Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 28 апрѣля 2017 г. Сейчасъ на порталѣ посѣтителей - 33.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́нія въ 7-й де́нь.
Свята́го священному́ченика Ѳеодо́та, епи́скопа Анки́рскаго.

[ВЕЧЕРЪ,]
Стихи́ры, гла́съ 1. Подо́бенъ: Небе́сныхъ чино́въ.

Искуше́ньми пло́ти твоея́* уязви́лъ еси́ супоста́ты, блаже́нне,* и сострѣля́лъ еси́ си́хъ обличе́ніи сердца́,* ка́плями же излія́ній крове́й твои́хъ* пото́ки изсуши́лъ еси́ до конца́* безбо́жія, преблаже́нне.

Терпѣли́вно свѣща́ми опаля́емь* и ра́нами хребе́тъ сокруша́емь,* му́чениче, претерпѣ́лъ еси́, зовы́й:* Христо́вы любве́ отню́дъ ничто́же мя́ разлучи́тъ,* ни сме́рть, ни живо́тъ,* ниже́ вся́ка и́на му́ка.

Ины стихи́ры Пресвяты́я Богоро́дицы, гла́съ и подо́бенъ то́йже:

Одержи́ми паде́ніи ненаде́жными, Чи́стая,* Тя́ Предста́тельницу еди́ну иму́ще, Дѣ́во,* вопіе́мъ благода́рственно:* очи́сти ны́, Пресвята́я Богоневѣ́сто,* Ты́ бо еси́ мíру прибѣ́жище* и заступле́ніе ро́ду на́шему.

Жезло́мъ Твоего́ предста́тельства,* Богороди́тельнице Чи́стая,* звѣри́ныя стра́сти* окая́нныя души́ моея́ отжени́ вско́рѣ,* ми́рно живо́тъ мо́й управля́ющи,* и свято́му мя́ ста́ду* избра́нныхъ Твои́хъ ове́цъ причти́.

Согрѣше́ній пучи́ною потопля́емь,* къ ти́хому приста́нищу* пречи́стыя Твоея́ моли́твы, Богороди́тельнице, прибѣ́гъ,* взыва́ю Ти́: спаси́ мя,* держа́вную Твою́ пода́вши десни́цу* рабу́ Твоему́, Пренепоро́чная.

Сла́ва, и ны́нѣ:

Нра́вомъ гнилы́мъ попо́лзся, ни́цъ лежу́* и къ Твое́й, Дѣ́во, притека́ю тишинѣ́:* отъ бу́ри сопроти́вныя* и искуше́ній многообра́зныхъ мя́ изба́ви,* да пою́ Твою́ благода́ть непреста́нно,* Богоро́дице Ма́ти Приснодѣ́во.

Крестобогоро́диченъ:

У Креста́ предстоя́щи Сы́на и Бо́га Твоего́* и долготерпѣ́ніе Того́ смотря́ющи,* глаго́лаше, пла́чущи, Ма́ти Чи́стая:* увы́ Мнѣ́, Ча́до Сладча́йшее,* что́ сія́ стра́ждеши непра́ведно, Сло́ве Бо́жій,* да спасе́ши человѣ́чество?

Тропа́рь, гла́съ 4:

И нра́вомъ прича́стникъ, и престо́ломъ намѣ́стникъ апо́столомъ бы́въ, дѣя́ніе обрѣ́лъ еси́, богодохнове́нне, въ видѣ́нія восхо́дъ; сего́ ра́ди, сло́во и́стины исправля́я, и вѣ́ры ра́ди пострада́лъ еси́ да́же до кро́ве, священному́чениче Ѳеодо́те, моли́ Христа́ Бо́га спасти́ся душа́мъ на́шимъ.


[НА УТРЕНИ,]
Кано́нъ, его́же краегране́сіе: Бо́жіе дая́ніе бы́лъ еси́ и́стинно, блаже́нне. Творе́ніе Іо́сифово, гла́съ 6.

Пѣ́снь 1.

Ирмо́съ: Яко по су́ху пѣшеше́ствовавъ Изра́иль по бе́зднѣ стопа́ми, гони́теля фарао́на ви́дя потопля́ема, Бо́гу побѣ́дную пѣ́снь пои́мъ, вопія́ше.

Богосія́нную тя́ звѣзду́ мы́сленное показа́въ Со́лнце на высотѣ́ Своея́ Це́ркве, всю́ зе́млю блиста́ньми, блаже́нне, твои́хъ страда́ній уясни́.

Отъ ю́на во́зраста возложе́нъ бы́въ Бо́гу, Ѳеодо́те, богода́нными добродѣ́тельми ду́шу просвѣти́лъ еси́ я́вѣ и мíръ честны́ми страда́ніи украси́лъ еси́.

Сла́вный му́ченикъ, смотря́я льсти́ваго мре́жи, просте́рты на земли́, всю́ду прохожда́ше, ду́ши уче́ньми благочести́выхъ утвержда́я благода́тію.

Богоро́диченъ: Премно́гимъ милосе́рдіемъ небеса́ прекло́нь, сни́де Сы́нъ Бо́жій и изъ Тебе́ воплоти́ся, Чи́стая, спаса́я человѣ́ка отъ пре́лести зміи́ны.

Пѣ́снь 3.

Ирмо́съ: Нѣ́сть свя́тъ, я́коже Ты́, Го́споди Бо́же мо́й, вознесы́й ро́гъ вѣ́рныхъ Твои́хъ, Бла́же, и утверди́вый на́съ на ка́мени исповѣ́данія Твоего́.

Вы́ну взира́я къ Бо́гу очесы́ у́мными, приснопа́мятне му́чениче, не чу́лъ еси́ ра́нъ, тѣлеси́ приближа́ющихся, и му́ками всю́ду одержи́мь.

Ника́коже, му́чениче, прило́ги болѣ́зненными поколеба́лся еси́, ни ласка́ніи беззако́нныхъ, на ка́мени тве́рдыя вѣ́ры Христо́вы водруже́нъ, сла́вне Ѳеодо́те.

Сокруша́я тѣ́ло мно́гими ра́нами, гони́тель не возмо́же отню́дъ твоея́ крѣ́пости душе́вныя разсла́бити, боже́ственною любо́вію Спа́са, блаже́нне, утвержда́емь.

Богоро́диченъ: Ви́дѣвъ Твоего́ издале́ча ли́къ проро́ческій богогла́сный та́инства глубину́, многообра́зными гла́сы Бо́гу Ма́терь Чи́стую Тя́ проповѣ́дуетъ, Пречи́стая Богоневѣ́сто.

Сѣда́ленъ, гла́съ 1. Подо́бенъ: Гро́бъ Тво́й.

Многосвѣ́тлая звѣзда́, дарова́ніи чуде́сными и страда́ніи свяще́нными озаря́я тва́рь, Ѳеодо́те блаже́нне, вои́стинну бы́лъ еси́. Тѣ́мже дне́сь свѣтоно́сную твою́ па́мять пра́зднующе, въ весе́ліи се́рдца Христа́ велича́емъ.

Сла́ва, и ны́нѣ, пра́здника или́ богоро́диченъ:

Безневѣ́стная Чи́стая Богоро́дице Дѣ́во, еди́на вѣ́рныхъ предста́тельнице и покро́ве, бѣ́дъ, и скорбе́й, и лю́тыхъ обстоя́ній всѣ́хъ изба́ви, на Тя́ упова́ніе, Отрокови́це, иму́щихъ, и ду́ши на́ша спаси́ боже́ственными моли́твами Твои́ми.

Крестобогоро́диченъ:

Нескве́рная Агница, Агнца и Па́стыря, повѣ́шена на дре́вѣ, ме́ртва зря́щи, пла́чущи, вѣща́ше, ма́терски восклица́ющи: ка́ко претерплю́ Твое́ е́же па́че сло́ва, Сы́не Мо́й, сни́тіе и во́льныя стра́сти, Бо́же Преблагíй?

Пѣ́снь 4.

Ирмо́съ: Христо́съ моя́ си́ла, Бо́гъ и Госпо́дь, честна́я Це́рковь боголѣ́пно пое́тъ, взыва́ющи, отъ смы́сла чи́ста, о Го́сподѣ пра́зднующи.

Му́дростію слове́съ твои́хъ и дѣ́лъ благода́тію тмы́ предста́теля я́вѣ посрами́лъ еси́, Ѳеодо́те, и побѣ́ду взя́лъ еси́ на него́, сла́вно подви́гся.

Огне́мъ страда́ній твои́хъ я́вѣ запали́лъ еси́ многобо́жную ле́сть и, я́ко свѣща́, Ду́хомъ Святы́мъ, му́чениче, вже́гся та́йно, подсо́лнечную просвѣти́лъ еси́.

Крѣ́пко, сла́вне, въ ре́бра стру́жемь и зѣ́льными болѣ́зньми я́ко вои́стинну всю́ду окруже́нъ, непоколе́блемь умо́мъ позна́лся еси́ вѣ́ры ра́ди, приснопа́мятне.

Богоро́диченъ: Сохрани́въ нетлѣ́нну Тя́ по рождествѣ́, я́коже пре́жде рождества́, Дѣ́во, Содѣ́тель всели́ся въ ложесна́ Твоя́ и истлѣ́вшія мно́гими согрѣше́ніи обнови́.

Пѣ́снь 5.

Ирмо́съ: Бо́жіимъ свѣ́томъ Твои́мъ, Бла́же, у́тренюющихъ Ти́ ду́ши любо́вію озари́, молю́ся, Тя́ вѣ́дѣти, Сло́вѣ Бо́жій, и́стиннаго Бо́га, отъ мра́ка грѣхо́внаго взыва́юща.

Терпѣ́ніемъ твои́мъ, му́чениче му́дре, беззако́ннующихъ стремле́нія, и му́къ озлобле́нія, и опале́нія я́вѣ терпѣ́лъ еси́, Боже́ственнымъ посо́біемъ огражде́нъ.

Проповѣ́дуя сло́во благочести́вое, пу́тная ше́ствія дале́че, му́чениче богому́дре, ше́ствовалъ еси́ и заблужде́нныя къ свѣ́ту обрати́лъ еси́, тмо́ю води́мыя су́етства.

Воздви́женъ бы́въ, я́коже а́гнецъ, му́чениче, на дре́во, желѣ́зныхъ ногте́й терпи́ши терза́нія, я́коже безпло́тенъ, блаже́нне, умерщвле́нія дебельство́ совлача́я.

Богоро́диченъ: Воплоще́нно вои́стинну Сло́во Отчее отъ чи́стыхъ, Чи́стая Дѣ́во, крове́й Твои́хъ родила́ еси́, во двою́ соверше́нну естеству́, еди́ной же ѵпоста́си, Богора́дованная.

Пѣ́снь 6.

Ирмо́съ: Жите́йское мо́ре, воздвиза́емое зря́ напа́стей бу́рею, къ ти́хому приста́нищу Твоему́ прите́къ, вопію́ Ти: возведи́ отъ тли́ живо́тъ мо́й, Многоми́лостиве.

Пома́залъ еси́ словесы́ твои́ми свяще́нными чи́стыя къ подвиго́мъ жены́, и, низло́жше, му́чениче, врага́ му́жескими боре́ніи, нетлѣ́нія вѣнцы́ исплето́ша.

Крѣ́постію ду́ха ду́шу огради́въ, лука́вствія ду́хи терпѣ́ніемъ ра́нъ низложи́лъ еси́ и побѣ́ды вѣне́цъ отъ Бо́га прія́лъ еси́, досточу́дне.

Ка́плями крове́й твои́хъ и́дольскій пла́мень, му́чениче Христо́въ, погаси́лъ еси́ и росо́ю болѣ́зней твои́хъ благочести́выхъ ду́ши ороси́лъ еси́, отъ пла́мене пре́лести изба́вивъ.

Богоро́диченъ: Иже все́й отню́дъ разу́мнѣй я́ко Бо́гъ и ви́димѣй тва́ри во утро́бу Твою́ всели́ся вои́стинну и пло́ть бы́сть, человѣ́ки назида́я, Приснодѣ́во.

Пѣ́снь 7.

Ирмо́съ: Росода́тельну у́бо пе́щь содѣ́ла а́нгелъ преподо́бнымъ отроко́мъ, халде́и же опаля́ющее велѣ́ніе Бо́жіе, мучи́теля увѣща́ вопи́ти: благослове́нъ еси́, Бо́же оте́цъ на́шихъ.

Огне́мъ, богоблаже́нне, болѣ́зней твои́хъ запале́ніе и́дольское угаси́лъ еси́, кро́вными же пото́ки погрузи́лъ еси́ враги́ безпло́тныя, Ѳеодо́те, вопія́: благослове́нъ еси́, Бо́же оте́цъ на́шихъ.

Яко ѳиміа́мъ благово́ненъ, прине́слся еси́, му́дре, Подвигополо́жнику твоему́, Боже́ственною благода́тію злосмра́дную ле́сть низлага́я. Тѣ́мъ пое́ши ра́достно: благослове́нъ еси́, Бо́же оте́цъ на́шихъ.

Соблю́дъ твоя́ словеса́ Фо́ртъ святы́й, богоно́сному Фо́ртону отдаде́ тя, хра́му на воздви́женіе че́стну, на очище́ніе всѣ́хъ благочести́выхъ, въ снабде́ніе душа́мъ, му́чениче Ѳеодо́те.

Богоро́диченъ: Еди́ну Нося́щаго ѵпоста́сь родила́ еси́ Сло́ва, Ма́ти Дѣ́во, сугу́ба иму́ща хотѣ́нія и есте́ственная Его́ сво́йства я́вѣ: Бо́гъ бо е́сть и Человѣ́къ, на́съ ра́ди воплоти́выйся.

Пѣ́снь 8.

Ирмо́съ: Изъ пла́мене преподо́бнымъ ро́су источи́лъ еси́ и пра́веднаго же́ртву водо́ю попали́лъ еси́: вся́ бо твори́ши, Христе́, то́кмо е́же хотѣ́ти. Тя́ превозно́симъ во вся́ вѣ́ки.

Непоколеби́мь сто́лпъ, забра́ло непрекло́нно, непобѣди́мая стѣна́, степе́нь вѣ́ры, да́ніе боже́ственное, благоче́стія побо́рникъ, пре́лести губи́тель показа́лся еси́, страстоно́сче.

Правле́ніемъ Боже́ственныя благода́ти, прему́дре, му́къ преше́лъ еси́ вели́кую пучи́ну и ти́хая, ра́дуяся, дости́глъ еси́, сла́вне, приста́нища го́рняго Ца́рствія.

Ше́ствія и стези́ твоя́ напра́вишася ко Христу́, всѣ́хъ Бо́гу и Го́споду, Ему́же въ ру́цѣ ду́хъ тво́й пре́далъ еси́, му́чениче страстоно́сче, Ѳеодо́те треблаже́нне.

Богоро́диченъ: Ри́торовъ язы́къ та́инства Твоего́ недоумѣ́нную глубину́ изрещи́ не мо́жетъ: Сло́во бо Бо́жіе па́че сло́ва родила́ еси́, Пречи́стая Дѣ́во, во спасе́ніе всѣ́хъ.

Пѣ́снь 9.

Ирмо́съ: Бо́га человѣ́комъ невозмо́жно ви́дѣти, на Него́же не смѣ́ютъ чи́ни а́нгельстіи взира́ти; Тобо́ю бо, Всечи́стая, яви́ся человѣ́комъ Сло́во воплоще́нно, Его́же велича́юще, съ небе́сными во́и, Тя́ ублажа́емъ.

Да сла́вы улучи́ши о́ныя, страстоте́рпче, ви́димую, ра́дуяся, преоби́дѣлъ еси́ и, боже́ственнымъ ма́ніемъ къ ра́намъ отлучи́вся, не ужа́слся еси́ мучи́тельныхъ ви́дъ и сме́рти го́рькія. Тѣ́мже съ му́ченики вѣнча́лся еси́, подви́гся.

Яви́лся еси́ хра́мъ, му́чениче, чи́стъ Тро́ицы зда́ніемъ дѣя́ній, Ѳеодо́те пребога́те, боже́ственныхъ, страда́ній же свѣ́тлыхъ сія́ніемъ укра́шенъ. Тѣ́мже хра́мы де́монскія истука́нныя, му́дре, боже́ственною Утѣ́шителя си́лою я́вѣ низве́рглъ еси́.

Иска́пающая гора́ боже́ственную сла́дость яви́лся еси́, исто́чникъ чуде́съ, пучи́на же, сла́вне, боже́ственныхъ дарова́ній, струя́ свѣтла́ Свята́го Ду́ха, ду́ши напоя́я, и потопля́я стра́сти, и всѣ́мъ хода́тайствуя, му́чениче, благоче́стно пою́щимъ тя́, ра́дованіе.

Богоро́диченъ: Гла́сомъ а́нгела родила́ еси́ Безнача́льнаго Сло́ва, пріе́мшаго пло́ть у́мну же и одушевле́нну, Дѣ́во Всечи́стая, отъ чи́стыхъ крове́й Твои́хъ, и безпло́тныя враги́ низло́жшаго, и спа́сшаго на́съ всѣ́хъ, и́стинную Богоро́дицу исповѣ́дающихъ Тя́.

Источникъ: Минíа, мѣ́сяцъ Іу́ній. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 41 – 44.

/ Къ оглавленію раздѣла /


Наверхъ / Къ титульной страницѣ

0