Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 18 августа 2017 г. Сейчасъ на порталѣ посѣтителей - 21.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́нія въ 9-й де́нь.
Иже во святы́хъ отца́ на́шего Кири́лла, архіепи́скопа Александрíйскаго.

[ВЕЧЕРЪ.]
Стихи́ры святи́теля, на 6, гла́съ 4. Подо́бенъ: Яко до́бля.

Сія́ніи духо́вными* просвѣти́въ тво́й у́мъ,* свѣтолу́чно со́лнце бы́лъ еси́,* я́коже лучи́, уче́нія* во вся́ концы́ простира́я,* и вѣ́рныхъ озаря́я* исполне́ніе, преблаже́нне,* и отгоня́я тму́, богоно́се, ересе́й* си́лою отъ Дѣ́вы Возсія́вшаго.

Благосказа́ніемъ слове́съ твои́хъ,* свяще́нне Кири́лле,* Це́рковь вся́ украша́ется,* и благоче́стно удобря́ется кра́сными добро́тами,* и почита́етъ свяще́нно* твою́ святу́ю и благонаро́читую па́мять,* правосла́вныхъ похвало́,* отце́въ верхо́вниче,* и́же на собо́рѣ Всесвяты́я побо́рниче.

Огненными твои́ми уче́ніи* ересе́й вся́ка хвра́стная* попаля́ется ве́щь, прему́дре,* разу́мными глубина́ми* погружа́ется во́инство* неповину́ющихся злочести́выхъ,* свя́щенне Кири́лле,* уче́ньми украша́ется вѣ́рныхъ всегда́ Це́рковь,* велегла́сно чту́щи тя́.

Сла́ва, гла́съ 6:

Благíй ра́бе и вѣ́рный, дѣ́лателю виногра́да Христо́ва, ты́ и тяготу́ дневну́ю поне́слъ еси́, ты́ и да́нный тебѣ́ тала́нтъ возрасти́лъ еси́, и по тебѣ́ прише́дшимъ не зави́дѣлъ еси́. Тѣ́мже врата́ небе́сная отверзо́шася тебѣ́, вни́ди въ ра́дость Го́спода твоего́ и моли́ о на́съ, Кири́лле, о́тче на́шъ.

И ны́нѣ, пра́здника или́ богоро́диченъ.
Крестобогоро́диченъ. Подо́бенъ: Все́ отло́жше.

Агнца Своего́* Агница нескве́рная дре́вле* и непоро́чная Влады́чица* на дре́вѣ кре́стнѣмъ я́ко узрѣ́,* ма́терски восклица́ше* и, дивя́щися, вопія́ше:* Ча́до Сладча́йшее,* что́ зрѣ́ніе сіе́,* но́вое и пресла́вное?* Ка́ко со́нмъ безблагода́тный суди́щу Пила́тову предаде́ Тя* и осужда́етъ на сме́рть* Живота́ вся́ческихъ?* Но воспѣва́ю Твое́ неизрече́нное,* Сло́ве, снизхожде́ніе.

На стихо́внѣ Окто́иха. Сла́ва, гла́съ 6:

Человѣ́че Бо́жій и вѣ́рный ра́бе, слуго́ Госпо́день, му́жу жела́ній, сосу́де избра́нный, сто́лпе и утвержде́ніе Це́ркве, Ца́рствія наслѣ́дниче, не премолчи́, вопія́ за ны́ ко Го́споду.

И ны́нѣ, пра́здника или́ богоро́диченъ.
Крестобогоро́диченъ. Подо́бенъ: Тридне́венъ.

Ви́дящи Тя́ распина́ема, Христе́, Тебе́ Ро́ждшая вопія́ше: что́ стра́нное, е́же ви́жу, та́инство, Сы́не Мо́й? Ка́ко на дре́вѣ умира́еши, пло́тію повѣ́шенъ, жи́зни Пода́телю?

Тропа́рь, гла́съ 8:

Правосла́вія наста́вниче, благоче́стія учи́телю и чистоты́, вселе́нныя свѣти́льниче, архіере́овъ Богодухнове́нное удобре́ніе, Кири́лле прему́дре, уче́ньми твои́ми вся́ просвѣти́лъ еси́, цѣвни́це духо́вная, моли́ Христа́ Бо́га спасти́ся душа́мъ на́шимъ.


НА УТРЕНИ.
Оба кано́на Окто́иха и свята́го на 6, его́же краегране́сіе: Зрѣ́ніе Кири́ллъ боже́ственныхъ цѣвни́ца. Ѳеофа́ново, гла́съ 4.


Пѣ́снь 1.

Ирмо́съ: Мо́ря чермну́ю пучи́ну невла́жными стопа́ми дре́вній пѣшеше́ствовавъ Изра́иль, крестообра́зными Моисе́овыма рука́ма Амали́кову си́лу въ пусты́ни побѣди́лъ е́сть.

Отъ Бо́га свѣтода́тельну благода́ть, Кири́лле, пріе́мъ и свѣ́телъ свѣти́льникъ я́влься, слове́сныя облиста́лъ еси́ на́мъ лучи́ па́мятію твое́ю, я́ко да досто́йно тя́ воспое́мъ.

Испо́лнился еси́ свѣтоявле́нія, Кири́лле прему́дре, духо́внаго, я́ко за́повѣдей Христо́выхъ храни́тель, отъ страсте́й очи́щенъ, Пребоже́ственныя бы́лъ еси́ вои́стинну Тро́ицы жили́ще.

Яко ре́вности и дерзнове́нія испо́лненъ, Кири́лле сла́вне, богобо́рная вся́ нело́жно языковре́дія изобличи́лъ еси́ злочести́выхъ ересе́й, по пра́вѣй вѣ́рѣ боря́ся.

Богоро́диченъ: Исцѣли́ла еси́ сокруше́ніе, Всенепоро́чная, человѣ́чества, Творца́ ро́ждшая всѣ́хъ, возве́дшаго ны́, низве́рженныя паде́ніемъ пра́отчимъ, Богоневѣ́сто.

Пѣ́снь 3.

Ирмо́съ: Весели́тся о Тебѣ́ Це́рковь Твоя́, Христе́, зову́щи: Ты́ моя́ крѣ́пость, Го́споди, и прибѣ́жище, и утвержде́ніе.

Укрѣпля́емь о Христѣ́, ко́зни лука́ваго змíя тве́рдымъ умо́мъ, Кири́лле, я́коже тка́ніе паучи́нное, расто́ргнулъ еси́.

Ти́ну страсте́й отъ души́ оттря́слъ еси́, Кири́лле, низло́жь вся́каго по́мысла возноше́ніе, на Христа́ превозноша́ющееся.

Яко благополу́ченъ страда́лецъ, о́тче, уклони́лся еси́ тве́рдо вся́каго плотска́го сладостра́стія, я́ко тще́тнаго и пакостнотво́рнаго.

Богоро́диченъ: Еди́ну въ жена́хъ Тя́, Благослове́нную, я́ко Бо́жіе селе́ніе, всеблаголѣ́пно вси́ ра́достію просла́вимъ.

Сѣда́ленъ, гла́съ 3. Подо́бенъ: Красотѣ́ дѣ́вства.

Сто́лпъ и же́ртва Це́ркве Христо́вы, о́тче, бы́въ, сію́ непоколеби́му отъ искуше́ній лука́ваго прему́дро соблю́лъ еси́: все́ бо Несто́ріево злодѣ́йство разори́лъ еси́ и Богома́терь Богоро́дицу проповѣ́далъ еси́. Тѣ́мже тя́, соше́дшеся, почита́емъ, Кири́лле богоблаже́нне. [Два́жды.]

Сла́ва, и ны́нѣ, пра́здника или́ богоро́диченъ:

Яко невоздѣ́ланная, Дѣ́во, лоза́, краснѣ́йшій Гро́здъ прозябла́ еси́, источа́ющь на́мъ вино́ спасе́нія, всѣ́хъ веселя́щее ду́ши же и тѣлеса́. Тѣ́мже, я́ко вину́ Тя́ до́брыхъ блажа́ще при́сно, со Ангеломъ вопіе́мъ Ти́: ра́дуйся, Благода́тная.

Крестобогоро́диченъ:

Неискусобра́чная Чи́стая и Ма́ти Твоя́, Христе́, ви́дящи Тя́ ме́ртва ви́сяща на Крестѣ́, ма́терски пла́чущи, глаго́лаше: что́ Тебѣ́ воздаде́ евре́йскій беззако́нный собо́ръ и неблагода́рный, и́же мно́гихъ и вели́кихъ Твои́хъ, Сы́не Мо́й, даро́въ наслади́выйся? Пою́ Твое́ Боже́ственное снизхожде́ніе.

Пѣ́снь 4.

Ирмо́съ: Вознесе́на Тя́ ви́дѣвши Це́рковь на Крестѣ́, Со́лнце Пра́ведное, ста́ въ чи́нѣ свое́мъ, досто́йно взыва́ющи: сла́ва си́лѣ Твое́й, Го́споди.

Побѣди́вша стра́сти душетлѣ́нныя и по́мыслъ удержа́вша плотскíй, богоно́се Кири́лле, ви́дѣвъ, Христо́съ боже́ственныя тя́ Це́ркве предсѣда́теля, о́тче, поста́ви.

Наслѣ́довавъ, я́ко сы́нъ возлю́бленъ, оте́ческую Ма́ркову добродѣ́тель, и престо́ла бы́лъ еси́ прее́мникъ, боже́ственнаго стопа́мъ евангели́ста послѣ́дуя.

Отъ Христа́ у́бо, я́ко овча́, упасе́нъ бы́въ, я́коже па́стырь, упа́слъ еси́ ста́до, о́тче, словесы́ душепита́тельными твои́ми, я́ко трава́ми и цвѣты́, бога́тно напита́я благода́ти.

Богоро́диченъ: Воплоще́нно Безпло́тное пре́жде ро́ждши Сло́во Бо́жіе, Всепѣ́тая Обра́дованная, мíръ обнови́ла еси́. Тѣ́мже Тя́, Богоневѣ́сто, вѣ́рою правосла́вною проповѣ́дуемъ.

Пѣ́снь 5.

Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Тече́нію вои́стинну зѣ́льному, наводня́ющему рѣ́ки, твое́, о Кири́лле, уподо́бися сло́во, злосла́вныхъ отвраща́я ухищре́ніе.

Ра́внѣ ме́рзкое Аріево раздѣле́ніе, о Кири́лле, скве́рное же Саве́лліево слія́ніе изъ глубины́ изве́рглъ еси́.

Словеса́ богатотво́рная, я́ко зла́то, оста́вилъ еси́, о Кири́лле, сокро́вища же, я́коже ка́менія честна́я твоя́, Це́ркви Христо́вѣ.

Богоро́диченъ: Да кропи́тъ не́бо весе́ліе и благода́ть на земли́: возда́стъ бо е́й ны́нѣ весе́ліе въ высоту́, еди́ну Богома́терь.

Пѣ́снь 6.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Клеща́ми Серафи́мъ проро́ку у́гль, Це́ркви же Христо́вѣ твои́ма рука́ма подае́ши, священнотаи́нниче, е́же отъ Боже́ственнаго огня́ у́гліе очище́нія.

Единопредѣ́льныя, я́ко Сампсо́нъ, иноплеме́нники не потреби́лъ еси́, иноро́дныя же вся́ иносла́вныхъ уче́нія низложи́лъ еси́ и держа́ву правосла́внымъ да́лъ еси́, Кири́лле.

Собо́ру богоизбра́нному я́вѣ предводи́тельствовавъ, злоче́стіе Несто́ріево, христобо́рную де́рзость, о́тче, низложи́лъ еси́, ре́вностію дыха́я по и́стиннѣй Богома́тери.

Богоро́диченъ: Ра́зума нетлѣ́ннаго Пло́дъ прозябла́ еси́, Богороди́тельнице, мíру присноживо́тный, Хода́тай нетлѣ́нія явля́емь вѣ́рою и любо́вію пою́щихъ Тя́.

Конда́къ, гла́съ 6. Подо́бенъ: Еже о на́съ.

Бе́здну на́мъ уче́ній богосло́вія источи́лъ еси́ я́вѣ отъ исто́чникъ Спа́совыхъ, е́реси погружа́ющую, блаже́нне Кири́лле, и ста́до невреди́мо отъ треволне́ній спаса́ющую, страна́мъ бо всѣ́мъ наста́вникъ, преподо́бне, я́ко боже́ственная явля́я.

Икосъ:

Красно́ при у́трени показу́ется вельми́ со́лнце, су́що свѣтоно́сно, тма́ отгоня́ется и луна́ охужда́ется, но́щь бо не состои́тся; уясня́етъ де́нь, просвѣща́етъ возду́хъ, не́бо красно́ показу́етъ на́мъ, зе́млю удобря́я, цвѣто́мъ творя́ израще́ніе, мо́ре же облиста́етъ и вку́пѣ ве́сь украша́етъ мíръ, е́же во все́мъ сего́ свѣтлѣ́йши Кири́ллъ, его́же му́драя уче́нія спаса́ютъ поднебе́сную. Озаря́етъ бо то́й вѣ́рныхъ ду́ши и побѣжда́етъ благоче́стно е́реси при́сно, страна́мъ бо то́й наста́вникъ, я́ко боже́ственная явля́я.

Пѣ́снь 7.

Ирмо́съ: Въ пещи́ авраа́мстіи о́троцы перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.

Въ Сина́йстѣй горѣ́, во мра́къ дре́вле вше́дъ, зако́нъ прія́тъ, блаже́нне Кири́лле, Моисе́й, убива́ющій пи́сменемъ, ты́ же разгну́лъ еси́ сокрове́нную добро́ту Ду́ха.

Законоположе́нія гада́ньми, я́коже младе́нцемъ, пе́рвѣе, о́тче, да́ннаго покрыва́лу покрове́нія, я́коже ши́пки, разумѣ́нія ты́ откры́лъ еси́, сказа́въ о́бразы я́вственнѣйше.

Въ несли́тномъ соедине́ніи Боже́ственномъ и несѣко́мѣмъ я́вѣ, о́тче, раздѣле́ніи три́ у́бо богосло́вствуяй Ѵпоста́си, ре́клъ еси́, Кири́лле, непремѣ́нныя же въ Существѣ́ еди́номъ и Божествѣ́.

Богоро́диченъ: Ви́дѣша Ангели, Богома́ти, стра́нная рождество́мъ Твои́мъ: естество́ тлѣ́нное ро́да земна́го къ нетлѣ́нному па́ки теку́ще житію́ и сла́вѣ небе́снѣй.

Пѣ́снь 8.

Ирмо́съ: Ру́цѣ распросте́ръ, Даніи́лъ, льво́въ зія́нія въ ро́вѣ затче́; о́гненную же си́лу угаси́ша, добродѣ́телію препоя́савшеся, благоче́стія рачи́тели, о́троцы, взыва́юще: благослови́те, вся́ дѣла́ Госпо́дня, Го́спода.

Яко волна́ морска́я вои́стинну, въ тебѣ́ истече́ прему́дрости исто́чникъ, и́бо приснотеку́щія потеко́ша рѣки отъ чре́ва твоего́, о́тче, уче́ній благочести́выхъ, я́коже прорече́ Христо́съ. Прехо́дятъ бо песка́ твоя́ словеса́ богоизбра́нная.

Па́стырь и учи́тель му́дръ Це́ркве яви́лся еси́, о́ба, Кири́лле, я́вѣ разгну́лъ еси́, преподо́бне, завѣ́ты, я́ко бо анки́ру, и оте́ческая наслѣ́дія, твоя́ иму́щи словеса́, вопіе́тъ: благослови́те, вся́ дѣла́ Госпо́дня, Го́спода.

Сло́ва, вопло́щшагося на́съ ра́ди, Всехитреца́, ты́ неизрече́нному науча́еши соедине́нію, Кири́лле, нераздѣ́льное, неслія́нное, по ко́ейждо во́ли ра́внѣ уклони́лъ еси́, вопія́: благослови́те, вся́ дѣла́ Госпо́дня, Го́спода.

Богоро́диченъ: Естество́мъ непристу́пный всю́ду, Сы́нъ и Сло́во Бо́жіе въ Тя́ всели́ся, Чи́стая, и, обо́лкся, Пречи́стая, въ на́ше существо́, я́ко Милосе́рдъ, яви́ся благопристу́пенъ пло́тію, и водвори́ся съ на́ми, вопію́щими: благослови́те, вся́ дѣла́ Госпо́дня, Го́спода.

Пѣ́снь 9.

Ирмо́съ: Ева у́бо неду́гомъ преслуша́нія кля́тву всели́ла е́сть, Ты́ же, Дѣ́во Богоро́дице, прозябе́ніемъ чревоноше́нія мíрови благослове́ніе процвѣла́ еси́. Тѣ́мъ Тя́ вси́ велича́емъ.

Возноше́ніе на Христо́въ взе́млющееся ра́зумъ и Сего́ Богома́терь, Кири́лле, вся́ку держа́ву низложи́лъ еси́ Несто́рія безбо́жнаго, сыно́внюю дво́ицу, та́коже и слія́ніе безгла́вныхъ есте́ствъ.

Си́лою ра́зума и просвѣще́ніемъ благода́ти Тро́ицу Единосу́щную, Сы́на же воплоще́нна Бо́га богосло́вилъ еси́, блаже́нне, яви́въ же ся Богоро́дицы побо́рникъ, въ вы́шнихъ ны́нѣ прославля́ешися.

Свы́ше ны́, пѣвцы́, приснопа́мятне, назира́еши, о́тче, ми́лостивно, Импера́тору побѣ́ды Крестоно́сцу подая́, и возвыша́я моли́твами твои́ми ро́гъ правосла́вныхъ, уясня́я же твою́ па́мять велича́ющія.

Богоро́диченъ: Утѣсня́емь паде́ніи мно́гими, Препѣ́тая, и лю́тостію бѣ́дъ, ны́нѣ Тебѣ́ хвале́ній же́ртву приноша́ю и прилѣ́жно взыва́ю Ти́: Свята́я Богоро́дице, помози́ ми, Тя́ бо сла́вя, пѣ́снь скончава́ю.

Свѣти́ленъ. Подо́бенъ: Ученико́мъ.

Чу́вство и ра́зумъ премину́вшаго и глубинѣ́ Ду́ха нау́чшася, боже́ственнаго тайнопи́сца Пребоже́ственныя Тро́ицы воспое́мъ, я́ко святи́теля Госпо́дня и побо́рника благоче́стія. [Два‘жды.]

Сла́ва, и ны́нѣ, пра́здника или́ богоро́диченъ:

Иже Твоего́, Непоро́чная Богоро́дице, о́браза не цѣлу́етъ съ любо́вію, во о́гнь вмета́ется гее́нскій, я́коже безу́мный Несто́рій. Мы́ же Тя́, Пресвята́я, облобыза́емъ любо́вію.

На стихо́внѣ Окто́иха. Сла́ва, гла́съ 6:

Наслѣ́дниче Бо́жій, соприча́стниче Христо́въ, служи́телю Госпо́день, Кири́лле, о́тче на́шъ, по и́мени твоему́ та́ко и житіе́ твое́: спросія́ бо сѣди́нѣ ра́зумъ, свидѣ́тельствоваше свѣ́тлость лица́ твоего́ душе́вное незло́біе, извѣ́ствоваше кро́тость сло́во молчали́вое. Жи́знь твоя́ сла́вна и успе́ніе со святы́ми, моли́ о душа́хъ на́шихъ.

И ны́нѣ, богоро́диченъ или́ крестобогоро́диченъ. Подо́бенъ: Тридне́венъ.

Предстоя́щи у Дре́ва иногда́ во вре́мя распя́тія Дѣ́ва съ дѣ́вственнымъ ученико́мъ и пла́чущи, вопія́ше: увы́ Мнѣ́, ка́ко стра́ждеши, всѣ́хъ, Христе́, Сы́й безстра́стіе?


НА ЛИТУРГІИ:

Блаже́нна пра́здника или́ Окто́иха и свята́го, пѣ́снь 3-я. Проки́менъ, гла́съ 1: Уста́ моя́ возглаго́лютъ прему́дрость,* [и поуче́ніе се́рдца моего́ ра́зумъ]. Сти́хъ: Услы́шите сія́ вси́ язы́цы, [внуши́те вси́ живу́щіи по вселе́ннѣй]. Апо́столъ ко Евре́емъ, зача́ло 334. Аллилу́ія, гла́съ 2: Уста́ пра́веднаго поуча́тся прему́дрости, [и язы́къ eго́ возглаго́летъ су́дъ]. Сти́хъ: Зако́нъ Бо́га его́ въ се́рдцѣ его́, [и не за́пнутся стопы́ eго́]. Ева́нгеліе Матѳе́я, зача́ло 11. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся].

Источникъ: Минíа, мѣ́сяцъ Іу́ній. — Кíевъ: Въ тѵпогра́фіи Кíево-Пече́рской Ла́ѵры, 1863. — Л. 25 - 27 об.

/ Къ оглавленію раздѣла /


Наверхъ / Къ титульной страницѣ

0