Собраніе богослужебныхъ текстовъ Православной Церкви

Русскiй Порталъ- Церковный календарь- Русская Библія- Осанна- Святоотеческое наслѣдіе- Наслѣдіе Святой Руси- Слово пастыря- Литературное наслѣдіе- Новости

Осанна
-
Гостевая книга
-
Новости
-
Написать письмо
-
Поискъ
-
Литургика
-
Канонизація святыхъ
-
Ирмологій

Домашняя молитва

Каноны
-
Акаѳисты
-
Псалтирь Божіей Матери

Евхологій

Служебникъ
-
Требникъ

Слѣдованная Псалтирь

Псалтирь
-
Канонникъ
-
Часословъ
-
Мѣсяцесловъ

Тріодь

Постная
-
Цвѣтная

Минеи

Минея Общая
-
Минеи Богослужебныя
-
Архивъ

Церк.-учит. литература

«Златоустъ»

Греч. и древнерус. тексты

Греч. литург. тексты
-
Древнерус. литург. тексты

Календарь на Вашемъ сайтѣ

Ссылка для установки

Православный календарь

Новости сайта



Сегодня - воскресенiе, 19 ноября 2017 г. Сейчасъ на порталѣ посѣтителей - 15.
Если вы нашли ошибку на странице, выделите ее мышкой и щелкните по этой ссылке, или нажмите Ctrl+Alt+E

ЦЕРКОВНО-БОГОСЛУЖЕБНЫЯ КНИГИ

МИНЕИ БОГОСЛУЖЕБНЫЯ (СЕНТЯБРЬ-АВГУСТЪ).

Мѣ́сяца Іу́нія в 5-й де́нь.
Па́мять преподо́бнаго и богоно́снаго отца́ на́шего Петра́ Кори́шскаго.

НА ВЕЧЕРНИ,
По обы́чномъ псалмѣ́ стихологису́емъ: Блаже́нъ му́жъ.., 1-й антифо́нъ. На Го́споди воззва́хъ: стихи́ры на 6, гла́съ 5. Подо́бенъ: Преподо́бне о́тче.

Преподо́бне о́тче* Пе́тре досточу́дне,* отъ младе́нства твою́ жи́знь Христу́ Бо́гу возложи́лъ еси́,* отъ Него́же укрѣпля́емь,* плотскíя стра́сти по́мыслу покори́лъ еси́,* безстра́стія же свѣ́томъ,* я́ко мо́лніями облиста́въ,* бѣсо́въ полки́ попали́лъ еси́.* Преподо́бнымъ единожи́телю и пра́веднымъ,* съ ни́миже Христу́ моли́ся,* дарова́ти душа́мъ на́шимъ* ми́ръ и ве́лію ми́лость. [Два́жды.]

Преподо́бне о́тче,* богоно́се Пе́тре блаже́нне,* ти́хое и чи́стое твое́ житіе́* ви́дѣвъ Христо́съ,* кро́ткое же и беззло́бивое,* со Отце́мъ и Боже́ственнымъ Ду́хомъ,* оби́тель сотвори́ въ тебѣ́.* Тѣ́мже и въ чудесѣ́хъ ди́вна тя́ показа́,* цѣле́бныя да́ры источа́я* и ду́хи лука́вствія отгоня́, о́тче,* сего́ ра́ди бы́лъ еси́ отце́мъ украше́ніе,* съ ни́миже моли́ся Го́сподеви,* ми́ръ мíрови дарова́ти* и душа́мъ на́шимъ ве́лію ми́лость. [Два́жды.]

Сла́ва, гла́съ 6:

Еже по о́бразу соблю́дъ невреди́мо, у́мъ влады́ку на стра́сти па́губныя по́стнически поста́вивъ, во е́же по подо́бію, я́ко мо́щно, возше́лъ еси́, му́жески бо естество́ пону́дивъ, потща́лся еси́ ху́ждшее покори́ти лу́чшему, и пло́ть порабо́тити ду́ху. Тѣ́мже и́ночествующихъ яви́лся еси́ наста́вникъ, жи́тель пусты́нный, благотеку́щихъ обучи́тель, пра́вило добродѣ́телей извѣ́стнѣйшее. И ны́нѣ на небесѣ́хъ зерца́ломъ разрѣ́шшимся, о́тче на́шъ Пе́тре, чи́стѣ зри́ши Святу́ю Тро́ицу, моля́ся несре́дственнѣ о и́же вѣ́рою и любо́вію чту́щихъ тя́.

И ны́нѣ, богоро́диченъ: Кто́ Тебе́ не ублажи́тъ...
Вхо́дъ. Проки́менъ дне́. Чте́нія три́, преподо́бническая.

Прему́дрости Соломо́ни чте́ніе.

Пра́ведницы во вѣ́ки живу́тъ, и въ Го́сподѣ мзда́ и́хъ, и попече́ніе и́хъ у Вы́шняго. Сего́ ра́ди пріи́мутъ ца́рствіе благолѣ́пія и вѣне́цъ добро́ты отъ руки́ Госпо́дни, зане́ десни́цею покры́етъ я́ и мы́шцею защити́тъ и́хъ. Пріи́метъ всеору́жіе — рве́ніе свое́ и вооружи́тъ тва́рь въ ме́сть враго́мъ. Облече́тся въ броня́ пра́вды и возложи́тъ шле́мъ — су́дъ нелицемѣ́ренъ. Пріи́метъ щи́тъ непобѣди́мый — преподо́біе, поостри́тъ же напра́сный гнѣ́въ — во ору́жіе, спобо́ретъ же съ ни́мъ мíръ на безу́мныя. По́йдутъ праволу́чныя стрѣ́лы мо́лніины и, я́ко отъ благокру́гла лу́ка облако́въ, на намѣ́реніе полетя́тъ, и отъ каменоме́тныя я́рости испо́лнь паду́тъ гра́ды. Вознегоду́етъ на ни́хъ вода́ морска́я, рѣ́ки же потопя́тъ я́ на́гло. Сопроти́въ ста́нетъ и́мъ ду́хъ си́лы и, я́ко ви́хоръ, развѣ́етъ и́хъ, и опустоши́тъ всю́ зе́млю беззако́ніе, и злодѣ́йство преврати́тъ престо́лы си́льныхъ. Слы́шите у́бо, ца́ріе, и разумѣ́йте, навы́кните, судіи́ конце́въ земли́. Внуши́те держа́щіи мно́жества и гордя́щіися о наро́дѣхъ язы́ковъ, я́ко дана́ е́сть отъ Го́спода держа́ва ва́мъ и си́ла отъ Вы́шняго.

Прему́дрости Соломо́ни чте́ніе.

Пра́ведныхъ ду́ши въ руцѣ́ Бо́жіей, и не прико́снется и́хъ му́ка. Непщева́ни бы́ша во очесѣ́хъ безу́мныхъ умре́ти, и вмѣни́ся озлобле́ніе исхо́дъ и́хъ, и е́же отъ на́съ ше́ствіе — сокруше́ніе, они́ же су́ть въ ми́рѣ. Ибо предъ лице́мъ человѣ́ческимъ, а́ще и му́ку пріи́мутъ, упова́ніе и́хъ безсме́ртія испо́лнено. И вма́лѣ нака́зани бы́вше, вели́кими благодѣ́тельствовани бу́дутъ, я́ко Бо́гъ искуси́ я́ и обрѣ́те и́хъ досто́йны Себѣ́. Я́ко зла́то въ горни́лѣ, искуси́ и́хъ и, я́ко всепло́діе же́ртвенное, прія́тъ я́. И во вре́мя посѣще́нія и́хъ, возсія́ютъ, и я́ко и́скры по сте́блію, потеку́тъ. Су́дятъ язы́комъ и облада́ютъ людьми́, и воцари́тся Госпо́дь въ ни́хъ во вѣ́ки. Надѣ́ющіися На́нь разумѣ́ютъ и́стину и вѣ́рніи въ любви́ пребу́дутъ Ему́, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

Прему́дрости Соломо́ни чте́ніе.

Пра́ведникъ, а́ще пости́гнетъ сконча́тися, въ поко́и бу́детъ. Ста́рость бо честна́ не многолѣ́тна, ниже́ въ числѣ́ лѣ́тъ исчита́ется. Сѣди́на же е́сть му́дрость человѣ́комъ, и во́зрастъ ста́рости — житіе́ нескве́рное. Благоуго́денъ Бо́гови бы́въ, возлю́бленъ бы́сть, и живы́й посредѣ́ грѣ́шникъ, преста́вленъ бы́сть. Восхище́нъ бы́сть, да не зло́ба измѣни́тъ ра́зума его́ или́ ле́сть прельсти́тъ ду́шу его́. Раче́ніе бо зло́бы помрача́етъ до́брая и паре́ніе по́хоти, премѣня́етъ у́мъ незло́бивъ. Сконча́вся вма́лѣ, испо́лни лѣ́та до́лга, уго́дна бо бѣ́ Го́сподеви душа́ его́, сего́ ра́ди потща́ся отъ среды́ лука́вствія. Лю́діе же ви́дѣвше и не разумѣ́вше, ниже́ поло́жше въ помышле́ніи таково́е, я́ко благода́ть и ми́лость въ преподо́бныхъ Его́ и посѣще́ніе во избра́нныхъ Его́.

На стихо́внѣ стихи́ры, гла́съ 2. Подо́бенъ: Егда́ отъ дре́ва.

Высокогнѣздя́щимся пти́цамъ, о́тче, подо́бяся,* верху́ горы́ жили́ще себѣ́ водрузи́лъ еси́,* въ ка́менную пеще́ру всели́вся,* мра́зомъ и ва́ромъ изнуря́я свое́ тѣ́ло,* плотска́я взыгра́нія до конца́ увяди́лъ еси́,* безстра́стія же свѣ́томъ одѣ́явся,* удо́бь сѣ́ти прелетѣ́лъ еси́ бѣсо́вскія,* я́ко кри́лы о́гненными,* широты́ ра́йскія доше́лъ еси́,* въ не́йже и пребыва́я, ра́дуяся,* о на́съ моли́ся, спасти́ся душа́мъ на́шимъ.

Сти́хъ: Честна́ предъ Го́сподемъ* сме́рть преподо́бныхъ Его́.

Ра́дуяся, ви́дѣвъ соверше́ніе трудо́въ твои́хъ мзду́,* и́хже о́ко не ви́дѣ, и у́хо не слы́ша,* и на се́рдце человѣ́ку не взы́де,* добро́ты ра́йскія имѣ́я,* свѣ́тлая воздая́нія по́двигъ твои́хъ:* источа́етъ благода́ть гро́бъ тво́й,* притека́ющимъ къ ра́цѣ моще́й твои́хъ.

Сти́хъ: Блаже́нъ му́жъ, боя́йся Го́спода,* въ за́повѣдехъ Его́ восхо́щетъ зѣло́.

Иже въ пусты́ни твоя́ страда́нія,* кто́ изрече́тъ, блаже́нне о́тче?* Кто́же ли по́двиги и разли́чныя твоя́ труды́,* я́же жи́зни вѣ́чныя подъя́лъ еси́?* Высо́кая и жестокови́дная гора́,* на не́йже я́ко безпло́тенъ* лѣ́та мно́гая претерпѣ́лъ еси́,* твое́ му́жество и добродѣ́тели я́вѣ сказу́етъ,* отъ ону́дуже къ премíрнымъ возлетѣ́лъ еси́,* трудо́въ твои́хъ возме́здіе пріе́мля,* ра́йское наслажде́ніе.* Тѣ́мже мо́лимъ, вѣ́рою тя́ хва́ляще,* и на́съ помина́й моли́твами твои́ми.

Сла́ва, гла́съ 5:

Преподо́бне о́тче, достоблаже́нне Пе́тре, на ра́мо взе́мъ кре́стъ тво́й, ева́нгельски усе́рдно Христо́ви послѣ́довалъ еси́, въ пусты́няхъ водворя́яся Дави́дски, ча́я Бо́га спаса́ющаго тя́. На́нь же всю́ наде́жду возложи́лъ еси́, съ небе́сными чи́ны ра́дуешися, преподо́бне, съ ни́миже Го́сподеви моли́мя, ми́ръ мíрови дарова́ти и душа́мъ на́шимъ ве́лію ми́лость.

И ны́нѣ, богоро́диченъ: Хра́мъ и две́рь еси́...

Тропа́рь преподобнаго, гла́съ 1:

Пусты́нный жи́тель, и въ тѣлеси́ а́нгелъ, и чудотво́рецъ яви́лся еси́, богоно́се о́тче на́шъ Пе́тре: посто́мъ, бдѣ́ніемъ, моли́твою небе́сная дарова́нія пріи́мъ, исцѣля́еши неду́жныя и ду́ши вѣ́рою притека́ющихъ ти́. Сла́ва Да́вшему тебѣ́ крѣ́пость, сла́ва Вѣнча́вшему тя́, сла́ва Дѣ́йствующему тобо́ю всѣ́мъ исцѣле́нія.

Сла́ва, и ны́нѣ, богоро́диченъ: Гавріи́лу вѣща́вшу...



НА УТРЕНИ,
На Бо́гъ Госпо́дь: Тропа́рь преподо́бнаго, два́жды. Сла́ва, и ны́нѣ, богоро́диченъ.

По 1-мъ стихосло́віи сѣда́ленъ, гла́съ 4:

Зва́нію Го́спода Твоего́ послѣ́довалъ еси́, мíръ отве́ргъ, и вся́ я́же въ мíрѣ кра́сная, блаже́нне Пе́тре, претерпѣ́лъ еси́ пусты́нное озлобле́ніе усе́рдно, полки́ же отрази́лъ еси́ де́моновъ му́жественнѣ. Тѣ́мже и твою́ па́мять при́сно пѣ́сньми восхваля́емъ ве́рно. [Два́жды.]

Сла́ва, и ны́нѣ, богоро́диченъ:

Обнови́ла еси́, Чи́стая, Боже́ственнымъ Рождество́мъ Твои́мъ истлѣ́вшее во страстьми земноро́дныхъ ме́ртвенное существо́ и воздви́гла еси́ вся́ отъ сме́рти къ жи́зни нетлѣ́нія. Тѣ́мже Тя́ по до́лгу блажи́мъ вси́, Дѣ́во Препросла́вленная, я́коже прорекла́ еси́.

По 2-мъ стихосло́віи сѣда́ленъ, гла́съ 1:

Возсія́въ я́ко со́лнце, зари́ облиста́еши, преподо́бне, мíру издале́че, чудотво́рче вели́кій Пе́тре свѣтоно́сче, преподо́бнымъ похвало́. Тѣ́мже моли́ твоего́ Влады́ку, просвѣти́ти ду́ши на́ша, восхваля́ющихъ тя́, о́тче на́шъ. [Два́жды.]

Сла́ва, и ны́нѣ, богоро́диченъ:

Въ кро́въ Тво́й, Пречи́стая Дѣ́во, прибѣга́ющихъ, мольбу́ пріе́мши о всѣ́хъ, не преста́й моля́щи Человѣколю́бца Бо́га, спасти́ся рабо́мъ Твои́мъ.

Поліеле́й.

Велича́ніе: Ублажа́емъ тя́, преподо́бне о́тче Пе́тре, и чте́мъ святу́ю па́мять твою́, наста́вниче мона́ховъ и собесѣ́дниче а́нгеловъ.

Псало́мъ избра́нный: Терпя́ потерпѣ́хъ Го́спода, и вня́тъ ми́...

По поліеле́и сѣда́ленъ, гла́съ 8:

Отъ утро́бы освяти́лся еси́, вои́стинну на земли́ я́ко а́нгелъ пожи́лъ еси́, пло́ть бо умертви́лъ еси́ свои́мъ произволе́ніемъ, по́мощію Вы́шняго, Тро́ицы показа́ся уго́дникъ, блаже́нне. Тѣ́мже ликостоя́нію преподо́бныхъ совокупи́лся еси́, съ ни́миже моли́ся спасти́ся душа́мъ на́шимъ. [Два́жды.]

Сла́ва, и ны́нѣ, богоро́диченъ:

Повелѣ́нное та́йно, пріе́мь въ ра́зумѣ, въ кро́вѣ Іо́сифовѣ тща́ніемъ предста́ безпло́тный, глаго́ля Неискусобра́чнѣй: Приклони́вый схожде́ніемъ небеса́, вмѣща́ется неизмѣ́нно ве́сь въ Тя́. Его́же и ви́дя въ ложесна́хъ Твои́хъ пріе́мша ра́бій зра́къ, ужаса́юся зва́ти Тебѣ́: ра́дуйся Невѣ́сто неневѣ́стная.

Степе́нна, 1-й антифо́нъ 4-го гла́са. Проки́менъ, гла́съ 4: Честна́ предъ Го́сподемъ* сме́рть преподо́бныхъ Его́. Сти́хъ: Что́ возда́мъ Го́сподеви о всѣ́хъ, я́же воздаде́ ми? Вся́кое дыха́ніе... Ева́нгеліе отъ Матѳе́я, зача́ло 43.

По 50-мъ псалмѣ́ стихи́ра, гла́съ 6, самогласенъ:

Преподо́бне о́тче, во всю́ зе́млю изы́де вѣща́ніе исправле́ній твои́хъ, тѣ́мже на небесѣ́хъ обрѣ́лъ еси́ мзду́ трудо́въ твои́хъ, де́монскія разори́лъ еси́ полки́ и а́нгельскія дости́глъ еси́ чи́ны, и́хже житію́ непоро́чно поревнова́лъ еси́. Дерзнове́ніе имѣ́я ко Христу́ Бо́гу, ми́ръ испроси́ душа́мъ на́шимъ.

Кано́нъ Богоро́дицы, со ирмосо́мъ на 6 и свята́го на 8.

Кано́нъ Богоро́дицѣ, его́же краестро́чіе: Пою́ хвалу́ живо́носнѣй Отрокови́цѣ. Гла́съ 2. Недѣ́ля на у́трени.

Кано́нъ свята́го, гла́съ 4.
Пѣ́снь 1.

Ирмо́съ: Отве́рзу уста́ моя́, и напо́лнятся Ду́ха, и сло́во отры́гну Цари́цѣ Ма́тери, и явлю́ся, свѣ́тло торжеству́я, и воспою́, ра́дуяся, Тоя́ чудеса́.

Трисо́лнечнымъ свѣ́томъ просвѣти́вся му́дре, озаря́я твою́ мы́сль, бѣсо́въ же помрача́я зла́я шата́нія, я́ко бо паучи́ну звѣре́й наси́лованія вмѣня́я, боже́ственнымъ разжига́емь жела́ніемъ, о́тче преподо́бне.

Все́ жела́ніе ко Го́споду возложи́въ отъ ю́ности, и къ Нему́ востече́ ра́дуяся, плотска́я взыгра́нія до конца́ увяди́лъ еси́, и страсте́й вся́ нахо́ды, воздержа́ніемъ украси́лся еси́, Пе́тре богоно́се, прехва́льне.

Побѣди́въ и́же плодо́мъ, скве́рнаго змíя попра́лъ еси́, и того́ сѣ́ти легко́ кресто́мъ боже́ственнымъ премину́лъ еси́, благоче́стія крилы́ впери́вся, о́тче, живо́тъ же, ра́дуяся, прія́лъ еси́ отъ са́да кре́стнаго.

Богоро́диченъ: Содержа́й концы́ земли́, я́ко Бо́гъ, Твои́ма рука́ма, Чи́стая, держи́мь е́сть, описа́ніемъ тѣ́ла, Иже Боже́ственнымъ зра́комъ Неопи́санный.

Катава́сія: Отве́рзу уста́ моя́...

Пѣ́снь 3.

Ирмо́съ: Твоя́ пѣсносло́вцы, Богоро́дице, живы́й и незави́стный Исто́чниче, ли́къ Себѣ́ совоку́пльшія, духо́вно утверди́, въ боже́ственнѣй Твое́й сла́вѣ, вѣнце́въ сла́вы сподо́би.

Крѣ́пкими прило́ги бѣсо́вскими и звѣ́рскими о́бразы устраша́емь, о тѣ́хъ немощнѣ́й си́лѣ неради́лъ еси́, крѣ́пкаго бо имѣ́яше во бранѣ́хъ Христа́ засту́пника, преподо́бне о́тче Пе́тре, всеблаже́нне.

Умъ влады́ку надъ страстьми́ поста́вилъ еси́, пребога́те Пе́тре, вѣне́чникъ преди́венъ я́влься, и́бо ху́дшее, му́дре, лу́чьшему повину́лъ еси́, тѣ́мже я́ко фи́никсъ, о́тче, въ пусты́няхъ процвѣ́лъ еси́.

Ника́коже сна́ твои́ма очи́ма по́далъ еси́, сего́ ра́ди хра́мъ яви́ся Пресвятѣ́й Тро́ицѣ, прему́дрости сокро́вищемъ мíръ обогати́лъ еси́, преблаже́нне о́тче.

Богоро́диченъ: Пресвята́я Дѣ́во, Ма́ти Христа́ Бо́га на́шего, пріими́ моле́ніе рабо́въ Твои́хъ и изба́ви на́съ отъ вся́каго наси́лія вра́жія.

Сѣда́ленъ, гла́съ 8. Подо́бенъ: Прему́дрости.

Ду́шу твою́ связа́въ любо́вію Христо́вою, земна́я вся́ возненави́дѣвъ, му́дре, водвори́лся же еси́, о́тче преподо́бне, въ пусты́няхъ и гора́хъ. Разу́мнаго бо оби́лія вкуша́я, сла́вне, я́ко отъ незаходи́мыхъ, таи́нниче, просія́лъ еси́ а́нгельски, тѣ́мже и мра́къ проше́дъ пло́ти твоея́, тму́ отгна́лъ еси́ и бѣ́сы ужаси́лъ еси́, богоно́се преблаже́нне Пе́тре, моли́ Христа́ Бо́га грѣхо́въ оставле́ніе пода́ти, чту́щимъ любо́вію святу́ю па́мять твою́. [Два́жды.]

Сла́ва, и ны́нѣ, богоро́диченъ:

Небе́сную две́рь и киво́тъ, всесвяту́ю го́ру, свѣтоза́рный о́блакъ воспои́мъ, небе́сную лѣ́ствицу, слове́сный ра́й, Евино избавле́ніе, вселе́нныя всея́ вели́кое сокро́вище, я́ко спасе́ніе въ Не́й содѣ́лася мíрови и оставле́ніе дре́внихъ согрѣше́ній. Сего́ ра́ди вопіе́мъ Ти́: моли́ся Сы́ну Твоему́ и Бо́гу прегрѣше́ній оставле́ніе дарова́ти, благоче́стно покланя́ющимся Всесвято́му Рождеству́ Твоему́.

Пѣ́снь 4.

Ирмо́съ: Сѣдя́й въ сла́вѣ на Престо́лѣ Божества́ во о́блацѣ ле́гцѣ, прíиде Іису́съ Пребоже́ственный, Нетлѣ́нною Дла́нію и спасе́ зову́щія: сла́ва, Христе́, си́лѣ Твое́й.

Иже на тя́, о́тче, лю́тѣ разсвирѣ́пѣвъ прелука́вый змíй, потребле́нъ бы́сть, я́коже Авиро́нъ, моли́твою твое́ю, тебе́ бо неви́димо Боже́ственная благода́ть осѣня́етъ духо́внѣ, мно́гимъ подая́ исцѣле́нія, всеблаже́нне Пе́тре, богому́дре.

Душе́вное чи́стѣ устрое́ніе и разшире́ніе, Боже́ственными видѣ́ньми, вмѣсти́вся въ сію́ пусты́ню, стяжа́лъ еси́. Боже́ственнымъ же да́ромъ, цѣльбы́ мно́гія творя́, подо́бникъ бы́въ твоему́ Влады́цѣ, о́тче преподо́бне.

Ве́сь Бо́гови освяти́вся, Пе́тре, еди́нъ Еди́ному совокупля́яся, прему́дре, добродѣ́тельми приближа́яся Ему́, мно́гихъ даро́въ отъ Него́ сподобля́емь.

Богоро́диченъ: Бо́га изъ Тебе́ воплоще́ннаго моли́ непреста́нно, Иже въ Тебѣ́ пребы́вша естество́мъ ра́вна Отцу́, и Ду́хови единосу́щна. Тѣ́мъ Тя́, я́ко Ма́терь Содѣ́теля, ублажа́емъ.

Пѣ́снь 5.

Ирмо́съ: Ужасо́шася вся́ческая о Боже́ственнѣй сла́вѣ Твое́й: Ты́ бо, неискусобра́чная Дѣ́во, имѣ́ла еси́ во утро́бѣ надъ всѣ́ми Бо́га, и родила́ еси́ Безлѣ́тнаго Сы́на, всѣ́мъ, воспѣва́ющимъ Тя́, ми́ръ подава́ющая.

Бо́гомъ да́нная ти́ благода́ть, преподо́бне, богодохнове́ннѣ прослу́ся повсю́ду, подая́ исцѣле́нія всѣ́мъ вѣ́рою прося́щимъ: я́вѣ творя́щи чудесе́мъ явле́нія, Боже́ственнымъ дѣ́йствомъ.

Неукло́нною мы́слію къ тебѣ́ Жела́емому простира́яся, отъ Него́же благода́ть чуде́съ пріе́мъ, исцѣле́ніе подава́я неду́гомъ, вѣ́рою притека́ющимъ къ ра́цѣ моще́й твои́хъ, о́тче преподо́бне.

Исцѣле́ній благода́ть тебѣ́ даде́ся разли́чныя прогони́ти неду́ги: естество́ бо побѣди́въ, о́тче, па́че естества́ даро́въ сподо́бися, Ду́ха Боже́ственнаго благода́тію.

Умъ тво́й воззре́ніемъ е́же къ Бо́гу, о́тче, просвѣща́емь, богови́денъ ве́сь бы́лъ еси́, я́коже зерца́ло Боже́ственнаго Ду́ха невеще́ственно, явле́ніе бу́дущихъ бла́гъ пріе́мля.

Богоро́диченъ: Тебе́ стѣ́ну иму́ще, заступле́ніемъ Твои́мъ соблюда́емся, Твое́ю же боже́ственною сла́вою хва́лящеся, Тя́, Дѣ́во, ублажа́емъ.

Пѣ́снь 6.

Ирмо́съ: Боже́ственное сіе́ и всечестно́е соверша́юще пра́зднество, богому́дріи, Богома́тере, пріиди́те, рука́ми воспле́щимъ, отъ Нея́ ро́ждшагося Бо́га сла́вимъ.

Прему́дрости поро́дъ яви́вся, нача́ло прему́дрости возжелѣ́лъ еси́ — стра́хъ Бо́жій, укрѣпля́емь къ соверше́нію вмѣ́стному человѣ́комъ, о́тче, дости́глъ еси́.

Любо́вь къ Бо́гу и бли́жнему стяжа́въ, зако́на и проро́ковъ исполня́я глави́зну, преиму́щую во всѣ́мъ неоску́дно добродѣ́тель, о́тче, испра́вилъ еси́.

Иму́ще тя́ къ Бо́гу моли́твенника крѣ́пка, всеблаже́нне Пе́тре, предста́теля же во вся́кихъ ну́ждахъ и засту́пника те́пла, отъ вся́кихъ бѣ́дъ спасе́мся, приснопа́мятне.

Богоро́диченъ: Спа́са и Изба́вителя, Бо́га всѣ́хъ и Го́спода, Дѣ́во, ро́ждши пло́тію, на́мъ прибли́жшася, спаси́ отъ бѣ́дъ, призыва́ющихъ Тя́, Пречи́стая Влады́чице.

Конда́къ, гла́съ 2:

Удали́въ себе́ человѣ́ческаго сожи́тельства, въ пеще́рахъ ка́менныхъ и разсѣ́линахъ пожи́лъ еси́, жела́ніемъ боже́ственнымъ и любо́вію, Пе́тре, Го́спода твоего́. Отъ Него́же вѣне́цъ прія́лъ еси́, моли́ непреста́нно спасти́ся на́мъ.

Икосъ:

Христо́въ гла́съ улы́шавъ, ше́ствовалъ еси́ вслѣ́дъ Того́ за́повѣдей, отве́ргъ жите́йская попече́нія и пристра́стія мірска́я и, стяжа́въ любо́вь, еди́нъ въ пусты́няхъ бесѣ́дуя Бо́гови чи́стѣ, ра́зума дарова́ніе прія́лъ еси́. Еже ми́ посли́, въ пѣ́снехъ пою́щему ти́: моли́ непреста́нно спасти́ся на́мъ.

Пѣ́снь 7.

Ирмо́съ: Не послужи́ша тва́ри богому́дріи, па́че Созда́вшаго, но, о́гненное преще́ніе му́жески попра́вше, ра́довахуся, пою́ще: препѣ́тый отце́въ Госпо́дь и Бо́гъ, благослове́нъ еси́.

Въ гора́хъ — я́ко во градѣ́хъ, въ де́брѣхъ — я́ко въ до́мѣхъ пребыва́я, сла́дкую пи́щу и питіе́, по́стъ со слеза́ми себѣ́ предлага́я, и ны́нѣ со а́нгелы на небесѣ́хъ вѣ́чныя пи́щи досто́йно, Пе́тре, насыща́ешися.

Нагото́ю, о́тче, удруча́емь, о оде́ждѣ тѣле́снѣй не попе́чся; поуче́ніемъ бо Христа́ твоего́, ра́дуяся, на кри́ны у́мно взира́я, бу́дущихъ добро́тъ оде́жди возжделѣ́лъ еси́, и́хже ны́нѣ пріе́мля, весели́шися.

Хвалы́ тще́тныя бѣ́гая, въ пусты́няхъ кры́яся, Бо́гу еди́ному вѣ́домь, и ны́нѣ я́вственно чуде́съ благода́ть твори́ти, тебѣ́ дарова́лъ е́сть.

Богоро́диченъ: Засту́пницу Тя́ и стѣ́ну необори́мую, Богома́ти Чи́стая, иму́ще раби́ Твои́ всегда́, вѣ́рою вопіе́мъ Ти́: ра́дуйся, Руководи́тельнице вѣ́рныхъ къ Бо́гу и Покро́ве душа́мъ на́шимъ.

Пѣ́снь 8.

Ирмо́съ: Отроки благочести́выя въ пещи́ Рождество́ Богоро́дичо спасло́ е́сть, тогда́ у́бо образу́емое, ны́нѣ же дѣ́йствуемое, вселе́нную всю́ воздвиза́етъ пѣ́ти Тебѣ́: Го́спода по́йте, дѣла́, и превозноси́те Его́ во вся́ вѣ́ки.

На стѣнѣ́ пребы́лъ еси́, псало́мски, я́ко пти́ца осо́бящаяся на здѣ́, ве́сь де́нь поноси́мь враги́ и бори́мь, терпѣ́ніемъ же горды́ню и́хъ низложи́лъ еси́, Христу́ укрѣпля́ющу тя́.

Сла́дость духо́вная, Иже на́съ ра́ди же́лчи вкуси́вый, укрѣпи́ тя́, го́рькая бы́лія, Его́ ра́ди сла́достнѣ я́сти, до́ндеже благода́тію Его́ въ ма́нну претвори́шася.

Пеще́ра твоя́, преподо́бне, Боже́ственная це́рковь устро́ися, мѵроизли́тіемъ ти́ освя́щшіися, ду́ши умаща́ющіи, съ вѣ́рою въ ню́ притека́ющихъ и пою́щихъ свято́е твое́ торжество́, приснопа́мятне.

Богоро́диченъ: Ору́жіе, е́же дре́вле обраща́емо, плещи́ ны́нѣ, Дѣ́во, дае́тъ: я́ко Бо́га Сло́ва родила́ еси́, пло́тію обложе́ннаго, во двою́ же естеству́ разумѣва́ема, Его́же трепе́щутъ а́нгельстіи чи́нове, и земнíи славосло́вимъ во вся́ вѣ́ки.

Пѣ́снь 9.

Ирмо́съ: Вся́къ земноро́дный да взыгра́ется, Ду́хомъ просвѣща́емь, да торжеству́етъ же безпло́тныхъ умо́въ естество́, почита́ющее свяще́нное торжество́ Богома́тере, и да вопіе́тъ: ра́дуйся, Всеблаже́нная Богоро́дице, Чи́стая Приснодѣ́во.

Христо́вы стра́сти помина́я, Пе́тре, крѣ́пко сраспя́лся еси́ Ему́, блаже́нне, тѣ́мже и прича́стникъ Боже́ственныя сла́вы Его́, я́вѣ сподо́бися.

Ели́ко отъ ни́щаго ми́ ума́ посты́жно, хвале́нія пѣ́снь пріими́, преподо́бне, и ми́лость отъ Христа́ испроси́, моля́щися Ему́, въ покая́ніи до́брѣ пожи́ти на́мъ. И та́ко къ себѣ́ оте́чески на́съ пріими́, а́ще и вели́ко е́сть проси́мое.

Наста́ свѣтоно́сный тво́й пра́здникъ, преблаже́нне о́тче, испо́лнь ра́дости и весе́лія духо́внаго, испо́лнь благоуха́нія и свяще́нія, ны́нѣ иму́ще тя́ воздержа́нія пра́вило, и твердотерпѣли́ва стоя́теля, Пе́тре преподо́бне и равноа́нгельне.

Благоуха́етъ твоя́ ра́ка духо́вное благово́ніе, преподо́бне о́тче Пе́тре, бога́тно веселя́щи твоя́ сы́ны; моли́ о пою́щихъ тя́ любо́вію, и помина́ющія, блаже́нне, а́нгельское твое́ пребыва́ніе, и тебѣ́ да́нную свѣ́тлость и сла́ву, и присносу́щную красоту́.

Богоро́диченъ: Яко всѣ́хъ превы́шши земноро́дныхъ несравне́нными, Чи́стая, пе́рвенствы: Бо́га бо, всѣ́хъ тва́рей Творца́, во утро́бу Твою́ вмѣсти́ла еси́. Того́ моли́, я́ко Ми́лостива, единомышле́ніе, ми́ръ и благостоя́ніе ти́хое Це́рквамъ дарова́ти.

Свѣти́ленъ:

Пусты́ню гра́дъ сотвори́лъ еси́ любому́дрыми нра́вы, отце́въ красото́, Пе́тре, о́тче богому́дре, и сію́ соверши́лъ еси́ мы́сленный ра́й, цвѣту́щь цвѣ́ты боже́ственными, единонра́вныхъ мно́жества, досто́йно соверша́ющихъ твою́ честну́ю па́мять. [Два́жды.]

[Сла́ва, и ны́нѣ,] богоро́диченъ:

Яко иму́щи сострада́тельное и ми́лость ве́лію, при́зри, Всепѣ́тая Богоро́дице Дѣ́во, на мое́ смире́ніе, и страсте́й молву́, и собла́зновъ житія́ разори́, Отрокови́це, и огня́ гее́нскаго изба́ви мя́ моли́твами Твои́ми.

На хвалитехъ стихиры на 4, гласъ 1:

Небе́сныхъ бла́гъ возжделѣ́въ,* земна́я усе́рдно вся́ оста́вилъ еси́,* и въ пусты́няхъ, о́тче, водворя́яся,* въ ни́хже а́нгельски пожи́лъ еси́,* отъ ону́дуже къ премíрнымъ востече́,* со а́нгелы ны́нѣ водворя́ешия, ра́дуяся. [Два́жды.]

Бу́дущихъ бла́гъ* тайнозри́тель сы́й,* Свѣ́томъ невеще́ственнымъ просвѣ́щся,* и я́ко со́лнце отъ пусты́ни возсія́лъ еси́,* вѣ́рныхъ се́рдца, о́тче, просвѣща́я* луча́ми боже́ственныхъ ти́ чуде́съ,* и́миже и на́съ ны́нѣ просвѣти́, всеблаже́нне.

Добродѣ́тельми впери́вся къ небесе́мъ,* я́ко безпло́тенъ возлетѣ́лъ еси́,* во Христо́во Ца́рствіе, ра́дуяся, всели́лся еси́,* принося́ Ему́ болѣ́зней свои́хъ рукоя́ти,* возме́здіе пріе́мъ трудо́въ твои́хъ —* весе́ліе непреста́нное.

Сла́ва, гла́съ 8:

Степе́ньми добродѣ́телей къ высотѣ́ взя́тся чу́дне, и кра́йнимъ житія́ воздержа́ніемъ душе́вная чу́вства очи́стивъ, изъ пусты́ни смотря́ Вы́шняго Іерусали́ма красо́ты, и болѣ́зненныхъ подвиго́въ досто́йно по́чести пріе́мъ, съ премíрными ра́дуешися чи́ны, треблаже́нне, вѣ́чныхъ бла́гъ наслажда́яся во Ца́рствіи Христо́вѣ. Но моли́ся, богоно́се Пе́тре достохва́льне, Спа́су всѣ́хъ и Влады́цѣ, ми́ръ, тишину́ и благостоя́ніе оби́тели се́й дарова́ти, и душа́мъ на́шимъ ве́лію ми́лость.

И ны́нѣ, богоро́диченъ, гла́съ то́йже:

Влады́чице, пріими́ моли́твы рабо́въ Твои́хъ и изба́ви на́съ отъ вся́кія ну́жды и печа́ли.

Славосло́віе вели́кое, ектеніи́ и отпу́стъ.



НА ЛИТУРГІИ,

Блаже́нна отъ кано́на преподо́бнаго, пѣ́снь 3 и 6. Проки́менъ, гла́съ 7: Честна́ предъ Го́сподемъ* сме́рть преподо́бныхъ его́. Сти́хъ: Что́ возда́мъ Го́сподеви о всѣ́хъ, я́же воздаде́ ми́? Апо́столъ, къ Кори́нѳяномъ, зача́ло 176. Аллилу́ія, гла́съ 6: Блаже́нъ му́жъ, боя́йся Го́спода, въ за́повѣдехъ Его́ восхо́щетъ зѣло́. Сти́хъ: Си́льно на земли́ бу́детъ сѣ́мя его́. Ева́нгеліе отъ Луки́, зача́ло 77. Прича́стенъ: Въ па́мять вѣ́чную бу́детъ пра́ведникъ, отъ слу́ха зла́ не убои́тся.

Источникъ: Србљак. — Београд: Издаjе Свети Архиjереjски Синод Српске Православне Цркве, 1986. — С. 399-407.

/ Къ оглавленію раздѣла /


Наверхъ / Къ титульной страницѣ

0