Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - четвергъ, 19 октября 2017 г. Сейчасъ на порталѣ посѣтителей - 15.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́нія въ 6-й де́нь.
Преподо́бнаго отца́ на́шего Висаріо́на чудотво́рца и преподо́бнаго Иларіо́на Но́ваго, оби́тели Далма́тскія.

[ВЕЧЕРЪ,]
На Го́споди воззва́хъ: стихи́ры, гла́съ 8. Подо́бенъ: О, пресла́внаго чудесе́!

Неизрече́нныхъ по́двигъ твои́хъ,* ты́ боже́ственною любо́вію,* терпя́ стоя́ніе посредѣ́ те́рнія,* показа́лъ еси́ страда́льцемъ ра́вно сопротивле́ніе.* Го́рькаго мо́ря услажда́еши во́ды* и ду́ши напоя́еши въ жа́жди, прему́дре.* Прехо́диши вы́ше Ни́ловыхъ быстри́нъ,* творя́ немо́кренно, прехва́льне,* на вода́хъ ше́ствіе.

Тя́, подо́бника Иліи́ му́дрому* вси́ вѣ́дуще я́вѣ, Висаріо́не, восхваля́емъ:* ми́лостію боже́ственною тебѣ́* съ небесе́ одожди́лъ еси́ водны́я струи́,* и дожде́вныя исто́чники, и ро́су боже́ственную,* твои́ми честны́ми моли́твами подае́ши уже́ свы́ше,* о́тче преблаже́нне, всѣ́мъ вѣ́рнымъ* благода́ть же и си́лу* и покро́въ необори́мъ.

Ины стихи́ры преподо́бнаго Иларіо́на, гла́съ 4. Подо́бенъ: Да́лъ еси́ зна́меніе.

Житіе́ нескве́рно,* терпѣ́ніе, и кро́тость,* и любо́вь нелицемѣ́рну,* воздержа́ніе безмѣ́рно,* всено́щное стоя́ніе,* умиле́ніе боже́ственное,* вѣ́ру и наде́жду и́стинну* съ ми́лованіемъ, о́тче, стяжа́въ,* я́ко а́нгелъ, пожи́лъ еси́ на земли́ съ тѣ́ломъ,* Иларіо́не блаже́нне,* моли́твенниче о душа́хъ на́шихъ.

Земны́й а́нгелъ* и небе́сный человѣ́къ бы́лъ еси́, преподо́бне,* исто́чникъ умиле́нія,* ми́лованія струя́,* пучи́на чуде́съ,* грѣ́шниковъ испору́чникъ,* ма́слина вои́стинну Бо́жія плодови́та,* еле́емъ трудо́въ твои́хъ* умаща́я ли́ца, Иларіо́не чу́дне,* вѣ́рно восхваля́ющихъ тя́.

Умъ тво́й, сія́я* боже́ственными разумѣ́ніи,* тѣле́сныхъ превы́ше страсте́й бы́лъ еси́,* несмѣ́шенъ до́льними,* нося́ начерта́ніе* и изобража́я въ себѣ́ боже́ственную добро́ту,* и познава́емь, ве́сь свѣтови́дѣнъ* дѣ́йствомъ Ду́ха, Иларіо́не, о́тче на́шъ,* мона́шествующихъ украше́ніе.

Сла́ва, и ны́нѣ, пра́здника или́ богоро́диченъ:

Ра́дуйся, солнцезра́чная луче́,* Со́лнца незаходи́маго престо́ле,* Яже Со́лнце возсія́вши недоумѣ́нное;* ра́дуйся, у́ме, облиста́яй боже́ственными сія́ньми,* заре́ мо́лнійная, освѣти́вшая земли́ концы́,* и́стинное зла́та блиста́ніе,* вседо́брая и Пренепоро́чная,* Свѣ́тъ невече́рній вѣ́рнымъ облиста́вши.

Крестобогоро́диченъ:

Распина́ема Христа́ Человѣколю́бца* ви́дящи, Пречи́стая,* и ре́бра ископава́ема копіе́мъ,* пла́чущи, вопія́ше:* что́ сіе́, Сы́не Мо́й?* Что́ Ти безблагода́тніи лю́діе возда́ша,* за я́же сотвори́лъ еси́ до́брая и́мъ,* и тщи́шися безча́дствовати Мя́, Вселюбе́знѣйшій?* Удивля́юся, Благоутро́бне, Твоему́ во́льному распя́тію.

Тропа́рь, гла́съ 4:

Бо́же оте́цъ на́шихъ, творя́й при́сно съ на́ми по Твое́й кро́тости, не отста́ви ми́лость Твою́ отъ на́съ, но моли́твами и́хъ въ ми́рѣ упра́ви живо́тъ на́шъ.


[НА УТРЕНИ,]
Кано́нъ свята́го Висаріо́на. Творе́ніе Іо́сифово, гла́съ 2.

Пѣ́снь 1.

Ирмо́съ: Гряди́те, лю́діе, пои́мъ пѣ́снь Христу́ Бо́гу, раздѣ́льшему мо́ре и наста́вльшему лю́ди, я́же изведе́ изъ рабо́ты еги́петскія, я́ко просла́вися.

Пое́тъ Бо́гу Це́рковь, лику́ющи въ па́мяти твое́й дне́сь, богодохнове́нне Висаріо́не, и вѣ́рою сла́витъ вели́кія, о́тче, по́двиги твоя́.

Ра́бъ Бо́гу я́влься, порабо́тилъ еси́ душе́вными си́лами стра́сти тѣле́сныя и свобо́дь вся́кія зло́бы яви́лся еси́, о́тче всечу́дне.

Украси́вся добро́тами по́двигъ твои́хъ, сосу́дъ яви́лся еси́ благопотре́бенъ Боже́ственнаго Ду́ха, Того́ дѣ́йствія вмѣща́ющь, Висаріо́не блаже́нне.

Богоро́диченъ: Ду́шъ льсте́цъ мя́ привлече́ въ поги́бельный ро́въ, но мнѣ́ простри́ держа́вную Твою́ ру́ку и ско́ро, Богоро́дице, къ свѣ́ту возведи́.

Инъ кано́нъ преподо́бнаго Иларіо́на, гла́съ 8.
Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Въ свѣ́тъ невеще́ственный и разу́мный отъ тмы́ су́щихъ веще́й востекíй, Иларіо́не преподо́бне, моли́твами твои́ми къ Бо́гу мя́ просвѣти́.

Отъ младе́нства сса́въ добродѣ́тель, воздержа́нія болѣ́зньми и по́ты по́стными въ му́жа дости́глъ еси́ и въ мѣ́ру духо́вную во́зраста Христо́ва.

Страсте́й пучи́ну преше́дъ и треволне́нія де́моновъ избѣ́гъ, во приста́нище устреми́лся еси́ немо́кренно безстра́стія, о́тче преподо́бне.

Богоро́диченъ: Сло́во безъ ма́тере изъ Отца́, безъ отца́ Сего́ напослѣ́докъ богому́жно родила́ еси́, еди́на Богома́ти, я́ко превы́шши всея́ тва́ри.

Пѣ́снь 3.

Ирмо́съ: На ка́мени мя́ вѣ́ры утверди́въ, разшири́лъ еси́ уста́ моя́ на враги́ моя́, возвесели́бося ду́хъ мо́й, внегда́ пѣ́ти: нѣ́сть свя́тъ, я́коже Бо́гъ на́шъ, и нѣ́сть пра́веденъ, па́че Тебе́, Го́споди.

Возше́лъ еси́ на высоту́ безстра́стія, вше́лъ еси́ во мра́къ боговидѣ́нія, прія́лъ еси́ въ се́рдцы твое́мъ боже́ственный зако́нъ, и́мже укрѣ́плься, свѣти́льникъ пресвѣ́телъ мона́шествующихъ, преподо́бне, бы́лъ еси́.

Плодови́тая ма́слина, въ дому́ боже́ственнѣмъ я́вѣ насажде́нъ, яви́лся еси́, о́тче, еле́емъ по́двиговъ твои́хъ умасти́ на́ша ли́ца, восхваля́ющихъ твоя́, Висаріо́не преподо́бне, чудеса́.

Нестяжа́тельно пожи́въ, блаже́нне, житіе́, пти́цамъ подо́бно, о́тче, кри́лы же облегча́емь безстра́стія, вы́шнія дости́глъ еси́ оби́тели, ра́дуяся, сего́ ра́ди вѣ́рою тя́ ублажа́емъ.

Богоро́диченъ: Лѣ́ностно живо́тъ мо́й изжи́въ и страстьми́ се́рдце оскверни́въ, приступа́ю къ Тебѣ́, Влады́чице, умиле́ніемъ души́ и молю́ся уще́дрити и спасти́ мя, покая́нія о́бразы мя́ утве́рждши.

Инъ.

Ирмо́съ: Ты́ еси́ утвержде́ніе притека́ющихъ къ Тебѣ́, Го́споди, Ты́ еси́ Свѣ́тъ омраче́нныхъ, и пое́тъ Тя́ ду́хъ мо́й.

Попали́лъ еси́ у́глемъ воздержа́нія, преподо́бне, страсте́й те́рніе и прохлажда́еши вѣ́рныхъ мудрова́нія.

Стрѣ́лы изощре́ны добродѣ́тели стяжа́въ ду́хомъ, я́ко си́ленъ, уязви́лъ еси́ се́рдце лю́таго ратобо́рца.

Ору́жіемъ воздержа́нія и моли́твою, я́ко броня́ми, преподо́бне, вооружи́вся, враго́въ неви́димыхъ побѣди́лъ еси́ полки́.

Богоро́диченъ: Ми́лостиву бы́ти ми́, Тя́ молю́, Твои́ми, Влады́чице, дерзнове́ньми, изъ Тебе́ ро́ждшемуся, въ де́нь Су́дный.

Конда́къ Иларіо́на, гла́съ 2. Подо́бенъ: Тве́рдыя.

Огра́ды живоно́сныя твоея́ па́жити, па́стырски невреди́мо ста́до соблю́лъ еси́ и яви́лся еси́ высото́ю дѣ́лъ вели́къ, но́вый Иларіо́не, по благоче́стіи мно́ги му́ки и ско́рби пріе́мъ: тѣ́мъ во всера́достный живо́тъ всели́лся го́рняго Сіо́на, моли́ за ны́, преподо́бне.

Сѣда́ленъ Висаріо́на, гла́съ 1. Подо́бенъ: Гро́бъ Тво́й.

Воздержа́нія огне́мъ попали́въ стра́сти, свѣща́ свѣтла́ безстра́стія яви́лся еси́, тму́ ду́шъ на́шихъ отгоня́щи благода́тію. Тѣ́мже дне́сь свѣтоно́сную твою́ па́мять пра́зднуемъ весе́ліемъ се́рдца, Висаріо́не, о́тче на́шъ.

Сла́ва, Иларіо́на, гла́съ 4. Подо́бенъ: Ско́ро предвари́.

Бо́гу освяти́лъ еси́ твою́ жи́знь, всеблаже́нне, бы́въ изря́денъ священнодѣ́йственникъ вои́стинну Христо́въ, свяще́нниче. Тѣ́мже по мно́гихъ по́тѣхъ и болѣ́знехъ, ра́дуяся, въ невеще́ственная преста́вился еси́ селе́нія. И ны́нѣ источа́еши на́мъ струи́ исцѣле́ній.

И ны́нѣ, пра́здника или́ богоро́диченъ:

Дѣ́во Всенепоро́чная, Яже Пресу́щнаго Бо́га ро́ждшая, со безпло́тными Того́ непреста́нно моли́ оставле́ніе прегрѣше́ній и исправле́ніе житія́ да́ти на́мъ пре́жде конца́, вѣ́рою и любо́вію пою́щимъ Тя́ по до́лгу, еди́на Всепѣ́тая.

Крестобогоро́диченъ:

Дѣ́во Пренепоро́чная, Ма́ти Христа́ Бо́га, ору́жіе про́йде Твою́ пресвяту́ю ду́шу, егда́ распина́ема ви́дѣла еси́ во́лею Сы́на и Бо́га Твоего́. Его́же, Благослове́нная, моля́щи не преста́й проще́ніе прегрѣше́ній на́мъ дарова́ти.

Пѣ́снь 4.

Ирмо́съ: Пою́ Тя, слу́хомъ бо, Го́споди, услы́шахъ и ужасо́хся: до мене́ бо и́деши, мене́ ища́, заблу́ждшаго. Тѣ́мъ мно́гое Твое́ снизхожде́ніе, е́же на мя́, прославля́ю, Многоми́лостиве.

Ка́пли исцѣле́ній прія́лъ еси́ отъ пучи́ны благода́тей, отсю́ду преложи́лъ еси́ во́ду морску́ю моли́твою твое́ю, му́дре, на сла́дость, исцѣля́я ученику́ твоему́ жа́жду, досточу́дне.

Ника́коже да́же до ста́рости оскудѣ́лъ еси́, въ житіи́, богому́дре о́тче, въ пусты́няхъ и гора́хъ заблужда́я хотѣ́ніемъ, ища́й Бо́га, свѣтлостьми́ па́че у́мныхъ чуде́съ тя́ просвѣ́щша.

Бы́лъ еси́ смире́нъ и охужде́нъ, возноси́мь безстра́стіемъ. Тѣ́мже разрази́лъ еси́ возноше́нія де́моновъ, свѣти́льникъ мона́шествующихъ, о́тче, бы́въ, благоче́стно вѣ́рою восхваля́ющихъ тя́.

Богоро́диченъ: Стра́сти души́ моея́ исцѣли́, возраста́ющія ми́ преокая́нно, по́мыслъ просвѣти́, дале́че отгоня́щи тму́, Чи́стая, де́моновъ, оскорбля́ющихъ мя́ и всегда́ сѣ́ти дѣ́лающихъ ми́.

Инъ.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Насажде́нъ бы́въ при вода́хъ воздержа́нія, о́тче блаже́нне, лоза́ яви́лся еси́ благора́слена, благоче́стія гро́здіе предлага́ющая.

Ве́сь боже́ственъ бы́въ и духоно́сенъ, ве́сь изше́лъ еси́ къ Бо́гу, Иларіо́не всеблаже́нне, тѣ́мже со а́нгелы лику́еши при́сно.

На ка́мени вѣ́ры поста́вилъ еси́ стопы́ се́рдца твоего́ и непоколеби́мь пре́былъ еси́, прило́гъ де́монскихъ не ужаса́яся.

Богоро́диченъ: Херуви́мъ превы́шшую Тя́ и серафи́мъ пое́мъ, Пречи́стая: Его́же бо трепе́щутъ, носи́ла еси́ пло́тію Бо́га на́шего на руку́ Твое́ю.

Пѣ́снь 5.

Ирмо́съ: Просвѣще́ніе во тмѣ́ лежа́щихъ, спасе́ніе отча́янныхъ, Христе́ Спа́се мо́й, къ Тебѣ́ у́тренюю, Царю́ ми́ра, просвѣти́ мя сія́ніемъ Твои́мъ, ино́го бо ра́звѣ Тебе́ Бо́га не зна́ю.

Просвѣще́ніе, все́льшееся, преблаже́нне, Утѣ́шителя вну́трь души́ твоея́, веду́щую къ Ца́рству показа́ стезю́, въ не́йже ше́ствуя, де́моновъ ловле́нія и помраче́нія душе́внаго уклони́лся еси́.

Но́въ я́влься Іису́съ, богоно́се, со́лнца тече́ніе уста́вилъ еси́ мольбо́ю свѣтосія́нною, боже́ственными словесы́ украша́емь, блаже́нне, и чуде́съ заре́ю просвѣща́емь, и Бо́жіими чудесы́ мно́гими удобря́емь.

Въ кни́зѣ живо́тнѣй написа́лся еси́ досто́йно, напи́санная вся́ сконча́въ въ боже́ственныхъ кни́гахъ. Тѣ́мже вопію́ ти: рукописа́ніе, о́тче, зо́лъ мои́хъ твои́ми расто́ргни ко Всеви́дцу Бо́гу мольба́ми.

Богоро́диченъ: Стопа́мъ послѣ́дуя, собо́ръ преподо́бныхъ, изъ чре́ва Твоего́ Возсія́вшему неизрече́ннымъ рождество́мъ, Дѣ́во Ма́ти, съ небе́сными ли́ки сочта́ся, съ ни́миже моли́ся и испроси́ на́мъ очище́ніе, чту́щимъ Тя́.

Инъ.

Ирмо́съ: Утренююще, вопіе́мъ Ти́: Го́споди, спаси́ ны, Ты́ бо еси Бо́гъ на́шъ, ра́звѣ Тебе́, ино́го не вѣ́мы.

Око серде́чное неусы́пно въ боже́ственныхъ за́поведехъ соблю́лъ еси́ незазо́рно, сла́вне.

На го́ру добродѣ́телей воздержа́ніемъ, богоно́се, дѣ́тельно восте́клъ еси́ къ боговидѣ́нію восхожде́нія.

Еле́й расточи́въ ни́щимъ, отъ се́рдца, Иларіо́не преподо́бне, бога́тство небе́сное поче́рплъ еси́.

Богоро́диченъ: Сло́ва ковче́гъ Тя́ показа́, Богоро́дице, зако́на Госпо́дь, въ о́ньже несказа́нно всели́ся.

Пѣ́снь 6.

Ирмо́съ: Ко Го́споду отъ ки́та Іо́на возопи́: Ты́ мя возведи́ изъ глубины́ а́да, молю́ся, да я́ко Изба́вителю, во гла́сѣ хвале́нія, и́стины же ду́хомъ пожру́ Тебѣ́.

Не оскудѣ́лъ еси́, мно́гимъ приближа́яся подвиго́мъ: ноще́й бо, преподо́бне, и дне́й четы́редесять пребы́лъ еси́ стоя́, непрекло́ненъ ну́ждными ну́ждами естества́.

Умертви́въ твоя́ у́ды, я́же на земли́, чу́дне, живы́мъ дѣ́йствомъ исцѣле́нія обогати́лся еси́ и живе́ши на небесѣ́хъ, умерщвля́ющихъ всегда́ ду́шъ на́шихъ стра́сти исцѣля́я.

Житіе́ твое́, рыда́я, при́сно сконча́лъ еси́: жела́ніе бо боже́ственное тя́, о́тче, вну́трь распали́. И ны́нѣ на небесѣ́хъ обрѣ́лъ еси́ утѣше́ніе, съ преподо́бными ли́ки совокупля́яся.

Богоро́диченъ: Госпо́дь изъ Тебе́ пло́тію ражда́ется, всѣ́хъ Госпожу́ Тя́ тва́рей содѣ́лавъ, Его́же моли́, Чи́стая, облада́ющаго изба́вити врага́ ду́ши на́ша.

Инъ.

Ирмо́съ: Очи́сти мя́, Спа́се, мно́га бо беззако́нія моя́, и изъ глубины́ зо́лъ возведи́, молю́ся, къ Тебѣ́ бо возопи́хъ, и услы́ши мя́, Бо́же спасе́нія моего́.

Мы́сленнаго Голіа́ѳа, зло́бою вознося́щагося безору́жнымъ твои́мъ сплете́ніемъ, вѣ́рно пра́щею уби́лъ еси́ и сего́, исто́ргъ побѣди́тельная ору́жія, я́ко вельми́ хва́лящася, посѣ́клъ еси́.

Вели́кому въ добродѣ́телехъ поревнова́лъ еси́ Иларіо́ну и, сего́ духо́вно стопа́мъ возслѣ́дуя, воздержа́ніемъ, преподо́бне, верхо́венъ яви́лся еси́ и ста́ду воображе́ніе.

По́ты воздержа́тельными у́гліе стрѣ́лъ врага́ погаси́лъ еси́ до конца́ и, о́гнь вѣ́ры вже́гъ, попали́лъ еси́ невѣ́рія ерети́ческая шата́нія.

Богоро́диченъ: Зачала́ еси́ вои́стинну Бо́жія Сло́ва во утро́бѣ Твое́й и Сего́ па́че естества́, Всенепоро́чная, родила́ еси́. Его́же моли́твами умоли́ о и́же вои́стинну Богоро́дицу воспѣва́ющихъ Тя́.

Конда́къ Висаріо́на, гла́съ 2. Подо́бенъ: Тве́рдыя.

Вы́шнихъ си́лъ подража́въ, преподо́бне, о́бразомъ пти́цъ житіе́ пожи́лъ еси́, вре́менная въ забы́тіи положи́въ, непреста́ннымъ жела́ніемъ влеко́мъ къ небе́снымъ добро́тамъ Христа́ Царя́, до́ндеже Того́ дости́глъ еси́, Висаріо́не, моли́ непреста́нно о всѣ́хъ на́съ.

Пѣ́снь 7.

Ирмо́съ: Тѣ́лу злато́му прему́дрыя дѣ́ти не послужи́ша, и въ пла́мень са́ми поидо́ша, и бо́ги и́хъ обруга́ша, среди́ пла́мене возопи́ша и ороси́ я́ а́нгелъ: услы́шася уже́ у́стъ ва́шихъ моли́тва.

Обнови́въ ду́шу воздержа́нія благочести́вымъ, о́тче, ра́ломъ, кла́съ многопло́денъ воздѣ́лалъ еси́, въ жи́тницахъ соблюда́емь небе́сныхъ, и пита́еши вѣ́рно воспѣва́ющія: благослове́нъ еси́, Го́споди, Бо́же оте́цъ на́шихъ.

Свѣ́ту сраствори́вся невеще́ственному, чи́стъ свѣ́тъ бы́лъ еси́ и быстрину́ рѣчну́ю преше́лъ еси́, омочи́въ ника́коже стопы́ твоя́: по стезя́мъ же пра́вымъ, богому́дре Висаріо́не, ходи́лъ еси́, грѣха́ му́тныя изсуши́въ во́ды.

О, чу́до стра́шно! Ка́ко непива́емыя иногда́ во́ды піе́мы сотвори́лъ еси́ боже́ственнымъ назнамена́ніемъ и рѣчну́ю быстрину́ преше́лъ еси́, тече́ніе же удержа́лъ еси́ со́лнечное, Висаріо́не богому́дре, богозна́меніи свяще́нными велича́емь.

Богоро́диченъ: Му́дрость Бо́жія Ѵпоста́сная изъ Тебе́, Чи́стая, роди́ся, и зловѣ́рныя мудрецы́ потреби́, и умудри́ мно́жество мона́шествующихъ и преподо́бныхъ воспѣва́ти благода́тію: Благослове́нная, Яже Бо́га пло́тію ро́ждшая.

Инъ.

Ирмо́съ: Отъ Іуде́и доше́дше, о́троцы, въ Вавило́нѣ иногда́, вѣ́рою Тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.

Въ зла́цѣ вы́шняго Ца́рства ста́до, о́тче, воспита́лъ еси́ и, жезло́мъ уче́ній звѣ́ри отгна́въ ерети́ческія, пѣ́лъ еси́: оте́цъ на́шихъ Бо́же, благослове́нъ еси́.

Чуде́съ зарю́ просте́ръ, разоря́еши неду́гующихъ мглу́ и здра́вія лучи́ подае́ши дне́сь и цѣльбы́ зову́щимъ: оте́цъ на́шихъ Бо́же, благослове́нъ еси́.

Въ вы́шнюю вше́лъ еси́ бра́чную трапе́зу Царя́ Христа́, во оде́жду одѣ́янъ, досто́йно зову́щему. Тѣ́мъ и возле́глъ еси́, вопія́: оте́цъ на́шихъ Бо́же, благослове́нъ еси́.

Богоро́диченъ: Па́че естества́ и сло́ва Влады́ку всѣ́хъ родила́ еси́ и пита́еши отъ сосцу́ Твое́ю всѣ́мъ во бла́го вре́мя гото́вящаго трапе́зу. Его́же прилѣ́жно, Пречи́стая, о на́съ моли́.

Пѣ́снь 8.

Ирмо́съ: Въ пе́щь о́гненную ко отроко́мъ евре́йскимъ снизше́дшаго и пла́мень въ ро́су прело́жшаго Бо́га, по́йте дѣла́ я́ко Го́спода, и превозноси́те во вся́ вѣ́ки.

Свѣ́тъ тебѣ́ возсія́ я́вѣ, я́коже пра́веднику, и ра́дость, и весе́ліе, я́ко пла́кавшу, о́тче, на земли́ прилѣ́жно и стра́нну сея́ бы́вшу нестяжа́ніемъ и вся́цѣмъ злострада́ніемъ.

Ве́сь отню́дъ сраствори́вся коне́чными жела́ніи, преподо́бне о́тче, гра́ды же и пусты́ни во умиле́ніи мно́зѣ прохожда́лъ еси́, до́ндеже митропо́лію дости́глъ еси́ вы́шнюю, свѣ́тло украша́емь.

Утро возсія́лъ еси́ на́мъ свѣ́тлыми добродѣ́тели просвѣще́ніи, на́ша мы́сли просвѣща́я при́сно. Тѣ́мже твою́ свѣтоно́сную дне́сь, о́тче Висаріо́не, соверша́емъ па́мять.

Богоро́диченъ: Но́ва родила́ еси́ Сы́на, Собезнача́льна, Чи́стая, Отцу́ Безнача́льному, и обнови́ла еси́ еди́на обетша́вшее на́ше естество́ лю́тыми преступле́ніи, тѣ́мже Тя́ согла́сно пое́мъ, Богоро́дице.

Инъ.

Ирмо́съ: Седмери́цею пе́щь халде́йскій мучи́тель богочести́вымъ неи́стовно разжже́, си́лою же лу́чшею спасе́ны сія́ ви́дѣвъ, Творцу́ и Изба́вителю вопія́ше: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Сле́зными струя́ми страсте́й взыгра́нія и неуста́вныя по́мыслы потопи́лъ еси́ и пучи́на бы́лъ еси́ долготерпѣ́нія, преподо́бне, къ тишинѣ́ веды́й ти́хостнѣй вопію́щія: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Якоже терпѣли́ва адама́нта, воздержа́нію иму́ще твоя́ наказа́нія, Иларіо́не преподо́бне, сердца́ утвержда́емъ и страсте́й полки́ побѣжда́емъ, язы́комъ вѣ́рно вопію́ще: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Воздержа́ніемъ, преподо́бне, пло́ти благостра́стіе удержа́ніемъ изнури́въ, прему́дре, испо́лнилъ еси́ Ду́ха душе́вное дѣ́йство и къ безстра́стія стезя́мъ дости́глъ еси́, зовы́й: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Богоро́диченъ: Подъ кро́въ, Влады́чице, святы́хъ кри́лъ Твои́хъ вси́ прибѣга́емъ, озло́бленніи лю́тыми согрѣше́ніи, и напа́стьми, и скорбьми́. Тя́ бо Предста́тельницу иму́ще, вопіе́мъ: о́троцы, благослови́те, свяще́нницы, воспо́йте, лю́діе, превозноси́те во вся́ вѣ́ки.

Пѣ́снь 9.

Ирмо́съ: Отъ Бо́га Бо́га Сло́ва, неизрече́нною му́дростію прише́дшаго обнови́ти Ада́ма, я́дію въ тлѣ́ніе па́дшаго лю́тѣ, отъ Святы́я Дѣ́вы неизрече́нно воплоти́вшагося на́съ ра́ди, вѣ́рніи, единому́дренно пѣ́сньми велича́емъ.

Крѣ́пости низложи́лъ еси́ льсти́ваго, крѣ́постію препоя́санъ духо́вною, и яви́лся еси́ си́ленъ на стра́сти, преблаже́нне, сего́ ра́ди чуде́съ благода́ти пріе́мъ отъ Бо́га, вѣ́рнымъ исцѣлѣва́еши неисцѣ́льныя неду́ги.

Яви́ся твоя́ ве́лія сла́ва, я́же по Бо́зѣ, все́й тва́ри, просвѣща́я вѣ́рныя свяще́нными уподобле́ніи непоро́чнаго твоего́ житія́, богому́дре Висаріо́не, вои́стинну мона́ховъ украше́ніе и отце́въ верхо́вниче.

Стеня́, пла́ча и сѣ́туя, умиле́ніемъ сле́знымъ кропя́ зе́млю при́сно, о́тче богому́дре, соверша́лъ еси́, до́ндеже обрѣ́лъ еси́ боже́ственное утѣше́ніе, во гра́дѣ Бо́жіи со всѣ́ми святы́ми, преподо́бне, всели́вся.

Процвѣ́лъ еси́, о́тче, я́ко кри́нъ, добродѣ́тельными благово́ніи на́ша облагово́нствуя ду́ши. Тѣ́мже сотворя́емъ па́мять твою́, злосмра́дія согрѣше́ній про́симъ изба́витися тебе́ ра́ди, Висаріо́не, и вся́каго де́монскаго озлобле́нія.

Богоро́диченъ: Умовре́дно согрѣша́я, неиспра́вленъ пребыва́ю, мно́гимъ нечу́вствомъ объюродѣ́въ. Тѣ́мже зову́ Ти, Влады́чице: въ таковѣ́й ну́жди су́ща посѣти́ мя ны́нѣ и уврачу́й стра́сти смире́ннаго се́рдца моего́.

Инъ.

Ирмо́съ: Ужасе́ся о се́мъ не́бо, и земли́ удиви́шася концы́, я́ко Бо́гъ яви́ся человѣ́комъ пло́тски, и чре́во Твое́ бы́сть простра́ннѣйшее небе́съ. Тѣ́мъ Тя́, Богоро́дицу, а́нгеловъ и человѣ́къ чинонача́лія велича́ютъ.

Исто́чника тя́ чуде́съ я́ко вои́стинну Христо́съ показа́, блаже́нне, болѣ́зненныя скве́рны очища́юща страсте́й и неду́говъ болѣ́зни потопля́юща удо́бь. Тѣ́мже и рѣку́ тя́ душе́вныхъ очище́ній нарица́емъ вси́, преблаже́нне.

Процвѣ́тъ, я́ко фи́никсъ, духо́вно въ дому́ Бо́жіи, пресла́вне, пло́дъ прине́слъ еси́ воздержа́нія, я́коже сла́дость, и́мже сердца́, прему́дре, наслади́лъ еси́ ста́да твоего́ слове́снаго. Тѣ́мже и вѣнцы́ небе́сныя сла́вы, о́тче, воспрія́лъ еси́, приснопа́мятне.

Воздержа́нія показа́лся еси́, о́тче, пра́вило, и кро́тости яви́лся еси́ о́бразъ, и ти́хъ всѣ́мъ, Иларіо́не, наста́вникъ, и мою́ мольба́ми ко Го́споду укроти́ бу́рю страсте́й и пода́ждь прося́щему глубо́кій ми́ръ, я́ко да досто́йно ублажа́ю тя́.

Богоро́диченъ: Тя́ ору́жіе въ бѣда́хъ и напа́стехъ, приста́нище и стѣ́ну въ ско́рбѣхъ, и щи́тъ во бранѣ́хъ и́мамы разу́мный, и вели́ко очисти́лище въ лю́тыхъ согрѣше́ніихъ и нахожде́ніихъ. Тѣ́мъ Тя́, Богоро́дицу, по до́лгу чти́мъ и велича́емъ Рождество́ Твое́.

Источникъ: Минíа, мѣ́сяцъ Іу́ній. — Кíевъ: Въ тѵпогра́фіи Кíево-Пече́рской Ла́ѵры, 1893. — Л. 34 об. – 40 об.

/ Къ оглавленію раздѣла /


Наверхъ / Къ титульной страницѣ

0