Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - пятница, 15 декабря 2017 г. Сейчасъ на порталѣ посѣтителей - 7.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́нія въ 5-й де́нь.
Слу́жба свято́му страстоте́рпцу благовѣ́рному вели́кому кня́зю Игорю Черни́говскому и Кíевскому, въ креще́ніи Гео́ргію, во и́ноцѣхъ Гавріи́лу.

НА ВЕЛИЦѢЙ ВЕЧЕРНИ,
[Блаже́нъ му́жъ.., 1-й антифо́нъ.] На Го́споди воззва́хъ: стихи́ры, гла́съ 2:

Егда́ во оби́тель Ѳео́дорову заключи́лся еси́ и та́мо послуша́нію и́ноческому вда́лся еси́, тогда́ вра́гъ ро́да человѣ́ческаго поусти́ на тя́ лю́ди законопресту́пныя, и́же тя́, я́ко а́гнца незло́бива, никому́же зла́ сотво́рша, на убіе́ніе непра́веднѣ влеко́ша. Ты́ же Го́сподеви моли́лся еси́, подо́бяся первому́ченику Христо́ву Стефа́ну, и съ ни́мъ взыва́я: Го́споди, не поста́ви и́мъ грѣха́ сего́.

Егда́ колѣнопрекло́ннѣ предъ о́бразомъ Пречи́стыя моли́лся еси́, тогда́ убíйцы твои́, я́ко звѣ́ри ди́віе, съ я́ростію устреми́шася на тя́; ты́ же безро́потнѣ въ ру́цѣ и́хъ вда́лся еси́, стра́сти мно́зи и муче́нія отъ ни́хъ съ терпѣ́ніемъ пріе́мля, пра́ведную ду́шу свою́ Го́сподеви пре́далъ еси́.

Сла́ва, гла́съ 6:

Ра́дуется дне́сь гра́дъ Черни́говъ, въ хра́мѣ Спа́совѣ храня́щій свято́е и многострада́льное тѣ́ло твое́, и взыва́етъ ти́ съ любо́вію: страстоте́рпче кня́же Игоре, моли́ Христа́ Бо́га въ ми́рѣ глубо́цѣ страну́ на́шу соблюсти́, гра́дъ се́й сохрани́ти и всѣ́мъ спасти́ся.

И ны́нѣ, пра́здника. Аще по́стъ, догма́тикъ, гла́съ то́йже:

Кто́ Тебѣ́ не ублажи́тъ, [Пресвята́я Дѣ́во? Кто́ ли не воспое́тъ Твоего́ Пречи́стаго Рождества́? Безлѣ́тно бо отъ Отца́ возсія́вый Сы́нъ Единоро́дный, То́йже отъ Тебе́, Чи́стыя, про́йде, неизрече́нно вопло́щся: естество́мъ Бо́гъ Сы́й и естество́мъ бы́въ Человѣ́къ на́съ ра́ди; не во двою́ лицу́ раздѣля́емый, но во двою́ естеству́ несли́тно познава́емый. Того́ моли́, Чи́стая Всеблаже́нная, поми́ловатися душа́мъ на́шимъ].

Ма́лый вхо́дъ. Проки́менъ дне́. Пареміи́ му́ченическія.

Проро́чества Иса́іина чте́ніе.

Та́ко глаго́летъ Госпо́дь: вси́ язы́цы собра́шася вку́пѣ, и соберу́тся кня́зи отъ ни́хъ, кто́ возвѣсти́тъ сія́ въ ни́хъ? Или́ я́же отъ нача́ла, кто́ слы́шана сотвори́тъ ва́мъ? Да приведу́тъ свидѣ́тели своя́ и оправдя́тся, и да услы́шатъ, и да реку́тъ и́стину. Бу́дите Ми́ свидѣ́тели, и Азъ Свидѣ́тель, глаго́летъ Госпо́дь Бо́гъ, и отрокъ, его́же избра́хъ, да позна́ете и вѣ́руете Ми́, и разумѣ́ете, я́ко Азъ е́смь; пре́жде Мене́ не бы́сть и́нъ бо́гъ, и по Мнѣ́ не бу́детъ. Азъ е́смь Бо́гъ, и нѣ́сть ра́звѣ Мене́ спаса́яй. Азъ возвѣсти́хъ и спасо́хъ, уничижи́хъ, и не бѣ́ въ ва́съ чу́ждій. Вы́ Мнѣ́ свидѣ́тели, и Азъ Госпо́дь Бо́гъ. И еще́ отъ нача́ла Азъ е́смь, и нѣ́сть отъ ру́къ Мои́хъ избавля́яй; сотворю́, и кто́ отврати́тъ то? Си́це глаго́летъ Госпо́дь Бо́гъ, избавля́яй ва́съ Святы́й Изра́илевъ.

Прему́дрости Соломо́новы чте́ніе.

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе сокруше́ніе; они́ же су́ть въ ми́рѣ. Ибо предъ лице́мъ человѣ́ческимъ а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Яко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ возсія́ютъ и, я́ко и́скры по сте́блію, потеку́тъ: су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́новы чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Стихи́ры на стихо́внѣ, гла́съ 2. Подо́бенъ: До́ме Евфра́ѳовъ.

Блаже́нъ еси́, гра́де Кíеве, и свяще́нны сто́гны твоя́, напи́вшіяся честны́я кро́ве страстоте́рпца кня́зя Игоря, непра́ведное убіе́ніе та́мо пріе́мша.

Сти́хъ: Пра́ведникъ, я́ко фи́никсъ, процвѣте́тъ и я́ко ке́дръ, и́же въ Лива́нѣ, умно́жится.

Ра́дуйся, гра́де Черни́гове, весели́ся, святы́й до́ме Спа́совъ, вы́ бо сохраня́ете сокро́вище многоцѣ́нное, святы́я мо́щи страстоте́рпца Игоря, и́же непреста́нно мо́лится о душа́хъ на́шихъ.

Сти́хъ: Насажде́ни въ дому́ Госпо́дни, во дво́рѣхъ Бо́га на́шего процвѣту́тъ.

Тве́рдо страда́льчествующе и му́жественнѣ ско́рби терпя́ще, Го́спода лицезрѣ́лъ еси́, вѣнце́мъ му́ченическимъ украша́юща и во оби́тели небе́сныя соводворя́юща тя́.

Сла́ва, гла́съ 6:

Пріиди́те, мучениколю́бцы вси́, Христо́ва страстоте́рпца [тече́ніе] соверши́вша благоче́стно просла́вимъ, Игоря сла́внаго, се́й бо змíеву главу́ сокруши́ и кро́вію зе́млю освяти́, отъ су́щихъ здѣ́ преста́вися къ вѣ́чнымъ жили́щемъ и отъ Вседержи́тельныя руки́ подвиго́въ по́честь прія́тъ, про́ситъ очище́нія душа́мъ на́шимъ и ве́лія ми́лости.

И ны́нѣ, пра́здника. Аще по́стъ, богоро́диченъ, гла́съ то́йже:

Творе́цъ и Изба́витель [мо́й, Пречи́стая, Христо́съ Госпо́дь, изъ Твои́хъ ложе́снъ проше́дъ, въ мя́ оболкíйся, пе́рвыя кля́твы Ада́ма свободи́. Тѣ́мже Ти́, Всечи́стая, я́ко Бо́жіи Ма́тери же и Дѣ́вѣ, вои́стинну вопіе́мъ немо́лчно: ра́дуйся а́нгельски, ра́дуйся, Влады́чице, предста́тельство, и покро́ве, и спасе́ніе ду́шъ на́шихъ].

Тропа́рь, гла́съ 4:

Наста́ дне́сь всечестна́я па́мять страстоте́рпца, благовѣ́рнаго кня́зя Игоря, созыва́ющая лю́ди въ пречестны́й хра́мъ Спа́совъ, идѣ́же, ра́достно соше́дшеся, благочести́выхъ мно́жество моли́твенно пра́зднуютъ святу́ю па́мять твою́ и съ вѣ́рою взыва́ютъ ти́: моли́ся, свя́те, странѣ́ Россíйстѣй, гра́ду Черни́гову и всѣ́мъ правосла́внымъ христіа́номъ въ ми́рѣ и благоде́нствіи спасти́ся.

Сла́ва, и ны́нѣ, [пра́здника, или́] богоро́диченъ:

Еже отъ вѣ́ка утае́нное, [и а́нгеломъ несвѣ́домое та́инство: Тобо́ю, Богоро́дице, су́щимъ на земли́ яви́ся, Бо́гъ въ несли́тномъ соедине́ніи воплоща́емь, и кре́стъ во́лею на́съ ра́ди воспріи́мъ, и́мже воскреси́въ первозда́ннаго, спасе́ отъ сме́рти ду́ши на́ша].


НА УТРЕНИ,
[Тропа́рь пра́здника, два́жды. Сла́ва, свята́го. И ны́нѣ, пра́здника.
Аще по́стъ: Тропа́рь свята́го, два́жды. Сла́ва, и ны́нѣ, богоро́диченъ.]

По 1-й каѳи́змѣ сѣда́ленъ, гла́съ 1:

Ца́рство земно́е во́льнѣ оста́вивъ, страстоте́рпче, ю́же на небесѣ́хъ возжела́лъ еси́ сла́ву, болѣ́зни претерпѣ́лъ еси́ и ну́ждную сме́рть: тѣ́мже дне́сь всесвяту́ю твою́ па́мять пра́зднуемъ, Христу́ принося́ще хвалу́, преблаже́нне Игоре. [Два́жды.]

Сла́ва, и ны́нѣ, пра́здника. Аще по́стъ, богоро́диченъ:

Гавріи́лу вѣща́вшу [Тебѣ́, Дѣ́во, ра́дуйся, со гла́сомъ воплоща́шеся всѣ́хъ Влады́ка въ Тебѣ́, святѣ́мъ киво́тѣ, я́коже рече́ пра́ведный Дави́дъ, яви́лася еси́ ши́ршая небе́съ, поноси́вши Зижди́теля Твоего́: сла́ва Все́льшемуся въ Тя́; сла́ва Проше́дшему изъ Тебе́; сла́ва Свободи́вшему на́съ Рождество́мъ Твои́мъ].

По 2-й каѳи́змѣ сѣда́ленъ, гла́съ 4:

Тече́ніе соверши́въ и́стинное, мучи́телей всю́ крѣ́пость побѣди́лъ еси́ и прія́лъ еси́ вѣне́цъ отъ руки́ Вседержи́теля, Игоре всеблаже́нне, и показа́лся еси́ а́нгеломъ соприча́стникъ. [Два́жды.]

Сла́ва, и ны́нѣ, пра́здника. Аще по́стъ, богоро́диченъ:

Сло́во Отчее, Христа́ [Бо́га на́шего, отъ Тебе́ воплоти́вшагося, позна́хомъ, Богоро́дице Дѣ́во, еди́на Чи́стая, еди́на Благослове́нная, тѣ́мъ непреста́нно Тя́ воспѣва́юще, велича́емъ].

Велича́ніе:

Велича́емъ тя́, страстоте́рпче святы́й, кня́же Игоре, и чте́мъ святу́ю па́мять твою́, ты́ бо мо́лиши о на́съ Христа́, Бо́га на́шего.

Псало́мъ избра́нный: Бо́гъ на́мъ прибѣ́жище и си́ла...

По поліеле́и сѣда́ленъ, гла́съ 4:

Многообра́зными муче́ніи лю́тіе мучи́теліе ка́зни злѣ́й преда́ша многострада́льное тѣ́ло твое́, богомы́сленне кня́же Игоре, вся́ бо сія́ терпѣ́лъ еси́, я́ко ино́му стра́ждущу, ожида́я бу́дущаго воздая́нія и безсме́ртныя жи́зни. [Два́жды.]

Сла́ва, и ны́нѣ, пра́здника. Аще по́стъ, богоро́диченъ:

Къ Богоро́дицѣ прилѣ́жно ны́нѣ притеце́мъ, [грѣ́шніи и смире́нніи, и припаде́мъ, въ покая́ніи зову́ще изъ глубины́ души́: Влады́чице, помози́, на ны́ милосе́рдовавши, потщи́ся, погиба́емъ отъ мно́жества прегрѣше́ній, не отврати́ Твоя́ рабы́ тщи́, Тя́ бо и еди́ну наде́жду и́мамы].

[Та́же степе́нна, 1-й антифо́нъ, 4-го гла́са.] Проки́менъ, [гла́съ 4]: Пра́ведникъ, я́ко фи́никсъ процвѣте́тъ,* [я́ко ке́дръ, и́же въ Лива́нѣ, умно́жится. Сти́хъ: Насажде́ни въ дому́ Госпо́дни, во дво́рѣхъ Бо́га на́шего процвѣту́тъ. Вся́кое дыха́ніе...] Ева́нгеліе отъ Матѳе́я, зача́ло 36.

Стихи́ра ева́нгельская, гла́съ 6:

Ра́дуется дне́сь гра́дъ Черни́говъ, [въ хра́мѣ Спа́совѣ храня́щій свято́е и многострада́льное тѣ́ло твое́, и взыва́етъ ти́ съ любо́вію: страстоте́рпче кня́же Игоре, моли́ Христа́ Бо́га въ ми́рѣ глубо́цѣ страну́ на́шу соблюсти́, гра́дъ се́й сохрани́ти и всѣ́мъ спасти́ся].

Кано́нъ [пра́здника или́] Богоро́дицы [на 6] и свята́го на 8, гла́съ 8.
Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Во́ду нече́стія тимѣ́нну оста́вивши, къ водѣ́ чисти́тельнѣй прите́клъ еси́, свя́те Игоре, и на́ша очи́сти сердца́ чи́сто пѣ́ти твоя́ страда́нія.

Водо́ю креще́нія омы́вшись, перворо́днаго грѣха́ изба́вился еси́ и чи́стому Влады́цѣ Христу́ присво́ился еси́, Ему́же и на́съ чи́сто присво́й моли́твами твои́ми.

Въ водѣ́ Потопи́вшему змíя лука́ваго подо́бящися, кро́вію твое́ю страда́льческою вра́жію погрузи́лъ еси́ си́лу, страстоте́рпче, отъ него́же и на́мъ изба́витися Спа́са умоли́.

Богоро́диченъ: Во́ду сле́зъ очища́ющую, Пречи́стая, пода́ждь ми́ и, очи́стивши мя́ отъ ка́ла беззако́ній, чи́ста предста́ви, Богороди́тельнице, Сы́ну Твоему́ и Бо́гу.

Пѣ́снь 3.

Ирмо́съ: Небе́снаго кру́га Верхотво́рче, Го́споди, и Це́ркве Зижди́телю, Ты́ мене́ утверди́ въ любви́ Твое́й, жела́ній кра́ю, вѣ́рныхъ утвержде́ніе, еди́не Человѣколю́бче.

Небе́снаго кру́га Верхотво́рцу все́ житіе́ свое́ отда́вши, возлюби́лъ еси́ Того́ до конца́; сподо́би и на́съ моли́твами твои́ми, страстоте́рпче, люби́ти Го́спода до конца́ дне́й на́шихъ.

Небе́сныя жи́зни жела́я, въ земнѣ́мъ житіи́ твое́мъ вся́ пренебре́глъ еси́; сподо́би и на́съ, свя́те, моли́твами твои́ми небе́сныя жи́зни сподо́битися.

Небе́снаго черто́га жела́ющи, чистоту́ дѣ́вства твоего́ соблю́лъ еси́ и ны́нѣ съ дѣ́вственники въ небе́сныхъ черто́зѣхъ лику́еши.

Богоро́диченъ: Небе́снаго Творца́, Богоро́дице Всепѣ́тая, ро́ждши, небе́съ простра́ннѣйшая яви́лася еси́; мене́ отъ простра́ннаго пути́ поги́бельна укло́нши, на небе́сный пу́ть наста́ви, молю́ся.

Сѣда́ленъ, гла́съ 5:

Добродѣ́тельными свѣтлостьми́ просвѣща́емь и муче́нія свѣ́томъ украша́емь, па́че со́лнца, прему́дре, сія́еши тве́рдѣ и просвѣща́еши вои́стину творя́щихъ вѣ́рно па́мять твою́ свѣтоно́сную, пресла́вный страстоте́рпче Игоре, спаса́й моли́твами твои́ми. [Два́жды.]

Сла́ва, и ны́нѣ, пра́здника. Аще по́стъ, богоро́диченъ:

Ужа́сно чу́до зача́тія [и несказа́ненъ о́бразъ Рождества́ въ Тебѣ́ позна́ся, Приснодѣ́во Чи́стая, ужаса́етъ мо́й у́мъ и удивля́етъ помышле́ніе, сла́ва Твоя́, Богоро́дице, во всѣ́хъ простре́ся, ко спасе́нію ду́шъ на́шихъ].

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Услы́шавъ, Игоре, небеса́ повѣ́дающа сла́ву Бо́жію, на земли́ Бо́га сла́вити возжелѣ́лъ еси́, Его́же сла́вы и на́съ сподо́би.

Услы́шавъ, я́ко врази́ твои́ воста́ша на тя́, не убоя́лся еси́ свирѣ́пства и́хъ, но кро́тцѣ въ ру́цѣ и́хъ скве́рныя вда́лся еси́, Го́сподеви взыва́я: не поста́ви и́мъ грѣха́ сего́.

Услы́шавши преще́нія вра́жеская и му́ки отъ ни́хъ терпя́ще, непоколеби́мъ пребы́лъ еси́; и мене́ непоколеби́ма въ добродѣ́телехъ сотвори́.

Богоро́диченъ: Услы́ши, Пречи́стая Влады́чице, моле́ніе мое́, и изба́ви мя́ отъ зо́лъ, и гла́съ, благослове́нныхъ призыва́ющій [въ] Ца́рство, слы́шати удосто́й.

Пѣ́снь 5.

Ирмо́съ: Просвѣти́ на́съ повелѣ́ніи Твои́ми, Го́споди, и мы́шцею Твое́ю высо́кою Тво́й ми́ръ пода́ждь на́мъ, Человѣколю́бче.

Просвѣти́въ стезю́ жи́зни твоея́ свѣ́томъ богоразу́мія, Христа́ Го́спода вседу́шнѣ возлюби́лъ еси́; сподо́би и мене́, страстоте́рпче, въ си́хъ бы́ти подража́телемъ.

Просвѣща́хуся вѣ́рніи лю́діе, ви́дяще тя́, нестерпи́мыя му́ки до́бльственнѣ терпя́ща, сподо́би и мене́, страда́льче, бы́ти терпѣли́ву.

Просвѣти́ мя, о Игоре, омраче́ннаго мгло́ю грѣхо́вною, и свѣ́томъ невече́рнимъ осіява́тися, свѣ́тлый му́чениче, молю́ся, сотвори́.

Богоро́диченъ: Просвѣти́ла еси́ потемне́нное естество́, Богоро́дице, Свѣ́тъ Истинный ро́ждши, тѣ́мже и мене́, свѣ́томъ просвѣти́вши, отъ мра́чныхъ вра́гъ свободи́.

Пѣ́снь 6.

Ирмо́съ: Моли́тву пролію́ ко Го́споду и Тому́ возвѣщу́ печа́ли моя́, я́ко зо́лъ душа́ моя́ испо́лнися и живо́тъ мо́й а́ду прибли́жися, и молю́ся, я́ко Іо́на: отъ тли́, Бо́же, возведи́ мя.

Моли́тву твою́ страда́льческую услы́шавъ Христо́съ, Игоре, крѣ́пость и си́лу ко страда́ніямъ тебѣ́ подаде́; сподо́би и мя́ моли́твами твои́ми въ страда́ніихъ жите́йскихъ бы́ти тве́рду.

Моли́твою предъ о́бразомъ Пречи́стыя себе́ укрѣпи́въ, изше́лъ еси́ ко враго́мъ твои́мъ, и́щущимъ тя́, и, я́ко а́гнецъ незло́бивъ, пострада́лъ еси́ отъ ни́хъ, непра́ведно умерщвля́емь.

Моли́тву вся́къ принося́й ти́ съ вѣ́рою, страда́льче, душе́вныхъ страсте́й и тѣле́сныхъ исцѣле́ніе ско́ро пріе́млетъ; е́же и на́мъ бога́тно подава́й, мо́лимся.

Богоро́диченъ: Моли́тву на́шу пріими́, Пречи́стая, и моли́твою Ти́ всемо́щною изба́вити на́съ вра́гъ ви́димыхъ и неви́димыхъ, отъ грѣхо́въ же и вся́кія му́ки моли́, Его́же родила́ еси́, Человѣколю́бца Бо́га.

Конда́къ, гла́съ 6:

Измѣни́лъ еси́ земна́го княже́нія сла́ву во и́ночества о́бразъ смире́нный и, страда́льчески земно́е житіе́ сконча́въ, ны́нѣ на небесѣ́хъ ра́дуешися, усе́рднѣ моля́ся о чту́щихъ тя́, Игоре, страда́льцевъ похвало́.

Инъ конда́къ, гла́съ 8:

Кня́жескую діаде́му обагри́лъ еси́ кро́вію твое́ю, богому́дре страстоте́рпче Игоре, за ски́птръ кре́стъ въ ру́ку пріи́мъ, яви́лся еси́ побѣдоно́сецъ, и же́ртву непоро́чну Влады́цѣ прине́слъ еси́ себе́. Яко бо а́гнецъ незло́бивъ, отъ ра́бъ убіе́нъ бы́лъ еси́, и ны́нѣ, ра́дуяся, предстои́ши Святѣ́й Тро́ицѣ, моли́ся спасти́ся душа́мъ на́шимъ.

[Икосъ:

Ангельски пожи́вше на земли́, отъ ю́ности бо возлюби́лъ еси́ Боже́ственное уче́ніе и сему́ послѣ́довавъ до́брымъ житіе́мъ, немо́лчно прославля́лъ еси́ и́мя Госпо́дне чте́ніемъ святы́хъ кни́гъ и пѣ́ніемъ церко́внымъ. Сего́ ра́ди тебѣ́, на небеси́ и на земли́ просла́вленному, вопіе́мъ си́це: ра́дуйся, отъ рожде́нія твоего́ Бо́гомъ избра́нный; ра́дуйся, сѣ́мя сло́ва Бо́жія отъ ю́ности воспрія́вый; ра́дуйся, вели́кій уго́дниче Бо́жій, благочести́вую жи́знь на земли́ возлюби́вый; ра́дуйся, отъ Царя́ Небе́снаго, вѣне́цъ му́ченическій пріе́мый; ра́дуйся, за Сладча́йшаго Іису́са Христа́ ду́шу твою́ положи́вый; ра́дуйся, путе́мъ тру́днымъ и тѣ́снымъ жи́знь земну́ю сконча́вый. Ра́дуйся, святы́й благовѣ́рный кня́же Игоре, во смире́ніи за и́стину терпя́щимъ ско́рый помо́щниче.]

Пѣ́снь 7.

Ирмо́съ: Отроцы евре́йстіи въ пещи́ попра́ша пла́мень дерзнове́нно и на ро́су о́гнь преложи́ша, вопію́ще: благослове́нъ еси́, Го́споди Бо́же, во вѣ́ки.

Дѣ́ти евре́йскія а́нгелъ отъ огня́ неопа́льна сохрани́вый, и тебе́, Игоре, во страда́ніи укрѣпи́, пою́ща: благослове́нъ еси́, Го́споди Бо́же, во вѣ́ки.

Дѣ́тское игра́лище вмѣня́ющи му́ки, не пощади́лъ еси́ тѣ́ла твоего́, но стра́сти му́жественнѣ терпя́щи, пѣ́лъ [еси́]: благослове́нъ еси́, Го́споди Бо́же, во вѣ́ки.

Дѣ́темъ му́чимымъ подража́я, Игоре, хвалю́ и а́зъ Христа́, да́вшаго тебѣ́ крѣ́пость; ты́ же мя́, на по́двигъ добродѣ́телей укрѣ́пльши, сподо́би пѣ́ти съ тобо́ю: благослове́нъ еси́, Го́споди Бо́же, во вѣ́ки.

Богоро́диченъ: Дѣторо́дію Твоему́, Дѣ́вою и по Рождествѣ́ пребы́вшу, дивлю́ся, Богоро́дице. Удиви́ у́бо и на мнѣ́ ми́лость Сы́на Твоего́, да поми́лованъ Тобо́ю, пою́: благослове́нъ еси́, Го́споди Бо́же, во вѣ́ки.

Пѣ́снь 8.

Ирмо́съ: Побѣди́тели мучи́теля и пла́мене благода́тію Твое́ю бы́вше, за́повѣдемъ Твои́мъ зѣло́ прилежа́ще, о́троцы вопія́ху: благослови́те, вся́ дѣла́ Госпо́дня, Го́спода.

Побѣди́тель яви́лся еси́, сла́вне Игоре, враго́въ, му́чащихъ тя́, и́бо въ лю́тыхъ му́кахъ стражда́, непреста́нно взыва́лъ еси́: благослови́те, вся́ дѣла́ Госпо́дня, Го́спода.

Побѣди́лъ еси́ му́жествомъ твои́мъ, страстоте́рпче сла́вне Игоре, вся́ мучи́тельская ухищре́нія. Моли́ у́бо Влады́ку Христа́, мо́лимъ тя́, всѣ́мъ вѣ́рнымъ на враги́ побѣ́ду да́ти, пою́щимъ: благослови́те, вся́ дѣла́ Госпо́дня, Го́спода.

Побѣди́телемъ жестокосе́рдыхъ убíйцъ яви́лся еси́, сла́вне Игоре: они́ бо небе́снымъ огне́мъ во а́дскій о́гнь низведо́шася, ты́ же на не́бо возше́лъ еси́, идѣ́же ны́нѣ со а́нгелы пое́ши: благослови́те, вся́ дѣла́ Госпо́дня, Го́спода.

Богоро́диченъ: Побѣди́, Пречи́стая, враго́въ ви́димыхъ и неви́димыхъ, низложи́ти на́съ тща́щихся, и страсте́й мя́ вся́кихъ изба́ви, да пою́ торже́ственнѣ: благослови́те, вся́ дѣла́ Госпо́дня, Го́спода.

Пѣ́снь 9.

Ирмо́съ: Вои́стинну Богоро́дицу, Тя́ исповѣ́дуемъ, спасе́нніи Тобо́ю, Дѣ́во Чи́стая, съ безпло́тными ли́ки Тя́ велича́юще.

Вои́стину Бо́га исповѣ́дующи, страстоте́рпче, черто́гъ небе́сный наслѣ́довалъ еси́, его́же и на́съ сподо́би, да съ тобо́ю Христа́ вѣ́чно велича́емъ.

Вои́стину на тебѣ́, Игоре блаже́нне, испо́лнися Христо́во прорече́ніе: вся́ претерпѣ́вый до конца́ спасе́нъ бу́детъ; ны́нѣ бо со всѣ́ми спасе́нными Христа́ вѣ́чно велича́еши.

Вои́стину никто́же притека́яй къ тебѣ́, страстоте́рпче, то́щь благода́ти твоея́ отхо́дитъ, ея́же и мене́ испо́лни, да тя́ велича́ю.

Богоро́диченъ: Вои́стину Истиннаго Бо́га пло́тію, Богоро́дице, родила́ еси́, Его́же ми́лостива на́мъ въ де́нь Суда́ содѣ́лай, да безконе́чно съ Ни́мъ Тя́ велича́емъ.

Свѣти́ленъ:

Якоже со́лнце, свѣтоно́сно возсія́ ны́нѣ, страстоте́рпче, па́мять твоя́, вся́ вѣ́рныя веселя́ще, и́же моли́твенно взыва́ютъ ти́: моли́ся прилѣ́жно, во е́же спасти́ся на́мъ. [Два́жды.]

[Сла́ва, и ны́нѣ, пра́здника. Аще по́стъ,] богоро́диченъ:

Держа́внымъ Твои́мъ покро́вомъ, Чи́стая, на́съ, рабо́въ Твои́хъ, отъ навѣ́та вра́жія сохраня́й всегда́ невреди́мыхъ, Тя́ бо еди́ну стяжа́хомъ прибѣ́жище въ бѣда́хъ.

На хвали́техъ стихи́ры, гла́съ 8:

Ра́дуйся, страстоте́рпче Христо́въ Игоре, сла́ву мíра сего́ ни во что́же бо вмѣни́лъ еси́ и отъ единонадеся́таго часа́ житія́ твоего́ во и́ночествѣ до́брѣ Го́споду послужи́лъ еси́; и ны́нѣ съ му́ченики и преподо́бными престо́лу Бо́жію предстои́ши, моли́ся прилѣ́жно о душа́хъ на́шихъ.

Ра́дуйся, страстоте́рпче Христо́въ Игоре, гра́да Черни́гова похвало́ и всея́ земли́ Россíйскія свяще́нное украше́ніе, неви́нно кро́вь свою́ пролія́вый, и моли́ся прилѣ́жно о душа́хъ на́шихъ.

Сла́ва, гла́съ 6:

Дне́сь гра́дъ сла́вный Черни́говъ просвѣща́ется страстоте́рпца заря́ми и святы́й до́мъ Спа́совъ, цвѣ́ты украша́емь, вопіе́тъ ти́, уго́дниче Христо́въ: не преста́й моли́ти о всѣ́хъ, пра́зднующихъ любо́вію святу́ю па́мять твою́.

И ны́нѣ, пра́здника. Аще е́сть по́стъ, пое́мъ:

Богоро́дице, Ты́ еси́ лоза́ и́стинная, [возрасти́вшая на́мъ Пло́дъ живота́, Тебѣ́ мо́лимся: моли́ся, Влады́чице, со святы́ми апо́столы поми́ловати ду́ши на́ша].

Вели́кое славосло́віе. [Ектеніи́ и отпу́стъ.]



НА ЛИТУРГІИ,

Блаже́нны отъ кано́на, пѣ́снь 3-я и 6-я. Проки́менъ, гла́съ 7: Возвесели́тся пра́ведникъ о Го́сподѣ* и упова́етъ на Него́. Сти́хъ: Услы́ши, Бо́же, гла́съ мо́й, внегда́ моли́ти ми ся къ Тебѣ́. Апо́столъ Дѣя́ній, зача́ло 17 съ престу́пкою, коне́цъ: Не поста́ви и́мъ грѣха́ сего́. И сія́ ре́къ, у́спѣ [гл. 6, ст. 8-12, гл. 7, ст. 58-60]. Аллилу́ія, гла́съ 4: Пра́ведникъ, я́ко фи́никсъ, процвѣте́тъ, [я́ко ке́дръ, и́же въ Лива́нѣ, умно́жится. Сти́хъ: Насажде́ни въ дому́ Госпо́дни, во дво́рѣхъ Бо́га на́шего процвѣту́тъ.] Ева́нгеліе отъ Іоа́нна, зача́ло 52. Прича́стенъ: Въ па́мять вѣ́чную бу́детъ пра́ведникъ, [отъ слу́ха зла́ не убои́тся].

Источникъ: Краткое житіе святаго благовѣрнаго Игоря, князя Черниговскаго и Кіевскаго. Служба благовѣрному князю Игорю Черниговскому. — Собралъ и составилъ настоятель Спасо-Преображенскаго собора іеромонахъ Іона (Пироговъ). — Черниговъ: Изданіе Спасо-Преображенскаго собора, 2002. — С. 19-32.

/ Къ оглавленію раздѣла /


Наверхъ / Къ титульной страницѣ

0