Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - суббота, 21 октября 2017 г. Сейчасъ на порталѣ посѣтителей - 22.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́нія въ 8-й де́нь.
Свята́го великому́ченика Ѳео́дора Стратила́та.

[ВЕЧЕРЪ,]
Стихи́ры на 6, гла́съ 2. Подо́бенъ: Егда́ отъ дре́ва.

Сѣ́мя воздѣ́лавъ прилѣ́жно всѣ́янное Сло́ва въ чи́стѣй твое́й души́, сіе́ умно́жилъ еси́ болѣ́зньми страда́нія и, му́дрѣ положе́нъ въ небе́сныхъ жи́тницахъ, нетлѣ́нно обрѣ́лъ еси́ наслажде́ніе, его́же ны́нѣ насыща́яся, блаже́нне, твои́ми ко Христу́ хода́тайствы вѣ́рно пою́щія тя́ спаса́й.

Му́чениче страстоте́рпче Христо́въ, и́же въ разли́чныхъ ну́ждахъ спаса́й мольба́ми твои́ми, вся́ко у́бо обстоя́ніе отрѣва́я и отгоня́ душегуби́тельную печа́ль, благода́ть же и ми́лость на́мъ прося́, я́ко да моли́твами твои́ми спа́сшіися, ра́дующеся, воспое́мъ вси́ честны́я по́двиги твоя́, Ѳео́доре.

Ины стихи́ры, гла́съ 4. Подо́бенъ: Яко до́бля.

Страда́лецъ до́блественный,* во́инъ непобѣди́мь* Ду́хомъ Святы́мъ показа́лся еси́,* низло́жь бори́теля* му́дростію слове́съ твои́хъ* и дѣ́лъ твои́хъ, му́дрѣ, терпѣли́вными явле́ньми.* Тѣ́мже прія́лъ еси́ вѣнцы́ побѣ́дныя* и съ вы́шними ли́ки сочета́лся еси́,* великому́чениче Ѳео́доре.

Боже́ственный сто́лпъ бы́лъ еси́* благоче́стія, пребога́те,* злочести́выхъ ка́пищъ возгнуша́вся,* и овча́ всесоверше́нно,* и заколе́ніе благопрія́тно,* Закла́вшемуся тебе́ ра́ди чи́стѣ приводи́мь,* Просла́вльшему святу́ю твою́ па́мять* и чуде́съ сокро́вище тя́ су́щимъ въ мíрѣ* Дарова́вшему, Ѳео́доре.

На кре́стъ воздви́женъ,* и пло́ти стру́жемѣ,* и о́стрыми стрѣла́ми уязвля́емь,* и на дре́вѣ протяза́емь,* и мечи́ усѣка́емь,* и вся́кими хитростьми́ болѣ́зней окружа́емь,* непрекло́ненъ и непобѣди́мь яви́лся еси́* си́лою на Крестѣ́ Пригвожде́ннаго,* сла́ва му́чениковъ, Ѳео́доре.

Сла́ва, гла́съ 5:

Дне́сь возсія́ па́че денни́цы, честна́я па́мять страстоте́рпца Христо́ва, вѣ́рныхъ сердца́ неви́димо просвѣща́ющи и о́блаки ду́шъ отгоня́ющи дѣ́йствомъ благода́ти Ду́ха. Къ нему́же, мучениколю́бцы, воззове́мъ: ра́дуйся, и́же вѣ́рнымъ я́влься Богодарова́нная благода́ть и чуде́съ мно́жества простира́я къ тебѣ́ притека́ющимъ, Ѳео́доре блаже́нне. Христа́ непреста́нно моля́, не оскудѣ́й, вѣ́чныхъ бла́гъ получи́ти вѣ́рою творя́щимъ па́мять твою́.

И ны́нѣ, пра́здника, или́ богоро́диченъ, или́ крестобогоро́диченъ. Подо́бенъ: Ра́дуйся.

Агнца Своего́ Агница иногда́ зря́щи, къ заколе́нію тща́щася, усе́рдно послѣ́доваше, сія́ вопію́щи Ему́: ка́мо и́деши, Ча́до Мое́ Сладча́йшее, Христе́? Чесо́ ра́ди ско́рое тече́ніе сіе́, Долготерпѣли́ве, тече́ши нелѣ́ностно? Іису́се возжелѣ́ннѣйшій, Безгрѣ́шне, Многоми́лостиве Го́споди, да́ждь Ми́ сло́во, рабѣ́ Твое́й, Сы́не Мо́й Вселюбе́знѣйшій. Не пре́зри, Ще́дре, молча́, Тя́ стра́нно ро́ждшую, Бо́же Всеще́дре, да́руяй мíрови ве́лію ми́лость.

На стихо́внѣ окто́иха. Сла́ва, гла́съ 8. Самогла́сенъ:

Бо́жіихъ даро́въ я́ко тезоимени́та и того́ наслѣ́дника блаже́нства, вси́ восхва́лимъ, вѣ́рніи, и ублажи́мъ по достоя́нію Ѳео́дора, до́бляго великому́ченика, вселе́нныя побо́рника: мо́литъ бо ся Христу́ Бо́гу о душа́хъ на́шихъ.

И ны́нѣ, богоро́диченъ или крестобогоро́диченъ. Подо́бенъ: О, пресла́внаго чудесе́!

Не терплю́, Ча́до,* ви́дящи Тя́* на дре́вѣ усну́вша,* бо́дрость всѣ́мъ подаю́щаго,* я́ко да дре́вле преступле́нія плодо́мъ* сно́мъ поги́бельнымъ усну́вшимъ* боже́ственную и спаси́тельную бо́дрость пода́си, —* Дѣ́ва глаго́лаше, пла́чущися,* Юже велича́емъ.

Тропа́рь, гла́съ 4:

Воинствосло́віемъ и́стиннымъ, страстоте́рпче, небе́снаго Царя́ воево́да предо́брый бы́лъ еси́, Ѳео́доре: ору́жіями бо вѣ́ры ополчи́лся еси́ му́дренно, и побѣди́лъ еси́ де́моновъ полки́, и побѣдоно́сный яви́лся еси́ страда́лецъ. Тѣ́мже тя́ вѣ́рою при́сно ублажа́емъ.


НА УТРЕНИ,
Оба кано́на окто́иха, безъ му́ченичновъ, и свята́го на 6.

Кано́нъ свята́го, его́же краегране́сіе: Пою́ тя, даро́въ боже́ственныхъ тезоимени́та, хвала́ми боже́ственными. Творе́ніе Ѳеофа́ново, гла́съ 4.
Пѣ́снь 1.

Ирмо́съ: Мо́ря чермну́ю пучи́ну невла́жными стопа́ми дре́вній пѣшеше́ствовавъ Изра́иль, крестообра́зными Моисе́овыма рука́ма Амали́кову си́лу въ пусты́ни побѣди́лъ е́сть.

Му́ченикъ, я́вѣ свѣтлостьми́ украша́емь, Добротво́рцу предстои́ши Христу́, отъ Него́ удобря́емь, я́ко даро́въ тезоимени́тъ боже́ственныхъ, му́чениче Ѳео́доре.

Боже́ственными вооружи́вся, Ѳео́доре, ору́жіи вѣ́ры, вра́жія ссѣ́клъ еси́ тве́рдо душетлѣ́нныя полки́ и, побѣди́тель бы́въ, съ му́ченики вѣнча́лся еси́.

Свѣ́тлое твоея́ души́ хра́брство показу́я злочести́вому, богому́дре, царю́, прему́дростію слове́съ твои́хъ и благода́тію дѣ́лъ, сего́ посрами́лъ еси́, Ѳео́доре.

Богоро́диченъ: Безъ сѣ́мене Отчею во́лею отъ Боже́ственнаго Ду́ха Бо́жія зачала́ еси́ Сы́на и пло́тію родила́ еси́, Иже изъ Отца́ безъ ма́тере, на́съ же ра́ди изъ Тебе́ безъ отца́.

Пѣ́снь 3.

Ирмо́съ: Весели́тся о Тебѣ́ Це́рковь Твоя́, Христе́, зову́щи: Ты́ моя́ крѣ́пость, Го́споди, и прибѣ́жище, и утвержде́ніе.

Ополче́ніе злочести́вое, я́ко воево́да си́ленъ, побѣди́лъ еси́ и стропти́ваго змíя вся́ хи́трости попра́лъ еси́.

Яко усе́рденъ душе́ю, умышле́ніемъ благочести́вымъ, сла́вне, злочести́выхъ погуби́лъ еси́ прелюбодѣ́йственная чти́лища.

Крѣ́постію по́мысла лю́тыхъ наноше́нія претерпѣ́лъ еси́, животво́рнѣй ме́ртвости Подвигополо́жника подо́бяся.

Богоро́диченъ: Ты́ еди́на, су́щимъ на земли́, па́че естества́, благи́хъ Хода́таица, Ма́ти Бо́жія была́ еси́. Тѣ́мже Ти́, ра́дуйся, вопіе́мъ.

Сѣда́ленъ, гла́съ 8. Подо́бенъ: Прему́дрости.

Боже́ственное всеору́жіе воспріи́мъ и и́дольскую ле́сть низложи́въ, а́нгелы возста́вилъ еси́ восхвали́ти по́двиги твоя́, и́бо, боже́ственною любо́вію у́мъ распали́въ, на о́гненную сме́рть до́блественно дерзну́лъ еси́. Тѣ́мже тезоимени́тно прося́щимъ тя́ дае́ши боже́ственная дарова́нія, страстоте́рпче Ѳео́доре. Сего́ ра́ди вопіе́мъ ти́: моли́ Христа́ Бо́га грѣхо́въ оставле́ніе пода́ти чту́щимъ любо́вію па́мять твою́. [Два́жды.]

Сла́ва, и ны́нѣ, пра́здника или́ богоро́диченъ:

Въ напа́сти многоплете́нныя впа́дъ отъ вра́гъ ви́димыхъ и неви́димыхъ, бу́рею одержи́мь безчи́сленныхъ согрѣше́ній мои́хъ, и я́ко къ те́плому заступле́нію и покро́ву моему́, Чи́стая, ко приста́нищу притека́ю Твоея́ бла́гости. Тѣ́мже, Пречи́стая, изъ Тебе́ воплоще́нному безсѣ́менно моли́ся прилѣ́жно о всѣ́хъ рабѣ́хъ Твои́хъ, непреста́нно моля́щихъ Ти ся, Богоро́дице Пречи́стая, моля́щи Его́ при́сно согрѣше́ній оставле́ніе дарова́ти воспѣва́ющимъ досто́йно сла́ву Твою́.

Крестобогородиченъ:

Дѣ́ва и Ма́ти Іису́сова, на дре́вѣ зря́щи Творца́, стеня́ше, слезя́щи, и лю́тѣ уязвля́шеся, ду́шу и тѣ́ло растерза́ющи, бію́щися, и къ Нему́ вопію́щи го́рько, и взыва́ющи: увы́ Мнѣ́, о Сы́не Мо́й! Ка́ко претерплю́ стра́сть Твою́, гво́здіе и копіе́, Яже безъ болѣ́зни Тя́ ро́ждши? Но потщи́ся воста́ти, и ви́дѣти Тя́, Сы́не Мо́й и Бо́же, и отъ рыда́нія преста́ти и болѣ́зни, и пою́щіи Твоя́ стра́сти согрѣше́ній разрѣше́ніе пріи́мутъ.

Пѣ́снь 4.

Ирмо́съ: Вознесе́на Тя́ ви́дѣвши Це́рковь на Крестѣ́, Со́лнце Пра́ведное, ста́ въ чи́нѣ свое́мъ, досто́йно взыва́ющи: сла́ва си́лѣ Твое́й, Го́споди.

Уязви́лъ еси́ змíя, уязви́ти тя́ хотя́щаго, и терпѣли́выми сопротивле́ніи му́ченикъ яви́лся еси́, поя́ прилѣ́жно тя́ Укрѣ́пльшему: сла́ва си́лѣ Твое́й, Го́споди.

Изнури́въ пло́ть мно́гими ра́нами, по́мыслъ непрекло́ненъ поста́вилъ еси́, треблаже́нне, поя́ усе́рдно тя́ Укрѣ́пльшему: сла́ва си́лѣ Твое́й, Го́споди.

Украси́лся еси́ страда́ньми Влады́ки, твоя́ честна́я страда́нія, прему́дре, совоку́пль, и сподо́бился еси́ Того́ свѣ́тлости и жела́емыя красоты́.

Богоро́диченъ: Неискусобра́чно родила́ еси́, о Дѣ́во, и по рождествѣ́ яви́лася еси́ дѣ́вствующи па́ки. Тѣ́мже немо́лчными гла́сы, е́же ра́дуйся, Тебѣ́, Влады́чице, вѣ́рою несумнѣ́нною взыва́емъ.

Пѣ́снь 5.

Ирмо́съ: Ты́, Го́споди, мо́й Свѣ́тъ, въ мíръ прише́лъ еси́, Свѣ́тъ Святы́й, обраща́яй изъ мра́чна невѣ́дѣнія вѣ́рою воспѣва́ющія Тя́.

Кропле́ніемъ плотски́хъ крове́й уста́вилъ еси́ де́монскую на па́губу приноси́мую кро́вь, непобѣди́ме Ѳео́доре.

О, нра́ва благочести́ва! О, до́блественна ра́зума! О, вѣ́ры теплѣ́йшія честна́го страстоте́рпца, е́юже Бо́га получи́!

Умъ имѣ́я, свѣ́томъ Бо́жіимъ осія́емь, побо́рника зло́бы омрачи́лъ еси́, змíя, богоно́се Ѳео́доре.

Богоро́диченъ: Тя́ ору́жіе непобѣди́мое на враги́ предлага́емъ, Тя́ утвержде́ніе и наде́жду на́шего спасе́нія, Богоневѣ́сто, стяжа́хомъ.

Пѣ́снь 6.

Ирмо́съ: Пожру́ Ти со гла́сомъ хвале́нія, Го́споди, Це́рковь вопіе́тъ Ти́, отъ бѣсо́вскія кро́ве очи́щшися, ра́ди ми́лости отъ ре́бръ Твои́хъ исте́кшею кро́вію.

Побѣди́лъ еси́ усе́рдіемъ де́рзостнымъ низлага́ющихъ, на крестѣ́ просте́ртъ и гвоздьми́ пробода́емь, блаже́нне, изобража́я спаси́тельную стра́сть Зижди́теля.

Зако́нно стра́ждущему, Христо́съ тебѣ́ явля́ется, въ темни́цѣ затворе́ну, воздвиза́я я́ко Подвигополо́жникъ къ подвиго́мъ на враги́ боре́нія, пресла́вне.

Же́ртву чи́сту, и свя́ту, и непоро́чну тебе́ ра́ди во́лею Себе́ же́ртву прине́сшему, приве́лъ еси́ себе́, страстоте́рпче Ѳео́доре.

Богоро́диченъ: О, чу́до, всѣ́хъ чуде́съ новѣ́йшее! я́ко Дѣ́ва, во утро́бѣ вся́ Содержа́щаго неискусому́жно заче́нши, не тѣсновмѣсти́.

Конда́къ, гла́съ 2. Подо́бенъ: Вы́шнихъ ища́.

Му́жествомъ души́ въ вѣ́ру оболкíйся и глаго́лъ Бо́жій, а́ки копіе́, въ ру́ку взе́мъ, врага́ побѣди́лъ еси́, му́чениковъ преве́лій Ѳео́доре, съ ни́ми Христу́ Бо́гу моля́ся не преста́й о всѣ́хъ на́съ.

Икосъ:

Страда́льцевъ пресвѣ́тлую добро́ту, пріиди́те вси́, пѣ́сненными вѣнцы́, вѣ́рніи, Ѳео́дора вѣнча́емъ: да́ръ бо Бо́жій вели́къ мíру яви́ся сія́ньми чуде́съ. Врага́ бо побѣ́ждь веліа́ра страда́ніи честны́ми, одождя́етъ вмѣ́сто кро́вныхъ ка́плей исцѣле́ній то́ки, съ си́ми у́бо всѣ́ми ра́дуется Христу́ и дае́тъ ми́ръ неоскуде́нъ. Тѣ́мъ вопіе́мъ ему́: моли́ непреста́нно о всѣ́хъ на́съ.

Пѣ́снь 7.

Ирмо́съ: Въ пещи́ авраа́мстіи о́троцы перси́дстѣй, любо́вію благоче́стія па́че, не́жели пла́менемъ, опаля́еми, взыва́ху: благослове́нъ еси́ въ хра́мѣ сла́вы Твоея́, Го́споди.

Въ пещи́ твои́хъ подвиго́въ, му́чениче сла́вне, ве́щь злоче́стія попали́лъ еси́ и свѣти́ло благоче́стія, поя́, бы́лъ еси́: благослове́нъ еси́ въ хра́мѣ сла́вы Твоея́, Го́споди.

Яко воево́да, я́ко смы́сленъ и тре́звеникъ дѣ́ломъ, царя́ несмы́слена и злочести́ва премо́глъ еси́ и показа́лъ еси́ сего́ некрѣ́пка, укрѣпи́вся си́лою духо́вною.

Зако́нъ побѣжда́ется похвала́ми вели́чества твоего́: ты́ бо пресвѣ́тлыми просія́лъ еси́ облиста́ніи муче́нія, Влады́цѣ твоему́ вопія́, Ѳео́доре: благослове́нна держа́ва Твоего́ влады́чества.

Богоро́диченъ: Вы́шняго освяще́нное боже́ственное селе́ніе, ра́дуйся, Тобо́ю бо даде́ся ра́дость, Богоро́дице, зову́щимъ: благослове́на Ты́ въ жена́хъ еси́, Всенепоро́чная Влады́чице.

Пѣ́снь 8.

Ирмо́съ: Ру́цѣ распросте́ръ, Даніи́лъ, льво́въ зія́нія въ ро́вѣ затче́; о́гненную же си́лу угаси́ша, добродѣ́телію препоя́савшеся, благоче́стія рачи́тели, о́троцы, взыва́юще: благослови́те, вся́ дѣла́ Госпо́дня, Го́спода.

На Тя́ упова́въ, мене́ ра́ди Кре́стъ и сме́рть претерпѣ́вшаго, на кре́стъ воздвиго́хся, Влады́ко, и уязвля́емь стрѣля́ньми, и лю́тымъ прикаса́яся ра́намъ, Го́споди, — вопія́лъ еси́, му́чениче, стражда́, доблему́дренне Ѳео́доре.

Приве́лъ еси́ же́ртву чи́сту себе́ Зижди́телю твоему́, ра́дуяся, Ѳео́доре, и отлучи́вся, сла́вне, къ Ца́рству небе́сному, съ му́ченики свяще́нно взыва́я всегда́: благослови́те, вся́ дѣла́ Госпо́дня, Го́спода.

Яко кри́нъ, я́ко ши́покъ разу́мный, воня́ми страда́ній твои́хъ благоуха́еши на́съ, отгоня́ благода́тію всегда́ злосмра́діе страсте́й на́шихъ и понужда́я вопи́ти благово́нною душе́ю: благослови́те, вся́ дѣла́ Госпо́дня, Го́спода.

Богоро́диченъ: Ты́ еди́на во всѣ́хъ родѣ́хъ, Дѣ́во Пречи́стая, Ма́ти яви́лася еси́ Бо́жія, Ты́ Божества́ была́ еси́ жили́ще, Всенепоро́чная, не опа́льшися огне́мъ непристу́пнаго Свѣ́та. Тѣ́мже вси́ Тя́ благослови́мъ, Марíе Богоневѣ́сто.

Пѣ́снь 9.

Ирмо́съ: Ка́мень нерукосѣ́чный отъ несѣко́мыя горы́, Тебе́, Дѣ́во, краеуго́льный отсѣче́ся — Христо́съ, совокупи́вый разстоя́щаяся естества́. Тѣ́мъ, веселя́щеся, Тя́, Богоро́дице, велича́емъ.

Ны́нѣ со блаже́нными собо́ры и му́ченическими ли́ки, я́ко укра́шенъ страда́ньми, соводворя́яся и свеселя́ся, вѣне́цъ нося́, предстои́ши Жела́емому тебѣ́, Ѳео́доре.

Къ высотѣ́ небе́снѣй взя́тся, о земны́хъ небре́гъ, и жела́емаго тебѣ́ конца́ сподо́бился еси́, то́ са́мое соверше́ніе жела́ній, Ѳео́доре, воспріе́мъ, ра́дуяся.

Имы́й къ Бо́гу дерзнове́ніе, я́ко до́бль и му́дръ страда́лецъ, восхваля́ющимъ тя́ любо́вію согрѣше́ній оставле́ніе проси́, отъ страсте́й и скорбе́й всѣ́хъ на́съ избавля́я.

Еди́наго Тя́, безсме́ртна Сло́ва, пло́тію пострада́вша и уме́рша, му́ченикъ богому́дрый возжела́въ, безсме́ртія Твоего́ получи́въ, на небеса́ всели́ся, къ Зижди́телю всѣ́хъ Всеси́льну.

Богоро́диченъ: Благослове́нную Марíю и Бо́жію Ма́терь Дѣ́ву, пріиди́те вси́, вѣ́рою и любо́вію непреста́нно восхва́лимъ, Ея́же ра́ди обрѣ́тше вѣ́чное ра́дованіе.

Свѣти́ленъ. Подо́бенъ: Не́бо звѣзда́ми.

Ты́, красе́нъ добро́тою, и воево́да благомо́щенъ, и сла́вный во страда́льцѣхъ во́инъ, прине́слся еси́ Христу́ и мíру да́ръ боже́ственный, Ѳео́доре, показа́лся еси́.

Сла́ва, и ны́нѣ, пра́здника или́ богоро́диченъ:

Держа́внымъ Твои́мъ кро́вомъ отъ вра́гъ навѣ́та на́съ, Чи́стая, Твоя́ рабы́, сохраня́й вся́ невре́дны: Тя́ бо стяжа́хомъ еди́ну прибѣ́жище въ ну́ждахъ.

На стихо́внѣ окто́иха. Сла́ва, гла́съ 8:

Страда́льческій соста́вль по́двигъ, на пре́лесть му́жествовалъ еси́, Ѳео́доре, огневѣща́ннымъ язы́комъ твои́мъ посрами́лъ еси́ Лики́ніево безчеловѣ́чество. Тѣ́мже, и со а́нгелы ра́дуяся, блаже́нне, моли́ Христа́ Бо́га, я́ко да ми́лостивъ бу́детъ на́мъ въ де́нь Су́дный.

И ны́нѣ, пра́здника или́ богоро́диченъ.
Крестобогоро́диченъ пи́санъ ве́черъ на стихо́внѣ.



НА ЛИТУРГІИ,

Блаже́нна пра́здника или́ окто́иха, и свята́го пѣ́снь 3-я. Проки́менъ, гла́съ 7: Возвесели́тся пра́ведникъ о Го́сподѣ,* [и упова́етъ на Него́]. Сти́хъ: Услы́ши, Бо́же, гла́съ мо́й, внегда́ моли́ти ми ся къ Тебѣ́. Апо́столъ къ Тимоѳе́ю, зача́ло 292. Аллилу́ія, гла́съ 4: Пра́ведникъ, я́ко фи́никсъ процвѣте́тъ, я́ко ке́дръ, и́же въ Лива́нѣ, умно́жится. [Сти́хъ: Насажде́ни въ дому́ Госпо́дни, во дво́рѣхъ Бо́га на́шего процвѣту́тъ.] Ева́нгеліе отъ Матѳе́я, зача́ло 36. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся].

Источникъ: Минíа, мѣ́сяцъ Іу́ній. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 44 об. – 49.

/ Къ оглавленію раздѣла /


Наверхъ / Къ титульной страницѣ

0