Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - понедѣльникъ, 1 мая 2017 г. Сейчасъ на порталѣ посѣтителей - 14.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́нія в 5-й де́нь.
Преподо́бнаго отца́ на́шего Петра́ Кори́шскаго.

НА МАЛѢЙ ВЕЧЕРНИ,
На Го́споди воззва́хъ: стихи́ры, гла́съ 8:

Зако́номъ Христо́вымъ научи́вся,* небре́глъ еси́ о пи́щи и о оде́жди,* но небе́сныхъ пти́цъ дѣ́ло испо́лнивъ, о́тче,* и въ пеще́ру всели́вся,* безъ пи́щи и безъ покро́ва* на мно́га лѣ́та* пребы́лъ еси́, преподо́бне,* тѣ́мже во свѣ́тѣ изы́де пра́вда твоя́,* и, я́коже полу́дне,* о́тче, возсія́лъ еси́.

На ра́ло возложи́лъ еси́* ру́ки своя́, всече́стне,* дѣ́лая всегда́ боже́ственная,* и не возврати́лся еси́, зря́ вспя́ть,* но бы́лъ еси́ упра́вленъ во Ца́рствіе Христа́,* вопло́щшагося Бо́га,* во спасе́ніе ду́шъ на́шихъ.

Въ лодіи́ тѣле́снѣй вози́мъ,* кро́ткими дыха́ніи Кро́ткаго Ду́ха* легко́ преше́лъ еси́* жите́йскую пучи́ну, му́дре,* и на Би́серѣ многоцѣ́ннѣмъ* твоя́ имѣ́нія прода́въ* и обрѣ́тъ Его́, въ себѣ́ удержа́лъ еси́,* блаже́нъ бы́въ* боже́ственными добро́тами Его́.

Преподо́бенъ и че́стенъ* свѣти́льникъ боже́ственный и свѣтоно́сный* подъ спу́домъ жите́йскія толстоты́* никогда́же скрыва́ется,* но на версѣ́ полага́етъ его́* высо́кихъ чуде́съ Человѣколю́бецъ.* Того́ моли́твами, Христе́,* да́руй лю́демъ Твои́мъ ве́лію ми́лость.

Сла́ва, гла́съ 1:

Наста́, богоно́се, со́лнца свѣтлѣ́йшій тво́й пра́здникъ, озаря́етъ приходя́щія къ тебѣ́ вѣ́рою, и безсме́ртіемъ облагоуха́етъ, и душа́мъ источа́етъ исцѣле́нія, Пе́тре преподо́бне, моли́твенниче о душа́хъ на́шихъ.

И ны́нѣ, богоро́диченъ, гла́съ то́йже:

Святѣ́йшая святы́хъ всѣ́хъ си́лъ, Честнѣ́йшая всея́ тва́ри, Богоро́дице, Влады́чице мíра, спаси́ ны, Спа́са ро́ждшая, отъ прегрѣше́ній тмори́чныхъ и бѣ́дъ, я́ко Блага́я, моли́твами Твои́ми.

На стихо́внѣ стихи́ры, гла́съ 2. Подо́бенъ: До́ме Евфра́ѳовъ.

Яви́лся еси́* отъ ма́тернихъ пеле́нъ* сосу́дъ свяще́нъ Бо́гу,* богоно́се о́тче на́шъ Пе́тре,* и до́мъ Пресвята́го Ду́ха.

Сти́хъ: Честна́ предъ Го́сподемъ* сме́рть преподо́бныхъ Его́.

Нося́ на ра́мѣ* свое́мъ, Пе́тре,* Кре́стъ Госпо́день,* бѣсо́вская мечта́нія до конца́,* о́тче на́шъ,* потреби́лъ еси́.

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

Ле́сти лука́выхъ бѣсо́въ* обличи́лъ еси́* кре́стною си́лою,* му́дростію же вѣ́ры* уясни́лъ еси́ сла́ву Христо́ву,* Пе́тре, о́тче на́шъ.

Сла́ва, гла́съ 8, самогла́сенъ:

Пріиди́те дне́сь, благовѣ́рніи лю́діе, и притеце́мъ преподо́бному Петру́, отцу́ на́шему, я́ко да свои́ми моли́твами изба́витъ всѣ́хъ на́съ отъ тлѣтво́рныхъ страсте́й и искуше́ній лука́выхъ и испро́ситъ ро́ду на́шему на враги́ побѣ́ды, плѣне́ннымъ свобожде́ніе, бра́тіямъ любо́вь, мíру устрое́ніе, Це́рквамъ соедине́ніе и душа́мъ на́шимъ ве́лію ми́лость.

И ны́нѣ, богоро́диченъ, гла́съ то́йже:

Влады́чице, пріими́ моли́твы ра́бъ Твои́хъ и изба́ви на́съ отъ вся́кія ну́жды и печа́ли.

Тропа́рь пи́санъ на вели́цѣй вече́рни.



НА ВЕЛИЦѢЙ ВЕЧЕРНИ,
Блаже́нъ му́жъ.., 1-й антифо́нъ. На Го́споди воззва́хъ: стихи́ры, гла́съ 8:

Преподо́бне о́тче богому́дре,* благи́ми нра́вы украси́вся,* Христу́ прилѣпи́лся еси́ отъ ю́ности,* плотскíя стра́сти умертви́въ воздержа́ніемъ,* глаго́ловъ и зако́новъ Бо́жіихъ* испо́лнитель бы́въ,* испо́лнился еси́* боже́ственныхъ даро́въ и чуде́съ,* и всѣ́мъ лучи́ бога́тно испусти́лъ еси́,* и ны́нѣ моли́ спасти́ся душа́мъ на́шимъ. [Два́жды.]

Преподо́бне о́тче пресла́вне,* со́вѣсть имѣ́лъ еси́ бла́гу* и о́ко серде́чное,* взира́ющее къ Бо́гу.* Крѣ́постію Христа́ возмо́гъ,* держа́ву вра́жію* и си́лу низложи́лъ еси́* и, ве́сь прилѣжа́ Вседержи́телю,* све́рглъ еси́ на зе́млю велехва́льнаго* изря́дными дѣ́лы твои́ми,* и ны́нѣ моли́ спасти́ся душа́мъ на́шимъ.

Преподо́бне о́тче досточу́дне,* ду́шу твою́ хра́мъ Свято́му Ду́ху содѣ́ялъ еси́,* и бы́лъ еси́ наслѣ́дникъ го́рняго Ца́рствія* съ вы́шними си́лами:* многоболѣ́зненныя стра́сти всегда́ врачу́еши* приступа́ющихъ къ тебѣ́,* благода́ть бо пріи́мъ отъ Го́спода* содѣва́ти зна́менія и чудеса́,* и ны́нѣ моли́ спасти́ся душа́мъ на́шимъ.

Ины стихи́ры, гла́съ то́йже:

Собра́вшеся я́ко вѣ́рное Христо́во ста́до* къ ковче́гу преблаже́ннаго отца́ на́шего Петра́,* благоговѣ́йно поклони́мся,* хвалу́ досто́йную въ пѣ́снѣхъ воздая́ ему́* и моля́ся усе́рднѣ,* да пода́стъ всѣ́мъ вѣ́рнымъ* исцѣле́ніе благода́тію Го́спода,* Ему́же благоче́стно покланя́емся. [Два́жды.]

Пріиди́те, новосвяще́нніи лю́діе,* избра́нное ста́до Христо́во,* да просла́вимъ па́мять* преблаже́ннаго отца́ на́шего Петра́,* въ верте́пѣ возсія́вшаго* и къ на́мъ прише́дшаго,* и́же и по сме́рти дае́тъ слѣпы́мъ зра́къ,* хромы́мъ — хожде́ніе, глухи́мъ — слу́хъ,* согбе́ннымъ — исправле́ніе,* бѣ́сы же изгони́тъ* и, ду́хомъ предстоя́ Влады́цѣ,* мо́лится о спасе́ніи ду́шъ на́шихъ.

Ихже о́ко не ви́дѣ и у́хо не слы́ша,* ниже́ на се́рдцѣ человѣ́ка взы́де,* я́же угото́ва Бо́гъ возлю́бльшимъ Его́,* си́хъ ты́ возжелѣ́лъ еси́,* о́тче Пе́тре богодухнове́нне,* возненави́дѣлъ еси́ мірско́е пристра́стіе,* къ Бо́гу еди́ному прите́клъ еси́,* и, Того́ бла́гости при́сно насыща́яся,* моли́ся Ему́ прилѣ́жно,* спасти́ся душа́мъ на́шимъ.

Сла́ва, гла́съ 2:

Преподо́бне о́тче Пе́тре, а́ще и въ послѣ́днихъ вре́менѣхъ яви́лся еси́, оба́че житіе́ твое́ и исправле́нія ра́вно дре́внимъ отце́мъ показа́ся. Тѣ́мже Христо́съ, вѣ́дый твоя́ по́двиги и души́ твоея́ чистоту́, воспросла́ви тя́ на земли́, да и мы́ къ подо́бной подвиго́въ твои́хъ ре́вности воспря́немъ и сподо́бимся на небесѣ́хъ съ тобо́ю дости́гнути вѣ́чнаго блаже́нства.

И ны́нѣ, богоро́диченъ: [Пре́йде сѣ́нь зако́нная...]
Вхо́дъ. Проки́менъ дне́ и чте́нія три́ преподо́бническая.

Прему́дрости Соломо́ни чте́ніе.

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе.

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На литíи стихи́ры, самогла́сны, гла́съ 1:

Пріиди́те, лю́діе, восторжеству́имъ дне́сь, сла́вяще преподо́бнаго отца́ на́шего Петра́, въ Кори́шѣ возсія́вшаго, и, вопію́ще ему́, си́це рце́мъ: ра́дуйся, кори́шское свѣти́ло, осіява́ющее всю́ Се́рбскую страну́, источа́я благода́тныя струи́ и подава́я всѣ́мъ исцѣле́ніе.

Отъ ю́ности своея́ Бо́га возлюби́лъ еси́, жела́лъ еси́ служи́ти Ему́ вѣ́рою и любо́вію, воздержа́ніемъ, посто́мъ и моли́твою, сего́ ра́ди, укроти́въ стра́сти, труди́лся еси́ дне́мъ и но́щію, терпя́ вся́кія ско́рби и преодолѣва́я вра́жескія навѣ́ты, ны́нѣ же въ небе́сныхъ селе́ніихъ водворя́яся, моли́ся о душа́хъ на́шихъ.

Сла́ва, гла́съ 5:

Ра́дуйся, пресвѣ́тлое свѣти́ло, богозра́чное церко́вное украше́ніе, и́же процвѣ́лъ еси́ благоуха́ніемъ, я́ко кри́нъ, Влады́цѣ Христу́ подража́я и благода́ти Его́ вруча́яся. Тѣ́мже чи́стое а́нгельское житіе́ стяжа́въ, го́ры, верте́пы и гра́ды свѣ́тло украси́, сего́ ра́ди богоуго́дный вѣне́цъ воспрія́лъ еси́, рѣ́ки богодухнове́ннаго уче́нія источи́лъ еси́, преподо́бне о́тче Пе́тре, Христу́ же моли́ся о на́съ, ча́дѣхъ твои́хъ, дарова́ти душа́мъ на́шимъ ми́ръ и ве́лію ми́лость.

И ны́нѣ, богоро́диченъ:

Тве́рдое и непрело́жное упова́ніе вѣ́мы Тя́, Богоро́дице, его́же держи́мся, и упова́я мо́лимся: сохрани́ на́съ, и гра́дъ се́й, и вся́ гра́ды и страны́ христіа́нскія отъ всѣ́хъ бѣ́дъ, находя́щихъ человѣ́комъ согрѣша́ющимъ, но а́біе моли́твами Твои́ми пріе́млющимъ а́біе согрѣше́ній оставле́ніе.

На стихо́внѣ стихи́ры самогла́сны, гла́съ 2:

Избѣ́глъ еси́ жите́йскую красоту́,* богому́дре Пе́тре,* послѣ́довавъ Христу́,* тѣ́мже прія́лъ еси́ жи́знь вѣ́чную,* красоты́ неувяда́емыя и неизмѣня́емыя.

Сти́хъ: Честна́ предъ Го́сподемъ* сме́рть преподо́бныхъ Его́.

Мла́дъ проводя́ во́зрастъ,* ста́рческій имѣ́лъ еси́ ра́зумъ,* тѣ́мже жи́знь до́брую упражня́я* въ воздержа́ніи, и труда́хъ, и моли́твахъ,* вы́ну взыва́лъ еси́:* сла́ва, Христе́, благоутро́бію Твоему́.

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

Свѣти́льникъ яви́лся еси́ вели́кій,* богому́дре о́тче на́шъ Пе́тре,* просвѣща́я подсо́лнечную чуде́съ сія́ньми* и боже́ственными дѣя́ньми,* тѣ́мже по успе́ніи Незаходи́мый Свѣ́тъ прія́лъ еси́,* сего́ ра́ди моли́ся спасти́ся душа́мъ на́шимъ.

Сла́ва, гла́съ 6, самогла́сенъ:

Преподо́бне о́тче Пе́тре, тво́й у́мъ отъ страсте́й свобо́денъ соблю́дъ, Ду́ху Пресвято́му сосу́дъ свяще́нъ бы́лъ еси́ и, Христа́ пріи́мъ въ се́рдцѣ свое́мъ, чудотво́рецъ яви́лся еси́, прогоня́я де́моны, сего́ ра́ди мо́лимъ тя́: моли́ся непреста́нно о всѣ́хъ на́съ.

И ны́нѣ, богоро́диченъ: Творе́цъ и Изба́витель мо́й...

На благослове́ніи хлѣ́бовъ: тропа́рь свята́го, два́жды и Богоро́дице Дѣ́во.., еди́ножды.

Тропа́рь, гла́съ 4:

Любо́вію Христо́вою просвѣще́нъ, измла́да возлюби́лъ еси́ мона́шеское житіе́ и, возненави́дѣвъ вся́кое плотско́е наслажде́ніе, житіе́ твое́ испо́лнилъ еси́ терпѣ́ніемъ, посто́мъ и моли́твами, просія́лъ бо еси́ добродѣ́тельми, я́ко свѣ́тлое свѣти́ло, и ны́нѣ, усе́рдно мо́лимъ тя́: моли́ Христа́ Бо́га сохрани́ти оте́чество на́ше и ве́сь крестоно́сный наро́дъ се́рбскій и всѣ́мъ дарова́ти ве́лію ми́лость.


НА УТРЕНИ,
На Бо́гъ Госпо́дь: Тропа́рь преподо́бнаго, два́жды. Сла́ва, и ны́нѣ, богоро́диченъ.

По 1-мъ стихосло́віи сѣда́ленъ, гла́съ 1:

Воздержа́нія огне́мъ, я́ко зла́то въ пещи́, му́дре, искуси́вся, возсія́лъ еси́ свѣтлѣ́йше со́лнца, растерза́въ у́зы естества́ преесте́ственнымъ чи́стымъ житіе́мъ, вышеесте́ственныхъ прія́лъ еси́ дѣ́йство, всеблаже́нне. Сего́ ра́ди вѣ́рою тя́ восхваля́юще, вопіе́мъ: благода́ть, и ми́лость, и очище́ніе согрѣше́ній на́шихъ, о́тче, испроси́. [Два́жды.]

Сла́ва, и ны́нѣ, богоро́диченъ, гла́съ то́йже:

Моли́твы Твои́хъ ра́бъ пріими́, Богоро́дице, Засту́пнице на́ша и прибѣ́жище. Къ кому́ бо прибѣ́гнемъ, ра́звѣ Тебе́, Влады́чице? Ты́ покро́въ на́шъ и заступле́ніе еси́, и ны́нѣ не оста́ви на́съ до конца́ поги́бнути, да Твои́ми моли́твами отъ бѣ́дъ сохраня́емся: на Тя́ бо упова́ніе возложи́хомъ, Богоро́дице.

По 2-мъ стихосло́віи сѣда́ленъ, гла́съ 5:

По́стника Госпо́дня пѣ́сньми почти́мъ, я́ко умертви́вша вся́ прило́ги страсте́й воздержа́ніемъ и тве́рдымъ терпѣ́ніемъ вои́стинну, и посрами́вша зѣло́ противобо́рца врага́ и всю́ его́ горды́ню, и ны́нѣ моля́щася Го́споду поми́ловатися душа́мъ на́шимъ. [Два́жды.]

Сла́ва, и ны́нѣ, богоро́диченъ, гла́съ то́йже:

Ужа́сно чу́до зача́тія и несказа́ненъ о́бразъ рождества́ въ Тебѣ́ позна́ся, Приснодѣ́во Чи́стая, ужаса́етъ мо́й у́мъ и удивля́етъ помышле́ніе: сла́ва Твоя́, Богоро́дице, во всѣ́хъ простре́ся, ко спасе́нію ду́шъ на́шихъ.

По поліеле́и сѣда́ленъ, гла́съ 4:

Преподо́бныхъ добро́то, страда́льцевъ сострада́льче, безъ кро́ве вѣнча́лся еси́, я́ко му́ченикъ, Христо́во нося́ и́мя боже́ственное и дерзнове́нно всегда́ проповѣ́дуя та́инство Святы́я Тро́ицы, Ейже и моли́тися, Пе́тре, не преста́й о восхваля́ющихъ тя́. [Два́жды.]

Сла́ва, и ны́нѣ, богоро́диченъ, гла́съ то́йже:

Удиви́ся Іо́сифъ, е́же па́че естества́ зря́ и внима́ше мы́слію, и́же на руно́ до́ждь, въ безсѣ́менномъ зача́тіи Твое́мъ, Богоро́дице, купину́, огне́мъ неопали́мую, же́злъ Ааро́новъ прозя́бшій, и, свидѣ́тельствуя, обру́чникъ Тво́й и храни́тель свяще́нникомъ взыва́ше: Дѣ́ва ражда́етъ и по рождествѣ́ па́ки Дѣ́вою пребыва́етъ.

Степе́нна, 1-й антифо́нъ 4-го гла́са. Проки́менъ, гла́съ 4: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Вся́кое дыха́ніе... Ева́нгеліе отъ Матѳе́я, зача́ло 43.

По 50-мъ псалмѣ́ стихи́ра, гла́съ 6, самогласенъ:

Преподо́бне о́тче Пе́тре, во всю́ зе́млю изы́де вѣща́ніе исправле́ній твои́хъ, тѣ́мъ на небесѣ́хъ обрѣ́лъ еси́ мзду́ трудо́въ твои́хъ, де́монскія разори́лъ еси́ полки́ и а́нгельскія дости́глъ еси́ чи́ны, и́хже житію́ безъ поро́ка поревнова́лъ еси́, дерзнове́ніе имѣ́я ко Христу́ Бо́гу, ми́ръ испроси́ душа́мъ на́шимъ.

Кано́нъ Богоро́дицы со ирмосо́мъ на 6 и преподо́бнаго на 8, гла́съ 8.

Пѣ́снь 1.

Ирмо́съ: Во́ду проше́дъ, я́ко су́шу, и еги́петскаго зла́ избѣжа́въ, изра́ильтянинъ вопія́ше: Изба́вителю и Бо́гу на́шему пои́мъ.

Благи́ми нра́вы украси́вся, Христу́ прилѣпи́лся еси́ отъ ю́ности, плотскíя стра́сти умертви́въ воздержа́ніемъ, и къ животу́, преподо́бне, преста́вился еси́.

Глаго́ловъ и зако́новъ Бо́жіихъ испо́лнитель бы́въ, испо́лнился еси́, о́тче прему́дре, боже́ственныхъ даро́въ и чуде́съ и всѣ́мъ лучи́ бога́тно испусти́лъ еси́.

Со́вѣсть имѣ́лъ еси́ бла́гу и о́ко серде́чное, взира́ющее къ Бо́гу, тѣ́мже вня́тъ моли́твѣ твое́й, прему́дре, съ преподо́бными сочта́ тя.

Богоро́диченъ: Стра́сти пло́ти моея́ и ума́ моего́ двиза́нія неподо́бная утоли́, молю́ Тя, Пречи́стая Дѣ́во, и испра́ви мя́, заблу́ждшаго умо́мъ.

Пѣ́снь 3.

Ирмо́съ: Ты́ еси́ утвержде́ніе притека́ющихъ къ Тебѣ́, Го́споди, Ты́ еси́ Свѣ́тъ омраче́нныхъ, и пое́тъ Тя́ ду́хъ мо́й.

Ве́сь прилѣжа́ Вседержи́телю, преподо́бне о́тче прему́дре, всея́ бѣсо́вскія зло́бы избѣ́глъ еси́.

Высото́ю смире́нія украша́емь, на зе́млю све́рглъ еси́ велехва́льнаго изря́дными дѣ́лы твои́ми.

Пло́тію обложе́нъ, о́тче прему́дре, смири́лъ еси́ превзя́тую вы́ю нечести́ваго смире́ніемъ слове́съ твои́хъ.

Богоро́диченъ: Въ ложесна́ Твоя́ воплоща́емь, Всенепоро́чная, всели́ся Зижди́тель, на благодѣя́ніе вѣ́рно пою́щимъ Тя́.

Сѣда́ленъ, гла́съ 4. [Подо́бенъ: Ско́ро предвари́.]

Страстно́е покори́лъ еси́ плотско́е мудрова́ніе, и, го́ршая порабо́тив лу́чшему, о́тче Пе́тре пресла́вне, сокруши́лъ еси́ бѣсо́вскія ко́зни посто́мъ и возсія́лъ еси́ въ мíрѣ, я́ко луча́ со́лнечная, сія́ніи твои́хъ добродѣ́телей, сего́ ра́ди тя́ воспѣва́емъ. [Два́жды.]

Сла́ва, и ны́нѣ, богоро́диченъ:

Стѣна́ непобѣди́мая на́мъ, христіа́номъ, еси́, Богоро́дице Дѣ́во, къ Тебѣ́ прибѣга́юще, невреди́ми пребыва́емъ и, па́ки согрѣша́юще, и́мамы Тя́ Моли́твенницу. Тѣ́мъ, благодаря́ще, вопіе́мъ Ти́: ра́дуйся, Благода́тная, Госпо́дь съ Тобо́ю.

Пѣ́снь 4.

Ирмо́съ: Услы́шахъ, Го́споди, смотре́нія Твоего́ та́инство, разумѣ́хъ дѣла́ Твоя́ и просла́вихъ Твое́ Божество́.

Содѣ́явъ, пресла́вне, ду́шу твою́ хра́мъ Свято́му Ду́ху, бы́лъ еси́ наслѣ́дникъ го́рняго Ца́рствія съ вы́шними си́лами.

Многоболѣ́зненныя стра́сти всегда́ врачу́еши приступа́ющихъ къ тебѣ́: благода́ть бо, преподо́бне, пріи́мъ отъ Го́спода содѣва́ти зна́менія и чудеса́.

Краснѣ́йшимъ прозябе́ніемъ, о́тче, въ дому́ Бо́жіи прозя́блъ еси́, добродѣ́тельми укра́шенъ и плоды́ чуде́сными облагоуха́емь.

Богоро́диченъ: Ни́ва духо́вная, я́коже изъ бразды́ кла́съ, изнесла́ еси́ всю́ тва́рь Пита́ющаго, вся́ческихъ Бо́га, Приснодѣ́во.

Пѣ́снь 5.

Ирмо́съ: Утренююще, вопіе́мъ Ти́: Го́споди, спаси́ ны, Ты́ бо еси Бо́гъ на́шъ, ра́звѣ Тебе́, ино́го не вѣ́мы.

Умо́мъ очище́ннымъ, пресла́вне, зри́ши добро́ту неизрече́нную Христа́, вся́ческихъ Бо́га на́шего.

Якоже Илія́ на колесни́цѣ, о́тче, добродѣ́тельми твои́ми возше́лъ еси́ на не́бо, Ду́хомъ облегчава́емь.

Стягну́въ тѣ́ло твое́ воздержа́ніемъ и чистото́ю, въ вы́шняя селе́нія къ широтѣ́, о́тче, дости́глъ еси́.

Богоро́диченъ: Исцѣли́ неду́гующаго ума́ моего́ омраче́ніе, Врача́ ро́ждшая, Христа́, Всенепоро́чная Влады́чице.

Пѣ́снь 6.

Ирмо́съ: Моли́тву пролію́ ко Го́споду и Тому́ возвѣщу́ печа́ли моя́, я́ко зо́лъ душа́ моя́ испо́лнися и живо́тъ мо́й а́ду прибли́жися, и молю́ся, я́ко Іо́на: отъ тли́, Бо́же, возведи́ мя.

Лука́вый умертви́ся змíй святы́ми твои́ми моли́твами, богоблаже́нне Пе́тре, и отъ того́ разрѣша́ются зло́бы и́же зна́менія отъ тебе́ испроси́вшіи: еси́ бо уго́дникъ Бо́жій всесвѣ́телъ, позна́нъ бы́лъ еси́ вѣ́ренъ.

Обнови́въ прилѣ́жнымъ ра́ломъ ду́шу твою́, свяще́нный о́тче Пе́тре, добродѣ́тельная въ ню́ вве́рглъ еси́ прему́дренно многопло́дная сѣ́мена и пожа́лъ еси́ многоразли́чныхъ исцѣле́ній бога́тыя кла́сы.

Крѣ́постію ду́ха, о́тче, возмо́гъ, держа́ву вра́жію и си́лу низложи́лъ еси́ и похвалу́ побѣ́дную по́чести прія́лъ еси́, преподо́бне Пе́тре, чуде́сными сія́ніи.

Богоро́диченъ: Госпо́дь съ Тобо́ю, Пречи́стая, я́коже изво́лилъ е́сть, бы́въ, Отрокови́це, всѣ́хъ на́съ отъ о́бласти льсти́ваго хода́тайствомъ Твои́мъ изба́вилъ е́сть, тѣ́мже Тя́ ны́нѣ по до́лгу, ро́дове родо́въ, ублажа́емъ.

Конда́къ, гла́съ 2:

Вели́чіемъ по́двигъ твои́хъ возсія́лъ еси́ и озари́лъ еси́, богому́дре, вся́ концы́ земны́я. Тѣ́мже, и у́меръ, преше́лъ еси́ отъ свѣ́та къ Свѣ́ту возсія́вшему. Мы́ же ны́нѣ вопіе́мъ ти́: просвѣти́ на́ша помышле́нія, Пе́тре, о́тче на́шъ, и моли́ непреста́нно о всѣ́хъ на́съ.

Икосъ:

Возлюби́въ Бо́га па́че всѣ́хъ, кро́токъ же и смире́нъ се́рдцемъ, вся́ въ мíрѣ оста́вилъ еси́ и, отрѣши́вся мірска́го житія́, возжелѣ́лъ еси́ всецѣ́ло послужи́ти Бо́гу. Сего́ ра́ди удали́лся еси́, вку́пѣ со единоро́дною сестро́ю Еле́ною, во е́же подвиза́тися по́двигомъ до́брымъ и спаси́тельнымъ. Восхотѣ́въ же па́ки крѣпча́йшаго по́двига, оста́вилъ еси́ да́же и единоро́дную сестру́ свою́ Еле́ну и, отбѣ́гъ ея́, подвиза́лся еси́ крѣ́пко и до́лго. Тѣ́мже и побѣди́тель яви́лся еси́ мно́гихъ искуше́ній и всея́ вра́жія си́лы. Наста́вникъ бы́въ мно́жеству мона́ховъ, отону́дуже дарова́ніе чуде́съ отъ Христа́ прія́лъ еси́, тѣ́мже мно́гихъ жи́телей удиви́лъ еси́. Житія́ же ра́ди свята́го и богоуго́дныхъ дѣ́лъ твои́хъ тебе́ чту́тъ да́же и ага́ряне и притека́ютъ къ ра́цѣ моще́й твои́хъ, прося́ще твоея́ по́мощи. Мы́ же дне́сь, вѣ́рою и любо́вію восхваля́юще тя́, вопіе́мъ: ра́дуйся, преподо́бне Пе́тре богоблаже́нне, преди́вная кори́шская похвало́.

Пѣ́снь 7.

Ирмо́съ: Отъ Іуде́и доше́дше, о́троцы, въ Вавило́нѣ иногда́, вѣ́рою Тро́ическою пла́мень пе́щный попра́ша, пою́ще: отце́въ Бо́же, благослове́нъ еси́.

Проше́дъ по́двиги по́стныя, о́тче, умо́мъ крѣ́пкимъ у́мъ прего́рдый боже́ственнымъ смире́ніемъ смири́лъ еси́, поя́: благослове́нъ Бо́гъ оте́цъ на́шихъ.

Краснѣ́йшее прозябе́ніе, о́тче, въ дому́ Бо́жіи прозя́блъ еси́, добродѣ́тельми укра́шенъ, и плоды́ чуде́сными облагоуха́лъ еси́.

Просвѣти́въ твое́ се́рдце, нача́льникъ бы́лъ еси́ свяще́ннаго собо́ра о́тча, наказу́я, и уча́, и вся́ приводя́ къ Бо́жіей во́ли, поя́: оте́цъ на́шихъ Бо́же, благослове́нъ еси́.

Богоро́диченъ: Но́во Отроча́ ро́ждши, Пребезнача́льнаго Сло́ва, обветша́вшія ны́ грѣхо́мъ обнови́ла еси́, Дѣ́во, и пѣ́ти укрѣпи́ла еси́: оте́цъ на́шихъ Бо́же, благослове́нъ еси́.

Пѣ́снь 8.

Ирмо́съ: Богоглаго́ливіи о́троцы, въ пещи́ со огне́мъ пла́мень попира́юще, поя́ху: благослови́те, дѣла́ Госпо́дня, Го́спода.

Наслѣ́дниче боже́ственныхъ селе́ній, а́нгельски, о́тче, пожи́лъ еси́, тѣ́мъ со а́нгелы лику́етъ ду́хъ тво́й.

Невозвра́тно ше́ствовавъ, о́тче прему́дре и досточу́дне, веду́щими къ небеси́ боже́ственными стезя́ми, отъ злѣ́ веду́щихъ до конца́ уклони́лся еси́.

Все́льшеюся благода́тію въ ду́шу твою́, о́тче, лука́вно живу́щіи въ человѣ́цѣхъ нечи́стіи ду́хи отгони́ми быва́ютъ.

Богоро́диченъ: Вода́ еси́ неисчерпа́емая, Дѣ́во, отъ нея́же вси́ пію́ще, благода́ти исполня́емся, душе́ю и тѣ́ломъ освяща́еми.

Пѣ́снь 9.

Ирмо́съ: Устраши́ся вся́къ слу́хъ неизрече́нна Бо́жія снизхожде́нія, я́ко Вы́шній во́лею сни́де да́же и до пло́ти, отъ дѣви́ческаго чре́ва бы́въ Человѣ́къ. Тѣ́мже Пречи́стую Богоро́дицу, вѣ́рніи, велича́емъ.

Исцѣле́ніе источа́етъ бога́тно честна́я твоя́ ра́ка Бо́жіимъ Ду́хомъ и стра́сти многовре́менныя исцѣля́етъ, о́тче, приходя́щихъ къ тебѣ́, и прогоня́етъ лука́выя ду́хи лю́тыя, и воздвиза́етъ вѣ́рныя восхвали́ти твоя́ свѣ́тлыя по́двиги.

Тѣ́ло твое́, блаже́нне, терпѣли́вое, связа́вшееся вери́гами, стра́сти неисцѣ́льныя прикоснове́ніемъ исцѣля́етъ, Бо́гу и Спа́су тя́ вельми́ просла́вльшу, о́тче прему́дре и досточу́дне Пе́тре, я́ко дѣ́лы твои́ми до́брыми просла́вльшуся, преподо́бне.

Процвѣ́лъ еси́ въ по́стническихъ удо́ліихъ, прехва́льне Пе́тре, о́тче на́шъ, я́ко ши́покъ благоуха́ненъ, и, я́коже кри́нъ, облагоуха́лъ еси́ со́вѣсти вѣ́рныхъ добродѣ́тельми и чудесы́. Тѣ́мже, преподо́бне, отжени́ отъ на́съ стра́сти смердя́щія.

Богоро́диченъ: Просвѣти́, Чи́стая Дѣ́во, се́тующее се́рдце мое́ при́сно преступле́ньми и жите́йскими мно́гими молва́ми, не оста́ви мене́ враго́мъ бы́ти въ ра́дость, я́ко да сла́влю Тя́ и любо́вію пою́, Препѣ́тая.

Свѣти́ленъ:

Свѣ́томъ невеще́ственнымъ озаря́емь, свѣтови́денъ вои́стинну показа́лся еси́, преподо́бне о́тче Пе́тре, му́жески оттря́съ вся́ земна́я попече́нія, ду́шу свою́ къ небесе́мъ впери́лъ еси́, сего́ ра́ди ны́нѣ на небеси́ лику́еши я́ко вои́стинну наслѣ́дникъ боже́ственныхъ наслажде́ній. [Два́жды.]

Сла́ва, и ны́нѣ, богоро́диченъ:

Пресвята́я Богоро́дице, Влады́чице всея́ тва́ри, просвѣти́ и на́съ свѣ́томъ невеще́ственнымъ, и да́руй на́мъ вре́менное и вѣ́чное благополу́чіе, и изба́ви на́съ отъ вся́кія ну́жды и печа́ли.

На хвали́техъ стихи́ры на 4, гла́съ 4:

Да ра́дуется дне́сь* вся́ земля́ Се́рбская,* да весели́тся, торжеству́я,* и гра́дъ При́зренъ,* я́ко имѣ́я въ предѣ́лѣхъ о́бласти своея́* неистощи́мое сокро́вище —* преподо́бнаго отца́ на́шего* Петра́ Кори́шскаго,* крѣ́пкаго предста́теля* и моли́твенника ко Го́споду,* Его́же непреста́нно моли́* о душа́хъ на́шихъ.

Пріиди́те, вси́ благовѣ́рніи лю́діе,* псалмы́ и пѣ́сньми воспое́мъ* преподо́бнаго отца́ на́шего* Петра́ Кори́шскаго,* и́же возсія́ на тве́рди вѣ́ры па́че со́лнца.* Се́й бо, жела́ніе боже́ственное воспріи́мъ,* мірску́ю оста́ви пре́лесть,* взе́мъ же яре́мъ Христо́въ на ра́мо,* полки́ бѣсо́въ му́жески побѣди́* и ны́нѣ на небесѣ́хъ мо́лится непреста́нно* о душа́хъ на́шихъ.

Имѣ́я всегда́ бо́дръ у́мъ,* богому́дре о́тче Пе́тре,* зако́номъ Боже́ственнымъ послѣ́довалъ еси́,* повелѣ́ніемъ Сотво́ршаго повину́яся,* показа́лся еси́ мона́ховъ законополо́жникъ* и пра́вило извѣ́стнѣйшее,* наказа́тель безу́мныхъ и наста́вникъ заблу́ждшихъ,* свѣти́льникъ во тмѣ́ невѣ́дѣнія,* освяща́ющъ всю́ зе́млю Се́рбскую,* и ны́нѣ моли́, во е́же спасти́ся на́мъ.

Имѣ́я си́лу наставля́ющаго тя́ Ду́ха Бо́жія,* богому́дре о́тче Пе́тре,* ника́коже восхотѣ́лъ еси́ вну́трь мíра пребы́ти,* но, избѣ́гъ мíра,* въ непроходи́мыхъ пу́стыняхъ жи́лъ еси́* и, я́ко земны́й а́нгелъ и небе́сный человѣ́къ,* со звѣрьми́ безъ боя́зни ходи́лъ еси́,* сего́ ра́ди и нетлѣ́нныя жи́зни причасти́лся еси́,* и ны́нѣ лику́я со а́нгелы,* моли́ о душа́хъ на́шихъ.

Сла́ва, гла́съ 5:

Стецы́теся дне́сь, вся́ мно́жества мона́ховъ, воструби́те трубо́ю пѣ́сней, благода́ть бо Ду́ха, вся́кія трубы́ боголѣ́пнѣйши, всѣ́хъ созыва́етъ къ пѣ́нію преподо́бнаго отца́ на́шего Петра́: лю́діе, я́ко раби́ Госпо́дни, да покло́нятся и́скреннему рабу́ всѣ́хъ Царя́, мона́си да просла́вятъ и́стиннаго наста́вника своего́, и́же показа́ дѣ́тельно изря́дный пу́ть любве́ боже́ственныя, па́стыри и учи́тели да восхва́лятъ вои́стинну изря́дно пра́вило же и о́бразъ па́ствѣ, и́же пости́же Свѣ́тъ и́стинный Вседѣ́тельныя Тро́ицы и мо́лится непреста́нно о душа́хъ на́шихъ.

И ны́нѣ, богоро́диченъ:

Тебѣ́ мо́лимся, я́ко Бо́жіей Ма́тери, Благослове́нная: моли́ о спасе́ніи ду́шъ на́шихъ.

Славосло́віе вели́кое, тропа́рь преподо́бнаго, ектеніи́ и отпу́стъ.



НА ЛИТУРГІИ,

Блаже́нна отъ кано́на преподо́бнаго, пѣ́снь 3 и 6. Проки́менъ, гла́съ 7: Честна́ предъ Го́сподемъ* сме́рть преподо́бныхъ его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Апо́столъ, къ Кори́нѳяномъ, зача́ло 176. Аллилу́ія, гла́съ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́. Ева́нгеліе отъ Луки́, зача́ло 77. Прича́стенъ: Въ па́мять вѣ́чную [бу́детъ пра́ведникъ, отъ слу́ха зла́ не убои́тся].

Источникъ: Мине́я Ию́нь. Ча́сть пе́рвая. — М.: Издательскій совѣтъ Русской Православной Церкви, 2002. — С. 159-171.

/ Къ оглавленію раздѣла /


Наверхъ / Къ титульной страницѣ

0