Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 21 октября 2017 г. Сейчасъ на порталѣ посѣтителей - 20.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́нія въ 9-й де́нь.
Слу́жба преподо́бнаго отца́ на́шего Кири́лла, игу́мена Бѣлоезе́рскаго.

НА МАЛѢЙ ВЕЧЕРНИ,
На Го́споди воззва́хъ: стихи́ры, гла́съ 1. Подо́бенъ: Всехва́льніи му́ченицы.

Иже непра́ведно и разбо́йнически по́сланный* тебе́ оскорби́ти, преподо́бне,* ви́дѣ боже́ственную си́лу,* того́ напра́сное суровство́ возбраня́ющу,* отону́дуже позна́ свое́ безчеловѣ́чное согрѣше́ніе* и къ тебѣ́ притече́ покая́ніемъ,* ты́ же ми́лостивно его́ наказа́лъ еси́.* Богоблаже́нне, о на́съ моли́,* дарова́ти душа́мъ на́шимъ ми́ръ* и ве́лію ми́лость.

Отче Кири́лле,* и́же иногда́ человѣ́ка, вра́жія совѣ́та послу́шавша* и огне́мъ па́кость хотя́ща тебѣ́ сотвори́ти,* но по́мощь Бо́жію, съ тобо́ю быва́ющую, позна́вша* и къ тебѣ́ прибѣ́гша покая́ніемъ,* любо́вію прія́лъ еси́* и, ми́лостивно наказа́въ,* твоему́ ста́ду о́наго сочта́лъ еси́.* Тѣ́мже моли́* дарова́ти душа́мъ на́шимъ ми́ръ* и ве́лію ми́лость.

Сла́ва, гла́съ 6:

Преподо́бне о́тче, явле́ніемъ Бо́жія Ма́тере наставля́емь и Тоя́ сія́ньми озаря́емь, пусты́ню, явле́нную тебѣ́ отъ Тоя́, дости́глъ еси́ и, въ не́й трудолю́бнѣ подвиза́вся, вше́лъ еси́ въ незаходи́мый свѣ́тъ ра́зума, идѣ́же мно́ги ревни́тели житію́ твоему́ сотвори́лъ еси́. Того́ ра́ди и по сме́рти дарова́нія прія́тъ бѣ́сы прогоня́ти, и исцѣле́нія разли́чныхъ неду́говъ человѣ́комъ да́руеши, вѣ́рою отъ души́ притека́ющимъ къ хра́му твоему́ всечестно́му, и мо́лишися спасти́ почита́ющихъ любо́вію па́мять твою́.

И ны́нѣ, богоро́диченъ. Аще Пятдеся́тница: И ны́нѣ, пра́здника.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Яко преходя́щую жи́знь,* я́же на земли́, преоби́дѣлъ еси́, блаже́нне,* и та́мо боже́ственныя улучи́ти сподо́бився,* тоя́ сія́ніе* прія́лъ еси́, богоно́сне.

Сти́хъ: Честна́ предъ Го́сподемъ* сме́рть преподо́бныхъ Его́.

Христо́вы ра́ди любве́,* преподо́бне Кири́лле,* пло́ти рачи́тельное умертви́лъ еси́ мудрова́ніе* и ду́шу, свобо́дну отъ страсте́й,* Бо́гу предста́вилъ еси́.

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

Бо́дренными моли́твами* и сле́зными исто́чники* Це́ркви вѣ́рныхъ* обогати́лъ еси́,* богоблаже́нне.

Сла́ва, и ны́нѣ, богоро́диченъ:

Вы́шнія Тя́ ли́цы,* Богоро́дице Дѣ́во,* пою́тъ съ ни́жними,* сла́вяще непреста́нно* Рождество́ Твое́ Пречи́стое.

Тропа́рь пи́санъ на вели́цѣй вече́рни.



НА ВЕЛИЦѢЙ ВЕЧЕРНИ,
Пое́мъ: Блаже́нъ му́жъ.., [1-й антифо́нъ.] Стихи́ры на 8. Гла́съ 4. Подо́бенъ: Зва́нный свы́ше.

Егда́ Пречи́стыя гла́сомъ* по́званъ бы́въ Богома́тере,* тогда́ вся́ су́щая,* я́ко не су́щая, преоби́дѣлъ еси́* и въ пусты́ню да́льнюю всели́лся еси́, преподо́бне,* идѣ́же и тѣле́сная мудрова́нія* по́стническими труды́* ду́ху повину́лъ еси́* и, стада́ учени́къ твои́хъ* въ то́й умно́живъ,* Христу́ приве́лъ еси́.* Того́ моли́, блаже́нне Кири́лле,* спасти́ и просвѣти́ти ду́ши на́ша. [Два́жды.]

Егда́ Пречи́стыя гла́съ* услы́шалъ еси́, пребога́те,* тогда́ стремле́ніе плотско́е* обузда́лъ еси́, преподо́бне о́тче,* и, я́ко Илія́ дре́вле, у́мъ очи́щь,* въ пусты́ню всели́лся еси́,* и та́мо непреста́нными моли́твами* къ Бо́гу прибли́жился еси́,* стопа́мъ вели́каго Анто́нія послѣ́дуя.* Тѣ́мъ и по сме́рти чудесы́ сія́я,* Христу́ моли́ся* спасти́ и просвѣти́ти ду́ши на́ша.

Боже́ственный гла́съ* егда́ услы́шалъ еси́, блаже́нне Кири́лле,* тогда́, кре́стъ тво́й взе́мъ,* послѣ́довалъ еси́ Христу́* и, любо́вію къ Нему́ распала́емь,* кро́токъ и смире́нъ се́рдцемъ бы́лъ еси́.* Тѣ́мже и кро́ткихъ селе́нія наслѣ́довалъ еси́* и отту́ду источа́еши* исто́чникъ исцѣле́ній чту́щимъ тя́.* Христу́, Ему́же рабо́талъ еси́,* Тому́ моли́ся* спасти́ и просвѣти́ти ду́ши на́ша.

Ины стихи́ры, гла́съ 8. Подо́бенъ: Что́ вы́ нарече́мъ.

Что́ тя́ нарече́мъ, Кири́лле?* Рѣку́, духо́вныхъ во́дъ наполня́ему* и напоя́ющу жа́ждущихъ непло́дствующая сердца́;* исто́чника, источа́юща всегда́ исцѣле́нія вѣ́рнымъ;* ча́шу, боже́ственное вино́ иму́щу;* свѣти́льника, оте́чество твое́ просвѣща́юща.* Мно́га ти́ имена́* и бо́льша дарова́нія,* моли́ спасти́ся душа́мъ на́шимъ. [Два́жды.]

Что́ тя́ нареку́, Кири́лле пречу́дне?* Ученика́, я́ко Госпо́день учени́къ бы́лъ еси́;* учи́теля, я́ко мно́гихъ учени́къ ко Христу́ приве́лъ еси́;* пусты́ни жи́теля, я́ко ту́ гра́дъ сотвори́лъ еси́;* граждани́на, и́бо въ небе́сный гра́дъ всели́лся еси́;* кро́ткаго, я́ко Христа́, кро́ткаго Пастыренача́льника,* кро́ткое овча́ бы́лъ еси́.* Его́же моли́* спасти́ся душа́мъ на́шимъ.

Что́ тя́, чу́дне Кири́лле, имену́емъ?* Прему́драго, Христа́ бо ра́ди юро́дство творя́ бы́лъ еси́;* беззло́бива, я́ко незло́бивъ ко озло́бившимъ тебе́ бы́лъ еси́;* стра́нныхъ пріи́мника, я́ко Авраа́мле страннолю́біе стяжа́лъ еси́;* Исаа́ка, я́ко са́мъ себе́ же́ртву прине́слъ еси́;* чудодѣ́йственника, я́ко чуде́съ дарова́нія отъ Бо́га прія́лъ еси́.* Мно́га именова́нія твоя́,* бо́льша же даро́въ прія́тія,* моли́ спасти́ся душа́мъ на́шимъ.

Сла́ва, гла́съ 6:

Еже по о́бразу соблю́дъ невреди́мо, у́мъ влады́ку на стра́сти па́губныя по́стнически поста́вивъ, во е́же по подо́бію, я́ко мо́щно, возше́лъ еси́, му́жески бо естество́ пону́дивъ, потща́лся еси́ ху́ждшее покори́ти лу́чшему, и пло́ть порабо́тити ду́ху. Тѣ́мже мона́шествующихъ яви́лся еси́ ве́рхъ, жи́тель пусты́нный, благотеку́щихъ обучи́тель, пра́вило добродѣ́тели извѣ́стнѣйшее. И ны́нѣ на небесѣ́хъ зерца́ломъ разрѣ́шшимся, о́тче на́шъ Кири́лле, чи́стѣ зри́ши Святу́ю Тро́ицу, моля́ся несре́дственнѣ о вѣ́рою и любо́вію чту́щихъ тя́.

И ны́нѣ, богоро́диченъ. Аще Пятдеся́тница: И ны́нѣ, пра́здника.
Вхо́дъ. Проки́менъ дне́. Чте́нія три́:

Прему́дрости Соломо́ни чте́ніе.

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе.

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ры, гла́съ 2:

Въ ти́хое и небу́рное приста́нище безмо́лвія вше́лъ еси́, преподо́бне, и та́мо Влады́чицу Богоро́дицу сподо́бился еси́ ви́дѣти, и сла́дкій гла́съ, я́ко Авраа́мъ, услы́шавъ, изы́ти отту́ду глаго́лющь и ити́ та́мо, идѣ́же мѣ́сто ти́ угото́вахъ, и па́ки послу́шавъ, боже́ственныхъ дарова́ній та́мо сподо́бился еси́, бѣ́сы прогоня́ти и боля́щія исцѣля́ти. Тѣ́мже мо́лимся и на́съ душе́вныхъ страсте́й изба́вити, соверша́ющихъ любо́вію честно́е твое́ успе́ніе.

Яко пресвѣ́тлымъ вѣнце́мъ пресла́вно отъ вседержи́тельныя десни́цы Вы́шняго вѣнча́вся, Тому́, блаже́нне Кири́лле преподо́бне, со дерзнове́ніемъ мно́гимъ предстоя́, прилѣ́жно моли́ся о почита́ющихъ жи́знь твою́ и пречестно́е твое́ успе́ніе вѣ́рно сла́вящихъ, вся́каго вре́да лука́ваго изба́витися свяще́нному ста́ду твоему́ и душа́мъ на́шимъ низпосла́ти ми́ръ и ве́лію ми́лость.

Сла́ва, гла́съ 8:

Исцѣле́нія оби́льно честны́я мо́щи твоя́ всегда́ источа́ютъ вѣ́рою приходя́щимъ, богоно́се Кири́лле, благоуха́нія всѣ́хъ исполня́юще и тму́ бѣсо́вскую дале́че отгоня́юще, свѣ́томъ благоче́стія просвѣща́юще вѣ́рныхъ. Тѣ́мже мо́лимъ тя́, раби́ твои́, вся́каго навѣ́та вра́жія на́съ изба́вити, я́ко да тво́й пресвѣ́тлый пра́здникъ благоче́стно воспѣва́емъ псало́мски и, сла́вное успе́ніе дне́сь пѣ́сньми торжеству́юще, прославля́емъ тебе́ та́ко просла́вльшаго, еди́наго во святы́хъ Бо́га на́шего.

И ны́нѣ, богоро́диченъ. Аще Пятдеся́тница: И ны́нѣ, пра́здника.

На стихо́внѣ стихи́ры, гла́съ 1. Подо́бенъ: Небе́сныхъ чино́въ.

Блиста́ніемъ боже́ственнаго свѣ́та,* преподо́бне о́тче, при́сно озаря́емь,* ве́сь свѣтови́дѣнъ бы́лъ еси́.* Мно́гими укра́шенъ отъ Бо́га дарова́ньми,* во оби́тели дости́глъ еси́ небе́сныя,* въ ни́хже мо́лишися* о и́же вѣ́рою пою́щихъ тя́.

Сти́хъ: Честна́ предъ Го́сподемъ* сме́рть преподо́бныхъ Его́.

Водвори́лся еси́ въ пусты́ню безмо́лвія, блаже́нне,* та́мо небе́сное бога́тство стяжа́лъ еси́, преподо́бне Кири́лле,* препроводи́въ бо твое́ житіе́ во умиле́ніи и слеза́хъ.* Тѣ́мже ра́дости и свѣ́та сы́нъ бы́лъ еси́,* со а́нгелы всегда́ веселя́ся,* моли́ о чту́щихъ тя́.

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

Ста́до, е́же стяжа́лъ еси́ труды́ твои́ми, о́тче,* не оста́ви, но посѣща́й, преподо́бне,* и, я́ко жи́въ, съ на́ми водворя́яся,* та́ко и ны́нѣ съ преподо́бными Влады́цѣ предстоя́,* моли́ изба́витися всѣ́мъ вся́каго гнѣ́ва и преще́нія* и бу́дущаго грѣ́шнымъ томле́нія.

Сла́ва, гла́съ 6:

Тезоимени́тое зва́ніе Пречи́стыя я́ко услы́шавъ, по́стническими труды́ себе́ обложи́лъ еси́, мíру и страсте́мъ себе́ умертви́въ, со Христо́мъ изво́лилъ еси́ жи́ти. Тѣ́мъ и по сме́рти исцѣле́нія источа́етъ гро́бъ тво́й, преподо́бне Кири́лле, вѣ́рою притека́ющимъ. Но, я́ко имѣ́я дерзнове́ніе ко прославля́емому во святы́хъ Христу́, моли́ся о и́же вѣ́рою соверша́ющихъ па́мять твою́ честну́ю и чту́щихъ труды́ твоя́, я́же за Христа́ претерпѣ́лъ еси́, и на́мъ улучи́ти дерзнове́ніе въ де́нь Суда́, мо́лимся.

И ны́нѣ, богоро́диченъ. Аще Пятдеся́тница: И ны́нѣ, пра́здника.

Тропа́рь, гла́съ 1:

Яко кри́нъ, въ пусты́ни Дави́дски процвѣ́лъ еси́, о́тче Кири́лле, злостра́стія те́рніе искореня́я, и собра́лъ еси́ въ не́й учени́къ мно́жество, стра́хомъ Бо́жіимъ и уче́ніемъ твои́мъ наставля́емыхъ, и́хже и до конца́, я́ко чадолюби́вый оте́цъ, не оста́вилъ еси́, посѣща́я, да вси́ вопіе́мъ: сла́ва Да́вшему ти́ крѣ́пость, сла́ва Вѣнча́вшему тя́, сла́ва Дѣ́йствующему тобо́ю всѣ́мъ исцѣле́нія.

Сла́ва, и ны́нѣ, пра́здника или́ богоро́диченъ.



НА УТРЕНИ,
На Бо́гъ Госпо́дь: Тропа́рь, два́жды, и богоро́диченъ.

По 1-й стихоло́гіи сѣда́ленъ, гла́съ 3. Подо́бенъ: Красотѣ́ дѣ́вства.

Яко безпло́тенъ, о́тче, пожи́лъ еси́ на земли́ и превознося́щагося врага́ смири́лъ еси́. Тѣ́мже, ны́нѣ съ невеще́ственными ли́ки, блаже́нне, водворя́яся, та́мо блаже́нства наслажда́ешися, помина́й па́мять твою́ дне́сь пра́зднующихъ, да вси́ ра́достными гла́сы воспѣва́емъ Христа́ Бо́га на́шего, да́вшаго тебѣ́ благода́ть исцѣле́ній. [Два́жды.]

Сла́ва, и ны́нѣ, богоро́диченъ:

Боже́ственная ски́нія была́ еси́ Сло́ва, еди́на Пречи́стая Ма́ти Дѣ́во, чистото́ю а́нгелы превозше́дшая, па́че всѣ́хъ мене́, пе́рсть бы́вша, оскверне́на плотски́ми прегрѣше́ньми, очи́сти моли́твъ Твои́хъ боже́ственными вода́ми, подаю́щи, Чи́стая, ве́лію ми́лость.

По 2-й стихоло́гіи сѣда́ленъ, гла́съ 8. Подо́бенъ: Повелѣ́нное.

Страсте́й тму́ моли́твами твои́ми, о́тче, отгна́лъ еси́ и се́рдце твое́ съ чу́вствы чи́сто Бо́гу предста́вилъ еси́. Сего́ ра́ди въ тя́ всели́ся благода́ть Ду́ха Пресвята́го, е́же прови́дѣти бу́дущая и, я́ко бли́зъ су́щая, та́ проявля́ти, и проси́вшимъ у тебе́ съ вѣ́рою непло́дствія соу́зъ разрѣши́лъ еси́. Тѣ́мже и на́мъ, мо́лимся, проси́ отъ Христа́ ве́лію ми́лость. [Два́жды.]

Сла́ва, и ны́нѣ, богоро́диченъ:

Яже непремѣ́ннаго Бо́га поро́ждшая, премѣня́емое при́сно се́рдце мое́ грѣхо́мъ и лѣ́ностію, прило́гми льсти́ваго утверди́, Блага́я, моли́твами ма́терними Твои́ми, я́ко да и а́зъ благода́рно сла́влю Тя́, Богороди́тельнице Марíе, поми́луй ста́до Твое́, е́же стяжа́ла еси́, Всенепоро́чная.

По поліеле́и сѣда́ленъ, гла́съ 8. Подо́бенъ: Прему́дрости.

Въ пусты́ню, преблаже́нне, всели́лся еси́, и въ не́й прече́стенъ хра́мъ Бо́жія Ма́тере воздви́глъ еси́, и мно́жество мона́шествующихъ та́мо собра́лъ еси́, Го́сподеви съ тобо́ю рабо́тающихъ, и́хже сохраня́й отъ вся́каго прило́га лука́ваго, да вси́ благода́рственно вопіе́мъ ти́: преблаже́нне Кири́лле, моли́ Христа́ Бо́га грѣхо́въ оставле́ніе дарова́ти чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Яко дѣ́ву и еди́ну въ жена́хъ, Тя́, безъ сѣ́мене ро́ждшую Бо́га пло́тію, вси́ ублажа́емъ, ро́ди человѣ́честіи: о́гнь бо всели́ся въ Тя́ Божества́, и я́ко Младе́нца млеко́мъ пита́еши Зижди́теля и Го́спода. Тѣ́мъ, а́нгельскій и человѣ́ческій ро́дъ, досто́йно сла́вимъ пресвято́е Рождество́ Твое́ и согла́сно вопіе́мъ Ти́: моли́ Христа́ Бо́га согрѣше́ній оставле́ніе дарова́ти покланя́ющимся вѣ́рою пресвято́му Рождеству́ Твоему́.

Степе́нна, 1-й антифо́нъ 4-го гла́са. Проки́менъ, [гла́съ 4]: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Вся́кое дыха́ніе... Ева́нгеліе Матѳе́я, зача́ло 43.

По 50-мъ псалмѣ́, стихи́ра, гла́съ 6:

[Тезоимени́тое зва́ніе Пречи́стыя я́ко услы́шавъ, по́стническими труды́ себе́ обложи́лъ еси́, мíру и страсте́мъ себе́ умертви́въ, со Христо́мъ изво́лилъ еси́ жи́ти. Тѣ́мъ и по сме́рти исцѣле́нія источа́етъ гро́бъ тво́й, преподо́бне Кири́лле, вѣ́рою притека́ющимъ. Но, я́ко имѣ́я дерзнове́ніе ко прославля́емому во святы́хъ Христу́, моли́ся о и́же вѣ́рою соверша́ющихъ па́мять твою́ честну́ю и чту́щихъ труды́ твоя́, я́же за Христа́ претерпѣ́лъ еси́, и на́мъ улучи́ти дерзнове́ніе въ де́нь Суда́, мо́лимся.]

Кано́нъ Богоро́дицы со ирмосо́мъ на 6. И свята́го два́ кано́на на 8.

Кано́нъ свята́го Кири́лла. Творе́ніе Пахо́мія, іеромона́ха Святы́я Горы́, его́же краегране́сіе: Похвалу́ пою́ Кири́ллу, но́вому чудотво́рцу. Гла́съ 6.
Пѣ́снь 1.

Ирмо́съ: Яко по су́ху пѣшеше́ствовавъ Изра́иль по бе́зднѣ стопа́ми, гони́теля фарао́на ви́дя потопля́ема, Бо́гу побѣ́дную пѣ́снь пои́мъ, вопія́ше.

Прекра́сная лоза́ виногра́да Христо́ва бы́лъ еси́, прему́дре Кири́лле, и гро́здъ пресла́дкій яви́лся еси́, боже́ственную сла́дость вѣ́рнымъ источа́еши, блаже́нне, ку́пно же и ра́дованіе пою́щимъ тя́.

Отче Кири́лле, не терпя́, вра́гъ въ нача́лѣ твоего́ житія́ бу́рю воздви́гъ, дре́вомъ напра́сно хотя́ умертви́ти тебе́, а́ще не бы́ боже́ственный гла́съ возгласи́лъ тя́, богому́дре.

Христа́, на́съ ра́ди смири́вшагося, подража́въ и кре́стъ тво́й взе́мъ, преподо́бне, Того́ стопа́мъ послѣ́довалъ еси́, вся́ко мірско́е пристра́стіе отъ тебе́ оттря́слъ еси́, пребога́те.

Богоро́диченъ: Во двою́ естеству́ Еди́нъ отъ Святы́я Тро́ицы, отъ чи́стыхъ крове́й Твои́хъ воплоти́ся, боголѣ́пно про́йде, и́же отъ Ада́ма спаса́я, Пречи́стая, бла́гостію.

Другíй кано́нъ, гла́съ 8.
Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Яко вели́ко вои́стинну дерзнове́ніе стяжа́въ, преподо́бне, къ Бо́гу, сбытію́ зри́тель сподо́бился еси́ бы́ти и непло́дная ложесна́ многопло́дна моли́твами твои́ми показа́лъ еси́.

На водѣ́ поко́я и на зла́цѣ воздержа́нія, о́тче, учени́къ твои́хъ стада́ му́дрѣ упа́слъ еси́ и, ны́нѣ съ на́ми неви́димо водворя́яся, моли́ о чту́щихъ па́мять твою́.

Умъ тво́й къ Бо́гу любо́вію впери́въ, тлѣ́нными нетлѣ́нная искупи́лъ еси́. Тѣ́мже вся́ка душа́, спаса́ема тобо́ю, тя́ прославля́етъ.

Богоро́диченъ: Ма́ніемъ вся́ Содержа́й изъ Тебе́ па́че сло́ва ражда́ется, Ма́ти Чи́стая, преподо́бныя вѣнча́вый, вѣ́рно Тебе́ сла́вящія, Ма́терь Бо́жію.

Пѣ́снь 3.

Ирмо́съ: Нѣ́сть свя́тъ, я́коже Ты́, Го́споди Бо́же мо́й, вознесы́й ро́гъ вѣ́рныхъ Твои́хъ, Бла́же, и утверди́вый на́съ на ка́мени исповѣ́данія Твоего́.

Аще и въ мíрѣ су́щая, о́тче, преоби́дѣлъ еси́, но та́мо премíрная и нетлѣ́нная стяжа́лъ еси́, идѣ́же гла́съ пра́зднующихъ и ра́йское наслажде́ніе.

Льсти́вый вра́гъ хотя́ тебѣ́ па́кость сотвори́ти, преподо́бне, лука́выя человѣ́ки на тя́ вооружа́етъ, тебѣ́ же прирази́вся, постыдѣ́ся, Христу́ бо тя́ соблюда́ющу.

Уже́ пресла́вное твое́ житіе́ всю́ду, преподо́бне, прославля́ется, и чудеса́ твоя́ въ концѣ́хъ проповѣ́даются, тѣ́мже, въ па́мять твою́ соше́дшеся, почита́емъ тя́.

Богоро́диченъ: Пло́ти бре́ннѣй соедини́вся, Иже отъ Отца́ единоро́дный, въ ложесна́хъ Твои́хъ, еди́нъ отъ двою́ про́йде безъ истлѣ́нія и соблюде́ невреди́мо дѣ́вство Твое́, Всепѣ́тая.

Инъ.

Ирмо́съ: Ты́ еси́ утвержде́ніе притека́ющихъ къ Тебѣ́, Го́споди, Ты́ еси́ Свѣ́тъ омраче́нныхъ, и пое́тъ Тя́ ду́хъ мо́й.

Волна́мъ, преподо́бне, и́менемъ Госпо́днимъ запрети́въ и е́зеро укроти́въ, лю́ди отъ потопле́нія спа́слъ еси́ моли́твами твои́ми, Кири́лле блаже́нне.

Жела́ніемъ, е́же къ Бо́гу, и Того́ любо́вію па́че огня́ распала́емь, о́тче, цѣлому́дренно въ преподо́біи и пра́вдѣ пожи́лъ еси́, преподо́бне Кири́лле.

Тѣ́ло твое́ посто́мъ и моли́твами, о́тче, удручи́лъ еси́ и сего́ ра́ди наслажда́ешися вѣ́чнаго блаже́нства, идѣ́же святы́хъ собо́ри и преподо́бныхъ ли́цы веселя́тся.

Богоро́диченъ: Боговидѣ́ніемъ просвѣща́емь, проро́къ явле́нно зри́тъ го́ру Бо́жію благослове́нную, земны́хъ украше́ніе, еди́ну Всепѣ́тую.

Сѣда́ленъ, гла́съ 4. Подо́бенъ: Вознесы́йся.

Приспѣ́ пра́здникъ честна́го твоего́ успе́нія, блаже́нне Кири́лле, просвѣща́я всѣ́хъ пра́зднующихъ па́мять твою́ свѣ́тло и Христа́ непреста́нно пѣ́сньми всегда́ сла́вящихъ. [Два́жды.]

Сла́ва, и ны́нѣ, пра́здника или́ богоро́диченъ:

Иже на престо́лѣ херуви́мстѣмъ сѣдя́й и въ нѣ́дрѣхъ Отчихъ водворя́яся я́ко на престо́лѣ святѣ́мъ сѣди́тъ Свое́мъ, Влады́чице, въ нѣ́дрѣхъ Твои́хъ; вопло́щся бо Бо́гъ вои́стинну, воцари́ся надъ всѣ́ми язы́ки, и разу́мно ны́нѣ пои́мъ Ему́, Его́же умоли́ спасти́ся рабо́мъ Твои́мъ.

Пѣ́снь 4.

Ирмо́съ: Христо́съ моя́ си́ла, Бо́гъ и Госпо́дь, честна́я Це́рковь боголѣ́пно пое́тъ, взыва́ющи, отъ смы́сла чи́ста, о Го́сподѣ пра́зднующи.

Отче преподо́бне, сна́ твои́ма очи́ма не да́лъ еси́, ни вѣ́ждома дрема́нія, до́ндеже сподо́бился еси́ ви́дѣти пра́ведныхъ селе́нія, я́же угото́ва Бо́гъ лю́бящимъ Его́.

Уже́ не ктому́ врази́, ниже́ человѣ́цы лука́віи, мо́гутъ къ тебѣ́ прибли́житися, Кири́лле преподо́бне: ви́дѣша бо благода́ть Бо́жію, тебе́ всегда́ соблюда́ющую.

Богоро́диченъ: На Тя́ упова́ніе мое́ возложи́хъ, Ма́ти Приснодѣ́во, спасе́нія моего́ и Тя́ Предста́тельницу имѣ́ю живота́ моего́, тве́рду же и непоколеби́му.

Инъ.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Бо́дренными моли́твами, о́тче, и сле́зными пото́ки Це́рковь вѣ́рныхъ напои́лъ еси́, блаже́нне Кири́лле.

Еже на земли́ вре́менное житіе́ твое́ въ безмо́лвіи мно́зѣ пожи́лъ еси́, Христу́ поя́: сла́ва си́лѣ Твое́й, Го́споди.

Отъ млада́го во́зраста въ воздержа́ніи, о́тче, пре́былъ еси́, пло́дъ мно́гъ добродѣ́тели Бо́гу, преподо́бне, прине́слъ еси́ и сего́ ра́ди отъ Него́ просла́вился еси́.

Богоро́диченъ: Всели́вся въ Тя́ Невмѣсти́мый и, вмѣсти́вся, показа́ Тя́ небе́съ ши́ршу, Дѣ́во, тѣ́мже Тя́ ублажа́емъ.

Пѣ́снь 5.

Ирмо́съ: Бо́жіимъ свѣ́томъ Твои́мъ, Бла́же, у́тренюющихъ Ти́ ду́ши любо́вію озари́, молю́ся, Тя́ вѣ́дѣти, Сло́вѣ Бо́жій, и́стиннаго Бо́га, отъ мра́ка грѣхо́внаго взыва́юща.

Изря́дно твое́ житіе́ въ послѣ́днія ро́ды и пресла́вно яви́ся, чудеса́ же твоя́ всю́ду вѣ́рнымъ излія́шася. Тѣ́мже тя́ вси́, о́тче, ублажа́емъ.

Ра́йскія добро́ты жела́я, преподо́бне Кири́лле, и тоя́ ра́ди въ слеза́хъ и воздыха́ніихъ, бдѣ́ніихъ же и моли́твахъ твою́ жи́знь препроводи́лъ еси́ и отту́ду наслѣ́дилъ еси́ жела́емое тебѣ́ блаже́нство.

Пресвѣ́тлый тво́й пра́здникъ, о́тче, благоче́стно пра́зднующимъ подава́й свы́ше спасе́ніе и избавле́ніе, да тя́ вси́, блаже́нне Кири́лле, непреста́нно воспѣва́емъ.

Богоро́диченъ: Лю́демъ я́ко вои́стинну ти́хое приста́нище Христо́съ Тебе́ яви́, вѣ́рою и любо́вію Тя́, и́стинную Влады́чицу, Всенепоро́чная, отъ со́вѣсти чи́сты Богоро́дицу исповѣ́дающимъ.

Инъ.

Ирмо́съ: Вску́ю мя́ отри́нулъ еси́ отъ лица́ Твоего́, Свѣ́те незаходи́мый, и покры́ла мя́ е́сть чужда́я тма́ окая́ннаго? Но обрати́ мя, и къ свѣ́ту за́повѣдей Твои́хъ пути́ моя́ напра́ви, молю́ся.

Пото́ки сле́зными, о́тче, страсте́й пучи́ну изсуши́лъ еси́, и въ зе́млю обѣтова́нія преше́лъ еси́, и та́мо ра́йское житіе́ прія́лъ еси́, е́же угото́ва Бо́гъ лю́бящимъ Его́.

Христа́, тобо́ю слѣпы́мъ да́рующая здра́віе, о́тче, моли́, и мнѣ́ о́чи душе́вныя просвѣти́ти, до́ндеже не обря́щетъ мя́ негото́ва но́щь глубо́кая и тма́ отча́янія, молю́ся.

Богоро́диченъ: Украси́лася еси́ дѣ́вства пречи́стыми добро́тами и пе́рвый Евы покры́ла еси́ сту́дъ злообра́зный, Христа́ ро́ждши, одѣя́ніе безсме́ртія да́рующаго Тебе́ чту́щимъ.

Пѣ́снь 6.

Ирмо́съ: Ятъ бы́сть, но не удержа́нъ въ пе́рсѣхъ ки́товыхъ Іо́на: Тво́й бо о́бразъ нося́, страда́вшаго и погребе́нію да́вшагося, я́ко отъ черто́га, отъ звѣ́ря изы́де. Приглаша́ше же кустодíи: храня́щіи су́етная и ло́жная, ми́лость сію́ оста́вили есте́.

Влады́ку у́мъ поста́вилъ еси́ надъ страстьми́ тѣле́сными, блаже́нне, тѣ́мже и Пресвята́го Ду́ха селе́ніе, богоно́се, бы́лъ еси́. Его́же моли́ и на́съ свободи́ти отъ страсте́й, да тя́ почита́емъ.

Яко побѣди́въ вѣ́ка сего́ кня́зя тмы́, возше́лъ еси́ къ небе́снымъ, побѣ́ды вѣне́цъ нося́ отъ вседержи́тельныя руки́ Бо́га на́шего, моли́ отъ бѣ́дъ спасти́ся тебе́ почита́ющимъ.

Плотско́е мудрова́ніе, е́же на земли́, о́тче, умертви́лъ еси́ и на небесѣ́хъ житіе́ стяжа́лъ еси́, идѣ́же святы́хъ ду́си ра́дуются, пою́ще съ тобо́ю Влады́ку твоего́.

Богоро́диченъ: Пречи́стая Влады́чице, ро́ждшая человѣ́комъ ко́рмчію и Го́спода, страсте́й мои́хъ непостоя́нное и лю́тое отжени́ смуще́ніе и тишину́ пода́ждь се́рдцу моему́.

Инъ.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Въ пусты́ни безмо́лвія водвори́лся еси́, преподо́бне, и отту́ду къ небе́сному гра́ду преше́лъ еси́, идѣ́же Бо́гу угоди́вшихъ жили́ща, съ ни́миже о на́съ, блаже́нне, моли́ся.

Чи́сто житіе́ твое́ отъ ю́ности имѣ́лъ еси́, блаже́нне, и того́ ра́ди Пречи́стыя Бо́жія Ма́тере изря́дный служи́тель бы́лъ еси́, и прече́стенъ хра́мъ То́й воздви́глъ еси́, въ не́мже Госпо́дь сла́вится.

Отъ страсте́й тимѣ́нія чи́ста тя́ обрѣ́тъ, всели́ся въ тя́ Ду́хъ Пресвяты́й, тѣ́мъ и чуде́съ дарова́нія тебѣ́ да́руетъ еди́нъ во святы́хъ прославля́емый Бо́гъ на́шъ.

Богоро́диченъ: Зачала́ еси́ вои́стинну Боже́ственное Сло́во во утро́бѣ Твое́й и Сіе́ па́че естества́, Всенепоро́чная, родила́ еси́, Его́же моли́ отъ бѣ́дъ всѣ́мъ изба́витися, рабо́мъ Твои́мъ.

Конда́къ, гла́съ 8. Подо́бенъ: Взбра́нной.

Яко преоби́дѣвъ тлѣ́нная и до́лу влеку́щая мудрова́нія, о́тче, къ вы́шнему тече́нію ра́достно устреми́лся еси́, и та́мо со святы́ми Пресвятѣ́й Тро́ицѣ предстоя́, моли́ отъ вра́гъ сохрани́тися ста́ду твоему́, я́ко да, свято́е твое́ успе́ніе пра́зднующе, вопіе́мъ: ра́дуйся, преблаже́нне Кири́лле, о́тче на́шъ.

Икосъ:

Аще и человѣ́къ, о́тче, бы́лъ еси́ по естеству́, но па́че человѣ́ка житіе́ соверши́лъ еси́: вся́ бо, я́же въ мíрѣ сла́дкая и кра́сная, преоби́дѣвъ, послѣ́довалъ еси́ Христу́. Тѣ́мже и отъ всѣ́хъ слы́шиши: ра́дуйся, я́ко, Пречи́стою наставля́емь, пусты́ню дости́глъ еси́; ра́дуйся, я́ко въ то́й прече́стенъ хра́мъ Бо́жіи Ма́тери воздви́гнувый; ра́дуйся, я́ко въ не́мъ Бо́гъ прославля́ется; ра́дуйся, собра́вый та́мо учени́къ мно́жество; ра́дуйся, я́ко съ тѣ́ми прилѣ́жно Го́сподеви рабо́талъ еси́; ра́дуйся, удиви́вый а́нгелы житіе́мъ твои́мъ; ра́дуйся, я́ко тобо́ю человѣ́цы по́льзовашася; ра́дуйся, и́же чудесы́ всѣ́хъ удиви́вый; ра́дуйся, преше́дый отъ земны́хъ на небе́сная; ра́дуйся, я́ко, Тро́ицѣ предстоя́, о на́съ мо́лишися; ра́дуйся, исто́чниче чуде́съ неисчерпа́емый; ра́дуйся, вѣ́рныхъ плѣ́нникъ изба́вителю; ра́дуйся, преблаже́нне Кири́лле, о́тче на́шъ.

Пѣ́снь 7.

Ирмо́съ: Росода́тельну у́бо пе́щь содѣ́ла а́нгелъ преподо́бнымъ отроко́мъ, халде́и же опаля́ющее велѣ́ніе Бо́жіе, мучи́теля увѣща́ вопи́ти: благослове́нъ еси́, Бо́же оте́цъ на́шихъ.

Очи́стивъ отъ страсте́й, преподо́бне о́тче, у́мъ тво́й и Вседержи́телю съ преподо́бныхъ ли́ки и пра́ведныхъ предстоя́, всегда́ вопіе́ши: благослове́нъ Бо́гъ оте́цъ на́шихъ.

Вра́чь преизря́дный мíру яви́лся еси́, блаже́нне, исцѣля́я всѣ́хъ, вѣ́рою притека́ющихъ ко хра́му твоему́ свято́му и Христу́ отъ души́ вопію́щихъ непреста́нно: благослове́нъ Бо́гъ оте́цъ на́шихъ.

Посто́мъ и воздержа́ніемъ лице́ твое́ украси́лъ еси́, преподо́бне, свѣтлѣ́йши наипа́че яви́лся еси́ многоразли́чными бра́шны пита́ющихся. Тѣ́мже и Христу́ вопіе́ши: благослове́нъ Бо́гъ оте́цъ на́шихъ.

Богоро́диченъ: Тя́, Пресвята́я Ма́ти Приснодѣ́во, позна́хомъ, земнíи, спасе́ніе, и́бо въ нѣ́дрѣхъ Отца́ неразлу́чно живы́й изъ Тебе́ воплоща́ется. Тѣ́мже благослове́на еси́ въ ро́дъ и ро́дъ.

Инъ.

Ирмо́съ: Отъ Іуде́и доше́дше, о́троцы, въ Вавило́нѣ иногда́, вѣ́рою Тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.

Отъ мірска́го треволне́нія избѣ́гъ, преподо́бне, въ ти́хое приста́нище дости́глъ еси́ небе́снаго пребыва́нія, вопія́: оте́цъ на́шихъ Бо́же, благослове́нъ еси́.

Въ пусты́ню, я́коже дре́вній Анто́ній, всели́лся еси́ и въ не́й вели́каго Ефре́ма слеза́ми и посто́мъ подража́лъ еси́, Христу́ поя́: благослове́нъ еси́, Го́споди Бо́же оте́цъ на́шихъ.

Вся́кими, о́тче, о́бразы и́же съ тобо́ю ученики́ направля́лъ еси́ по стезя́мъ пра́вымъ путе́й твои́хъ ходи́ти и съ тобо́ю Христу́ пѣ́ти: оте́цъ на́шихъ Бо́же, благослове́нъ еси́.

Богоро́диченъ: Го́ру Тя́ проро́къ Даніи́лъ Боже́ственнымъ Ду́хомъ прорече́, Дѣ́во, изъ нея́же ка́мень — Христо́съ безъ руки́ отсѣче́ся и сокруше́ніе содѣ́ла истука́ннѣй пре́лести.

Пѣ́снь 8.

Ирмо́съ: Изъ пла́мене преподо́бнымъ ро́су источи́лъ еси́ и пра́веднаго же́ртву водо́ю попали́лъ еси́: вся́ бо твори́ши, Христе́, то́кмо е́же хотѣ́ти. Тя́ превозно́симъ во вся́ вѣ́ки.

Гро́бъ, идѣ́же положено́ бы́сть честно́е тѣ́ло твое́, преподо́бне, освяти́ всѣ́хъ, къ нему́ притека́ющихъ, исто́чникъ исцѣле́нія источа́я отъ души́ Христу́ вопію́щимъ и превознося́щимъ Его́ во вѣ́ки.

Во вре́мя гла́да, раздробля́я, преподо́бне, ни́щимъ хлѣ́бъ тво́й, тѣ́хъ а́лчбу уста́вилъ еси́, и мене́, та́ющаго гла́домъ, боже́ственныхъ дѣя́ній напита́й: да возмогу́ и а́зъ со всѣ́ми пе́ти Го́спода во вся́ вѣ́ки.

Иже съ тобо́ю ученицы́ твои́, уче́нію твоему́ повину́ющеся, преподо́бне, земна́я оста́вльше, во слѣ́дъ тебе́ къ небе́снымъ преидо́ша, и съ тобо́ю пою́тъ Христу́, и превозно́сятъ Его́ во вѣ́ки.

Богоро́диченъ: Въ рождествѣ́ болѣ́зни избѣжа́ла еси́, Пречи́стая, и, ро́ждши, па́ки Дѣ́вою пребыла́ еси́: вся́ бо твори́тъ Іису́съ, Бо́гъ и Человѣ́къ, Его́же превозно́симъ во вѣ́ки.

Инъ.

Ирмо́съ: Царя́ Небе́снаго, Его́же пою́тъ во́и а́нгельстіи, хвали́те и превозноси́те во вся́ вѣ́ки.

Бу́дущаго ра́ди житія́ на небесѣ́хъ на земли́ мíру умертви́лся еси́, о́тче. Сего́ ра́ди жи́въ Бо́гу предстоя́, вопіе́ши: Тя́ превозно́симъ, Го́спода, во вѣ́ки.

Свѣ́томъ Тро́ическимъ, о́тче, просвѣща́емь, твою́ жи́знь благоче́стно сконча́лъ еси́ и по́стныхъ собо́ры приве́лъ еси́ Христу́ вопи́ти: Тя́ превозно́симъ, Го́спода, во вѣ́ки.

Съ небе́сными во́инствы всегда́, преподо́бне, Тро́ицу несозда́нную, нераздѣ́льное Божество́ славосло́виши, блаже́нне, и превозно́сиши во вѣ́ки.

Богоро́диченъ: Во утро́бѣ Твое́й пе́рвѣйша Тебе́ заче́нши, Богома́ти, Чи́стая Дѣ́во, родила́ еси́ несказа́нно Бо́га и Царя́, Его́же превозно́симъ во вѣ́ки.

Пѣ́снь 9.

Ирмо́съ: Бо́га человѣ́комъ невозмо́жно ви́дѣти, на Него́же не смѣ́ютъ чи́ни а́нгельстіи взира́ти; Тобо́ю бо, Всечи́стая, яви́ся человѣ́комъ Сло́во воплоще́нно, Его́же велича́юще, съ небе́сными во́и, Тя́ ублажа́емъ.

Житія́ сего́ непостоя́нную пучи́ну немяте́жно преше́лъ еси́, преподо́бне, ко́рмчію Ма́терь Бо́жію имѣ́я, на сіе́ наставля́ющую тя́. Тѣ́мже и ко приста́нищемъ приста́лъ еси́ а́нгельскаго пребыва́нія.

Яко зрѣ́лая и чистѣ́йшая пшени́ца, кромѣ́ всѣ́хъ зло́бныхъ пле́велъ, въ небе́сныхъ жи́тницахъ соблю́лся еси́, преподо́бне, хлѣ́бъ сла́дкій жела́я принести́ся небе́сному Царю́, Его́же ра́ди вся́ въ мíрѣ преоби́дѣлъ еси́.

Вели́кимъ отце́мъ, дре́вле въ постѣ́хъ и по́двизѣхъ просія́вшимъ, подо́бяся, о́тче, вся́ дни́ жи́зни твоея́ въ слеза́хъ и трудѣ́хъ препроводи́лъ еси́, до́ндеже дости́глъ еси́ блаже́нную кончи́ну, ю́же и они́ наслѣ́доваша.

Богоро́диченъ: Сы́на Безлѣ́тна, отъ Отца́ возсія́вша, Ты́, во утро́бѣ несказа́нно заче́нши, родила́ еси́, Богома́ти Чи́стая Дѣ́во, моли́ непреста́нно о рабѣ́хъ Твои́хъ Того́, я́ко Человѣколю́бца Бо́га, спасти́ ро́дъ на́шъ.

Инъ.

Ирмо́съ: Чи́стую сла́вно почти́мъ, лю́діе, Богоро́дицу, о́гнь Божества́ пріи́мшую во чре́вѣ неопа́льно, пѣ́сньми велича́емъ.

Потреби́ страстна́я двиза́нія ума́ моего́, Христе́, и лѣ́ность уны́нія отжени́, въ пра́вый пу́ть Тво́й ходи́ти наста́ви моли́твами уго́дника Твоего́ Кири́лла, да я́ко Благодѣ́теля велича́ю Тя́.

Пѣвце́мъ, тебе́ пою́щимъ, о́тче, и во хвале́ніи сла́вящимъ, пода́ждь свы́ше спасе́ніе и избавле́ніе, да ктому́ тебе́ мно́жае въ пѣ́снехъ велича́ютъ.

Руко́ю мое́ю недосто́йною приноси́мое тебѣ́ съ трудо́мъ отъ усе́рдія хвале́ніе пріими́, богоблаже́нне Кири́лле, и хода́тай къ Бо́гу бу́ди ми́, молю́ся, изба́вити мя́ та́мошняго муче́нія, да непреста́нно въ пѣ́снехъ велича́ю тя́.

Богоро́диченъ: Въ Тя́ всели́вся, Пренепоро́чная, пе́рвѣе родонача́льнымъ злообра́зно запе́ншаго человѣкоубíйцу низложи́, роди́вся, и всѣ́хъ на́съ спасе́.

Свѣти́ленъ. Подо́бенъ: Посѣти́лъ ны́.

Пречестну́ю и свяще́нную па́мять твою́ соверша́ющихъ, преподо́бне Кири́лле, и мно́гія труды́ твоя́ пою́щихъ, не преста́й, моля́ Изба́вителя отъ напа́стей избавля́ти на́съ и селе́нію святы́хъ сподо́бити. [Два́жды.]

[Сла́ва, и ны́нѣ,] богоро́диченъ:

Почита́ютъ Рождество́ Твое́ безпло́тныхъ чи́ни, ра́дости бо земны́я Ты́ еди́на испо́лнила еси́. Тѣ́мже Тя́, Всенепоро́чная, вѣ́рніи, сла́вимъ, пѣ́сньми славосло́вяще: Свѣ́тъ бо су́щимъ во тмѣ́ возсія́ла еси́ и Со́лнце незаходя́щее.

На хвали́техъ стихи́ры, на 4, гла́съ 8. Подо́бенъ: О, пресла́внаго чудесе́!

Свы́ше дарова́нія чуде́съ* отъ Бо́га сподо́бился еси́,* блаже́нне Кири́лле:* бѣ́сы отъ человѣ́къ,* вѣ́рою приходя́щихъ, прогони́ти* и разли́чными неду́ги одержи́мыя* исцѣля́ти моли́твами твои́ми.* Тѣ́мже вси́, въ па́мять твою́ соше́дшеся,* любо́вію тебе́ почита́емъ. [Два́жды.]

Свяще́нными твои́ми, о́тче, моли́твами* хлѣ́бы во вре́мя гла́да умно́жилъ еси́* и а́лчущихъ мно́гихъ препита́лъ еси́.* Тѣ́мже тя́ мо́лимъ,* преподо́бне Кири́лле:* и на́съ душе́внаго гла́да премѣни́* и боже́ственными бра́шны* напита́й, мо́лимся,* я́ко да любо́вію тя́ почита́емъ.

Вина́ недоста́тки Бо́жіей це́ркви,* моли́твами твои́ми, о́тче,* сосу́дъ испо́лнилъ еси́* и на мно́га времена́* довлѣ́ти то́й дарова́лъ еси́.* Тѣ́мже и на́съ, почита́ющихъ па́мять твою́,* вино́мъ Бо́жія любве́ напо́й всѣ́хъ,* да прославля́емъ пречестно́е успе́ніе твое́.

Сла́ва, гла́съ 2:

Пусты́ня, я́же иногда́ бѣсо́мъ жили́ща иму́щи, ны́нѣ же учени́къ твои́хъ, Кири́лле, мно́жествомъ наполня́ема, украша́ется, хра́мъ въ себѣ́ прече́стенъ Ма́тере Бо́жія иму́щи, разли́чными добро́тами удобре́нъ. Тѣ́мже, въ не́мъ дне́сь соше́дшеся, и честны́й гро́бъ тво́й обстоя́ще, и любе́зно покланя́ющеся, мо́лимся: Це́рквамъ единомы́сліе дарова́ти моли́ся, и правосла́вному Импера́тору на́шему на враги́ посо́бствуй моли́твами твои́ми, и душа́мъ на́шимъ испроси́ ми́ръ и ве́лію ми́лость.

И ны́нѣ, богоро́диченъ.
Славосло́віе вели́кое. [Ектеніи́] и отпу́стъ.



НА ЛИТУРГІИ,

Блаже́нна 1-го кано́на, пѣ́снь 3-я на 4, и 2-го кано́на, пѣ́снь 6-я на 4. Проки́менъ, [гла́съ 7]: Честна́ предъ Го́сподемъ* [сме́рть преподо́бныхъ его́.] Сти́хъ: Что́ возда́мъ Го́сподеви [о всѣ́хъ, я́же воздаде́ ми́?] Апо́столъ, къ Гала́томъ, зача́ло 213. Аллилу́ія, гла́съ 6: Блаже́нъ му́жъ, боя́йся Го́спода, [въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́.] Ева́нгеліе отъ Луки́, зача́ло 24. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся.]

Источникъ: Минíа, мѣ́сяцъ Іу́ній. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 53 – 62 об.

/ Къ оглавленію раздѣла /


Наверхъ / Къ титульной страницѣ

0