е́же получи́ша святы́хъ собо́ри,* покая́ніемъ очище́на мя́ пре́жде конца́ покажи́* и сле́зными излія́ніи.

Ту́чами Ду́ха Пресвята́го, Пречи́стая,* мою́ мы́сль ороси́,* Яже ка́плю ро́ждшая, Христа́,* неизче́тно безмѣ́рная беззако́нія человѣ́ковъ* щедро́тами измы́вшую,* изсуши́ исто́чникъ страсте́й мои́хъ* и пото́ка мя́ сподо́би* пи́щи живы́я при́сно* моли́твами Твои́ми.

Покая́нія изря́дное* и спаси́тельное врачевство́,* Яже Бо́га ро́ждшая, Спа́са моего́,* и слеза́мъ то́ки,* и часа́ по́мыслъ гро́знаго и стра́шнаго,* и Суда́ неумы́тнаго* Ты́ ми да́руй избѣжа́ти моли́твами Твои́ми, о Дѣ́во,* муче́нія тре́петнаго* и Боже́ственную улучи́ти благода́ть.

Сла́ва, и ны́нѣ, [богоро́диченъ]:

Тма́ми, Пречи́стая, обѣща́хся* покая́ніе о мои́хъ сотвори́ти согрѣше́ніихъ,* но не оставля́етъ мя́ любе́зный зо́лъ мои́хъ обы́чай.* Сего́ ра́ди Тебѣ́ вопію́* и припа́даю, моля́ся:* Ты́ мя, Влады́чице, изми́* такова́го мучи́тельства,* наставля́ющи къ лу́чшимъ* и спасе́нія бли́зъ су́щихъ.

Крестобогоро́диченъ:

Агнца и Па́стыря, Тя́* на дре́вѣ я́ко ви́дѣ,* Агница ро́ждшая рыда́ше* и ма́терски Ти́ вѣща́ше:* Сы́не возжелѣ́нне,* ка́ко на дре́вѣ кре́стнѣмъ повѣ́шенъ еси́, Долготерпѣли́ве?* Ка́ко ру́цѣ и но́зѣ Твои́, Сло́ве,* пригвозди́шася отъ беззако́нныхъ,* и кро́вь Твою́ излія́лъ еси́, Влады́ко?


[НА УТРЕНИ,]
Кано́нъ, гла́съ 4.

Пѣ́снь 1.

Ирмо́съ: Триста́ты крѣ́пкія, Рожде́йся отъ Дѣ́вы, безстра́стія во глубинѣ́, души́ трича́стное потопи́, молю́ся, да Тебѣ́, я́ко въ тимпа́нѣ, во умерщвле́ніи тѣлесе́ побѣ́дное воспою́ пѣ́ніе.

Непобѣди́му крѣ́пость, неизмѣ́нну держа́ву и непретво́рну я́ко имѣ́я, Благíй, неизрече́нною си́лою Твое́ю утверди́ моего́ язы́ка не́мощь въ пѣ́снехъ Твои́хъ и моли́твами Тимоѳе́я уще́дри.

Крѣ́постію богодѣ́льною свяще́ннаго су́щи ко́рене израсти́лъ еси́ свяще́нный, Тимоѳе́е, са́дъ, добродѣ́телей яви́лся еси́ благоукраше́ніе: процвѣ́лъ бо еси́ страда́ній плоды́ оби́льны и всѣ́хъ Влады́цѣ прине́слъ еси́.

Ума́ чистото́ю и души́ свѣ́тлостію, твои́ми кро́вными омоче́ніи испещре́нъ я́влься, богоно́се Тимоѳе́е, горѣ́ ны́нѣ ца́рствуеши со Влады́кою тва́ри и ста́ду твоему́ вѣ́рою предста́лъ еси́.

Богоро́диченъ: Одушевле́нный Бо́жій и пресвѣ́тлый до́мъ, Богоро́дице Блага́я, мíра Ра́досте, не отри́ни мене́ дале́че отъ Тебе́, уще́дри же и всѣ́хъ искуше́ній изба́ви, я́ко да вну́трь лику́ю покро́ва Твоего́.

Пѣ́снь 3.

Ирмо́съ: Весели́тся о Тебѣ́ Це́рковь Твоя́, Христе́, зову́щи: Ты́ моя́ крѣ́пость, Го́споди, и прибѣ́жище, и утвержде́ніе.

Съ му́ченики Христо́вы му́ченикъ я́влься свѣ́телъ, сла́вне, во свяще́нницѣхъ му́дрыхъ яви́лся еси́ свяще́нникомъ удобре́ніе.

Хра́мъ Христо́въ, прему́дрости сокро́вище, дне́сь пріиди́те, вѣ́рніи, воспое́мъ ста́до пру́сскаго первонача́льника.

Съ по́ты добродѣ́тельными кро́вь твою́ растворя́я, чи́сто, прему́дре, пи́во Го́сподеви прине́слъ еси́, боже́ственно и красно́, о Тимоѳе́е!

Богоро́диченъ: Марíе, Ма́ти Бо́жія, вы́шшая херуви́мъ, Чи́стая и всея́ земли́ Влады́чице, спаси́ мя боже́ственными Твои́ми мольба́ми.

Сѣда́ленъ, гла́съ 5. Подо́бенъ: Собезнача́льное Сло́во.

Кро́вными ту́чами напоя́емь, священному́чениче Госпо́день, пло́дъ прине́слъ еси́ въ земли́ бла́зѣй се́рдца твоего́, неиждива́емую пи́щу, ю́же прія́лъ еси́ отъ Бо́га. Тѣ́мже тя́ мо́лимъ изба́витися отъ бѣ́дъ творя́щимъ па́мять твою́.

Сла́ва, и ны́нѣ, пра́здника или́ богоро́диченъ:

Тя́ приста́нище, и стѣ́ну, и прибѣ́жище, и наде́жду, и покро́въ, и заступле́ніе те́плое обрѣ́тше, вѣ́рніи, къ Тебѣ́ притека́емъ, и вопіе́мъ прилѣ́жно, и зове́мъ вѣ́рно: поми́луй, Богоро́дице, упова́ющихъ на Тя́ и отъ прегрѣше́ній изба́ви.

Крестобогоро́диченъ:

Кресто́мъ Сы́на Твоего́, Богоблагода́тная, и́дольская пре́лесть вся́ упраздни́ся и де́монская крѣ́пость попра́ся. Сего́ ра́ди, вѣ́рніи, по до́лгу Тя́ при́сно пое́мъ, и благосло́вимъ, и, Богоро́дицу вои́стинну исповѣ́дающе, Тя́ велича́емъ.

Пѣ́снь 4.

Ирмо́съ: Вознесе́на Тя́ ви́дѣвши Це́рковь на Крестѣ́, Со́лнце Пра́ведное, ста́ въ чи́нѣ свое́мъ, досто́йно взыва́ющи: сла́ва си́лѣ Твое́й, Го́споди.

Небому́дренно житіе́ я́ко стяжа́въ и возгремѣ́ніи Ду́ха ве́сь облиста́я, змíя всепа́губнаго попали́лъ еси́, сла́вне, благода́тію Боже́ственною укрѣпля́емь.

Видѣ́ніемъ и дѣя́ніемъ украша́емь, въ леви́тстѣ о́бразѣ, ору́жіемъ обою́ду о́стрымъ змíя вну́тренняя ссѣца́еши, о Тимоѳе́е, хлѣ́бовъ свяще́нныхъ покрыва́ломъ.

Позна́въ Христа́, Вели́каго Архіере́я, не чужде́ю кро́вію, но твое́ю, му́чениче, ко Отцу́ приводи́ма, я́ко собесѣ́дникъ Ему́, кро́вь твою́ принося́, поже́рлъ еси́.

Богоро́диченъ: Многоочи́тая, Твоея́ чистоты́ неусы́пно, Богороди́тельнице Чи́стая, побѣжда́ются зрѣ́ти: си́хъ бо, я́ко Влады́чица, предваря́еши всегда́ и при́сно предви́диши рабы́ Твоя́.

Пѣ́снь 5.

Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Якоже сѣки́ра тверда́, я́ко си́льно ору́жіе, къ полко́мъ беззако́нныхъ бра́нь соста́вль, побѣ́дою вѣнча́ся.

Свѣти́ло дневно́е свѣтоно́сно показу́етя, озари́лъ еси́ цари́цу, ю́же во мра́цѣ зло́бы скончава́ющу лице́, сла́вне.

Зря́ и́дольскихъ скверне́ній смѣше́ніе, пре́далъ еси́ кро́ви излія́телемъ, я́ко а́гня, себе́, блаже́нне, и же́ртва Бо́гу прине́слся еси́.

Богоро́диченъ: Чи́стая Голуби́це, моли́твъ Твои́хъ крилѣ́ на рабы́ Твоя́, и́же въ мíрѣ, и покро́въ просте́рши, Дѣ́во, не пре́зри и мене́.

Пѣ́снь 6.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Возвесели́ся вселе́нная дне́сь, ра́дующися о па́мяти твое́й, блаже́нне: просвѣща́еши бо свы́ше чуде́съ заря́ми ду́ши пою́щихъ тя́.

Яви́лся еси́ ны́нѣ не на земли́ су́щей трапе́зѣ служи́тель, но, въ небе́сная входя́, пита́ешися на трапе́зѣ неизрече́ннѣй, въ не́йже пода́ждь и на́мъ твою́ пи́щу и наслажде́ніе.

Зако́нно свяще́нный по́двигъ творя́, со дерзнове́ніемъ, богому́дре, царя́ безу́міе изобличи́лъ еси́ и и́дольская разори́лъ еси́ тре́бища, Тимоѳе́е.

Богоро́диченъ: Пое́тся гла́сы а́нгельскими, Богоневѣ́сто, Тво́й Сы́нъ, всѣ́хъ Зижди́тель и Бо́гъ, Сы́й пре́жде вѣ́къ, и съ Ни́мъ у́бо ца́рствующи, спаси́ мя́, Влады́чице.

Пѣ́снь 7.

Ирмо́съ: Въ пещи́ авраа́мстіи о́троцы перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.

Достодо́лжно въ добродѣ́телехъ бога́тное тя́ сокро́вище вѣнча́етъ пре́жде страда́ній благода́ть богодѣ́льная и, чуде́сными дарова́ніи просвѣща́ющи, свѣ́тла въ ми́рѣ соверши́. [Дважды.]

Ору́жна преще́нія и огнено́сна пла́мене, му́чениче, зря́, вѣ́рою вооружи́въ у́мъ тво́й и ду́шу, и безбоя́зненнымъ ра́зумомъ Христа́ проповѣ́далъ еси́, твоего́ Содѣ́теля, и Зижди́теля, и Го́спода.

Богоро́диченъ: Ты́, держа́щаго дла́нію вся́ческая, Ма́ти Бо́жія, вну́трь во чре́вѣ иму́щи боголѣ́пно, соблюда́еши зову́щія: благослове́нна Ты́ въ жена́хъ еси́, Пренепоро́чная.

Пѣ́снь 8.

Ирмо́съ: Ру́цѣ распросте́ръ, Даніи́лъ, льво́въ зія́нія въ ро́вѣ затче́; о́гненную же си́лу угаси́ша, добродѣ́телію препоя́савшеся, благоче́стія рачи́тели, о́троцы, взыва́юще: благослови́те, вся́ дѣла́ Госпо́дня, Го́спода.

Си́лою боже́ственныя вѣ́ры укрѣ́плься, му́дре Тимоѳе́е, но́въ показа́лся еси́ я́коже Даніи́лъ на́мъ, змíя низлага́я всегуби́тельнаго, и, на высотѣ́ предста́въ, зове́ши, поя́ при́сно: благослови́те, вся́ дѣла́ Госпо́дня, Го́спода.

Вну́трь, я́ко ра́бъ свяще́нный, Го́спода твоего́ ра́дости бы́лъ еси́: ты́ бо тала́нтъ, сла́вне, вѣ́ры болѣ́зньми твои́ми израсти́лъ еси́ многосугу́бо, страда́ніи и чудесы́, взыва́я: благослови́те, вся́ дѣла́ Госпо́дня, Го́спода.

Неду́ги отгоня́ человѣ́ковъ, пома́заніи твои́ми благоуха́еши, прему́дре, ду́ши, си́льнымъ твои́мъ дарова́ніемъ болѣ́зней отъе́млеши я́звы и отъ духо́въ лука́выхъ избавля́еши при́сно вопію́щія: благослови́те, вся́ дѣла́ Госпо́дня, Го́спода.

Богоро́диченъ: Яко сла́венъ вѣне́цъ, естество́ прія́тъ боже́ственнымъ рождество́мъ Твои́мъ, враго́въ на бра́ни у́бо да́руй побѣди́телю бы́ти ми́, Твои́хъ дарова́ній свѣ́тлымъ вѣнце́мъ вѣнча́тися и взыва́ти: благослови́те, вся́ дѣла́ Госпо́дня, Го́спода.

Пѣ́снь 9.

Ирмо́съ: Ева у́бо неду́гомъ преслуша́нія кля́тву всели́ла е́сть, Ты́ же, Дѣ́во Богоро́дице, прозябе́ніемъ чревоноше́нія мíрови благослове́ніе процвѣла́ еси́. Тѣ́мъ Тя́ вси́ велича́емъ.

Ви́дѣхомъ пресла́вная въ тебѣ́, Тимоѳе́е богоно́се, вои́стинну чудеса́: источа́етъ бо моще́й твои́хъ ра́ка исцѣле́ній исто́чники на́мъ и уставля́етъ неду́говъ болѣ́зни. Тѣ́мже, чту́ще тя́, сла́вимъ.

Ве́сь лику́я вои́стинну, Тимоѳе́е, со а́нгельскими во́инствы, ра́дуяся съ му́ченическими собо́ры и поя́ со свяще́нными чи́ны, моли́ непреста́нно Го́спода спасти́ вѣ́рою хва́лящія тя́.

Пѣ́ній и моле́бъ гла́сы услы́ши, му́чениче Христо́въ всече́стне, вонми́ къ жела́нію и любви́, и воззри́ во гнѣ́вѣ Непобѣди́мому, и свы́ше покро́въ тво́й да́руй всѣ́мъ, вѣ́рою хва́лящимъ тя́.

Богоро́диченъ: Возвы́си благода́ть Твою́, Чи́стая, возвели́чи моли́тву и приведи́ чи́ны а́нгельскія ко Влады́цѣ, ли́ки апо́столъ и проро́къ и вся́ пра́ведники съ му́ченики, я́ко да спасе́мся, чту́щіи Тя́.

Источникъ: Минíа, мѣ́сяцъ Іу́ній. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 62 об. – 65 об.

/ Къ оглавленію раздѣла /


Наверхъ / Къ титульной страницѣ

0